੨. ਮਰੀਚਿਕਮ੍ਮਟ੍ਠਾਨਿਕਤ੍ਥੇਰਵਤ੍ਥੁ

ਫੇਣੂਪਮਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਸਾਵਤ੍ਥਿਯਂ ਵਿਹਰਨ੍ਤੋ ਅਞ੍ਞਤਰਂ ਮਰੀਚਿਕਮ੍ਮਟ੍ਠਾਨਿਕਂ ਭਿਕ੍ਖੁਂ ਆਰਬ੍ਭ ਕਥੇਸਿ.

ਸੋ ਕਿਰ ਭਿਕ੍ਖੁ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ, ‘‘ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ ਅਰਞ੍ਞਂ ਪਵਿਸਿਤ੍ਵਾ ਘਟੇਤ੍ਵਾ ਵਾਯਮਿਤ੍ਵਾ ਅਰਹਤ੍ਤਂ ਪਤ੍ਤੁਂ ਅਸਕ੍ਕੋਨ੍ਤੋ ‘‘ਵਿਸੇਸੇਤ੍ਵਾ ਕਮ੍ਮਟ੍ਠਾਨਂ ਕਥਾਪੇਸ੍ਸਾਮੀ’’ਤਿ ਸਤ੍ਥੁ ਸਨ੍ਤਿਕਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਮਰੀਚਿਂ ਦਿਸ੍ਵਾ, ‘‘ਯਥਾ ਅਯਂ ਗਿਮ੍ਹਸਮਯੇ ਉਟ੍ਠਿਤਾ ਮਰੀਚਿ ਦੂਰੇ ਠਿਤਾਨਂ ਰੂਪਗਤਾ ਵਿਯ ਪਞ੍ਞਾਯਤਿ, ਸਨ੍ਤਿਕਂ ਆਗਚ੍ਛਨ੍ਤਾਨਂ ਨੇਵ ਪਞ੍ਞਾਯਤਿ, ਅਯਂ ਅਤ੍ਤਭਾਵੋਪਿ ਉਪ੍ਪਾਦਵਯਟ੍ਠੇਨ ਏਵਰੂਪੋ’’ਤਿ ਮਰੀਚਿਕਮ੍ਮਟ੍ਠਾਨਂ ਭਾਵੇਨ੍ਤੋ ਆਗਨ੍ਤ੍ਵਾ ਮਗ੍ਗਕਿਲਨ੍ਤੋ ਅਚਿਰਵਤਿਯਂ ਨ੍ਹਾਯਿਤ੍ਵਾ ਏਕਸ੍ਮਿਂ ਚਣ੍ਡਸੋਤਤੀਰੇ ਰੁਕ੍ਖਛਾਯਾਯ ਨਿਸਿਨ੍ਨੋ ਉਦਕਵੇਗਾਭਿਘਾਤੇਨ ਉਟ੍ਠਹਿਤ੍ਵਾ ਮਹਨ੍ਤੇ ਮਹਨ੍ਤੇ ਫੇਣਪਿਣ੍ਡੇ ਭਿਜ੍ਜਮਾਨੇ ਦਿਸ੍ਵਾ, ‘‘ਅਯਂ ਅਤ੍ਤਭਾਵੋਪਿ ਉਪ੍ਪਜ੍ਜਿਤ੍ਵਾ ਭਿਜ੍ਜਨਟ੍ਠੇਨ ਏਵਰੂਪੋਯੇਵਾ’’ਤਿ ਆਰਮ੍ਮਣਂ ਅਗ੍ਗਹੇਸਿ. ਸਤ੍ਥਾ ਗਨ੍ਧਕੁਟਿਯਂ ਠਿਤੋਵ ਤਂ ਥੇਰਂ ਦਿਸ੍ਵਾ, ‘‘ਏਵਮੇਵ, ਭਿਕ੍ਖੁ, ਏਵਰੂਪੋਵਾਯਂ ਅਤ੍ਤਭਾਵੋ ਫੇਣਪਿਣ੍ਡੋ ਵਿਯ ਮਰੀਚਿ ਵਿਯ ਉਪ੍ਪਜ੍ਜਨਭਿਜ੍ਜਨਸਭਾਵੋਯੇਵਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੪੬. ‘‘ਫੇਣੂਪਮਂ ਕਾਯਮਿਮਂ ਵਿਦਿਤ੍ਵਾ,

ਮਰੀਚਿਧਮ੍ਮਂ ਅਭਿਸਮ੍ਬੁਧਾਨੋ;

ਛੇਤ੍ਵਾਨ ਮਾਰਸ੍ਸ ਪਪੁਪ੍ਫਕਾਨਿ,

ਅਦਸ੍ਸਨਂ ਮਚ੍ਚੁਰਾਜਸ੍ਸ ਗਚ੍ਛੇ’’ਤਿ.

ਤਤ੍ਥ ਫੇਣੂਪਮਨ੍ਤਿ ਇਮਂ ਕੇਸਾਦਿਸਮੂਹਸਙ੍ਖਾਤਂ ਕਾਯਂ ਅਬਲਦੁਬ੍ਬਲਟ੍ਠੇਨ ਅਨਦ੍ਧਨਿਯਤਾਵਕਾਲਿਕਟ੍ਠੇਨ ਫੇਣਪਿਣ੍ਡਸਰਿਕ੍ਖਕੋਤਿ ਵਿਦਿਤ੍ਵਾ. ਮਰੀਚਿਧਮ੍ਮਨ੍ਤਿ ਯਥਾ ਮਰੀਚਿ ਦੂਰੇ ਠਿਤਾਨਂ ਰੂਪਗਤਾ ਵਿਯ ਗਯ੍ਹੂਪਗਾ ਵਿਯ ਹੋਤਿ, ਸਨ੍ਤਿਕੇ ਉਪਗਚ੍ਛਨ੍ਤਾਨਂ ਰਿਤ੍ਤਾ ਤੁਚ੍ਛਾ ਅਗਯ੍ਹੂਪਗਾ ਸਮ੍ਪਜ੍ਜਤਿ, ਏਵਮੇਵ ਖਣਿਕਇਤ੍ਤਰਪਚ੍ਚੁਪਟ੍ਠਾਨਟ੍ਠੇਨ ਅਯਂ ਕਾਯੋਪਿ ਮਰੀਚਿਧਮ੍ਮੋਤਿ ਅਭਿਸਮ੍ਬੁਧਾਨੋ ਬੁਜ੍ਝਨ੍ਤੋ, ਜਾਨਨ੍ਤੋਤਿ ਅਤ੍ਥੋ. ਮਾਰਸ੍ਸ ਪਪੁਪ੍ਫਕਾਨੀਤਿ ਮਾਰਸ੍ਸ ਪਪੁਪ੍ਫਕਸਙ੍ਖਾਤਾਨਿ ਤੇਭੂਮਕਾਨਿ ਵਟ੍ਟਾਨਿ ਅਰਿਯਮਗ੍ਗੇਨ ਛਿਨ੍ਦਿਤ੍ਵਾ ਖੀਣਾਸਵੋ ਭਿਕ੍ਖੁ ਮਚ੍ਚੁਰਾਜਸ੍ਸ ਅਦਸ੍ਸਨਂ ਅਵਿਸਯਂ ਅਮਤਮਹਾਨਿਬ੍ਬਾਨਂ ਗਚ੍ਛੇਯ੍ਯਾਤਿ.

ਗਾਥਾਪਰਿਯੋਸਾਨੇ ਥੇਰੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਸਤ੍ਥੁ ਸੁਵਣ੍ਣਵਣ੍ਣਂ ਸਰੀਰਂ ਥੋਮੇਨ੍ਤੋ ਵਣ੍ਣੇਨ੍ਤੋ ਵਨ੍ਦਨ੍ਤੋਵ ਆਗਤੋਤਿ.

ਮਰੀਚਿਕਮ੍ਮਟ੍ਠਾਨਿਕਤ੍ਥੇਰਵਤ੍ਥੁ ਦੁਤਿਯਂ.