੩੩. ਜਟਿਲਤ੍ਥੇਰਵਤ੍ਥੁ

ਯੋਧ ਤਣ੍ਹਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਜਟਿਲਤ੍ਥੇਰਂ ਆਰਬ੍ਭ ਕਥੇਸਿ.

ਤਤ੍ਰਾਯਂ ਅਨੁਪੁਬ੍ਬੀ ਕਥਾ – ਅਤੀਤੇ ਕਿਰ ਬਾਰਾਣਸਿਯਂ ਦ੍ਵੇ ਭਾਤਰੋ ਕੁਟੁਮ੍ਬਿਕਾ ਮਹਨ੍ਤਂ ਉਚ੍ਛੁਖੇਤ੍ਤਂ ਕਾਰੇਸੁਂ. ਅਥੇਕਦਿਵਸਂ ਕਨਿਟ੍ਠਭਾਤਾ ਉਚ੍ਛੁਖੇਤ੍ਤਂ ਗਨ੍ਤ੍ਵਾ ‘‘ਏਕਂ ਜੇਟ੍ਠਭਾਤਿਕਸ੍ਸ ਦਸ੍ਸਾਮਿ, ਏਕਂ ਮਯ੍ਹਂ ਭਵਿਸ੍ਸਤੀ’’ਤਿ ਦ੍ਵੇ ਉਚ੍ਛੁਯਟ੍ਠਿਯੋ ਰਸਸ੍ਸ ਅਨਿਕ੍ਖਮਨਤ੍ਥਾਯ ਛਿਨ੍ਨਟ੍ਠਾਨੇ ਬਨ੍ਧਿਤ੍ਵਾ ਗਣ੍ਹਿ. ਤਦਾ ਕਿਰ ਉਚ੍ਛੂਨਂ ਯਨ੍ਤੇਨ ਪੀਲ਼ਨਕਿਚ੍ਚਂ ਨਤ੍ਥਿ, ਅਗ੍ਗੇ ਵਾ ਮੂਲੇ ਵਾ ਛਿਨ੍ਦਿਤ੍ਵਾ ਉਕ੍ਖਿਤ੍ਤਕਾਲੇ ਧਮ੍ਮਕਰਣਤੋ ਉਦਕਂ ਵਿਯ ਸਯਮੇਵ ਰਸੋ ਨਿਕ੍ਖਮਤਿ. ਤਸ੍ਸ ਪਨ ਖੇਤ੍ਤਤੋ ਉਚ੍ਛੁਯਟ੍ਠਿਯੋ ਗਹੇਤ੍ਵਾ ਆਗਮਨਕਾਲੇ ਗਨ੍ਧਮਾਦਨੇ ਪਚ੍ਚੇਕਬੁਦ੍ਧੋ ਸਮਾਪਤ੍ਤਿਤੋ ਵੁਟ੍ਠਾਯ ‘‘ਕਸ੍ਸ ਨੁ ਖੋ ਅਜ੍ਜ ਅਨੁਗ੍ਗਹਂ ਕਰਿਸ੍ਸਾਮੀ’’ਤਿ ਉਪਧਾਰੇਨ੍ਤੋ ਤਂ ਅਤ੍ਤਨੋ ਞਾਣਜਾਲੇ ਪਵਿਟ੍ਠਂ ਦਿਸ੍ਵਾ ਸਙ੍ਗਹਂ ਕਾਤੁਂ ਸਮਤ੍ਥਭਾਵਞ੍ਚ ਞਤ੍ਵਾ ਪਤ੍ਤਚੀਵਰਂ ਆਦਾਯ ਇਦ੍ਧਿਯਾ ਆਗਨ੍ਤ੍ਵਾ ਤਸ੍ਸ ਪੁਰਤੋ ਅਟ੍ਠਾਸਿ. ਸੋ ਤਂ ਦਿਸ੍ਵਾਵ ਪਸਨ੍ਨਚਿਤ੍ਤੋ ਉਤ੍ਤਰਸਾਟਕਂ ਉਚ੍ਚਤਰੇ ਭੂਮਿਪਦੇਸੇ ਅਤ੍ਥਰਿਤ੍ਵਾ, ‘‘ਭਨ੍ਤੇ, ਇਧ ਨਿਸੀਦਥਾ’’ਤਿ ਪਚ੍ਚੇਕਬੁਦ੍ਧਂ ਨਿਸੀਦਾਪੇਤ੍ਵਾ ‘‘ਪਤ੍ਤਂ ਉਪਨਾਮੇਥਾ’’ਤਿ ਉਚ੍ਛੁਯਟ੍ਠਿਯਾ ਬਨ੍ਧਨਟ੍ਠਾਨਂ ਮੋਚੇਤ੍ਵਾ ਪਤ੍ਤਸ੍ਸ ਉਪਰਿ ਅਕਾਸਿ, ਰਸੋ ਓਤਰਿਤ੍ਵਾ ਪਤ੍ਤਂ ਪੂਰੇਸਿ. ਪਚ੍ਚੇਕਬੁਦ੍ਧੇਨ ਤਸ੍ਮਿਂ ਰਸੇ ਪੀਤੇ ‘‘ਸਾਧੁਕਂ ਵਤ ਮੇ ਅਯ੍ਯੇਨ ਰਸੋ ਪੀਤੋ. ਸਚੇ ਮੇ ਜੇਟ੍ਠਭਾਤਿਕੋ ਮੂਲਂ ਆਹਰਾਪੇਸ੍ਸਤਿ, ਮੂਲਂ ਦਸ੍ਸਾਮਿ. ਸਚੇ ਪਤ੍ਤਿਂ ਆਹਰਾਪੇਸ੍ਸਤਿ, ਪਤ੍ਤਿਂ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਭਨ੍ਤੇ, ਪਤ੍ਤਂ ਮੇ ਉਪਨਾਮੇਥਾ’’ਤਿ ਦੁਤਿਯਮ੍ਪਿ ਉਚ੍ਛੁਯਟ੍ਠਿਂ ਮੋਚੇਤ੍ਵਾ ਰਸਂ ਅਦਾਸਿ. ‘‘ਭਾਤਾ ਮੇ ਉਚ੍ਛੁਖੇਤ੍ਤਤੋ ਅਞ੍ਞਂ ਉਚ੍ਛੁਂ ਆਹਰਿਤ੍ਵਾ ਖਾਦਿਸ੍ਸਤੀ’’ਤਿ ਏਤ੍ਤਕਮ੍ਪਿ ਕਿਰਸ੍ਸ ਵਞ੍ਚਨਚਿਤ੍ਤਂ ਨਾਹੋਸਿ. ਪਚ੍ਚੇਕਬੁਦ੍ਧੋ ਪਨ ਪਠਮਂ ਉਚ੍ਛੁਰਸਸ੍ਸ ਪੀਤਤ੍ਤਾ ਤਂ ਉਚ੍ਛੁਰਸਂ ਅਞ੍ਞੇਹਿਪਿ ਸਦ੍ਧਿਂ ਸਂਵਿਭਜਿਤੁਕਾਮੋ ਹੁਤ੍ਵਾ ਗਹੇਤ੍ਵਾਵ ਨਿਸੀਦਿ. ਸੋ ਤਸ੍ਸ ਆਕਾਰਂ ਞਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ, ‘‘ਭਨ੍ਤੇ, ਯੋ ਅਯਂ ਮਯਾ ਦਿਨ੍ਨੋ ਅਗ੍ਗਰਸੋ, ਇਮਸ੍ਸ ਨਿਸ੍ਸਨ੍ਦੇਨ ਦੇਵਮਨੁਸ੍ਸੇਸੁ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਪਰਿਯੋਸਾਨੇ ਤੁਮ੍ਹੇਹਿ ਪਤ੍ਤਧਮ੍ਮਮੇਵ ਪਾਪੁਣੇਯ੍ਯ’’ਨ੍ਤਿ ਪਤ੍ਥਨਂ ਪਟ੍ਠਪੇਸਿ. ਪਚ੍ਚੇਕਬੁਦ੍ਧੋਪਿਸ੍ਸ ‘‘ਏਵਂ ਹੋਤੂ’’ਤਿ ਵਤ੍ਵਾ ‘‘ਇਚ੍ਛਿਤਂ ਪਤ੍ਥਿਤਂ ਤੁਯ੍ਹ’’ਨ੍ਤਿ ਦ੍ਵੀਹਿ ਗਾਥਾਹਿ ਅਨੁਮੋਦਨਂ ਕਤ੍ਵਾ ਯਥਾ ਸੋ ਪਸ੍ਸਤਿ, ਏਵਂ ਅਧਿਟ੍ਠਹਿਤ੍ਵਾ ਆਕਾਸੇਨ ਗਨ੍ਧਮਾਦਨਂ ਗਨ੍ਤ੍ਵਾ ਪਞ੍ਚਨ੍ਨਂ ਪਚ੍ਚੇਕਬੁਦ੍ਧਸਤਾਨਂ ਤਂ ਰਸਂ ਅਦਾਸਿ.

ਸੋ ਤਂ ਪਾਟਿਹਾਰਿਯਂ ਦਿਸ੍ਵਾ ਭਾਤੁ ਸਨ੍ਤਿਕਂ ਗਨ੍ਤ੍ਵਾ ‘‘ਕਹਂ ਗਤੋਸੀ’’ਤਿ ਵੁਤ੍ਤੇ ‘‘ਉਚ੍ਛੁਖੇਤ੍ਤਂ ਓਲੋਕੇਤੁਂ ਗਤੋਮ੍ਹੀ’’ਤਿ. ‘‘ਕਿਂ ਤਾਦਿਸੇਨ ਉਚ੍ਛੁਖੇਤ੍ਤਂ ਗਤੇਨ, ਨਨੁ ਨਾਮ ਏਕਂ ਵਾ ਦ੍ਵੇ ਵਾ ਉਚ੍ਛੁਯਟ੍ਠਿਯੋ ਆਦਾਯ ਆਗਨ੍ਤਬ੍ਬਂ ਭਵੇਯ੍ਯਾ’’ਤਿ ਭਾਤਰਾ ਵੁਤ੍ਤੋ – ‘‘ਆਮ, ਭਾਤਿਕ, ਦ੍ਵੇ ਮੇ ਉਚ੍ਛੁਯਟ੍ਠਿਯੋ ਗਹਿਤਾ, ਏਕਂ ਪਨ ਪਚ੍ਚੇਕਬੁਦ੍ਧਂ ਦਿਸ੍ਵਾ ਮਮ ਉਚ੍ਛੁਯਟ੍ਠਿਤੋ ਰਸਂ ਦਤ੍ਵਾ ‘ਮੂਲਂ ਵਾ ਪਤ੍ਤਿਂ ਵਾ ਦਸ੍ਸਾਮੀ’ਤਿ ਤੁਮ੍ਹਾਕਮ੍ਪਿ ਮੇ ਉਚ੍ਛੁਯਟ੍ਠਿਤੋ ਰਸੋ ਦਿਨ੍ਨੋ, ਕਿਂ ਨੁ ਖੋ ਤਸ੍ਸ ਮੂਲਂ ਗਣ੍ਹਿਸ੍ਸਥ, ਉਦਾਹੁ ਪਤ੍ਤਿ’’ਨ੍ਤਿ ਆਹ. ‘‘ਕਿਂ ਪਨ ਪਚ੍ਚੇਕਬੁਦ੍ਧੇਨ ਕਤ’’ਨ੍ਤਿ? ‘‘ਮਮ ਉਚ੍ਛੁਯਟ੍ਠਿਤੋ ਰਸਂ ਪਿਵਿਤ੍ਵਾ ਤੁਮ੍ਹਾਕਂ ਉਚ੍ਛੁਯਟ੍ਠਿਤੋ ਰਸਂ ਆਦਾਯ ਆਕਾਸੇਨ ਗਨ੍ਧਮਾਦਨਂ ਗਨ੍ਤ੍ਵਾ ਪਞ੍ਚਸਤਾਨਂ ਪਚ੍ਚੇਕਬੁਦ੍ਧਾਨਂ ਅਦਾਸੀ’’ਤਿ. ਸੋ ਤਸ੍ਮਿਂ ਕਥੇਨ੍ਤੇਯੇਵ ਨਿਰਨ੍ਤਰਂ ਪੀਤਿਯਾ ਫੁਟ੍ਠਸਰੀਰੋ ਹੁਤ੍ਵਾ ‘‘ਤੇਨ ਮੇ ਪਚ੍ਚੇਕਬੁਦ੍ਧੇਨ ਦਿਟ੍ਠਧਮ੍ਮਸ੍ਸੇਵ ਅਧਿਗਮੋ ਭਵੇਯ੍ਯਾ’’ਤਿ ਪਤ੍ਥਨਂ ਅਕਾਸਿ. ਏਵਂ ਕਨਿਟ੍ਠੇਨ ਤਿਸ੍ਸੋ ਸਮ੍ਪਤ੍ਤਿਯੋ ਪਤ੍ਥਿਤਾ, ਜੇਟ੍ਠੇਨ ਪਨ ਏਕਪਦੇਨੇਵ ਅਰਹਤ੍ਤਂ ਪਤ੍ਥਿਤਨ੍ਤਿ ਇਦਂ ਤੇਸਂ ਪੁਬ੍ਬਕਮ੍ਮਂ.

ਤੇ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਏਕਂ ਬੁਦ੍ਧਨ੍ਤਰਂ ਖੇਪਯਿਂਸੁ. ਤੇਸਂ ਦੇਵਲੋਕੇ ਠਿਤਕਾਲੇਯੇਵ ਵਿਪਸ੍ਸੀ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਜ੍ਜਿ. ਤੇਪਿ ਦੇਵਲੋਕਤੋ ਚਵਿਤ੍ਵਾ ਬਨ੍ਧੁਮਤਿਯਾ ਏਕਸ੍ਮਿਂ ਕੁਲਗੇਹੇ ਜੇਟ੍ਠੋ ਜੇਟ੍ਠੋਵ, ਕਨਿਟ੍ਠੋ ਕਨਿਟ੍ਠੋਵ ਹੁਤ੍ਵਾ ਪਟਿਸਨ੍ਧਿਂ ਗਣ੍ਹਿਂਸੁ. ਤੇਸੁ ਜੇਟ੍ਠਸ੍ਸ ਸੇਨੋਤਿ ਨਾਮਂ ਅਕਂਸੁ, ਕਨਿਟ੍ਠਸ੍ਸ ਅਪਰਾਜਿਤੋਤਿ. ਤੇਸੁ ਵਯਪ੍ਪਤ੍ਤਕਾਲੇ ਕੁਟੁਮ੍ਬਂ ਸਣ੍ਠਾਪੇਤ੍ਵਾ ਵਿਹਰਨ੍ਤੇਸੁ ‘‘ਬੁਦ੍ਧਰਤਨਂ ਲੋਕੇ ਉਪ੍ਪਨ੍ਨਂ, ਧਮ੍ਮਰਤਨਂ, ਸਙ੍ਘਰਤਨਂ, ਦਾਨਾਨਿ ਦੇਥ, ਪੁਞ੍ਞਾਨਿ ਕਰੋਥ, ਅਜ੍ਜ ਅਟ੍ਠਮੀ, ਅਜ੍ਜ ਚਾਤੁਦ੍ਦਸੀ, ਅਜ੍ਜ ਪਨ੍ਨਰਸੀ, ਉਪੋਸਥਂ ਕਰੋਥ, ਧਮ੍ਮਂ ਸੁਣਾਥਾ’’ਤਿ ਧਮ੍ਮਘੋਸਕਸ੍ਸ ਬਨ੍ਧੁਮਤੀਨਗਰੇ ਘੋਸਨਂ ਸੁਤ੍ਵਾ ਮਹਾਜਨਂ ਪੁਰੇਭਤ੍ਤਂ ਦਾਨਂ ਦਤ੍ਵਾ ਪਚ੍ਛਾਭਤ੍ਤਂ ਧਮ੍ਮਸ੍ਸਵਨਾਯ ਗਚ੍ਛਨ੍ਤਂ ਦਿਸ੍ਵਾ ਸੇਨਕੁਟੁਮ੍ਬਿਕੋ ‘‘ਕਹਂ ਗਚ੍ਛਥਾ’’ਤਿ ਪੁਚ੍ਛਿਤ੍ਵਾ ‘‘ਸਤ੍ਥੁ ਸਨ੍ਤਿਕਂ ਧਮ੍ਮਸ੍ਸਵਨਾਯਾ’’ਤਿ ਵੁਤ੍ਤੇ ‘‘ਅਹਮ੍ਪਿ ਗਮਿਸ੍ਸਾਮੀ’’ਤਿ ਤੇਹਿ ਸਦ੍ਧਿਂਯੇਵ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਨਿਸੀਦਿ.

ਸਤ੍ਥਾ ਤਸ੍ਸ ਅਜ੍ਝਾਸਯਂ ਵਿਦਿਤ੍ਵਾ ਅਨੁਪੁਬ੍ਬਿਂ ਕਥਂ ਕਥੇਸਿ. ਸੋ ਸਤ੍ਥੁ ਧਮ੍ਮਂ ਸੁਤ੍ਵਾ ਪਬ੍ਬਜ੍ਜਾਯ ਉਸ੍ਸਾਹਜਾਤੋ ਸਤ੍ਥਾਰਂ ਪਬ੍ਬਜ੍ਜਂ ਯਾਚਿ. ਅਥ ਨਂ ਸਤ੍ਥਾ ‘‘ਅਤ੍ਥਿ ਪਨ ਤੇ ਅਪਲੋਕੇਤਬ੍ਬਾ ਞਾਤਕਾ’’ਤਿ ਪੁਚ੍ਛਿ. ਅਤ੍ਥਿ, ਭਨ੍ਤੇਤਿ. ਤੇਨ ਹਿ ਅਪਲੋਕੇਤ੍ਵਾ ਏਹੀਤਿ. ਸੋ ਕਨਿਟ੍ਠਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਯਂ ਇਮਸ੍ਮਿਂ ਕੁਲੇ ਸਾਪਤੇਯ੍ਯਂ, ਤਂ ਸਬ੍ਬਂ ਤਵ ਹੋਤੂ’’ਤਿ ਆਹ. ਤੁਮ੍ਹੇ ਪਨ, ਸਾਮੀਤਿ. ਅਹਂ ਸਤ੍ਥੁ ਸਨ੍ਤਿਕੇ ਪਬ੍ਬਜਿਸ੍ਸਾਮੀਤਿ. ਸਾਮਿ ਕਿਂ ਵਦੇਥ, ਅਹਂ ਮਾਤਰਿ ਮਤਾਯ ਮਾਤਰਂ ਵਿਯ, ਪਿਤਰਿ ਮਤੇ ਪਿਤਰਂ ਵਿਯ ਤੁਮ੍ਹੇ ਅਲਤ੍ਥਂ, ਇਦਂ ਕੁਲਂ ਮਹਾਭੋਗਂ, ਗੇਹੇ ਠਿਤੇਨੇਵ ਸਕ੍ਕਾ ਪੁਞ੍ਞਾਨਿ ਕਾਤੁਂ, ਮਾ ਏਵਂ ਕਰਿਤ੍ਥਾਤਿ. ਮਯਾ ਸਤ੍ਥੁ ਸਨ੍ਤਿਕੇ ਧਮ੍ਮੋ ਸੁਤੋ, ਨ ਸਕ੍ਕਾ ਤਂ ਅਗਾਰਮਜ੍ਝੇ ਠਿਤੇਨ ਪੂਰੇਤੁਂ, ਪਬ੍ਬਜਿਸ੍ਸਾਮੇਵਾਹਂ, ਤ੍ਵਂ ਨਿਵਤ੍ਤਾਹੀਤਿ. ਏਵਂ ਸੋ ਕਨਿਟ੍ਠਂ ਨਿਵਤ੍ਤਾਪੇਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਨ ਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਕਨਿਟ੍ਠੋਪਿ ‘‘ਭਾਤੁ ਪਬ੍ਬਜਿਤਸਕ੍ਕਾਰਂ ਕਰਿਸ੍ਸਾਮੀ’’ਤਿ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਭਾਤਰਂ ਵਨ੍ਦਿਤ੍ਵਾ ਆਹ – ‘‘ਭਨ੍ਤੇ, ਤੁਮ੍ਹੇਹਿ ਅਤ੍ਤਨੋ ਭਵਨਿਸ੍ਸਰਣਂ ਕਤਂ, ਅਹਂ ਪਨ ਪਞ੍ਚਹਿ ਕਾਮਗੁਣੇਹਿ ਬਦ੍ਧੋ ਨਿਕ੍ਖਮਿਤ੍ਵਾ ਪਬ੍ਬਜਿਤੁਂ ਨ ਸਕ੍ਕੋਮਿ, ਮਯ੍ਹਂ ਗੇਹੇ ਠਿਤਸ੍ਸੇਵ ਅਨੁਚ੍ਛਵਿਕਂ ਮਹਨ੍ਤਂ ਪੁਞ੍ਞਕਮ੍ਮਂ ਆਚਿਕ੍ਖਥਾ’’ਤਿ. ਅਥ ਨਂ ਥੇਰੋ ‘‘ਸਾਧੁ ਸਾਧੁ, ਪਣ੍ਡਿਤ, ਸਤ੍ਥੁ ਗਨ੍ਧਕੁਟਿਂ ਕਰੋਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਨਾਨਾਦਾਰੂਨਿ ਆਹਰਾਪੇਤ੍ਵਾ ਥਮ੍ਭਾਦੀਨਂ ਅਤ੍ਥਾਯ ਤਚ੍ਛਾਪੇਤ੍ਵਾ ਏਕਂ ਸੁਵਣ੍ਣਖਚਿਤਂ, ਏਕਂ ਰਜਤਖਚਿਤਂ, ਏਕਂ ਮਣਿਖਚਿਤਨ੍ਤਿ ਸਬ੍ਬਾਨਿ ਸਤ੍ਤਰਤਨਖਚਿਤਾਨਿ ਕਾਰੇਤ੍ਵਾ ਤੇਹਿ ਗਨ੍ਧਕੁਟਿਂ ਕਾਰੇਤ੍ਵਾ ਸਤ੍ਤਰਤਨਖਚਿਤਾਹੇਵ ਛਦਨਿਟ੍ਠਕਾਹਿ ਛਾਦਾਪੇਸਿ. ਗਨ੍ਧਕੁਟਿਯਾ ਕਰਣਕਾਲੇਯੇਵ ਪਨ ਤਂ ਅਤ੍ਤਨਾ ਸਮਾਨਨਾਮਕੋ ਅਪਰਾਜਿਤੋਯੇਵ ਨਾਮ ਭਾਗਿਨੇਯ੍ਯੋ ਉਪਸਙ੍ਕਮਿਤ੍ਵਾ ‘‘ਅਹਮ੍ਪਿ ਕਰਿਸ੍ਸਾਮਿ, ਮਯ੍ਹਮ੍ਪਿ ਪਤ੍ਤਿਂ ਦੇਥ ਮਾਤੁਲਾ’’ਤਿ ਆਹ. ਨ ਦੇਮਿ, ਤਾਤ, ਅਞ੍ਞੇਹਿ ਅਸਾਧਾਰਣਂ ਕਰਿਸ੍ਸਾਮੀਤਿ. ਸੋ ਬਹੁਮ੍ਪਿ ਯਾਚਿਤ੍ਵਾ ਪਤ੍ਤਿਂ ਅਲਭਮਾਨੋ ‘‘ਗਨ੍ਧਕੁਟਿਯਾ ਪੁਰਤੋ ਕੁਞ੍ਜਰਸਾਲਂ ਲਦ੍ਧੁਂ ਵਟ੍ਟਤੀ’’ਤਿ ਸਤ੍ਤਰਤਨਮਯਂ ਕੁਞ੍ਜਰਸਾਲਂ ਕਾਰੇਸਿ. ਸੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮੇਣ੍ਡਕਸੇਟ੍ਠਿ ਹੁਤ੍ਵਾ ਨਿਬ੍ਬਤ੍ਤਿ.

ਗਨ੍ਧਕੁਟਿਯਂ ਪਨ ਸਤ੍ਤਰਤਨਮਯਾਨਿ ਤੀਣਿ ਮਹਾਵਾਤਪਾਨਾਨਿ ਅਹੇਸੁਂ. ਤੇਸਂ ਅਭਿਮੁਖੇ ਹੇਟ੍ਠਾ ਸੁਧਾਪਰਿਕਮ੍ਮਕਤਾ ਤਿਸ੍ਸੋ ਪੋਕ੍ਖਰਣਿਯੋ ਕਾਰੇਤ੍ਵਾ ਚਤੁਜ੍ਜਾਤਿਕਗਨ੍ਧੋਦਕਸ੍ਸ ਪੂਰੇਤ੍ਵਾ ਅਪਰਾਜਿਤੋ, ਗਹਪਤਿ, ਪਞ੍ਚਵਣ੍ਣਾਨਿ ਕੁਸੁਮਾਨਿ ਰੋਪਾਪੇਸਿ ਤਥਾਗਤਸ੍ਸ ਅਨ੍ਤੋ ਨਿਸਿਨ੍ਨਕਾਲੇ ਵਾਤਵੇਗੇਨ ਸਮੁਟ੍ਠਿਤਾਹਿ ਰੇਣੁਵਟ੍ਟੀਹਿ ਸਰੀਰਸ੍ਸ ਓਕਿਰਣਤ੍ਥਂ. ਗਨ੍ਧਕੁਟਿਥੂਪਿਕਾਯ ਕਪਲ੍ਲਂ ਰਤ੍ਤਸੁਵਣ੍ਣਮਯਂ ਅਹੋਸਿ, ਪਵਾਲ਼ਮਯਾ ਸਿਖਰਾ, ਹੇਟ੍ਠਾ ਮਣਿਮਯਾ ਛਦਨਿਟ੍ਠਕਾ. ਇਤਿ ਸਾ ਨਚ੍ਚਨ੍ਤੋ ਵਿਯ ਮੋਰੋ ਸੋਭਮਾਨਾ ਅਟ੍ਠਾਸਿ. ਸਤ੍ਤਸੁ ਪਨ ਰਤਨੇਸੁ ਕੋਟ੍ਟੇਤਬ੍ਬਯੁਤ੍ਤਕਂ ਕੋਟ੍ਟੇਤ੍ਵਾ ਇਤਰਂ ਸਕਲਮੇਵ ਗਹੇਤ੍ਵਾ ਜਣ੍ਣੁਮਤ੍ਤੇਨ ਓਧਿਨਾ ਗਨ੍ਧਕੁਟਿਂ ਪਰਿਕ੍ਖਿਪਿਤ੍ਵਾ ਪਰਿਵੇਣਂ ਪੂਰੇਸਿ.

ਏਵਂ ਗਨ੍ਧਕੁਟਿਂ ਨਿਟ੍ਠਾਪੇਤ੍ਵਾ ਅਪਰਾਜਿਤੋ, ਗਹਪਤਿ, ਭਾਤਿਕਤ੍ਥੇਰਂ ਉਪਸਙ੍ਕਮਿਤ੍ਵਾ ਆਹ – ‘‘ਭਨ੍ਤੇ, ਨਿਟ੍ਠਿਤਾ ਗਨ੍ਧਕੁਟਿ, ਪਰਿਭੋਗਮਸ੍ਸਾ ਪਚ੍ਚਾਸੀਸਾਮਿ, ਪਰਿਭੋਗੇਨ ਕਿਰ ਮਹਨ੍ਤਂ ਪੁਞ੍ਞਂ ਹੋਤੀ’’ਤਿ. ਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਇਮਿਨਾ ਕਿਰ ਵੋ ਕੁਟੁਮ੍ਬਿਕੇਨ ਗਨ੍ਧਕੁਟਿ ਕਾਰਿਤਾ, ਇਦਾਨਿ ਪਨ ਪਰਿਭੋਗਂ ਪਚ੍ਚਾਸੀਸਤੀ’’ਤਿ ਆਹ. ਸਤ੍ਥਾ ਉਟ੍ਠਾਯਾਸਨਾ ਗਨ੍ਧਕੁਟਿਅਭਿਮੁਖਂ ਗਨ੍ਤ੍ਵਾ ਗਨ੍ਧਕੁਟਿਂ ਪਰਿਕ੍ਖਿਪਿਤ੍ਵਾ ਪਰਿਕ੍ਖਿਤ੍ਤਰਤਨਰਾਸਿਂ ਓਲੋਕੇਨ੍ਤੋ ਦ੍ਵਾਰਕੋਟ੍ਠਕੇ ਅਟ੍ਠਾਸਿ. ਅਥ ਨਂ ਕੁਟੁਮ੍ਬਿਕੋ ‘‘ਪਵਿਸਥ, ਭਨ੍ਤੇ’’ਤਿ ਆਹ. ਸਤ੍ਥਾ ਤਤ੍ਥੇਵ ਠਤ੍ਵਾ ਤਤਿਯਵਾਰੇ ਤਸ੍ਸ ਭਾਤਿਕਤ੍ਥੇਰਂ ਓਲੋਕੇਸਿ. ਸੋ ਓਲੋਕਿਤਾਕਾਰੇਨੇਵ ਞਤ੍ਵਾ ਕਨਿਟ੍ਠਭਾਤਰਂ ਆਹ – ‘‘ਏਹਿ, ਤਾਤ, ‘ਮਮੇਵ ਰਕ੍ਖਾ ਭਵਿਸ੍ਸਤਿ, ਤੁਮ੍ਹੇ ਯਥਾਸੁਖਂ ਵਸਥਾ’ਤਿ ਸਤ੍ਥਾਰਂ ਵਦੇਹੀ’’ਤਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਸਤ੍ਥਾਰਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ, ‘‘ਭਨ੍ਤੇ, ਯਥਾ ਮਨੁਸ੍ਸਾ ਰੁਕ੍ਖਮੂਲੇ ਪਵਿਸਿਤ੍ਵਾ ਅਨਪੇਕ੍ਖਾ ਪਕ੍ਕਮਨ੍ਤਿ, ਯਥਾ ਵਾ ਨਦਿਂ ਤਰਿਤ੍ਵਾ ਉਲ਼ੁਮ੍ਪਂ ਅਨਪੇਕ੍ਖਾ ਪਰਿਚ੍ਚਜਨ੍ਤਿ, ਏਵਂ ਅਨਪੇਕ੍ਖਾ ਹੁਤ੍ਵਾ ਤੁਮ੍ਹੇ ਵਸਥਾ’’ਤਿ ਆਹ. ਕਿਮਤ੍ਥਂ ਪਨ ਸਤ੍ਥਾ ਅਟ੍ਠਾਸਿ? ਏਵਂ ਕਿਰਸ੍ਸ ਅਹੋਸਿ – ‘‘ਬੁਦ੍ਧਾਨਂ ਸਨ੍ਤਿਕਂ ਪੁਰੇਭਤ੍ਤਮ੍ਪਿ ਪਚ੍ਛਾਭਤ੍ਤਮ੍ਪਿ ਬਹੂ ਆਗਚ੍ਛਨ੍ਤਿ, ਤੇਸੁ ਰਤਨਾਨਿ ਆਦਾਯ ਪਕ੍ਕਮਨ੍ਤੇਸੁ ਨ ਸਕ੍ਕਾ ਅਮ੍ਹੇਹਿ ਵਾਰੇਤੁਂ, ਪਰਿਵੇਣਮ੍ਹਿ ਏਤ੍ਤਕੇ ਰਤਨੇ ਵੋਕਿਣ੍ਣੇ ਅਤ੍ਤਨੋ ਉਪਟ੍ਠਾਕੇ ਹਰਨ੍ਤੇਪਿ ਨ ਵਾਰੇਤੀਤਿ ਕੁਟੁਮ੍ਬਿਕੋ ਮਯਿ ਆਘਾਤਂ ਕਤ੍ਵਾ ਅਪਾਯੂਪਗੋ ਭਵੇਯ੍ਯਾ’’ਤਿ ਇਮਿਨਾ ਕਾਰਣੇਨ ਅਟ੍ਠਾਸਿ. ਤੇਨ ਪਨ, ‘‘ਭਨ੍ਤੇ, ਮਮੇਵ ਰਕ੍ਖਾ ਭਵਿਸ੍ਸਤਿ, ਤੁਮ੍ਹੇ ਵਸਥਾ’’ਤਿ ਵੁਤ੍ਤੇ ਪਾਵਿਸਿ.

ਕੁਟੁਮ੍ਬਿਕੋ ਸਮਨ੍ਤਾ ਰਕ੍ਖਂ ਠਪੇਤ੍ਵਾ ਮਨੁਸ੍ਸੇ ਆਹ – ‘‘ਤਾਤਾ, ਉਚ੍ਛਙ੍ਗੇਨ ਵਾ ਪਚ੍ਛਿਪਸਿਬ੍ਬਕੇਹਿ ਵਾ ਆਦਾਯ ਗਚ੍ਛਨ੍ਤੇ ਵਾਰੇਯ੍ਯਾਥ, ਹਤ੍ਥੇਨ ਗਹੇਤ੍ਵਾ ਗਚ੍ਛਨ੍ਤੇ ਪਨ ਮਾ ਵਾਰਯਿਤ੍ਥਾ’’ਤਿ. ਅਨ੍ਤੋਨਗਰੇਪਿ ਆਰੋਚਾਪੇਸਿ ‘‘ਮਯਾ ਗਨ੍ਧਕੁਟਿਪਰਿਵੇਣੇ ਸਤ੍ਤ ਰਤਨਾਨਿ ਓਕਿਣ੍ਣਾਨਿ, ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਗਚ੍ਛਨ੍ਤਾ ਦੁਗ੍ਗਤਮਨੁਸ੍ਸਾ ਉਭੋ ਹਤ੍ਥੇ ਪੂਰੇਤ੍ਵਾ ਗਣ੍ਹਨ੍ਤੁ, ਸੁਖਿਤਾਪਿ ਏਕੇਨ ਗਣ੍ਹਨ੍ਤੂ’’ਤਿ. ਏਵਂ ਕਿਰਸ੍ਸ ਅਹੋਸਿ ‘‘ਸਦ੍ਧਾ ਤਾਵ ਧਮ੍ਮਂ ਸੋਤੁਕਾਮਾ ਗਮਿਸ੍ਸਨ੍ਤਿਯੇਵ, ਅਸ੍ਸਦ੍ਧਾਪਿ ਪਨ ਧਨਲੋਭੇਨ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਦੁਕ੍ਖਤੋ ਮੁਚ੍ਚਿਸ੍ਸਨ੍ਤੀ’’ਤਿ. ਤਸ੍ਮਾ ਜਨਸਙ੍ਗਹਤ੍ਥਾਯ ਏਵਂ ਆਰੋਚਾਪੇਸਿ. ਮਹਾਜਨੋ ਤੇਨ ਵੁਤ੍ਤਨਿਯਾਮੇਨੇਵ ਰਤਨਾਨਿ ਗਣ੍ਹਿ. ਸਕਿਂ ਓਕਿਣ੍ਣਰਤਨੇਸੁ ਖੀਣੇਸੁ ਯਾਵਤਤਿਯਂ ਜਣ੍ਣੁਮਤ੍ਤੇਨ ਓਧਿਨਾ ਓਕਿਰਾਪੇਸਿਯੇਵ. ਸਤ੍ਥੁ ਪਨ ਪਾਦਮੂਲੇ ਤਿਪੁਸਮਤ੍ਤਂ ਅਨਗ੍ਘਂ ਮਣਿਰਤਨਂ ਠਪੇਸਿ. ਏਵਂ ਕਿਰਸ੍ਸ ਅਹੋਸਿ – ‘‘ਸਤ੍ਥੁ ਸਰੀਰਤੋ ਸੁਵਣ੍ਣਵਣ੍ਣਾਯ ਪਭਾਯ ਸਦ੍ਧਿਂ ਮਣਿਪਭਂ ਓਲੋਕੇਨ੍ਤਾਨਂ ਤਿਤ੍ਤਿ ਨਾਮ ਨ ਭਵਿਸ੍ਸਤੀ’’ਤਿ. ਤਸ੍ਮਾ ਏਵਮਕਾਸਿ. ਮਹਾਜਨੋਪਿ ਅਤਿਤ੍ਤੋਵ ਓਲੋਕੇਸਿ.

ਅਥੇਕਦਿਵਸਂ ਏਕੋ ਮਿਚ੍ਛਾਦਿਟ੍ਠਿਕਬ੍ਰਾਹ੍ਮਣੋ ‘‘ਸਤ੍ਥੁ ਕਿਰ ਪਾਦਮੂਲੇ ਮਹਗ੍ਘਂ ਮਣਿਰਤਨਂ ਨਿਕ੍ਖਿਤ੍ਤਂ, ਹਰਿਸ੍ਸਾਮਿ ਨ’’ਨ੍ਤਿ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤੁਂ ਆਗਤਸ੍ਸ ਮਹਾਜਨਸ੍ਸ ਅਨ੍ਤਰੇਨ ਪਾਵਿਸਿ. ਕੁਟੁਮ੍ਬਿਕੋ ਤਸ੍ਸ ਪਵਿਸਨਾਕਾਰੇਨੇਵ ‘‘ਮਣਿਂ ਗਣ੍ਹਿਤੁਕਾਮੋ’’ਤਿ ਸਲ੍ਲਕ੍ਖੇਤ੍ਵਾ ‘‘ਅਹੋ ਵਤ ਨ ਗਣ੍ਹੇਯ੍ਯਾ’’ਤਿ ਚਿਨ੍ਤੇਸਿ. ਸੋਪਿ ਸਤ੍ਥਾਰਂ ਵਨ੍ਦਨ੍ਤੋ ਵਿਯ ਪਾਦਮੂਲੇ ਹਤ੍ਥਂ ਉਪਨਾਮੇਤ੍ਵਾ ਮਣਿਂ ਗਹੇਤ੍ਵਾ ਓਵਟ੍ਟਿਕਾਯ ਕਤ੍ਵਾ ਪਕ੍ਕਾਮਿ. ਕੁਟੁਮ੍ਬਿਕੋ ਤਸ੍ਮਿਂ ਚਿਤ੍ਤਂ ਪਸਾਦੇਤੁਂ ਨਾਸਕ੍ਖਿ. ਸੋ ਧਮ੍ਮਕਥਾਵਸਾਨੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਆਹ – ‘‘ਭਨ੍ਤੇ, ਮਯਾ ਤਿਕ੍ਖਤ੍ਤੁਂ ਗਨ੍ਧਕੁਟਿਂ ਪਰਿਕ੍ਖਿਪਿਤ੍ਵਾ ਜਣ੍ਣੁਮਤ੍ਤੇਨ ਓਧਿਨਾ ਸਤ੍ਤ ਰਤਨਾਨਿ ਓਕਿਣ੍ਣਾਨਿ, ਤਾਨਿ ਮੇ ਗਣ੍ਹਨ੍ਤੇਸੁ ਆਘਾਤੋ ਨਾਮ ਨਾਹੋਸਿ, ਚਿਤ੍ਤਂ ਭਿਯ੍ਯੋ ਭਿਯ੍ਯੋ ਪਸੀਦਿਯੇਵ. ਅਜ੍ਜ ਪਨ ‘ਅਹੋ ਵਤਾਯਂ ਬ੍ਰਾਹ੍ਮਣੋ ਮਣਿਂ ਨ ਗਣ੍ਹੇਯ੍ਯਾ’ਤਿ ਚਿਨ੍ਤੇਤ੍ਵਾ ਤਸ੍ਮਿਂ ਮਣਿਂ ਆਦਾਯ ਗਤੇ ਚਿਤ੍ਤਂ ਪਸਾਦੇਤੁਂ ਨਾਸਕ੍ਖਿ’’ਨ੍ਤਿ. ਸਤ੍ਥਾ ਤਸ੍ਸ ਵਚਨਂ ਸੁਤ੍ਵਾ ‘‘ਨਨੁ, ਉਪਾਸਕ, ਅਤ੍ਤਨੋ ਸਨ੍ਤਕਂ ਪਰੇਹਿ ਅਨਾਹਰਣੀਯਂ ਕਾਤੁਂ ਸਕ੍ਕੋਸੀ’’ਤਿ ਨਯਂ ਅਦਾਸਿ. ਸੋ ਸਤ੍ਥਾਰਾ ਦਿਨ੍ਨਨਯੇ ਠਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਅਜ੍ਜ ਆਦਿਂ ਕਤ੍ਵਾ ਮਮ ਸਨ੍ਤਕਂ ਦਸਿਕਸੁਤ੍ਤਮਤ੍ਤਮ੍ਪਿ ਮਂ ਅਭਿਭਵਿਤ੍ਵਾ ਅਨੇਕਸਤਾਪਿ ਰਾਜਾਨੋ ਵਾ ਚੋਰਾ ਵਾ ਗਣ੍ਹਿਤੁਂ ਸਮਤ੍ਥਾ ਨਾਮ ਮਾ ਹੋਨ੍ਤੁ, ਅਗ੍ਗਿਨਾਪਿ ਮਮ ਸਨ੍ਤਕਂ ਮਾ ਡਯ੍ਹਤੁ, ਉਦਕੇਨਪਿ ਮਾ ਵੁਯ੍ਹਤੂ’’ਤਿ ਪਤ੍ਥਨਂ ਅਕਾਸਿ. ਸਤ੍ਥਾਪਿਸ੍ਸ ‘‘ਏਵਂ ਹੋਤੂ’’ਤਿ ਅਨੁਮੋਦਨਂ ਅਕਾਸਿ. ਸੋ ਗਨ੍ਧਕੁਟਿਮਹਂ ਕਰੋਨ੍ਤੋ ਅਟ੍ਠਸਟ੍ਠਿਯਾ ਭਿਕ੍ਖੁਸਤਸਹਸ੍ਸਾਨਂ ਅਨ੍ਤੋਵਿਹਾਰੇਯੇਵ ਨਵ ਮਾਸੇ ਮਹਾਦਾਨਂ ਦਤ੍ਵਾ ਦਾਨਪਰਿਯੋਸਾਨੇ ਸਬ੍ਬੇਸਂ ਤਿਚੀਵਰਂ ਅਦਾਸਿ. ਸਙ੍ਘਨਵਕਸ੍ਸ ਚੀਵਰਸਾਟਕਾ ਸਹਸ੍ਸਗ੍ਘਨਕਾ ਅਹੇਸੁਂ.

ਸੋ ਏਵਂ ਯਾਵਤਾਯੁਕਂ ਪੁਞ੍ਞਾਨਿ ਕਰਿਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਏਤ੍ਤਕਂ ਕਾਲਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਏਕਸ੍ਮਿਂ ਸੇਟ੍ਠਿਕੁਲੇ ਪਟਿਸਨ੍ਧਿਂ ਗਹੇਤ੍ਵਾ ਅਡ੍ਢਮਾਸਾਧਿਕੇ ਨਵ ਮਾਸੇ ਮਾਤੁਕੁਚ੍ਛਿਯਂ ਵਸਿ. ਜਾਤਦਿਵਸੇ ਪਨਸ੍ਸ ਸਕਲਨਗਰੇ ਸਬ੍ਬਾਵੁਧਾਨਿ ਪਜ੍ਜਲਿਂਸੁ, ਸਬ੍ਬੇਸਂ ਕਾਯਰੂਲ਼੍ਹਾਨਿ ਆਭਰਣਾਨਿਪਿ ਪਜ੍ਜਲਿਤਾਨਿ ਵਿਯ ਓਭਾਸਂ ਮੁਞ੍ਚਿਂਸੁ, ਨਗਰਂ ਏਕਪਜ੍ਜੋਤਂ ਅਹੋਸਿ. ਸੇਟ੍ਠਿਪਿ ਪਾਤੋਵ ਰਾਜੂਪਟ੍ਠਾਨਂ ਅਗਮਾਸਿ. ਅਥ ਨਂ ਰਾਜਾ ਪੁਚ੍ਛਿ – ‘‘ਅਜ੍ਜ ਸਬ੍ਬਾਵੁਧਾਨਿ ਪਜ੍ਜਲਿਂਸੁ, ਨਗਰਂ ਏਕਪਜ੍ਜੋਤਂ ਜਾਤਂ, ਜਾਨਾਸਿ ਨੁ ਖੋ ਏਤ੍ਥ ਕਾਰਣ’’ਨ੍ਤਿ? ‘‘ਜਾਨਾਮਿ, ਦੇਵਾ’’ਤਿ. ‘‘ਕਿਂ, ਸੇਟ੍ਠੀ’’ਤਿ? ‘‘ਮਮ ਗੇਹੇ ਤੁਮ੍ਹਾਕਂ ਦਾਸੋ ਜਾਤੋ, ਤਸ੍ਸ ਪੁਞ੍ਞਤੇਜੇਨੇਵਂ ਅਹੋਸੀ’’ਤਿ. ‘‘ਕਿਂ ਨੁ ਖੋ ਚੋਰੋ ਭਵਿਸ੍ਸਤੀ’’ਤਿ? ‘‘ਨਤ੍ਥੇਤਂ, ਦੇਵ, ਪੁਞ੍ਞਵਾ ਸਤ੍ਤੋ ਕਤਾਭਿਨੀਹਾਰੋ’’ਤਿ. ‘‘ਤੇਨ ਹਿ ਨਂ ਸਮ੍ਮਾ ਪੋਸੇਤੁਂ ਵਟ੍ਟਤਿ, ਇਦਮਸ੍ਸ ਖੀਰਮੂਲਂ ਹੋਤੂ’’ਤਿ ਦੇਵਸਿਕਂ ਸਹਸ੍ਸਂ ਪਟ੍ਠਪੇਸਿ. ਅਥਸ੍ਸ ਨਾਮਗਹਣਦਿਵਸੇ ਸਕਲਨਗਰਸ੍ਸ ਏਕਪਜ੍ਜੋਤਭੂਤਤ੍ਤਾ ਜੋਤਿਕੋਤ੍ਵੇਵ ਨਾਮਂ ਕਰਿਂਸੁ.

ਅਥਸ੍ਸ ਵਯਪ੍ਪਤ੍ਤਕਾਲੇ ਗੇਹਕਰਣਤ੍ਥਾਯ ਭੂਮਿਤਲੇ ਸੋਧਿਯਮਾਨੇ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ‘‘ਕਿਂ ਨੁ ਖੋ ਇਦ’’ਨ੍ਤਿ ਉਪਧਾਰਯਮਾਨੋ ‘‘ਜੋਤਿਕਸ੍ਸ ਗੇਹਟ੍ਠਾਨਂ ਗਣ੍ਹਨ੍ਤੀ’’ਤਿ ਞਤ੍ਵਾ ‘‘ਨਾਯਂ ਏਤੇਹਿ ਕਤਗੇਹੇ ਵਸਿਸ੍ਸਤਿ, ਮਯਾਪੇਤ੍ਥ ਗਨ੍ਤੁਂ ਵਟ੍ਟਤੀ’’ਤਿ ਵਡ੍ਢਕੀਵੇਸੇਨ ਤਤ੍ਥ ਗਨ੍ਤ੍ਵਾ ‘‘ਕਿਂ ਕਰੋਥਾ’’ਤਿ ਆਹ. ‘‘ਜੋਤਿਕਸ੍ਸ ਗੇਹਟ੍ਠਾਨਂ ਗਣ੍ਹਾਮਾ’’ਤਿ. ‘‘ਅਪੇਥ, ਨਾਯਂ ਤੁਮ੍ਹੇਹਿ ਕਤਗੇਹੇ ਵਸਿਸ੍ਸਤੀ’’ਤਿ ਵਤ੍ਵਾ ਸੋਲ਼ਸਕਰੀਸਮਤ੍ਤਂ ਭੂਮਿਪਦੇਸਂ ਓਲੋਕੇਸਿ, ਸੋ ਤਾਵਦੇਵ ਕਸਿਣਮਣ੍ਡਲਂ ਵਿਯ ਸਮੋ ਅਹੋਸਿ. ਪੁਨ ‘‘ਇਮਸ੍ਮਿਂ ਠਾਨੇ ਪਥਵਿਂ ਭਿਨ੍ਦਿਤ੍ਵਾ ਸਤ੍ਤਰਤਨਮਯੋ ਸਤ੍ਤਭੂਮਿਕਪਾਸਾਦੋ ਉਟ੍ਠਹਤੂ’’ਤਿ ਚਿਨ੍ਤੇਤ੍ਵਾ ਓਲੋਕੇਸਿ, ਤਾਵਦੇਵ ਤਥਾਰੂਪੋ ਪਾਸਾਦੋ ਉਟ੍ਠਹਿ. ਪੁਨ ‘‘ਇਮਂ ਪਰਿਕ੍ਖਿਪਿਤ੍ਵਾ ਸਤ੍ਤਰਤਨਮਯਾ ਸਤ੍ਤ ਪਾਕਾਰਾ ਉਟ੍ਠਹਨ੍ਤੂ’’ਤਿ ਚਿਨ੍ਤੇਤ੍ਵਾ ਓਲੋਕੇਸਿ, ਤਥਾਰੂਪਾ ਪਾਕਾਰਾ ਉਟ੍ਠਹਿਂਸੁ. ਅਥ ‘‘ਨੇਸਂ ਪਰਿਯਨ੍ਤੇ ਕਪ੍ਪਰੁਕ੍ਖਾ ਉਟ੍ਠਹਨ੍ਤੂ’’ਤਿ ਚਿਨ੍ਤੇਤ੍ਵਾ ਓਲੋਕੇਸਿ, ਤਥਾਰੂਪਾ ਕਪ੍ਪਰੁਕ੍ਖਾ ਉਟ੍ਠਹਿਂਸੁ. ‘‘ਪਾਸਾਦਸ੍ਸ ਚਤੂਸੁ ਕਣ੍ਣੇਸੁ ਚਤਸ੍ਸੋ ਨਿਧਿਕੁਮ੍ਭਿਯੋ ਉਟ੍ਠਹਨ੍ਤੂ’’ਤਿ ਚਿਨ੍ਤੇਤ੍ਵਾ ਓਲੋਕੇਸਿ, ਸਬ੍ਬਂ ਤਥੇਵ ਅਹੋਸਿ. ਨਿਧਿਕੁਮ੍ਭੀਸੁ ਪਨ ਏਕਾ ਯੋਜਨਿਕਾ ਅਹੋਸਿ, ਏਕਾ ਤਿਗਾਵੁਤਿਕਾ, ਏਕਾ ਅਡ੍ਢਯੋਜਨਿਕਾ, ਏਕਾ ਗਾਵੁਤਪ੍ਪਮਾਣਾ. ਬੋਧਿਸਤ੍ਤਸ੍ਸ ਨਿਬ੍ਬਤ੍ਤਨਿਧਿਕੁਮ੍ਭੀਨਂ ਪਨ ਏਕਮੁਖਪ੍ਪਮਾਣਂ ਅਹੋਸਿ, ਹੇਟ੍ਠਾ ਪਥਵੀਪਰਿਯਨ੍ਤਾਵ ਅਹੇਸੁਂ. ਜੋਤਿਕਸ੍ਸ ਨਿਬ੍ਬਤ੍ਤਨਿਧਿਕੁਮ੍ਭੀਨਂ ਮੁਖਪਰਿਮਾਣਂ ਨ ਕਥਿਤਂ, ਸਬ੍ਬਾ ਮੁਖਛਿਨ੍ਨਤਾਲਫਲਂ ਵਿਯ ਪਰਿਪੁਣ੍ਣਾਵ ਉਟ੍ਠਹਿਂਸੁ. ਪਾਸਾਦਸ੍ਸ ਚਤੂਸੁ ਕਣ੍ਣੇਸੁ ਤਰੁਣਤਾਲਕ੍ਖਨ੍ਧਪ੍ਪਮਾਣਾ ਚਤਸ੍ਸੋ ਸੁਵਣ੍ਣਮਯਾ ਉਚ੍ਛੁਯਟ੍ਠਿਯੋ ਨਿਬ੍ਬਤ੍ਤਿਂਸੁ. ਤਾਸਂ ਮਣਿਮਯਾਨਿ ਪਤ੍ਤਾਨਿ, ਸੋਵਣ੍ਣਮਯਾਨਿ ਖਨ੍ਧਾਨਿ ਅਹੇਸੁਂ. ਪੁਬ੍ਬਕਮ੍ਮਸ੍ਸ ਦਸ੍ਸਨਤ੍ਥਂ ਕਿਰੇਤਾਨਿ, ਨਿਬ੍ਬਤ੍ਤਿਂਸੁ.

ਸਤ੍ਤਸੁ ਦ੍ਵਾਰਕੋਟ੍ਠਕੇਸੁ ਸਤ੍ਤ ਯਕ੍ਖਾ ਆਰਕ੍ਖਂ ਗਣ੍ਹਿਂਸੁ. ਪਠਮੇ ਦ੍ਵਾਰਕੋਟ੍ਠਕੇ ਯਮਕੋਲ਼ੀ ਨਾਮ ਯਕ੍ਖੋ ਅਤ੍ਤਨੋ ਪਰਿਵਾਰੇਨ ਯਕ੍ਖਸਹਸ੍ਸੇਨ ਸਦ੍ਧਿਂ ਆਰਕ੍ਖਂ ਗਣ੍ਹਿ, ਦੁਤਿਯੇ ਉਪ੍ਪਲੋ ਨਾਮ ਅਤ੍ਤਨੋ ਪਰਿਵਾਰਯਕ੍ਖਾਨਂ ਦ੍ਵੀਹਿ ਸਹਸ੍ਸੇਹਿ ਸਦ੍ਧਿਂ, ਤਤਿਯੇ ਵਜਿਰੋ ਨਾਮ ਤੀਹਿ ਸਹਸ੍ਸੇਹਿ ਸਦ੍ਧਿਂ, ਚਤੁਤ੍ਥੇ ਵਜਿਰਬਾਹੁ ਨਾਮ ਚਤੂਹਿ ਸਹਸ੍ਸੇਹਿ ਸਦ੍ਧਿਂ, ਪਞ੍ਚਮੇ ਕਸਕਨ੍ਦੋ ਨਾਮ ਪਞ੍ਚਹਿ ਸਹਸ੍ਸੇਹਿ ਸਦ੍ਧਿਂ, ਛਟ੍ਠੇ ਕਟਤ੍ਥੋ ਨਾਮ ਛਹਿ ਸਹਸ੍ਸੇਹਿ ਸਦ੍ਧਿਂ, ਸਤ੍ਤਮੇ ਦਿਸਾਮੁਖੋ ਨਾਮ ਸਤ੍ਤਹਿ ਸਹਸ੍ਸੇਹਿ ਸਦ੍ਧਿਂ ਆਰਕ੍ਖਂ ਗਣ੍ਹਿ. ਏਵਂ ਪਾਸਾਦਸ੍ਸ ਅਨ੍ਤੋ ਚ ਬਹਿ ਚ ਗਾਲ਼੍ਹਰਕ੍ਖਾ ਅਹੋਸਿ. ‘‘ਜੋਤਿਕਸ੍ਸ ਕਿਰ ਸਤ੍ਤਰਤਨਮਯੋ ਸਤ੍ਤਭੂਮਿਕਪਾਸਾਦੋ ਉਟ੍ਠਿਤੋ, ਸਤ੍ਤ ਪਾਕਾਰਾ ਸਤ੍ਤਦ੍ਵਾਰਕੋਟ੍ਠਕਾ ਚਤਸ੍ਸੋ ਨਿਧਿਕੁਮ੍ਭਿਯੋ ਉਟ੍ਠਿਤਾ’’ਤਿ ਸੁਤ੍ਵਾ ਬਿਮ੍ਬਿਸਾਰੋ ਰਾਜਾ ਸੇਟ੍ਠਿਚ੍ਛਤ੍ਤਂ ਪਹਿਣਿ. ਸੋ ਜੋਤਿਕਸੇਟ੍ਠਿ ਨਾਮ ਅਹੋਸਿ.

ਤੇਨ ਪਨ ਸਦ੍ਧਿਂ ਕਤਪੁਞ੍ਞਕਮ੍ਮਾ ਇਤ੍ਥੀ ਉਤ੍ਤਰਕੁਰੂਸੁ ਨਿਬ੍ਬਤ੍ਤਿ. ਅਥ ਨਂ ਦੇਵਤਾ ਤਤੋ ਆਨੇਤ੍ਵਾ ਸਿਰਿਗਬ੍ਭੇ ਨਿਸੀਦਾਪੇਸੁਂ. ਸਾ ਆਗਚ੍ਛਮਾਨਾ ਏਕਂ ਤਣ੍ਡੁਲਨਾਲ਼ਿਂ ਤਯੋ ਚ ਜੋਤਿਪਾਸਾਣੇ ਗਣ੍ਹਿ. ਤੇਸਂ ਯਾਵਜੀਵਂ ਤਾਯੇਵ ਤਣ੍ਡੁਲਨਾਲ਼ਿਯਾ ਭਤ੍ਤਂ ਅਹੋਸਿ. ਸਚੇ ਕਿਰ ਤੇ ਸਕਟਸਤਮ੍ਪਿ ਤਣ੍ਡੁਲਾਨਂ ਪੂਰੇਤੁਕਾਮਾ ਹੋਨ੍ਤਿ, ਸਾ ਤਣ੍ਡੁਲਨਾਲ਼ਿ ਨਾਲ਼ਿਯੇਵ ਹੁਤ੍ਵਾ ਤਿਟ੍ਠਤਿ. ਭਤ੍ਤਪਚਨਕਾਲੇ ਤਣ੍ਡੁਲੇ ਉਕ੍ਖਲਿਯਂ ਪਕ੍ਖਿਪਿਤ੍ਵਾ ਤੇਸਂ ਪਾਸਾਣਾਨਂ ਉਪਰਿ ਠਪੇਤਿ, ਪਾਸਾਣਾ ਤਾਵਦੇਵ ਪਜ੍ਜਲਿਤ੍ਵਾ ਭਤ੍ਤੇ ਪਕ੍ਕਮਤ੍ਤੇ ਨਿਬ੍ਬਾਯਨ੍ਤਿ. ਤੇਨੇਵ ਸਞ੍ਞਾਣੇਨ ਭਤ੍ਤਸ੍ਸ ਪਕ੍ਕਭਾਵਂ ਜਾਨਨ੍ਤਿ. ਸੂਪੇਯ੍ਯਾਦਿਪਚਨਕਾਲੇਪਿ ਏਸੇਵ ਨਯੋ. ਏਵਂ ਤੇਸਂ ਜੋਤਿਪਾਸਾਣੇਹਿ ਆਹਾਰੋ ਪਚ੍ਚਤਿ. ਮਣਿਆਲੋਕੇਨ ਚ ਵਸਨ੍ਤਿ, ਅਗ੍ਗਿਸ੍ਸ ਵਾ ਦੀਪਸ੍ਸ ਵਾ ਓਭਾਸਂ ਨੇਵ ਜਾਨਿਂਸੁ. ‘‘ਜੋਤਿਕਸ੍ਸ ਕਿਰ ਏਵਰੂਪਾ ਸਮ੍ਪਤ੍ਤੀ’’ਤਿ ਸਕਲਜਮ੍ਬੁਦੀਪੇ ਪਾਕਟੋ ਅਹੋਸਿ. ਮਹਾਜਨੋ ਯਾਨਾਦੀਨਿ ਯੋਜੇਤ੍ਵਾ ਦਸ੍ਸਨਤ੍ਥਾਯ ਆਗਚ੍ਛਤਿ. ਜੋਤਿਕਸੇਟ੍ਠਿ ਆਗਤਾਗਤਾਨਂ ਉਤ੍ਤਰਕੁਰੁਤਣ੍ਡੁਲਾਨਂ ਭਤ੍ਤਂ ਪਚਾਪੇਤ੍ਵਾ ਦਾਪੇਸਿ. ‘‘ਕਪ੍ਪਰੁਕ੍ਖੇਹਿ ਵਤ੍ਥਾਨਿ ਗਣ੍ਹਨ੍ਤੁ, ਆਭਰਣਾਨਿ ਗਣ੍ਹਨ੍ਤੂ’’ਤਿ ਆਣਾਪੇਸਿ. ‘‘ਗਾਵੁਤਿਕਨਿਧਿਕੁਮ੍ਭਿਯਾ ਮੁਖਂ ਵਿਵਰਾਪੇਤ੍ਵਾ ਯਾਪਨਮਤ੍ਤਂ ਧਨਂ ਗਣ੍ਹਨ੍ਤੂ’’ਤਿ ਆਣਾਪੇਸਿ. ਸਕਲਜਮ੍ਬੁਦੀਪਵਾਸਿਕੇਸੁ ਧਨਂ ਗਹੇਤ੍ਵਾ ਗਚ੍ਛਨ੍ਤੇਸੁ ਨਿਧਿਕੁਮ੍ਭਿਯਾ ਅਙ੍ਗੁਲਿਮਤ੍ਤਮ੍ਪਿ ਊਨਂ ਨਾਹੋਸਿ. ਗਨ੍ਧਕੁਟਿਪਰਿਵੇਣੇ ਵਾਲੁਕਂ ਕਤ੍ਵਾ ਓਕਿਣ੍ਣਰਤਨਾਨਂ ਕਿਰਸ੍ਸ ਏਸੋ ਨਿਸ੍ਸਨ੍ਦੋ.

ਏਵਂ ਮਹਾਜਨੇ ਵਤ੍ਥਾਭਰਣਾਨਿ ਚੇਵ ਧਨਞ੍ਚ ਯਦਿਚ੍ਛਕਂ ਆਦਾਯ ਗਚ੍ਛਨ੍ਤੇ ਬਿਮ੍ਬਿਸਾਰੋ ਤਸ੍ਸ ਪਾਸਾਦਂ ਦਟ੍ਠੁਕਾਮੋਪਿ ਮਹਾਜਨੇ ਆਗਚ੍ਛਨ੍ਤੇ ਓਕਾਸਂ ਨਾਲਤ੍ਥ. ਅਪਰਭਾਗੇ ਯਦਿਚ੍ਛਕਂ ਆਦਾਯ ਗਤਤ੍ਤਾ ਮਨੁਸ੍ਸੇਸੁ ਮਨ੍ਦੀਭੂਤੇਸੁ ਰਾਜਾ ਜੋਤਿਕਸ੍ਸ ਪਿਤਰਂ ਆਹ – ‘‘ਤਵ ਪੁਤ੍ਤਸ੍ਸ ਪਾਸਾਦਂ ਦਟ੍ਠੁਕਾਮਮ੍ਹਾ’’ਤਿ. ਸੋ ‘‘ਸਾਧੁ, ਦੇਵਾ’’ਤਿ ਵਤ੍ਵਾ ਗਨ੍ਤ੍ਵਾ ਪੁਤ੍ਤਸ੍ਸ ਕਥੇਸਿ – ‘‘ਤਾਤ, ਰਾਜਾ ਤੇ ਪਾਸਾਦਂ ਦਟ੍ਠੁਕਾਮੋ’’ਤਿ. ‘‘ਸਾਧੁ, ਤਾਤ, ਆਗਚ੍ਛਤੂ’’ਤਿ. ਰਾਜਾ ਮਹਨ੍ਤੇਨ ਪਰਿਵਾਰੇਨ ਤਤ੍ਥ ਅਗਮਾਸਿ. ਪਠਮਦ੍ਵਾਰਕੋਟ੍ਠਕੇ ਸਮ੍ਮਜ੍ਜਿਤ੍ਵਾ ਕਚਵਰਛਡ੍ਡਿਕਾ ਦਾਸੀ ਰਞ੍ਞੋ ਹਤ੍ਥਂ ਅਦਾਸਿ, ਰਾਜਾ ‘‘ਸੇਟ੍ਠਿਜਾਯਾ’’ਤਿ ਸਞ੍ਞਾਯ ਲਜ੍ਜਮਾਨੋ ਤਸ੍ਸਾ ਬਾਹਾਯ ਹਤ੍ਥਂ ਨ ਠਪੇਸਿ. ਏਵਂ ਸੇਸਦ੍ਵਾਰਕੋਟ੍ਠਕੇਸੁਪਿ ਦਾਸਿਯੋ ‘‘ਸੇਟ੍ਠਿਭਰਿਯਾਯੋ’’ਤਿ ਮਞ੍ਞਮਾਨੋ ਤਾਸਂ ਬਾਹਾਯ ਹਤ੍ਥਂ ਨ ਠਪੇਸਿ. ਜੋਤਿਕੋ ਆਗਨ੍ਤ੍ਵਾ ਰਾਜਾਨਂ ਪਚ੍ਚੁਗ੍ਗਨ੍ਤ੍ਵਾ ਵਨ੍ਦਿਤ੍ਵਾ ਪਚ੍ਛਤੋ ਹੁਤ੍ਵਾ ‘‘ਪੁਰਤੋ ਯਾਥ, ਦੇਵਾ’’ਤਿ ਆਹ. ਰਞ੍ਞੋ ਮਣਿਪਥਵੀ ਸਤਪੋਰਿਸਪਪਾਤੋ ਵਿਯ ਹੁਤ੍ਵਾ ਉਪਟ੍ਠਹਿ. ਸੋ ‘‘ਇਮਿਨਾ ਮਮ ਗਹਣਤ੍ਥਾਯ ਓਪਾਤੋ ਖਣਿਤੋ’’ਤਿ ਮਞ੍ਞਮਾਨੋ ਪਾਦਂ ਨਿਕ੍ਖਿਪਿਤੁਂ ਨ ਵਿਸਹਿ. ਜੋਤਿਕੋ ‘‘ਨਾਯਂ, ਦੇਵ, ਓਪਾਤੋ, ਮਮ ਪਚ੍ਛਤੋ ਆਗਚ੍ਛਥਾ’’ਤਿ ਪੁਰਤੋ ਅਹੋਸਿ. ਰਾਜਾ ਤੇਨ ਅਕ੍ਕਨ੍ਤਕਾਲੇ ਭੂਮਿਂ ਅਕ੍ਕਮਿਤ੍ਵਾ ਹੇਟ੍ਠਿਮਤਲਤੋ ਪਟ੍ਠਾਯ ਪਾਸਾਦਂ ਓਲੋਕੇਨ੍ਤੋ ਵਿਚਰਿ. ਤਦਾ ਅਜਾਤਸਤ੍ਤੁਕੁਮਾਰੋਪਿ ਪਿਤੁ ਅਙ੍ਗੁਲਿਂ ਗਹੇਤ੍ਵਾ ਵਿਚਰਨ੍ਤੋ ਚਿਨ੍ਤੇਸਿ – ‘‘ਅਹੋ ਅਨ੍ਧਬਾਲੋ ਮਮ ਪਿਤਾ, ਗਹਪਤਿਕੇ ਨਾਮ ਸਤ੍ਤਰਤਨਮਯੇ ਪਾਸਾਦੇ ਵਸਨ੍ਤੇ ਏਸ ਰਾਜਾ ਹੁਤ੍ਵਾ ਦਾਰੁਮਯੇ ਗੇਹੇ ਵਸਤਿ, ਅਹਂ ਦਾਨਿ ਰਾਜਾ ਹੁਤ੍ਵਾ ਇਮਸ੍ਸ ਇਮਸ੍ਮਿਂ ਪਾਸਾਦੇ ਵਸਿਤੁਂ ਨ ਦਸ੍ਸਾਮੀ’’ਤਿ.

ਰਞ੍ਞੋਪਿ ਉਪਰਿਮਤਲਾਨਿ ਅਭਿਰੁਹਨ੍ਤਸ੍ਸੇਵ ਪਾਤਰਾਸਵੇਲਾ ਜਾਤਾ. ਸੋ ਸੇਟ੍ਠਿਂ ਆਮਨ੍ਤੇਤ੍ਵਾ, ‘‘ਮਹਾਸੇਟ੍ਠਿ, ਇਧੇਵ ਪਾਤਰਾਸਂ ਭੁਞ੍ਜਿਸ੍ਸਾਮਾ’’ਤਿ. ਜਾਨਾਮਿ, ਦੇਵ, ਸਜ੍ਜਿਤੋ ਦੇਵਸ੍ਸਾਹਾਰੋਤਿ. ਸੋ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਤ੍ਵਾ ਰਤਨਮਯੇ ਸੇਟ੍ਠਿਸ੍ਸ ਨਿਸੀਦਨਮਣ੍ਡਪੇ ਪਞ੍ਞਤ੍ਤੇ ਤਸ੍ਸੇਵ ਨਿਸੀਦਨਪਲ੍ਲਙ੍ਕੇ ਨਿਸੀਦਿ. ਅਥਸ੍ਸ ਹਤ੍ਥਧੋਵਨੂਦਕਂ ਦਤ੍ਵਾ ਸਤਸਹਸ੍ਸਗ੍ਘਨਿਕਾਯ ਸੁਵਣ੍ਣਪਾਤਿਯਾ ਕਿਲਿਨ੍ਨਪਾਯਾਸਂ ਵਡ੍ਢੇਤ੍ਵਾ ਪੁਰਤੋ ਠਪਯਿਂਸੁ. ਰਾਜਾ ‘‘ਭੋਜਨ’’ਨ੍ਤਿ ਸਞ੍ਞਾਯ ਭੁਞ੍ਜਿਤੁਂ ਆਰਭਿ. ਸੇਟ੍ਠਿ ‘‘ਨਯਿਦਂ, ਦੇਵ, ਭੋਜਨਂ, ਕਿਲਿਨ੍ਨਪਾਯਾਸੋ ਏਸੋ’’ਤਿ ਅਞ੍ਞਿਸ੍ਸਾ ਸੁਵਣ੍ਣਪਾਤਿਯਾ ਭੋਜਨਂ ਵਡ੍ਢੇਤ੍ਵਾ ਪੁਰਿਮਪਾਤਿਯਂ ਠਪਯਿਂਸੁ. ਤਤੋ ਉਟ੍ਠਿਤਉਤੁਨਾ ਕਿਰ ਤਂ ਭੁਞ੍ਜਿਤੁਂ ਸੁਖਂ ਹੋਤਿ. ਰਾਜਾ ਮਧੁਰਭੋਜਨਂ ਭੁਞ੍ਜਨ੍ਤੋ ਪਮਾਣਂ ਨ ਅਞ੍ਞਾਸਿ. ਅਥ ਨਂ ਸੇਟ੍ਠਿ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ‘‘ਅਲਂ, ਦੇਵ, ਏਤ੍ਤਕਮੇਵ ਹੋਤੁ, ਇਤੋ ਉਤ੍ਤਰਿਂ ਜਿਰਾਪੇਤੁਂ ਨ ਸਕ੍ਕਾ’’ਤਿ ਆਹ. ਅਥ ਨਂ ਰਾਜਾ ਆਹ – ‘‘ਕਿਂ, ਗਹਪਤਿ, ਗਰੁਕਂ ਕਤ੍ਵਾ ਕਥੇਸਿ ਅਤ੍ਤਨੋ ਭਤ੍ਤ’’ਨ੍ਤਿ? ਦੇਵ, ਨਤ੍ਥੇਤਂ, ਤੁਮ੍ਹਾਕਂ ਸਬ੍ਬਸ੍ਸਾਪਿ ਹਿ ਬਲਕਾਯਸ੍ਸ ਇਦਮੇਵ ਭਤ੍ਤਂ ਇਦਂ ਸੁਪੇਯ੍ਯਂ. ਅਪਿ ਚ ਖੋ ਅਹਂ ਅਯਸਸ੍ਸ ਭਾਯਾਮੀਤਿ. ਕਿਂ ਕਾਰਣਾਤਿ? ਸਚੇ ਦੇਵਸ੍ਸ ਕਾਯਾਲਸਿਯਮਤ੍ਤਂ ਭਵੇਯ੍ਯ, ‘‘ਹਿਯ੍ਯੋ ਰਞ੍ਞਾ ਸੇਟ੍ਠਿਸ੍ਸ ਗੇਹੇ ਭਤ੍ਤਂ ਭੁਤ੍ਤਂ, ਸੇਟ੍ਠਿਨਾ ਕਿਞ੍ਚਿ ਕਤਂ ਭਵਿਸ੍ਸਤੀ’’ਤਿ ਵਚਨਸ੍ਸ ਭਾਯਾਮਿ, ਦੇਵਾਤਿ. ਤੇਨ ਹਿ ਭਤ੍ਤਂ ਹਰ, ਉਦਕਂ ਆਹਰਾਤਿ. ਰਞ੍ਞੋ ਭਤ੍ਤਕਿਚ੍ਚਾਵਸਾਨੇ ਸਬ੍ਬੋ ਰਾਜਪਰਿਵਾਰੋ ਤਦੇਵ ਭਤ੍ਤਂ ਪਰਿਭੁਞ੍ਜਿ.

ਰਾਜਾ ਸੁਖਕਥਾਯ ਨਿਸਿਨ੍ਨੋ ਸੇਟ੍ਠਿਂ ਆਮਨ੍ਤੇਤ੍ਵਾ, ‘‘ਕਿਂ ਇਮਸ੍ਮਿਂ ਗੇਹੇ ਸੇਟ੍ਠਿਭਰਿਯਾ ਨਤ੍ਥੀ’’ਤਿ ਆਹ? ‘‘ਆਮ ਅਤ੍ਥਿ, ਦੇਵਾ’’ਤਿ. ‘‘ਕਹਂ ਸਾ’’ਤਿ? ‘‘ਸਿਰਿਗਬ੍ਭੇ ਨਿਸਿਨ੍ਨਾ, ਦੇਵਸ੍ਸ ਆਗਤਭਾਵਂ ਨ ਜਾਨਾਤੀ’’ਤਿ. ਕਿਞ੍ਚਾਪਿ ਹਿ ਪਾਤੋਵ ਰਾਜਾ ਸਪਰਿਵਾਰੋ ਆਗਤੋ, ਸਾ ਪਨਸ੍ਸ ਆਗਤਭਾਵਂ ਨ ਜਾਨਾਤੇਵ. ਤਤੋ ਸੇਟ੍ਠਿ ‘‘ਰਾਜਾ ਮੇ ਭਰਿਯਂ ਦਟ੍ਠੁਕਾਮੋ’’ਤਿ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ‘‘ਰਾਜਾ ਆਗਤੋ, ਕਿਂ ਤਵ ਰਾਜਾਨਂ ਦਟ੍ਠੁਂ ਨ ਵਟ੍ਟਤੀ’’ਤਿ ਆਹ. ਸਾ ਨਿਪਨ੍ਨਕਾਵ ‘‘ਕੋ ਏਸ, ਸਾਮਿ, ਰਾਜਾ ਨਾਮਾ’’ਤਿ ਵਤ੍ਵਾ ‘‘ਰਾਜਾ ਨਾਮ ਅਮ੍ਹਾਕਂ ਇਸ੍ਸਰੋ’’ਤਿ ਵੁਤ੍ਤੇ ਅਨਤ੍ਤਮਨਤਂ ਪਵੇਦੇਨ੍ਤੀ ‘‘ਦੁਕ੍ਕਟਾਨਿ ਵਤ ਨੋ ਪੁਞ੍ਞਕਮ੍ਮਾਨਿ, ਯੇਸਂ ਨੋ ਇਸ੍ਸਰੋਪਿ ਅਤ੍ਥਿ. ਅਸ੍ਸਦ੍ਧਾਯ ਨਾਮ ਪੁਞ੍ਞਕਮ੍ਮਾਨਿ ਕਤ੍ਵਾ ਮਯਂ ਸਮ੍ਪਤ੍ਤਿਂ ਪਾਪੁਣਿਤ੍ਵਾ ਅਞ੍ਞਸ੍ਸ ਇਸ੍ਸਰਿਯਟ੍ਠਾਨੇ ਨਿਬ੍ਬਤ੍ਤਮ੍ਹਾ. ਅਦ੍ਧਾ ਅਮ੍ਹੇਹਿ ਅਸਦ੍ਦਹਿਤ੍ਵਾ ਦਾਨਂ ਦਿਨ੍ਨਂ ਭਵਿਸ੍ਸਤਿ, ਤਸ੍ਸੇਤਂ ਫਲ’’ਨ੍ਤਿ ਵਤ੍ਵਾ ‘‘ਕਿਂ ਦਾਨਿ ਕਰੋਮਿ, ਸਾਮੀ’’ਤਿ ਆਹ. ਤਾਲਵਣ੍ਟਂ ਆਦਾਯ ਆਗਨ੍ਤ੍ਵਾ ਰਾਜਾਨਂ ਬੀਜਾਹੀਤਿ. ਤਸ੍ਸਾ ਤਾਲਵਣ੍ਟਂ ਆਦਾਯ ਆਗਨ੍ਤ੍ਵਾ ਰਾਜਾਨਂ ਬੀਜੇਨ੍ਤਿਯਾ ਰਞ੍ਞੋ ਵੇਠਨਸ੍ਸ ਗਨ੍ਧਵਾਤੋ ਅਕ੍ਖੀਨਿ ਪਹਰਿ, ਅਥਸ੍ਸਾ ਅਕ੍ਖੀਹਿ ਅਸ੍ਸੁਧਾਰਾ ਪਵਤ੍ਤਿਂਸੁ. ਤਂ ਦਿਸ੍ਵਾ ਰਾਜਾ ਸੇਟ੍ਠਿਂ ਆਹ – ‘‘ਮਹਾਸੇਟ੍ਠਿ, ਮਾਤੁਗਾਮੋ ਨਾਮ ਅਪ੍ਪਬੁਦ੍ਧਿਕੋ, ‘ਰਾਜਾ ਮੇ ਸਾਮਿਕਸ੍ਸ ਸਮ੍ਪਤ੍ਤਿਂ ਗਣ੍ਹੇਯ੍ਯਾ’ਤਿ ਭਯੇਨ ਰੋਦਤਿ ਮਞ੍ਞੇ, ਅਸ੍ਸਾਸੇਹਿ ਨਂ ‘ਨ ਮੇ ਤਵ ਸਮ੍ਪਤ੍ਤਿਯਾ ਅਤ੍ਥੋ’’’ਤਿ. ਨ ਏਸਾ, ਦੇਵ, ਰੋਦਤੀਤਿ. ਅਥ ਕਿਂ ਏਤਨ੍ਤਿ? ਤੁਮ੍ਹਾਕਂ ਵੇਠਨਗਨ੍ਧੇਨਸ੍ਸਾ ਅਸ੍ਸੂਨਿ ਪਵਤ੍ਤਿਂਸੁ. ਅਯਞ੍ਹਿ ਦੀਪੋਭਾਸਂ ਵਾ ਅਗ੍ਗਿਓਭਾਸਂ ਵਾ ਅਦਿਸ੍ਵਾ ਮਣਿਆਲੋਕੇਨੇਵ ਭੁਞ੍ਜਤਿ ਚ ਨਿਸੀਦਤਿ ਚ ਨਿਪਜ੍ਜਤਿ ਚ, ਦੇਵੋ ਪਨ ਦੀਪਾਲੋਕੇਨ ਨਿਸਿਨ੍ਨੋ ਭਵਿਸ੍ਸਤੀਤਿ? ਆਮ, ਸੇਟ੍ਠੀਤਿ. ਤੇਨ ਹਿ, ਦੇਵ, ਅਜ੍ਜ ਪਟ੍ਠਾਯ ਮਣਿਆਲੋਕੇਨ ਨਿਸੀਦਥਾਤਿ ਮਹਨ੍ਤਂ ਤਿਪੁਸਮਤ੍ਤਂ ਅਨਗ੍ਘਂ ਮਣਿਰਤਨਂ ਅਦਾਸਿ. ਰਾਜਾ ਗੇਹਂ ਓਲੋਕੇਤ੍ਵਾ ‘‘ਮਹਤੀ ਵਤ ਜੋਤਿਕਸ੍ਸ ਸਮ੍ਪਤ੍ਤੀ’’ਤਿ ਵਤ੍ਵਾ ਅਗਮਾਸਿ. ਅਯਂ ਤਾਵ ਜੋਤਿਕਸ੍ਸ ਉਪ੍ਪਤ੍ਤਿ.

ਇਦਾਨਿ ਜਟਿਲਸ੍ਸ ਉਪ੍ਪਤ੍ਤਿ ਵੇਦਿਤਬ੍ਬਾ – ਬਾਰਾਣਸਿਯਞ੍ਹਿ ਏਕਾ ਸੇਟ੍ਠਿਧੀਤਾ ਅਭਿਰੂਪਾ ਅਹੋਸਿ, ਤਂ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਿਕਕਾਲੇ ਰਕ੍ਖਣਤ੍ਥਾਯ ਏਕਂ ਦਾਸਿਂ ਦਤ੍ਵਾ ਸਤ੍ਤਭੂਮਿਕਸ੍ਸ ਪਾਸਾਦਸ੍ਸ ਉਪਰਿਮਤਲੇ ਸਿਰਿਗਬ੍ਭੇ ਵਾਸਯਿਂਸੁ. ਤਂ ਏਕਦਿਵਸਂ ਵਾਤਪਾਨਂ ਵਿਵਰਿਤ੍ਵਾ ਬਹਿ ਓਲੋਕਯਮਾਨਂ ਆਕਾਸੇਨ ਗਚ੍ਛਨ੍ਤੋ ਏਕੋ ਵਿਜ੍ਜਾਧਰੋ ਦਿਸ੍ਵਾ ਉਪ੍ਪਨ੍ਨਸਿਨੇਹੋ ਵਾਤਪਾਨੇਨ ਪਵਿਸਿਤ੍ਵਾ ਤਾਯ ਸਦ੍ਧਿਂ ਸਨ੍ਥਵਮਕਾਸਿ. ਸਾ ਤੇਨ ਸਦ੍ਧਿਂ ਸਂਵਾਸਮਨ੍ਵਾਯ ਨ ਚਿਰਸ੍ਸੇਵ ਗਬ੍ਭਂ ਪਟਿਲਭਿ. ਅਥ ਨਂ ਸਾ ਦਾਸੀ ਦਿਸ੍ਵਾ, ‘‘ਅਮ੍ਮ, ਕਿਂ ਇਦ’’ਨ੍ਤਿ ਵਤ੍ਵਾ ‘‘ਹੋਤੁ ਮਾ ਕਸ੍ਸਚਿ ਆਚਿਕ੍ਖੀ’’ਤਿ ਤਾਯ ਵੁਤ੍ਤਾ ਭਯੇਨ ਤੁਣ੍ਹੀ ਅਹੋਸਿ. ਸਾਪਿ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿਤ੍ਵਾ ਨਵਭਾਜਨਂ ਆਹਰਾਪੇਤ੍ਵਾ ਤਤ੍ਥ ਤਂ ਦਾਰਕਂ ਨਿਪਜ੍ਜਾਪੇਤ੍ਵਾ ਤਂ ਭਾਜਨਂ ਪਿਦਹਿਤ੍ਵਾ ਉਪਰਿ ਪੁਪ੍ਫਦਾਮਾਨਿ ਠਪੇਤ੍ਵਾ ‘‘ਇਮਂ ਸੀਸੇਨ ਉਕ੍ਖਿਪਿਤ੍ਵਾ ਗਙ੍ਗਾਯ ਵਿਸ੍ਸਜ੍ਜੇਹਿ, ‘ਕਿਂ ਇਦ’ਨ੍ਤਿ ਚ ਪੁਟ੍ਠਾ ‘ਅਯ੍ਯਾਯ ਮੇ ਬਲਿਕਮ੍ਮ’ਨ੍ਤਿ ਵਦੇਯ੍ਯਾਸੀ’’ਤਿ ਦਾਸਿਂ ਆਣਾਪੇਸਿ. ਸਾ ਤਥਾ ਅਕਾਸਿ.

ਹੇਟ੍ਠਾਗਙ੍ਗਾਯਮ੍ਪਿ ਦ੍ਵੇ ਇਤ੍ਥਿਯੋ ਨ੍ਹਾਯਮਾਨਾ ਤਂ ਭਾਜਨਂ ਉਦਕੇਨਾਹਰਿਯਮਾਨਂ ਦਿਸ੍ਵਾ ਏਕਾ ‘‘ਮਯ੍ਹੇਤਂ ਭਾਜਨ’’ਨ੍ਤਿ ਆਹ. ਏਕਾ ‘‘ਯਂ ਏਤਸ੍ਸ ਅਨ੍ਤੋ, ਤਂ ਮਯ੍ਹ’’ਨ੍ਤਿ ਵਤ੍ਵਾ ਭਾਜਨੇ ਸਮ੍ਪਤ੍ਤੇ ਤਂ ਆਦਾਯ ਥਲੇ ਠਪੇਤ੍ਵਾ ਵਿਵਰਿਤ੍ਵਾ ਦਾਰਕਂ ਦਿਸ੍ਵਾ ਏਕਾ ‘‘ਮਮ ਭਾਜਨਨ੍ਤਿ ਵੁਤ੍ਤਤਾਯ ਦਾਰਕੋ ਮਮੇਵ ਹੋਤੀ’’ਤਿ ਆਹ. ਏਕਾ ‘‘ਯਂ ਭਾਜਨਸ੍ਸ ਅਨ੍ਤੋ, ਤਂ ਮਮੇਵ ਹੋਤੂਤਿ ਵੁਤ੍ਤਤਾਯ ਮਮ ਦਾਰਕੋ’’ਤਿ ਆਹ. ਤਾ ਵਿਵਦਮਾਨਾ ਵਿਨਿਚ੍ਛਯਟ੍ਠਾਨਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ਅਮਚ੍ਚੇਸੁ ਵਿਨਿਚ੍ਛਿਤੁਂ ਅਸਕ੍ਕੋਨ੍ਤੇਸੁ ਰਞ੍ਞੋ ਸਨ੍ਤਿਕਂ ਅਗਮਂਸੁ. ਰਾਜਾ ਤਾਸਂ ਵਚਨਂ ਸੁਤ੍ਵਾ ‘‘ਤ੍ਵਂ ਦਾਰਕਂ ਗਣ੍ਹ, ਤ੍ਵਂ ਭਾਜਨਂ ਗਣ੍ਹਾ’’ਤਿ ਆਹ. ਯਾਯ ਪਨ ਦਾਰਕੋ ਲਦ੍ਧੋ, ਸਾ ਮਹਾਕਚ੍ਚਾਨਤ੍ਥੇਰਸ੍ਸ ਉਪਟ੍ਠਾਯਿਕਾ ਅਹੋਸਿ. ਤਸ੍ਮਾ ਸਾ ਦਾਰਕਂ ‘‘ਇਮਂ ਥੇਰਸ੍ਸ ਸਨ੍ਤਿਕੇ ਪਬ੍ਬਾਜੇਸ੍ਸਾਮੀ’’ਤਿ ਪੋਸੇਸਿ. ਤਸ੍ਸ ਜਾਤਦਿਵਸੇ ਗਬ੍ਭਮਲਸ੍ਸ ਧੋਵਿਤ੍ਵਾ ਅਨਪਨੀਤਤਾਯ ਕੇਸਾ ਜਟਿਤਾ ਹੁਤ੍ਵਾ ਅਟ੍ਠਂਸੁ, ਤੇਨਸ੍ਸ ਜਟਿਲੋਤ੍ਵੇਵ ਨਾਮਂ ਕਰਿਂਸੁ. ਤਸ੍ਸ ਪਦਸਾ ਵਿਚਰਣਕਾਲੇ ਥੇਰੋ ਤਂ ਗੇਹਂ ਪਿਣ੍ਡਾਯ ਪਾਵਿਸਿ. ਉਪਾਸਿਕਾ ਥੇਰਂ ਨਿਸੀਦਾਪੇਤ੍ਵਾ ਆਹਾਰਮਦਾਸਿ. ਥੇਰੋ ਦਾਰਕਂ ਦਿਸ੍ਵਾ ‘‘ਕਿਂ ਉਪਾਸਿਕੇ ਦਾਰਕੋ ਲਦ੍ਧੋ’’ਤਿ ਪੁਚ੍ਛਿ. ‘‘ਆਮ, ਭਨ੍ਤੇ, ਇਮਾਹਂ ਦਾਰਕਂ ਤੁਮ੍ਹਾਕਂ ਸਨ੍ਤਿਕੇ ਪਬ੍ਬਾਜੇਸ੍ਸਾਮੀਤਿ ਪੋਸੇਸਿਂ, ਪਬ੍ਬਾਜੇਥ ਨ’’ਨ੍ਤਿ ਅਦਾਸਿ. ਥੇਰੋ ‘‘ਸਾਧੂ’’ਤਿ ਆਦਾਯ ਤਂ ਗਚ੍ਛਨ੍ਤੋ ‘‘ਅਤ੍ਥਿ ਨੁ ਖੋ ਇਮਸ੍ਸ ਗਿਹਿਸਮ੍ਪਤ੍ਤਿਂ ਅਨੁਭਵਿਤੁਂ ਪੁਞ੍ਞਕਮ੍ਮ’’ਨ੍ਤਿ ਓਲੋਕੇਨ੍ਤੋ ‘‘ਮਹਾਪੁਞ੍ਞੋ ਸਤ੍ਤੋ ਮਹਾਸਮ੍ਪਤ੍ਤਿਂ ਅਨੁਭਵਿਸ੍ਸਤਿ, ਦਹਰੋ ਏਸ ਤਾਵ, ਞਾਣਮ੍ਪਿਸ੍ਸ ਪਰਿਪਾਕਂ ਨ ਗਚ੍ਛਤੀ’’ਤਿ ਚਿਨ੍ਤੇਤ੍ਵਾ ਤਂ ਆਦਾਯ ਤਕ੍ਕਸਿਲਾਯਂ ਏਕਸ੍ਸ ਉਪਟ੍ਠਾਕਸ੍ਸ ਗੇਹਂ ਅਗਮਾਸਿ.

ਸੋ ਥੇਰਂ ਵਨ੍ਦਿਤ੍ਵਾ ਠਿਤੋ ਤਂ ਦਾਰਕਂ ਦਿਸ੍ਵਾ ‘‘ਦਾਰਕੋ ਵੋ, ਭਨ੍ਤੇ, ਲਦ੍ਧੋ’’ਤਿ ਪੁਚ੍ਛਿ. ਆਮ, ਉਪਾਸਕ, ਪਬ੍ਬਜਿਸ੍ਸਤਿ, ਦਹਰੋ ਤਾਵ, ਤਵੇਵ ਸਨ੍ਤਿਕੇ ਹੋਤੂਤਿ. ਸੋ ‘‘ਸਾਧੁ, ਭਨ੍ਤੇ’’ਤਿ ਤਂ ਪੁਤ੍ਤਟ੍ਠਾਨੇ ਠਪੇਤ੍ਵਾ ਪਟਿਜਗ੍ਗਿ. ਤਸ੍ਸ ਪਨ ਗੇਹੇ ਦ੍ਵਾਦਸ ਵਸ੍ਸਾਨਿ ਭਣ੍ਡਕਂ ਉਸ੍ਸਨ੍ਨਂ ਹੋਤਿ. ਸੋ ਗਾਮਨ੍ਤਰਂ ਗਚ੍ਛਨ੍ਤੋ ਸਬ੍ਬਮ੍ਪਿ ਤਂ ਭਣ੍ਡਂ ਆਪਣਂ ਹਰਿਤ੍ਵਾ ਦਾਰਕਂ ਆਪਣੇ ਨਿਸੀਦਾਪੇਤ੍ਵਾ ਤਸ੍ਸ ਤਸ੍ਸ ਭਣ੍ਡਕਸ੍ਸ ਮੂਲਂ ਆਚਿਕ੍ਖਿਤ੍ਵਾ ‘‘ਇਦਞ੍ਚ ਇਦਞ੍ਚ ਏਤ੍ਤਕਂ ਨਾਮ ਧਨਂ ਗਹੇਤ੍ਵਾ ਦਦੇਯ੍ਯਾਸੀ’’ਤਿ ਵਤ੍ਵਾ ਪਕ੍ਕਾਮਿ. ਤਂਦਿਵਸਂ ਨਗਰਪਰਿਗ੍ਗਾਹਿਕਾ ਦੇਵਤਾ ਅਨ੍ਤਮਸੋ ਮਰਿਚਜੀਰਕਮਤ੍ਤੇਨਾਪਿ ਅਤ੍ਥਿਕੇ ਤਸ੍ਸੇਵ ਆਪਣਾਭਿਮੁਖੇ ਕਰਿਂਸੁ. ਸੋ ਦ੍ਵਾਦਸ ਵਸ੍ਸਾਨਿ ਉਸ੍ਸਨ੍ਨਂ ਭਣ੍ਡਕਂ ਏਕਦਿਵਸੇਨੇਵ ਵਿਕ੍ਕਿਣਿ. ਕੁਟੁਮ੍ਬਿਕੋ ਆਗਨ੍ਤ੍ਵਾ ਆਪਣੇ ਕਿਞ੍ਚਿ ਅਦਿਸ੍ਵਾ ‘‘ਸਬ੍ਬਂ ਤੇ, ਤਾਤ, ਭਣ੍ਡਕਂ ਨਾਸਿਤ’’ਨ੍ਤਿ ਆਹ. ਨ ਨਾਸੇਮਿ, ਸਬ੍ਬਂ ਤੁਮ੍ਹੇਹਿ ਵੁਤ੍ਤਨਯੇਨੇਵ ਵਿਕ੍ਕਿਣਿਂ, ਇਦਂ ਅਸੁਕਸ੍ਸ ਮੂਲਂ, ਇਦਂ ਅਸੁਕਸ੍ਸਾਤਿ. ਕੁਟੁਮ੍ਬਿਕੋ ਪਸੀਦਿਤ੍ਵਾ ‘‘ਅਨਗ੍ਘੋ ਪੁਰਿਸੋ, ਯਤ੍ਥ ਕਤ੍ਥਚਿ ਜੀਵਿਤੁਂ ਸਮਤ੍ਥੋ’’ਤਿ ਅਤ੍ਤਨੋ ਗੇਹੇ ਵਯਪ੍ਪਤ੍ਤਂ ਧੀਤਰਂ ਤਸ੍ਸ ਦਤ੍ਵਾ ‘‘ਗੇਹਮਸ੍ਸ ਕਰੋਥਾ’’ਤਿ ਪੁਰਿਸੇ ਆਣਾਪੇਤ੍ਵਾ ਨਿਟ੍ਠਿਤੇ ਗੇਹੇ ‘‘ਗਚ੍ਛਥ, ਤੁਮ੍ਹੇ ਅਤ੍ਤਨੋ ਗੇਹੇ ਵਸਥਾ’’ਤਿ ਆਹ.

ਅਥਸ੍ਸ ਗੇਹਪਵਿਸਨਕਾਲੇ ਏਕੇਨ ਪਾਦੇਨ ਉਮ੍ਮਾਰੇ ਅਕ੍ਕਨ੍ਤਮਤ੍ਤੇ ਗੇਹਸ੍ਸ ਪਚ੍ਛਿਮਭਾਗੇ ਭੂਮਿਂ ਭਿਨ੍ਦਿਤ੍ਵਾ ਅਸੀਤਿਹਤ੍ਥੋ ਸੁਵਣ੍ਣਪਬ੍ਬਤੋ ਉਟ੍ਠਹਿ. ਰਾਜਾ ‘‘ਜਟਿਲਕੁਮਾਰਸ੍ਸ ਕਿਰ ਗੇਹੇ ਭੂਮਿਂ ਭਿਨ੍ਦਿਤ੍ਵਾ ਸੁਵਣ੍ਣਪਬ੍ਬਤੋ ਉਟ੍ਠਿਤੋ’’ਤਿ ਸੁਤ੍ਵਾਵ ਤਸ੍ਸ ਸੇਟ੍ਠਿਚ੍ਛਤ੍ਤਂ ਪੇਸੇਸਿ. ਸੋ ਜਟਿਲਸੇਟ੍ਠਿ ਨਾਮ ਅਹੋਸਿ. ਤਸ੍ਸ ਤਯੋ ਪੁਤ੍ਤਾ ਅਹੇਸੁਂ. ਸੋ ਤੇਸਂ ਵਯਪ੍ਪਤ੍ਤਕਾਲੇ ਪਬ੍ਬਜ੍ਜਾਯ ਚਿਤ੍ਤਂ ਉਪ੍ਪਾਦੇਤ੍ਵਾ ‘‘ਸਚੇ ਅਮ੍ਹੇਹਿ ਸਮਾਨਭੋਗਂ ਸੇਟ੍ਠਿਕੁਲਂ ਭਵਿਸ੍ਸਤਿ, ਪਬ੍ਬਜਿਤੁਂ ਦਸ੍ਸਨ੍ਤਿ. ਨੋ ਚੇ, ਨ ਦਸ੍ਸਨ੍ਤਿ. ਅਤ੍ਥਿ ਨੁ ਖੋ ਜਮ੍ਬੁਦੀਪੇ ਅਮ੍ਹੇਹਿ ਸਮਾਨਭੋਗਂ ਕੁਲ’’ਨ੍ਤਿ ਵੀਮਂਸਨਤ੍ਥਾਯ ਸੁਵਣ੍ਣਮਯਂ ਇਟ੍ਠਕਂ ਸੁਵਣ੍ਣਮਯਂ ਪਤੋਦਲਟ੍ਠਿਂ ਸੁਵਣ੍ਣਮਯਂ ਪਾਦੁਕਞ੍ਚ ਕਾਰਾਪੇਤ੍ਵਾ ਪੁਰਿਸਾਨਂ ਹਤ੍ਥੇ ਦਤ੍ਵਾ ‘‘ਗਚ੍ਛਥ, ਇਮਾਨਿ ਆਦਾਯ ਕਿਞ੍ਚਿਦੇਵ ਓਲੋਕਯਮਾਨਾ ਵਿਯ ਜਮ੍ਬੁਦੀਪਤਲੇ ਵਿਚਰਿਤ੍ਵਾ ਅਮ੍ਹੇਹਿ ਸਮਾਨਭੋਗਸ੍ਸ ਸੇਟ੍ਠਿਕੁਲਸ੍ਸ ਅਤ੍ਥਿਭਾਵਂ ਵਾ ਨਤ੍ਥਿਭਾਵਂ ਵਾ ਞਤ੍ਵਾ ਆਗਚ੍ਛਥਾ’’ਤਿ ਪਹਿਣਿ.

ਤੇ ਚਾਰਿਕਂ ਚਰਨ੍ਤਾ ਭਦ੍ਦਿਯਨਗਰਂ ਪਾਪੁਣਿਂਸੁ. ਅਥ ਨੇ ਮੇਣ੍ਡਕਸੇਟ੍ਠਿ ਦਿਸ੍ਵਾ, ‘‘ਤਾਤਾ, ਕਿਂ ਕਰੋਨ੍ਤਾ ਵਿਚਰਥਾ’’ਤਿ ਪੁਚ੍ਛਿਤ੍ਵਾ ‘‘ਏਕਂ ਓਲੋਕੇਨ੍ਤਾ ਵਿਚਰਾਮਾ’’ਤਿ ਵੁਤ੍ਤੇ ‘‘ਇਮੇਸਂ ਇਮਾਨਿ ਗਹੇਤ੍ਵਾ ਕਿਞ੍ਚਿਦੇਵ ਓਲੋਕੇਤੁਂ ਵਿਚਰਣਕਿਚ੍ਚਂ ਨਤ੍ਥਿ, ਰਟ੍ਠਂ ਪਰਿਗ੍ਗਣ੍ਹਮਾਨਾ ਵਿਚਰਨ੍ਤੀ’’ਤਿ ਞਤ੍ਵਾ, ‘‘ਤਾਤਾ, ਅਮ੍ਹਾਕਂ ਪਚ੍ਛਿਮਗੇਹਂ ਪਵਿਸਿਤ੍ਵਾ ਓਲੋਕੇਥਾ’’ਤਿ ਆਹ. ਤੇ ਤਤ੍ਥ ਅਟ੍ਠਕਰੀਸਮਤ੍ਤੇ ਠਾਨੇ ਹਤ੍ਥਿਅਸ੍ਸਉਸਭਪ੍ਪਮਾਣੇ ਪਿਟ੍ਠਿਯਾ ਪਿਟ੍ਠਿਂ ਆਹਚ੍ਚ ਪਥਵਿਂ ਭਿਨ੍ਦਿਤ੍ਵਾ ਉਟ੍ਠਿਤੇ ਹੇਟ੍ਠਾ ਵੁਤ੍ਤਪ੍ਪਕਾਰੇ ਸੁਵਣ੍ਣਮੇਣ੍ਡਕੇ ਦਿਸ੍ਵਾ ਤੇਸਂ ਅਨ੍ਤਰਨ੍ਤਰਾ ਵਿਚਰਿਤ੍ਵਾ ਨਿਕ੍ਖਮਿਂਸੁ. ਅਥ ਨੇ ਸੇਟ੍ਠਿ, ‘‘ਤਾਤਾ, ਯਂ ਓਲੋਕੇਨ੍ਤਾ ਵਿਚਰਥ, ਦਿਟ੍ਠੋ ਵੋ ਸੋ’’ਤਿ ਪੁਚ੍ਛਿਤ੍ਵਾ ‘‘ਪਸ੍ਸਾਮ, ਸਾਮੀ’’ਤਿ ਵੁਤ੍ਤੇ ‘‘ਤੇਨ ਹਿ ਗਚ੍ਛਥਾ’’ਤਿ ਉਯ੍ਯੋਜੇਸਿ. ਤੇ ਤਤੋਵ ਗਨ੍ਤ੍ਵਾ ਅਤ੍ਤਨੋ ਸੇਟ੍ਠਿਨਾ ‘‘ਕਿਂ, ਤਾਤਾ, ਦਿਟ੍ਠਂ ਵੋ ਅਮ੍ਹਾਕਂ ਸਮਾਨਭੋਗਂ ਸੇਟ੍ਠਿਕੁਲ’’ਨ੍ਤਿ ਵੁਤ੍ਤੇ, ‘‘ਸਾਮਿ, ਤੁਮ੍ਹਾਕਂ ਕਿਂ ਅਤ੍ਥਿ, ਭਦ੍ਦਿਯਨਗਰੇ ਮੇਣ੍ਡਕਸੇਟ੍ਠਿਨੋ ਏਵਰੂਪੋ ਨਾਮ ਵਿਭਵੋ’’ਤਿ ਸਬ੍ਬਂ ਤਂ ਪਵਤ੍ਤਿਂ ਆਚਿਕ੍ਖਿਂਸੁ. ਤਂ ਸੁਤ੍ਵਾ ਸੇਟ੍ਠਿ ਅਤ੍ਤਮਨੋ ਹੁਤ੍ਵਾ ‘‘ਏਕਂ ਤਾਵ ਸੇਟ੍ਠਿਕੁਲਂ ਲਦ੍ਧਂ, ਅਪਰਮ੍ਪਿ ਨੁ ਖੋ ਅਤ੍ਥੀ’’ਤਿ ਸਤਸਹਸ੍ਸਗ੍ਘਨਿਕਂ ਕਮ੍ਬਲਂ ਦਤ੍ਵਾ ‘‘ਗਚ੍ਛਥ, ਤਾਤਾ, ਅਞ੍ਞਮ੍ਪਿ. ਸੇਟ੍ਠਿਕੁਲਂ ਵਿਚਿਨਥਾ’’ਤਿ ਪਹਿਣਿ.

ਤੇ ਰਾਜਗਹਂ ਗਨ੍ਤ੍ਵਾ ਜੋਤਿਕਸੇਟ੍ਠਿਸ੍ਸ ਗੇਹਤੋ ਅਵਿਦੂਰੇ ਦਾਰੁਰਾਸਿਂ ਕਤ੍ਵਾ ਅਗ੍ਗਿਂ ਦਤ੍ਵਾ ਅਟ੍ਠਂਸੁ. ‘‘ਕਿਂ ਇਦ’’ਨ੍ਤਿ ਪੁਟ੍ਠਕਾਲੇ ਚ ‘‘ਏਕਂ ਨੋ ਮਹਗ੍ਘਕਮ੍ਬਲਂ ਵਿਕ੍ਕਿਣਨ੍ਤਾਨਂ ਕਯਿਕੋ ਨਤ੍ਥਿ, ਗਹੇਤ੍ਵਾ ਵਿਚਰਨ੍ਤਾਪਿ ਚੋਰਾਨਂ ਭਾਯਾਮ, ਤੇਨ ਤਂ ਝਾਪੇਤ੍ਵਾ ਗਮਿਸ੍ਸਾਮਾ’’ਤਿ ਵਦਿਂਸੁ. ਅਥ ਨੇ ਜੋਤਿਕਸੇਟ੍ਠਿ ਦਿਸ੍ਵਾ ‘‘ਇਮੇ ਕਿਂ ਕਰੋਨ੍ਤੀ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ਪਕ੍ਕੋਸਾਪੇਤ੍ਵਾ ‘‘ਕਿਂ ਅਗ੍ਘਨਕੋ ਕਮ੍ਬਲੋ’’ਤਿ ਪੁਚ੍ਛਿ. ‘‘ਸਤਸਹਸ੍ਸਗ੍ਘਨਕੋ’’ਤਿ ਵੁਤ੍ਤੇ ਸਤਸਹਸ੍ਸਂ ਦਾਪੇਤ੍ਵਾ ‘‘ਦ੍ਵਾਰਕੋਟ੍ਠਕਂ ਸਮ੍ਮਜ੍ਜਿਤ੍ਵਾ ਕਚਵਰਛਡ੍ਡਿਕਾਯ ਦਾਸਿਯਾ ਦੇਥਾ’’ਤਿ ਤੇਸਂਯੇਵ ਹਤ੍ਥੇ ਪਹਿਣਿ. ਸਾ ਕਮ੍ਬਲਂ ਗਹੇਤ੍ਵਾ ਰੋਦਮਾਨਾ ਸਾਮਿਕਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ‘‘ਕਿਂ ਮਂ, ਸਾਮਿ, ਅਪਰਾਧੇ ਸਤਿ ਪਹਰਿਤੁਂ ਨ ਵਟ੍ਟਤਿ, ਕਸ੍ਮਾ ਮੇ ਏਵਰੂਪਂ ਥੂਲਕਮ੍ਬਲਂ ਪਹਿਣਿਤ੍ਥ, ਕਥਾਹਂ ਇਮਂ ਨਿਵਾਸੇਸ੍ਸਾਮਿ ਵਾ ਪਾਰੁਪਿਸ੍ਸਾਮਿ ਵਾ’’ਤਿ. ਨਾਹਂ ਤਵ ਏਤਦਤ੍ਥਾਯ ਪਹਿਣਿਂ, ਏਤਂ ਪਨ ਪਲਿਵੇਠੇਤ੍ਵਾ ਤਵ ਸਯਨਪਾਦਮੂਲੇ ਠਪੇਤ੍ਵਾ ਨਿਪਜ੍ਜਨਕਾਲੇ ਗਨ੍ਧੋਦਕੇਨ ਧੋਤਾਨਂ ਪਾਦਾਨਂ ਪੁਞ੍ਛਨਤ੍ਥਾਯ ਤੇ ਪਹਿਣਿਂ, ਕਿਂ ਏਤਮ੍ਪਿ ਕਾਤੁਂ ਨ ਸਕ੍ਕੋਸੀਤਿ. ਸਾ ‘‘ਏਤਂ ਪਨ ਕਾਤੁਂ ਸਕ੍ਖਿਸ੍ਸਾਮੀ’’ਤਿ ਗਹੇਤ੍ਵਾ ਅਗਮਾਸਿ. ਤੇ ਚ ਪੁਰਿਸਾ ਤਂ ਕਾਰਣਂ ਦਿਸ੍ਵਾ ਅਤ੍ਤਨੋ ਸੇਟ੍ਠਿਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਕਿਂ, ਤਾਤਾ, ਦਿਟ੍ਠਂ ਵੋ ਸੇਟ੍ਠਿਕੁਲ’’ਨ੍ਤਿ ਵੁਤ੍ਤੇ, ‘‘ਸਾਮਿ, ਕਿਂ ਤੁਮ੍ਹਾਕਂ ਅਤ੍ਥਿ, ਰਾਜਗਹਨਗਰੇ ਜੋਤਿਕਸੇਟ੍ਠਿਸ੍ਸ ਏਵਰੂਪਾ ਨਾਮ ਸਮ੍ਪਤ੍ਤੀ’’ਤਿ ਸਬ੍ਬਂ ਗੇਹਸਮ੍ਪਤ੍ਤਿਂ ਆਰੋਚੇਤ੍ਵਾ ਤਂ ਪਵਤ੍ਤਿਂ ਆਚਿਕ੍ਖਿਂਸੁ. ਸੇਟ੍ਠਿ ਤੇਸਂ ਵਚਨਂ ਸੁਤ੍ਵਾ ਤੁਟ੍ਠਮਾਨਸੋ ‘‘ਇਦਾਨਿ ਪਬ੍ਬਜਿਤੁਂ ਲਭਿਸ੍ਸਾਮੀ’’ਤਿ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ‘‘ਪਬ੍ਬਜਿਤੁਕਾਮੋਮ੍ਹਿ, ਦੇਵਾ’’ਤਿ ਆਹ. ਸਾਧੁ, ਮਹਾਸੇਟ੍ਠਿ, ਪਬ੍ਬਜਾਹੀਤਿ. ਸੋ ਗੇਹਂ ਗਨ੍ਤ੍ਵਾ ਪੁਤ੍ਤੇ ਪਕ੍ਕੋਸਾਪੇਤ੍ਵਾ ਸੁਵਣ੍ਣਦਣ੍ਡਂ ਵਜਿਰਕੁਦ੍ਦਾਲਂ ਜੇਟ੍ਠਪੁਤ੍ਤਸ੍ਸ ਹਤ੍ਥੇ ਠਪੇਤ੍ਵਾ, ‘‘ਤਾਤ, ਪਚ੍ਛਿਮਗੇਹੇ ਸੁਵਣ੍ਣਪਬ੍ਬਤਤੋ ਸੁਵਣ੍ਣਪਿਣ੍ਡਂ ਉਦ੍ਧਰਾਹੀ’’ਤਿ ਆਹ. ਸੋ ਕੁਦ੍ਦਾਲਂ ਆਦਾਯ ਗਨ੍ਤ੍ਵਾ ਸੁਵਣ੍ਣਪਬ੍ਬਤਂ ਪਹਰਿ, ਪਿਟ੍ਠਿਪਾਸਾਣੇ ਪਹਟਕਾਲੋ ਵਿਯ ਅਹੋਸਿ. ਤਸ੍ਸ ਹਤ੍ਥਤੋ ਕੁਦ੍ਦਾਲਂ ਗਹੇਤ੍ਵਾ ਮਜ੍ਝਿਮਪੁਤ੍ਤਸ੍ਸ ਹਤ੍ਥੇ ਦਤ੍ਵਾ ਪਹਿਣਿ, ਤਸ੍ਸਪਿ ਸੁਵਣ੍ਣਪਬ੍ਬਤਂ ਪਹਰਨ੍ਤਸ੍ਸ ਪਿਟ੍ਠਿਪਾਸਾਣੇ ਪਹਟਕਾਲੋ ਵਿਯ ਅਹੋਸਿ. ਅਥ ਨਂ ਕਨਿਟ੍ਠਪੁਤ੍ਤਸ੍ਸ ਹਤ੍ਥੇ ਦਤ੍ਵਾ ਪਹਿਣਿ, ਤਸ੍ਸ ਤਂ ਗਹੇਤ੍ਵਾ ਪਹਰਨ੍ਤਸ੍ਸ ਕੋਟ੍ਟੇਤ੍ਵਾ ਰਾਸਿਕਤਾਯ ਮਤ੍ਤਿਕਾਯ ਪਹਟਕਾਲੋ ਵਿਯ ਅਹੋਸਿ. ਅਥ ਨਂ ਸੇਟ੍ਠਿ ‘‘ਏਹਿ, ਤਾਤ, ਅਲਂ ਏਤ੍ਤਕੇਨਾ’’ਤਿ ਵਤ੍ਵਾ ਇਤਰੇ ਦ੍ਵੇ ਜੇਟ੍ਠਭਾਤਿਕੇ ਪਕ੍ਕੋਸਾਪੇਤ੍ਵਾ ‘‘ਅਯਂ ਸੁਵਣ੍ਣਪਬ੍ਬਤੋ ਨ ਤੁਮ੍ਹਾਕਂ ਨਿਬ੍ਬਤ੍ਤੋ, ਮਯ੍ਹਞ੍ਚ ਕਨਿਟ੍ਠਸ੍ਸ ਚ ਨਿਬ੍ਬਤ੍ਤੋ, ਇਮਿਨਾ ਸਦ੍ਧਿਂ ਏਕਤੋ ਹੁਤ੍ਵਾ ਪਰਿਭੁਞ੍ਜਥਾ’’ਤਿ ਆਹ. ਕਸ੍ਮਾ ਪਨ ਸੋ ਤੇਸਮੇਵ ਨਿਬ੍ਬਤ੍ਤਤਿ, ਕਸ੍ਮਾ ਚ ਜਟਿਲੋ ਜਾਤਕਾਲੇ ਉਦਕੇ ਪਾਤਿਤੋਤਿ? ਅਤ੍ਤਨੋ ਕਤਕਮ੍ਮੇਨੇਵ.

ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਹਿ ਚੇਤਿਯੇ ਕਰਿਯਮਾਨੇ ਏਕੋ ਖੀਣਾਸਵੋ ਚੇਤਿਯਟ੍ਠਾਨਂ ਗਨ੍ਤ੍ਵਾ ਓਲੋਕੇਤ੍ਵਾ, ‘‘ਤਾਤਾ, ਕਸ੍ਮਾ ਚੇਤਿਯਸ੍ਸ ਉਤ੍ਤਰੇਨ ਮੁਖਂ ਨ ਉਟ੍ਠਹਤੀ’’ਤਿ ਪੁਚ੍ਛਿ. ‘‘ਸੁਵਣ੍ਣਂ ਨਪ੍ਪਹੋਤੀ’’ਤਿ ਆਹਂਸੁ. ਅਹਂ ਅਨ੍ਤੋਗਾਮਂ ਪਵਿਸਿਤ੍ਵਾ ਸਮਾਦਪੇਸ੍ਸਾਮਿ, ਤੁਮ੍ਹੇ ਆਦਰੇਨ ਕਮ੍ਮਂ ਕਰੋਥਾਤਿ. ਸੋ ਏਵਂ ਵਤ੍ਵਾ ਨਗਰਂ ਪਵਿਸਿਤ੍ਵਾ, ‘‘ਅਮ੍ਮਾ, ਤਾਤਾ, ਤੁਮ੍ਹਾਕਂ ਚੇਤਿਯਸ੍ਸ ਏਕਸ੍ਮਿਂ ਮੁਖੇ ਸੁਵਣ੍ਣਂ ਨਪ੍ਪਹੋਤਿ, ਸੁਵਣ੍ਣਂ ਜਾਨਾਥਾ’’ਤਿ ਮਹਾਜਨਂ ਸਮਾਦਪੇਨ੍ਤੋ ਸੁਵਣ੍ਣਕਾਰਕੁਲਂ ਅਗਮਾਸਿ. ਸੁਵਣ੍ਣਕਾਰੋਪਿ ਤਙ੍ਖਣੇਯੇਵ ਭਰਿਯਾਯ ਸਦ੍ਧਿਂ ਕਲਹਂ ਕਰੋਨ੍ਤੋ ਨਿਸਿਨ੍ਨੋ ਹੋਤਿ. ਅਥ ਨਂ ਥੇਰੋ ‘‘ਚੇਤਿਯੇ ਤੁਮ੍ਹੇਹਿ ਗਹਿਤਮੁਖਸ੍ਸ ਸੁਵਣ੍ਣਂ ਨਪ੍ਪਹੋਤਿ, ਤਂ ਜਾਨਿਤੁਂ ਵਟ੍ਟਤੀ’’ਤਿ ਆਹ. ਸੋ ਭਰਿਯਾਯ ਕੋਪੇਨ ‘‘ਤਵ ਸਤ੍ਥਾਰਂ ਉਦਕੇ ਖਿਪਿਤ੍ਵਾ ਗਚ੍ਛਾ’’ਤਿ ਆਹ. ਅਥ ਨਂ ਸਾ ‘‘ਅਤਿਸਾਹਸਿਕਕਮ੍ਮਂ ਤੇ ਕਤਂ, ਮਮ ਕੁਦ੍ਧੇਨ ਤੇ ਅਹਮੇਵ ਅਕ੍ਕੋਸਿਤਬ੍ਬਾ ਵਾ ਪਹਰਿਤਬ੍ਬਾ ਵਾ, ਕਸ੍ਮਾ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇਸੁ ਬੁਦ੍ਧੇਸੁ ਵੇਰਮਕਾਸੀ’’ਤਿ ਆਹ. ਸੁਵਣ੍ਣਕਾਰੋ ਤਾਵਦੇਵ ਸਂਵੇਗਪ੍ਪਤ੍ਤੋ ਹੁਤ੍ਵਾ ‘‘ਖਮਥ ਮੇ, ਭਨ੍ਤੇ’’ਤਿ ਵਤ੍ਵਾ ਥੇਰਸ੍ਸ ਪਾਦਮੂਲੇ ਨਿਪਜ੍ਜਿ. ਤਾਤ, ਅਹਂ ਤਯਾ ਨ ਕਿਞ੍ਚਿ ਵੁਤ੍ਤੋ, ਸਤ੍ਥਾਰਂ ਖਮਾਪੇਹੀਤਿ. ਕਿਨ੍ਤਿ ਕਤ੍ਵਾ ਖਮਾਪੇਮਿ, ਭਨ੍ਤੇਤਿ. ਸੁਵਣ੍ਣਪੁਪ੍ਫਾਨਂ ਤਯੋ ਕੁਮ੍ਭੇ ਕਤ੍ਵਾ ਅਨ੍ਤੋਧਾਤੁਨਿਧਾਨੇ ਪਕ੍ਖਿਪਿਤ੍ਵਾ ਅਲ੍ਲਵਤ੍ਥੋ ਅਲ੍ਲਕੇਸੋ ਹੁਤ੍ਵਾ ਖਮਾਪੇਹਿ, ਤਾਤਾਤਿ.

ਸੋ ‘‘ਸਾਧੁ, ਭਨ੍ਤੇ’’ਤਿ ਵਤ੍ਵਾ ਸੁਵਣ੍ਣਪੁਪ੍ਫਾਨਿ ਕਰੋਨ੍ਤੋ ਤੀਸੁ ਪੁਤ੍ਤੇਸੁ ਜੇਟ੍ਠਪੁਤ੍ਤਂ ਪਕ੍ਕੋਸਾਪੇਤ੍ਵਾ ‘‘ਏਹਿ, ਤਾਤ, ਅਹਂ ਸਤ੍ਥਾਰਂ ਵੇਰਵਚਨੇਨ ਅਵਚਂ, ਤਸ੍ਮਾ ਇਮਾਨਿ ਪੁਪ੍ਫਾਨਿ ਕਤ੍ਵਾ ਧਾਤੁਨਿਧਾਨੇ ਪਕ੍ਖਿਪਿਤ੍ਵਾ ਖਮਾਪੇਸ੍ਸਾਮਿ, ਤ੍ਵਮ੍ਪਿ ਖੋ ਮੇ ਸਹਾਯੋ ਹੋਹੀ’’ਤਿ ਆਹ. ਸੋ ‘‘ਨ ਤ੍ਵਂ ਮਯਾ ਵੇਰਵਚਨਂ ਵਦਾਪਿਤੋ, ਤ੍ਵਂਯੇਵ ਕਰੋਹੀ’’ਤਿ ਕਾਤੁਂ ਨ ਇਚ੍ਛਿ. ਮਜ੍ਝਿਮਪੁਤ੍ਤਂ ਪਕ੍ਕੋਸਿਤ੍ਵਾ ਤਥੇਵਾਹ, ਸੋਪਿ ਤਥੇਵ ਵਤ੍ਵਾ ਕਾਤੁਂ ਨ ਇਚ੍ਛਿ. ਕਨਿਟ੍ਠਂ ਪਕ੍ਕੋਸਿਤ੍ਵਾ ਤਥੇਵਾਹ, ਸੋ ‘‘ਪਿਤੁ ਉਪ੍ਪਨ੍ਨਕਿਚ੍ਚਂ ਨਾਮ ਪੁਤ੍ਤਸ੍ਸ ਭਾਰੋ’’ਤਿ ਵਤ੍ਵਾ ਪਿਤੁਸਹਾਯੋ ਹੁਤ੍ਵਾ ਪੁਪ੍ਫਾਨਿ ਅਕਾਸਿ. ਸੁਵਣ੍ਣਕਾਰੋ ਵਿਦਤ੍ਥਿਪ੍ਪਮਾਣਾਨਂ ਪੁਪ੍ਫਾਨਂ ਤਯੋ ਕੁਮ੍ਭੇ ਨਿਟ੍ਠਾਪੇਤ੍ਵਾ ਧਾਤੁਨਿਧਾਨੇ ਪਕ੍ਖਿਪਿਤ੍ਵਾ ਅਲ੍ਲਵਤ੍ਥੋ ਅਲ੍ਲਕੇਸੋ ਸਤ੍ਥਾਰਂ ਖਮਾਪੇਸਿ. ਇਤਿ ਸੋ ਸਤ੍ਤਕ੍ਖਤ੍ਤੁਂ ਜਾਤਕਾਲੇ ਉਦਕੇ ਪਾਤਨਂ ਲਭਿ. ਅਯਂ ਪਨਸ੍ਸ ਕੋਟਿਯਂ ਠਿਤੋ ਅਤ੍ਤਭਾਵੋ. ਇਧਾਪਿ ਤਸ੍ਸੇਵ ਨਿਸ੍ਸਨ੍ਦੇਨ ਉਦਕੇ ਪਾਤਿਤੋ. ਯੇ ਪਨਸ੍ਸ ਦ੍ਵੇ ਜੇਟ੍ਠਭਾਤਿਕਾ ਪੁਤ੍ਤਾ ਸੁਵਣ੍ਣਪੁਪ੍ਫਾਨਂ ਕਰਣਕਾਲੇ ਸਹਾਯਾ ਭਵਿਤੁਂ ਨ ਇਚ੍ਛਿਂਸੁ, ਤੇਸਂ ਤੇਨ ਕਾਰਣੇਨ ਸੁਵਣ੍ਣਪਬ੍ਬਤੋ ਨ ਨਿਬ੍ਬਤ੍ਤਿ, ਜਟਿਲਸ੍ਸ ਚੇਵ ਕਨਿਟ੍ਠਪੁਤ੍ਤਸ੍ਸ ਚ ਏਕਤੋ ਕਤਭਾਵੇਨ ਨਿਬ੍ਬਤ੍ਤਿ. ਇਤਿ ਸੋ ਪੁਤ੍ਤੇ ਅਨੁਸਾਸਿਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਕਤਿਪਾਹੇਨੇਵ ਅਰਹਤ੍ਤਂ ਪਾਪੁਣਿ. ਸਤ੍ਥਾ ਅਪਰੇਨ ਸਮਯੇਨ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਪਿਣ੍ਡਾਯ ਚਰਨ੍ਤੋ ਤਸ੍ਸ ਪੁਤ੍ਤਾਨਂ ਗੇਹਦ੍ਵਾਰਂ ਅਗਮਾਸਿ, ਤੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਅਡ੍ਢਮਾਸਂ ਭਿਕ੍ਖਾਦਾਨਂ ਅਦਂਸੁ.

ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਅਜ੍ਜਾਪਿ ਤੇ, ਆਵੁਸੋ ਜਟਿਲ, ਅਸੀਤਿਹਤ੍ਥੇ ਸੁਵਣ੍ਣਪਬ੍ਬਤੇ ਚ ਪੁਤ੍ਤੇਸੁ ਚ ਤਣ੍ਹਾ ਅਤ੍ਥੀ’’ਤਿ. ‘‘ਨ ਮੇ, ਆਵੁਸੋ, ਏਤੇਸੁ ਤਣ੍ਹਾ ਵਾ ਮਾਨੋ ਵਾ ਅਤ੍ਥੀ’’ਤਿ. ਤੇ ‘‘ਅਯਂ ਜਟਿਲਤ੍ਥੇਰੋ ਅਭੂਤਂ ਵਤ੍ਵਾ ਅਞ੍ਞਂ ਬ੍ਯਾਕਰੋਤੀ’’ਤਿ ਵਦਿਂਸੁ. ਸਤ੍ਥਾ ਤੇਸਂ ਕਥਂ ਸੁਤ੍ਵਾ ‘‘ਨ, ਭਿਕ੍ਖਵੇ, ਮਮ ਪੁਤ੍ਤਸ੍ਸ ਤੇਸੁ ਤਣ੍ਹਾ ਵਾ ਮਾਨੋ ਵਾ ਅਤ੍ਥੀ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੪੧੬. ‘‘ਯੋਧ ਤਣ੍ਹਂ ਪਹਨ੍ਤ੍ਵਾਨ, ਅਨਾਗਾਰੋ ਪਰਿਬ੍ਬਜੇ;

ਤਣ੍ਹਾਭਵਪਰਿਕ੍ਖੀਣਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣ’’ਨ੍ਤਿ.

ਤਸ੍ਸਤ੍ਥੋ – ਯੋ ਇਧ ਲੋਕੇ ਛਦ੍ਵਾਰਿਕਂ ਤਣ੍ਹਂ ਵਾ ਮਾਨਂ ਵਾ ਜਹਿਤ੍ਵਾ ਘਰਾਵਾਸੇਨ ਅਨਤ੍ਥਿਕੋ ਅਨਾਗਾਰੋ ਹੁਤ੍ਵਾ ਪਰਿਬ੍ਬਜਤਿ, ਤਣ੍ਹਾਯ ਚੇਵ ਭਵਸ੍ਸ ਚ ਪਰਿਕ੍ਖੀਣਤ੍ਤਾ ਤਣ੍ਹਾਭਵਪਰਿਕ੍ਖੀਣਂ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਜਟਿਲਤ੍ਥੇਰਵਤ੍ਥੁ ਤੇਤ੍ਤਿਂਸਤਿਮਂ.