੭. ਮਘਵਤ੍ਥੁ

ਅਪ੍ਪਮਾਦੇਨ ਮਘਵਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਸਾਲਿਯਂ ਉਪਨਿਸ੍ਸਾਯ ਕੂਟਾਗਾਰਸਾਲਾਯਂ ਵਿਹਰਨ੍ਤੋ ਸਕ੍ਕਂ ਦੇਵਰਾਜਾਨਂ ਆਰਬ੍ਭ ਕਥੇਸਿ.

ਵੇਸਾਲਿਯਞ੍ਹਿ ਮਹਾਲਿ ਨਾਮ ਲਿਚ੍ਛਵੀ ਵਸਤਿ, ਸੋ ਤਥਾਗਤਸ੍ਸ ਸਕ੍ਕਪਞ੍ਹਸੁਤ੍ਤਨ੍ਤਦੇਸਨਂ (ਦੀ. ਨਿ. ੨.੩੪੪ ਆਦਯੋ) ਸੁਤ੍ਵਾ ‘‘ਸਮ੍ਮਾਸਮ੍ਬੁਦ੍ਧੋ ਸਕ੍ਕਸਮ੍ਪਤ੍ਤਿਂ ਮਹਤਿਂ ਕਤ੍ਵਾ ਕਥੇਸਿ, ‘ਦਿਸ੍ਵਾ ਨੁ ਖੋ ਕਥੇਸਿ, ਉਦਾਹੁ ਅਦਿਸ੍ਵਾ. ਜਾਨਾਤਿ ਨੁ ਖੋ ਸਕ੍ਕਂ, ਉਦਾਹੁ ਨੋ’ਤਿ ਪੁਚ੍ਛਿਸ੍ਸਾਮਿ ਨ’’ਨ੍ਤਿ ਚਿਨ੍ਤੇਸਿ. ਅਥ ਖੋ, ਮਹਾਲਿ, ਲਿਚ੍ਛਵੀ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ, ਮਹਾਲਿ, ਲਿਚ੍ਛਵੀ ਭਗਵਨ੍ਤਂ ਏਤਦਵੋਚ – ‘‘ਦਿਟ੍ਠੋ ਖੋ, ਭਨ੍ਤੇ, ਭਗਵਤਾ ਸਕ੍ਕੋ ਦੇਵਾਨਮਿਨ੍ਦੋ’’ਤਿ? ‘‘ਦਿਟ੍ਠੋ ਖੋ ਮੇ, ਮਹਾਲਿ, ਸਕ੍ਕੋ ਦੇਵਾਨਮਿਨ੍ਦੋ’’ਤਿ. ‘‘ਸੋ ਹਿ ਨੁਨ, ਭਨ੍ਤੇ, ਸਕ੍ਕਪਤਿਰੂਪਕੋ ਭਵਿਸ੍ਸਤਿ. ਦੁਦ੍ਦਸੋ ਹਿ, ਭਨ੍ਤੇ, ਸਕ੍ਕੋ ਦੇਵਾਨਮਿਨ੍ਦੋ’’ਤਿ. ‘‘ਸਕ੍ਕਞ੍ਚ ਖ੍ਵਾਹਂ, ਮਹਾਲਿ, ਪਜਾਨਾਮਿ ਸਕ੍ਕਕਰਣੇ ਚ ਧਮ੍ਮੇ, ਯੇਸਂ ਧਮ੍ਮਾਨਂ ਸਮਾਦਿਨ੍ਨਤ੍ਤਾ ਸਕ੍ਕੋ ਸਕ੍ਕਤ੍ਤਂ ਅਜ੍ਝਗਾ, ਤਞ੍ਚ ਪਜਾਨਾਮਿ’’.

ਸਕ੍ਕੋ, ਮਹਾਲਿ, ਦੇਵਾਨਮਿਨ੍ਦੋ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਮਘੋ ਨਾਮ ਮਾਣਵੋ ਅਹੋਸਿ, ਤਸ੍ਮਾ ‘‘ਮਘਵਾ’’ਤਿ ਵੁਚ੍ਚਤਿ.

ਸਕ੍ਕੋ, ਮਹਾਲਿ, ਦੇਵਾਨਮਿਨ੍ਦੋ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਪੁਰੇ ਦਾਨਂ ਅਦਾਸਿ, ਤਸ੍ਮਾ ‘‘ਪੁਰਿਨ੍ਦਦੋ’’ਤਿ ਵੁਚ੍ਚਤਿ.

ਸਕ੍ਕੋ, ਮਹਾਲਿ, ਦੇਵਾਨਮਿਨ੍ਦੋ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਸਕ੍ਕਚ੍ਚਂ ਦਾਨਂ ਅਦਾਸਿ, ਤਸ੍ਮਾ ‘‘ਸਕ੍ਕੋ’’ਤਿ ਵੁਚ੍ਚਤਿ.

ਸਕ੍ਕੋ, ਮਹਾਲਿ, ਦੇਵਾਨਮਿਨ੍ਦੋ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਆਵਸਥਂ ਅਦਾਸਿ, ਤਸ੍ਮਾ ‘‘ਵਾਸਵੋ’’ਤਿ ਵੁਚ੍ਚਤਿ.

ਸਕ੍ਕੋ, ਮਹਾਲਿ, ਦੇਵਾਨਮਿਨ੍ਦੋ ਸਹਸ੍ਸਮ੍ਪਿ ਅਤ੍ਥਂ ਮੁਹੁਤ੍ਤੇਨ ਚਿਨ੍ਤੇਤਿ, ਤਸ੍ਮਾ ‘‘ਸਹਸ੍ਸਕ੍ਖੋ’’ਤਿ ਵੁਚ੍ਚਤਿ.

ਸਕ੍ਕਸ੍ਸ, ਮਹਾਲਿ, ਦੇਵਾਨਮਿਨ੍ਦਸ੍ਸ ਸੁਜਾ ਨਾਮ ਅਸੁਰਕਞ੍ਞਾ, ਪਜਾਪਤਿ, ਤਸ੍ਮਾ ‘‘ਸੁਜਮ੍ਪਤੀ’’ਤਿ ਵੁਚ੍ਚਤਿ.

ਸਕ੍ਕੋ, ਮਹਾਲਿ, ਦੇਵਾਨਮਿਨ੍ਦੋ ਦੇਵਾਨਂ ਤਾਵਤਿਂਸਾਨਂ ਇਸ੍ਸਰਿਯਾਧਿਪਚ੍ਚਂ ਰਜ੍ਜਂ ਕਾਰੇਤਿ, ਤਸ੍ਮਾ ‘‘ਦੇਵਾਨਮਿਨ੍ਦੋ’’ਤਿ ਵੁਚ੍ਚਤਿ.

ਸਕ੍ਕਸ੍ਸ, ਮਹਾਲਿ, ਦੇਵਾਨਮਿਨ੍ਦਸ੍ਸ ਪੁਬ੍ਬੇ ਮਨੁਸ੍ਸਭੂਤਸ੍ਸ ਸਤ੍ਤ ਵਤਪਦਾਨਿ ਸਮਤ੍ਤਾਨਿ ਸਮਾਦਿਨ੍ਨਾਨਿ ਅਹੇਸੁਂ, ਯੇਸਂ ਸਮਾਦਿਨ੍ਨਤ੍ਤਾ ਸਕ੍ਕੋ ਸਕ੍ਕਤ੍ਤਂ ਅਜ੍ਝਗਾ. ਕਤਮਾਨਿ ਸਤ੍ਤ ਵਤਪਦਾਨਿ? ਯਾਵਜੀਵਂ ਮਾਤਾਪੇਤ੍ਤਿਭਰੋ ਅਸ੍ਸਂ, ਯਾਵਜੀਵਂ ਕੁਲੇ ਜੇਟ੍ਠਾਪਚਾਯੀ ਅਸ੍ਸਂ, ਯਾਵਜੀਵਂ ਸਣ੍ਹਵਾਚੋ ਅਸ੍ਸਂ, ਯਾਵਜੀਵਂ ਅਪਿਸੁਣਵਾਚੋ ਅਸ੍ਸਂ, ਯਾਵਜੀਵਂ ਵਿਗਤਮਲਮਚ੍ਛੇਰੇਨ ਚੇਤਸਾ ਅਗਾਰਂ ਅਜ੍ਝਾਵਸੇਯ੍ਯਂ, ਮੁਤ੍ਤਚਾਗੋ ਪਯਤਪਾਣਿ ਵੋਸਗ੍ਗਰਤੋ ਯਾਚਯੋਗੋ ਦਾਨਸਂਵਿਭਾਗਰਤੋ ਅਸ੍ਸਂ. ਯਾਵਜੀਵਂ ਸਚ੍ਚਵਾਚੋ ਅਸ੍ਸਂ, ਯਾਵਜੀਵਂ ਅਕ੍ਕੋਧਨੋ ਅਸ੍ਸਂ, ‘‘ਸਚੇਪਿ ਮੇ ਕੋਧੋ ਉਪ੍ਪਜ੍ਜੇਯ੍ਯ, ਖਿਪ੍ਪਮੇਵ ਨ ਪਟਿਵਿਨੇਯ੍ਯ’’ਨ੍ਤਿ. ਸਕ੍ਕਸ੍ਸ, ਮਹਾਲਿ, ਦੇਵਾਨਮਿਨ੍ਦਸ੍ਸ ਪੁਬ੍ਬੇ ਮਨੁਸ੍ਸਭੂਤਸ੍ਸ ਇਮਾਨਿ ਸਤ੍ਤ ਵਤਪਦਾਨਿ ਸਮਤ੍ਤਾਨਿ ਸਮਾਦਿਨ੍ਨਾਨਿ ਅਹੇਸੁਂ, ਯੇਸਂ ਸਮਾਦਿਨ੍ਨਤ੍ਤਾ ਸਕ੍ਕੋ ਸਕ੍ਕਤ੍ਤਂ ਅਜ੍ਝਗਾਤਿ.

‘‘ਮਾਤਾਪੇਤ੍ਤਿਭਰਂ ਜਨ੍ਤੁਂ, ਕੁਲੇ ਜੇਟ੍ਠਾਪਚਾਯਿਨਂ;

ਸਣ੍ਹਂ ਸਖਿਲਸਮ੍ਭਾਸਂ, ਪੇਸੁਣੇਯ੍ਯਪ੍ਪਹਾਯਿਨਂ.

‘‘ਮਚ੍ਛੇਰਵਿਨਯੇ ਯੁਤ੍ਤਂ, ਸਚ੍ਚਂ ਕੋਧਾਭਿਭੁਂ ਨਰਂ;

ਤਂ ਵੇ ਦੇਵਾ ਤਾਵਤਿਂਸਾ, ਆਹੁ ਸਪ੍ਪੁਰਿਸੋ ਇਤੀ’’ਤਿ. (ਸਂ. ਨਿ. ੧.੨੫੭) –

ਇਦਂ, ਮਹਾਲਿ, ਸਕ੍ਕੇਨ ਮਘਮਾਣਵਕਾਲੇ ਕਤਕਮ੍ਮਨ੍ਤਿ ਵਤ੍ਵਾ ਪੁਨ ਤੇਨ ‘‘ਕਥਂ, ਭਨ੍ਤੇ, ਮਘਮਾਣਵੋ ਪਟਿਪਜ੍ਜੀ’’ਤਿ? ਤਸ੍ਸ ਪਟਿਪਤ੍ਤਿਂ ਵਿਤ੍ਥਾਰਤੋ ਸੋਤੁਕਾਮੇਨ ਪੁਟ੍ਠੋ ‘‘ਤੇਨ ਹਿ, ਮਹਾਲਿ, ਸੁਣਾਹੀ’’ਤਿ ਵਤ੍ਵਾ ਅਤੀਤਂ ਆਹਰਿ –

ਅਤੀਤੇ ਮਗਧਰਟ੍ਠੇ ਮਚਲਗਾਮੇ ਮਘੋ ਨਾਮ ਮਾਣਵੋ ਗਾਮਕਮ੍ਮਕਰਣਟ੍ਠਾਨਂ ਗਨ੍ਤ੍ਵਾ ਅਤ੍ਤਨੋ ਠਿਤਟ੍ਠਾਨਂ ਪਾਦਨ੍ਤੇਨ ਪਂਸੁਂ ਵਿਯੂਹਿਤ੍ਵਾ ਰਮਣੀਯਂ ਕਤ੍ਵਾ ਅਟ੍ਠਾਸਿ. ਅਪਰੋ ਤਂ ਬਾਹੁਨਾ ਪਹਰਿਤ੍ਵਾ ਤਤੋ ਅਪਨੇਤ੍ਵਾ ਸਯਂ ਤਤ੍ਥ ਅਟ੍ਠਾਸਿ. ਸੋ ਤਸ੍ਸ ਅਕੁਜ੍ਝਿਤ੍ਵਾਵ ਅਞ੍ਞਂ ਠਾਨਂ ਰਮਣੀਯਂ ਕਤ੍ਵਾ ਠਿਤੋ. ਤਤੋਪਿ ਨਂ ਅਞ੍ਞੋ ਆਗਨ੍ਤ੍ਵਾ ਬਾਹੁਨਾ ਪਹਰਿਤ੍ਵਾ ਅਪਨੇਤ੍ਵਾ ਸਯਂ ਅਟ੍ਠਾਸਿ. ਸੋ ਤਸ੍ਸਪਿ ਅਕੁਜ੍ਝਿਤ੍ਵਾਵ ਅਞ੍ਞਂ ਠਾਨਂ ਰਮਣੀਯਂ ਕਤ੍ਵਾ ਠਿਤੋ, ਇਤਿ ਤਂ ਗੇਹਤੋ ਨਿਕ੍ਖਨ੍ਤਾ ਨਿਕ੍ਖਨ੍ਤਾ ਪੁਰਿਸਾ ਬਾਹੁਨਾ ਪਹਰਿਤ੍ਵਾ ਠਿਤਠਿਤਟ੍ਠਾਨਤੋ ਅਪਨੇਸੁਂ. ਸੋ ‘‘ਸਬ੍ਬੇਪੇਤੇ ਮਂ ਨਿਸ੍ਸਾਯ ਸੁਖਿਤਾ ਜਾਤਾ, ਇਮਿਨਾ ਕਮ੍ਮੇਨ ਮਯ੍ਹਂ ਸੁਖਦਾਯਕੇਨ ਪੁਞ੍ਞਕਮ੍ਮੇਨ ਭਵਿਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ, ਪੁਨਦਿਵਸੇ ਕੁਦਾਲਂ ਆਦਾਯ ਖਲਮਣ੍ਡਲਮਤ੍ਤਂ ਠਾਨਂ ਰਮਣੀਯਂ ਅਕਾਸਿ. ਸਬ੍ਬੇ ਗਨ੍ਤ੍ਵਾ ਤਤ੍ਥੇਵ ਅਟ੍ਠਂਸੁ. ਅਥ ਨੇਸਂ ਸੀਤਸਮਯੇ ਅਗ੍ਗਿਂ ਕਤ੍ਵਾ ਅਦਾਸਿ, ਗਿਮ੍ਹਕਾਲੇ ਉਦਕਂ. ਤਤੋ ‘‘ਰਮਣੀਯਂ ਠਾਨਂ ਨਾਮ ਸਬ੍ਬੇਸਂ ਪਿਯਂ, ਕਸ੍ਸਚਿ ਅਪ੍ਪਿਯਂ ਨਾਮ ਨਤ੍ਥਿ, ਇਤੋ ਪਟ੍ਠਾਯ ਮਯਾ ਮਗ੍ਗਂ ਸਮਂ ਕਰੋਨ੍ਤੇਨ ਵਿਚਰਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ, ਪਾਤੋਵ ਨਿਕ੍ਖਮਿਤ੍ਵਾ, ਮਗ੍ਗਂ ਸਮਂ ਕਰੋਨ੍ਤੋ ਛਿਨ੍ਦਿਤ੍ਵਾ, ਹਰਿਤਬ੍ਬਯੁਤ੍ਤਕਾ ਰੁਕ੍ਖਸਾਖਾ ਹਰਨ੍ਤੋ ਵਿਚਰਤਿ. ਅਥ ਨਂ ਅਪਰੋ ਦਿਸ੍ਵਾ ਆਹ – ‘‘ਸਮ੍ਮ, ਕਿਂ ਕਰੋਸੀ’’ਤਿ? ‘‘ਮਯ੍ਹਂ ਸਗ੍ਗਗਾਮਿਨਂ ਮਗ੍ਗਂ ਕਰੋਮਿ, ਸਮ੍ਮਾ’’ਤਿ. ‘‘ਤੇਨ ਹਿ ਅਹਮ੍ਪਿ ਤੇ ਸਹਾਯੋ ਹੋਮੀ’’ਤਿ. ‘‘ਹੋਹਿ, ਸਮ੍ਮ, ਸਗ੍ਗੋ ਨਾਮ ਬਹੂਨਮ੍ਪਿ ਮਨਾਪੋ ਸੁਖਬਹੁਲੋ’’ਤਿ. ਤਤੋ ਪਟ੍ਠਾਯ ਦ੍ਵੇ ਜਨਾ ਅਹੇਸੁਂ. ਤੇ ਦਿਸ੍ਵਾ ਤਥੇਵ ਪੁਚ੍ਛਿਤ੍ਵਾ ਚ ਸੁਤ੍ਵਾ ਚ ਅਪਰੋਪਿ ਤੇਸਂ ਸਹਾਯੋ ਜਾਤੋ, ਏਵਂ ਅਪਰੋਪਿ ਅਪਰੋਪੀਤਿ ਸਬ੍ਬੇਪਿ ਤੇਤ੍ਤਿਂਸ ਜਨਾ ਜਾਤਾ. ਤੇ ਸਬ੍ਬੇਪਿ ਕੁਦਾਲਾਦਿਹਤ੍ਥਾ ਮਗ੍ਗਂ ਸਮਂ ਕਰੋਨ੍ਤਾ ਏਕਯੋਜਨਦ੍ਵਿਯੋਜਨਮਤ੍ਤਟ੍ਠਾਨਂ ਗਚ੍ਛਨ੍ਤਿ.

ਤੇ ਦਿਸ੍ਵਾ ਗਾਮਭੋਜਕੋ ਚਿਨ੍ਤੇਸਿ – ‘‘ਇਮੇ ਮਨੁਸ੍ਸਾ ਅਯੋਗੇ ਯੁਤ੍ਤਾ, ਸਚੇ ਇਮੇ ਅਰਞ੍ਞਤੋ ਮਚ੍ਛਮਂਸਾਦੀਨਿ ਵਾ ਆਹਰੇਯ੍ਯੁਂ. ਸੁਰਂ ਵਾ ਕਤ੍ਵਾ ਪਿਵੇਯ੍ਯੁਂ, ਅਞ੍ਞਂ ਵਾ ਤਾਦਿਸਂ ਕਮ੍ਮਂ ਕਰੇਯ੍ਯੁਂ, ਅਹਮ੍ਪਿ ਕਿਞ੍ਚਿ ਕਿਞ੍ਚਿ ਲਭੇਯ੍ਯ’’ਨ੍ਤਿ. ਅਥ ਨੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਕਿਂ ਕਰੋਨ੍ਤਾ ਵਿਚਰਥਾ’’ਤਿ? ‘‘ਸਗ੍ਗਮਗ੍ਗਂ, ਸਾਮੀ’’ਤਿ. ‘‘ਘਰਾਵਾਸਂ ਵਸਨ੍ਤੇਹਿ ਨਾਮ ਏਵਂ ਕਾਤੁਂ ਨ ਵਟ੍ਟਤਿ, ਅਰਞ੍ਞਤੋ ਮਚ੍ਛਮਂਸਾਦੀਨਿ ਆਹਰਿਤੁਂ, ਸੁਰਂ ਕਤ੍ਵਾ ਪਾਤੁਂ, ਨਾਨਪ੍ਪਕਾਰੇ ਚ ਕਮ੍ਮਨ੍ਤੇ ਕਾਤੁਂ ਵਟ੍ਟਤੀ’’ਤਿ. ਤੇ ਤਸ੍ਸ ਵਚਨਂ ਪਟਿਕ੍ਖਿਪਿਂਸੁ, ਏਵਂ ਪੁਨਪ੍ਪੁਨਂ ਵੁਚ੍ਚਮਾਨਾਪਿ ਪਟਿਕ੍ਖਿਪਿਂਸੁਯੇਵ. ਸੋ ਕੁਜ੍ਝਿਤ੍ਵਾ ‘‘ਨਾਸੇਸ੍ਸਾਮਿ ਨੇ’’ਤਿ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ, ‘‘ਚੋਰੇ ਤੇ, ਦੇਵ, ਵਗ੍ਗਬਨ੍ਧਨੇਨ ਵਿਚਰਨ੍ਤੇ ਪਸ੍ਸਾਮੀ’’ਤਿ ਵਤ੍ਵਾ, ‘‘ਗਚ੍ਛ, ਤੇ ਗਹੇਤ੍ਵਾ ਆਨੇਹੀ’’ਤਿ ਵੁਤ੍ਤੇ ਤਥਾ ਕਤ੍ਵਾ ਸਬ੍ਬੇ ਤੇ ਬਨ੍ਧਿਤ੍ਵਾ ਆਨੇਤ੍ਵਾ ਰਞ੍ਞੋ ਦਸ੍ਸੇਸਿ. ਰਾਜਾ ਅਵੀਮਂਸਿਤ੍ਵਾਵ ‘‘ਹਤ੍ਥਿਨਾ ਮਦ੍ਦਾਪੇਥਾ’’ਤਿ ਆਣਾਪੇਸਿ. ਮਘੋ ਸੇਸਾਨਂ ਓਵਾਦਮਦਾਸਿ – ‘‘ਸਮ੍ਮਾ, ਠਪੇਤ੍ਵਾ ਮੇਤ੍ਤਂ ਅਞ੍ਞੋ ਅਮ੍ਹਾਕਂ ਅਵਸ੍ਸਯੋ ਨਤ੍ਥਿ, ਤੁਮ੍ਹੇ ਕਤ੍ਥਚਿ ਕੋਪਂ ਅਕਤ੍ਵਾ ਰਞ੍ਞੇ ਚ ਗਾਮਭੋਜਕੇ ਚ ਮਦ੍ਦਨਹਤ੍ਥਿਮ੍ਹਿ ਚ ਅਤ੍ਤਨਿ ਚ ਮੇਤ੍ਤਚਿਤ੍ਤੇਨ ਸਮਚਿਤ੍ਤਾਵ ਹੋਥਾ’’ਤਿ. ਤੇ ਤਥਾ ਕਰਿਂਸੁ. ਅਥ ਨੇਸਂ ਮੇਤ੍ਤਾਨੁਭਾਵੇਨ ਹਤ੍ਥੀ ਉਪ੍ਪਸਙ੍ਕਮਿਤੁਮ੍ਪਿ ਨ ਵਿਸਹਿ. ਰਾਜਾ ਤਮਤ੍ਥਂ ਸੁਤ੍ਵਾ ਬਹੂ ਮਨੁਸ੍ਸੇ ਦਿਸ੍ਵਾ ਮਦ੍ਦਿਤੁਂ ਨ ਵਿਸਹਿਸ੍ਸਤਿ? ‘‘ਗਚ੍ਛਥ, ਨੇ ਕਿਲਞ੍ਜੇਨ ਪਟਿਚ੍ਛਾਦੇਤ੍ਵਾ ਮਦ੍ਦਾਪੇਥਾ’’ਤਿ ਆਹ. ਤੇ ਕਿਲਞ੍ਜੇਨ ਪਟਿਚ੍ਛਾਦੇਤ੍ਵਾ ਮਦ੍ਦਿਤੁਂ ਪੇਸਿਯਮਾਨੋਪਿ ਹਤ੍ਥੀ ਦੂਰਤੋਵ ਪਟਿਕ੍ਕਮਿ.

ਰਾਜਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਕਾਰਣੇਨੇਤ੍ਥ ਭਵਿਤਬ੍ਬ’’ਨ੍ਤਿ ਤੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਤਾਤਾ, ਮਂ ਨਿਸ੍ਸਾਯ ਤੁਮ੍ਹੇ ਕਿਂ ਨ ਲਭਥਾ’’ਤਿ? ‘‘ਕਿਂ ਨਾਮੇਤਂ, ਦੇਵਾ’’ਤਿ? ‘‘ਤੁਮ੍ਹੇ ਕਿਰ ਵਗ੍ਗਬਨ੍ਧਨੇਨ ਚੋਰਾ ਹੁਤ੍ਵਾ ਅਰਞ੍ਞੇ ਵਿਚਰਥਾ’’ਤਿ? ‘‘ਕੋ ਏਵਮਾਹ, ਦੇਵਾ’’ਤਿ? ‘‘ਗਾਮਭੋਜਕੋ, ਤਾਤਾ’’ਤਿ. ‘‘ਨ ਮਯਂ, ਦੇਵ, ਚੋਰਾ, ਮਯਂ ਪਨ ਅਤ੍ਤਨੋ ਸਗ੍ਗਮਗ੍ਗਂ ਸੋਧੇਨ੍ਤਾ ਇਦਞ੍ਚਿਦਞ੍ਚ ਕਰੋਮ, ਗਾਮਭੋਜਕੋ ਅਮ੍ਹੇ ਅਕੁਸਲਕਿਰਿਯਾਯ ਨਿਯੋਜੇਤ੍ਵਾ ਅਤ੍ਤਨੋ ਵਚਨਂ ਅਕਰੋਨ੍ਤੇ ਨਾਸੇਤੁਕਾਮੋ ਕੁਜ੍ਝਿਤ੍ਵਾ ਏਵਮਾਹਾ’’ਤਿ. ਅਥ ਰਾਜਾ ਤੇਸਂ ਕਥਂ ਸੁਤ੍ਵਾ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ, ‘‘ਤਾਤਾ, ਅਯਂ ਤਿਰਚ੍ਛਾਨੋ ਤੁਮ੍ਹਾਕਂ ਗੁਣੇ ਜਾਨਾਤਿ, ਅਹਂ ਮਨੁਸ੍ਸਭੂਤੋ ਜਾਨਿਤੁਂ ਨਾਸਕ੍ਖਿਂ, ਖਮਥ ਮੇ’’ਤਿ. ਏਵਞ੍ਚ ਪਨ ਵਤ੍ਵਾ ਸਪੁਤ੍ਤਦਾਰਂ ਗਾਮਭੋਜਕਂ ਤੇਸਂ ਦਾਸਂ, ਹਤ੍ਥਿਂ ਆਰੋਹਨਿਯਂ, ਤਞ੍ਚ ਗਾਮਂ ਯਥਾਸੁਖਂ ਪਰਿਭੋਗਂ ਕਤ੍ਵਾ ਅਦਾਸਿ. ਤੇ ‘‘ਇਧੇਵ ਨੋ ਕਤਪੁਞ੍ਞਸ੍ਸਾਨਿਸਂਸੋ ਦਿਟ੍ਠੋ’’ਤਿ ਭਿਯ੍ਯੋਸੋਮਤ੍ਤਾਯ ਪਸਨ੍ਨਮਾਨਸਾ ਹੁਤ੍ਵਾ ਤਂ ਹਤ੍ਥਿਂ ਵਾਰੇਨ ਵਾਰੇਨ ਅਭਿਰੁਯ੍ਹ ਗਚ੍ਛਨ੍ਤਾ ਮਨ੍ਤਯਿਂਸੁ ‘‘ਇਦਾਨਿ ਅਮ੍ਹੇਹਿ ਅਤਿਰੇਕਤਰਂ ਪੁਞ੍ਞਂ ਕਾਤਬ੍ਬਂ, ਕਿਂ ਕਰੋਮ? ਚਤੁਮਹਾਪਥੇ ਥਾਵਰਂ ਕਤ੍ਵਾ ਮਹਾਜਨਸ੍ਸ ਵਿਸ੍ਸਮਨਸਾਲਂ ਕਰਿਸ੍ਸਾਮਾ’’ਤਿ. ਤੇ ਵਡ੍ਢਕਿਂ ਪਕ੍ਕੋਸਾਪੇਤ੍ਵਾ ਸਾਲਂ ਪਟ੍ਠਪੇਸੁਂ. ਮਾਤੁਗਾਮੇਸੁ ਪਨ ਵਿਗਤਚ੍ਛਨ੍ਦਤਾਯ ਤਸ੍ਸਾ ਸਾਲਾਯ ਮਾਤੁਗਾਮਾਨਂ ਪਤ੍ਤਿਂ ਨਾਦਂਸੁ.

ਮਘਸ੍ਸ ਪਨ ਗੇਹੇ ਨਨ੍ਦਾ, ਚਿਤ੍ਤਾ, ਸੁਧਮ੍ਮਾ, ਸੁਜਾਤਿ ਚਤਸ੍ਸੋ ਇਤ੍ਥਿਯੋ ਹੋਨ੍ਤਿ. ਤਾਸੁ ਸੁਧਮ੍ਮਾ ਵਡ੍ਢਕਿਨਾ ਸਦ੍ਧਿਂ ਏਕਤੋ ਹੁਤ੍ਵਾ, ‘‘ਭਾਤਿਕ, ਇਮਿਸ੍ਸਾ ਸਾਲਾਯ ਮਂ ਜੇਟ੍ਠਿਕਂ ਕਰੋਹੀ’’ਤਿ ਵਤ੍ਵਾ ਲਞ੍ਜਂ ਅਦਾਸਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਠਮਮੇਵ ਕਣ੍ਣਿਕਤ੍ਥਾਯ ਰੁਕ੍ਖਂ ਸੁਕ੍ਖਾਪੇਤ੍ਵਾ ਤਚ੍ਛੇਤ੍ਵਾ ਵਿਜ੍ਝਿਤ੍ਵਾ ਕਣ੍ਣਿਕਂ ਨਿਟ੍ਠਾਪੇਤ੍ਵਾ, ‘‘ਸੁਧਮ੍ਮਾ ਨਾਮ ਅਯਂ ਸਾਲਾ’’ਤਿ ਅਕ੍ਖਰਾਨਿ ਛਿਨ੍ਦਿਤ੍ਵਾ ਵਤ੍ਥੇਨ ਪਲਿਵੇਠੇਤ੍ਵਾ ਠਪੇਸਿ. ਅਥ ਨੇ ਵਡ੍ਢਕੀ ਸਾਲਂ ਨਿਟ੍ਠਾਪੇਤ੍ਵਾ ਕਣ੍ਣਿਕਾਰੋਪਨਦਿਵਸੇ ‘‘ਅਹੋ, ਅਯ੍ਯਾ, ਏਕਂ ਕਰਣੀਯਂ ਨ ਸਰਿਮ੍ਹਾ’’ਤਿ ਆਹ. ‘‘ਕਿਂ ਨਾਮ, ਭੋ’’ਤਿ? ‘‘ਕਣ੍ਣਿਕ’’ਨ੍ਤਿ. ‘‘ਹੋਤੁ ਤਂ ਆਹਰਿਸ੍ਸਾਮਾ’’ਤਿ. ‘‘ਇਦਾਨਿ ਛਿਨ੍ਨਰੁਕ੍ਖੇਨ ਕਾਤੁਂ ਨ ਸਕ੍ਕਾ, ਪੁਬ੍ਬੇਯੇਵ ਤਂ ਛਿਨ੍ਦਿਤ੍ਵਾ ਤਚ੍ਛੇਤ੍ਵਾ ਵਿਜ੍ਝਿਤ੍ਵਾ ਠਪਿਤਕਣ੍ਣਿਕਾ ਲਦ੍ਧੁਂ ਵਟ੍ਟਤੀ’’ਤਿ. ‘‘ਇਦਾਨਿ ਕਿਂ ਕਾਤਬ੍ਬ’’ਨ੍ਤਿ? ‘‘ਸਚੇ ਕਸ੍ਸਚਿ ਗੇਹੇ ਨਿਟ੍ਠਾਪੇਤ੍ਵਾ ਠਪਿਤਾ ਵਿਕ੍ਕਾਯਿਕਕਣ੍ਣਿਕਾ ਅਤ੍ਥਿ, ਸਾ ਪਰਿਯੇਸਿਤਬ੍ਬਾ’’ਤਿ. ਤੇ ਪਰਿਯੇਸਨ੍ਤਾ ਸੁਧਮ੍ਮਾਯ ਗੇਹੇ ਦਿਸ੍ਵਾ ਸਹਸ੍ਸਂ ਦਤ੍ਵਾਪਿ ਮੂਲੇਨ ਨ ਲਭਿਂਸੁ. ‘‘ਸਚੇ ਮਂ ਸਾਲਾਯ ਪਤ੍ਤਿਂ ਕਰੋਥ, ਦਸ੍ਸਾਮੀ’’ਤਿ ਵੁਤ੍ਤੇ ਪਨ ‘‘ਮਯਂ ਮਾਤੁਗਾਮਾਨਂ ਪਤ੍ਤਿਂ ਨ ਦਮ੍ਮਾ’’ਤਿ ਆਹਂਸੁ.

ਅਥ ਨੇ ਵਡ੍ਢਕੀ ਆਹ – ‘‘ਅਯ੍ਯਾ, ਤੁਮ੍ਹੇ ਕਿਂ ਕਥੇਥ, ਠਪੇਤ੍ਵਾ ਬ੍ਰਹ੍ਮਲੋਕਂ ਅਞ੍ਞਂ ਮਾਤੁਗਾਮਰਹਿਤਟ੍ਠਾਨਂ ਨਾਮ ਨਤ੍ਥਿ, ਗਣ੍ਹਥ ਕਣ੍ਣਿਕਂ. ਏਵਂ ਸਨ੍ਤੇ ਅਮ੍ਹਾਕਂ ਕਮ੍ਮਂ ਨਿਟ੍ਠਂ ਗਮਿਸ੍ਸਤੀ’’ਤਿ. ਤੇ ‘‘ਸਾਧੂ’’ਤਿ ਕਣ੍ਣਿਕਂ ਗਹੇਤ੍ਵਾ ਸਾਲਂ ਨਿਟ੍ਠਾਪੇਤ੍ਵਾ ਤਿਧਾ ਵਿਭਜਿਂਸੁ. ਏਕਸ੍ਮਿਂ ਕੋਟ੍ਠਾਸੇ ਇਸ੍ਸਰਾਨਂ ਵਸਨਟ੍ਠਾਨਂ ਕਰਿਂਸੁ, ਏਕਸ੍ਮਿਂ ਦੁਗ੍ਗਤਾਨਂ, ਏਕਸ੍ਮਿਂ ਗਿਲਾਨਾਨਂ. ਤੇਤ੍ਤਿਂਸ ਜਨਾ ਤੇਤ੍ਤਿਂਸ ਫਲਕਾਨਿ ਪਞ੍ਞਪੇਤ੍ਵਾ ਹਤ੍ਥਿਸ੍ਸ ਸਞ੍ਞਂ ਅਦਂਸੁ – ‘‘ਆਗਨ੍ਤੁਕੋ ਆਗਨ੍ਤ੍ਵਾ ਯਸ੍ਸ ਅਤ੍ਥਤਫਲਕੇ ਨਿਸੀਦਤਿ, ਤਂ ਗਹੇਤ੍ਵਾ ਫਲਕਸਾਮਿਕਸ੍ਸੇਵ ਗੇਹੇ ਪਤਿਟ੍ਠਪੇਹਿ, ਤਸ੍ਸ ਪਾਦਪਰਿਕਮ੍ਮਪਿਟ੍ਠਿਪਰਿਕਮ੍ਮਪਾਨੀਯਖਾਦਨੀਯਭੋਜਨੀਯਸਯਨਾਨਿ ਸਬ੍ਬਾਨਿ ਫਲਕਸਾਮਿਕਸ੍ਸੇਵ ਭਾਰੋ ਭਵਿਸ੍ਸਤੀ’’ਤਿ. ਹਤ੍ਥੀ ਆਗਤਾਗਤਂ ਗਹੇਤ੍ਵਾ ਫਲਕਸਾਮਿਕਸ੍ਸੇਵ ਘਰਂ ਨੇਤਿ. ਸੋ ਤਸ੍ਸ ਤਂ ਦਿਵਸਂ ਕਤ੍ਤਬ੍ਬਂ ਕਰੋਤਿ. ਮਘੋ ਸਾਲਾਯ ਅਵਿਦੂਰੇ ਕੋਵਿਲ਼ਾਰਰੁਕ੍ਖਂ ਰੋਪੇਤ੍ਵਾ ਤਸ੍ਸ ਮੂਲੇ ਪਾਸਾਣਫਲਕਂ ਅਤ੍ਥਰਿ. ਸਾਲਂ ਪਵਿਟ੍ਠਪਵਿਟ੍ਠਾ ਜਨਾ ਕਣ੍ਣਿਕਂ ਓਲੋਕੇਤ੍ਵਾ ਅਕ੍ਖਰਾਨਿ ਵਾਚੇਤ੍ਵਾ, ‘‘ਸੁਧਮ੍ਮਾ ਨਾਮੇਸਾ ਸਾਲਾ’’ਤਿ ਵਦਨ੍ਤਿ. ਤੇਤ੍ਤਿਂਸਜਨਾਨਂ ਨਾਮਂ ਨ ਪਞ੍ਞਾਯਤਿ. ਨਨ੍ਦਾ ਚਿਨ੍ਤੇਸਿ – ‘‘ਇਮੇ ਸਾਲਂ ਕਰੋਨ੍ਤਾ ਅਮ੍ਹੇ ਅਪਤ੍ਤਿਕਾ ਕਰਿਂਸੁ, ਸੁਧਮ੍ਮਾ ਪਨ ਅਤ੍ਤਨੋ ਬ੍ਯਤ੍ਤਤਾਯ ਕਣ੍ਣਿਕਂ ਕਤ੍ਵਾ ਪਤ੍ਤਿਕਾ ਜਾਤਾ, ਮਯਾਪਿ ਕਿਞ੍ਚਿ ਕਾਤੁਂ ਵਟ੍ਟਤਿ, ਕਿਂ ਨੁ ਖੋ ਕਰਿਸ੍ਸਾਮੀ’’ਤਿ? ਅਥਸ੍ਸਾ ਏਤਦਹੋਸਿ – ‘‘ਸਾਲਂ ਆਗਤਾਗਤਾਨਂ ਪਾਨੀਯਞ੍ਚੇਵ ਨ੍ਹਾਨੋਦਕਞ੍ਚ ਲਦ੍ਧੁਂ ਵਟ੍ਟਤਿ, ਪੋਕ੍ਖਰਣਿਂ ਖਣਾਪੇਸ੍ਸਾਮੀ’’ਤਿ. ਸਾ ਪੋਕ੍ਖਰਣਿਂ ਕਾਰੇਸਿ. ਚਿਤ੍ਤਾ ਚਿਨ੍ਤੇਸਿ – ‘‘ਸੁਧਮ੍ਮਾਯ ਕਣ੍ਣਿਕਾ ਦਿਨ੍ਨਾ, ਨਨ੍ਦਾਯ ਪੋਕ੍ਖਰਣੀ ਕਾਰਿਤਾ, ਮਯਾਪਿ ਕਿਞ੍ਚਿ ਕਾਤੁਂ ਵਟ੍ਟਤਿ, ਕਿਂ ਨੁ ਖੋ ਕਰਿਸ੍ਸਾਮੀ’’ਤਿ? ਅਥਸ੍ਸਾ ਏਤਦਹੋਸਿ – ‘‘ਸਾਲਂ ਆਗਤਾਗਤੇਹਿ ਪਾਨੀਯਂ ਪਿਵਿਤ੍ਵਾ ਨ੍ਹਤ੍ਵਾ ਗਮਨਕਾਲੇਪਿ ਮਾਲਂ ਪਿਲਨ੍ਧਿਤ੍ਵਾ ਗਨ੍ਤੁਂ ਵਟ੍ਟਤਿ, ਪੁਪ੍ਫਾਰਾਮਂ ਕਾਰਾਪੇਸ੍ਸਾਮੀ’’ਤਿ. ਸਾ ਰਮਣੀਯਂ ਪੁਪ੍ਫਾਰਾਮਂ ਕਾਰੇਸਿ. ਯੇਭੁਯ੍ਯੇਨ ਤਸ੍ਮਿਂ ਆਰਾਮੇ ‘‘ਅਸੁਕੋ ਨਾਮ ਪੁਪ੍ਫੂਪਗਫਲੂਪਗਰੁਕ੍ਖੋ ਨਤ੍ਥੀ’’ਤਿ ਨਾਹੋਸਿ.

ਸੁਜਾ ਪਨ ‘‘ਅਹਂ ਮਘਸ੍ਸ ਮਾਤੁਲਧੀਤਾ ਚੇਵ ਪਾਦਪਰਿਚਾਰਿਕਾ ਚ, ਏਤੇਨ ਕਤਂ ਕਮ੍ਮਂ ਮਯ੍ਹਮੇਵ, ਮਯਾ ਕਤਂ ਏਤਸ੍ਸੇਵਾ’’ਤਿ ਚਿਨ੍ਤੇਤ੍ਵਾ, ਕਿਞ੍ਚਿ ਅਕਤ੍ਵਾ ਅਤ੍ਤਭਾਵਮੇਵ ਮਣ੍ਡਯਮਾਨਾ ਕਾਲਂ ਵੀਤਿਨਾਮੇਸਿ. ਮਘੋਪਿ ਮਾਤਾਪਿਤੁਉਪਟ੍ਠਾਨਂ ਕੁਲੇ ਜੇਟ੍ਠਾਪਚਾਯਨਕਮ੍ਮਂ ਸਚ੍ਚਵਾਚਂ ਅਫਰੁਸਵਾਚਂ ਅਪਿ, ਸੁਣਵਾਚਂ ਮਚ੍ਛੇਰਵਿਨਯਂ ਅਕ੍ਕੋਧਨਨ੍ਤਿ ਇਮਾਨਿ ਸਤ੍ਤ ਵਤਪਦਾਨਿ ਪੂਰੇਤ੍ਵਾ –

‘‘ਮਾਤਾਪੇਤ੍ਤਿਭਰਂ ਜਨ੍ਤੁਂ, ਕੁਲੇ ਜੇਟ੍ਠਾਪਚਾਯਿਨਂ;

ਸਣ੍ਹਂ ਸਖਿਲਸਮ੍ਭਾਸਂ, ਪੇਸੁਣੇਯ੍ਯਪ੍ਪਹਾਯਿਨਂ.

‘‘ਮਚ੍ਛੇਰਵਿਨਯੇ ਯੁਤ੍ਤਂ, ਸਚ੍ਚਂ ਕੋਧਾਭਿਭੁਂ ਨਰਂ;

ਤਂ ਵੇ ਦੇਵਾ ਤਾਵਤਿਂਸਾ, ਆਹੁ ‘ਸਪ੍ਪੁਰਿਸੋ’ਇਤੀ’’ਤਿ. (ਸਂ. ਨਿ. ੧.੨੫੭) –

ਏਵਂ ਪਸਂਸਿਯਭਾਵਂ ਆਪਜ੍ਜਿਤ੍ਵਾ ਜੀਵਿਤਪਰਿਯੋਸਾਨੇ ਤਾਵਤਿਂਸਭਵਨੇ ਸਕ੍ਕੋ ਦੇਵਰਾਜਾ ਹੁਤ੍ਵਾ ਨਿਬ੍ਬਤ੍ਤਿ, ਤੇਪਿਸ੍ਸ ਸਹਾਯਕਾ ਤਤ੍ਥੇਵ ਨਿਬ੍ਬਤ੍ਤਿਂਸੁ, ਵਡ੍ਢਕੀ ਵਿਸ੍ਸਕਮ੍ਮਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਦਾ ਤਾਵਤਿਂਸਭਵਨੇ ਅਸੁਰਾ ਵਸਨ੍ਤਿ. ਤੇ ‘‘ਅਭਿਨਵਾ ਦੇਵਪੁਤ੍ਤਾ ਨਿਬ੍ਬਤ੍ਤਾ’’ਤਿ ਦਿਬ੍ਬਪਾਨਂ ਸਜ੍ਜਯਿਂਸੁ. ਸਕ੍ਕੋ ਅਤ੍ਤਨੋ ਪਰਿਸਾਯ ਕਸ੍ਸਚਿ ਅਪਿਵਨਤ੍ਥਾਯ ਸਞ੍ਞਮਦਾਸਿ. ਅਸੁਰਾ ਦਿਬ੍ਬਪਾਨਂ ਪਿਵਿਤ੍ਵਾ ਮਜ੍ਜਿਂਸੁ. ਸਕ੍ਕੋ ‘‘ਕਿਂ ਮੇ ਇਮੇਹਿ ਸਾਧਾਰਣੇਨ ਰਜ੍ਜੇਨਾ’’ਤਿ ਅਤ੍ਤਨੋ ਪਰਿਸਾਯ ਸਞ੍ਞਂ ਦਤ੍ਵਾ ਤੇ ਪਾਦੇਸੁ ਗਾਹਾਪੇਤ੍ਵਾ ਮਹਾਸਮੁਦ੍ਦੇ ਖਿਪਾਪੇਸਿ. ਤੇ ਅਵਂਸਿਰਾ ਸਮੁਦ੍ਦੇ ਪਤਿਂਸੁ. ਅਥ ਨੇਸਂ ਪੁਞ੍ਞਾਨੁਭਾਵੇਨ ਸਿਨੇਰੁਨੋ ਹੇਟ੍ਠਿਮਤਲੇ ਅਸੁਰਵਿਮਾਨਂ ਨਾਮ ਨਿਬ੍ਬਤ੍ਤਿ, ਚਿਤ੍ਤਪਾਟਲਿ ਨਾਮ ਨਿਬ੍ਬਤ੍ਤਿ.

ਦੇਵਾਸੁਰਸਙ੍ਗਾਮੇ ਪਨ ਅਸੁਰੇਸੁ ਪਰਾਜਿਤੇਸੁ ਦਸਯੋਜਨਸਹਸ੍ਸਂ ਤਾਵਤਿਂਸਦੇਵਨਗਰਂ ਨਾਮ ਨਿਬ੍ਬਤ੍ਤਿ. ਤਸ੍ਸ ਪਨ ਨਗਰਸ੍ਸ ਪਾਚੀਨਪਚ੍ਛਿਮਦ੍ਵਾਰਾਨਂ ਅਨ੍ਤਰਾ ਦਸਯੋਜਨਸਹਸ੍ਸਂ ਹੋਤਿ, ਤਥਾ ਦਕ੍ਖਿਣੁਤ੍ਤਰਦ੍ਵਾਰਾਨਂ. ਤਂ ਖੋ ਪਨ ਨਗਰਂ ਦ੍ਵਾਰਸਹਸ੍ਸਯੁਤ੍ਤਂ ਅਹੋਸਿ ਆਰਾਮਪੋਕ੍ਖਰਣਿਪਟਿਮਣ੍ਡਿਤਂ. ਤਸ੍ਸ ਮਜ੍ਝੇ ਸਾਲਾਯ ਨਿਸ੍ਸਨ੍ਦੇਨ ਤਿਯੋਜਨਸਤੁਬ੍ਬੇਧੇਹਿ ਧਜੇਹਿ ਪਟਿਮਣ੍ਡਿਤੋ ਸਤ੍ਤਰਤਨਮਯੋ ਸਤ੍ਤਯੋਜਨਸਤੁਬ੍ਬੇਧੋ ਵੇਜਯਨ੍ਤੋ ਨਾਮ ਪਾਸਾਦੋ ਉਗ੍ਗਞ੍ਛਿ. ਸੁਵਣ੍ਣਯਟ੍ਠੀਸੁ ਮਣਿਧਜਾ ਅਹੇਸੁਂ, ਮਣਿਯਟ੍ਠੀਸੁ ਸੁਵਣ੍ਣਧਜਾ; ਪਵਾਲ਼ਯਟ੍ਠੀਸੁ ਮੁਤ੍ਤਧਜਾ, ਮੁਤ੍ਤਯਟ੍ਠੀਸੁ ਪਵਾਲ਼ਧਜਾ; ਸਤ੍ਤਰਤਨਮਯਾਸੁ ਯਟ੍ਠੀਸੁ ਸਤ੍ਤਰਤਨਧਜਾ, ਮਜ੍ਝੇ ਠਿਤੋ ਧਜੋ ਤਿਯੋਜਨਸਤੁਬ੍ਬੇਧੋ ਅਹੋਸਿ. ਇਤਿ ਸਾਲਾਯ ਨਿਸ੍ਸਨ੍ਦੇਨ ਯੋਜਨਸਹਸ੍ਸੁਬ੍ਬੇਧੋ ਪਾਸਾਦੋ ਸਤ੍ਤਰਤਨਮਯੋਵ ਹੁਤ੍ਵਾ ਨਿਬ੍ਬਤ੍ਤਿ, ਕੋਵਿਲ਼ਾਰਰੁਕ੍ਖਸ੍ਸ ਨਿਸ੍ਸਨ੍ਦੇਨ ਸਮਨ੍ਤਾ ਤਿਯੋਜਨਸਤਪਰਿਮਣ੍ਡਲੋ ਪਾਰਿਚ੍ਛਤ੍ਤਕੋ ਨਿਬ੍ਬਤ੍ਤਿ, ਪਾਸਾਣਫਲਕਸ੍ਸ ਨਿਸ੍ਸਨ੍ਦੇਨ ਪਾਰਿਚ੍ਛਤ੍ਤਕਮੂਲੇ ਦੀਘਤੋ ਸਟ੍ਠਿਯੋਜਨਾ ਪੁਥੁਲਤੋ ਪਣ੍ਣਾਸਯੋਜਨਾ ਬਹਲਤੋ ਪਞ੍ਚਦਸਯੋਜਨਾ ਜਯਸੁਮਨਰਤ੍ਤਕਮ੍ਬਲਵਣ੍ਣਾ ਪਣ੍ਡੁਕਮ੍ਬਲਸਿਲਾ ਨਿਬ੍ਬਤ੍ਤਿ. ਤਤ੍ਥ ਨਿਸਿਨ੍ਨਕਾਲੇ ਉਪਡ੍ਢਕਾਯੋ ਪਵਿਸਤਿ, ਉਟ੍ਠਿਤਕਾਲੇ ਊਨਂ ਪਰਿਪੂਰਤਿ.

ਹਤ੍ਥੀ ਪਨ ਏਰਾਵਣੋ ਨਾਮ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਦੇਵਲੋਕਸ੍ਮਿਞ੍ਹਿ ਤਿਰਚ੍ਛਾਨਗਤਾ ਨ ਹੋਨ੍ਤਿ. ਤਸ੍ਮਾ ਸੋ ਉਯ੍ਯਾਨਕੀਲ਼ਾਯ ਨਿਕ੍ਖਮਨਕਾਲੇ ਅਤ੍ਤਭਾਵਂ ਵਿਜਹਿਤ੍ਵਾ ਦਿਯਡ੍ਢਯੋਜਨਸਤਿਕੋ ਏਰਾਵਣੋ ਨਾਮ ਹਤ੍ਥੀ ਅਹੋਸਿ. ਸੋ ਤੇਤ੍ਤਿਂਸਜਨਾਨਂ ਅਤ੍ਥਾਯ ਤੇਤ੍ਤਿਂਸ ਕੁਮ੍ਭੇ ਮਾਪੇਸਿ ਆਵਟ੍ਟੇਨ ਤਿਗਾਵੁਤਅਡ੍ਢਯੋਜਨਪ੍ਪਮਾਣੇ, ਸਬ੍ਬੇਸਂ ਮਜ੍ਝੇ ਸਕ੍ਕਸ੍ਸ ਅਤ੍ਥਾਯ ਸੁਦਸ੍ਸਨਂ ਨਾਮ ਤਿਂਸਯੋਜਨਿਕਂ ਕੁਮ੍ਭਂ ਮਾਪੇਸਿ. ਤਸ੍ਸ ਉਪਰਿ ਦ੍ਵਾਦਸਯੋਜਨਿਕੋ ਰਤਨਮਣ੍ਡਪੋ ਹੋਤਿ. ਤਤ੍ਥ ਅਨ੍ਤਰਨ੍ਤਰਾ ਸਤ੍ਤਰਤਨਮਯਾ ਯੋਜਨੁਬ੍ਬੇਧਾ ਧਜਾ ਉਟ੍ਠਹਨ੍ਤਿ. ਪਰਿਯਨ੍ਤੇ ਕਿਙ੍ਕਿਣਿਕਜਾਲਂ ਓਲਮ੍ਬਤਿ. ਯਸ੍ਸ ਮਨ੍ਦਵਾਤੇਰਿਤਸ੍ਸ ਪਞ੍ਚਙ੍ਗਿਕਤੂਰਿਯਸਦ੍ਦਸਂਮਿਸ੍ਸੋ ਦਿਬ੍ਬਗੀਤਸਦ੍ਦੋ ਵਿਯ ਰਵੋ ਨਿਚ੍ਛਰਤਿ. ਮਣ੍ਡਪਮਜ੍ਝੇ ਸਕ੍ਕਸ੍ਸਤ੍ਥਾਯ ਯੋਜਨਿਕੋ ਮਣਿਪਲ੍ਲਙ੍ਕੋ ਪਞ੍ਞਤ੍ਤੋ ਹੋਤਿ, ਤਤ੍ਥ ਸਕ੍ਕੋ ਨਿਸੀਦਿ. ਤੇਤ੍ਤਿਂਸ ਦੇਵਪੁਤ੍ਤਾ ਅਤ੍ਤਨੋ ਕੁਮ੍ਭੇ ਰਤਨਪਲ੍ਲਙ੍ਕੇ ਨਿਸੀਦਿਂਸੁ. ਤੇਤ੍ਤਿਂਸਾਯ ਕੁਮ੍ਭਾਨਂ ਏਕੇਕਸ੍ਮਿਂ ਕੁਮ੍ਭੇ ਸਤ੍ਤ ਸਤ੍ਤ ਦਨ੍ਤੇ ਮਾਪੇਸਿ. ਤੇਸੁ ਏਕੇਕੋ ਪਣ੍ਣਾਸਯੋਜਨਾਯਾਮੋ, ਏਕੇਕਸ੍ਮਿਞ੍ਚੇਤ੍ਥ ਦਨ੍ਤੇ ਸਤ੍ਤ ਸਤ੍ਤ ਪੋਕ੍ਖਰਣਿਯੋ ਹੋਨ੍ਤਿ, ਏਕੇਕਾਯ ਪੋਕ੍ਖਰਣਿਯਾ ਸਤ੍ਤ ਸਤ੍ਤ ਪਦੁਮਿਨੀਗਚ੍ਛਾਨਿ, ਏਕੇਕਸ੍ਮਿਂ ਗਚ੍ਛੇ ਸਤ੍ਤ ਸਤ੍ਤ ਪੁਪ੍ਫਾਨਿ ਹੋਨ੍ਤਿ, ਏਕੇਕਸ੍ਮਿਂ ਪੁਪ੍ਫੇ ਸਤ੍ਤ ਸਤ੍ਤ ਪਤ੍ਤਾਨਿ, ਏਕੇਕਸ੍ਮਿਂ ਪਤ੍ਤੇ ਸਤ੍ਤ ਸਤ੍ਤ ਦੇਵਧੀਤਰੋ ਨਚ੍ਚਨ੍ਤਿ. ਏਵਂ ਸਮਨ੍ਤਾ ਪਣ੍ਣਾਸਯੋਜਨਠਾਨੇਸੁ ਹਤ੍ਥਿਦਨ੍ਤੇਸੁਯੇਵ ਨਟਸਮਜ੍ਜਾ ਹੋਨ੍ਤਿ. ਏਵਂ ਮਹਨ੍ਤਂ ਯਸਂ ਅਨੁਭਵਨ੍ਤੋ ਸਕ੍ਕੋ ਦੇਵਰਾਜਾ ਵਿਚਰਤਿ.

ਸੁਧਮ੍ਮਾਪਿ ਕਾਲਂ ਕਤ੍ਵਾ ਗਨ੍ਤ੍ਵਾ ਤਤ੍ਥੇਵ ਨਿਬ੍ਬਤ੍ਤਿ. ਤਸ੍ਸਾ ਸੁਧਮ੍ਮਾ ਨਾਮ ਨਵ ਯੋਜਨਸਤਿਕਾ ਦੇਵਸਭਾ ਨਿਬ੍ਬਤ੍ਤਿ. ਤਤੋ ਰਮਣੀਯਤਰਂ ਕਿਰ ਅਞ੍ਞਂ ਠਾਨਂ ਨਾਮ ਨਤ੍ਥਿ, ਮਾਸਸ੍ਸ ਅਟ੍ਠ ਦਿਵਸੇ ਧਮ੍ਮਸ੍ਸਵਨਂ ਤਤ੍ਥੇਵ ਹੋਤਿ. ਯਾਵਜ੍ਜਤਨਾ ਅਞ੍ਞਤਰਂ ਰਮਣੀਯਂ ਠਾਨਂ ਦਿਸ੍ਵਾ, ‘‘ਸੁਧਮ੍ਮਾ ਦੇਵਸਭਾ ਵਿਯਾ’’ਤਿ ਵਦਨ੍ਤਿ. ਨਨ੍ਦਾਪਿ ਕਾਲਂ ਕਤ੍ਵਾ ਗਨ੍ਤ੍ਵਾ ਤਤ੍ਥੇਵ ਨਿਬ੍ਬਤ੍ਤਿ, ਤਸ੍ਸਾ ਪਞ੍ਚਯੋਜਨਸਤਿਕਾ ਨਨ੍ਦਾ ਨਾਮ ਪੋਕ੍ਖਰਣੀ ਨਿਬ੍ਬਤ੍ਤਿ. ਚਿਤ੍ਤਾਪਿ ਕਾਲਂ ਕਤ੍ਵਾ ਗਨ੍ਤ੍ਵਾ ਤਤ੍ਥੇਵ ਨਿਬ੍ਬਤ੍ਤਿ, ਤਸ੍ਸਾਪਿ ਪਞ੍ਚਯੋਜਨਸਤਿਕਂ ਚਿਤ੍ਤਲਤਾਵਨਂ ਨਾਮ ਨਿਬ੍ਬਤ੍ਤਿ, ਤਤ੍ਥ ਉਪ੍ਪਨ੍ਨਪੁਬ੍ਬਨਿਮਿਤ੍ਤੇ ਦੇਵਪੁਤ੍ਤੇ ਨੇਤ੍ਵਾ ਮੋਹਯਮਾਨਾ ਵਿਚਰਨ੍ਤਿ. ਸੁਜਾ ਪਨ ਕਾਲਂ ਕਤ੍ਵਾ ਏਕਿਸ੍ਸਾ ਗਿਰਿਕਨ੍ਦਰਾਯ ਏਕਾ ਬਕਸਕੁਣਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਸਕ੍ਕੋ ਅਤ੍ਤਨੋ ਪਰਿਚਾਰਿਕਾ ਓਲੋਕੇਨ੍ਤੋ ‘‘ਸੁਧਮ੍ਮਾ ਇਧੇਵ ਨਿਬ੍ਬਤ੍ਤਾ, ਤਥਾ ਨਨ੍ਦਾ ਚ ਚਿਤ੍ਤਾ ਚ, ਸੁਜਾ ਨੁ ਖੋ ਕੁਹਿਂ ਨਿਬ੍ਬਤ੍ਤਾ’’ਤਿ ਚਿਨ੍ਤੇਨ੍ਤੋ ਤਂ ਤਤ੍ਥ ਨਿਬ੍ਬਤ੍ਤਂ ਦਿਸ੍ਵਾ, ‘‘ਬਾਲਾ ਕਿਞ੍ਚਿ ਪੁਞ੍ਞਂ ਅਕਤ੍ਵਾ ਇਦਾਨਿ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਾ, ਇਦਾਨਿ ਪਨ ਤਂ ਪੁਞ੍ਞਂ ਕਾਰੇਤ੍ਵਾ ਇਧਾਨੇਤੁਂ ਵਟ੍ਟਤੀ’’ਤਿ ਅਤ੍ਤਭਾਵਂ ਵਿਜਹਿਤ੍ਵਾ ਅਞ੍ਞਾਤਕਵੇਸੇਨ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ, ‘‘ਕਿਂ ਕਰੋਨ੍ਤੀ ਇਧ ਵਿਚਰਸੀ’’ਤਿ ਪੁਚ੍ਛਿ. ‘‘ਕੋ ਪਨ ਤ੍ਵਂ, ਸਾਮੀ’’ਤਿ? ‘‘ਅਹਂ ਤੇ ਸਾਮਿਕੋ ਮਘੋ’’ਤਿ. ‘‘ਕੁਹਿਂ ਨਿਬ੍ਬਤ੍ਤੋਸਿ, ਸਾਮੀ’’ਤਿ? ‘‘ਅਹਂ ਤਾਵਤਿਂਸਦੇਵਲੋਕੇ ਨਿਬ੍ਬਤ੍ਤੋ’’. ‘‘ਤਵ ਸਹਾਯਿਕਾਨਂ ਪਨ ਨਿਬ੍ਬਤ੍ਤਟ੍ਠਾਨਂ ਜਾਨਾਸੀ’’ਤਿ? ‘‘ਨ ਜਾਨਾਮਿ, ਸਾਮੀ’’ਤਿ. ‘‘ਤਾਪਿ ਮਮੇਵ ਸਨ੍ਤਿਕੇ ਨਿਬ੍ਬਤ੍ਤਾ, ਪਸ੍ਸਿਸ੍ਸਸਿ ਤਾ ਸਹਾਯਿਕਾ’’ਤਿ. ‘‘ਕਥਾਹਂ ਤਤ੍ਥ ਗਮਿਸ੍ਸਾਮੀ’’ਤਿ? ਸਕ੍ਕੋ ‘‘ਅਹਂ ਤਂ ਤਤ੍ਥ ਨੇਸ੍ਸਾਮੀ’’ਤਿ ਵਤ੍ਵਾ ਹਤ੍ਥਤਲੇ ਠਪੇਤ੍ਵਾ ਦੇਵਲੋਕਂ ਨੇਤ੍ਵਾ ਨਨ੍ਦਾਯ ਪੋਕ੍ਖਰਣਿਯਾ ਤੀਰੇ ਵਿਸ੍ਸਜ੍ਜੇਤ੍ਵਾ ਇਤਰਾਸਂ ਤਿਸ੍ਸਨ੍ਨਂ ਆਰੋਚੇਸਿ – ‘‘ਤੁਮ੍ਹਾਕਂ ਸਹਾਯਿਕਂ ਸੁਜਂ ਪਸ੍ਸਿਸ੍ਸਥਾ’’ਤਿ. ‘‘ਕੁਹਿਂ ਸਾ, ਦੇਵਾ’’ਤਿ? ‘‘ਨਨ੍ਦਾਯ ਪੋਕ੍ਖਰਣਿਯਾ ਤੀਰੇ ਠਿਤਾ’’ਤਿ ਆਹ. ਤਾ ਤਿਸ੍ਸੋਪਿ ਗਨ੍ਤ੍ਵਾ, ‘‘ਅਹੋ ਅਯ੍ਯਾਯ ਏਵਰੂਪਂ ਅਤ੍ਤਭਾਵਮਣ੍ਡਨਸ੍ਸ ਫਲਂ, ਇਦਾਨਿਸ੍ਸਾ ਤੁਣ੍ਡਂ ਪਸ੍ਸਥ, ਪਾਦੇ ਪਸ੍ਸਥ, ਜਙ੍ਘਾ ਪਸ੍ਸਥ, ਸੋਭਤਿ ਵਤਸ੍ਸਾ ਅਤ੍ਤਭਾਵੋ’’ਤਿ ਕੇਲ਼ਿਂ ਕਤ੍ਵਾ ਪਕ੍ਕਮਿਂਸੁ.

ਪੁਨ ਸਕ੍ਕੋ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ, ‘‘ਦਿਟ੍ਠਾ ਤੇ ਸਹਾਯਿਕਾ’’ਤਿ ਵਤ੍ਵਾ ‘‘ਦਿਟ੍ਠਾ ਮਂ ਉਪ੍ਪਣ੍ਡੇਤ੍ਵਾ ਗਤਾ, ਤਤ੍ਥੇਵ ਮਂ ਨੇਹੀ’’ਤਿ ਵੁਤ੍ਤੇ ਤਂ ਤਤ੍ਥੇਵ ਨੇਤ੍ਵਾ ਉਦਕੇ ਵਿਸ੍ਸਜ੍ਜੇਤ੍ਵਾ, ‘‘ਦਿਟ੍ਠਾ ਤੇ ਤਾਸਂ ਸਮ੍ਪਤ੍ਤੀ’’ਤਿ ਪੁਚ੍ਛਿ. ‘‘ਦਿਟ੍ਠਾ, ਦੇਵਾ’’ਤਿ? ‘‘ਤਯਾਪਿ ਤਤ੍ਥ ਨਿਬ੍ਬਤ੍ਤਨੂਪਾਯਂ ਕਾਤੁਂ ਵਟ੍ਟਤੀ’’ਤਿ. ‘‘ਕਿਂ ਕਰੋਮਿ, ਦੇਵਾ’’ਤਿ? ‘‘ਮਯਾ ਦਿਨ੍ਨਂ ਓਵਾਦਂ ਰਕ੍ਖਿਸ੍ਸਸੀ’’ਤਿ. ‘‘ਰਕ੍ਖਿਸ੍ਸਾਮਿ, ਦੇਵਾ’’ਤਿ. ਅਥਸ੍ਸਾ ਪਞ੍ਚ ਸੀਲਾਨਿ ਦਤ੍ਵਾ, ‘‘ਅਪ੍ਪਮਤ੍ਤਾ ਰਕ੍ਖਾਹੀ’’ਤਿ ਵਤ੍ਵਾ ਪਕ੍ਕਾਮਿ. ਸਾ ਤਤੋ ਪਟ੍ਠਾਯ ਸਯਂਮਤਮਚ੍ਛਕੇਯੇਵ ਪਰਿਯੇਸਿਤ੍ਵਾ ਖਾਦਤਿ. ਸਕ੍ਕੋ ਕਤਿਪਾਹਚ੍ਚਯੇਨ ਤਸ੍ਸਾ ਵੀਮਂਸਨਤ੍ਥਾਯ ਗਨ੍ਤ੍ਵਾ, ਵਾਲੁਕਾਪਿਟ੍ਠੇ ਮਤਮਚ੍ਛਕੋ ਵਿਯ ਹੁਤ੍ਵਾ ਉਤ੍ਤਾਨੋ ਨਿਪਜ੍ਜਿ. ਸਾ ਤਂ ਦਿਸ੍ਵਾ ‘‘ਮਤਮਚ੍ਛਕੋ’’ਤਿ ਸਞ੍ਞਾਯ ਅਗ੍ਗਹੇਸਿ. ਮਚ੍ਛੋ ਗਿਲਨਕਾਲੇ ਨਙ੍ਗੁਟ੍ਠਂ ਚਾਲੇਸਿ. ਸਾ ‘‘ਸਜੀਵਮਚ੍ਛਕੋ’’ਤਿ ਉਦਕੇ ਵਿਸ੍ਸਜ੍ਜੇਸਿ. ਸੋ ਥੋਕਂ ਵੀਤਿਨਾਮੇਤ੍ਵਾ ਪੁਨ ਤਸ੍ਸਾ ਪੁਰਤੋ ਉਤ੍ਤਾਨੋ ਹੁਤ੍ਵਾ ਨਿਪਜ੍ਜਿ. ਪੁਨ ਸਾ ‘‘ਮਤਮਚ੍ਛਕੋ’’ਤਿ ਸਞ੍ਞਾਯ ਗਹੇਤ੍ਵਾ ਗਿਲਨਕਾਲੇ ਅਗ੍ਗਨਙ੍ਗੁਟ੍ਠਂ ਚਾਲੇਸਿ. ਤਂ ਦਿਸ੍ਵਾ ‘‘ਸਜੀਵਮਚ੍ਛੋ’’ਤਿ ਵਿਸ੍ਸਜ੍ਜੇਸਿ. ਏਵਂ ਤਿਕ੍ਖਤ੍ਤੁਂ ਵੀਮਂਸਿਤ੍ਵਾ ‘‘ਸਾਧੁਕਂ ਸੀਲਂ ਰਕ੍ਖਤੀ’’ਤਿ ਅਤ੍ਤਾਨਂ ਜਾਨਾਪੇਤ੍ਵਾ ‘‘ਅਹਂ ਤਵ ਵੀਮਂਸਨਤ੍ਥਾਯ ਆਗਤੋ, ਸਾਧੁਕਂ ਸੀਲਂ ਰਕ੍ਖਸਿ, ਏਵਂ ਰਕ੍ਖਮਾਨਾ ਨ ਚਿਰਸ੍ਸੇਵ ਮਮ ਸਨ੍ਤਿਕੇ ਨਿਬ੍ਬਤ੍ਤਿਸ੍ਸਸਿ, ਅਪ੍ਪਮਤ੍ਤਾ ਹੋਹੀ’’ਤਿ ਵਤ੍ਵਾ ਪਕ੍ਕਾਮਿ.

ਸਾ ਤਤੋ ਪਟ੍ਠਾਯ ਪਨ ਸਯਂਮਤਮਚ੍ਛਂ ਲਭਤਿ ਵਾ, ਨ ਵਾ. ਅਲਭਮਾਨਾ ਕਤਿਪਾਹਚ੍ਚਯੇਨੇਵ ਸੁਸ੍ਸਿਤ੍ਵਾ ਕਾਲਂ ਕਤ੍ਵਾ ਤਸ੍ਸ ਸੀਲਸ੍ਸ ਫਲੇਨ ਬਾਰਾਣਸਿਯਂ ਕੁਮ੍ਭਕਾਰਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਅਥਸ੍ਸਾ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਿਕਕਾਲੇ ਸਕ੍ਕੋ ‘‘ਕੁਹਿਂ ਨੁ ਖੋ ਸਾ ਨਿਬ੍ਬਤ੍ਤਾ’’ਤਿ ਆਵਜ੍ਜੇਨ੍ਤੋ ਦਿਸ੍ਵਾ, ‘‘ਇਦਾਨਿ ਮਯਾ ਤਤ੍ਥ ਗਨ੍ਤੁਂ ਵਟ੍ਟਤੀ’’ਤਿ ਏਲ਼ਾਲੁਕਵਣ੍ਣੇਨ ਪਞ੍ਞਾਯਮਾਨੇਹਿ ਸਤ੍ਤਹਿ ਰਤਨੇਹਿ ਯਾਨਕਂ ਪੂਰੇਤ੍ਵਾ ਤਂ ਪਾਜੇਨ੍ਤੋ ਬਾਰਾਣਸਿਂ ਪਵਿਸਿਤ੍ਵਾ, ‘‘ਅਮ੍ਮਤਾਤਾ, ਏਲ਼ਾਲੁਕਾਨਿ ਗਣ੍ਹਥ ਗਣ੍ਹਥਾ’’ਤਿ ਉਗ੍ਘੋਸੇਨ੍ਤੋ ਵੀਥਿਂ ਪਟਿਪਜ੍ਜਿ. ਮੁਗ੍ਗਮਾਸਾਦੀਨਿ ਗਹੇਤ੍ਵਾ ਆਗਤੇ ਪਨ ‘‘ਮੂਲੇਨ ਨ ਦੇਮੀ’’ਤਿ ਵਤ੍ਵਾ, ‘‘ਕਥਂ ਦੇਸੀ’’ਤਿ ਵੁਤ੍ਤੇ, ‘‘ਸੀਲਰਕ੍ਖਿਕਾਯ ਇਤ੍ਥਿਯਾ ਦਮ੍ਮੀ’’ਤਿ ਆਹ. ‘‘ਸੀਲਂ ਨਾਮ, ਸਾਮਿ, ਕੀਦਿਸਂ, ਕਿਂ ਕਾਲ਼ਂ, ਉਦਾਹੁ ਨੀਲਾਦਿਵਣ੍ਣ’’ਨ੍ਤਿ? ‘‘ਤੁਮ੍ਹੇ ‘ਸੀਲਂ ਕੀਦਿਸ’ਨ੍ਤਿਪਿ ਨ ਜਾਨਾਥ, ਕਿਮੇਵ ਨਂ ਰਕ੍ਖਿਸ੍ਸਥ, ਸੀਲਰਕ੍ਖਿਕਾਯ ਪਨ ਦਸ੍ਸਾਮੀ’’ਤਿ. ‘‘ਸਾਮਿ, ਏਸਾ ਕੁਮ੍ਭਕਾਰਸ੍ਸ ਧੀਤਾ ‘ਸੀਲਂ ਰਕ੍ਖਾਮੀ’ਤਿ ਵਿਚਰਤਿ, ਏਤਿਸ੍ਸਾ ਦੇਹੀ’’ਤਿ. ਸਾਪਿ ਨਂ ‘‘ਤੇਨ ਹਿ ਮਯ੍ਹਂ ਦੇਹਿ, ਸਾਮੀ’’ਤਿ ਆਹ. ‘‘ਕਾਸਿ ਤ੍ਵ’’ਨ੍ਤਿ? ‘‘ਅਹਂ ਅਵਿਜਹਿਤਪਞ੍ਚਸੀਲਾ’’ਤਿ. ‘‘ਤੁਯ੍ਹਮੇਵੇਤਾਨਿ ਮਯਾ ਆਨੀਤਾਨੀ’’ਤਿ ਯਾਨਕਂ ਪਾਜੇਨ੍ਤੋ ਤਸ੍ਸਾ ਘਰਂ ਗਨ੍ਤ੍ਵਾ ਅਞ੍ਞੇਹਿ ਅਨਾਹਰਿਯਂ ਕਤ੍ਵਾ ਏਲ਼ਾਲੁਕਵਣ੍ਣੇਨ ਦੇਵਦਤ੍ਤਿਯਂ ਧਨਂ ਦਤ੍ਵਾ ਅਤ੍ਤਾਨਂ ਜਾਨਾਪੇਤ੍ਵਾ, ‘‘ਇਦਂ ਤੇ ਜੀਵਿਤਵੁਤ੍ਤਿਯਾ ਧਨਂ, ਪਞ੍ਚਸੀਲਾਨਿ ਅਖਣ੍ਡਾਦੀਨਿ ਕਤ੍ਵਾ ਰਕ੍ਖਾਹੀ’’ਤਿ ਵਤ੍ਵਾ ਪਕ੍ਕਾਮਿ.

ਸਾਪਿ ਤਤੋ ਚਵਿਤ੍ਵਾ ਅਸੁਰਭਵਨੇ ਅਸੁਰਜੇਟ੍ਠਕਸ੍ਸ ਧੀਤਾ ਹੁਤ੍ਵਾ ਸਕ੍ਕਸ੍ਸ ਵੇਰਿਘਰੇ ਨਿਬ੍ਬਤ੍ਤਿ. ਦ੍ਵੀਸੁ ਪਨ ਅਤ੍ਤਭਾਵੇਸੁ ਸੀਲਸ੍ਸ ਸੁਰਕ੍ਖਿਤਤ੍ਤਾ ਅਭਿਰੂਪਾ ਅਹੋਸਿ ਸੁਵਣ੍ਣਵਣ੍ਣਾ ਅਸਾਧਾਰਣਾਯ ਰੂਪਸਿਰਿਯਾ ਸਮਨ੍ਨਾਗਤਾ. ਵੇਪਚਿਤ੍ਤਿਅਸੁਰਿਨ੍ਦੋ ਆਗਤਾਗਤਾਨਂ ਅਸੁਰਾਨਂ ‘‘ਤੁਮ੍ਹੇ ਮਮ ਧੀਤੁ ਅਨੁਚ੍ਛਵਿਕਾ ਨ ਹੋਥਾ’’ਤਿ ਤਂ ਕਸ੍ਸਚਿ ਅਦਤ੍ਵਾ, ‘‘ਮਮ ਧੀਤਾ ਅਤ੍ਤਨਾਵ ਅਤ੍ਤਨੋ ਅਨੁਚ੍ਛਵਿਕਂ ਸਾਮਿਕਂ ਗਹੇਸ੍ਸਤੀ’’ਤਿ ਅਸੁਰਬਲਂ ਸਨ੍ਨਿਪਾਤਾਪੇਤ੍ਵਾ, ‘‘ਤੁਯ੍ਹਂ ਅਨੁਚ੍ਛਵਿਕਂ ਸਾਮਿਕਂ ਗਣ੍ਹਾ’’ਤਿ ਤਸ੍ਸਾ, ਹਤ੍ਥੇ ਪੁਪ੍ਫਦਾਮਂ ਅਦਾਸਿ. ਤਸ੍ਮਿਂ ਖਣੇ ਸਕ੍ਕੋ ਤਸ੍ਸਾ ਨਿਬ੍ਬਤ੍ਤਟ੍ਠਾਨਂ ਓਲੋਕੇਨ੍ਤੋ ਤਂ ਪਵਤ੍ਤਿਂ ਞਤ੍ਵਾ, ‘‘ਇਦਾਨਿ ਮਯਾ ਗਨ੍ਤ੍ਵਾ ਤਂ ਆਨੇਤੁਂ ਵਟ੍ਟਤੀ’’ਤਿ ਮਹਲ੍ਲਕਅਸੁਰਵਣ੍ਣਂ ਨਿਮ੍ਮਿਨਿਤ੍ਵਾ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਅਟ੍ਠਾਸਿ. ਸਾਪਿ ਇਤੋ ਚਿਤੋ ਚ ਓਲੋਕੇਨ੍ਤੀ ਤਂ ਦਿਟ੍ਠਮਤ੍ਤਾਵ ਪੁਬ੍ਬਸਨ੍ਨਿਵਾਸਵਸੇਨ ਉਪ੍ਪਨ੍ਨੇਨ ਪੇਮੇਨ ਮਹੋਘੇਨੇਵ ਅਜ੍ਝੋਤ੍ਥਟਹਦਯਾ ਹੁਤ੍ਵਾ, ‘‘ਏਸੋ ਮੇ ਸਾਮਿਕੋ’’ਤਿ ਤਸ੍ਸ ਉਪਰਿ ਪੁਪ੍ਫਦਾਮਂ ਖਿਪਿ. ਅਸੁਰਾ ‘‘ਅਮ੍ਹਾਕਂ ਰਾਜਾ ਏਤ੍ਤਕਂ ਕਾਲਂ ਧੀਤੁ ਅਨੁਚ੍ਛਵਿਕਂ ਅਲਭਿਤ੍ਵਾ ਇਦਾਨਿ ਲਭਿ, ਅਯਮੇਵਸ੍ਸ ਧੀਤੁ ਪਿਤਾਮਹਤੋ ਮਹਲ੍ਲਕੋ ਅਨੁਚ੍ਛਵਿਕੋ’’ਤਿ ਲਜ੍ਜਮਾਨਾ ਅਪਕ੍ਕਮਿਂਸੁ. ਸਕ੍ਕੋਪਿ ਤਂ ਹਤ੍ਥੇ ਗਹੇਤ੍ਵਾ ‘‘ਸਕ੍ਕੋਹਮਸ੍ਮੀ’’ਤਿ ਨਦਿਤ੍ਵਾ ਆਕਾਸੇ ਪਕ੍ਖਨ੍ਦਿ. ਅਸੁਰਾ ‘‘ਵਞ੍ਚਿਤਮ੍ਹਾ ਜਰਸਕ੍ਕੇਨਾ’’ਤਿ ਤਂ ਅਨੁਬਨ੍ਧਿਂਸੁ. ਮਾਤਲਿ, ਸਙ੍ਗਾਹਕੋ ਵੇਜਯਨ੍ਤਰਥਂ ਆਹਰਿਤ੍ਵਾ ਅਨ੍ਤਰਾਮਗ੍ਗੇ ਅਟ੍ਠਾਸਿ. ਸਕ੍ਕੋ ਤਂ ਤਤ੍ਥ ਆਰੋਪੇਤ੍ਵਾ ਦੇਵਨਗਰਾਭਿਮੁਖੋ ਪਾਯਾਸਿ. ਅਥਸ੍ਸ ਸਿਪ੍ਪਲਿਵਨਂ ਸਮ੍ਪਤ੍ਤਕਾਲੇ ਰਥਸਦ੍ਦਂ ਸੁਤ੍ਵਾ ਭੀਤਾ ਗਰੁਲ਼ਪੋਤਕਾ ਵਿਰਵਿਂਸੁ. ਤੇਸਂ ਸਦ੍ਦਂ ਸੁਤ੍ਵਾ ਸਕ੍ਕੋ ਮਾਤਲਿਂ ਪੁਚ੍ਛਿ – ‘‘ਕੇ ਏਤੇ ਵਿਰਵਨ੍ਤੀ’’ਤਿ? ‘‘ਗਰੁਲ਼ਪੋਤਕਾ, ਦੇਵਾ’’ਤਿ. ‘‘ਕਿਂ ਕਾਰਣਾ’’ਤਿ? ‘‘ਰਥਸਦ੍ਦਂ ਸੁਤ੍ਵਾ ਮਰਣਭਯੇਨਾ’’ਤਿ. ‘‘ਮਂ ਏਕਂ ਨਿਸ੍ਸਾਯ ਏਤ੍ਤਕੋ ਦਿਜੋ ਰਥਵੇਗੇਨ ਵਿਚੁਣ੍ਣਿਤੋ ਮਾ ਨਸ੍ਸਿ, ਨਿਵਤ੍ਤੇਹਿ ਰਥ’’ਨ੍ਤਿ. ਸੋਪਿ ਸਿਨ੍ਧਵਸਹਸ੍ਸਸ੍ਸ ਦਣ੍ਡਕਸਞ੍ਞਂ ਦਤ੍ਵਾ ਰਥਂ ਨਿਵਤ੍ਤੇਸਿ. ਤਂ ਦਿਸ੍ਵਾ ਅਸੁਰਾ ‘‘ਜਰਸਕ੍ਕੋ ਅਸੁਰਪੁਰਤੋ ਪਟ੍ਠਾਯ ਪਲਾਯਨ੍ਤੋ ਇਦਾਨਿ ਰਥਂ ਨਿਵਤ੍ਤੇਸਿ, ਅਦ੍ਧਾ ਤੇਨ ਉਪਤ੍ਥਮ੍ਭੋ ਲਦ੍ਧੋ ਭਵਿਸ੍ਸਤੀ’’ਤਿ ਨਿਵਤ੍ਤੇਤ੍ਵਾ ਆਗਮਨਮਗ੍ਗੇਨੇਵ ਅਸੁਰਪੁਰਂ ਪਵਿਸਿਤ੍ਵਾ ਪੁਨ ਸੀਸਂ ਨ ਉਕ੍ਖਿਪਿਂਸੁ.

ਸਕ੍ਕੋਪਿ ਸੁਜਂ ਅਸੁਰਕਞ੍ਞਂ ਦੇਵਨਗਰਂ ਨੇਤ੍ਵਾ ਅਡ੍ਢਤੇਯ੍ਯਾਨਂ ਅਚ੍ਛਰਾਕੋਟੀਨਂ ਜੇਟ੍ਠਿਕਟ੍ਠਾਨੇ ਠਪੇਸਿ. ਸਾ ਸਕ੍ਕਂ ਵਰਂ ਯਾਚਿ – ‘‘ਮਹਾਰਾਜ, ਮਮ ਇਮਸ੍ਮਿਂ ਦੇਵਲੋਕੇ ਮਾਤਾਪਿਤਰੋ ਵਾ ਭਾਤਿਕਭਗਿਨਿਯੋ ਵਾ ਨਤ੍ਥਿ, ਯਤ੍ਥ ਯਤ੍ਥ ਗਚ੍ਛਸਿ, ਤਤ੍ਥ ਤਤ੍ਥ ਮਂ ਗਹੇਤ੍ਵਾਵ ਗਚ੍ਛੇਯ੍ਯਾਸੀ’’ਤਿ. ਸੋ ‘‘ਸਾਧੂ’’ਤਿ ਤਸ੍ਸਾ ਪਟਿਞ੍ਞਂ ਅਦਾਸਿ. ਤਤੋ ਪਟ੍ਠਾਯ ਚਿਤ੍ਤਪਾਟਲਿਯਾ ਪੁਪ੍ਫਿਤਾਯ ਅਸੁਰਾ ‘‘ਅਮ੍ਹਾਕਂ ਨਿਬ੍ਬਤ੍ਤਟ੍ਠਾਨੇ ਦਿਬ੍ਬਪਾਰਿਚ੍ਛਤ੍ਤਕਸ੍ਸ ਪੁਪ੍ਫਨਕਾਲੋ’’ਤਿ ਯੁਦ੍ਧਤ੍ਥਾਯ ਸਗ੍ਗਂ ਅਭਿਰੁਹਨ੍ਤਿ. ਸਕ੍ਕੋ ਹੇਟ੍ਠਾਸਮੁਦ੍ਦੇ ਨਾਗਾਨਂ ਆਰਕ੍ਖਂ ਅਦਾਸਿ, ਤਤੋ ਸੁਪਣ੍ਣਾਨਂ, ਤਤੋ ਕੁਮ੍ਭਣ੍ਡਾਨਂ, ਤਤੋ ਯਕ੍ਖਾਨਂ. ਤਤੋ ਚਤੁਨ੍ਨਂ ਮਹਾਰਾਜਾਨਂ. ਸਬ੍ਬੂਪਰਿ ਪਨ ਉਪਦ੍ਦਵਨਿਵਤ੍ਤਨਤ੍ਥਾਯ ਦੇਵਨਗਰਦ੍ਵਾਰੇਸੁ ਵਜਿਰਹਤ੍ਥਾ ਇਨ੍ਦਪਟਿਮਾ ਠਪੇਸਿ. ਅਸੁਰਾ ਨਾਗਾਦਯੋ ਜਿਨਿਤ੍ਵਾ ਆਗਤਾਪਿ ਇਨ੍ਦਪਟਿਮਾ ਦੂਰਤੋ ਦਿਸ੍ਵਾ ‘‘ਸਕ੍ਕੋ ਨਿਕ੍ਖਨ੍ਤੋ’’ਤਿ ਪਲਾਯਨ੍ਤਿ. ਏਵਂ, ਮਹਾਲਿ, ਮਘੋ ਮਾਣਵੋ ਅਪ੍ਪਮਾਦਪਟਿਪਦਂ ਪਟਿਪਜ੍ਜਿ. ਏਵਂ ਅਪ੍ਪਮਤ੍ਤੋ ਪਨੇਸ ਏਵਰੂਪਂ ਇਸ੍ਸਰਿਯਂ ਪਤ੍ਵਾ ਦ੍ਵੀਸੁ ਦੇਵਲੋਕੇਸੁ ਰਜ੍ਜਂ ਕਾਰੇਸਿ. ਅਪ੍ਪਮਾਦੋ ਨਾਮੇਸ ਬੁਦ੍ਧਾਦੀਹਿ ਪਸਤ੍ਥੋ. ਅਪ੍ਪਮਾਦਞ੍ਹਿ ਨਿਸ੍ਸਾਯ ਸਬ੍ਬੇਸਮ੍ਪਿ ਲੋਕਿਯਲੋਕੁਤ੍ਤਰਾਨਂ ਵਿਸੇਸਾਨਂ ਅਧਿਗਮੋ ਹੋਤੀਤਿ ਵਤ੍ਵਾ ਇਮਂ ਗਾਥਮਾਹ –

੩੦. ‘‘ਅਪ੍ਪਮਾਦੇਨ ਮਘਵਾ, ਦੇਵਾਨਂ ਸੇਟ੍ਠਤਂ ਗਤੋ;

ਅਪ੍ਪਮਾਦਂ ਪਸਂਸਨ੍ਤਿ, ਪਮਾਦੋ ਗਰਹਿਤੋ ਸਦਾ’’ਤਿ.

ਤਤ੍ਥ ਅਪ੍ਪਮਾਦੇਨਾਤਿ ਮਚਲਗਾਮੇ ਭੂਮਿਪ੍ਪਦੇਸਸੋਧਨਂ ਆਦਿਂ ਕਤ੍ਵਾ ਕਤੇਨ ਅਪ੍ਪਮਾਦੇਨ. ਮਘਵਾਤਿ ਇਦਾਨਿ ‘‘ਮਘਵਾ’’ਤਿਪਞ੍ਞਾਤੋ ਮਘੋ ਮਾਣਵੋ ਦ੍ਵਿਨ੍ਨਂ ਦੇਵਲੋਕਾਨਂ ਰਾਜਭਾਵੇਨ ਦੇਵਾਨਂ ਸੇਟ੍ਠਤਂ ਗਤੋ. ਪਸਂਸਨ੍ਤੀਤਿ ਬੁਦ੍ਧਾਦਯੋ ਪਣ੍ਡਿਤਾ ਅਪ੍ਪਮਾਦਮੇਵ ਥੋਮੇਨ੍ਤਿ ਵਣ੍ਣਯਨ੍ਤਿ. ਕਿਂ ਕਾਰਣਾ? ਸਬ੍ਬੇਸਂ ਲੋਕਿਯਲੋਕੁਤ੍ਤਰਾਨਂ ਵਿਸੇਸਾਨਂ ਪਟਿਲਾਭਕਾਰਣਤ੍ਤਾ. ਪਮਾਦੋ ਗਰਹਿਤੋ ਸਦਾਤਿ ਪਮਾਦੋ ਪਨ ਤੇਹਿ ਅਰਿਯੇਹਿ ਨਿਚ੍ਚਂ ਗਰਹਿਤੋ ਨਿਨ੍ਦਿਤੋ. ਕਿਂ ਕਾਰਣਾ? ਸਬ੍ਬਵਿਪਤ੍ਤੀਨਂ ਮੂਲਭਾਵਤੋ. ਮਨੁਸ੍ਸਦੋਭਗ੍ਗਂ ਵਾ ਹਿ ਅਪਾਯੁਪ੍ਪਤ੍ਤਿ ਵਾ ਸਬ੍ਬਾ ਪਮਾਦਮੂਲਿਕਾਯੇਵਾਤਿ.

ਗਾਥਾਪਰਿਯੋਸਾਨੇ ਮਹਾਲਿ ਲਿਚ੍ਛਵੀ ਸੋਤਾਪਤ੍ਤਿਫਲੇ ਪਤਿਟ੍ਠਹਿ, ਸਮ੍ਪਤ੍ਤਪਰਿਸਾਯਪਿ ਬਹੂ ਸੋਤਾਪਨ੍ਨਾਦਯੋ ਜਾਤਾਤਿ.

ਮਘਵਤ੍ਥੁ ਸਤ੍ਤਮਂ.