੩. ਵਿਟਟੂਭਵਤ੍ਥੁ

ਪੁਪ੍ਫਾਨਿਹੇਵ ਪਚਿਨਨ੍ਤਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਸਾਵਤ੍ਥਿਯਂ ਵਿਹਰਨ੍ਤੋ ਸਪਰਿਸਂ ਮਹੋਘੇਨ ਅਜ੍ਝੋਤ੍ਥਰਿਤ੍ਵਾ ਮਾਰਿਤਂ ਵਿਟਟੂਭਂ ਆਰਬ੍ਭ ਕਥੇਸਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਸਾਵਤ੍ਥਿਯਞ੍ਹਿ ਮਹਾਕੋਸਲਰਞ੍ਞੋ ਪੁਤ੍ਤੋ ਪਸੇਨਦਿਕੁਮਾਰੋ ਨਾਮ. ਵੇਸਾਲਿਯਂ ਲਿਚ੍ਛਵਿਰਞ੍ਞੋ ਪੁਤ੍ਤੋ ਲਿਚ੍ਛਵਿਕੁਮਾਰੋ ਮਹਾਲਿ ਨਾਮ, ਕੁਸਿਨਾਰਾਯਂ ਮਲ੍ਲਰਾਜਪੁਤ੍ਤੋ ਬਨ੍ਧੁਲੋ ਨਾਮਾਤਿ ਇਮੇ ਤਯੋ ਦਿਸਾਪਾਮੋਕ੍ਖਸ੍ਸਾਚਰਿਯਸ੍ਸ ਸਨ੍ਤਿਕੇ ਸਿਪ੍ਪੁਗ੍ਗਹਣਤ੍ਥਂ ਤਕ੍ਕਸਿਲਂ ਗਨ੍ਤ੍ਵਾ ਬਹਿਨਗਰੇ ਸਾਲਾਯ ਸਮਾਗਤਾ ਅਞ੍ਞਮਞ੍ਞਸ੍ਸ ਆਗਤਕਾਰਣਞ੍ਚ ਕੁਲਞ੍ਚ ਨਾਮਞ੍ਚ ਪੁਚ੍ਛਿਤ੍ਵਾ ਸਹਾਯਕਾ ਹੁਤ੍ਵਾ ਏਕਤੋਵ ਆਚਰਿਯਂ ਉਪਸਙ੍ਕਮਿਤ੍ਵਾ ਸਿਪ੍ਪਂ ਸਿਕ੍ਖਨ੍ਤਾ ਨ ਚਿਰਸ੍ਸੇਵ ਉਗ੍ਗਹਿਤਸਿਪ੍ਪਾ ਆਚਰਿਯਂ ਆਪੁਚ੍ਛਿਤ੍ਵਾ ਏਕਤੋਵ ਨਿਕ੍ਖਮਿਤ੍ਵਾ ਸਕਸਕਟ੍ਠਾਨਾਨਿ ਅਗਮਂਸੁ. ਤੇਸੁ ਪਸੇਨਦਿਕੁਮਾਰੋ ਪਿਤੁ ਸਿਪ੍ਪਂ ਦਸ੍ਸੇਤ੍ਵਾ ਪਸਨ੍ਨੇਨ ਪਿਤਰਾ ਰਜ੍ਜੇ ਅਭਿਸਿਤ੍ਤੋ. ਮਹਾਲਿਕੁਮਾਰੋ ਲਿਚ੍ਛਵੀਨਂ ਸਿਪ੍ਪਂ ਦਸ੍ਸੇਨ੍ਤੋ ਮਹਨ੍ਤੇਨ ਉਸ੍ਸਾਹੇਨ ਦਸ੍ਸੇਸਿ, ਤਸ੍ਸ ਅਕ੍ਖੀਨਿ ਭਿਜ੍ਜਿਤ੍ਵਾ ਅਗਮਂਸੁ. ਲਿਚ੍ਛਵਿਰਾਜਾਨੋ ‘‘ਅਹੋ ਵਤ ਅਮ੍ਹਾਕਂ ਆਚਰਿਯੋ ਅਕ੍ਖਿਵਿਨਾਸਂ ਪਤ੍ਤੋ, ਨ ਨਂ ਪਰਿਚ੍ਚਜਿਸ੍ਸਾਮ, ਉਪਟ੍ਠਹਿਸ੍ਸਾਮ ਨ’’ਨ੍ਤਿ ਤਸ੍ਸ ਸਤਸਹਸ੍ਸੁਟ੍ਠਾਨਕਂ ਏਕਂ ਦ੍ਵਾਰਂ ਅਦਂਸੁ. ਸੋ ਤਂ ਨਿਸ੍ਸਾਯ ਪਞ੍ਚਸਤੇ ਲਿਚ੍ਛਵਿਰਾਜਪੁਤ੍ਤੇ ਸਿਪ੍ਪਂ ਸਿਕ੍ਖਾਪੇਨ੍ਤੋ ਵਸਿ. ਬਨ੍ਧੁਲਕੁਮਾਰੋ ਸਟ੍ਠਿਂ ਸਟ੍ਠਿਂ ਵੇਲ਼ੂ ਗਹੇਤ੍ਵਾ ਮਜ੍ਝੇ ਅਯਸਲਾਕਂ ਪਕ੍ਖਿਪਿਤ੍ਵਾ ਸਟ੍ਠਿਕਲਾਪੇ ਉਸ੍ਸਾਪੇਤ੍ਵਾ ਠਪਿਤੇ ਮਲ੍ਲਰਾਜਕੁਲੇਹਿ ‘‘ਇਮੇ ਕਪ੍ਪੇਤੂ’’ਤਿ ਵੁਤ੍ਤੋ ਅਸੀਤਿਹਤ੍ਥਂ ਆਕਾਸਂ ਉਲ੍ਲਙ੍ਘਿਤ੍ਵਾ ਅਸਿਨਾ ਕਪ੍ਪੇਨ੍ਤੋ ਅਗਮਾਸਿ. ਸੋ ਓਸਾਨਕਲਾਪੇ ਅਯਸਲਾਕਾਯ ‘‘ਕਿਰੀ’’ਤਿ ਸਦ੍ਦਂ ਸੁਤ੍ਵਾ, ‘‘ਕਿਂ ਏਤ’’ਨ੍ਤਿ ਪੁਚ੍ਛਿਤ੍ਵਾ ਸਬ੍ਬਕਲਾਪੇਸੁ ਅਯਸਲਾਕਾਨਂ ਠਪਿਤਭਾਵਂ ਞਤ੍ਵਾ ਅਸਿਂ ਛਡ੍ਡੇਤ੍ਵਾ ਰੋਦਮਾਨੋ ‘‘ਮਯ੍ਹਂ ਏਤ੍ਤਕੇਸੁ ਞਾਤਿਸੁਹਜ੍ਜੇਸੁ ਏਕੋਪਿ ਸਸਿਨੇਹੋ ਹੁਤ੍ਵਾ ਇਮਂ ਕਾਰਣਂ ਨਾਚਿਕ੍ਖਿ. ਸਚੇ ਹਿ ਅਹਂ ਜਾਨੇਯ੍ਯਂ, ਅਯਸਲਾਕਾਯ ਸਦ੍ਦਂ ਅਨੁਟ੍ਠਾਪੇਨ੍ਤੋਵ ਛਿਨ੍ਦੇਯ੍ਯ’’ਨ੍ਤਿ ਵਤ੍ਵਾ, ‘‘ਸਬ੍ਬੇਪਿਮੇ ਮਾਰੇਤ੍ਵਾ ਰਜ੍ਜਂ ਕਰੇਯ੍ਯ’’ਨ੍ਤਿ ਮਾਤਾਪਿਤੂਨਂ ਕਥੇਸਿ. ਤੇਹਿ ‘‘ਪਵੇਣਿਰਜ੍ਜਂ ਨਾਮ, ਤਾਤ, ਇਦਂ ਨ ਲਬ੍ਭਾ ਏਵਂ ਕਾਤੁ’’ਨ੍ਤਿ ਨਾਨਪ੍ਪਕਾਰੇਨ ਵਾਰਿਤੋ ‘‘ਤੇਨ ਹਿ ਮਮ ਸਹਾਯਕਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਸਾਵਤ੍ਥਿਂ ਅਗਮਾਸਿ.

ਪਸੇਨਦਿ ਕੋਸਲੋ ਰਾਜਾ ਤਸ੍ਸਾਗਮਨਂ ਸੁਤ੍ਵਾ ਪਚ੍ਚੁਗ੍ਗਨ੍ਤ੍ਵਾ ਮਹਨ੍ਤੇਨ ਸਕ੍ਕਾਰੇਨ ਤਂ ਨਗਰਂ ਪਵੇਸੇਤ੍ਵਾ ਸੇਨਾਪਤਿਟ੍ਠਾਨੇ ਠਪੇਸਿ. ਸੋ ਮਾਤਾਪਿਤਰੋ ਪਕ੍ਕੋਸਾਪੇਤ੍ਵਾ ਤਤ੍ਥੇਵ ਵਾਸਂ ਕਪ੍ਪੇਸਿ. ਅਥੇਕਦਿਵਸਂ ਰਾਜਾ ਉਪਰਿਪਾਸਾਦੇ ਠਿਤੋ ਅਨ੍ਤਰਵੀਥਿਂ ਓਲੋਕਯਮਾਨੋ ‘‘ਅਨਾਥਪਿਣ੍ਡਿਕਸ੍ਸ ਚੂਲ਼ਅਨਾਥਪਿਣ੍ਡਿਕਸ੍ਸ ਵਿਸਾਖਾਯ ਸੁਪ੍ਪਵਾਸਾਯਾ’’ਤਿ ਏਤੇਸਂ ਗੇਹੇ ਨਿਚ੍ਚਂ ਭਤ੍ਤਕਿਚ੍ਚਤ੍ਥਾਯ ਗਚ੍ਛਨ੍ਤੇ ਅਨੇਕਸਹਸ੍ਸੇ ਭਿਕ੍ਖੂ ਦਿਸ੍ਵਾ, ‘‘ਕਹਂ, ਅਯ੍ਯਾ, ਗਚ੍ਛਨ੍ਤੀ’’ਤਿ ਪੁਚ੍ਛਿਤ੍ਵਾ, ‘‘ਦੇਵ, ਅਨਾਥਪਿਣ੍ਡਿਕਸ੍ਸ ਗੇਹੇ ਨਿਚ੍ਚਭਤ੍ਤਸਲਾਕਭਤ੍ਤਗਿਲਾਨਭਤ੍ਤਾਦੀਨਂ ਅਤ੍ਥਾਯ ਦੇਵਸਿਕਂ ਦ੍ਵੇ ਭਿਕ੍ਖੁਸਹਸ੍ਸਾਨਿ ਗਚ੍ਛਨ੍ਤਿ, ਚੂਲ਼ਅਨਾਥਪਿਣ੍ਡਿਕਸ੍ਸ ਗੇਹੇ ਪਞ੍ਚਸਤਾਨਿ, ਤਥਾ ਵਿਸਾਖਾਯ ਤਥਾ ਸੁਪ੍ਪਵਾਸਾਯਾ’’ਤਿ ਵੁਤ੍ਤੇ ਸਯਮ੍ਪਿ ਭਿਕ੍ਖੁਸਙ੍ਘਂ ਉਪਟ੍ਠਹਿਤੁਕਾਮੋ ਵਿਹਾਰਂ ਗਨ੍ਤ੍ਵਾ ਭਿਕ੍ਖੁਸਹਸ੍ਸੇਨ ਸਦ੍ਧਿਂ ਸਤ੍ਥਾਰਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਸਹਤ੍ਥਾ ਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਸਤ੍ਥਾਰਂ ਵਨ੍ਦਿਤ੍ਵਾ, ‘‘ਭਨ੍ਤੇ, ਪਞ੍ਚਹਿ ਮੇ ਭਿਕ੍ਖੁਸਤੇਹਿ ਸਦ੍ਧਿਂ ਨਿਬਦ੍ਧਂ ਭਿਕ੍ਖਂ ਗਣ੍ਹਥਾ’’ਤਿ ਆਹ. ‘‘ਮਹਾਰਾਜ ਬੁਦ੍ਧਾ ਨਾਮ ਏਕਟ੍ਠਾਨੇ ਨਿਬਦ੍ਧਂ ਭਿਕ੍ਖਂ ਨ ਗਣ੍ਹਨ੍ਤਿ, ਬਹੂ ਜਨਾ ਬੁਦ੍ਧਾਨਂ ਆਗਮਨਂ ਪਚ੍ਚਾਸੀਸਨ੍ਤੀ’’ਤਿ. ‘‘ਤੇਨ ਹਿ ਏਕਂ ਭਿਕ੍ਖੁਂ ਨਿਬਦ੍ਧਂ ਪੇਸੇਥਾ’’ਤਿ ਆਹ. ਸਤ੍ਥਾ ਆਨਨ੍ਦਤ੍ਥੇਰਸ੍ਸ ਭਾਰਂ ਅਕਾਸਿ. ਰਾਜਾ ਭਿਕ੍ਖੁਸਙ੍ਘੇ ਆਗਤੇ ਪਤ੍ਤਂ ਗਹੇਤ੍ਵਾ, ‘‘ਇਮੇ ਨਾਮ ਪਰਿਵਿਸਨ੍ਤੂ’’ਤਿ ਅਵਿਚਾਰੇਤ੍ਵਾਵ ਸਤ੍ਤਾਹਂ ਸਯਮੇਵ ਪਰਿਵਿਸਿਤ੍ਵਾ ਅਟ੍ਠਮੇ ਦਿਵਸੇ ਵਿਕ੍ਖਿਤ੍ਤਚਿਤ੍ਤੋ ਪਮਜ੍ਜਮਕਾਸਿ. ਰਾਜਕੁਲੇ ਨਾਮ ਅਨਾਣਤ੍ਤਾ ਆਸਨਾਨਿ ਪਞ੍ਞਾਪੇਤ੍ਵਾ ਭਿਕ੍ਖੂ ਨਿਸੀਦਾਪੇਤ੍ਵਾ ਪਰਿਵਿਸਿਤੁਂ ਨ ਲਭਨ੍ਤਿ ‘‘ਨ ਮਯਂ ਇਧ ਠਾਤੁਂ ਸਕ੍ਖਿਸ੍ਸਾਮਾ’’ਤਿ ਬਹੂ ਭਿਕ੍ਖੂ ਪਕ੍ਕਮਿਂਸੁ. ਰਾਜਾ ਦੁਤਿਯਦਿਵਸੇਪਿ ਪਮਜ੍ਜਿ, ਦੁਤਿਯਦਿਵਸੇਪਿ ਬਹੂ ਭਿਕ੍ਖੂ ਪਕ੍ਕਮਿਂਸੁ. ਤਤਿਯਦਿਵਸੇਪਿ ਪਮਜ੍ਜਿ, ਤਦਾ ਆਨਨ੍ਦਤ੍ਥੇਰਂ ਏਕਕਮੇਵ ਠਪੇਤ੍ਵਾ ਅਵਸੇਸਾ ਪਕ੍ਕਮਿਂਸੁ. ਪੁਞ੍ਞਵਨ੍ਤਾ ਨਾਮ ਕਾਰਣਵਸਿਕਾ ਹੋਨ੍ਤਿ, ਕੁਲਾਨਂ ਪਸਾਦਂ ਰਕ੍ਖਨ੍ਤਿ. ਤਥਾਗਤਸ੍ਸ ਚ ਸਾਰਿਪੁਤ੍ਤਤ੍ਥੇਰੋ ਮਹਾਮੋਗ੍ਗਲ੍ਲਾਨਤ੍ਥੇਰੋਤਿ ਦ੍ਵੇ ਅਗ੍ਗਸਾਵਕਾ, ਖੇਮਾ ਉਪ੍ਪਲਵਣ੍ਣਾਤਿ ਦ੍ਵੇ ਅਗ੍ਗਸਾਵਿਕਾ, ਉਪਾਸਕੇਸੁ ਚਿਤ੍ਤੋ, ਗਹਪਤਿ, ਹਤ੍ਥਕੋ ਆਲ਼ਵਕੋਤਿ ਦ੍ਵੇ ਅਗ੍ਗਉਪਾਸਕਾ, ਉਪਾਸਿਕਾਸੁ ਵੇਲ਼ੁਕਣ੍ਠਕੀ ਨਨ੍ਦਮਾਤਾ, ਖੁਜ੍ਜੁਤ੍ਤਰਾਤਿ ਦ੍ਵੇ ਅਗ੍ਗਉਪਾਸਿਕਾ, ਇਤਿ ਇਮੇ ਅਟ੍ਠ ਜਨੇ ਆਦਿਂ ਕਤ੍ਵਾ ਠਾਨਨ੍ਤਰਪਤ੍ਤਾ ਸਬ੍ਬੇਪਿ ਸਾਵਕਾ ਏਕਦੇਸੇਨ ਦਸਨ੍ਨਂ ਪਾਰਮੀਨਂ ਪੂਰਿਤਤ੍ਤਾ ਮਹਾਪੁਞ੍ਞਾ ਅਭਿਨੀਹਾਰਸਮ੍ਪਨ੍ਨਾ. ਆਨਨ੍ਦਤ੍ਥੇਰੋਪਿ ਕਪ੍ਪਸਤਸਹਸ੍ਸਂ ਪੂਰਿਤਪਾਰਮੀ ਅਭਿਨੀਹਾਰਸਮ੍ਪਨ੍ਨੋ ਮਹਾਪੁਞ੍ਞੋ ਅਤ੍ਤਨੋ ਕਾਰਣਵਸਿਕਤਾਯ ਕੁਲਸ੍ਸ ਪਸਾਦਂ ਰਕ੍ਖਨ੍ਤੋ ਅਟ੍ਠਾਸਿ. ਤਂ ਏਕਕਮੇਵ ਨਿਸੀਦਾਪੇਤ੍ਵਾ ਪਰਿਵਿਸਿਂਸੁ.

ਰਾਜਾ ਭਿਕ੍ਖੂਨਂ ਗਤਕਾਲੇ ਆਗਨ੍ਤ੍ਵਾ ਖਾਦਨੀਯਭੋਜਨੀਯਾਨਿ ਤਥੇਵ ਠਿਤਾਨਿ ਦਿਸ੍ਵਾ, ‘‘ਕਿਂ, ਅਯ੍ਯਾ, ਨਾਗਮਿਂਸੂ’’ਤਿ ਪੁਚ੍ਛਿਤ੍ਵਾ, ‘‘ਆਨਨ੍ਦਤ੍ਥੇਰੋ ਏਕਕੋਵ ਆਗਤੋ ਦੇਵਾ’’ਤਿ ਸੁਤ੍ਵਾ, ‘‘ਅਦ੍ਧਾ ਏਤ੍ਤਕਂ ਮੇ ਭਤ੍ਤਚ੍ਛੇਦਨਮਕਂਸੂ’’ਤਿ ਭਿਕ੍ਖੂਨਂ ਕੁਦ੍ਧੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ, ‘‘ਭਨ੍ਤੇ, ਮਯਾ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਭਿਕ੍ਖਾ ਪਟਿਯਤ੍ਤਾ, ਆਨਨ੍ਦਤ੍ਥੇਰੋ ਕਿਰ ਏਕਕੋਵਾਗਤੋ, ਪਟਿਯਤ੍ਤਾ ਭਿਕ੍ਖਾ ਤਥੇਵ ਠਿਤਾ, ਪਞ੍ਚਸਤਾ ਭਿਕ੍ਖੂ ਮਮ ਗੇਹੇ ਸਞ੍ਞਂ ਨ ਕਰਿਂਸੁ, ਕਿਂ ਨੁ ਖੋ ਕਾਰਣ’’ਨ੍ਤਿ ਆਹ. ਸਤ੍ਥਾ ਭਿਕ੍ਖੂਨਂ ਦੋਸਂ ਅਵਤ੍ਵਾ, ‘‘ਮਹਾਰਾਜ, ਮਮ ਸਾਵਕਾਨਂ ਤੁਮ੍ਹੇਹਿ ਸਦ੍ਧਿਂ ਵਿਸ੍ਸਾਸੋ ਨਤ੍ਥਿ, ਤੇਨ ਨ ਗਤਾ ਭਵਿਸ੍ਸਨ੍ਤੀ’’ਤਿ ਵਤ੍ਵਾ ਕੁਲਾਨਂ ਅਨੁਪਗਮਨਕਾਰਣਞ੍ਚ ਉਪਗਮਨਕਾਰਣਞ੍ਚ ਪਕਾਸੇਨ੍ਤੋ ਭਿਕ੍ਖੂ ਆਮਨ੍ਤੇਤ੍ਵਾ ਇਮਂ ਸੁਤ੍ਤਮਾਹ –

‘‘ਨਵਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਕੁਲਂ ਅਨੁਪਗਨ੍ਤ੍ਵਾ ਵਾ ਨਾਲਂ ਉਪਗਨ੍ਤੁਂ, ਉਪਗਨ੍ਤ੍ਵਾ ਵਾ ਨਾਲਂ ਉਪਨਿਸੀਦਿਤੁਂ. ਕਤਮੇਹਿ ਨਵਹਿ? ਨ ਮਨਾਪੇਨ ਪਚ੍ਚੁਟ੍ਠੇਨ੍ਤਿ, ਨ ਮਨਾਪੇਨ ਅਭਿਵਾਦੇਨ੍ਤਿ, ਨ ਮਨਾਪੇਨ ਆਸਨਂ ਦੇਨ੍ਤਿ, ਸਨ੍ਤਮਸ੍ਸ ਪਰਿਗੁਹਨ੍ਤਿ, ਬਹੁਕਮ੍ਪਿ ਥੋਕਂ ਦੇਨ੍ਤਿ, ਪਣੀਤਮ੍ਪਿ ਲੂਖਂ ਦੇਨ੍ਤਿ, ਅਸਕ੍ਕਚ੍ਚਂ ਦੇਨ੍ਤਿ ਨੋ ਸਕ੍ਕਚ੍ਚਂ, ਨ ਉਪਨਿਸੀਦਨ੍ਤਿ ਧਮ੍ਮਸ੍ਸਵਨਾਯ, ਭਾਸਿਤਮਸ੍ਸ ਨ ਸੁਸ੍ਸੂਸਨ੍ਤਿ. ਇਮੇਹਿ ਖੋ, ਭਿਕ੍ਖਵੇ, ਨਵਹਙ੍ਗੇਹਿ ਸਮਨ੍ਨਾਗਤਂ ਕੁਲਂ ਅਨੁਪਗਨ੍ਤ੍ਵਾ ਵਾ ਨਾਲਂ ਉਪਗਨ੍ਤੁਂ, ਉਪਗਨ੍ਤ੍ਵਾ ਵਾ ਨਾਲਂ ਉਪਨਿਸੀਦਿਤੁਂ.

‘‘ਨਵਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਕੁਲਂ ਅਨੁਪਗਨ੍ਤ੍ਵਾ ਵਾ ਅਲਂ ਉਪਗਨ੍ਤੁਂ, ਉਪਗਨ੍ਤ੍ਵਾ ਵਾ ਅਲਂ ਉਪਨਿਸੀਦਿਤੁਂ. ਕਤਮੇਹਿ ਨਵਹਿ? ਮਨਾਪੇਨ ਪਚ੍ਚੁਟ੍ਠੇਨ੍ਤਿ, ਮਨਾਪੇਨ ਅਭਿਵਾਦੇਨ੍ਤਿ, ਮਨਾਪੇਨ ਆਸਨਂ ਦੇਨ੍ਤਿ, ਸਨ੍ਤਮਸ੍ਸ ਨ ਪਰਿਗੁਹਨ੍ਤਿ, ਬਹੁਕਮ੍ਪਿ ਬਹੁਕਂ ਦੇਨ੍ਤਿ, ਪਣੀਤਮ੍ਪਿ ਪਣੀਤਂ ਦੇਨ੍ਤਿ, ਸਕ੍ਕਚ੍ਚਂ ਦੇਨ੍ਤਿ ਨੋ ਅਸਕ੍ਕਚ੍ਚਂ, ਉਪਨਿਸੀਦਨ੍ਤਿ ਧਮ੍ਮਸ੍ਸਵਨਾਯ, ਭਾਸਿਤਮਸ੍ਸ ਸੁਸ੍ਸੂਸਨ੍ਤਿ. ਇਮੇਹਿ ਖੋ, ਭਿਕ੍ਖਵੇ, ਨਵਹਙ੍ਗੇਹਿ ਸਮਨ੍ਨਾਗਤਂ ਕੁਲਂ ਅਨੁਪਗਨ੍ਤ੍ਵਾ ਵਾ ਅਲਂ ਉਪਗਨ੍ਤੁਂ, ਉਪਗਨ੍ਤ੍ਵਾ ਵਾ ਅਲਂ ਉਪਨਿਸੀਦਿਤੁ’’ਨ੍ਤਿ (ਅ. ਨਿ. ੯.੧੭).

ਇਤਿ ਖੋ, ਮਹਾਰਾਜ, ਮਮ ਸਾਵਕਾ ਤੁਮ੍ਹਾਕਂ ਸਨ੍ਤਿਕਾ ਵਿਸ੍ਸਾਸਂ ਅਲਭਨ੍ਤਾ ਨ ਗਤਾ ਭਵਿਸ੍ਸਨ੍ਤੀਤਿ. ਪੋਰਾਣਕਪਣ੍ਡਿਤਾਪਿ ਹਿ ਅਵਿਸ੍ਸਾਸਿਕਟ੍ਠਾਨੇ ਸਕ੍ਕਚ੍ਚਂ ਉਪਟ੍ਠਿਯਮਾਨਾਪਿ ਮਾਰਣਨ੍ਤਿਕਂ ਵੇਦਨਂ ਪਤ੍ਵਾ ਵਿਸ੍ਸਾਸਿਕਟ੍ਠਾਨਮੇਵ ਅਗਮਿਂਸੂਤਿ. ‘‘ਕਦਾ, ਭਨ੍ਤੇ’’ਤਿ ਰਞ੍ਞਾ ਪੁਟ੍ਠੋ ਅਤੀਤਂ ਆਹਰਿ –

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਕੇਸਵੋ ਨਾਮ ਰਾਜਾ ਰਜ੍ਜਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿ. ਤਂ ਪਞ੍ਚ ਪੁਰਿਸਸਤਾਨਿ ਅਨੁਪਬ੍ਬਜਿਂਸੁ. ਸੋ ਕੇਸਵਤਾਪਸੋ ਨਾਮ ਅਹੋਸਿ. ਪਸਾਧਨਕਪ੍ਪਕੋ ਪਨਸ੍ਸ ਅਨੁਪਬ੍ਬਜਿਤ੍ਵਾ ਕਪ੍ਪਕੋ ਨਾਮ ਅਨ੍ਤੇਵਾਸਿਕੋ ਅਹੋਸਿ. ਕੇਸਵਤਾਪਸੋ ਪਰਿਸਾਯ ਸਦ੍ਧਿਂ ਅਟ੍ਠ ਮਾਸੇ ਹਿਮਵਨ੍ਤੇ ਵਸਿਤ੍ਵਾ ਵਸ੍ਸਾਰਤ੍ਤਸਮਯੇ ਲੋਣਮ੍ਬਿਲਸੇਵਨਤ੍ਥਾਯ ਬਾਰਾਣਸਿਂ ਪਤ੍ਵਾ ਭਿਕ੍ਖਾਯ ਪਾਵਿਸਿ. ਅਥ ਨਂ ਰਾਜਾ ਦਿਸ੍ਵਾ ਪਸੀਦਿਤ੍ਵਾ ਚਤੁਮਾਸਂ ਅਤ੍ਤਨੋ ਸਨ੍ਤਿਕੇ ਵਸਨਤ੍ਥਾਯ ਪਟਿਞ੍ਞਂ ਗਹੇਤ੍ਵਾ ਉਯ੍ਯਾਨੇਵ ਵਸਾਪੇਨ੍ਤੋ ਸਯਂ ਸਾਯਂਪਾਤਂ ਅਸ੍ਸ ਉਪਟ੍ਠਾਨਂ ਗਚ੍ਛਤਿ. ਅਵਸੇਸਾ ਤਾਪਸਾ ਕਤਿਪਾਹਂ ਵਸਿਤ੍ਵਾ ਹਤ੍ਥਿਸਦ੍ਦਾਦੀਹਿ ਉਬ੍ਬਾਲ਼੍ਹਾ ਹੁਤ੍ਵਾ ਉਕ੍ਕਣ੍ਠਿਤ੍ਵਾ, ‘‘ਆਚਰਿਯ, ਉਕ੍ਕਣ੍ਠਿਤਮ੍ਹਾ, ਗਚ੍ਛਾਮਾ’’ਤਿ ਆਹਂਸੁ. ‘‘ਕਹਂ, ਤਾਤਾ’’ਤਿ? ‘‘ਹਿਮਵਨ੍ਤਂ, ਆਚਰਿਯਾ’’ਤਿ. ਰਾਜਾ ਅਮ੍ਹਾਕਂ ਆਗਤਦਿਵਸੇਯੇਵ ਚਤੁਮਾਸਂ ਇਧ ਵਸਨਤ੍ਥਾਯ ਪਟਿਞ੍ਞਂ ਗਣ੍ਹਿ. ‘‘ਕਥਂ ਗਮਿਸ੍ਸਥ, ਤਾਤਾ’’ਤਿ? ‘‘ਤੁਮ੍ਹੇਹਿ ਅਮ੍ਹਾਕਂ ਅਨਾਚਿਕ੍ਖਿਤ੍ਵਾਵ ਪਟਿਞ੍ਞਾ ਦਿਨ੍ਨਾ, ਮਯਂ ਇਧ ਨ ਸਕ੍ਕੋਮ ਵਸਿਤੁਂ, ਇਤੋ ਅਵਿਦੂਰੇ ਤੁਮ੍ਹਾਕਂ ਪਵਤ੍ਤਿਸ੍ਸਵਨਟ੍ਠਾਨੇ ਵਸਿਸ੍ਸਾਮਾ’’ਤਿ ਵਨ੍ਦਿਤ੍ਵਾ ਪਕ੍ਕਮਿਂਸੁ. ਕਪ੍ਪਨ੍ਤੇਵਾਸਿਕੇਨ ਸਦ੍ਧਿਂ ਆਚਰਿਯੋ ਓਹੀਯਿ.

ਰਾਜਾ ਉਪਟ੍ਠਾਨਂ ਆਗਤੋ, ‘‘ਕਹਂ, ਅਯ੍ਯਾ’’ਤਿ ਪੁਚ੍ਛਿ. ‘‘ਸਬ੍ਬੇ ਉਕ੍ਕਣ੍ਠਿਤਮ੍ਹਾਤਿ ਵਤ੍ਵਾ ਹਿਮਵਨ੍ਤਂ ਗਤਾ, ਮਹਾਰਾਜਾ’’ਤਿ ਆਹ. ਕਪ੍ਪਕੋਪਿ ਨ ਚਿਰਸ੍ਸੇਵ ਉਕ੍ਕਣ੍ਠਿਤ੍ਵਾ ਆਚਰਿਯੇਨ ਪੁਨਪ੍ਪੁਨਂ ਵਾਰਿਯਮਾਨੋਪਿ ‘‘ਨ ਸਕ੍ਕੋਮੀ’’ਤਿ ਵਤ੍ਵਾ ਪਕ੍ਕਾਮਿ. ਇਤਰੇਸਂ ਪਨ ਸਨ੍ਤਿਕਂ ਅਗਨ੍ਤ੍ਵਾ ਆਚਰਿਯਸ੍ਸ ਪਵਤ੍ਤਿਂ ਸੁਣਨ੍ਤੋ ਅਵਿਦੂਰੇ ਠਾਨੇ ਵਸਿ. ਅਪਰਭਾਗੇ ਆਚਰਿਯਸ੍ਸ ਅਨ੍ਤੇਵਾਸਿਕੇ ਅਨੁਸ੍ਸਰਨ੍ਤਸ੍ਸ ਕੁਚ੍ਛਿਰੋਗੋ ਉਪ੍ਪਜ੍ਜਿ. ਰਾਜਾ ਵੇਜ੍ਜੇਹਿ ਤਿਕਿਚ੍ਛਾਪੇਸਿ, ਰੋਗੋ ਨ ਵੂਪਸਮ੍ਮਤਿ. ਤਾਪਸੋ ਆਹ – ‘‘ਕਿਂ, ਮਹਾਰਾਜ, ਇਚ੍ਛਸਿ ਮੇ ਰੋਗਵੂਪਸਮ’’ਨ੍ਤਿ? ‘‘ਭਨ੍ਤੇ, ਸਚਾਹਂ ਸਕ੍ਕੁਣੇਯ੍ਯਂ, ਇਦਾਨੇਵ ਵੋ ਫਾਸੁਕਂ ਕਰੇਯ੍ਯ’’ਨ੍ਤਿ. ‘‘ਮਹਾਰਾਜ, ਸਚੇ ਮੇ ਫਾਸੁਕਂ ਇਚ੍ਛਸਿ, ਮਂ ਅਨ੍ਤੇਵਾਸਿਕਾਨਂ ਸਨ੍ਤਿਕਂ ਪੇਸੇਹੀ’’ਤਿ. ਰਾਜਾ ‘‘ਸਾਧੁ, ਭਨ੍ਤੇ’’ਤਿ ਤਂ ਮਞ੍ਚਕੇ ਨਿਪਜ੍ਜਾਪੇਤ੍ਵਾ ਨਾਰਦਅਮਚ੍ਚਪ੍ਪਮੁਖੇ ਚਤ੍ਤਾਰੋ ਅਮਚ੍ਚੇ ‘‘ਮਮ ਅਯ੍ਯਸ੍ਸ ਪਵਤ੍ਤਿਂ ਞਤ੍ਵਾ, ਮਯ੍ਹਂ ਸਾਸਨਂ ਪਹਿਣੇਯ੍ਯਾਥਾ’’ਤਿ ਉਯ੍ਯੋਜੇਸਿ. ਕਪ੍ਪਨ੍ਤੇਵਾਸਿਕੋ ਆਚਰਿਯਸ੍ਸ ਆਗਮਨਂ ਸੁਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਇਤਰੇ ‘‘ਕਹ’’ਨ੍ਤਿ ਵੁਤ੍ਤੇ, ‘‘ਅਸੁਕਟ੍ਠਾਨੇ ਕਿਰ ਵਸਨ੍ਤੀ’’ਤਿ ਆਹ. ਤੇਪਿ ਆਚਰਿਯਸ੍ਸਾਗਮਨਭਾਵਂ ਸੁਤ੍ਵਾ ਤਤ੍ਥੇਵ ਸਮੋਸਰਿਤ੍ਵਾ ਆਚਰਿਯਸ੍ਸ ਉਣ੍ਹੋਦਕਂ ਦਤ੍ਵਾ ਫਲਾਫਲਂ ਅਦਂਸੁ. ਤਂ ਖਣਞ੍ਞੇਵ ਰੋਗੋ ਵੂਪਸਮ੍ਮਤਿ. ਸੋ ਕਤਿਪਾਹੇਨੇਵ ਸੁਵਣ੍ਣਵਣ੍ਣੋ ਅਹੋਸਿ. ਅਥ ਨਂ ਨਾਰਦੋ ਪੁਚ੍ਛਿ –

‘‘ਮਨੁਸ੍ਸਿਨ੍ਦਂ ਜਹਿਤ੍ਵਾਨ, ਸਬ੍ਬਕਾਮਸਮਿਦ੍ਧਿਨਂ;

ਕਥਂ ਨੁ ਭਗਵਾ ਕੇਸੀ, ਕਪ੍ਪਸ੍ਸ ਰਮਤਿ ਅਸ੍ਸਮੇ.

‘‘ਸਾਦੂਨਿ ਰਮਣੀਯਾਨਿ, ਸਨ੍ਤਿ ਵਕ੍ਖਾ ਮਨੋਰਮਾ;

ਸੁਭਾਸਿਤਾਨਿ ਕਪ੍ਪਸ੍ਸ, ਨਾਰਦ ਰਮਯਨ੍ਤਿ ਮਂ.

‘‘ਸਾਲੀਨਂ ਓਦਨਂ ਭੁਞ੍ਜੇ, ਸੁਚਿਂ ਮਂਸੂਪਸੇਚਨਂ;

ਕਥਂ ਸਾਮਾਕਨੀਵਾਰਂ, ਅਲੋਣਂ ਛਾਦਯਨ੍ਤਿ ਤਂ.

‘‘ਸਾਦੁਂ ਵਾ ਯਦਿ ਵਾਸਾਦੁਂ, ਅਪ੍ਪਂ ਵਾ ਯਦਿ ਵਾ ਬਹੁਂ;

ਵਿਸ੍ਸਤ੍ਥੋ ਯਤ੍ਥ ਭੁਞ੍ਜੇਯ੍ਯ, ਵਿਸ੍ਸਾਸਪਰਮਾ ਰਸਾ’’ਤਿ. (ਜਾ. ੧.੪.੧੮੧-੧੮੪);

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਨ੍ਤੋ ‘‘ਤਦਾ ਰਾਜਾ ਮੋਗ੍ਗਲ੍ਲਾਨੋ ਅਹੋਸਿ, ਨਾਰਦੋ ਸਾਰਿਪੁਤ੍ਤੋ, ਕਪ੍ਪਨ੍ਤੇਵਾਸਿਕੋ ਆਨਨ੍ਦੋ, ਕੇਸਵਤਾਪਸੋ ਅਹਮੇਵਾ’’ਤਿ ਵਤ੍ਵਾ, ‘‘ਏਵਂ, ਮਹਾਰਾਜ, ਪੁਬ੍ਬੇਪਿ ਪਣ੍ਡਿਤਾ ਮਾਰਣਨ੍ਤਿਕਂ ਵੇਦਨਂ ਪਤ੍ਵਾ ਵਿਸ੍ਸਾਸਿਕਟ੍ਠਾਨਂ ਗਮਿਂਸੁ, ਮਮ ਸਾਵਕਾ ਤੁਮ੍ਹਾਕਂ ਸਨ੍ਤਿਕੇ ਵਿਸ੍ਸਾਸਂ ਨ ਲਭਨ੍ਤਿ ਮਞ੍ਞੇ’’ਤਿ ਆਹ. ਰਾਜਾ ‘‘ਭਿਕ੍ਖੁਸਙ੍ਘੇਨ ਸਦ੍ਧਿਂ ਮਯਾ ਵਿਸ੍ਸਾਸਂ ਕਾਤੁਂ ਵਟ੍ਟਤਿ, ਕਥਂ ਨੁ ਖੋ ਕਰਿਸ੍ਸਾਮੀਤਿ ਸਮ੍ਮਾਸਮ੍ਬੁਦ੍ਧਸ੍ਸ ਞਾਤਿਧੀਤਰਂ ਮਮ ਗੇਹੇ ਕਾਤੁਂ ਵਟ੍ਟਤਿ, ਏਵਂ ਸਨ੍ਤੇ ‘ਦਹਰਾ ਚ ਸਾਮਣੇਰਾ ਚ ਸਮ੍ਮਾਸਮ੍ਬੁਦ੍ਧਸ੍ਸ ਞਾਤਿਰਾਜਾ’ਤਿ ਮਮ ਸਨ੍ਤਿਕਂ ਵਿਸ੍ਸਤ੍ਥਾ ਨਿਬਦ੍ਧਂ ਆਗਮਿਸ੍ਸਨ੍ਤੀ’’ਤਿ ਚਿਨ੍ਤੇਤ੍ਵਾ – ‘‘ਏਕਂ ਮੇ ਧੀਤਰਂ ਦੇਨ੍ਤੂ’’ਤਿ ਸਾਕਿਯਾਨਂ ਸਨ੍ਤਿਕਂ ਸਾਸਨਂ ਪੇਸੇਸਿ. ‘‘ਕਤਰਸ੍ਸ ਸਕ੍ਯਸ੍ਸ ਧੀਤਾ’’ਤਿ ਚ ਪੁਚ੍ਛਿਤ੍ਵਾ, ‘‘ਞਤ੍ਵਾ ਆਗਚ੍ਛੇਯ੍ਯਾਥਾ’’ਤਿ ਵਤ੍ਵਾ ਦੂਤੇ ਆਣਾਪੇਸਿ. ਦੂਤਾ ਗਨ੍ਤ੍ਵਾ ਸਾਕਿਯੇ ਦਾਰਿਕਂ ਯਾਚਿਂਸੁ. ਤੇ ਸਨ੍ਨਿਪਤਿਤ੍ਵਾ, ‘‘ਪਕ੍ਖਨ੍ਤਰਿਕੋ ਰਾਜਾ, ਸਚੇ ਨ ਦਸ੍ਸਾਮ, ਵਿਨਾਸੇਸ੍ਸਤਿ ਨੋ, ਨ ਖੋ ਪਨ ਅਮ੍ਹੇਹਿ ਕੁਲੇਨ ਸਦਿਸੋ, ਕਿਂ ਨੁ ਖੋ ਕਾਤਬ੍ਬ’’ਨ੍ਤਿ ਮਨ੍ਤਯਿਂਸੁ. ਮਹਾਨਾਮੋ ‘‘ਮਮ ਦਾਸਿਯਾ ਕੁਚ੍ਛਿਮ੍ਹਿ ਜਾਤਾ ਵਾਸਭਖਤ੍ਤਿਯਾ ਨਾਮ ਧੀਤਾ ਰੂਪਸੋਭਗ੍ਗਪ੍ਪਤ੍ਤਾ ਅਤ੍ਥਿ, ਤਂ ਦਸ੍ਸਾਮਾ’’ਤਿ ਵਤ੍ਵਾ ਦੂਤੇ ਆਹ – ‘‘ਸਾਧੁ, ਰਞ੍ਞੋ ਦਾਰਿਕਂ ਦਸ੍ਸਾਮਾ’’ਤਿ. ‘‘ਸਾ ਕਸ੍ਸ, ਧੀਤਾ’’ਤਿ? ‘‘ਸਮ੍ਮਾਸਮ੍ਬੁਦ੍ਧਸ੍ਸ ਚੂਲ਼ਪਿਤੁਪੁਤ੍ਤਸ੍ਸ ਮਹਾਨਾਮਸ੍ਸ ਸਕ੍ਕਸ੍ਸ ਧੀਤਾ ਵਾਸਭਖਤ੍ਤਿਯਾ ਨਾਮਾ’’ਤਿ.

ਤੇ ਗਨ੍ਤ੍ਵਾ ਰਞ੍ਞੋ ਆਰੋਚਯਿਂਸੁ. ਰਾਜਾ ‘‘ਯਦਿ ਏਵਂ, ਸਾਧੁ, ਸੀਘਂ ਆਨੇਥ, ਖਤ੍ਤਿਯਾ ਚ ਨਾਮ ਬਹੁਮਾਯਾ, ਦਾਸਿਧੀਤਰਮ੍ਪਿ ਪਹਿਣੇਯ੍ਯੁਂ, ਪਿਤਰਾ ਸਦ੍ਧਿਂ ਏਕਭਾਜਨੇ ਭੁਞ੍ਜਨ੍ਤਿਂ ਆਨੇਯ੍ਯਾਥਾ’’ਤਿ ਪੇਸੇਸਿ. ਤੇ ਗਨ੍ਤ੍ਵਾ, ‘‘ਦੇਵ, ਤੁਮ੍ਹੇਹਿ ਸਦ੍ਧਿਂ ਏਕਤੋ ਭੁਞ੍ਜਨ੍ਤਿਂ ਰਾਜਾ ਇਚ੍ਛਤੀ’’ਤਿ ਆਹਂਸੁ. ਮਹਾਨਾਮੋ ‘‘ਸਾਧੁ, ਤਾਤਾ’’ਤਿ ਤਂ ਅਲਙ੍ਕਾਰਾਪੇਤ੍ਵਾ ਅਤ੍ਤਨੋ ਭੋਜਨਕਾਲੇ ਪਕ੍ਕੋਸਾਪੇਤ੍ਵਾ ਤਾਯ ਸਦ੍ਧਿਂ ਏਕਤੋ ਭੁਞ੍ਜਨਾਕਾਰਂ ਦਸ੍ਸੇਤ੍ਵਾ ਦੂਤਾਨਂ ਨਿਯ੍ਯਾਦੇਸਿ. ਤੇ ਤਂ ਆਦਾਯ ਸਾਵਤ੍ਥਿਂ ਗਨ੍ਤ੍ਵਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ. ਰਾਜਾ ਤੁਟ੍ਠਮਾਨਸੋ ਤਂ ਪਞ੍ਚਨ੍ਨਂ ਇਤ੍ਥਿਸਤਾਨਂ ਜੇਟ੍ਠਿਕਂ ਕਤ੍ਵਾ ਅਗ੍ਗਮਹੇਸਿਟ੍ਠਾਨੇ ਅਭਿਸਿਞ੍ਚਿ. ਸਾ ਨ ਚਿਰਸ੍ਸੇਵ ਸੁਵਣ੍ਣਵਣ੍ਣਂ ਪੁਤ੍ਤਂ ਵਿਜਾਯਿ.

ਅਥਸ੍ਸ ਨਾਮਗ੍ਗਹਣਦਿਵਸੇ ਰਾਜਾ ਦਾਰਕਸ੍ਸ ਅਯ੍ਯਕਸ੍ਸ ਸਨ੍ਤਿਕਂ ਪੇਸੇਸਿ ‘‘ਸਕ੍ਯਰਾਜਧੀਤਾ ਵਾਸਭਖਤ੍ਤਿਯਾ ਪੁਤ੍ਤਂ ਵਿਜਾਤਾ, ਕਿਮਸ੍ਸ ਨਾਮਂ ਕਰੋਮਾ’’ਤਿ? ਤਂ ਪਨ ਸਾਸਨਂ ਗਹੇਤ੍ਵਾ ਗਤੋ ਅਮਚ੍ਚੋ ਥੋਕਂ ਬਧਿਰਧਾਤੁਕੋ, ਸੋ ਗਨ੍ਤ੍ਵਾ ਰਞ੍ਞੋ ਅਯ੍ਯਕਸ੍ਸ ਆਰੋਚੇਸਿ, ਸੋ ਤਂ ਸੁਤ੍ਵਾ ‘‘ਵਾਸਭਖਤ੍ਤਿਯਾ ਪੁਤ੍ਤਂ ਅਵਿਜਾਯਿਤ੍ਵਾਪਿ ਸਬ੍ਬਜਨਂ ਅਭਿਭਵਿ, ਇਦਾਨਿ ਪਨ ਰਞ੍ਞੋ ਅਤਿਵਿਯ ਵਲ੍ਲਭਾ ਭਵਿਸ੍ਸਤੀ’’ਤਿ ਆਹ. ਬਧਿਰੋ ਅਮਚ੍ਚੋ ‘‘ਵਲ੍ਲਭਾ’’ਤਿ ਵਚਨਂ ਦੁਸ੍ਸੁਤਂ ਸੁਤ੍ਵਾ ‘‘ਵਿਟਟੂਭੋ’’ਤਿ ਸਲ੍ਲਕ੍ਖੇਤ੍ਵਾ ਰਾਜਾਨਂ ਉਪਗਨ੍ਤ੍ਵਾ, ‘‘ਦੇਵ, ਕੁਮਾਰਸ੍ਸ ਕਿਰ ‘ਵਿਟਟੂਭੋ’ਤਿ ਨਾਮਂ ਕਰੋਥਾ’’ਤਿ ਆਹ. ਰਾਜਾ ‘‘ਪੋਰਾਣਕਂ ਨੋ ਕੁਲਸਨ੍ਤਕਂ ਨਾਮਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਤਂ ਨਾਮਂ ਅਕਾਸਿ. ਅਥਸ੍ਸ ਦਹਰਕਾਲੇਯੇਵ ਰਾਜਾ ‘‘ਸਤ੍ਥੁ ਪਿਯਂ ਕਰੋਮੀ’’ਤਿ ਸੇਨਾਪਤਿਟ੍ਠਾਨਂ ਅਦਾਸਿ.

ਸੋ ਕੁਮਾਰਪਰਿਹਾਰੇਨ ਵਡ੍ਢਨ੍ਤੋ ਸਤ੍ਤਵਸ੍ਸਿਕਕਾਲੇ ਅਞ੍ਞੇਸਂ ਕੁਮਾਰਾਨਂ ਮਾਤਾਮਹਕੁਲਤੋ ਹਤ੍ਥਿਰੂਪਕਅਸ੍ਸਰੂਪਕਾਦੀਨਿ ਆਹਰਿਯਮਾਨਾਨਿ ਦਿਸ੍ਵਾ ਮਾਤਰਂ ਪੁਚ੍ਛਿ – ‘‘ਅਮ੍ਮ, ਅਞ੍ਞੇਸਂ ਮਾਤਾਮਹਕੁਲਤੋ ਪਣ੍ਣਾਕਾਰੋ ਆਹਰੀਯਤਿ, ਮਯ੍ਹਂ ਕੋਚਿ ਕਿਞ੍ਚਿ ਨ ਪੇਸੇਸਿ, ਕਿਂ ਤ੍ਵਂ ਨਿਮਾਤਾ ਨਿਪਿਤਾ’’ਤਿ? ਅਥ ਨਂ ਸਾ, ‘‘ਤਾਤ, ਤਵ ਸਕ੍ਯਰਾਜਾਨੋ ਮਾਤਾਮਹਾ ਦੂਰੇ ਪਨ ਵਸਨ੍ਤਿ, ਤੇਨ ਤੇ ਕਿਞ੍ਚਿ ਨ ਪੇਸੇਨ੍ਤੀ’’ਤਿ ਵਞ੍ਚੇਸਿ. ਸੋਲ਼ਸਵਸ੍ਸਿਕਕਾਲੇ, ‘‘ਅਮ੍ਮ, ਤਵ ਮਾਤਾਮਹਕੁਲਂ ਪਸ੍ਸਿਤੁਕਾਮੋਮ੍ਹੀ’’ਤਿ ਵਤ੍ਵਾ, ‘‘ਅਲਂ, ਤਾਤ, ਕਿਂ ਤਤ੍ਥ ਗਨ੍ਤ੍ਵਾ ਕਰਿਸ੍ਸਤੀ’’ਤਿ ਵਾਰਿਯਮਾਨੋਪਿ ਪੁਨਪ੍ਪੁਨਂ ਯਾਚਿ. ਅਥਸ੍ਸ ਮਾਤਾ ‘‘ਤੇਨ ਹਿ ਗਚ੍ਛਾ’’ਤਿ ਸਮ੍ਪਟਿਚ੍ਛਿ. ਸੋ ਪਿਤੁ ਆਰੋਚੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿ. ਵਾਸਭਖਤ੍ਤਿਯਾ ਪੁਰੇਤਰਂ ਪਣ੍ਣਂ ਪੇਸੇਸਿ – ‘‘ਅਹਂ ਇਧ ਸੁਖਂ ਵਸਾਮਿ, ਮਾਸ੍ਸ ਕਿਞ੍ਚਿ ਸਾਮਿਨੋ ਅਨ੍ਤਰਂ ਦਸ੍ਸਯਿਂਸੂ’’ਤਿ. ਸਾਕਿਯਾ ਵਿਟਟੂਭਸ੍ਸ ਆਗਮਨਂ ਞਤ੍ਵਾ, ‘‘ਵਨ੍ਦਿਤੁਂ ਨ ਸਕ੍ਕੋਮਾ’’ਤਿ ਤਸ੍ਸ ਦਹਰਦਹਰੇ ਕੁਮਾਰੇ ਜਨਪਦਂ ਪਹਿਣਿਤ੍ਵਾ ਤਸ੍ਮਿਂ ਕਪਿਲਪੁਰਂ ਸਮ੍ਪਤ੍ਤੇ ਸਨ੍ਥਾਗਾਰੇ ਸਨ੍ਨਿਪਤਿਂਸੁ. ਕੁਮਾਰੋ ਤਤ੍ਥ ਗਨ੍ਤ੍ਵਾ ਅਟ੍ਠਾਸਿ.

ਅਥ ਨਂ ‘‘ਅਯਂ ਤੇ, ਤਾਤ, ਮਾਤਾਮਹੋ, ਅਯਂ ਮਾਤੁਲੋ’’ਤਿ ਵਤ੍ਵਾ ਵਨ੍ਦਾਪੇਸੁਂ. ਸੋ ਸਬ੍ਬੇ ਵਨ੍ਦਮਾਨੋ ਵਿਚਰਿਤ੍ਵਾ ਏਕਮ੍ਪਿ ਅਤ੍ਤਾਨਂ ਵਨ੍ਦਨ੍ਤਂ ਅਦਿਸ੍ਵਾ ‘‘ਕਿਂ ਨੁ ਖੋ ਮਂ ਵਨ੍ਦਨ੍ਤਾ ਨਤ੍ਥੀ’’ਤਿ ਪੁਚ੍ਛਿ. ਸਾਕਿਯਾ, ‘‘ਤਾਤ, ਤੇ ਕਨਿਟ੍ਠਕੁਮਾਰਾ ਜਨਪਦਂ ਗਤਾ’’ਤਿ ਵਤ੍ਵਾ ਤਸ੍ਸ ਮਹਨ੍ਤਂ ਸਕ੍ਕਾਰਂ ਕਰਿਂਸੁ. ਸੋ ਕਤਿਪਾਹਂ ਵਸਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿ. ਅਥੇਕਾ ਦਾਸੀ ਸਨ੍ਥਾਗਾਰੇ ਤੇਨ ਨਿਸਿਨ੍ਨਫਲਕਂ ‘‘ਇਦਂ ਵਾਸਭਖਤ੍ਤਿਯਾਯ ਦਾਸਿਯਾ ਪੁਤ੍ਤਸ੍ਸ ਨਿਸਿਨ੍ਨਫਲਕ’’ਨ੍ਤਿ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ਖੀਰੋਦਕੇਨ ਧੋਵਿ. ਏਕੋ ਪੁਰਿਸੋ ਅਤ੍ਤਨੋ ਆਵੁਧਂ ਪਮੁਸ੍ਸਿਤ੍ਵਾ ਨਿਵਤ੍ਤੋ ਤਂ ਗਣ੍ਹਨ੍ਤੋ ਵਿਟਟੂਭਕੁਮਾਰਸ੍ਸ ਅਕ੍ਕੋਸਨਸਦ੍ਦਂ ਸੁਤ੍ਵਾ ਤਂ ਕਾਰਣਂ ਪੁਚ੍ਛਿਤ੍ਵਾ, ‘‘ਵਾਸਭਖਤ੍ਤਿਯਾ ਦਾਸਿਯਾ ਕੁਚ੍ਛਿਮ੍ਹਿ ਮਹਾਨਾਮਸਕ੍ਕਂ ਪਟਿਚ੍ਚ ਜਾਤਾ’’ਤਿ ਞਤ੍ਵਾ ਬਲਕਾਯਸ੍ਸ ਕਥੇਸਿ. ‘‘ਵਾਸਭਖਤ੍ਤਿਯਾ ਕਿਰ ਦਾਸਿਧੀਤਾ’’ਤਿ ਮਹਾਕੋਲਾਹਲਂ ਅਹੋਸਿ. ਤਂ ਸੁਤ੍ਵਾ ਵਿਟਟੂਭੋ ‘‘ਏਤੇ ਤਾਵ ਮਮ ਨਿਸਿਨ੍ਨਫਲਕਂ ਖੀਰੋਦਕੇਨ ਧੋਵਨ੍ਤੁ, ਅਹਂ ਪਨ ਰਜ੍ਜੇ ਪਤਿਟ੍ਠਿਤਕਾਲੇ ਏਤੇਸਂ ਗਲਲੋਹਿਤਂ ਗਹੇਤ੍ਵਾ ਮਮ ਨਿਸਿਨ੍ਨਫਲਕਂ ਧੋਵਿਸ੍ਸਾਮੀ’’ਤਿ ਚਿਤ੍ਤਂ ਪਟ੍ਠਪੇਸਿ. ਤਸ੍ਮਿਂ ਸਾਵਤ੍ਥਿਂ ਗਤੇ ਅਮਚ੍ਚਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚਯਿਂਸੁ. ਰਾਜਾ ‘‘ਮਯ੍ਹਂ ਦਾਸਿਧੀਤਰਂ ਅਦਂਸੂ’’ਤਿ ਸਾਕਿਯਾਨਂ ਕੁਜ੍ਝਿਤ੍ਵਾ ਵਾਸਭਖਤ੍ਤਿਯਾਯ ਚ ਪੁਤ੍ਤਸ੍ਸ ਚ ਦਿਨ੍ਨਪਰਿਹਾਰਂ ਅਚ੍ਛਿਨ੍ਦਿਤ੍ਵਾ ਦਾਸਦਾਸੀਹਿ ਲਦ੍ਧਬ੍ਬਮਤ੍ਤਮੇਵ ਦਾਪੇਸਿ.

ਤਤੋ ਕਤਿਪਾਹਚ੍ਚਯੇਨ ਸਤ੍ਥਾ ਰਾਜਨਿਵੇਸਨਂ ਗਨ੍ਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿ. ਰਾਜਾ ਆਗਨ੍ਤ੍ਵਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਤੁਮ੍ਹਾਕਂ ਕਿਰ ਞਾਤਕੇਹਿ ਦਾਸਿਧੀਤਾ ਮਯ੍ਹਂ ਦਿਨ੍ਨਾ, ਤੇਨਸ੍ਸਾ ਅਹਂ ਸਪੁਤ੍ਤਾਯ ਪਰਿਹਾਰਂ ਅਚ੍ਛਿਨ੍ਦਿਤ੍ਵਾ ਦਾਸਦਾਸੀਹਿ ਲਦ੍ਧਬ੍ਬਮਤ੍ਤਮੇਵ ਦਾਪੇਸਿ’’ਨ੍ਤਿ ਆਹ. ਸਤ੍ਥਾ ‘‘ਅਯੁਤ੍ਤਂ, ਮਹਾਰਾਜ, ਸਾਕਿਯੇਹਿ ਕਤਂ, ਦਦਨ੍ਤੇਹਿ ਨਾਮ ਸਮਾਨਜਾਤਿਕਾ ਦਾਤਬ੍ਬਾ ਅਸ੍ਸ, ਤਂ ਪਨ, ਮਹਾਰਾਜ, ਵਦਾਮਿ, ਵਾਸਭਖਤ੍ਤਿਯਾ ਖਤ੍ਤਿਯਰਾਜਧੀਤਾ ਖਤ੍ਤਿਯਰਞ੍ਞੋ ਗੇਹੇ ਅਭਿਸੇਕਂ ਲਭਿ. ਵਿਟਟੂਭੋਪਿ ਖਤ੍ਤਿਯਰਾਜਾਨਮੇਵ ਪਟਿਚ੍ਚ ਜਾਤੋ, ਮਾਤੁਗੋਤ੍ਤਂ ਨਾਮ ਕਿਂ ਕਰਿਸ੍ਸਤਿ, ਪਿਤੁਗੋਤ੍ਤਮੇਵ ਪਮਾਣਨ੍ਤਿ. ਪੋਰਾਣਕਪਣ੍ਡਿਤਾ ਦਲਿਦ੍ਦਿਤ੍ਥਿਯਾ ਕਟ੍ਠਹਾਰਿਕਾਯ ਅਗ੍ਗਮਹੇਸਿਟ੍ਠਾਨਂ ਅਦਂਸੁ, ਤਸ੍ਸਾ ਚ ਕੁਚ੍ਛਿਮ੍ਹਿ ਜਾਤਕੁਮਾਰੋ ਦ੍ਵਾਦਸਯੋਜਨਿਕਾਯ ਬਾਰਾਣਸਿਯਾ ਰਜ੍ਜਂ ਪਤ੍ਵਾ ਕਟ੍ਠਵਾਹਨਰਾਜਾ ਨਾਮ ਜਾਤੋ’’ਤਿ ਕਟ੍ਠਹਾਰਿਜਾਤਕਂ (ਜਾ. ੧.੧.੭) ਕਥੇਸਿ. ਰਾਜਾ ਧਮ੍ਮਕਥਂ ਸੁਤ੍ਵਾ ‘‘ਪਿਤੁਗੋਤ੍ਤਮੇਵ ਕਿਰ ਪਮਾਣ’’ਨ੍ਤਿ ਤੁਸ੍ਸਿਤ੍ਵਾ ਵਾਸਭਖਤ੍ਤਿਯਾਯ ਚ ਪੁਤ੍ਤਸ੍ਸ ਚ ਪਕਤਿਪਰਿਹਾਰਮੇਵ ਦਾਪੇਸਿ.

ਬਨ੍ਧੁਲਸੇਨਾਪਤਿਸ੍ਸਪਿ ਖੋ ਕੁਸਿਨਾਰਾਯਂ ਮਲ੍ਲਰਾਜਧੀਤਾ ਮਲ੍ਲਿਕਾ ਨਾਮ ਭਰਿਯਾ ਦੀਘਰਤ੍ਤਂ ਪੁਤ੍ਤਂ ਨ ਵਿਜਾਯਿ. ਅਥ ਨਂ ਬਨ੍ਧੁਲੋ ‘‘ਅਤ੍ਤਨੋ ਕੁਲਘਰਮੇਵ ਗਚ੍ਛਾ’’ਤਿ ਉਯ੍ਯੋਜੇਸਿ. ਸਾ ‘‘ਸਤ੍ਥਾਰਂ ਦਿਸ੍ਵਾਵ ਗਮਿਸ੍ਸਾਮੀ’’ਤਿ ਜੇਤਵਨਂ ਪਵਿਸਿਤ੍ਵਾ ਤਥਾਗਤਂ ਵਨ੍ਦਿਤ੍ਵਾ ਠਿਤਾ, ‘‘ਕਹਂ ਗਚ੍ਛਸੀ’’ਤਿ ਵੁਤ੍ਤਾ ‘‘ਸਾਮਿਕੋ ਮਂ ਭਨ੍ਤੇ, ਕੁਲਘਰਂ ਪੇਸੇਤੀ’’ ਆਹ. ‘‘ਕਿਂ ਕਾਰਣਾ’’ਤਿ? ‘‘ਵਞ੍ਝਾ ਕਿਰਸ੍ਮਿ ਅਪੁਤ੍ਤਿਕਾ’’ਤਿ. ‘‘ਯਦਿ ਏਵਂ, ਗਮਨਕਿਚ੍ਚਂ ਨਤ੍ਥਿ, ਨਿਵਤ੍ਤਸ੍ਸੂ’’ਤਿ. ਸਾ ਤੁਟ੍ਠਮਾਨਸਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਵੇਸਨਂ ਗਨ੍ਤ੍ਵਾ ‘‘ਕਸ੍ਮਾ ਨਿਵਤ੍ਤਾਸੀ’’ਤਿ ਵੁਤ੍ਤਾ ‘‘ਦਸਬਲੇਨ ਨਿਵਤ੍ਤਿਤਾਮ੍ਹੀ’’ਤਿ ਆਹ ਬਨ੍ਧੁਲੋ ‘‘ਦਿਟ੍ਠਂ ਭਵਿਸ੍ਸਤਿ ਦੀਘਦਸ੍ਸਿਨਾ ਕਾਰਣ’’ਨ੍ਤਿ ਸਮ੍ਪਟਿਚ੍ਛਿ. ਸਾ ਨ ਚਿਰਸ੍ਸੇਵ ਗਬ੍ਭਂ ਪਟਿਲਭਿਤ੍ਵਾ ਉਪ੍ਪਨ੍ਨਦਾਹਲ਼ਾ ‘‘ਦੋਹਲ਼ੋ ਮੇ ਉਪ੍ਪਨ੍ਨੋ’’ਤਿ ਆਰੋਚੇਸਿ. ‘‘ਕਿਂ ਦੋਹਲ਼ੋ’’ਤਿ? ‘‘ਵੇਸਾਲਿਨਗਰੇ ਗਣਰਾਜਕੁਲਾਨਂ ਅਭਿਸੇਕਮਙ੍ਗਲਪੋਕ੍ਖਰਣਿਯਂ ਓਤਰਿਤ੍ਵਾ ਨ੍ਹਤ੍ਵਾ ਪਾਨੀਯਂ ਪਾਤੁਕਾਮਾਮ੍ਹਿ, ਸਾਮੀ’’ਤਿ. ਬਨ੍ਧੁਲੋ ‘‘ਸਾਧੂ’’ਤਿ ਵਤ੍ਵਾ ਸਹਸ੍ਸਥਾਮਧਨੁਂ ਗਹੇਤ੍ਵਾ ਤਂ ਰਥਂ ਆਰੋਪੇਤ੍ਵਾ ਸਾਵਤ੍ਥਿਤੋ ਨਿਕ੍ਖਮਿਤ੍ਵਾ ਰਥਂ ਪਾਜੇਨ੍ਤੋ ਮਹਾਲਿਲਿਚ੍ਛਵਿਨੋ ਦਿਨ੍ਨਦ੍ਵਾਰੇਨ ਵੇਸਾਲਿਂ ਪਾਵਿਸਿ. ਮਹਾਲਿਲਿਚ੍ਛਵਿਨੋ ਚ ਦ੍ਵਾਰਸਮੀਪੇ ਏਵ ਨਿਵੇਸਨਂ ਹੋਤਿ. ਸੋ ਰਥਸ੍ਸ ਉਮ੍ਮਾਰੇ ਪਨਿਘਾਤਸਦ੍ਦਂ ਸੁਤ੍ਵਾਵ ‘‘ਬਨ੍ਧੁਲਸ੍ਸ ਰਥਸਦ੍ਦੋ ਏਸੋ, ਅਜ੍ਜ ਲਿਚ੍ਛਵੀਨਂ ਭਯਂ ਉਪ੍ਪਜ੍ਜਿਸ੍ਸਤੀ’’ਤਿ ਆਹ.

ਪੋਕ੍ਖਰਣਿਯਾ ਅਨ੍ਤੋ ਚ ਬਹਿ ਚ ਆਰਕ੍ਖਾ ਬਲਵਤੀ, ਉਪਰਿ ਲੋਹਜਾਲਂ ਪਤ੍ਥਟਂ, ਸਕੁਣਾਨਮ੍ਪਿ ਓਕਾਸੋ ਨਤ੍ਥਿ. ਬਨ੍ਧੁਲਸੇਨਾਪਤਿ ਪਨ ਰਥਾ ਓਤਰਿਤ੍ਵਾ ਆਰਕ੍ਖਕੇ ਮਨੁਸ੍ਸੇ ਵੇਤ੍ਤੇਨ ਪਹਰਨ੍ਤੋ ਪਲਾਪੇਤ੍ਵਾ ਲੋਹਜਾਲਂ ਛਿਨ੍ਦਿਤ੍ਵਾ ਅਨ੍ਤੋਪੋਕ੍ਖਰਣੀਯਂ ਭਰਿਯਂ ਨ੍ਹਾਪੇਤ੍ਵਾ ਸਯਮ੍ਪਿ ਨ੍ਹਤ੍ਵਾ ਪੁਨ ਤਂ ਰਥਂ ਆਰੋਪੇਤ੍ਵਾ ਨਗਰਾ ਨਿਕ੍ਖਮਿਤ੍ਵਾ ਆਗਤਮਗ੍ਗੇਨੇਵ ਪਾਯਾਸਿ. ਤੇ ਆਰਕ੍ਖਮਨੁਸ੍ਸਾ ਲਿਚ੍ਛਵਿਰਾਜੂਨਂ ਆਰੋਚੇਸੁਂ. ਲਿਚ੍ਛਵਿਰਾਜਾਨੋ ਕੁਜ੍ਝਿਤ੍ਵਾ ਪਞ੍ਚ ਰਥਸਤਾਨਿ ਆਰੁਯ੍ਹ ‘‘ਬਨ੍ਧੁਲਮਲ੍ਲਂ ਗਣ੍ਹਿਸ੍ਸਾਮਾ’’ਤਿ ਨਿਕ੍ਖਮਿਂਸੁ. ਤਂ ਪਵਤ੍ਤਿਂ ਮਹਾਲਿਸ੍ਸ ਆਰੋਚੇਸੁਂ. ਮਹਾਲਿ, ‘‘ਮਾ ਗਮਿਤ੍ਥ, ਸੋ ਹਿ ਵੋ ਸਬ੍ਬੇ ਘੋਤੇਸ੍ਸਤੀ’’ਤਿ ਆਹ. ਤੇਪਿ ‘‘ਮਯਂ ਗਮਿਸ੍ਸਾਮ ਏਵਾ’’ਤਿ ਵਦਿਂਸੁ. ‘‘ਤੇਨ ਹਿ ਤਸ੍ਸ ਰਥਚਕ੍ਕਸ੍ਸ ਯਾਵ ਨਾਭਿਤੋ ਪਥਵਿਂ ਪਵਿਟ੍ਠਟ੍ਠਾਨਂ ਦਿਸ੍ਵਾ ਨਿਵਤ੍ਤੇਯ੍ਯਾਥ, ਤਤੋ ਅਨਿਵਤ੍ਤਨ੍ਤਾ ਪੁਰਤੋ ਅਸਨਿਸਦ੍ਦਂ ਵਿਯ ਸੁਣਿਸ੍ਸਥ, ਤਮ੍ਹਾ ਠਾਨਾ ਨਿਵਤ੍ਤੇਯ੍ਯਾਥ. ਤਤੋ ਅਨਿਵਤ੍ਤਨ੍ਤਾ ਤੁਮ੍ਹਾਕਂ ਰਥਧੁਰੇਸੁ ਛਿਦ੍ਦਂ ਪਸ੍ਸਿਸ੍ਸਥ, ਤਮ੍ਹਾ ਠਾਨਾ ਨਿਵਤ੍ਤੇਯ੍ਯਾਥ, ਪੁਰਤੋ ਮਾ ਗਮਿਤ੍ਥਾ’’ਤਿ. ਤੇ ਤਸ੍ਸ ਵਚਨੇਨ ਅਨਿਵਤ੍ਤਿਤ੍ਵਾ ਤਂ ਅਨੁਬਨ੍ਧਿਂਸੁ ਏਵ. ਮਲ੍ਲਿਕਾ ਦਿਸ੍ਵਾ, ‘‘ਰਥਾ, ਸਾਮਿ, ਪਞ੍ਞਾਯਨ੍ਤੀ’’ਤਿ ਆਹ. ‘‘ਤੇਨ ਹਿ ਏਕਸ੍ਸੇਵ ਰਥਸ੍ਸ ਪਞ੍ਞਾਯਨਕਾਲੇ ਮਂ ਆਰੋਚੇਯ੍ਯਾਸੀ’’ਤਿ. ਸਾ ਯਦਾ ਸਬ੍ਬੇ ਰਥਾ ਏਕੋ ਵਿਯ ਹੁਤ੍ਵਾ ਪਞ੍ਞਾਯਿਂਸੁ, ਤਦਾ ‘‘ਏਕਮੇਵ, ਸਾਮਿ, ਰਥਸੀਸਂ ਪਞ੍ਞਾਯਤੀ’’ਤਿ ਆਹ. ਬਨ੍ਧੁਲੋ ‘‘ਤੇਨ ਹਿ ਇਮਾ ਰਸ੍ਮਿਯੋ ਗਣ੍ਹਾਹੀ’’ਤਿ ਤਸ੍ਸਾ ਰਸ੍ਮਿਯੋ ਦਤ੍ਵਾ ਰਥੇ ਠਿਤੋਵ ਧਨੁਂ ਆਰੋਪੇਸਿ, ਰਥਚਕ੍ਕਂ ਯਾਵ ਨਾਭਿਤੋ ਪਥਵਿਂ ਪਾਵਿਸਿ.

ਲਿਚ੍ਛਵਿਨੋ ਤਂ ਠਾਨਂ ਦਿਸ੍ਵਾਪਿ ਨ ਨਿਵਤ੍ਤਿਂਸੁ. ਇਤਰੋ ਥੋਕਂ ਗਨ੍ਤ੍ਵਾ ਜਿਯਂ ਪੋਥੇਸਿ, ਅਸਨਿਸਦ੍ਦੋ ਵਿਯ ਅਹੋਸਿ. ਤੇ ਤਤੋਪਿ ਨ ਨਿਵਤ੍ਤਿਂਸੁ, ਅਨੁਬਨ੍ਧਨ੍ਤਾ ਗਚ੍ਛਨ੍ਤੇਵ. ਬਨ੍ਧੁਲੋ ਰਥੇ ਠਿਤਕੋਵ ਏਕਸਰਂ ਖਿਪਿ, ਸੋ ਪਞ੍ਚਨ੍ਨਂ ਰਥਸਤਾਨਂ ਰਥਸੀਸੇ ਛਿਦ੍ਦਂ ਕਤ੍ਵਾ ਪਞ੍ਚ ਰਾਜਸਤਾਨਿ ਪਰਿਕਰਬਨ੍ਧਨਟ੍ਠਾਨੇ ਵਿਨਿਵਿਜ੍ਝਿਤ੍ਵਾ ਪਥਵਿਂ ਪਾਵਿਸਿ. ਤੇ ਅਤ੍ਤਨੋ ਪਵਿਦ੍ਧਭਾਵਂ ਅਜਾਨਿਤ੍ਵਾ, ‘‘ਤਿਟ੍ਠ, ਰੇ, ਤਿਟ੍ਠ, ਰੇ’’ਤਿ ਵਦਨ੍ਤਾ ਅਨੁਬਨ੍ਧਿਂਸੁ ਏਵ. ਬਨ੍ਧੁਲੋ ਰਥਂ ਠਪੇਤ੍ਵਾ ‘‘ਤੁਮ੍ਹੇ ਮਤਕਾ, ਮਤਕੇਹਿ ਸਦ੍ਧਿਂ ਮਯ੍ਹਂ ਯੁਦ੍ਧਂ ਨਾਮ ਨਤ੍ਥੀ’’ਤਿ ਆਹ. ‘‘ਮਤਕਾ ਨਾਮ ਅਮ੍ਹਾਦਿਸਾ ਨ ਹੋਨ੍ਤੀ’’ਤਿ. ‘‘ਤੇਨ ਹਿ ਸਬ੍ਬਪਚ੍ਛਿਮਸ੍ਸ ਪਰਿਕਰਂ ਮੋਚੇਥਾ’’ਤਿ. ਤੇ ਮੋਚਯਿਂਸੁ. ਸੋ ਮੁਤ੍ਤਮਤ੍ਤੇ ਏਵ ਮਰਿਤ੍ਵਾ ਪਤਿਤੋ. ਅਥ ਤੇ ਸਬ੍ਬੇਪਿ ‘‘ਤੁਮ੍ਹੇ ਏਵਰੂਪਾ, ਅਤ੍ਤਨੋ ਘਰਾਨਿ ਗਨ੍ਤ੍ਵਾ ਸਂਵਿਧਾਤਬ੍ਬਂ ਸਂਵਿਦਹਿਤ੍ਵਾ ਪੁਤ੍ਤਦਾਰਂ ਅਨੁਸਾਸਿਤ੍ਵਾ ਸਨ੍ਨਾਹਂ ਮੋਚੇਥਾ’’ਤਿ ਆਹ. ਤੇ ਤਥਾ ਕਤ੍ਵਾ ਸਬ੍ਬੇਪਿ ਜੀਵਿਤਕ੍ਖਯਂ ਪਤ੍ਤਾ. ਬਨ੍ਧੁਲੋਪਿ ਮਲ੍ਲਿਕਂ ਸਾਵਤ੍ਥਿਂ ਆਨੇਸਿ. ਸਾ ਸੋਲ਼ਸਕ੍ਖਤ੍ਤੁਂ ਯਮਕੇ ਯਮਕੇ ਪੁਤ੍ਤੇ ਵਿਜਾਯਿ. ਸਬ੍ਬੇਪਿ ਸੂਰਾ ਥਾਮਸਮ੍ਪਨ੍ਨਾ ਅਹੇਸੁਂ, ਸਬ੍ਬਸਿਪ੍ਪਾਨਂ ਨਿਪ੍ਫਤ੍ਤਿਂ ਪਾਪੁਣਿਂਸੁ. ਏਕੇਕਸ੍ਸ ਪੁਰਿਸਸਹਸ੍ਸਂ ਪਰਿਵਾਰੋ ਅਹੋਸਿ. ਪਿਤਰਾ ਸਦ੍ਧਿਂ ਰਾਜਨਿਵੇਸਨਂ ਗਚ੍ਛਨ੍ਤੇਹਿ ਤੇਹੇਵ ਰਾਜਙ੍ਗਣਂ ਪਰਿਪੂਰਿ.

ਅਥੇਕਦਿਵਸਂ ਵਿਨਿਚ੍ਛਯੇ ਕੂਟਟ੍ਟਪਰਾਜਿਤਾ ਮਨੁਸ੍ਸਾ ਬਨ੍ਧੁਲਂ ਆਗਚ੍ਛਨ੍ਤਂ ਦਿਸ੍ਵਾ ਮਹਾਵਿਰਵਂ ਵਿਰਵਨ੍ਤਾ ਵਿਨਿਚ੍ਛਯਅਮਚ੍ਚਾਨਂ ਕੂਟਟ੍ਟਕਰਣਂ ਤਸ੍ਸ ਆਰੋਚੇਸੁਂ. ਸੋ ਵਿਨਿਚ੍ਛਯਂ ਗਨ੍ਤ੍ਵਾ ਤਂ ਅਟ੍ਟਂ ਵਿਚਾਰੇਤ੍ਵਾ ਸਾਮਿਕਮੇਵ ਸਾਮਿਕਂ ਅਕਾਸਿ. ਮਹਾਜਨੋ ਮਹਾਸਦ੍ਦੇਨ ਸਾਧੁਕਾਰਂ ਪਵਤ੍ਤੇਤਿ. ਰਾਜਾ ‘‘ਕਿਂ ਇਦ’’ਨ੍ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ਤੁਸ੍ਸਿਤ੍ਵਾ ਸਬ੍ਬੇਪਿ ਤੇ ਅਮਚ੍ਚੇ ਹਾਰੇਤ੍ਵਾ ਬਨ੍ਧੁਲਸ੍ਸੇਵ ਵਿਨਿਚ੍ਛਯਂ ਨਿਯ੍ਯਾਦੇਸਿ. ਸੋ ਤਤੋ ਪਟ੍ਠਾਯ ਸਮ੍ਮਾ ਵਿਨਿਚ੍ਛਯਿ. ਤਤੋ ਤੇ ਪੋਰਾਣਕਵਿਨਿਚ੍ਛਯਿਕਾ ਅਮਚ੍ਚਾ ਕਿਞ੍ਚਿ ਲਞ੍ਜਂ ਅਲਭਨ੍ਤਾ ਅਪ੍ਪਲਾਭਾ ਹੁਤ੍ਵਾ ‘‘ਬਨ੍ਧੁਲੋ ਰਜ੍ਜਂ ਪਤ੍ਥੇਤੀ’’ਤਿ ਰਾਜਕੁਲੇ ਪਰਿਭਿਨ੍ਦਿਂਸੁ. ਰਾਜਾ ਤੇਸਂ ਕਥਂ ਸਦ੍ਦਹਿਤ੍ਵਾ ਚਿਤ੍ਤਂ ਨਿਗ੍ਗਹੇਤੁਂ ਨਾਸਕ੍ਖਿ. ‘‘ਇਮਸ੍ਮਿਂ ਇਧੇਵ ਘਾਤਿਯਮਾਨੇ ਗਰਹਾ ਮੇ ਉਪ੍ਪਜ੍ਜਿਸ੍ਸਤੀ’’ਤਿ ਪੁਨ ਚਿਨ੍ਤੇਤ੍ਵਾ ਪਯੁਤ੍ਤਪੁਰਿਸੇਹਿ ਪਚ੍ਚਨ੍ਤਂ ਪਹਾਰਾਪੇਤ੍ਵਾ ਬਨ੍ਧੁਲਂ ਪਕ੍ਕੋਸਾਪੇਤ੍ਵਾ, ‘‘ਪਚ੍ਚਨ੍ਤੋ ਕਿਰ ਕੁਪਿਤੋ, ਤਵ ਪੁਤ੍ਤੇਹਿ ਸਦ੍ਧਿਂ ਗਨ੍ਤ੍ਵਾ, ਚੋਰੇ ਗਣ੍ਹਾਹੀ’’ਤਿ ਪਹਿਣਿਤ੍ਵਾ, ‘‘ਏਤ੍ਥੇਵਸ੍ਸ ਦ੍ਵਤ੍ਤਿਂਸਾਯ ਪੁਤ੍ਤੇਹਿ ਸਦ੍ਧਿਂ ਸੀਸਂ ਛਿਨ੍ਦਿਤ੍ਵਾ ਆਹਰਥਾ’’ਤਿ ਤੇਹਿ ਸਦ੍ਧਿਂ ਅਞ੍ਞੇਪਿ ਸਮਤ੍ਥੇ ਮਹਾਯੋਧੇ ਪੇਸੇਸਿ. ਤਸ੍ਮਿਂ ਪਚ੍ਚਨ੍ਤਂ ਗਚ੍ਛਨ੍ਤੇਯੇਵ ‘‘ਸੇਨਾਪਤਿ ਕਿਰ ਆਗਚ੍ਛਤੀ’’ਤਿ ਪਯੁਤ੍ਤਚੋਰਾ ਪਲਾਯਿਂਸੁ. ਸੋ ਤਂ ਪਦੇਸਂ ਆਵਾਸਾਪੇਤ੍ਵਾ ਸਣ੍ਠਾਪੇਤ੍ਵਾ ਨਿਵਤ੍ਤਿ.

ਅਥਸ੍ਸ ਨਗਰਤੋ ਅਵਿਦੂਰੇ ਠਾਨੇ ਤੇ ਯੋਧਾ ਪੁਤ੍ਤੇਹਿ ਸਦ੍ਧਿਂ ਸੀਸਂ ਛਿਨ੍ਦਿਂਸੁ. ਤਂ ਦਿਵਸਂ ਮਲ੍ਲਿਕਾਯ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਦ੍ਵੇ ਅਗ੍ਗਸਾਵਕਾ ਨਿਮਨ੍ਤਿਤਾ ਹੋਨ੍ਤਿ. ਅਥਸ੍ਸਾ ਪੁਬ੍ਬਣ੍ਹੇ ਏਵ ‘‘ਸਾਮਿਕਸ੍ਸ ਤੇ ਸਦ੍ਧਿਂ ਪੁਤ੍ਤੇਹਿ ਸੀਸਂ ਛਿਨ੍ਨ’’ਨ੍ਤਿ ਪਣ੍ਣਂ ਆਹਰਿਤ੍ਵਾ ਅਦਂਸੁ. ਸਾ ਤਂ ਪਵਤ੍ਤਿਂ ਞਤ੍ਵਾ ਕਸ੍ਸਚਿ ਕਿਞ੍ਚਿ ਅਵਤ੍ਵਾ ਪਣ੍ਣਂ ਉਚ੍ਛਙ੍ਗੇ ਠਪੇਤ੍ਵਾ ਭਿਕ੍ਖੁਸਙ੍ਘਮੇਵ ਪਰਿਵਿਸਿ. ਅਥਸ੍ਸਾ ਪਰਿਚਾਰਿਕਾਯੋ ਭਿਕ੍ਖੂਨਂ ਭਤ੍ਤਂ ਦਤ੍ਵਾ ਸਪ੍ਪਿਚਾਟਿਂ ਆਹਰਨ੍ਤਿਯੋ ਥੇਰਾਨਂ ਪੁਰਤੋ ਸਪ੍ਪਿਚਾਟਿਂ ਭਿਨ੍ਦਿਂਸੁ. ਧਮ੍ਮਸੇਨਾਪਤਿ ‘‘ਭੇਦਨਧਮ੍ਮਂ ਭਿਨ੍ਨਂ, ਨ ਚਿਨ੍ਤਿਤਬ੍ਬ’’ਨ੍ਤਿ ਆਹ. ਸਾ ਉਚ੍ਛਙ੍ਗਤੋ ਪਣ੍ਣਂ ਨੀਹਰਿਤ੍ਵਾ ‘‘ਦ੍ਵਤ੍ਤਿਂਸਾਯ ਪੁਤ੍ਤੇਹਿ ਸਦ੍ਧਿਂ ਪਿਤੁਸੀਸਂ ਛਿਨ੍ਨਨ੍ਤਿ ਮੇ ਇਮਂ ਪਣ੍ਣਂ ਆਹਰਿਂਸੁ, ਅਹਂ ਇਦਂ ਸੁਤ੍ਵਾਪਿ ਨ ਚਿਨ੍ਤੇਮਿ, ਸਪ੍ਪਿਚਾਟਿਯਾ ਭਿਨ੍ਨਾਯ ਕਿਂ ਚਿਨ੍ਤਯਿਸ੍ਸਾਮਿ, ਭਨ੍ਤੇ’’ਤਿ ਆਹ. ਧਮ੍ਮਸੇਨਾਪਤਿ ‘‘ਅਨਿਮਿਤ੍ਤਮਨਞ੍ਞਾਤਂ, ਮਚ੍ਚਾਨਂ ਇਧ ਜੀਵਿਤ’’ਨ੍ਤਿਆਦੀਨਿ (ਸੁ. ਨਿ. ੫੭੯) ਵਤ੍ਵਾ ਧਮ੍ਮਂ ਦੇਸੇਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਅਗਮਾਸਿ. ਸਾਪਿ ਦ੍ਵਤ੍ਤਿਂਸ ਸੁਣਿਸਾਯੋ ਪਕ੍ਕੋਸਾਪੇਤ੍ਵਾ, ‘‘ਤੁਮ੍ਹਾਕਂ ਸਾਮਿਕਾ ਨਿਰਪਰਾਧਾ ਅਤ੍ਤਨੋ ਪੁਰਿਮਕਮ੍ਮਫਲਂ ਲਭਿਂਸੁ, ਤੁਮ੍ਹੇ ਮਾ ਸੋਚਯਿਤ੍ਥ, ਮਾ ਪਰਿਦੇਵਿਤ੍ਥ, ਰਞ੍ਞੋ ਉਪਰਿ ਮਨੋਪਦੋਸਂ ਮਾ ਕਰਿਤ੍ਥਾ’’ਤਿ ਓਵਦਿ.

ਰਞ੍ਞੋ ਚਰਪੁਰਿਸਾ ਤਂ ਕਥਂ ਸੁਤ੍ਵਾ ਗਨ੍ਤ੍ਵਾ ਤੇਸਂ ਨਿਦ੍ਦੋਸਭਾਵਂ ਰਞ੍ਞੋ ਕਥਯਿਂਸੁ. ਰਾਜਾ ਸਂਵੇਗਪ੍ਪਤ੍ਤੋ ਤਸ੍ਸਾ ਨਿਵੇਸਨਂ ਗਨ੍ਤ੍ਵਾ ਮਲ੍ਲਿਕਞ੍ਚ ਸੁਣਿਸਾਯੋ ਚਸ੍ਸਾ ਖਮਾਪੇਤ੍ਵਾ ਮਲ੍ਲਿਕਾਯ ਵਰਂ ਅਦਾਸਿ. ਸਾ ‘‘ਵਰੋ ਗਹਿਤੋ ਮੇ ਹੋਤੂ’’ਤਿ ਵਤ੍ਵਾ ਤਸ੍ਮਿਂ ਗਤੇ ਮਤਕਭਤ੍ਤਂ ਦਤ੍ਵਾ ਨ੍ਹਤ੍ਵਾ ਰਾਜਾਨਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ, ‘‘ਦੇਵ, ਤੁਮ੍ਹੇਹਿ ਮਯ੍ਹਂ ਵਰੋ ਦਿਨ੍ਨੋ, ਮਯ੍ਹਞ੍ਚ ਅਞ੍ਞੇਨ ਅਤ੍ਥੋ ਨਤ੍ਥਿ, ਦ੍ਵਤ੍ਤਿਂਸਾਯ ਮੇ ਸੁਣਿਸਾਨਂ ਮਮਞ੍ਚ ਕੁਲਘਰਗਮਨਂ ਅਨੁਜਾਨਾਥਾ’’ਤਿ ਆਹ. ਰਾਜਾ ਸਮ੍ਪਟਿਚ੍ਛਿ. ਸਾ ਦ੍ਵਤ੍ਤਿਂਸ ਸੁਣਿਸਾਯੋ ਯਥਾਸਕਾਨਿ ਕੁਲਾਨਿ ਪੇਸੇਸਿ, ਸਯਮ੍ਪਿ ਕੁਸਿਨਾਰਾਨਗਰੇ ਅਤ੍ਤਨੋ ਕੁਲਘਰਂ ਅਗਮਾਸਿ.

ਰਾਜਾਪਿ ਬਨ੍ਧੁਲਸੇਨਾਪਤਿਨੋ ਭਾਗਿਨੇਯ੍ਯਸ੍ਸ ਦੀਘਕਾਰਾਯਨਸ੍ਸ ਨਾਮ ਸੇਨਾਪਤਿਟ੍ਠਾਨਂ ਅਦਾਸਿ. ਸੋ ਪਨ ‘‘ਮਾਤੁਲੋ ਮੇ ਇਮਿਨਾ ਮਾਰਿਤੋ’’ਤਿ ਰਞ੍ਞੋ ਓਤਾਰਂ ਗਵੇਸਨ੍ਤੋ ਵਿਚਰਤਿ. ਰਾਜਾਪਿ ਨਿਰਪਰਾਧਸ੍ਸ ਬਨ੍ਧੁਲਸ੍ਸ ਮਾਰਿਤਕਾਲਤੋ ਪਟ੍ਠਾਯ ਵਿਪ੍ਪਟਿਸਾਰੀ ਹੁਤ੍ਵਾ ਚਿਤ੍ਤਸ੍ਸਾਦਂ ਨ ਲਭਤਿ, ਰਜ੍ਜਸੁਖਂ ਨਾਨੁਭੋਤਿ. ਤਦਾ ਸਤ੍ਥਾ ਸਕ੍ਯਾਨਂ ਮੇਦਾਲ਼ੁਪਂ ਨਾਮ ਨਿਗਮਂ ਉਪਨਿਸ੍ਸਾਯ ਵਿਹਰਤਿ. ਰਾਜਾ ਤਤ੍ਥ ਗਨ੍ਤ੍ਵਾ ਆਰਾਮਤੋ ਅਵਿਦੂਰੇ ਖਨ੍ਧਾਵਾਰਂ ਨਿਵਾਸੇਤ੍ਵਾ, ‘‘ਮਨ੍ਦੇਨ ਪਰਿਵਾਰੇਨ ਸਤ੍ਥਾਰਂ ਵਨ੍ਦਿਸ੍ਸਾਮੀ’’ਤਿ ਵਿਹਾਰਂ ਗਨ੍ਤ੍ਵਾ ਪਞ੍ਚਰਾਜਾਕਕੁਧਭਣ੍ਡਾਨਿ ਦੀਘਕਾਰਾਯਨਸ੍ਸ ਦਤ੍ਵਾ ਏਕਕੋਵ ਗਨ੍ਧਕੁਟਿਂ ਪਾਵਿਸਿ. ਸਬ੍ਬਂ ਧਮ੍ਮਚੇਤਿਯਸੁਤ੍ਤਨਿਯਾਮੇਨ (ਮ. ਨਿ. ੨.੩੬੪ ਆਦਯੋ) ਦੀਪੇਤਬ੍ਬਂ. ਤਸ੍ਮਿਂ ਗਨ੍ਧਕੁਟਿਂ ਪਵਿਟ੍ਠੇ ਦੀਘਕਾਰਾਯਨੋ ਤਾਨਿ ਪਞ੍ਚ ਰਾਜਕਕੁਧਭਣ੍ਡਾਨਿ ਗਹੇਤ੍ਵਾ ਵਿਟਟੂਭਂ ਰਾਜਾਨਂ ਕਤ੍ਵਾ ਰਞ੍ਞੋ ਏਕਂ ਅਸ੍ਸਂ ਏਕਞ੍ਚ ਉਪਟ੍ਠਾਨਕਾਰਿਕਂ ਮਾਤੁਗਾਮਂ ਠਪੇਤ੍ਵਾ ਨਿਵਤ੍ਤੇਤ੍ਵਾ ਸਾਵਤ੍ਥਿਂ ਅਗਮਾਸਿ.

ਰਾਜਾ ਸਤ੍ਥਾਰਾ ਸਦ੍ਧਿਂ ਪਿਯਕਥਂ ਕਥੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਕ੍ਖਨ੍ਤੋ ਸੇਨਂ ਅਦਿਸ੍ਵਾ ਤਂ ਮਾਤੁਗਾਮਂ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ, ‘‘ਅਹਂ ਭਾਗਿਨੇਯ੍ਯਂ ਆਦਾਯ ਗਨ੍ਤ੍ਵਾ, ਵਿਟਟੂਭਂ ਗਹੇਸ੍ਸਾਮੀ’’ਤਿ ਰਾਜਗਹਨਗਰਂ ਗਚ੍ਛਨ੍ਤੋ ਵਿਕਾਲੇ ਦ੍ਵਾਰੇਸੁ ਪਿਦਹਿਤੇਸੁ ਨਗਰਂ ਪਤ੍ਵਾ ਏਕਿਸ੍ਸਾ ਸਾਲਾਯ ਨਿਪਜ੍ਜਿਤ੍ਵਾ ਵਾਤਾਤਪੇਹਿ ਕਿਲਨ੍ਤੋ ਰਤ੍ਤਿਭਾਗੇ ਤਤ੍ਥੇਵ ਕਾਲਮਕਾਸਿ. ਵਿਭਾਤਾਯ ਰਤ੍ਤਿਯਾ, ‘‘ਦੇਵ, ਕੋਸਲਨਰਿਨ੍ਦ ਅਨਾਥੋ ਜਾਤੋਸੀ’’ਤਿ ਵਿਪ੍ਪਲਪਨ੍ਤਿਯਾ ਤਸ੍ਸਾ ਇਤ੍ਥਿਯਾ ਸਦ੍ਦਂ ਸੁਤ੍ਵਾ ਰਞ੍ਞੋ ਆਰੋਚੇਸੁਂ. ਸੋ ਮਾਤੁਲਸ੍ਸ ਮਹਨ੍ਤੇਨ ਸਕ੍ਕਾਰੇਨ ਸਰੀਰਕਿਚ੍ਚਂ ਕਾਰੇਸਿ.

ਵਿਟਟੂਭੋਪਿ ਰਜ੍ਜਂ ਲਭਿਤ੍ਵਾ ਤਂ ਵੇਰਂ ਸਰਿਤ੍ਵਾ ‘‘ਸਬ੍ਬੇਪਿ ਸਾਕਿਯੇ ਮਾਰੇਸ੍ਸਾਮੀ’’ਤਿ ਮਹਤਿਯਾ ਸੇਨਾਯ ਨਿਕ੍ਖਮਿ. ਤਂ ਦਿਵਸਂ ਸਤ੍ਥਾ ਪਚ੍ਚੂਸਕਾਲੇ ਲੋਕਂ ਵੋਲੋਕੇਨ੍ਤੋ ਞਾਤਿਸਙ੍ਘਸ੍ਸ ਵਿਨਾਸਂ ਦਿਸ੍ਵਾ, ‘‘ਞਾਤਿਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਬ੍ਬਣ੍ਹਸਮਯੇ ਪਿਣ੍ਡਾਯ ਚਰਿਤ੍ਵਾ, ਪਿਣ੍ਡਪਾਤਪਟਿਕ੍ਕਨ੍ਤੋ ਗਨ੍ਧਕੁਟਿਯਂ ਸੀਹਸੇਯ੍ਯਂ ਕਪ੍ਪੇਤ੍ਵਾ, ਸਾਯਨ੍ਹਸਮਯੇ ਆਕਾਸੇਨ ਗਨ੍ਤ੍ਵਾ, ਕਪਿਲਵਤ੍ਥੁਸਾਮਨ੍ਤੇ ਏਕਸ੍ਮਿਂ ਕਬਰਚ੍ਛਾਯੇ ਰੁਕ੍ਖਮੂਲੇ ਨਿਸੀਦਿ. ਤਤੋ ਵਿਟਟੂਭਸ੍ਸ ਰਜ੍ਜਸੀਮਾਯ ਮਹਨ੍ਤੋ ਸਨ੍ਦਚ੍ਛਾਯੋ ਨਿਗ੍ਰੋਧੋ ਅਤ੍ਥਿ. ਵਿਟਟੂਭੋ ਸਤ੍ਥਾਰਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਕਿਂ ਕਾਰਣਾ ਏਵਰੂਪਾਯ ਉਣ੍ਹਵੇਲਾਯ ਇਮਸ੍ਮਿਂ ਕਬਰਚ੍ਛਾਯੇ ਰੁਕ੍ਖਮੂਲੇ ਨਿਸੀਦਥ, ਏਤਸ੍ਮਿਂ ਸਨ੍ਦਚ੍ਛਾਯੇ ਨਿਗ੍ਰੋਧਮੂਲੇ ਨਿਸੀਦਥ, ਭਨ੍ਤੇ’’ਤਿ ਵਤ੍ਵਾ, ‘‘ਹੋਤੁ, ਮਹਾਰਾਜ, ਞਾਤਕਾਨਂ ਛਾਯਾ ਨਾਮ ਸੀਤਲਾ’’ਤਿ ਵੁਤ੍ਤੇ, ‘‘ਞਾਤਕਾਨੁਰਕ੍ਖਨਤ੍ਥਾਯ ਸਤ੍ਥਾ ਆਗਤੋ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਨਿਵਤ੍ਤਿਤ੍ਵਾ ਸਾਵਤ੍ਥਿਂਯੇਵ ਪਚ੍ਚਾਗਮਿ. ਸਤ੍ਥਾਪਿ ਉਪ੍ਪਤਿਤ੍ਵਾ ਜੇਤਵਨਮੇਵ ਗਤੋ.

ਰਾਜਾ ਸਾਕਿਯਾਨਂ ਦੋਸਂ ਸਰਿਤ੍ਵਾ ਦੁਤਿਯਮ੍ਪਿ ਨਿਕ੍ਖਮਿਤ੍ਵਾ ਤਥੇਵ ਸਤ੍ਥਾਰਂ ਪਸ੍ਸਿਤ੍ਵਾ ਪੁਨ ਨਿਵਤ੍ਤਿ. ਤਤਿਯਵਾਰੇਪਿ ਨਿਕ੍ਖਮਿਤ੍ਵਾ ਤਥੇਵ ਸਤ੍ਥਾਰਂ ਪਸ੍ਸਿਤ੍ਵਾ ਪੁਨ ਨਿਵਤ੍ਤਿ. ਚਤੁਤ੍ਥਵਾਰੇ ਪਨ ਤਸ੍ਮਿਂ ਨਿਕ੍ਖਨ੍ਤੇ ਸਤ੍ਥਾ ਸਾਕਿਯਾਨਂ ਪੁਬ੍ਬਕਮ੍ਮਂ ਓਲੋਕੇਤ੍ਵਾ ਤੇਸਂ ਏਕਦਿਵਸਂ ਨਦਿਯਂ ਵਿਸਪਕ੍ਖਿਪਨਪਾਪਕਮ੍ਮਸ੍ਸ ਅਪ੍ਪਟਿਬਾਹਿਯਭਾਵਂ ਞਤ੍ਵਾ ਚਤੁਤ੍ਥਵਾਰੇ ਨਾਗਮਾਸਿ. ਵਿਟਟੂਭੋ ‘‘ਸਾਕਿਯੇ ਘਾਤੇਸ੍ਸਾਮੀ’’ਤਿ ਮਹਨ੍ਤੇਨ ਬਲਕਾਯੇਨ ਨਿਕ੍ਖਮਿ. ਸਮ੍ਮਾਸਮ੍ਬੁਦ੍ਧਸ੍ਸ ਪਨ ਞਾਤਕਾ ਅਸਤ੍ਤਘਾਤਕਾ ਨਾਮ, ਅਤ੍ਤਨਾ ਮਰਨ੍ਤਾਪਿ ਪਰੇਸਂ ਜੀਵਿਤਂ ਨ ਵੋਰੋਪੇਨ੍ਤਿ. ਤੇ ਚਿਨ੍ਤਯਿਂਸੁ – ‘‘ਮਯਂ ਸੁਸਿਕ੍ਖਿਤਾ ਕਤਹਤ੍ਥਾ ਕਤੂਪਾਸਨਾ ਮਹਿਸ੍ਸਾਸਾ, ਨ ਖੋ ਪਨ ਸਕ੍ਕਾ ਅਮ੍ਹੇਹਿ ਪਰਂ ਜੀਵਿਤਾ ਵੋਰੋਪੇਤੁਂ, ਅਤ੍ਤਨੋ ਕਮ੍ਮਂ ਦਸ੍ਸੇਤ੍ਵਾ ਪਲਾਪੇਸ੍ਸਾਮਾ’’ਤਿ ਤੇ ਕਤਸਨ੍ਨਾਹਾ ਨਿਕ੍ਖਮਿਤ੍ਵਾ ਯੁਦ੍ਧਂ ਆਰਭਿਂਸੁ. ਤੇਹਿ ਖਿਤ੍ਤਾ ਸਰਾ ਵਿਟਟੂਭਸ੍ਸ ਪੁਰਿਸਾਨਂ ਅਨ੍ਤਰਨ੍ਤਰੇਨ ਗਚ੍ਛਨ੍ਤਿ, ਫਲਕਨ੍ਤਰਕਣ੍ਣਛਿਦ੍ਦਨ੍ਤਰਾਦੀਹਿ ਨਿਕ੍ਖਮਨ੍ਤਿ. ਵਿਟਟੂਭੋ ਦਿਸ੍ਵਾ ਨਨੁ ਭਣੇ ‘‘ਸਾਕਿਯਾ ਅਸਤ੍ਤਘਾਤਕਾਮ੍ਹਾ’’ਤਿ ਵਦਨ੍ਤਿ, ਅਥ ਚ ਪਨ ਮੇ ਪੁਰਿਸੇ ਨਾਸੇਨ੍ਤੀਤਿ.

ਅਥ ਨਂ ਏਕੋ ਪੁਰਿਸੋ ਆਹ – ‘‘ਕਿਂ ਸਾਮਿ, ਨਿਵਤ੍ਤਿਤ੍ਵਾ ਓਲੋਕੇਸੀ’’ਤਿ? ‘‘ਸਾਕਿਯਾ ਮੇ ਪੁਰਿਸੇ ਨਾਸੇਨ੍ਤੀ’’ਤਿ. ‘‘ਤੁਮ੍ਹਾਕਂ ਕੋਚਿ ਪੁਰਿਸੋ ਮਤੋ ਨਾਮ ਨਤ੍ਥਿ. ਇਙ੍ਘ ਤੇ ਗਣਾਪੇਥਾ’’ਤਿ. ਗਣਾਪੇਨ੍ਤੋ ਏਕਸ੍ਸਪਿ ਖਯਂ ਨ ਪਸ੍ਸਿ. ਸੋ ਤਤੋ ਨਿਵਤ੍ਤਿਤ੍ਵਾ ‘‘ਯੇ ਯੇ ਪਨ ਭਣੇ ‘ਸਾਕਿਯਮ੍ਹਾ’ਤਿ ਭਣਨ੍ਤਿ, ਸਬ੍ਬੇ ਮਾਰੇਥ, ਮਾਤਾਮਹਸ੍ਸ ਪਨ ਮਹਾਨਾਮਸਕ੍ਕਸ੍ਸ ਸਨ੍ਤਿਕੇ ਠਿਤਾਨਂ ਜੀਵਿਤਂ ਦੇਥਾ’’ਤਿ ਆਹ. ਸਾਕਿਯਾ ਗਹੇਤਬ੍ਬਗਹਣਂ ਅਪਸ੍ਸਨ੍ਤਾ ਏਕਚ੍ਚੇ ਤਿਣਂ ਡਂਸਿਤ੍ਵਾ, ਏਕਚ੍ਚੇ ਨਲ਼ਂ ਗਹੇਤ੍ਵਾ ਅਟ੍ਠਂਸੁ. ‘‘ਤੁਮ੍ਹੇ ਸਾਕਿਯਾ, ਨੋ’’ਤਿ ਪੁਚ੍ਛਿਤਾ ਯਸ੍ਮਾ ਤੇ ਮਰਨ੍ਤਾਪਿ ਮੁਸਾਵਾਦਂ ਨ ਭਣਨ੍ਤਿ, ਤਸ੍ਮਾ ਤਿਣਂ ਡਂਸਿਤ੍ਵਾ ਠਿਤਾ ‘‘ਨੋ ਸਾਕੋ, ਤਿਣ’’ਨ੍ਤਿ ਵਦਨ੍ਤਿ. ਨਲ਼ਂ ਗਹੇਤ੍ਵਾ ਠਿਤਾ ‘‘ਨੋ ਸਾਕੋ, ਨਲ਼ੋ’’ਤਿ ਵਦਨ੍ਤਿ. ਯੇ ਚ ਮਹਾਨਾਮਸ੍ਸ ਸਨ੍ਤਿਕੇ ਠਿਤਾ, ਤੇ ਚ ਜੀਵਿਤਂ ਲਭਿਂਸੁ. ਤੇਸੁ ਤਿਣਂ ਡਂਸਿਤ੍ਵਾ ਠਿਤਾ ਤਿਣਸਾਕਿਯਾ ਨਾਮ, ਨਲ਼ਂ ਗਹੇਤ੍ਵਾ ਠਿਤਾ ਨਲ਼ਸਾਕਿਯਾ ਨਾਮ ਜਾਤਾਤਿ, ਵਿਟਟੂਭੋ ਅਵਸੇਸੇ ਖੀਰਪਕੇਪਿ ਦਾਰਕੇ ਅਵਿਸ੍ਸਜ੍ਜੇਤ੍ਵਾ ਘਾਤਾਪੇਨ੍ਤੋ ਲੋਹਿਤਨਦਿਂ ਪਵਤ੍ਤੇਤ੍ਵਾ ਤੇਸਂ ਗਲਲੋਹਿਤੇਨ ਫਲਕਂ ਧੋਵਾਪੇਸਿ. ਏਵਂ ਸਾਕਿਯਵਂਸੋ ਵਿਟਟੂਭੇਨ ਉਪਚ੍ਛਿਨ੍ਨੋ.

ਸੋ ਮਹਾਨਾਮਸਕ੍ਕਂ ਗਾਹਾਪੇਤ੍ਵਾ ਨਿਵਤ੍ਤੋ ‘‘ਪਾਤਰਾਸਵੇਲਾਯ ਪਾਤਰਾਸਂ ਕਰਿਸ੍ਸਾਮੀ’’ਤਿ ਏਕਸ੍ਮਿਂ ਠਾਨੇ ਓਤਰਿਤ੍ਵਾ ਭੋਜਨੇ ਉਪਨੀਤੇ ‘‘ਏਕਤੋਵ ਭੁਞ੍ਜਿਸ੍ਸਾਮਾ’’ਤਿ ਅਯ੍ਯਕਂ ਪਕ੍ਕੋਸਾਪੇਸਿ. ਖਤ੍ਤਿਯਾ ਪਨ ਜੀਵਿਤਂ ਚਜਨ੍ਤਾਪਿ ਦਾਸਿਪੁਤ੍ਤੇਹਿ ਸਦ੍ਧਿਂ ਨ ਭੁਞ੍ਜਨ੍ਤਿ. ਤਸ੍ਮਾ ਮਹਾਨਾਮੋ ਏਕਂ ਸਰਂ ਓਲੋਕੇਤ੍ਵਾ ‘‘ਕਿਲਿਟ੍ਠਗਤ੍ਤੋਮ੍ਹਿ, ਨ੍ਹਾਯਿਸ੍ਸਾਮਿ, ਤਾਤਾ’’ਤਿ ਆਹ. ‘‘ਸਾਧੁ, ਅਯ੍ਯਕ, ਨ੍ਹਾਯਥਾ’’ਤਿ. ਸੋ ‘‘ਅਯਂ ਮਂ ਏਕਤੋ ਅਭੁਞ੍ਜਨ੍ਤਂ ਘਾਤੇਸ੍ਸਤਿ, ਸਯਮੇਵ ਮੇ ਮਤਂ ਸੇਯ੍ਯੋ’’ਤਿ ਕੇਸੇ ਮੁਞ੍ਚਿਤ੍ਵਾ ਅਗ੍ਗੇ ਗਣ੍ਠਿਂ ਕਤ੍ਵਾ ਕੇਸੇਸੁ ਪਾਦਙ੍ਗੁਟ੍ਠਕੇ ਪਵੇਸੇਤ੍ਵਾ ਉਦਕੇ ਨਿਮੁਜ੍ਜਿ. ਤਸ੍ਸ ਗੁਣਤੇਜੇਨ ਨਾਗਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਨਾਗਰਾਜਾ ‘‘ਕਿਂ ਨੁ ਖੋ’’ਤਿ ਉਪਧਾਰੇਨ੍ਤੋ ਤਂ ਞਤ੍ਵਾ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਤਂ ਅਤ੍ਤਨੋ ਫਣੇ ਨਿਸੀਦਾਪੇਤ੍ਵਾ ਨਾਗਭਵਨਂ ਪਵੇਸੇਸਿ. ਸੋ ਦ੍ਵਾਦਸ੍ਸ ਵਸ੍ਸਾਨਿ ਤਤ੍ਥੇਵ ਵਸਿ. ਵਿਟਟੂਭੋਪਿ ‘‘ਮਯ੍ਹਂ ਅਯ੍ਯਕੋ ਇਦਾਨਿ ਆਗਮਿਸ੍ਸਤਿ, ਇਦਾਨਿ ਆਗਮਿਸ੍ਸਤੀ’’ਤਿ ਆਗਮਯਮਾਨੋਵ ਨਿਸੀਦਿ. ਤਸ੍ਮਿਂ ਅਤਿਚਿਰਾਯਨ੍ਤੇ ਸਰਂ ਵਿਚਿਨਾਪੇਤ੍ਵਾ ਦੀਪਾਲੋਕੇਨ ਪੁਰਿਸਬ੍ਭਨ੍ਤਰਾਨਿਪਿ ਓਲੋਕੇਤ੍ਵਾ ਅਦਿਸ੍ਵਾ ‘‘ਗਤੋ ਭਵਿਸ੍ਸਤੀ’’ਤਿ ਪਕ੍ਕਾਮਿ. ਸੋ ਰਤ੍ਤਿਭਾਗੇ ਅਚਿਰਵਤਿਂ ਪਤ੍ਵਾ ਖਨ੍ਧਾਵਾਰਂ ਨਿਵਾਸੇਸਿ. ਏਕਚ੍ਚੇ ਅਨ੍ਤੋਨਦਿਯਂ ਵਾਲੁਕਾਪੁਲਿਨੇ ਨਿਪਜ੍ਜਿਂਸੁ, ਏਕਚ੍ਚੇ ਬਹਿਥਲੇ, ਅਨ੍ਤੋਨਿਪਨ੍ਨੇਸੁਪਿ ਪੁਬ੍ਬੇ ਅਕਤਪਾਪਕਮ੍ਮਾ ਅਤ੍ਥਿ, ਬਹਿਨਿਪਨ੍ਨੇਸੁਪਿ ਪੁਬ੍ਬੇ ਕਤਪਾਪਕਮ੍ਮਾ ਅਤ੍ਥਿ, ਤੇਸਂ ਨਿਪਨ੍ਨਟ੍ਠਾਨੇਸੁ ਕਿਪਿਲ੍ਲਿਕਾ ਉਟ੍ਠਹਿਂਸੁ. ਤੇ ‘‘ਮਯ੍ਹਂ ਨਿਪਨ੍ਨਟ੍ਠਾਨੇ ਕਿਪਿਲ੍ਲਿਕਾ, ਮਯ੍ਹਂ ਨਿਪਨ੍ਨਟ੍ਠਾਨੇ ਕਿਪਿਲ੍ਲਿਕਾ’’ਤਿ ਉਟ੍ਠਹਿਤ੍ਵਾ ਅਕਤਪਾਪਕਮ੍ਮਾ ਉਤ੍ਤਰਿਤ੍ਵਾ ਥਲੇ ਨਿਪਜ੍ਜਿਂਸੁ, ਕਤਪਾਪਕਮ੍ਮਾ ਓਤਰਿਤ੍ਵਾ ਵਾਲੁਕਾਪੁਲਿਨੇ ਨਿਪਜ੍ਜਿਂਸੁ. ਤਸ੍ਮਿਂ ਖਣੇ ਮਹਾਮੇਘੋ ਉਟ੍ਠਹਿਤ੍ਵਾ ਘਨਵਸ੍ਸਂ ਵਸ੍ਸਿ. ਨਦਿਯਾ ਓਘੋ ਆਗਨ੍ਤ੍ਵਾ ਵਿਟਟੂਭਂ ਸਦ੍ਧਿਂ ਪਰਿਸਾਯ ਸਮੁਦ੍ਦਮੇਵ ਪਾਪੇਸਿ. ਸਬ੍ਬੇ ਤਤ੍ਥ ਮਚ੍ਛਕਚ੍ਛਪਭਕ੍ਖਾ ਅਹੇਸੁਂ.

ਮਹਾਜਨੋ ਕਥਂ ਸਮੁਟ੍ਠਾਪੇਸਿ ‘‘ਸਾਕਿਯਾਨਂ ਮਰਣਂ ਅਯੁਤ੍ਤਂ, ‘ਏਵਂ ਨਾਮ ਕੋਟ੍ਟੇਤ੍ਵਾ ਕੋਟ੍ਟੇਤ੍ਵਾ ਸਾਕਿਯਾ ਮਾਰੇਤਬ੍ਬਾ’ਤਿ ਅਨਨੁਚ੍ਛਵਿਕਮੇਤ’’ਨ੍ਤਿ. ਸਤ੍ਥਾ ਤਂ ਕਥਂ ਸੁਤ੍ਵਾ, ‘‘ਭਿਕ੍ਖਵੇ, ਇਮਸ੍ਮਿਂ ਅਤ੍ਤਭਾਵੇ ਕਿਞ੍ਚਾਪਿ ਸਾਕਿਯਾਨਂ ਏਵਂ ਮਰਣਂ ਅਯੁਤ੍ਤਂ, ਪੁਬ੍ਬੇ ਕਤਪਾਪਕਮ੍ਮਵਸੇਨ ਪਨ ਯੁਤ੍ਤਮੇਵੇਤੇਹਿ ਲਦ੍ਧ’’ਨ੍ਤਿ ਆਹ. ‘‘ਕਿਂ ਪਨ, ਭਨ੍ਤੇ, ਏਤੇ ਪੁਬ੍ਬੇ ਅਕਂਸੂ’’ਤਿ? ਸਬ੍ਬੇ ਏਕਤੋ ਹੁਤ੍ਵਾ ਨਦਿਯਂ ਵਿਸਂ ਪਕ੍ਖਿਪਿਂਸੂਤਿ. ਪੁਨੇਕਦਿਵਸਂ ਧਮ੍ਮਸਭਾਯਂ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ – ‘‘ਵਿਟਟੂਭੋ ਏਤ੍ਤਕੇ ਸਾਕਿਯੇ ਮਾਰੇਤ੍ਵਾ ਆਗਚ੍ਛਨ੍ਤੋ ਅਤ੍ਤਨੋ ਮਨੋਰਥੇ ਮਤ੍ਥਕਂ ਅਪ੍ਪਤ੍ਤੇਯੇਵ ਏਤ੍ਤਕਂ ਜਨਂ ਆਦਾਯ ਮਹਾਸਮੁਦ੍ਦੇ ਮਚ੍ਛਕਚ੍ਛਪਭਕ੍ਖੋ ਜਾਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ, ‘‘ਇਮੇਸਂ ਸਤ੍ਤਾਨਂ ਮਨੋਰਥੇ ਮਤ੍ਥਕਂ ਅਪ੍ਪਤ੍ਤੇਯੇਵ ਮਚ੍ਚੁਰਾਜਾ ਸੁਤ੍ਤਂ ਗਾਮਂ ਅਜ੍ਝੋਤ੍ਥਰਨ੍ਤੋ ਮਹੋਘੋ ਵਿਯ ਜੀਵਿਤਿਨ੍ਦ੍ਰਿਯਂ ਛਿਨ੍ਦਿਤ੍ਵਾ ਚਤੂਸੁ ਅਪਾਯਸਮੁਦ੍ਦੇਸੁ ਨਿਮੁਜ੍ਜਾਪੇਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੪੭. ‘‘ਪੁਪ੍ਫਾਨਿ ਹੇਵ ਪਚਿਨਨ੍ਤਂ, ਬ੍ਯਾਸਤ੍ਤਮਨਸਂ ਨਰਂ;

ਸੁਤ੍ਤਂ ਗਾਮਂ ਮਹੋਘੋਵ, ਮਚ੍ਚੁ ਆਦਾਯ ਗਚ੍ਛਤੀ’’ਤਿ.

ਤਤ੍ਥ ਬ੍ਯਾਸਤ੍ਤਮਨਸਂ ਨਰਨ੍ਤਿ ਸਮ੍ਪਤ੍ਤੇ ਵਾ ਅਸਮ੍ਪਤ੍ਤੇ ਵਾ ਲਗ੍ਗਮਾਨਸਂ. ਇਦਂ ਵੁਤ੍ਤਂ ਹੋਤਿ – ਯਥਾ ਮਾਲਾਕਾਰੋ ਪੁਪ੍ਫਾਰਾਮਂ ਪਵਿਸਿਤ੍ਵਾ ‘‘ਪੁਪ੍ਫਾਨਿ ਪਚਿਨਿਸ੍ਸਾਮੀ’’ਤਿ ਤਤੋ ਪੁਪ੍ਫਾਨਿ ਗਹੇਤ੍ਵਾ ਅਞ੍ਞਮਞ੍ਞਂ ਵਾ ਗਚ੍ਛਂ ਪਤ੍ਥੇਨ੍ਤੋ ਸਕਲੇ ਪੁਪ੍ਫਾਰਾਮੇ ਮਨਂ ਪੇਸੇਤਿ, ‘‘ਇਤੋ ਚਿਤੋ ਚ ਪੁਪ੍ਫਾਨਿ ਪਚਿਨਿਸ੍ਸਾਮੀ’’ਤਿ ਤਤੋ ਪੁਪ੍ਫਾਨਿ ਅਗ੍ਗਹੇਤ੍ਵਾ ਅਞ੍ਞਤ੍ਥ ਮਨਂ ਪੇਸੇਸਿ, ਤਮੇਵ ਗਚ੍ਛਂ ਪਚਿਨਨ੍ਤੋ ਪਮਾਦਮਾਪਜ੍ਜਤਿ, ਏਵਮੇਵ ਏਕਚ੍ਚੋ ਪੁਪ੍ਫਾਰਾਮਸਦਿਸਂ ਪਞ੍ਚਕਾਮਗੁਣਮਜ੍ਝਂ ਓਤਰਿਤ੍ਵਾ ਮਨੋਰਮਂ ਰੂਪਂ ਲਭਿਤ੍ਵਾ ਮਨੋਰਮਾਨਂ ਸਦ੍ਦਗਨ੍ਧਰਸਫੋਟ੍ਠਬ੍ਬਾਨਂ ਅਞ੍ਞਤਰਂ ਪਤ੍ਥੇਤਿ. ਅਞ੍ਞੋ ਤੇਸੁ ਵਾ ਅਞ੍ਞਤਰਂ ਲਭਿਤ੍ਵਾ ਅਞ੍ਞਤਰਂ ਪਤ੍ਥੇਤਿ, ਰੂਪਮੇਵ ਵਾ ਲਭਿਤ੍ਵਾ ਅਞ੍ਞਂ ਅਪਤ੍ਥੇਨ੍ਤੋ ਤਮੇਵ ਅਸ੍ਸਾਦੇਤਿ, ਸਦ੍ਦਾਦੀਸੁ ਵਾ ਅਞ੍ਞਤਰਂ. ਏਸੇਵ ਨਯੋ ਗੋਮਹਿਂਸਦਾਸਿਦਾਸਖੇਤ੍ਤਵਤ੍ਥੁਗਾਮਨਿਗਮਜਨਪਦਾਦੀਸੁ, ਪਬ੍ਬਜਿਤਾਨਮ੍ਪਿ ਪਰਿਵੇਣਵਿਹਾਰਪਤ੍ਤਚੀਵਰਾਦੀਸੂਤਿ ਏਵਂ ਪਞ੍ਚਕਾਮਗੁਣਸਙ੍ਖਾਤਾਨਿ ਪੁਪ੍ਫਾਨਿ ਏਵ ਪਚਿਨਨ੍ਤਂ ਸਮ੍ਪਤ੍ਤੇ ਵਾ ਅਸਮ੍ਪਤ੍ਤੇ ਵਾ ਕਾਮਗੁਣੇ ਬ੍ਯਾਸਤ੍ਤਮਨਸਂ ਨਰਂ. ਸੁਤ੍ਤਂ ਗਾਮਨ੍ਤਿ ਗਾਮਸ੍ਸ ਗੇਹਭਿਤ੍ਤਿਆਦੀਨਂ ਪਨ ਸੁਪਨਵਸੇਨ ਸੁਪਨਂ ਨਾਮ ਨਤ੍ਥਿ, ਸਤ੍ਤਾਨਂ ਪਨ ਸੁਤ੍ਤਪਮਤ੍ਤਤਂ ਉਪਾਦਾਯ ਸੁਤ੍ਤੋ ਨਾਮ ਹੋਤਿ. ਏਵਂ ਸੁਤ੍ਤਂ ਗਾਮਂ ਦ੍ਵੇ ਤੀਣਿ ਯੋਜਨਾਨਿ ਆਯਤਗਮ੍ਭੀਰੋ ਮਹੋਘੋਵ ਮਚ੍ਚੁ ਆਦਾਯ ਗਚ੍ਛਤਿ. ਯਥਾ ਸੋ ਮਹੋਘੋ ਇਤ੍ਥਿਪੁਰਿਸਗੋਮਹਿਂਸਕੁਕ੍ਕੁਟਾਦੀਸੁ ਕਿਞ੍ਚਿ ਅਨਵਸੇਸੇਤ੍ਵਾ ਸਬ੍ਬਂ ਤਂ ਗਾਮਂ ਸਮੁਦ੍ਦਂ ਪਾਪੇਤ੍ਵਾ ਮਚ੍ਛਕਚ੍ਛਪਭਕ੍ਖਂ ਕਰੋਤਿ, ਏਵਮੇਵ ਬ੍ਯਾਸਤ੍ਤਮਨਸਂ ਨਰਂ ਮਚ੍ਚੁ ਆਦਾਯ ਜੀਵਿਤਿਨ੍ਦ੍ਰਿਯਮਸ੍ਸ ਛਿਨ੍ਦਿਤ੍ਵਾ ਚਤੂਸੁ ਅਪਾਯਸਮੁਦ੍ਦੇਸੁ ਨਿਮੁਜ੍ਜਾਪੇਤੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਤ੍ਤਾ. ਮਹਾਜਨਸ੍ਸ ਸਾਤ੍ਥਿਕਾ ਦੇਸਨਾ ਜਾਤਾਤਿ.

ਵਿਟਟੂਭਵਤ੍ਥੁ ਤਤਿਯਂ.