੪੦. ਦੇਵਹਿਤਬ੍ਰਾਹ੍ਮਣਵਤ੍ਥੁ

ਪੁਬ੍ਬੇਨਿਵਾਸਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦੇਵਹਿਤਬ੍ਰਾਹ੍ਮਣਸ੍ਸ ਪਞ੍ਹਂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਭਗਵਾ ਵਾਤਰੋਗੇਨ ਆਬਾਧਿਕੋ ਹੁਤ੍ਵਾ ਉਪਵਾਣਤ੍ਥੇਰਂ ਉਣ੍ਹੋਦਕਤ੍ਥਾਯ ਦੇਵਹਿਤਬ੍ਰਾਹ੍ਮਣਸ੍ਸ ਸਨ੍ਤਿਕਂ ਪਹਿਣਿ. ਸੋ ਗਨ੍ਤ੍ਵਾ ਸਤ੍ਥੁ ਆਬਾਧਿਕਭਾਵਂ ਆਚਿਕ੍ਖਿਤ੍ਵਾ ਉਣ੍ਹੋਦਕਂ ਯਾਚਿ, ਤਂ ਸੁਤ੍ਵਾ ਬ੍ਰਾਹ੍ਮਣੋ ਤੁਟ੍ਠਮਾਨਸੋ ਹੁਤ੍ਵਾ ‘‘ਲਾਭਾ ਵਤ ਮੇ, ਯਂ ਮਮ ਸਨ੍ਤਿਕਂ ਸਮ੍ਮਾਸਮ੍ਬੁਦ੍ਧੋ ਉਣ੍ਹੋਦਕਸ੍ਸਤ੍ਥਾਯ ਸਾਵਕਂ ਪਹਿਣੀ’’ਤਿ ਉਣ੍ਹੋਦਕਸ੍ਸ ਕਾਜਂ ਪੁਰਿਸੇਨ ਗਾਹਾਪੇਤ੍ਵਾ ਫਾਣਿਤਸ੍ਸ ਚ ਪੁਟਂ ਉਪਵਾਣਤ੍ਥੇਰਸ੍ਸ ਪਾਦਾਸਿ. ਥੇਰੋ ਤਂ ਗਾਹਾਪੇਤ੍ਵਾ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਉਣ੍ਹੋਦਕੇਨ ਨ੍ਹਾਪੇਤ੍ਵਾ ਉਣ੍ਹੋਦਕੇਨ ਫਾਣਿਤਂ ਆਲੋਲ਼ੇਤ੍ਵਾ ਭਗਵਤੋ ਪਾਦਾਸਿ, ਤਸ੍ਸ ਤਙ੍ਖਣੇਯੇਵ ਸੋ ਆਬਾਧੋ ਪਟਿਪਸ੍ਸਮ੍ਭਿ. ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਕਸ੍ਸ ਨੁ ਖੋ ਦੇਯ੍ਯਧਮ੍ਮੋ ਦਿਨ੍ਨੋ ਮਹਪ੍ਫਲੋ ਹੋਤਿ, ਸਤ੍ਥਾਰਂ ਪੁਚ੍ਛਿਸ੍ਸਾਮੀ’’ਤਿ ਸੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਪੁਚ੍ਛਨ੍ਤੋ ਇਮਂ ਗਾਥਮਾਹ –

‘‘ਕਤ੍ਥ ਦਜ੍ਜਾ ਦੇਯ੍ਯਧਮ੍ਮਂ, ਕਤ੍ਥ ਦਿਨ੍ਨਂ ਮਹਪ੍ਫਲਂ;

ਕਥਞ੍ਹਿ ਯਜਮਾਨਸ੍ਸ, ਕਥਂ ਇਜ੍ਝਤਿ ਦਕ੍ਖਿਣਾ’’ਤਿ. (ਸਂ. ਨਿ. ੧.੧੯੯);

ਅਥਸ੍ਸ ਸਤ੍ਥਾ ‘‘ਏਵਰੂਪਸ੍ਸ ਬ੍ਰਾਹ੍ਮਣਸ੍ਸ ਦਿਨ੍ਨਂ ਮਹਪ੍ਫਲਂ ਹੋਤੀ’’ਤਿ ਵਤ੍ਵਾ ਬ੍ਰਾਹ੍ਮਣਂ ਪਕਾਸੇਨ੍ਤੋ ਇਮਂ ਗਾਥਮਾਹ –

੪੨੩. ‘‘ਪੁਬ੍ਬੇਨਿਵਾਸਂ ਯੋ ਵੇਦਿ, ਸਗ੍ਗਾਪਾਯਞ੍ਚ ਪਸ੍ਸਤਿ;

ਅਥੋ ਜਾਤਿਕ੍ਖਯਂ ਪਤ੍ਤੋ, ਅਭਿਞ੍ਞਾਵੋਸਿਤੋ ਮੁਨਿ; (ਸਂ. ਨਿ. ੧.੧੯੯);

ਸਬ੍ਬਵੋਸਿਤਵੋਸਾਨਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣ’’ਨ੍ਤਿ.

ਤਸ੍ਸਤ੍ਥੋ – ਯੋ ਪੁਬ੍ਬੇਨਿਵਾਸਂ ਪਾਕਟਂ ਕਤ੍ਵਾ ਜਾਨਾਤਿ, ਛਬ੍ਬੀਸਤਿਦੇਵਲੋਕਭੇਦਂ ਸਗ੍ਗਞ੍ਚ ਚਤੁਬ੍ਬਿਧਂ ਅਪਾਯਞ੍ਚ ਦਿਬ੍ਬਚਕ੍ਖੁਨਾ ਪਸ੍ਸਤਿ, ਅਥੋ ਜਾਤਿਕ੍ਖਯਸਙ੍ਖਾਤਂ ਅਰਹਤ੍ਤਂ ਪਤ੍ਤੋ, ਅਭਿਞ੍ਞੇਯ੍ਯਂ ਧਮ੍ਮਂ ਅਭਿਜਾਨਿਤ੍ਵਾ ਪਰਿਞ੍ਞੇਯ੍ਯਂ ਪਰਿਜਾਨਿਤ੍ਵਾ ਪਹਾਤਬ੍ਬਂ ਪਹਾਯ ਸਚ੍ਛਿਕਾਤਬ੍ਬਂ ਸਚ੍ਛਿਕਤ੍ਵਾ ਵੋਸਿਕੋ ਨਿਟ੍ਠਾਨਂ ਪਤ੍ਤੋ, ਵੁਸਿਤਵੋਸਾਨਂ ਵਾ ਪਤ੍ਤੋ, ਆਸਵਕ੍ਖਯਪਞ੍ਞਾਯ ਮੋਨਭਾਵਂ ਪਤ੍ਤਤ੍ਤਾ ਮੁਨਿ, ਤਮਹਂ ਸਬ੍ਬੇਸਂ ਕਿਲੇਸਾਨਂ ਵੋਸਾਨਂ ਅਰਹਤ੍ਤਮਗ੍ਗਞਾਣਂ ਬ੍ਰਹ੍ਮਚਰਿਯਵਾਸਂ ਵੁਤ੍ਥਭਾਵੇਨ ਸਬ੍ਬਵੋਸਿਤਵੋਸਾਨਂ ਬ੍ਰਾਹ੍ਮਣਂ ਵਦਾਮੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ. ਬ੍ਰਾਹ੍ਮਣੋਪਿ ਪਸਨ੍ਨਮਾਨਸੋ ਸਰਣੇਸੁ ਪਤਿਟ੍ਠਾਯ ਉਪਾਸਕਤ੍ਤਂ ਪਵੇਦੇਸੀਤਿ.

ਦੇਵਹਿਤਬ੍ਰਾਹ੍ਮਣਵਤ੍ਥੁ ਚਤ੍ਤਾਲੀਸਂ.

ਬ੍ਰਾਹ੍ਮਣਵਗ੍ਗਵਣ੍ਣਨਾ ਨਿਟ੍ਠਿਤਾ.

ਛਬ੍ਬੀਸਤਿਮੋ ਵਗ੍ਗੋ.

ਨਿਗਮਨਕਥਾ

ਏਤ੍ਤਾਵਤਾ ਸਬ੍ਬਪਠਮੇ ਯਮਕਵਗ੍ਗੇ ਚੁਦ੍ਦਸ ਵਤ੍ਥੂਨਿ, ਅਪ੍ਪਮਾਦਵਗ੍ਗੇ ਨਵ, ਚਿਤ੍ਤਵਗ੍ਗੇ ਨਵ, ਪੁਪ੍ਫਵਗ੍ਗੇ ਦ੍ਵਾਦਸ, ਬਾਲਵਗ੍ਗੇ ਪਨ੍ਨਰਸ, ਪਣ੍ਡਿਤਵਗ੍ਗੇ ਏਕਾਦਸ, ਅਰਹਨ੍ਤਵਗ੍ਗੇ ਦਸ, ਸਹਸ੍ਸਵਗ੍ਗੇ ਚੁਦ੍ਦਸ, ਪਾਪਵਗ੍ਗੇ ਦ੍ਵਾਦਸ, ਦਣ੍ਡਵਗ੍ਗੇ ਏਕਾਦਸ, ਜਰਾਵਗ੍ਗੇ ਨਵ, ਅਤ੍ਤਵਗ੍ਗੇ ਦਸ, ਲੋਕਵਗ੍ਗੇ ਏਕਾਦਸ, ਬੁਦ੍ਧਵਗ੍ਗੇ ਨਵ, ਸੁਖਵਗ੍ਗੇ ਅਟ੍ਠ, ਪਿਯਵਗ੍ਗੇ ਨਵ, ਕੋਧਵਗ੍ਗੇ ਅਟ੍ਠ, ਮਲਵਗ੍ਗੇ ਦ੍ਵਾਦਸ, ਧਮ੍ਮਟ੍ਠਵਗ੍ਗੇ ਦਸ, ਮਗ੍ਗਵਗ੍ਗੇ ਦ੍ਵਾਦਸ, ਪਕਿਣ੍ਣਕਵਗ੍ਗੇ ਨਵ, ਨਿਰਯਵਗ੍ਗੇ ਨਵ, ਨਾਗਵਗ੍ਗੇ ਅਟ੍ਠ, ਤਣ੍ਹਾਵਗ੍ਗੇ ਦ੍ਵਾਦਸ, ਭਿਕ੍ਖੁਵਗ੍ਗੇ ਦ੍ਵਾਦਸ, ਬ੍ਰਾਹ੍ਮਣਵਗ੍ਗੇ ਚਤ੍ਤਾਲੀਸਾਤਿ ਪਞ੍ਚਾਧਿਕਾਨਿ ਤੀਣਿ ਵਤ੍ਥੁਸਤਾਨਿ ਪਕਾਸੇਤ੍ਵਾ ਨਾਤਿਸਙ੍ਖੇਪਨਾਤਿਵਿਤ੍ਥਾਰਵਸੇਨ ਉਪਰਚਿਤਾ ਦ੍ਵਾਸਤ੍ਤਤਿਭਾਣਵਾਰਪਮਾਣਾ ਧਮ੍ਮਪਦਸ੍ਸ ਅਤ੍ਥਵਣ੍ਣਨਾ ਨਿਟ੍ਠਿਤਾਤਿ.

ਪਤ੍ਤਂ ਧਮ੍ਮਪਦਂ ਯੇਨ, ਧਮ੍ਮਰਾਜੇਨਨੁਤ੍ਤਰਂ;

ਗਾਥਾ ਧਮ੍ਮਪਦੇ ਤੇਨ, ਭਾਸਿਤਾ ਯਾ ਮਹੇਸਿਨਾ.

ਸਤੇਵੀਸਾ ਚਤੁਸ੍ਸਤਾ, ਚਤੁਸਚ੍ਚਵਿਭਾਵਿਨਾ;

ਸਤਤ੍ਤਯਞ੍ਹਿ ਵਤ੍ਥੂਨਂ, ਪਞ੍ਚਾਧਿਕਾ ਸਮੁਟ੍ਠਿਤਾ.

ਵਿਹਾਰੇ ਅਧਿਰਾਜੇਨ, ਕਾਰਿਤਮ੍ਹਿ ਕਤਞ੍ਞੁਨਾ;

ਪਾਸਾਦੇ ਸਿਰਿਕੂਟਸ੍ਸ, ਰਞ੍ਞੋ ਵਿਹਰਤਾ ਮਯਾ.

ਅਤ੍ਥਬ੍ਯਞ੍ਜਨਸਮ੍ਪਨ੍ਨਂ, ਅਤ੍ਥਾਯ ਚ ਹਿਤਾਯ ਚ;

ਲੋਕਸ੍ਸ ਲੋਕਨਾਥਸ੍ਸ, ਸਦ੍ਧਮ੍ਮਟ੍ਠਿਤਿਕਮ੍ਯਤਾ.

ਤਾਸਂ ਅਟ੍ਠਕਥਂ ਏਤਂ, ਕਰੋਨ੍ਤੇਨ ਸੁਨਿਮ੍ਮਲਂ;

ਦ੍ਵਾਸਤ੍ਤਤਿਪਮਾਣਾਯ, ਭਾਣਵਾਰੇਹਿ ਪਾਲ਼ਿਯਾ.

ਯਂ ਪਤ੍ਤਂ ਕੁਸਲਂ ਤੇਨ, ਕੁਸਲਾ ਸਬ੍ਬਪਾਣਿਨਂ;

ਸਬ੍ਬੇ ਇਜ੍ਝਨ੍ਤੁ ਸਙ੍ਕਪ੍ਪਾ, ਲਭਨ੍ਤੁ ਮਧੁਰਂ ਫਲਨ੍ਤਿ.

ਪਰਮਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਪਟਿਮਣ੍ਡਿਤੇਨ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਸਮੁਦਯਸਮੁਦਿਤੇਨ ਸਕਸਮਯਸਮਯਨ੍ਤਰਗਹਨਜ੍ਝੋਗਾਹਣਸਮਤ੍ਥੇਨ ਪਞ੍ਞਾਵੇਯ੍ਯਤ੍ਤਿਯਸਮਨ੍ਨਾਗਤੇਨ ਤਿਪਿਟਕਪਰਿਯਤ੍ਤਿਪ੍ਪਭੇਦੇ ਸਾਟ੍ਠਕਥੇ ਸਤ੍ਥੁਸਾਸਨੇ ਅਪ੍ਪਟਿਹਤਞਾਣਪ੍ਪਭਾਵੇਨ ਮਹਾਵੇਯ੍ਯਾਕਰਣੇਨ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਲਾਵਣ੍ਣਯੁਤ੍ਤੇਨ ਯੁਤ੍ਤਮੁਤ੍ਤਵਾਦਿਨਾ ਵਾਦੀਵਰੇਨ ਮਹਾਕਵਿਨਾ ਪਭਿਨ੍ਨਪਟਿਸਮ੍ਭਿਦਾਪਰਿਵਾਰੇ ਛਲ਼ਭਿਞ੍ਞਾਪਟਿਸਮ੍ਭਿਦਾਦਿਪ੍ਪਭੇਦਗੁਣਪਟਿਮਣ੍ਡਿਤੇ ਉਤ੍ਤਰਿਮਨੁਸ੍ਸਧਮ੍ਮੇ ਸੁਪ੍ਪਤਿਟ੍ਠਿਤਬੁਦ੍ਧੀਨਂ ਥੇਰਵਂਸਪ੍ਪਦੀਪਾਨਂ ਥੇਰਾਨਂ ਮਹਾਵਿਹਾਰਵਾਸੀਨਂ ਵਂਸਾਲਙ੍ਕਾਰਭੂਤੇਨ ਵਿਪੁਲਵਿਸੁਦ੍ਧਬੁਦ੍ਧਿਨਾ ਬੁਦ੍ਧਘੋਸੋਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਥੇਰੇਨ ਕਤਾਯਂ ਧਮ੍ਮਪਦਟ੍ਠਕਥਾ –

ਤਾਵ ਤਿਟ੍ਠਤੁ ਲੋਕਸ੍ਮਿਂ, ਲੋਕਨਿਤ੍ਥਰਣੇਸਿਨਂ;

ਦਸ੍ਸੇਨ੍ਤੀ ਕੁਲਪੁਤ੍ਤਾਨਂ, ਨਯਂ ਸਦ੍ਧਾਦਿਬੁਦ੍ਧਿਯਾ.

ਯਾਵ ਬੁਦ੍ਧੋਤਿ ਨਾਮਮ੍ਪਿ, ਸੁਦ੍ਧਚਿਤ੍ਤਸ੍ਸ ਤਾਦਿਨੋ;

ਲੋਕਮ੍ਹਿ ਲੋਕਜੇਟ੍ਠਸ੍ਸ, ਪਵਤ੍ਤਤਿ ਮਹੇਸਿਨੋਤਿ.

ਇਤਿ ਤੇਵੀਸਾਧਿਕਚਤੁਸਤਗਾਥਾਪਞ੍ਚਾਧਿਕਤਿਸਤਵਤ੍ਥੁਪਟਿਮਣ੍ਡਿਤਾ

ਛਬ੍ਬੀਸਤਿਵਗ੍ਗਸਮਨ੍ਨਾਗਤਾ ਧਮ੍ਮਪਦਵਣ੍ਣਨਾ ਸਮਤ੍ਤਾ.

ਧਮ੍ਮਪਦ-ਅਟ੍ਠਕਥਾ ਸਬ੍ਬਾਕਾਰੇਨ ਨਿਟ੍ਠਿਤਾ.