੧. ਪਥਵਿਕਥਾਪਸੁਤਪਞ੍ਚਸਤਭਿਕ੍ਖੁਵਤ੍ਥੁ

ਕੋ ਇਮਂ ਪਥਵਿਂ ਵਿਚੇਸ੍ਸਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਸਾਵਤ੍ਥਿਯਂ ਵਿਹਰਨ੍ਤੋ ਪਥਵਿਕਥਾਪਸੁਤੇ ਪਞ੍ਚਸਤੇ ਭਿਕ੍ਖੂ ਆਰਬ੍ਭ ਕਥੇਸਿ.

ਤੇ ਕਿਰ ਭਗਵਤਾ ਸਦ੍ਧਿਂ ਜਨਪਦਚਾਰਿਕਂ ਚਰਿਤ੍ਵਾ ਜੇਤਵਨਂ ਆਗਨ੍ਤ੍ਵਾ ਸਾਯਨ੍ਹਸਮਯੇ ਉਪਟ੍ਠਾਨਸਾਲਾਯਂ ਸਨ੍ਨਿਸਿਨ੍ਨਾ ਅਤ੍ਤਨਾ ਗਤਗਤਟ੍ਠਾਨੇਸੁ ‘‘ਅਸੁਕਗਾਮਤੋ ਅਸੁਕਗਾਮਗਮਨਟ੍ਠਾਨੇ ਸਮਂ ਵਿਸਮਂ ਕਦ੍ਦਮਬਹੁਲਂ ਸਕ੍ਖਰਬਹੁਲਂ ਕਾਲ਼ਮਤ੍ਤਿਕਂ ਤਮ੍ਬਮਤ੍ਤਿਕ’’ਨ੍ਤਿ ਪਥਵਿਕਥਂ ਕਥੇਸੁਂ. ਸਤ੍ਥਾ ਆਗਨ੍ਤ੍ਵਾ, ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ, ‘‘ਭਨ੍ਤੇ, ਅਮ੍ਹੇਹਿ ਵਿਚਰਿਤਟ੍ਠਾਨੇ ਪਥਵਿਕਥਾਯਾ’’ਤਿ ਵੁਤ੍ਤੇ, ‘‘ਭਿਕ੍ਖਵੇ, ਏਸਾ ਬਾਹਿਰਪਥਵੀ ਨਾਮ, ਤੁਮ੍ਹੇਹਿ ਅਜ੍ਝੁਤ੍ਤਿਕਪਥਵਿਯਂ ਪਰਿਕਮ੍ਮਂ ਕਾਤੁਂ ਵਟ੍ਟਤੀ’’ਤਿ ਵਤ੍ਵਾ ਇਮਾ ਦ੍ਵੇ ਗਾਥਾ ਅਭਾਸਿ –

੪੪. ‘‘ਕੋ ਇਮਂ ਪਥਵਿਂ ਵਿਚੇਸ੍ਸਤਿ,

ਯਮਲੋਕਞ੍ਚ ਇਮਂ ਸਦੇਵਕਂ;

ਕੋ ਧਮ੍ਮਪਦਂ ਸੁਦੇਸਿਤਂ,

ਕੁਸਲੋ ਪੁਪ੍ਫਮਿਵ ਪਚੇਸ੍ਸਤਿ.

੪੫. ‘‘ਸੇਖੋ ਪਥਵਿਂ ਵਿਚੇਸ੍ਸਤਿ,

ਯਮਲੋਕਞ੍ਚ ਇਮਂ ਸਦੇਵਕਂ;

ਸੇਖੋ ਧਮ੍ਮਪਦਂ ਸੁਦੇਸਿਤਂ,

ਕੁਸਲੋ ਪੁਪ੍ਫਮਿਵ ਪਚੇਸ੍ਸਤੀ’’ਤਿ.

ਤਤ੍ਥ ਕੋ ਇਮਨ੍ਤਿ ਕੋ ਇਮਂ ਅਤ੍ਤਭਾਵਸਙ੍ਖਾਤਂ ਪਥਵਿਂ. ਵਿਚੇਸ੍ਸਤੀਤਿ ਅਤ੍ਤਨੋ ਞਾਣੇਨ ਵਿਚਿਨਿਸ੍ਸਤਿ ਵਿਜਾਨਿਸ੍ਸਤਿ, ਪਟਿਵਿਜ੍ਝਿਸ੍ਸਤਿ, ਸਚ੍ਛਿਕਰਿਸ੍ਸਤੀਤਿ ਅਤ੍ਥੋ. ਯਮਲੋਕਞ੍ਚਾਤਿ ਚਤੁਬ੍ਬਿਧਂ ਅਪਾਯਲੋਕਞ੍ਚ. ਇਮਂ ਸਦੇਵਕਨ੍ਤਿ ਇਮਂ ਮਨੁਸ੍ਸਲੋਕਞ੍ਚ ਦੇਵਲੋਕੇਨ ਸਦ੍ਧਿਂ ਕੋ ਵਿਚੇਸ੍ਸਤਿ ਵਿਚਿਨਿਸ੍ਸਤਿ ਵਿਜਾਨਿਸ੍ਸਤਿ ਪਟਿਵਿਜ੍ਝਿਸ੍ਸਤਿ ਸਚ੍ਛਿਕਰਿਸ੍ਸਤੀਤਿ ਪੁਚ੍ਛਿ. ਕੋਧਮ੍ਮਪਦਂ ਸੁਦੇਸਿਤਨ੍ਤਿ ਯਥਾਸਭਾਵਤੋ ਕਥਿਤਤ੍ਤਾ ਸੁਦੇਸਿਤਂ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮਸਙ੍ਖਾਤਂ ਧਮ੍ਮਪਦਂ ਕੁਸਲੋ ਮਾਲਾਕਾਰੋ ਪੁਪ੍ਫਂ ਵਿਚਿਨਨ੍ਤੋ ਵਿਯ ਕੋ ਪਚੇਸ੍ਸਤਿ ਵਿਚਿਨਿਸ੍ਸਤਿ ਵਿਜਾਨਿਸ੍ਸਤਿ ਉਪਪਰਿਕ੍ਖਿਸ੍ਸਤਿ ਪਟਿਵਿਜ੍ਝਿਸ੍ਸਤਿ, ਸਚ੍ਛਿਕਰਿਸ੍ਸਤੀਤਿ ਅਤ੍ਥੋ. ਸੇਖੋਤਿ ਅਧਿਸੀਲਸਿਕ੍ਖਾ, ਅਧਿਚਿਤ੍ਤਸਿਕ੍ਖਾ, ਅਧਿਪਞ੍ਞਾਸਿਕ੍ਖਾਤਿ ਇਮਾ ਤਿਸ੍ਸੋ ਸਿਕ੍ਖਾ ਸਿਕ੍ਖਨਤੋ ਸੋਤਾਪਤ੍ਤਿਮਗ੍ਗਟ੍ਠਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਮਗ੍ਗਟ੍ਠਾ ਸਤ੍ਤਵਿਧੋ ਸੇਖੋ ਇਮਂ ਅਤ੍ਤਭਾਵਸਙ੍ਖਾਤਂ ਪਥਵਿਂ ਅਰਹਤ੍ਤਮਗ੍ਗੇਨ ਤਤੋ ਛਨ੍ਦਰਾਗਂ ਅਪਕਡ੍ਢਨ੍ਤੋ ਵਿਚੇਸ੍ਸਤਿ ਵਿਚਿਨਿਸ੍ਸਤਿ ਵਿਜਾਨਿਸ੍ਸਤਿ ਪਟਿਵਿਜ੍ਝਿਸ੍ਸਤਿ ਸਚ੍ਛਿਕਰਿਸ੍ਸਤਿ. ਯਮਲੋਕਞ੍ਚਾਤਿ ਤਂ ਯਥਾਵੁਤ੍ਤਪਕਾਰਂ ਯਮਲੋਕਞ੍ਚ ਇਮਂ ਮਨੁਸ੍ਸਲੋਕਞ੍ਚ ਸਹ ਦੇਵੇਹਿ ਸਦੇਵਕਂ ਸ੍ਵੇਵ ਵਿਚੇਸ੍ਸਤਿ ਵਿਚਿਨਿਸ੍ਸਤਿ ਵਿਜਾਨਿਸ੍ਸਤਿ ਪਟਿਵਿਜ੍ਝਿਸ੍ਸਤਿ ਸਚ੍ਛਿਕਰਿਸ੍ਸਤਿ. ਸੇਖੋਤਿ ਸ੍ਵੇਵ ਸਤ੍ਤਵਿਧੋ ਸੇਖੋ, ਯਥਾ ਨਾਮ ਕੁਸਲੋ ਮਾਲਾਕਾਰੋ ਪੁਪ੍ਫਾਰਾਮਂ ਪਵਿਸਿਤ੍ਵਾ ਤਰੁਣਮਕੁਲ਼ਾਨਿ ਚ ਪਾਣਕਵਿਦ੍ਧਾਨਿ ਚ ਮਿਲਾਤਾਨਿ ਚ ਗਣ੍ਠਿਕਜਾਤਾਨਿ ਚ ਪੁਪ੍ਫਾਨਿ ਵਜ੍ਜੇਤ੍ਵਾ ਸੋਭਨਾਨਿ ਸੁਜਾਤਸੁਜਾਤਾਨੇਵ ਪੁਪ੍ਫਾਨਿ ਵਿਚਿਨਾਤਿ, ਏਵਮੇਵ ਇਮਂ ਸੁਕਥਿਤਂ ਸੁਨਿਦ੍ਦਿਟ੍ਠਂ ਬੋਧਿਪਕ੍ਖਿਯਧਮ੍ਮਪਦਮ੍ਪਿ ਪਞ੍ਞਾਯ ਪਚੇਸ੍ਸਤਿ ਵਿਚਿਨਿਸ੍ਸਤਿ ਉਪਪਰਿਕ੍ਖਿਸ੍ਸਤਿ ਪਟਿਵਿਜ੍ਝਿਸ੍ਸਤਿ ਸਚ੍ਛਿਕਰਿਸ੍ਸਤੀਤਿ ਸਤ੍ਥਾ ਸਯਮੇਵ ਪਞ੍ਹਂ ਵਿਸ੍ਸਜ੍ਜੇਸਿ.

ਦੇਸਨਾਵਸਾਨੇ ਪਞ੍ਚਸਤਾਪਿ ਭਿਕ੍ਖੂ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਂਸੁ. ਸਮ੍ਪਤ੍ਤਪਰਿਸਾਯਪਿ ਸਾਤ੍ਥਿਕਾ ਧਮ੍ਮਦੇਸਨਾ ਅਹੋਸੀਤਿ.

ਪਥਵਿਕਥਾਪਸੁਤਪਞ੍ਚਸਤਭਿਕ੍ਖੁਵਤ੍ਥੁ ਪਠਮਂ.