੭. ਸਤ੍ਤਕਨਿਪਾਤੋ

੧. ਕੁਕ੍ਕੁਵਗ੍ਗੋ

[੩੯੬] ੧. ਕੁਕ੍ਕੁਜਾਤਕਵਣ੍ਣਨਾ

ਦਿਯਡ੍ਢਕੁਕ੍ਕੂਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਰਾਜੋਵਾਦਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਤੇਸਕੁਣਜਾਤਕੇ (ਜਾ. ੨.੧੭.੧ ਆਦਯੋ) ਆਵਿ ਭਵਿਸ੍ਸਤਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਤਸ੍ਸ ਅਤ੍ਥਧਮ੍ਮਾਨੁਸਾਸਕੋ ਅਮਚ੍ਚੋ ਅਹੋਸਿ. ਰਾਜਾ ਅਗਤਿਗਮਨੇ ਪਤਿਟ੍ਠਾਯ ਅਧਮ੍ਮੇਨ ਰਜ੍ਜਂ ਕਾਰੇਸਿ, ਜਨਪਦਂ ਪੀਲ਼ੇਤ੍ਵਾ ਧਨਮੇਵ ਸਂਹਰਿ. ਬੋਧਿਸਤ੍ਤੋ ਰਾਜਾਨਂ ਓਵਦਿਤੁਕਾਮੋ ਏਕਂ ਉਪਮਂ ਉਪਧਾਰੇਨ੍ਤੋ ਵਿਚਰਤਿ, ਰਞ੍ਞੋ ਉਯ੍ਯਾਨੇ ਵਾਸਾਗਾਰਂ ਵਿਪ੍ਪਕਤਂ ਹੋਤਿ ਅਨਿਟ੍ਠਿਤਚ੍ਛਦਨਂ, ਦਾਰੁਕਣ੍ਣਿਕਂ ਆਰੋਪੇਤ੍ਵਾ ਗੋਪਾਨਸਿਯੋ ਪਵੇਸਿਤਮਤ੍ਤਾ ਹੋਨ੍ਤਿ. ਰਾਜਾ ਕੀਲ਼ਨਤ੍ਥਾਯ ਉਯ੍ਯਾਨਂ ਗਨ੍ਤ੍ਵਾ ਤਤ੍ਥ ਵਿਚਰਿਤ੍ਵਾ ਤਂ ਗੇਹਂ ਪਵਿਸਿਤ੍ਵਾ ਉਲ੍ਲੋਕੇਨ੍ਤੋ ਕਣ੍ਣਿਕਮਣ੍ਡਲਂ ਦਿਸ੍ਵਾ ਅਤ੍ਤਨੋ ਉਪਰਿਪਤਨਭਯੇਨ ਨਿਕ੍ਖਮਿਤ੍ਵਾ ਬਹਿ ਠਿਤੋ ਪੁਨ ਓਲੋਕੇਤ੍ਵਾ ‘‘ਕਿਂ ਨੁ ਖੋ ਨਿਸ੍ਸਾਯ ਕਣ੍ਣਿਕਾ ਠਿਤਾ, ਕਿਂ ਨਿਸ੍ਸਾਯ ਗੋਪਾਨਸਿਯੋ’’ਤਿ ਚਿਨ੍ਤੇਤ੍ਵਾ ਬੋਧਿਸਤ੍ਤਂ ਪੁਚ੍ਛਨ੍ਤੋ ਪਠਮਂ ਗਾਥਮਾਹ –

੧. ‘‘ਦਿਯਡ੍ਢਕੁਕ੍ਕੂ ਉਦਯੇਨ ਕਣ੍ਣਿਕਾ, ਵਿਦਤ੍ਥਿਯੋ ਅਟ੍ਠ ਪਰਿਕ੍ਖਿਪਨ੍ਤਿ ਨਂ;

ਸਾ ਸਿਂਸਪਾ, ਸਾਰਮਯਾ ਅਫੇਗ੍ਗੁਕਾ, ਕੁਹਿਂ ਠਿਤਾ ਉਪ੍ਪਰਿਤੋ ਨ ਧਂਸਤੀ’’ਤਿ.

ਤਤ੍ਥ ਦਿਯਡ੍ਢਕੁਕ੍ਕੂਤਿ ਦਿਯਡ੍ਢਰਤਨਾ. ਉਦਯੇਨਾਤਿ ਉਚ੍ਚਤ੍ਤੇਨ. ਪਰਿਕ੍ਖਿਪਨ੍ਤਿ ਨਨ੍ਤਿ ਤਂ ਪਨੇਤਂ ਅਟ੍ਠ ਵਿਦਤ੍ਥਿਯੋ ਪਰਿਕ੍ਖਿਪਨ੍ਤਿ, ਪਰਿਕ੍ਖੇਪਤੋ ਅਟ੍ਠਵਿਦਤ੍ਥਿਪਮਾਣਾਤਿ ਵੁਤ੍ਤਂ ਹੋਤਿ. ਕੁਹਿਂ ਠਿਤਾਤਿ ਕਤ੍ਥ ਪਤਿਟ੍ਠਿਤਾ ਹੁਤ੍ਵਾ. ਨ ਧਂਸਤੀਤਿ ਨ ਪਤਤਿ.

ਤਂ ਸੁਤ੍ਵਾ ਬੋਧਿਸਤ੍ਤੋ ‘‘ਲਦ੍ਧਾ ਦਾਨਿ ਮੇ ਰਞ੍ਞੋ ਓਵਾਦਤ੍ਥਾਯ ਉਪਮਾ’’ਤਿ ਚਿਨ੍ਤੇਤ੍ਵਾ ਇਮਾ ਗਾਥਾ ਆਹ –

੨. ‘‘ਯਾ ਤਿਂਸਤਿ ਸਾਰਮਯਾ ਅਨੁਜ੍ਜੁਕਾ, ਪਰਿਕਿਰਿਯ ਗੋਪਾਨਸਿਯੋ ਸਮਂ ਠਿਤਾ;

ਤਾਹਿ ਸੁਸਙ੍ਗਹਿਤਾ ਬਲਸਾ ਪੀਲ਼ਿਤਾ, ਸਮਂ ਠਿਤਾ ਉਪ੍ਪਰਿਤੋ ਨ ਧਂਸਤਿ.

੩. ‘‘ਏਵਮ੍ਪਿ ਮਿਤ੍ਤੇਹਿ ਦਲ਼੍ਹੇਹਿ ਪਣ੍ਡਿਤੋ, ਅਭੇਜ੍ਜਰੂਪੇਹਿ ਸੁਚੀਹਿ ਮਨ੍ਤਿਭਿ;

ਸੁਸਙ੍ਗਹੀਤੋ ਸਿਰਿਯਾ ਨ ਧਂਸਤਿ, ਗੋਪਾਨਸੀਭਾਰਵਹਾਵ ਕਣ੍ਣਿਕਾ’’ਤਿ.

ਤਤ੍ਥ ਯਾ ਤਿਂਸਤਿ ਸਾਰਮਯਾਤਿ ਯਾ ਏਤਾ ਸਾਰਰੁਕ੍ਖਮਯਾ ਤਿਂਸਤਿ ਗੋਪਾਨਸਿਯੋ. ਪਰਿਕਿਰਿਯਾਤਿ ਪਰਿਵਾਰੇਤ੍ਵਾ. ਸਮਂ ਠਿਤਾਤਿ ਸਮਭਾਗੇਨ ਠਿਤਾ. ਬਲਸਾ ਪੀਲ਼ਿਤਾਤਿ ਤਾਹਿ ਤਾਹਿ ਗੋਪਾਨਸੀਹਿ ਬਲੇਨ ਪੀਲ਼ਿਤਾ ਸੁਟ੍ਠੁ ਸਙ੍ਗਹਿਤਾ ਏਕਾਬਦ੍ਧਾ ਹੁਤ੍ਵਾ. ਪਣ੍ਡਿਤੋਤਿ ਞਾਣਸਮ੍ਪਨ੍ਨੋ ਰਾਜਾ. ਸੁਚੀਹੀਤਿ ਸੁਚਿਸਮਾਚਾਰੇਹਿ ਕਲ੍ਯਾਣਮਿਤ੍ਤੇਹਿ. ਮਨ੍ਤਿਭੀਤਿ ਮਨ੍ਤਕੁਸਲੇਹਿ. ਗੋਪਾਨਸੀਭਾਰਵਹਾਵ ਕਣ੍ਣਿਕਾਤਿ ਯਥਾ ਗੋਪਾਨਸੀਨਂ ਭਾਰਂ ਵਹਮਾਨਾ ਕਣ੍ਣਿਕਾ ਨ ਧਂਸਤਿ ਨ ਪਤਤਿ, ਏਵਂ ਰਾਜਾਪਿ ਵੁਤ੍ਤਪ੍ਪਕਾਰੇਹਿ ਮਨ੍ਤੀਹਿ ਅਭਿਜ੍ਜਹਦਯੇਹਿ ਸੁਸਙ੍ਗਹਿਤੋ ਸਿਰਿਤੋ ਨ ਧਂਸਤਿ ਨ ਪਤਤਿ ਨ ਪਰਿਹਾਯਤਿ.

ਰਾਜਾ ਬੋਧਿਸਤ੍ਤੇ ਕਥੇਨ੍ਤੇਯੇਵ ਅਤ੍ਤਨੋ ਕਿਰਿਯਂ ਸਲ੍ਲਕ੍ਖੇਤ੍ਵਾ ਕਣ੍ਣਿਕਾਯ ਅਸਤਿ ਗੋਪਾਨਸਿਯੋ ਨ ਤਿਟ੍ਠਨ੍ਤਿ, ਗੋਪਾਨਸੀਹਿ ਅਸਙ੍ਗਹਿਤਾ ਕਣ੍ਣਿਕਾ ਨ ਤਿਟ੍ਠਤਿ, ਗੋਪਾਨਸੀਸੁ ਭਿਜ੍ਜਨ੍ਤੀਸੁ ਕਣ੍ਣਿਕਾ ਪਤਤਿ, ਏਵਮੇਵ ਅਧਮ੍ਮਿਕੋ ਰਾਜਾ ਅਤ੍ਤਨੋ ਮਿਤ੍ਤਾਮਚ੍ਚੇ ਚ ਬਲਕਾਯੇ ਚ ਬ੍ਰਾਹ੍ਮਣਗਹਪਤਿਕੇ ਚ ਅਸਙ੍ਗਣ੍ਹਨ੍ਤੋ ਤੇਸੁ ਭਿਜ੍ਜਨ੍ਤੇਸੁ ਤੇਹਿ ਅਸਙ੍ਗਹਿਤੋ ਇਸ੍ਸਰਿਯਾ ਧਂਸਤਿ, ਰਞ੍ਞਾ ਨਾਮ ਧਮ੍ਮਿਕੇਨ ਭਵਿਤਬ੍ਬਨ੍ਤਿ. ਅਥਸ੍ਸ ਤਸ੍ਮਿਂ ਖਣੇ ਪਣ੍ਣਾਕਾਰਤ੍ਥਾਯ ਮਾਤੁਲੁਙ੍ਗਂ ਆਹਰਿਂਸੁ. ਰਾਜਾ ‘‘ਸਹਾਯ, ਇਮਂ ਮਾਤੁਲੁਙ੍ਗਂ ਖਾਦਾ’’ਤਿ ਬੋਧਿਸਤ੍ਤਂ ਆਹ. ਬੋਧਿਸਤ੍ਤੋ ਤਂ ਗਹੇਤ੍ਵਾ ‘‘ਮਹਾਰਾਜ, ਇਮਂ ਖਾਦਿਤੁਂ ਅਜਾਨਨ੍ਤਾ ਤਿਤ੍ਤਕਂ ਵਾ ਕਰੋਨ੍ਤਿ ਅਮ੍ਬਿਲਂ ਵਾ, ਜਾਨਨ੍ਤਾ ਪਨ ਪਣ੍ਡਿਤਾ ਤਿਤ੍ਤਕਂ ਹਾਰੇਤ੍ਵਾ ਅਮ੍ਬਿਲਂ ਅਨੀਹਰਿਤ੍ਵਾ ਮਾਤੁਲੁਙ੍ਗਰਸਂ ਅਨਾਸੇਤ੍ਵਾਵ ਖਾਦਨ੍ਤੀ’’ਤਿ ਰਞ੍ਞੋ ਇਮਾਯ ਉਪਮਾਯ ਧਨਸਙ੍ਘਰਣੂਪਾਯਂ ਦਸ੍ਸੇਨ੍ਤੋ ਦ੍ਵੇ ਗਾਥਾ ਅਭਾਸਿ –

੪. ‘‘ਖਰਤ੍ਤਚਂ ਬੇਲ੍ਲਂ ਯਥਾਪਿ ਸਤ੍ਥਵਾ, ਅਨਾਮਸਨ੍ਤੋਪਿ ਕਰੋਤਿ ਤਿਤ੍ਤਕਂ;

ਸਮਾਹਰਂ ਸਾਦੁਂ ਕਰੋਤਿ ਪਤ੍ਥਿਵ, ਅਸਾਦੁਂ ਕਯਿਰਾ ਤਨੁਬਨ੍ਧਮੁਦ੍ਧਰਂ.

੫. ‘‘ਏਵਮ੍ਪਿ ਗਾਮਨਿਗਮੇਸੁ ਪਣ੍ਡਿਤੋ, ਅਸਾਹਸਂ ਰਾਜਧਨਾਨਿ ਸਙ੍ਘਰਂ;

ਧਮ੍ਮਾਨੁਵਤ੍ਤੀ ਪਟਿਪਜ੍ਜਮਾਨੋ, ਸ ਫਾਤਿ ਕਯਿਰਾ ਅਵਿਹੇਠਯਂ ਪਰ’’ਨ੍ਤਿ.

ਤਤ੍ਥ ਖਰਤ੍ਤਚਨ੍ਤਿ ਥਦ੍ਧਤਚਂ. ਬੇਲ੍ਲਨ੍ਤਿ ਮਾਤੁਲੁਙ੍ਗਂ. ‘ਬੇਲ’’ਨ੍ਤਿਪਿ ਪਾਠੋ, ਅਯਮੇਵਤ੍ਥੋ. ਸਤ੍ਥਵਾਤਿ ਸਤ੍ਥਕਹਤ੍ਥੋ. ਅਨਾਮਸਨ੍ਤੋਤਿ ਬਹਿਤਚਂ ਤਨੁਕਮ੍ਪਿ ਅਤਚ੍ਛਨ੍ਤੋ ਇਦਂ ਫਲਂ ਤਿਤ੍ਤਕਂ ਕਰੋਤਿ. ਸਮਾਹਰਨ੍ਤਿ ਸਮਾਹਰਨ੍ਤੋ ਬਹਿਤਚਂ ਤਚ੍ਛਨ੍ਤੋ ਅਨ੍ਤੋ ਚ ਅਮ੍ਬਿਲਂ ਅਨੀਹਰਨ੍ਤੋ ਤਂ ਸਾਦੁਂ ਕਰੋਤਿ. ਪਤ੍ਥਿਵਾਤਿ ਰਾਜਾਨਂ ਆਲਪਤਿ. ਤਨੁਬਨ੍ਧਮੁਦ੍ਧਰਨ੍ਤਿ ਤਨੁਕਂ ਪਨ ਤਚਂ ਉਦ੍ਧਰਨ੍ਤੋ ਸਬ੍ਬਸੋ ਤਿਤ੍ਤਕਸ੍ਸ ਅਨਪਨੀਤਤ੍ਤਾ ਤਂ ਅਸਾਦੁਮੇਵ ਕਯਿਰਾ. ਏਵਨ੍ਤਿ ਏਵਂ ਪਣ੍ਡਿਤੋ ਰਾਜਾਪਿ ਅਸਾਹਸਂ ਸਾਹਸਿਯਾ ਤਣ੍ਹਾਯ ਵਸਂ ਅਗਚ੍ਛਨ੍ਤੋ ਅਗਤਿਗਮਨਂ ਪਹਾਯ ਰਟ੍ਠਂ ਅਪੀਲ਼ੇਤ੍ਵਾ ਉਪਚਿਕਾਨਂ ਵਮ੍ਮਿਕਵਡ੍ਢਨਨਿਯਾਮੇਨ ਮਧੁਕਰਾਨਂ ਰੇਣੁਂ ਗਹੇਤ੍ਵਾ ਮਧੁਕਰਣਨਿਯਾਮੇਨ ਚ ਧਨਂ ਸਙ੍ਘਰਨ੍ਤੋ –

‘‘ਦਾਨਂ ਸੀਲਂ ਪਰਿਚ੍ਚਾਗਂ, ਅਜ੍ਜਵਂ ਮਦ੍ਦਵਂ ਤਪਂ;

ਅਕ੍ਕੋਧਂ ਅਵਿਹਿਂਸਞ੍ਚ, ਖਨ੍ਤਿਞ੍ਚ ਅਵਿਰੋਧਨ’’ਨ੍ਤਿ. –

ਇਤਿ ਇਮੇਸਂ ਦਸਨ੍ਨਂ ਰਾਜਧਮ੍ਮਾਨਂ ਅਨੁਵਤ੍ਤਨੇਨ ਧਮ੍ਮਾਨੁਵਤ੍ਤੀ ਹੁਤ੍ਵਾ ਪਟਿਪਜ੍ਜਮਾਨੋ ਸੋ ਅਤ੍ਤਨੋ ਚ ਪਰੇਸਞ੍ਚ ਫਾਤਿਂ ਵਡ੍ਢਿਂ ਕਰੇਯ੍ਯ ਪਰਂ ਅਵਿਹੇਠੇਨ੍ਤੋਯੇਵਾਤਿ.

ਰਾਜਾ ਬੋਧਿਸਤ੍ਤੇਨ ਸਦ੍ਧਿਂ ਮਨ੍ਤੇਨ੍ਤੋ ਪੋਕ੍ਖਰਣੀਤੀਰਂ ਗਨ੍ਤ੍ਵਾ ਸੁਪੁਪ੍ਫਿਤਂ ਬਾਲਸੂਰਿਯਵਣ੍ਣਂ ਉਦਕੇਨ ਅਨੁਪਲਿਤ੍ਤਂ ਪਦੁਮਂ ਦਿਸ੍ਵਾ ਆਹ – ‘‘ਸਹਾਯ, ਇਮਂ ਪਦੁਮਂ ਉਦਕੇ ਸਞ੍ਜਾਤਮੇਵ ਉਦਕੇਨ ਅਲਿਮ੍ਪਮਾਨਂ ਠਿਤ’’ਨ੍ਤਿ. ਅਥ ਨਂ ਬੋਧਿਸਤ੍ਤੋ ‘‘ਮਹਾਰਾਜ, ਰਞ੍ਞਾ ਨਾਮ ਏਵਰੂਪੇਨ ਭਵਿਤਬ੍ਬ’’ਨ੍ਤਿ ਓਵਦਨ੍ਤੋ ਇਮਾ ਗਾਥਾ ਆਹ –

੬. ‘‘ਓਦਾਤਮੂਲਂ ਸੁਚਿਵਾਰਿਸਮ੍ਭਵਂ, ਜਾਤਂ ਯਥਾ ਪੋਕ੍ਖਰਣੀਸੁ ਅਮ੍ਬੁਜਂ;

ਪਦੁਮਂ ਯਥਾ ਅਗ੍ਗਿਨਿਕਾਸਿਫਾਲਿਮਂ, ਨ ਕਦ੍ਦਮੋ ਨ ਰਜੋ ਨ ਵਾਰਿ ਲਿਮ੍ਪਤਿ.

੭. ‘‘ਏਵਮ੍ਪਿ ਵੋਹਾਰਸੁਚਿਂ ਅਸਾਹਸਂ, ਵਿਸੁਦ੍ਧਕਮ੍ਮਨ੍ਤਮਪੇਤਪਾਪਕਂ;

ਨ ਲਿਮ੍ਪਤਿ ਕਮ੍ਮਕਿਲੇਸ ਤਾਦਿਸੋ, ਜਾਤਂ ਯਥਾ ਪੋਕ੍ਖਰਣੀਸੁ ਅਮ੍ਬੁਜ’’ਨ੍ਤਿ.

ਤਤ੍ਥ ਓਦਾਤਮੂਲਨ੍ਤਿ ਪਣ੍ਡਰਮੂਲਂ. ਅਮ੍ਬੁਜਨ੍ਤਿ ਪਦੁਮਸ੍ਸੇਵ ਵੇਵਚਨਂ. ਅਗ੍ਗਿਨਿਕਾਸਿਫਾਲਿਮਨ੍ਤਿ ਅਗ੍ਗਿਨਿਕਾਸਿਨਾ ਸੂਰਿਯੇਨ ਫਾਲਿਤਂ ਵਿਕਸਿਤਨ੍ਤਿ ਅਤ੍ਥੋ. ਨ ਕਦ੍ਦਮੋ ਨ ਰਜੋ ਨ ਵਾਰਿ ਲਿਮ੍ਪਤੀਤਿ ਨੇਵ ਕਦ੍ਦਮੋ ਨ ਰਜੋ ਨ ਉਦਕਂ ਲਿਮ੍ਪਤਿ, ਨ ਮਕ੍ਖੇਤੀਤਿ ਅਤ੍ਥੋ. ‘‘ਲਿਪ੍ਪਤਿ’’ਚ੍ਚੇਵ ਵਾ ਪਾਠੋ, ਭੁਮ੍ਮਤ੍ਥੇ ਵਾ ਏਤਾਨਿ ਪਚ੍ਚਤ੍ਤਵਚਨਾਨਿ, ਏਤੇਸੁ ਕਦ੍ਦਮਾਦੀਸੁ ਨ ਲਿਪ੍ਪਤਿ, ਨ ਅਲ੍ਲੀਯਤੀਤਿ ਅਤ੍ਥੋ. ਵੋਹਾਰਸੁਚਿਨ੍ਤਿ ਪੋਰਾਣਕੇਹਿ ਧਮ੍ਮਿਕਰਾਜੂਹਿ ਲਿਖਾਪੇਤ੍ਵਾ ਠਪਿਤਵਿਨਿਚ੍ਛਯਵੋਹਾਰੇ ਸੁਚਿਂ, ਅਗਤਿਗਮਨਂ ਪਹਾਯ ਧਮ੍ਮੇਨ ਵਿਨਿਚ੍ਛਯਕਾਰਕਨ੍ਤਿ ਅਤ੍ਥੋ. ਅਸਾਹਸਨ੍ਤਿ ਧਮ੍ਮਿਕਵਿਨਿਚ੍ਛਯੇ ਠਿਤਤ੍ਤਾਯੇਵ ਸਾਹਸਿਕਕਿਰਿਯਾਯ ਵਿਰਹਿਤਂ. ਵਿਸੁਦ੍ਧਕਮ੍ਮਨ੍ਤਨ੍ਤਿ ਤੇਨੇਵ ਅਸਾਹਸਿਕਟ੍ਠੇਨ ਵਿਸੁਦ੍ਧਕਮ੍ਮਨ੍ਤਂ ਸਚ੍ਚਵਾਦਿਂ ਨਿਕ੍ਕੋਧਂ ਮਜ੍ਝਤ੍ਤਂ ਤੁਲਾਭੂਤਂ ਲੋਕਸ੍ਸ. ਅਪੇਤਪਾਪਕਨ੍ਤਿ ਅਪਗਤਪਾਪਕਮ੍ਮਂ. ਨ ਲਿਮ੍ਪਤਿ ਕਮ੍ਮਕਿਲੇਸ ਤਾਦਿਸੋਤਿ ਤਂ ਰਾਜਾਨਂ ਪਾਣਾਤਿਪਾਤੋ ਅਦਿਨ੍ਨਾਦਾਨਂ ਕਾਮੇਸੁਮਿਚ੍ਛਾਚਾਰੋ ਮੁਸਾਵਾਦੋਤਿ ਅਯਂ ਕਮ੍ਮਕਿਲੇਸੋ ਨ ਅਲ੍ਲੀਯਤਿ. ਕਿਂਕਾਰਣਾ? ਤਾਦਿਸੋ ਜਾਤਂ ਯਥਾ ਪੋਕ੍ਖਰਣੀਸੁ ਅਮ੍ਬੁਜਂ. ਤਾਦਿਸੋ ਹਿ ਰਾਜਾ ਯਥਾ ਪੋਕ੍ਖਰਣੀਸੁ ਜਾਤਂ ਪਦੁਮਂ ਅਨੁਪਲਿਤ੍ਤਂ, ਏਵਂ ਅਨੁਪਲਿਤ੍ਤੋ ਨਾਮ ਹੋਤਿ.

ਰਾਜਾ ਬੋਧਿਸਤ੍ਤਸ੍ਸ ਓਵਾਦਂ ਸੁਤ੍ਵਾ ਤਤੋ ਪਟ੍ਠਾਯ ਧਮ੍ਮੇਨ ਰਜ੍ਜਂ ਕਾਰੇਨ੍ਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਰਾਜਾ ਆਨਨ੍ਦੋ ਅਹੋਸਿ, ਪਣ੍ਡਿਤਾਮਚ੍ਚੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕੁਕ੍ਕੁਜਾਤਕਵਣ੍ਣਨਾ ਪਠਮਾ.

[੩੯੭] ੨. ਮਨੋਜਜਾਤਕਵਣ੍ਣਨਾ

ਯਥਾ ਚਾਪੋ ਨਿਨ੍ਨਮਤੀਤਿ ਇਦਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਵਿਪਕ੍ਖਸੇਵਕਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਪਨ ਹੇਟ੍ਠਾ ਮਹਿਲ਼ਾਮੁਖਜਾਤਕੇ (ਜਾ. ੧.੧.੨੬) ਵਿਤ੍ਥਾਰਿਤਮੇਵ. ਤਦਾ ਪਨ ਸਤ੍ਥਾ ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪੇਸ ਵਿਪਕ੍ਖਸੇਵਕੋਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਸੀਹੋ ਹੁਤ੍ਵਾ ਸੀਹਿਯਾ ਸਦ੍ਧਿਂ ਸਂਵਸਨ੍ਤੋ ਦ੍ਵੇ ਪੋਤਕੇ ਲਭਿ – ਪੁਤ੍ਤਞ੍ਚ ਧੀਤਰਞ੍ਚ. ਪੁਤ੍ਤਸ੍ਸ ਮਨੋਜੋਤਿ ਨਾਮਂ ਅਹੋਸਿ, ਸੋ ਵਯਪ੍ਪਤ੍ਤੋ ਏਕਂ ਸੀਹਪੋਤਿਕਂ ਗਣ੍ਹਿ. ਇਤਿ ਤੇ ਪਞ੍ਚ ਜਨਾ ਅਹੇਸੁਂ. ਮਨੋਜੋ ਵਨਮਹਿਂਸਾਦਯੋ ਵਧਿਤ੍ਵਾ ਮਂਸਂ ਆਹਰਿਤ੍ਵਾ ਮਾਤਾਪਿਤਰੋ ਚ ਭਗਿਨਿਞ੍ਚ ਪਜਾਪਤਿਞ੍ਚ ਪੋਸੇਤਿ. ਸੋ ਏਕਦਿਵਸਂ ਗੋਚਰਭੂਮਿਯਂ ਗਿਰਿਯਂ ਨਾਮ ਸਿਙ੍ਗਾਲਂ ਪਲਾਯਿਤੁਂ ਅਪ੍ਪਹੋਨ੍ਤਂ ਉਰੇਨ ਨਿਪਨ੍ਨਂ ਦਿਸ੍ਵਾ ‘‘ਕਿਂ, ਸਮ੍ਮਾ’’ਤਿ ਪੁਚ੍ਛਿਤ੍ਵਾ ‘‘ਉਪਟ੍ਠਾਤੁਕਾਮੋਮ੍ਹਿ, ਸਾਮੀ’’ਤਿ ਵੁਤ੍ਤੇ ‘‘ਸਾਧੁ, ਉਪਟ੍ਠਹਸ੍ਸੂ’’ਤਿ ਤਂ ਗਹੇਤ੍ਵਾ ਅਤ੍ਤਨੋ ਵਸਨਗੁਹਂ ਆਨੇਸਿ. ਬੋਧਿਸਤ੍ਤੋ ਤਂ ਦਿਸ੍ਵਾ ‘‘ਤਾਤ ਮਨੋਜ, ਸਿਙ੍ਗਾਲਾ ਨਾਮ ਦੁਸ੍ਸੀਲਾ ਪਾਪਧਮ੍ਮਾ ਅਕਿਚ੍ਚੇ ਨਿਯੋਜੇਨ੍ਤਿ, ਮਾ ਏਤਂ ਅਤ੍ਤਨੋ ਸਨ੍ਤਿਕੇ ਕਰੀ’’ਤਿ ਵਾਰੇਤੁਂ ਨਾਸਕ੍ਖਿ.

ਅਥੇਕਦਿਵਸਂ ਸਿਙ੍ਗਾਲੋ ਅਸ੍ਸਮਂਸਂ ਖਾਦਿਤੁਕਾਮੋ ਮਨੋਜਂ ਆਹ – ‘‘ਸਾਮਿ, ਅਮ੍ਹੇਹਿ ਠਪੇਤ੍ਵਾ ਅਸ੍ਸਮਂਸਂ ਅਞ੍ਞਂ ਅਖਾਦਿਤਪੁਬ੍ਬਂ ਨਾਮ ਨਤ੍ਥਿ, ਅਸ੍ਸਂ ਗਣ੍ਹਿਸ੍ਸਾਮਾ’’ਤਿ. ‘‘ਕਹਂ ਪਨ, ਸਮ੍ਮ, ਅਸ੍ਸਾ ਹੋਨ੍ਤੀ’’ਤਿ? ‘‘ਬਾਰਾਣਸਿਯਂ ਨਦੀਤੀਰੇ’’ਤਿ. ਸੋ ਤਸ੍ਸ ਵਚਨਂ ਗਹੇਤ੍ਵਾ ਤੇਨ ਸਦ੍ਧਿਂ ਅਸ੍ਸਾਨਂ ਨਦਿਯਾ ਨ੍ਹਾਨਵੇਲਾਯਂ ਗਨ੍ਤ੍ਵਾ ਏਕਂ ਅਸ੍ਸਂ ਗਹੇਤ੍ਵਾ ਪਿਟ੍ਠਿਯਂ ਆਰੋਪੇਤ੍ਵਾ ਵੇਗੇਨ ਅਤ੍ਤਨੋ ਗੁਹਾਦ੍ਵਾਰਮੇਵ ਆਗਤੋ. ਅਥਸ੍ਸ ਪਿਤਾ ਅਸ੍ਸਮਂਸਂ ਖਾਦਿਤ੍ਵਾ ‘‘ਤਾਤ, ਅਸ੍ਸਾ ਨਾਮ ਰਾਜਭੋਗਾ, ਰਾਜਾਨੋ ਚ ਨਾਮ ਅਨੇਕਮਾਯਾ ਕੁਸਲੇਹਿ ਧਨੁਗ੍ਗਹੇਹਿ ਵਿਜ੍ਝਾਪੇਨ੍ਤਿ, ਅਸ੍ਸਮਂਸਖਾਦਨਸੀਹਾ ਨਾਮ ਦੀਘਾਯੁਕਾ ਨ ਹੋਨ੍ਤਿ, ਇਤੋ ਪਟ੍ਠਾਯ ਮਾ ਅਸ੍ਸਂ ਗਣ੍ਹੀ’’ਤਿ ਆਹ. ਸੋ ਪਿਤੁ ਵਚਨਂ ਅਕਤ੍ਵਾ ਗਣ੍ਹਤੇਵ. ‘‘ਸੀਹੋ ਅਸ੍ਸੇ ਗਣ੍ਹਾਤੀ’’ਤਿ ਸੁਤ੍ਵਾ ਰਾਜਾ ਅਨ੍ਤੋਨਗਰੇਯੇਵ ਅਸ੍ਸਾਨਂ ਪੋਕ੍ਖਰਣਿਂ ਕਾਰਾਪੇਸਿ. ਤਤੋਪਿ ਆਗਨ੍ਤ੍ਵਾ ਗਣ੍ਹਿਯੇਵ. ਰਾਜਾ ਅਸ੍ਸਸਾਲਂ ਕਾਰੇਤ੍ਵਾ ਅਨ੍ਤੋਸਾਲਾਯਮੇਵ ਤਿਣੋਦਕਂ ਦਾਪੇਸਿ. ਸੀਹੋ ਪਾਕਾਰਮਤ੍ਥਕੇਨ ਗਨ੍ਤ੍ਵਾ ਅਨ੍ਤੋਸਾਲਾਤੋਪਿ ਗਣ੍ਹਿਯੇਵ.

ਰਾਜਾ ਏਕਂ ਅਕ੍ਖਣਵੇਧਿਂ ਧਨੁਗ੍ਗਹਂ ਪਕ੍ਕੋਸਾਪੇਤ੍ਵਾ ‘‘ਸਕ੍ਖਿਸ੍ਸਸਿ ਤਾਤ, ਸੀਹਂ ਵਿਜ੍ਝਿਤੁ’’ਨ੍ਤਿ ਆਹ. ਸੋ ‘‘ਸਕ੍ਕੋਮੀ’’ਤਿ ਵਤ੍ਵਾ ਪਾਕਾਰਂ ਨਿਸ੍ਸਾਯ ਸੀਹਸ੍ਸ ਆਗਮਨਮਗ੍ਗੇ ਅਟ੍ਟਕਂ ਕਾਰੇਤ੍ਵਾ ਅਟ੍ਠਾਸਿ. ਸੀਹੋ ਆਗਨ੍ਤ੍ਵਾ ਬਹਿਸੁਸਾਨੇ ਸਿਙ੍ਗਾਲਂ ਠਪੇਤ੍ਵਾ ਅਸ੍ਸਗਹਣਤ੍ਥਾਯ ਨਗਰਂ ਪਕ੍ਖਨ੍ਦਿ. ਧਨੁਗ੍ਗਹੋ ਆਗਮਨਕਾਲੇ ‘‘ਅਤਿਤਿਖਿਣੋ ਵੇਗੋ’’ਤਿ ਸੀਹਂ ਅਵਿਜ੍ਝਿਤ੍ਵਾ ਅਸ੍ਸਂ ਗਹੇਤ੍ਵਾ ਗਮਨਕਾਲੇ ਗਰੁਭਾਰਤਾਯ ਓਲੀਨਵੇਗਂ ਸੀਹਂ ਤਿਖਿਣੇਨ ਨਾਰਾਚੇਨ ਪਚ੍ਛਾਭਾਗੇ ਵਿਜ੍ਝਿ. ਨਾਰਾਚੋ ਪੁਰਿਮਕਾਯੇਨ ਨਿਕ੍ਖਮਿਤ੍ਵਾ ਆਕਾਸਂ ਪਕ੍ਖਨ੍ਦਿ. ਸੀਹੋ ‘‘ਵਿਦ੍ਧੋਸ੍ਮੀ’’ਤਿ ਵਿਰਵਿ. ਧਨੁਗ੍ਗਹੋ ਤਂ ਵਿਜ੍ਝਿਤ੍ਵਾ ਅਸਨਿ ਵਿਯ ਜਿਯਂ ਪੋਥੇਸਿ. ਸਿਙ੍ਗਾਲੋ ਸੀਹਸ੍ਸ ਚ ਜਿਯਾਯ ਚ ਸਦ੍ਦਂ ਸੁਤ੍ਵਾ ‘‘ਸਹਾਯੋ ਮੇ ਧਨੁਗ੍ਗਹੇਨ ਵਿਜ੍ਝਿਤ੍ਵਾ ਮਾਰਿਤੋ ਭਵਿਸ੍ਸਤਿ, ਮਤਕੇਨ ਹਿ ਸਦ੍ਧਿਂ ਵਿਸ੍ਸਾਸੋ ਨਾਮ ਨਤ੍ਥਿ, ਇਦਾਨਿ ਮਮ ਪਕਤਿਯਾ ਵਸਨਵਨਮੇਵ ਗਮਿਸ੍ਸਾਮੀ’’ਤਿ ਅਤ੍ਤਨਾਵ ਸਦ੍ਧਿਂ ਸਲ੍ਲਪਨ੍ਤੋ ਦ੍ਵੇ ਗਾਥਾ ਅਭਾਸਿ –

੮. ‘‘ਯਥਾ ਚਾਪੋ ਨਿਨ੍ਨਮਤਿ, ਜਿਯਾ ਚਾਪਿ ਨਿਕੂਜਤਿ;

ਹਞ੍ਞਤੇ ਨੂਨ ਮਨੋਜੋ, ਮਿਗਰਾਜਾ ਸਖਾ ਮਮ.

੯. ‘‘ਹਨ੍ਦ ਦਾਨਿ ਵਨਨ੍ਤਾਨਿ, ਪਕ੍ਕਮਾਮਿ ਯਥਾਸੁਖਂ;

ਨੇਤਾਦਿਸਾ ਸਖਾ ਹੋਨ੍ਤਿ, ਲਬ੍ਭਾ ਮੇ ਜੀਵਤੋ ਸਖਾ’’ਤਿ.

ਤਤ੍ਥ ਯਥਾਤਿ ਯੇਨਾਕਾਰੇਨੇਵ ਚਾਪੋ ਨਿਨ੍ਨਮਤਿ. ਹਞ੍ਞਤੇ ਨੂਨਾਤਿ ਨੂਨ ਹਞ੍ਞਤਿ. ਨੇਤਾਦਿਸਾਤਿ ਏਵਰੂਪਾ ਮਤਕਾ ਸਹਾਯਾ ਨਾਮ ਨ ਹੋਨ੍ਤਿ. ਲਬ੍ਭਾ ਮੇਤਿ ਜੀਵਤੋ ਮਮ ਸਹਾਯੋ ਨਾਮ ਸਕ੍ਕਾ ਲਦ੍ਧੁਂ.

ਸੀਹੋਪਿ ਏਕਵੇਗੇਨ ਗਨ੍ਤ੍ਵਾ ਅਸ੍ਸਂ ਗੁਹਾਦ੍ਵਾਰੇ ਪਾਤੇਤ੍ਵਾ ਸਯਮ੍ਪਿ ਮਰਿਤ੍ਵਾ ਪਤਿ. ਅਥਸ੍ਸ ਞਾਤਕਾ ਨਿਕ੍ਖਮਿਤ੍ਵਾ ਤਂ ਲੋਹਿਤਮਕ੍ਖਿਤਂ ਪਹਾਰਮੁਖੇਹਿ ਪਗ੍ਘਰਿਤਲੋਹਿਤਂ ਪਾਪਜਨਸੇਵਿਤਾਯ ਜੀਵਿਤਕ੍ਖਯਂ ਪਤ੍ਤਂ ਅਦ੍ਦਸਂਸੁ, ਦਿਸ੍ਵਾ ਚਸ੍ਸ ਮਾਤਾ ਪਿਤਾ ਭਗਿਨੀ ਪਜਾਪਤੀਤਿ ਪਟਿਪਾਟਿਯਾ ਚਤਸ੍ਸੋ ਗਾਥਾ ਭਾਸਿਂਸੁ –

੧੦. ‘‘ਨ ਪਾਪਜਨਸਂਸੇਵੀ, ਅਚ੍ਚਨ੍ਤਂ ਸੁਖਮੇਧਤਿ;

ਮਨੋਜਂ ਪਸ੍ਸ ਸੇਮਾਨਂ, ਗਿਰਿਯਸ੍ਸਾਨੁਸਾਸਨੀ.

੧੧. ‘‘ਨ ਪਾਪਸਮ੍ਪਵਙ੍ਕੇਨ, ਮਾਤਾ ਪੁਤ੍ਤੇਨ ਨਨ੍ਦਤਿ;

ਮਨੋਜਂ ਪਸ੍ਸ ਸੇਮਾਨਂ, ਅਚ੍ਛਨ੍ਨਂ ਸਮ੍ਹਿ ਲੋਹਿਤੇ.

੧੨. ‘‘ਏਵਮਾਪਜ੍ਜਤੇ ਪੋਸੋ, ਪਾਪਿਯੋ ਚ ਨਿਗਚ੍ਛਤਿ;

ਯੋ ਵੇ ਹਿਤਾਨਂ ਵਚਨਂ, ਨ ਕਰੋਤਿ ਅਤ੍ਥਦਸ੍ਸਿਨਂ.

੧੩. ‘‘ਏਵਞ੍ਚ ਸੋ ਹੋਤਿ ਤਤੋ ਚ ਪਾਪਿਯੋ, ਯੋ ਉਤ੍ਤਮੋ ਅਧਮਜਨੂਪਸੇਵੀ;

ਪਸ੍ਸੁਤ੍ਤਮਂ ਅਧਮਜਨੂਪਸੇਵਿਤਂ, ਮਿਗਾਧਿਪਂ ਸਰਵਰਵੇਗਨਿਦ੍ਧੁਤ’’ਨ੍ਤਿ.

ਤਤ੍ਥ ਅਚ੍ਚਨ੍ਤਂ ਸੁਖਮੇਧਤੀਤਿ ਨ ਚਿਰਂ ਸੁਖਂ ਲਭਤਿ. ਗਿਰਿਯਸ੍ਸਾਨੁਸਾਸਨੀਤਿ ਅਯਂ ਏਵਰੂਪਾ ਗਿਰਿਯਸ੍ਸਾਨੁਸਾਸਨੀਤਿ ਗਰਹਨ੍ਤੋ ਆਹ. ਪਾਪਸਮ੍ਪਵਙ੍ਕੇਨਾਤਿ ਪਾਪੇਸੁ ਸਮ੍ਪਵਙ੍ਕੇਨ ਪਾਪਸਹਾਯੇਨ. ਅਚ੍ਛਨ੍ਨਨ੍ਤਿ ਨਿਮੁਗ੍ਗਂ. ਪਾਪਿਯੋ ਚ ਨਿਗਚ੍ਛਤੀਤਿ ਪਾਪਞ੍ਚ ਵਿਨ੍ਦਤਿ. ਹਿਤਾਨਨ੍ਤਿ ਅਤ੍ਥਕਾਮਾਨਂ. ਅਤ੍ਥਦਸ੍ਸਿਨਨ੍ਤਿ ਅਨਾਗਤਅਤ੍ਥਂ ਪਸ੍ਸਨ੍ਤਾਨਂ. ਪਾਪਿਯੋਤਿ ਪਾਪਤਰੋ. ਅਧਮਜਨੂਪਸੇਵੀਤਿ ਅਧਮਜਨਂ ਉਪਸੇਵੀ. ਉਤ੍ਤਮਨ੍ਤਿ ਸਰੀਰਬਲੇਨ ਜੇਟ੍ਠਕਂ.

ਪਚ੍ਛਿਮਾ ਅਭਿਸਮ੍ਬੁਦ੍ਧਗਾਥਾ –

੧੪. ‘‘ਨਿਹੀਯਤਿ ਪੁਰਿਸੋ ਨਿਹੀਨਸੇਵੀ, ਨ ਚ ਹਾਯੇਥ ਕਦਾਚਿ ਤੁਲ੍ਯਸੇਵੀ;

ਸੇਟ੍ਠਮੁਪਗਮਂ ਉਦੇਤਿ ਖਿਪ੍ਪਂ, ਤਸ੍ਮਾਤ੍ਤਨਾ ਉਤ੍ਤਰਿਤਰਂ ਭਜੇਥਾ’’ਤਿ.

ਤਤ੍ਥ ਨਿਹੀਯਤੀਤਿ ਭਿਕ੍ਖਵੇ, ਨਿਹੀਨਸੇਵੀ ਨਾਮ ਮਨੋਜੋ ਸੀਹੋ ਵਿਯ ਨਿਹੀਯਤਿ ਪਰਿਹਾਯਤਿ ਵਿਨਾਸਂ ਪਾਪੁਣਾਤਿ. ਤੁਲ੍ਯਸੇਵੀਤਿ ਸੀਲਾਦੀਹਿ ਅਤ੍ਤਨਾ ਸਦਿਸਂ ਸੇਵਮਾਨੋ ਨ ਹਾਯਤਿ, ਵਡ੍ਢਿਯੇਵ ਪਨਸ੍ਸ ਹੋਤਿ. ਸੇਟ੍ਠਮੁਪਗਮਨ੍ਤਿ ਸੀਲਾਦੀਹਿ ਉਤ੍ਤਰਿਤਰਂਯੇਵ ਉਪਗਚ੍ਛਨ੍ਤੋ. ਉਦੇਤਿ ਖਿਪ੍ਪਨ੍ਤਿ ਸੀਘਮੇਵ ਸੀਲਾਦੀਹਿ ਗੁਣੇਹਿ ਉਦੇਤਿ, ਵੁਦ੍ਧਿਂ ਉਪਗਚ੍ਛਤੀਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਵਿਪਕ੍ਖਸੇਵਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਤਦਾ ਸਿਙ੍ਗਾਲੋ ਦੇਵਦਤ੍ਤੋ ਅਹੋਸਿ, ਮਨੋਜੋ ਵਿਪਕ੍ਖਸੇਵਕੋ, ਭਗਿਨੀ ਉਪ੍ਪਲਵਣ੍ਣਾ, ਭਰਿਯਾ ਖੇਮਾ ਭਿਕ੍ਖੁਨੀ, ਮਾਤਾ ਰਾਹੁਲਮਾਤਾ, ਪਿਤਾ ਸੀਹਰਾਜਾ ਪਨ ਅਹਮੇਵ ਅਹੋਸਿਨ੍ਤਿ.

ਮਨੋਜਜਾਤਕਵਣ੍ਣਨਾ ਦੁਤਿਯਾ.

[੩੯੮] ੩. ਸੁਤਨੁਜਾਤਕਵਣ੍ਣਨਾ

ਰਾਜਾ ਤੇ ਭਤ੍ਤਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਾਤੁਪੋਸਕਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਸਾਮਜਾਤਕੇ (ਜਾ. ੨.੨੨.੨੯੬ ਆਦਯੋ) ਆਵਿ ਭਵਿਸ੍ਸਤਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਦੁਗ੍ਗਤਗਹਪਤਿਕੁਲੇ ਨਿਬ੍ਬਤ੍ਤਿ, ਸੁਤਨੂਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਭਤਿਂ ਕਤ੍ਵਾ ਮਾਤਾਪਿਤਰੋ ਪੋਸੇਤ੍ਵਾ ਪਿਤਰਿ ਕਾਲਕਤੇ ਮਾਤਰਂ ਪੋਸੇਤਿ. ਤਸ੍ਮਿਂ ਪਨ ਕਾਲੇ ਬਾਰਾਣਸਿਰਾਜਾ ਮਿਗਵਿਤ੍ਤਕੋ ਅਹੋਸਿ. ਸੋ ਏਕਦਿਵਸਂ ਮਹਨ੍ਤੇਨ ਪਰਿਵਾਰੇਨ ਯੋਜਨਦ੍ਵਿਯੋਜਨਮਤ੍ਤਂ ਅਰਞ੍ਞਂ ਪਵਿਸਿਤ੍ਵਾ ‘‘ਯਸ੍ਸ ਠਿਤਟ੍ਠਾਨੇਨ ਮਿਗੋ ਪਲਾਯਤਿ, ਸੋ ਇਮਂ ਨਾਮ ਜਿਤੋ’’ਤਿ ਸਬ੍ਬੇਸਂ ਆਰੋਚਾਪੇਸਿ. ਅਮਚ੍ਚਾ ਰਞ੍ਞੋ ਧੁਵਮਗ੍ਗਟ੍ਠਾਨੇ ਕੋਟ੍ਠਕਂ ਛਾਦੇਤ੍ਵਾ ਅਦਂਸੁ. ਮਨੁਸ੍ਸੇਹਿ ਮਿਗਾਨਂ ਵਸਨਟ੍ਠਾਨਾਨਿ ਪਰਿਵਾਰੇਤ੍ਵਾ ਉਨ੍ਨਾਦੇਨ੍ਤੇਹਿ ਉਟ੍ਠਾਪਿਤੇਸੁ ਮਿਗੇਸੁ ਏਕੋ ਏਣਿਮਿਗੋ ਰਞ੍ਞੋ ਠਿਤਟ੍ਠਾਨਂ ਪਟਿਪਜ੍ਜਿ. ਰਾਜਾ ‘‘ਤਂ ਵਿਜ੍ਝਿਸ੍ਸਾਮੀ’’ਤਿ ਸਰਂ ਖਿਪਿ. ਉਗ੍ਗਹਿਤਮਾਯੋ ਮਿਗੋ ਸਰਂ ਮਹਾਫਾਸੁਕਾਭਿਮੁਖਂ ਆਗਚ੍ਛਨ੍ਤਂ ਞਤ੍ਵਾ ਪਰਿਵਤ੍ਤਿਤ੍ਵਾ ਸਰੇਨ ਵਿਦ੍ਧੋ ਵਿਯ ਹੁਤ੍ਵਾ ਪਤਿ. ਰਾਜਾ ‘‘ਮਿਗੋ ਮੇ ਵਿਦ੍ਧੋ’’ਤਿ ਗਹਣਤ੍ਥਾਯ ਧਾਵਿ. ਮਿਗੋ ਉਟ੍ਠਾਯ ਵਾਤਵੇਗੇਨ ਪਲਾਯਿ, ਅਮਚ੍ਚਾਦਯੋ ਰਾਜਾਨਂ ਅਵਹਸਿਂਸੁ. ਸੋ ਮਿਗਂ ਅਨੁਬਨ੍ਧਿਤ੍ਵਾ ਕਿਲਨ੍ਤਕਾਲੇ ਖਗ੍ਗੇਨ ਦ੍ਵਿਧਾ ਛਿਨ੍ਦਿਤ੍ਵਾ ਏਕਸ੍ਮਿਂ ਦਣ੍ਡਕੇ ਲਗ੍ਗਿਤ੍ਵਾ ਕਾਜਂ ਵਹਨ੍ਤੋ ਵਿਯ ਆਗਚ੍ਛਨ੍ਤੋ ‘‘ਥੋਕਂ ਵਿਸ੍ਸਮਿਸ੍ਸਾਮੀ’’ਤਿ ਮਗ੍ਗਸਮੀਪੇ ਠਿਤਂ ਵਟਰੁਕ੍ਖਂ ਉਪਗਨ੍ਤ੍ਵਾ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿ.

ਤਸ੍ਮਿਂ ਪਨ ਵਟਰੁਕ੍ਖੇ ਨਿਬ੍ਬਤ੍ਤੋ ਮਘਦੇਵੋ ਨਾਮ ਯਕ੍ਖੋ ਤਤ੍ਥ ਪਵਿਟ੍ਠੇ ਵੇਸ੍ਸਵਣਸ੍ਸ ਸਨ੍ਤਿਕਾ ਖਾਦਿਤੁਂ ਲਭਿ. ਸੋ ਰਾਜਾਨਂ ਉਟ੍ਠਾਯ ਗਚ੍ਛਨ੍ਤਂ ‘‘ਤਿਟ੍ਠ ਭਕ੍ਖੋਸਿ ਮੇ’’ਤਿ ਹਤ੍ਥੇ ਗਣ੍ਹਿ. ‘‘ਤ੍ਵਂ ਕੋਨਾਮੋਸੀ’’ਤਿ? ‘‘ਅਹਂ ਇਧ ਨਿਬ੍ਬਤ੍ਤਯਕ੍ਖੋ, ਇਮਂ ਠਾਨਂ ਪਵਿਟ੍ਠਕੇ ਖਾਦਿਤੁਂ ਲਭਾਮੀ’’ਤਿ. ਰਾਜਾ ਸਤਿਂ ਉਪਟ੍ਠਪੇਤ੍ਵਾ ‘‘ਕਿਂ ਅਜ੍ਜੇਵ ਮਂ ਖਾਦਿਸ੍ਸਸਿ, ਉਦਾਹੁ ਨਿਬਦ੍ਧਂ ਖਾਦਿਸ੍ਸਸੀ’’ਤਿ ਪੁਚ੍ਛਿ. ‘‘ਲਭਨ੍ਤੋ ਨਿਬਦ੍ਧਂ ਖਾਦਿਸ੍ਸਾਮੀ’’ਤਿ. ਰਾਜਾ ‘‘ਇਮਂ ਅਜ੍ਜ ਮਿਗਂ ਖਾਦਿਤ੍ਵਾ ਮਂ ਵਿਸ੍ਸਜ੍ਜੇਹਿ, ਅਹਂ ਤੇ ਸ੍ਵੇ ਪਟ੍ਠਾਯ ਏਕਾਯ ਭਤ੍ਤਪਾਤਿਯਾ ਸਦ੍ਧਿਂ ਏਕਂ ਮਨੁਸ੍ਸਂ ਪੇਸੇਸ੍ਸਾਮੀ’’ਤਿ. ‘‘ਤੇਨ ਹਿ ਅਪ੍ਪਮਤ੍ਤੋ ਹੋਹਿ, ਅਪੇਸਿਤਦਿਵਸੇ ਤਞ੍ਞੇਵ ਖਾਦਿਸ੍ਸਾਮੀ’’ਤਿ. ‘‘ਅਹਂ ਬਾਰਾਣਸਿਰਾਜਾ, ਮਯ੍ਹਂ ਅਵਿਜ੍ਜਮਾਨਂ ਨਾਮ ਨਤ੍ਥੀ’’ਤਿ. ਯਕ੍ਖੋ ਪਟਿਞ੍ਞਂ ਗਹੇਤ੍ਵਾ ਤਂ ਵਿਸ੍ਸਜ੍ਜੇਸਿ. ਸੋ ਨਗਰਂ ਪਵਿਸਿਤ੍ਵਾ ਤਮਤ੍ਥਂ ਏਕਸ੍ਸ ਅਤ੍ਥਚਰਕਸ੍ਸ ਅਮਚ੍ਚਸ੍ਸ ਕਥੇਤ੍ਵਾ ‘‘ਇਦਾਨਿ ਕਿਂ ਕਾਤਬ੍ਬ’’ਨ੍ਤਿ ਪੁਚ੍ਛਿ. ‘‘ਦਿਵਸਪਰਿਚ੍ਛੇਦੋ ਕਤੋ, ਦੇਵਾ’’ਤਿ? ‘‘ਨ ਕਤੋ’’ਤਿ. ‘‘ਅਯੁਤ੍ਤਂ ਵੋ ਕਤਂ, ਏਵਂ ਸਨ੍ਤੇਪਿ ਮਾ ਚਿਨ੍ਤਯਿਤ੍ਥ, ਬਹੂ ਬਨ੍ਧਨਾਗਾਰੇ ਮਨੁਸ੍ਸਾ’’ਤਿ. ‘‘ਤੇਨ ਹਿ ਤ੍ਵਂ ਏਤਂ ਕਮ੍ਮਂ ਕਰ, ਮਯ੍ਹਂ ਜੀਵਿਤਂ ਦੇਹੀ’’ਤਿ.

ਅਮਚ੍ਚੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਦੇਵਸਿਕਂ ਬਨ੍ਧਨਾਗਾਰਤੋ ਮਨੁਸ੍ਸਂ ਨੀਹਰਿਤ੍ਵਾ ਭਤ੍ਤਪਾਤਿਂ ਗਹੇਤ੍ਵਾ ਕਞ੍ਚਿ ਅਜਾਨਾਪੇਤ੍ਵਾਵ ਯਕ੍ਖਸ੍ਸ ਪੇਸੇਸਿ. ਯਕ੍ਖੋ ਭਤ੍ਤਂ ਭੁਞ੍ਜਿਤ੍ਵਾ ਮਨੁਸ੍ਸਂ ਖਾਦਤਿ. ਅਪਰਭਾਗੇ ਬਨ੍ਧਨਾਗਾਰਾਨਿ ਨਿਮ੍ਮਨੁਸ੍ਸਾਨਿ ਜਾਤਾਨਿ. ਰਾਜਾ ਭਤ੍ਤਹਾਰਕਂ ਅਲਭਨ੍ਤੋ ਮਰਣਭਯੇਨ ਕਮ੍ਪਿ. ਅਥ ਨਂ ਅਮਚ੍ਚੋ ਅਸ੍ਸਾਸੇਤ੍ਵਾ ‘‘ਦੇਵ, ਜੀਵਿਤਾਸਾਤੋ ਧਨਾਸਾਵ ਬਲਵਤਰਾ, ਹਤ੍ਥਿਕ੍ਖਨ੍ਧੇ ਸਹਸ੍ਸਭਣ੍ਡਿਕਂ ਠਪੇਤ੍ਵਾ ‘ਕੋ ਇਮਂ ਧਨਂ ਗਹੇਤ੍ਵਾ ਯਕ੍ਖਸ੍ਸ ਭਤ੍ਤਂ ਆਦਾਯ ਗਮਿਸ੍ਸਤੀ’ਤਿ ਭੇਰਿਂ ਚਰਾਪੇਮਾ’’ਤਿ ਵਤ੍ਵਾ ਤਥਾ ਕਾਰੇਸਿ. ਅਥ ਤਂ ਸੁਤ੍ਵਾ ਬੋਧਿਸਤ੍ਤੋ ਚਿਨ੍ਤੇਸਿ ‘‘ਅਹਂ ਭਤਿਯਾ ਮਾਸਕਡ੍ਢਮਾਸਕਂ ਸਙ੍ਘਰਿਤ੍ਵਾ ਕਿਚ੍ਛੇਨ ਮਾਤਰਂ ਪੋਸੇਮਿ, ਇਮਂ ਧਨਂ ਗਹੇਤ੍ਵਾ ਮਾਤੁ ਦਤ੍ਵਾ ਯਕ੍ਖਸ੍ਸ ਸਨ੍ਤਿਕਂ ਗਮਿਸ੍ਸਾਮਿ, ਸਚੇ ਯਕ੍ਖਂ ਦਮੇਤੁਂ ਸਕ੍ਖਿਸ੍ਸਾਮਿ, ਇਚ੍ਚੇਤਂ ਕੁਸਲਂ, ਨੋ ਚੇ ਸਕ੍ਖਿਸ੍ਸਾਮਿ, ਮਾਤਾ ਮੇ ਸੁਖਂ ਜੀਵਿਸ੍ਸਤੀ’’ਤਿ. ਸੋ ਤਮਤ੍ਥਂ ਮਾਤੁ ਆਰੋਚੇਤ੍ਵਾ ‘‘ਅਲਂ ਤਾਤ, ਨ ਮਮ ਅਤ੍ਥੋ ਧਨੇਨਾ’’ਤਿ ਦ੍ਵੇ ਵਾਰੇ ਪਟਿਕ੍ਖਿਪਿਤ੍ਵਾ ਤਤਿਯਵਾਰੇ ਤਂ ਅਨਾਪੁਚ੍ਛਿਤ੍ਵਾਵ ‘‘ਆਹਰਥ, ਅਯ੍ਯ, ਸਹਸ੍ਸਂ, ਅਹਂ ਭਤ੍ਤਂ ਹਰਿਸ੍ਸਾਮੀ’’ਤਿ ਸਹਸ੍ਸਂ ਗਹੇਤ੍ਵਾ ਮਾਤੁ ਦਤ੍ਵਾ ‘‘ਅਮ੍ਮ, ਮਾ ਚਿਨ੍ਤਯਿ, ਅਹਂ ਯਕ੍ਖਂ ਦਮੇਤ੍ਵਾ ਮਹਾਜਨਸ੍ਸ ਸੋਤ੍ਥਿਂ ਕਰਿਸ੍ਸਾਮਿ, ਅਜ੍ਜੇਵ ਤਵ ਅਸ੍ਸੁਕਿਲਿਨ੍ਨਮੁਖਂ ਹਾਸਾਪੇਨ੍ਤੋਵ ਆਗਚ੍ਛਿਸ੍ਸਾਮੀ’’ਤਿ ਮਾਤਰਂ ਵਨ੍ਦਿਤ੍ਵਾ ਰਾਜਪੁਰਿਸੇਹਿ ਸਦ੍ਧਿਂ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ.

ਤਤੋ ਰਞ੍ਞਾ ‘‘ਤਾਤ, ਤ੍ਵਂ ਭਤ੍ਤਂ ਹਰਿਸ੍ਸਸੀ’’ਤਿ ਵੁਤ੍ਤੇ ‘‘ਆਮ, ਦੇਵਾ’’ਤਿ ਆਹ. ‘‘ਕਿਂ ਤੇ ਲਦ੍ਧੁਂ ਵਟ੍ਟਤੀ’’ਤਿ? ‘‘ਤੁਮ੍ਹਾਕਂ ਸੁਵਣ੍ਣਪਾਦੁਕਾ, ਦੇਵਾ’’ਤਿ. ‘‘ਕਿਂਕਾਰਣਾ’’ਤਿ? ‘‘ਦੇਵ, ਸੋ ਯਕ੍ਖੋ ਅਤ੍ਤਨੋ ਰੁਕ੍ਖਮੂਲੇ ਭੂਮਿਯਂ ਠਿਤਕੇ ਖਾਦਿਤੁਂ ਲਭਤਿ, ਅਹਂ ਏਤਸ੍ਸ ਸਨ੍ਤਕਭੂਮਿਯਂ ਅਟ੍ਠਤ੍ਵਾ ਪਾਦੁਕਾਸੁ ਠਸ੍ਸਾਮੀ’’ਤਿ. ‘‘ਅਞ੍ਞਂ ਕਿਂ ਲਦ੍ਧੁਂ ਵਟ੍ਟਤੀ’’ਤਿ? ‘‘ਤੁਮ੍ਹਾਕਂ ਛਤ੍ਤਂ, ਦੇਵਾ’’ਤਿ. ‘‘ਇਦਂ ਕਿਮਤ੍ਥਾਯਾ’’ਤਿ? ‘‘ਦੇਵ, ਯਕ੍ਖੋ ਅਤ੍ਤਨੋ ਰੁਕ੍ਖਚ੍ਛਾਯਾਯ ਠਿਤਕੇ ਖਾਦਿਤੁਂ ਲਭਤਿ, ਅਹਂ ਤਸ੍ਸ ਰੁਕ੍ਖਚ੍ਛਾਯਾਯ ਅਟ੍ਠਤ੍ਵਾ ਛਤ੍ਤਚ੍ਛਾਯਾਯ ਠਸ੍ਸਾਮੀ’’ਤਿ. ‘‘ਅਞ੍ਞਂ ਕਿਂ ਲਦ੍ਧੁਂ ਵਟ੍ਟਤੀ’’ਤਿ. ‘‘ਤੁਮ੍ਹਾਕਂ ਖਗ੍ਗਂ, ਦੇਵਾ’’ਤਿ. ‘‘ਇਮਿਨਾ ਕੋ ਅਤ੍ਥੋ’’ਤਿ? ‘‘ਦੇਵ, ਅਮਨੁਸ੍ਸਾਪਿ ਆਵੁਧਹਤ੍ਥਾਨਂ ਭਾਯਨ੍ਤਿਯੇਵਾ’’ਤਿ. ‘‘ਅਞ੍ਞਂ ਕਿਂ ਲਦ੍ਧੁਂ ਵਟ੍ਟਤੀ’’ਤਿ? ‘‘ਸੁਵਣ੍ਣਪਾਤਿਂ ਪੂਰੇਤ੍ਵਾ ਤੁਮ੍ਹਾਕਂ ਭੁਞ੍ਜਨਕਭਤ੍ਤਂ ਦੇਥ, ਦੇਵਾ’’ਤਿ. ‘‘ਕਿਂਕਾਰਣਾ, ਤਾਤਾ’’ਤਿ? ‘‘ਦੇਵ, ਮਾਦਿਸਸ੍ਸ ਨਾਮ ਪਣ੍ਡਿਤਸ੍ਸ ਪੁਰਿਸਸ੍ਸ ਮਤ੍ਤਿਕਪਾਤਿਯਾ ਲੂਖਭੋਜਨਂ ਹਰਿਤੁਂ ਅਨਨੁਚ੍ਛਵਿਕ’’ਨ੍ਤਿ. ‘‘ਸਾਧੁ, ਤਾਤਾ’’ਤਿ ਰਾਜਾ ਸਬ੍ਬਂ ਦਾਪੇਤ੍ਵਾ ਤਸ੍ਸ ਵੇਯ੍ਯਾਵਚ੍ਚਕਰੇ ਪਟਿਪਾਦੇਸਿ.

ਬੋਧਿਸਤ੍ਤੋ ‘‘ਮਹਾਰਾਜ, ਮਾ ਭਾਯਿਤ੍ਥ, ਅਜ੍ਜਾਹਂ ਯਕ੍ਖਂ ਦਮੇਤ੍ਵਾ ਤੁਮ੍ਹਾਕਂ ਸੋਤ੍ਥਿਂ ਕਤ੍ਵਾ ਆਗਮਿਸ੍ਸਾਮੀ’’ਤਿ ਰਾਜਾਨਂ ਵਨ੍ਦਿਤ੍ਵਾ ਉਪਕਰਣਾਨਿ ਗਾਹਾਪੇਤ੍ਵਾ ਤਤ੍ਥ ਗਨ੍ਤ੍ਵਾ ਮਨੁਸ੍ਸੇ ਰੁਕ੍ਖਸ੍ਸਾਵਿਦੂਰੇ ਠਪੇਤ੍ਵਾ ਸੁਵਣ੍ਣਪਾਦੁਕਂ ਆਰੁਯ੍ਹ ਖਗ੍ਗਂ ਸਨ੍ਨਯ੍ਹਿਤ੍ਵਾ ਸੇਤਚ੍ਛਤ੍ਤਂ ਮਤ੍ਥਕੇ ਕਤ੍ਵਾ ਕਞ੍ਚਨਪਾਤਿਯਾ ਭਤ੍ਤਂ ਗਹੇਤ੍ਵਾ ਯਕ੍ਖਸ੍ਸ ਸਨ੍ਤਿਕਂ ਪਾਯਾਸਿ. ਯਕ੍ਖੋ ਮਗ੍ਗਂ ਓਲੋਕੇਨ੍ਤੋ ਤਂ ਦਿਸ੍ਵਾ ‘‘ਅਯਂ ਪੁਰਿਸੋ ਨ ਅਞ੍ਞੇਸੁ ਦਿਵਸੇਸੁ ਆਗਮਨਨਿਯਾਮੇਨ ਏਤਿ, ਕਿਂ ਨੁ ਖੋ ਕਾਰਣ’’ਨ੍ਤਿ ਚਿਨ੍ਤੇਸਿ. ਬੋਧਿਸਤ੍ਤੋਪਿ ਰੁਕ੍ਖਸਮੀਪਂ ਗਨ੍ਤ੍ਵਾ ਅਸਿਤੁਣ੍ਡੇਨ ਭਤ੍ਤਪਾਤਿਂ ਅਨ੍ਤੋਛਾਯਾਯ ਕਰਿਤ੍ਵਾ ਛਾਯਾਯ ਪਰਿਯਨ੍ਤੇ ਠਿਤੋ ਪਠਮਂ ਗਾਥਮਾਹ.

੧੫. ‘‘ਰਾਜਾ ਤੇ ਭਤ੍ਤਂ ਪਾਹੇਸਿ, ਸੁਚਿਂ ਮਂਸੂਪਸੇਚਨਂ;

ਮਘਦੇਵਸ੍ਮਿਂ ਅਧਿਵਤ੍ਥੇ, ਏਹਿ ਨਿਕ੍ਖਮ੍ਮ ਭੁਞ੍ਜਸੂ’’ਤਿ.

ਤਤ੍ਥ ਪਾਹੇਸੀਤਿ ਪਹਿਣਿ. ਮਘਦੇਵਸ੍ਮਿਂ ਅਧਿਵਤ੍ਥੇਤਿ ਮਘਦੇਵੋਤਿ ਵਟਰੁਕ੍ਖੋ ਵੁਚ੍ਚਤਿ, ਤਸ੍ਮਿਂ ਅਧਿਵਤ੍ਥੇਤਿ ਦੇਵਤਂ ਆਲਪਤਿ.

ਤਂ ਸੁਤ੍ਵਾ ਯਕ੍ਖੋ ‘‘ਇਮਂ ਪੁਰਿਸਂ ਵਞ੍ਚੇਤ੍ਵਾ ਅਨ੍ਤੋਛਾਯਾਯ ਪਵਿਟ੍ਠਂ ਖਾਦਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦੁਤਿਯਂ ਗਾਥਮਾਹ –

੧੬. ‘‘ਏਹਿ ਮਾਣਵ ਓਰੇਨ, ਭਿਕ੍ਖਮਾਦਾਯ ਸੂਪਿਤਂ;

ਤ੍ਵਞ੍ਚ ਮਾਣਵ ਭਿਕ੍ਖਾ ਚ, ਉਭੋ ਭਕ੍ਖਾ ਭਵਿਸ੍ਸਥਾ’’ਤਿ.

ਤਤ੍ਥ ਭਿਕ੍ਖਨ੍ਤਿ ਮਮ ਨਿਬਦ੍ਧਭਿਕ੍ਖਂ. ਸੂਪਿਤਨ੍ਤਿ ਸੂਪਸਮ੍ਪਨ੍ਨਂ.

ਤਤੋ ਬੋਧਿਸਤ੍ਤੋ ਦ੍ਵੇ ਗਾਥਾ ਅਭਾਸਿ –

੧੭. ‘‘ਅਪ੍ਪਕੇਨ ਤੁਵਂ ਯਕ੍ਖ, ਥੁਲ੍ਲਮਤ੍ਥਂ ਜਹਿਸ੍ਸਸਿ;

ਭਿਕ੍ਖਂ ਤੇ ਨਾਹਰਿਸ੍ਸਨ੍ਤਿ, ਜਨਾ ਮਰਣਸਞ੍ਞਿਨੋ.

੧੮. ‘‘ਲਦ੍ਧਾਯ ਯਕ੍ਖਾ ਤਵ ਨਿਚ੍ਚਭਿਕ੍ਖਂ, ਸੁਚਿਂ ਪਣੀਤਂ ਰਸਸਾ ਉਪੇਤਂ;

ਭਿਕ੍ਖਞ੍ਚ ਤੇ ਆਹਰਿਯੋ ਨਰੋ ਇਧ, ਸੁਦੁਲ੍ਲਭੋ ਹੇਹਿਤਿ ਭਕ੍ਖਿਤੇ ਮਯੀ’’ਤਿ.

ਤਤ੍ਥ ਥੁਲ੍ਲਮਤ੍ਥਨ੍ਤਿ ਅਪ੍ਪਕੇਨ ਕਾਰਣੇਨ ਮਹਨ੍ਤਂ ਅਤ੍ਥਂ ਜਹਿਸ੍ਸਸੀਤਿ ਦਸ੍ਸੇਤਿ. ਨਾਹਰਿਸ੍ਸਨ੍ਤੀਤਿ ਇਤੋ ਪਟ੍ਠਾਯ ਮਰਣਸਞ੍ਞਿਨੋ ਹੁਤ੍ਵਾ ਨ ਆਹਰਿਸ੍ਸਨ੍ਤਿ, ਅਥ ਤ੍ਵਂ ਮਿਲਾਤਸਾਖੋ ਵਿਯ ਰੁਕ੍ਖੋ ਨਿਰਾਹਾਰੋ ਦੁਬ੍ਬਲੋ ਭਵਿਸ੍ਸਸੀਤਿ. ਲਦ੍ਧਾਯਨ੍ਤਿ ਲਦ੍ਧਅਯਂ ਲਦ੍ਧਾਗਮਨਂ. ਇਦਂ ਵੁਤ੍ਤਂ ਹੋਤਿ – ਸਮ੍ਮ ਯਕ੍ਖ, ਯਂ ਅਹਂ ਅਜ੍ਜ ਆਹਰਿਂ, ਇਦਂ ਤਵ ਨਿਚ੍ਚਭਿਕ੍ਖਂ ਸੁਚਿਂ ਪਣੀਤਂ ਉਤ੍ਤਮਂ ਰਸੇਨ ਉਪੇਤਂ ਲਦ੍ਧਾਗਮਨਂ ਦੇਵਸਿਕਂ ਤੇ ਆਗਚ੍ਛਿਸ੍ਸਤਿ. ਆਹਰਿਯੋਤਿ ਆਹਰਣਕੋ. ਇਦਂ ਵੁਤ੍ਤਂ ਹੋਤਿ – ‘‘ਸਚੇ ਤ੍ਵਂ ਇਮਂ ਭਿਕ੍ਖਂ ਗਹੇਤ੍ਵਾ ਆਗਤਂ ਮਂ ਭਕ੍ਖਸਿ, ਅਥੇਵਂ ਮਯਿ ਭਕ੍ਖਿਤੇ ਭਿਕ੍ਖਞ੍ਚ ਤੇ ਆਹਰਣਕੋ ਅਞ੍ਞੋ ਨਰੋ ਇਧ ਸੁਦੁਲ੍ਲਭੋ ਭਵਿਸ੍ਸਤਿ. ਕਿਂਕਾਰਣਾ? ਮਾਦਿਸੋ ਹਿ ਬਾਰਾਣਸਿਯਂ ਅਞ੍ਞੋ ਪਣ੍ਡਿਤਮਨੁਸ੍ਸੋ ਨਾਮ ਨਤ੍ਥਿ, ਮਯਿ ਪਨ ਖਾਦਿਤੇ ਸੁਤਨੁਪਿ ਨਾਮ ਯਕ੍ਖੇਨ ਖਾਦਿਤੋ, ਅਞ੍ਞਸ੍ਸ ਕਸ੍ਸ ਸੋ ਲਜ੍ਜਿਸ੍ਸਤੀ’’ਤਿ ਭਤ੍ਤਾਹਰਣਕਂ ਨ ਲਭਿਸ੍ਸਸਿ, ਅਥ ਤੇ ਇਤੋ ਪਟ੍ਠਾਯ ਭੋਜਨਂ ਦੁਲ੍ਲਭਂ ਭਵਿਸ੍ਸਤਿ, ਅਮ੍ਹਾਕਮ੍ਪਿ ਰਾਜਾਨਂ ਗਣ੍ਹਿਤੁਂ ਨ ਲਭਿਸ੍ਸਸਿ. ਕਸ੍ਮਾ? ਰੁਕ੍ਖਤੋ ਬਹਿਭਾਵੇਨ. ਸਚੇ ਪਨਿਦਂ ਭਤ੍ਤਂ ਭੁਞ੍ਜਿਤ੍ਵਾ ਮਂ ਪਹਿਣਿਸ੍ਸਸਿ, ਅਹਂ ਤੇ ਰਞ੍ਞੋ ਕਥੇਤ੍ਵਾ ਨਿਬਦ੍ਧਂ ਭਤ੍ਤਂ ਪੇਸੇਸ੍ਸਾਮਿ, ਅਤ੍ਤਾਨਮ੍ਪਿ ਚ ਤੇ ਖਾਦਿਤੁਂ ਨ ਦਸ੍ਸਾਮਿ, ਅਹਮ੍ਪਿ ਤਵ ਸਨ੍ਤਿਕੇ ਠਾਨੇ ਨ ਠਸ੍ਸਾਮਿ, ਪਾਦੁਕਾਸੁ ਠਸ੍ਸਾਮਿ, ਰੁਕ੍ਖਚ੍ਛਾਯਾਯਮ੍ਪਿ ਤੇ ਨ ਠਸ੍ਸਾਮਿ, ਅਤ੍ਤਨੋ ਛਤ੍ਤਚ੍ਛਾਯਾਯਮੇਵ ਠਸ੍ਸਾਮਿ, ਸਚੇ ਪਨ ਮਯਾ ਸਦ੍ਧਿਂ ਵਿਰੁਜ੍ਝਿਸ੍ਸਸਿ, ਖਗ੍ਗੇਨ ਤਂ ਦ੍ਵਿਧਾ ਭਿਨ੍ਦਿਸ੍ਸਾਮਿ, ਅਹਞ੍ਹਿ ਅਜ੍ਜ ਏਤਦਤ੍ਥਮੇਵ ਸਜ੍ਜੋ ਹੁਤ੍ਵਾ ਆਗਤੋਤਿ. ਏਵਂ ਕਿਰ ਨਂ ਮਹਾਸਤ੍ਤੋ ਤਜ੍ਜੇਸਿ.

ਯਕ੍ਖੋ ‘‘ਯੁਤ੍ਤਰੂਪਂ ਮਾਣਵੋ ਵਦਤੀ’’ਤਿ ਸਲ੍ਲਕ੍ਖੇਤ੍ਵਾ ਪਸਨ੍ਨਚਿਤ੍ਤੋ ਦ੍ਵੇ ਗਾਥਾ ਅਭਾਸਿ –

੧੯. ‘‘ਮਮੇਵ ਸੁਤਨੋ ਅਤ੍ਥੋ, ਯਥਾ ਭਾਸਸਿ ਮਾਣਵ;

ਮਯਾ ਤ੍ਵਂ ਸਮਨੁਞ੍ਞਾਤੋ, ਸੋਤ੍ਥਿਂ ਪਸ੍ਸਾਹਿ ਮਾਤਰਂ.

੨੦. ‘‘ਖਗ੍ਗਂ ਛਤ੍ਤਞ੍ਚ ਪਾਤਿਞ੍ਚ, ਗਚ੍ਛਮਾਦਾਯ ਮਾਣਵ;

ਸੋਤ੍ਥਿਂ ਪਸ੍ਸਤੁ ਤੇ ਮਾਤਾ, ਤ੍ਵਞ੍ਚ ਪਸ੍ਸਾਹਿ ਮਾਤਰ’’ਨ੍ਤਿ.

ਤਤ੍ਥ ਸੁਤਨੋਤਿ ਬੋਧਿਸਤ੍ਤਂ ਆਲਪਤਿ. ਯਥਾ ਭਾਸਸੀਤਿ ਯਥਾ ਤ੍ਵਂ ਭਾਸਸਿ, ਤਥਾ ਯੋ ਏਸ ਤਯਾ ਭਾਸਿਤੋ ਅਤ੍ਥੋ, ਏਸੋ ਮਮੇਵਤ੍ਥੋ, ਮਯ੍ਹਮੇਵ ਵਡ੍ਢੀਤਿ.

ਯਕ੍ਖਸ੍ਸ ਕਥਂ ਸੁਤ੍ਵਾ ਬੋਧਿਸਤ੍ਤੋ ‘‘ਮਮ ਕਮ੍ਮਂ ਨਿਪ੍ਫਨ੍ਨਂ, ਦਮਿਤੋ ਮੇ ਯਕ੍ਖੋ, ਬਹੁਞ੍ਚ ਧਨਂ ਲਦ੍ਧਂ, ਰਞ੍ਞੋ ਚ ਵਚਨਂ ਕਤ’’ਨ੍ਤਿ ਤੁਟ੍ਠਚਿਤ੍ਤੋ ਯਕ੍ਖਸ੍ਸ ਅਨੁਮੋਦਨਂ ਕਰੋਨ੍ਤੋ ਓਸਾਨਗਾਥਮਾਹ –

੨੧. ‘‘ਏਵਂ ਯਕ੍ਖ ਸੁਖੀ ਹੋਹਿ, ਸਹ ਸਬ੍ਬੇਹਿ ਞਾਤਿਭਿ;

ਧਨਞ੍ਚ ਮੇ ਅਧਿਗਤਂ, ਰਞ੍ਞੋ ਚ ਵਚਨਂ ਕਤ’’ਨ੍ਤਿ. –

ਵਤ੍ਵਾ ਚ ਪਨ ਯਕ੍ਖਂ ਆਮਨ੍ਤੇਤ੍ਵਾ ‘‘ਸਮ੍ਮ, ਤ੍ਵਂ ਪੁਬ੍ਬੇ ਅਕੁਸਲਕਮ੍ਮਂ ਕਤ੍ਵਾ ਕਕ੍ਖਲ਼ੋ ਫਰੁਸੋ ਪਰੇਸਂ ਲੋਹਿਤਮਂਸਭਕ੍ਖੋ ਯਕ੍ਖੋ ਹੁਤ੍ਵਾ ਨਿਬ੍ਬਤ੍ਤੋ, ਇਤੋ ਪਟ੍ਠਾਯ ਪਾਣਾਤਿਪਾਤਾਦੀਨਿ ਮਾ ਕਰੀ’’ਤਿ ਸੀਲੇ ਚ ਆਨਿਸਂਸਂ, ਦੁਸ੍ਸੀਲ੍ਯੇ ਚ ਆਦੀਨਵਂ ਕਥੇਤ੍ਵਾ ਯਕ੍ਖਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ‘‘ਕਿਂ ਤੇ ਅਰਞ੍ਞਵਾਸੇਨ, ਏਹਿ ਨਗਰਦ੍ਵਾਰੇ ਤਂ ਨਿਸੀਦਾਪੇਤ੍ਵਾ ਅਗ੍ਗਭਤ੍ਤਲਾਭਿਂ ਕਰੋਮੀ’’ਤਿ ਯਕ੍ਖੇਨ ਸਦ੍ਧਿਂ ਨਿਕ੍ਖਮਿਤ੍ਵਾ ਖਗ੍ਗਾਦੀਨਿ ਯਕ੍ਖਂ ਗਾਹਾਪੇਤ੍ਵਾ ਬਾਰਾਣਸਿਂ ਅਗਮਾਸਿ. ‘‘ਸੁਤਨੁ ਮਾਣਵੋ ਯਕ੍ਖਂ ਗਹੇਤ੍ਵਾ ਏਤੀ’’ਤਿ ਰਞ੍ਞੋ ਆਰੋਚੇਸੁਂ. ਰਾਜਾ ਅਮਚ੍ਚਪਰਿਵੁਤੋ ਬੋਧਿਸਤ੍ਤਸ੍ਸ ਪਚ੍ਚੁਗ੍ਗਮਨਂ ਕਤ੍ਵਾ ਯਕ੍ਖਂ ਨਗਰਦ੍ਵਾਰੇ ਨਿਸੀਦਾਪੇਤ੍ਵਾ ਅਗ੍ਗਭਤ੍ਤਲਾਭਿਨਂ ਕਤ੍ਵਾ ਨਗਰਂ ਪਵਿਸਿਤ੍ਵਾ ਭੇਰਿਂ ਚਰਾਪੇਤ੍ਵਾ ਨਾਗਰੇ ਸਨ੍ਨਿਪਾਤਾਪੇਤ੍ਵਾ ਬੋਧਿਸਤ੍ਤਸ੍ਸ ਗੁਣਂ ਕਥੇਤ੍ਵਾ ਸੇਨਾਪਤਿਟ੍ਠਾਨਂ ਅਦਾਸਿ. ਅਯਞ੍ਚ ਬੋਧਿਸਤ੍ਤਸ੍ਸ ਓਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਮਾਤੁਪੋਸਕਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਦਾ ਯਕ੍ਖੋ ਅਙ੍ਗੁਲਿਮਾਲੋ ਅਹੋਸਿ, ਰਾਜਾ ਆਨਨ੍ਦੋ, ਮਾਣਵੋ ਪਨ ਅਹਮੇਵ ਅਹੋਸਿਨ੍ਤਿ.

ਸੁਤਨੁਜਾਤਕਵਣ੍ਣਨਾ ਤਤਿਯਾ.

[੩੯੯] ੪. ਮਾਤੁਪੋਸਕਗਿਜ੍ਝਜਾਤਕਵਣ੍ਣਨਾ

ਤੇ ਕਥਂ ਨੁ ਕਰਿਸ੍ਸਨ੍ਤੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਮਾਤੁਪੋਸਕਭਿਕ੍ਖੁਂ ਆਰਬ੍ਭ ਕਥੇਸਿ. ਵਤ੍ਥੁ ਸਾਮਜਾਤਕੇ (ਜਾ. ੨.੨੨.੨੯੬ ਆਦਯੋ) ਆਵਿ ਭਵਿਸ੍ਸਤਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਗਿਜ੍ਝਯੋਨਿਯਂ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਵੁਦ੍ਧੇ ਪਰਿਹੀਨਚਕ੍ਖੁਕੇ ਮਾਤਾਪਿਤਰੋ ਗਿਜ੍ਝਗੁਹਾਯਂ ਠਪੇਤ੍ਵਾ ਗੋਮਂਸਾਦੀਨਿ ਆਹਰਿਤ੍ਵਾ ਪੋਸੇਸਿ. ਤਸ੍ਮਿਂ ਕਾਲੇ ਬਾਰਾਣਸਿਯਂ ਸੁਸਾਨੇ ਏਕੋ ਨੇਸਾਦੋ ਅਨਿਯਮੇਤ੍ਵਾ ਗਿਜ੍ਝਾਨਂ ਪਾਸੇ ਓਡ੍ਡੇਸਿ. ਅਥੇਕਦਿਵਸਂ ਬੋਧਿਸਤ੍ਤੋ ਗੋਮਂਸਾਦਿਂ ਪਰਿਯੇਸਨ੍ਤੋ ਸੁਸਾਨਂ ਪਵਿਟ੍ਠੋ ਪਾਦੇਨ ਪਾਸੇ ਬਜ੍ਝਿਤ੍ਵਾ ਅਤ੍ਤਨੋ ਨ ਚਿਨ੍ਤੇਸਿ, ਵੁਦ੍ਧੇ ਪਰਿਹੀਨਚਕ੍ਖੁਕੇ ਮਾਤਾਪਿਤਰੋ ਅਨੁਸ੍ਸਰਿਤ੍ਵਾ ‘‘ਕਥਂ ਨੁ ਖੋ ਮੇ ਮਾਤਾਪਿਤਰੋ ਯਾਪੇਸ੍ਸਨ੍ਤਿ, ਮਮ ਬਦ੍ਧਭਾਵਮ੍ਪਿ ਅਜਾਨਨ੍ਤਾ ਅਨਾਥਾ ਨਿਪ੍ਪਚ੍ਚਯਾ ਪਬ੍ਬਤਗੁਹਾਯਮੇਵ ਸੁਸ੍ਸਿਤ੍ਵਾ ਮਰਿਸ੍ਸਨ੍ਤਿ ਮਞ੍ਞੇ’’ਤਿ ਵਿਲਪਨ੍ਤੋ ਪਠਮਂ ਗਾਥਮਾਹ –

੨੨. ‘‘ਤੇ ਕਥਂ ਨੁ ਕਰਿਸ੍ਸਨ੍ਤਿ, ਵੁਦ੍ਧਾ ਗਿਰਿਦਰੀਸਯਾ;

ਅਹਂ ਬਦ੍ਧੋਸ੍ਮਿ ਪਾਸੇਨ, ਨਿਲੀਯਸ੍ਸ ਵਸਂ ਗਤੋ’’ਤਿ.

ਤਤ੍ਥ ਨਿਲੀਯਸ੍ਸਾਤਿ ਏਵਂਨਾਮਕਸ੍ਸ ਨੇਸਾਦਪੁਤ੍ਤਸ੍ਸ.

ਅਥ ਨੇਸਾਦਪੁਤ੍ਤੋ ਗਿਜ੍ਝਰਾਜਸ੍ਸ ਪਰਿਦੇਵਿਤਸਦ੍ਦਂ ਸੁਤ੍ਵਾ ਦੁਤਿਯਂ ਗਾਥਮਾਹ –

੨੩. ‘‘ਕਿਂ ਗਿਜ੍ਝ ਪਰਿਦੇਵਸਿ, ਕਾ ਨੁ ਤੇ ਪਰਿਦੇਵਨਾ;

ਨ ਮੇ ਸੁਤੋ ਵਾ ਦਿਟ੍ਠੋ ਵਾ, ਭਾਸਨ੍ਤੋ ਮਾਨੁਸਿਂ ਦਿਜੋ’’ਤਿ.

ਗਿਜ੍ਝੋ ਆਹ –

੨੪. ‘‘ਭਰਾਮਿ ਮਾਤਾਪਿਤਰੋ, ਵੁਦ੍ਧੇ ਗਿਰਿਦਰੀਸਯੇ;

ਤੇ ਕਥਂ ਨੁ ਕਰਿਸ੍ਸਨ੍ਤਿ, ਅਹਂ ਵਸਂ ਗਤੋ ਤਵਾ’’ਤਿ.

ਨੇਸਾਦੋ ਆਹ –

੨੫. ‘‘ਯਂ ਨੁ ਗਿਜ੍ਝੋ ਯੋਜਨਸਤਂ, ਕੁਣਪਾਨਿ ਅਵੇਕ੍ਖਤਿ;

ਕਸ੍ਮਾ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਸੀ’’ਤਿ.

ਗਿਜ੍ਝਰਾਜਾ ਆਹ –

੨੬. ‘‘ਯਦਾ ਪਰਾਭਵੋ ਹੋਤਿ, ਪੋਸੋ ਜੀਵਿਤਸਙ੍ਖਯੇ;

ਅਥ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਤੀ’’ਤਿ.

੨੭. ‘‘ਭਰਸ੍ਸੁ ਮਾਤਾਪਿਤਰੋ, ਵੁਦ੍ਧੇ ਗਿਰਿਦਰੀਸਯੇ;

ਮਯਾ ਤ੍ਵਂ ਸਮਨੁਞ੍ਞਾਤੋ, ਸੋਤ੍ਥਿਂ ਪਸ੍ਸਾਹਿ ਞਾਤਕੇ.

੨੮. ‘‘ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;

ਭਰਿਸ੍ਸਂ ਮਾਤਾਪਿਤਰੋ, ਵੁਦ੍ਧੇ ਗਿਰਿਦਰੀਸਯੇ’’ਤਿ. –

ਨੇਸਾਦਪੁਤ੍ਤੇਨ ਦੁਤਿਯਾ, ਗਿਜ੍ਝੇਨ ਤਤਿਯਾਤਿ ਇਮਾ ਗਾਥਾ ਪਟਿਪਾਟਿਯਾ ਵੁਤ੍ਤਾ.

ਤਤ੍ਥ ਯਂ ਨੂਤਿ ਯਂ ਨੁ ਏਤਂ ਲੋਕੇ ਕਥੀਯਤਿ. ਗਿਜ੍ਝੋ ਯੋਜਨਸਤਂ, ਕੁਣਪਾਨਿ ਅਵੇਕ੍ਖਤੀਤਿ ਯੋਜਨਸਤਂ ਅਤਿਕ੍ਕਮ੍ਮ ਠਿਤਾਨਿਪਿ ਕੁਣਪਾਨਿ ਪਸ੍ਸਤਿ, ਤਂ ਯਦਿ ਤਥਂ, ਅਥ ਕਸ੍ਮਾ ਤ੍ਵਂ ਇਮਂ ਜਾਲਞ੍ਚ ਪਾਸਞ੍ਚ ਆਸਜ੍ਜਾਪਿ ਨ ਬੁਜ੍ਝਸਿ, ਸਨ੍ਤਿਕਂ ਆਗਨ੍ਤ੍ਵਾਪਿ ਨ ਜਾਨਾਸੀਤਿ.

ਪਰਾਭਵੋਤਿ ਵਿਨਾਸੋ. ਭਰਸ੍ਸੂਤਿ ਇਦਂ ਸੋ ਬੋਧਿਸਤ੍ਤਸ੍ਸ ਧਮ੍ਮਕਥਂ ਸੁਤ੍ਵਾ ‘‘ਪਣ੍ਡਿਤੋ ਗਿਜ੍ਝਰਾਜਾ ਪਰਿਦੇਵਨ੍ਤੋ ਨ ਅਤ੍ਤਨੋ ਪਰਿਦੇਵਤਿ, ਮਾਤਾਪਿਤੂਨਂ ਪਰਿਦੇਵਤਿ, ਨਾਯਂ ਮਾਰੇਤੁਂ ਯੁਤ੍ਤੋ’’ਤਿ ਤੁਸ੍ਸਿਤ੍ਵਾ ਆਹ, ਵਤ੍ਵਾ ਚ ਪਨ ਪਿਯਚਿਤ੍ਤੇਨ ਮੁਦੁਚਿਤ੍ਤੇਨ ਪਾਸਂ ਮੋਚੇਸਿ.

ਅਥਸ੍ਸ ਬੋਧਿਸਤ੍ਤੋ ਮਰਣਮੁਖਾ ਪਮੁਤ੍ਤੋ ਸੁਖਿਤੋ ਅਨੁਮੋਦਨਂ ਕਰੋਨ੍ਤੋ ਓਸਾਨਗਾਥਂ ਵਤ੍ਵਾ ਮੁਖਪੂਰਂ ਮਂਸਂ ਆਦਾਯ ਮਾਤਾਪਿਤੂਨਂ ਅਦਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਮਾਤੁਪੋਸਕਭਿਕ੍ਖੁ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਤਦਾ ਨੇਸਾਦਪੁਤ੍ਤੋ ਛਨ੍ਨੋ ਅਹੋਸਿ, ਮਾਤਾਪਿਤਰੋ ਮਹਾਰਾਜਕੁਲਾਨਿ, ਗਿਜ੍ਝਰਾਜਾ ਪਨ ਅਹਮੇਵ ਅਹੋਸਿਨ੍ਤਿ.

ਮਾਤੁਪੋਸਕਗਿਜ੍ਝਜਾਤਕਵਣ੍ਣਨਾ ਚਤੁਤ੍ਥਾ.

[੪੦੦] ੫. ਦਬ੍ਭਪੁਪ੍ਫਜਾਤਕਵਣ੍ਣਨਾ

ਅਨੁਤੀਰਚਾਰੀ ਭਦ੍ਦਨ੍ਤੇਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪਨਨ੍ਦਂ ਸਕ੍ਯਪੁਤ੍ਤਂ ਆਰਬ੍ਭ ਕਥੇਸਿ. ਸੋ ਹਿ ਸਾਸਨੇ ਪਬ੍ਬਜਿਤ੍ਵਾ ਅਪ੍ਪਿਚ੍ਛਤਾਦਿਗੁਣੇ ਪਹਾਯ ਮਹਾਤਣ੍ਹੋ ਅਹੋਸਿ. ਵਸ੍ਸੂਪਨਾਯਿਕਾਯ ਦ੍ਵੇ ਤਯੋ ਵਿਹਾਰੇ ਪਰਿਗ੍ਗਹੇਤ੍ਵਾ ਏਕਸ੍ਮਿਂ ਛਤ੍ਤਂ ਵਾ ਉਪਾਹਨਂ ਵਾ ਏਕਸ੍ਮਿਂ ਕਤ੍ਤਰਯਟ੍ਠਿਂ ਵਾ ਉਦਕਤੁਮ੍ਬਂ ਵਾ ਠਪੇਤ੍ਵਾ ਏਕਸ੍ਮਿਂ ਸਯਂ ਵਸਤਿ. ਸੋ ਏਕਸ੍ਮਿਂ ਜਨਪਦਵਿਹਾਰੇ ਵਸ੍ਸਂ ਉਪਗਨ੍ਤ੍ਵਾ ‘‘ਭਿਕ੍ਖੂਹਿ ਨਾਮ ਅਪ੍ਪਿਚ੍ਛੇਹਿ ਭਵਿਤਬ੍ਬ’’ਨ੍ਤਿ ਆਕਾਸੇ ਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਭਿਕ੍ਖੂਨਂ ਪਚ੍ਚਯਸਨ੍ਤੋਸਦੀਪਕਂ ਅਰਿਯਵਂਸਪਟਿਪਦਂ ਕਥੇਸਿ. ਤਂ ਸੁਤ੍ਵਾ ਭਿਕ੍ਖੂ ਮਨਾਪਾਨਿ ਪਤ੍ਤਚੀਵਰਾਨਿ ਛਡ੍ਡੇਤ੍ਵਾ ਮਤ੍ਤਿਕਾਪਤ੍ਤਾਨਿ ਚੇਵ ਪਂਸੁਕੂਲਚੀਵਰਾਨਿ ਚ ਗਣ੍ਹਿਂਸੁ. ਸੋ ਤਾਨਿ ਅਤ੍ਤਨੋ ਵਸਨਟ੍ਠਾਨੇ ਠਪੇਤ੍ਵਾ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ਯਾਨਕਂ ਪੂਰੇਤ੍ਵਾ ਜੇਤਵਨਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਏਕਸ੍ਸ ਅਰਞ੍ਞਵਿਹਾਰਸ੍ਸ ਪਿਟ੍ਠਿਭਾਗੇ ਪਾਦੇ ਵਲ੍ਲਿਯਾ ਪਲਿਬੁਦ੍ਧੋ ‘‘ਅਦ੍ਧਾ ਏਤ੍ਥ ਕਿਞ੍ਚਿ ਲਦ੍ਧਬ੍ਬਂ ਭਵਿਸ੍ਸਤੀ’’ਤਿ ਤਂ ਵਿਹਾਰਂ ਪਾਵਿਸਿ. ਤਤ੍ਥ ਪਨ ਦ੍ਵੇ ਮਹਲ੍ਲਕਾ ਭਿਕ੍ਖੂ ਵਸ੍ਸਂ ਉਪਗਚ੍ਛਿਂਸੁ. ਤੇ ਦ੍ਵੇ ਚ ਥੂਲਸਾਟਕੇ ਏਕਞ੍ਚ ਸੁਖੁਮਕਮ੍ਬਲਂ ਲਭਿਤ੍ਵਾ ਭਾਜੇਤੁਂ ਅਸਕ੍ਕੋਨ੍ਤਾ ਤਂ ਦਿਸ੍ਵਾ ‘‘ਥੇਰੋ ਨੋ ਭਾਜੇਤ੍ਵਾ ਦਸ੍ਸਤੀ’’ਤਿ ਤੁਟ੍ਠਚਿਤ੍ਤਾ ‘‘ਮਯਂ, ਭਨ੍ਤੇ, ਇਮਂ ਵਸ੍ਸਾਵਾਸਿਕਂ ਭਾਜੇਤੁਂ ਨ ਸਕ੍ਕੋਮ, ਇਮਂ ਨੋ ਨਿਸ੍ਸਾਯ ਵਿਵਾਦੋ ਹੋਤਿ, ਇਦਂ ਅਮ੍ਹਾਕਂ ਭਾਜੇਤ੍ਵਾ ਦੇਥਾ’’ਤਿ ਆਹਂਸੁ. ਸੋ ‘‘ਸਾਧੁ ਭਾਜੇਸ੍ਸਾਮੀ’’ਤਿ ਦ੍ਵੇ ਥੂਲਸਾਟਕੇ ਦ੍ਵਿਨ੍ਨਮ੍ਪਿ ਭਾਜੇਤ੍ਵਾ ‘‘ਅਯਂ ਅਮ੍ਹਾਕਂ ਵਿਨਯਧਰਾਨਂ ਪਾਪੁਣਾਤੀ’’ਤਿ ਕਮ੍ਬਲਂ ਗਹੇਤ੍ਵਾ ਪਕ੍ਕਾਮਿ.

ਤੇਪਿ ਥੇਰਾ ਕਮ੍ਬਲੇ ਸਾਲਯਾ ਤੇਨੇਵ ਸਦ੍ਧਿਂ ਜੇਤਵਨਂ ਗਨ੍ਤ੍ਵਾ ਵਿਨਯਧਰਾਨਂ ਭਿਕ੍ਖੂਨਂ ਤਮਤ੍ਥਂ ਆਰੋਚੇਤ੍ਵਾ ‘‘ਲਬ੍ਭਤਿ ਨੁ ਖੋ, ਭਨ੍ਤੇ, ਵਿਨਯਧਰਾਨਂ ਏਵਂ ਵਿਲੋਪਂ ਖਾਦਿਤੁ’’ਨ੍ਤਿ ਆਹਂਸੁ. ਭਿਕ੍ਖੂ ਉਪਨਨ੍ਦਤ੍ਥੇਰੇਨ ਆਭਤਂ ਪਤ੍ਤਚੀਵਰਰਾਸਿਂ ਦਿਸ੍ਵਾ ‘‘ਮਹਾਪੁਞ੍ਞੋਸਿ ਤ੍ਵਂ ਆਵੁਸੋ, ਬਹੁਂ ਤੇ ਪਤ੍ਤਚੀਵਰਂ ਲਦ੍ਧ’’ਨ੍ਤਿ ਵਦਿਂਸੁ. ਸੋ ‘‘ਕੁਤੋ ਮੇ ਆਵੁਸੋ, ਪੁਞ੍ਞਂ, ਇਮਿਨਾ ਮੇ ਉਪਾਯੇਨ ਇਦਂ ਲਦ੍ਧ’’ਨ੍ਤਿ ਸਬ੍ਬਂ ਕਥੇਸਿ. ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਆਵੁਸੋ, ਉਪਨਨ੍ਦੋ ਸਕ੍ਯਪੁਤ੍ਤੋ ਮਹਾਤਣ੍ਹੋ ਮਹਾਲੋਭੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਨ, ਭਿਕ੍ਖਵੇ, ਉਪਨਨ੍ਦੇਨ ਪਟਿਪਦਾਯ ਅਨੁਚ੍ਛਵਿਕਂ ਕਤਂ, ਪਰਸ੍ਸ ਪਟਿਪਦਂ ਕਥੇਨ੍ਤੇਨ ਨਾਮ ਭਿਕ੍ਖੁਨਾ ਪਠਮਂ ਅਤ੍ਤਨੋ ਅਨੁਚ੍ਛਵਿਕਂ ਕਤ੍ਵਾ ਪਚ੍ਛਾ ਪਰੋ ਓਵਦਿਤਬ੍ਬੋ’’ਤਿ.

‘‘ਅਤ੍ਤਾਨਮੇਵ ਪਠਮਂ, ਪਤਿਰੂਪੇ ਨਿਵੇਸਯੇ;

ਅਥਞ੍ਞਮਨੁਸਾਸੇਯ੍ਯ, ਨ ਕਿਲਿਸ੍ਸੇਯ੍ਯ ਪਣ੍ਡਿਤੋ’’ਤਿ. (ਧ. ਪ. ੧੫੮) –

ਇਮਾਯ ਧਮ੍ਮਪਦੇ ਗਾਥਾਯ ਧਮ੍ਮਂ ਦੇਸੇਤ੍ਵਾ ‘‘ਨ, ਭਿਕ੍ਖਵੇ, ਉਪਨਨ੍ਦੋ ਇਦਾਨੇਵ, ਪੁਬ੍ਬੇਪੇਸ ਮਹਾਤਣ੍ਹੋ ਮਹਾਲੋਭੋਵ, ਨ ਚ ਪਨ ਇਦਾਨੇਵ, ਪੁਬ੍ਬੇਪੇਸ ਇਮੇਸਂ ਸਨ੍ਤਕਂ ਵਿਲੁਮ੍ਪਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਨਦੀਤੀਰੇ ਰੁਕ੍ਖਦੇਵਤਾ ਅਹੋਸਿ. ਤਦਾ ਏਕੋ ਸਿਙ੍ਗਾਲੋ ਮਾਯਾਵਿਂ ਨਾਮ ਭਰਿਯਂ ਗਹੇਤ੍ਵਾ ਨਦੀਤੀਰੇ ਏਕਸ੍ਮਿਂ ਠਾਨੇ ਵਸਿ. ਅਥੇਕਦਿਵਸਂ ਸਿਙ੍ਗਾਲੀ ਸਿਙ੍ਗਾਲਂ ਆਹ ‘‘ਦੋਹਲ਼ੋ ਮੇ ਸਾਮਿ, ਉਪ੍ਪਨ੍ਨੋ, ਅਲ੍ਲਰੋਹਿਤਮਚ੍ਛਂ ਖਾਦਿਤੁਂ ਇਚ੍ਛਾਮੀ’’ਤਿ. ਸਿਙ੍ਗਾਲੋ ‘‘ਅਪ੍ਪੋਸ੍ਸੁਕ੍ਕਾ ਹੋਹਿ, ਆਹਰਿਸ੍ਸਾਮਿ ਤੇ’’ਤਿ ਨਦੀਤੀਰੇ ਚਰਨ੍ਤੋ ਵਲ੍ਲਿਯਾ ਪਾਦੇ ਪਲਿਬੁਜ੍ਝਿਤ੍ਵਾ ਅਨੁਤੀਰਮੇਵ ਅਗਮਾਸਿ. ਤਸ੍ਮਿਂ ਖਣੇ ਗਮ੍ਭੀਰਚਾਰੀ ਚ ਅਨੁਤੀਰਚਾਰੀ ਚਾਤਿ ਦ੍ਵੇ ਉਦ੍ਦਾ ਮਚ੍ਛੇ ਪਰਿਯੇਸਨ੍ਤਾ ਤੀਰੇ ਅਟ੍ਠਂਸੁ. ਤੇਸੁ ਗਮ੍ਭੀਰਚਾਰੀ ਮਹਨ੍ਤਂ ਰੋਹਿਤਮਚ੍ਛਂ ਦਿਸ੍ਵਾ ਵੇਗੇਨ ਉਦਕੇ ਪਵਿਸਿਤ੍ਵਾ ਤਂ ਨਙ੍ਗੁਟ੍ਠੇ ਗਣ੍ਹਿ. ਬਲਵਾ ਮਚ੍ਛੋ ਪਰਿਕਡ੍ਢਨ੍ਤੋ ਯਾਸਿ. ਸੋ ਗਮ੍ਭੀਰਚਾਰੀ ਉਦ੍ਦੋ ‘‘ਮਹਾਮਚ੍ਛੋ ਉਭਿਨ੍ਨਮ੍ਪਿ ਨੋ ਪਹੋਸ੍ਸਤਿ, ਏਹਿ ਮੇ ਸਹਾਯੋ ਹੋਹੀ’’ਤਿ ਇਤਰੇਨ ਸਦ੍ਧਿਂ ਸਲ੍ਲਪਨ੍ਤੋ ਪਠਮਂ ਗਾਥਮਾਹ –

੨੯. ‘‘ਅਨੁਤੀਰਚਾਰੀ ਭਦ੍ਦਨ੍ਤੇ, ਸਹਾਯਮਨੁਧਾਵ ਮਂ;

ਮਹਾ ਮੇ ਗਹਿਤੋ ਮਚ੍ਛੋ, ਸੋ ਮਂ ਹਰਤਿ ਵੇਗਸਾ’’ਤਿ.

ਤਤ੍ਥ ਸਹਾਯਮਨੁਧਾਵ ਮਨ੍ਤਿ ਸਹਾਯ ਅਨੁਧਾਵ ਮਂ, ਸਨ੍ਧਿਵਸੇਨ ਮ-ਕਾਰੋ ਵੁਤ੍ਤੋ. ਇਦਂ ਵੁਤ੍ਤਂ ਹੋਤਿ – ਯਥਾਹਂ ਇਮਿਨਾ ਮਚ੍ਛੇਨ ਨ ਸਂਹੀਰਾਮਿ, ਏਵਂ ਮਂ ਨਙ੍ਗੁਟ੍ਠਖਣ੍ਡੇ ਗਹੇਤ੍ਵਾ ਤ੍ਵਂ ਅਨੁਧਾਵਾਤਿ.

ਤਂ ਸੁਤ੍ਵਾ ਇਤਰੋ ਦੁਤਿਯਂ ਗਾਥਮਾਹ –

੩੦. ‘‘ਗਮ੍ਭੀਰਚਾਰੀ ਭਦ੍ਦਨ੍ਤੇ, ਦਲ਼੍ਹਂ ਗਣ੍ਹਾਹਿ ਥਾਮਸਾ;

ਅਹਂ ਤਂ ਉਦ੍ਧਰਿਸ੍ਸਾਮਿ, ਸੁਪਣ੍ਣੋ ਉਰਗਾਮਿਵਾ’’ਤਿ.

ਤਤ੍ਥ ਥਾਮਸਾਤਿ ਥਾਮੇਨ. ਉਦ੍ਧਰਿਸ੍ਸਾਮੀਤਿ ਨੀਹਰਿਸ੍ਸਾਮਿ. ਸੁਪਣ੍ਣੋ ਉਰਗਾਮਿਵਾਤਿ ਗਰੁਲ਼ੋ ਸਪ੍ਪਂ ਵਿਯ.

ਅਥ ਦ੍ਵੇਪਿ ਤੇ ਏਕਤੋ ਹੁਤ੍ਵਾ ਰੋਹਿਤਮਚ੍ਛਂ ਨੀਹਰਿਤ੍ਵਾ ਥਲੇ ਠਪੇਤ੍ਵਾ ਮਾਰੇਤ੍ਵਾ ‘‘ਤ੍ਵਂ ਭਾਜੇਹਿ, ਤ੍ਵਂ ਭਾਜੇਹੀ’’ਤਿ ਕਲਹਂ ਕਤ੍ਵਾ ਭਾਜੇਤੁਂ ਅਸਕ੍ਕੋਨ੍ਤਾ ਠਪੇਤ੍ਵਾ ਨਿਸੀਦਿਂਸੁ. ਤਸ੍ਮਿਂ ਕਾਲੇ ਸਿਙ੍ਗਾਲੋ ਤਂ ਠਾਨਂ ਅਨੁਪ੍ਪਤ੍ਤੋ. ਤੇ ਤਂ ਦਿਸ੍ਵਾ ਉਭੋਪਿ ਪਚ੍ਚੁਗ੍ਗਮਨਂ ਕਤ੍ਵਾ ‘‘ਅਯਂ, ਸਮ੍ਮ, ਦਬ੍ਭਪੁਪ੍ਫਮਚ੍ਛੋ ਅਮ੍ਹੇਹਿ ਏਕਤੋ ਹੁਤ੍ਵਾ ਗਹਿਤੋ, ਤਂ ਨੋ ਭਾਜੇਤੁਂ ਅਸਕ੍ਕੋਨ੍ਤਾਨਂ ਵਿਵਾਦੋ ਉਪ੍ਪਨ੍ਨੋ, ਸਮਭਾਗਂ ਨੋ ਭਾਜੇਤ੍ਵਾ ਦੇਹੀ’’ਤਿ ਤਤਿਯਂ ਗਾਥਮਾਹਂਸੁ –

੩੧. ‘‘ਵਿਵਾਦੋ ਨੋ ਸਮੁਪ੍ਪਨ੍ਨੋ, ਦਬ੍ਭਪੁਪ੍ਫ ਸੁਣੋਹਿ ਮੇ;

ਸਮੇਹਿ ਮੇਧਗਂ ਸਮ੍ਮਾ, ਵਿਵਾਦੋ ਵੂਪਸਮ੍ਮਤ’’ਨ੍ਤਿ.

ਤਤ੍ਥ ਦਬ੍ਭਪੁਪ੍ਫਾਤਿ ਦਬ੍ਭਪੁਪ੍ਫਸਮਾਨਵਣ੍ਣਤਾਯ ਤਂ ਆਲਪਨ੍ਤਿ. ਮੇਧਗਨ੍ਤਿ ਕਲਹਂ.

ਤੇਸਂ ਵਚਨਂ ਸੁਤ੍ਵਾ ਸਿਙ੍ਗਾਲੋ ਅਤ੍ਤਨੋ ਬਲਂ ਦੀਪੇਨ੍ਤੋ –

੩੨. ‘‘ਧਮ੍ਮਟ੍ਠੋਹਂ ਪੁਰੇ ਆਸਿਂ, ਬਹੂ ਅਡ੍ਡਾ ਮੇ ਤੀਰਿਤਾ;

ਸਮੇਮਿ ਮੇਧਗਂ ਸਮ੍ਮਾ, ਵਿਵਾਦੋ ਵੂਪਸਮ੍ਮਤ’’ਨ੍ਤਿ. –

ਇਦਂ ਗਾਥਂ ਵਤ੍ਵਾ ਭਾਜੇਨ੍ਤੋ –

੩੩. ‘‘ਅਨੁਤੀਰਚਾਰਿ ਨਙ੍ਗੁਟ੍ਠਂ, ਸੀਸਂ ਗਮ੍ਭੀਰਚਾਰਿਨੋ;

ਅਚ੍ਚਾਯਂ ਮਜ੍ਝਿਮੋ ਖਣ੍ਡੋ, ਧਮ੍ਮਟ੍ਠਸ੍ਸ ਭਵਿਸ੍ਸਤੀ’’ਤਿ. –

ਇਮਂ ਗਾਥਮਾਹ –

ਤਤ੍ਥ ਪਠਮਗਾਥਾਯ ਅਯਮਤ੍ਥੋ – ਅਹਂ ਪੁਬ੍ਬੇ ਰਾਜੂਨਂ ਵਿਨਿਚ੍ਛਯਾਮਚ੍ਚੋ ਆਸਿਂ, ਤੇਨ ਮਯਾ ਵਿਨਿਚ੍ਛਯੇ ਨਿਸੀਦਿਤ੍ਵਾ ਬਹੂ ਅਡ੍ਡਾ ਤੀਰਿਤਾ, ਤੇਸਂ ਤੇਸਂ ਬ੍ਰਾਹ੍ਮਣਗਹਪਤਿਕਾਦੀਨਂ ਬਹੂ ਅਡ੍ਡਾ ਤੀਰਿਤਾ ਵਿਨਿਚ੍ਛਿਤਾ, ਸ੍ਵਾਹਂ ਤੁਮ੍ਹਾਦਿਸਾਨਂ ਸਮਜਾਤਿਕਾਨਂ ਚਤੁਪ੍ਪਦਾਨਂ ਅਡ੍ਡਂ ਤੀਰੇਤੁਂ ਕਿਂ ਨ ਸਕ੍ਖਿਸ੍ਸਾਮਿ, ਅਹਂ ਵੋ ਸਮੇਮਿ ਮੇਧਗਂ, ਸਮ੍ਮਾ ਮਂ ਨਿਸ੍ਸਾਯ ਤੁਮ੍ਹਾਕਂ ਵਿਵਾਦੋ ਵੂਪਸਮ੍ਮਤੂਤਿ.

ਏਵਞ੍ਚ ਪਨ ਵਤ੍ਵਾ ਮਚ੍ਛਂ ਤਯੋ ਕੋਟ੍ਠਾਸੇ ਕਤ੍ਵਾ ਅਨੁਤੀਰਚਾਰਿ ਤ੍ਵਂ ਨਙ੍ਗੁਟ੍ਠਂ ਗਣ੍ਹ, ਸੀਸਂ ਗਮ੍ਭੀਰਚਾਰਿਨੋ ਹੋਤੁ. ਅਚ੍ਚਾਯਂ ਮਜ੍ਝਿਮੋ ਖਣ੍ਡੋਤਿ ਅਪਿਚ ਅਯਂ ਮਜ੍ਝਿਮੋ ਕੋਟ੍ਠਾਸੋ. ਅਥ ਵਾ ਅਚ੍ਚਾਤਿ ਅਤਿਚ੍ਚ, ਇਮੇ ਦ੍ਵੇ ਕੋਟ੍ਠਾਸੇ ਅਤਿਕ੍ਕਮਿਤ੍ਵਾ ਠਿਤੋ ਅਯਂ ਮਜ੍ਝਿਮੋ ਖਣ੍ਡੋ ਧਮ੍ਮਟ੍ਠਸ੍ਸ ਵਿਨਿਚ੍ਛਯਸਾਮਿਕਸ੍ਸ ਮਯ੍ਹਂ ਭਵਿਸ੍ਸਤੀਤਿ.

ਏਵਂ ਤਂ ਮਚ੍ਛਂ ਵਿਭਜਿਤ੍ਵਾ ‘‘ਤੁਮ੍ਹੇ ਕਲਹਂ ਅਕਤ੍ਵਾ ਨਙ੍ਗੁਟ੍ਠਞ੍ਚ ਸੀਸਞ੍ਚ ਖਾਦਥਾ’’ਤਿ ਵਤ੍ਵਾ ਮਜ੍ਝਿਮਖਣ੍ਡਂ ਮੁਖੇਨ ਡਂਸਿਤ੍ਵਾ ਤੇਸਂ ਪਸ੍ਸਨ੍ਤਾਨਂਯੇਵ ਪਲਾਯਿ. ਤੇ ਸਹਸ੍ਸਂ ਪਰਾਜਿਤਾ ਵਿਯ ਦੁਮ੍ਮੁਖਾ ਨਿਸੀਦਿਤ੍ਵਾ ਗਾਥਮਾਹਂਸੁ –

੩੪. ‘‘ਚਿਰਮ੍ਪਿ ਭਕ੍ਖੋ ਅਭਵਿਸ੍ਸ, ਸਚੇ ਨ ਵਿਵਦੇਮਸੇ;

ਅਸੀਸਕਂ ਅਨਙ੍ਗੁਟ੍ਠਂ, ਸਿਙ੍ਗਾਲੋ ਹਰਤਿ ਰੋਹਿਤ’’ਨ੍ਤਿ.