੧. ਸਾਮਾਵਤੀਵਤ੍ਥੁ

ਅਪ੍ਪਮਾਦੋ ਅਮਤਪਦਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਕੋਸਮ੍ਬਿਂ ਉਪਨਿਸ੍ਸਾਯ ਘੋਸਿਤਾਰਾਮੇ ਵਿਹਰਨ੍ਤੋ ਸਾਮਾਵਤਿਪ੍ਪਮੁਖਾਨਂ ਪਞ੍ਚਨ੍ਨਂ ਇਤ੍ਥਿਸਤਾਨਂ, ਮਾਗਣ੍ਡਿਯਪ੍ਪਮੁਖਾਨਞ੍ਚ ਏਤਿਸ੍ਸਾ ਪਞ੍ਚਨ੍ਨਂ ਞਾਤਿਸਤਾਨਂ ਮਰਣਬ੍ਯਸਨਂ ਆਰਬ੍ਭ ਕਥੇਸਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਅਤੀਤੇ ਅਲ੍ਲਕਪ੍ਪਰਟ੍ਠੇ ਅਲ੍ਲਕਪ੍ਪਰਾਜਾ ਨਾਮ, ਵੇਠਦੀਪਕਰਟ੍ਠੇ ਵੇਠਦੀਪਕਰਾਜਾ ਨਾਮਾਤਿ ਇਮੇ ਦ੍ਵੇ ਦਹਰਕਾਲਤੋ ਪਟ੍ਠਾਯ ਸਹਾਯਕਾ ਹੁਤ੍ਵਾ ਏਕਾਚਰਿਯਕੁਲੇ ਸਿਪ੍ਪਂ ਉਗ੍ਗਣ੍ਹਿਤ੍ਵਾ ਅਤ੍ਤਨੋ ਅਤ੍ਤਨੋ ਪਿਤੂਨਂ ਅਚ੍ਚਯੇਨ ਛਤ੍ਤਂ ਉਸ੍ਸਾਪੇਤ੍ਵਾ ਆਯਾਮੇਨ ਦਸਦਸਯੋਜਨਿਕੇ ਰਟ੍ਠੇ ਰਾਜਾਨੋ ਅਹੇਸੁਂ. ਤੇ ਕਾਲੇਨ ਕਾਲਂ ਸਮਾਗਨ੍ਤ੍ਵਾ ਏਕਤੋ ਤਿਟ੍ਠਨ੍ਤਾ ਨਿਸੀਦਨ੍ਤਾ ਨਿਪਜ੍ਜਨ੍ਤਾ ਮਹਾਜਨਂ ਜਾਯਮਾਨਞ੍ਚ ਜੀਯਮਾਨਞ੍ਚ ਮੀਯਮਾਨਞ੍ਚ ਦਿਸ੍ਵਾ ‘‘ਪਰਲੋਕਂ ਗਚ੍ਛਨ੍ਤਂ ਅਨੁਗਚ੍ਛਨ੍ਤੋ ਨਾਮ ਨਤ੍ਥਿ, ਅਨ੍ਤਮਸੋ ਅਤ੍ਤਨੋ ਸਰੀਰਮ੍ਪਿ ਨਾਨੁਗਚ੍ਛਤਿ, ਸਬ੍ਬਂ ਪਹਾਯ ਗਨ੍ਤਬ੍ਬਂ, ਕਿਂ ਨੋ ਘਰਾਵਾਸੇਨ, ਪਬ੍ਬਜਿਸ੍ਸਾਮਾ’’ਤਿ ਮਨ੍ਤੇਤ੍ਵਾ ਰਜ੍ਜਾਨਿ ਪੁਤ੍ਤਦਾਰਾਨਂ ਨਿਯ੍ਯਾਦੇਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਪ੍ਪਦੇਸੇ ਵਸਨ੍ਤਾ ਮਨ੍ਤਯਿਂਸੁ – ‘‘ਮਯਂ ਰਜ੍ਜਂ ਪਹਾਯ ਪਬ੍ਬਜਿਤਾ, ਨ ਜੀਵਿਤੁਂ ਅਸਕ੍ਕੋਨ੍ਤਾ. ਤੇ ਮਯਂ ਏਕਟ੍ਠਾਨੇ ਵਸਨ੍ਤਾ ਅਪਬ੍ਬਜਿਤਸਦਿਸਾਯੇਵ ਹੋਮ, ਤਸ੍ਮਾ ਵਿਸੁਂ ਵਸਿਸ੍ਸਾਮ. ਤ੍ਵਂ ਏਤਸ੍ਮਿਂ ਪਬ੍ਬਤੇ ਵਸ, ਅਹਂ ਇਮਸ੍ਮਿਂ ਪਬ੍ਬਤੇ ਵਸਿਸ੍ਸਾਮਿ. ਅਨ੍ਵਡ੍ਢਮਾਸਂ ਪਨ ਉਪੋਸਥਦਿਵਸੇ ਏਕਤੋ ਭਵਿਸ੍ਸਾਮਾ’’ਤਿ. ਅਥ ਖੋ ਨੇਸਂ ਏਤਦਹੋਸਿ – ‘‘ਏਵਮ੍ਪਿ ਨੋ ਗਣਸਙ੍ਗਣਿਕਾਵ ਭਵਿਸ੍ਸਤਿ, ਤ੍ਵਂ ਪਨ ਤਵ ਪਬ੍ਬਤੇ ਅਗ੍ਗਿਂ ਜਾਲੇਯ੍ਯਾਸਿ, ਅਹਂ ਮਮ ਪਬ੍ਬਤੇ ਅਗ੍ਗਿਂ ਜਾਲੇਸ੍ਸਾਮਿ, ਤਾਯ ਸਞ੍ਞਾਯ ਅਤ੍ਥਿਭਾਵਂ ਜਾਨਿਸ੍ਸਾਮਾ’’ਤਿ. ਤੇ ਤਥਾ ਕਰਿਂਸੁ.

ਅਥ ਅਪਰਭਾਗੇ ਵੇਠਦੀਪਕਤਾਪਸੋ ਕਾਲਂ ਕਤ੍ਵਾ ਮਹੇਸਕ੍ਖੋ ਦੇਵਰਾਜਾ ਹੁਤ੍ਵਾ ਨਿਬ੍ਬਤ੍ਤੋ. ਤਤੋ ਅਡ੍ਢਮਾਸੇ ਸਮ੍ਪਤ੍ਤੇ ਅਗ੍ਗਿਂ ਅਦਿਸ੍ਵਾਵ ਇਤਰੋ ‘‘ਸਹਾਯਕੋ ਮੇ ਕਾਲਕਤੋ’’ਤਿ ਅਞ੍ਞਾਸਿ. ਇਤਰੋਪਿ ਨਿਬ੍ਬਤ੍ਤਕ੍ਖਣੇਯੇਵ ਅਤ੍ਤਨੋ ਦੇਵਸਿਰਿਂ ਓਲੋਕੇਤ੍ਵਾ ਕਮ੍ਮਂ ਉਪਧਾਰੇਨ੍ਤੋ ਨਿਕ੍ਖਮਨਤੋ ਪਟ੍ਠਾਯ ਅਤ੍ਤਨੋ ਤਪਚਰਿਯਂ ਦਿਸ੍ਵਾ ‘‘ਗਨ੍ਤ੍ਵਾ ਮਮ ਸਹਾਯਕਂ ਪਸ੍ਸਿਸ੍ਸਾਮੀ’’ਤਿ ਤਂ ਅਤ੍ਤਭਾਵਂ ਵਿਜਹਿਤ੍ਵਾ ਮਗ੍ਗਿਕਪੁਰਿਸੋ ਵਿਯ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਨਂ ਸੋ ਆਹ – ‘‘ਕੁਤੋ ਆਗਤੋਸੀ’’ਤਿ? ‘‘ਮਗ੍ਗਿਕਪੁਰਿਸੋ ਅਹਂ, ਭਨ੍ਤੇ, ਦੂਰਤੋਵ ਆਗਤੋਮ੍ਹਿ. ਕਿਂ ਪਨ, ਭਨ੍ਤੇ, ਅਯ੍ਯੋ ਇਮਸ੍ਮਿਂ ਠਾਨੇ ਏਕਕੋਵ ਵਸਤਿ, ਅਞ੍ਞੋਪਿ ਕੋਚਿ ਅਤ੍ਥੀ’’ਤਿ? ‘‘ਅਤ੍ਥਿ ਮੇ ਏਕੋ ਸਹਾਯਕੋ’’ਤਿ. ‘‘ਕੁਹਿਂ ਸੋ’’ਤਿ? ‘‘ਏਤਸ੍ਮਿਂ ਪਬ੍ਬਤੇ ਵਸਤਿ, ਉਪੋਸਥਦਿਵਸੇ ਪਨ ਅਗ੍ਗਿਂ ਨ ਜਾਲੇਤਿ, ਮਤੋ ਨੂਨ ਭਵਿਸ੍ਸਤੀ’’ਤਿ. ‘‘ਏਵਂ, ਭਨ੍ਤੇ’’ਤਿ? ‘‘ਏਵਮਾਵੁਸੋ’’ਤਿ. ‘‘ਅਹਂ ਸੋ, ਭਨ੍ਤੇ’’ਤਿ. ‘‘ਕੁਹਿਂ ਨਿਬ੍ਬਤ੍ਤੋਸੀ’’ਤਿ? ‘‘ਦੇਵਲੋਕੇ ਮਹੇਸਕ੍ਖੋ ਦੇਵਰਾਜਾ ਹੁਤ੍ਵਾ ਨਿਬ੍ਬਤ੍ਤੋਸ੍ਮਿ, ਭਨ੍ਤੇ, ‘ਅਯ੍ਯਂ ਪਸ੍ਸਿਸ੍ਸਾਮੀ’ਤਿ ਪੁਨ ਆਗਤੋਮ੍ਹਿ. ਅਪਿ ਨੁ ਖੋ ਅਯ੍ਯਾਨਂ ਇਮਸ੍ਮਿਂ ਠਾਨੇ ਵਸਨ੍ਤਾਨਂ ਕੋਚਿ ਉਪਦ੍ਦਵੋ ਅਤ੍ਥੀ’’ਤਿ? ‘‘ਆਮ, ਆਵੁਸੋ, ਹਤ੍ਥੀ ਨਿਸ੍ਸਾਯ ਕਿਲਮਾਮੀ’’ਤਿ. ‘‘ਕਿਂ ਵੋ, ਭਨ੍ਤੇ, ਹਤ੍ਥੀ ਕਰੋਨ੍ਤੀ’’ਤਿ? ‘‘ਸਮ੍ਮਜ੍ਜਨਟ੍ਠਾਨੇ ਲਣ੍ਡਂ ਪਾਤੇਨ੍ਤਿ, ਪਾਦੇਹਿ ਭੂਮਿਯਂ ਪਹਰਿਤ੍ਵਾ ਪਂਸੁਂ ਉਦ੍ਧਰਨ੍ਤਿ, ਸ੍ਵਾਹਂ ਲਣ੍ਡਂ ਛਡ੍ਡੇਨ੍ਤੋ ਪਂਸੁਂ ਸਮਂ ਕਰੋਨ੍ਤੋ ਕਿਲਮਾਮੀ’’ਤਿ. ‘‘ਕਿਂ ਪਨ ਤੇਸਂ ਅਨਾਗਮਨਂ ਇਚ੍ਛਥਾ’’ਤਿ? ‘‘ਆਮਾਵੁਸੋ’’ਤਿ. ‘‘ਤੇਨ ਹਿ ਤੇਸਂ ਅਨਾਗਮਨਂ ਕਰਿਸ੍ਸਾਮੀ’’ਤਿ ਤਾਪਸਸ੍ਸ ਹਤ੍ਥਿਕਨ੍ਤਵੀਣਞ੍ਚੇਵ ਹਤ੍ਥਿਕਨ੍ਤਮਨ੍ਤਞ੍ਚ ਅਦਾਸਿ. ਦਦਨ੍ਤੋ ਚ ਪਨ ਵੀਣਾਯ ਤਿਸ੍ਸੋ ਤਨ੍ਤਿਯੋ ਦਸ੍ਸੇਤ੍ਵਾ ਤਯੋ ਮਨ੍ਤੇ ਉਗ੍ਗਣ੍ਹਾਪੇਤ੍ਵਾ ‘‘ਇਮਂ ਤਨ੍ਤਿਂ ਪਹਰਿਤ੍ਵਾ ਇਮਸ੍ਮਿਂ ਮਨ੍ਤੇ ਵੁਤ੍ਤੇ ਨਿਵਤ੍ਤਿਤ੍ਵਾ ਓਲੋਕੇਤੁਮ੍ਪਿ ਅਸਕ੍ਕੋਨ੍ਤਾ ਹਤ੍ਥੀ ਪਲਾਯਨ੍ਤਿ, ਇਮਂ ਤਨ੍ਤਿਂ ਪਹਰਿਤ੍ਵਾ ਇਮਸ੍ਮਿਂ ਮਨ੍ਤੇ ਵੁਤ੍ਤੇ ਨਿਵਤ੍ਤਿਤ੍ਵਾ ਪਚ੍ਛਤੋ ਓਲੋਕੇਨ੍ਤਾ ਓਲੋਕੇਨ੍ਤਾ ਪਲਾਯਨ੍ਤਿ, ਇਮਂ ਤਨ੍ਤਿਂ ਪਹਰਿਤ੍ਵਾ ਇਮਸ੍ਮਿਂ ਮਨ੍ਤੇ ਵੁਤ੍ਤੇ ਹਤ੍ਥਿਯੂਥਪਤਿ ਪਿਟ੍ਠਿਂ ਉਪਨਾਮੇਨ੍ਤੋ ਆਗਚ੍ਛਤੀ’’ਤਿ ਆਚਿਕ੍ਖਿਤ੍ਵਾ, ‘‘ਯਂ ਵੋ ਰੁਚ੍ਚਤਿ, ਤਂ ਕਰੇਯ੍ਯਾਥਾ’’ਤਿ ਵਤ੍ਵਾ ਤਾਪਸਂ ਵਨ੍ਦਿਤ੍ਵਾ ਪਕ੍ਕਾਮਿ. ਤਾਪਸੋ ਪਲਾਯਨਮਨ੍ਤਂ ਵਤ੍ਵਾ ਪਲਾਯਨਤਨ੍ਤਿਂ ਪਹਰਿਤ੍ਵਾ ਹਤ੍ਥੀ ਪਲਾਪੇਤ੍ਵਾ ਵਸਿ.

ਤਸ੍ਮਿਂ ਸਮਯੇ ਕੋਸਮ੍ਬਿਯਂ ਪੂਰਨ੍ਤਪ੍ਪੋ ਨਾਮ ਰਾਜਾ ਹੋਤਿ. ਸੋ ਏਕਦਿਵਸਂ ਗਬ੍ਭਿਨਿਯਾ ਦੇਵਿਯਾ ਸਦ੍ਧਿਂ ਬਾਲਸੂਰਿਯਤਪਂ ਤਪ੍ਪਮਾਨੋ ਅਬ੍ਭੋਕਾਸਤਲੇ ਨਿਸੀਦਿ. ਦੇਵੀ ਰਞ੍ਞੋ ਪਾਰੁਪਨਂ ਸਤਸਹਸ੍ਸਗ੍ਘਨਿਕਂ ਰਤ੍ਤਕਮ੍ਬਲਂ ਪਾਰੁਪਿਤ੍ਵਾ ਨਿਸਿਨ੍ਨਾ ਰਞ੍ਞਾ ਸਦ੍ਧਿਂ ਸਮੁਲ੍ਲਪਮਾਨਾ ਰਞ੍ਞੋ ਅਙ੍ਗੁਲਿਤੋ ਸਤਸਹਸ੍ਸਗ੍ਘਨਿਕਂ ਰਾਜਮੁਦ੍ਦਿਕਂ ਨੀਹਰਿਤ੍ਵਾ ਅਤ੍ਤਨੋ ਅਙ੍ਗੁਲਿਯਂ ਪਿਲਨ੍ਧਿ. ਤਸ੍ਮਿਂ ਸਮਯੇ ਹਤ੍ਥਿਲਿਙ੍ਗਸਕੁਣੋ ਆਕਾਸੇਨ ਗਚ੍ਛਨ੍ਤੋ ਦੂਰਤੋ ਰਤ੍ਤਕਮ੍ਬਲਪਾਰੁਪਨਂ ਦੇਵਿਂ ਦਿਸ੍ਵਾ ‘‘ਮਂਸਪੇਸੀ’’ਤਿ ਸਞ੍ਞਾਯ ਪਕ੍ਖੇ ਵਿਸ੍ਸਜ੍ਜੇਤ੍ਵਾ ਓਤਰਿ. ਰਾਜਾ ਤਸ੍ਸ ਓਤਰਣਸਦ੍ਦੇਨ ਭੀਤੋ ਉਟ੍ਠਾਯ ਅਨ੍ਤੋਨਿਵੇਸਨਂ ਪਾਵਿਸਿ. ਦੇਵੀ ਗਰੁਗਬ੍ਭਤਾਯ ਚੇਵ ਭੀਰੁਕਜਾਤਿਕਤਾਯ ਚ ਵੇਗੇਨ ਗਨ੍ਤੁਂ ਨਾਸਕ੍ਖਿ. ਅਥ ਨਂ ਸੋ ਸਕੁਣੋ ਅਜ੍ਝਪ੍ਪਤ੍ਤੋ ਨਖਪਞ੍ਜਰੇ ਨਿਸੀਦਾਪੇਤ੍ਵਾ ਆਕਾਸਂ ਪਕ੍ਖਨ੍ਦਿ. ਤੇ ਕਿਰ ਸਕੁਣਾ ਪਞ੍ਚਨ੍ਨਂ ਹਤ੍ਥੀਨਂ ਬਲਂ ਧਾਰੇਨ੍ਤਿ. ਤਸ੍ਮਾ ਆਕਾਸੇਨ ਨੇਤ੍ਵਾ ਯਥਾਰੁਚਿਤਟ੍ਠਾਨੇ ਨਿਸੀਦਿਤ੍ਵਾ ਮਂਸਂ ਖਾਦਨ੍ਤਿ. ਸਾਪਿ ਤੇਨ ਨੀਯਮਾਨਾ ਮਰਣਭਯਭੀਤਾ ਚਿਨ੍ਤੇਸਿ – ‘‘ਸਚਾਹਂ ਵਿਰਵਿਸ੍ਸਾਮਿ, ਮਨੁਸ੍ਸਸਦ੍ਦੋ ਨਾਮ ਤਿਰਚ੍ਛਾਨਗਤਾਨਂ ਉਬ੍ਬੇਜਨੀਯੋ, ਤਂ ਸੁਤ੍ਵਾ ਮਂ ਛਡ੍ਡੇਸ੍ਸਤਿ. ਏਵਂ ਸਨ੍ਤੇ ਸਹ ਗਬ੍ਭੇਨ ਜੀਵਿਤਕ੍ਖਯਂ ਪਾਪੁਣਿਸ੍ਸਾਮਿ, ਯਸ੍ਮਿਂ ਪਨ ਠਾਨੇ ਨਿਸੀਦਿਤ੍ਵਾ ਮਂ ਖਾਦਿਤੁਂ ਆਰਭਿਸ੍ਸਤਿ, ਤਤ੍ਰ ਨਂ ਸਦ੍ਦਂ ਕਤ੍ਵਾ ਪਲਾਪੇਸ੍ਸਾਮੀ’’ਤਿ. ਸਾ ਅਤ੍ਤਨੋ ਪਣ੍ਡਿਤਤਾਯ ਅਧਿਵਾਸੇਸਿ.

ਤਦਾ ਚ ਹਿਮਵਨ੍ਤਪਦੇਸੇ ਥੋਕਂ ਵਡ੍ਢਿਤ੍ਵਾ ਮਣ੍ਡਪਾਕਾਰੇਨ ਠਿਤੋ ਏਕੋ ਮਹਾਨਿਗ੍ਰੋਧੋ ਹੋਤਿ. ਸੋ ਸਕੁਣੋ ਮਿਗਰੂਪਾਦੀਨਿ ਤਤ੍ਥ ਨੇਤ੍ਵਾ ਖਾਦਤਿ, ਤਸ੍ਮਾ ਤਮ੍ਪਿ ਤਤ੍ਥੇਵ ਨੇਤ੍ਵਾ ਵਿਟਪਬ੍ਭਨ੍ਤਰੇ ਠਪੇਤ੍ਵਾ ਆਗਤਮਗ੍ਗਂ ਓਲੋਕੇਸਿ. ਆਗਤਮਗ੍ਗੋਲੋਕਨਂ ਕਿਰ ਤੇਸਂ ਧਮ੍ਮਤਾ. ਤਸ੍ਮਿਂ ਖਣੇ ਦੇਵੀ, ‘‘ਇਦਾਨਿ ਇਮਂ ਪਲਾਪੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਉਭੋ ਹਤ੍ਥੇ ਉਕ੍ਖਿਪਿਤ੍ਵਾ ਪਾਣਿਸਦ੍ਦਞ੍ਚੇਵ ਮੁਖਸਦ੍ਦਞ੍ਚ ਕਤ੍ਵਾ ਤਂ ਪਲਾਪੇਸਿ. ਅਥਸ੍ਸਾ ਸੂਰਿਯਤ੍ਥਙ੍ਗਮਨਕਾਲੇ ਗਬ੍ਭੇ ਕਮ੍ਮਜਵਾਤਾ ਚਲਿਂਸੁ. ਸਬ੍ਬਦਿਸਾਸੁ ਗਜ੍ਜਨ੍ਤੋ ਮਹਾਮੇਘੋ ਉਟ੍ਠਹਿ. ਸੁਖੇਧਿਤਾਯ ਰਾਜਮਹੇਸਿਯਾ ‘‘ਮਾ ਭਾਯਿ, ਅਯ੍ਯੇ’’ਤਿ ਵਚਨਮਤ੍ਤਮ੍ਪਿ ਅਲਭਮਾਨਾਯ ਦੁਕ੍ਖਪਰੇਤਾਯ ਸਬ੍ਬਰਤ੍ਤਿਂ ਨਿਦ੍ਦਾ ਨਾਮ ਨਾਹੋਸਿ. ਵਿਭਾਤਾਯ ਪਨ ਰਤ੍ਤਿਯਾ ਵਲਾਹਕਵਿਗਮੋ ਚ ਅਰੁਣੁਗ੍ਗਮਨਞ੍ਚ ਤਸ੍ਸਾ ਗਬ੍ਭਵੁਟ੍ਠਾਨਞ੍ਚ ਏਕਕ੍ਖਣੇਯੇਵ ਅਹੋਸਿ. ਸਾ ਮੇਘਉਤੁਞ੍ਚ ਪਬ੍ਬਤਉਤੁਞ੍ਚ ਅਰੁਣਉਤੁਞ੍ਚ ਗਹੇਤ੍ਵਾ ਜਾਤਤ੍ਤਾ ਪੁਤ੍ਤਸ੍ਸ ਉਤੇਨੋਤਿ ਨਾਮਂ ਅਕਾਸਿ.

ਅਲ੍ਲਕਪ੍ਪਤਾਪਸਸ੍ਸਪਿ ਖੋ ਤਤੋ ਅਵਿਦੂਰੇ ਵਸਨਟ੍ਠਾਨਂ ਹੋਤਿ. ਸੋ ਪਕਤਿਯਾਵ ਵਸ੍ਸਦਿਵਸੇ ਸੀਤਭਯੇਨ ਫਲਾਫਲਤ੍ਥਾਯ ਵਨਂ ਨ ਪਵਿਸਤਿ, ਤਂ ਰੁਕ੍ਖਮੂਲਂ ਗਨ੍ਤ੍ਵਾ ਸਕੁਣੇਹਿ ਖਾਦਿਤਮਂਸਾਨਂ ਅਟ੍ਠਿਂ ਆਹਰਿਤ੍ਵਾ ਕੋਟ੍ਟੇਤ੍ਵਾ ਰਸਂ ਕਤ੍ਵਾ ਪਿਵਤਿ. ਤਸ੍ਮਾ ਤਂ ਦਿਵਸਂ ‘‘ਅਟ੍ਠਿਂ ਆਹਰਿਸ੍ਸਾਮੀ’’ਤਿ ਤਤ੍ਥ ਗਨ੍ਤ੍ਵਾ ਰੁਕ੍ਖਮੂਲੇ ਅਟ੍ਠਿਂ ਪਰਿਯੇਸੇਨ੍ਤੋ ਉਪਰਿ ਦਾਰਕਸਦ੍ਦਂ ਸੁਤ੍ਵਾ ਉਲ੍ਲੋਕੇਨ੍ਤੋ ਦੇਵਿਂ ਦਿਸ੍ਵਾ ‘‘ਕਾਸਿ ਤ੍ਵ’’ਨ੍ਤਿ ਵਤ੍ਵਾ ‘‘ਮਾਨੁਸਿਤ੍ਥਿਮ੍ਹੀ’’ਤਿ. ‘‘ਕਥਂ ਆਗਤਾਸੀ’’ਤਿ? ‘‘ਹਤ੍ਥਿਲਿਙ੍ਗਸਕੁਣੇਨਾਨੀਤਾਮ੍ਹੀ’’ਤਿ ਵੁਤ੍ਤੇ ‘‘ਓਤਰਾਹੀ’’ਤਿ ਆਹ. ‘‘ਜਾਤਿਸਮ੍ਭੇਦਤੋ ਭਾਯਾਮਿ, ਅਯ੍ਯਾ’’ਤਿ. ‘‘ਕਾਸਿ ਤ੍ਵ’’ਨ੍ਤਿ? ‘‘ਖਤ੍ਤਿਯਾਮ੍ਹੀ’’ਤਿ. ‘‘ਅਹਮ੍ਪਿ ਖਤ੍ਤਿਯੋਯੇਵਾ’’ਤਿ. ‘‘ਤੇਨ ਹਿ ਖਤ੍ਤਿਯਮਾਯਂ ਕਥੇਹੀ’’ਤਿ. ਸੋ ਖਤ੍ਤਿਯਮਾਯਂ ਕਥੇਸਿ. ‘‘ਤੇਨ ਹਿ ਆਰੁਯ੍ਹ ਪੁਤ੍ਤਂ ਮੇ ਓਤਾਰੇਹੀ’’ਤਿ. ਸੋ ਏਕੇਨ ਪਸ੍ਸੇਨ ਅਭਿਰੁਹਨਮਗ੍ਗਂ ਕਤ੍ਵਾ ਅਭਿਰੁਹਿਤ੍ਵਾ ਦਾਰਕਂ ਗਣ੍ਹਿ. ‘‘ਮਾ ਮਂ ਹਤ੍ਥੇਨ ਛੁਪੀ’’ਤਿ ਚ ਵੁਤ੍ਤੇ ਤਂ ਅਛੁਪਿਤ੍ਵਾਵ ਦਾਰਕਂ ਓਤਾਰੇਸਿ. ਦੇਵੀਪਿ ਓਤਰਿ. ਅਥ ਨਂ ਅਸ੍ਸਮਪਦਂ ਨੇਤ੍ਵਾ ਸੀਲਭੇਦਂ ਅਕਤ੍ਵਾਵ ਅਨੁਕਮ੍ਪਾਯ ਪਟਿਜਗ੍ਗਿ, ਨਿਮ੍ਮਕ੍ਖਿਕਮਧੁਂ ਆਹਰਿਤ੍ਵਾ ਸਯਂਜਾਤਸਾਲਿਂ ਆਹਰਿਤ੍ਵਾ ਯਾਗੁਂ ਪਚਿਤ੍ਵਾ ਅਦਾਸਿ. ਏਵਂ ਤਸ੍ਮਿਂ ਪਟਿਜਗ੍ਗਨ੍ਤੇ ਸਾ ਅਪਰਭਾਗੇ ਚਿਨ੍ਤੇਸਿ – ‘‘ਅਹਂ ਨੇਵ ਆਗਤਮਗ੍ਗਂ ਜਾਨਾਮਿ, ਨ ਗਮਨਮਗ੍ਗਂ ਜਾਨਾਮਿ, ਇਮਿਨਾਪਿ ਮੇ ਸਦ੍ਧਿਂ ਵਿਸ੍ਸਾਸਮਤ੍ਤਮ੍ਪਿ ਨਤ੍ਥਿ. ਸਚੇ ਪਨਾਯਂ ਅਮ੍ਹੇ ਪਹਾਯ ਕਤ੍ਥਚਿ ਗਮਿਸ੍ਸਤਿ, ਉਭੋਪਿ ਇਧੇਵ ਮਰਣਂ ਪਾਪੁਣਿਸ੍ਸਾਮ, ਯਂਕਿਞ੍ਚਿ ਕਤ੍ਵਾ ਇਮਸ੍ਸ ਸੀਲਂ ਭਿਨ੍ਦਿਤ੍ਵਾ ਯਥਾ ਮਂ ਨ ਮੁਞ੍ਚਤਿ, ਤਥਾ ਤਂ ਕਾਤੁਂ ਵਟ੍ਟਤੀ’’ਤਿ. ਅਥ ਨਂ ਦੁਨ੍ਨਿਵਤ੍ਥਦੁਪ੍ਪਾਰੁਤਦਸ੍ਸਨੇਨ ਪਲੋਭੇਤ੍ਵਾ ਸੀਲਵਿਨਾਸਂ ਪਾਪੇਸਿ. ਤਤੋ ਪਟ੍ਠਾਯ ਦ੍ਵੇਪਿ ਸਮਗ੍ਗਵਾਸਂ ਵਸਿਂਸੁ.

ਅਥੇਕਦਿਵਸਂ ਤਾਪਸੋ ਨਕ੍ਖਤ੍ਤਯੋਗਂ ਉਲ੍ਲੋਕੇਨ੍ਤੋ ਪੂਰਨ੍ਤਪ੍ਪਸ੍ਸ ਨਕ੍ਖਤ੍ਤਮਿਲਾਯਨਂ ਦਿਸ੍ਵਾ ‘‘ਭਦ੍ਦੇ ਕੋਸਮ੍ਬਿਯਂ ਪੂਰਨ੍ਤਪ੍ਪਰਾਜਾ ਮਤੋ’’ਤਿ ਆਹ. ‘‘ਕਸ੍ਮਾ, ਅਯ੍ਯ, ਏਵਂ ਵਦੇਸਿ? ਕਿਂ ਤੇ ਤੇਨ ਸਦ੍ਧਿਂ ਆਘਾਤੋ ਅਤ੍ਥੀ’’ਤਿ? ‘‘ਨਤ੍ਥਿ, ਭਦ੍ਦੇ, ਨਕ੍ਖਤ੍ਤਮਿਲਾਯਨਮਸ੍ਸ ਦਿਸ੍ਵਾ ਏਵਂ ਵਦਾਮੀ’’ਤਿ, ਸਾ ਪਰੋਦਿ. ਅਥ ਨਂ ‘‘ਕਸ੍ਮਾ ਰੋਦਸੀ’’ਤਿ ਪੁਚ੍ਛਿਤ੍ਵਾ ਤਾਯ ਤਸ੍ਸ ਅਤ੍ਤਨੋ ਸਾਮਿਕਭਾਵੇ ਅਕ੍ਖਾਤੇ ਆਹ – ‘‘ਮਾ, ਭਦ੍ਦੇ, ਰੋਦਿ, ਜਾਤਸ੍ਸ ਨਾਮ ਨਿਯਤੋ ਮਚ੍ਚੂ’’ਤਿ. ‘‘ਜਾਨਾਮਿ, ਅਯ੍ਯਾ’’ਤਿ ਵੁਤ੍ਤੇ ‘‘ਅਥ ਕਸ੍ਮਾ ਰੋਦਸੀ’’ਤਿ? ‘‘ਪੁਤ੍ਤੋ ਮੇ ਕੁਲਸਨ੍ਤਕਸ੍ਸ ਰਜ੍ਜਸ੍ਸ ਅਨੁਚ੍ਛਵਿਕੋ, ‘ਸਚੇ ਤਤ੍ਰ ਅਭਵਿਸ੍ਸ, ਸੇਤਚ੍ਛਤ੍ਤਂ ਉਸ੍ਸਾਪਯਿਸ੍ਸ. ਇਦਾਨਿ ਮਹਾਜਾਨਿਕੋ ਵਤ ਜਾਤੋ’ਤਿ ਸੋਕੇਨ ਰੋਦਾਮਿ, ਅਯ੍ਯਾ’’ਤਿ. ‘‘ਹੋਤੁ, ਭਦ੍ਦੇ, ਮਾ ਚਿਨ੍ਤਯਿ, ਸਚਸ੍ਸ ਰਜ੍ਜਂ ਪਤ੍ਥੇਸਿ, ਅਹਮਸ੍ਸ ਰਜ੍ਜਲਭਨਾਕਾਰਂ ਕਰਿਸ੍ਸਾਮੀ’’ਤਿ. ਅਥਸ੍ਸ ਹਤ੍ਥਿਕਨ੍ਤਵੀਣਞ੍ਚੇਵ ਹਤ੍ਥਿਕਨ੍ਤਮਨ੍ਤੇ ਚ ਅਦਾਸਿ. ਤਦਾ ਅਨੇਕਾਨਿ ਹਤ੍ਥਿਸਹਸ੍ਸਾਨਿ ਆਗਨ੍ਤ੍ਵਾ ਵਟਰੁਕ੍ਖਮੂਲੇ ਨਿਸੀਦਨ੍ਤਿ. ਅਥ ਨਂ ਆਹ – ‘‘ਹਤ੍ਥੀਸੁ ਅਨਾਗਤੇਸੁਯੇਵ ਰੁਕ੍ਖਂ ਅਭਿਰੁਹਿਤ੍ਵਾ ਤੇਸੁ ਆਗਤੇਸੁ ਇਮਂ ਮਨ੍ਤਂ ਵਤ੍ਵਾ ਇਮਂ ਤਨ੍ਤਿਂ ਪਹਰ, ਸਬ੍ਬੇ ਨਿਵਤ੍ਤਿਤ੍ਵਾ ਓਲੋਕੇਤੁਮ੍ਪਿ ਅਸਕ੍ਕੋਨ੍ਤਾ ਪਲਾਯਿਸ੍ਸਨ੍ਤਿ, ਅਥ ਓਤਰਿਤ੍ਵਾ ਆਗਚ੍ਛੇਯ੍ਯਾਸੀ’’ਤਿ. ਸੋ ਤਥਾ ਕਤ੍ਵਾ ਆਗਨ੍ਤ੍ਵਾ ਤਂ ਪਵਤ੍ਤਿਂ ਆਰੋਚੇਸਿ. ਅਥ ਨਂ ਦੁਤਿਯਦਿਵਸੇ ਆਹ – ‘‘ਅਜ੍ਜ ਇਮਂ ਮਨ੍ਤਂ ਵਤ੍ਵਾ ਇਮਂ ਤਨ੍ਤਿਂ ਪਹਰੇਯ੍ਯਾਸਿ, ਸਬ੍ਬੇ ਨਿਵਤ੍ਤਿਤ੍ਵਾ ਓਲੋਕੇਨ੍ਤਾ ਪਲਾਯਿਸ੍ਸਨ੍ਤੀ’’ਤਿ. ਤਦਾਪਿ ਤਥਾ ਕਤ੍ਵਾ ਆਗਨ੍ਤ੍ਵਾ ਆਰੋਚੇਸਿ. ਅਥ ਨਂ ਤਤਿਯਦਿਵਸੇ ਆਹ – ‘‘ਅਜ੍ਜ ਇਮਂ ਮਨ੍ਤਂ ਵਤ੍ਵਾ ਇਮਂ ਤਨ੍ਤਿਂ ਪਹਰੇਯ੍ਯਾਸਿ, ਯੂਥਪਤਿ ਪਿਟ੍ਠਿਂ ਉਪਨਾਮੇਨ੍ਤੋ ਆਗਮਿਸ੍ਸਤੀ’’ਤਿ. ਤਦਾਪਿ ਤਥਾ ਕਤ੍ਵਾ ਆਰੋਚੇਸਿ.

ਅਥਸ੍ਸ ਮਾਤਰਂ ਆਮਨ੍ਤੇਤ੍ਵਾ, ‘‘ਭਦ੍ਦੇ, ਪੁਤ੍ਤਸ੍ਸ ਤੇ ਸਾਸਨਂ ਵਦੇਹਿ, ਏਤ੍ਤੋਵ ਗਨ੍ਤ੍ਵਾ ਰਾਜਾ ਭਵਿਸ੍ਸਤੀ’’ਤਿ ਆਹ. ਸਾ ਪੁਤ੍ਤਂ ਆਮਨ੍ਤੇਤ੍ਵਾ, ‘‘ਤਾਤ, ਤ੍ਵਂ ਕੋਸਮ੍ਬਿਯਂ ਪੂਰਨ੍ਤਪ੍ਪਰਞ੍ਞੋ ਪੁਤ੍ਤੋ, ਮਂ ਸਗਬ੍ਭਂ ਹਤ੍ਥਿਲਿਙ੍ਗਸਕੁਣੋ ਆਨੇਸੀ’’ਤਿ ਵਤ੍ਵਾ ਸੇਨਾਪਤਿਆਦੀਨਂ ਨਾਮਾਨਿ ਆਚਿਕ੍ਖਿਤ੍ਵਾ ‘‘ਅਸਦ੍ਦਹਨ੍ਤਾਨਂ ਇਮਂ ਪਿਤੁ ਪਾਰੁਪਨਕਮ੍ਬਲਞ੍ਚੇਵ ਪਿਲਨ੍ਧਨਮੁਦ੍ਦਿਕਞ੍ਚ ਦਸ੍ਸੇਯ੍ਯਾਸੀ’’ਤਿ ਵਤ੍ਵਾ ਉਯ੍ਯੋਜੇਸਿ. ਕੁਮਾਰੋ ਤਾਪਸਂ ‘‘ਇਦਾਨਿ ਕਿਂ ਕਰੋਮੀ’’ਤਿ ਆਹ. ‘‘ਰੁਕ੍ਖਸ੍ਸ ਹੇਟ੍ਠਿਮਸਾਖਾਯ ਨਿਸੀਦਿਤ੍ਵਾ ਇਮਂ ਮਨ੍ਤਂ ਵਤ੍ਵਾ ਇਮਂ ਤਨ੍ਤਿਂ ਪਹਰ, ਜੇਟ੍ਠਕਹਤ੍ਥੀ ਤੇ ਪਿਟ੍ਠਿਂ ਉਪਨਾਪੇਤ੍ਵਾ ਉਪਸਙ੍ਕਮਿਸ੍ਸਤਿ, ਤਸ੍ਸ ਪਿਟ੍ਠਿਯਂ ਨਿਸਿਨ੍ਨੋਵ ਰਟ੍ਠਂ ਗਨ੍ਤ੍ਵਾ ਰਜ੍ਜਂ ਗਣ੍ਹਾਹੀ’’ਤਿ. ਸੋ ਮਾਤਾਪਿਤਰੋ ਵਨ੍ਦਿਤ੍ਵਾ ਤਥਾ ਕਤ੍ਵਾ ਆਗਤਸ੍ਸ ਹਤ੍ਥਿਨੋ ਪਿਟ੍ਠਿਯਂ ਨਿਸੀਦਿਤ੍ਵਾ ਕਣ੍ਣੇ ਮਨ੍ਤਯਿ – ‘‘ਅਹਂ ਕੋਸਮ੍ਬਿਯਂ ਪੂਰਨ੍ਤਪ੍ਪਰਞ੍ਞੋ ਪੁਤ੍ਤੋ, ਪੇਤ੍ਤਿਕਂ ਮੇ ਰਜ੍ਜਂ ਗਣ੍ਹਿਤ੍ਵਾ ਦੇਹਿ ਸਾਮੀ’’ਤਿ. ਸੋ ਤਂ ਸੁਤ੍ਵਾ ‘‘ਅਨੇਕਾਨਿ ਹਤ੍ਥਿਸਹਸ੍ਸਾਨਿ ਸਨ੍ਨਿਪਤਨ੍ਤੂ’’ਤਿ ਹਤ੍ਥਿਰਵਂ ਰਵਿ, ਅਨੇਕਾਨਿ ਹਤ੍ਥਿਸਹਸ੍ਸਾਨਿ ਸਨ੍ਨਿਪਤਿਂਸੁ. ਪੁਨ ‘‘ਜਿਣ੍ਣਾ ਹਤ੍ਥੀ ਪਟਿਕ੍ਕਮਨ੍ਤੂ’’ਤਿ ਹਤ੍ਥਿਰਵਂ ਰਵਿ, ਜਿਣ੍ਣਾ ਹਤ੍ਥੀ ਪਟਿਕ੍ਕਮਿਂਸੁ. ਪੁਨ ‘‘ਅਤਿਤਰੁਣਾ ਹਤ੍ਥੀ ਨਿਵਤ੍ਤਨ੍ਤੂ’’ਤਿ ਹਤ੍ਥਿਰਵਂ ਰਵਿ, ਤੇਪਿ ਨਿਵਤ੍ਤਿਂਸੁ. ਸੋ ਅਨੇਕੇਹਿ ਯੂਥਹਤ੍ਥਿਸਹਸ੍ਸੇਹੇਵ ਪਰਿਵੁਤੋ ਪਚ੍ਚਨ੍ਤਗਾਮਂ ਪਤ੍ਵਾ ‘‘ਅਹਂ ਰਞ੍ਞੋ ਪੁਤ੍ਤੋ, ਸਮ੍ਪਤ੍ਤਿਂ ਪਤ੍ਥਯਮਾਨਾ ਮਯਾ ਸਦ੍ਧਿਂ ਆਗਚ੍ਛਨ੍ਤੂ’’ਤਿ ਆਹ. ‘‘ਤਤੋ ਪਟ੍ਠਾਯ ਮਨੁਸ੍ਸਾਨਂ ਸਙ੍ਗਹਂ ਕਰੋਨ੍ਤੋ ਗਨ੍ਤ੍ਵਾ ਨਗਰਂ ਪਰਿਵਾਰੇਤ੍ਵਾ ‘ਯੁਦ੍ਧਂ ਵਾ ਮੇ ਦੇਤੁ, ਰਜ੍ਜਂ ਵਾ’’’ਤਿ ਸਾਸਨਂ ਪੇਸੇਸਿ. ਨਾਗਰਾ ਆਹਂਸੁ – ‘‘ਮਯਂ ਦ੍ਵੇਪਿ ਨ ਦਸ੍ਸਾਮ. ਅਮ੍ਹਾਕਞ੍ਹਿ ਦੇਵੀ ਗਰੁਗਬ੍ਭਾ ਹਤ੍ਥਿਲਿਙ੍ਗਸਕੁਣੇਨ ਨੀਤਾ, ਤਸ੍ਸਾ ਅਤ੍ਥਿਭਾਵਂ ਵਾ ਨਤ੍ਥਿਭਾਵਂ ਵਾ ਮਯਂ ਨ ਜਾਨਾਮ. ਯਾਵ ਤਸ੍ਸਾ ਪਵਤ੍ਤਿਂ ਨ ਸੁਣਾਮ. ਤਾਵ ਨੇਵ ਯੁਦ੍ਧਂ ਦਸ੍ਸਾਮ, ਨ ਰਜ੍ਜ’’ਨ੍ਤਿ. ਤਦਾ ਕਿਰ ਤਂ ਪਵੇਣਿਰਜ੍ਜਂ ਅਹੋਸਿ. ਤਤੋ ਕੁਮਾਰੋ ‘‘ਅਹਂ ਤਸ੍ਸਾ ਪੁਤ੍ਤੋ’’ਤਿ ਵਤ੍ਵਾ ਸੇਨਾਪਤਿਆਦੀਨਂ ਨਾਮਾਨਿ ਕਥੇਤ੍ਵਾ ਤਥਾਪਿ ਅਸਦ੍ਦਹਨ੍ਤਾਨਂ ਕਮ੍ਬਲਞ੍ਚ ਮੁਦ੍ਦਿਕਞ੍ਚ ਦਸ੍ਸੇਸਿ. ਤੇ ਕਮ੍ਬਲਞ੍ਚ ਮੁਦ੍ਦਿਕਞ੍ਚ ਸਞ੍ਜਾਨਿਤ੍ਵਾ ਨਿਕ੍ਕਙ੍ਖਾ ਹੁਤ੍ਵਾ ਦ੍ਵਾਰਂ ਵਿਵਰਿਤ੍ਵਾ ਤਂ ਰਜ੍ਜੇ ਅਭਿਸਿਞ੍ਚਿਂਸੁ. ਅਯਂ ਤਾਵ ਉਤੇਨਸ੍ਸ ਉਪ੍ਪਤ੍ਤਿ.

ਅਲ੍ਲਕਪ੍ਪਰਟ੍ਠੇ ਪਨ ਦੁਬ੍ਭਿਕ੍ਖੇ ਜੀਵਿਤੁਂ ਅਸਕ੍ਕੋਨ੍ਤੋ ਏਕੋ ਕੋਤੁਹਲਿਕੋ ਨਾਮ ਮਨੁਸ੍ਸੋ ਕਾਪਿਂ ਨਾਮ ਤਰੁਣਪੁਤ੍ਤਞ੍ਚ ਕਾਲ਼ਿਂ ਨਾਮ ਭਰਿਯਞ੍ਚ ਆਦਾਯ ‘‘ਕੋਸਮ੍ਬਿਂ ਗਨ੍ਤ੍ਵਾ ਜੀਵਿਸ੍ਸਾਮੀ’’ਤਿ ਪਾਥੇਯ੍ਯਂ ਗਹੇਤ੍ਵਾ ਨਿਕ੍ਖਮਿ. ‘‘ਅਹਿਵਾਤਰੋਗੇਨ ਮਹਾਜਨੇ ਮਰਨ੍ਤੇ ਦਿਸ੍ਵਾ ਨਿਕ੍ਖਮੀ’’ਤਿਪਿ ਵਦਨ੍ਤਿਯੇਵ. ਤੇ ਗਚ੍ਛਨ੍ਤਾ ਪਾਥੇਯ੍ਯੇ ਪਰਿਕ੍ਖੀਣੇ ਖੁਦਾਭਿਭੂਤਾ ਦਾਰਕਂ ਵਹਿਤੁਂ ਨਾਸਕ੍ਖਿਂਸੁ. ਅਥ ਸਾਮਿਕੋ ਪਜਾਪਤਿਂ ਆਹ – ‘‘ਭਦ੍ਦੇ, ਮਯਂ ਜੀਵਨ੍ਤਾ ਪੁਨ ਪੁਤ੍ਤਂ ਲਭਿਸ੍ਸਾਮ, ਛਡ੍ਡੇਤ੍ਵਾ ਨਂ ਗਚ੍ਛਾਮਾ’’ਤਿ. ਮਾਤੁ ਹਦਯਂ ਨਾਮ ਮੁਦੁਕਂ ਹੋਤਿ. ਤਸ੍ਮਾ ਸਾ ਆਹ – ‘‘ਨਾਹਂ ਜੀਵਨ੍ਤਮੇਵ ਪੁਤ੍ਤਂ ਛਡ੍ਡੇਤੁਂ ਸਕ੍ਖਿਸ੍ਸਾਮੀ’’ਤਿ. ‘‘ਅਥ ਕਿਂ ਕਰੋਮਾ’’ਤਿ? ‘‘ਵਾਰੇਨ ਨਂ ਵਹਾਮਾ’’ਤਿ. ਮਾਤਾ ਅਤ੍ਤਨੋ ਵਾਰੇ ਪੁਪ੍ਫਦਾਮਂ ਵਿਯ ਨਂ ਉਕ੍ਖਿਪਿਤ੍ਵਾ ਉਰੇ ਨਿਪਜ੍ਜਾਪੇਤ੍ਵਾ ਅਙ੍ਕੇਨ ਵਹਿਤ੍ਵਾ ਪਿਤੁਨੋ ਦੇਤਿ. ਤਸ੍ਸ ਤਂ ਗਹੇਤ੍ਵਾ ਗਮਨਕਾਲੇ ਛਾਤਕਤੋਪਿ ਬਲਵਤਰਾ ਵੇਦਨਾ ਉਪ੍ਪਜ੍ਜਿ. ਸੋ ਪੁਨਪ੍ਪੁਨਂ ਆਹ – ‘‘ਭਦ੍ਦੇ, ਮਯਂ ਜੀਵਨ੍ਤਾ ਪੁਤ੍ਤਂ ਲਭਿਸ੍ਸਾਮ, ਛਡ੍ਡੇਮ ਨ’’ਨ੍ਤਿ. ਸਾਪਿ ਪੁਨਪ੍ਪੁਨਂ ਪਟਿਕ੍ਖਿਪਿਤ੍ਵਾ ਪਟਿਵਚਨਂ ਨਾਦਾਸਿ. ਦਾਰਕੋ ਵਾਰੇਨ ਪਰਿਵਤ੍ਤਿਯਮਾਨੋ ਕਿਲਨ੍ਤੋ ਪਿਤੁ ਹਤ੍ਥੇ ਨਿਦ੍ਦਾਯਿ. ਸੋ ਤਸ੍ਸ ਨਿਦ੍ਦਾਯਨਭਾਵਂ ਞਤ੍ਵਾ ਮਾਤਰਂ ਪੁਰਤੋ ਕਤ੍ਵਾ ਏਕਸ੍ਸ ਗਚ੍ਛਸ੍ਸ ਹੇਟ੍ਠਾ ਪਣ੍ਣਸਨ੍ਥਰੇ ਤਂ ਨਿਪਜ੍ਜਾਪੇਤ੍ਵਾ ਪਾਯਾਸਿ. ਮਾਤਾ ਨਿਵਤ੍ਤਿਤ੍ਵਾ ਓਲੋਕੇਨ੍ਤੀ ਪੁਤ੍ਤਂ ਅਦਿਸ੍ਵਾ, ‘‘ਸਾਮਿ, ਕੁਹਿਂ ਮੇ ਪੁਤ੍ਤੋ’’ਤਿ ਪੁਚ੍ਛਿ. ‘‘ਏਕਸ੍ਸ ਮੇ ਗਚ੍ਛਸ੍ਸ ਹੇਟ੍ਠਾ ਨਿਪਜ੍ਜਾਪਿਤੋ’’ਤਿ. ‘‘ਸਾਮਿ, ਮਾ ਮਂ ਨਾਸਯਿ, ਪੁਤ੍ਤਂ ਵਿਨਾ ਜੀਵਿਤੁਂ ਨ ਸਕ੍ਖਿਸ੍ਸਾਮਿ, ਆਨੇਹਿ ਮੇ ਪੁਤ੍ਤ’’ਨ੍ਤਿ ਉਰਂ ਪਹਰਿਤ੍ਵਾ ਪਰਿਦੇਵਿ. ਅਥ ਨਂ ਨਿਵਤ੍ਤਿਤ੍ਵਾ ਆਨੇਸਿ. ਪੁਤ੍ਤੋਪਿ ਅਨ੍ਤਰਾਮਗ੍ਗੇ ਮਤੋ ਹੋਤਿ. ਇਤਿ ਸੋ ਏਤ੍ਤਕੇ ਠਾਨੇ ਪੁਤ੍ਤਂ ਛਡ੍ਡੇਤ੍ਵਾ ਤਸ੍ਸ ਨਿਸ੍ਸਨ੍ਦੇਨ ਭਵਨ੍ਤਰੇ ਸਤ੍ਤ ਵਾਰੇ ਛਡ੍ਡਿਤੋ. ‘‘ਪਾਪਕਮ੍ਮਂ ਨਾਮੇਤਂ ਅਪ੍ਪਕ’’ਨ੍ਤਿ ਨ ਅਵਮਞ੍ਞਿਤਬ੍ਬਂ.

ਤੇ ਗਚ੍ਛਨ੍ਤਾ ਏਕਂ ਗੋਪਾਲਕੁਲਂ ਪਾਪੁਣਿਂਸੁ. ਤਂ ਦਿਵਸਞ੍ਚ ਗੋਪਾਲਕਸ੍ਸ ਧੇਨੁਮਙ੍ਗਲਂ ਹੋਤਿ. ਗੋਪਾਲਕਸ੍ਸ ਗੇਹੇ ਨਿਬਦ੍ਧਂ ਏਕੋ ਪਚ੍ਚੇਕਬੁਦ੍ਧੋ ਭੁਞ੍ਜਤਿ. ਸੋ ਤਂ ਭੋਜੇਤ੍ਵਾ ਮਙ੍ਗਲਮਕਾਸਿ. ਬਹੁ ਪਾਯਾਸੋ ਪਟਿਯਤ੍ਤੋ ਹੋਤਿ. ਗੋਪਾਲਕੋ ਤੇ ਆਗਤੇ ਦਿਸ੍ਵਾ, ‘‘ਕੁਤੋ ਆਗਤਤ੍ਥਾ’’ਤਿ ਪੁਚ੍ਛਿਤ੍ਵਾ ਸਬ੍ਬਂ ਪਵਤ੍ਤਿਂ ਸੁਤ੍ਵਾ ਮੁਦੁਜਾਤਿਕੋ ਕੁਲਪੁਤ੍ਤੋ ਤੇਸੁ ਅਨੁਕਮ੍ਪਂ ਕਤ੍ਵਾ ਬਹੁਕੇਨ ਸਪ੍ਪਿਨਾ ਪਾਯਾਸਂ ਦਾਪੇਸਿ. ਭਰਿਯਾ ‘‘ਸਾਮਿ, ਤਯਿ ਜੀਵਨ੍ਤੇ ਅਹਮ੍ਪਿ ਜੀਵਾਮਿ ਨਾਮ, ਦੀਘਰਤ੍ਤਂ ਊਨੋਦਰੋਸਿ, ਯਾਵਦਤ੍ਥਂ ਭੁਞ੍ਜਾਹੀ’’ਤਿ ਸਪ੍ਪਿਞ੍ਚ ਦਧਿਞ੍ਚ ਤਦਭਿਮੁਖਞ੍ਞੇਵ ਕਤ੍ਵਾ ਅਤ੍ਤਨਾ ਮਨ੍ਦਸਪ੍ਪਿਨਾ ਥੋਕਮੇਵ ਭੁਞ੍ਜਿ. ਇਤਰੋ ਬਹੁਂ ਭੁਞ੍ਜਿਤ੍ਵਾ ਸਤ੍ਤਟ੍ਠਦਿਵਸੇ ਛਾਤਤਾਯ ਆਹਾਰਤਣ੍ਹਂ ਛਿਨ੍ਦਿਤੁਂ ਨਾਸਕ੍ਖਿ. ਗੋਪਾਲਕੋ ਤੇਸਂ ਪਾਯਾਸਂ ਦਾਪੇਤ੍ਵਾ ਸਯਂ ਭੁਞ੍ਜਿਤੁਂ ਆਰਭਿ. ਕੋਤੁਹਲਿਕੋ ਤਂ ਓਲੋਕੇਨ੍ਤੋ ਨਿਸੀਦਿਤ੍ਵਾ ਹੇਟ੍ਠਾਪੀਠੇ ਨਿਪਨ੍ਨਾਯ ਸੁਨਖਿਯਾ ਗੋਪਾਲਕੇਨ ਵਡ੍ਢੇਤ੍ਵਾ ਦਿਯ੍ਯਮਾਨਂ ਪਾਯਾਸਪਿਣ੍ਡਂ ਦਿਸ੍ਵਾ ‘‘ਪੁਞ੍ਞਾ ਵਤਾਯਂ ਸੁਨਖੀ, ਨਿਬਦ੍ਧਂ ਏਵਰੂਪਂ ਭੋਜਨਂ ਲਭਤੀ’’ਤਿ ਚਿਨ੍ਤੇਸਿ. ਸੋ ਰਤ੍ਤਿਭਾਗੇ ਤਂ ਪਾਯਾਸਂ ਜੀਰਾਪੇਤੁਂ ਅਸਕ੍ਕੋਨ੍ਤੋ ਕਾਲਂ ਕਤ੍ਵਾ ਤਸ੍ਸਾ ਸੁਨਖਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ.

ਅਥਸ੍ਸ ਭਰਿਯਾ ਸਰੀਰਕਿਚ੍ਚਂ ਕਤ੍ਵਾ ਤਸ੍ਮਿਂਯੇਵ ਗੇਹੇ ਭਤਿਂ ਕਤ੍ਵਾ ਤਣ੍ਡੁਲਨਾਲ਼ਿਂ ਲਭਿਤ੍ਵਾ ਪਚਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਪਤ੍ਤੇ ਪਤਿਟ੍ਠਾਪੇਤ੍ਵਾ, ‘‘ਦਾਸਸ੍ਸ ਵੋ ਪਾਪੁਣਾਤੂ’’ਤਿ ਵਤ੍ਵਾ ਚਿਨ੍ਤੇਸਿ – ‘‘ਮਯਾ ਇਧੇਵ ਵਸਿਤੁਂ ਵਟ੍ਟਤਿ, ਨਿਬਦ੍ਧਂ, ਅਯ੍ਯੋ, ਇਧਾਗਚ੍ਛਤਿ, ਦੇਯ੍ਯਧਮ੍ਮੋ ਹੋਤੁ ਵਾ, ਮਾ ਵਾ, ਦੇਵਸਿਕਂ ਵਨ੍ਦਨ੍ਤੀ ਵੇਯ੍ਯਾਵਚ੍ਚਂ ਕਰੋਨ੍ਤੀ ਚਿਤ੍ਤਂ ਪਸਾਦੇਨ੍ਤੀ ਬਹੁਂ ਪੁਞ੍ਞਂ ਪਸਵਿਸ੍ਸਾਮੀ’’ਤਿ. ਸਾ ਤਤ੍ਥੇਵ ਭਤਿਂ ਕਰੋਨ੍ਤੀ ਵਸਿ. ਸਾਪਿ ਸੁਨਖੀ ਛਟ੍ਠੇ ਵਾ ਸਤ੍ਤਮੇ ਵਾ ਮਾਸੇ ਏਕਮੇਵ ਕੁਕ੍ਕੁਰਂ ਵਿਜਾਯਿ. ਗੋਪਾਲਕੋ ਤਸ੍ਸ ਏਕਧੇਨੁਯਾ ਖੀਰਂ ਦਾਪੇਸਿ. ਸੋ ਨ ਚਿਰਸ੍ਸੇਵ ਵਡ੍ਢਿ. ਅਥਸ੍ਸ ਪਚ੍ਚੇਕਬੁਦ੍ਧੋ ਭੁਞ੍ਜਨ੍ਤੋ ਨਿਬਦ੍ਧਂ ਏਕਂ ਭਤ੍ਤਪਿਣ੍ਡਂ ਦੇਤਿ. ਸੋ ਭਤ੍ਤਪਿਣ੍ਡਂ ਨਿਸ੍ਸਾਯ ਪਚ੍ਚੇਕਬੁਦ੍ਧੇ ਸਿਨੇਹਮਕਾਸਿ. ਗੋਪਾਲਕੋਪਿ ਨਿਬਦ੍ਧਂ ਦ੍ਵੇ ਵਾਰੇ ਪਚ੍ਚੇਕਬੁਦ੍ਧਸ੍ਸੁਪਟ੍ਠਾਨਂ ਯਾਤਿ. ਗਚ੍ਛਨ੍ਤੋਪਿ ਅਨ੍ਤਰਾਮਗ੍ਗੇ ਵਾਲ਼ਮਿਗਟ੍ਠਾਨੇ ਦਣ੍ਡੇਨ ਗਚ੍ਛੇ ਚ ਭੂਮਿਞ੍ਚ ਪਹਰਿਤ੍ਵਾ ‘‘ਸੁਸੂ’’ਤਿ ਤਿਕ੍ਖਤ੍ਤੁਂ ਸਦ੍ਦਂ ਕਤ੍ਵਾ ਵਾਲ਼ਮਿਗੇ ਪਲਾਪੇਤਿ. ਸੁਨਖੋਪਿ ਤੇਨ ਸਦ੍ਧਿਂ ਗਚ੍ਛਤਿ.

ਸੋ ਏਕਦਿਵਸਂ ਪਚ੍ਚੇਕਬੁਦ੍ਧਂ ਆਹ – ‘‘ਭਨ੍ਤੇ, ਯਦਾ ਮੇ ਓਕਾਸੋ ਨ ਭਵਿਸ੍ਸਤਿ, ਤਦਾ ਇਮਂ ਸੁਨਖਂ ਪੇਸੇਸ੍ਸਾਮਿ, ਤੇਨ ਸਞ੍ਞਾਣੇਨ ਆਗਚ੍ਛੇਯ੍ਯਾਥਾ’’ਤਿ. ਤਤੋ ਪਟ੍ਠਾਯ ਅਨੋਕਾਸਦਿਵਸੇ, ‘‘ਗਚ੍ਛ, ਤਾਤ, ਅਯ੍ਯਂ ਆਨੇਹੀ’’ਤਿ ਸੁਨਖਂ ਪੇਸੇਸਿ. ਸੋ ਏਕਵਚਨੇਨੇਵ ਪਕ੍ਖਨ੍ਦਿਤ੍ਵਾ ਸਾਮਿਕਸ੍ਸ ਗਚ੍ਛਪੋਥਨਭੂਮਿਪੋਥਨਟ੍ਠਾਨੇ ਤਿਕ੍ਖਤ੍ਤੁਂ ਭੁਸ੍ਸਿਤ੍ਵਾ ਤੇਨ ਸਦ੍ਦੇਨ ਵਾਲ਼ਮਿਗਾਨਂ ਪਲਾਤਭਾਵਂ ਞਤ੍ਵਾ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਨਿਸਿਨ੍ਨਸ੍ਸ ਪਚ੍ਚੇਕਬੁਦ੍ਧਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਪਣ੍ਣਸਾਲਦ੍ਵਾਰੇ ਤਿਕ੍ਖਤ੍ਤੁਂ ਭੁਸ੍ਸਿਤ੍ਵਾ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਏਕਮਨ੍ਤੇ ਨਿਪਜ੍ਜਤਿ, ਪਚ੍ਚੇਕਬੁਦ੍ਧੇ ਵੇਲਂ ਸਲ੍ਲਕ੍ਖੇਤ੍ਵਾ ਨਿਕ੍ਖਨ੍ਤੇ ਭੁਸ੍ਸਨ੍ਤੋ ਪੁਰਤੋ ਗਚ੍ਛਤਿ. ਅਨ੍ਤਰਨ੍ਤਰਾ ਪਚ੍ਚੇਕਬੁਦ੍ਧੋ ਤਂ ਵੀਮਂਸਨ੍ਤੋ ਅਞ੍ਞਂ ਮਗ੍ਗਂ ਪਟਿਪਜ੍ਜਤਿ. ਅਥਸ੍ਸ ਪੁਰਤੋ ਤਿਰਿਯਂ ਠਤ੍ਵਾ ਭੁਸ੍ਸਿਤ੍ਵਾ ਇਤਰਮਗ੍ਗਮੇਵ ਨਂ ਆਰੋਪੇਤਿ. ਅਥੇਕਦਿਵਸਂ ਅਞ੍ਞਂ ਮਗ੍ਗਂ ਪਟਿਪਜ੍ਜਿਤ੍ਵਾ ਤੇਨ ਪੁਰਤੋ ਤਿਰਿਯਂ ਠਤ੍ਵਾ ਵਾਰਿਯਮਾਨੋਪਿ ਅਨਿਵਤ੍ਤਿਤ੍ਵਾ ਸੁਨਖਂ ਪਾਦੇਨ ਪਹਰਿਤ੍ਵਾ ਪਾਯਾਸਿ. ਸੁਨਖੋ ਤਸ੍ਸ ਅਨਿਵਤ੍ਤਨਭਾਵਂ ਞਤ੍ਵਾ ਨਿਵਾਸਨਕਣ੍ਣੇ ਡਂਸਿਤ੍ਵਾ ਆਕਡ੍ਢਨ੍ਤੋ ਇਤਰਮਗ੍ਗਮੇਵ ਨਂ ਆਰੋਪੇਸਿ. ਏਵਂ ਸੋ ਤਸ੍ਮਿਂ ਬਲਵਸਿਨੇਹਂ ਉਪ੍ਪਾਦੇਸਿ.

ਤਤੋ ਅਪਰਭਾਗੇ ਪਚ੍ਚੇਕਬੁਦ੍ਧਸ੍ਸ ਚੀਵਰਂ ਜੀਰਿ. ਅਥਸ੍ਸ ਗੋਪਾਲਕੋ ਚੀਵਰਵਤ੍ਥਾਨਿ ਅਦਾਸਿ. ਤਮੇਨਂ ਪਚ੍ਚੇਕਬੁਦ੍ਧੋ ਆਹ – ‘‘ਆਵੁਸੋ, ਚੀਵਰਂ ਨਾਮ ਏਕਕੇਨ ਕਾਤੁਂ ਦੁਕ੍ਕਰਂ, ਫਾਸੁਕਟ੍ਠਾਨਂ ਗਨ੍ਤ੍ਵਾ ਕਾਰੇਸ੍ਸਾਮੀ’’ਤਿ. ‘‘ਇਧੇਵ, ਭਨ੍ਤੇ, ਕਰੋਥਾ’’ਤਿ. ‘‘ਨ ਸਕ੍ਕਾ, ਆਵੁਸੋ’’ਤਿ. ‘‘ਤੇਨ ਹਿ, ਭਨ੍ਤੇ, ਮਾ ਚਿਰਂ ਬਹਿ ਵਸਿਤ੍ਥਾ’’ਤਿ. ਸੁਨਖੋ ਤੇਸਂ ਕਥਂ ਸੁਣਨ੍ਤੋਵ ਅਟ੍ਠਾਸਿ, ਪਚ੍ਚੇਕਬੁਦ੍ਧੋਪਿ ‘‘ਤਿਟ੍ਠ, ਉਪਾਸਕਾ’’ਤਿ ਗੋਪਾਲਕਂ ਨਿਵਤ੍ਤਾਪੇਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਗਨ੍ਧਮਾਦਨਾਭਿਮੁਖੋ ਪਾਯਾਸਿ. ਸੁਨਖਸ੍ਸ ਤਂ ਆਕਾਸੇਨ ਗਚ੍ਛਨ੍ਤਂ ਦਿਸ੍ਵਾ ਭੁਕ੍ਕਰਿਤ੍ਵਾ ਠਿਤਸ੍ਸ ਤਸ੍ਮਿਂ ਚਕ੍ਖੁਪਥਂ ਵਿਜਹਨ੍ਤੇ ਹਦਯਂ ਫਲਿਤ੍ਵਾ ਮਤੋ. ਤਿਰਚ੍ਛਾਨਾ ਕਿਰ ਨਾਮੇਤੇ ਉਜੁਜਾਤਿਕਾ ਹੋਨ੍ਤਿ ਅਕੁਟਿਲਾ. ਮਨੁਸ੍ਸਾ ਪਨ ਅਞ੍ਞਂ ਹਦਯੇਨ ਚਿਨ੍ਤੇਨ੍ਤਿ, ਅਞ੍ਞਂ ਮੁਖੇਨ ਕਥੇਨ੍ਤਿ. ਤੇਨੇਵਾਹ – ‘‘ਗਹਨਞ੍ਹੇਤਂ, ਭਨ੍ਤੇ, ਯਦਿਦਂ ਮਨੁਸ੍ਸਾ, ਉਤ੍ਤਾਨਕਞ੍ਹੇਤਂ, ਭਨ੍ਤੇ, ਯਦਿਦਂ ਪਸਵੋ’’ਤਿ (ਮ. ਨਿ. ੨.੩).

ਇਤਿ ਸੋ ਤਾਯ ਉਜੁਚਿਤ੍ਤਤਾਯ ਅਕੁਟਿਲਤਾਯ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤੋ ਅਚ੍ਛਰਾਸਹਸ੍ਸਪਰਿਵੁਤੋ ਮਹਾਸਮ੍ਪਤ੍ਤਿਂ ਅਨੁਭੋਸਿ. ਤਸ੍ਸ ਕਣ੍ਣਮੂਲੇ ਮਨ੍ਤਯਨ੍ਤਸ੍ਸ ਸਦ੍ਦੋ ਸੋਲ਼ਸਯੋਜਨਟ੍ਠਾਨਂ ਫਰਤਿ, ਪਕਤਿਕਥਾਸਦ੍ਦੋ ਪਨ ਸਕਲਂ ਦਸਯੋਜਨਸਹਸ੍ਸਂ ਦੇਵਨਗਰਂ ਛਾਦੇਤਿ. ਤੇਨੇਵਸ੍ਸ ‘‘ਘੋਸਕਦੇਵਪੁਤ੍ਤੋ’’ਤਿ ਨਾਮਂ ਅਹੋਸਿ. ‘‘ਕਿਸ੍ਸ ਪਨੇਸ ਨਿਸ੍ਸਨ੍ਦੋ’’ਤਿ. ਪਚ੍ਚੇਕਬੁਦ੍ਧੇ ਪੇਮੇਨ ਭੁਕ੍ਕਰਣਸ੍ਸ ਨਿਸ੍ਸਨ੍ਦੋ. ਸੋ ਤਤ੍ਥ ਨ ਚਿਰਂ ਠਤ੍ਵਾ ਚਵਿ. ਦੇਵਲੋਕਤੋ ਹਿ ਦੇਵਪੁਤ੍ਤਾ ਆਯੁਕ੍ਖਯੇਨ ਪੁਞ੍ਞਕ੍ਖਯੇਨ ਆਹਾਰਕ੍ਖਯੇਨ ਕੋਪੇਨਾਤਿ ਚਤੂਹਿ ਕਾਰਣੇਹਿ ਚਵਨ੍ਤਿ.

ਤਤ੍ਥ ਯੇਨ ਬਹੁਂ ਪੁਞ੍ਞਕਮ੍ਮਂ ਕਤਂ ਹੋਤਿ, ਸੋ ਦੇਵਲੋਕੇ ਉਪ੍ਪਜ੍ਜਿਤ੍ਵਾ ਯਾਵਤਾਯੁਕਂ ਠਤ੍ਵਾ ਉਪਰੂਪਰਿ ਨਿਬ੍ਬਤ੍ਤਤਿ. ਏਵਂ ਆਯੁਕ੍ਖਯੇਨ ਚਵਤਿ ਨਾਮ. ਯੇਨ ਪਰਿਤ੍ਤਂ ਪੁਞ੍ਞਂ ਕਤਂ ਹੋਤਿ, ਤਸ੍ਸ ਰਾਜਕੋਟ੍ਠਾਗਾਰੇ ਪਕ੍ਖਿਤ੍ਤਂ ਤਿਚਤੁਨਾਲ਼ਿਮਤ੍ਤਂ ਧਞ੍ਞਂ ਵਿਯ ਅਨ੍ਤਰਾਵ ਤਂ ਪੁਞ੍ਞਂਖੀਯਤਿ, ਅਨ੍ਤਰਾਵ ਕਾਲਂ ਕਰੋਤਿ. ਏਵਂ ਪੁਞ੍ਞਕ੍ਖਯੇਨ ਚਵਤਿ ਨਾਮ. ਅਪਰੋਪਿ ਕਾਮਗੁਣੇ ਪਰਿਭੁਞ੍ਜਮਾਨੋ ਸਤਿਸਮ੍ਮੋਸੇਨ ਆਹਾਰਂ ਅਪਰਿਭੁਞ੍ਜਿਤ੍ਵਾ ਕਿਲਨ੍ਤਕਾਯੋ ਕਾਲਂ ਕਰੋਤਿ. ਏਵਂ ਆਹਾਰਕ੍ਖਯੇਨ ਚਵਤਿ ਨਾਮ. ਅਪਰੋਪਿ ਪਰਸ੍ਸ ਸਮ੍ਪਤ੍ਤਿਂ ਅਸਹਨ੍ਤੋ ਕੁਜ੍ਝਿਤ੍ਵਾ ਕਾਲਂ ਕਰੋਤਿ. ਏਵਂ ਕੋਪੇਨ ਚਵਤਿ ਨਾਮ.

ਅਯਂ ਪਨ ਕਾਮਗੁਣੇ ਪਰਿਭੁਞ੍ਜਨ੍ਤੋ ਮੁਟ੍ਠਸ੍ਸਤਿ ਹੁਤ੍ਵਾ ਆਹਾਰਕ੍ਖਯੇਨ ਚਵਿ, ਚਵਿਤ੍ਵਾ ਚ ਪਨ ਕੋਸਮ੍ਬਿਯਂ ਨਗਰਸੋਭਿਨਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਸਾਪਿ ਜਾਤਦਿਵਸੇ ‘‘ਕਿਂ ਏਤ’’ਨ੍ਤਿ ਦਾਸਿਂ ਪੁਚ੍ਛਿਤ੍ਵਾ, ‘‘ਪੁਤ੍ਤੋ, ਅਯ੍ਯੇ’’ਤਿ ਵੁਤ੍ਤੇ – ‘‘ਹਨ੍ਦ, ਜੇ, ਇਮਂ ਦਾਰਕਂ ਕਤ੍ਤਰਸੁਪ੍ਪੇ ਆਰੋਪੇਤ੍ਵਾ ਸਙ੍ਕਾਰਕੂਟੇ ਛਡ੍ਡੇਹੀ’’ਤਿ ਛਡ੍ਡਾਪੇਸਿ. ਨਗਰਸੋਭਿਨਿਯੋ ਹਿ ਧੀਤਰਂ ਪਟਿਜਗ੍ਗਨ੍ਤਿ, ਨ ਪੁਤ੍ਤਂ. ਧੀਤਰਾ ਹਿ ਤਾਸਂ ਪਵੇਣੀ ਘਟੀਯਤਿ. ਦਾਰਕਂ ਕਾਕਾਪਿ ਸੁਨਖਾਪਿ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਪਚ੍ਚੇਕਬੁਦ੍ਧੇ ਸਿਨੇਹਪ੍ਪਭਵਸ੍ਸ ਭੁਕ੍ਕਰਣਸ੍ਸ ਨਿਸ੍ਸਨ੍ਦੇਨ ਏਕੋਪਿ ਉਪਗਨ੍ਤੁਂ ਨ ਵਿਸਹਿ. ਤਸ੍ਮਿਂ ਖਣੇ ਏਕੋ ਮਨੁਸ੍ਸੋ ਬਹਿ ਨਿਕ੍ਖਨ੍ਤੋ ਤਂ ਕਾਕਸੁਨਖਸਨ੍ਨਿਪਾਤਂ ਦਿਸ੍ਵਾ, ‘‘ਕਿਂ ਨੁ ਖੋ ਏਤ’’ਨ੍ਤਿ ਗਨ੍ਤ੍ਵਾ ਦਾਰਕਂ ਦਿਸ੍ਵਾ ਪੁਤ੍ਤਸਿਨੇਹਂ ਪਟਿਲਭਿਤ੍ਵਾ ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਗੇਹਂ ਨੇਸਿ. ਤਦਾ ਕੋਸਮ੍ਬਕਸੇਟ੍ਠਿ ਰਾਜਕੁਲਂ ਗਚ੍ਛਨ੍ਤੋ ਰਾਜਨਿਵੇਸਨਤੋ ਆਗਚ੍ਛਨ੍ਤਂ ਪੁਰੋਹਿਤਂ ਦਿਸ੍ਵਾ, ‘‘ਕਿਂ, ਆਚਰਿਯ, ਅਜ੍ਜ ਤੇ ਤਿਥਿਕਰਣਨਕ੍ਖਤ੍ਤਯੋਗੋ ਓਲੋਕਿਤੋ’’ਤਿ ਪੁਚ੍ਛਿ. ‘‘ਆਮ, ਮਹਾਸੇਟ੍ਠਿ, ਅਮ੍ਹਾਕਂ ਕਿਂ ਅਞ੍ਞਂ ਕਿਚ੍ਚਨ੍ਤਿ? ਜਨਪਦਸ੍ਸ ਕਿਂ ਭਵਿਸ੍ਸਤੀ’’ਤਿ? ‘‘ਅਞ੍ਞਂ ਨਤ੍ਥਿ, ਇਮਸ੍ਮਿਂ ਪਨ ਨਗਰੇ ਅਜ੍ਜ ਜਾਤਦਾਰਕੋ ਜੇਟ੍ਠਕਸੇਟ੍ਠਿ ਭਵਿਸ੍ਸਤੀ’’ਤਿ. ਤਦਾ ਸੇਟ੍ਠਿਨੋ ਭਰਿਯਾ ਗਰੁਗਬ੍ਭਾ ਹੋਤਿ. ਤਸ੍ਮਾ ਸੋ ਸੀਘਂ ਗੇਹਂ ਪੁਰਿਸਂ ਪੇਸੇਸਿ – ‘‘ਗਚ੍ਛ ਭਣੇ, ਜਾਨਾਹਿ ਨਂ ਵਿਜਾਤਾ ਵਾ, ਨੋ ਵਾ’’ਤਿ. ‘‘ਨ ਵਿਜਾਯਤੀ’’ਤਿ ਸੁਤ੍ਵਾ ਰਾਜਾਨਂ ਦਿਸ੍ਵਾਵ ਵੇਗੇਨ ਗੇਹਂ ਗਨ੍ਤ੍ਵਾ ਕਾਲ਼ਿਂ ਨਾਮ ਦਾਸਿਂ ਪਕ੍ਕੋਸਿਤ੍ਵਾ ਸਹਸ੍ਸਂ ਦਤ੍ਵਾ, ‘‘ਗਚ੍ਛ ਜੇ, ਇਮਸ੍ਮਿਂ ਨਗਰੇ ਉਪਧਾਰੇਤ੍ਵਾ ਸਹਸ੍ਸਂ ਦਤ੍ਵਾ ਅਜ੍ਜ ਜਾਤਦਾਰਕਂ ਗਣ੍ਹਿਤ੍ਵਾ ਏਹੀ’’ਤਿ. ਸਾ ਉਪਧਾਰੇਨ੍ਤੀ ਤਂ ਗੇਹਂ ਗਨ੍ਤ੍ਵਾ ਦਾਰਕਂ ਦਿਸ੍ਵਾ, ‘‘ਅਯਂ ਦਾਰਕੋ ਕਦਾ ਜਾਤੋ’’ਤਿ ਗਹਪਤਾਨਿਂ ਪੁਚ੍ਛਿਤ੍ਵਾ ‘‘ਅਜ੍ਜ ਜਾਤੋ’’ਤਿ ਵੁਤ੍ਤੇ, ‘‘ਇਮਂ ਮਯ੍ਹਂ ਦੇਹੀ’’ਤਿ ਏਕਕਹਾਪਣਂ ਆਦਿਂ ਕਤ੍ਵਾ ਮੂਲਂ ਵਡ੍ਢੇਨ੍ਤੀ ਸਹਸ੍ਸਂ ਦਤ੍ਵਾ ਤਂ ਆਨੇਤ੍ਵਾ ਸੇਟ੍ਠਿਨੋ ਦਸ੍ਸੇਸਿ. ਸੇਟ੍ਠਿ ‘‘ਸਚੇ ਮੇ ਧੀਤਾ ਵਿਜਾਯਿਸ੍ਸਤਿ, ਤਾਯ ਨਂ ਸਦ੍ਧਿਂ ਨਿਵੇਸੇਤ੍ਵਾ ਸੇਟ੍ਠਿਟ੍ਠਾਨਸ੍ਸ ਸਾਮਿਕਂ ਕਰਿਸ੍ਸਾਮਿ. ਸਚੇ ਮੇ ਪੁਤ੍ਤੋ ਵਿਜਾਯਿਸ੍ਸਤਿ, ਮਾਰੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਤਂ ਗੇਹੇ ਕਾਰੇਸਿ.

ਅਥਸ੍ਸ ਭਰਿਯਾ ਕਤਿਪਾਹਚ੍ਚਯੇਨ ਪੁਤ੍ਤਂ ਵਿਜਾਯਿ. ਸੇਟ੍ਠਿ ‘‘ਇਮਸ੍ਮਿਂ ਅਸਤਿ ਮਮ ਪੁਤ੍ਤੋਵ ਸੇਟ੍ਠਿਟ੍ਠਾਨਂ ਲਭਿਸ੍ਸਤਿ, ਇਦਾਨੇਵ ਤਂ ਮਾਰੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਕਾਲ਼ਿਂ ਆਮਨ੍ਤੇਤ੍ਵਾ, ‘‘ਗਚ੍ਛ, ਜੇ, ਵਜਤੋ ਗੁਨ੍ਨਂ ਨਿਕ੍ਖਮਨਵੇਲਾਯ ਵਜਦ੍ਵਾਰਮਜ੍ਝੇ ਇਮਂ ਤਿਰਿਯਂ ਨਿਪਜ੍ਜਾਪੇਹਿ, ਗਾਵਿਯੋ ਨਂ ਮਦ੍ਦਿਤ੍ਵਾ ਮਾਰੇਸ੍ਸਨ੍ਤਿ, ਮਦ੍ਦਿਤਾਮਦ੍ਦਿਤਭਾਵਂ ਪਨਸ੍ਸ ਞਤ੍ਵਾ ਏਹੀ’’ਤਿ ਆਹ. ਸਾ ਗਨ੍ਤ੍ਵਾ ਗੋਪਾਲਕੇਨ ਵਜਦ੍ਵਾਰੇ ਵਿਵਟਮਤ੍ਤੇਯੇਵ ਤਂ ਤਥਾ ਨਿਪਜ੍ਜਾਪੇਸਿ. ਗੋਗਣਜੇਟ੍ਠਕੋ ਉਸਭੋ ਅਞ੍ਞਸ੍ਮਿਂ ਕਾਲੇ ਸਬ੍ਬਪਚ੍ਛਾ ਨਿਕ੍ਖਮਨ੍ਤੋਪਿ ਤਂ ਦਿਵਸਂ ਸਬ੍ਬਪਠਮਂ ਨਿਕ੍ਖਮਿਤ੍ਵਾ ਦਾਰਕਂ ਚਤੁਨ੍ਨਂ ਪਾਦਾਨਂ ਅਨ੍ਤਰੇ ਕਤ੍ਵਾ ਅਟ੍ਠਾਸਿ. ਅਨੇਕਸਤਗਾਵਿਯੋ ਉਸਭਸ੍ਸ ਦ੍ਵੇ ਪਸ੍ਸਾਨਿ ਘਂਸਨ੍ਤਿਯੋ ਨਿਕ੍ਖਮਿਂਸੁ. ਗੋਪਾਲਕੋਪਿ ‘‘ਅਯਂ ਉਸਭੋ ਪੁਬ੍ਬੇ ਸਬ੍ਬਪਚ੍ਛਾ ਨਿਕ੍ਖਮਤਿ, ਅਜ੍ਜ ਪਨ ਸਬ੍ਬਪਠਮਂ ਨਿਕ੍ਖਮਿਤ੍ਵਾ ਵਜਦ੍ਵਾਰਮਜ੍ਝੇ ਨਿਚ੍ਚਲੋਵ ਠਿਤੋ, ਕਿਂ ਨੁ ਖੋ ਏਤ’’ਨ੍ਤਿ ਚਿਨ੍ਤੇਤ੍ਵਾ ਗਨ੍ਤ੍ਵਾ ਤਸ੍ਸ ਹੇਟ੍ਠਾ ਨਿਪਨ੍ਨਂ ਦਾਰਕਂ ਦਿਸ੍ਵਾ ਪੁਤ੍ਤਸਿਨੇਹਂ ਪਟਿਲਭਿਤ੍ਵਾ, ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਗੇਹਂ ਨੇਸਿ.

ਕਾਲ਼ੀ ਗਨ੍ਤ੍ਵਾ ਸੇਟ੍ਠਿਨਾ ਪੁਚ੍ਛਿਤਾ ਤਮਤ੍ਥਂ ਆਰੋਚੇਤ੍ਵਾ, ‘‘ਗਚ੍ਛ, ਨਂ ਪੁਨ ਸਹਸ੍ਸਂ ਦਤ੍ਵਾ ਆਨੇਹੀ’’ਤਿ ਵੁਤ੍ਤਾ ਸਹਸ੍ਸਂ ਦਤ੍ਵਾ ਪੁਨ ਆਨੇਤ੍ਵਾ ਅਦਾਸਿ. ਅਥ ਨਂ ਆਹ – ‘‘ਅਮ੍ਮ, ਕਾਲ਼ਿ ਇਮਸ੍ਮਿਂ ਨਗਰੇ ਪਞ੍ਚ ਸਕਟਸਤਾਨਿ ਪਚ੍ਚੂਸਕਾਲੇ ਉਟ੍ਠਾਯ ਵਾਣਿਜ੍ਜਾਯ ਗਚ੍ਛਨ੍ਤਿ, ਤ੍ਵਂ ਇਮਂ ਨੇਤ੍ਵਾ ਚਕ੍ਕਮਗ੍ਗੇ ਨਿਪਜ੍ਜਾਪੇਹਿ, ਗੋਣਾ ਵਾ ਨਂ ਮਦ੍ਦਿਸ੍ਸਨ੍ਤਿ, ਚਕ੍ਕਾ ਵਾ ਛਿਨ੍ਦਿਸ੍ਸਨ੍ਤਿ, ਪਵਤ੍ਤਿਂ ਚਸ੍ਸ ਞਤ੍ਵਾਵ ਆਗਚ੍ਛੇਯ੍ਯਾਸੀ’’ਤਿ. ਸਾ ਤਂ ਨੇਤ੍ਵਾ ਚਕ੍ਕਮਗ੍ਗੇ ਨਿਪਜ੍ਜਾਪੇਸਿ. ਤਦਾ ਸਾਕਟਿਕਜੇਟ੍ਠਕੋ ਪੁਰਤੋ ਅਹੋਸਿ. ਅਥਸ੍ਸ ਗੋਣਾ ਤਂ ਠਾਨਂ ਪਤ੍ਵਾ ਧੁਰਂ ਛਡ੍ਡੇਸੁਂ, ਪੁਨਪ੍ਪੁਨਂ ਆਰੋਪੇਤ੍ਵਾ ਪਾਜਿਯਮਾਨਾਪਿ ਪੁਰਤੋ ਨ ਗਚ੍ਛਿਂਸੁ. ਏਵਂ ਤਸ੍ਸ ਤੇਹਿ ਸਦ੍ਧਿਂ ਵਾਯਮਨ੍ਤਸ੍ਸੇਵ ਅਰੁਣਂ ਉਟ੍ਠਹਿ. ਸੋ ‘‘ਕਿਂ ਨਾਮੇਤਂ ਗੋਣਾ ਕਰਿਂਸੂ’’ਤਿ ਮਗ੍ਗਂ ਓਲੋਕੇਨ੍ਤੋ ਦਾਰਕਂ ਦਿਸ੍ਵਾ, ‘‘ਭਾਰਿਯਂ ਵਤ ਮੇ ਕਮ੍ਮ’’ਨ੍ਤਿ ਚਿਨ੍ਤੇਤ੍ਵਾ, ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਤੁਟ੍ਠਮਾਨਸੋ ਤਂ ਗੇਹਂ ਨੇਸਿ.

ਕਾਲ਼ੀ ਗਨ੍ਤ੍ਵਾ ਸੇਟ੍ਠਿਨਾ ਪੁਚ੍ਛਿਤਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ, ‘‘ਗਚ੍ਛ, ਨਂ ਪੁਨ ਸਹਸ੍ਸਂ ਦਤ੍ਵਾ ਆਨੇਹੀ’’ਤਿ ਵੁਤ੍ਤਾ ਤਥਾ ਅਕਾਸਿ. ਅਥ ਨਂ ਸੋ ਆਹ – ‘‘ਇਦਾਨਿ ਨਂ ਆਮਕਸੁਸਾਨਂ ਨੇਤ੍ਵਾ ਗਚ੍ਛਨ੍ਤਰੇ ਨਿਪਜ੍ਜਾਪੇਹਿ, ਤਤ੍ਥ ਸੁਨਖਾਦੀਹਿ ਵਾ ਖਾਦਿਤੋ, ਅਮਨੁਸ੍ਸੇਹਿ ਵਾ ਪਹਟੋ ਮਰਿਸ੍ਸਤਿ, ਮਾਤਾਮਤਭਾਵਞ੍ਚਸ੍ਸ ਜਾਨਿਤ੍ਵਾਵ ਆਗਚ੍ਛੇਯ੍ਯਾਸੀ’’ਤਿ. ਸਾ ਤਂ ਨੇਤ੍ਵਾ ਤਤ੍ਥ ਨਿਪਜ੍ਜਾਪੇਤ੍ਵਾ ਏਕਮਨ੍ਤੇ ਅਟ੍ਠਾਸਿ. ਤਂ ਸੁਨਖੋ ਵਾ ਕਾਕੋ ਵਾ ਅਮਨੁਸ੍ਸੋ ਵਾ ਉਪਸਙ੍ਕਮਿਤੁਂ ਨਾਸਕ੍ਖਿ. ‘‘ਨਨੁ ਚਸ੍ਸ ਨੇਵ ਮਾਤਾ ਨ ਪਿਤਾ ਨ ਭਾਤਿਕਾਦੀਸੁ ਕੋਚਿ ਰਕ੍ਖਿਤਾ ਨਾਮ ਅਤ੍ਥਿ, ਕੋ ਤਂ ਰਕ੍ਖਤੀ’’ਤਿ? ਸੁਨਖਕਾਲੇ ਪਚ੍ਚੇਕਬੁਦ੍ਧੇ ਸਿਨੇਹੇਨ ਪਵਤ੍ਤਿਤਭੁਕ੍ਕਰਣਮਤ੍ਤਮੇਵ ਤਂ ਰਕ੍ਖਤਿ. ਅਥੇਕੋ ਅਜਪਾਲਕੋ ਅਨੇਕਸਹਸ੍ਸਾ ਅਜਾ ਗੋਚਰਂ ਨੇਨ੍ਤੋ ਸੁਸਾਨਪਸ੍ਸੇਨ ਗਚ੍ਛਤਿ. ਏਕਾ ਅਜਾ ਪਣ੍ਣਾਨਿ ਖਾਦਮਾਨਾ ਗਚ੍ਛਨ੍ਤਰਂ ਪਵਿਟ੍ਠਾ ਦਾਰਕਂ ਦਿਸ੍ਵਾ ਜਣ੍ਣੁਕੇਹਿ ਠਤ੍ਵਾ ਦਾਰਕਸ੍ਸ ਥਨਂ ਅਦਾਸਿ, ਅਜਪਾਲਕੇਨ ‘‘ਹੇ ਹੇ’’ਤਿ ਸਦ੍ਦੇ ਕਤੇਪਿ ਨ ਨਿਕ੍ਖਮਿ. ਸੋ ‘‘ਯਟ੍ਠਿਯਾ ਨਂ ਪਹਰਿਤ੍ਵਾ ਨੀਹਰਿਸ੍ਸਾਮੀ’’ਤਿ ਗਚ੍ਛਨ੍ਤਰਂ ਪਵਿਟ੍ਠੋ ਜਣ੍ਣੁਕੇਹਿ ਠਤ੍ਵਾ ਦਾਰਕਂ ਖੀਰਂ ਪਾਯਨ੍ਤਿਂ ਅਜਿਂ ਦਿਸ੍ਵਾ ਦਾਰਕੇ ਪੁਤ੍ਤਸਿਨੇਹਂ ਪਟਿਲਭਿਤ੍ਵਾ, ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਆਦਾਯ ਪਕ੍ਕਾਮਿ.

ਕਾਲ਼ੀ ਗਨ੍ਤ੍ਵਾ ਸੇਟ੍ਠਿਨਾ ਪੁਚ੍ਛਿਤਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ, ‘‘ਗਚ੍ਛ, ਤਂ ਪੁਨ ਸਹਸ੍ਸਂ ਦਤ੍ਵਾ ਆਨੇਹੀ’’ਤਿ ਵੁਤ੍ਤਾ ਤਥਾ ਅਕਾਸਿ. ਅਥ ਨਂ ਆਹ – ‘‘ਅਮ੍ਮ ਕਾਲ਼ਿ, ਇਮਂ ਆਦਾਯ ਚੋਰਪਪਾਤਪਬ੍ਬਤਂ ਅਭਿਰੁਹਿਤ੍ਵਾ ਪਪਾਤੇ ਖਿਪ, ਪਬ੍ਬਤਕੁਚ੍ਛਿਯਂ ਪਟਿਹਞ੍ਞਮਾਨੋ ਖਣ੍ਡਾਖਣ੍ਡਿਕੋ ਹੁਤ੍ਵਾ ਭੂਮਿਯਂ ਪਤਿਸ੍ਸਤਿ, ਮਤਾਮਤਭਾਵਞ੍ਚਸ੍ਸ ਞਤ੍ਵਾਵ ਆਗਚ੍ਛੇਯ੍ਯਾਸੀ’’ਤਿ. ਸਾ ਤਂ ਤਤ੍ਥ ਨੇਤ੍ਵਾ ਪਬ੍ਬਤਮਤ੍ਥਕੇ ਠਤ੍ਵਾ ਖਿਪਿ. ਤਂ ਖੋ ਪਨ ਪਬ੍ਬਤਕੁਚ੍ਛਿਂ ਨਿਸ੍ਸਾਯ ਮਹਾਵੇਲ਼ੁਗੁਮ੍ਬੋ ਪਬ੍ਬਤਾਨੁਸਾਰੇਨੇਵ ਵਡ੍ਢਿ, ਤਸ੍ਸ ਮਤ੍ਥਕਂ ਘਨਜਾਤੋ ਜਿਞ੍ਜੁਕਗੁਮ੍ਬੋ ਅਵਤ੍ਥਰਿ. ਦਾਰਕੋ ਪਤਨ੍ਤੋ ਕੋਜਵਕੇ ਵਿਯ ਤਸ੍ਮਿਂ ਪਤਿ. ਤਂ ਦਿਵਸਞ੍ਚ ਨਲ਼ਕਾਰਜੇਟ੍ਠਕਸ੍ਸ ਵੇਲ਼ੁਬਲਿ ਪਤ੍ਤੋ ਹੋਤਿ. ਸੋ ਪੁਤ੍ਤੇਨ ਸਦ੍ਧਿਂ ਗਨ੍ਤ੍ਵਾ ਤਂ ਵੇਲ਼ੁਗੁਮ੍ਬਂ ਛਿਨ੍ਦਿਤੁਂ ਆਰਭਿ. ਤਸ੍ਮਿਂ ਚਲਨ੍ਤੇ ਦਾਰਕੋ ਸਦ੍ਦਮਕਾਸਿ. ਸੋ ‘‘ਦਾਰਕਸਦ੍ਦੋ ਵਿਯਾ’’ਤਿ ਏਕੇਨ ਪਸ੍ਸੇਨ ਅਭਿਰੁਹਿਤ੍ਵਾ ਤਂ ਦਿਸ੍ਵਾ, ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਤੁਟ੍ਠਚਿਤ੍ਤੋ ਆਦਾਯ ਗਤੋ.

ਕਾਲ਼ੀ ਸੇਟ੍ਠਿਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤੇਨ ਪੁਚ੍ਛਿਤਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ, ‘‘ਗਚ੍ਛ, ਨਂ ਪੁਨ ਸਹਸ੍ਸਂ ਦਤ੍ਵਾ ਆਨੇਹੀ’’ਤਿ ਵੁਤ੍ਤਾ ਤਥਾ ਅਕਾਸਿ. ਸੇਟ੍ਠਿਨੋ ਇਦਞ੍ਚਿਦਞ੍ਚ ਕਰੋਨ੍ਤਸ੍ਸੇਵ ਦਾਰਕੋ ਵਡ੍ਢਿਤੋ ‘‘ਘੋਸਕੋ’’ਤ੍ਵੇਵਸ੍ਸ ਨਾਮਂ ਅਹੋਸਿ. ਸੋ ਸੇਟ੍ਠਿਨੋ ਅਕ੍ਖਿਮ੍ਹਿ ਕਣ੍ਟਕੋ ਵਿਯ ਖਾਯਿ, ਉਜੁਕਂ ਤਂ ਓਲੋਕੇਤੁਮ੍ਪਿ ਨ ਵਿਸਤਿ. ਅਥਸ੍ਸ ਮਾਰਣੂਪਾਯਂ ਚਿਨ੍ਤੇਨ੍ਤੋ ਅਤ੍ਤਨੋ ਸਹਾਯਕਸ੍ਸ ਕੁਮ੍ਭਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ, ‘‘ਕਦਾ ਤ੍ਵਂ ਆਵਾਪਂ ਆਲਿਮ੍ਪੇਸ੍ਸਸੀ’’ਤਿ ਪੁਚ੍ਛਿਤ੍ਵਾ – ‘‘ਸ੍ਵੇ’’ਤਿ ਵੁਤ੍ਤੇ, ‘‘ਤੇਨ ਹਿ ਇਦਂ ਸਹਸ੍ਸਂ ਗਹੇਤ੍ਵਾ ਮਮ ਏਕਂ ਕਮ੍ਮਂ ਕਰੋਹੀ’’ਤਿ ਆਹ. ‘‘ਕਿਂ, ਸਾਮੀ’’ਤਿ? ‘‘ਏਕੋ ਮੇ ਅਵਜਾਤਪੁਤ੍ਤੋ ਅਤ੍ਥਿ, ਤਂ ਤਵ ਸਨ੍ਤਿਕਂ ਪੇਸੇਸ੍ਸਾਮਿ, ਅਥ ਨਂ ਗਹੇਤ੍ਵਾ ਗਬ੍ਭਂ ਪਵੇਸੇਤ੍ਵਾ ਤਿਖਿਣਾਯ ਵਾਸਿਯਾ ਖਣ੍ਡਾਖਣ੍ਡਿਕਂ ਛਿਨ੍ਦਿਤ੍ਵਾ ਚਾਟਿਯਂ ਪਕ੍ਖਿਪਿਤ੍ਵਾ ਆਵਾਪੇ ਪਚੇਯ੍ਯਾਸਿ, ਇਦਂ ਤੇ ਸਹਸ੍ਸਂ ਸਚ੍ਚਕਾਰਸਦਿਸਂ. ਉਤ੍ਤਰਿਂ ਪਨ ਤੇ ਕਤ੍ਤਬ੍ਬਯੁਤ੍ਤਕਂ ਪਚ੍ਛਾ ਕਰਿਸ੍ਸਾਮੀ’’ਤਿ. ਕੁਮ੍ਭਕਾਰੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਸੇਟ੍ਠਿ ਪੁਨਦਿਵਸੇ ਘੋਸਕਂ ਪਕ੍ਕੋਸਿਤ੍ਵਾ, ‘‘ਹਿਯ੍ਯੋ ਮਯਾ ਕੁਮ੍ਭਕਾਰੋ ਏਕਂ ਕਮ੍ਮਂ ਆਣਤ੍ਤੋ, ਏਹਿ, ਤ੍ਵਂ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਵਦੇਹਿ – ‘ਹਿਯ੍ਯੋ ਕਿਰ ਮੇ ਪਿਤਰਾ ਆਣਤ੍ਤਂ ਕਮ੍ਮਂ ਨਿਪ੍ਫਾਦੇਹੀ’’’ਤਿ ਪਹਿਣਿ. ਸੋ ‘‘ਸਾਧੂ’’ਤਿ ਅਗਮਾਸਿ. ਤਂ ਤਤ੍ਥ ਗਚ੍ਛਨ੍ਤਂ ਇਤਰੋ ਸੇਟ੍ਠਿਨੋ ਪੁਤ੍ਤੋ ਦਾਰਕੇਹਿ ਸਦ੍ਧਿਂ ਗੁਲ਼ਂ ਕੀਲ਼ਨ੍ਤੋ ਦਿਸ੍ਵਾ ਤਂ ਪਕ੍ਕੋਸਿਤ੍ਵਾ, ‘‘ਕੁਹਿਂ ਗਚ੍ਛਸਿ ਭਾਤਿਕਾ’’ਤਿ ਪੁਚ੍ਛਿਤ੍ਵਾ ‘‘ਪਿਤੁ ਸਾਸਨਂ ਗਹੇਤ੍ਵਾ ਕੁਮ੍ਭਕਾਰਸ੍ਸ ਸਨ੍ਤਿਕ’’ਨ੍ਤਿ ਵੁਤ੍ਤੇ ‘‘ਅਹਂ ਤਤ੍ਥ ਗਮਿਸ੍ਸਾਮਿ. ਇਮੇ ਮਂ ਦਾਰਕਾ ਬਹੁਂ ਲਕ੍ਖਂ ਜਿਨਿਂਸੁ, ਤਂ ਮੇ ਪਟਿਜਿਨਿਤ੍ਵਾ ਦੇਹੀ’’ਤਿ ਆਹ. ‘‘ਅਹਂ ਪਿਤੁ ਭਾਯਾਮੀ’’ਤਿ. ‘‘ਮਾ ਭਾਯਿ, ਭਾਤਿਕ, ਅਹਂ ਤਂ ਸਾਸਨਂ ਹਰਿਸ੍ਸਾਮਿ. ਬਹੂਹਿ ਜਿਤੋ, ਯਾਵਾਹਂ ਆਗਚ੍ਛਾਮਿ, ਤਾਵ ਮੇ ਲਕ੍ਖਂ ਪਟਿਜਿਨਾ’’ਤਿ.

ਘੋਸਕੋ ਕਿਰ ਗੁਲ਼ਕੀਲ਼ਾਯ ਛੇਕੋ, ਤੇਨ ਨਂ ਏਵਂ ਨਿਬਨ੍ਧਿ. ਸੋਪਿ ਤਂ ‘‘ਤੇਨ ਹਿ ਗਨ੍ਤ੍ਵਾ ਕੁਮ੍ਭਕਾਰਂ ਵਦੇਹਿ – ‘ਪਿਤਰਾ ਕਿਰ ਮੇ ਹਿਯ੍ਯੋ ਏਕਂ ਕਮ੍ਮਂ ਆਣਤ੍ਤਂ, ਤਂ ਨਿਪ੍ਫਾਦੇਹੀ’’’ਤਿ ਵਤ੍ਵਾ ਉਯ੍ਯੋਜੇਸਿ. ਸੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਥਾ ਅਵਚ. ਅਥ ਨਂ ਕੁਮ੍ਭਕਾਰੋ ਸੇਟ੍ਠਿਨਾ ਵੁਤ੍ਤਨਿਯਾਮੇਨੇਵ ਮਾਰੇਤ੍ਵਾ ਆਵਾਪੇ ਖਿਪਿ. ਘੋਸਕੋਪਿ ਦਿਵਸਭਾਗਂ ਕੀਲ਼ਿਤ੍ਵਾ ਸਾਯਨ੍ਹਸਮਯੇ ਗੇਹਂ ਗਨ੍ਤ੍ਵਾ ‘‘ਕਿਂ, ਤਾਤ, ਨ ਗਤੋਸੀ’’ਤਿ ਵੁਤ੍ਤੇ ਅਤ੍ਤਨੋ ਅਗਤਕਾਰਣਞ੍ਚ ਕਨਿਟ੍ਠਸ੍ਸ ਗਤਕਾਰਣਞ੍ਚ ਆਰੋਚੇਸਿ. ਤਂ ਸੁਤ੍ਵਾ ਸੇਟ੍ਠਿ ‘‘ਅਹਂ ਧੀ’’ਤਿ ਮਹਾਵਿਰਵਂ ਵਿਰਵਿਤ੍ਵਾ ਸਕਲਸਰੀਰੇ ਪਕ੍ਕੁਥਿਤਲੋਹਿਤੋ ਵਿਯ ਹੁਤ੍ਵਾ, ‘‘ਅਮ੍ਭੋ, ਕੁਮ੍ਭਕਾਰ, ਮਾ ਮਂ ਨਾਸਯਿ, ਮਾ ਮਂ ਨਾਸਯੀ’’ਤਿ ਬਾਹਾ ਪਗ੍ਗਯ੍ਹ ਕਨ੍ਦਨ੍ਤੋ ਤਸ੍ਸ ਸਨ੍ਤਿਕਂ ਅਗਮਾਸਿ. ਕੁਮ੍ਭਕਾਰੋ ਤਂ ਤਥਾ ਆਗਚ੍ਛਨ੍ਤਂ ਦਿਸ੍ਵਾ, ‘‘ਸਾਮਿ, ਮਾ ਸਦ੍ਦਂ ਕਰਿ, ਕਮ੍ਮਂ ਤੇ ਨਿਪ੍ਫਨ੍ਨ’’ਨ੍ਤਿ ਆਹ. ਸੋ ਪਬ੍ਬਤੇਨ ਵਿਯ ਮਹਨ੍ਤੇਨ ਸੋਕੇਨ ਅਵਤ੍ਥਟੋ ਹੁਤ੍ਵਾ ਅਨਪ੍ਪਕਂ ਦੋਮਨਸ੍ਸਂ ਪਟਿਸਂਵੇਦੇਸਿ. ਯਥਾ ਤਂ ਅਪ੍ਪਦੁਟ੍ਠਸ੍ਸ ਪਦੁਸ੍ਸਮਾਨੋ. ਤੇਨਾਹ ਭਗਵਾ –

‘‘ਯੋ ਦਣ੍ਡੇਨ ਅਦਣ੍ਡੇਸੁ, ਅਪ੍ਪਦੁਟ੍ਠੇਸੁ ਦੁਸ੍ਸਤਿ;

ਦਸਨ੍ਨਮਞ੍ਞਤਰਂ ਠਾਨਂ, ਖਿਪ੍ਪਮੇਵ ਨਿਗਚ੍ਛਤਿ.

‘‘ਵੇਦਨਂ ਫਰੁਸਂ ਜਾਨਿਂ, ਸਰੀਰਸ੍ਸ ਚ ਭੇਦਨਂ;

ਗਰੁਕਂ ਵਾਪਿ ਆਬਾਧਂ, ਚਿਤ੍ਤਕ੍ਖੇਪਞ੍ਚ ਪਾਪੁਣੇ.

‘‘ਰਾਜਤੋ ਵਾ ਉਪਸਗ੍ਗਂ, ਅਬ੍ਭਕ੍ਖਾਨਞ੍ਚ ਦਾਰੁਣਂ;

ਪਰਿਕ੍ਖਯਞ੍ਚ ਞਾਤੀਨਂ, ਭੋਗਾਨਞ੍ਚ ਪਭਙ੍ਗੁਰਂ.

‘‘ਅਥ ਵਾਸ੍ਸ ਅਗਾਰਾਨਿ, ਅਗ੍ਗਿ ਡਹਤਿ ਪਾਵਕੋ;

ਕਾਯਸ੍ਸ ਭੇਦਾ ਦੁਪ੍ਪਞ੍ਞੋ, ਨਿਰਯਂ ਸੋਪਪਜ੍ਜਤੀ’’ਤਿ. (ਧ. ਪ. ੧੩੭-੧੪੦);

ਏਵਂ ਸਨ੍ਤੇਪਿ ਪੁਨ ਨਂ ਸੇਟ੍ਠਿ ਉਜੁਕਂ ਓਲੋਕੇਤੁਂ ਨ ਸਕ੍ਕੋਤਿ. ‘‘ਕਿਨ੍ਤਿ ਨਂ ਮਾਰੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ, ‘‘ਮਮ ਗਾਮਸਤੇ ਆਯੁਤ੍ਤਕਸ੍ਸ ਸਨ੍ਤਿਕਂ ਪੇਸੇਤ੍ਵਾ ਮਾਰੇਸ੍ਸਾਮੀ’’ਤਿ ਉਪਾਯਂ ਦਿਸ੍ਵਾ, ‘‘ਅਯਂ ਮੇ ਅਵਜਾਤਪੁਤ੍ਤੋ, ਇਮਂ ਮਾਰੇਤ੍ਵਾ ਵਚ੍ਚਕੂਪੇ ਖਿਪਤੁ, ਏਵਂ ਕਤੇ ਅਹਂ ਮਾਤੁਲਸ੍ਸ ਕਤ੍ਤਬ੍ਬਯੁਤ੍ਤਕਂ ਪਚ੍ਛਾ ਜਾਨਿਸ੍ਸਾਮੀ’’ਤਿ ਤਸ੍ਸ ਪਣ੍ਣਂ ਲਿਖਿਤ੍ਵਾ, ‘‘ਤਾਤ ਘੋਸਕ, ਅਮ੍ਹਾਕਂ ਗਾਮਸਤੇ ਆਯੁਤ੍ਤਕੋ ਅਤ੍ਥਿ, ਇਮਂ ਪਣ੍ਣਂ ਹਰਿਤ੍ਵਾ ਤਸ੍ਸ ਦੇਹੀ’’ਤਿ ਵਤ੍ਵਾ ਪਣ੍ਣਂ ਤਸ੍ਸ ਦੁਸ੍ਸਨ੍ਤੇ ਬਨ੍ਧਿ. ਸੋ ਪਨ ਅਕ੍ਖਰਸਮਯਂ ਨ ਜਾਨਾਤਿ. ਦਹਰਕਾਲਤੋ ਪਟ੍ਠਾਯ ਹਿ ਨਂ ਮਾਰਾਪੇਨ੍ਤੋਵ ਸੇਟ੍ਠਿ ਮਾਰੇਤੁਂ ਨਾਸਕ੍ਖਿ, ਕਿਂ ਅਕ੍ਖਰਸਮਯਂ ਸਿਕ੍ਖਾਪੇਸ੍ਸਤਿ? ਇਤਿ ਸੋ ਅਤ੍ਤਨੋ ਮਾਰਾਪਨਪਣ੍ਣਮੇਵ ਦੁਸ੍ਸਨ੍ਤੇ ਬਨ੍ਧਿਤ੍ਵਾ ਨਿਕ੍ਖਮਨ੍ਤੋ ਆਹ – ‘‘ਪਾਥੇਯ੍ਯਂ ਮੇ, ਤਾਤ, ਨਤ੍ਥੀ’’ਤਿ. ‘‘ਪਾਥੇਯ੍ਯੇਨ ਤੇ ਕਮ੍ਮਂ ਨਤ੍ਥਿ, ਅਨ੍ਤਰਾਮਗ੍ਗੇ ‘ਅਸੁਕਗਾਮੇ ਨਾਮ ਮਮਸਹਾਯਕੋ ਸੇਟ੍ਠਿ ਅਤ੍ਥਿ, ਤਸ੍ਸ ਘਰੇ ਪਾਤਰਾਸਂ ਕਤ੍ਵਾ ਪੁਰਤੋ ਗਚ੍ਛਾਹੀ’’’ਤਿ. ਸੋ ‘‘ਸਾਧੂ’’ਤਿ ਪਿਤਰਂ ਵਨ੍ਦਿਤ੍ਵਾ ਨਿਕ੍ਖਨ੍ਤੋ ਤਂ ਗਾਮਂ ਪਤ੍ਵਾ ਸੇਟ੍ਠਿਸ੍ਸ ਘਰਂ ਪੁਚ੍ਛਿਤ੍ਵਾ ਗਨ੍ਤ੍ਵਾ ਸੇਟ੍ਠਿਜਾਯਂ ਪਸ੍ਸਿ. ‘‘ਤ੍ਵਂ ਕੁਤੋ ਆਗਤੋਸੀ’’ਤਿ ਚ ਵੁਤ੍ਤੇ, ‘‘ਅਨ੍ਤੋਨਗਰਤੋ’’ਤਿ ਆਹ. ‘‘ਕਸ੍ਸ ਪੁਤ੍ਤੋਸੀ’’ਤਿ? ‘‘ਤੁਮ੍ਹਾਕਂ ਸਹਾਯਕਸੇਟ੍ਠਿਨੋ, ਅਮ੍ਮਾ’’ਤਿ. ‘‘ਤ੍ਵਂਸਿ ਘੋਸਕੋ ਨਾਮਾ’’ਤਿ? ‘‘ਆਮ, ਅਮ੍ਮਾ’’ਤਿ. ਤਸ੍ਸਾ ਸਹ ਦਸ੍ਸਨੇਨੇਵ ਤਸ੍ਮਿਂ ਪੁਤ੍ਤਸਿਨੇਹੋ ਉਪ੍ਪਜ੍ਜਿ. ਸੇਟ੍ਠਿਨੋ ਪਨੇਕਾ ਧੀਤਾ ਅਤ੍ਥਿ ਪਨ੍ਨਰਸਸੋਲ਼ਸਵਸ੍ਸੁਦ੍ਦੇਸਿਕਾ ਅਭਿਰੂਪਾ ਪਾਸਾਦਿਕਾ, ਤਂ ਰਕ੍ਖਿਤੁਂ ਏਕਮੇਵ ਪੇਸਨਕਾਰਿਕਂ ਦਾਸਿਂ ਦਤ੍ਵਾ ਸਤ੍ਤਭੂਮਿਕਸ੍ਸ ਪਾਸਾਦਸ੍ਸ ਉਪਰਿਮਤਲੇ ਸਿਰਿਗਬ੍ਭੇ ਵਸਾਪੇਨ੍ਤਿ. ਸੇਟ੍ਠਿਧੀਤਾ ਤਸ੍ਮਿਂ ਖਣੇ ਤਂ ਦਾਸਿਂ ਅਨ੍ਤਰਾਪਣਂ ਪੇਸੇਸਿ. ਅਥ ਨਂ ਸੇਟ੍ਠਿਜਾਯਾ ਦਿਸ੍ਵਾ, ‘‘ਕੁਹਿਂ ਗਚ੍ਛਸੀ’’ਤਿ ਪੁਚ੍ਛਿਤ੍ਵਾ, ‘‘ਅਯ੍ਯਧੀਤਾਯ ਪੇਸਨੇਨਾ’’ਤਿ ਵੁਤ੍ਤੇ ‘‘ਇਤੋ ਤਾਵ ਏਹਿ, ਤਿਟ੍ਠਤੁ ਪੇਸਨਂ, ਪੁਤ੍ਤਸ੍ਸ ਮੇ ਪੀਠਕਂ ਅਤ੍ਥਰਿਤ੍ਵਾ ਪਾਦੇ ਧੋਵਿਤ੍ਵਾ ਤੇਲਂ ਮਕ੍ਖਿਤ੍ਵਾ ਸਯਨਂ ਅਤ੍ਥਰਿਤ੍ਵਾ ਦੇਹਿ, ਪਚ੍ਛਾ ਪੇਸਨਂ ਕਰਿਸ੍ਸਸੀ’’ਤਿ ਆਹ. ਸਾ ਤਥਾ ਅਕਾਸਿ.

ਅਥ ਨਂ ਚਿਰੇਨਾਗਤਂ ਸੇਟ੍ਠਿਧੀਤਾ ਸਨ੍ਤਜ੍ਜੇਸਿ. ਅਥ ਨਂ ਸਾ ਆਹ – ‘‘ਮਾ ਮੇ ਕੁਜ੍ਝਿ, ਸੇਟ੍ਠਿਪੁਤ੍ਤੋ ਘੋਸਕੋ ਆਗਤੋ, ਤਸ੍ਸ ਇਦਞ੍ਚਿਦਞ੍ਚ ਕਤ੍ਵਾ ਤਤ੍ਥ ਗਨ੍ਤ੍ਵਾ ਆਗਤਾਮ੍ਹੀ’’ਤਿ. ਸੇਟ੍ਠਿਧੀਤਾਯ ‘‘ਸੇਟ੍ਠਿਪੁਤ੍ਤੋ ਘੋਸਕੋ’’ਤਿ ਨਾਮਂ ਸੁਤ੍ਵਾਵ ਪੇਮਂ ਛਵਿਯਾਦੀਨਿ ਛਿਨ੍ਦਿਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਠਿਤਂ. ਕੋਤੁਹਲਕਾਲਸ੍ਮਿਞ੍ਹਿ ਸਾ ਤਸ੍ਸ ਪਜਾਪਤੀ ਹੁਤ੍ਵਾ ਨਾਲ਼ਿਕੋਦਨਂ ਪਚ੍ਚੇਕਬੁਦ੍ਧਸ੍ਸ ਅਦਾਸਿ, ਤਸ੍ਸਾਨੁਭਾਵੇਨਾਗਨ੍ਤ੍ਵਾ ਇਮਸ੍ਮਿਂ ਸੇਟ੍ਠਿਕੁਲੇ ਨਿਬ੍ਬਤ੍ਤਾ. ਇਤਿ ਤਂ ਸੋ ਪੁਬ੍ਬਸਿਨੇਹੋ ਅਵਤ੍ਥਰਿਤ੍ਵਾ ਗਣ੍ਹਿ. ਤੇਨਾਹ ਭਗਵਾ –

‘‘ਪੁਬ੍ਬੇਵ ਸਨ੍ਨਿਵਾਸੇਨ, ਪਚ੍ਚੁਪ੍ਪਨ੍ਨਹਿਤੇਨ ਵਾ;

ਏਵਂ ਤਂ ਜਾਯਤੇ ਪੇਮਂ, ਉਪ੍ਪਲਂਵ ਯਥੋਦਕੇ’’ਤਿ. (ਜਾ. ੧.੨.੧੭੪);

ਅਥ ਨਂ ਪੁਚ੍ਛਿ – ‘‘ਕੁਹਿਂ ਸੋ, ਅਮ੍ਮਾ’’ਤਿ? ‘‘ਸਯਨੇ ਨਿਪਨ੍ਨੋ ਨਿਦ੍ਦਾਯਤੀ’’ਤਿ. ‘‘ਅਤ੍ਥਿ ਪਨਸ੍ਸ ਹਤ੍ਥੇ ਕਿਞ੍ਚੀ’’ਤਿ? ‘‘ਦੁਸ੍ਸਨ੍ਤੇ ਪਣ੍ਣਂ ਅਤ੍ਥੀ’’ਤਿ. ਸਾ ‘‘ਕਿਂ ਪਣ੍ਣਂ ਨੁ ਖੋ ਏਤ’’ਨ੍ਤਿ ਤਸ੍ਮਿਂ ਨਿਦ੍ਦਾਯਨ੍ਤੇ ਮਾਤਾਪਿਤੂਨਂ ਅਞ੍ਞਵਿਹਿਤਤਾਯ ਅਪਸ੍ਸਨ੍ਤਾਨਂ ਓਤਰਿਤ੍ਵਾ ਸਮੀਪਂ ਗਨ੍ਤ੍ਵਾ ਤਂ ਪਣ੍ਣਂ ਮੋਚੇਤ੍ਵਾ ਆਦਾਯ ਅਤ੍ਤਨੋ ਗਬ੍ਭਂ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਵਾਤਪਾਨਂ ਵਿਵਰਿਤ੍ਵਾ ਅਕ੍ਖਰਸਮਯੇ ਕੁਸਲਤਾਯ ਪਣ੍ਣਂ ਵਾਚੇਤ੍ਵਾ, ‘‘ਅਹੋ ਵਤ ਬਾਲੋ, ਅਤ੍ਤਨੋ ਮਰਣਪਣ੍ਣਂ ਦੁਸ੍ਸਨ੍ਤੇ ਬਨ੍ਧਿਤ੍ਵਾ ਵਿਚਰਤਿ, ਸਚੇ ਮਯਾ ਨ ਦਿਟ੍ਠਂ ਅਸ੍ਸ, ਨਤ੍ਥਿਸ੍ਸ ਜੀਵਿਤ’’ਨ੍ਤਿ ਤਂ ਪਣ੍ਣਂ ਫਾਲੇਤ੍ਵਾ ਸੇਟ੍ਠਿਸ੍ਸ ਵਚਨੇਨ ਅਪਰਂ ਪਣ੍ਣਂ ਲਿਖਿ – ‘‘ਅਯਂ ਮਮ ਪੁਤ੍ਤੋ ਘੋਸਕੋ ਨਾਮ, ਗਾਮਸਤਤੋ ਪਣ੍ਣਾਕਾਰਂ ਆਹਰਾਪੇਤ੍ਵਾ ਇਮਸ੍ਸ ਜਨਪਦਸੇਟ੍ਠਿਨੋ ਧੀਤਰਾ ਸਦ੍ਧਿਂ ਮਙ੍ਗਲਂ ਕਤ੍ਵਾ ਅਤ੍ਤਨੋ ਵਸਨਗਾਮਸ੍ਸ ਮਜ੍ਝੇ ਦ੍ਵਿਭੂਮਕਂ ਗੇਹਂ ਕਾਰੇਤ੍ਵਾ ਪਾਕਾਰਪਰਿਕ੍ਖੇਪੇਨ ਚੇਵ ਪੁਰਿਸਗੁਤ੍ਤਿਯਾ ਚ ਸੁਸਂਵਿਹਿਤਾਰਕ੍ਖਂ ਕਰੋਤੁ, ਮਯ੍ਹਞ੍ਚ ‘ਇਦਞ੍ਚਿਦਞ੍ਚ ਮਯਾ ਕਤ’ਨ੍ਤਿ ਸਾਸਨਂ ਪੇਸੇਤੁ, ਏਵਂ ਕਤੇ ਅਹਂ ਮਾਤੁਲਸ੍ਸ ਕਤ੍ਤਬ੍ਬਯੁਤ੍ਤਕਂ ਪਚ੍ਛਾ ਜਾਨਿਸ੍ਸਾਮੀ’’ਤਿ, ਲਿਖਿਤ੍ਵਾ ਚ ਪਨ ਸਙ੍ਘਰਿਤ੍ਵਾ ਓਤਰਿਤ੍ਵਾ ਦੁਸ੍ਸਨ੍ਤੇਯੇਵਸ੍ਸ ਬਨ੍ਧਿ.

ਸੋ ਦਿਵਸਭਾਗਂ ਨਿਦ੍ਦਾਯਿਤ੍ਵਾ ਉਟ੍ਠਾਯ ਭੁਞ੍ਜਿਤ੍ਵਾ ਪਕ੍ਕਾਮਿ. ਪੁਨਦਿਵਸੇ ਪਾਤੋਵ ਤਂ ਗਾਮਂ ਗਨ੍ਤ੍ਵਾ ਆਯੁਤ੍ਤਕਂ ਗਾਮਕਿਚ੍ਚਂ ਕਰੋਨ੍ਤਂਯੇਵ ਪਸ੍ਸਿ. ਸੋ ਤਂ ਦਿਸ੍ਵਾ, ‘‘ਕਿਂ, ਤਾਤਾ’’ਤਿ ਪੁਚ੍ਛਿ. ‘‘ਪਿਤਰਾ ਮੇ ਤੁਮ੍ਹਾਕਂ ਪਣ੍ਣਂ ਪੇਸਿਤ’’ਨ੍ਤਿ. ‘‘ਕਿਂ ਪਣ੍ਣਂ, ਤਾਤ, ਆਹਰਾ’’ਤਿ ਪਣ੍ਣਂ ਗਹੇਤ੍ਵਾ ਵਾਚੇਤ੍ਵਾ ਤੁਟ੍ਠਮਾਨਸੋ ‘‘ਪਸ੍ਸਥ, ਭੋ, ਮਮ ਸਾਮਿਨੋ ਮਯਿ ਸਿਨੇਹਂ ਕਤ੍ਵਾ ਜੇਟ੍ਠਪੁਤ੍ਤਸ੍ਸ ਮੇ ਮਙ੍ਗਲਂ ਕਰੋਤੂ’’ਤਿ ਮਮ ਸਨ੍ਤਿਕਂ ਪਹਿਣਿ. ‘‘ਸੀਘਂ ਦਾਰੁਆਦੀਨਿ ਆਹਰਥਾ’’ਤਿ ਗਹਪਤਿਕੇ ਵਤ੍ਵਾ ਗਾਮਮਜ੍ਝੇ ਵੁਤ੍ਤਪਕਾਰਂ ਗੇਹਂ ਕਾਰਾਪੇਤ੍ਵਾ ਗਾਮਸਤਤੋ ਪਣ੍ਣਾਕਾਰਂ ਆਹਰਾਪੇਤ੍ਵਾ ਜਨਪਦਸੇਟ੍ਠਿਨੋ ਸਨ੍ਤਿਕਾ ਧੀਤਰਂ ਆਨੇਤ੍ਵਾ ਮਙ੍ਗਲਂ ਕਤ੍ਵਾ ਸੇਟ੍ਠਿਸ੍ਸ ਸਾਸਨਂ ਪਹਿਣਿ ‘‘ਇਦਞ੍ਚਿਦਞ੍ਚ ਮਯਾ ਕਤ’’ਨ੍ਤਿ.

ਤਂ ਸੁਤ੍ਵਾ ਸੇਟ੍ਠਿਨੋ ‘‘ਯਂ ਕਾਰੇਮਿ, ਤਂ ਨ ਹੋਤਿ; ਯਂ ਨ ਕਾਰੇਮਿ, ਤਦੇਵ ਹੋਤੀ’’ਤਿ ਮਹਨ੍ਤਂ ਦੋਮਨਸ੍ਸਂ ਉਪ੍ਪਜ੍ਜਿ. ਪੁਤ੍ਤਸੋਕੇਨ ਸਦ੍ਧਿਂ ਸੋ ਸੋਕੋ ਏਕਤੋ ਹੁਤ੍ਵਾ ਕੁਚ੍ਛਿਡਾਹਂ ਉਪ੍ਪਾਦੇਤ੍ਵਾ ਅਤਿਸਾਰਂ ਜਨੇਸਿ. ਸੇਟ੍ਠਿਧੀਤਾਪਿ ‘‘ਸਚੇ ਕੋਚਿ ਸੇਟ੍ਠਿਨੋ ਸਨ੍ਤਿਕਾ ਆਗਚ੍ਛਤਿ, ਮਮ ਅਕਥੇਤ੍ਵਾ ਸੇਟ੍ਠਿਪੁਤ੍ਤਸ੍ਸ ਪਠਮਤਰਂ ਮਾ ਕਥਯਿਤ੍ਥਾ’’ਤਿ ਜਨੇ ਆਣਾਪੇਸਿ. ਸੇਟ੍ਠਿਪਿ ਖੋ ‘‘ਦਾਨਿ ਤਂ ਦੁਟ੍ਠਪੁਤ੍ਤਂ ਮਮ ਸਾਪਤੇਯ੍ਯਸ੍ਸ ਸਾਮਿਕਂ ਨ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਕਂ ਆਯੁਤ੍ਤਕਂ ਆਹ – ‘‘ਮਾਤੁਲ, ਪੁਤ੍ਤਂ ਮੇ ਦਟ੍ਠੁਕਾਮੋਮ੍ਹਿ, ਏਕਂ ਪਾਦਮੂਲਿਕਂ ਪੇਸੇਤ੍ਵਾ ਮਮ ਪੁਤ੍ਤਂ ਪਕ੍ਕੋਸਾਪੇਹੀ’’ਤਿ. ਸੋ ‘‘ਸਾਧੂ’’ਤਿ ਵਤ੍ਵਾ ਪਣ੍ਣਂ ਦਤ੍ਵਾ ਏਕਂ ਪੁਰਿਸਂ ਪੇਸੇਸਿ. ਸੇਟ੍ਠਿਧੀਤਾਪਿ ਤਸ੍ਸ ਆਗਨ੍ਤ੍ਵਾ ਦ੍ਵਾਰੇ ਠਿਤਭਾਵਂ ਸੁਤ੍ਵਾ ਤਂ ਪਕ੍ਕੋਸਾਪੇਤ੍ਵਾ, ‘‘ਕਿਂ, ਤਾਤਾ’’ਤਿ ਪੁਚ੍ਛਿ. ਸੋ ਆਹ – ‘‘ਸੇਟ੍ਠਿ ਗਿਲਾਨੋ, ਪੁਤ੍ਤਂ ਪਸ੍ਸਿਤੁਂ ਪਕ੍ਕੋਸਾਪੇਸਿ, ਅਯ੍ਯੇ’’ਤਿ. ‘‘ਕਿਂ, ਤਾਤ, ਬਲਵਾ, ਦੁਬ੍ਬਲੋ’’ਤਿ? ‘‘ਬਲਵਾ ਤਾਵ, ਆਹਾਰਂ ਭੁਞ੍ਜਤਿਯੇਵ, ਅਯ੍ਯੇ’’ਤਿ. ਸਾ ਸੇਟ੍ਠਿਪੁਤ੍ਤਂ ਅਜਾਨਾਪੇਤ੍ਵਾਵ ਤਸ੍ਸ ਨਿਵੇਸਨਞ੍ਚ ਪਰਿਬ੍ਬਯਞ੍ਚ ਦਾਪੇਤ੍ਵਾ ‘‘ਮਯਾ ਪੇਸਿਤਕਾਲੇ ਗਮਿਸ੍ਸਸਿ, ਅਚ੍ਛਸ੍ਸੁ ਤਾਵਾ’’ਤਿ ਆਹ. ਸੇਟ੍ਠਿ ਪੁਨ ਆਯੁਤ੍ਤਕਂ ਅਵਚ, ‘‘ਕਿਂ, ਮਾਤੁਲ, ਨ ਤੇ ਮਮ ਪੁਤ੍ਤਸ੍ਸ ਸਨ੍ਤਿਕਂ ਪਹਿਤ’’ਨ੍ਤਿ? ‘‘ਪਹਿਤਂ, ਸਾਮਿ, ਗਤਪੁਰਿਸੋ ਨ ਤਾਵ ਏਤੀ’’ਤਿ. ‘‘ਤੇਨ ਹਿ ਪੁਨ ਅਪਰਂ ਪੇਸੇਹੀ’’ਤਿ. ਸੋ ਪੇਸੇਸਿ. ਸੇਟ੍ਠਿਧੀਤਾ ਤਸ੍ਮਿਮ੍ਪਿ ਤਥੇਵ ਪਟਿਪਜ੍ਜਿ. ਅਥ ਸੇਟ੍ਠਿਨੋ ਰੋਗੋ ਬਲਵਾ ਜਾਤੋ, ਏਕਂ ਭਾਜਨਂ ਪਵਿਸਤਿ, ਏਕਂ ਨਿਕ੍ਖਮਤਿ. ਪੁਨ ਸੇਟ੍ਠਿ ਆਯੁਤ੍ਤਕਂ ਪੁਚ੍ਛਿ – ‘‘ਕਿਂ, ਮਾਤੁਲ, ਨ ਤੇ ਮਮ ਪੁਤ੍ਤਸ੍ਸ ਸਨ੍ਤਿਕਂ ਪਹਿਤ’’ਨ੍ਤਿ? ‘‘ਪਹਿਤਂ, ਸਾਮਿ, ਗਤਪੁਰਿਸੋ ਨ ਤਾਵ ਏਤੀ’’ਤਿ. ‘‘ਤੇਨ ਹਿ ਪੁਨ ਅਪਰਂ ਪੇਸੇਹੀ’’ਤਿ. ਸੋ ਪੇਸੇਸਿ. ਸੇਟ੍ਠਿਧੀਤਾ ਤਤਿਯਵਾਰੇ ਆਗਤਮ੍ਪਿ ਤਂ ਪਵਤ੍ਤਿਂ ਪੁਚ੍ਛਿ. ਸੋ ‘‘ਬਾਲ਼੍ਹਗਿਲਾਨੋ, ਅਯ੍ਯੇ, ਸੇਟ੍ਠਿ ਆਹਾਰਂ ਪਚ੍ਛਿਨ੍ਦਿਤ੍ਵਾ ਮਚ੍ਚੁਪਰਾਯਣੋ ਜਾਤੋ, ਏਕਂ ਭਾਜਨਂ ਨਿਕ੍ਖਮਤਿ, ਏਕਂ ਪਵਿਸਤੀ’’ਤਿ ਆਹ. ਸੇਟ੍ਠਿਧੀਤਾ ‘‘ਇਦਾਨਿ ਗਨ੍ਤੁਂ ਕਾਲੋ’’ਤਿ ਸੇਟ੍ਠਿਪੁਤ੍ਤਸ੍ਸ ‘‘ਪਿਤਾ ਤੇ ਕਿਰ ਗਿਲਾਨੋ’’ਤਿ ਆਰੋਚੇਤ੍ਵਾ ‘‘ਕਿਂ ਵਦੇਸਿ ਭਦ੍ਦੇ’’ਤਿ ਵੁਤ੍ਤੇ ‘‘ਅਫਾਸੁਕਮਸ੍ਸ, ਸਾਮੀ’’ਤਿ ਆਹ. ‘‘ਇਦਾਨਿ ਕਿਂ ਕਾਤਬ੍ਬ’’ਨ੍ਤਿ. ਸਾਮਿ? ‘‘ਗਾਮਸਤਤੋ ਵੁਟ੍ਠਾਨਕਪਣ੍ਣਾਕਾਰਂ ਆਦਾਯ ਗਨ੍ਤ੍ਵਾ ਪਸ੍ਸਿਸ੍ਸਾਮ ਨ’’ਨ੍ਤਿ. ਸੋ ‘‘ਸਾਧੂ’’ਤਿ ਪਣ੍ਣਾਕਾਰਂ ਆਹਰਾਪੇਤ੍ਵਾ ਸਕਟੇਹਿ ਆਦਾਯ ਪਕ੍ਕਾਮਿ.

ਅਥ ਨਂ ਸਾ ‘‘ਪਿਤਾ ਤੇ ਦੁਬ੍ਬਲੋ, ਏਤ੍ਤਕਂ ਪਣ੍ਣਾਕਾਰਂ ਗਹੇਤ੍ਵਾ ਗਚ੍ਛਨ੍ਤਾਨਂ ਪਪਞ੍ਚੋ ਭਵਿਸ੍ਸਤਿ, ਏਤਂ ਨਿਵਤ੍ਤਾਪੇਹੀ’’ਤਿ ਵਤ੍ਵਾ ਤਂ ਸਬ੍ਬਂ ਅਤ੍ਤਨੋ ਕੁਲਗੇਹਂ ਪੇਸੇਤ੍ਵਾ ਪੁਨ ਤਂ ਆਹ – ‘‘ਸਾਮਿ, ਤ੍ਵਂ ਅਤ੍ਤਨੋ ਪਿਤੁ ਪਾਦਪਸ੍ਸੇ ਤਿਟ੍ਠੇਯ੍ਯਾਸਿ, ਅਹਂ ਉਸ੍ਸੀਸਕਪਸ੍ਸੇ ਠਸ੍ਸਾਮੀ’’ਤਿ. ਗੇਹਂ ਪਵਿਸਮਾਨਾਯੇਵ ਚ ‘‘ਗੇਹਸ੍ਸ ਪੁਰਤੋ ਚ ਪਚ੍ਛਤੋ ਚ ਆਰਕ੍ਖਂ ਗਣ੍ਹਥਾ’’ਤਿ ਅਤ੍ਤਨੋ ਪੁਰਿਸੇ ਆਣਾਪੇਸਿ. ਪਵਿਟ੍ਠਕਾਲੇ ਪਨ ਸੇਟ੍ਠਿਪੁਤ੍ਤੋ ਪਿਤੁ ਪਾਦਪਸ੍ਸੇ ਅਟ੍ਠਾਸਿ, ਇਤਰਾ ਉਸ੍ਸੀਸਕਪਸ੍ਸੇ.

ਤਸ੍ਮਿਂ ਖਣੇ ਸੇਟ੍ਠਿ ਉਤ੍ਤਾਨਕੋ ਨਿਪਨ੍ਨੋ ਹੋਤਿ. ਆਯੁਤ੍ਤਕੋ ਪਨ ਤਸ੍ਸ ਪਾਦੇ ਪਰਿਮਜ੍ਜਨ੍ਤੋ ‘‘ਪੁਤ੍ਤੋ ਤੇ, ਸਾਮਿ, ਆਗਤੋ’’ਤਿ ਆਹ. ‘‘ਕੁਹਿਂ ਸੋ’’ਤਿ? ‘‘ਏਸ ਪਾਦਮੂਲੇ ਠਿਤੋ’’ਤਿ. ਅਥ ਨਂ ਦਿਸ੍ਵਾ ਆਯਕਮ੍ਮਿਕਂ ਪਕ੍ਕੋਸਾਪੇਤ੍ਵਾ, ‘‘ਮਮ ਗੇਹੇ ਕਿਤ੍ਤਕਂ ਧਨ’’ਨ੍ਤਿ ਪੁਚ੍ਛਿ. ‘‘ਸਾਮਿ, ਧਨਸ੍ਸੇਵ ਚਤ੍ਤਾਲੀਸਕੋਟਿਯੋ, ਉਪਭੋਗਪਰਿਭੋਗਭਣ੍ਡਾਨਂ ਪਨ ਵਨਗਾਮਕ੍ਖੇਤ੍ਤਦ੍ਵਿਪਦਚਤੁਪ੍ਪਦਯਾਨਵਾਹਨਾਨਞ੍ਚ ਅਯਞ੍ਚ ਅਯਞ੍ਚ ਪਰਿਚ੍ਛੇਦੋ’’ਤਿ ਵੁਤ੍ਤੇ, ‘‘ਅਹਂ ਏਤ੍ਤਕਂ ਧਨਂ ਮਮ ਪੁਤ੍ਤਸ੍ਸ ਘੋਸਕਸ੍ਸ ਨ ਦੇਮੀ’’ਤਿ ਵਤ੍ਤੁਕਾਮੋ ‘‘ਦੇਮੀ’’ਤਿ ਆਹ. ਤਂ ਸੁਤ੍ਵਾ ਸੇਟ੍ਠਿਧੀਤਾ ‘‘ਅਯਂ ਪੁਨ ਕਥੇਨ੍ਤੋ ਅਞ੍ਞਂ ਕਿਞ੍ਚਿ ਕਥੇਯ੍ਯਾ’’ਤਿ ਚਿਨ੍ਤੇਤ੍ਵਾ ਸੋਕਾਤੁਰਾ ਵਿਯ ਕੇਸੇ ਵਿਕਿਰਿਤ੍ਵਾ ਰੋਦਮਾਨਾ ‘‘ਕਿਂ ਨਾਮੇਤਂ, ਤਾਤ, ਵਦੇਥ, ਇਦਮ੍ਪਿ ਨਾਮ ਵੋ ਵਚਨਂ ਸੁਣੋਮ, ਅਲਕ੍ਖਿਕਾ ਵਤਮ੍ਹਾ’’ਤਿ ਵਤ੍ਵਾ ਮਤ੍ਥਕੇਨ ਨਂ ਉਰਮਜ੍ਝੇ ਪਹਰਨ੍ਤੀ ਪਤਿਤ੍ਵਾ ਯਥਾ ਪੁਨ ਵਤ੍ਤੁਂ ਨ ਸਕ੍ਕੋਤਿ, ਤਥਾਸ੍ਸ ਉਰਮਜ੍ਝੇ ਮਤ੍ਥਕੇਨ ਘਂਸੇਨ੍ਤੀ ਆਰੋਦਨਂ ਦਸ੍ਸੇਸਿ. ਸੇਟ੍ਠਿ ਤਂਖਣਞ੍ਞੇਵ ਕਾਲਮਕਾਸਿ. ‘‘ਸੇਟ੍ਠਿ ਮਤੋ’’ਤਿ ਗਨ੍ਤ੍ਵਾ ਉਤੇਨਸ੍ਸ ਰਞ੍ਞੋ ਆਰੋਚਯਿਂਸੁ. ਰਾਜਾ ਤਸ੍ਸ ਸਰੀਰਕਿਚ੍ਚਂ ਕਾਰਾਪੇਤ੍ਵਾ, ‘‘ਅਤ੍ਥਿ ਪਨਸ੍ਸ ਪੁਤ੍ਤੋ ਵਾ ਧੀਤਾ ਵਾ’’ਤਿ ਪੁਚ੍ਛਿ. ‘‘ਅਤ੍ਥਿ, ਦੇਵ, ਘੋਸਕੋ ਨਾਮ ਤਸ੍ਸ ਪੁਤ੍ਤੋ, ਸਬ੍ਬਂ ਸਾਪਤੇਯ੍ਯਂ ਤਸ੍ਸ ਨਿਯ੍ਯਾਦੇਤ੍ਵਾਵ ਮਤੋ, ਦੇਵਾ’’ਤਿ.

ਰਾਜਾ ਅਪਰਭਾਗੇ ਸੇਟ੍ਠਿਪੁਤ੍ਤਂ ਪਕ੍ਕੋਸਾਪੇਸਿ. ਤਸ੍ਮਿਞ੍ਚ ਦਿਵਸੇ ਦੇਵੋ ਵਸ੍ਸਿ. ਰਾਜਙ੍ਗਣੇ ਤਤ੍ਥ ਤਤ੍ਥ ਉਦਕਂ ਸਣ੍ਠਾਤਿ. ਸੇਟ੍ਠਿਪੁਤ੍ਤੋ ‘‘ਰਾਜਾਨਂ ਪਸ੍ਸਿਸ੍ਸਾਮੀ’’ਤਿ ਪਾਯਾਸਿ. ਰਾਜਾ ਵਾਤਪਾਨਂ ਵਿਵਰਿਤ੍ਵਾ ਤਂ ਆਗਚ੍ਛਨ੍ਤਂ ਓਲੋਕੇਨ੍ਤੋ ਰਾਜਙ੍ਗਣੇ ਉਦਕਂ ਲਙ੍ਘਿਤ੍ਵਾ ਆਗਚ੍ਛਨ੍ਤਂ ਦਿਸ੍ਵਾ ਆਗਨ੍ਤ੍ਵਾ ਵਨ੍ਦਿਤ੍ਵਾ ਠਿਤਂ ‘‘ਤ੍ਵਂ ਘੋਸਕੋ ਨਾਮ, ਤਾਤਾ’’ਤਿ ਪੁਚ੍ਛਿਤ੍ਵਾ ‘‘ਆਮ, ਦੇਵਾ’’ਤਿ ਵੁਤ੍ਤੇ ‘‘ਪਿਤਾ ਮੇ ਮਤੋਤਿ ਮਾ ਸੋਚਿ, ਤਵ ਪੇਤ੍ਤਿਕਂ ਸੇਟ੍ਠਿਟ੍ਠਾਨਂ ਤੁਯ੍ਹਮੇਵ ਦਸ੍ਸਾਮੀ’’ਤਿ ਤਂ ਸਮਸ੍ਸਾਸੇਤ੍ਵਾ ‘‘ਗਚ੍ਛ, ਤਾਤਾ’’ਤਿ ਉਯ੍ਯੋਜੇਸਿ. ਰਾਜਾ ਗਚ੍ਛਨ੍ਤਞ੍ਚ ਨਂ ਓਲੋਕੇਨ੍ਤੋਵ ਅਟ੍ਠਾਸਿ. ਸੋ ਆਗਮਨਕਾਲੇ ਲਙ੍ਘਿਤਂ ਉਦਕਂ ਗਮਨਕਾਲੇ ਓਤਰਿਤ੍ਵਾ ਸਣਿਕਂ ਅਗਮਾਸਿ. ਅਥ ਨਂ ਰਾਜਾ ਤਤੋਵ ਪਕ੍ਕੋਸਾਪੇਤ੍ਵਾ, ‘‘ਕਿਂ ਨੁ ਖੋ, ਤਾਤ, ਤ੍ਵਂ ਮਮ ਸਨ੍ਤਿਕਂ ਆਗਚ੍ਛਨ੍ਤੋ ਉਦਕਂ ਲਙ੍ਘਿਤ੍ਵਾ ਆਗਮ੍ਮ ਗਚ੍ਛਨ੍ਤੋ ਓਤਰਿਤ੍ਵਾ ਸਣਿਕਂ ਗਚ੍ਛਸੀ’’ਤਿ ਪੁਚ੍ਛਿ. ‘‘ਆਮ, ਦੇਵ, ਅਹਂ ਤਸ੍ਮਿਂ ਖਣੇ ਕੁਮਾਰਕੋ, ਕੀਲ਼ਨਕਾਲੋ ਨਾਮ, ਸੋ ਇਦਾਨਿ ਪਨ ਮੇ ਦੇਵੇਨ ਠਾਨਨ੍ਤਰਂ ਪਟਿਸ੍ਸੁਤਂ. ਤਸ੍ਮਾ ਯਥਾ ਪੁਰੇ ਅਚਰਿਤ੍ਵਾ ਇਦਾਨਿ ਸਨ੍ਨਿਸਿਨ੍ਨੇਨ ਹੁਤ੍ਵਾ ਚਰਿਤੁਂ ਵਟ੍ਟਤੀ’’ਤਿ. ਤਂ ਸੁਤ੍ਵਾ ਰਾਜਾ ‘‘ਧਿਤਿਮਾਯਂ ਪੁਰਿਸੋ, ਇਦਾਨੇਵਸ੍ਸ ਠਾਨਨ੍ਤਰਂ ਦਸ੍ਸਾਮੀ’’ਤਿ ਪਿਤਰਾ ਭੁਤ੍ਤਂ ਭੋਗਂ ਦਤ੍ਵਾ ਸਬ੍ਬਸਤੇਨ ਸੇਟ੍ਠਿਟ੍ਠਾਨਂ ਅਦਾਸਿ.

ਸੋ ਰਥੇ ਠਤ੍ਵਾ ਨਗਰਂ ਪਦਕ੍ਖਿਣਂ ਅਕਾਸਿ. ਓਲੋਕਿਤੋਲੋਕਿਤਟ੍ਠਾਨਂ ਕਮ੍ਪਤਿ. ਸੇਟ੍ਠਿਧੀਤਾ ਕਾਲ਼ਿਦਾਸਿਯਾ ਸਦ੍ਧਿਂ ਮਨ੍ਤਯਮਾਨਾ ਨਿਸਿਨ੍ਨਾ ‘‘ਅਮ੍ਮ ਕਾਲ਼ਿ, ਪੁਤ੍ਤਸ੍ਸ ਤੇ ਏਤ੍ਤਿਕਾ ਸਮ੍ਪਤ੍ਤਿ ਮਂ ਨਿਸ੍ਸਾਯ ਉਪ੍ਪਨ੍ਨਾ’’ਤਿ ਆਹ. ‘‘ਕਿਂ ਕਾਰਣਾ, ਅਮ੍ਮਾ’’ਤਿ? ‘‘ਅਯਞ੍ਹਿ ਅਤ੍ਤਨੋ ਮਰਣਪਣ੍ਣਂ ਦੁਸ੍ਸਨ੍ਤੇ ਬਨ੍ਧਿਤ੍ਵਾ ਅਮ੍ਹਾਕਂ ਘਰਂ ਆਗਤੋ, ਅਥਸ੍ਸ ਮਯਾ ਤਂ ਪਣ੍ਣਂ ਫਾਲੇਤ੍ਵਾ ਮਯਾ ਸਦ੍ਧਿਂ ਮਙ੍ਗਲਕਰਣਤ੍ਥਾਯ ਅਞ੍ਞਂ ਪਣ੍ਣਂ ਲਿਖਿਤ੍ਵਾ ਏਤ੍ਤਕਂ ਕਾਲਂ ਤਤ੍ਥ ਆਰਕ੍ਖੋ ਕਤੋ’’ਤਿ. ‘‘ਅਮ੍ਮ, ਤ੍ਵਂ ਏਤ੍ਤਕਂ ਪਸ੍ਸਸਿ, ਇਮਂ ਪਨ ਸੇਟ੍ਠਿ ਦਹਰਕਾਲਤੋ ਪਟ੍ਠਾਯ ਮਾਰੇਤੁਕਾਮੋ ਮਾਰੇਤੁਂ ਨਾਸਕ੍ਖਿ, ਕੇਵਲਂ ਇਮਂ ਨਿਸ੍ਸਾਯ ਬਹੁਂ ਧਨਂ ਖੀਯੀ’’ਤਿ. ‘‘ਅਮ੍ਮ, ਅਤਿਭਾਰਿਯਂ ਵਤ ਸੇਟ੍ਠਿਨਾ ਕਤ’’ਨ੍ਤਿ. ਨਗਰਂ ਪਦਕ੍ਖਿਣਂ ਕਤ੍ਵਾ ਗੇਹਂ ਪਵਿਸਨ੍ਤਂ ਪਨ ਨਂ ਦਿਸ੍ਵਾ, ‘‘ਅਯਂ ਏਤ੍ਤਿਕਾ ਸਮ੍ਪਤ੍ਤਿ ਮਂ ਨਿਸ੍ਸਾਯ ਉਪ੍ਪਨ੍ਨਾ’’ਤਿ ਹਸਿਤਂ ਅਕਾਸਿ. ਅਥ ਨਂ ਸੇਟ੍ਠਿਪੁਤ੍ਤੋ ਦਿਸ੍ਵਾ, ‘‘ਕਿਂ ਕਾਰਣਾ ਹਸੀ’’ਤਿ ਪੁਚ੍ਛਿ. ‘‘ਏਕਂ ਕਾਰਣਂ ਨਿਸ੍ਸਾਯਾ’’ਤਿ. ‘‘ਕਥੇਹਿ ਨ’’ਨ੍ਤਿ? ‘‘ਸਾ ਨ ਕਥੇਸਿ’’. ਸੋ ‘‘ਸਚੇ ਨ ਕਥੇਸ੍ਸਸਿ, ਦ੍ਵਿਧਾ ਤਂ ਛਿਨ੍ਦਿਸ੍ਸਾਮੀ’’ਤਿ ਤਜ੍ਜੇਤ੍ਵਾ ਅਸਿਂ ਨਿਕ੍ਕਡ੍ਢਿ. ਸਾ ‘‘ਅਯਂ ਏਤ੍ਤਿਕਾ ਸਮ੍ਪਤ੍ਤਿ ਤਯਾ ਮਂ ਨਿਸ੍ਸਾਯ ਲਦ੍ਧਾਤਿ ਚਿਨ੍ਤੇਤ੍ਵਾ ਹਸਿਤ’’ਨ੍ਤਿ ਆਹ. ‘‘ਯਦਿ ਮਮ ਪਿਤਰਾ ਅਤ੍ਤਨੋ ਸਨ੍ਤਕਂ ਮਯ੍ਹਂ ਨਿਯ੍ਯਾਦਿਤਂ, ਤ੍ਵਂ ਏਤ੍ਥ ਕਿਂ ਹੋਸੀ’’ਤਿ? ਸੋ ਕਿਰ ਏਤ੍ਤਕਂ ਕਾਲਂ ਕਿਞ੍ਚਿ ਨ ਜਾਨਾਤਿ, ਤੇਨਸ੍ਸਾ ਵਚਨਂ ਨ ਸਦ੍ਦਹਿ. ਅਥਸ੍ਸ ਸਾ ‘‘ਤੁਮ੍ਹਾਕਂ ਪਿਤਰਾ ਮਰਣਪਣ੍ਣਂ ਦਤ੍ਵਾ ਪੇਸਿਤਾ, ਤੁਮ੍ਹੇ ਮਯਾ ਇਦਞ੍ਚਿਦਞ੍ਚ ਕਤ੍ਵਾ ਰਕ੍ਖਿਤਾ’’ਤਿ ਸਬ੍ਬਂ ਕਥੇਸਿ. ‘‘ਤ੍ਵਂ ਅਭੂਤਂ ਕਥੇਸੀ’’ਤਿ ਅਸਦ੍ਦਹਨ੍ਤੋ ‘‘ਮਾਤਰਂ ਕਾਲ਼ਿਂ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਏਵਂ ਕਿਰ, ਅਮ੍ਮਾ’’ਤਿ. ‘‘ਆਮ, ਤਾਤ, ਦਹਰਕਾਲਤੋ ਪਟ੍ਠਾਯ ਤਂ ਮਾਰੇਤੁਕਾਮੋ ਮਾਰੇਤੁਂ ਅਸਕ੍ਕੋਨ੍ਤੋ ਤਂ ਨਿਸ੍ਸਾਯ ਬਹੁਂ ਧਨਂ ਖੀਯਿ, ਸਤ੍ਤਸੁ ਠਾਨੇਸੁ ਤ੍ਵਂ ਮਰਣਤੋ ਮੁਤ੍ਤੋ, ਇਦਾਨਿ ਭੋਗਗਾਮਤੋ ਆਗਮ੍ਮ ਸਬ੍ਬਸਤੇਨ ਸਦ੍ਧਿਂ ਸੇਟ੍ਠਿਟ੍ਠਾਨਂ ਪਤ੍ਤੋ’’ਤਿ. ਸੋ ਤਂ ਸੁਤ੍ਵਾ ‘‘ਭਾਰਿਯਂ ਵਤ ਕਮ੍ਮਂ, ਏਵਰੂਪਾ ਖੋ ਪਨ ਮਰਣਾ ਮੁਤ੍ਤਸ੍ਸ ਮਮ ਪਮਾਦਜੀਵਿਤਂ ਜੀਵਿਤੁਂ ਅਯੁਤ੍ਤਂ, ਅਪ੍ਪਮਤ੍ਤੋ ਭਵਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦੇਵਸਿਕਂ ਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਅਦ੍ਧਿਕਕਪਣਾਦੀਨਂ ਦਾਨਂ ਪਟ੍ਠਪੇਸਿ. ਮਿਤ੍ਤੋ ਨਾਮਸ੍ਸ ਕੁਟੁਮ੍ਬਿਕੋ ਦਾਨਬ੍ਯਾਵਟੋ ਅਹੋਸਿ. ਅਯਂ ਘੋਸਕਸੇਟ੍ਠਿਨੋ ਉਪ੍ਪਤ੍ਤਿ.

ਤਸ੍ਮਿਂ ਪਨ ਕਾਲੇ ਭਦ੍ਦਵਤੀਨਗਰੇ ਭਦ੍ਦਵਤਿਯਸੇਟ੍ਠਿ ਨਾਮ ਘੋਸਕਸੇਟ੍ਠਿਨੋ ਅਦਿਟ੍ਠਪੁਬ੍ਬਸਹਾਯਕੋ ਅਹੋਸਿ. ਭਦ੍ਦਵਤੀਨਗਰਤੋ ਆਗਤਾਨਂ ਵਾਣਿਜਾਨਂ ਸਨ੍ਤਿਕੇ ਘੋਸਕਸੇਟ੍ਠਿ ਭਦ੍ਦਵਤਿਯਸੇਟ੍ਠਿਨੋ ਸਮ੍ਪਤ੍ਤਿਞ੍ਚ ਵਯਪ੍ਪਦੇਸਞ੍ਚ ਸੁਤ੍ਵਾ ਤੇਨ ਸਦ੍ਧਿਂ ਸਹਾਯਕਭਾਵਂ ਇਚ੍ਛਨ੍ਤੋ ਪਣ੍ਣਾਕਾਰਂ ਪੇਸੇਸਿ. ਭਦ੍ਦਵਤਿਯਸੇਟ੍ਠਿਪਿ ਕੋਸਮ੍ਬਿਤੋ ਆਗਤਾਨਂ ਵਾਣਿਜਾਨਂ ਸਨ੍ਤਿਕੇ ਘੋਸਕਸੇਟ੍ਠਿਨੋ ਸਮ੍ਪਤ੍ਤਿਞ੍ਚ ਵਯਪ੍ਪਦੇਸਞ੍ਚ ਸੁਤ੍ਵਾ ਤੇਨ ਸਦ੍ਧਿਂ ਸਹਾਯਕਭਾਵਂ ਇਚ੍ਛਨ੍ਤੋ ਪਣ੍ਣਾਕਾਰਂ ਪੇਸੇਸਿ. ਏਵਂ ਤੇ ਅਞ੍ਞਮਞ੍ਞਂ ਅਦਿਟ੍ਠਪੁਬ੍ਬਸਹਾਯਕਾ ਹੁਤ੍ਵਾ ਵਸਿਂਸੁ. ਅਪਰਭਾਗੇ ਭਦ੍ਦਵਤਿਯਸੇਟ੍ਠਿਨੋ ਗੇਹੇ ਅਹਿਵਾਤਰੋਗੋ ਪਤਿਤੋ. ਤਸ੍ਮਿਂ ਪਤਿਤੇ ਪਠਮਂ ਮਕ੍ਖਿਕਾ ਮਰਨ੍ਤਿ, ਤਤੋ ਅਨੁਕ੍ਕਮੇਨੇਵ ਕੀਟਾ ਮੂਸਿਕਾ ਕੁਕ੍ਕੁਟਾ ਸੂਕਰਾ ਗਾਵੋ ਦਾਸੀ ਦਾਸਾ ਸਬ੍ਬਪਚ੍ਛਾ ਘਰਮਾਨੁਸਕਾਪਿ ਮਰਨ੍ਤਿ. ਤੇਸੁ ਯੇ ਭਿਤ੍ਤਿਂ ਭਿਨ੍ਦਿਤ੍ਵਾ ਪਲਾਯਨ੍ਤਿ, ਤੇ ਜੀਵਿਤਂ ਲਭਨ੍ਤਿ, ਤਦਾ ਪਨ ਸੇਟ੍ਠਿ ਚ ਭਰਿਯਾ ਚ ਧੀਤਾ ਚਸ੍ਸ ਤਥਾ ਪਲਾਯਿਤ੍ਵਾ ਘੋਸਕਸੇਟ੍ਠਿਂ ਪਸ੍ਸਿਤੁਂ ਪਤ੍ਥੇਨ੍ਤਾ ਕੋਸਮ੍ਬਿਮਗ੍ਗਂ ਪਟਿਪਜ੍ਜਿਂਸੁ. ਤੇ ਅਨ੍ਤਰਾਮਗ੍ਗੇਯੇਵ ਖੀਣਪਾਥੇਯ੍ਯਾ ਵਾਤਾਤਪੇਨ ਚੇਵ ਖੁਪ੍ਪਿਪਾਸਾਹਿ ਚ ਕਿਲਨ੍ਤਸਰੀਰਾ ਕਿਚ੍ਛੇਨ ਕੋਸਮ੍ਬਿਂ ਪਤ੍ਵਾ ਉਦਕਫਾਸੁਕਟ੍ਠਾਨੇ ਠਤ੍ਵਾ ਨ੍ਹਤ੍ਵਾ ਨਗਰਦ੍ਵਾਰੇ ਏਕਂ ਸਾਲਂ ਪਵਿਸਿਂਸੁ.

ਤਤੋ ਸੇਟ੍ਠਿ ਭਰਿਯਂ ਆਹ – ‘‘ਭਦ੍ਦੇ, ਇਮਿਨਾ ਨੀਹਾਰੇਨ ਗਚ੍ਛਨ੍ਤਾ ਵਿਜਾਤਮਾਤੁਯਾਪਿ ਅਮਨਾਪਾ ਹੋਨ੍ਤਿ, ਸਹਾਯਕੋ ਕਿਰ ਮੇ ਅਦ੍ਧਿਕਕਪਣਾਦੀਨਂ ਦੇਵਸਿਕਂ ਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਦਾਨਂ ਦਾਪੇਸਿ. ਤਤ੍ਥ ਧੀਤਰਂ ਪੇਸੇਤ੍ਵਾ ਆਹਾਰਂ ਆਹਰਾਪੇਤ੍ਵਾ ਏਕਾਹਂ ਦ੍ਵੀਹਂ ਇਧੇਵ ਸਰੀਰਂ ਸਨ੍ਤਪ੍ਪੇਤ੍ਵਾ ਸਹਾਯਕਂ ਪਸ੍ਸਿਸ੍ਸਾਮਾ’’ਤਿ. ਸਾ ‘‘ਸਾਧੁ, ਸਾਮੀ’’ਤਿ. ਤੇ ਸਾਲਾਯਮੇਵ ਵਸਿਂਸੁ. ਪੁਨਦਿਵਸੇ ਕਾਲੇ ਆਰੋਚਿਤੇ ਕਪਣਦ੍ਧਿਕਾਦੀਸੁ ਆਹਾਰਤ੍ਥਾਯ ਗਚ੍ਛਨ੍ਤੇਸੁ ਮਾਤਾਪਿਤਰੋ, ‘‘ਅਮ੍ਮ, ਗਨ੍ਤ੍ਵਾ ਅਮ੍ਹਾਕਂ ਆਹਾਰਂ ਆਹਰਾ’’ਤਿ ਧੀਤਰਂ ਪੇਸਯਿਂਸੁ. ਮਹਾਭੋਗਕੁਲਸ੍ਸ ਧੀਤਾ ਵਿਪਤ੍ਤਿਯਾ ਅਚ੍ਛਿਨ੍ਨਲਜ੍ਜਿਤਾਯ ਅਲਜ੍ਜਮਾਨਾ ਪਾਤਿਂ ਗਹੇਤ੍ਵਾ ਕਪਣਜਨੇਨ ਸਦ੍ਧਿਂ ਆਹਾਰਤ੍ਥਾਯ ਗਨ੍ਤ੍ਵਾ ‘‘ਕਤਿ ਪਟਿਵੀਸੇ ਗਣ੍ਹਿਸ੍ਸਸਿ, ਅਮ੍ਮਾ’’ਤਿ ਪੁਟ੍ਠਾ ਚ ਪਨ ‘‘ਤਯੋ’’ਤਿ ਆਹ. ਅਥਸ੍ਸਾ ਤਯੋ ਪਟਿਵੀਸੇ ਅਦਾਸਿ. ਤਾਯ ਭਤ੍ਤੇ ਆਹਟੇ ਤਯੋਪਿ ਏਕਤੋ ਭੁਞ੍ਜਿਤੁਂ ਨਿਸੀਦਿਂਸੁ.

ਅਥ ਮਾਤਾਧੀਤਰੋ ਸੇਟ੍ਠਿਂ ਆਹਂਸੁ – ‘‘ਸਾਮਿ, ਵਿਪਤ੍ਤਿ ਨਾਮ ਮਹਾਕੁਲਾਨਮ੍ਪਿ ਉਪ੍ਪਜ੍ਜਤਿ, ਮਾ ਅਮ੍ਹੇ ਓਲੋਕੇਤ੍ਵਾ ਭੁਞ੍ਜ, ਮਾ ਚਿਨ੍ਤਯੀ’’ਤਿ. ਇਤਿ ਨਂ ਨਾਨਪ੍ਪਕਾਰੇਹਿ ਯਾਚਿਤ੍ਵਾ ਭੋਜੇਸੁਂ. ਸੋ ਭੁਞ੍ਜਿਤ੍ਵਾ ਆਹਾਰਂ ਜੀਰਾਪੇਤੁਂ ਅਸਕ੍ਕੋਨ੍ਤੋ ਅਰੁਣੇ ਉਗ੍ਗਚ੍ਛਨ੍ਤੇ ਕਾਲਮਕਾਸਿ. ਮਾਤਾਧੀਤਰੋ ਨਾਨਪ੍ਪਕਾਰੇਹਿ ਪਰਿਦੇਵਿਤ੍ਵਾ ਰੋਦਿਂਸੁ. ਕੁਮਾਰਿਕਾ ਪੁਨਦਿਵਸੇ ਰੋਦਮਾਨਾ ਆਹਾਰਤ੍ਥਾਯ ਗਨ੍ਤ੍ਵਾ, ‘‘ਕਤਿ ਪਟਿਵੀਸੇ ਗਣ੍ਹਿਸ੍ਸਸੀ’’ਤਿ ਵੁਤ੍ਤਾ, ‘‘ਦ੍ਵੇ’’ਤਿ ਵਤ੍ਵਾ ਆਹਾਰਂ ਆਹਰਿਤ੍ਵਾ ਮਾਤਰਂ ਯਾਚਿਤ੍ਵਾ ਭੋਜੇਸਿ. ਸਾਪਿ ਤਾਯ ਯਾਚਿਯਮਾਨਾ ਭੁਞ੍ਜਿਤ੍ਵਾ ਆਹਾਰਂ ਜੀਰਾਪੇਤੁਂ ਅਸਕ੍ਕੋਨ੍ਤੀ ਤਂ ਦਿਵਸਮੇਵ ਕਾਲਮਕਾਸਿ. ਕੁਮਾਰਿਕਾ ਏਕਿਕਾਵ ਰੋਦਿਤ੍ਵਾ ਪਰਿਦੇਵਿਤ੍ਵਾ ਤਾਯ ਦੁਕ੍ਖੁਪ੍ਪਤ੍ਤਿਯਾ ਅਤਿਵਿਯ ਸਞ੍ਜਾਤਛਾਤਕਦੁਕ੍ਖਾ ਪੁਨਦਿਵਸੇ ਯਾਚਕੇਹਿ ਸਦ੍ਧਿਂ ਰੋਦਨ੍ਤੀ ਆਹਾਰਤ੍ਥਾਯ ਗਨ੍ਤ੍ਵਾ, ‘‘ਕਤਿ ਪਟਿਵੀਸੇ ਗਣ੍ਹਿਸ੍ਸਸਿ, ਅਮ੍ਮਾ’’ਤਿ ਵੁਤ੍ਤਾ ‘‘ਏਕ’’ਨ੍ਤਿ ਆਹ. ਮਿਤ੍ਤਕੁਟੁਮ੍ਬਿਕੋ ਤਂ ਤਯੋ ਦਿਵਸੇ ਭਤ੍ਤਂ ਗਣ੍ਹਨ੍ਤਿਂ ਸਞ੍ਜਾਨਾਤਿ, ਤੇਨ ਤਂ ‘‘ਅਪੇਹਿ ਨਸ੍ਸ, ਵਸਲਿ, ਅਜ੍ਜ ਤਵ ਕੁਚ੍ਛਿਪ੍ਪਮਾਣਂ ਅਞ੍ਞਾਸੀ’’ਤਿ ਆਹ. ਹਿਰੋਤ੍ਤਪ੍ਪਸਮ੍ਪਨ੍ਨਾ ਕੁਲਧੀਤਾ ਪਚ੍ਚੋਰਸ੍ਮਿਂ ਸਤ੍ਤਿਪਹਾਰਂ ਵਿਯ ਵਣੇ ਖਾਰੋਦਕਸੇਚਨਕਂ ਵਿਯ ਚ ਪਤ੍ਵਾ ‘‘ਕਿਂ, ਸਾਮੀ’’ਤਿ ਆਹ. ‘‘ਤਯਾ ਪੁਰੇ ਤਯੋ ਕੋਟ੍ਠਾਸਾ ਗਹਿਤਾ, ਹਿਯ੍ਯੋ ਦ੍ਵੇ, ਅਜ੍ਜ ਏਕਂ ਗਣ੍ਹਾਸਿ. ਅਜ੍ਜ ਤੇ ਅਤ੍ਤਨੋ ਕੁਚ੍ਛਿਪ੍ਪਮਾਣਂ ਞਾਤ’’ਨ੍ਤਿ. ‘‘ਮਾ ਮਂ, ਸਾਮਿ, ‘ਅਤ੍ਤਨੋਵ ਅਤ੍ਥਾਯ ਗਣ੍ਹੀ’ਤਿ ਮਞ੍ਞਿਤ੍ਥਾ’’ਤਿ. ‘‘ਅਥ ਕਸ੍ਮਾ ਏਵਂ ਗਣ੍ਹੀ’’ਤਿ? ‘‘ਪੁਰੇ ਤਯੋ ਜਨਾ ਅਹੁਮ੍ਹ, ਸਾਮਿ, ਹਿਯ੍ਯੋ ਦ੍ਵੇ, ਅਜ੍ਜ ਏਕਿਕਾਵ ਜਾਤਾਮ੍ਹੀ’’ਤਿ. ਸੋ ‘‘ਕੇਨ ਕਾਰਣੇਨਾ’’ਤਿ ਪੁਚ੍ਛਿਤ੍ਵਾ ਆਦਿਤੋ ਪਟ੍ਠਾਯ ਤਾਯ ਕਥਿਤਂ ਸਬ੍ਬਂ ਪਵਤ੍ਤਿਂ ਸੁਤ੍ਵਾ ਅਸ੍ਸੂਨਿ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਸਞ੍ਜਾਤਬਲਵਦੋਮਨਸ੍ਸੋ ਹੁਤ੍ਵਾ, ‘‘ਅਮ੍ਮ, ਏਵਂ ਸਨ੍ਤੇ ਮਾ ਚਿਨ੍ਤਯਿ, ਤ੍ਵਂ ਭਦ੍ਦਵਤਿਯਸੇਟ੍ਠਿਨੋ ਧੀਤਾ ਅਜ੍ਜਕਾਲਤੋ ਪਟ੍ਠਾਯ ਮਮ ਧੀਤਾਯੇਵ ਨਾਮਾ’’ਤਿ ਵਤ੍ਵਾ ਸੀਸੇ ਚੁਮ੍ਬਿਤ੍ਵਾ ਘਰਂ ਨੇਤ੍ਵਾ ਅਤ੍ਤਨੋ ਜੇਟ੍ਠਧੀਤੁਟ੍ਠਾਨੇ ਠਪੇਸਿ.

ਸਾ ਦਾਨਗ੍ਗੇ ਉਚ੍ਚਾਸਦ੍ਦਂ ਮਹਾਸਦ੍ਦਂ ਸੁਤ੍ਵਾ, ‘‘ਤਾਤ, ਕਸ੍ਮਾ ਏਤਂ ਜਨਂ ਨਿਸ੍ਸਦ੍ਦਂ ਕਤ੍ਵਾ ਦਾਨਂ ਨ ਦੇਥਾ’’ਤਿ ਆਹ. ‘‘ਨ ਸਕ੍ਕਾ ਕਾਤੁਂ, ਅਮ੍ਮਾ’’ਤਿ. ‘‘ਸਕ੍ਕਾ, ਤਾਤਾ’’ਤਿ. ‘‘ਕਥਂ ਸਕ੍ਕਾ, ਅਮ੍ਮਾ’’ਤਿ? ‘‘ਤਾਤ ਦਾਨਗ੍ਗਂ ਪਰਿਕ੍ਖਿਪਿਤ੍ਵਾ ਏਕੇਕਸ੍ਸੇਵ ਪਵੇਸਨਪ੍ਪਮਾਣੇਨ ਦ੍ਵੇ ਦ੍ਵਾਰਾਨਿ ਯੋਜੇਤ੍ਵਾ, ‘ਏਕੇਨ ਦ੍ਵਾਰੇਨ ਪਵਿਸਿਤ੍ਵਾ ਏਕੇਨ ਨਿਕ੍ਖਮਥਾ’ਤਿ ਵਦੇਥ, ਏਵਂ ਨਿਸ੍ਸਦ੍ਦਾ ਹੁਤ੍ਵਾਵ ਗਣ੍ਹਿਸ੍ਸਨ੍ਤੀ’’ਤਿ. ਸੋ ਤਂ ਸੁਤ੍ਵਾ, ‘‘ਭਦ੍ਦਕੋਵ, ਅਮ੍ਮ, ਉਪਾਯੋ’’ਤਿ ਤਥਾ ਕਾਰੇਸਿ. ਸਾਪਿ ਪੁਬ੍ਬੇ ਸਾਮਾ ਨਾਮ. ਵਤਿਯਾ ਪਨ ਕਾਰਿਤਤ੍ਤਾ ਸਾਮਾਵਤੀ ਨਾਮ ਜਾਤਾ. ਤਤੋ ਪਟ੍ਠਾਯ ਦਾਨਗ੍ਗੇ ਕੋਲਾਹਲਂ ਪਚ੍ਛਿਨ੍ਦੀ. ਘੋਸਕਸੇਟ੍ਠਿ ਪੁਬ੍ਬੇ ਤਂ ਸਦ੍ਦਂ ਸੁਣਨ੍ਤੋ ‘‘ਮਯ੍ਹਂ ਦਾਨਗ੍ਗੇ ਸਦ੍ਦੋ’’ਤਿ ਤੁਸ੍ਸਤਿ. ਦ੍ਵੀਹਤੀਹਂ ਪਨ ਸਦ੍ਦਂ ਅਸੁਣਨ੍ਤੋ ਮਿਤ੍ਤਕੁਟੁਮ੍ਬਿਕਂ ਅਤ੍ਤਨੋ ਉਪਟ੍ਠਾਨਂ ਆਗਤਂ ਪੁਚ੍ਛਿ – ‘‘ਦਿਯ੍ਯਤਿ ਕਪਣਦ੍ਧਿਕਾਦੀਨਂ ਦਾਨ’’ਨ੍ਤਿ? ‘‘ਆਮ, ਸਾਮੀ’’ਤਿ. ‘‘ਅਥ ਕਿਂ ਦ੍ਵੀਹਤੀਹਂ ਸਦ੍ਦੋ ਨ ਸੁਯ੍ਯਤੀ’’ਤਿ? ‘‘ਯਥਾ ਨਿਸ੍ਸਦ੍ਦਾ ਹੁਤ੍ਵਾ ਗਣ੍ਹਨ੍ਤਿ, ਤਥਾ ਮੇ ਉਪਾਯੋ ਕਤੋ’’ਤਿ. ‘‘ਅਥ ਪੁਬ੍ਬੇਵ ਕਸ੍ਮਾ ਨਾਕਾਸੀ’’ਤਿ? ‘‘ਅਜਾਨਨਤਾਯ, ਸਾਮੀ’’ਤਿ. ‘‘ਇਦਾਨਿ ਕਥਂ ਤੇ ਞਾਤੋ’’ਤਿ? ‘‘ਧੀਤਰਾ ਮੇ ਅਕ੍ਖਾਤੋ, ਸਾਮੀ’’ਤਿ. ਮਯ੍ਹਂ ਅਵਿਦਿਤਾ ‘‘ਤਵ ਧੀਤਾ ਨਾਮ ਅਤ੍ਥੀ’’ਤਿ. ਸੋ ਅਹਿਵਾਤਰੋਗੁਪ੍ਪਤ੍ਤਿਤੋ ਪਟ੍ਠਾਯ ਸਬ੍ਬਂ ਭਦ੍ਦਵਤਿਯਸੇਟ੍ਠਿਨੋ ਪਵਤ੍ਤਿਂ ਆਚਿਕ੍ਖਿਤ੍ਵਾ ਤਸ੍ਸਾ ਅਤ੍ਤਨੋ ਜੇਟ੍ਠਧੀਤੁਟ੍ਠਾਨੇ ਠਪਿਤਭਾਵਂ ਆਰੋਚੇਸਿ. ਅਥ ਨਂ ਸੇਟ੍ਠਿ ‘‘ਏਵਂ ਸਨ੍ਤੇ ਮਮ ਕਸ੍ਮਾ ਨ ਕਥੇਸਿ, ਮਮ ਸਹਾਯਕਸ੍ਸ ਧੀਤਾ ਮਮ ਧੀਤਾ ਨਾਮਾ’’ਤਿ ਤਂ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਅਮ੍ਮ, ਸੇਟ੍ਠਿਨੋ ਧੀਤਾਸੀ’’ਤਿ? ‘‘ਆਮ, ਤਾਤਾ’’ਤਿ. ‘‘ਤੇਨ ਹਿ ਮਾ ਚਿਨ੍ਤਯਿ, ਤ੍ਵਂ ਮਮ ਧੀਤਾਸੀ’’ਤਿ ਤਂ ਸੀਸੇ ਚੁਮ੍ਬਿਤ੍ਵਾ ਪਰਿਵਾਰਤ੍ਥਾਯ ਤਸ੍ਸਾ ਪਞ੍ਚ ਇਤ੍ਥਿਸਤਾਨਿ ਦਤ੍ਵਾ ਤਂ ਅਤ੍ਤਨੋ ਜੇਟ੍ਠਧੀਤੁਟ੍ਠਾਨੇ ਠਪੇਸਿ.

ਅਥੇਕਦਿਵਸਂ ਤਸ੍ਮਿਂ ਨਗਰੇ ਨਕ੍ਖਤ੍ਤਂ ਸਙ੍ਘੁਟ੍ਠਂ ਹੋਤਿ. ਤਸ੍ਮਿਂ ਪਨ ਨਕ੍ਖਤ੍ਤੇ ਬਹਿ ਅਨਿਕ੍ਖਮਨਕਾ ਕੁਲਧੀਤਰੋਪਿ ਅਤ੍ਤਨੋ ਪਰਿਵਾਰੇਨ ਸਦ੍ਧਿਂ ਪਦਸਾਵ ਨਦਿਂ ਗਨ੍ਤ੍ਵਾ ਨ੍ਹਾਯਨ੍ਤਿ. ਤਸ੍ਮਾ ਤਂ ਦਿਵਸਂ ਸਾਮਾਵਤੀਪਿ ਪਞ੍ਚਹਿ ਇਤ੍ਥਿਸਤੇਹਿ ਪਰਿਵਾਰਿਤਾ ਰਾਜਙ੍ਗਣੇਨੇਵ ਨ੍ਹਾਯਿਤੁਂ ਅਗਮਾਸਿ. ਉਤੇਨੋ ਸੀਹਪਞ੍ਜਰੇ ਠਿਤੋ ਤਂ ਦਿਸ੍ਵਾ ‘‘ਕਸ੍ਸਿਮਾ ਨਾਟਕਿਤ੍ਥਿਯੋ’’ਤਿ ਪੁਚ੍ਛਿ. ‘‘ਨ ਕਸ੍ਸਚਿ ਨਾਟਕਿਤ੍ਥਿਯੋ, ਦੇਵਾ’’ਤਿ. ‘‘ਅਥ ਕਸ੍ਸ ਧੀਤਰੋ’’ਤਿ? ‘‘ਘੋਸਕਸੇਟ੍ਠਿਨੋ ਧੀਤਾ ਦੇਵ, ਸਾਮਾਵਤੀ ਨਾਮੇਸਾ’’ਤਿ. ਸੋ ਦਿਸ੍ਵਾਵ ਉਪ੍ਪਨ੍ਨਸਿਨੇਹੋ ਸੇਟ੍ਠਿਨੋ ਸਾਸਨਂ ਪਾਹੇਸਿ – ‘‘ਧੀਤਰਂ ਕਿਰ ਮੇ ਪੇਸੇਤੂ’’ਤਿ. ‘‘ਨ ਪੇਸੇਮਿ, ਦੇਵਾ’’ਤਿ. ‘‘ਮਾ ਕਿਰ ਏਵਂ ਕਰੋਤੁ, ਪੇਸੇਤੁਯੇਵਾ’’ਤਿ. ‘‘ਮਯਂ ਗਹਪਤਿਕਾ ਨਾਮ ਕੁਮਾਰਿਕਾਨਂ ਪੋਥੇਤ੍ਵਾ ਵਿਹੇਠੇਤ੍ਵਾ ਕਡ੍ਢਨਭਯੇਨ ਨ ਦੇਮ, ਦੇਵਾ’’ਤਿ. ਰਾਜਾ ਕੁਜ੍ਝਿਤ੍ਵਾ ਗੇਹਂ ਲਞ੍ਛਾਪੇਤ੍ਵਾ ਸੇਟ੍ਠਿਞ੍ਚ ਭਰਿਯਞ੍ਚ ਹਤ੍ਥੇ ਗਹੇਤ੍ਵਾ ਬਹਿ ਕਾਰਾਪੇਸਿ. ਸਾਮਾਵਤੀ, ਨ੍ਹਾਯਿਤ੍ਵਾ ਆਗਨ੍ਤ੍ਵਾ ਗੇਹਂ ਪਵਿਸਿਤੁਂ ਓਕਾਸਂ ਅਲਭਨ੍ਤੀ, ‘‘ਕਿਂ ਏਤਂ, ਤਾਤਾ’’ਤਿ ਪੁਚ੍ਛਿ. ‘‘ਅਮ੍ਮ, ਰਾਜਾ ਤਵ ਕਾਰਣਾ ਪਹਿਣਿ. ਅਥ ‘ਨ ਮਯਂ ਦਸ੍ਸਾਮਾ’ਤਿ ਵੁਤ੍ਤੇ ਘਰਂ ਲਞ੍ਛਾਪੇਤ੍ਵਾ ਅਮ੍ਹੇ ਬਹਿ ਕਾਰਾਪੇਸੀ’’ਤਿ. ‘‘ਤਾਤ, ਭਾਰਿਯਂ ਵੋ ਕਮ੍ਮਂ ਕਤਂ, ਰਞ੍ਞਾ ਨਾਮ ਪਹਿਤੇ ‘ਨ, ਦੇਮਾ’ਤਿ ਅਵਤ੍ਵਾ ‘ਸਚੇ ਮੇ ਧੀਤਰਂ ਸਪਰਿਵਾਰਂ ਗਣ੍ਹਥ, ਦੇਮਾ’ਤਿ ਵਤ੍ਤਬ੍ਬਂ ਭਵੇਯ੍ਯ, ਤਾਤਾ’’ਤਿ. ‘‘ਸਾਧੁ, ਅਮ੍ਮ, ਤਵ ਰੁਚਿਯਾ ਸਤਿ ਏਵਂ ਕਰਿਸ੍ਸਾਮੀ’’ਤਿ ਰਞ੍ਞੋ ਤਥਾ ਸਾਸਨਂ ਪਾਹੇਸਿ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਂ ਸਪਰਿਵਾਰਂ ਆਨੇਤ੍ਵਾ ਅਭਿਸਿਞ੍ਚਿਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸੇਸਾ ਤਸ੍ਸਾਯੇਵ ਪਰਿਵਾਰਿਤ੍ਥਿਯੋ ਅਹੇਸੁਂ. ਅਯਂ ਸਾਮਾਵਤਿਯਾ ਉਪ੍ਪਤ੍ਤਿ.

ਉਤੇਨਸ੍ਸ ਪਨ ਅਪਰਾਪਿ ਵਾਸੁਲਦਤ੍ਤਾ ਨਾਮ ਦੇਵੀ ਅਹੋਸਿ ਚਣ੍ਡਪਜ੍ਜੋਤਸ੍ਸ ਧੀਤਾ. ਉਜ੍ਜੇਨਿਯਞ੍ਹਿ ਚਣ੍ਡਪਜ੍ਜੋਤੋ ਨਾਮ ਰਾਜਾ ਅਹੋਸਿ. ਸੋ ਏਕਦਿਵਸਂ ਉਯ੍ਯਾਨਤੋ ਆਗਚ੍ਛਨ੍ਤੋ ਅਤ੍ਤਨੋ ਸਮ੍ਪਤ੍ਤਿਂ ਓਲੋਕੇਤ੍ਵਾ, ‘‘ਅਤ੍ਥਿ ਨੁ ਖੋ ਅਞ੍ਞਸ੍ਸਪਿ ਕਸ੍ਸਚਿ ਏਵਰੂਪਾ ਸਮ੍ਪਤ੍ਤੀ’’ਤਿ ਵਤ੍ਵਾ ਤਂ ਸੁਤ੍ਵਾ ਮਨੁਸ੍ਸੇਹਿ ‘‘ਕਿਂ ਸਮ੍ਪਤ੍ਤਿ ਨਾਮੇਸਾ, ਕੋਸਮ੍ਬਿਯਂ ਉਤੇਨਸ੍ਸ ਰਞ੍ਞੋ ਅਤਿਮਹਤੀ ਸਮ੍ਪਤੀ’’ਤਿ ਵੁਤ੍ਤੇ ਰਾਜਾ ਆਹ – ‘‘ਤੇਨ ਹਿ ਗਣ੍ਹਿਸ੍ਸਾਮ ਨ’’ਨ੍ਤਿ? ‘‘ਨ ਸਕ੍ਕਾ ਸੋ ਗਹੇਤੁ’’ਨ੍ਤਿ. ‘‘ਕਿਞ੍ਚਿ ਕਤ੍ਵਾ ਗਣ੍ਹਿਸ੍ਸਾਮਯੇਵਾ’’ਤਿ? ‘‘ਨ ਸਕ੍ਕਾ ਦੇਵਾ’’ਤਿ. ‘‘ਕਿਂ ਕਾਰਣਾ’’ਤਿ? ‘‘ਸੋ ਹਤ੍ਥਿਕਨ੍ਤਂ ਨਾਮ ਸਿਪ੍ਪਂ ਜਾਨਾਤਿ, ਮਨ੍ਤਂ ਪਰਿਵਤ੍ਤੇਤ੍ਵਾ ਹਤ੍ਥਿਕਨ੍ਤਵੀਣਂ ਵਾਦੇਨ੍ਤੋ ਨਾਗੇ ਪਲਾਪੇਤਿਪਿ ਗਣ੍ਹਾਤਿਪਿ. ਹਤ੍ਥਿਵਾਹਨਸਮ੍ਪਨ੍ਨੋ ਤੇਨ ਸਦਿਸੋ ਨਾਮ ਨਤ੍ਥੀ’’ਤਿ. ‘‘ਨ ਸਕ੍ਕਾ ਮਯਾ ਸੋ ਗਹੇਤੁ’’ਨ੍ਤਿ. ‘‘ਸਚੇ ਤੇ, ਦੇਵ, ਏਕਨ੍ਤੇਨ ਅਯਂ ਨਿਚ੍ਛਯੋ, ਤੇਨ ਹਿ ਦਾਰੁਹਤ੍ਥਿਂ ਕਾਰੇਤ੍ਵਾ ਤਸ੍ਸਾਸਨ੍ਨਟ੍ਠਾਨਂ ਪੇਸੇਹਿ. ਸੋ ਹਤ੍ਥਿਵਾਹਨਂ ਵਾ ਅਸ੍ਸਵਾਹਨਂ ਵਾ ਸੁਤ੍ਵਾ ਦੂਰਮ੍ਪਿ ਗਚ੍ਛਤਿ. ਤਤ੍ਥ ਨਂ ਆਗਤਂ ਗਹੇਤੁਂ ਸਕ੍ਕਾ ਭਵਿਸ੍ਸਤੀ’’ਤਿ.

ਰਾਜਾ ‘‘ਅਤ੍ਥੇਸੋ ਉਪਾਯੋ’’ਤਿ ਦਾਰੁਮਯਂ ਯਨ੍ਤਹਤ੍ਥਿਂ ਕਾਰਾਪੇਤ੍ਵਾ ਬਹਿ ਪਿਲੋਤਿਕਾਹਿ ਵੇਠੇਤ੍ਵਾ ਕਤਚਿਤ੍ਤਕਮ੍ਮਂ ਕਤ੍ਵਾ ਤਸ੍ਸ ਵਿਜਿਤੇ ਆਸਨ੍ਨਟ੍ਠਾਨੇ ਏਕਸ੍ਮਿਂ ਸਰਤੀਰੇ ਵਿਸ੍ਸਜ੍ਜਾਪੇਸਿ. ਹਤ੍ਥਿਨੋ ਅਨ੍ਤੋਕੁਚ੍ਛਿਯਂ ਸਟ੍ਠਿ ਪੁਰਿਸਾ ਅਪਰਾਪਰਂ ਚਙ੍ਕਮਨ੍ਤਿ, ਹਤ੍ਥਿਲਣ੍ਡਂ ਆਹਰਿਤ੍ਵਾ ਤਤ੍ਥ ਤਤ੍ਥ ਛਡ੍ਡੇਸੁਂ. ਏਕੋ ਵਨਚਰਕੋ ਹਤ੍ਥਿਂ ਦਿਸ੍ਵਾ, ‘‘ਅਮ੍ਹਾਕਂ ਰਞ੍ਞੋ ਅਨੁਚ੍ਛਵਿਕੋ’’ਤਿ ਚਿਨ੍ਤੇਤ੍ਵਾ, ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ – ‘‘ਦੇਵ, ਮਯਾ ਸਬ੍ਬਸੇਤੋ ਕੇਲਾਸਕੂਟਪਟਿਭਾਗੋ ਤੁਮ੍ਹਾਕਞ੍ਞੇਵ ਅਨੁਚ੍ਛਵਿਕੋ ਵਰਵਾਰਣੋ ਦਿਟ੍ਠੋ’’ਤਿ. ਉਤੇਨੋ ਤਮੇਵ ਮਗ੍ਗਦੇਸਕਂ ਕਤ੍ਵਾ ਹਤ੍ਥਿਂ ਅਭਿਰੁਯ੍ਹ ਸਪਰਿਵਾਰੋ ਨਿਕ੍ਖਮਿ. ਤਸ੍ਸ ਆਗਮਨਂ ਞਤ੍ਵਾ ਚਰਪੁਰਿਸਾ ਗਨ੍ਤ੍ਵਾ ਚਣ੍ਡਪਜ੍ਜੋਤਸ੍ਸ ਆਰੋਚੇਸੁਂ. ਸੋ ਆਗਨ੍ਤ੍ਵਾ ਮਜ੍ਝੇ ਤੁਚ੍ਛਂ ਕਤ੍ਵਾ ਉਭੋਸੁ ਪਸ੍ਸੇਸੁ ਬਲਕਾਯਂ ਪਯੋਜੇਸਿ. ਉਤੇਨੋ ਤਸ੍ਸਾਗਮਨਂ ਅਜਾਨਨ੍ਤੋ ਹਤ੍ਥਿਂ ਅਨੁਬਨ੍ਧਿ. ਅਨ੍ਤੋ ਠਿਤਮਨੁਸ੍ਸਾ ਵੇਗੇਨ ਪਲਾਪੇਸੁਂ. ਕਟ੍ਠਹਤ੍ਥੀ ਰਞ੍ਞੋ ਮਨ੍ਤਂ ਪਰਿਵਤ੍ਤੇਤ੍ਵਾ ਵੀਣਂ ਵਾਦੇਨ੍ਤਸ੍ਸ ਤਨ੍ਤਿਸਦ੍ਦਂ ਅਸੁਣਨ੍ਤੋ ਵਿਯ ਪਲਾਯਤਿਯੇਵ. ਰਾਜਾ ਹਤ੍ਥਿਨਾਗਂ ਪਾਪੁਣਿਤੁਂ ਅਸਕ੍ਕੋਨ੍ਤੋ ਅਸ੍ਸਂ ਆਰੁਯ੍ਹ ਅਨੁਬਨ੍ਧਿ. ਤਸ੍ਮਿਂ ਵੇਗੇਨ ਅਨੁਬਨ੍ਧਨ੍ਤੇ ਬਲਕਾਯੋ ਓਹੀਯਿ. ਰਾਜਾ ਏਕਕੋਵ ਅਹੋਸਿ. ਅਥ ਨਂ ਉਭੋਸੁ ਪਸ੍ਸੇਸੁ ਪਯੁਤ੍ਤਾ ਚਣ੍ਡਪਜ੍ਜੋਤਸ੍ਸ ਪੁਰਿਸਾ ਗਣ੍ਹਿਤ੍ਵਾ ਅਤ੍ਤਨੋ ਰਞ੍ਞੋ ਅਦਂਸੁ. ਅਥਸ੍ਸ ਬਲਕਾਯੋ ਅਮਿਤ੍ਤਵਸਂ ਗਤਭਾਵਂ ਞਤ੍ਵਾ ਬਹਿਨਗਰੇਵ ਖਨ੍ਧਾਵਾਰਂ ਨਿਵੇਸੇਤ੍ਵਾ ਅਚ੍ਛਿ.

ਚਣ੍ਡਪਜ੍ਜੋਤੋਪਿ ਉਤੇਨਂ ਜੀਵਗ੍ਗਾਹਮੇਵ ਗਾਹਾਪੇਤ੍ਵਾ ਏਕਸ੍ਮਿਂ ਚੋਰਗੇਹੇ ਪਕ੍ਖਿਪਿਤ੍ਵਾ ਦ੍ਵਾਰਂ ਪਿਦਹਾਪੇਤ੍ਵਾ ਤਯੋ ਦਿਵਸੇ ਜਯਪਾਨਂ ਪਿਵਿ. ਉਤੇਨੋ ਤਤਿਯਦਿਵਸੇ ਆਰਕ੍ਖਕੇ ਪੁਚ੍ਛਿ – ‘‘ਕਹਂ ਵੋ, ਤਾਤ, ਰਾਜਾ’’ਤਿ? ‘‘‘ਪਚ੍ਚਾਮਿਤ੍ਤੋ ਮੇ ਗਹਿਤੋ’ਤਿ ਜਯਪਾਨਂ ਪਿਵਤੀ’’ਤਿ. ‘‘ਕਾ ਨਾਮੇਸਾ ਮਾਤੁਗਾਮਸ੍ਸ ਵਿਯ ਤੁਮ੍ਹਾਕਂ ਰਞ੍ਞੋ ਕਿਰਿਯਾ, ਨਨੁ ਪਟਿਰਾਜੂਨਂ ਗਹੇਤ੍ਵਾ ਵਿਸ੍ਸਜ੍ਜੇਤੁਂ ਵਾ ਮਾਰੇਤੁਂ ਵਾ ਵਟ੍ਟਤਿ, ਅਮ੍ਹੇ ਦੁਕ੍ਖਂ ਨਿਸੀਦਾਪੇਤ੍ਵਾ ਜਯਪਾਨਂ ਕਿਰ ਪਿਵਤੀ’’ਤਿ. ਤੇ ਗਨ੍ਤ੍ਵਾ ਤਮਤ੍ਥਂ ਰਞ੍ਞੋ ਆਰੋਚੇਸੁਂ. ਸੋ ਆਗਨ੍ਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਏਵਂ ਵਦਸੀ’’ਤਿ ਪੁਚ੍ਛਿ. ‘‘ਆਮ, ਮਹਾਰਾਜਾ’’ਤਿ. ‘‘ਸਾਧੁ ਤਂ ਵਿਸ੍ਸਜ੍ਜੇਸ੍ਸਾਮਿ, ਏਵਰੂਪੋ ਕਿਰ ਤੇ ਮਨ੍ਤੋ ਅਤ੍ਥਿ, ਤਂ ਮਯ੍ਹਂ ਦਸ੍ਸਸੀ’’ਤਿ. ‘‘ਸਾਧੁ ਦਸ੍ਸਾਮਿ, ਗਹਣਸਮਯੇ ਮਂ ਵਨ੍ਦਿਤ੍ਵਾ ਤਂ ਗਣ੍ਹਾਹਿ. ਕਿਂ ਪਨ ਤ੍ਵਂ ਵਨ੍ਦਿਸ੍ਸਸੀ’’ਤਿ? ‘‘ਕ੍ਯਾਹਂ ਤਂ ਵਨ੍ਦਿਸ੍ਸਾਮਿ, ਨ ਵਨ੍ਦਿਸ੍ਸਾਮੀ’’ਤਿ? ‘‘ਅਹਮ੍ਪਿ ਤੇ ਨ ਦਸ੍ਸਾਮੀ’’ਤਿ. ‘‘ਏਵਂ ਸਨ੍ਤੇ ਰਾਜਾਣਂ ਤੇ ਕਰਿਸ੍ਸਾਮੀ’’ਤਿ. ‘‘ਕਰੋਹਿ, ਸਰੀਰਸ੍ਸ ਮੇ ਇਸ੍ਸਰੋ, ਨ ਪਨ ਚਿਤ੍ਤਸ੍ਸਾ’’ਤਿ. ਰਾਜਾ ਤਸ੍ਸ ਸੂਰਗਜ੍ਜਿਤਂ ਸੁਤ੍ਵਾ, ‘‘ਕਥਂ ਨੁ ਖੋ ਇਮਂ ਮਨ੍ਤਂ ਗਣ੍ਹਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਇਮਂ ਮਨ੍ਤਂ ਅਞ੍ਞਂ ਜਾਨਾਪੇਤੁਂ ਨ ਸਕ੍ਕਾ, ਮਮ ਧੀਤਰਂ ਏਤਸ੍ਸ ਸਨ੍ਤਿਕੇ ਉਗ੍ਗਣ੍ਹਾਪੇਤ੍ਵਾ ਅਹਂ ਤਸ੍ਸਾ ਸਨ੍ਤਿਕੇ ਗਣ੍ਹਿਸ੍ਸਾਮੀ’’ਤਿ. ਅਥ ਨਂ ਆਹ – ‘‘ਅਞ੍ਞਸ੍ਸ ਵਨ੍ਦਿਤ੍ਵਾ ਗਣ੍ਹਨ੍ਤਸ੍ਸ ਦਸ੍ਸਸੀ’’ਤਿ. ‘‘ਆਮ, ਮਹਾਰਾਜਾ’’ਤਿ. ‘‘ਤੇਨ ਹਿ ਅਮ੍ਹਾਕਂ ਘਰੇ ਏਕਾ ਖੁਜ੍ਜਾ ਅਤ੍ਥਿ ਤਸ੍ਸਾ ਅਨ੍ਤੋਸਾਣਿਯਂ ਵਨ੍ਦਿਤ੍ਵਾ ਨਿਸਿਨ੍ਨਾਯ ਤ੍ਵਂ ਬਹਿਸਾਣਿਯਂ ਠਿਤੋਵ ਮਨ੍ਤਂ ਵਾਚੇਹੀ’’ਤਿ. ‘‘ਸਾਧੁ, ਮਹਾਰਾਜ, ਖੁਜ੍ਜਾ ਵਾ ਹੋਤੁ ਪੀਠਸਪ੍ਪਿ ਵਾ, ਵਨ੍ਦਨ੍ਤਿਯਾ ਦਸ੍ਸਾਮੀ’’ਤਿ. ਤਤੋ ਰਾਜਾ ਗਨ੍ਤ੍ਵਾ ਧੀਤਰਂ ਵਾਸੁਲਦਤ੍ਤਂ ਆਹ – ‘‘ਅਮ੍ਮ, ਏਕੋ ਸਙ੍ਖਕੁਟ੍ਠੀ ਅਨਗ੍ਘਮਨ੍ਤਂ ਜਾਨਾਤਿ, ਤਂ ਅਞ੍ਞਂ ਜਾਨਾਪੇਤੁਂ ਨ ਸਕ੍ਕਾ. ਤ੍ਵਂ ਅਨ੍ਤੋਸਾਣਿਯਂ ਨਿਸੀਦਿਤ੍ਵਾ ਤਂ ਵਨ੍ਦਿਤ੍ਵਾ ਮਨ੍ਤਂ ਗਣ੍ਹ, ਸੋ ਬਹਿਸਾਣਿਯਂ ਠਤ੍ਵਾ ਤੁਯ੍ਹਂ ਵਾਚੇਸ੍ਸਤਿ. ਤਵ ਸਨ੍ਤਿਕਾ ਅਹਂ ਤਂ ਗਣ੍ਹਿਸ੍ਸਾਮੀ’’ਤਿ.

ਏਵਂ ਸੋ ਤੇਸਂ ਅਞ੍ਞਮਞ੍ਞਂ ਸਨ੍ਥਵਕਰਣਭਯੇਨ ਧੀਤਰਂ ਖੁਜ੍ਜਂ, ਇਤਰਂ ਸਙ੍ਖਕੁਟ੍ਠਿਂ ਕਤ੍ਵਾ ਕਥੇਸਿ. ਸੋ ਤਸ੍ਸਾ ਅਨ੍ਤੋਸਾਣਿਯਂ ਵਨ੍ਦਿਤ੍ਵਾ ਨਿਸਿਨ੍ਨਾਯ ਬਹਿ ਠਿਤੋ ਮਨ੍ਤਂ ਵਾਚੇਸਿ. ਅਥ ਨਂ ਏਕਦਿਵਸਂ ਪੁਨਪ੍ਪੁਨਂ ਵੁਚ੍ਚਮਾਨਮ੍ਪਿ ਮਨ੍ਤਪਦਂ ਵਤ੍ਤੁਂ ਅਸਕ੍ਕੋਨ੍ਤਿਂ ‘‘ਅਰੇ ਖੁਜ੍ਜੇ ਅਤਿਬਹਲੋਟ੍ਠਕਪੋਲਂ ਤੇ ਮੁਖਂ, ਏਵਂ ਨਾਮ ਵਦੇਹੀ’’ਤਿ ਆਹ. ‘‘ਸਾ ਕੁਜ੍ਝਿਤ੍ਵਾ ਅਰੇ ਦੁਟ੍ਠਸਙ੍ਖਕੁਟ੍ਠਿ ਕਿਂ ਵਦੇਸਿ, ਕਿਂ ਮਾਦਿਸਾ ਖੁਜ੍ਜਾ ਨਾਮ ਹੋਤੀ’’ਤਿ? ਸਾਣਿਕਣ੍ਣਂ ਉਕ੍ਖਿਪਿਤ੍ਵਾ ‘‘ਕਾਸਿ ਤ੍ਵ’’ਨ੍ਤਿ ਵੁਤ੍ਤੇ, ‘‘ਰਞ੍ਞੋ ਧੀਤਾ ਵਾਸੁਲਦਤ੍ਤਾ ਨਾਮਾਹ’’ਨ੍ਤਿ ਆਹ. ‘‘ਪਿਤਾ ਤੇ ਤਂ ਮਯ੍ਹਂ ਕਥੇਨ੍ਤੋ ‘ਖੁਜ੍ਜਾ’ਤਿ ਕਥੇਸੀ’’ਤਿ. ‘‘ਮਯ੍ਹਮ੍ਪਿ ਕਥੇਨ੍ਤੋ ਤਂ ਸਙ੍ਖਕੁਟ੍ਠਿਂ ਕਤ੍ਵਾ ਕਥੇਸੀ’’ਤਿ. ਤੇ ਉਭੋਪਿ ‘‘ਤੇਨ ਹਿ ਅਮ੍ਹਾਕਂ ਸਨ੍ਥਵਕਰਣਭਯੇਨ ਕਥਿਤਂ ਭਵਿਸ੍ਸਤੀ’’ਤਿ ਅਨ੍ਤੋਸਾਣਿਯਞ੍ਞੇਵ ਸਨ੍ਥਵਂ ਕਰਿਂਸੁ.

ਤਤੋ ਪਟ੍ਠਾਯ ਮਨ੍ਤਗ੍ਗਹਣਂ ਵਾ ਸਿਪ੍ਪਗ੍ਗਹਣਂ ਵਾ ਨਤ੍ਥਿ. ਰਾਜਾਪਿ ਧੀਤਰਂ ਨਿਚ੍ਚਂ ਪੁਚ੍ਛਤਿ – ‘‘ਸਿਪ੍ਪਂ ਗਣ੍ਹਸਿ, ਅਮ੍ਮਾ’’ਤਿ? ‘‘ਗਣ੍ਹਾਮਿ, ਤਾਤਾ’’ਤਿ. ਅਥ ਨਂ ਏਕਦਿਵਸਂ ਉਤੇਨੋ ਆਹ – ‘‘ਭਦ੍ਦੇ, ਸਾਮਿਕੇਨ ਕਤ੍ਤਬ੍ਬਂ ਨਾਮ ਨੇਵ ਮਾਤਾਪਿਤਰੋ ਨ ਭਾਤੁਭਗਿਨਿਯੋ ਕਾਤੁਂ ਸਕ੍ਕੋਨ੍ਤਿ, ਸਚੇ ਮਯ੍ਹਂ ਜੀਵਿਤਂ ਦਸ੍ਸਸਿ, ਪਞ੍ਚ ਤੇ ਇਤ੍ਥਿਸਤਾਨਿ ਪਰਿਵਾਰਂ ਦਤ੍ਵਾ ਅਗ੍ਗਮਹੇਸਿਟ੍ਠਾਨਂ ਦਸ੍ਸਾਮੀ’’ਤਿ. ‘‘ਸਚੇ ਇਮਸ੍ਮਿਂ ਵਚਨੇ ਪਤਿਟ੍ਠਾਤੁਂ ਸਕ੍ਖਿਸ੍ਸਥ, ਦਸ੍ਸਾਮਿ ਵੋ ਜੀਵਿਤ’’ਨ੍ਤਿ. ‘‘ਸਕ੍ਖਿਸ੍ਸਾਮਿ, ਭਦ੍ਦੇ’’ਤਿ. ਸਾ ‘‘ਸਾਧੁ, ਸਾਮੀ’’ਤਿ ਪਿਤੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਨਂ ਸੋ ਪੁਚ੍ਛਿ – ‘‘ਅਮ੍ਮ, ਨਿਟ੍ਠਿਤਂ ਸਿਪ੍ਪ’’ਨ੍ਤਿ? ‘‘ਨ ਤਾਵ ਨਿਟ੍ਠਿਤਂ, ਤਾਤ, ਸਿਪ੍ਪ’’ਨ੍ਤਿ. ਅਥ ਨਂ ਸੋ ਪੁਚ੍ਛਿ – ‘‘ਕਿਂ, ਅਮ੍ਮਾ’’ਤਿ? ‘‘ਅਮ੍ਹਾਕਂ ਏਕਂ ਦ੍ਵਾਰਞ੍ਚ ਏਕਂ ਵਾਹਨਞ੍ਚ ਲਦ੍ਧੁਂ ਵਟ੍ਟਤਿ, ਤਾਤਾ’’ਤਿ. ‘‘ਇਦਂ ਕਿਂ, ਅਮ੍ਮਾ’’ਤਿ? ‘‘ਤਾਤ, ਰਤ੍ਤਿਂ ਕਿਰ ਤਾਰਕਸਞ੍ਞਾਯ ਮਨ੍ਤਸ੍ਸ ਉਪਚਾਰਤ੍ਥਾਯ ਏਕਂ ਓਸਧਂ ਗਹੇਤਬ੍ਬਂ ਅਤ੍ਥਿ. ਤਸ੍ਮਾ ਅਮ੍ਹਾਕਂ ਵੇਲਾਯ ਵਾ ਅਵੇਲਾਯ ਵਾ ਨਿਕ੍ਖਮਨਕਾਲੇ ਏਕਂ ਦ੍ਵਾਰਞ੍ਚੇਵ ਏਕਂ ਵਾਹਨਞ੍ਚ ਲਦ੍ਧੁਂ ਵਟ੍ਟਤੀ’’ਤਿ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਤੇ ਅਤ੍ਤਨੋ ਅਭਿਰੁਚਿਤਂ ਏਕਂ ਦ੍ਵਾਰਂ ਹਤ੍ਥਗਤਂ ਕਰਿਂਸੁ. ਰਞ੍ਞੋ ਪਨ ਪਞ੍ਚ ਵਾਹਨਾਨਿ ਅਹੇਸੁਂ. ਭਦ੍ਦਵਤੀ ਨਾਮ ਕਰੇਣੁਕਾ ਏਕਦਿਵਸਂ ਪਞ੍ਞਾਸ ਯੋਜਨਾਨਿ ਗਚ੍ਛਤਿ, ਕਾਕੋ ਨਾਮ ਦਾਸੋ ਸਟ੍ਠਿ ਯੋਜਨਾਨਿ ਗਚ੍ਛਤਿ, ਚੇਲਕਟ੍ਠਿ ਚ ਮੁਞ੍ਚਕੇਸੀ ਚਾਤਿ ਦ੍ਵੇ ਅਸ੍ਸਾ ਯੋਜਨਸਤਂ ਗਚ੍ਛਨ੍ਤਿ, ਨਾਲ਼ਾਗਿਰਿ ਹਤ੍ਥੀ ਵੀਸਤਿ ਯੋਜਨਸਤਨ੍ਤਿ.

ਸੋ ਕਿਰ ਰਾਜਾ ਅਨੁਪ੍ਪਨ੍ਨੇ ਬੁਦ੍ਧੇ ਏਕਸ੍ਸ ਇਸ੍ਸਰਸ੍ਸ ਉਪਟ੍ਠਾਕੋ ਅਹੋਸਿ. ਅਥੇਕਦਿਵਸਂ ਇਸ੍ਸਰੇ ਬਹਿਨਗਰਂ ਗਨ੍ਤ੍ਵਾ ਨ੍ਹਤ੍ਵਾ ਆਗਚ੍ਛਨ੍ਤੇ ਏਕੋ ਪਚ੍ਚੇਕਬੁਦ੍ਧੋ ਨਗਰਂ ਪਿਣ੍ਡਾਯ ਪਵਿਸਿਤ੍ਵਾ ਸਕਲਨਗਰਵਾਸੀਨਂ ਮਾਰੇਨ ਆਵਟ੍ਟਿਤਤ੍ਤਾ ਏਕਂ ਭਿਕ੍ਖਾਮ੍ਪਿ ਅਲਭਿਤ੍ਵਾ ਯਥਾਧੋਤੇਨ ਪਤ੍ਤੇਨ ਨਿਕ੍ਖਮਿ. ਅਥ ਨਂ ਨਗਰਦ੍ਵਾਰਂ ਪਤ੍ਤਕਾਲੇ ਮਾਰੋ ਅਞ੍ਞਾਤਕਵੇਸੇਨ ਉਪਸਙ੍ਕਮਿਤ੍ਵਾ, ‘‘ਅਪਿ, ਭਨ੍ਤੇ, ਵੋ ਕਿਞ੍ਚਿ ਲਦ੍ਧ’’ਨ੍ਤਿ ਪੁਚ੍ਛਿ. ‘‘ਕਿਂ ਪਨ ਮੇ ਤ੍ਵਂ ਅਲਭਨਾਕਾਰਂ ਕਰੀ’’ਤਿ? ‘‘ਤੇਨ ਹਿ ਨਿਵਤ੍ਤਿਤ੍ਵਾ ਪੁਨ ਪਵਿਸਥ, ਇਦਾਨਿ ਨ ਕਰਿਸ੍ਸਾਮੀ’’ਤਿ. ‘‘ਨਾਹਂ ਪੁਨ ਨਿਵਤ੍ਤਿਸ੍ਸਾਮੀ’’ਤਿ. ਸਚੇ ਹਿ ਨਿਵਤ੍ਤੇਯ੍ਯ, ਪੁਨ ਸੋ ਸਕਲਨਗਰਵਾਸੀਨਂ ਸਰੀਰੇ ਅਧਿਮੁਞ੍ਚਿਤ੍ਵਾ ਪਾਣਿਂ ਪਹਰਿਤ੍ਵਾ ਹਸਨਕੇਲ਼ਿਂ ਕਰੇਯ੍ਯ. ਪਚ੍ਚੇਕਬੁਦ੍ਧੇ ਅਨਿਵਤ੍ਤਿਤ੍ਵਾ ਗਤੇ ਮਾਰੋ ਤਤ੍ਥੇਵ ਅਨ੍ਤਰਧਾਯਿ. ਅਥ ਸੋ ਇਸ੍ਸਰੋ ਯਥਾਧੋਤੇਨੇਵ ਪਤ੍ਤੇਨ ਆਗਚ੍ਛਨ੍ਤਂ ਪਚ੍ਚੇਕਬੁਦ੍ਧਂ ਦਿਸ੍ਵਾ ਵਨ੍ਦਿਤ੍ਵਾ, ‘‘ਅਪਿ, ਭਨ੍ਤੇ, ਕਿਞ੍ਚਿ ਲਦ੍ਧ’’ਨ੍ਤਿ ਪੁਚ੍ਛਿ. ‘‘ਚਰਿਤ੍ਵਾ ਨਿਕ੍ਖਨ੍ਤਮ੍ਹਾਵੁਸੋ’’ਤਿ. ਸੋ ਚਿਨ੍ਤੇਸਿ – ‘‘ਅਯ੍ਯੋ, ਮਯਾ ਪੁਚ੍ਛਿਤਂ ਅਕਥੇਤ੍ਵਾ ਅਞ੍ਞਂ ਵਦਤਿ, ਨ ਕਿਞ੍ਚਿ ਲਦ੍ਧਂ ਭਵਿਸ੍ਸਤੀ’’ਤਿ. ਅਥਸ੍ਸ ਪਤ੍ਤਂ ਓਲੋਕੇਨ੍ਤੋ ਤੁਚ੍ਛਂ ਦਿਸ੍ਵਾ ਗੇਹੇ ਭਤ੍ਤਸ੍ਸ ਨਿਟ੍ਠਿਤਾਨਿਟ੍ਠਿਤਭਾਵਂ ਅਜਾਨਨਤਾਯ ਸੂਰੋ ਹੁਤ੍ਵਾ ਪਤ੍ਤਂ ਗਹੇਤੁਂ ਅਵਿਸਹਨ੍ਤੋ ‘‘ਥੋਕਂ, ਭਨ੍ਤੇ, ਅਧਿਵਾਸੇਥਾ’’ਤਿ ਵਤ੍ਵਾ ਵੇਗੇਨ ਘਰਂ ਗਨ੍ਤ੍ਵਾ ‘‘ਅਮ੍ਹਾਕਂ ਭਤ੍ਤਂ ਨਿਟ੍ਠਿਤ’’ਨ੍ਤਿ ਪੁਚ੍ਛਿਤ੍ਵਾ, ‘‘ਨਿਟ੍ਠਿਤ’’ਨ੍ਤਿ ਵੁਤ੍ਤੇ ਤਂ ਉਪਟ੍ਠਾਕਂ ਆਹ – ‘‘ਤਾਤ, ਅਞ੍ਞੋ ਤਯਾ ਸਮ੍ਪਨ੍ਨਵੇਗਤਰੋ ਨਾਮ ਨਤ੍ਥਿ, ਸੀਘੇਨ ਜਵੇਨ ਭਦਨ੍ਤਂ ਪਤ੍ਵਾ ‘ਪਤ੍ਤਂ ਮੇ, ਭਨ੍ਤੇ, ਦੇਥਾ’ਤਿ ਵਤ੍ਵਾ ਪਤ੍ਤਂ ਗਹੇਤ੍ਵਾ ਵੇਗੇਨ ਏਹੀ’’ਤਿ. ਸੋ ਏਕਵਚਨੇਨੇਵ ਪਕ੍ਖਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਆਹਰਿ. ਇਸ੍ਸਰੋਪਿ ਅਤ੍ਤਨੋ ਭੋਜਨਸ੍ਸ ਪਤ੍ਤਂ ਪੂਰੇਤ੍ਵਾ ‘‘ਇਮਂ ਸੀਘਂ ਗਨ੍ਤ੍ਵਾ ਅਯ੍ਯਸ੍ਸ ਸਮ੍ਪਾਦੇਹਿ, ਅਹਂ ਤੇ ਇਤੋ ਪਤ੍ਤਿਂ ਦਮ੍ਮੀ’’ਤਿ ਆਹ.

ਸੋਪਿ ਤਂ ਗਹੇਤ੍ਵਾ ਜਵੇਨ ਗਨ੍ਤ੍ਵਾ ਪਚ੍ਚੇਕਬੁਦ੍ਧਸ੍ਸ ਪਤ੍ਤਂ ਦਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ, ‘‘ਭਨ੍ਤੇ, ‘ਵੇਲਾ ਉਪਕਟ੍ਠਾ’ਤਿ ਅਹਂ ਅਤਿਸੀਘੇਨ ਜਵੇਨ ਆਗਤੋ ਚ ਗਤੋ ਚ, ਏਤਸ੍ਸ ਮੇ ਜਵਸ੍ਸ ਫਲੇਨ ਯੋਜਨਾਨਂ ਪਣ੍ਣਾਸਸਟ੍ਠਿਸਤਵੀਸਸਤਗਮਨਸਮਤ੍ਥਾਨਿ ਪਞ੍ਚ ਵਾਹਨਾਨਿ ਨਿਬ੍ਬਤ੍ਤਨ੍ਤੁ, ਆਗਚ੍ਛਨ੍ਤਸ੍ਸ ਚ ਮੇ ਗਚ੍ਛਨ੍ਤਸ੍ਸ ਚ ਸਰੀਰਂ ਸੂਰਿਯਤੇਜੇਨ ਤਤ੍ਥਂ, ਤਸ੍ਸ ਮੇ ਫਲੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਆਣਾ ਸੂਰਿਯਤੇਜਸਦਿਸਾ ਹੋਤੁ, ਇਮਸ੍ਮਿਂ ਮੇ ਪਿਣ੍ਡਪਾਤੇ ਸਾਮਿਨਾ ਪਤ੍ਤਿ ਦਿਨ੍ਨਾ, ਤਸ੍ਸਾ ਮੇ ਨਿਸ੍ਸਨ੍ਦੇਨ ਤੁਮ੍ਹੇਹਿ ਦਿਟ੍ਠਧਮ੍ਮਸ੍ਸ ਭਾਗੀ ਹੋਮੀ’’ਤਿ ਆਹ. ਪਚ੍ਚੇਕਬੁਦ੍ਧੋ ‘‘ਏਵਂ ਹੋਤੂ’’ਤਿ ਵਤ੍ਵਾ –

‘‘ਇਚ੍ਛਿਤਂ ਪਤ੍ਥਿਤਂ ਤੁਯ੍ਹਂ, ਸਬ੍ਬਮੇਵ ਸਮਿਜ੍ਝਤੁ;

ਸਬ੍ਬੇ ਪੂਰੇਨ੍ਤੁ ਸਙ੍ਕਪ੍ਪਾ, ਚਨ੍ਦੋ ਪਨ੍ਨਰਸੋ ਯਥਾ. (ਦੀ. ਨਿ. ਅਟ੍ਠ. ੨.੯੫ ਪੁਬ੍ਬੂਪਨਿਸ੍ਸਯਸਮ੍ਪਤ੍ਤਿਕਥਾ; ਅ. ਨਿ. ਅਟ੍ਠ. ੧.੧. ੧੯੨);

‘‘ਇਚ੍ਛਿਤਂ ਪਤ੍ਥਿਤਂ ਤੁਯ੍ਹਂ, ਖਿਪ੍ਪਮੇਵ ਸਮਿਜ੍ਝਤੁ;

ਸਬ੍ਬੇ ਪੂਰੇਨ੍ਤੁ ਸਙ੍ਕਪ੍ਪਾ, ਮਣਿਜੋਤਿਰਸੋ ਯਥਾ’’ਤਿ. –

ਅਨੁਮੋਦਨਂ ਅਕਾਸਿ. ਪਚ੍ਚੇਕਬੁਦ੍ਧਾਨਂ ਕਿਰ ਇਧਾਵ ਦ੍ਵੇ ਗਾਥਾ ਅਨੁਮੋਦਨਗਾਥਾ ਨਾਮ ਹੋਨ੍ਤਿ. ਤਤ੍ਥ ਜੋਤਿਰਸੋਤਿ ਸਬ੍ਬਕਾਮਦਦਂ ਮਣਿਰਤਨਂ ਵੁਚ੍ਚਤਿ. ਇਦਂ ਤਸ੍ਸ ਪੁਬ੍ਬਚਰਿਤਂ. ਸੋ ਏਤਰਹਿ ਚਣ੍ਡਪਜ੍ਜੋਤੋ ਅਹੋਸਿ. ਤਸ੍ਸ ਚ ਕਮ੍ਮਸ੍ਸ ਨਿਸ੍ਸਨ੍ਦੇਨ ਇਮਾਨਿ ਪਞ੍ਚ ਵਾਹਨਾਨਿ ਨਿਬ੍ਬਤ੍ਤਿਂਸੁ. ਅਥੇਕਦਿਵਸਂ ਰਾਜਾ ਉਯ੍ਯਾਨਕੀਲ਼ਾਯ ਨਿਕ੍ਖਮਿ. ਉਤੇਨੋ ‘‘ਅਜ੍ਜ ਪਲਾਯਿਤਬ੍ਬ’’ਨ੍ਤਿ ਮਹਨ੍ਤਾਮਹਨ੍ਤੇ ਚਮ੍ਮਪਸਿਬ੍ਬਕੇ ਹਿਰਞ੍ਞਸੁਵਣ੍ਣਸ੍ਸ ਪੂਰੇਤ੍ਵਾ ਕਰੇਣੁਕਾਪਿਟ੍ਠੇ ਠਪੇਤ੍ਵਾ ਵਾਸੁਲਦਤ੍ਤਂ ਆਦਾਯ ਪਲਾਯਿ. ਅਨ੍ਤੇਪੁਰਪਾਲਕਾ ਪਲਾਯਨ੍ਤਂ ਤਂ ਦਿਸ੍ਵਾ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਸੀਘਂ ਗਚ੍ਛਥਾ’’ਤਿ ਬਲਂ ਪਹਿਣਿ. ਉਤੇਨੋ ਬਲਸ੍ਸ ਪਕ੍ਖਨ੍ਦਭਾਵਂ ਞਤ੍ਵਾ ਕਹਾਪਣਪਸਿਬ੍ਬਕਂ ਮੋਚੇਤ੍ਵਾ ਪਾਤੇਸਿ, ਮਨੁਸ੍ਸਾ ਕਹਾਪਣੇ ਉਚ੍ਚਿਨਿਤ੍ਵਾ ਪੁਨ ਪਕ੍ਖਨ੍ਦਿਂਸੁ. ਇਤਰੋ ਸੁਵਣ੍ਣਪਸਿਬ੍ਬਕਂ ਮੋਚੇਤ੍ਵਾ ਪਾਤੇਤ੍ਵਾ ਨੇਸਂ ਸੁਵਣ੍ਣਲੋਭੇਨ ਪਪਞ੍ਚੇਨ੍ਤਾਨਞ੍ਞੇਵ ਬਹਿ ਨਿਵੁਟ੍ਠਂ ਅਤ੍ਤਨੋ ਖਨ੍ਧਾਵਾਰਂ ਪਾਪੁਣਿ. ਅਥ ਨਂ ਆਗਚ੍ਛਨ੍ਤਂ ਦਿਸ੍ਵਾਵ ਅਤ੍ਤਨੋ ਬਲਕਾਯੋ ਪਰਿਵਾਰੇਤ੍ਵਾ ਨਗਰਂ ਪਵੇਸੇਸਿ. ਸੋ ਪਤ੍ਵਾਵ ਵਾਸੁਲਦਤ੍ਤਂ ਅਭਿਸਿਞ੍ਚਿਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸੀਤਿ. ਅਯਂ ਵਾਸੁਲਦਤ੍ਤਾਯ ਉਪ੍ਪਤ੍ਤਿ.

ਅਪਰਾ ਪਨ ਮਾਗਣ੍ਡਿਯਾ ਨਾਮ ਰਞ੍ਞੋ ਸਨ੍ਤਿਕਾ ਅਗ੍ਗਮਹੇਸਿਟ੍ਠਾਨਂ ਲਭਿ. ਸਾ ਕਿਰ ਕੁਰੁਰਟ੍ਠੇ ਮਾਗਣ੍ਡਿਯਬ੍ਰਾਹ੍ਮਣਸ੍ਸ ਧੀਤਾ. ਮਾਤਾਪਿਸ੍ਸਾ ਮਾਗਣ੍ਡਿਯਾਯੇਵ ਨਾਮਂ. ਚੂਲ਼ਪਿਤਾਪਿਸ੍ਸਾ ਮਾਗਣ੍ਡਿਯੋਵ, ਸਾ ਅਭਿਰੂਪਾ ਅਹੋਸਿ ਦੇਵਚ੍ਛਰਪਟਿਭਾਗਾ. ਪਿਤਾ ਪਨਸ੍ਸਾ ਅਨੁਚ੍ਛਵਿਕਂ ਸਾਮਿਕਂ ਅਲਭਨ੍ਤੋ ਮਹਨ੍ਤੇਹਿ ਮਹਨ੍ਤੇਹਿ ਕੁਲੇਹਿ ਯਾਚਿਤੋਪਿ ‘‘ਨ ਮਯ੍ਹਂ ਧੀਤੁ ਤੁਮ੍ਹੇ ਅਨੁਚ੍ਛਵਿਕਾ’’ਤਿ ਤਜ੍ਜੇਤ੍ਵਾ ਉਯ੍ਯੋਜੇਸਿ. ਅਥੇਕਦਿਵਸਂ ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤੋ ਮਾਗਣ੍ਡਿਯਬ੍ਰਾਹ੍ਮਣਸ੍ਸ ਸਪਜਾਪਤਿਕਸ੍ਸ ਅਨਾਗਾਮਿਫਲੂਪਨਿਸ੍ਸਯਂ ਦਿਸ੍ਵਾ ਅਤ੍ਤਨੋ ਪਤ੍ਤਚੀਵਰਮਾਦਾਯ ਤਸ੍ਸ ਬਹਿਨਿਗਮੇ ਅਗ੍ਗਿਪਰਿਚਰਣਟ੍ਠਾਨਂ ਅਗਮਾਸਿ. ਸੋ ਤਥਾਗਤਸ੍ਸ ਰੂਪਸੋਭਗ੍ਗਪ੍ਪਤ੍ਤਂ ਅਤ੍ਤਭਾਵਂ ਓਲੋਕੇਤ੍ਵਾ, ‘‘ਇਮਸ੍ਮਿਂ ਲੋਕੇ ਇਮਿਨਾ ਪੁਰਿਸੇਨ ਸਦਿਸੋ ਅਞ੍ਞੋ ਪੁਰਿਸੋ ਨਾਮ ਨਤ੍ਥਿ, ਅਯਂ ਮਯ੍ਹਂ ਧੀਤੁ ਅਨੁਚ੍ਛਵਿਕੋ, ਇਮਸ੍ਸ ਪੋਸਾਪਨਤ੍ਥਾਯ ਧੀਤਰਂ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਸਮਣ, ਏਕਾ ਮੇ ਧੀਤਾ ਅਤ੍ਥਿ, ਅਹਂ ਏਤ੍ਤਕਂ ਕਾਲਂ ਤਸ੍ਸਾ ਅਨੁਚ੍ਛਵਿਕਂ ਪੁਰਿਸਂ ਨ ਪਸ੍ਸਾਮਿ, ਤੁਮ੍ਹੇ ਤਸ੍ਸਾ ਅਨੁਚ੍ਛਵਿਕਾ, ਸਾ ਚ ਤੁਮ੍ਹਾਕਞ੍ਞੇਵ ਅਨੁਚ੍ਛਵਿਕਾ. ਤੁਮ੍ਹਾਕਞ੍ਹਿ ਪਾਦਪਰਿਚਾਰਿਕਾ, ਤਸ੍ਸਾ ਚ ਭਤ੍ਤਾ ਲਦ੍ਧੁਂ ਵਟ੍ਟਤਿ, ਤਂ ਵੋ ਅਹਂ ਦਸ੍ਸਾਮਿ, ਯਾਵ ਮਮਾਗਮਨਾ ਇਧੇਵ ਤਿਟ੍ਠਥਾ’’ਤਿ ਆਹ. ਸਤ੍ਥਾ ਕਿਞ੍ਚਿ ਅਵਤ੍ਵਾ ਤੁਣ੍ਹੀ ਅਹੋਸਿ. ਬ੍ਰਾਹ੍ਮਣੋ ਵੇਗੇਨ ਘਰਂ ਗਨ੍ਤ੍ਵਾ, ‘‘ਭੋਤਿ, ਭੋਤਿ ਧੀਤੁ ਮੇ ਅਨੁਚ੍ਛਵਿਕੋ ਪੁਰਿਸੋ ਦਿਟ੍ਠੋ, ਸੀਘਂ ਸੀਘਂ ਨਂ ਅਲਙ੍ਕਰੋਹੀ’’ਤਿ ਤਂ ਅਲਙ੍ਕਾਰਾਪੇਤ੍ਵਾ ਸਦ੍ਧਿਂ ਬ੍ਰਾਹ੍ਮਣਿਯਾ ਆਦਾਯ ਸਤ੍ਥੁ ਸਨ੍ਤਿਕਂ ਪਾਯਾਸਿ. ਸਕਲਨਗਰਂ ਸਙ੍ਖੁਭਿ. ਅਯਂ ‘‘ਏਤ੍ਤਕਂ ਕਾਲਂ ਮਯ੍ਹਂ ਧੀਤੁ ਅਨੁਚ੍ਛਵਿਕੋ ਨਤ੍ਥੀ’’ਤਿ ਕਸ੍ਸਚਿ ਅਦਤ੍ਵਾ ‘‘ਅਜ੍ਜ ਮੇ ਧੀਤੁ ਅਨੁਚ੍ਛਵਿਕੋ ਦਿਟ੍ਠੋ’’ਤਿ ਕਿਰ ਵਦੇਤਿ, ‘‘ਕੀਦਿਸੋ ਨੁ ਖੋ ਸੋ ਪੁਰਿਸੋ, ਪਸ੍ਸਿਸ੍ਸਾਮ ਨ’’ਨ੍ਤਿ ਮਹਾਜਨੋ ਤੇਨੇਵ ਸਦ੍ਧਿਂ ਨਿਕ੍ਖਮਿ.

ਤਸ੍ਮਿਂ ਧੀਤਰਂ ਗਹੇਤ੍ਵਾ ਆਗਚ੍ਛਨ੍ਤੇ ਸਤ੍ਥਾ ਤੇਨ ਵੁਤ੍ਤਟ੍ਠਾਨੇ ਅਟ੍ਠਤ੍ਵਾ ਤਤ੍ਥ ਪਦਚੇਤਿਯਂ ਦਸ੍ਸੇਤ੍ਵਾ ਗਨ੍ਤ੍ਵਾ ਅਞ੍ਞਸ੍ਮਿਂ ਠਾਨੇ ਅਟ੍ਠਾਸਿ. ਬੁਦ੍ਧਾਨਞ੍ਹਿ ਪਦਚੇਤਿਯਂ ਅਧਿਟ੍ਠਹਿਤ੍ਵਾ ਅਕ੍ਕਨ੍ਤਟ੍ਠਾਨੇਯੇਵ ਪਞ੍ਞਾਯਤਿ, ਨ ਅਞ੍ਞਤ੍ਥ. ਯੇਸਞ੍ਚਤ੍ਥਾਯ ਅਧਿਟ੍ਠਿਤਂ ਹੋਤਿ, ਤੇਯੇਵ ਨਂ ਪਸ੍ਸਨ੍ਤਿ. ਤੇਸਂ ਪਨ ਅਦਸ੍ਸਨਕਰਣਤ੍ਥਂ ਹਤ੍ਥਿਆਦਯੋ ਵਾ ਅਕ੍ਕਮਨ੍ਤੁ, ਮਹਾਮੇਘੋ ਵਾ ਪਵਸ੍ਸਤੁ, ਵੇਰਮ੍ਭਵਾਤਾ ਵਾ ਪਹਰਨ੍ਤੁ, ਨ ਤਂ ਕੋਚਿ ਮਕ੍ਖੇਤੁਂ ਸਕ੍ਕੋਤਿ. ਅਥ ਬ੍ਰਾਹ੍ਮਣੀ ਬ੍ਰਾਹ੍ਮਣਂ ਆਹ – ‘‘ਕੁਹਿਂ ਸੋ ਪੁਰਿਸੋ’’ਤਿ. ‘‘‘ਇਮਸ੍ਮਿਂ ਠਾਨੇ ਤਿਟ੍ਠਾਹੀ’ਤਿ ਨਂ ਅਵਚਂ, ਕੁਹਿਂ ਨੁ ਖੋ ਸੋ ਗਤੋ’’ਤਿ ਇਤੋ ਚਿਤੋ ਓਲੋਕੇਨ੍ਤੋ ਪਦਚੇਤਿਯਂ ਦਿਸ੍ਵਾ ‘‘ਅਯਮਸ੍ਸ ਪਦਵਲਞ੍ਜੋ’’ਤਿ ਆਹ. ਬ੍ਰਾਹ੍ਮਣੀ ਸਲਕ੍ਖਣਮਨ੍ਤਾਨਂ ਤਿਣ੍ਣਂ ਵੇਦਾਨਂ ਪਗੁਣਤਾਯ ਲਕ੍ਖਣਮਨ੍ਤੇ ਪਰਿਵਤ੍ਤੇਤ੍ਵਾ ਪਦਲਕ੍ਖਣਂ ਉਪਧਾਰੇਤ੍ਵਾ, ‘‘ਨਯਿਦਂ, ਬ੍ਰਾਹ੍ਮਣ, ਪਞ੍ਚਕਾਮਗੁਣਸੇਵਿਨੋ ਪਦ’’ਨ੍ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਰਤ੍ਤਸ੍ਸ ਹਿ ਉਕ੍ਕੁਟਿਕਂ ਪਦਂ ਭਵੇ,

ਦੁਟ੍ਠਸ੍ਸ ਹੋਤਿ ਸਹਸਾਨੁਪੀਲ਼ਿਤਂ;

ਮੂਲ਼੍ਹਸ੍ਸ ਹੋਤਿ ਅਵਕਡ੍ਢਿਤਂ ਪਦਂ,

ਵਿਵਟ੍ਟਚ੍ਛਦਸ੍ਸ ਇਦਮੀਦਿਸਂ ਪਦ’’ਨ੍ਤਿ. (ਅ. ਨਿ. ਅਟ੍ਠ. ੧.੧.੨੬੦-੨੬੧; ਵਿਸੁਦ੍ਧਿ. ੧.੪੫);

ਅਥ ਨਂ ਬ੍ਰਾਹ੍ਮਣੋ ਏਵਮਾਹ – ‘‘ਭੋਤਿ ਤ੍ਵਂ ਉਦਕਪਾਤਿਯਂ ਕੁਮ੍ਭੀਲਂ, ਗੇਹਮਜ੍ਝੇ ਚ ਪਨ ਚੋਰਂ ਵਿਯ ਮਨ੍ਤੇ ਪਸ੍ਸਨਸੀਲਾ, ਤੁਣ੍ਹੀ ਹੋਹੀ’’ਤਿ. ਬ੍ਰਾਹ੍ਮਣ, ਯਂ ਇਚ੍ਛਸਿ, ਤਂ ਵਦੇਹਿ, ਨਯਿਦਂ ਪਞ੍ਚਕਾਮਗੁਣਸੇਵਿਨੋ ਪਦਨ੍ਤਿ. ਤਤੋ ਇਤੋ ਚਿਤੋ ਚ ਓਲੋਕੇਨ੍ਤੋ ਸਤ੍ਥਾਰਂ ਦਿਸ੍ਵਾ, ‘‘ਅਯਂ ਸੋ ਪੁਰਿਸੋ’’ਤਿ ਵਤ੍ਵਾ ਬ੍ਰਾਹ੍ਮਣੋ ਗਨ੍ਤ੍ਵਾ, ‘‘ਸਮਣ, ਧੀਤਰਂ ਮੇ ਤਵ ਪੋਸਾਪਨਤ੍ਥਾਯ ਦੇਮੀ’’ਤਿ ਆਹ. ਸਤ੍ਥਾ ‘‘ਧੀਤਰਾ ਤੇ ਮਯ੍ਹਂ ਅਤ੍ਥੋ ਅਤ੍ਥਿ ਵਾ ਨਤ੍ਥਿ ਵਾ’’ਤਿ ਅਵਤ੍ਵਾਵ, ‘‘ਬ੍ਰਾਹ੍ਮਣ, ਏਕਂ ਤੇ ਕਾਰਣਂ ਕਥੇਮੀ’’ਤਿ ਵਤ੍ਵਾ, ‘‘ਕਥੇਹਿ ਸਮਣਾ’’ਤਿ ਵੁਤ੍ਤੇ ਮਹਾਭਿਨਿਕ੍ਖਮਨਤੋ ਪਟ੍ਠਾਯ ਯਾਵ ਅਜਪਾਲਨਿਗ੍ਰੋਧਮੂਲਾ ਮਾਰੇਨ ਅਨੁਬਦ੍ਧਭਾਵਂ ਅਜਪਾਲਨਿਗ੍ਰੋਧਮੂਲੇ ਚ ਪਨ ‘‘ਅਤੀਤੋ ਦਾਨਿ ਮੇ ਏਸ ਵਿਸਯ’’ਨ੍ਤਿ ਤਸ੍ਸ ਸੋਕਾਤੁਰਸ੍ਸ ਸੋਕਵੂਪਸਮਨਤ੍ਥਂ ਆਗਤਾਹਿ ਮਾਰਧੀਤਾਹਿ ਕੁਮਾਰਿਕਵਣ੍ਣਾਦਿਵਸੇਨ ਪਯੋਜਿਤਂ ਪਲੋਭਨਂ ਆਚਿਕ੍ਖਿਤ੍ਵਾ, ‘‘ਤਦਾਪਿ ਮਯ੍ਹਂ ਛਨ੍ਦੋ ਨਾਹੋਸੀ’’ਤਿ ਵਤ੍ਵਾ –

‘‘ਦਿਸ੍ਵਾਨ ਤਣ੍ਹਂ ਅਰਤਿਂ ਰਗਞ੍ਚ,

ਨਾਹੋਸਿ ਛਨ੍ਦੋ ਅਪਿ ਮੇਥੁਨਸ੍ਮਿਂ;

ਕਿਮੇਵਿਦਂ ਮੁਤ੍ਤਕਰੀਸਪੁਣ੍ਣਂ,

ਪਾਦਾਪਿ ਨਂ ਸਮ੍ਫੁਸਿਤੁਂ ਨ ਇਚ੍ਛੇ’’ਤਿ. (ਅ. ਨਿ. ਅਟ੍ਠ. ੧.੧.੨੬੦-੨੬੧; ਸੁ. ਨਿ. ੮੪੧) –

ਇਮਂ ਗਾਥਮਾਹ. ਗਾਥਾਪਰਿਯੋਸਾਨੇ ਬ੍ਰਾਹ੍ਮਣੋ ਚ ਬ੍ਰਾਹ੍ਮਣੀ ਚ ਅਨਾਗਾਮਿਫਲੇ ਪਤਿਟ੍ਠਹਿਂਸੁ. ਮਾਗਣ੍ਡਿਯਾਪਿ ਖੋ ‘‘ਸਚਸ੍ਸ ਮਯਾ ਅਤ੍ਥੋ ਨਤ੍ਥਿ, ਅਨਤ੍ਥਿਕਭਾਵੋਵ ਵਤ੍ਤਬ੍ਬੋ, ਅਯਂ ਪਨ ਮਂ ਮੁਤ੍ਤਕਰੀਸਪੁਣ੍ਣਂ ਕਰੋਤਿ, ਪਾਦਾਪਿ ਨਂ ਸਮ੍ਫੁਸਿਤੁਂ ਨ ਇਚ੍ਛੇਤਿ, ਹੋਤੁ, ਅਤ੍ਤਨੋ ਜਾਤਿਕੁਲਪਦੇਸਭੋਗਯਸਵਯਸਮ੍ਪਤ੍ਤਿਂ ਆਗਮ੍ਮ ਤਥਾਰੂਪਂ ਭਤ੍ਤਾਰਂ ਲਭਿਤ੍ਵਾ ਸਮਣਸ੍ਸ ਗੋਤਮਸ੍ਸ ਕਤ੍ਤਬ੍ਬਯੁਤ੍ਤਕਂ ਜਾਨਿਸ੍ਸਾਮੀ’’ਤਿ ਸਤ੍ਥਰਿ ਆਘਾਤਂ ਬਨ੍ਧਿ. ‘‘ਕਿਂ ਪਨ ਸਤ੍ਥਾ ਤਾਯ ਅਤ੍ਤਨਿ ਆਘਾਤੁਪ੍ਪਤ੍ਤਿਂ ਜਾਨਾਤਿ, ਨੋ’’ਤਿ? ‘‘ਜਾਨਾਤਿਯੇਵ. ਜਾਨਨ੍ਤੋ ਕਸ੍ਮਾ ਗਾਥਮਾਹਾ’’ਤਿ? ਇਤਰੇਸਂ ਦ੍ਵਿਨ੍ਨਂ ਵਸੇਨ. ਬੁਦ੍ਧਾ ਹਿ ਆਘਾਤਂ ਅਗਣੇਤ੍ਵਾ ਮਗ੍ਗਫਲਾਧਿਗਮਾਰਹਾਨਂ ਵਸੇਨ ਧਮ੍ਮਂ ਦੇਸੇਨ੍ਤਿਯੇਵ. ਮਾਤਾਪਿਤਰੋ ਤਂ ਨੇਤ੍ਵਾ ਚੂਲ਼ਮਾਗਣ੍ਡਿਯਂ ਕਨਿਟ੍ਠਂ ਪਟਿਚ੍ਛਾਪੇਤ੍ਵਾ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਚੂਲ਼ਮਾਗਣ੍ਡਿਯੋਪਿ ਚਿਨ੍ਤੇਸਿ – ‘‘ਮਮ ਧੀਤਾ ਓਮਕਸਤ੍ਤਸ੍ਸ ਨ ਅਨੁਚ੍ਛਵਿਕਾ, ਏਕਸ੍ਸ ਰਞ੍ਞੋਵ ਅਨੁਚ੍ਛਵਿਕਾ’’ਤਿ. ਤਂ ਆਦਾਯ ਕੋਸਮ੍ਬਿਂ ਗਨ੍ਤ੍ਵਾ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ, ‘‘ਇਮਂ ਇਤ੍ਥਿਰਤਨਂ ਦੇਵਸ੍ਸ ਅਨੁਚ੍ਛਵਿਕ’’ਨ੍ਤਿ ਉਤੇਨਸ੍ਸ ਰਞ੍ਞੋ ਅਦਾਸਿ. ਸੋ ਤਂ ਦਿਸ੍ਵਾਵ ਉਪ੍ਪਨ੍ਨਬਲਵਸਿਨੇਹੋ ਅਭਿਸੇਕਂ ਕਤ੍ਵਾ ਪਞ੍ਚਸਤਮਾਤੁਗਾਮਪਰਿਵਾਰਂ ਦਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਅਯਂ ਮਾਗਣ੍ਡਿਯਾਯ ਉਪ੍ਪਤ੍ਤਿ.

ਏਵਮਸ੍ਸ ਦਿਯਡ੍ਢਸਹਸ੍ਸਨਾਟਕਿਤ੍ਥਿਪਰਿਵਾਰਾ ਤਿਸ੍ਸੋ ਅਗ੍ਗਮਹੇਸਿਯੋ ਅਹੇਸੁਂ. ਤਸ੍ਮਿਂ ਖੋ ਪਨ ਸਮਯੇ ਘੋਸਕਸੇਟ੍ਠਿ ਕੁਕ੍ਕੁਟਸੇਟ੍ਠਿ ਪਾਵਾਰਿਕਸੇਟ੍ਠੀਤਿ ਕੋਸਮ੍ਬਿਯਂ ਤਯੋ ਸੇਟ੍ਠਿਨੋ ਹੋਨ੍ਤਿ. ਤੇ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਪਞ੍ਚਸਤਤਾਪਸੇ ਹਿਮਵਨ੍ਤਤੋ ਆਗਨ੍ਤ੍ਵਾ ਨਗਰੇ ਭਿਕ੍ਖਾਯ ਚਰਨ੍ਤੇ ਦਿਸ੍ਵਾ ਪਸੀਦਿਤ੍ਵਾ ਨਿਸੀਦਾਪੇਤ੍ਵਾ ਭੋਜੇਤ੍ਵਾ ਪਟਿਞ੍ਞਂ ਗਹੇਤ੍ਵਾ ਚਤ੍ਤਾਰੋ ਮਾਸੇ ਅਤ੍ਤਨੋ ਸਨ੍ਤਿਕੇ ਵਸਾਪੇਤ੍ਵਾ ਪੁਨ ਵਸ੍ਸਾਰਤ੍ਤੇ ਆਗਮਨਤ੍ਥਾਯ ਪਟਿਜਾਨਾਪੇਤ੍ਵਾ ਉਯ੍ਯੋਜੇਸੁਂ. ਤਾਪਸਾਪਿ ਤਤੋ ਪਟ੍ਠਾਯ ਅਟ੍ਠ ਮਾਸੇ ਹਿਮਵਨ੍ਤੇ ਵਸਿਤ੍ਵਾ ਚਤ੍ਤਾਰੋ ਮਾਸੇ ਤੇਸਂ ਸਨ੍ਤਿਕੇ ਵਸਿਂਸੁ. ਤੇ ਅਪਰਭਾਗੇ ਹਿਮਵਨ੍ਤਤੋ ਆਗਚ੍ਛਨ੍ਤਾ ਅਰਞ੍ਞਾਯਤਨੇ ਏਕਂ ਮਹਾਨਿਗ੍ਰੋਧਂ ਦਿਸ੍ਵਾ ਤਸ੍ਸ ਮੂਲੇ ਨਿਸੀਦਿਂਸੁ. ਤੇਸੁ ਜੇਟ੍ਠਕਤਾਪਸੋ ਚਿਨ੍ਤੇਸਿ – ‘‘ਇਮਸ੍ਮਿਂ ਰੁਕ੍ਖੇ ਅਧਿਵਤ੍ਥਾ ਦੇਵਤਾ ਓਰਮਤ੍ਤਿਕਾ ਨ ਭਵਿਸ੍ਸਤਿ, ਮਹੇਸਕ੍ਖੇਨੇਵੇਤ੍ਥ ਦੇਵਰਾਜੇਨ ਭਵਿਤਬ੍ਬਂ, ਸਾਧੁ ਵਤ ਸਚਾਯਂ ਇਸਿਗਣਸ੍ਸ ਪਾਨੀਯਂ ਦਦੇਯ੍ਯਾ’’ਤਿ. ਸੋਪਿ ਪਾਨੀਯਂ ਅਦਾਸਿ. ਤਾਪਸੋ ਨ੍ਹਾਨੋਦਕਂ ਚਿਨ੍ਤੇਸਿ, ਤਮ੍ਪਿ ਅਦਾਸਿ. ਤਤੋ ਭੋਜਨਂ ਚਿਨ੍ਤੇਸਿ, ਤਮ੍ਪਿ ਅਦਾਸਿ. ਅਥਸ੍ਸ ਏਤਦਹੋਸਿ – ‘‘ਅਯਂ ਦੇਵਰਾਜਾ ਅਮ੍ਹੇਹਿ ਚਿਨ੍ਤਿਤਂ ਚਿਨ੍ਤਿਤਂ ਸਬ੍ਬਂ ਦੇਤਿ, ਅਹੋ ਵਤ ਨਂ ਪਸ੍ਸੇਯ੍ਯਾਮਾ’’ਤਿ. ਸੋ ਰੁਕ੍ਖਕ੍ਖਨ੍ਧਂ ਪਦਾਲੇਤ੍ਵਾ ਅਤ੍ਤਾਨਂ ਦਸ੍ਸੇਸਿ. ਅਥ ਨਂ ਤਾਪਸਾ, ‘‘ਦੇਵਰਾਜ, ਮਹਤੀ ਤੇ ਸਮ੍ਪਤ੍ਤਿ, ਕਿਂ ਨੁ ਖੋ ਕਤ੍ਵਾ ਅਯਂ ਤੇ ਲਦ੍ਧਾ’’ਤਿ ਪੁਚ੍ਛਿਂਸੁ. ‘‘ਮਾ ਪੁਚ੍ਛਥ, ਅਯ੍ਯਾ’’ਤਿ. ‘‘ਆਚਿਕ੍ਖ, ਦੇਵਰਾਜਾ’’ਤਿ. ਸੋ ਅਤ੍ਤਨਾ ਕਤਕਮ੍ਮਸ੍ਸ ਪਰਿਤ੍ਤਕਤ੍ਤਾ ਲਜ੍ਜਮਾਨੋ ਕਥੇਤੁਂ ਨ ਵਿਸਹਿ. ਤੇਹਿ ਪੁਨਪ੍ਪੁਨਂ ਨਿਪ੍ਪੀਲ਼ਿਯਮਾਨੋ ਪਨ ‘‘ਤੇਨ ਹਿ ਸੁਣਾਥਾ’’ਤਿ ਵਤ੍ਵਾ ਕਥੇਸਿ.

ਸੋ ਕਿਰੇਕੋ ਦੁਗ੍ਗਤਮਨੁਸ੍ਸੋ ਹੁਤ੍ਵਾ ਭਤਿਂ ਪਰਿਯੇਸਨ੍ਤੋ ਅਨਾਥਪਿਣ੍ਡਿਕਸ੍ਸ ਸਨ੍ਤਿਕੇ ਭਤਿਕਮ੍ਮਂ ਲਭਿਤ੍ਵਾ ਤਂ ਨਿਸ੍ਸਾਯ ਜੀਵਿਕਂ ਕਪ੍ਪੇਸਿ. ਅਥੇਕਸ੍ਮਿਂ ਉਪੋਸਥਦਿਵਸੇ ਸਮ੍ਪਤ੍ਤੇ ਅਨਾਥਪਿਣ੍ਡਿਕੋ ਵਿਹਾਰਤੋ ਆਗਨ੍ਤ੍ਵਾ ਪੁਚ੍ਛਿ – ‘‘ਤਸ੍ਸ ਭਤਿਕਸ੍ਸ ਅਜ੍ਜੁਪੋਸਥਦਿਵਸਭਾਵੋ ਕੇਨਚਿ ਕਥਿਤੋ’’ਤਿ? ‘‘ਨ ਕਥਿਤੋ, ਸਾਮੀ’’ਤਿ. ‘‘ਤੇਨ ਹਿਸ੍ਸ ਸਾਯਮਾਸਂ ਪਚਥਾ’’ਤਿ. ਅਥਸ੍ਸ ਪਤ੍ਥੋਦਨਂ ਪਚਿਂਸੁ. ਸੋ ਦਿਵਸਂ ਅਰਞ੍ਞੇ ਕਮ੍ਮਂ ਕਤ੍ਵਾ ਸਾਯਂ ਆਗਨ੍ਤ੍ਵਾ ਭਤ੍ਤੇ ਵਡ੍ਢੇਤ੍ਵਾ ਦਿਨ੍ਨੇ ‘‘ਛਾਤੋਮ੍ਹੀ’’ਤਿ ਸਹਸਾ ਅਭੁਞ੍ਜਿਤ੍ਵਾਵ ‘‘ਅਞ੍ਞੇਸੁ ਦਿਵਸੇਸੁ ਇਮਸ੍ਮਿਂ ਗੇਹੇ ‘ਭਤ੍ਤਂ ਦੇਥ, ਸੂਪਂ ਦੇਥ, ਬ੍ਯਞ੍ਜਨਂ ਦੇਥਾ’ਤਿ ਮਹਾਕੋਲਾਹਲਂ ਅਹੋਸਿ, ਅਜ੍ਜ ਤੇ ਸਬ੍ਬੇ ਨਿਸ੍ਸਦ੍ਦਾ ਨਿਪਜ੍ਜਿਂਸੁ, ਮਯ੍ਹਮੇਵ ਏਕਸ੍ਸਾਹਾਰਂ ਵਡ੍ਢਯਿਂਸੁ, ਕਿਂ ਨੁ ਖੋ ਏਤ’’ਨ੍ਤਿ ਚਿਨ੍ਤੇਤ੍ਵਾ ਪੁਚ੍ਛਿ – ‘‘ਅਵਸੇਸਾ ਭੁਞ੍ਜਿਂਸੁ, ਨ ਭੁਞ੍ਜਿਂਸੂ’’ਤਿ? ‘‘ਨ ਭੁਞ੍ਜਿਂਸੁ, ਤਾਤਾ’’ਤਿ. ‘‘ਕਿਂ ਕਾਰਣਾ’’ਤਿ? ਇਮਸ੍ਮਿਂ ਗੇਹੇ ਉਪੋਸਥਦਿਵਸੇਸੁ ਸਾਯਮਾਸਂ ਨ ਭੁਞ੍ਜਨ੍ਤਿ, ਸਬ੍ਬੇਵ ਉਪੋਸਥਿਕਾ ਹੋਨ੍ਤਿ. ਅਨ੍ਤਮਸੋ ਥਨਪਾਯਿਨੋਪਿ ਦਾਰਕੇ ਮੁਖਂ ਵਿਕ੍ਖਾਲਾਪੇਤ੍ਵਾ ਚਤੁਮਧੁਰਂ ਮੁਖੇ ਪਕ੍ਖਿਪਾਪੇਤ੍ਵਾ ਮਹਾਸੇਟ੍ਠਿ ਉਪੋਸਥਿਕੇ ਕਾਰੇਤਿ. ਗਨ੍ਧਤੇਲਪ੍ਪਦੀਪੇ ਜਾਲਨ੍ਤੇ ਖੁਦ੍ਦਕਮਹਲ੍ਲਕਦਾਰਕਾ ਸਯਨਗਤਾ ਦ੍ਵਤ੍ਤਿਂਸਾਕਾਰਂ ਸਜ੍ਝਾਯਨ੍ਤਿ. ਤੁਯ੍ਹਂ ਪਨ ਉਪੋਸਥਦਿਵਸਭਾਵਂ ਕਥੇਤੁਂ ਸਤਿਂ ਨ ਕਰਿਮ੍ਹਾ. ਤਸ੍ਮਾ ਤਵੇਵ ਭਤ੍ਤਂ ਪਕ੍ਕਂ, ਨਂ ਭੁਞ੍ਜਸ੍ਸੂਤਿ. ਸਚੇ ਇਦਾਨਿ ਉਪੋਸਥਿਕੇਨ ਭਵਿਤੁਂ ਵਟ੍ਟਤਿ, ਅਹਮ੍ਪਿ ਭਵੇਯ੍ਯਨ੍ਤਿ. ‘‘ਇਦਂ ਸੇਟ੍ਠਿ ਜਾਨਾਤੀ’’ਤਿ. ‘‘ਤੇਨ ਹਿ ਨਂ ਪੁਚ੍ਛਥਾ’’ਤਿ. ਤੇ ਗਨ੍ਤ੍ਵਾ ਸੇਟ੍ਠਿਂ ਪੁਚ੍ਛਿਂਸੁ. ਸੋ ਏਵਮਾਹ – ‘‘ਇਦਾਨਿ ਪਨ ਅਭੁਞ੍ਜਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਹਨ੍ਤੋ ਉਪਡ੍ਢਂ ਉਪੋਸਥਕਮ੍ਮਂ ਲਭਿਸ੍ਸਤੀ’’ਤਿ. ਇਤਰੋ ਤਂ ਸੁਤ੍ਵਾ ਤਥਾ ਅਕਾਸਿ.

ਤਸ੍ਸ ਸਕਲਦਿਵਸਂ ਕਮ੍ਮਂ ਕਤ੍ਵਾ ਛਾਤਸ੍ਸ ਸਰੀਰੇ ਵਾਤਾ ਕੁਪ੍ਪਿਂਸੁ. ਸੋ ਯੋਤ੍ਤੇਨ ਉਰਂ ਬਨ੍ਧਿਤ੍ਵਾ ਯੋਤ੍ਤਕੋਟਿਯਂ ਗਹੇਤ੍ਵਾ ਪਰਿਵਤ੍ਤਤਿ. ਸੇਟ੍ਠਿ ਤਂ ਪਵਤ੍ਤਿਂ ਸੁਤ੍ਵਾ ਉਕ੍ਕਾਹਿ ਧਾਰਿਯਮਾਨਾਹਿ ਚਤੁਮਧੁਰਂ ਗਾਹਾਪੇਤ੍ਵਾ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ, ‘‘ਕਿਂ, ਤਾਤਾ’’ਤਿ ਪੁਚ੍ਛਿ. ‘‘ਸਾਮਿ, ਵਾਤਾ ਮੇ ਕੁਪ੍ਪਿਤਾ’’ਤਿ. ‘‘ਤੇਨ ਹਿ ਉਟ੍ਠਾਯ ਇਦਂ ਭੇਸਜ੍ਜਂ ਖਾਦਾਹੀ’’ਤਿ. ‘‘ਤੁਮ੍ਹੇਪਿ ਖਾਦਥ, ਸਾਮੀ’’ਤਿ. ‘‘ਅਮ੍ਹਾਕਂ ਅਫਾਸੁਕਂ ਨਤ੍ਥਿ, ਤ੍ਵਂ ਖਾਦਾਹੀ’’ਤਿ. ‘‘ਸਾਮਿ, ਅਹਂ ਉਪੋਸਥਕਮ੍ਮਂ ਕਰੋਨ੍ਤੋ ਸਕਲਂ ਕਾਤੁਂ ਨਾਸਕ੍ਖਿਂ, ਉਪਡ੍ਢਕਮ੍ਮਮ੍ਪਿ ਮੇ ਵਿਕਲਂ ਮਾ ਅਹੋਸੀ’’ਤਿ ਨ ਇਚ੍ਛਿ. ‘‘ਮਾ ਏਵਂ ਕਰਿ, ਤਾਤਾ’’ਤਿ ਵੁਚ੍ਚਮਾਨੋਪਿ ਅਨਿਚ੍ਛਿਤ੍ਵਾ ਅਰੁਣੇ ਉਟ੍ਠਹਨ੍ਤੇ ਮਿਲਾਤਮਾਲਾ ਵਿਯ ਕਾਲਂ ਕਤ੍ਵਾ ਤਸ੍ਮਿਂ ਨਿਗ੍ਰੋਧਰੁਕ੍ਖੇ ਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਮਾ ਇਮਮਤ੍ਥਂ ਕਥੇਤ੍ਵਾ ‘‘ਸੋ ਸੇਟ੍ਠਿ ਬੁਦ੍ਧਮਾਮਕੋ, ਧਮ੍ਮਮਾਮਕੋ, ਸਙ੍ਘਮਾਮਕੋ, ਤਂ ਨਿਸ੍ਸਾਯ ਕਤਸ੍ਸ ਉਪਡ੍ਢੁਪੋਸਥਕਮ੍ਮਸ੍ਸ ਨਿਸ੍ਸਨ੍ਦੇਨੇਸਾ ਸਮ੍ਪਤ੍ਤਿ ਮਯਾ ਲਦ੍ਧਾ’’ਤਿ ਆਹ.

‘‘ਬੁਦ੍ਧੋ’’ਤਿ ਵਚਨਂ ਸੁਤ੍ਵਾਵ ਪਞ੍ਚਸਤਾ ਤਾਪਸਾ ਉਟ੍ਠਾਯ ਦੇਵਤਾਯ ਅਞ੍ਜਲਿਂ ਪਗ੍ਗਯ੍ਹ ‘‘ਬੁਦ੍ਧੋਤਿ ਵਦੇਸਿ, ਬੁਦ੍ਧੋਤਿ ਵਦੇਸੀ’’ਤਿ ਪੁਚ੍ਛਿਤ੍ਵਾ, ‘‘ਬੁਦ੍ਧੋਤਿ ਵਦਾਮਿ, ਬੁਦ੍ਧੋਤਿ ਵਦਾਮੀ’’ਤਿ ਤਿਕ੍ਖਤ੍ਤੁਂ ਪਟਿਜਾਨਾਪੇਤ੍ਵਾ ‘‘ਘੋਸੋਪਿ ਖੋ ਏਸੋ ਦੁਲ੍ਲਭੋ ਲੋਕਸ੍ਮਿ’’ਨ੍ਤਿ ਉਦਾਨਂ ਉਦਾਨੇਤ੍ਵਾ ‘‘ਦੇਵਤੇ ਅਨੇਕੇਸੁ ਕਪ੍ਪਸਤਸਹਸ੍ਸੇਸੁ ਅਸੁਤਪੁਬ੍ਬਂ ਸਦ੍ਦਂ ਤਯਾ ਸੁਣਾਪਿਤਮ੍ਹਾ’’ਤਿ ਆਹਂਸੁ. ਅਥ ਅਨ੍ਤੇਵਾਸਿਨੋ ਆਚਰਿਯਂ ਏਤਦਵੋਚੁਂ – ‘‘ਤੇਨ ਹਿ ਸਤ੍ਥੁ ਸਨ੍ਤਿਕਂ ਗਚ੍ਛਾਮਾ’’ਤਿ. ‘‘ਤਾਤਾ, ਤਯੋ ਸੇਟ੍ਠਿਨੋ ਅਮ੍ਹਾਕਂ ਬਹੂਪਕਾਰਾ, ਸ੍ਵੇ ਤੇਸਂ ਨਿਵੇਸਨੇ ਭਿਕ੍ਖਂ ਗਣ੍ਹਿਤ੍ਵਾ ਤੇਸਮ੍ਪਿ ਆਚਿਕ੍ਖਿਤ੍ਵਾ ਗਮਿਸ੍ਸਾਮ, ਅਧਿਵਾਸੇਥ, ਤਾਤਾ’’ਤਿ. ਤੇ ਅਧਿਵਾਸਯਿਂਸੁ. ਪੁਨਦਿਵਸੇ ਸੇਟ੍ਠਿਨੋ ਯਾਗੁਭਤ੍ਤਂ ਸਮ੍ਪਾਦੇਤ੍ਵਾ ਆਸਨਾਨਿ ਪਞ੍ਞਾਪੇਤ੍ਵਾ ‘‘ਅਜ੍ਜ ਨੋ ਅਯ੍ਯਾਨਂ ਆਗਮਨਦਿਵਸੋ’’ਤਿ ਞਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਤੇ ਆਦਾਯ ਨਿਵੇਸਨਂ ਗਨ੍ਤ੍ਵਾ ਨਿਸੀਦਾਪੇਤ੍ਵਾ ਭਿਕ੍ਖਂ ਅਦਂਸੁ. ਤੇ ਕਤਭਤ੍ਤਕਿਚ੍ਚਾ ਮਹਾਸੇਟ੍ਠਿਨੋ ‘‘ਮਯਂ ਗਮਿਸ੍ਸਾਮਾ’’ਤਿ ਵਦਿਂਸੁ. ‘‘ਨਨੁ, ਭਨ੍ਤੇ, ਤੁਮ੍ਹੇਹਿ ਚਤ੍ਤਾਰੋ ਵਸ੍ਸਿਕੇ ਮਾਸੇ ਅਮ੍ਹਾਕਂ ਗਹਿਤਾਵ ਪਟਿਞ੍ਞਾ, ਇਦਾਨਿ ਕੁਹਿਂ ਗਚ੍ਛਥਾ’’ਤਿ? ‘‘ਲੋਕੇ ਕਿਰ ਬੁਦ੍ਧੋ ਉਪ੍ਪਨ੍ਨੋ, ਧਮ੍ਮੋ ਉਪ੍ਪਨ੍ਨੋ, ਸਙ੍ਘੋ ਉਪ੍ਪਨ੍ਨੋ, ਤਸ੍ਮਾ ਸਤ੍ਥੁ ਸਨ੍ਤਿਕਂ ਗਮਿਸ੍ਸਾਮਾ’’ਤਿ. ‘‘ਕਿਂ ਪਨ ਤਸ੍ਸ ਸਤ੍ਥੁਨੋ ਸਨ੍ਤਿਕਂ ਤੁਮ੍ਹਾਕਞ੍ਞੇਵ ਗਨ੍ਤੁਂ ਵਟ੍ਟਤੀ’’ਤਿ? ‘‘ਅਞ੍ਞੇਸਮ੍ਪਿ ਅਵਾਰਿਤਂ, ਆਵੁਸੋ’’ਤਿ. ‘‘ਤੇਨ ਹਿ, ਭਨ੍ਤੇ, ਆਗਮੇਥ, ਮਯਮ੍ਪਿ ਗਮਨਪਰਿਵਚ੍ਛਂ ਕਤ੍ਵਾ ਗਚ੍ਛਾਮਾ’’ਤਿ. ‘‘ਤੁਮ੍ਹੇਸੁ ਪਰਿਵਚ੍ਛਂ ਕਰੋਨ੍ਤੇਸੁ ਅਮ੍ਹਾਕਂ ਪਪਞ੍ਚੋ ਹੋਤਿ, ਮਯਂ ਪੁਰਤੋ ਗਚ੍ਛਾਮ, ਤੁਮ੍ਹੇ ਪਚ੍ਛਾ ਆਗਚ੍ਛੇਯ੍ਯਾਥਾ’’ਤਿ ਵਤ੍ਵਾ ਤੇ ਪੁਰੇਤਰਂ ਗਨ੍ਤ੍ਵਾ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਅਭਿਤ੍ਥਵਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਥ ਨੇਸਂ ਸਤ੍ਥਾ ਅਨੁਪੁਬ੍ਬਿਂ ਕਥਂ ਕਥੇਤ੍ਵਾ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਸਬ੍ਬੇਪਿ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਪਬ੍ਬਜ੍ਜਂ ਯਾਚਿਤ੍ਵਾ ‘‘ਏਥ, ਭਿਕ੍ਖਵੋ’’ਤਿ ਵਚਨਸਮਨਨ੍ਤਰਂਯੇਵ ਇਦ੍ਧਿਮਯਪਤ੍ਤਚੀਵਰਧਰਾ ਏਹਿਭਿਕ੍ਖੂ ਅਹੇਸੁਂ.

ਤੇਪਿ ਖੋ ਤਯੋ ਸੇਟ੍ਠਿਨੋ ਪਞ੍ਚਹਿ ਪਞ੍ਚਹਿ ਸਕਟਸਤੇਹਿ ਭਤ੍ਤਚ੍ਛਾਦਨਸਪ੍ਪਿਮਧੁਫਾਣਿਤਾਦੀਨਿ ਦਾਨੂਪਕਰਣਾਨਿ ਆਦਾਯ ਸਾਵਤ੍ਥਿਂ ਪਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਧਮ੍ਮਕਥਂ ਸੁਤ੍ਵਾ ਕਥਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਅਦ੍ਧਮਾਸਮਤ੍ਤਮ੍ਪਿ ਦਾਨਂ ਦਦਮਾਨਾ ਸਤ੍ਥੁ ਸਨ੍ਤਿਕੇ ਵਸਿਤ੍ਵਾ ਕੋਸਮ੍ਬਿਂ ਆਗਮਨਤ੍ਥਾਯ ਸਤ੍ਥਾਰਂ ਯਾਚਿਤ੍ਵਾ ਸਤ੍ਥਾਰਾ ਪਟਿਞ੍ਞਂ ਦਦਨ੍ਤੇਨ ‘‘ਸੁਞ੍ਞਾਗਾਰੇ ਖੋ ਗਹਪਤਯੋ ਤਥਾਗਤਾ ਅਭਿਰਮਨ੍ਤੀ’’ਤਿ ਵੁਤ੍ਤੇ, ‘‘ਅਞ੍ਞਾਤਂ, ਭਨ੍ਤੇ, ਅਮ੍ਹੇਹਿ ਪਹਿਤਸਾਸਨੇਨ ਆਗਨ੍ਤੁਂ ਵਟ੍ਟਤੀ’’ਤਿ ਵਤ੍ਵਾ ਕੋਸਮ੍ਬਿਂ ਗਨ੍ਤ੍ਵਾ ਘੋਸਕਸੇਟ੍ਠਿ ਘੋਸਿਤਾਰਾਮਂ, ਕੁਕ੍ਕੁਟਸੇਟ੍ਠਿ ਕੁਕ੍ਕੁਟਾਰਾਮਂ, ਪਾਵਾਰਿਕਸੇਟ੍ਠਿ ਪਾਵਾਰਿਕਾਰਾਮਨ੍ਤਿ ਤਯੋ ਮਹਾਵਿਹਾਰੇ ਕਾਰੇਤ੍ਵਾ ਸਤ੍ਥੁ ਆਗਮਨਤ੍ਥਾਯ ਸਾਸਨਂ ਪਹਿਣਿਂਸੁ. ਸਤ੍ਥਾ ਤੇਸਂ ਸਾਸਨਂ ਸੁਤ੍ਵਾ ਤਤ੍ਥ ਅਗਮਾਸਿ. ਤੇ ਪਚ੍ਚੁਗ੍ਗਨ੍ਤ੍ਵਾ ਸਤ੍ਥਾਰਂ ਵਿਹਾਰਂ ਪਵੇਸੇਤ੍ਵਾ ਵਾਰੇਨ ਵਾਰੇਨ ਪਟਿਜਗ੍ਗਨ੍ਤਿ. ਸਤ੍ਥਾ ਦੇਵਸਿਕਂ ਏਕੇਕਸ੍ਮਿਂ ਵਿਹਾਰੇ ਵਸਤਿ. ਯਸ੍ਸ ਵਿਹਾਰੇ ਵੁਟ੍ਠੋ ਹੋਤਿ, ਤਸ੍ਸੇਵ ਘਰਦ੍ਵਾਰੇ ਪਿਣ੍ਡਾਯ ਚਰਤਿ. ਤੇਸਂ ਪਨ ਤਿਣ੍ਣਂ ਸੇਟ੍ਠੀਨਂ ਉਪਟ੍ਠਾਕੋ ਸੁਮਨੋ ਨਾਮ ਮਾਲਾਕਾਰੋ ਅਹੋਸਿ. ਸੋ ਤੇ ਸੇਟ੍ਠਿਨੋ ਏਵਮਾਹ – ‘‘ਅਹਂ ਤੁਮ੍ਹਾਕਂ ਦੀਘਰਤ੍ਤਂ ਉਪਕਾਰਕੋ, ਸਤ੍ਥਾਰਂ ਭੋਜੇਤੁਕਾਮੋਮ੍ਹਿ, ਮਯ੍ਹਮ੍ਪਿ ਏਕਦਿਵਸਂ ਸਤ੍ਥਾਰਂ ਦੇਥਾ’’ਤਿ. ‘‘ਤੇਨ ਹਿ ਭਣੇ ਸ੍ਵੇ ਭੋਜੇਹੀ’’ਤਿ. ‘‘ਸਾਧੁ, ਸਾਮੀ’’ਤਿ ਸੋ ਸਤ੍ਥਾਰਂ ਨਿਮਨ੍ਤੇਤ੍ਵਾ ਸਕ੍ਕਾਰਂ ਪਟਿਯਾਦੇਸਿ.

ਤਦਾ ਰਾਜਾ ਸਾਮਾਵਤਿਯਾ ਦੇਵਸਿਕਂ ਪੁਪ੍ਫਮੂਲੇ ਅਟ੍ਠ ਕਹਾਪਣੇ ਦੇਤਿ. ਤਸ੍ਸਾ ਖੁਜ੍ਜੁਤ੍ਤਰਾ ਨਾਮ ਦਾਸੀ ਸੁਮਨਮਾਲਾਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਨਿਬਦ੍ਧਂ ਪੁਪ੍ਫਾਨਿ ਗਣ੍ਹਾਤਿ. ਅਥ ਨਂ ਤਸ੍ਮਿਂ ਦਿਵਸੇ ਆਗਤਂ ਮਾਲਾਕਾਰੋ ਆਹ – ‘‘ਮਯਾ ਸਤ੍ਥਾ ਨਿਮਨ੍ਤਿਤੋ, ਅਜ੍ਜ ਪੁਪ੍ਫੇਹਿ ਸਤ੍ਥਾਰਂ ਪੂਜੇਸ੍ਸਾਮਿ, ਤਿਟ੍ਠ ਤਾਵ, ਤ੍ਵਂ ਪਰਿਵੇਸਨਾਯ ਸਹਾਯਿਕਾ ਹੁਤ੍ਵਾ ਧਮ੍ਮਂ ਸੁਤ੍ਵਾ ਅਵਸੇਸਾਨਿ ਪੁਪ੍ਫਾਨਿ ਗਹੇਤ੍ਵਾ ਗਮਿਸ੍ਸਸੀ’’ਤਿ. ਸਾ ‘‘ਸਾਧੂ’’ਤਿ ਅਧਿਵਾਸੇਸਿ. ਸੁਮਨੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਰਿਵਿਸਿਤ੍ਵਾ ਅਨੁਮੋਦਨਕਰਣਤ੍ਥਾਯ ਪਤ੍ਤਂ ਅਗ੍ਗਹੇਸਿ. ਸਤ੍ਥਾ ਅਨੁਮੋਦਨਧਮ੍ਮਦੇਸਨਂ ਆਰਭਿ. ਖੁਜ੍ਜੁਤ੍ਤਰਾਪਿ ਸਤ੍ਥੁ ਧਮ੍ਮਕਥਂ ਸੁਣਨ੍ਤੀਯੇਵ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਾ ਅਞ੍ਞੇਸੁ ਦਿਵਸੇਸੁ ਚਤ੍ਤਾਰੋ ਕਹਾਪਣੇ ਅਤ੍ਤਨੋ ਗਹੇਤ੍ਵਾ ਚਤੂਹਿ ਪੁਪ੍ਫਾਨਿ ਗਹੇਤ੍ਵਾ ਗਚ੍ਛਤਿ, ਤਂ ਦਿਵਸਂ ਅਟ੍ਠਹਿਪਿ ਪੁਪ੍ਫਾਨਿ ਗਹੇਤ੍ਵਾ ਗਤਾ. ਅਥ ਨਂ ਸਾਮਾਵਤੀ ਆਹ – ‘‘ਕਿਂ ਨੁ ਖੋ, ਅਮ੍ਮ, ਅਜ੍ਜ ਅਮ੍ਹਾਕਂ ਰਞ੍ਞਾ ਦ੍ਵਿਗੁਣਂ ਪੁਪ੍ਫਮੂਲਂ ਦਿਨ੍ਨ’’ਨ੍ਤਿ? ‘‘ਨੋ, ਅਯ੍ਯੇ’’ਤਿ. ‘‘ਅਥ ਕਸ੍ਮਾ ਬਹੂਨਿ ਪੁਪ੍ਫਾਨੀ’’ਤਿ? ‘‘ਅਞ੍ਞੇਸੁ ਦਿਵਸੇਸੁ ਅਹਂ ਚਤ੍ਤਾਰੋ ਕਹਾਪਣੇ ਅਤ੍ਤਨੋ ਗਹੇਤ੍ਵਾ ਚਤੂਹਿ ਪੁਪ੍ਫਾਨਿ ਆਹਰਾਮੀ’’ਤਿ. ‘‘ਅਜ੍ਜ ਕਸ੍ਮਾ ਨ ਗਣ੍ਹੀ’’ਤਿ? ‘‘ਸਮ੍ਮਾਸਮ੍ਬੁਦ੍ਧਸ੍ਸ ਧਮ੍ਮਕਥਂ ਸੁਤ੍ਵਾ ਧਮ੍ਮਸ੍ਸ ਅਧਿਗਤਤ੍ਤਾ’’ਤਿ. ਅਥ ਨਂ ‘‘ਅਰੇ, ਦੁਟ੍ਠਦਾਸਿ ਏਤ੍ਤਕਂ ਕਾਲਂ ਤਯਾ ਗਹਿਤਕਹਾਪਣੇ ਮੇ ਦੇਹੀ’’ਤਿ ਅਤਜ੍ਜੇਤ੍ਵਾ, ‘‘ਅਮ੍ਮ, ਤਯਾ ਪਿਵਿਤਂ ਅਮਤਂ ਅਮ੍ਹੇਪਿ ਪਾਯੇਹੀ’’ਤਿ ਵਤ੍ਵਾ ‘‘ਤੇਨ ਹਿ ਮਂ ਨ੍ਹਾਪੇਹੀ’’ਤਿ ਵੁਤ੍ਤੇ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਾਪੇਤ੍ਵਾ ਦ੍ਵੇ ਮਟ੍ਠਸਾਟਕੇ ਦਾਪੇਸਿ. ਸਾ ਏਕਂ ਨਿਵਾਸੇਤ੍ਵਾ ਏਕਂ ਏਕਂਸਂ ਪਾਰੁਪਿਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਏਕਂ ਬੀਜਨਿਂ ਆਹਰਾਪੇਤ੍ਵਾ ਆਸਨੇ ਨਿਸੀਦਿਤ੍ਵਾ ਚਿਤ੍ਰਬੀਜਨਿਂ ਆਦਾਯ ਪਞ੍ਚ ਮਾਤੁਗਾਮਸਤਾਨਿ ਆਮਨ੍ਤੇਤ੍ਵਾ ਤਾਸਂ ਸਤ੍ਥਾਰਾ ਦੇਸਿਤਨਿਯਾਮੇਨੇਵ ਧਮ੍ਮਂ ਦੇਸੇਸਿ. ਤਸ੍ਸਾ ਧਮ੍ਮਕਥਂ ਸੁਤ੍ਵਾ ਤਾ ਸਬ੍ਬਾਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ.

ਤਾ ਸਬ੍ਬਾਪਿ ਖੁਜ੍ਜੁਤ੍ਤਰਂ ਵਨ੍ਦਿਤ੍ਵਾ, ‘‘ਅਮ੍ਮ, ਅਜ੍ਜਤੋ ਪਟ੍ਠਾਯ ਤ੍ਵਂ ਕਿਲਿਟ੍ਠਕਮ੍ਮਂ ਮਾ ਕਰਿ, ਅਮ੍ਹਾਕਂ ਮਾਤੁਟ੍ਠਾਨੇ ਚ ਆਚਰਿਯਟ੍ਠਾਨੇ ਚ ਠਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥਾਰਾ ਦੇਸਿਤਂ ਧਮ੍ਮਂ ਸੁਤ੍ਵਾ ਅਮ੍ਹਾਕਂ ਕਥੇਹੀ’’ਤਿ ਵਦਿਂਸੁ. ਸਾ ਤਥਾ ਕਰੋਨ੍ਤੀ ਅਪਰਭਾਗੇ ਤਿਪਿਟਕਧਰਾ ਜਾਤਾ. ਅਥ ਨਂ ਸਤ੍ਥਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਿਕਾਨਂ ਉਪਾਸਿਕਾਨਂ ਬਹੁਸ੍ਸੁਤਾਨਂ ਧਮ੍ਮਕਥਿਕਾਨਂ ਯਦਿਦਂ ਖੁਜ੍ਜੁਤ੍ਤਰਾ’’ਤਿ ਏਤਦਗ੍ਗੇ ਠਪੇਸਿ. ਤਾਪਿ ਖੋ ਪਞ੍ਚਸਤਾ ਇਤ੍ਥਿਯੋ ਤਂ ਏਵਮਾਹਂਸੁ – ‘‘ਅਮ੍ਮ, ਸਤ੍ਥਾਰਂ ਦਟ੍ਠੁਕਾਮਾਮ੍ਹਾ, ਤਂ ਨੋ ਦਸ੍ਸੇਹਿ, ਗਨ੍ਧਮਾਲਾਦੀਹਿ ਤਂ ਪੂਜੇਸ੍ਸਾਮਾ’’ਤਿ. ‘‘ਅਯ੍ਯੇ, ਰਾਜਕੁਲਂ ਨਾਮ ਭਾਰਿਯਂ, ਤੁਮ੍ਹੇ ਗਹੇਤ੍ਵਾ ਬਹਿ ਗਨ੍ਤੁਂ ਨ ਸਕ੍ਕਾ’’ਤਿ. ‘‘ਅਮ੍ਮ, ਨੋ ਮਾ ਨਾਸੇਹਿ, ਦਸ੍ਸੇਹੇਵ ਅਮ੍ਹਾਕਂ ਸਤ੍ਥਾਰ’’ਨ੍ਤਿ. ‘‘ਤੇਨ ਹਿ ਤੁਮ੍ਹਾਕਂ ਵਸਨਗਬ੍ਭਾਨਂ ਭਿਤ੍ਤੀਸੁ ਯਤ੍ਤਕੇਨ ਓਲੋਕੇਤੁਂ ਸਕ੍ਕਾ ਹੋਤਿ, ਤਤ੍ਤਕਂ ਛਿਦ੍ਦਂ ਕਤ੍ਵਾ ਗਨ੍ਧਮਾਲਾਦੀਨਿ ਆਹਰਾਪੇਤ੍ਵਾ ਸਤ੍ਥਾਰਂ ਤਿਣ੍ਣਂ ਸੇਟ੍ਠੀਨਂ ਘਰਦ੍ਵਾਰਂ ਗਚ੍ਛਨ੍ਤਂ ਤੁਮ੍ਹੇ ਤੇਸੁ ਤੇਸੁ ਠਾਨੇਸੁ ਠਤ੍ਵਾ ਓਲੋਕੇਥ ਚੇਵ, ਹਤ੍ਥੇ ਚ ਪਸਾਰੇਤ੍ਵਾ ਵਨ੍ਦਥ, ਪੂਜੇਥ ਚਾ’’ਤਿ. ਤਾ ਤਥਾ ਕਤ੍ਵਾ ਸਤ੍ਥਾਰਂ ਗਚ੍ਛਨ੍ਤਞ੍ਚ ਆਗਚ੍ਛਨ੍ਤਞ੍ਚ ਓਲੋਕੇਤ੍ਵਾ ਵਨ੍ਦਿਂਸੁ ਚੇਵ ਪੂਜੇਸੁਞ੍ਚ.

ਅਥੇਕਦਿਵਸਂ ਮਾਗਣ੍ਡਿਯਾ ਅਤ੍ਤਨੋ ਪਾਸਾਦਤਲਤੋ ਨਿਕ੍ਖਮਿਤ੍ਵਾ ਚਙ੍ਕਮਮਾਨਾ ਤਾਸਂ ਵਸਨਟ੍ਠਾਨਂ ਗਨ੍ਤ੍ਵਾ ਗਬ੍ਭੇਸੁ ਛਿਦ੍ਦਂ ਦਿਸ੍ਵਾ, ‘‘ਇਦਂ ਕਿ’’ਨ੍ਤਿ ਪੁਚ੍ਛਿਤ੍ਵਾ, ਤਾਹਿ ਤਸ੍ਸਾ ਸਤ੍ਥਰਿ ਆਘਾਤਬਦ੍ਧਭਾਵਂ ਅਜਾਨਨ੍ਤੀਹਿ ‘‘ਸਤ੍ਥਾ ਇਮਂ ਨਗਰਂ ਆਗਤੋ, ਮਯਂ ਏਤ੍ਥ ਠਤ੍ਵਾ ਸਤ੍ਥਾਰਂ ਵਨ੍ਦਾਮ ਚੇਵ ਪੂਜੇਮ ਚਾ’’ਤਿ ਵੁਤ੍ਤੇ, ‘‘ਆਗਤੋ ਨਾਮ ਇਮਂ ਨਗਰਂ ਸਮਣੋ ਗੋਤਮੋ, ਇਦਾਨਿਸ੍ਸ ਕਤ੍ਤਬ੍ਬਂ ਜਾਨਿਸ੍ਸਾਮਿ, ਇਮਾਪਿ ਤਸ੍ਸ ਉਪਟ੍ਠਾਯਿਕਾ, ਇਮਾਸਮ੍ਪਿ ਕਤ੍ਤਬ੍ਬਂ ਜਾਨਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ – ‘‘ਮਹਾਰਾਜ, ਸਾਮਾਵਤਿਮਿਸ੍ਸਿਕਾਨਂ ਬਹਿਦ੍ਧਾ ਪਤ੍ਥਨਾ ਅਤ੍ਥਿ, ਕਤਿਪਾਹੇਨੇਵ ਤੇ ਜੀਵਿਤਂ ਮਾਰੇਸ੍ਸਨ੍ਤੀ’’ਤਿ. ਰਾਜਾ ‘‘ਨ ਤਾ ਏਵਰੂਪਂ ਕਰਿਸ੍ਸਨ੍ਤੀ’’ਤਿ ਨ ਸਦ੍ਦਹਿ. ਪੁਨਪ੍ਪੁਨਂ ਵੁਤ੍ਤੇਪਿ ਨ ਸਦ੍ਦਹਿ ਏਵ. ਅਥ ਨਂ ਏਵਂ ਤਿਕ੍ਖਤ੍ਤੁਂ ਵੁਤ੍ਤੇਪਿ ਅਸਦ੍ਦਹਨ੍ਤਂ ‘‘ਸਚੇ ਮੇ ਨ ਸਦ੍ਦਹਸਿ, ਤਾਸਂ ਵਸਨਟ੍ਠਾਨਂ ਗਨ੍ਤ੍ਵਾ ਉਪਚਾਰੇਹਿ, ਮਹਾਰਾਜਾ’’ਤਿ ਆਹ. ਰਾਜਾ ਗਨ੍ਤ੍ਵਾ ਗਬ੍ਭੇਸੁ ਛਿਦ੍ਦਂ ਦਿਸ੍ਵਾ, ‘‘ਇਦਂ ਕਿ’’ਨ੍ਤਿ ਪੁਚ੍ਛਿਤ੍ਵਾ, ਤਸ੍ਮਿਂ ਅਤ੍ਥੇ ਆਰੋਚਿਤੇ ਤਾਸਂ ਅਕੁਜ੍ਝਿਤ੍ਵਾ, ਕਿਞ੍ਚਿ ਅਵਤ੍ਵਾਵ ਛਿਦ੍ਦਾਨਿ ਪਿਦਹਾਪੇਤ੍ਵਾ ਸਬ੍ਬਗਬ੍ਭੇਸੁ ਉਦ੍ਧਚ੍ਛਿਦ੍ਦਕਵਾਤਪਾਨਾਨਿ ਕਾਰੇਸਿ. ਉਦ੍ਧਚ੍ਛਿਦ੍ਦਕਵਾਤਪਾਨਾਨਿ ਕਿਰ ਤਸ੍ਮਿਂ ਕਾਲੇ ਉਪ੍ਪਨ੍ਨਾਨਿ. ਮਾਗਣ੍ਡਿਯਾ ਤਾਸਂ ਕਿਞ੍ਚਿ ਕਾਤੁਂ ਅਸਕ੍ਕੁਣਿਤ੍ਵਾ, ‘‘ਸਮਣਸ੍ਸ ਗੋਤਮਸ੍ਸੇਵ ਕਤ੍ਤਬ੍ਬਂ ਕਰਿਸ੍ਸਾਮੀ’’ਤਿ ਨਾਗਰਾਨਂ ਲਞ੍ਜਂ ਦਤ੍ਵਾ, ‘‘ਸਮਣਂ ਗੋਤਮਂ ਅਨ੍ਤੋਨਗਰਂ ਪਵਿਸਿਤ੍ਵਾ ਵਿਚਰਨ੍ਤਂ ਦਾਸਕਮ੍ਮਕਰਪੋਰਿਸੇਹਿ ਅਕ੍ਕੋਸੇਤ੍ਵਾ ਪਰਿਭਾਸੇਤ੍ਵਾ ਪਲਾਪੇਥਾ’’ਤਿ ਆਣਾਪੇਸਿ. ਮਿਚ੍ਛਾਦਿਟ੍ਠਿਕਾ ਤੀਸੁ ਰਤਨੇਸੁ ਅਪ੍ਪਸਨ੍ਨਾ ਅਨ੍ਤੋਨਗਰਂ ਪਵਿਟ੍ਠਂ ਸਤ੍ਥਾਰਂ ਅਨੁਬਨ੍ਧਿਤ੍ਵਾ, ‘‘ਚੋਰੋਸਿ, ਬਾਲੋਸਿ, ਮੂਲ਼੍ਹੋਸਿ, ਓਟ੍ਠੋਸਿ, ਗੋਣੋਸਿ, ਗਦ੍ਰਭੋਸਿ, ਨੇਰਯਿਕੋਸਿ, ਤਿਰਚ੍ਛਾਨਗਤੋਸਿ, ਨਤ੍ਥਿ ਤੁਯ੍ਹਂ ਸੁਗਤਿ, ਦੁਗ੍ਗਤਿਯੇਵ ਤੁਯ੍ਹਂ ਪਾਟਿਕਙ੍ਖਾ’’ਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ.

ਤਂ ਸੁਤ੍ਵਾ ਆਯਸ੍ਮਾ ਆਨਨ੍ਦੋ ਸਤ੍ਥਾਰਂ ਏਤਦਵੋਚ – ‘‘ਭਨ੍ਤੇ, ਇਮੇ ਨਾਗਰਾ ਅਮ੍ਹੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ, ਇਤੋ ਅਞ੍ਞਤ੍ਥ ਗਚ੍ਛਾਮਾ’’ਤਿ. ‘‘ਕੁਹਿਂ, ਆਨਨ੍ਦੋਤਿ’’? ‘‘ਅਞ੍ਞਂ ਨਗਰਂ, ਭਨ੍ਤੇ’’ਤਿ. ‘‘ਤਤ੍ਥ ਮਨੁਸ੍ਸੇਸੁ ਅਕ੍ਕੋਸਨ੍ਤੇਸੁ ਪੁਨ ਕਤ੍ਥ ਗਮਿਸ੍ਸਾਮ, ਆਨਨ੍ਦੋ’’ਤਿ? ‘‘ਤਤੋਪਿ ਅਞ੍ਞਂ ਨਗਰਂ, ਭਨ੍ਤੇ’’ਤਿ. ‘‘ਤਤ੍ਥਾਪਿ ਮਨੁਸ੍ਸੇਸੁ ਅਕ੍ਕੋਸਨ੍ਤੇਸੁ ਕੁਹਿਂ ਗਮਿਸ੍ਸਾਮਾ’’ਤਿ? ‘‘ਤਤੋਪਿ ਅਞ੍ਞਂ ਨਗਰਂ, ਭਨ੍ਤੇ’’ਤਿ. ‘‘ਆਨਨ੍ਦ, ਏਵਂ ਕਾਤੁਂ ਨ ਵਟ੍ਟਤਿ. ਯਤ੍ਥ ਅਧਿਕਰਣਂ ਉਪ੍ਪਨ੍ਨਂ, ਤਤ੍ਥੇਵ ਤਸ੍ਮਿਂ ਵੂਪਸਨ੍ਤੇ ਅਞ੍ਞਤ੍ਥ ਗਨ੍ਤੁਂ ਵਟ੍ਟਤਿ. ਕੇ ਪਨ ਤੇ, ਆਨਨ੍ਦ, ਅਕ੍ਕੋਸਨ੍ਤੀ’’ਤਿ? ‘‘ਭਨ੍ਤੇ, ਦਾਸਕਮ੍ਮਕਰੇ ਉਪਾਦਾਯ ਸਬ੍ਬੇ ਅਕ੍ਕੋਸਨ੍ਤੀ’’ਤਿ. ‘‘ਅਹਂ, ਆਨਨ੍ਦ, ਸਙ੍ਗਾਮਂ ਓਤਿਣ੍ਣਹਤ੍ਥਿਸਦਿਸੋ, ਸਙ੍ਗਾਮਂ ਓਤਿਣ੍ਣਹਤ੍ਥਿਨੋ ਹਿ ਚਤੂਹਿ ਦਿਸਾਹਿ ਆਗਤੇ ਸਰੇ ਸਹਿਤੁਂ ਭਾਰੋ, ਤਥੇਵ ਬਹੂਹਿ ਦੁਸ੍ਸੀਲੇਹਿ ਕਥਿਤਕਥਾਨਂ ਸਹਨਂ ਨਾਮ ਮਯ੍ਹਂ ਭਾਰੋ’’ਤਿ ਵਤ੍ਵਾ ਅਤ੍ਤਾਨਂ ਆਰਬ੍ਭ ਧਮ੍ਮਂ ਦੇਸੇਨ੍ਤੋ ਇਮਾ ਨਾਗਵਗ੍ਗੇ ਤਿਸ੍ਸੋ ਗਾਥਾ ਅਭਾਸਿ –

‘‘ਅਹਂ ਨਾਗੋਵ ਸਙ੍ਗਾਮੇ, ਚਾਪਤੋ ਪਤਿਤਂ ਸਰਂ;

ਅਤਿਵਾਕ੍ਯਂ ਤਿਤਿਕ੍ਖਿਸ੍ਸਂ, ਦੁਸ੍ਸੀਲੋ ਹਿ ਬਹੁਜ੍ਜਨੋ.

‘‘ਦਨ੍ਤਂ ਨਯਨ੍ਤਿ ਸਮਿਤਿਂ, ਦਨ੍ਤਂ ਰਾਜਾਭਿਰੂਹਤਿ;

ਦਨ੍ਤੋ ਸੇਟ੍ਠੋ ਮਨੁਸ੍ਸੇਸੁ, ਯੋਤਿਵਾਕ੍ਯਂ ਤਿਤਿਕ੍ਖਤਿ.

‘‘ਵਰਮਸ੍ਸਤਰਾ ਦਨ੍ਤਾ, ਆਜਾਨੀਯਾ ਚ ਸਿਨ੍ਧਵਾ;

ਕੁਞ੍ਜਰਾ ਚ ਮਹਾਨਾਗਾ, ਅਤ੍ਤਦਨ੍ਤੋ ਤਤੋ ਵਰ’’ਨ੍ਤਿ. (ਧ. ਪ. ੩੨੦-੩੨੨);

ਧਮ੍ਮਕਥਾ ਸਮ੍ਪਤ੍ਤਮਹਾਜਨਸ੍ਸ ਸਾਤ੍ਥਿਕਾ ਅਹੋਸਿ. ਏਵਂ ਧਮ੍ਮਂ ਦੇਸੇਤ੍ਵਾ ਮਾ ਚਿਨ੍ਤਯਿ, ਆਨਨ੍ਦ, ਏਤੇ ਸਤ੍ਤਾਹਮਤ੍ਤਮੇਵ ਅਕ੍ਕੋਸਿਸ੍ਸਨ੍ਤਿ, ਅਟ੍ਠਮੇ ਦਿਵਸੇ ਤੁਣ੍ਹੀ ਭਵਿਸ੍ਸਨ੍ਤਿ, ਬੁਦ੍ਧਾਨਞ੍ਹਿ ਉਪ੍ਪਨ੍ਨਂ ਅਧਿਕਰਣਂ ਸਤ੍ਤਾਹਤੋ ਉਤ੍ਤਰਿ ਨ ਗਚ੍ਛਤਿ. ਮਾਗਣ੍ਡਿਯਾ ਸਤ੍ਥਾਰਂ ਅਕ੍ਕੋਸਾਪੇਤ੍ਵਾ ਪਲਾਪੇਤੁਂ ਅਸਕ੍ਕੋਨ੍ਤੀ, ‘‘ਕਿਂ ਨੁ ਖੋ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਇਮਾ ਏਤਸ੍ਸ ਉਪਤ੍ਥਮ੍ਭਭੂਤਾ, ਏਤਾਸਮ੍ਪਿ ਬ੍ਯਸਨਂ ਕਰਿਸ੍ਸਾਮੀ’’ਤਿ ਏਕਦਿਵਸਂ ਰਞ੍ਞੋ ਸੁਰਾਪਾਨਟ੍ਠਾਨੇ ਉਪਟ੍ਠਾਨਂ ਕਰੋਨ੍ਤੀ ਚੂਲ਼ਪਿਤੁ ਸਾਸਨਂ ਪਹਿਣਿ ‘‘ਅਤ੍ਥੋ ਮੇ ਕਿਰ ਕੁਕ੍ਕੁਟੇਹਿ, ਅਟ੍ਠ ਮਤਕੁਕ੍ਕੁਟੇ, ਅਟ੍ਠ ਸਜੀਵਕੁਕ੍ਕੁਟੇ ਚ ਗਹੇਤ੍ਵਾ ਆਗਚ੍ਛਤੁ, ਆਗਨ੍ਤ੍ਵਾ ਚ ਸੋਪਾਨਮਤ੍ਥਕੇ ਠਤ੍ਵਾ ਆਗਤਭਾਵਂ ਨਿਵੇਦੇਤ੍ਵਾ ‘ਪਵਿਸਤੂ’ਤਿ ਵੁਤ੍ਤੇਪਿ ਅਪਵਿਸਿਤ੍ਵਾ ਪਠਮਂ ਅਟ੍ਠ ਸਜੀਵਕੁਕ੍ਕੁਟੇ ਪਹਿਣਤੁ, ‘ਪਚ੍ਛਾ ਇਤਰੇ’’’ਤਿ. ਚੂਲ਼ਾਪਟ੍ਠਾਕਸ੍ਸ ਚ ‘‘ਮਮ ਵਚਨਂ ਕਰੇਯ੍ਯਾਸੀ’’ਤਿ ਲਞ੍ਜਂ ਅਦਾਸਿ. ਮਾਗਣ੍ਡਿਯੋ ਆਗਨ੍ਤ੍ਵਾ, ਰਞ੍ਞੋ ਨਿਵੇਦਾਪੇਤ੍ਵਾ, ‘‘ਪਵਿਸਤੂ’’ਤਿ ਵੁਤ੍ਤੇ, ‘‘ਰਞ੍ਞੋ ਆਪਾਨਭੂਮਿਂ ਨ ਪਵਿਸਿਸ੍ਸਾਮੀ’’ਤਿ ਆਹ. ਇਤਰਾ ਚੂਲ਼ੁਪਟ੍ਠਾਕਂ ਪਹਿਣਿ – ‘‘ਗਚ੍ਛ, ਤਾਤ, ਮਮ ਚੂਲ਼ਪਿਤੁ ਸਨ੍ਤਿਕ’’ਨ੍ਤਿ. ਸੋ ਗਨ੍ਤ੍ਵਾ ਤੇਨ ਦਿਨ੍ਨੇ ਅਟ੍ਠ ਸਜੀਵਕੁਕ੍ਕੁਟੇ ਆਨੇਤ੍ਵਾ, ‘‘ਦੇਵ, ਪੁਰੋਹਿਤੇਨ ਪਣ੍ਣਾਕਾਰੋ ਪਹਿਤੋ’’ਤਿ ਆਹ. ਰਾਜਾ ‘‘ਭਦ੍ਦਕੋ ਵਤ ਨੋ ਉਤ੍ਤਰਿਭਙ੍ਗੋ ਉਪ੍ਪਨ੍ਨੋ, ਕੋ ਨੁ ਖੋ ਪਚੇਯ੍ਯਾ’’ਤਿ ਆਹ. ਮਾਗਣ੍ਡਿਯਾ, ‘‘ਮਹਾਰਾਜ, ਸਾਮਾਵਤਿਪ੍ਪਮੁਖਾ ਪਞ੍ਚਸਤਾ ਇਤ੍ਥਿਯੋ ਨਿਕ੍ਕਮ੍ਮਿਕਾ ਵਿਚਰਨ੍ਤਿ, ਤਾਸਂ ਪੇਸੇਹਿ, ਤਾ ਪਚਿਤ੍ਵਾ ਆਹਰਿਸ੍ਸਨ੍ਤੀ’’ਤਿ ਆਹ. ਰਾਜਾ ‘‘ਗਚ੍ਛ, ਤਾਸਂ ਦਤ੍ਵਾ ਅਞ੍ਞਸ੍ਸ ਕਿਰ ਹਤ੍ਥੇ ਅਦਤ੍ਵਾ ਸਯਮੇਵ ਮਾਰੇਤ੍ਵਾ ਪਚਨ੍ਤੂ’’ਤਿ ਪੇਸੇਸਿ. ਚੂਲ਼ੁਪਟ੍ਠਾਕੋ ‘‘ਸਾਧੁ ਦੇਵਾ’’ਤਿ ਗਨ੍ਤ੍ਵਾ ਤਥਾ ਵਤ੍ਵਾ ਤਾਹਿ ‘‘ਮਯਂ ਪਾਣਾਤਿਪਾਤਂ ਨ ਕਰੋਮਾ’’ਤਿ ਪਟਿਕ੍ਖਿਤ੍ਤੋ ਆਗਨ੍ਤ੍ਵਾ ਤਮਤ੍ਥਂ ਰਞ੍ਞੋ ਆਰੋਚੇਸਿ. ਮਾਗਣ੍ਡਿਯਾ ‘‘ਦਿਟ੍ਠਂ ਤੇ, ਮਹਾਰਾਜ, ਇਦਾਨਿ ਤਾਸਂ ਪਾਣਾਤਿਪਾਤਸ੍ਸ ਕਰਣਂ ਵਾ ਅਕਰਣਂ ਵਾ ਜਾਨਿਸ੍ਸਸਿ, ‘ਸਮਣਸ੍ਸ ਗੋਤਮਸ੍ਸ ਪਚਿਤ੍ਵਾ ਪੇਸੇਨ੍ਤੂ’ਤਿ ਵਦੇਹਿ ਦੇਵਾ’’ਤਿ ਆਹ. ਰਾਜਾ ਤਥਾ ਵਤ੍ਵਾ ਪੇਸੇਸਿ. ਇਤਰੋ ਤੇ ਗਹੇਤ੍ਵਾ ਗਚ੍ਛਨ੍ਤੋ ਵਿਯ ਹੁਤ੍ਵਾ ਗਨ੍ਤ੍ਵਾ ਤੇ ਕੁਕ੍ਕੁਟੇ ਪੁਰੋਹਿਤਸ੍ਸ ਦਤ੍ਵਾ ਮਤਕੁਕ੍ਕੁਟੇ ਤਾਸਂ ਸਨ੍ਤਿਕਂ ਨੇਤ੍ਵਾ, ‘‘ਇਮੇ ਕਿਰ ਕੁਕ੍ਕੁਟੇ ਪਚਿਤ੍ਵਾ ਸਤ੍ਥੁ ਸਨ੍ਤਿਕਂ ਪਹਿਣਥਾ’’ਤਿ ਆਹ. ਤਾ, ‘‘ਸਾਮਿ, ਆਹਰ, ਇਦਂ ਨਾਮ ਅਮ੍ਹਾਕਂ ਕਿਚ੍ਚ’’ਨ੍ਤਿ ਪਚ੍ਚੁਗ੍ਗਨ੍ਤ੍ਵਾ ਗਣ੍ਹਿਂਸੁ. ਸੋ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ, ‘‘ਕਿਂ, ਤਾਤਾ’’ਤਿ ਪੁਟ੍ਠੋ, ‘‘ਸਮਣਸ੍ਸ ਗੋਤਮਸ੍ਸ ਪਚਿਤ੍ਵਾ ਪੇਸੇਥਾਤਿ ਵੁਤ੍ਤਮਤ੍ਤੇਯੇਵ ਪਟਿਮਗ੍ਗਂ ਆਗਨ੍ਤ੍ਵਾ ਗਣ੍ਹਿਂਸੂ’’ਤਿ ਆਚਿਕ੍ਖਿ. ਮਾਗਣ੍ਡਿਯਾ ‘‘ਪਸ੍ਸ, ਮਹਾਰਾਜ, ਨ ਤਾ ਤੁਮ੍ਹਾਦਿਸਾਨਂ ਕਰੋਨ੍ਤਿ, ਬਹਿਦ੍ਧਾ ਪਤ੍ਥਨਾ ਤਾਸਂ ਅਤ੍ਥੀਤਿ ਵੁਤ੍ਤੇ ਨ ਸਦ੍ਦਹਸੀ’’ਤਿ ਆਹ. ਰਾਜਾ ਤਂ ਸੁਤ੍ਵਾਪਿ ਅਧਿਵਾਸੇਤ੍ਵਾ ਤੁਣ੍ਹੀਯੇਵ ਅਹੋਸਿ. ਮਾਗਣ੍ਡਿਯਾ ‘‘ਕਿਂ ਨੁ ਖੋ ਕਰਿਸ੍ਸਾਮੀ’’ਤਿ ਚਿਨ੍ਤੇਸਿ.

ਤਦਾ ਪਨ ਰਾਜਾ ‘‘ਸਾਮਾਵਤਿਯਾ ਵਾਸੁਲਦਤ੍ਤਾਯ ਮਾਗਣ੍ਡਿਯਾਯ ਚਾ’’ਤਿ ਤਿਸ੍ਸਨ੍ਨਮ੍ਪਿ ਏਤਾਸਂ ਪਾਸਾਦਤਲੇ ਵਾਰੇਨ ਵਾਰੇਨ ਸਤ੍ਤਾਹਂ ਸਤ੍ਤਾਹਂ ਵੀਤਿਨਾਮੇਤਿ. ਅਥ ਨਂ ‘‘ਸ੍ਵੇ ਵਾ ਪਰਸੁਵੇ ਵਾ ਸਾਮਾਵਤਿਯਾ ਪਾਸਾਦਤਲਂ ਗਮਿਸ੍ਸਤੀ’’ਤਿ ਞਤ੍ਵਾ ਮਾਗਣ੍ਡਿਯਾ ਚੂਲ਼ਪਿਤੁ ਸਾਸਨਂ ਪਹਿਣਿ – ‘‘ਅਗਦੇਨ ਕਿਰ ਦਾਠਾ ਧੋਵਿਤ੍ਵਾ ਏਕਂ ਸਪ੍ਪਂ ਪੇਸੇਤੂ’’ਤਿ. ਸੋ ਤਥਾ ਕਤ੍ਵਾ ਪੇਸੇਸਿ. ਰਾਜਾ ਅਤ੍ਤਨੋ ਗਮਨਟ੍ਠਾਨਂ ਹਤ੍ਥਿਕਨ੍ਤਵੀਣਂ ਆਦਾਯਯੇਵ ਗਚ੍ਛਤਿ, ਤਸ੍ਸਾ ਪੋਕ੍ਖਰੇ ਏਕਂ ਛਿਦ੍ਦਂ ਅਤ੍ਥਿ. ਮਾਗਣ੍ਡਿਯਾ ਤੇਨ ਛਿਦ੍ਦੇਨ ਸਪ੍ਪਂ ਪਵੇਸੇਤ੍ਵਾ ਛਿਦ੍ਦਂ ਮਾਲਾਗੁਲ਼ੇਨ ਥਕੇਸਿ. ਸਪ੍ਪੋ ਦ੍ਵੀਹਤੀਹਂ ਅਨ੍ਤੋਵੀਣਾਯਮੇਵ ਅਹੋਸਿ. ਮਾਗਣ੍ਡਿਯਾ ਰਞ੍ਞੋ ਗਮਨਦਿਵਸੇ ‘‘ਅਜ੍ਜ ਕਤਰਿਸ੍ਸਿਤ੍ਥਿਯਾ ਪਾਸਾਦਂ ਗਮਿਸ੍ਸਸਿ ਦੇਵਾ’’ਤਿ ਪੁਚ੍ਛਿਤ੍ਵਾ ‘‘ਸਾਮਾਵਤਿਯਾ’’ਤਿ ਵੁਤ੍ਤੇ, ‘‘ਅਜ੍ਜ ਮਯਾ, ਮਹਾਰਾਜ, ਅਮਨਾਪੋ ਸੁਪਿਨੋ ਦਿਟ੍ਠੋ. ਨ ਸਕ੍ਕਾ ਤਤ੍ਥ ਗਨ੍ਤੁਂ, ਦੇਵਾ’’ਤਿ? ‘‘ਗਚ੍ਛਾਮੇਵਾ’’ਤਿ. ਸਾ ਯਾਵ ਤਤਿਯਂ ਵਾਰੇਤ੍ਵਾ, ‘‘ਏਵਂ ਸਨ੍ਤੇ ਅਹਮ੍ਪਿ ਤੁਮ੍ਹੇਹਿ ਸਦ੍ਧਿਂ ਗਮਿਸ੍ਸਾਮਿ, ਦੇਵਾ’’ਤਿ ਵਤ੍ਵਾ ਨਿਵਤ੍ਤਿਯਮਾਨਾਪਿ ਅਨਿਵਤ੍ਤਿਤ੍ਵਾ, ‘‘ਨ ਜਾਨਾਮਿ, ਕਿਂ ਭਵਿਸ੍ਸਤਿ ਦੇਵਾ’’ਤਿ ਰਞ੍ਞਾ ਸਦ੍ਧਿਂਯੇਵ ਅਗਮਾਸਿ.

ਰਾਜਾ ਸਾਮਾਵਤਿਮਿਸ੍ਸਿਕਾਹਿ ਦਿਨ੍ਨਾਨਿ ਵਤ੍ਥਪੁਪ੍ਫਗਨ੍ਧਾਭਰਣਾਨਿ ਧਾਰੇਤ੍ਵਾ ਸੁਭੋਜਨਂ ਭੁਞ੍ਜਿਤ੍ਵਾ ਵੀਣਂ ਉਸ੍ਸੀਸਕੇ ਠਪੇਤ੍ਵਾ ਸਯਨੇ ਨਿਪਜ੍ਜਿ. ਮਾਗਣ੍ਡਿਯਾ ਅਪਰਾਪਰਂ ਵਿਚਰਨ੍ਤੀ ਵਿਯ ਹੁਤ੍ਵਾ ਵੀਣਾਛਿਦ੍ਦਤੋ ਪੁਪ੍ਫਗੁਲ਼ਂ ਅਪਨੇਸਿ. ਸਪ੍ਪੋ ਦ੍ਵੀਹਤੀਹਂ ਨਿਰਾਹਾਰੋ ਤੇਨ ਛਿਦ੍ਦੇਨ ਨਿਕ੍ਖਮਿਤ੍ਵਾ ਪਸ੍ਸਸਨ੍ਤੋ ਫਣਂ ਕਤ੍ਵਾ ਸਯਨਪਿਟ੍ਠੇ ਨਿਪਜ੍ਜਿ. ਮਾਗਣ੍ਡਿਯਾ ਤਂ ਦਿਸ੍ਵਾ, ‘‘ਧੀ ਧੀ, ਦੇਵ, ਸਪ੍ਪੋ’’ਤਿ ਮਹਾਸਦ੍ਦਂ ਕਤ੍ਵਾ ਰਾਜਾਨਞ੍ਚ ਤਾ ਚ ਅਕ੍ਕੋਸਨ੍ਤੀ, ‘‘ਅਯਂ ਅਨ੍ਧਬਾਲਰਾਜਾ ਅਲਕ੍ਖਿਕੋ ਮਯ੍ਹਂ ਵਚਨਂ ਨ ਸੁਣਾਤਿ, ਇਮਾਪਿ ਨਿਸ੍ਸਿਰੀਕਾ ਦੁਬ੍ਬਿਨੀਤਾ, ਕਿਂ ਨਾਮ ਰਞ੍ਞੋ ਸਨ੍ਤਿਕਾ ਨ ਲਭਨ੍ਤਿ, ਕਿਂ ਨੁ ਤੁਮ੍ਹੇ ਇਮਸ੍ਮਿਂ ਮਤੇਯੇਵ ਸੁਖਂ ਜੀਵਿਸ੍ਸਥ, ਜੀਵਨ੍ਤੇ ਦੁਕ੍ਖਂ ਜੀਵਥ, ‘ਅਜ੍ਜ ਮਯਾ ਪਾਪਸੁਪਿਨੋ ਦਿਟ੍ਠੋ, ਸਾਮਾਵਤਿਯਾ ਪਾਸਾਦਂ ਗਨ੍ਤੁਂ ਨ ਵਟ੍ਟਤੀ’ਤਿ ਵਾਰੇਨ੍ਤਿਯਾਪਿ ਮੇ ਵਚਨਂ ਨ ਸੁਣਸਿ, ਦੇਵਾ’’ਤਿ ਆਹ. ਰਾਜਾ ਸਪ੍ਪਂ ਦਿਸ੍ਵਾ ਮਰਣਭਯਤਜ੍ਜਿਤੋ ‘‘ਏਵਰੂਪਮ੍ਪਿ ਨਾਮ ਇਮਾ ਕਰਿਸ੍ਸਨ੍ਤਿ, ਅਹੋ ਪਾਪਾ, ਅਹਂ ਇਮਾਸਂ ਪਾਪਭਾਵਂ ਆਚਿਕ੍ਖਨ੍ਤਿਯਾਪਿ ਇਮਿਸ੍ਸਾ ਵਚਨਂ ਨ ਸਦ੍ਦਹਿਂ, ਪਠਮਂ ਅਤ੍ਤਨੋ ਗਬ੍ਭੇਸੁ ਛਿਦ੍ਦਾਨਿ ਕਤ੍ਵਾ ਨਿਸਿਨ੍ਨਾ, ਪੁਨ ਮਯਾ ਪੇਸਿਤੇ ਕੁਕ੍ਕੁਟੇ ਪਟਿਪਹਿਣਿਂਸੁ, ਅਜ੍ਜ ਸਯਨੇ ਸਪ੍ਪਂ ਵਿਸ੍ਸਜ੍ਜਿਂਸੂ’’ਤਿ ਕੋਧੇਨ ਸਮ੍ਪਜ੍ਜਲਿਤੋ ਵਿਯ ਅਹੋਸਿ.

ਸਾਮਾਵਤੀਪਿ ਪਞ੍ਚਨ੍ਨਂ ਇਤ੍ਥਿਸਤਾਨਂ ਓਵਾਦਂ ਅਦਾਸਿ – ‘‘ਅਮ੍ਮਾ, ਅਮ੍ਹਾਕਂ ਅਞ੍ਞਂ ਪਟਿਸਰਣਂ ਨਤ੍ਥਿ, ਨਰਿਨ੍ਦੇ ਚ ਦੇਵਿਯਾ ਚ ਅਤ੍ਤਨਿ ਚ ਸਮਮੇਵ ਮੇਤ੍ਤਚਿਤ੍ਤਂ ਪਵਤ੍ਤੇਥ, ਮਾ ਕਸ੍ਸਚਿ ਕੋਪਂ ਕਰਿਤ੍ਥਾ’’ਤਿ. ਰਾਜਾ ਸਹਸ੍ਸਥਾਮਂ ਸਿਙ੍ਗਧਨੁਂ ਆਦਾਯ ਜਿਯਂ ਪੋਥੇਤ੍ਵਾ ਵਿਸਪੀਤਂ ਸਰਂ ਸਨ੍ਨਯ੍ਹਿਤ੍ਵਾ ਸਾਮਾਵਤਿਂ ਧੁਰੇ ਕਤ੍ਵਾ ਸਬ੍ਬਾ ਤਾ ਪਟਿਪਾਟਿਯਾ ਠਪਾਪੇਤ੍ਵਾ ਸਾਮਾਵਤਿਯਾ ਉਰੇ ਸਰਂ ਵਿਸ੍ਸਜ੍ਜੇਸਿ. ਸੋ ਤਸ੍ਸਾ ਮੇਤ੍ਤਾਨੁਭਾਵੇਨ ਪਟਿਨਿਵਤ੍ਤਿਤ੍ਵਾ ਆਗਤਮਗ੍ਗਾਭਿਮੁਖੋਵ ਹੁਤ੍ਵਾ ਰਞ੍ਞੋ ਹਦਯਂ ਪਵਿਸਨ੍ਤੋ ਵਿਯ ਅਟ੍ਠਾਸਿ. ਰਾਜਾ ਚਿਨ੍ਤੇਸਿ – ‘‘ਮਯਾ ਖਿਤ੍ਤੋ ਸਰੋ ਸਿਲਮ੍ਪਿ ਵਿਨਿਵਿਜ੍ਝਿਤ੍ਵਾ ਗਚ੍ਛਤਿ, ਆਕਾਸੇ ਪਟਿਹਨਨਕਟ੍ਠਾਨਂ ਨਤ੍ਥਿ, ਅਥ ਚ ਪਨੇਸ ਨਿਵਤ੍ਤਿਤ੍ਵਾ ਮਮ ਹਦਯਾਭਿਮੁਖੋ ਜਾਤੋ, ਅਯਞ੍ਹਿ ਨਾਮ ਨਿਸ੍ਸਤ੍ਤੋ ਨਿਜ੍ਜੀਵੋ ਸਰੋਪਿ ਏਤਿਸ੍ਸਾ ਗੁਣਂ ਜਾਨਾਤਿ, ਅਹਂ ਮਨੁਸ੍ਸਭੂਤੋਪਿ ਨ ਜਾਨਾਮੀ’’ਤਿ, ਸੋ ਧਨੁਂ ਛਡ੍ਡੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਸਾਮਾਵਤਿਯਾ ਪਾਦਮੂਲੇ ਉਕ੍ਕੁਟਿਕਂ ਨਿਸੀਦਿਤ੍ਵਾ ਇਮਂ ਗਾਥਮਾਹ –

‘‘ਸਮ੍ਮੁਯ੍ਹਾਮਿ ਪਮੁਯ੍ਹਾਮਿ, ਸਬ੍ਬਾ ਮੁਯ੍ਹਨ੍ਤਿ ਮੇ ਦਿਸਾ;

ਸਾਮਾਵਤਿ ਮਂ ਤਾਯਸ੍ਸੁ, ਤ੍ਵਞ੍ਚ ਮੇ ਸਰਣਂ ਭਵਾ’’ਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ, ‘‘ਸਾਧੁ, ਦੇਵ, ਮਂ ਸਰਣਂ ਗਚ੍ਛਾ’’ਤਿ ਅਵਤ੍ਵਾ, ‘‘ਯਮਹਂ, ਮਹਾਰਾਜ, ਸਰਣਂ ਗਤਾ, ਤਮੇਵ ਤ੍ਵਮ੍ਪਿ ਸਰਣਂ ਗਚ੍ਛਾਹੀ’’ਤਿ ਇਦਂ ਵਤ੍ਵਾ ਸਾਮਾਵਤੀ ਸਮ੍ਮਾਸਮ੍ਬੁਦ੍ਧਸਾਵਿਕਾ –

‘‘ਮਾ ਮਂ ਤ੍ਵਂ ਸਰਣਂ ਗਚ੍ਛ, ਯਮਹਂ ਸਰਣਂ ਗਤਾ;

ਏਸ ਬੁਦ੍ਧੋ ਮਹਾਰਾਜ, ਏਸ ਬੁਦ੍ਧੋ ਅਨੁਤ੍ਤਰੋ;

ਸਰਣਂ ਗਚ੍ਛ ਤਂ ਬੁਦ੍ਧਂ, ਤ੍ਵਞ੍ਚ ਮੇ ਸਰਣਂ ਭਵਾ’’ਤਿ. –

ਆਹ. ਰਾਜਾ ਤਸ੍ਸ ਵਚਨਂ ਸੁਤ੍ਵਾ, ‘‘ਇਦਾਨਾਹਂ ਅਤਿਰੇਕਤਰਂ ਭਾਯਾਮੀ’’ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਏਸ ਭਿਯ੍ਯੋ ਪਮੁਯ੍ਹਾਮਿ, ਸਬ੍ਬਾ ਮੁਯ੍ਹਨ੍ਤਿ ਮੇ ਦਿਸਾ;

ਸਾਮਾਵਤਿ ਮਂ ਤਾਯਸ੍ਸੁ, ਤ੍ਵਞ੍ਚ ਮੇ ਸਰਣਂ ਭਵਾ’’ਤਿ.

ਅਥ ਨਂ ਸਾ ਪੁਰਿਮਨਯੇਨੇਵ ਪੁਨ ਪਟਿਕ੍ਖਿਪਿਤ੍ਵਾ, ‘‘ਤੇਨ ਹਿ ਤ੍ਵਞ੍ਚ ਸਰਣਂ ਗਚ੍ਛਾਮਿ, ਸਤ੍ਥਾਰਞ੍ਚ ਸਰਣਂ ਗਚ੍ਛਾਮਿ, ਵਰਞ੍ਚ ਤੇ ਦਮ੍ਮੀ’’ਤਿ ਵੁਤ੍ਤੇ, ‘‘ਵਰੋ ਗਹਿਤੋ ਹੋਤੁ, ਮਹਾਰਾਜਾ’’ਤਿ ਆਹ. ਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਸਰਣਂ ਗਨ੍ਤ੍ਵਾ ਨਿਮਨ੍ਤੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਸਾਮਾਵਤਿਂ ਆਮਨ੍ਤੇਤ੍ਵਾ, ‘‘ਉਟ੍ਠੇਹਿ, ਵਰਂ ਗਣ੍ਹਾ’’ਤਿ ਆਹ. ‘‘ਮਹਾਰਾਜ, ਮਯ੍ਹਂ ਹਿਰਞ੍ਞਾਦੀਹਿ ਅਤ੍ਥੋ ਨਤ੍ਥਿ, ਇਮਂ ਪਨ ਮੇ ਵਰਂ ਦੇਹਿ, ਤਥਾ ਕਰੋਹਿ, ਯਥਾ ਸਤ੍ਥਾ ਨਿਬਦ੍ਧਂ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਇਧਾਗਚ੍ਛਤਿ, ਧਮ੍ਮਂ ਸੁਣਿਸ੍ਸਾਮੀ’’ਤਿ. ਰਾਜਾ ਸਤ੍ਥਾਰਂ ਵਨ੍ਦਿਤ੍ਵਾ, ‘‘ਭਨ੍ਤੇ, ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਨਿਬਦ੍ਧਂ ਇਧਾਗਚ੍ਛਥ, ਸਾਮਾਵਤਿਮਿਸ੍ਸਿਕਾ ‘ਧਮ੍ਮਂ ਸੁਣਿਸ੍ਸਾਮਾ’ਤਿ ਵਦਨ੍ਤੀ’’ਤਿ ਆਹ. ‘‘ਮਹਾਰਾਜ, ਬੁਦ੍ਧਾਨਂ ਨਾਮ ਏਕਸ੍ਮਿਂ ਠਾਨੇ ਨਿਬਦ੍ਧਂ ਗਨ੍ਤੁਂ ਨ ਵਟ੍ਟਤਿ, ਮਹਾਜਨੋ ਸਤ੍ਥਾਰਂ ਆਗਮਨਤ੍ਥਾਯ ਪਚ੍ਚਾਸੀਸਤੀ’’ਤਿ. ‘‘ਤੇਨ ਹਿ, ਭਨ੍ਤੇ, ਏਕਂ ਭਿਕ੍ਖੁਂ ਆਣਾਪੇਥਾ’’ਤਿ. ਸਤ੍ਥਾ ਆਨਨ੍ਦਤ੍ਥੇਰਂ ਆਣਾਪੇਸਿ. ਸੋ ਤਤੋ ਪਟ੍ਠਾਯ ਪਞ੍ਚ ਭਿਕ੍ਖੁਸਤਾਨਿ ਆਦਾਯ ਨਿਬਦ੍ਧਂ ਰਾਜਕੁਲਂ ਗਚ੍ਛਤਿ. ਤਾਪਿ ਦੇਵਿਯੋ ਨਿਬਦ੍ਧਂ ਥੇਰਂ ਸਪਰਿਵਾਰਂ ਭੋਜੇਨ੍ਤਿ, ਧਮ੍ਮਂ ਸੁਣਨ੍ਤਿ. ਤਾ ਏਕਦਿਵਸਂ ਥੇਰਸ੍ਸ ਧਮ੍ਮਕਥਂ ਸੁਤ੍ਵਾ ਪਸੀਦਿਤ੍ਵਾ, ਪਞ੍ਚਹਿ ਉਤ੍ਤਰਾਸਙ੍ਗਸਤੇਹਿ ਧਮ੍ਮਪੂਜਂ ਅਕਂਸੁ. ਏਕੇਕੋ ਉਤ੍ਤਰਾਸਙ੍ਗੋ ਪਞ੍ਚ ਸਤਾਨਿ ਪਞ੍ਚ ਸਤਾਨਿ ਅਗ੍ਘਤਿ.

ਤਾ ਏਕਵਤ੍ਥਾ ਦਿਸ੍ਵਾ ਰਾਜਾ ਪੁਚ੍ਛਿ – ‘‘ਕੁਹਿਂ ਵੋ ਉਤ੍ਤਰਾਸਙ੍ਗੋ’’ਤਿ. ‘‘ਅਯ੍ਯਸ੍ਸ ਨੋ ਦਿਨ੍ਨਾ’’ਤਿ. ‘‘ਤੇਨ ਸਬ੍ਬੇ ਗਹਿਤਾ’’ਤਿ? ‘‘ਆਮ, ਗਹਿਤਾ’’ਤਿ. ਰਾਜਾ ਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਤਾਹਿ ਉਤ੍ਤਰਾਸਙ੍ਗਾਨਂ ਦਿਨ੍ਨਭਾਵਂ ਪੁਚ੍ਛਿਤ੍ਵਾ ਤਾਹਿ ਦਿਨ੍ਨਭਾਵਞ੍ਚ ਥੇਰੇਨ ਗਹਿਤਭਾਵਞ੍ਚ ਸੁਤ੍ਵਾ, ‘‘ਨਨੁ, ਭਨ੍ਤੇ, ਅਤਿਬਹੂਨਿ ਵਤ੍ਥਾਨਿ, ਏਤ੍ਤਕੇਹਿ ਕਿਂ ਕਰਿਸ੍ਸਥਾ’’ਤਿ ਪੁਚ੍ਛਿ. ‘‘ਅਮ੍ਹਾਕਂ ਪਹੋਨਕਾਨਿ ਵਤ੍ਥਾਨਿ ਗਣ੍ਹਿਤ੍ਵਾ ਸੇਸਾਨਿ ਜਿਣ੍ਣਚੀਵਰਿਕਾਨਂ ਭਿਕ੍ਖੂਨਂ ਦਸ੍ਸਾਮਿ, ਮਹਾਰਾਜਾ’’ਤਿ. ‘‘ਤੇ ਅਤ੍ਤਨੋ ਜਿਣ੍ਣਚੀਵਰਾਨਿ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਜਿਣ੍ਣਤਰਚੀਵਰਿਕਾਨਂ ਦਸ੍ਸਨ੍ਤੀ’’ਤਿ. ‘‘ਤੇ ਅਤ੍ਤਨੋ ਜਿਣ੍ਣਤਰਚੀਵਰਾਨਿ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਪਚ੍ਚਤ੍ਥਰਣਾਨਿ ਕਰਿਸ੍ਸਨ੍ਤੀ’’ਤਿ. ‘‘ਪੁਰਾਣਪਚ੍ਚਤ੍ਥਰਣਾਨਿ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਭੂਮਤ੍ਥਰਣਾਨਿ ਕਰਿਸ੍ਸਨ੍ਤੀ’’ਤਿ. ‘‘ਪੁਰਾਣਭੂਮਤ੍ਥਰਣਾਨਿ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਪਾਦਪੁਞ੍ਛਨਾਨਿ ਕਰਿਸ੍ਸਨ੍ਤਿ, ਮਹਾਰਾਜਾ’’ਤਿ. ‘‘ਪੁਰਾਣਪਾਦਪੁਞ੍ਛਨਾਨਿ ਕਿਂ ਕਰਿਸ੍ਸਨ੍ਤੀ’’ਤਿ? ‘‘ਖਣ੍ਡਾਖਣ੍ਡਿਕਂ ਕੋਟ੍ਟੇਤ੍ਵਾ ਮਤ੍ਤਿਕਾਯ ਮਦ੍ਦਿਤ੍ਵਾ ਭਿਤ੍ਤਿਂ ਲਿਮ੍ਪਿਸ੍ਸਨ੍ਤੀ’’ਤਿ. ‘‘ਭਨ੍ਤੇ, ਏਤ੍ਤਕਾਨਿ ਕਤ੍ਵਾਪਿ ਅਯ੍ਯਾਨਂ ਦਿਨ੍ਨਾਨਿ ਨ ਨਸ੍ਸਨ੍ਤੀ’’ਤਿ? ‘‘ਆਮ, ਮਹਾਰਾਜਾ’’ਤਿ. ਰਾਜਾ ਪਸਨ੍ਨੋ ਅਪਰਾਨਿਪਿ ਪਞ੍ਚ ਵਤ੍ਥਸਤਾਨਿ ਆਹਰਾਪੇਤ੍ਵਾ ਥੇਰਸ੍ਸ ਪਾਦਮੂਲੇ ਠਪਾਪੇਸਿ. ਥੇਰੋ ਕਿਰ ਪਞ੍ਚਸਤਗ੍ਘਨਕਾਨੇਵ ਵਤ੍ਥਾਨਿ ਪਞ੍ਚਸਤਭਾਗੇਨ ਪਾਦਮੂਲੇ ਠਪੇਤ੍ਵਾ ਦਿਨ੍ਨਾਨਿ ਪਞ੍ਚਸਤਕ੍ਖਤ੍ਤੁਂ ਲਭਿ, ਸਹਸ੍ਸਗ੍ਘਨਕਾਨਿ ਸਹਸ੍ਸਭਾਗੇਨ ਪਾਦਮੂਲੇ ਠਪੇਤ੍ਵਾ ਦਿਨ੍ਨਾਨਿ ਸਹਸ੍ਸਕ੍ਖਤ੍ਤੁਂ ਲਭਿ, ਸਤਸਹਸ੍ਸਗ੍ਘਨਕਾਨਿ ਸਤਸਹਸ੍ਸਭਾਗੇਨ ਪਾਦਮੂਲੇ ਠਪੇਤ੍ਵਾ ਦਿਨ੍ਨਾਨਿ ਸਤਸਹਸ੍ਸਕ੍ਖਤ੍ਤੁਂ ਲਭਿ. ਏਕਂ ਦ੍ਵੇ ਤੀਣਿ ਚਤ੍ਤਾਰਿ ਪਞ੍ਚ ਦਸਾਤਿਆਦਿਨਾ ਨਯੇਨ ਲਦ੍ਧਾਨਂ ਪਨ ਗਣਨਾ ਨਾਮ ਨਤ੍ਥਿ. ਤਥਾਗਤੇ ਕਿਰ ਪਰਿਨਿਬ੍ਬੁਤੇ ਥੇਰੋ ਸਕਲਜਮ੍ਬੁਦੀਪਂ ਵਿਚਰਿਤ੍ਵਾ ਸਬ੍ਬਵਿਹਾਰੇਸੁ ਭਿਕ੍ਖੂਨਂ ਅਤ੍ਤਨੋ ਸਨ੍ਤਕਾਨੇਵ ਪਤ੍ਤਚੀਵਰਾਨਿ ਅਦਾਸਿ.

ਤਦਾ ਮਾਗਣ੍ਡਿਯਾਪਿ ‘‘ਯਮਹਂ ਕਰੋਮਿ. ਤਂ ਤਥਾ ਅਹੁਤ੍ਵਾ ਅਞ੍ਞਥਾਵ ਹੋਤਿ, ਇਦਾਨਿ ਕਿਂ ਨੁ ਖੋ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ‘‘ਅਤ੍ਥੇਸੋ ਉਪਾਯੋ’’ਤਿ ਰਞ੍ਞੇ ਉਯ੍ਯਾਨਕੀਲ਼ਂ ਗਚ੍ਛਨ੍ਤੇ ਚੂਲ਼ਪਿਤੁ ਸਾਸਨਂ ਪਹਿਣਿ – ‘‘ਸਾਮਾਵਤਿਯਾ ਪਾਸਾਦਂ ਗਨ੍ਤ੍ਵਾ, ਦੁਸ੍ਸਕੋਟ੍ਠਾਗਾਰਾਨਿ ਚ ਤੇਲਕੋਟ੍ਠਾਗਾਰਾਨਿ ਚ ਵਿਵਰਾਪੇਤ੍ਵਾ, ਦੁਸ੍ਸਾਨਿ ਤੇਲਚਾਟੀਸੁ ਤੇਮੇਤ੍ਵਾ ਤੇਮੇਤ੍ਵਾ ਥਮ੍ਭੇ ਵੇਠੇਤ੍ਵਾ ਤਾ ਸਬ੍ਬਾਪਿ ਏਕਤੋ ਕਤ੍ਵਾ ਦ੍ਵਾਰਂ ਪਿਦਹਿਤ੍ਵਾ ਬਹਿ ਯਨ੍ਤਕਂ ਦਤ੍ਵਾ ਦਣ੍ਡਦੀਪਿਕਾਹਿ ਗੇਹੇ ਅਗ੍ਗਿਂ ਦਦਮਾਨੋ ਓਤਰਿਤ੍ਵਾ ਗਚ੍ਛਤੂ’’ਤਿ. ਸੋ ਪਾਸਾਦਂ ਅਭਿਰੁਯ੍ਹ ਕੋਟ੍ਠਾਗਾਰਾਨਿ ਵਿਵਰਿਤ੍ਵਾ ਵਤ੍ਥਾਨਿ ਤੇਲਚਾਟੀਸੁ ਤੇਮੇਤ੍ਵਾ ਤੇਮੇਤ੍ਵਾ ਥਮ੍ਭੇ ਵੇਠੇਤੁਂ ਆਰਭਿ. ਅਥ ਨਂ ਸਾਮਾਵਤਿਪ੍ਪਮੁਖਾ ਇਤ੍ਥਿਯੋ ‘‘ਕਿਂ ਏਤਂ ਚੂਲ਼ਪਿਤਾ’’ਤਿ ਵਦਨ੍ਤਿਯੋ ਉਪਸਙ੍ਕਮਿਂਸੁ. ‘‘ਅਮ੍ਮਾ, ਰਾਜਾ ਦਲ਼੍ਹਿਕਮ੍ਮਤ੍ਥਾਯ ਇਮੇ ਥਮ੍ਭੇ ਤੇਲਪਿਲੋਤਿਕਾਹਿ ਵੇਠਾਪੇਤਿ, ਰਾਜਗੇਹੇ ਨਾਮ ਸੁਯੁਤ੍ਤਂ ਦੁਯੁਤ੍ਤਂ ਦੁਜ੍ਜਾਨਂ, ਮਾ ਮੇ ਸਨ੍ਤਿਕੇ ਹੋਥ, ਅਮ੍ਮਾ’’ਤਿ ਏਵਂ ਵਤ੍ਵਾ ਤਾ ਆਗਤਾ ਗਬ੍ਭੇ ਪਵੇਸੇਤ੍ਵਾ ਦ੍ਵਾਰਾਨਿ ਪਿਦਹਿਤ੍ਵਾ ਬਹਿ ਯਨ੍ਤਕਂ ਦਤ੍ਵਾ ਆਦਿਤੋ ਪਟ੍ਠਾਯ ਅਗ੍ਗਿਂ ਦੇਨ੍ਤੋ ਓਤਰਿ. ਸਾਮਾਵਤੀ ਤਾਸਂ ਓਵਾਦਂ ਅਦਾਸਿ – ‘‘ਅਮ੍ਹਾਕਂ ਅਨਮਤਗ੍ਗੇ ਸਂਸਾਰੇ ਵਿਚਰਨ੍ਤੀਨਂ ਏਵਮੇਵ ਅਗ੍ਗਿਨਾ ਝਾਯਮਾਨਾਨਂ ਅਤ੍ਤਭਾਵਾਨਂ ਪਰਿਚ੍ਛੇਦੋ ਬੁਦ੍ਧਞਾਣੇਨਪਿ ਨ ਸੁਕਰੋ, ਅਪ੍ਪਮਤ੍ਤਾ ਹੋਥਾ’’ਤਿ. ਤਾ ਗੇਹੇ ਝਾਯਨ੍ਤੇ ਵੇਦਨਾਪਰਿਗ੍ਗਹਕਮ੍ਮਟ੍ਠਾਨਂ ਮਨਸਿਕਰੋਨ੍ਤਿਯੋ ਕਾਚਿ ਦੁਤਿਯਫਲਂ, ਕਾਚਿ ਤਤਿਯਫਲਂ ਪਾਪੁਣਿਂਸੁ. ਤੇਨ ਵੁਤ੍ਤਂ – ‘‘ਅਥ ਖੋ ਸਮ੍ਬਹੁਲਾ ਭਿਕ੍ਖੂ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘ਇਧ, ਭਨ੍ਤੇ, ਰਞ੍ਞੋ ਉਤੇਨਸ੍ਸ ਉਯ੍ਯਾਨਗਤਸ੍ਸ ਅਨ੍ਤੇਪੁਰਂ ਦਡ੍ਢਂ, ਪਞ੍ਚ ਚ ਇਤ੍ਥਿਸਤਾਨਿ ਕਾਲਕਤਾਨਿ ਸਾਮਾਵਤਿਪ੍ਪਮੁਖਾਨਿ. ਤਾਸਂ, ਭਨ੍ਤੇ, ਉਪਾਸਿਕਾਨਂ ਕਾ ਗਤਿ, ਕੋ ਅਭਿਸਮ੍ਪਰਾਯੋ’ਤਿ? ਸਨ੍ਤੇਤ੍ਥ, ਭਿਕ੍ਖਵੇ, ਉਪਾਸਿਕਾਯੋ ਸੋਤਾਪਨ੍ਨਾ, ਸਨ੍ਤਿ ਸਕਦਾਗਾਮਿਯੋ, ਸਨ੍ਤਿ ਅਨਾਗਾਮਿਯੋ, ਸਬ੍ਬਾ ਤਾ, ਭਿਕ੍ਖਵੇ, ਉਪਾਸਿਕਾਯੋ ਅਨਿਪ੍ਫਲਾ ਕਾਲਕਤਾ’’ਤਿ. ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

‘‘ਮੋਹਸਮ੍ਬਨ੍ਧਨੋ ਲੋਕੋ, ਭਬ੍ਬਰੂਪੋਵ ਦਿਸ੍ਸਤਿ;

ਉਪਧੀਬਨ੍ਧਨੋ ਬਾਲੋ, ਤਮਸਾ ਪਰਿਵਾਰਿਤੋ;

ਸਸ੍ਸਤੋਰਿਵ ਖਾਯਤਿ, ਪਸ੍ਸਤੋ ਨਤ੍ਥਿ ਕਿਞ੍ਚਨ’’ਨ੍ਤਿ. (ਉਦਾ. ੭੦);

ਏਵਞ੍ਚ ਪਨ ਵਤ੍ਵਾ, ‘‘ਭਿਕ੍ਖਵੇ, ਸਤ੍ਤਾ ਨਾਮ ਵਟ੍ਟੇ ਵਿਚਰਨ੍ਤਾ ਨਿਚ੍ਚਕਾਲਂ ਅਪ੍ਪਮਤ੍ਤਾ ਹੁਤ੍ਵਾ ਪੁਞ੍ਞਕਮ੍ਮਮੇਵ ਨ ਕਰੋਨ੍ਤਿ, ਪਮਾਦਿਨੋ ਹੁਤ੍ਵਾ ਪਾਪਕਮ੍ਮਮ੍ਪਿ ਕਰੋਨ੍ਤਿ. ਤਸ੍ਮਾ ਵਟ੍ਟੇ ਵਿਚਰਨ੍ਤਾ ਸੁਖਮ੍ਪਿ ਦੁਕ੍ਖਮ੍ਪਿ ਅਨੁਭਵਨ੍ਤੀ’’ਤਿ ਧਮ੍ਮਂ ਦੇਸੇਸਿ.

ਰਾਜਾ ‘‘ਸਾਮਾਵਤਿਯਾ ਗੇਹਂ ਕਿਰ ਝਾਯਤੀ’’ਤਿ ਸੁਤ੍ਵਾ ਵੇਗੇਨਾਗਚ੍ਛਨ੍ਤੋਪਿ ਅਦਡ੍ਢੇ ਸਮ੍ਪਾਪੁਣਿਤੁਂ ਨਾਸਕ੍ਖਿ. ਆਗਨ੍ਤ੍ਵਾ ਪਨ ਗੇਹਂ ਨਿਬ੍ਬਾਪੇਨ੍ਤੋ ਉਪ੍ਪਨ੍ਨਬਲਵਦੋਮਨਸ੍ਸੋ ਅਮਚ੍ਚਗਣਪਰਿਵੁਤੋ ਨਿਸੀਦਿਤ੍ਵਾ ਸਾਮਾਵਤਿਯਾ ਗੁਣੇ ਅਨੁਸ੍ਸਰਨ੍ਤੋ, ‘‘ਕਸ੍ਸ ਨੁ ਖੋ ਇਦਂ ਕਮ੍ਮ’’ਨ੍ਤਿ ਚਿਨ੍ਤੇਤ੍ਵਾ – ‘‘ਮਾਗਣ੍ਡਿਯਾਯ ਕਾਰਿਤਂ ਭਵਿਸ੍ਸਤੀ’’ਤਿ ਞਤ੍ਵਾ, ‘‘ਤਾਸੇਤ੍ਵਾ ਪੁਚ੍ਛਿਯਮਾਨਾ ਨ ਕਥੇਸ੍ਸਤਿ, ਸਣਿਕਂ ਉਪਾਯੇਨ ਪੁਚ੍ਛਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਮਚ੍ਚੇ ਆਹ – ‘‘ਅਮ੍ਭੋ, ਅਹਂ ਇਤੋ ਪੁਬ੍ਬੇ ਉਟ੍ਠਾਯ ਸਮੁਟ੍ਠਾਯ ਆਸਙ੍ਕਿਤਪਰਿਸਙ੍ਕਿਤੋਵ ਹੋਮਿ, ਸਾਮਾਵਤੀ ਮੇ ਨਿਚ੍ਚਂ ਓਤਾਰਮੇਵ ਗਵੇਸਤਿ, ਇਦਾਨਿ ਪਨ ਮੇ ਚਿਤ੍ਤਂ ਨਿਬ੍ਬੁਤਂ ਭਵਿਸ੍ਸਤਿ, ਸੁਖੇਨ ਚ ਵਸਿਤੁਂ ਲਭਿਸ੍ਸਾਮੀ’’ਤਿ, ਤੇ ‘‘ਕੇਨ ਨੁ ਖੋ, ਦੇਵ, ਇਦਂ ਕਤ’’ਨ੍ਤਿ ਆਹਂਸੁ. ‘‘ਮਯਿ ਸਿਨੇਹੇਨ ਕੇਨਚਿ ਕਤਂ ਭਵਿਸ੍ਸਤੀ’’ਤਿ. ਮਾਗਣ੍ਡਿਯਾਪਿ ਸਮੀਪੇ ਠਿਤਾ ਤਂ ਸੁਤ੍ਵਾ, ‘‘ਨਾਞ੍ਞੋ ਕੋਚਿ ਕਾਤੁਂ ਸਕ੍ਖਿਸ੍ਸਤਿ, ਮਯਾ ਕਤਂ, ਦੇਵ, ਅਹਂ ਚੂਲ਼ਪਿਤਰਂ ਆਣਾਪੇਤ੍ਵਾ ਕਾਰੇਸਿ’’ਨ੍ਤਿ ਆਹ. ‘‘ਤਂ ਠਪੇਤ੍ਵਾ ਅਞ੍ਞੋ ਮਯਿ ਸਿਨੇਹੋ ਸਤ੍ਤੋ ਨਾਮ ਨਤ੍ਥਿ, ਪਸਨ੍ਨੋਸ੍ਮਿ, ਵਰਂ ਤੇ ਦਮ੍ਮਿ, ਅਤ੍ਤਨੋ ਞਾਤਿਗਣਂ ਪਕ੍ਕੋਸਾਪੇਹੀ’’ਤਿ. ਸਾ ਞਾਤਕਾਨਂ ਸਾਸਨਂ ਪਹਿਣਿ – ‘‘ਰਾਜਾ ਮੇ ਪਸਨ੍ਨੋ ਵਰਂ ਦੇਤਿ, ਸੀਘਂ ਆਗਚ੍ਛਨ੍ਤੂ’’ਤਿ. ਰਾਜਾ ਆਗਤਾਗਤਾਨਂ ਮਹਨ੍ਤਂ ਸਕ੍ਕਾਰਂ ਕਾਰੇਸਿ. ਤਂ ਦਿਸ੍ਵਾ ਤਸ੍ਸਾ ਅਞ੍ਞਾਤਕਾਪਿ ਲਞ੍ਜਂ ਦਤ੍ਵਾ ‘‘ਮਯਂ ਮਾਗਣ੍ਡਿਯਾਯ ਞਾਤਕਾ’’ਤਿ ਆਗਚ੍ਛਿਂਸੁ. ਰਾਜਾ ਤੇ ਸਬ੍ਬੇ ਗਾਹਾਪੇਤ੍ਵਾ ਰਾਜਙ੍ਗਣੇ ਨਾਭਿਪ੍ਪਮਾਣੇ ਆਵਾਟੇ ਖਣਾਪੇਤ੍ਵਾ ਤੇ ਤਤ੍ਥ ਨਿਸੀਦਾਪੇਤ੍ਵਾ ਪਂਸੂਹਿ ਪੂਰੇਤ੍ਵਾ ਉਪਰਿ ਪਲਾਲੇ ਵਿਕਿਰਾਪੇਤ੍ਵਾ ਅਗ੍ਗਿਂ ਦਾਪੇਸਿ. ਚਮ੍ਮਸ੍ਸ ਦਡ੍ਢਕਾਲੇ ਅਯਨਙ੍ਗਲੇਨ ਕਸਾਪੇਤ੍ਵਾ ਖਣ੍ਡਾਖਣ੍ਡਂ ਹੀਰਾਹੀਰਂ ਕਾਰੇਸਿ. ਮਾਗਣ੍ਡਿਯਾਯ ਸਰੀਰਤੋਪਿ ਤਿਖਿਣੇਨ ਸਤ੍ਥੇਨ ਘਨਘਨਟ੍ਠਾਨੇਸੁ ਮਂਸਂ ਉਪ੍ਪਾਟੇਤ੍ਵਾ ਤੇਲਕਪਾਲਂ ਉਦ੍ਧਨਂ ਆਰੋਪੇਤ੍ਵਾ ਪੂਵੇ ਵਿਯ ਪਚਾਪੇਤ੍ਵਾ ਤਮੇਵ ਖਾਦਾਪੇਸਿ.

ਧਮ੍ਮਸਭਾਯਮ੍ਪਿ ਭਿਕ੍ਖੂ ਕਥਂ ਸਮੁਟ੍ਠਾਪੇਸੁਂ, ‘‘ਅਨਨੁਚ੍ਛਵਿਕਂ ਵਤ, ਆਵੁਸੋ, ਏਵਰੂਪਾਯ ਸਦ੍ਧਾਯ ਪਸਨ੍ਨਾਯ ਉਪਾਸਿਕਾਯ ਏਵਰੂਪਂ ਮਰਣ’’ਨ੍ਤਿ. ਸਤ੍ਥਾ ਆਗਨ੍ਤ੍ਵਾ, ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ, ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਭਿਕ੍ਖਵੇ, ਇਮਸ੍ਮਿਂ ਅਤ੍ਤਭਾਵੇ ਸਾਮਾਵਤਿਪ੍ਪਮੁਖਾਨਂ ਇਤ੍ਥੀਨਂ ਏਤਂ ਅਯੁਤ੍ਤਂ ਸਮ੍ਪਤ੍ਤਂ. ਪੁਬ੍ਬੇ ਕਤਕਮ੍ਮਸ੍ਸ ਪਨ ਯੁਤ੍ਤਮੇਵ ਏਤਾਹਿ ਲਦ੍ਧ’’ਨ੍ਤਿ ਵਤ੍ਵਾ, ‘‘ਕਿਂ, ਭਨ੍ਤੇ, ਏਤਾਹਿ ਪੁਬ੍ਬੇ ਕਤਂ, ਤਂ ਆਚਿਕ੍ਖਥਾ’’ਤਿ ਤੇਹਿ ਯਾਚਿਤੋ ਅਤੀਤਂ ਆਹਰਿ –

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਰਾਜਗੇਹੇ ਨਿਬਦ੍ਧਂ ਅਟ੍ਠ ਪਚ੍ਚੇਕਬੁਦ੍ਧਾ ਭੁਞ੍ਜਨ੍ਤਿ. ਪਞ੍ਚਸਤਾ ਇਤ੍ਥਿਯੋ ਤੇ ਉਪਟ੍ਠਹਨ੍ਤਿ. ਤੇਸੁ ਸਤ੍ਤ ਪਚ੍ਚੇਕਬੁਦ੍ਧਾ ਹਿਮਵਨ੍ਤਂ ਗਚ੍ਛਨ੍ਤਿ, ਏਕੋ ਨਦੀਤੀਰੇ ਏਕਂ ਤਿਣਗਹਨਂ ਅਤ੍ਥਿ, ਤਤ੍ਥ ਝਾਨਂ ਸਮਾਪਜ੍ਜਿਤ੍ਵਾ ਨਿਸੀਦਿ. ਅਥੇਕਦਿਵਸਂ ਰਾਜਾ ਪਚ੍ਚੇਕਬੁਦ੍ਧੇਸੁ ਗਤੇਸੁ ਤਾ ਇਤ੍ਥਿਯੋ ਆਦਾਯ ਨਦਿਯਂ ਉਦਕਕੀਲ਼ਂ ਕੀਲ਼ਿਤੁਂ ਗਤੋ. ਤਤ੍ਥ ਤਾ ਇਤ੍ਥਿਯੋ ਦਿਵਸਭਾਗਂ ਉਦਕੇ ਕੀਲ਼ਿਤ੍ਵਾ ਉਤ੍ਤਰਿਤ੍ਵਾ ਸੀਤਪੀਲ਼ਿਤਾ ਅਗ੍ਗਿਂ ਵਿਸਿਬ੍ਬੇਤੁਕਾਮਾ ‘‘ਅਮ੍ਹਾਕਂ ਅਗ੍ਗਿਕਰਣਟ੍ਠਾਨਂ ਓਲੋਕੇਥਾ’’ਤਿ ਅਪਰਾਪਰਂ ਵਿਚਰਨ੍ਤਿਯੋ ਤਂ ਤਿਣਗਹਨਂ ਦਿਸ੍ਵਾ, ‘‘ਤਿਣਰਾਸੀ’’ਤਿ ਸਞ੍ਞਾਯ ਤਂ ਪਰਿਵਾਰੇਤ੍ਵਾ ਠਿਤਾ ਅਗ੍ਗਿਂ ਅਦਂਸੁ. ਤਿਣੇਸੁ ਝਾਯਿਤ੍ਵਾ ਪਤਨ੍ਤੇਸੁ ਪਚ੍ਚੇਕਬੁਦ੍ਧਂ ਦਿਸ੍ਵਾ, ‘‘ਨਟ੍ਠਾਮ੍ਹਾ, ਅਮ੍ਹਾਕਂ ਰਞ੍ਞੋ ਪਚ੍ਚੇਕਬੁਦ੍ਧੋ ਝਾਯਤਿ, ਰਾਜਾ ਞਤ੍ਵਾ ਅਮ੍ਹੇ ਨਾਸੇਸ੍ਸਤਿ, ਸੁਦਡ੍ਢਂ ਨਂ ਕਰਿਸ੍ਸਾਮਾ’’ਤਿ ਸਬ੍ਬਾ ਤਾ ਇਤ੍ਥਿਯੋ ਇਤੋ ਚਿਤੋ ਚ ਦਾਰੂਨਿ ਆਹਰਿਤ੍ਵਾ ਤਸ੍ਸ ਉਪਰਿ ਦਾਰੁਰਾਸਿਂ ਕਰਿਂਸੁ. ਮਹਾਦਾਰੁਰਾਸਿ ਅਹੋਸਿ. ਅਥ ਨਂ ਆਲਿਮ੍ਪੇਤ੍ਵਾ, ‘‘ਇਦਾਨਿ ਝਾਯਿਸ੍ਸਤੀ’’ਤਿ ਪਕ੍ਕਮਿਂਸੁ. ਤਾ ਪਠਮਂ ਅਸਞ੍ਚੇਤਨਿਕਾ ਹੁਤ੍ਵਾ ਕਮ੍ਮੁਨਾ ਨ ਬਜ੍ਝਿਂਸੁ, ਇਦਾਨਿ ਪਚ੍ਛਾ ਸਞ੍ਚੇਤਨਾਯ ਕਮ੍ਮੁਨਾ ਬਜ੍ਝਿਂਸੁ. ਪਚ੍ਚੇਕਬੁਦ੍ਧਂ ਪਨ ਅਨ੍ਤੋਸਮਾਪਤ੍ਤਿਯਂ ਸਕਟਸਹਸ੍ਸੇਹਿ ਦਾਰੂਨਿ ਆਹਰਿਤ੍ਵਾ ਆਲਿਮ੍ਪੇਨ੍ਤਾਪਿ ਉਸ੍ਮਾਕਾਰਮਤ੍ਤਮ੍ਪਿ ਗਹੇਤੁਂ ਨ ਸਕ੍ਕੋਨ੍ਤਿ. ਤਸ੍ਮਾ ਸੋ ਸਤ੍ਤਮੇ ਦਿਵਸੇ ਉਟ੍ਠਾਯ ਯਥਾਸੁਖਂ ਅਗਮਾਸਿ. ਤਾ ਤਸ੍ਸ ਕਮ੍ਮਸ੍ਸ ਕਤਤ੍ਤਾ ਬਹੂਨਿ ਵਸ੍ਸਸਤਸਹਸ੍ਸਾਨਿ ਨਿਰਯੇ ਪਚ੍ਚਿਤ੍ਵਾ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਅਤ੍ਤਭਾਵਸਤੇ ਇਮਿਨਾਵ ਨਿਯਾਮੇਨ ਗੇਹੇ ਝਾਯਮਾਨੇ ਝਾਯਿਂਸੁ. ਇਦਂ ਏਤਾਸਂ ਪੁਬ੍ਬਕਮ੍ਮਨ੍ਤਿ.

ਏਵਂ ਵੁਤ੍ਤੇ ਭਿਕ੍ਖੂ ਸਤ੍ਥਾਰਂ ਪਟਿਪੁਚ੍ਛਿਂਸੁ – ‘‘ਖੁਜ੍ਜੁਤ੍ਤਰਾ ਪਨ, ਭਨ੍ਤੇ, ਕੇਨ ਕਮ੍ਮੇਨ ਖੁਜ੍ਜਾ ਜਾਤਾ, ਕੇਨ ਕਮ੍ਮੇਨ ਮਹਾਪਞ੍ਞਾ, ਕੇਨ ਕਮ੍ਮੇਨ ਸੋਤਾਪਤ੍ਤਿਫਲਂ ਅਧਿਗਤਾ, ਕੇਨ ਕਮ੍ਮੇਨ ਪਰੇਸਂ ਪੇਸਨਕਾਰਿਤਾ ਜਾਤਾ’’ਤਿ? ਭਿਕ੍ਖਵੇ, ਤਸ੍ਸੇਵ ਰਞ੍ਞੋ ਬਾਰਾਣਸਿਯਂ ਰਜ੍ਜਂ ਕਰਣਕਾਲੇ ਸ੍ਵੇਵ ਪਚ੍ਚੇਕਬੁਦ੍ਧੋ ਥੋਕਂ ਖੁਜ੍ਜਧਾਤੁਕੋ ਅਹੋਸਿ. ਅਥੇਕਾ ਉਪਟ੍ਠਾਯਿਕਾ ਇਤ੍ਥੀ ਕਮ੍ਬਲਂ ਪਾਰੁਪਿਤ੍ਵਾ ਸੁਵਣ੍ਣਸਰਣਂ ਗਹੇਤ੍ਵਾ, ‘‘ਅਮ੍ਹਾਕਂ ਪਚ੍ਚੇਕਬੁਦ੍ਧੋ ਏਵਞ੍ਚ ਏਵਞ੍ਚ ਵਿਚਰਤੀ’’ਤਿ ਖੁਜ੍ਜਾ ਹੁਤ੍ਵਾ ਤਸ੍ਸ ਵਿਚਰਣਾਕਾਰਂ ਦਸ੍ਸੇਸਿ. ਤਸ੍ਸ ਨਿਸ੍ਸਨ੍ਦੇਨ ਖੁਜ੍ਜਾ ਜਾਤਾ. ਤੇ ਪਨ ਪਚ੍ਚੇਕਬੁਦ੍ਧੇ ਪਠਮਦਿਵਸੇ ਰਾਜਗੇਹੇ ਨਿਸੀਦਾਪੇਤ੍ਵਾ ਪਤ੍ਤੇ ਗਾਹਾਪੇਤ੍ਵਾ ਪਾਯਾਸਸ੍ਸ ਪੂਰੇਤ੍ਵਾ ਦਾਪੇਸਿ. ਉਣ੍ਹਪਾਯਾਸਸ੍ਸ ਪੂਰੇ ਪਤ੍ਤੇ ਪਚ੍ਚੇਕਬੁਦ੍ਧਾ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਗਣ੍ਹਨ੍ਤਿ. ਸਾ ਇਤ੍ਥੀ ਤੇ ਤਥਾ ਕਰੋਨ੍ਤੇ ਦਿਸ੍ਵਾ ਅਤ੍ਤਨੋ ਸਨ੍ਤਕਾਨਿ ਅਟ੍ਠ ਦਨ੍ਤਵਲਯਾਨਿ ਦਤ੍ਵਾ, ‘‘ਇਧ ਠਪੇਤ੍ਵਾ ਗਣ੍ਹਥਾ’’ਤਿ ਆਹ. ਤੇਸੁ ਤਥਾ ਕਤ੍ਵਾ ਤਂ ਓਲੋਕੇਤ੍ਵਾ ਠਿਤੇਸੁ ਤੇਸਂ ਅਧਿਪ੍ਪਾਯਂ ਞਤ੍ਵਾ, ‘‘ਨਤ੍ਥਿ, ਭਨ੍ਤੇ, ਅਮ੍ਹਾਕਂ ਏਤੇਹਿ ਅਤ੍ਥੋ. ਤੁਮ੍ਹਾਕਞ੍ਞੇਵ ਏਤਾਨਿ ਪਰਿਚ੍ਚਤ੍ਤਾਨਿ, ਗਹੇਤ੍ਵਾ ਗਚ੍ਛਥਾ’’ਤਿ ਆਹ. ਤੇ ਗਹੇਤ੍ਵਾ ਨਨ੍ਦਮੂਲਕਪਬ੍ਭਾਰਂ ਅਗਮਂਸੁ. ਅਜ੍ਜਤਨਾਪਿ ਤਾਨਿ ਵਲਯਾਨਿ ਅਰੋਗਾਨੇਵ. ਸਾ ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਇਦਾਨਿ ਤਿਪਿਟਕਧਰਾ ਮਹਾਪਞ੍ਞਾ ਜਾਤਾ. ਪਚ੍ਚੇਕਬੁਦ੍ਧਾਨਂ ਕਤਉਪਟ੍ਠਾਨਸ੍ਸ ਨਿਸ੍ਸਨ੍ਦੇਨ ਪਨ ਸੋਤਾਪਤ੍ਤਿਫਲਂ ਪਤ੍ਤਾ. ਇਦਮਸ੍ਸਾ ਬੁਦ੍ਧਨ੍ਤਰੇ ਪੁਬ੍ਬਕਮ੍ਮਂ.

ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਪਨ ਏਕਾ ਬਾਰਾਣਸਿਸੇਟ੍ਠਿਨੋ ਧੀਤਾ ਵਡ੍ਢਮਾਨਕਚ੍ਛਾਯਾਯ ਆਦਾਸਂ ਗਹੇਤ੍ਵਾ ਅਤ੍ਤਾਨਂ ਅਲਙ੍ਕਰੋਨ੍ਤੀ ਨਿਸੀਦਿ. ਅਥਸ੍ਸਾ ਵਿਸ੍ਸਾਸਿਕਾ ਏਕਾ ਖੀਣਾਸਵਾ ਭਿਕ੍ਖੁਨੀ ਤਂ ਦਟ੍ਠੁਂ ਅਗਮਾਸਿ. ਭਿਕ੍ਖੁਨਿਯੋ ਹਿ ਖੀਣਾਸਵਾਪਿ ਸਾਯਨ੍ਹਸਮਯੇ ਉਪਟ੍ਠਾਕਕੁਲਾਨਿ ਦਟ੍ਠੁਕਾਮਾ ਹੋਨ੍ਤਿ. ਤਸ੍ਮਿਂ ਪਨ ਖਣੇ ਸੇਟ੍ਠਿਧੀਤਾਯ ਸਨ੍ਤਿਕੇ ਕਾਚਿ ਪੇਸਨਕਾਰਿਕਾ ਨਤ੍ਥਿ, ਸਾ ‘‘ਵਨ੍ਦਾਮਿ, ਅਯ੍ਯੇ, ਏਤਂ ਤਾਵ ਮੇ ਪਸਾਧਨਪੇਲ਼ਕਂ ਗਹੇਤ੍ਵਾ ਦੇਥਾ’’ਤਿ ਆਹ. ਥੇਰੀ ਚਿਨ੍ਤੇਸਿ – ‘‘ਸਚਸ੍ਸਾ ਇਮਂ ਗਣ੍ਹਿਤ੍ਵਾ ਨ ਦਸ੍ਸਾਮਿ, ਮਯਿ ਆਘਾਤਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤਿਸ੍ਸਤਿ. ਸਚੇ ਪਨ ਦਸ੍ਸਾਮਿ, ਪਰਸ੍ਸ ਪੇਸਨਕਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿਸ੍ਸਤਿ. ਨਿਰਯਸਨ੍ਤਾਪਤੋ ਖੋ ਪਨ ਪਰਸ੍ਸ ਪੇਸਨਭਾਵੋਵ ਸੇਯ੍ਯੋ’’ਤਿ. ‘‘ਸਾ ਅਨੁਦਯਂ ਪਟਿਚ੍ਚ ਤਂ ਗਹੇਤ੍ਵਾ ਤਸ੍ਸਾ ਅਦਾਸਿ. ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਪਰੇਸਂ ਪੇਸਨਕਾਰਿਕਾ ਜਾਤਾ’’ਤਿ.

ਅਥ ਪੁਨੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ ‘‘ਸਾਮਾਵਤਿਪ੍ਪਮੁਖਾ ਪਞ੍ਚਸਤਾ ਇਤ੍ਥਿਯੋ ਗੇਹੇ ਅਗ੍ਗਿਨਾ ਝਾਯਿਂਸੁ, ਮਾਗਣ੍ਡਿਯਾਯ ਞਾਤਕਾ ਉਪਰਿ ਪਲਾਲਗ੍ਗਿਂ ਦਤ੍ਵਾ ਅਯਨਙ੍ਗਲੇਹਿ ਭਿਨ੍ਨਾ, ਮਾਗਣ੍ਡਿਯਾ ਪਕ੍ਕੁਥਿਤਤੇਲੇ ਪਕ੍ਕਾ, ਕੇ ਨੁ ਖੋ ਏਤ੍ਥ ਜੀਵਨ੍ਤਿ ਨਾਮ, ਕੇ ਮਤਾ ਨਾਮਾ’’ਤਿ. ਸਤ੍ਥਾ ਆਗਨ੍ਤ੍ਵਾ, ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ, ‘‘ਇਮਾਯ ਨਾਮਾ’’ਤਿ ਵੁਤ੍ਤੇ, ‘‘ਭਿਕ੍ਖਵੇ, ਯੇ ਕੇਚਿ ਪਮਤ੍ਤਾ, ਤੇ ਵਸ੍ਸਸਤਂ ਜੀਵਨ੍ਤਾਪਿ ਮਤਾਯੇਵ ਨਾਮ. ਯੇ ਅਪ੍ਪਮਤ੍ਤਾ, ਤੇ ਮਤਾਪਿ ਜੀਵਨ੍ਤਿਯੇਵ. ਤਸ੍ਮਾ ਮਾਗਣ੍ਡਿਯਾ ਜੀਵਨ੍ਤੀਪਿ ਮਤਾਯੇਵ ਨਾਮ, ਸਾਮਾਵਤਿਪ੍ਪਮੁਖਾ ਪਞ੍ਚਸਤਾ ਇਤ੍ਥਿਯੋ ਮਤਾਪਿ ਜੀਵਨ੍ਤਿਯੇਵ ਨਾਮ. ਨ ਹਿ, ਭਿਕ੍ਖਵੇ, ਅਪ੍ਪਮਤ੍ਤਾ ਮਰਨ੍ਤਿ ਨਾਮਾ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੨੧. ‘‘ਅਪ੍ਪਮਾਦੋ ਅਮਤਪਦਂ, ਪਮਾਦੋ ਮਚ੍ਚੁਨੋ ਪਦਂ;

ਅਪ੍ਪਮਤ੍ਤਾ ਨ ਮੀਯਨ੍ਤਿ, ਯੇ ਪਮਤ੍ਤਾ ਯਥਾ ਮਤਾ.

੨੨. ‘‘ਏਵਂ ਵਿਸੇਸਤੋ ਞਤ੍ਵਾ, ਅਪ੍ਪਮਾਦਮ੍ਹਿ ਪਣ੍ਡਿਤਾ;

ਅਪ੍ਪਮਾਦੇ ਪਮੋਦਨ੍ਤਿ, ਅਰਿਯਾਨਂ ਗੋਚਰੇ ਰਤਾ.

੨੩. ‘‘ਤੇ ਝਾਯਿਨੋ ਸਾਤਤਿਕਾ, ਨਿਚ੍ਚਂ ਦਲ਼੍ਹਪਰਕ੍ਕਮਾ;

ਫੁਸਨ੍ਤਿ ਧੀਰਾ ਨਿਬ੍ਬਾਨਂ, ਯੋਗਕ੍ਖੇਮਂ ਅਨੁਤ੍ਤਰ’’ਨ੍ਤਿ.

ਤਤ੍ਥ ਅਪ੍ਪਮਾਦੋਤਿ ਪਦਂ ਮਹਨ੍ਤਂ ਅਤ੍ਥਂ ਦੀਪੇਤਿ, ਮਹਨ੍ਤਂ ਅਤ੍ਥਂ ਗਹੇਤ੍ਵਾ ਤਿਟ੍ਠਤਿ. ਸਕਲਮ੍ਪਿ ਹਿ ਤੇਪਿਟਕਂ ਬੁਦ੍ਧਵਚਨਂ ਆਹਰਿਤ੍ਵਾ ਕਥਿਯਮਾਨਂ ਅਪ੍ਪਮਾਦਪਦਮੇਵ ਓਤਰਤਿ. ਤੇਨ ਵੁਤ੍ਤਂ –

‘‘ਸੇਯ੍ਯਥਾਪਿ, ਭਿਕ੍ਖਵੇ, ਯਾਨਿ ਕਾਨਿਚਿ ਜਙ੍ਗਲਾਨਂ ਪਾਣਾਨਂ ਪਦਜਾਤਾਨਿ, ਸਬ੍ਬਾਨਿ ਤਾਨਿ ਹਤ੍ਥਿਪਦੇ ਸਮੋਧਾਨਂ ਗਚ੍ਛਨ੍ਤਿ, ਹਤ੍ਥਿਪਦਂ ਤੇਸਂ ਅਗ੍ਗਮਕ੍ਖਾਯਤਿ ਯਦਿਦਂ ਮਹਨ੍ਤਤ੍ਤੇਨ. ਏਵਮੇਵ ਖੋ, ਭਿਕ੍ਖਵੇ, ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇਤੇ ਅਪ੍ਪਮਾਦਮੂਲਕਾ ਅਪ੍ਪਮਾਦਸਮੋਸਰਣਾ, ਅਪ੍ਪਮਾਦੋ ਤੇਸਂ ਧਮ੍ਮਾਨਂ ਅਗ੍ਗਮਕ੍ਖਾਯਤੀ’’ਤਿ (ਸਂ. ਨਿ. ੫.੧੪੦).

ਸੋ ਪਨੇਸ ਅਤ੍ਥਤੋ ਸਤਿਯਾ ਅਵਿਪ੍ਪਵਾਸੋ ਨਾਮ. ਨਿਚ੍ਚਂ ਉਪਟ੍ਠਿਤਾਯ ਸਤਿਯਾ ਚੇਤਂ ਨਾਮਂ. ਅਮਤਪਦਨ੍ਤਿ ਅਮਤਂ ਵੁਚ੍ਚਤਿ ਨਿਬ੍ਬਾਨਂ. ਤਞ੍ਹਿ ਅਜਾਤਤ੍ਤਾ ਨੁ ਜੀਯਤਿ ਨ ਮੀਯਤਿ, ਤਸ੍ਮਾ ਅਮਤਨ੍ਤਿ ਵੁਚ੍ਚਤਿ. ਪਜ੍ਜਨ੍ਤਿ ਇਮਿਨਾਤਿ ਪਦਂ, ਅਮਤਂ ਪਾਪੁਣਨ੍ਤੀਤਿ ਅਤ੍ਥੋ. ਅਮਤਸ੍ਸ ਪਦਂ ਅਮਤਪਦਂ, ਅਮਤਸ੍ਸ ਅਧਿਗਮੂਪਾਯੋਤਿ ਵੁਤ੍ਤਂ ਹੋਤਿ, ਪਮਾਦੋਤਿ ਪਮਜ੍ਜਨਭਾਵੋ, ਮੁਟ੍ਠਸ੍ਸਤਿਸਙ੍ਖਾਤਸ੍ਸ ਸਤਿਯਾ ਵੋਸਗ੍ਗਸ੍ਸੇਤਂ ਨਾਮਂ. ਮਚ੍ਚੁਨੋਤਿ ਮਰਣਸ੍ਸ. ਪਦਨ੍ਤਿ ਉਪਾਯੋ ਮਗ੍ਗੋ. ਪਮਤ੍ਤੋ ਹਿ ਜਾਤਿਂ ਨਾਤਿਵਤ੍ਤਤਿ, ਜਾਤੋ ਜੀਯਤਿ ਚੇਵ ਮੀਯਤਿ ਚਾਤਿ ਪਮਾਦੋ ਮਚ੍ਚੁਨੋ ਪਦਂ ਨਾਮ ਹੋਤਿ, ਮਰਣਂ ਉਪੇਤਿ. ਅਪ੍ਪਮਤ੍ਤਾ ਨ ਮੀਯਨ੍ਤੀਤਿ ਸਤਿਯਾ ਸਮਨ੍ਨਾਗਤਾ ਹਿ ਅਪ੍ਪਮਤ੍ਤਾ ਨ ਮਰਨ੍ਤਿ. ਅਜਰਾ ਅਮਰਾ ਹੋਨ੍ਤੀਤਿ ਨ ਸਲ੍ਲਕ੍ਖੇਤਬ੍ਬਂ. ਨ ਹਿ ਕੋਚਿ ਸਤ੍ਤੋ ਅਜਰੋ ਅਮਰੋ ਨਾਮ ਅਤ੍ਥਿ, ਪਮਤ੍ਤਸ੍ਸ ਪਨ ਵਟ੍ਟਂ ਨਾਮ ਅਪਰਿਚ੍ਛਿਨ੍ਨਂ, ਅਪ੍ਪਮਤ੍ਤਸ੍ਸ ਪਰਿਚ੍ਛਿਨ੍ਨਂ. ਤਸ੍ਮਾ ਪਮਤ੍ਤਾ ਜਾਤਿਆਦੀਹਿ ਅਪਰਿਮੁਤ੍ਤਤ੍ਤਾ ਜੀਵਨ੍ਤਾਪਿ ਮਤਾਯੇਵ ਨਾਮ. ਅਪ੍ਪਮਤ੍ਤਾ ਪਨ ਅਪ੍ਪਮਾਦਲਕ੍ਖਣਂ ਵਡ੍ਢੇਤ੍ਵਾ ਖਿਪ੍ਪਂ ਮਗ੍ਗਫਲਾਨਿ ਸਚ੍ਛਿਕਤ੍ਵਾ ਦੁਤਿਯਤਤਿਯਅਤ੍ਤਭਾਵੇਸੁ ਨ ਨਿਬ੍ਬਤ੍ਤਨ੍ਤਿ. ਤਸ੍ਮਾ ਤੇ ਜੀਵਨ੍ਤਾਪਿ ਮਤਾਪਿ ਨ ਮੀਯਨ੍ਤਿਯੇਵ ਨਾਮ. ਯੇ ਪਮਤ੍ਤਾ ਯਥਾ ਮਤਾਤਿ ਯੇ ਪਨ ਸਤ੍ਤਾ ਪਮਤ੍ਤਾ, ਤੇ ਪਮਾਦਮਰਣੇਨ ਮਤਤ੍ਤਾ, ਯਥਾ ਹਿ ਜੀਵਿਤਿਨ੍ਦ੍ਰਿਯੁਪਚ੍ਛੇਦੇਨ ਮਤਾ ਦਾਰੁਕ੍ਖਨ੍ਧਸਦਿਸਾ ਅਪਗਤਵਿਞ੍ਞਾਣਾ, ਤਥੇਵ ਹੋਨ੍ਤਿ. ਤੇਸਮ੍ਪਿ ਹਿ ਮਤਾਨਂ ਵਿਯ ਗਹਟ੍ਠਾਨਂ ਤਾਵ ‘‘ਦਾਨਂ ਦਸ੍ਸਾਮ, ਸੀਲਂ ਰਕ੍ਖਿਸ੍ਸਾਮ, ਉਪੋਸਥਕਮ੍ਮਂ ਕਰਿਸ੍ਸਾਮਾ’’ਤਿ ਏਕਚਿਤ੍ਤਮ੍ਪਿ ਨ ਉਪ੍ਪਜ੍ਜਤਿ, ਪਬ੍ਬਜਿਤਾਨਮ੍ਪਿ ‘‘ਆਚਰਿਯੁਪਜ੍ਝਾਯਵਤ੍ਤਾਦੀਨਿ ਪੂਰੇਸ੍ਸਾਮ, ਧੁਤਙ੍ਗਾਨਿ ਸਮਾਦਿਯਿਸ੍ਸਾਮ, ਭਾਵਨਂ ਵਡ੍ਢੇਸ੍ਸਾਮਾ’’ਤਿ ਨ ਉਪ੍ਪਜ੍ਜਤੀਤਿ ਮਤੇਨ ਤੇ ਕਿਂ ਨਾਨਾਕਰਣਾਵ ਹੋਨ੍ਤਿ. ਤੇਨ ਵੁਤ੍ਤਂ – ‘‘ਯੇ ਪਮਤ੍ਤਾ ਯਥਾ ਮਤਾ’’ਤਿ.

ਏਵਂ ਵਿਸੇਸਤੋ ਞਤ੍ਵਾਤਿ ਪਮਤ੍ਤਸ੍ਸ ਵਟ੍ਟਤੋ ਨਿਸ੍ਸਰਣਂ ਨਤ੍ਥਿ, ਅਪ੍ਪਮਤ੍ਤਸ੍ਸ ਅਤ੍ਥੀਤਿ ਏਵਂ ਵਿਸੇਸਤੋਵ ਜਾਨਿਤ੍ਵਾ. ਕੇ ਪਨੇਤਂ ਵਿਸੇਸਂ ਜਾਨਨ੍ਤੀਤਿ? ਅਪ੍ਪਮਾਦਮ੍ਹਿ ਪਣ੍ਡਿਤਾਤਿ ਯੇ ਪਣ੍ਡਿਤਾ ਮੇਧਾਵਿਨੋ ਸਪ੍ਪਞ੍ਞਾ ਅਤ੍ਤਨੋ ਅਪ੍ਪਮਾਦੇ ਠਤ੍ਵਾ ਅਪ੍ਪਮਾਦਂ ਵਡ੍ਢੇਨ੍ਤਿ, ਤੇ ਏਵਂ ਵਿਸੇਸਕਾਰਣਂ ਜਾਨਨ੍ਤਿ. ਅਪ੍ਪਮਾਦੇ ਪਮੋਦਨ੍ਤੀਤਿ ਤੇ ਏਵਂ ਞਤ੍ਵਾ ਤਸ੍ਮਿਂ ਅਤ੍ਤਨੋ ਅਪ੍ਪਮਾਦੇ ਪਮੋਦਨ੍ਤਿ, ਪਹਂਸਿਤਮੁਖਾ ਤੁਟ੍ਠਪਹਟ੍ਠਾ ਹੋਨ੍ਤਿ. ਅਰਿਯਾਨਂ ਗੋਚਰੇ ਰਤਾਤਿ ਤੇ ਏਵਂ ਅਪ੍ਪਮਾਦੇ ਪਮੋਦਨ੍ਤਾ ਤਂ ਅਪ੍ਪਮਾਦਂ ਵਡ੍ਢੇਤ੍ਵਾ ਅਰਿਯਾਨਂ ਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਸਾਵਕਾਨਂ ਗੋਚਰਸਙ੍ਖਾਤੇ ਚਤੁਸਤਿਪਟ੍ਠਾਨਾਦਿਭੇਦੇ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮੇ ਨਵਵਿਧਲੋਕੁਤ੍ਤਰਧਮ੍ਮੇ ਚ ਰਤਾ ਨਿਰਤਾ, ਅਭਿਰਤਾ ਹੋਨ੍ਤੀਤਿ ਅਤ੍ਥੋ.

ਤੇ ਝਾਯਿਨੋਤਿ ਤੇ ਅਪ੍ਪਮਤ੍ਤਾ ਪਣ੍ਡਿਤਾ ਅਟ੍ਠਸਮਾਪਤ੍ਤਿਸਙ੍ਖਾਤੇਨ ਆਰਮ੍ਮਣੂਪਨਿਜ੍ਝਾਨੇਨ ਵਿਪਸ੍ਸਨਾਮਗ੍ਗਫਲਸਙ੍ਖਾਤੇਨ ਲਕ੍ਖਣੂਪਨਿਜ੍ਝਾਨੇਨ ਚਾਤਿ ਦੁਵਿਧੇਨਪਿ ਝਾਨੇਨ ਝਾਯਿਨੋ. ਸਾਤਤਿਕਾਤਿ ਅਭਿਨਿਕ੍ਖਮਨਕਾਲਤੋ ਪਟ੍ਠਾਯ ਯਾਵ ਅਰਹਤ੍ਤਮਗ੍ਗਾ ਸਤਤਂ ਪਵਤ੍ਤਕਾਯਿਕਚੇਤਸਿਕਵੀਰਿਯਾ. ਨਿਚ੍ਚਂ ਦਲ਼੍ਹਪਰਕ੍ਕਮਾਤਿ ਯਂ ਤਂ ਪੁਰਿਸਥਾਮੇਨ ਪੁਰਿਸਵੀਰਿਯੇਨ ਪੁਰਿਸਪਰਕ੍ਕਮੇਨ ਪਤ੍ਤਬ੍ਬਂ, ਨ ਤਂ ਅਪਾਪੁਣਿਤ੍ਵਾ ਵੀਰਿਯਸ੍ਸ ਸਣ੍ਠਾਨਂ ਭਵਿਸ੍ਸਤੀਤਿ ਏਵਰੂਪੇਨ ਵੀਰਿਯੇਨ ਅਨ੍ਤਰਾ ਅਨੋਸਕ੍ਕਿਤ੍ਵਾ ਨਿਚ੍ਚਪ੍ਪਵਤ੍ਤੇਨ ਦਲ਼੍ਹਪਰਕ੍ਕਮੇਨ ਸਮਨ੍ਨਾਗਤਾ. ਫੁਸਨ੍ਤੀਤਿ ਏਤ੍ਥ ਦ੍ਵੇ ਫੁਸਨਾ ਞਾਣਫੁਸਨਾ ਚ, ਵਿਪਾਕਫੁਸਨਾ ਚ. ਤਤ੍ਥ ਚਤ੍ਤਾਰੋ ਮਗ੍ਗਾ ਞਾਣਫੁਸਨਾ ਨਾਮ, ਚਤ੍ਤਾਰਿ ਫਲਾਨਿ ਵਿਪਾਕਫੁਸਨਾ ਨਾਮ. ਤੇਸੁ ਇਧ ਵਿਪਾਕਫੁਸਨਾ ਅਧਿਪ੍ਪੇਤਾ. ਅਰਿਯਫਲੇਨ ਨਿਬ੍ਬਾਨਂ ਸਚ੍ਛਿਕਰੋਨ੍ਤੋ ਧੀਰਾ ਪਣ੍ਡਿਤਾ ਤਾਯ ਵਿਪਾਕਫੁਸਨਾਯ ਫੁਸਨ੍ਤਿ, ਨਿਬ੍ਬਾਨਂ ਸਚ੍ਛਿਕਰੋਨ੍ਤਿ. ਯੋਗਕ੍ਖੇਮਂ ਅਨੁਤ੍ਤਰਨ੍ਤਿ ਯੇ ਚਤ੍ਤਾਰੋ ਯੋਗਾ ਮਹਾਜਨਂ ਵਟ੍ਟੇ ਓਸੀਦਾਪੇਨ੍ਤਿ, ਤੇਹਿ ਖੇਮਂ ਨਿਬ੍ਭਯਂ ਸਬ੍ਬੇਹਿ ਲੋਕਿਯਲੋਕੁਤ੍ਤਰਧਮ੍ਮੇਹਿ ਸੇਟ੍ਠਤ੍ਤਾ ਅਨੁਤ੍ਤਰਨ੍ਤਿ.

ਦੇਸਨਾਪਰਿਯੋਸਾਨੇ ਬਹੂ ਸੋਤਾਪਨ੍ਨਾਦਯੋ ਅਹੇਸੁਂ. ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਜਾਤਾਤਿ.

ਸਾਮਾਵਤੀਵਤ੍ਥੁ ਪਠਮਂ.