੨੩. ਸਾਮਣੇਰਾਨਂ ਵਤ੍ਥੁ

ਅਵਿਰੁਦ੍ਧਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਚਤ੍ਤਾਰੋ ਸਾਮਣੇਰੇ ਆਰਬ੍ਭ ਕਥੇਸਿ.

ਏਕਾ ਕਿਰ ਬ੍ਰਾਹ੍ਮਣੀ ਚਤੁਨ੍ਨਂ ਭਿਕ੍ਖੂਨਂ ਉਦ੍ਦੇਸਭਤ੍ਤਂ ਸਜ੍ਜੇਤ੍ਵਾ ਬ੍ਰਾਹ੍ਮਣਂ ਆਹ – ‘‘ਵਿਹਾਰਂ ਗਨ੍ਤ੍ਵਾ ਚਤ੍ਤਾਰੋ ਮਹਲ੍ਲਕਬ੍ਰਾਹ੍ਮਣੇ ਉਦ੍ਦਿਸਾਪੇਤ੍ਵਾ ਆਨੇਹੀ’’ਤਿ. ਸੋ ਵਿਹਾਰਂ ਗਨ੍ਤ੍ਵਾ ‘‘ਚਤ੍ਤਾਰੋ ਮੇ ਬ੍ਰਾਹ੍ਮਣੇ ਉਦ੍ਦਿਸਿਤ੍ਵਾ ਦੇਥਾ’’ਤਿ ਆਹ. ਤਸ੍ਸ ਸਂਕਿਚ੍ਚੋ ਪਣ੍ਡਿਤੋ ਸੋਪਾਕੋ ਰੇਵਤੋਤਿ ਸਤ੍ਤਵਸ੍ਸਿਕਾ ਚਤ੍ਤਾਰੋ ਖੀਣਾਸਵਸਾਮਣੇਰਾ ਪਾਪੁਣਿਂਸੁ. ਬ੍ਰਾਹ੍ਮਣੀ ਮਹਾਰਹਾਨਿ ਆਸਨਾਨਿ ਪਞ੍ਞਾਪੇਤ੍ਵਾ ਠਿਤਾ ਸਾਮਣੇਰੇ ਦਿਸ੍ਵਾਵ ਕੁਪਿਤਾ ਉਦ੍ਧਨੇ ਪਕ੍ਖਿਤ੍ਤਲੋਣਂ ਵਿਯ ਤਟਤਟਾਯਮਾਨਾ ‘‘ਤ੍ਵਂ ਵਿਹਾਰਂ ਗਨ੍ਤ੍ਵਾ ਅਤ੍ਤਨੋ ਨਤ੍ਤੁਮਤ੍ਤੇਪਿ ਅਪ੍ਪਹੋਨ੍ਤੇ ਚਤ੍ਤਾਰੋ ਕੁਮਾਰਕੇ ਗਹੇਤ੍ਵਾ ਆਗਤੋਸੀ’’ਤਿ ਵਤ੍ਵਾ ਤੇਸਂ ਤੇਸੁ ਆਸਨੇਸੁ ਨਿਸੀਦਿਤੁਂ ਅਦਤ੍ਵਾ ਨੀਚਪੀਠਕਾਨਿ ਅਤ੍ਥਰਿਤ੍ਵਾ ‘‘ਏਤੇਸੁ ਨਿਸੀਦਥਾ’’ਤਿ ਵਤ੍ਵਾ ‘‘ਗਚ੍ਛ, ਬ੍ਰਾਹ੍ਮਣ, ਮਹਲ੍ਲਕੇ ਓਲੋਕੇਤ੍ਵਾ ਆਨੇਹੀ’’ਤਿ ਆਹ. ਬ੍ਰਾਹ੍ਮਣੋ ਵਿਹਾਰਂ ਗਨ੍ਤ੍ਵਾ ਸਾਰਿਪੁਤ੍ਤਤ੍ਥੇਰਂ ਦਿਸ੍ਵਾ ‘‘ਏਥ, ਅਮ੍ਹਾਕਂ ਗੇਹਂ ਗਮਿਸ੍ਸਾਮਾ’’ਤਿ ਆਨੇਸਿ. ਥੇਰੋ ਆਗਨ੍ਤ੍ਵਾ ਸਾਮਣੇਰੇ ਦਿਸ੍ਵਾ ‘‘ਇਮੇਹਿ ਬ੍ਰਾਹ੍ਮਣੇਹਿ ਭਤ੍ਤਂ ਲਦ੍ਧ’’ਨ੍ਤਿ ਪੁਚ੍ਛਿਤ੍ਵਾ ‘‘ਨ ਲਦ੍ਧ’’ਨ੍ਤਿ ਵੁਤ੍ਤੇ ਚਤੁਨ੍ਨਮੇਵ ਭਤ੍ਤਸ੍ਸ ਪਟਿਯਤ੍ਤਭਾਵਂ ਞਤ੍ਵਾ ‘‘ਆਹਰ ਮੇ ਪਤ੍ਤ’’ਨ੍ਤਿ ਪਤ੍ਤਂ ਗਹੇਤ੍ਵਾ ਪਕ੍ਕਾਮਿ. ਬ੍ਰਾਹ੍ਮਣੀਪਿ ‘‘ਕਿਂ ਇਮਿਨਾ ਵੁਤ੍ਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਏਤੇਸਂ ਨਿਸਿਨ੍ਨਾਨਂ ਬ੍ਰਾਹ੍ਮਣਾਨਂ ਲਦ੍ਧੁਂ ਵਟ੍ਟਤਿ, ਆਹਰ ਮੇ ਪਤ੍ਤ’’ਨ੍ਤਿ ਅਤ੍ਤਨੋ ਪਤ੍ਤਂ ਗਹੇਤ੍ਵਾ ਗਤੋ, ਨ ਭੁਞ੍ਜਿਤੁਕਾਮੋ ਭਵਿਸ੍ਸਤਿ, ਸੀਘਂ ਗਨ੍ਤ੍ਵਾ ਅਞ੍ਞਂ ਓਲੋਕੇਤ੍ਵਾ ਆਨੇਹੀਤਿ. ਬ੍ਰਾਹ੍ਮਣੋ ਗਨ੍ਤ੍ਵਾ ਮਹਾਮੋਗ੍ਗਲ੍ਲਾਨਤ੍ਥੇਰਂ ਦਿਸ੍ਵਾ ਤਥੇਵ ਵਤ੍ਵਾ ਆਨੇਸਿ. ਸੋਪਿ ਸਾਮਣੇਰੇ ਦਿਸ੍ਵਾ ਤਥੇਵ ਵਤ੍ਵਾ ਪਤ੍ਤਂ ਗਹੇਤ੍ਵਾ ਪਕ੍ਕਾਮਿ. ਅਥ ਨਂ ਬ੍ਰਾਹ੍ਮਣੀ ਆਹ – ‘‘ਏਤੇ ਨ ਭੁਞ੍ਜਿਤੁਕਾਮਾ, ਬ੍ਰਾਹ੍ਮਣਵਾਦਕਂ ਗਨ੍ਤ੍ਵਾ ਏਕਂ ਮਹਲ੍ਲਕਬ੍ਰਾਹ੍ਮਣਂ ਆਨੇਹੀ’’ਤਿ.

ਸਾਮਣੇਰਾਪਿ ਪਾਤੋਵ ਪਟ੍ਠਾਯ ਕਿਞ੍ਚਿ ਅਲਭਮਾਨਾ ਜਿਘਚ੍ਛਾਯ ਪੀਲ਼ਿਤਾ ਨਿਸੀਦਿਂਸੁ. ਅਥ ਨੇਸਂ ਗੁਣਤੇਜੇਨ ਸਕ੍ਕਸ੍ਸ ਆਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸੋ ਆਵਜ੍ਜੇਨ੍ਤੋ ਤੇਸਂ ਪਾਤੋਵ ਪਟ੍ਠਾਯ ਨਿਸਿਨ੍ਨਾਨਂ ਕਿਲਨ੍ਤਭਾਵਂ ਞਤ੍ਵਾ ‘‘ਮਯਾ ਤਤ੍ਥ ਗਨ੍ਤੁਂ ਵਟ੍ਟਤੀ’’ਤਿ ਜਰਾਜਿਣ੍ਣੋ ਮਹਲ੍ਲਕਬ੍ਰਾਹ੍ਮਣੋ ਹੁਤ੍ਵਾ ਤਸ੍ਮਿਂ ਬ੍ਰਾਹ੍ਮਣਵਾਦਕੇ ਬ੍ਰਾਹ੍ਮਣਾਨਂ ਅਗ੍ਗਾਸਨੇ ਨਿਸੀਦਿ. ਬ੍ਰਾਹ੍ਮਣੋ ਤਂ ਦਿਸ੍ਵਾ ‘‘ਇਦਾਨਿ ਮੇ ਬ੍ਰਾਹ੍ਮਣੀ ਅਤ੍ਤਮਨਾ ਭਵਿਸ੍ਸਤੀ’’ਤਿ ਏਹਿ ਗੇਹਂ ਗਮਿਸ੍ਸਾਮਾ’’ਤਿ ਤਂ ਆਦਾਯ ਗੇਹਂ ਅਗਮਾਸਿ. ਬ੍ਰਾਹ੍ਮਣੀ ਤਂ ਦਿਸ੍ਵਾਵ ਤੁਟ੍ਠਚਿਤ੍ਤਾ ਦ੍ਵੀਸੁ ਆਸਨੇਸੁ ਅਤ੍ਥਰਣਂ ਏਕਸ੍ਮਿਂਯੇਵ ਅਤ੍ਥਰਿਤ੍ਵਾ, ‘‘ਅਯ੍ਯ, ਇਧ ਨਿਸੀਦਾਹੀ’’ਤਿ ਆਹ. ਸਕ੍ਕੋ ਗੇਹਂ ਪਵਿਸਿਤ੍ਵਾ ਚਤ੍ਤਾਰੋ ਸਾਮਣੇਰੇ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਤੇਸਂ ਆਸਨਪਰਿਯਨ੍ਤੇ ਭੂਮਿਯਂ ਪਲ੍ਲਙ੍ਕੇਨ ਨਿਸੀਦਿ. ਅਥ ਨਂ ਦਿਸ੍ਵਾ ਬ੍ਰਾਹ੍ਮਣੀ ਬ੍ਰਾਹ੍ਮਣਂ ਆਹ – ‘‘ਅਹੋ ਤੇ ਆਨੀਤੋ ਬ੍ਰਾਹ੍ਮਣੋ, ਏਤਮ੍ਪਿ ਉਮ੍ਮਤ੍ਤਕਂ ਗਹੇਤ੍ਵਾ ਆਗਤੋਸਿ, ਅਤ੍ਤਨੋ ਨਤ੍ਤੁਮਤ੍ਤੇ ਵਨ੍ਦਨ੍ਤੋ ਵਿਚਰਤਿ, ਕਿਂ ਇਮਿਨਾ, ਨੀਹਰਾਹਿ ਨ’’ਨ੍ਤਿ. ਸੋ ਖਨ੍ਧੇਪਿ ਹਤ੍ਥੇਪਿ ਕਚ੍ਛਾਯਪਿ ਗਹੇਤ੍ਵਾ ਨਿਕ੍ਕਡ੍ਢਿਯਮਾਨੋ ਉਟ੍ਠਾਤੁਮ੍ਪਿ ਨ ਇਚ੍ਛਤਿ. ਅਥ ਨਂ ਬ੍ਰਾਹ੍ਮਣੀ ‘‘ਏਹਿ, ਬ੍ਰਾਹ੍ਮਣ, ਤ੍ਵਂ ਏਕਸ੍ਮਿਂ ਹਤ੍ਥੇ ਗਣ੍ਹ, ਅਹਂ ਏਕਸ੍ਮਿਂ ਹਤ੍ਥੇ ਗਣ੍ਹਿਸ੍ਸਾਮੀ’’ਤਿ ਉਭੋਪਿ ਦ੍ਵੀਸੁ ਹਤ੍ਥੇਸੁ ਗਹੇਤ੍ਵਾ ਪਿਟ੍ਠਿਯਂ ਪੋਥੇਨ੍ਤਾ ਗੇਹਦ੍ਵਾਰਤੋ ਬਹਿ ਅਕਂਸੁ. ਸਕ੍ਕੋਪਿ ਨਿਸਿਨ੍ਨਟ੍ਠਾਨੇਯੇਵ ਨਿਸਿਨ੍ਨੋ ਹਤ੍ਥਂ ਪਰਿਵਤ੍ਤੇਸਿ. ਤੇ ਨਿਵਤ੍ਤਿਤ੍ਵਾ ਤਂ ਨਿਸਿਨ੍ਨਮੇਵ ਦਿਸ੍ਵਾ ਭੀਤਰਵਂ ਰਵਨ੍ਤਾ ਵਿਸ੍ਸਜ੍ਜੇਸੁਂ. ਤਸ੍ਮਿਂ ਖਣੇ ਸਕ੍ਕੋ ਅਤ੍ਤਨੋ ਸਕ੍ਕਭਾਵਂ ਜਾਨਾਪੇਸਿ. ਅਥ ਨੇਸਂ ਆਹਾਰਂ ਅਦਂਸੁ. ਪਞ੍ਚਪਿ ਜਨਾ ਆਹਾਰਂ ਗਹੇਤ੍ਵਾ ਏਕੋ ਕਣ੍ਣਿਕਾਮਣ੍ਡਲਂ ਵਿਨਿਵਿਜ੍ਝਿਤ੍ਵਾ, ਏਕੋ ਛਦਨਸ੍ਸ ਪੁਰਿਮਭਾਗਂ, ਏਕੋ ਪਚ੍ਛਿਮਭਾਗਂ, ਏਕੋ ਪਥਵਿਯਂ ਨਿਮੁਜ੍ਜਿਤ੍ਵਾ, ਸਕ੍ਕੋਪਿ ਏਕੇਨ ਠਾਨੇਨ ਨਿਕ੍ਖਮੀਤਿ ਏਵਂ ਪਞ੍ਚਧਾ ਅਗਮਂਸੁ. ਤਤੋ ਪਟ੍ਠਾਯ ਚ ਪਨ ਤਂ ਗੇਹਂ ਪਞ੍ਚਛਿਦ੍ਦਗੇਹਂ ਕਿਰ ਨਾਮ ਜਾਤਂ.

ਸਾਮਣੇਰੇਪਿ ਵਿਹਾਰਂ ਗਤਕਾਲੇ ਭਿਕ੍ਖੂ, ‘‘ਆਵੁਸੋ, ਕੀਦਿਸ’’ਨ੍ਤਿ ਪੁਚ੍ਛਿਂਸੁ. ਮਾ ਨੋ ਪੁਚ੍ਛਿਤ੍ਥ, ਅਮ੍ਹਾਕਂ ਦਿਟ੍ਠਕਾਲਤੋ ਪਟ੍ਠਾਯ ਬ੍ਰਾਹ੍ਮਣੀ ਕੋਧਾਭਿਭੂਤਾ ਪਞ੍ਞਤ੍ਤਾਸਨੇਸੁ ਨੋ ਨਿਸੀਦਿਤੁਮ੍ਪਿ ਅਦਤ੍ਵਾ ‘‘ਸੀਘਂ ਸੀਘਂ ਮਹਲ੍ਲਕਬ੍ਰਾਹ੍ਮਣਂ ਆਨੇਹੀ’’ਤਿ ਆਹ. ਅਮ੍ਹਾਕਂ ਉਪਜ੍ਝਾਯੋ ਆਗਨ੍ਤ੍ਵਾ ਅਮ੍ਹੇ ਦਿਸ੍ਵਾ ‘‘ਇਮੇਸਂ ਨਿਸਿਨ੍ਨਬ੍ਰਾਹ੍ਮਣਾਨਂ ਲਦ੍ਧੁਂ ਵਟ੍ਟਤੀ’’ਤਿ ਪਤ੍ਤਂ ਆਹਰਾਪੇਤ੍ਵਾ ਨਿਕ੍ਖਮਿ. ‘‘ਅਞ੍ਞਂ ਮਹਲ੍ਲਕਂ ਬ੍ਰਾਹ੍ਮਣਂ ਆਨੇਸੀ’’ਤਿ ਵੁਤ੍ਤੇ ਬ੍ਰਾਹ੍ਮਣੋ ਮਹਾਮੋਗ੍ਗਲ੍ਲਾਨਤ੍ਥੇਰਂ ਆਨੇਸਿ, ਸੋਪਿ ਅਮ੍ਹੇ ਦਿਸ੍ਵਾ ਤਥੇਵ ਵਤ੍ਵਾ ਪਕ੍ਕਾਮਿ. ਅਥ ਬ੍ਰਾਹ੍ਮਣੀ ‘‘ਨ ਏਤੇ ਭੁਞ੍ਜਿਤੁਕਾਮਾ, ਗਚ੍ਛ ਬ੍ਰਾਹ੍ਮਣਵਾਦਕਤੋ ਏਕਂ ਮਹਲ੍ਲਕਬ੍ਰਾਹ੍ਮਣਂ ਆਨੇਹੀ’’ਤਿ ਬ੍ਰਾਹ੍ਮਣਂ ਪਹਿਣਿ. ਸੋ ਤਤ੍ਥ ਗਨ੍ਤ੍ਵਾ ਬ੍ਰਾਹ੍ਮਣਵੇਸੇਨ ਆਗਤਂ ਸਕ੍ਕਂ ਆਨੇਸਿ, ਤਸ੍ਸ ਆਗਤਕਾਲੇ ਅਮ੍ਹਾਕਂ ਆਹਾਰਂ ਅਦਂਸੂਤਿ. ਏਵਂ ਕਰੋਨ੍ਤਾਨਂ ਪਨ ਤੇਸਂ ਤੁਮ੍ਹੇ ਨ ਕੁਜ੍ਝਿਤ੍ਥਾਤਿ? ਨ ਕੁਜ੍ਝਿਮ੍ਹਾਤਿ. ਭਿਕ੍ਖੂ ਤਂ ਸੁਤ੍ਵਾ ਸਤ੍ਥੁ ਆਰੋਚੇਸੁਂ – ‘‘ਭਨ੍ਤੇ, ਇਮੇ ‘ਨ ਕੁਜ੍ਝਿਮ੍ਹਾ’ਤਿ ਅਭੂਤਂ ਵਤ੍ਵਾ ਅਞ੍ਞਂ ਬ੍ਯਾਕਰੋਨ੍ਤੀ’’ਤਿ. ਸਤ੍ਥਾ, ‘‘ਭਿਕ੍ਖਵੇ, ਖੀਣਾਸਵਾ ਨਾਮ ਵਿਰੁਦ੍ਧੇਸੁਪਿ ਨ ਵਿਰੁਜ੍ਝਨ੍ਤਿਯੇਵਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੪੦੬. ‘‘ਅਵਿਰੁਦ੍ਧਂ ਵਿਰੁਦ੍ਧੇਸੁ, ਅਤ੍ਤਦਣ੍ਡੇਸੁ ਨਿਬ੍ਬੁਤਂ;

ਸਾਦਾਨੇਸੁ ਅਨਾਦਾਨਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣ’’ਨ੍ਤਿ.

ਤਤ੍ਥ ਅਵਿਰੁਦ੍ਧਨ੍ਤਿ ਆਘਾਤਵਸੇਨ ਵਿਰੁਦ੍ਧੇਸੁਪਿ ਲੋਕਿਯਮਹਾਜਨੇਸੁ ਆਘਾਤਾਭਾਵੇਨ ਅਵਿਰੁਦ੍ਧਂ. ਹਤ੍ਥਗਤੇ ਦਣ੍ਡੇ ਵਾ ਸਤ੍ਥੇ ਵਾ ਅਵਿਜ੍ਜਮਾਨੇਪਿ ਪਰੇਸਂ ਪਹਾਰਦਾਨਤੋ ਅਵਿਰਤਤ੍ਤਾ ਅਤ੍ਤਦਣ੍ਡੇਸੁ ਜਨੇਸੁ ਨਿਬ੍ਬੁਤਂ ਨਿਕ੍ਖਿਤ੍ਤਦਣ੍ਡਂ, ਪਞ੍ਚਨ੍ਨਂ ਖਨ੍ਧਾਨਂ ਅਹਂ ਮਮਨ੍ਤਿ ਗਹਿਤਤ੍ਤਾ ਸਾਦਾਨੇਸੁ ਤਸ੍ਸ ਗਹਣਸ੍ਸ ਅਭਾਵੇਨ ਅਨਾਦਾਨਂ ਤਂ ਏਵਰੂਪਂ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਸਾਮਣੇਰਾਨਂ ਵਤ੍ਥੁ ਤੇਵੀਸਤਿਮਂ.