੬. ਅਗ੍ਗਿਦਤ੍ਤਬ੍ਰਾਹ੍ਮਣਵਤ੍ਥੁ

ਬਹੁਂ ਵੇ ਸਰਣਂ ਯਨ੍ਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਵਾਲਿਕਰਾਸਿਮ੍ਹਿ ਨਿਸਿਨ੍ਨਂ ਅਗ੍ਗਿਦਤ੍ਤਂ ਨਾਮ ਕੋਸਲਰਞ੍ਞੋ ਪੁਰੋਹਿਤਂ ਆਰਬ੍ਭ ਕਥੇਸਿ.

ਸੋ ਕਿਰ ਮਹਾਕੋਸਲਸ੍ਸ ਪੁਰੋਹਿਤੋ ਅਹੋਸਿ. ਅਥ ਨਂ ਪਿਤਰਿ ਕਾਲਕਤੇ ਰਾਜਾ ਪਸੇਨਦਿ ਕੋਸਲੋ ‘‘ਪਿਤੁ ਮੇ ਪੁਰੋਹਿਤੋ’’ਤਿ ਗਾਰਵੇਨ ਤਸ੍ਮਿਂਯੇਵ ਠਾਨੇ ਠਪੇਤ੍ਵਾ ਤਸ੍ਸ ਅਤ੍ਤਨੋ ਉਪਟ੍ਠਾਨਂ ਆਗਤਕਾਲੇ ਪਚ੍ਚੁਗ੍ਗਮਨਂ ਕਰੋਤਿ, ‘‘ਆਚਰਿਯ, ਇਧ ਨਿਸੀਦਥਾ’’ਤਿ ਸਮਾਨਾਸਨਂ ਦਾਪੇਸਿ. ਸੋ ਚਿਨ੍ਤੇਸਿ – ‘‘ਅਯਂ ਰਾਜਾ ਮਯਿ ਅਤਿਵਿਯ ਗਾਰਵਂ ਕਰੋਤਿ, ਨ ਖੋ ਪਨ ਰਾਜੂਨਂ ਨਿਚ੍ਚਕਾਲਮੇਵ ਸਕ੍ਕਾ ਚਿਤ੍ਤਂ ਗਹੇਤੁਂ. ਸਮਾਨਵਯੇਨੇਵ ਹਿ ਸਦ੍ਧਿਂ ਰਜ੍ਜਸੁਖਂ ਨਾਮ ਸੁਖਂ ਹੋਤਿ, ਅਹਞ੍ਚਮ੍ਹਿ ਮਹਲ੍ਲਕੋ, ਪਬ੍ਬਜਿਤੁਂ ਮੇ ਯੁਤ੍ਤ’’ਨ੍ਤਿ. ਸੋ ਰਾਜਾਨਂ ਪਬ੍ਬਜ੍ਜਂ ਅਨੁਜਾਨਾਪੇਤ੍ਵਾ ਨਗਰੇ ਭੇਰਿਂ ਚਰਾਪੇਤ੍ਵਾ ਸਤ੍ਤਾਹੇਨ ਸਬ੍ਬਂ ਅਤ੍ਤਨੋ ਧਨਂ ਦਾਨਮੁਖੇ ਵਿਸ੍ਸਜ੍ਜੇਤ੍ਵਾ ਬਾਹਿਰਕਪਬ੍ਬਜ੍ਜਂ ਪਬ੍ਬਜਿ. ਤਂ ਨਿਸ੍ਸਾਯ ਦਸ ਪੁਰਿਸਸਹਸ੍ਸਾਨਿ ਅਨੁਪਬ੍ਬਜਿਂਸੁ. ਸੋ ਤੇਹਿ ਸਦ੍ਧਿਂ ਅਙ੍ਗਮਗਧਾਨਞ੍ਚ ਕੁਰੁਰਟ੍ਠਸ੍ਸ ਚ ਅਨ੍ਤਰੇ ਵਾਸਂ ਕਪ੍ਪੇਤ੍ਵਾ ਇਮਂ ਓਵਾਦਂ ਦੇਤਿ, ‘‘ਤਾਤਾ, ਯਸ੍ਸ ਕਾਮਵਿਤਕ੍ਕਾਦਯੋ ਉਪ੍ਪਜ੍ਜਨ੍ਤਿ, ਸੋ ਨਦਿਤੋ ਏਕੇਕਂ ਵਾਲੁਕਪੁਟਂ ਉਦ੍ਧਰਿਤ੍ਵਾ ਇਮਸ੍ਮਿਂ ਓਕਿਰਤੂ’’ਤਿ. ਤੇ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਕਾਮਵਿਤਕ੍ਕਾਦੀਨਂ ਉਪ੍ਪਨ੍ਨਕਾਲੇ ਤਥਾ ਕਰਿਂਸੁ. ਅਪਰੇਨ ਸਮਯੇਨ ਮਹਾਵਾਲੁਕਰਾਸਿ ਅਹੋਸਿ, ਤਂ ਅਹਿਛਤ੍ਤੋ ਨਾਮ ਨਾਗਰਾਜਾ ਪਟਿਗ੍ਗਹੇਸਿ. ਅਙ੍ਗਮਗਧਵਾਸਿਨੋ ਚੇਵ ਕੁਰੁਰਟ੍ਠਵਾਸਿਨੋ ਚ ਮਾਸੇ ਮਾਸੇ ਤੇਸਂ ਮਹਨ੍ਤਂ ਸਕ੍ਕਾਰਂ ਅਭਿਹਰਿਤ੍ਵਾ ਦਾਨਂ ਦੇਨ੍ਤਿ. ਅਥ ਨੇਸਂ ਅਗ੍ਗਿਦਤ੍ਤੋ ਇਮਂ ਓਵਾਦਂ ਅਦਾਸਿ – ‘‘ਪਬ੍ਬਤਂ ਸਰਣਂ ਯਾਥ, ਵਨਂ ਸਰਣਂ ਯਾਥ, ਆਰਾਮਂ ਸਰਣਂ ਯਾਥ, ਰੁਕ੍ਖਂ ਸਰਣਂ ਯਾਥ, ਏਵਂ ਸਬ੍ਬਦੁਕ੍ਖਤੋ ਮੁਚ੍ਚਿਸ੍ਸਥਾ’’ਤਿ. ਅਤ੍ਤਨੋ ਅਨ੍ਤੇਵਾਸਿਕੇਪਿ ਇਮਿਨਾ ਓਵਾਦੇਨ ਓਵਦਿ.

ਬੋਧਿਸਤ੍ਤੋਪਿ ਕਤਾਭਿਨਿਕ੍ਖਮਨੋ ਸਮ੍ਮਾਸਮ੍ਬੋਧਿਂ ਪਤ੍ਵਾ ਤਸ੍ਮਿਂ ਸਮਯੇ ਸਾਵਤ੍ਥਿਂ ਨਿਸ੍ਸਾਯ ਜੇਤਵਨੇ ਵਿਹਰਨ੍ਤੋ ਪਚ੍ਚੂਸਕਾਲੇ ਲੋਕਂ ਵੋਲੋਕੇਨ੍ਤੋ ਅਗ੍ਗਿਦਤ੍ਤਬ੍ਰਾਹ੍ਮਣਂ ਸਦ੍ਧਿਂ ਅਨ੍ਤੇਵਾਸਿਕੇਹਿ ਅਤ੍ਤਨੋ ਞਾਣਜਾਲਸ੍ਸ ਅਨ੍ਤੋ ਪਵਿਟ੍ਠਂ ਦਿਸ੍ਵਾ ‘‘ਸਬ੍ਬੇਪਿ ਇਮੇ ਅਰਹਤ੍ਤਸ੍ਸ ਉਪਨਿਸ੍ਸਯਸਮ੍ਪਨ੍ਨਾ’’ਤਿ ਞਤ੍ਵਾ ਸਾਯਨ੍ਹਸਮਯੇ ਮਹਾਮੋਗ੍ਗਲ੍ਲਾਨਤ੍ਥੇਰਂ ਆਹ – ‘‘ਮੋਗ੍ਗਲ੍ਲਾਨ, ਕਿਂ ਪਸ੍ਸਸਿ ਅਗ੍ਗਿਦਤ੍ਤਬ੍ਰਾਹ੍ਮਣਂ ਮਹਾਜਨਂ ਅਤਿਤ੍ਥੇ ਪਕ੍ਖਨ੍ਦਾਪੇਨ੍ਤਂ, ਗਚ੍ਛ ਤੇਸਂ ਓਵਾਦਂ ਦੇਹੀ’’ਤਿ. ਭਨ੍ਤੇ, ਬਹੂ ਏਤੇ, ਏਕਕਸ੍ਸ ਮਯ੍ਹਂ ਅਵਿਸਯ੍ਹਾ. ਸਚੇ ਤੁਮ੍ਹੇਪਿ ਆਗਮਿਸ੍ਸਥ, ਵਿਸਯ੍ਹਾ ਭਵਿਸ੍ਸਨ੍ਤੀਤਿ. ਮੋਗ੍ਗਲ੍ਲਾਨ, ਅਹਮ੍ਪਿ ਆਗਮਿਸ੍ਸਾਮਿ, ਤ੍ਵਂ ਪੁਰਤੋ ਯਾਹੀਤਿ. ਥੇਰੋ ਪੁਰਤੋ ਗਚ੍ਛਨ੍ਤੋਵ ਚਿਨ੍ਤੇਸਿ – ‘‘ਏਤੇ ਬਲਵਨ੍ਤੋ ਚੇਵ ਬਹੂ ਚ. ਸਚੇ ਸਬ੍ਬੇਸਂ ਸਮਾਗਮਟ੍ਠਾਨੇ ਕਿਞ੍ਚਿ ਕਥੇਸ੍ਸਾਮਿ, ਸਬ੍ਬੇਪਿ ਵਗ੍ਗਵਗ੍ਗੇਨ ਉਟ੍ਠਹੇਯ੍ਯੁ’’ਨ੍ਤਿ ਅਤ੍ਤਨੋ ਆਨੁਭਾਵੇਨ ਥੂਲਫੁਸਿਤਕਂ ਦੇਵਂ ਵੁਟ੍ਠਾਪੇਸਿ. ਤੇ ਥੂਲਫੁਸਿਤਕੇਸੁ ਪਤਨ੍ਤੇਸੁ ਉਟ੍ਠਾਯੁਟ੍ਠਾਯ ਅਤ੍ਤਨੋ ਅਤ੍ਤਨੋ ਪਣ੍ਣਸਾਲਂ ਪਵਿਸਿਂਸੁ. ਥੇਰੋ ਅਗ੍ਗਿਦਤ੍ਤਸ੍ਸ ਬ੍ਰਾਹ੍ਮਣਸ੍ਸ ਪਣ੍ਣਸਾਲਦ੍ਵਾਰੇ ਠਤ੍ਵਾ ‘‘ਅਗ੍ਗਿਦਤ੍ਤਾ’’ਤਿ ਆਹ. ਸੋ ਥੇਰਸ੍ਸ ਸਦ੍ਦਂ ਸੁਤ੍ਵਾ ‘‘ਮਂ ਇਮਸ੍ਮਿਂ ਲੋਕੇ ਨਾਮੇਨ ਆਲਪਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਕੋ ਨੁ ਖੋ ਮਂ ਨਾਮੇਨ ਆਲਪਤੀ’’ਤਿ ਮਾਨਥਦ੍ਧਤਾਯ ‘‘ਕੋ ਏਸੋ’’ਤਿ ਆਹ. ‘‘ਅਹਂ, ਬ੍ਰਾਹ੍ਮਣਾ’’ਤਿ. ‘‘ਕਿਂ ਵਦੇਸੀ’’ਤਿ? ‘‘ਅਜ੍ਜ ਮੇ ਏਕਰਤ੍ਤਿਂ ਇਧ ਵਸਨਟ੍ਠਾਨਂ ਤ੍ਵਂ ਆਚਿਕ੍ਖਾਹੀ’’ਤਿ. ‘‘ਇਧ ਵਸਨਟ੍ਠਾਨਂ ਨਤ੍ਥਿ, ਏਕਸ੍ਸ ਏਕਾਵ ਪਣ੍ਣਸਾਲਾ’’ਤਿ. ‘‘ਅਗ੍ਗਿਦਤ੍ਤ, ਮਨੁਸ੍ਸਾ ਨਾਮ ਮਨੁਸ੍ਸਾਨਂ, ਗਾਵੋ ਗੁਨ੍ਨਂ, ਪਬ੍ਬਜਿਤਾ ਪਬ੍ਬਜਿਤਾਨਂ ਸਨ੍ਤਿਕਂ ਗਚ੍ਛਨ੍ਤਿ, ਮਾ ਏਵਂ ਕਰਿ, ਦੇਹਿ ਮੇ ਵਸਨਟ੍ਠਾਨ’’ਨ੍ਤਿ. ‘‘ਕਿਂ ਪਨ ਤ੍ਵਂ ਪਬ੍ਬਜਿਤੋ’’ਤਿ? ‘‘ਆਮ, ਪਬ੍ਬਜਿਤੋਮ੍ਹੀ’’ਤਿ. ‘‘ਸਚੇ ਪਬ੍ਬਜਿਤੋ, ਕਹਂ ਤੇ ਖਾਰਿਭਣ੍ਡਂ, ਕੋ ਪਬ੍ਬਜਿਤਪਰਿਕ੍ਖਾਰੋ’’ਤਿ. ‘‘ਅਤ੍ਥਿ ਮੇ ਪਰਿਕ੍ਖਾਰੋ, ਵਿਸੁਂ ਪਨ ਨਂ ਗਹੇਤ੍ਵਾ ਵਿਚਰਿਤੁਂ ਦੁਕ੍ਖਨ੍ਤਿ ਅਬ੍ਭਨ੍ਤਰੇਨੇਵ ਨਂ ਗਹੇਤ੍ਵਾ ਵਿਚਰਾਮਿ, ਬ੍ਰਾਹ੍ਮਣਾ’’ਤਿ. ਸੋ ‘‘ਤਂ ਗਹੇਤ੍ਵਾ ਵਿਚਰਿਸ੍ਸਸੀ’’ਤਿ ਥੇਰਸ੍ਸ ਕੁਜ੍ਝਿ. ਅਥ ਨਂ ਸੋ ਆਹ – ‘‘ਅਮ੍ਹੇ, ਅਗ੍ਗਿਦਤ੍ਤ, ਮਾ ਕੁਜ੍ਝਿ, ਵਸਨਟ੍ਠਾਨਂ ਮੇ ਆਚਿਕ੍ਖਾਹੀ’’ਤਿ. ਨਤ੍ਥਿ ਏਤ੍ਥ ਵਸਨਟ੍ਠਾਨਨ੍ਤਿ. ਏਤਸ੍ਮਿਂ ਪਨ ਵਾਲੁਕਰਾਸਿਮ੍ਹਿ ਕੋ ਵਸਤੀਤਿ. ਏਕੋ, ਨਾਗਰਾਜਾਤਿ. ਏਤਂ ਮੇ ਦੇਹੀਤਿ. ਨ ਸਕ੍ਕਾ ਦਾਤੁਂ, ਭਾਰਿਯਂ ਏਤਸ੍ਸ ਕਮ੍ਮਨ੍ਤਿ. ਹੋਤੁ, ਦੇਹਿ ਮੇਤਿ. ਤੇਨ ਹਿ ਤ੍ਵਂ ਏਵ ਜਾਨਾਹੀਤਿ.

ਥੇਰੋ ਵਾਲੁਕਰਾਸਿਅਭਿਮੁਖੋ ਪਾਯਾਸਿ. ਨਾਗਰਾਜਾ ਤਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਅਯਂ ਸਮਣੋ ਇਤੋ ਆਗਚ੍ਛਤਿ, ਨ ਜਾਨਾਤਿ ਮਞ੍ਞੇ ਮਮ ਅਤ੍ਥਿਭਾਵਂ, ਧੂਮਾਯਿਤ੍ਵਾ ਨਂ ਮਾਰੇਸ੍ਸਾਮੀ’’ਤਿ ਧੂਮਾਯਿ. ਥੇਰੋ ‘‘ਅਯਂ ਨਾਗਰਾਜਾ ‘ਅਹਮੇਵ ਧੂਮਾਯਿਤੁਂ ਸਕ੍ਕੋਮਿ, ਅਞ੍ਞੇ ਨ ਸਕ੍ਕੋਨ੍ਤੀ’ਤਿ ਮਞ੍ਞੇ ਸਲ੍ਲਕ੍ਖੇਤੀ’’ਤਿ ਸਯਮ੍ਪਿ ਧੂਮਾਯਿ. ਦ੍ਵਿਨ੍ਨਮ੍ਪਿ ਸਰੀਰਤੋ ਉਗ੍ਗਤਾ ਧੂਮਾ ਯਾਵ ਬ੍ਰਹ੍ਮਲੋਕਾ ਉਟ੍ਠਹਿਂਸੁ. ਉਭੋਪਿ ਧੂਮਾ ਥੇਰਂ ਅਬਾਧੇਤ੍ਵਾ ਨਾਗਰਾਜਾਨਮੇਵ ਬਾਧੇਨ੍ਤਿ. ਨਾਗਰਾਜਾ ਧੂਮਵੇਗਂ ਸਹਿਤੁਂ ਅਸਕ੍ਕੋਨ੍ਤੋ ਪਜ੍ਜਲਿ. ਥੇਰੋਪਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਤੇਨ ਸਦ੍ਧਿਂਯੇਵ ਪਜ੍ਜਲਿ. ਅਗ੍ਗਿਜਾਲਾ ਯਾਵ ਬ੍ਰਹ੍ਮਲੋਕਾ ਉਟ੍ਠਹਿਂਸੁ. ਉਭੋਪਿ ਥੇਰਂ ਅਬਾਧੇਤ੍ਵਾ ਨਾਗਰਾਜਾਨਮੇਵ ਬਾਧਯਿਂਸੁ. ਅਥਸ੍ਸ ਸਕਲਸਰੀਰਂ ਉਕ੍ਕਾਹਿ ਪਦਿਤ੍ਤਂ ਵਿਯ ਅਹੋਸਿ. ਇਸਿਗਣੋ ਓਲੋਕੇਤ੍ਵਾ ਚਿਨ੍ਤੇਸਿ – ‘‘ਨਾਗਰਾਜਾ, ਸਮਣਂ ਝਾਪੇਤਿ, ਭਦ੍ਦਕੋ ਵਤ ਸਮਣੋ ਅਮ੍ਹਾਕਂ ਵਚਨਂ ਅਸੁਤ੍ਵਾ ਨਟ੍ਠੋ’’ਤਿ. ਥੇਰੋ ਨਾਗਰਾਜਾਨਂ ਦਮੇਤ੍ਵਾ ਨਿਬ੍ਬਿਸੇਵਨਂ ਕਤ੍ਵਾ ਵਾਲੁਕਰਾਸਿਮ੍ਹਿ ਨਿਸੀਦਿ. ਨਾਗਰਾਜਾ ਵਾਲੁਕਰਾਸਿਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਕੂਟਾਗਾਰਕੁਚ੍ਛਿਪਮਾਣਂ ਫਣਂ ਮਾਪੇਤ੍ਵਾ ਥੇਰਸ੍ਸ ਉਪਰਿ ਧਾਰੇਸਿ.

ਇਸਿਗਣਾ ਪਾਤੋਵ ‘‘ਸਮਣਸ੍ਸ ਮਤਭਾਵਂ ਵਾ ਅਮਤਭਾਵਂ ਵਾ ਜਾਨਿਸ੍ਸਾਮਾ’’ਤਿ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਵਾਲੁਕਰਾਸਿਮਤ੍ਥਕੇ ਨਿਸਿਨ੍ਨਂ ਦਿਸ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਭਿਤ੍ਥਵਨ੍ਤਾ ਆਹਂਸੁ – ‘‘ਸਮਣ, ਕਚ੍ਚਿ ਨਾਗਰਾਜੇਨ ਨ ਬਾਧਿਤੋ’’ਤਿ. ‘‘ਕਿਂ ਨ ਪਸ੍ਸਥ ਮਮ ਉਪਰਿਫਣਂ ਧਾਰੇਤ੍ਵਾ ਠਿਤ’’ਨ੍ਤਿ? ਤੇ ‘‘ਅਚ੍ਛਰਿਯਂ ਵਤ ਭੋ, ਸਮਣਸ੍ਸ ਏਵਰੂਪੋ ਨਾਮ ਨਾਗਰਾਜਾ ਦਮਿਤੋ’’ਤਿ ਥੇਰਂ ਪਰਿਵਾਰੇਤ੍ਵਾ ਅਟ੍ਠਂਸੁ. ਤਸ੍ਮਿਂ ਖਣੇ ਸਤ੍ਥਾ ਆਗਤੋ. ਥੇਰੋ ਸਤ੍ਥਾਰਂ ਦਿਸ੍ਵਾ ਉਟ੍ਠਾਯ ਵਨ੍ਦਿ. ਅਥ ਨਂ ਇਸਯੋ ਆਹਂਸੁ – ‘‘ਅਯਮ੍ਪਿ ਤਯਾ ਮਹਨ੍ਤਤਰੋ’’ਤਿ. ਏਸੋ ਭਗਵਾ ਸਤ੍ਥਾ, ਅਹਂ ਇਮਸ੍ਸ ਸਾਵਕੋਤਿ. ਸਤ੍ਥਾ ਵਾਲੁਕਰਾਸਿਮਤ੍ਥਕੇ ਨਿਸੀਦਿ, ਇਸਿਗਣੋ ‘‘ਅਯਂ ਤਾਵ ਸਾਵਕਸ੍ਸ ਆਨੁਭਾਵੋ, ਇਮਸ੍ਸ ਪਨ ਆਨੁਭਾਵੋ ਕੀਦਿਸੋ ਭਵਿਸ੍ਸਤੀ’’ਤਿ ਅਞ੍ਜਲਿਂ ਪਗ੍ਗਯ੍ਹ ਸਤ੍ਥਾਰਂ ਅਭਿਤ੍ਥਵਿ. ਸਤ੍ਥਾ ਅਗ੍ਗਿਦਤ੍ਤਂ ਆਮਨ੍ਤੇਤ੍ਵਾ ਆਹ – ‘‘ਅਗ੍ਗਿਦਤ੍ਤ, ਤ੍ਵਂ ਤਵ ਸਾਵਕਾਨਞ੍ਚ ਉਪਟ੍ਠਾਕਾਨਞ੍ਚ ਓਵਾਦਂ ਦਦਮਾਨੋ ਕਿਨ੍ਤਿ ਵਤ੍ਵਾ ਦੇਸੀ’’ਤਿ. ‘‘ਏਤਂ ਪਬ੍ਬਤਂ ਸਰਣਂ ਗਚ੍ਛਥ, ਵਨਂ ਆਰਾਮਂ ਰੁਕ੍ਖਂ ਸਰਣਂ ਗਚ੍ਛਥ. ਏਤਾਨਿ ਹਿ ਸਰਣਂ ਗਤੋ ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ ਏਵਂ ਤੇਸਂ ਓਵਾਦਂ ਦਮ੍ਮੀਤਿ. ਸਤ੍ਥਾ ‘‘ਨ ਖੋ, ਅਗ੍ਗਿਦਤ੍ਤ, ਏਤਾਨਿ ਸਰਣਂ ਗਤੋ ਸਬ੍ਬਦੁਕ੍ਖਾ ਪਮੁਚ੍ਚਤਿ, ਬੁਦ੍ਧਂ ਧਮ੍ਮਂ ਸਙ੍ਘਂ ਪਨ ਸਰਣਂ ਗਨ੍ਤ੍ਵਾ ਸਕਲਵਟ੍ਟਦੁਕ੍ਖਾ ਪਮੁਚ੍ਚਤੀ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੧੮੮. ‘‘ਬਹੁਂ ਵੇ ਸਰਣਂ ਯਨ੍ਤਿ, ਪਬ੍ਬਤਾਨਿ ਵਨਾਨਿ ਚ;

ਆਰਾਮਰੁਕ੍ਖਚੇਤ੍ਯਾਨਿ, ਮਨੁਸ੍ਸਾ ਭਯਤਜ੍ਜਿਤਾ.

੧੮੯. ‘‘ਨੇਤਂ ਖੋ ਸਰਣਂ ਖੇਮਂ, ਨੇਤਂ ਸਰਣਮੁਤ੍ਤਮਂ;

ਨੇਤਂ ਸਰਣਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਤਿ.

੧੯੦. ‘‘ਯੋ ਚ ਬੁਦ੍ਧਞ੍ਚ ਧਮ੍ਮਞ੍ਚ, ਸਙ੍ਘਞ੍ਚ ਸਰਣਂ ਗਤੋ;

ਚਤ੍ਤਾਰਿ ਅਰਿਯਸਚ੍ਚਾਨਿ, ਸਮ੍ਮਪ੍ਪਞ੍ਞਾਯ ਪਸ੍ਸਤਿ.

੧੯੧. ‘‘ਦੁਕ੍ਖਂ ਦੁਕ੍ਖਸਮੁਪ੍ਪਾਦਂ, ਦੁਕ੍ਖਸ੍ਸ ਚ ਅਤਿਕ੍ਕਮਂ;

ਅਰਿਯਂ ਚਟ੍ਠਙ੍ਗਿਕਂ ਮਗ੍ਗਂ, ਦੁਕ੍ਖੂਪਸਮਗਾਮਿਨਂ.

੧੯੨. ‘‘ਏਤਂ ਖੋ ਸਰਣਂ ਖੇਮਂ, ਏਤਂ ਸਰਣਮੁਤ੍ਤਮਂ;

ਏਤਂ ਸਰਣਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ.

ਤਤ੍ਥ ਬਹੁਨ੍ਤਿ ਬਹੁ. ਪਬ੍ਬਤਾਨੀਤਿ ਤਤ੍ਥ ਤਤ੍ਥ ਇਸਿਗਿਲਿਵੇਪੁਲ੍ਲਵੇਭਾਰਾਦਿਕੇ ਪਬ੍ਬਤੇ ਚ ਮਹਾਵਨਗੋਸਿਙ੍ਗਸਾਲਵਨਾਦੀਨਿ ਵਨਾਨਿ ਚ ਵੇਲ਼ੁਵਨਜੀਵਕਮ੍ਬਵਨਾਦਯੋ ਆਰਾਮੇ ਚ ਉਦੇਨਚੇਤਿਯਗੋਤਮਚੇਤਿਯਾਦੀਨਿ ਰੁਕ੍ਖਚੇਤ੍ਯਾਨਿ ਚ ਤੇ ਤੇ ਮਨੁਸ੍ਸਾ ਤੇਨ ਤੇਨ ਭਯੇਨ ਤਜ੍ਜਿਤਾ ਭਯਤੋ ਮੁਚ੍ਚਿਤੁਕਾਮਾ ਪੁਤ੍ਤਲਾਭਾਦੀਨਿ ਵਾ ਪਤ੍ਥਯਮਾਨਾ ਸਰਣਂ ਯਨ੍ਤੀਤਿ ਅਤ੍ਥੋ. ਨੇਤਂ ਸਰਣਨ੍ਤਿ ਏਤਂ ਸਬ੍ਬਮ੍ਪਿ ਸਰਣਂ ਨੇਵ ਖੇਮਂ ਨ ਉਤ੍ਤਮਂ, ਨ ਚ ਏਤਂ ਪਟਿਚ੍ਚ ਜਾਤਿਆਦਿਧਮ੍ਮੇਸੁ ਸਤ੍ਤੇਸੁ ਏਕੋਪਿ ਜਾਤਿਆਦਿਤੋ ਸਬ੍ਬਦੁਕ੍ਖਾ ਪਮੁਚ੍ਚਤੀਤਿ ਅਤ੍ਥੋ.

ਯੋ ਚਾਤਿ ਇਦਂ ਅਖੇਮਂ ਅਨੁਤ੍ਤਮਂ ਸਰਣਂ ਦਸ੍ਸੇਤ੍ਵਾ ਖੇਮਂ ਉਤ੍ਤਮਂ ਸਰਣਂ ਦਸ੍ਸਨਤ੍ਥਂ ਆਰਦ੍ਧਂ. ਤਸ੍ਸਤ੍ਥੋ – ਯੋ ਚ ਗਹਟ੍ਠੋ ਵਾ ਪਬ੍ਬਜਿਤੋ ਵਾ ‘‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿਆਦਿਕਂ ਬੁਦ੍ਧਧਮ੍ਮਸਙ੍ਘਾਨੁਸ੍ਸਤਿਕਮ੍ਮਟ੍ਠਾਨਂ ਨਿਸ੍ਸਾਯ ਸੇਟ੍ਠਵਸੇਨ ਬੁਦ੍ਧਞ੍ਚ ਧਮ੍ਮਞ੍ਚ ਸਙ੍ਘਞ੍ਚ ਸਰਣਂ ਗਤੋ, ਤਸ੍ਸਪਿ ਤਂ ਸਰਣਗਮਨਂ ਅਞ੍ਞਤਿਤ੍ਥਿਯਵਨ੍ਦਨਾਦੀਹਿ ਕੁਪ੍ਪਤਿ ਚਲਤਿ. ਤਸ੍ਸ ਪਨ ਅਚਲਭਾਵਂ ਦਸ੍ਸੇਤੁਂ ਮਗ੍ਗੇਨ ਆਗਤਸਰਣਮੇਵ ਪਕਾਸਨ੍ਤੋ ਚਤ੍ਤਾਰਿ ਅਰਿਯਸਚ੍ਚਾਨਿ ਸਮ੍ਮਪ੍ਪਞ੍ਞਾਯ ਪਸ੍ਸਤੀਤਿ ਆਹ. ਯੋ ਹਿ ਏਤੇਸਂ ਸਚ੍ਚਾਨਂ ਦਸ੍ਸਨਵਸੇਨ ਏਤਾਨਿ ਸਰਣਂ ਗਤੋ, ਏਤਸ੍ਸ ਏਤਂ ਸਰਣਂ ਖੇਮਞ੍ਚ ਉਤ੍ਤਮਞ੍ਚ, ਸੋ ਚ ਪੁਗ੍ਗਲੋ ਏਤਂ ਸਰਣਂ ਪਟਿਚ੍ਚ ਸਕਲਸ੍ਮਾਪਿ ਵਟ੍ਟਦੁਕ੍ਖਾ ਪਮੁਚ੍ਚਤਿ, ਤਸ੍ਮਾ ਏਤਂ ਖੋ ਸਰਣਂ ਖੇਮਨ੍ਤਿਆਦਿ ਵੁਤ੍ਤਂ.

ਦੇਸਨਾਵਸਾਨੇ ਸਬ੍ਬੇਪਿ ਤੇ ਇਸਯੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਪਬ੍ਬਜ੍ਜਂ ਯਾਚਿਂਸੁ. ਸਤ੍ਥਾਪਿ ਚੀਵਰਗਬ੍ਭਤੋ ਹਤ੍ਥਂ ਪਸਾਰੇਤ੍ਵਾ ‘‘ਏਥ ਭਿਕ੍ਖਵੋ, ਚਰਥ ਬ੍ਰਹ੍ਮਚਰਿਯ’’ਨ੍ਤਿ ਆਹ. ਤੇ ਤਙ੍ਖਣੇਯੇਵ ਅਟ੍ਠਪਰਿਕ੍ਖਾਰਧਰਾ ਵਸ੍ਸਸਟ੍ਠਿਕਥੇਰਾ ਵਿਯ ਅਹੇਸੁਂ. ਸੋ ਚ ਸਬ੍ਬੇਸਮ੍ਪਿ ਅਙ੍ਗਮਗਧਕੁਰੁਰਟ੍ਠਵਾਸੀਨਂ ਸਕ੍ਕਾਰਂ ਆਦਾਯ ਆਗਮਨਦਿਵਸੋ ਅਹੋਸਿ. ਤੇ ਸਕ੍ਕਾਰਂ ਆਦਾਯ ਆਗਤਾ ਸਬ੍ਬੇਪਿ ਤੇ ਇਸਯੋ ਪਬ੍ਬਜਿਤੇ ਦਿਸ੍ਵਾ ‘‘ਕਿਂ ਨੁ ਖੋ ਅਮ੍ਹਾਕਂ ਅਗ੍ਗਿਦਤ੍ਤਬ੍ਰਾਹ੍ਮਣੋ ਮਹਾ, ਉਦਾਹੁ ਸਮਣੋ ਗੋਤਮੋ’’ਤਿ ਚਿਨ੍ਤੇਤ੍ਵਾ ਸਮਣਸ੍ਸ ਗੋਤਮਸ੍ਸ ਆਗਤਤ੍ਤਾ ‘‘ਅਗ੍ਗਿਦਤ੍ਤੋਵ ਮਹਾ’’ਤਿ ਮਞ੍ਞਿਂਸੁ. ਸਤ੍ਥਾ ਤੇਸਂ ਅਜ੍ਝਾਸਯਂ ਓਲੋਕੇਤ੍ਵਾ, ‘‘ਅਗ੍ਗਿਦਤ੍ਤ, ਪਰਿਸਾਯ ਕਙ੍ਖਂ ਛਿਨ੍ਦਾ’’ਤਿ ਆਹ. ਸੋ ‘‘ਅਹਮ੍ਪਿ ਏਤ੍ਤਕਮੇਵ ਪਚ੍ਚਾਸੀਸਾਮੀ’’ਤਿ ਇਦ੍ਧਿਬਲੇਨ ਸਤ੍ਤਕ੍ਖਤ੍ਤੁਂ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪੁਨਪ੍ਪੁਨਂ ਓਰੁਯ੍ਹ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਸਤ੍ਥਾ ਮੇ, ਭਨ੍ਤੇ, ਭਗਵਾ, ਸਾਵਕੋਹਮਸ੍ਮੀ’’ਤਿ ਵਤ੍ਵਾ ਸਾਵਕਤ੍ਤਂ ਪਕਾਸੇਸੀਤਿ.

ਅਗ੍ਗਿਦਤ੍ਤਬ੍ਰਾਹ੍ਮਣਵਤ੍ਥੁ ਛਟ੍ਠਂ.