੧੪. ਦ੍ਵੇਸਹਾਯਕਭਿਕ੍ਖੁਵਤ੍ਥੁ

ਬਹੁਮ੍ਪਿ ਚੇਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦ੍ਵੇ ਸਹਾਯਕੇ ਆਰਬ੍ਭ ਕਥੇਸਿ.

ਸਾਵਤ੍ਥਿਵਾਸਿਨੋ ਹਿ ਦ੍ਵੇ ਕੁਲਪੁਤ੍ਤਾ ਸਹਾਯਕਾ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਕਾਮੇ ਪਹਾਯ ਸਾਸਨੇ ਉਰਂ ਦਤ੍ਵਾ ਪਬ੍ਬਜਿਤ੍ਵਾ ਪਞ੍ਚ ਵਸ੍ਸਾਨਿ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕੇ ਵਸਿਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਸਾਸਨੇ ਧੁਰਂ ਪੁਚ੍ਛਿਤ੍ਵਾ ਵਿਪਸ੍ਸਨਾਧੁਰਞ੍ਚ ਗਨ੍ਥਧੁਰਞ੍ਚ ਵਿਤ੍ਥਾਰਤੋ ਸੁਤ੍ਵਾ ਏਕੋ ਤਾਵ ‘‘ਅਹਂ, ਭਨ੍ਤੇ, ਮਹਲ੍ਲਕਕਾਲੇ ਪਬ੍ਬਜਿਤੋ ਨ ਸਕ੍ਖਿਸ੍ਸਾਮਿ ਗਨ੍ਥਧੁਰਂ ਪੂਰੇਤੁਂ, ਵਿਪਸ੍ਸਨਾਧੁਰਂ ਪਨ ਪੂਰੇਸ੍ਸਾਮੀ’’ਤਿ ਯਾਵ ਅਰਹਤ੍ਤਾ ਵਿਪਸ੍ਸਨਾਧੁਰਂ ਕਥਾਪੇਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਇਤਰੋ ਪਨ ‘‘ਅਹਂ ਗਨ੍ਥਧੁਰਂ ਪੂਰੇਸ੍ਸਾਮੀ’’ਤਿ ਅਨੁਕ੍ਕਮੇਨ ਤੇਪਿਟਕਂ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਗਤਗਤਟ੍ਠਾਨੇ ਧਮ੍ਮਂ ਕਥੇਤਿ, ਸਰਭਞ੍ਞਂ ਭਣਤਿ, ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਧਮ੍ਮਂ ਵਾਚੇਨ੍ਤੋ ਵਿਚਰਤਿ. ਅਟ੍ਠਾਰਸਨ੍ਨਂ ਮਹਾਗਣਾਨਂ ਆਚਰਿਯੋ ਅਹੋਸਿ. ਭਿਕ੍ਖੂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਇਤਰਸ੍ਸ ਥੇਰਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਤਸ੍ਸ ਓਵਾਦੇ ਠਤ੍ਵਾ ਅਰਹਤ੍ਤਂ ਪਤ੍ਵਾ ਥੇਰਂ ਵਨ੍ਦਿਤ੍ਵਾ, ‘‘ਸਤ੍ਥਾਰਂ ਦਟ੍ਠੁਕਾਮਮ੍ਹਾ’’ਤਿ ਵਦਨ੍ਤਿ. ਥੇਰੋ ‘‘ਗਚ੍ਛਥ, ਆਵੁਸੋ, ਮਮ ਵਚਨੇਨ ਸਤ੍ਥਾਰਂ ਵਨ੍ਦਿਤ੍ਵਾ ਅਸੀਤਿ ਮਹਾਥੇਰੇ ਵਨ੍ਦਥ, ਸਹਾਯਕਤ੍ਥੇਰਮ੍ਪਿ ਮੇ ‘ਅਮ੍ਹਾਕਂ ਆਚਰਿਯੋ ਤੁਮ੍ਹੇ ਵਨ੍ਦਤੀ’ਤਿ ਵਦਥਾ’’ਤਿ ਪੇਸੇਤਿ. ਤੇ ਭਿਕ੍ਖੂ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਞ੍ਚੇਵ ਅਸੀਤਿ ਮਹਾਥੇਰੇ ਚ ਵਨ੍ਦਿਤ੍ਵਾ ਗਨ੍ਥਿਕਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ, ‘‘ਭਨ੍ਤੇ, ਅਮ੍ਹਾਕਂ ਆਚਰਿਯੋ ਤੁਮ੍ਹੇ ਵਨ੍ਦਤੀ’’ਤਿ ਵਦਨ੍ਤਿ. ਇਤਰੇਨ ਚ ‘‘ਕੋ ਨਾਮ ਸੋ’’ਤਿ ਵੁਤ੍ਤੇ, ‘‘ਤੁਮ੍ਹਾਕਂ ਸਹਾਯਕਭਿਕ੍ਖੁ, ਭਨ੍ਤੇ’’ਤਿ ਵਦਨ੍ਤਿ. ਏਵਂ ਥੇਰੇ ਪੁਨਪ੍ਪੁਨਂ ਸਾਸਨਂ ਪਹਿਣਨ੍ਤੇ ਸੋ ਭਿਕ੍ਖੁ ਥੋਕਂ ਕਾਲਂ ਸਹਿਤ੍ਵਾ ਅਪਰਭਾਗੇ ਸਹਿਤੁਂ ਅਸਕ੍ਕੋਨ੍ਤੋ ‘‘ਅਮ੍ਹਾਕਂ ਆਚਰਿਯੋ ਤੁਮ੍ਹੇ ਵਨ੍ਦਤੀ’’ਤਿ ਵੁਤ੍ਤੇ, ‘‘ਕੋ ਏਸੋ’’ਤਿ ਵਤ੍ਵਾ ‘‘ਤੁਮ੍ਹਾਕਂ ਸਹਾਯਕਭਿਕ੍ਖੂ’’ਤਿ ਵੁਤ੍ਤੇ, ‘‘ਕਿਂ ਪਨ ਤੁਮ੍ਹੇਹਿ ਤਸ੍ਸ ਸਨ੍ਤਿਕੇ ਉਗ੍ਗਹਿਤਂ, ਕਿਂ ਦੀਘਨਿਕਾਯਾਦੀਸੁ ਅਞ੍ਞਤਰੋ ਨਿਕਾਯੋ, ਕਿਂ ਤੀਸੁ ਪਿਟਕੇਸੁ ਏਕਂ ਪਿਟਕ’’ਨ੍ਤਿ ਵਤ੍ਵਾ ‘‘ਚਤੁਪ੍ਪਦਿਕਮ੍ਪਿ ਗਾਥਂ ਨ ਜਾਨਾਤਿ, ਪਂਸੁਕੂਲਂ ਗਹੇਤ੍ਵਾ ਪਬ੍ਬਜਿਤਕਾਲੇਯੇਵ ਅਰਞ੍ਞਂ ਪਵਿਟ੍ਠੋ, ਬਹੂ ਵਤ ਅਨ੍ਤੇਵਾਸਿਕੇ ਲਭਿ, ਤਸ੍ਸ ਆਗਤਕਾਲੇ ਮਯਾ ਪਞ੍ਹਂ ਪੁਚ੍ਛਿਤੁਂ ਵਟ੍ਟਤੀ’’ਤਿ ਚਿਨ੍ਤੇਸਿ.

ਅਥ ਅਪਰਭਾਗੇ ਥੇਰੋ ਸਤ੍ਥਾਰਂ ਦਟ੍ਠੁਂ ਆਗਤੋ. ਸਹਾਯਕਸ੍ਸ ਥੇਰਸ੍ਸ ਸਨ੍ਤਿਕੇ ਪਤ੍ਤਚੀਵਰਂ ਠਪੇਤ੍ਵਾ ਗਨ੍ਤ੍ਵਾ ਸਤ੍ਥਾਰਞ੍ਚੇਵ ਅਸੀਤਿ ਮਹਾਥੇਰੇ ਚ ਵਨ੍ਦਿਤ੍ਵਾ ਸਹਾਯਕਸ੍ਸ ਵਸਨਟ੍ਠਾਨਂ ਪਚ੍ਚਾਗਮਿ. ਅਥਸ੍ਸ ਸੋ ਵਤ੍ਤਂ ਕਾਰੇਤ੍ਵਾ ਸਮਪ੍ਪਮਾਣਂ ਆਸਨਂ ਗਹੇਤ੍ਵਾ, ‘‘ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਨਿਸੀਦਿ. ਤਸ੍ਮਿਂ ਖਣੇ ਸਤ੍ਥਾ ‘‘ਏਸ ਏਵਰੂਪਂ ਮਮ ਪੁਤ੍ਤਂ ਵਿਹੇਠੇਤ੍ਵਾ ਨਿਰਯੇ ਨਿਬ੍ਬਤ੍ਤੇਯ੍ਯਾ’’ਤਿ ਤਸ੍ਮਿਂ ਅਨੁਕਮ੍ਪਾਯ ਵਿਹਾਰਚਾਰਿਕਂ ਚਰਨ੍ਤੋ ਵਿਯ ਤੇਸਂ ਨਿਸਿਨ੍ਨਟ੍ਠਾਨਂ ਗਨ੍ਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸੀਦਿ. ਤਤ੍ਥ ਤਤ੍ਥ ਨਿਸੀਦਨ੍ਤਾ ਹਿ ਭਿਕ੍ਖੂ ਬੁਦ੍ਧਾਸਨਂ ਪਞ੍ਞਾਪੇਤ੍ਵਾਵ ਨਿਸੀਦਨ੍ਤਿ. ਤੇਨ ਸਤ੍ਥਾ ਪਕਤਿਪਞ੍ਞਤ੍ਤੇਯੇਵ ਆਸਨੇ ਨਿਸੀਦਿ. ਨਿਸਜ੍ਜ ਖੋ ਪਨ ਗਨ੍ਥਿਕਭਿਕ੍ਖੁਂ ਪਠਮਜ੍ਝਾਨੇ ਪਞ੍ਹਂ ਪੁਚ੍ਛਿਤ੍ਵਾ ਤਸ੍ਮਿਂ ਅਕਥਿਤੇ ਦੁਤਿਯਜ੍ਝਾਨਂ ਆਦਿਂ ਕਤ੍ਵਾ ਅਟ੍ਠਸੁਪਿ ਸਮਾਪਤ੍ਤੀਸੁ ਰੂਪਾਰੂਪੇਸੁ ਚ ਪਞ੍ਹਂ ਪੁਚ੍ਛਿ. ਗਨ੍ਥਿਕਤ੍ਥੇਰੋ ਏਕਮ੍ਪਿ ਕਥੇਤੁਂ ਨਾਸਕ੍ਖਿ. ਇਤਰੋ ਤਂ ਸਬ੍ਬਂ ਕਥੇਸਿ. ਅਥ ਨਂ ਸੋਤਾਪਤ੍ਤਿਮਗ੍ਗੇ ਪਞ੍ਹਂ ਪੁਚ੍ਛਿ. ਗਨ੍ਥਿਕਤ੍ਥੇਰੋ ਕਥੇਤੁਂ ਨਾਸਕ੍ਖਿ. ਤਤੋ ਖੀਣਾਸਵਤ੍ਥੇਰਂ ਪੁਚ੍ਛਿ. ਥੇਰੋ ਕਥੇਸਿ. ਸਤ੍ਥਾ ‘‘ਸਾਧੁ ਸਾਧੁ, ਭਿਕ੍ਖੂ’’ਤਿ ਅਭਿਨਨ੍ਦਿਤ੍ਵਾ ਸੇਸਮਗ੍ਗੇਸੁਪਿ ਪਟਿਪਾਟਿਯਾ ਪਞ੍ਹਂ ਪੁਚ੍ਛਿ. ਗਨ੍ਥਿਕੋ ਏਕਮ੍ਪਿ ਕਥੇਤੁਂ ਨਾਸਕ੍ਖਿ, ਖੀਣਾਸਵੋ ਪੁਚ੍ਛਿਤਂ ਪੁਚ੍ਛਿਤਂ ਕਥੇਸਿ. ਸਤ੍ਥਾ ਚਤੂਸੁਪਿ ਠਾਨੇਸੁ ਤਸ੍ਸ ਸਾਧੁਕਾਰਂ ਅਦਾਸਿ. ਤਂ ਸੁਤ੍ਵਾ ਭੁਮ੍ਮਦੇਵੇ ਆਦਿਂ ਕਤ੍ਵਾ ਯਾਵ ਬ੍ਰਹ੍ਮਲੋਕਾ ਸਬ੍ਬਾ ਦੇਵਤਾ ਚੇਵ ਨਾਗਸੁਪਣ੍ਣਾ ਚ ਸਾਧੁਕਾਰਂ ਅਦਂਸੁ. ਤਂ ਸਾਧੁਕਾਰਂ ਸੁਤ੍ਵਾ ਤਸ੍ਸ ਅਨ੍ਤੇਵਾਸਿਕਾ ਚੇਵ ਸਦ੍ਧਿਵਿਹਾਰਿਨੋ ਚ ਸਤ੍ਥਾਰਂ ਉਜ੍ਝਾਯਿਂਸੁ – ‘‘ਕਿਂ ਨਾਮੇਤਂ ਸਤ੍ਥਾਰਾ ਕਤਂ, ਕਿਞ੍ਚਿ ਅਜਾਨਨ੍ਤਸ੍ਸ ਮਹਲ੍ਲਕਤ੍ਥੇਰਸ੍ਸ ਚਤੂਸੁ ਠਾਨੇਸੁ ਸਾਧੁਕਾਰਂ ਅਦਾਸਿ, ਅਮ੍ਹਾਕਂ ਪਨਾਚਰਿਯਸ੍ਸ ਸਬ੍ਬਪਰਿਯਤ੍ਤਿਧਰਸ੍ਸ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਪਾਮੋਕ੍ਖਸ੍ਸ ਪਸਂਸਾਮਤ੍ਤਮ੍ਪਿ ਨ ਕਰੀ’’ਤਿ. ਅਥ ਨੇ ਸਤ੍ਥਾ ‘‘ਕਿਂ ਨਾਮੇਤਂ, ਭਿਕ੍ਖਵੇ, ਕਥੇਥਾ’’ਤਿ ਪੁਚ੍ਛਿਤ੍ਵਾ ਤਸ੍ਮਿਂ ਅਤ੍ਥੇ ਆਰੋਚਿਤੇ, ‘‘ਭਿਕ੍ਖਵੇ, ਤੁਮ੍ਹਾਕਂ ਆਚਰਿਯੋ ਮਮ ਸਾਸਨੇ ਭਤਿਯਾ ਗਾਵੋ ਰਕ੍ਖਣਸਦਿਸੋ, ਮਯ੍ਹਂ ਪਨ ਪੁਤ੍ਤੋ ਯਥਾਰੁਚਿਯਾ ਪਞ੍ਚ ਗੋਰਸੇ ਪਰਿਭੁਞ੍ਜਨਕਸਾਮਿਸਦਿਸੋ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੧੯. ‘‘ਬਹੁਮ੍ਪਿ ਚੇ ਸਂਹਿਤ ਭਾਸਮਾਨੋ,

ਨ ਤਕ੍ਕਰੋ ਹੋਤਿ ਨਰੋ ਪਮਤ੍ਤੋ;

ਗੋਪੋਵ ਗਾਵੋ ਗਣਯਂ ਪਰੇਸਂ,

ਨ ਭਾਗਵਾ ਸਾਮਞ੍ਞਸ੍ਸ ਹੋਤਿ.

੨੦. ‘‘ਅਪ੍ਪਮ੍ਪਿ ਚੇ ਸਂਹਿਤ ਭਾਸਮਾਨੋ,

ਧਮ੍ਮਸ੍ਸ ਹੋਤਿ ਅਨੁਧਮ੍ਮਚਾਰੀ;

ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ,

ਸਮ੍ਮਪ੍ਪਜਾਨੋ ਸੁਵਿਮੁਤ੍ਤਚਿਤ੍ਤੋ.

‘‘ਅਨੁਪਾਦਿਯਾਨੋ ਇਧ ਵਾ ਹੁਰਂ ਵਾ,

ਸ ਭਾਗਵਾ ਸਾਮਞ੍ਞਸ੍ਸ ਹੋਤੀ’’ਤਿ.

ਤਤ੍ਥ ਸਂਹਿਤਨ੍ਤਿ ਤੇਪਿਟਕਸ੍ਸ ਬੁਦ੍ਧਵਚਨਸ੍ਸੇਤਂ ਨਾਮਂ. ਤਂ ਆਚਰਿਯੇ ਉਪਸਙ੍ਕਮਿਤ੍ਵਾ ਉਗ੍ਗਣ੍ਹਿਤ੍ਵਾ ਬਹੁਮ੍ਪਿ ਪਰੇਸਂ ਭਾਸਮਾਨੋ ਵਾਚੇਨ੍ਤੋ ਤਂ ਧਮ੍ਮਂ ਸੁਤ੍ਵਾ ਯਂ ਕਾਰਕੇਨ ਪੁਗ੍ਗਲੇਨ ਕਤ੍ਤਬ੍ਬਂ, ਤਕ੍ਕਰੋ ਨ ਹੋਤਿ. ਕੁਕ੍ਕੁਟਸ੍ਸ ਪਕ੍ਖਪਹਰਣਮਤ੍ਤਮ੍ਪਿ ਅਨਿਚ੍ਚਾਦਿਵਸੇਨ ਯੋਨਿਸੋਮਨਸਿਕਾਰਂ ਨਪ੍ਪਵਤ੍ਤੇਤਿ. ਏਸੋ ਯਥਾ ਨਾਮ ਦਿਵਸਂ ਭਤਿਯਾ ਗਾਵੋ ਰਕ੍ਖਨ੍ਤੋ ਗੋਪੋ ਪਾਤੋਵ ਨਿਰਵਸੇਸਂ ਸਮ੍ਪਟਿਚ੍ਛਿਤ੍ਵਾ ਸਾਯਂ ਗਹੇਤ੍ਵਾ ਸਾਮਿਕਾਨਂ ਨਿਯ੍ਯਾਦੇਤ੍ਵਾ ਦਿਵਸਭਤਿਮਤ੍ਤਂ ਗਣ੍ਹਾਤਿ, ਯਥਾਰੁਚਿਯਾ ਪਨ ਪਞ੍ਚ ਗੋਰਸੇ ਪਰਿਭੁਞ੍ਜਿਤੁਂ ਨ ਲਭਤਿ, ਏਵਮੇਵ ਕੇਵਲਂ ਅਨ੍ਤੇਵਾਸਿਕਾਨਂ ਸਨ੍ਤਿਕਾ ਵਤ੍ਤਪਟਿਵਤ੍ਤਕਰਣਮਤ੍ਤਸ੍ਸ ਭਾਗੀ ਹੋਤਿ, ਸਾਮਞ੍ਞਸ੍ਸ ਪਨ ਭਾਗੀ ਨ ਹੋਤਿ. ਯਥਾ ਪਨ ਗੋਪਾਲਕੇਨ ਨਿਯ੍ਯਾਦਿਤਾਨਂ ਗੁਨ੍ਨਂ ਗੋਰਸਂ ਸਾਮਿਕਾਵ ਪਰਿਭੁਞ੍ਜਨ੍ਤਿ, ਤਥਾ ਤੇਨ ਕਥਿਤਂ ਧਮ੍ਮਂ ਸੁਤ੍ਵਾ ਕਾਰਕਪੁਗ੍ਗਲਾ ਯਥਾਨੁਸਿਟ੍ਠਂ ਪਟਿਪਜ੍ਜਿਤ੍ਵਾ ਕੇਚਿ ਪਠਮਜ੍ਝਾਨਾਦੀਨਿ ਪਾਪੁਣਨ੍ਤਿ, ਕੇਚਿ ਵਿਪਸ੍ਸਨਂ ਵਡ੍ਢੇਤ੍ਵਾ ਮਗ੍ਗਫਲਾਨਿ ਪਾਪੁਣਨ੍ਤਿ, ਗੋਣਸਾਮਿਕਾ ਗੋਰਸਸ੍ਸੇਵ ਸਾਮਞ੍ਞਸ੍ਸ ਭਾਗਿਨੋ ਹੋਨ੍ਤਿ.

ਇਤਿ ਸਤ੍ਥਾ ਸੀਲਸਮ੍ਪਨ੍ਨਸ੍ਸ ਬਹੁਸ੍ਸੁਤਸ੍ਸ ਪਮਾਦਵਿਹਾਰਿਨੋ ਅਨਿਚ੍ਚਾਦਿਵਸੇਨ ਯੋਨਿਸੋਮਨਸਿਕਾਰੇ ਪਮਤ੍ਤਸ੍ਸ ਭਿਕ੍ਖੁਨੋ ਵਸੇਨ ਪਠਮਂ ਗਾਥਂ ਕਥੇਸਿ, ਨ ਦੁਸ੍ਸੀਲਸ੍ਸ. ਦੁਤਿਯਗਾਥਾ ਪਨ ਅਪ੍ਪਸ੍ਸੁਤਸ੍ਸਪਿ ਯੋਨਿਸੋਮਨਸਿਕਾਰੇ ਕਮ੍ਮਂ ਕਰੋਨ੍ਤਸ੍ਸ ਕਾਰਕਪੁਗ੍ਗਲਸ੍ਸ ਵਸੇਨ ਕਥਿਤਾ.

ਤਤ੍ਥ ਅਪ੍ਪਮ੍ਪੀ ਚੇਤਿ ਥੋਕਂ ਏਕਵਗ੍ਗਦ੍ਵਿਵਗ੍ਗਮਤ੍ਤਮ੍ਪਿ. ਧਮ੍ਮਸ੍ਸ ਹੋਤਿ ਅਨੁਧਮ੍ਮਚਾਰੀਤਿ ਅਤ੍ਥਮਞ੍ਞਾਯ ਧਮ੍ਮਮਞ੍ਞਾਯ ਨਵਲੋਕੁਤ੍ਤਰਧਮ੍ਮਸ੍ਸ ਅਨੁਰੂਪਂ ਧਮ੍ਮਂ ਪੁਬ੍ਬਭਾਗਪਟਿਪਦਾਸਙ੍ਖਾਤਂ ਚਤੁਪਾਰਿਸੁਦ੍ਧਿਸੀਲਧੁਤਙ੍ਗਅਸੁਭਕਮ੍ਮਟ੍ਠਾਨਾਦਿਭੇਦਂ ਚਰਨ੍ਤੋ ਅਨੁਧਮ੍ਮਚਾਰੀ ਹੋਤਿ. ਸੋ ‘‘ਅਜ੍ਜ ਅਜ੍ਜੇਵਾ’’ਤਿ ਪਟਿਵੇਧਂ ਆਕਙ੍ਖਨ੍ਤੋ ਵਿਚਰਤਿ. ਸੋ ਇਮਾਯ ਸਮ੍ਮਾਪਟਿਪਤ੍ਤਿਯਾ ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ ਸਮ੍ਮਾ ਹੇਤੁਨਾ ਨਯੇਨ ਪਰਿਜਾਨਿਤਬ੍ਬੇ ਧਮ੍ਮੇ ਪਰਿਜਾਨਨ੍ਤੋ ਤਦਙ੍ਗਵਿਕ੍ਖਮ੍ਭਨਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਨਿਸ੍ਸਰਣਵਿਮੁਤ੍ਤੀਨਂ ਵਸੇਨ ਸੁਵਿਮੁਤ੍ਤਚਿਤ੍ਤੋ, ਅਨੁਪਾਦਿਯਾਨੋ ਇਧ ਵਾ ਹੁਰਂ ਵਾਤਿ ਇਧਲੋਕਪਰਲੋਕਪਰਿਯਾਪਨ੍ਨਾ ਵਾ ਅਜ੍ਝਤ੍ਤਿਕਬਾਹਿਰਾ ਵਾ ਖਨ੍ਧਾਯਤਨਧਾਤੁਯੋ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਨ੍ਤੋ ਮਹਾਖੀਣਾਸਵੋ ਮਗ੍ਗਸਙ੍ਖਾਤਸ੍ਸ ਸਾਮਞ੍ਞਸ੍ਸ ਵਸੇਨ ਆਗਤਸ੍ਸ ਫਲਸਾਮਞ੍ਞਸ੍ਸ ਚੇਵ ਪਞ੍ਚਅਸੇਕ੍ਖਧਮ੍ਮਕ੍ਖਨ੍ਧਸ੍ਸ ਚ ਭਾਗਵਾ ਹੋਤੀਤਿ ਰਤਨਕੂਟੇਨ ਵਿਯ ਅਗਾਰਸ੍ਸ ਅਰਹਤ੍ਤੇਨ ਦੇਸਨਾਯ ਕੂਟਂ ਗਣ੍ਹੀਤਿ.

ਗਾਥਾਪਰਿਯੋਸਾਨੇ ਬਹੂ ਸੋਤਾਪਨ੍ਨਾਦਯੋ ਅਹੇਸੁਂ. ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਜਾਤਾਤਿ.

ਦ੍ਵੇਸਹਾਯਕਭਿਕ੍ਖੁਵਤ੍ਥੁ ਚੁਦ੍ਦਸਮਂ.

ਯਮਕਵਗ੍ਗਵਣ੍ਣਨਾ ਨਿਟ੍ਠਿਤਾ.

ਪਠਮੋ ਵਗ੍ਗੋ.