੯. ਅਨੋਮਦਸ੍ਸੀਬੁਦ੍ਧਵਂਸਵਣ੍ਣਨਾ

ਸੋਭਿਤਬੁਦ੍ਧੇ ਪਨ ਪਰਿਨਿਬ੍ਬੁਤੇ ਤਸ੍ਸ ਅਪਰਭਾਗੇ ਏਕਮਸਙ੍ਖ੍ਯੇਯ੍ਯਂ ਬੁਦ੍ਧੁਪ੍ਪਾਦਰਹਿਤਂ ਅਹੋਸਿ. ਅਤੀਤੇ ਪਨ ਤਸ੍ਮਿਂ ਅਸਙ੍ਖ੍ਯੇਯ੍ਯੇ ਏਕਸ੍ਮਿਂ ਕਪ੍ਪੇ ਤਯੋ ਬੁਦ੍ਧਾ ਨਿਬ੍ਬਤ੍ਤਿਂਸੁ ਅਨੋਮਦਸ੍ਸੀ, ਪਦੁਮੋ, ਨਾਰਦੋਤਿ. ਤਤ੍ਥ ਅਨੋਮਦਸ੍ਸੀ ਭਗਵਾ ਸੋਲ਼ਸ ਅਸਙ੍ਖ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਦੇਵੇਹਿ ਅਭਿਯਾਚਿਤੋ ਤਤੋ ਚਵਿਤ੍ਵਾ ਚਨ੍ਦਵਤਿਯਂ ਨਾਮ ਰਾਜਧਾਨਿਯਂ ਯਸਵਾ ਨਾਮਸ੍ਸ ਰਞ੍ਞੋ ਕੁਲੇ ਸਮੁਸ੍ਸਿਤਚਾਰੁਪਯੋਧਰਾਯ ਯਸੋਧਰਾਯ ਨਾਮ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਅਨੋਮਦਸ੍ਸਿਕੁਮਾਰੇ ਕਿਰ ਯਸੋਧਰਾਯ ਦੇਵਿਯਾ ਕੁਚ੍ਛਿਗਤੇ ਤਸ੍ਸ ਪੁਞ੍ਞਪ੍ਪਭਾਵੇਨ ਪਭਾ ਅਸੀਤਿਹਤ੍ਥਪ੍ਪਮਾਣਂ ਠਾਨਂ ਫਰਿਤ੍ਵਾ ਅਟ੍ਠਾਸਿ. ਚਨ੍ਦਸੂਰਿਯਪ੍ਪਭਾਹਿ ਅਨਭਿਭਵਨੀਯਾਵ ਅਹੋਸਿ. ਸਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਬੋਧਿਸਤ੍ਤਂ ਸੁਚਨ੍ਦਨੁਯ੍ਯਾਨੇ ਵਿਜਾਯਿ. ਪਾਟਿਹਾਰਿਯਾਨਿ ਹੇਟ੍ਠਾ ਵੁਤ੍ਤਨਯਾਨੇਵ.

ਨਾਮਗ੍ਗਹਣਦਿਵਸੇ ਪਨਸ੍ਸ ਨਾਮਂ ਗਣ੍ਹਨ੍ਤਾ, ਯਸ੍ਮਾ ਜਾਤਿਯਂ ਆਕਾਸਤੋ ਸਤ੍ਤ ਰਤਨਾਨਿ ਪਤਿਂਸੁ, ਤਸ੍ਮਾ ਅਨੋਮਾਨਂ ਰਤਨਾਨਂ ਉਪ੍ਪਤ੍ਤਿਹੇਤੁਭੂਤਤ੍ਤਾ ‘‘ਅਨੋਮਦਸ੍ਸੀ’’ਤਿ ਨਾਮਮਕਂਸੁ. ਸੋ ਅਨੁਕ੍ਕਮੇਨ ਵੁਦ੍ਧਿਪ੍ਪਤ੍ਤੋ ਦਿਬ੍ਬੇਹਿ ਕਾਮਗੁਣੇਹਿ ਪਰਿਚਾਰਿਯਮਾਨੋ ਦਸਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਤਸ੍ਸ ਕਿਰ ਸਿਰਿ ਉਪਸਿਰਿ ਸਿਰਿਵਡ੍ਢੋਤਿ ਤਯੋ ਪਾਸਾਦਾ ਅਹੇਸੁਂ. ਸਿਰਿਮਾਦੇਵਿਪ੍ਪਮੁਖਾਨਿ ਤੇਵੀਸਤਿ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ. ਸੋ ਸਿਰਿਮਾਯ ਦੇਵਿਯਾ ਉਪਵਾਣੇ ਨਾਮ ਪੁਤ੍ਤੇ ਜਾਤੇ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸਿਵਿਕਾਯਾਨੇਨ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਤਿਸ੍ਸੋ ਜਨਕੋਟਿਯੋ ਅਨੁਪਬ੍ਬਜਿਂਸੁ.

ਤੇਹਿ ਪਰਿਵੁਤੋ ਮਹਾਪੁਰਿਸੋ ਦਸ ਮਾਸੇ ਪਧਾਨਚਰਿਯਂ ਚਰਿ. ਤਤੋ ਵਿਸਾਖਪੁਣ੍ਣਮਾਯ ਅਨੁਪਮਬ੍ਰਾਹ੍ਮਣਗਾਮੇ ਪਿਣ੍ਡਾਯ ਚਰਿਤ੍ਵਾ ਅਨੁਪਮਸੇਟ੍ਠਿਧੀਤਾਯ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਅਨੋਮਨਾਮਾਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਅਜ੍ਜੁਨਰੁਕ੍ਖਬੋਧਿਂ ਪਦਕ੍ਖਿਣਂ ਕਤ੍ਵਾ ਅਟ੍ਠਤ੍ਤਿਂਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਪਲ੍ਲਙ੍ਕਂ ਆਭੁਜਿਤ੍ਵਾ ਸਮਾਰਂ ਮਾਰਬਲਂ ਵਿਦ੍ਧਂਸੇਤ੍ਵਾ ਤੀਸੁ ਯਾਮੇਸੁ ਤਿਸ੍ਸੋ ਵਿਜ੍ਜਾ ਉਪ੍ਪਾਦੇਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਸਿ. ਤੇਨ ਵੁਤ੍ਤਂ –

੧. ‘‘ਸੋਭਿਤਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਅਨੋਮਦਸ੍ਸੀ ਅਮਿਤਯਸੋ, ਤੇਜਸ੍ਸੀ ਦੁਰਤਿਕ੍ਕਮੋ.

੨. ‘‘ਸੋ ਛੇਤ੍ਵਾ ਬਨ੍ਧਨਂ ਸਬ੍ਬਂ, ਵਿਦ੍ਧਂਸੇਤ੍ਵਾ ਤਯੋ ਭਵੇ;

ਅਨਿਵਤ੍ਤਿਗਮਨਂ ਮਗ੍ਗਂ, ਦੇਸੇਸਿ ਦੇਵਮਾਨੁਸੇ.

੩. ‘‘ਸਾਗਰੋਵ ਅਸਙ੍ਖੋਭੋ, ਪਬ੍ਬਤੋਵ ਦੁਰਾਸਦੋ;

ਆਕਾਸੋਵ ਅਨਨ੍ਤੋ ਸੋ, ਸਾਲਰਾਜਾਵ ਫੁਲ੍ਲਿਤੋ.

੪. ‘‘ਦਸ੍ਸਨੇਨਪਿ ਤਂ ਬੁਦ੍ਧਂ, ਤੋਸਿਤਾ ਹੋਨ੍ਤਿ ਪਾਣਿਨੋ;

ਬ੍ਯਾਹਰਨ੍ਤਂ ਗਿਰਂ ਸੁਤ੍ਵਾ, ਅਮਤਂ ਪਾਪੁਣਨ੍ਤਿ ਤੇ’’ਤਿ.

ਤਤ੍ਥ ਅਨੋਮਦਸ੍ਸੀਤਿ ਅਨੁਪਮਦਸ੍ਸਨੋ, ਅਮਿਤਦਸ੍ਸਨੋ ਵਾ. ਅਮਿਤਯਸੋਤਿ ਅਮਿਤਪਰਿਵਾਰੋ, ਅਮਿਤਕਿਤ੍ਤਿ ਵਾ. ਤੇਜਸ੍ਸੀਤਿ ਸੀਲਸਮਾਧਿਪਞ੍ਞਾਤੇਜੇਨ ਸਮਨ੍ਨਾਗਤੋ. ਦੁਰਤਿਕ੍ਕਮੋਤਿ ਦੁਪ੍ਪਧਂਸਿਯੋ, ਅਞ੍ਞੇਨ ਦੇਵੇਨ ਵਾ ਮਾਰੇਨ ਵਾ ਕੇਨਚਿ ਵਾ ਅਤਿਕ੍ਕਮਿਤੁਂ ਅਸਕ੍ਕੁਣੇਯ੍ਯੋਤਿ ਅਤ੍ਥੋ. ਸੋ ਛੇਤ੍ਵਾ ਬਨ੍ਧਨਂ ਸਬ੍ਬਨ੍ਤਿ ਸਬ੍ਬਂ ਦਸਵਿਧਂ ਸਂਯੋਜਨਂ ਛਿਨ੍ਦਿਤ੍ਵਾ. ਵਿਦ੍ਧਂਸੇਤ੍ਵਾ ਤਯੋ ਭਵੇਤਿ ਤਿਭਵੂਪਗਂ ਕਮ੍ਮਂ ਕਮ੍ਮਕ੍ਖਯਕਰਞਾਣੇਨ ਵਿਦ੍ਧਂਸੇਤ੍ਵਾ, ਅਭਾਵਂ ਕਤ੍ਵਾਤਿ ਅਤ੍ਥੋ. ਅਨਿਵਤ੍ਤਿਗਮਨਂ ਮਗ੍ਗਨ੍ਤਿ ਨਿਵਤ੍ਤਿਯਾ ਪਵਤ੍ਤਿਯਾ ਪਟਿਪਕ੍ਖਭੂਤਂ ਨਿਬ੍ਬਾਨਂ ਅਨਿਵਤ੍ਤੀਤਿ ਵੁਚ੍ਚਤਿ, ਤਂ ਅਨਿਵਤ੍ਤਿਂ ਗਚ੍ਛਤਿ ਅਨੇਨਾਤਿ ਅਨਿਵਤ੍ਤਿਗਮਨੋ. ਤਂ ਅਨਿਵਤ੍ਤਿਗਮਨਂ ਅਟ੍ਠਙ੍ਗਿਕਂ ਮਗ੍ਗਂ ਦੇਸੇਸੀਤਿ ਅਤ੍ਥੋ. ‘‘ਦਸ੍ਸੇਤੀ’’ਤਿਪਿ ਪਾਠੋ, ਸੋਯੇਵਤ੍ਥੋ. ਦੇਵਮਾਨੁਸੇਤਿ ਦੇਵਮਨੁਸ੍ਸਾਨਂ, ਸਾਮਿਅਤ੍ਥੇ ਉਪਯੋਗਵਚਨਂ ਦਟ੍ਠਬ੍ਬਂ.

ਅਸਙ੍ਖੋਭੋਤਿ ਖੋਭੇਤੁਂ ਚਾਲੇਤੁਂ ਅਸਕ੍ਕੁਣੇਯ੍ਯੋਤਿ ਅਕ੍ਖੋਭਿਯੋ. ਯਥਾ ਹਿ ਸਮੁਦ੍ਦੋ ਚਤੁਰਾਸੀਤਿਯੋਜਨਸਹਸ੍ਸਗਮ੍ਭੀਰੋ ਅਨੇਕਯੋਜਨਸਹਸ੍ਸਭੂਤਾਵਾਸੋ ਅਕ੍ਖੋਭਿਯੋ, ਏਵਂ ਅਕ੍ਖੋਭਿਯੋਤਿ ਅਤ੍ਥੋ. ਆਕਾਸੋਵ ਅਨਨ੍ਤੋਤਿ ਯਥਾ ਪਨ ਆਕਾਸਸ੍ਸ ਅਨ੍ਤੋ ਨਤ੍ਥਿ, ਅਥ ਖੋ ਅਨਨ੍ਤੋ ਅਪ੍ਪਮੇਯ੍ਯੋ ਅਪਾਰੋ, ਏਵਂ ਭਗਵਾਪਿ ਬੁਦ੍ਧਗੁਣੇਹਿ ਅਨਨ੍ਤੋ ਅਪ੍ਪਮੇਯ੍ਯੋ ਅਪਾਰੋ. ਸੋਤਿ ਸੋ ਭਗਵਾ. ਸਾਲਰਾਜਾਵ ਫੁਲ੍ਲਿਤੋਤਿ ਸਬ੍ਬਲਕ੍ਖਣਾਨੁਬ੍ਯਞ੍ਜਨਸਮਲਙ੍ਕਤਸਰੀਰਤ੍ਤਾ ਸੁਫੁਲ੍ਲਿਤਸਾਲਰਾਜਾ ਵਿਯ ਸੋਭਤੀਤਿ ਅਤ੍ਥੋ. ਦਸ੍ਸਨੇਨਪਿ ਤਂ ਬੁਦ੍ਧਨ੍ਤਿ ਤਸ੍ਸ ਬੁਦ੍ਧਸ੍ਸ ਦਸ੍ਸਨੇਨਾਪੀਤਿ ਅਤ੍ਥੋ. ਈਦਿਸੇਸੁਪਿ ਸਾਮਿਵਚਨਂ ਪਯੁਜ੍ਜਨ੍ਤਿ ਸਦ੍ਦਸਤ੍ਥਵਿਦੂ. ਤੋਸਿਤਾਤਿ ਪਰਿਤੋਸਿਤਾ ਪੀਣਿਤਾ. ਬ੍ਯਾਹਰਨ੍ਤਨ੍ਤਿ ਬ੍ਯਾਹਰਨ੍ਤਸ੍ਸ, ਸਾਮਿਅਤ੍ਥੇ ਉਪਯੋਗਵਚਨਂ. ਅਮਤਨ੍ਤਿ ਨਿਬ੍ਬਾਨਂ. ਪਾਪੁਣਨ੍ਤੀਤਿ ਅਧਿਗਚ੍ਛਨ੍ਤਿ. ਤੇਤਿ ਯੇ ਤਸ੍ਸ ਗਿਰਂ ਧਮ੍ਮਦੇਸਨਂ ਸੁਣਨ੍ਤਿ, ਤੇ ਅਮਤਂ ਪਾਪੁਣਨ੍ਤੀਤਿ ਅਤ੍ਥੋ.

ਭਗਵਾ ਪਨ ਬੋਧਿਮੂਲੇ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਬ੍ਰਹ੍ਮੁਨਾ ਆਯਾਚਿਤੋ ਧਮ੍ਮਦੇਸਨਾਯ ਬੁਦ੍ਧਚਕ੍ਖੁਨਾ ਲੋਕਂ ਓਲੋਕੇਨ੍ਤੋ ਅਤ੍ਤਨਾ ਸਹ ਪਬ੍ਬਜਿਤੇ ਤਿਕੋਟਿਸਙ੍ਖੇ ਜਨੇ ਉਪਨਿਸ੍ਸਯਸਮ੍ਪਨ੍ਨੇ ਦਿਸ੍ਵਾ – ‘‘ਕਤ੍ਥ ਨੁ ਖੋ ਤੇ ਏਤਰਹਿ ਵਿਹਰਨ੍ਤੀ’’ਤਿ ਉਪਧਾਰੇਨ੍ਤੋ ਸੁਭਵਤੀਨਗਰੇ ਸੁਦਸ੍ਸਨੁਯ੍ਯਾਨੇ ਵਿਹਰਨ੍ਤੇ ਦਿਸ੍ਵਾ ਆਕਾਸੇਨ ਗਨ੍ਤ੍ਵਾ ਸੁਦਸ੍ਸਨੁਯ੍ਯਾਨੇ ਓਤਰਿ. ਸੋ ਤੇਹਿ ਪਰਿਵੁਤੋ ਸਦੇਵਮਨੁਸ੍ਸਾਯ ਪਰਿਸਾਯ ਮਜ੍ਝੇ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਤ੍ਥ ਕੋਟਿਸਤਾਨਂ ਪਠਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਧਮ੍ਮਾਭਿਸਮਯੋ ਤਸ੍ਸ, ਇਦ੍ਧੋ ਫੀਤੋ ਤਦਾ ਅਹੁ;

ਕੋਟਿਸਤਾਨਿ ਅਭਿਸਮਿਂਸੁ, ਪਠਮੇ ਧਮ੍ਮਦੇਸਨੇ’’ਤਿ.

ਤਤ੍ਥ ਫੀਤੋਤਿ ਫਾਤਿਪ੍ਪਤ੍ਤੋ ਬਾਹੁਜਞ੍ਞਵਸੇਨ. ਕੋਟਿਸਤਾਨੀਤਿ ਕੋਟੀਨਂ ਸਤਾਨਿ ਕੋਟਿਸਤਾਨਿ. ‘‘ਕੋਟਿਸਤਯੋ’’ਤਿਪਿ ਪਾਠੋ, ਤਸ੍ਸ ਸਤਕੋਟਿਯੋਤਿ ਅਤ੍ਥੋ.

ਅਥਾਪਰੇਨ ਸਮਯੇਨ ਓਸਧੀਨਗਰਦ੍ਵਾਰੇ ਅਸਨਰੁਕ੍ਖਮੂਲੇ ਯਮਕਪਾਟਿਹਾਰਿਯਂ ਕਤ੍ਵਾ ਅਸੁਰੇਹਿ ਦੁਰਭਿਭਵਨੇ ਤਾਵਤਿਂਸਭਵਨੇ ਪਣ੍ਡੁਕਮ੍ਬਲਸਿਲਾਯਂ ਨਿਸਿਨ੍ਨੋ ਤੇਮਾਸਂ ਅਭਿਧਮ੍ਮਵਸ੍ਸਂ ਵਸ੍ਸਾਪਯਿ. ਤਦਾ ਅਸੀਤਿਦੇਵਤਾਕੋਟਿਯੋ ਅਭਿਸਮਿਂਸੁ. ਤੇਨ ਵੁਤ੍ਤਂ –

੬. ‘‘ਤਤੋ ਪਰਂ ਅਭਿਸਮਯੇ, ਵਸ੍ਸਨ੍ਤੇ ਧਮ੍ਮਵੁਟ੍ਠਿਯੋ;

ਅਸੀਤਿਕੋਟਿਯੋਭਿਸਮਿਂਸੁ, ਦੁਤਿਯੇ ਧਮ੍ਮਦੇਸਨੇ’’ਤਿ.

ਤਤ੍ਥ ਵਸ੍ਸਨ੍ਤੇਤਿ ਬੁਦ੍ਧਮਹਾਮੇਘੇ ਵਸ੍ਸਨ੍ਤੇ. ਧਮ੍ਮਵੁਟ੍ਠਿਯੋਤਿ ਧਮ੍ਮਕਥਾਵਸ੍ਸਵੁਟ੍ਠਿਯੋ.

ਤਤੋ ਅਪਰੇਨ ਸਮਯੇਨ ਮਙ੍ਗਲਪਞ੍ਹਾਨਿਦ੍ਦੇਸੇ ਅਟ੍ਠਸਤ੍ਤਤਿ ਕੋਟਿਯੋ ਅਭਿਸਮਿਂਸੁ. ਸੋ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੭. ‘‘ਤਤੋ ਪਰਮ੍ਪਿ ਵਸ੍ਸਨ੍ਤੇ, ਤਪ੍ਪਯਨ੍ਤੇ ਚ ਪਾਣਿਨਂ;

ਅਟ੍ਠਸਤ੍ਤਤਿਕੋਟੀਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਤਤ੍ਥ ਵਸ੍ਸਨ੍ਤੇਤਿ ਧਮ੍ਮਕਥਾਸਲਿਲਧਾਰਂ ਵਸ੍ਸਨ੍ਤੇ. ਤਪ੍ਪਯਨ੍ਤੇਤਿ ਧਮ੍ਮਾਮਤਵਸ੍ਸੇਨ ਤਪ੍ਪਯਨ੍ਤੇ, ਤਪ੍ਪਨਂ ਕਰੋਨ੍ਤੇ ਭਗਵਤੀਤਿ ਅਤ੍ਥੋ.

ਅਨੋਮਦਸ੍ਸਿਸ੍ਸਪਿ ਭਗਵਤੋ ਤਯੋ ਸਾਵਕਸਨ੍ਨਿਪਾਤਾ ਅਹੇਸੁਂ. ਤਤ੍ਥ ਸੋਰੇਯ੍ਯਨਗਰੇ ਇਸਿਦਤ੍ਤਸ੍ਸ ਰਞ੍ਞੋ ਧਮ੍ਮੇ ਦੇਸਿਯਮਾਨੇ ਪਸੀਦਿਤ੍ਵਾ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾਨਂ ਅਟ੍ਠਨ੍ਨਂ ਅਰਹਨ੍ਤਸਤਸਹਸ੍ਸਾਨਂ ਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ. ਅਯਂ ਪਠਮੋ ਸਨ੍ਨਿਪਾਤੋ ਅਹੋਸਿ. ਰਾਧਵਤੀਨਗਰੇ ਸੁਨ੍ਦਰਿਨ੍ਧਰਸ੍ਸ ਨਾਮ ਰਞ੍ਞੋ ਧਮ੍ਮੇ ਦੇਸਿਯਮਾਨੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾਨਂ ਸਤ੍ਤਨ੍ਨਂ ਅਰਹਨ੍ਤਸਤਸਹਸ੍ਸਾਨਂ ਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ. ਅਯਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਪੁਨ ਸੋਰੇਯ੍ਯਨਗਰੇਯੇਵ ਸੋਰੇਯ੍ਯਰਞ੍ਞਾ ਸਹ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾਨਂ ਛਨ੍ਨਂ ਅਰਹਨ੍ਤਸਤਸਹਸ੍ਸਾਨਂ ਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ. ਅਯਂ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੮. ‘‘ਸਨ੍ਨਿਪਾਤਾ ਤਯੋ ਆਸੁਂ, ਤਸ੍ਸਾਪਿ ਚ ਮਹੇਸਿਨੋ;

ਅਭਿਞ੍ਞਾਬਲਪ੍ਪਤ੍ਤਾਨਂ, ਪੁਪ੍ਫਿਤਾਨਂ ਵਿਮੁਤ੍ਤਿਯਾ.

੯. ‘‘ਅਟ੍ਠਸਤਸਹਸ੍ਸਾਨਂ, ਸਨ੍ਨਿਪਾਤੋ ਤਦਾ ਅਹੁ;

ਪਹੀਨਮਦਮੋਹਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੧੦. ‘‘ਸਤ੍ਤਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ;

ਅਨਙ੍ਗਣਾਨਂ ਵਿਰਜਾਨਂ, ਉਪਸਨ੍ਤਾਨ ਤਾਦਿਨਂ.

੧੧. ‘‘ਛਨ੍ਨਂ ਸਤਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਅਭਿਞ੍ਞਾਬਲਪ੍ਪਤ੍ਤਾਨਂ, ਨਿਬ੍ਬੁਤਾਨਂ ਤਪਸ੍ਸਿਨ’’ਨ੍ਤਿ.

ਤਤ੍ਥ ਤਸ੍ਸਾਪਿ ਚ ਮਹੇਸਿਨੋਤਿ ਤਸ੍ਸ ਮਹੇਸਿਨੋ ਅਨੋਮਦਸ੍ਸਿਸ੍ਸਾਪਿ. ‘‘ਤਸ੍ਸਾਪਿ ਦ੍ਵਿਪਦੁਤ੍ਤਮੋ’’ਤਿਪਿ ਪਾਠੋ, ਤਸ੍ਸਪਿ ਦ੍ਵਿਪਦੁਤ੍ਤਮਸ੍ਸਾਤਿ ਅਤ੍ਥੋ. ਲਕ੍ਖਣਂ ਸਦ੍ਦਸਤ੍ਥਤੋ ਗਹੇਤਬ੍ਬਂ. ਅਭਿਞ੍ਞਾਬਲਪ੍ਪਤ੍ਤਾਨਨ੍ਤਿ ਅਭਿਞ੍ਞਾਨਂ ਬਲਪ੍ਪਤ੍ਤਾਨਂ, ਚਿਣ੍ਣਵਸਿਤਾਯ ਖਿਪ੍ਪਨਿਸਨ੍ਤਿਭਾਵੇਨ ਅਭਿਞ੍ਞਾਸੁ ਥਿਰਭਾਵਪ੍ਪਤ੍ਤਾਨਨ੍ਤਿ ਅਤ੍ਥੋ. ਪੁਪ੍ਫਿਤਾਨਨ੍ਤਿ ਸਬ੍ਬਫਾਲਿਫੁਲ੍ਲਭਾਵੇਨ ਅਤਿਵਿਯ ਸੋਭਗ੍ਗਪ੍ਪਤ੍ਤਾਨਂ. ਵਿਮੁਤ੍ਤਿਯਾਤਿ ਅਰਹਤ੍ਤਫਲਵਿਮੁਤ੍ਤਿਯਾ.

ਅਨਙ੍ਗਣਾਨਨ੍ਤਿ ਏਤ੍ਥ ਅਯਂ ਅਙ੍ਗਣ-ਸਦ੍ਦੋ ਕਤ੍ਥਚਿ ਕਿਲੇਸੇਸੁ ਦਿਸ੍ਸਤਿ. ਯਥਾਹ – ‘‘ਤਤ੍ਥ ਕਤਮਾਨਿ ਤੀਣਿ ਅਙ੍ਗਣਾਨਿ? ਰਾਗੋ ਅਙ੍ਗਣਂ ਦੋਸੋ ਅਙ੍ਗਣਂ ਮੋਹੋ ਅਙ੍ਗਣ’’ਨ੍ਤਿ (ਵਿਭ. ੯੨੪). ‘‘ਪਾਪਕਾਨਂ ਖੋ ਏਤਂ, ਆਵੁਸੋ, ਅਕੁਸਲਾਨਂ ਇਚ੍ਛਾਵਚਰਾਨਂ ਅਧਿਵਚਨਂ ਯਦਿਦਂ ਅਙ੍ਗਣ’’ਨ੍ਤਿ (ਮ. ਨਿ. ੧.੬੦). ਕਤ੍ਥਚਿ ਕਿਸ੍ਮਿਞ੍ਚਿ ਮਲੇ? ਯਥਾਹ – ‘‘ਤਸ੍ਸੇਵ ਰਜਸ੍ਸ ਵਾ ਅਙ੍ਗਣਸ੍ਸ ਵਾ ਪਹਾਨਾਯ ਵਾਯਮਤੀ’’ਤਿ (ਮ. ਨਿ. ੧.੧੮੪). ਕਤ੍ਥਚਿ ਤਥਾਰੂਪੇ ਭੂਮਿਭਾਗੇ ‘‘ਚੇਤਿਯਙ੍ਗਣਂ ਬੋਧਿਯਙ੍ਗਣਂ ਰਾਜਙ੍ਗਣ’’ਨ੍ਤਿ. ਇਧ ਪਨ ਕਿਲੇਸੇਸੁ ਦਟ੍ਠਬ੍ਬੋ. ਤਸ੍ਮਾ ਨਿਕ੍ਕਿਲੇਸਾਨਨ੍ਤਿ ਅਤ੍ਥੋ (ਮ. ਨਿ. ਅਟ੍ਠ. ੧.੫੭). ਵਿਰਜਾਨਨ੍ਤਿ ਤਸ੍ਸੇਵ ਵੇਵਚਨਂ. ਤਪਸ੍ਸਿਨਨ੍ਤਿ ਕਿਲੇਸਕ੍ਖਯਕਰੋ ਅਰਿਯਮਗ੍ਗਸਙ੍ਖਾਤੋ ਤਪੋ ਯੇਸਂ ਅਤ੍ਥਿ ਤੇ ਤਪਸ੍ਸਿਨੋ, ਤੇਸਂ ਤਪਸ੍ਸੀਨਂ, ਖੀਣਾਸਵਾਨਨ੍ਤਿ ਅਤ੍ਥੋ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਏਕੋ ਮਹੇਸਕ੍ਖੋ ਯਕ੍ਖਸੇਨਾਪਤਿ ਅਹੋਸਿ ਮਹਿਦ੍ਧਿਕੋ ਮਹਾਨੁਭਾਵੋ ਅਨੇਕਕੋਟਿਸਤਸਹਸ੍ਸਾਨਂ ਯਕ੍ਖਾਨਂ ਅਧਿਪਤਿ. ਸੋ ‘‘ਬੁਦ੍ਧੋ ਲੋਕੇ ਉਪ੍ਪਨ੍ਨੋ’’ਤਿ ਸੁਤ੍ਵਾ ਆਗਨ੍ਤ੍ਵਾ ਪਰਮਰੁਚਿਰਦਸ੍ਸਨਂ ਸਤ੍ਤਰਤਨਮਯਂ ਅਭਿਰੁਚਿਰਰਜਨਿਕਰਮਣ੍ਡਲਸਦਿਸਂ ਮਣ੍ਡਪਂ ਨਿਮ੍ਮਿਨਿਤ੍ਵਾ ਤਤ੍ਥ ਸਤ੍ਤਾਹਂ ਮਹਾਦਾਨਂ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਅਦਾਸਿ. ਅਥ ਨਂ ਭਗਵਾ ਭਤ੍ਤਾਨੁਮੋਦਨਸਮਯੇ ‘‘ਅਨਾਗਤੇ ਕਪ੍ਪਸਤਸਹਸ੍ਸਾਧਿਕੇ ਏਕਸ੍ਮਿਂ ਅਸਙ੍ਖ੍ਯੇਯ੍ਯੇ ਅਤਿਕ੍ਕਨ੍ਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੧੨. ‘‘ਅਹਂ ਤੇਨ ਸਮਯੇਨ, ਯਕ੍ਖੋ ਆਸਿਂ ਮਹਿਦ੍ਧਿਕੋ;

ਨੇਕਾਨਂ ਯਕ੍ਖਕੋਟੀਨਂ, ਵਸਵਤ੍ਤਿਮ੍ਹਿ ਇਸ੍ਸਰੋ.

੧੩. ‘‘ਤਦਾਪਿ ਤਂ ਬੁਦ੍ਧਵਰਂ, ਉਪਗਨ੍ਤ੍ਵਾ ਮਹੇਸਿਨਂ;

ਅਨ੍ਨਪਾਨੇਨ ਤਪ੍ਪੇਸਿਂ, ਸਸਙ੍ਘਂ ਲੋਕਨਾਯਕਂ.

੧੪. ‘‘ਸੋਪਿ ਮਂ ਤਦਾ ਬ੍ਯਾਕਾਸਿ, ਵਿਸੁਦ੍ਧਨਯਨੋ ਮੁਨਿ;

ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੫. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੬. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਹਟ੍ਠੋ ਸਂਵਿਗ੍ਗਮਾਨਸੋ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਉਤ੍ਤਰਿਂ ਵਤਮਧਿਟ੍ਠਾਸਿਨ੍ਤਿ ਪਾਰਮਿਪੂਰਣਤ੍ਥਾਯ ਭਿਯ੍ਯੋਪਿ ਦਲ਼੍ਹਤਰਂ ਪਰਕ੍ਕਮਮਕਾਸੀਤਿ ਅਤ੍ਥੋ.

ਤਸ੍ਸ ਪਨ ਅਨੋਮਦਸ੍ਸਿਸ੍ਸ ਭਗਵਤੋ ਚਨ੍ਦਵਤੀ ਨਾਮ ਨਗਰਂ ਅਹੋਸਿ, ਯਸਵਾ ਨਾਮ ਰਾਜਾ ਪਿਤਾ, ਯਸੋਧਰਾ ਨਾਮ ਮਾਤਾ, ਨਿਸਭੋ ਚ ਅਨੋਮੋ ਚ ਦ੍ਵੇ ਅਗ੍ਗਸਾਵਕਾ, ਵਰੁਣੋ ਨਾਮੁਪਟ੍ਠਾਕੋ, ਸੁਨ੍ਦਰੀ ਚ ਸੁਮਨਾ ਚ ਦ੍ਵੇ ਅਗ੍ਗਸਾਵਿਕਾ, ਅਜ੍ਜੁਨਰੁਕ੍ਖੋ ਬੋਧਿ, ਸਰੀਰਂ ਅਟ੍ਠਪਣ੍ਣਾਸਹਤ੍ਥੁਬ੍ਬੇਧਂ ਅਹੋਸਿ, ਵਸ੍ਸਸਤਸਹਸ੍ਸਂ ਆਯੁ, ਸਿਰਿਮਾ ਨਾਮ ਅਗ੍ਗਮਹੇਸੀ, ਉਪਵਾਣੋ ਨਾਮਸ੍ਸ ਪੁਤ੍ਤੋ, ਦਸਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਸੋ ਸਿਵਿਕਾਯਾਨੇਨ ਨਿਕ੍ਖਮਿ. ਸਿਵਿਕਾਯਾਨੇਨ ਗਮਨਂ ਪਨ ਸੋਭਿਤਬੁਦ੍ਧਵਂਸਵਣ੍ਣਨਾਯ ਪਾਸਾਦਗਮਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਧਮ੍ਮਕੋ ਨਾਮ ਰਾਜਾ ਉਪਟ੍ਠਾਕੋ. ਧਮ੍ਮਾਰਾਮੇ ਕਿਰ ਭਗਵਾ ਵਿਹਾਸੀਤਿ. ਤੇਨ ਵੁਤ੍ਤਂ –

੧੭. ‘‘ਨਗਰਂ ਚਨ੍ਦਵਤੀ ਨਾਮ, ਯਸਵਾ ਨਾਮ ਖਤ੍ਤਿਯੋ;

ਮਾਤਾ ਯਸੋਧਰਾ ਨਾਮ, ਅਨੋਮਦਸ੍ਸਿਸ੍ਸ ਸਤ੍ਥੁਨੋ.

੨੨. ‘‘ਨਿਸਭੋ ਚ ਅਨੋਮੋ ਚ, ਅਹੇਸੁਂ ਅਗ੍ਗਸਾਵਕਾ;

ਵਰੁਣੋ ਨਾਮੁਪਟ੍ਠਾਕੋ, ਅਨੋਮਦਸ੍ਸਿਸ੍ਸ ਸਤ੍ਥੁਨੋ.

੨੩. ‘‘ਸੁਨ੍ਦਰੀ ਚ ਸੁਮਨਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਅਜ੍ਜੁਨੋਤਿ ਪਵੁਚ੍ਚਤਿ.

੨੫. ‘‘ਅਟ੍ਠਪਣ੍ਣਾਸਰਤਨਂ, ਅਚ੍ਚੁਗ੍ਗਤੋ ਮਹਾਮੁਨਿ;

ਪਭਾ ਨਿਦ੍ਧਾਵਤੀ ਤਸ੍ਸ, ਸਤਰਂਸੀਵ ਉਗ੍ਗਤੋ.

੨੬. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੭. ‘‘ਸੁਪੁਪ੍ਫਿਤਂ ਪਾਵਚਨਂ, ਅਰਹਨ੍ਤੇਹਿ ਤਾਦਿਹਿ;

ਵੀਤਰਾਗੇਹਿ ਵਿਮਲੇਹਿ, ਸੋਭਿਤ੍ਥ ਜਿਨਸਾਸਨਂ.

੨੮. ‘‘ਸੋ ਚ ਸਤ੍ਥਾ ਅਮਿਤਯਸੋ, ਯੁਗਾਨਿ ਤਾਨਿ ਅਤੁਲਿਯਾਨਿ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਪਭਾ ਨਿਦ੍ਧਾਵਤੀਤਿ ਤਸ੍ਸ ਸਰੀਰਤੋ ਪਭਾ ਨਿਕ੍ਖਮਤਿ. ਸਰੀਰਪ੍ਪਭਾ ਪਨਸ੍ਸ ਨਿਚ੍ਚਕਾਲਂ ਦ੍ਵਾਦਸਯੋਜਨਪ੍ਪਮਾਣਂ ਪਦੇਸਂ ਫਰਿਤ੍ਵਾ ਤਿਟ੍ਠਤਿ. ਯੁਗਾਨਿ ਤਾਨੀਤਿ ਅਗ੍ਗਸਾਵਕਯੁਗਾਦੀਨਿ ਯੁਗਲ਼ਾਨਿ. ਸਬ੍ਬਂ ਤਮਨ੍ਤਰਹਿਤਨ੍ਤਿ ਵੁਤ੍ਤਪ੍ਪਕਾਰਂ ਸਬ੍ਬਮ੍ਪਿ ਅਨਿਚ੍ਚਮੁਖਂ ਪਵਿਟ੍ਠਂ ਵਿਨਟ੍ਠਨ੍ਤਿ ਅਤ੍ਥੋ. ‘‘ਨਨੁ ਰਿਤ੍ਤਕਮੇਵ ਸਙ੍ਖਾਰਾ’’ਤਿਪਿ ਪਾਠੋ, ਤਸ੍ਸ ਨਨੁ ਰਿਤ੍ਤਕਾ ਤੁਚ੍ਛਕਾਯੇਵ ਸਬ੍ਬੇ ਸਙ੍ਖਾਰਾਤਿ ਅਤ੍ਥੋ. ਮ-ਕਾਰੋ ਪਦਸਨ੍ਧਿਕਰੋ. ਸੇਸਗਾਥਾਸੁ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਇਮਸ੍ਸ ਪਨ ਅਨੋਮਦਸ੍ਸਿਸ੍ਸ ਭਗਵਤੋ ਸਨ੍ਤਿਕੇ ਸਾਰਿਪੁਤ੍ਤੋ ਚ ਮਹਾਮੋਗ੍ਗਲ੍ਲਾਨੋ ਚਾਤਿ ਇਮੇ ਦ੍ਵੇ ਅਗ੍ਗਸਾਵਕਾ ਅਗ੍ਗਸਾਵਕਭਾਵਤ੍ਥਾਯ ਪਣਿਧਾਨਮਕਂਸੁ. ਇਮੇਸਂ ਪਨ ਥੇਰਾਨਂ ਵਤ੍ਥੁ ਚੇਤ੍ਥ ਕਥੇਤਬ੍ਬਂ. ਮਯਾ ਗਨ੍ਥਵਿਤ੍ਥਾਰਭਯੇਨ ਨ ਉਦ੍ਧਟਨ੍ਤਿ.

ਅਨੋਮਦਸ੍ਸੀਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਸਤ੍ਤਮੋ ਬੁਦ੍ਧਵਂਸੋ.