੫. ਮਹਾਕਸ੍ਸਪਤ੍ਥੇਰਵਤ੍ਥੁ

ਪਮਾਦਂ ਅਪ੍ਪਮਾਦੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਹਾਕਸ੍ਸਪਤ੍ਥੇਰਂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਦਿਵਸੇ ਥੇਰੋ ਪਿਪ੍ਫਲਿਗੁਹਾਯਂ ਵਿਹਰਨ੍ਤੋ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਆਲੋਕਂ ਵਡ੍ਢੇਤ੍ਵਾ ਪਮਤ੍ਤੇ ਚ ਅਪ੍ਪਮਤ੍ਤੇ ਚ ਉਦਕਪਥਵੀਪਬ੍ਬਤਾਦੀਸੁ ਚਵਨਕੇ ਉਪਪਜ੍ਜਨਕੇ ਚ ਸਤ੍ਤੇ ਦਿਬ੍ਬੇਨ ਚਕ੍ਖੁਨਾ ਓਲੋਕੇਨ੍ਤੋ ਨਿਸੀਦਿ. ਸਤ੍ਥਾ ਜੇਤਵਨੇ ਨਿਸਿਨ੍ਨਕੋਵ ‘‘ਕੇਨ ਨੁ ਖੋ ਵਿਹਾਰੇਨ ਅਜ੍ਜ ਮਮ ਪੁਤ੍ਤੋ ਕਸ੍ਸਪੋ ਵਿਹਰਤੀ’’ਤਿ ਦਿਬ੍ਬੇਨ ਚਕ੍ਖੁਨਾ ਉਪਧਾਰੇਨ੍ਤੋ ‘‘ਸਤ੍ਤਾਨਂ ਚੁਤੂਪਪਾਤਂ ਓਲੋਕੇਨ੍ਤੋ ਵਿਹਰਤੀ’’ਤਿ ਞਤ੍ਵਾ ‘‘ਸਤ੍ਤਾਨਂ ਚੁਤੂਪਪਾਤੋ ਨਾਮ ਬੁਦ੍ਧਞਾਣੇਨਪਿ ਅਪਰਿਚ੍ਛਿਨ੍ਨੋ, ਮਾਤੁਕੁਚ੍ਛਿਯਂ ਪਟਿਸਨ੍ਧਿਂ ਗਹੇਤ੍ਵਾ ਮਾਤਾਪਿਤਰੋ ਅਜਾਨਾਪੇਤ੍ਵਾ ਚਵਨਸਤ੍ਤਾਨਂ ਪਰਿਚ੍ਛੇਦੋ ਕਾਤੁਂ ਨ ਸਕ੍ਕਾ, ਤੇ ਜਾਨਿਤੁਂ ਤਵ ਅਵਿਸਯੋ, ਕਸ੍ਸਪ, ਅਪ੍ਪਮਤ੍ਤਕੋ ਤਵ ਵਿਸਯੋ, ਸਬ੍ਬਸੋ ਪਨ ਚਵਨ੍ਤੇ ਚ ਉਪਪਜ੍ਜਨ੍ਤੇ ਚ ਜਾਨਿਤੁਂ ਪਸ੍ਸਿਤੁਂ ਬੁਦ੍ਧਾਨਮੇਵ ਵਿਸਯੋ’’ਤਿ ਵਤ੍ਵਾ ਓਭਾਸਂ ਫਰਿਤ੍ਵਾ ਸਮ੍ਮੁਖੇ ਨਿਸਿਨ੍ਨੋ ਵਿਯ ਹੁਤ੍ਵਾ ਇਮਂ ਗਾਥਮਾਹ –

੨੮. ‘‘ਪਮਾਦਂ ਅਪ੍ਪਮਾਦੇਨ, ਯਦਾ ਨੁਦਤਿ ਪਣ੍ਡਿਤੋ;

ਪਞ੍ਞਾਪਾਸਾਦਮਾਰੁਯ੍ਹ, ਅਸੋਕੋ ਸੋਕਿਨਿਂ ਪਜਂ;

ਪਬ੍ਬਤਟ੍ਠੋਵ ਭੂਮਟ੍ਠੇ, ਧੀਰੋ ਬਾਲੇ ਅਵੇਕ੍ਖਤੀ’’ਤਿ.

ਤਤ੍ਥ ਨੁਦਤੀਤਿ ਯਥਾ ਨਾਮ ਪੋਕ੍ਖਰਣਿਂ ਪਵਿਸਨ੍ਤਂ ਨਵੋਦਕਂ ਪੁਰਾਣੋਦਕਂ ਖੋਭੇਤ੍ਵਾ ਤਸ੍ਸੋਕਾਸਂ ਅਦਤ੍ਵਾ ਤਂ ਅਤ੍ਤਨੋ ਮਤ੍ਥਕਮਤ੍ਥਕੇਨ ਪਲਾਯਨ੍ਤਂ ਨੁਦਤਿ ਨੀਹਰਤਿ, ਏਵਮੇਵ ਪਣ੍ਡਿਤੋ ਅਪ੍ਪਮਾਦਲਕ੍ਖਣਂ ਬ੍ਰੂਹੇਨ੍ਤੋ ਪਮਾਦਸ੍ਸੋਕਾਸਂ ਅਦਤ੍ਵਾ ਯਦਾ ਅਪ੍ਪਮਾਦਵੇਗੇਨ ਤਂ ਨੁਦਤਿ ਨੀਹਰਤਿ, ਅਥ ਸੋ ਪਨੁਨ੍ਨਪਮਾਦੋ ਅਚ੍ਚੁਗ੍ਗਤਤ੍ਥੇਨ ਪਰਿਸੁਦ੍ਧਂ ਦਿਬ੍ਬਚਕ੍ਖੁਸਙ੍ਖਾਤਂ ਪਞ੍ਞਾਪਾਸਾਦਂ ਤਸ੍ਸ ਅਨੁਚ੍ਛਵਿਕਂ ਪਟਿਪਦਂ ਪੂਰੇਨ੍ਤੋ ਤਾਯ ਪਟਿਪਦਾਯ ਨਿਸ੍ਸੇਣਿਯਾ ਪਾਸਾਦਂ ਵਿਯ ਆਰੁਯ੍ਹ ਪਹੀਨਸੋਕਸਲ੍ਲਤਾਯ ਅਸੋਕੋ, ਅਪ੍ਪਹੀਨਸੋਕਸਲ੍ਲਤਾਯ ਸੋਕਿਨਿਂ ਪਜਂ ਸਤ੍ਤਨਿਕਾਯਂ ਚਵਮਾਨਞ੍ਚੇਵ ਉਪਪਜ੍ਜਮਾਨਞ੍ਚ ਦਿਬ੍ਬਚਕ੍ਖੁਨਾ ਅਵੇਕ੍ਖਤਿ ਪਸ੍ਸਤਿ. ਯਥਾ ਕਿਂ? ਪਬ੍ਬਤਟ੍ਠੋਵ ਭੂਮਟ੍ਠੇਤਿ ਪਬ੍ਬਤਮੁਦ੍ਧਨਿ ਠਿਤੋ ਭੂਮਿਯਂ ਠਿਤੇ, ਉਪਰਿਪਾਸਾਦੇ ਵਾ ਪਨ ਠਿਤੋ ਪਾਸਾਦਪਰਿਵੇਣੇ ਠਿਤੇ ਅਕਿਚ੍ਛੇਨ ਅਵੇਕ੍ਖਤਿ, ਤਥਾ ਸੋਪਿ ਧੀਰੋ ਪਣ੍ਡਿਤੋ ਮਹਾਖੀਣਾਸਵੋ ਅਸਮੁਚ੍ਛਿਨ੍ਨਵਟ੍ਟਬੀਜੇ ਬਾਲੇ ਚਵਨ੍ਤੇ ਚ ਉਪਪਜ੍ਜਨ੍ਤੇ ਚ ਅਕਿਚ੍ਛੇਨ ਅਵੇਕ੍ਖਤੀਤਿ.

ਗਾਥਾਪਰਿਯੋਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਸਚ੍ਛਿਕਰਿਂਸੂਤਿ.

ਮਹਾਕਸ੍ਸਪਤ੍ਥੇਰਵਤ੍ਥੁ ਪਞ੍ਚਮਂ.