੬. ਪਮਤ੍ਤਾਪਮਤ੍ਤਦ੍ਵੇਸਹਾਯਕਵਤ੍ਥੁ

ਅਪ੍ਪਮਤ੍ਤੋ ਪਮਤ੍ਤੇਸੂਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦ੍ਵੇ ਸਹਾਯਕੇ ਭਿਕ੍ਖੂ ਆਰਬ੍ਭ ਕਥੇਸਿ.

ਤੇ ਕਿਰ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਆਰਞ੍ਞਕਵਿਹਾਰਂ ਪਵਿਸਿਂਸੁ. ਤੇਸੁ ਏਕੋ ਕਿਰ ਕਾਲਸ੍ਸੇਵ ਦਾਰੂਨਿ ਆਹਰਿਤ੍ਵਾ ਅਙ੍ਗਾਰਕਪਲ੍ਲਂ ਸਜ੍ਜੇਤ੍ਵਾ ਦਹਰਸਾਮਣੇਰੇਹਿ ਸਦ੍ਧਿਂ ਸਲ੍ਲਪਨ੍ਤੋ ਪਠਮਯਾਮਂ ਵਿਸਿਬ੍ਬਮਾਨੋ ਨਿਸੀਦਤਿ. ਏਕੋ ਅਪ੍ਪਮਤ੍ਤੋ ਸਮਣਧਮ੍ਮਂ ਕਰੋਨ੍ਤੋ ਇਤਰਂ ਓਵਦਤਿ, ‘‘ਆਵੁਸੋ, ਮਾ ਏਵਂ ਕਰਿ, ਪਮਤ੍ਤਸ੍ਸ ਹਿ ਚਤ੍ਤਾਰੋ ਅਪਾਯਾ ਸਕਘਰਸਦਿਸਾ. ਬੁਦ੍ਧਾ ਨਾਮ ਸਾਠੇਯ੍ਯੇਨ ਆਰਾਧੇਤੁਂ ਨ ਸਕ੍ਕਾ’’ਤਿ ਸੋ ਤਸ੍ਸੋਵਾਦਂ ਨ ਸੁਣਾਤਿ. ਇਤਰੋ ‘‘ਨਾਯਂ ਵਚਨਕ੍ਖਮੋ’’ਤਿ ਤਂ ਅਵਤ੍ਵਾ ਅਪ੍ਪਮਤ੍ਤੋਵ ਸਮਣਧਮ੍ਮਮਕਾਸਿ. ਅਲਸਤ੍ਥੇਰੋਪਿ ਪਠਮਯਾਮੇ ਵਿਸਿਬ੍ਬੇਤ੍ਵਾ ਇਤਰਸ੍ਸ ਚਙ੍ਕਮਿਤ੍ਵਾ ਗਬ੍ਭਂ ਪਵਿਟ੍ਠਕਾਲੇ ਪਵਿਸਿਤ੍ਵਾ, ‘‘ਮਹਾਕੁਸੀਤ, ਤ੍ਵਂ ਨਿਪਜ੍ਜਿਤ੍ਵਾ ਸਯਨਤ੍ਥਾਯ ਅਰਞ੍ਞਂ ਪਵਿਟ੍ਠੋਸਿ, ਕਿਂ ਬੁਦ੍ਧਾਨਂ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਉਟ੍ਠਾਯ ਸਮਣਧਮ੍ਮਂ ਕਾਤੁਂ ਵਟ੍ਟਤੀ’’ਤਿ ਵਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਪਵਿਸਿਤ੍ਵਾ ਨਿਪਜ੍ਜਿਤ੍ਵਾ ਸੁਪਤਿ. ਇਤਰੋਪਿ ਮਜ੍ਝਿਮਯਾਮੇ ਵਿਸ੍ਸਮਿਤ੍ਵਾ ਪਚ੍ਛਿਮਯਾਮੇ ਪਚ੍ਚੁਟ੍ਠਾਯ ਸਮਣਧਮ੍ਮਂ ਕਰੋਤਿ. ਸੋ ਏਵਂ ਅਪ੍ਪਮਤ੍ਤੋ ਵਿਹਰਨ੍ਤੋ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਇਤਰੋ ਪਮਾਦੇਨੇਵ ਕਾਲਂ ਵੀਤਿਨਾਮੇਸਿ. ਤੇ ਵੁਟ੍ਠਵਸ੍ਸਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਸਤ੍ਥਾ ਤੇਹਿ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ, ‘‘ਕਚ੍ਚਿ, ਭਿਕ੍ਖਵੇ, ਅਪ੍ਪਮਤ੍ਤਾ ਸਮਣਧਮ੍ਮਂ ਕਰਿਤ੍ਥ, ਕਚ੍ਚਿ ਵੋ ਪਬ੍ਬਜਿਤਕਿਚ੍ਚਂ ਮਤ੍ਥਕਂ ਪਤ੍ਤ’’ਨ੍ਤਿ ਪੁਚ੍ਛਿ. ਪਠਮਂ ਪਮਤ੍ਤੋ ਭਿਕ੍ਖੁ ਆਹ – ‘‘ਕੁਤੋ, ਭਨ੍ਤੇ, ਏਤਸ੍ਸ ਅਪ੍ਪਮਾਦੋ, ਗਤਕਾਲਤੋ ਪਟ੍ਠਾਯ ਨਿਪਜ੍ਜਿਤ੍ਵਾ ਨਿਦ੍ਦਾਯਨ੍ਤੋ ਕਾਲਂ ਵੀਤਿਨਾਮੇਸੀ’’ਤਿ. ‘‘ਤ੍ਵਂ ਪਨ ਭਿਕ੍ਖੂ’’ਤਿ. ‘‘ਅਹਂ, ਭਨ੍ਤੇ, ਕਾਲਸ੍ਸੇਵ ਦਾਰੂਨਿ ਆਹਰਿਤ੍ਵਾ ਅਙ੍ਗਾਰਕਪਲ੍ਲਂ ਸਜ੍ਜੇਤ੍ਵਾ ਪਠਮਯਾਮੇ ਵਿਸਿਬ੍ਬੇਨ੍ਤੋ ਨਿਸੀਦਿਤ੍ਵਾ ਅਨਿਦ੍ਦਾਯਨ੍ਤੋਵ ਕਾਲਂ ਵੀਤਿਨਾਮੇਸਿ’’ਨ੍ਤਿ. ਅਥ ਨਂ ਸਤ੍ਥਾ ‘‘ਤ੍ਵਂ ਪਮਤ੍ਤੋ ਕਾਲਂ ਵੀਤਿਨਾਮੇਤ੍ਵਾ ‘ਅਪ੍ਪਮਤ੍ਤੋਮ੍ਹੀ’ਤਿ ਵਦਸਿ, ਅਪ੍ਪਮਤ੍ਤਂ ਪਨ ਪਮਤ੍ਤਂ ਕਰੋਸੀ’’ਤਿ ਆਹ. ਪੁਨ ਪਮਾਦੇ ਦੋਸੇ, ਅਪ੍ਪਮਾਦੇ ਆਨਿਸਂਸੇ ਪਕਾਸੇਤੁਂ, ‘‘ਤ੍ਵਂ ਮਮ ਪੁਤ੍ਤਸ੍ਸ ਸਨ੍ਤਿਕੇ ਜਵਚ੍ਛਿਨ੍ਨੋ ਦੁਬ੍ਬਲਸ੍ਸੋ ਵਿਯ, ਏਸ ਪਨ ਤਵ ਸਨ੍ਤਿਕੇ ਸੀਘਜਵਸ੍ਸੋ ਵਿਯਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੯. ‘‘ਅਪ੍ਪਮਤ੍ਤੋ ਪਮਤ੍ਤੇਸੁ, ਸੁਤ੍ਤੇਸੁ ਬਹੁਜਾਗਰੋ;

ਅਬਲਸ੍ਸਂਵ ਸੀਘਸ੍ਸੋ, ਹਿਤ੍ਵਾ ਯਾਤਿ ਸੁਮੇਧਸੋ’’ਤਿ.

ਤਤ੍ਥ ਅਪ੍ਪਮਤ੍ਤੋਤਿ ਸਤਿਵੇਪੁਲ੍ਲਪ੍ਪਤ੍ਤਤਾਯ ਅਪ੍ਪਮਾਦਸਮ੍ਪਨ੍ਨੇ ਖੀਣਾਸਵੋ. ਪਮਤ੍ਤੇਸੂਤਿ ਸਤਿਵੋਸਗ੍ਗੇ ਠਿਤੇਸੁ ਸਤ੍ਤੇਸੁ. ਸੁਤ੍ਤੇਸੂਤਿ ਸਤਿਜਾਗਰਿਯਾਭਾਵੇਨ ਸਬ੍ਬਿਰਿਯਾਪਥੇਸੁ ਨਿਦ੍ਦਾਯਨ੍ਤੇਸੁ. ਬਹੁਜਾਗਰੋਤਿ ਮਹਨ੍ਤੇ ਸਤਿਵੇਪੁਲ੍ਲੇ ਜਾਗਰਿਯੇ ਠਿਤੋ. ਅਬਲਸ੍ਸਂਵਾਤਿ ਕੁਣ੍ਠਪਾਦਂ ਛਿਨ੍ਨਜਵਂ ਦੁਬ੍ਬਲਸ੍ਸਂ ਸੀਘਜਵੋ ਸਿਨ੍ਧਵਾਜਾਨੀਯੋ ਵਿਯ. ਸੁਮੇਧਸੋਤਿ ਉਤ੍ਤਮਪਞ੍ਞੋ. ਤਥਾਰੂਪਂ ਪੁਗ੍ਗਲਂ ਆਗਮੇਨਪਿ ਅਧਿਗਮੇਨਪਿ ਹਿਤ੍ਵਾ ਯਾਤਿ. ਮਨ੍ਦਪਞ੍ਞਸ੍ਮਿਞ੍ਹਿ ਏਕਂ ਸੁਤ੍ਤਂ ਗਹੇਤੁਂ ਵਾਯਮਨ੍ਤੇਯੇਵ ਸੁਮੇਧਸੋ ਏਕਂ ਵਗ੍ਗਂ ਗਣ੍ਹਾਤਿ, ਏਵਂ ਤਾਵ ਆਗਮੇਨ ਹਿਤ੍ਵਾ ਯਾਤਿ. ਮਨ੍ਦਪਞ੍ਞੇ ਪਨ ਰਤ੍ਤਿਟ੍ਠਾਨਦਿਵਾਟ੍ਠਾਨਾਨਿ ਕਾਤੁਂ ਵਾਯਮਨ੍ਤੇਯੇਵ ਕਮ੍ਮਟ੍ਠਾਨਂ ਉਗ੍ਗਹੇਤ੍ਵਾ ਸਜ੍ਝਾਯਨ੍ਤੇਯੇਵ ਚ ਸੁਮੇਧਸੋ ਪੁਬ੍ਬਭਾਗੇਪਿ ਪਰੇਨ ਕਤਂ ਰਤ੍ਤਿਟ੍ਠਾਨਂ ਵਾ ਦਿਵਾਟ੍ਠਾਨਂ ਵਾ ਪਵਿਸਿਤ੍ਵਾ ਕਮ੍ਮਟ੍ਠਾਨਂ ਸਮ੍ਮਸਨ੍ਤੋ ਸਬ੍ਬਕਿਲੇਸੇ ਖੇਪੇਤ੍ਵਾ ਨੇਵ ਲੋਕੁਤ੍ਤਰਧਮ੍ਮੇ ਹਤ੍ਥਗਤੇ ਕਰੋਤਿ, ਏਵਂ ਅਧਿਗਮੇਨਪਿ ਹਿਤ੍ਵਾ ਯਾਤਿ. ਵਟ੍ਟੇ ਪਨ ਨਂ ਹਿਤ੍ਵਾ ਛਡ੍ਡੇਤ੍ਵਾ ਵਟ੍ਟਤੋ ਨਿਸ੍ਸਰਨ੍ਤੋ ਯਾਤਿਯੇਵਾਤਿ.

ਗਾਥਾਪਰਿਯੋਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਪਮਤ੍ਤਾਪਮਤ੍ਤਦ੍ਵੇਸਹਾਯਕਵਤ੍ਥੁ ਛਟ੍ਠਂ.