੨੧. ਪਬ੍ਭਾਰਵਾਸੀਤਿਸ੍ਸਤ੍ਥੇਰਵਤ੍ਥੁ

ਅਸਂਸਟ੍ਠਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪਬ੍ਭਾਰਵਾਸੀਤਿਸ੍ਸਤ੍ਥੇਰਂ ਆਰਬ੍ਭ ਕਥੇਸਿ.

ਸੋ ਕਿਰ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਸਪ੍ਪਾਯਂ ਸੇਨਾਸਨਂ ਓਲੋਕੇਨ੍ਤੋ ਏਕਂ ਲੇਣਪਬ੍ਭਾਰਂ ਪਾਪੁਣਿ, ਸਮ੍ਪਤ੍ਤਕ੍ਖਣੇਯੇਵਸ੍ਸ ਚਿਤ੍ਤਂ ਏਕਗ੍ਗਤਂ ਲਭਿ. ਸੋ ‘‘ਅਹਂ ਇਧ ਵਸਨ੍ਤੋ ਪਬ੍ਬਜਿਤਕਿਚ੍ਚਂ ਨਿਪ੍ਫਾਦੇਤੁਂ ਸਕ੍ਖਿਸ੍ਸਾਮੀ’’ਤਿ ਚਿਨ੍ਤੇਸਿ. ਲੇਣੇਪਿ ਅਧਿਵਤ੍ਥਾ ਦੇਵਤਾ ‘‘ਸੀਲਵਾ ਭਿਕ੍ਖੁ ਆਗਤੋ, ਇਮਿਨਾ ਸਦ੍ਧਿਂ ਏਕਟ੍ਠਾਨੇ ਵਸਿਤੁਂ ਦੁਕ੍ਖਂ. ਅਯਂ ਪਨ ਇਧ ਏਕਰਤ੍ਤਿਮੇਵ ਵਸਿਤ੍ਵਾ ਪਕ੍ਕਮਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਪੁਤ੍ਤੇ ਆਦਾਯ ਨਿਕ੍ਖਮਿ. ਥੇਰੋ ਪੁਨਦਿਵਸੇ ਪਾਤੋਵ ਗੋਚਰਗਾਮਂ ਪਿਣ੍ਡਾਯ ਪਾਵਿਸਿ. ਅਥ ਨਂ ਏਕਾ ਉਪਾਸਿਕਾ ਦਿਸ੍ਵਾਵ ਪੁਤ੍ਤਸਿਨੇਹਂ ਪਟਿਲਭਿਤ੍ਵਾ ਗੇਹੇ ਨਿਸੀਦਾਪੇਤ੍ਵਾ ਭੋਜੇਤ੍ਵਾ ਅਤ੍ਤਾਨਂ ਨਿਸ੍ਸਾਯ ਤੇਮਾਸਂ ਵਸਨਤ੍ਥਾਯ ਯਾਚਿ. ਸੋਪਿ ‘‘ਸਕ੍ਕਾ ਮਯਾ ਇਮਂ ਨਿਸ੍ਸਾਯ ਭਵਨਿਸ੍ਸਰਣਂ ਕਾਤੁ’’ਨ੍ਤਿ ਅਧਿਵਾਸੇਤ੍ਵਾ ਤਮੇਵ ਲੇਣਂ ਅਗਮਾਸਿ. ਦੇਵਤਾ ਤਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਅਦ੍ਧਾ ਕੇਨਚਿ ਨਿਮਨ੍ਤਿਤੋ ਭਵਿਸ੍ਸਤਿ, ਸ੍ਵੇ ਵਾ ਪਰਸੁਵੇ ਵਾ ਗਮਿਸ੍ਸਤੀ’’ਤਿ ਚਿਨ੍ਤੇਸਿ.

ਏਵਂ ਅਡ੍ਢਮਾਸਮਤ੍ਤੇ ਅਤਿਕ੍ਕਨ੍ਤੇ ‘‘ਅਯਂ ਇਧੇਵ ਮਞ੍ਞੇ ਅਨ੍ਤੋਵਸ੍ਸਂ ਵਸਿਸ੍ਸਤਿ, ਸੀਲਵਤਾ ਪਨ ਸਦ੍ਧਿਂ ਏਕਟ੍ਠਾਨੇ ਪੁਤ੍ਤਕੇਹਿ ਸਦ੍ਧਿਂ ਵਸਿਤੁਂ ਦੁਕ੍ਕਰਂ, ਇਮਞ੍ਚ ‘ਨਿਕ੍ਖਮਾ’ਤਿ ਵਤ੍ਤੁਂ ਨ ਸਕ੍ਕਾ, ਅਤ੍ਥਿ ਨੁ ਖੋ ਇਮਸ੍ਸ ਸੀਲੇ ਖਲਿਤ’’ਨ੍ਤਿ ਦਿਬ੍ਬੇਨ ਚਕ੍ਖੁਨਾ ਓਲੋਕੇਨ੍ਤੀ ਉਪਸਮ੍ਪਦਮਾਲ਼ਕਤੋ ਪਟ੍ਠਾਯ ਤਸ੍ਸ ਸੀਲੇ ਖਲਿਤਂ ਅਦਿਸ੍ਵਾ ‘‘ਪਰਿਸੁਦ੍ਧਮਸ੍ਸ ਸੀਲਂ, ਕਿਞ੍ਚਿਦੇਵਸ੍ਸ ਕਤ੍ਵਾ ਅਯਸਂ ਉਪ੍ਪਾਦੇਸ੍ਸਾਮੀ’’ਤਿ ਤਸ੍ਸ ਉਪਟ੍ਠਾਕਕੁਲੇ ਉਪਾਸਿਕਾਯ ਜੇਟ੍ਠਪੁਤ੍ਤਸ੍ਸ ਸਰੀਰੇ ਅਧਿਮੁਚ੍ਚਿਤ੍ਵਾ ਗੀਵਂ ਪਰਿਵਤ੍ਤੇਸਿ. ਤਸ੍ਸ ਅਕ੍ਖੀਨਿ ਨਿਕ੍ਖਮਿਂਸੁ, ਮੁਖਤੋ ਖੇਲ਼ੋ ਪਗ੍ਘਰਿ. ਉਪਾਸਿਕਾ ਤਂ ਦਿਸ੍ਵਾ ‘‘ਕਿਂ ਇਦ’’ਨ੍ਤਿ ਵਿਰਵਿ. ਅਥ ਨਂ ਦੇਵਤਾ ਅਦਿਸ੍ਸਮਾਨਰੂਪਾ ਏਵਮਾਹ – ‘‘ਮਯਾ ਏਸ ਗਹਿਤੋ, ਬਲਿਕਮ੍ਮੇਨਪਿ ਮੇ ਅਤ੍ਥੋ ਨਤ੍ਥਿ, ਤੁਮ੍ਹਾਕਂ ਪਨ ਕੁਲੂਪਕਂ ਥੇਰਂ ਲਟ੍ਠਿਮਧੁਕਂ ਯਾਚਿਤ੍ਵਾ ਤੇਨ ਤੇਲਂ ਪਚਿਤ੍ਵਾ ਇਮਸ੍ਸ ਨਤ੍ਥੁਕਮ੍ਮਂ ਦੇਥ, ਏਵਾਹਂ ਇਮਂ ਮੁਞ੍ਚਿਸ੍ਸਾਮੀ’’ਤਿ. ਨਸ੍ਸਤੁ ਵਾ ਏਸ ਮਰਤੁ ਵਾ, ਨ ਸਕ੍ਖਿਸ੍ਸਾਮਹਂ ਅਯ੍ਯਂ ਲਟ੍ਠਿਮਧੁਕਂ ਯਾਚਿਤੁਨ੍ਤਿ. ਸਚੇ ਲਟ੍ਠਿਮਧੁਕਂ ਯਾਚਿਤੁਂ ਨ ਸਕ੍ਕੋਥ, ਨਾਸਿਕਾਯਸ੍ਸ ਹਿਙ੍ਗੁਚੁਣ੍ਣਂ ਪਕ੍ਖਿਪਿਤੁਂ ਵਦੇਥਾਤਿ. ਇਦਮ੍ਪਿ ਵਤ੍ਤੁਂ ਨ ਸਕ੍ਕੋਮਾਤਿ. ਤੇਨ ਹਿਸ੍ਸ ਪਾਦਧੋਵਨਉਦਕਂ ਆਦਾਯ ਸੀਸੇ ਆਸਿਞ੍ਚਥਾਤਿ. ਉਪਾਸਿਕਾ ‘‘ਸਕ੍ਕਾ ਇਦਂ ਕਾਤੁ’’ਨ੍ਤਿ ਵੇਲਾਯ ਆਗਤਂ ਥੇਰਂ ਨਿਸੀਦਾਪੇਤ੍ਵਾ ਯਾਗੁਖਜ੍ਜਕਂ ਦਤ੍ਵਾ ਅਨ੍ਤਰਭਤ੍ਤੇ ਨਿਸਿਨ੍ਨਸ੍ਸ ਪਾਦੇ ਧੋਵਿਤ੍ਵਾ ਉਦਕਂ ਗਹੇਤ੍ਵਾ, ‘‘ਭਨ੍ਤੇ, ਇਦਂ ਉਦਕਂ ਦਾਰਕਸ੍ਸ ਸੀਸੇ ਆਸਿਞ੍ਚਾਮਾ’’ਤਿ ਆਪੁਚ੍ਛਿਤ੍ਵਾ ‘‘ਤੇਨ ਹਿ ਆਸਿਞ੍ਚਥਾ’’ਤਿ ਵੁਤ੍ਤੇ ਤਥਾ ਅਕਾਸਿ. ਸਾ ਦੇਵਤਾ ਤਾਵਦੇਵ ਤਂ ਮੁਞ੍ਚਿਤ੍ਵਾ ਗਨ੍ਤ੍ਵਾ ਲੇਣਦ੍ਵਾਰੇ ਅਟ੍ਠਾਸਿ.

ਥੇਰੋਪਿ ਭਤ੍ਤਕਿਚ੍ਚਾਵਸਾਨੇ ਉਟ੍ਠਾਯਾਸਨਾ ਅਵਿਸ੍ਸਟ੍ਠਕਮ੍ਮਟ੍ਠਾਨਤਾਯ ਦ੍ਵਤ੍ਤਿਂਸਾਕਾਰਂ ਸਜ੍ਝਾਯਨ੍ਤੋਵ ਪਕ੍ਕਾਮਿ. ਅਥ ਨਂ ਲੇਣਦ੍ਵਾਰਂ ਪਤ੍ਤਕਾਲੇ ਸਾ ਦੇਵਤਾ ‘‘ਮਹਾਵੇਜ੍ਜ ਮਾ ਇਧ ਪਵਿਸਾ’’ਤਿ ਆਹ. ਸੋ ਤਤ੍ਥੇਵ ਠਤ੍ਵਾ ‘‘ਕਾਸਿ ਤ੍ਵ’’ਨ੍ਤਿ ਆਹ. ਅਹਂ ਇਧ ਅਧਿਵਤ੍ਥਾ ਦੇਵਤਾਤਿ. ਥੇਰੋ ‘‘ਅਤ੍ਥਿ ਨੁ ਖੋ ਮਯਾ ਵੇਜ੍ਜਕਮ੍ਮਸ੍ਸ ਕਤਟ੍ਠਾਨ’’ਨ੍ਤਿ ਉਪਸਮ੍ਪਦਮਾਲ਼ਕਤੋ ਪਟ੍ਠਾਯ ਓਲੋਕੇਨ੍ਤੋ ਅਤ੍ਤਨੋ ਸੀਲੇ ਤਿਲਕਂ ਵਾ ਕਾਲ਼ਕਂ ਵਾ ਅਦਿਸ੍ਵਾ ‘‘ਅਹਂ ਮਯਾ ਵੇਜ੍ਜਕਮ੍ਮਸ੍ਸ ਕਤਟ੍ਠਾਨਂ ਨ ਪਸ੍ਸਾਮਿ, ਕਸ੍ਮਾ ਏਵਂ ਵਦੇਸੀ’’ਤਿ ਆਹ. ਨ ਪਸ੍ਸਸੀਤਿ. ਆਮ, ਨ ਪਸ੍ਸਾਮੀਤਿ? ਆਚਿਕ੍ਖਾਮਿ ਤੇਤਿ. ਆਮ, ਆਚਿਕ੍ਖਾਹੀਤਿ. ਤਿਟ੍ਠਤੁ ਤਾਵ ਦੂਰੇ ਕਤਂ, ਅਜ੍ਜੇਵ ਤਯਾ ਅਮਨੁਸ੍ਸਗਹਿਤਸ੍ਸ ਉਪਟ੍ਠਾਕਪੁਤ੍ਤਸ੍ਸ ਪਾਦਧੋਵਨਉਦਕਂ ਸੀਸੇ ਆਸਿਤ੍ਤਂ, ਨਾਸਿਤ੍ਤਨ੍ਤਿ? ਆਮ, ਆਸਿਤ੍ਤਨ੍ਤਿ. ਕਿਂ ਏਤਂ ਨ ਪਸ੍ਸਸੀਤਿ? ਏਤਂ ਸਨ੍ਧਾਯ ਤ੍ਵਂ ਵਦੇਸੀਤਿ? ਆਮ, ਏਤਂ ਸਨ੍ਧਾਯ ਵਦਾਮੀਤਿ. ਥੇਰੋ ਚਿਨ੍ਤੇਸਿ – ‘‘ਅਹੋ ਵਤ ਮੇ ਸਮ੍ਮਾ ਪਣਿਹਿਤੋ ਅਤ੍ਤਾ, ਸਾਸਨਸ੍ਸ ਅਨੁਰੂਪਂ ਵਤ ਮੇ ਚਰਿਤਂ, ਦੇਵਤਾਪਿ ਮਮ ਚਤੁਪਾਰਿਸੁਦ੍ਧਿਸੀਲੇ ਤਿਲਕਂ ਵਾ ਕਾਲ਼ਕਂ ਵਾ ਅਦਿਸ੍ਵਾ ਦਾਰਕਸ੍ਸ ਸੀਸੇ ਆਸਿਤ੍ਤਪਾਦਧੋਵਨਮਤ੍ਤਂ ਅਦ੍ਦਸਾ’’ਤਿ ਤਸ੍ਸ ਸੀਲਂ ਆਰਬ੍ਭ ਬਲਵਪੀਤਿ ਉਪ੍ਪਜ੍ਜਿ. ਸੋ ਤਂ ਵਿਕ੍ਖਮ੍ਭੇਤ੍ਵਾ ਪਾਦੁਦ੍ਧਾਰਮ੍ਪਿ ਅਕਤ੍ਵਾ ਤਤ੍ਥੇਵ ਅਰਹਤ੍ਤਂ ਪਤ੍ਵਾ ‘‘ਮਾਦਿਸਂ ਪਰਿਸੁਦ੍ਧਂ ਸਮਣਂ ਦੂਸੇਤ੍ਵਾ ਮਾ ਇਧ ਵਨਸਣ੍ਡੇ ਵਸਿ, ਤ੍ਵਮੇਵ ਨਿਕ੍ਖਮਾਹੀ’’ਤਿ ਦੇਵਤਂ ਓਵਦਨ੍ਤੋ ਇਮਂ ਉਦਾਨਂ ਉਦਾਨੇਸਿ –

‘‘ਵਿਸੁਦ੍ਧੋ ਵਤ ਮੇ ਵਾਸੋ, ਨਿਮ੍ਮਲਂ ਮਂ ਤਪਸ੍ਸਿਨਂ;

ਮਾ ਤ੍ਵਂ ਵਿਸੁਦ੍ਧਂ ਦੂਸੇਸਿ, ਨਿਕ੍ਖਮ ਪਵਨਾ ਤੁਵ’’ਨ੍ਤਿ.

ਸੋ ਤਤ੍ਥੇਵ ਤੇਮਾਸਂ ਵਸਿਤ੍ਵਾ ਵੁਤ੍ਥਵਸ੍ਸੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਭਿਕ੍ਖੂਹਿ ‘‘ਕਿਂ, ਆਵੁਸੋ, ਪਬ੍ਬਜਿਤਕਿਚ੍ਚਂ ਤੇ ਮਤ੍ਥਕਂ ਪਾਪਿਤ’’ਨ੍ਤਿ ਪੁਟ੍ਠੋ ਤਸ੍ਮਿਂ ਲੇਣੇ ਵਸ੍ਸੂਪਗਮਨਤੋ ਪਟ੍ਠਾਯ ਸਬ੍ਬਂ ਤਂ ਪਵਤ੍ਤਿਂ ਭਿਕ੍ਖੂਨਂ ਆਰੋਚੇਤ੍ਵਾ, ‘‘ਆਵੁਸੋ, ਤ੍ਵਂ ਦੇਵਤਾਯ ਏਵਂ ਵੁਚ੍ਚਮਾਨੋ ਨ ਕੁਜ੍ਝੀ’’ਤਿ ਵੁਤ੍ਤੇ ‘‘ਨ ਕੁਜ੍ਝਿ’’ਨ੍ਤਿ ਆਹ. ਭਿਕ੍ਖੂ ਤਥਾਗਤਸ੍ਸ ਆਰੋਚੇਸੁਂ, ‘‘ਭਨ੍ਤੇ, ਅਯਂ ਭਿਕ੍ਖੁ ਅਞ੍ਞਂ ਬ੍ਯਾਕਰੋਤਿ, ਦੇਵਤਾਯ ਇਦਂ ਨਾਮ ਵੁਚ੍ਚਮਾਨੋਪਿ ਨ ਕੁਜ੍ਝਿਨ੍ਤਿ ਵਦਤੀ’’ਤਿ. ਸਤ੍ਥਾ ਤੇਸਂ ਕਥਂ ਸੁਤ੍ਵਾ ‘‘ਨੇਵ, ਭਿਕ੍ਖਵੇ, ਮਮ ਪੁਤ੍ਤੋ ਕੁਜ੍ਝਤਿ, ਏਤਸ੍ਸ ਗਿਹੀਹਿ ਵਾ ਪਬ੍ਬਜਿਤੇਹਿ ਵਾ ਸਂਸਗ੍ਗੋ ਨਾਮ ਨਤ੍ਥਿ, ਅਸਂਸਟ੍ਠੋ ਏਸ ਅਪ੍ਪਿਚ੍ਛੋ ਸਨ੍ਤੁਟ੍ਠੋ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੪੦੪. ‘‘ਅਸਂਸਟ੍ਠਂ ਗਹਟ੍ਠੇਹਿ, ਅਨਾਗਾਰੇਹਿ ਚੂਭਯਂ;

ਅਨੋਕਸਾਰਿਮਪ੍ਪਿਚ੍ਛਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣ’’ਨ੍ਤਿ.

ਤਤ੍ਥ ਅਸਂਸਟ੍ਠਨ੍ਤਿ ਦਸ੍ਸਨਸਵਨਸਮੁਲ੍ਲਪਨਪਰਿਭੋਗਕਾਯਸਂਸਗ੍ਗਾਨਂ ਅਭਾਵੇਨ ਅਸਂਸਟ੍ਠਂ. ਉਭਯਨ੍ਤਿ ਗਿਹੀਹਿ ਚ ਅਨਾਗਾਰੇਹਿ ਚਾਤਿ ਉਭਯੇਹਿਪਿ ਅਸਂਸਟ੍ਠਂ. ਅਨੋਕਸਾਰਿਨ੍ਤਿ ਅਨਾਲਯਚਾਰਿਂ ਤਂ ਏਵਰੂਪਂ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਪਬ੍ਭਾਰਵਾਸੀਤਿਸ੍ਸਤ੍ਥੇਰਵਤ੍ਥੁ ਏਕਵੀਸਤਿਮਂ.