੨. ਕੁਮ੍ਭਘੋਸਕਸੇਟ੍ਠਿਵਤ੍ਥੁ

ਉਟ੍ਠਾਨਵਤੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਕੁਮ੍ਭਘੋਸਕਂ ਆਰਬ੍ਭ ਕਥੇਸਿ. ਰਾਜਗਹਨਗਰਸ੍ਮਿਞ੍ਹਿ ਰਾਜਗਹਸੇਟ੍ਠਿਨੋ ਗੇਹੇ ਅਹਿਵਾਤਰੋਗੋ ਉਪ੍ਪਜ੍ਜਿ, ਤਸ੍ਮਿਂ ਉਪ੍ਪਨ੍ਨੇ ਮਕ੍ਖਿਕਾ ਆਦਿਂ ਕਤ੍ਵਾ ਯਾਵ ਗਾਵਾ ਪਠਮਂ ਤਿਰਚ੍ਛਾਨਗਤਾ ਮਰਨ੍ਤਿ, ਤਤੋ ਦਾਸਕਮ੍ਮਕਰੋ, ਸਬ੍ਬਪਚ੍ਛਾ ਗੇਹਸਾਮਿਕਾ, ਤਸ੍ਮਾ ਸੋ ਰੋਗੋ ਸਬ੍ਬਪਚ੍ਛਾ ਸੇਟ੍ਠਿਞ੍ਚ ਜਾਯਞ੍ਚ ਗਣ੍ਹਿ. ਤੇ ਰੋਗੇਨ ਫੁਟ੍ਠਾ ਪੁਤ੍ਤਂ ਸਨ੍ਤਿਕੇ ਠਿਤਂ ਓਲੋਕੇਤ੍ਵਾ ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ ਤਂ ਆਹਂਸੁ – ‘‘ਤਾਤ, ਇਮਸ੍ਮਿਂ ਕਿਰ ਰੋਗੇ ਉਪ੍ਪਨ੍ਨੇ ਭਿਤ੍ਤਿਂ ਭਿਨ੍ਦਿਤ੍ਵਾ ਪਲਾਯਨ੍ਤਾਵ ਜੀਵਿਤਂ ਲਭਨ੍ਤਿ, ਤ੍ਵਂ ਅਮ੍ਹੇ ਅਨੋਲੋਕੇਤ੍ਵਾ ਪਲਾਯਿਤ੍ਵਾ ਜੀਵਨ੍ਤੋ ਪੁਨਾਗਨ੍ਤ੍ਵਾ ਅਮ੍ਹਾਕਂ ਅਸੁਕਟ੍ਠਾਨੇ ਨਾਮ ਚਤ੍ਤਾਲੀਸ ਧਨਕੋਟਿਯੋ ਨਿਦਹਿਤ੍ਵਾ ਠਪਿਤਾ, ਤਾ ਉਦ੍ਧਰਿਤ੍ਵਾ ਜੀਵਿਕਂ ਕਪ੍ਪੇਯ੍ਯਾਸੀ’’ਤਿ. ਸੋ ਤੇਸਂ ਵਚਨਂ ਸੁਤ੍ਵਾ ਰੁਦਮਾਨੋ ਮਾਤਾਪਿਤਰੋ ਵਨ੍ਦਿਤ੍ਵਾ ਮਰਣਭਯਭੀਤੋ ਭਿਤ੍ਤਿਂ ਭਿਨ੍ਦਿਤ੍ਵਾ ਪਲਾਯਿਤ੍ਵਾ ਪਬ੍ਬਤਗਹਨਂ ਗਨ੍ਤ੍ਵਾ ਦ੍ਵਾਦਸ ਵਸ੍ਸਾਨਿ ਤਤ੍ਥ ਵਸਿਤ੍ਵਾ ਮਾਤਾਪਿਤੁਵਸਨਟ੍ਠਾਨਂ ਪਚ੍ਚਾਗਞ੍ਛਿ.

ਅਥ ਨਂ ਦਹਰਕਾਲੇ ਗਨ੍ਤ੍ਵਾ ਪਰੂਲ਼੍ਹਕੇਸਮਸ੍ਸੁਕਾਲੇ ਆਗਤਤ੍ਤਾ ਨ ਕੋਚਿ ਸਞ੍ਜਾਨਿ. ਸੋ ਮਾਤਾਪਿਤੂਹਿ ਦਿਨ੍ਨਸਞ੍ਞਾਵਸੇਨ ਧਨਟ੍ਠਾਨਂ ਗਨ੍ਤ੍ਵਾ ਧਨਸ੍ਸ ਅਰੋਗਭਾਵਂ ਞਤ੍ਵਾ ਚਿਨ੍ਤੇਸਿ – ‘‘ਮਂ ਨ ਕੋਚਿ ਸਞ੍ਜਾਨਾਤਿ, ਸਚਾਹਂ ਧਨਂ ਉਦ੍ਧਰਿਤ੍ਵਾ ਵਲਞ੍ਜਿਸ੍ਸਾਮਿ, ‘ਏਕੇਨ ਦੁਗ੍ਗਤੇਨ ਨਿਧਿ ਉਦ੍ਧਟੋ’ਤਿ ਮਂ ਗਹੇਤ੍ਵਾ ਵਿਹੇਠੇਯ੍ਯੁਂ, ਯਂਨੂਨਾਹਂ ਭਤਿਂ ਕਤ੍ਵਾ ਜੀਵੇਯ੍ਯ’’ਨ੍ਤਿ. ਅਥੇਕਂ ਪਿਲੋਤਿਕਂ ਨਿਵਾਸੇਤ੍ਵਾ, ‘‘ਅਤ੍ਥਿ ਕੋਚਿ ਭਤਕੇਨ ਅਤ੍ਥਿਕੋ’’ਤਿ ਪੁਚ੍ਛਨ੍ਤੋ ਭਤਕਵੀਥਿਂ ਪਾਪੁਣਿ. ਅਥ ਨਂ ਭਤਕਾ ਦਿਸ੍ਵਾ, ‘‘ਸਚੇ ਅਮ੍ਹਾਕਂ ਏਕਂ ਕਮ੍ਮਂ ਕਰਿਸ੍ਸਸਿ, ਭਤ੍ਤਵੇਤਨਂ ਤੇ ਦਸ੍ਸਾਮਾ’’ਤਿ ਆਹਂਸੁ. ‘‘ਕਿਂ ਕਮ੍ਮਂ ਨਾਮਾ’’ਤਿ? ‘‘ਪਬੋਧਨਚੋਦਨਕਮ੍ਮਂ. ਸਚੇ ਉਸ੍ਸਹਸਿ, ਪਾਤੋਵ ਉਟ੍ਠਾਯ ‘ਤਾਤਾ, ਉਟ੍ਠਹਥ, ਸਕਟਾਨਿ ਸਨ੍ਨਯ੍ਹਥ, ਗੋਣੇ ਯੋਜੇਥ, ਹਤ੍ਥਿਅਸ੍ਸਾਨਂ ਤਿਣਤ੍ਥਾਯ ਗਮਨਵੇਲਾ; ਅਮ੍ਮਾ, ਤੁਮ੍ਹੇਪਿ ਉਟ੍ਠਹਥ, ਯਾਗੁਂ ਪਚਥ, ਭਤ੍ਤਂ ਪਚਥਾ’ਤਿ ਵਿਚਰਿਤ੍ਵਾ ਆਰੋਚੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਅਥਸ੍ਸ ਵਸਨਤ੍ਥਾਯ ਏਕਂ ਘਰਂ ਅਦਂਸੁ. ਸੋ ਦੇਵਸਿਕਂ ਤਂ ਕਮ੍ਮਂ ਅਕਾਸਿ.

ਅਥਸ੍ਸ ਏਕਦਿਵਸਂ ਰਾਜਾ ਬਿਮ੍ਬਿਸਾਰੋ ਸਦ੍ਦਮਸ੍ਸੋਸਿ. ਸੋ ਪਨ ਸਬ੍ਬਰਵਞ੍ਞੂ ਅਹੋਸਿ. ਤਸ੍ਮਾ ‘‘ਮਹਾਧਨਸ੍ਸ ਪੁਰਿਸਸ੍ਸੇਸ ਸਦ੍ਦੋ’’ਤਿ ਆਹ. ਅਥਸ੍ਸ ਸਨ੍ਤਿਕੇ ਠਿਤਾ ਏਕਾ ਪਰਿਚਾਰਿਕਾ ‘‘ਰਾਜਾ ਯਂ ਵਾ ਤਂ ਵਾ ਨ ਕਥੇਸ੍ਸਤਿ, ਇਦਂ ਮਯਾ ਞਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ – ‘‘ਗਚ੍ਛ, ਤਾਤ, ਏਤਂ ਜਾਨਾਹੀ’’ਤਿ ਏਕਂ ਪੁਰਿਸਂ ਪਹਿਣਿ. ਸੋ ਵੇਗੇਨ ਗਨ੍ਤ੍ਵਾ ਤਂ ਦਿਸ੍ਵਾ ਆਗਨ੍ਤ੍ਵਾ, ‘‘ਏਕੋ ਭਤਕਾਨਂ ਭਤਿਕਾਰਕੋ ਕਪਣਮਨੁਸ੍ਸੋ ਏਸੋ’’ਤਿ ਆਰੋਚੇਸਿ. ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਤੁਣ੍ਹੀ ਹੁਤ੍ਵਾ ਦੁਤਿਯਦਿਵਸੇਪਿ ਤਤਿਯਦਿਵਸੇਪਿ ਤਂ ਤਸ੍ਸ ਸਦ੍ਦਂ ਸੁਤ੍ਵਾ ਤਥੇਵ ਆਹ. ਸਾਪਿ ਪਰਿਚਾਰਿਕਾ ਤਥੇਵ ਚਿਨ੍ਤੇਤ੍ਵਾ ਪੁਨਪ੍ਪੁਨਂ ਪੇਸੇਤ੍ਵਾ, ‘‘ਕਪਣਮਨੁਸ੍ਸੋ ਏਸੋ’’ਤਿ ਵੁਤ੍ਤੇ ਚਿਨ੍ਤੇਸਿ – ‘‘ਰਾਜਾ ‘ਕਪਣਮਨੁਸ੍ਸੋ ਏਸੋ’ਤਿ ਵਚਨਂ ਸੁਤ੍ਵਾਪਿ ਨ ਸਦ੍ਦਹਤਿ, ਪੁਨਪ੍ਪੁਨਂ ‘ਮਹਾਧਨਸ੍ਸ ਪੁਰਿਸਸ੍ਸੇਸ ਸਦ੍ਦੋ’ਤਿ ਵਦਤਿ, ਭਵਿਤਬ੍ਬਮੇਤ੍ਥ ਕਾਰਣੇਨ, ਯਥਾਸਭਾਵਤੋ ਏਤਂ ਞਾਤੁਂ ਵਟ੍ਟਤੀ’’ਤਿ. ਸਾ ਰਾਜਾਨਂ ਆਹ, ‘‘ਦੇਵ, ਅਹਂ ਸਹਸ੍ਸਂ ਲਭਮਾਨਾ ਧੀਤਰਂ ਆਦਾਯ ਗਨ੍ਤ੍ਵਾ ਏਤਂ ਧਨਂ ਰਾਜਕੁਲਂ ਪਵੇਸੇਸ੍ਸਾਮੀ’’ਤਿ. ਰਾਜਾ ਤਸ੍ਸਾ ਸਹਸ੍ਸਂ ਦਾਪੇਸਿ.

ਸਾ ਤਂ ਗਹੇਤ੍ਵਾ ਧੀਤਰਂ ਏਕਂ ਮਲਿਨਧਾਤੁਕਂ ਵਤ੍ਥਂ ਨਿਵਾਸਾਪੇਤ੍ਵਾ ਤਾਯ ਸਦ੍ਧਿਂ ਰਾਜਗੇਹਤੋ ਨਿਕ੍ਖਮਿਤ੍ਵਾ ਮਗ੍ਗਪਟਿਪਨ੍ਨਾ ਵਿਯ ਭਤਕਵੀਥਿਂ ਗਨ੍ਤ੍ਵਾ ਏਕਂ ਘਰਂ ਪਵਿਸਿਤ੍ਵਾ, ‘‘ਅਮ੍ਮ, ਮਯਂ ਮਗ੍ਗਪਟਿਪਨ੍ਨਾ, ਏਕਾਹਦ੍ਵੀਹਂ ਇਧ ਵਿਸ੍ਸਮਿਤ੍ਵਾ ਗਮਿਸ੍ਸਾਮਾ’’ਤਿ ਆਹ. ‘‘ਅਮ੍ਮ, ਬਹੂਨਿ ਘਰਮਾਨੁਸਕਾਨਿ, ਨ ਸਕ੍ਕਾ ਇਧ ਵਸਿਤੁਂ, ਏਤਂ ਕੁਮ੍ਭਘੋਸਕਸ੍ਸ ਗੇਹਂ ਤੁਚ੍ਛਂ, ਤਤ੍ਥ ਗਚ੍ਛਥਾ’’ਤਿ. ਸਾ ਤਤ੍ਥ ਗਨ੍ਤ੍ਵਾ, ‘‘ਸਾਮਿ, ਮਯਂ ਮਗ੍ਗਪਟਿਪਨ੍ਨਕਾ, ਏਕਾਹਦ੍ਵੀਹਂ ਇਧ ਵਸਿਸ੍ਸਾਮਾ’’ਤਿ ਵਤ੍ਵਾ ਤੇਨ ਪੁਨਪ੍ਪੁਨਂ ਪਟਿਕ੍ਖਿਤ੍ਤਾਪਿ, ‘‘ਸਾਮਿ, ਅਜ੍ਜੇਕਦਿਵਸਮਤ੍ਤਂ ਵਸਿਤ੍ਵਾ ਪਾਤੋਵ ਗਮਿਸ੍ਸਾਮਾ’’ਤਿ ਨਿਕ੍ਖਮਿਤੁਂ ਨ ਇਚ੍ਛਿ. ਸਾ ਤਤ੍ਥੇਵ ਵਸਿਤ੍ਵਾ ਪੁਨਦਿਵਸੇ ਤਸ੍ਸ ਅਰਞ੍ਞਗਮਨਵੇਲਾਯ, ‘‘ਸਾਮਿ, ਤਵ ਨਿਵਾਪਂ ਦਤ੍ਵਾ ਯਾਹਿ, ਆਹਾਰਂ ਤੇ ਪਚਿਸ੍ਸਾਮੀ’’ਤਿ ਵਤ੍ਵਾ, ‘‘ਅਲਂ, ਅਮ੍ਮ, ਅਹਮੇਵ ਪਚਿਤ੍ਵਾ ਭੁਞ੍ਜਿਸ੍ਸਾਮੀ’’ਤਿ ਵੁਤ੍ਤੇ ਪੁਨਪ੍ਪੁਨਂ ਨਿਬਨ੍ਧਿਤ੍ਵਾ ਤੇਨ ਦਿਨ੍ਨੇ ਗਹਿਤਮਤ੍ਤਕੇਯੇਵ ਕਤ੍ਵਾ ਅਨ੍ਤਰਾਪਣਤੋ ਭਾਜਨਾਨਿ ਚੇਵ ਪਰਿਸੁਦ੍ਧਤਣ੍ਡੁਲਾਦੀਨਿ ਚ ਆਹਰਾਪੇਤ੍ਵਾ ਰਾਜਕੁਲੇ ਪਚਨਨਿਯਾਮੇਨ ਸੁਪਰਿਸੁਦ੍ਧਂ ਓਦਨਂ, ਸਾਧੁਰਸਾਨਿ ਚ ਦ੍ਵੇ ਤੀਣਿ ਸੂਪਬ੍ਯਞ੍ਜਨਾਨਿ ਪਚਿਤ੍ਵਾ ਤਸ੍ਸ ਅਰਞ੍ਞਤੋ ਆਗਤਸ੍ਸ ਅਦਾਸਿ. ਅਥ ਨਂ ਭੁਞ੍ਜਿਤ੍ਵਾ ਮੁਦੁਚਿਤ੍ਤਤਂ ਆਪਨ੍ਨਂ ਞਤ੍ਵਾ, ‘‘ਸਾਮਿ, ਕਿਲਨ੍ਤਮ੍ਹ, ਏਕਾਹਦ੍ਵੀਹਂ ਇਧੇਵ ਹੋਮਾ’’ਤਿ ਆਹ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.

ਅਥਸ੍ਸ ਸਾਯਮ੍ਪਿ ਪੁਨਦਿਵਸੇਪਿ ਮਧੁਰਭਤ੍ਤਂ ਪਚਿਤ੍ਵਾ ਅਦਾਸਿ. ਅਥ ਮੁਦੁਚਿਤ੍ਤਤਂ ਤਸ੍ਸ ਞਤ੍ਵਾ ‘‘ਸਾਮਿ, ਕਤਿਪਾਹਂ ਇਧੇਵ ਵਸਿਸ੍ਸਾਮਾ’’ਤਿ. ਤਤ੍ਥ ਵਸਮਾਨਾ ਤਿਖਿਣੇਨ ਸਤ੍ਥੇਨ ਤਸ੍ਸ ਮਞ੍ਚਵਾਣਂ ਹੇਟ੍ਠਾਅਟਨਿਯਂ ਤਹਂ ਤਹਂ ਛਿਨ੍ਦਿ. ਮਞ੍ਚੋ ਤਸ੍ਮਿਂ ਆਗਨ੍ਤ੍ਵਾ ਨਿਸਿਨ੍ਨਮਤ੍ਤੇਯੇਵ ਹੇਟ੍ਠਾ ਓਲਮ੍ਬਿ. ਸੋ ‘‘ਕਸ੍ਮਾ ਅਯਂ ਮਞ੍ਚੋ ਏਵਂ ਛਿਜ੍ਜਿਤ੍ਵਾ ਗਤੋ’’ਤਿ ਆਹ. ‘‘ਸਾਮਿ, ਦਹਰਦਾਰਕੇ ਵਾਰੇਤੁਂ ਨ ਸਕ੍ਕੋਮਿ, ਏਤ੍ਥੇਵ ਸਨ੍ਨਿਪਤਨ੍ਤੀ’’ਤਿ. ‘‘ਅਮ੍ਮ, ਇਦਂ ਮੇ ਦੁਕ੍ਖਂ ਤੁਮ੍ਹੇ ਨਿਸ੍ਸਾਯ ਜਾਤਂ. ਅਹਞ੍ਹਿ ਪੁਬ੍ਬੇ ਕਤ੍ਥਚਿ ਗਚ੍ਛਨ੍ਤੋ ਦ੍ਵਾਰਂ ਪਿਦਹਿਤ੍ਵਾ ਗਚ੍ਛਾਮੀ’’ਤਿ. ‘‘ਕਿਂ ਕਰੋਮਿ, ਤਾਤ, ਵਾਰੇਤੁਂ ਨ ਸਕ੍ਕੋਮੀ’’ਤਿ. ਸਾ ਇਮਿਨਾਵ ਨਿਯਾਮੇਨ ਦ੍ਵੇ ਤਯੋ ਦਿਵਸੇ ਛਿਨ੍ਦਿਤ੍ਵਾ ਤੇਨ ਉਜ੍ਝਾਯਿਤ੍ਵਾ ਖੀਯਿਤ੍ਵਾ ਵੁਚ੍ਚਮਾਨਾਪਿ ਤਥੇਵ ਵਤ੍ਵਾ ਪੁਨ ਏਕਂ ਦ੍ਵੇ ਰਜ੍ਜੁਕੇ ਠਪੇਤ੍ਵਾ ਸੇਸੇ ਛਿਨ੍ਦਿ. ਤਂ ਦਿਵਸਂ ਤਸ੍ਮਿਂ ਨਿਸਿਨ੍ਨਮਤ੍ਤੇਯੇਵ ਸਬ੍ਬਂ ਵਾਣਂ ਭੂਮਿਯਂ ਪਤਿ, ਸੀਸਂ ਜਣ੍ਣੁਕੇਹਿ ਸਦ੍ਧਿਂ ਏਕਤੋ ਅਹੋਸਿ, ਸੋ ਉਟ੍ਠਾਯ, ‘‘ਕਿਂ ਕਰੋਮਿ, ਇਦਾਨਿ ਕੁਹਿਂ ਗਮਿਸ੍ਸਾਮਿ, ਨਿਪਜ੍ਜਨਮਞ੍ਚਸ੍ਸਪਿ ਤੁਮ੍ਹੇਹਿ ਅਸਾਮਿਕੋ ਵਿਯ ਕਤੋਮ੍ਹੀ’’ਤਿ ਆਹ. ‘‘ਤਾਤ, ਕਿਂ ਕਰੋਮਿ, ਪਟਿਵਿਸ੍ਸਕਦਾਰਕੇ ਵਾਰੇਤੁਂ ਨ ਸਕ੍ਕੋਮਿ, ਹੋਤੁ, ਮਾ ਚਿਨ੍ਤਯਿ, ਇਮਾਯ ਨਾਮ ਵੇਲਾਯ ਕੁਹਿਂ ਗਮਿਸ੍ਸਸੀ’’ਤਿ ਧੀਤਰਂ ਆਮਨ੍ਤੇਤ੍ਵਾ, ‘‘ਅਮ੍ਮ, ਤਵ ਭਾਤਿਕਸ੍ਸ ਨਿਪਜ੍ਜਨੋਕਾਸਂ ਕਰੋਹੀ’’ਤਿ ਆਹ. ਸਾ ਏਕਪਸ੍ਸੇ ਸਯਿਤ੍ਵਾ ‘‘ਇਧਾਗਚ੍ਛ, ਸਾਮੀ’’ਤਿ ਆਹ. ਇਤਰੋਪਿ ਨਂ ‘‘ਗਚ੍ਛ, ਤਾਤ, ਭਗਿਨਿਯਾ ਸਦ੍ਧਿਂ ਨਿਪਜ੍ਜਾ’’ਤਿ ਵਦੇਸਿ. ਸੋ ਤਾਯ ਸਦ੍ਧਿਂ ਏਕਮਞ੍ਚੇ ਨਿਪਜ੍ਜਿਤ੍ਵਾ ਤਂ ਦਿਵਸਞ੍ਞੇਵ ਸਨ੍ਥਵਂ ਅਕਾਸਿ, ਕੁਮਾਰਿਕਾ ਪਰੋਦਿ. ਅਥ ਨਂ ਮਾਤਾ ਪੁਚ੍ਛਿ – ‘‘ਕਿਂ, ਅਮ੍ਮ, ਰੋਦਸੀ’’ਤਿ? ‘‘ਅਮ੍ਮ, ਇਦਂ ਨਾਮ ਜਾਤ’’ਨ੍ਤਿ. ‘‘ਹੋਤੁ, ਅਮ੍ਮ, ਕਿਂ ਸਕ੍ਕਾ ਕਾਤੁਂ, ਤਯਾਪਿ ਏਕਂ ਭਤ੍ਤਾਰਂ ਇਮਿਨਾਪੇਕਂ ਪਾਦਪਰਿਚਾਰਿਕਂ ਲਦ੍ਧੁਂ ਵਟ੍ਟਤੀ’’ਤਿ ਤਂ ਜਾਮਾਤਰਂ ਅਕਾਸਿ. ਤੇ ਸਮਗ੍ਗਵਾਸਂ ਵਸਿਂਸੁ.

ਸਾ ਕਤਿਪਾਹਚ੍ਚਯੇਨ ਰਞ੍ਞੋ ਸਾਸਨਂ ਪੇਸੇਸਿ – ‘‘ਭਤਕਵੀਥਿਯਂ ਛਣਂ ਕਰੋਨ੍ਤੁ. ਯਸ੍ਸ ਪਨ ਘਰੇ ਛਣੋ ਨ ਕਰੀਯਤਿ, ਤਸ੍ਸ ਏਤ੍ਤਕੋ ਨਾਮ ਦਣ੍ਡੋਤਿ ਘੋਸਨਂ ਕਾਰੇਤੂ’’ਤਿ. ਰਾਜਾ ਤਥਾ ਕਾਰੇਸਿ. ਅਥ ਨਂ ਸਸ੍ਸੁ ਆਹ – ‘‘ਤਾਤ, ਭਤਕਵੀਥਿਯਂ ਰਾਜਾਣਾਯ ਛਣੋ ਕਤ੍ਤਬ੍ਬੋ ਜਾਤੋ, ਕਿਂ ਕਰੋਮਾ’’ਤਿ? ‘‘ਅਮ੍ਮ, ਅਹਂ ਭਤਿਂ ਕਰੋਨ੍ਤੋਪਿ ਜੀਵਿਤੁਂ ਨ ਸਕ੍ਕੋਮਿ, ਕਿਂ ਕਰਿਸ੍ਸਾਮੀ’’ਤਿ? ‘‘ਤਾਤ, ਘਰਾਵਾਸਂ ਵਸਨ੍ਤਾ ਨਾਮ ਇਣਮ੍ਪਿ ਗਣ੍ਹਨ੍ਤਿ, ਰਞ੍ਞੋ ਆਣਾ ਅਕਾਤੁਂ ਨ ਲਬ੍ਭਾ. ਇਣਤੋ ਨਾਮ ਯੇਨ ਕੇਨਚਿ ਉਪਾਯੇਨ ਮੁਚ੍ਚਿਤੁਂ ਸਕ੍ਕਾ, ਗਚ੍ਛ, ਕੁਤੋਚਿ ਏਕਂ ਵਾ ਦ੍ਵੇ ਵਾ ਕਹਾਪਣੇ ਆਹਰਾ’’ਤਿ ਆਹ. ਸੋ ਉਜ੍ਝਾਯਨ੍ਤੋ ਖੀਯਨ੍ਤੋ ਗਨ੍ਤ੍ਵਾ ਚਤ੍ਤਾਲੀਸਕੋਟਿਧਨਟ੍ਠਾਨਤੋ ਏਕਮੇਵ ਕਹਾਪਣਂ ਆਹਰਿ. ਸਾ ਤਂ ਕਹਾਪਣਂ ਰਞ੍ਞੋ ਪੇਸੇਤ੍ਵਾ ਅਤ੍ਤਨੋ ਕਹਾਪਣੇਨ ਛਣਂ ਕਤ੍ਵਾ ਪੁਨ ਕਤਿਪਾਹਚ੍ਚਯੇਨ ਤਥੇਵ ਸਾਸਨਂ ਪਹਿਣਿ. ਪੁਨ ਰਾਜਾ ਤਥੇਵ ‘‘ਛਣਂ ਕਰੋਨ੍ਤੁ, ਅਕਰੋਨ੍ਤਾਨਂ ਏਤ੍ਤਕੋ ਦਣ੍ਡੋ’’ਤਿ ਆਣਾਪੇਸਿ. ਪੁਨਪਿ ਸੋ ਤਾਯ ਤਥੇਵ ਵਤ੍ਵਾ ਨਿਪ੍ਪੀਲ਼ਿਯਮਾਨੋ ਗਨ੍ਤ੍ਵਾ ਤਯੋ ਕਹਾਪਣੇ ਆਹਰਿ. ਸਾ ਤੇਪਿ ਕਹਾਪਣੇ ਰਞ੍ਞੋ ਪੇਸੇਤ੍ਵਾ ਪੁਨ ਕਤਿਪਾਹਚ੍ਚਯੇਨ ਤਥੇਵ ਸਾਸਨਂ ਪਹਿਣਿ – ‘‘ਇਦਾਨਿ ਪੁਰਿਸੇ ਪੇਸੇਤ੍ਵਾ ਇਮਂ ਪਕ੍ਕੋਸਾਪੇਤੂ’’ਤਿ. ਰਾਜਾ ਪੇਸੇਸਿ. ਪੁਰਿਸਾ ਗਨ੍ਤ੍ਵਾ, ‘‘ਕੁਮ੍ਭਘੋਸਕੋ ਨਾਮ ਕਤਰੋ’’ਤਿ ਪੁਚ੍ਛਿਤ੍ਵਾ ਪਰਿਯੇਸਨ੍ਤਾ ਤਂ ਦਿਸ੍ਵਾ ‘‘ਏਹਿ, ਭੋ ਰਾਜਾ, ਤਂ ਪਕ੍ਕੋਸਤੀ’’ਤਿ ਆਹਂਸੁ. ਸੋ ਭੀਤੋ ‘‘ਨ ਮਂ ਰਾਜਾ ਜਾਨਾਤੀ’’ਤਿਆਦੀਨਿ ਵਤ੍ਵਾ ਗਨ੍ਤੁਂ ਨ ਇਚ੍ਛਿ. ਅਥ ਨਂ ਬਲਕ੍ਕਾਰੇਨ ਹਤ੍ਥਾਦੀਸੁ ਗਹੇਤ੍ਵਾ ਆਕਡ੍ਢਿਂਸੁ. ਸਾ ਇਤ੍ਥੀ ਤੇ ਦਿਸ੍ਵਾ, ‘‘ਅਰੇ, ਦੁਬ੍ਬਿਨੀਤਾ, ਤੁਮ੍ਹੇ ਮਮ ਜਾਮਾਤਰਂ ਹਤ੍ਥਾਦੀਸੁ ਗਹੇਤੁਂ ਅਨਨੁਚ੍ਛਵਿਕਾ’’ਤਿ ਤਜ੍ਜੇਤ੍ਵਾ, ‘‘ਏਹਿ, ਤਾਤ, ਮਾ ਭਾਯਿ, ਰਾਜਾਨਂ ਦਿਸ੍ਵਾ ਤਵ ਹਤ੍ਥਾਦਿਗਾਹਕਾਨਂ ਹਤ੍ਥੇਯੇਵ ਛਿਨ੍ਦਾਪੇਸ੍ਸਾਮੀ’’ਤਿ ਧੀਤਰਂ ਆਦਾਯ ਪੁਰਤੋ ਹੁਤ੍ਵਾ ਰਾਜਗੇਹਂ ਪਤ੍ਵਾ ਵੇਸਂ ਪਰਿਵਤ੍ਤੇਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਏਕਮਨ੍ਤਂ ਅਟ੍ਠਾਸਿ. ਇਤਰਮ੍ਪਿ ਪਰਿਕਡ੍ਢਿਤ੍ਵਾ ਆਨਯਿਂਸੁਯੇਵ.

ਅਥ ਨਂ ਵਨ੍ਦਿਤ੍ਵਾ ਠਿਤਂ ਰਾਜਾ ਆਹ – ‘‘ਤ੍ਵਂ ਕੁਮ੍ਭਘੋਸਕੋ ਨਾਮਾ’’ਤਿ? ‘‘ਆਮ, ਦੇਵਾ’’ਤਿ. ‘‘ਕਿਂ ਕਾਰਣਾ ਮਹਾਧਨਂ ਵਞ੍ਚੇਤ੍ਵਾ ਖਾਦਸੀ’’ਤਿ? ‘‘ਕੁਤੋ ਮੇ, ਦੇਵ, ਧਨਂ ਭਤਿਂ ਕਤ੍ਵਾ ਜੀਵਨ੍ਤਸ੍ਸਾ’’ਤਿ? ‘‘ਮਾ ਏਵਂ ਕਰਿ, ਕਿਂ ਅਮ੍ਹੇ ਵਞ੍ਚੇਸੀ’’ਤਿ? ‘‘ਨ ਵਞ੍ਚੇਮਿ, ਦੇਵ, ਨਤ੍ਥਿ ਮੇ ਧਨ’’ਨ੍ਤਿ. ਅਥਸ੍ਸ ਰਾਜਾ ਤੇ ਕਹਾਪਣੇ ਦਸ੍ਸੇਤ੍ਵਾ, ‘‘ਇਮੇ ਕਸ੍ਸ ਕਹਾਪਣਾ’’ਤਿ ਆਹ. ਸੋ ਸਞ੍ਜਾਨਿਤ੍ਵਾ, ‘‘ਅਹੋ ਬਾਲੋਮ੍ਹਿ, ਕਥਂ ਨੁ ਖੋ ਇਮੇ ਰਞ੍ਞੋ ਹਤ੍ਥਂ ਪਤ੍ਤਾ’’ਤਿ ਇਤੋ ਚਿਤੋ ਚ ਓਲੋਕੇਨ੍ਤੋ ਤਾ ਦ੍ਵੇਪਿ ਪਟਿਮਣ੍ਡਿਤਪਸਾਧਨਾ ਗਬ੍ਭਦ੍ਵਾਰਮੂਲੇ ਠਿਤਾ ਦਿਸ੍ਵਾ, ‘‘ਭਾਰਿਯਂ ਵਤਿਦਂ ਕਮ੍ਮਂ, ਇਮਾਹਿ ਰਞ੍ਞਾ ਪਯੋਜਿਤਾਹਿ ਭਵਿਤਬ੍ਬ’’ਨ੍ਤਿ ਚਿਨ੍ਤੇਸਿ. ਅਥ ਨਂ ਰਾਜਾ ‘‘ਵਦੇਹਿ, ਭੋ, ਕਸ੍ਮਾ ਏਵਂ ਕਰੋਸੀ’’ਤਿ ਆਹ. ‘‘ਨਿਸ੍ਸਯੋ ਮੇ ਨਤ੍ਥਿ, ਦੇਵਾ’’ਤਿ. ‘‘ਮਾਦਿਸੋ ਨਿਸ੍ਸਯੋ ਭਵਿਤੁਂ ਨ ਵਟ੍ਟਤੀ’’ਤਿ. ‘‘ਕਲ੍ਯਾਣਂ, ਦੇਵ, ਸਚੇ ਮੇ ਦੇਵੋ ਅਵਸ੍ਸਯੋ ਹੋਤੀ’’ਤਿ. ‘‘ਹੋਮਿ, ਭੋ, ਕਿਤ੍ਤਕਂ ਤੇ ਧਨ’’ਨ੍ਤਿ? ‘‘ਚਤ੍ਤਾਲੀਸਕੋਟਿਯੋ, ਦੇਵਾ’’ਤਿ. ‘‘ਕਿਂ ਲਦ੍ਧੁਂ ਵਟ੍ਟਤੀ’’ਤਿ? ‘‘ਸਕਟਾਨਿ ਦੇਵਾ’’ਤਿ? ਰਾਜਾ ਅਨੇਕਸਤਾਨਿ ਸਕਟਾਨਿ ਯੋਜਾਪੇਤ੍ਵਾ ਪਹਿਣਿਤ੍ਵਾ ਤਂ ਧਨਂ ਆਹਰਾਪੇਤ੍ਵਾ ਰਾਜਙ੍ਗਣੇ ਰਾਸਿਂ ਕਾਰਾਪੇਤ੍ਵਾ ਰਾਜਗਹਵਾਸਿਨੋ ਸਨ੍ਨਿਪਾਤਾਪੇਤ੍ਵਾ, ‘‘ਅਤ੍ਥਿ ਕਸ੍ਸਚਿ ਇਮਸ੍ਮਿਂ ਨਗਰੇ ‘‘ਏਤ੍ਤਕਂ ਧਨ’’ਨ੍ਤਿ ਪੁਚ੍ਛਿਤ੍ਵਾ ‘‘ਨਤ੍ਥਿ, ਦੇਵਾ’’ਤਿ. ‘‘ਕਿਂ ਪਨਸ੍ਸ ਕਾਤੁਂ ਵਟ੍ਟਤੀ’’ਤਿ? ‘‘ਸਕ੍ਕਾਰਂ, ਦੇਵਾ’’ਤਿ ਵੁਤ੍ਤੇ ਮਹਨ੍ਤੇਨ ਸਕ੍ਕਾਰੇਨ ਤਂ ਸੇਟ੍ਠਿਟ੍ਠਾਨੇ ਠਪੇਤ੍ਵਾ ਧੀਤਰਂ ਤਸ੍ਸੇਵ ਦਤ੍ਵਾ ਤੇਨ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਪਸ੍ਸਥਿਮਂ ਪੁਰਿਸਂ, ਏਵਰੂਪੋ ਧਿਤਿਮਾ ਨਾਮ ਨਤ੍ਥਿ, ਚਤ੍ਤਾਲੀਸਕੋਟਿਵਿਭਵੋ ਹੋਨ੍ਤੋਪਿ ਉਪ੍ਪਿਲਾਵਿਤਾਕਾਰਂ ਵਾ ਅਸ੍ਮਿਮਾਨਮਤ੍ਤਂ ਵਾ ਨ ਕਰੋਤਿ, ਕਪਣੋ ਵਿਯ ਪਿਲੋਤਿਕਂ ਨਿਵਾਸੇਤ੍ਵਾ ਭਤਕਵੀਥਿਯਂ ਭਤਿਂ ਕਤ੍ਵਾ ਜੀਵਨ੍ਤੋ ਮਯਾ ਇਮਿਨਾ ਨਾਮ ਉਪਾਯੇਨ ਞਾਤੋ. ਜਾਨਿਤ੍ਵਾ ਚ ਪਨ ਪਕ੍ਕੋਸਾਪੇਤ੍ਵਾ ਸਧਨਭਾਵਂ ਸਮ੍ਪਟਿਚ੍ਛਾਪੇਤ੍ਵਾ ਤਂ ਧਨਂ ਆਹਰਾਪੇਤ੍ਵਾ ਸੇਟ੍ਠਿਟ੍ਠਾਨੇ ਠਪਿਤੋ, ਧੀਤਾ ਚਸ੍ਸ ਮਯਾ ਦਿਨ੍ਨਾ. ਭਨ੍ਤੇ, ਮਯਾ ਚ ਏਵਰੂਪੋ ਧਿਤਿਮਾ ਨ ਦਿਟ੍ਠਪੁਬ੍ਬੋ’’ਤਿ ਆਹ.

ਤਂ ਸੁਤ੍ਵਾ ਸਤ੍ਥਾ ‘‘ਏਵਂ ਜੀਵਨ੍ਤਸ੍ਸ ਜੀਵਿਕਂ ਧਮ੍ਮਿਕਜੀਵਿਕਂ ਨਾਮ, ਮਹਾਰਾਜ, ਚੋਰਿਕਾਦਿਕਮ੍ਮਂ ਪਨ ਇਧਲੋਕੇ ਚੇਵ ਪੀਲ਼ੇਤਿ ਹਿਂਸੇਤਿ, ਪਰਲੋਕੇ ਚ, ਤਤੋਨਿਦਾਨਂ ਸੁਖਂ ਨਾਮ ਨਤ੍ਥਿ. ਪੁਰਿਸਸ੍ਸ ਹਿ ਧਨਪਾਰਿਜੁਞ੍ਞਕਾਲੇ ਕਸਿਂ ਵਾ ਭਤਿਂ ਵਾ ਕਤ੍ਵਾ ਜੀਵਿਕਮੇਵ ਧਮ੍ਮਿਕਜੀਵਿਕਂ ਨਾਮ. ਏਵਰੂਪਸ੍ਸ ਹਿ ਵੀਰਿਯਸਮ੍ਪਨ੍ਨਸ੍ਸ ਸਤਿਸਮ੍ਪਨ੍ਨਸ੍ਸ ਕਾਯਵਾਚਾਹਿ ਪਰਿਸੁਦ੍ਧਕਮ੍ਮਸ੍ਸ ਪਞ੍ਞਾਯ ਨਿਸਮ੍ਮਕਾਰਿਨੋ ਕਾਯਾਦੀਹਿ ਸਞ੍ਞਤਸ੍ਸ ਧਮ੍ਮਜੀਵਿਕਂ ਜੀਵਨ੍ਤਸ੍ਸ ਸਤਿਅਵਿਪ੍ਪਵਾਸੇ ਠਿਤਸ੍ਸ ਇਸ੍ਸਰਿਯਂ ਵਡ੍ਢਤਿਯੇਵਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੨੪. ‘‘ਉਟ੍ਠਾਨਵਤੋ ਸਤੀਮਤੋ,

ਸੁਚਿਕਮ੍ਮਸ੍ਸ ਨਿਸਮ੍ਮਕਾਰਿਨੋ;

ਸਞ੍ਞਤਸ੍ਸ ਧਮ੍ਮਜੀਵਿਨੋ,

ਅਪ੍ਪਮਤ੍ਤਸ੍ਸ ਯਸੋਭਿਵਡ੍ਢਤੀ’’ਤਿ.

ਤਤ੍ਥ ਉਟ੍ਠਾਨਵਤੋਤਿ ਉਟ੍ਠਾਨਵੀਰਿਯਵਨ੍ਤਸ੍ਸ. ਸਤਿਮਤੋਤਿ ਸਤਿਸਮ੍ਪਨ੍ਨਸ੍ਸ. ਸੁਚਿਕਮ੍ਮਸ੍ਸਾਤਿ ਨਿਦ੍ਦੋਸੇਹਿ ਨਿਰਪਰਾਧੇਹਿ ਕਾਯਕਮ੍ਮਾਦੀਹਿ ਸਮਨ੍ਨਾਗਤਸ੍ਸ. ਨਿਸਮ੍ਮਕਾਰਿਨੋਤਿ ਏਵਞ੍ਚੇ ਭਵਿਸ੍ਸਤਿ, ਏਵਂ ਕਰਿਸ੍ਸਾਮੀਤਿ ਵਾ, ਇਮਸ੍ਮਿਂ ਕਮ੍ਮੇ ਏਵਂ ਕਤੇ ਇਦਂ ਨਾਮ ਭਵਿਸ੍ਸਤੀਤਿ ਵਾ ਏਵਂ ਨਿਦਾਨਂ ਸਲ੍ਲਕ੍ਖੇਤ੍ਵਾ ਰੋਗਤਿਕਿਚ੍ਛਨਂ ਵਿਯ ਸਬ੍ਬਕਮ੍ਮਾਨਿ ਨਿਸਾਮੇਤ੍ਵਾ ਉਪਧਾਰੇਤ੍ਵਾ ਕਰੋਨ੍ਤਸ੍ਸ. ਸਞ੍ਞਤਸ੍ਸਾਤਿ ਕਾਯਾਦੀਹਿ ਸਞ੍ਞਤਸ੍ਸ ਨਿਚ੍ਛਿਦ੍ਦਸ੍ਸ. ਧਮ੍ਮਜੀਵਿਨੋਤਿ ਅਗਾਰਿਕਸ੍ਸ ਤੁਲਾਕੂਟਾਦੀਨਿ ਵਜ੍ਜੇਤ੍ਵਾ ਕਸਿਗੋਰਕ੍ਖਾਦੀਹਿ, ਅਨਗਾਰਿਕਸ੍ਸ ਵੇਜ੍ਜਕਮ੍ਮਦੂਤਕਮ੍ਮਾਦੀਨਿ ਵਜ੍ਜੇਤ੍ਵਾ ਧਮ੍ਮੇਨ ਸਮੇਨ ਭਿਕ੍ਖਾਚਰਿਯਾਯ ਜੀਵਿਕਂ ਕਪ੍ਪੇਨ੍ਤਸ੍ਸ. ਅਪ੍ਪਮਤ੍ਤਸ੍ਸਾਤਿ ਅਵਿਪ੍ਪਵੁਤ੍ਥਸਤਿਨੋ. ਯਸੋਭਿਵਡ੍ਢਤੀਤਿ ਇਸ੍ਸਰਿਯਭੋਗਸਮ੍ਪਨ੍ਨਸਙ੍ਖਾਤੋ ਚੇਵ ਕਿਤ੍ਤਿਵਣ੍ਣਭਣਨਸਙ੍ਖਾਤੋ ਚ ਯਸੋ ਅਭਿਵਡ੍ਢਤੀਤਿ.

ਗਾਥਾਪਰਿਯੋਸਾਨੇ ਕੁਮ੍ਭਘੋਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਅਞ੍ਞੇਪਿ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ. ਏਵਂ ਮਹਾਜਨਸ੍ਸ ਸਾਤ੍ਥਿਕਾ ਧਮ੍ਮਦੇਸਨਾ ਜਾਤਾਤਿ.

ਕੁਮ੍ਭਘੋਸਕਸੇਟ੍ਠਿਵਤ੍ਥੁ ਦੁਤਿਯਂ.