੯. ਨਿਗਮਵਾਸਿਤਿਸ੍ਸਤ੍ਥੇਰਵਤ੍ਥੁ

ਅਪ੍ਪਮਾਦਰਤੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਨਿਗਮਵਾਸਿਤਿਸ੍ਸਤ੍ਥੇਰਂ ਨਾਮ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਾਵਤ੍ਥਿਤੋ ਅਵਿਦੂਰੇ ਨਿਗਮਗਾਮੇ ਜਾਤਸਂਵਡ੍ਢੋ ਏਕੋ ਕੁਲਪੁਤ੍ਤੋ ਸਤ੍ਥੁ ਸਾਸਨੇ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ‘‘ਨਿਗਮਵਾਸਿਤਿਸ੍ਸਤ੍ਥੇਰੋ ਨਾਮ ਅਪ੍ਪਿਚ੍ਛੋ ਸਨ੍ਤੁਟ੍ਠੋ ਪਵਿਵਿਤ੍ਤੋ ਆਰਦ੍ਧਵੀਰਿਯੋ’’ਤਿ ਪਞ੍ਞਾਯਿ. ਸੋ ਨਿਬਦ੍ਧਂ ਞਾਤਿਗਾਮੇਯੇਵ ਪਿਣ੍ਡਾਯ ਵਿਚਰਤਿ. ਅਨਾਥਪਿਣ੍ਡਿਕਾਦੀਸੁ ਮਹਾਦਾਨਾਨਿ ਕਰੋਨ੍ਤੇਸੁ, ਪਸੇਨਦਿਕੋਸਲੇ ਅਸਦਿਸਦਾਨਂ ਕਰੋਨ੍ਤੇਪਿ ਸਾਵਤ੍ਥਿਂ ਨਾਗਚ੍ਛਤਿ. ਭਿਕ੍ਖੂ ‘‘ਅਯਂ ਨਿਗਮਵਾਸਿਤਿਸ੍ਸਤ੍ਥੇਰੋ ਉਟ੍ਠਾਯ ਸਮੁਟ੍ਠਾਯ ਞਾਤਿਸਂਸਟ੍ਠੋ ਵਿਹਰਤਿ, ਅਨਾਥਪਿਣ੍ਡਿਕਾਦੀਸੁ ਮਹਾਦਾਨਾਦੀਨਿ ਕਰੋਨ੍ਤੇਸੁ, ਪਸੇਨਦਿਕੋਸਲੇ ਅਸਦਿਸਦਾਨਂ ਕਰੋਨ੍ਤੇਪਿ ਨੇਵ ਆਗਚ੍ਛਤੀ’’ਤਿ ਕਥਂ ਸਮੁਟ੍ਠਾਪੇਤ੍ਵਾ ਸਤ੍ਥੁ ਆਰੋਚਯਿਂਸੁ. ਸਤ੍ਥਾ ਤਂ ਪਕ੍ਕੋਸਾਪੇਤ੍ਵਾ, ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਏਵਂ ਕਰੋਸੀ’’ਤਿ ਪੁਚ੍ਛਿਤ੍ਵਾ, ‘‘ਨਤ੍ਥਿ, ਭਨ੍ਤੇ, ਮਯ੍ਹਂ ਞਾਤਿਸਂਸਗ੍ਗੋ, ਅਹਂ ਏਤੇ ਮਨੁਸ੍ਸੇ ਨਿਸ੍ਸਾਯ ਅਜ੍ਝੋਹਰਣੀਯਮਤ੍ਤਂ ਆਹਾਰਂ ਲਭਾਮਿ ਲੂਖੇ ਵਾ ਪਣੀਤੇ ਵਾ. ਯਾਪਨਮਤ੍ਤੇ ਲਦ੍ਧੇ ਪੁਨ ਕਿਂ ਆਹਾਰਪਰਿਯੇਸਨੇਨਾਤਿ ਨ ਗਚ੍ਛਾਮਿ, ਞਾਤੀਹਿ ਪਨ ਮੇ ਸਂਸਗ੍ਗੋ ਨਾਮ ਨਤ੍ਥਿ, ਭਨ੍ਤੇ’’ਤਿ ਵੁਤ੍ਤੇ ਸਤ੍ਥਾ ਪਕਤਿਯਾਪਿ ਤਸ੍ਸ ਅਜ੍ਝਾਸਯਂ ਵਿਜਾਨਨ੍ਤੋ – ‘‘ਸਾਧੁ ਸਾਧੁ, ਭਿਕ੍ਖੂ’’ਤਿ ਤਸ੍ਸ ਸਾਧੁਕਾਰਂ ਦਤ੍ਵਾ, ‘‘ਅਨਚ੍ਛਰਿਯਂ ਖੋ ਪਨੇਤਂ ਭਿਕ੍ਖੁ, ਯਂ ਤ੍ਵਂ ਮਾਦਿਸਂ ਆਚਰਿਯਂ ਲਭਿਤ੍ਵਾ ਅਪ੍ਪਿਚ੍ਛੋ ਅਹੋਸਿ. ਅਯਞ੍ਹਿ ਅਪ੍ਪਿਚ੍ਛਤਾ ਨਾਮ ਮਮ ਤਨ੍ਤਿ, ਮਮ ਪਵੇਣੀ’’ਤਿ ਵਤ੍ਵਾ ਭਿਕ੍ਖੂਹਿ ਯਾਚਿਤੋ ਅਤੀਤਂ ਆਹਰਿ –

ਅਤੀਤੇ ਹਿਮਵਨ੍ਤੇ ਗਙ੍ਗਾਤੀਰੇ ਏਕਸ੍ਮਿਂ ਉਦੁਮ੍ਬਰਵਨੇ ਅਨੇਕਸਹਸ੍ਸਾ ਸੁਵਾ ਵਸਿਂਸੁ. ਤਤ੍ਰੇਕੋ ਸੁਵਰਾਜਾ ਅਤ੍ਤਨੋ ਨਿਵਾਸਰੁਕ੍ਖਸ੍ਸ ਫਲੇਸੁ ਖੀਣੇਸੁ ਯਂ ਯਦੇਵ ਅਵਸਿਟ੍ਠਂ ਹੋਤਿ ਅਙ੍ਕੁਰੋ ਵਾ ਪਤ੍ਤਂ ਵਾ ਤਚੋ ਵਾ, ਤਂ ਤਂ ਖਾਦਿਤ੍ਵਾ ਗਙ੍ਗਾਯਂ ਪਾਨੀਯਂ ਪਿਵਿਤ੍ਵਾ ਪਰਮਪ੍ਪਿਚ੍ਛੋ ਸਨ੍ਤੁਟ੍ਠੋ ਹੁਤ੍ਵਾ ਅਞ੍ਞਤ੍ਥ ਨ ਗਚ੍ਛਤਿ. ਤਸ੍ਸ ਅਪ੍ਪਿਚ੍ਛਸਨ੍ਤੁਟ੍ਠਭਾਵਗੁਣੇਨ ਸਕ੍ਕਸ੍ਸ ਭਵਨਂ ਕਮ੍ਪਿ. ਸਕ੍ਕੋ ਆਵਜ੍ਜਮਾਨੋ ਤਂ ਦਿਸ੍ਵਾ ਤਸ੍ਸ ਵੀਮਂਸਨਤ੍ਥਂ ਅਤ੍ਤਨੋ ਆਨੁਭਾਵੇਨ ਤਂ ਰੁਕ੍ਖਂ ਸੁਕ੍ਖਾਪੇਸਿ. ਰੁਕ੍ਖੋ ਓਭਗ੍ਗੋ ਖਾਣੁਮਤ੍ਤੋ ਛਿਦ੍ਦਾਵਛਿਦ੍ਦੋਵ ਹੁਤ੍ਵਾ ਵਾਤੇ ਪਹਰਨ੍ਤੇ ਆਕੋਟਿਤੋ ਵਿਯ ਸਦ੍ਦਂ ਨਿਚ੍ਛਾਰੇਨ੍ਤੋ ਅਟ੍ਠਾਸਿ. ਤਸ੍ਸ ਛਿਦ੍ਦੇਹਿ ਚੁਣ੍ਣਾਨਿ ਨਿਕ੍ਖਮਨ੍ਤਿ. ਸੁਵਰਾਜਾ ਤਾਨਿ ਖਾਦਿਤ੍ਵਾ ਗਙ੍ਗਾਯਂ ਪਾਨੀਯਂ ਪਿਵਿਤ੍ਵਾ ਅਞ੍ਞਤ੍ਥ ਅਗਨ੍ਤ੍ਵਾ ਵਾਤਾਤਪਂ ਅਗਣੇਤ੍ਵਾ ਉਦੁਮ੍ਬਰਖਾਣੁਮਤ੍ਥਕੇ ਨਿਸੀਦਤਿ. ਸਕ੍ਕੋ ਤਸ੍ਸ ਪਰਮਪ੍ਪਿਚ੍ਛਭਾਵਂ ਞਤ੍ਵਾ, ‘‘ਮਿਤ੍ਤਧਮ੍ਮਗੁਣਂ ਕਥਾਪੇਤ੍ਵਾ ਵਰਮਸ੍ਸ ਦਤ੍ਵਾ ਉਦੁਮ੍ਬਰਂ ਅਮਤਫਲਂ ਕਤ੍ਵਾ ਆਗਮਿਸ੍ਸਾਮੀ’’ਤਿ ਏਕੋ ਹਂਸਰਾਜਾ ਹੁਤ੍ਵਾ ਸੁਜਂ ਅਸੁਰਕਞ੍ਞਂ ਪੁਰਤੋ ਕਤ੍ਵਾ ਉਦੁਮ੍ਬਰਵਨਂ ਗਨ੍ਤ੍ਵਾ ਅਵਿਦੂਰੇ ਏਕਸ੍ਸ ਰੁਕ੍ਖਸ੍ਸ ਸਾਖਾਯ ਨਿਸੀਦਿਤ੍ਵਾ ਤੇਨ ਸਦ੍ਧਿਂ ਕਥੇਨ੍ਤੋ ਇਮਂ ਗਾਥਮਾਹ –

‘‘ਸਨ੍ਤਿ ਰੁਕ੍ਖਾ ਹਰਿਪਤ੍ਤਾ, ਦੁਮਾਨੇਕਫਲਾ ਬਹੂ;

ਕਸ੍ਮਾ ਨੁ ਸੁਕ੍ਖੇ ਕੋਲ਼ਾਪੇ, ਸੁਵਸ੍ਸ ਨਿਰਤੋ ਮਨੋ’’ਤਿ. (ਜਾ. ੧.੯.੩੦);

ਸਬ੍ਬਂ ਸੁਵਜਾਤਕਂ ਨਵਕਨਿਪਾਤੇ ਆਗਤਨਯੇਨੇਵ ਵਿਤ੍ਥਾਰੇਤਬ੍ਬਂ. ਅਟ੍ਠੁਪ੍ਪਤ੍ਤਿਯੇਵ ਹਿ ਤਤ੍ਥ ਚ ਇਧ ਚ ਨਾਨਾ, ਸੇਸਂ ਤਾਦਿਸਮੇਵ. ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ, ‘‘ਤਦਾ ਸਕ੍ਕੋ ਆਨਨ੍ਦੋ ਅਹੋਸਿ, ਸੁਵਰਾਜਾ ਅਹਮੇਵਾ’’ਤਿ ਵਤ੍ਵਾ, ‘‘ਏਵਂ, ਭਿਕ੍ਖਵੇ, ਅਪ੍ਪਿਚ੍ਛਤਾ ਨਾਮੇਸਾ ਮਮ ਤਨ੍ਤਿ, ਮਮ ਪਵੇਣੀ, ਅਨਚ੍ਛਰਿਯਾ ਮਮ ਪੁਤ੍ਤਸ੍ਸ ਨਿਗਮਵਾਸਿਤਿਸ੍ਸਸ੍ਸ ਮਾਦਿਸਂ ਆਚਰਿਯਂ ਲਭਿਤ੍ਵਾ ਅਪ੍ਪਿਚ੍ਛਤਾ, ਭਿਕ੍ਖੁਨਾ ਨਾਮ ਨਿਗਮਵਾਸਿਤਿਸ੍ਸੇਨ ਵਿਯ ਅਪ੍ਪਿਚ੍ਛੇਨੇਵ ਭਵਿਤਬ੍ਬਂ. ਏਵਰੂਪੋ ਹਿ ਭਿਕ੍ਖੁ ਅਭਬ੍ਬੋ ਸਮਥਵਿਪਸ੍ਸਨਾਧਮ੍ਮੇਹਿ ਵਾ ਮਗ੍ਗਫਲੇਹਿ ਵਾ ਪਰਿਹਾਨਾਯ, ਅਞ੍ਞਦਤ੍ਥੁ ਨਿਬ੍ਬਾਨਸ੍ਸੇਵ ਸਨ੍ਤਿਕੇ ਹੋਤੀ’’ਤਿ ਵਤ੍ਵਾ ਇਮਂ ਗਾਥਮਾਹ –

੩੨. ‘‘ਅਪ੍ਪਮਾਦਰਤੋ ਭਿਕ੍ਖੁ, ਪਮਾਦੇ ਭਯਦਸ੍ਸਿ ਵਾ;

ਅਭਬ੍ਬੋ ਪਰਿਹਾਨਾਯ, ਨਿਬ੍ਬਾਨਸ੍ਸੇਵ ਸਨ੍ਤਿਕੇ’’ਤਿ.

ਤਤ੍ਥ ਅਭਬ੍ਬੋ ਪਰਿਹਾਨਾਯਾਤਿ ਸੋ ਏਵਰੂਪੋ ਭਿਕ੍ਖੁ ਸਮਥਵਿਪਸ੍ਸਨਾਧਮ੍ਮੇਹਿ ਵਾ ਮਗ੍ਗਫਲੇਹਿ ਵਾ ਪਰਿਹਾਨਾਯ ਅਭਬ੍ਬੋ, ਨਾਪਿ ਪਤ੍ਤੇਹਿ ਪਰਿਹਾਯਤਿ, ਨ ਅਪ੍ਪਤ੍ਤਾਨਿ ਨ ਪਾਪੁਣਾਤਿ. ਨਿਬ੍ਬਾਨਸ੍ਸੇਵ ਸਨ੍ਤਿਕੇਤਿ ਕਿਲੇਸਪਰਿਨਿਬ੍ਬਾਨਸ੍ਸਪਿ ਅਨੁਪਾਦਾਪਰਿਨਿਬ੍ਬਾਨਸ੍ਸਾਪਿ ਸਨ੍ਤਿਕੇਯੇਵਾਤਿ.

ਗਾਥਾਪਰਿਯੋਸਾਨੇ ਨਿਗਮਵਾਸਿਤਿਸ੍ਸਤ੍ਥੇਰੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਞ੍ਞੇਪਿ ਬਹੂ ਸੋਤਾਪਨ੍ਨਾਦਯੋ ਅਹੇਸੁਂ. ਮਹਾਜਨਸ੍ਸ ਸਾਤ੍ਥਿਕਾ ਧਮ੍ਮਦੇਸਨਾ ਜਾਤਾਤਿ.

ਨਿਗਮਵਾਸਿਤਿਸ੍ਸਤ੍ਥੇਰਵਤ੍ਥੁ ਨਵਮਂ.

ਅਪ੍ਪਮਾਦਵਗ੍ਗਵਣ੍ਣਨਾ ਨਿਟ੍ਠਿਤਾ. ਦੁਤਿਯੋ ਵਗ੍ਗੋ.