੮. ਅਞ੍ਞਤਰਭਿਕ੍ਖੁਵਤ੍ਥੁ

ਅਪ੍ਪਮਾਦਰਤੋ ਭਿਕ੍ਖੂਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਕਥੇਸਿ.

ਸੋ ਕਿਰ ਸਤ੍ਥੁ ਸਨ੍ਤਿਕੇ ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਕਥਾਪੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਅਰਹਤ੍ਤਂ ਪਤ੍ਤੁਂ ਨਾਸਕ੍ਖਿ. ਸੋ ‘‘ਵਿਸੇਸੇਤ੍ਵਾ ਕਮ੍ਮਟ੍ਠਾਨਂ ਕਥਾਪੇਸ੍ਸਾਮੀ’’ਤਿ ਤਤੋ ਨਿਕ੍ਖਮਿਤ੍ਵਾ ਸਤ੍ਥੁ ਸਨ੍ਤਿਕਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਮਹਨ੍ਤਂ ਦਾਵਗ੍ਗਿਂ ਉਟ੍ਠਿਤਂ ਦਿਸ੍ਵਾ ਵੇਗੇਨ ਏਕਂ ਮੁਣ੍ਡਪਬ੍ਬਤਮਤ੍ਥਕਂ ਅਭਿਰੁਯ੍ਹ ਨਿਸਿਨ੍ਨੋ ਅਰਞ੍ਞਂ ਡਯ੍ਹਮਾਨਂ ਅਗ੍ਗਿਂ ਦਿਸ੍ਵਾ ਆਰਮ੍ਮਣਂ ਗਣ੍ਹਿ – ‘‘ਯਥਾ ਅਯਂ ਅਗ੍ਗਿ ਮਹਨ੍ਤਾਨਿ ਚ ਖੁਦ੍ਦਕਾਨਿ ਚ ਉਪਾਦਾਨਾਨਿ ਡਹਨ੍ਤੋ ਗਚ੍ਛਤਿ, ਏਵਂ ਅਰਿਯਮਗ੍ਗਞਾਣਗ੍ਗਿਨਾਪਿ ਮਹਨ੍ਤਾਨਿ ਚ ਖੁਦ੍ਦਕਾਨਿ ਚ ਸਂਯੋਜਨਾਨਿ ਡਹਨ੍ਤੇਨ ਗਨ੍ਤਬ੍ਬਂ ਭਵਿਸ੍ਸਤੀ’’ਤਿ. ਸਤ੍ਥਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਤਸ੍ਸ ਚਿਤ੍ਤਾਚਾਰਂ ਞਤ੍ਵਾ, ‘‘ਏਵਮੇਵ, ਭਿਕ੍ਖੁ, ਮਹਨ੍ਤਾਨਿਪਿ ਖੁਦ੍ਦਕਾਨਿਪਿ ਉਪਾਦਾਨਾਨਿ ਵਿਯ ਇਮੇਸਂ ਸਤ੍ਤਾਨਂ ਅਬ੍ਭਨ੍ਤਰੇ ਉਪ੍ਪਜ੍ਜਮਾਨਾਨਿ ਅਣੁਂਥੂਲਾਨਿ ਸਂਯੋਜਨਾਨਿ, ਤਾਨਿ ਞਾਣਗ੍ਗਿਨਾ ਝਾਪੇਤ੍ਵਾ ਅਭਬ੍ਬੁਪ੍ਪਤ੍ਤਿਕਾਨਿ ਕਾਤੁਂ ਵਟ੍ਟਤੀ’’ਤਿ ਵਤ੍ਵਾ ਓਭਾਸਂ ਵਿਸ੍ਸਜ੍ਜੇਤ੍ਵਾ ਤਸ੍ਸ ਭਿਕ੍ਖੁਨੋ ਅਭਿਮੁਖੇ ਨਿਸਿਨ੍ਨੋ ਵਿਯ ਪਞ੍ਞਾਯਮਾਨੋ ਇਮਂ ਓਭਾਸਗਾਥਮਾਹ –

੩੧. ‘‘ਅਪ੍ਪਮਾਦਰਤੋ ਭਿਕ੍ਖੁ, ਪਮਾਦੇ ਭਯਦਸ੍ਸਿ ਵਾ;

ਸਂਯੋਜਨਂ ਅਣੁਂ ਥੂਲਂ, ਡਹਂ ਅਗ੍ਗੀਵ ਗਚ੍ਛਤੀ’’ਤਿ.

ਤਤ੍ਥ ਅਪ੍ਪਮਾਦਰਤੋਤਿ ਅਪ੍ਪਮਾਦੇ ਰਤੋ ਅਭਿਰਤੋ, ਅਪ੍ਪਮਾਦੇਨ ਵੀਤਿਨਾਮੇਨ੍ਤੋਤਿ ਅਤ੍ਥੋ. ਪਮਾਦੇ ਭਯਦਸ੍ਸਿ ਵਾਤਿ ਨਿਰਯੁਪ੍ਪਤ੍ਤਿਆਦਿਕਂ ਪਮਾਦੇ ਭਯਂ ਭਯਤੋ ਪਸ੍ਸਨ੍ਤੋ, ਤਾਸਂ ਵਾ ਉਪ੍ਪਤ੍ਤੀਨਂ ਮੂਲਤ੍ਤਾ ਪਮਾਦਂ ਭਯਤੋ ਪਸ੍ਸਨ੍ਤੋ. ਸਂਯੋਜਨਨ੍ਤਿ ਵਟ੍ਟਦੁਕ੍ਖੇਨ ਸਦ੍ਧਿਂ ਯੋਜਨਂ ਬਨ੍ਧਨਂ ਪਜਾਨਂ ਵਟ੍ਟੇ ਓਸੀਦਾਪਨਸਮਤ੍ਥਂ ਦਸਵਿਧਂ ਸਂਯੋਜਨਂ. ਅਣੁਂ ਥੂਲਨ੍ਤਿ ਮਹਨ੍ਤਞ੍ਚ ਖੁਦ੍ਦਕਞ੍ਚ. ਡਹਂ ਅਗ੍ਗੀਵ ਗਚ੍ਛਤੀਤਿ ਯਥਾ ਅਯਂ ਅਗ੍ਗੀ ਏਤਂ ਮਹਨ੍ਤਞ੍ਚ ਖੁਦ੍ਦਕਞ੍ਚ ਉਪਾਦਾਨਂ ਡਹਨ੍ਤੋਵ ਗਚ੍ਛਤਿ. ਏਵਮੇਸੋ ਅਪ੍ਪਮਾਦਰਤੋ ਭਿਕ੍ਖੁ ਅਪ੍ਪਮਾਦਾਧਿਗਤੇਨ ਞਾਣਗ੍ਗਿਨਾ ਏਤਂ ਸਂਯੋਜਨਂ ਡਹਨ੍ਤੋ ਅਭਬ੍ਬੁਪ੍ਪਤ੍ਤਿਕਂ ਕਰੋਨ੍ਤੋ ਗਚ੍ਛਤੀਤਿ ਅਤ੍ਥੋ.

ਗਾਥਾਪਰਿਯੋਸਾਨੇ ਸੋ ਭਿਕ੍ਖੁ ਯਥਾਨਿਸਿਨ੍ਨੋਵ ਸਬ੍ਬਸਂਯੋਜਨਾਨਿ ਝਾਪੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਆਕਾਸੇਨਾਗਨ੍ਤ੍ਵਾ ਤਥਾਗਤਸ੍ਸ ਸੁਵਣ੍ਣਵਣ੍ਣਂ ਸਰੀਰਂ ਥੋਮੇਤ੍ਵਾ ਵਣ੍ਣੇਤ੍ਵਾ ਵਨ੍ਦਮਾਨੋਵ ਪਕ੍ਕਾਮੀਤਿ.

ਅਞ੍ਞਤਰਭਿਕ੍ਖੁਵਤ੍ਥੁ ਅਟ੍ਠਮਂ.