੧੦. ਪਦੁਮਬੁਦ੍ਧਵਂਸਵਣ੍ਣਨਾ
ਅਨੋਮਦਸ੍ਸਿਸ੍ਸ ਪਨ ਭਗਵਤੋ ਅਪਰਭਾਗੇ ਵਸ੍ਸਸਤਸਹਸ੍ਸਾਯੁਕਾ ਮਨੁਸ੍ਸਾ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਦਸਵਸ੍ਸਾਯੁਕਾ ਹੁਤ੍ਵਾ ਪੁਨ ਅਨੁਕ੍ਕਮੇਨ ਵਡ੍ਢਿਤ੍ਵਾ ਅਸਙ੍ਖ੍ਯੇਯ੍ਯਾਯੁਕਾ ਹੁਤ੍ਵਾ ਪੁਨ ਪਰਿਹਾਯਮਾਨਾ ਵਸ੍ਸਸਤਸਹਸ੍ਸਾਯੁਕਾ ਅਹੇਸੁਂ. ਤਥਾ ਪਦੁਮੋ ਨਾਮ ਸਤ੍ਥਾ ਲੋਕੇ ਉਪ੍ਪਜ੍ਜਿ. ਸੋਪਿ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਚਮ੍ਪਕਨਗਰੇ ਅਸਮਸ੍ਸ ਨਾਮ ਰਞ੍ਞੋ ਕੁਲੇ ਰੂਪਾਦੀਹਿ ਅਸਮਾਯ ਅਸਮਾਯ ਨਾਮ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਸੋ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਚਮ੍ਪਕੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਜਾਤੇ ਪਨ ਕੁਮਾਰੇ ਆਕਾਸਤੋ ਸਕਲਜਮ੍ਬੁਦੀਪੇ ਸਮੁਦ੍ਦਪਰਿਯਨ੍ਤੇ ਪਦੁਮਵਸ੍ਸਂ ਨਿਪਤਿ. ਤੇਨਸ੍ਸ ਨਾਮਗ੍ਗਹਣਦਿਵਸੇ ਨਾਮਂ ਗਣ੍ਹਨ੍ਤਾ ਨੇਮਿਤ੍ਤਕਾ ਚ ਞਾਤਕਾ ਚ ‘‘ਮਹਾਪਦੁਮਕੁਮਾਰੋ’’ਤ੍ਵੇਵ ਨਾਮਮਕਂਸੁ. ਸੋ ਦਸਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਨਨ੍ਦੁਤ੍ਤਰ-ਵਸੁਤ੍ਤਰ-ਯਸੁਤ੍ਤਰਾਨਾਮਕਾ ਤਯੋ ਪਾਸਾਦਾ ਅਹੇਸੁਂ. ਉਤ੍ਤਰਾਦੇਵਿਪ੍ਪਮੁਖਾਨਿ ਤੇਤ੍ਤਿਂਸ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.
ਅਥ ਮਹਾਸਤ੍ਤੋ ਉਤ੍ਤਰਾਯ ਨਾਮ ਮਹਾਦੇਵਿਯਾ ਰਮ੍ਮਕੁਮਾਰੇ ਨਾਮ ਉਪ੍ਪਨ੍ਨੇ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਆਜਞ੍ਞਰਥੇਨ ਮਹਾਭਿਨਿਕ੍ਖਮਨਂ ਨਿਕ੍ਖਮਿ. ਤਂ ਪਬ੍ਬਜਨ੍ਤਂ ਏਕਾ ਪੁਰਿਸਕੋਟਿ ਅਨੁਪਬ੍ਬਜਿ. ਸੋ ਤੇਹਿ ਪਰਿਵੁਤੋ ਅਟ੍ਠ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਧਞ੍ਞਵਤੀਨਗਰੇ ਸੁਧਞ੍ਞਸੇਟ੍ਠਿਸ੍ਸ ਧੀਤਾਯ ਧਞ੍ਞਵਤਿਯਾ ਨਾਮ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਮਹਾਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਤਿਤ੍ਥਕਾਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਮਹਾਸੋਣਬੋਧਿਂ ਉਪਸਙ੍ਕਮਿਤ੍ਵਾ ਅਟ੍ਠਤ੍ਤਿਂਸਹਤ੍ਥਵਿਤ੍ਥਤਂ ਤਿਣਸਨ੍ਥਰਕਂ ਪਞ੍ਞਪੇਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਮਾਰਬਲਂ ਵਿਧਮਿਤ੍ਵਾ ਤੀਸੁ ਯਾਮੇਸੁ ਤਿਸ੍ਸੋ ਵਿਜ੍ਜਾ ਸਚ੍ਛਿਕਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ (ਧ. ਪ. ੧੫੩-੧੫੪) ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਬੋਧਿਸਮੀਪੇਯੇਵ ਵੀਤਿਨਾਮੇਤ੍ਵਾ ਬ੍ਰਹ੍ਮੁਨੋ ਆਯਾਚਨਂ ਅਧਿਵਾਸੇਤ੍ਵਾ ਧਮ੍ਮਦੇਸਨਾਯ ਭਾਜਨਭੂਤੇ ਪੁਗ੍ਗਲੇ ਉਪਪਰਿਕ੍ਖਨ੍ਤੋ ਅਤ੍ਤਨਾ ਸਹ ਪਬ੍ਬਜਿਤੇ ਕੋਟਿਸਙ੍ਖੇ ਭਿਕ੍ਖੂ ਦਿਸ੍ਵਾ ਤਙ੍ਖਣੇਯੇਵ ਅਨਿਲਪਥੇਨ ਗਨ੍ਤ੍ਵਾ ਧਞ੍ਞਵਤੀਨਗਰਸਮੀਪੇ ਧਨਞ੍ਜਯੁਯ੍ਯਾਨੇ ਓਤਰਿਤ੍ਵਾ ਤੇਹਿ ਪਰਿਵੁਤੋ ਤੇਸਂ ਮਜ੍ਝੇ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਕੋਟਿਸਤਾਨਂ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –
੧. ‘‘ਅਨੋਮਦਸ੍ਸਿਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;
ਪਦੁਮੋ ਨਾਮ ਨਾਮੇਨ, ਅਸਮੋ ਅਪ੍ਪਟਿਪੁਗ੍ਗਲੋ.
੨. ‘‘ਤਸ੍ਸਾਪਿ ਅਸਮਂ ਸੀਲਂ, ਸਮਾਧਿਪਿ ਅਨਨ੍ਤਕੋ;
ਅਸਙ੍ਖ੍ਯੇਯ੍ਯਂ ਞਾਣਵਰਂ, ਵਿਮੁਤ੍ਤਿਪਿ ਅਨੂਪਮਾ.
੩. ‘‘ਤਸ੍ਸਾਪਿ ਅਤੁਲਤੇਜਸ੍ਸ, ਧਮ੍ਮਚਕ੍ਕਪ੍ਪਵਤ੍ਤਨੇ;
ਅਭਿਸਮਯਾ ਤਯੋ ਆਸੁਂ, ਮਹਾਤਮਪਵਾਹਨਾ’’ਤਿ.
ਤਤ੍ਥ ਅਸਮਂ ਸੀਲਨ੍ਤਿ ਅਞ੍ਞੇਸਂ ਸੀਲੇਨ ਅਸਦਿਸਂ, ਉਤ੍ਤਮਂ ਸੇਟ੍ਠਨ੍ਤਿ ਅਤ੍ਥੋ. ਸਮਾਧਿਪਿ ਅਨਨ੍ਤਕੋਤਿ ਸਮਾਧਿਪਿ ਅਪ੍ਪਮੇਯ੍ਯੋ, ਤਸ੍ਸ ਅਨਨ੍ਤਭਾਵੋ ਲੋਕਵਿਵਰਣਯਮਕਪਾਟਿਹਾਰਿਯਾਦੀਸੁ ਦਟ੍ਠਬ੍ਬੋ. ਞਾਣਵਰਨ੍ਤਿ ਸਬ੍ਬਞ੍ਞੁਤਞ੍ਞਾਣਂ, ਅਸਾਧਾਰਣਞਾਣਾਨਿ ਵਾ. ਵਿਮੁਤ੍ਤਿਪੀਤਿ ਅਰਹਤ੍ਤਫਲਵਿਮੁਤ੍ਤਿਪਿ ਭਗਵਤੋ. ਅਨੂਪਮਾਤਿ ਉਪਮਾਵਿਰਹਿਤਾ. ਅਤੁਲਤੇਜਸ੍ਸਾਤਿ ਅਤੁਲਞਾਣਤੇਜਸ੍ਸ. ‘‘ਅਤੁਲਞਾਣਤੇਜਾ’’ਤਿਪਿ ਪਾਠੋ. ਤਸ੍ਸ ‘‘ਤਯੋ ਅਭਿਸਮਯਾ’’ਤਿ ਇਮਿਨਾ ਉਤ੍ਤਰਪਦੇਨ ਸਮ੍ਬਨ੍ਧੋ ਦਟ੍ਠਬ੍ਬੋ. ਮਹਾਤਮਪਵਾਹਨਾਤਿ ਮਹਾਮੋਹਵਿਨਾਸਕਾ, ਮੋਹਨ੍ਧਕਾਰਵਿਦ੍ਧਂਸਕਾਤਿ ਅਤ੍ਥੋ.
ਅਥਾਪਰੇਨ ਸਮਯੇਨ ਪਦੁਮੋ ਭਗਵਾ ਅਤ੍ਤਨੋ ਕਨਿਟ੍ਠਭਾਤਰਂ ਸਾਲਕੁਮਾਰਞ੍ਚ ਉਪਸਾਲਕੁਮਾਰਞ੍ਚ ਞਾਤਿਸਮਾਗਮੇ ਸਪਰਿਵਾਰੇ ਪਬ੍ਬਾਜੇਤ੍ਵਾ ਤੇਸਂ ਧਮ੍ਮਂ ਦੇਸੇਨ੍ਤੋ ਨਵੁਤਿ ਕੋਟਿਯੋ ਧਮ੍ਮਾਮਤਂ ਪਾਯੇਸਿ. ਯਦਾ ਪਨ ਰਮ੍ਮਤ੍ਥੇਰਸ੍ਸ ਧਮ੍ਮਂ ਦੇਸੇਸਿ, ਤਦਾ ਅਸੀਤਿਕੋਟੀਨਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –
੪. ‘‘ਪਠਮਾਭਿਸਮਯੇ ਬੁਦ੍ਧੋ, ਕੋਟਿਸਤਮਬੋਧਯਿ;
ਦੁਤਿਯਾਭਿਸਮਯੇ ਧੀਰੋ, ਨਵੁਤਿਕੋਟਿਮਬੋਧਯਿ.
੫. ‘‘ਯਦਾ ਚ ਪਦੁਮੋ ਬੁਦ੍ਧੋ, ਓਵਦੀ ਸਕਮਤ੍ਰਜਂ;
ਤਦਾ ਅਸੀਤਿਕੋਟੀਨਂ, ਤਤਿਯਾਭਿਸਮਯੋ ਅਹੂ’’ਤਿ.
ਯਦਾ ਪਨ ਸੁਭਾਵਿਤਤ੍ਤੋ ਨਾਮ ਰਾਜਾ ਪਦੁਮਸ੍ਸ ਬੁਦ੍ਧਸ੍ਸ ਬੁਦ੍ਧਪਦੁਮਵਦਨਸ੍ਸ ਸਨ੍ਤਿਕੇ ਕੋਟਿਸਤਸਹਸ੍ਸਪਰਿਵਾਰੋ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤੋ, ਤਸ੍ਮਿਂ ਸਨ੍ਨਿਪਾਤੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਨ ਪਠਮੋ ਸਨ੍ਨਿਪਾਤੋ ਅਹੋਸਿ.
ਅਥਾਪਰੇਨ ਸਮਯੇਨ ਮਹਾਪਦੁਮੋ ਮੁਨਿਵਸਭੋ ਉਸਭਸਮਗਤੀ ਉਸਭਵਤੀਨਗਰਂ ਉਪਨਿਸ੍ਸਾਯ ਵਸ੍ਸਂ ਉਪਗਞ੍ਛਿ. ਨਗਰਵਾਸਿਨੋ ਮਨੁਸ੍ਸਾ ਭਗਵਨ੍ਤਂ ਦਸ੍ਸਨਕਾਮਾ ਉਪਸਙ੍ਕਮਿਂਸੁ. ਤੇਸਂ ਭਗਵਾ ਧਮ੍ਮਂ ਦੇਸੇਸਿ. ਤਤ੍ਥ ਚ ਬਹਵੋ ਮਨੁਸ੍ਸਾ ਪਸਨ੍ਨਚਿਤ੍ਤਾ ਪਬ੍ਬਜਿਂਸੁ. ਤਤੋ ਦਸਬਲੋ ਤੇਹਿ ਚ ਅਞ੍ਞੇਹਿ ਚ ਤੀਹਿ ਭਿਕ੍ਖੁਸਤਸਹਸ੍ਸੇਹਿ ਸਦ੍ਧਿਂ ਵਿਸੁਦ੍ਧਿਪਵਾਰਣਂ ਪਵਾਰੇਸਿ. ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਯੇ ਪਨ ਤਤ੍ਥ ਨ ਪਬ੍ਬਜਿਂਸੁ, ਤੇ ਕਥਿਨਾਨਿਸਂਸਂ ਸੁਤ੍ਵਾ ਪਾਟਿਪਦੇ ਪਞ੍ਚਸੁ ਮਾਸੇਸੁ ਪਞ੍ਚਾਨਿਸਂਸਦਾਯਕਂ ਕਥਿਨਚੀਵਰਮਦਂਸੁ. ਤਤੋ ਤਂ ਭਿਕ੍ਖੂ ਧਮ੍ਮਸੇਨਾਪਤਿਂ ਅਗ੍ਗਸਾਵਕਂ ਵਿਸਾਲਮਤਿਂ ਸਾਲਤ੍ਥੇਰਂ ਕਥਿਨਤ੍ਥਾਰਤ੍ਥਂ ਯਾਚਿਤ੍ਵਾ ਕਥਿਨਚੀਵਰਂ ਤਸ੍ਸਾਦਂਸੁ. ਥੇਰਸ੍ਸ ਕਥਿਨਚੀਵਰੇ ਕਯਿਰਮਾਨੇ ਭਿਕ੍ਖੂ ਸਿਬ੍ਬਨੇ ਸਹਾਯਕਾ ਅਹੇਸੁਂ. ਪਦੁਮੋ ਪਨ ਸਮ੍ਮਾਸਮ੍ਬੁਦ੍ਧੋ ਸੂਚਿਚ੍ਛਿਦ੍ਦੇ ਸੁਤ੍ਤਾਨਿ ਆਵੁਨਿਤ੍ਵਾ ਅਦਾਸਿ. ਨਿਟ੍ਠਿਤੇ ਪਨ ਚੀਵਰੇ ਭਗਵਾ ਤੀਹਿ ਭਿਕ੍ਖੁਸਤਸਹਸ੍ਸੇਹਿ ਚਾਰਿਕਂ ਪਕ੍ਕਾਮਿ.
ਅਥਾਪਰੇਨ ਸਮਯੇਨ ਸੀਹਵਿਕ੍ਕਨ੍ਤਗਾਮੀ ਪੁਰਿਸਸੀਹੋ ਵਿਯ ਬੁਦ੍ਧਸੀਹੋ ਗੋਸਿਙ੍ਗਸਾਲਵਨਸਦਿਸੇ ਪਰਮਸੁਰਭਿਕੁਸੁਮਫਲਭਾਰਵਿਨਮਿਤਸਾਖਾਵਿਟਪੇ ਵਿਮਲਕਮਲਕੁਵਲਯਸਮਲਙ੍ਕਤੇ ਸਿਸਿਰਮਧੁਰਵਾਰਿਵਾਹੇਨ ਪਰਿਪੂਰਿਤੇ ਰੁਰੁ-ਚਮਰ-ਸੀਹ-ਬ੍ਯਗ੍ਘ-ਅਜ-ਹਯ-ਗਵਯ-ਮਹਿਂਸਾਦਿ ਵਿਵਿਧਮਿਗਗਣਵਿਚਰਿਤੇ ਸੁਰਭਿਕੁਸੁਮਗਨ੍ਧਾਵਬਦ੍ਧਹਦਯਾਹਿ ਭਮਰਮਧੁਕਰਯੁਵਤੀਹਿ ਅਨੁਭੂਤਪ੍ਪਚਾਰਾਹਿ ਸਮਨ੍ਤਤੋ ਗੁਮ੍ਬਗੁਮ੍ਬਾਯਮਾਨੇ ਫਲਰਸਪਮੁਦਿਤਹਦਯਾਹਿ ਕਾਕਲਿਸਦਿਸਮਧੁਰਵਿਰੁਤਾਹਿ ਕੋਕਿਲਵਧੂਹਿ ਉਪਗੀਯਮਾਨੇ ਪਰਮਰਮਣੀਯੇ ਵਿਵਿਤ੍ਤੇ ਵਿਜਨੇ ਯੋਗਾਨੁਕੂਲੇ ਪਵਨੇ ਵਸ੍ਸਾਵਾਸਮੁਪਗਞ੍ਛਿ. ਤਸ੍ਮਿਂ ਵਿਹਰਨ੍ਤਂ ਸਪਰਿਵਾਰਕਂ ਦਸਬਲਂ ਤਥਾਗਤਂ ਧਮ੍ਮਰਾਜਂ ਬੁਦ੍ਧਸਿਰਿਯਾ ਵਿਰੋਚਮਾਨਂ ਦਿਸ੍ਵਾ ਮਨੁਸ੍ਸਾ ਤਸ੍ਸ ਧਮ੍ਮਂ ਸੁਤ੍ਵਾ ਪਸੀਦਿਤ੍ਵਾ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਂਸੁ. ਤਦਾ ਦ੍ਵੀਹਿ ਭਿਕ੍ਖੁਸਤਸਹਸ੍ਸੇਹਿ ਪਰਿਵੁਤੋ ਪਵਾਰੇਸਿ. ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –
੬. ‘‘ਸਨ੍ਨਿਪਾਤਾ ਤਯੋ ਆਸੁਂ, ਪਦੁਮਸ੍ਸ ਮਹੇਸਿਨੋ;
ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ.
੭. ‘‘ਕਥਿਨਤ੍ਥਾਰਸਮਯੇ, ਉਪ੍ਪਨ੍ਨੇ ਕਥਿਨਚੀਵਰੇ;
ਧਮ੍ਮਸੇਨਾਪਤਿਤ੍ਥਾਯ, ਭਿਕ੍ਖੂ ਸਿਬ੍ਬਿਂਸੁ ਚੀਵਰਂ.
੮. ‘‘ਤਦਾ ਤੇ ਵਿਮਲਾ ਭਿਕ੍ਖੂ, ਛਲ਼ਭਿਞ੍ਞਾ ਮਹਿਦ੍ਧਿਕਾ;
ਤੀਣਿ ਸਤਸਹਸ੍ਸਾਨਿ, ਸਮਿਂਸੁ ਅਪਰਾਜਿਤਾ.
੯. ‘‘ਪੁਨਾਪਰਂ ਸੋ ਨਰਾਸਭੋ, ਪਵਨੇ ਵਾਸਂ ਉਪਾਗਮਿ;
ਤਦਾ ਸਮਾਗਮੋ ਆਸਿ, ਦ੍ਵਿਨ੍ਨਂ ਸਤਸਹਸ੍ਸਿਨ’’ਨ੍ਤਿ.
ਤਤ੍ਥ ਕਥਿਨਤ੍ਥਾਰਸਮਯੇਤਿ ਕਥਿਨਚੀਵਰਤ੍ਥਰਣਸਮਯੇ. ਧਮ੍ਮਸੇਨਾਪਤਿਤ੍ਥਾਯਾਤਿ ਧਮ੍ਮਸੇਨਾਪਤਿਸਾਲਤ੍ਥੇਰਤ੍ਥਂ. ਅਪਰਾਜਿਤਾਤਿ ਨ ਪਰਾਜਿਤਾ, ਵਿਭਤ੍ਤਿਲੋਪੋ ਦਟ੍ਠਬ੍ਬੋ. ਸੋਤਿ ਸੋ ਮਹਾਪਦੁਮੋ. ਪਵਨੇਤਿ ਮਹਾਵਨੇ. ਵਾਸਨ੍ਤਿ ਵਸ੍ਸਾਵਾਸਂ. ਉਪਾਗਮੀਤਿ ਉਪਾਗਤੋ. ਦ੍ਵਿਨ੍ਨਂ ਸਤਸਹਸ੍ਸਿਨਨ੍ਤਿ ਦ੍ਵਿਨ੍ਨਂ ਸਤਸਹਸ੍ਸਾਨਂ. ‘‘ਤਦਾ ਆਸਿ ਸਮਾਗਮੋ’’ਤਿਪਿ ਪਾਠੋ ਯਦਿ ਅਤ੍ਥਿ ਸੁਨ੍ਦਰੋ ਭਵੇਯ੍ਯ.
ਤਦਾ ਤਥਾਗਤੇ ਤਸ੍ਮਿਂ ਵਨਸਣ੍ਡੇ ਵਸਨ੍ਤੇ ਅਮ੍ਹਾਕਂ ਬੋਧਿਸਤ੍ਤੋ ਸੀਹੋ ਹੁਤ੍ਵਾ ਸਤ੍ਤਾਹਂ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨਂ ਦਿਸ੍ਵਾ ਪਸਨ੍ਨਚਿਤ੍ਤੋ ਹੁਤ੍ਵਾ ਪਦਕ੍ਖਿਣਂ ਕਤ੍ਵਾ ਸਞ੍ਜਾਤਪੀਤਿਸੋਮਨਸ੍ਸੋ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਸਤ੍ਤਾਹਂ ਬੁਦ੍ਧਾਰਮ੍ਮਣਂ ਪੀਤਿਂ ਅਵਿਜਹਿਤ੍ਵਾ ਪੀਤਿਸੁਖੇਨੇਵ ਗੋਚਰਾਯ ਅਪਕ੍ਕਮਿਤ੍ਵਾ ਜੀਵਿਤਪਰਿਚ੍ਚਾਗਂ ਕਤ੍ਵਾ ਪਯਿਰੁਪਾਸਮਾਨੋ ਅਟ੍ਠਾਸਿ. ਅਥ ਸਤ੍ਥਾ ਤਸ੍ਸ ਸਤ੍ਤਾਹਸ੍ਸ ਅਚ੍ਚਯੇਨ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਯ ਨਰਸੀਹੋ ਸੀਹਂ ਓਲੋਕੇਤ੍ਵਾ – ‘‘ਭਿਕ੍ਖੁਸਙ੍ਘੇਪਿਸ੍ਸ ਚਿਤ੍ਤਪ੍ਪਸਾਦੋ ਹੋਤੂਤਿ ਸਙ੍ਘੋ ਆਗਚ੍ਛਤੂ’’ਤਿ ਚਿਨ੍ਤੇਸਿ. ਅਨੇਕਕੋਟਿਭਿਕ੍ਖੂ ਤਾਵਦੇਵ ਆਗਞ੍ਛਿਂਸੁ. ਸੀਹੋ ਸਙ੍ਘੇਪਿ ਚਿਤ੍ਤਂ ਪਸਾਦੇਸਿ. ਅਥ ਸਤ੍ਥਾ ਤਸ੍ਸ ਚਿਤ੍ਤਂ ਓਲੋਕੇਤ੍ਵਾ – ‘‘ਅਨਾਗਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –
੧੦. ‘‘ਅਹਂ ਤੇਨ ਸਮਯੇਨ, ਸੀਹੋ ਆਸਿਂ ਮਿਗਾਧਿਭੂ;
ਪਵਿਵੇਕਮਨੁਬ੍ਰੂਹਨ੍ਤਂ, ਪਵਨੇ ਅਦ੍ਦਸਂ ਜਿਨਂ.
੧੧. ‘‘ਵਨ੍ਦਿਤ੍ਵਾ ਸਿਰਸਾ ਪਾਦੇ, ਕਤ੍ਵਾਨ ਤਂ ਪਦਕ੍ਖਿਣਂ;
ਤਿਕ੍ਖਤ੍ਤੁਂ ਅਭਿਨਾਦਿਤ੍ਵਾ, ਸਤ੍ਤਾਹਂ ਜਿਨਮੁਪਟ੍ਠਹਂ.
੧੨. ‘‘ਸਤ੍ਤਾਹਂ ਵਰਸਮਾਪਤ੍ਤਿਯਾ, ਵੁਟ੍ਠਹਿਤ੍ਵਾ ਤਥਾਗਤੋ;
ਮਨਸਾ ਚਿਨ੍ਤਯਿਤ੍ਵਾਨ, ਕੋਟਿਭਿਕ੍ਖੂ ਸਮਾਨਯਿ.
੧੩. ‘‘ਤਦਾਪਿ ਸੋ ਮਹਾਵੀਰੋ, ਤੇਸਂ ਮਜ੍ਝੇ ਵਿਯਾਕਰਿ;
ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.
੧੪. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.
੧੫. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;
ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.
ਤਤ੍ਥ ਪਵਿਵੇਕਮਨੁਬ੍ਰੂਹਨ੍ਤਨ੍ਤਿ ਨਿਰੋਧਸਮਾਪਤ੍ਤਿਂ ਸਮਾਪਨ੍ਨਨ੍ਤਿ ਅਤ੍ਥੋ. ਪਦਕ੍ਖਿਣਨ੍ਤਿ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ. ਅਭਿਨਾਦਿਤ੍ਵਾਤਿ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ. ਉਪਟ੍ਠਹਨ੍ਤਿ ਉਪਟ੍ਠਹਿਂ. ਅਯਮੇਵ ਵਾ ਪਾਠੋ. ਵਰਸਮਾਪਤ੍ਤਿਯਾਤਿ ਨਿਰੋਧਸਮਾਪਤ੍ਤਿਤੋ ਵੁਟ੍ਠਹਿਤ੍ਵਾ. ਮਨਸਾ ਚਿਨ੍ਤਯਿਤ੍ਵਾਨਾਤਿ ‘‘ਸਬ੍ਬੇਪਿ ਭਿਕ੍ਖੂ ਇਧ ਆਗਚ੍ਛਨ੍ਤੂ’’ਤਿ ਮਨਸਾਵ ਚਿਨ੍ਤੇਤ੍ਵਾ. ਸਮਾਨਯੀਤਿ ਸਮਾਹਰਿ.
ਤਸ੍ਸ ਪਨ ਪਦੁਮਸ੍ਸ ਭਗਵਤੋ ਚਮ੍ਪਕਂ ਨਾਮ ਨਗਰਂ ਅਹੋਸਿ. ਅਸਮੋ ਨਾਮ ਰਾਜਾ ਪਿਤਾ ਅਹੋਸਿ, ਮਾਤਾਪਿ ਤਸ੍ਸ ਅਸਮਾ ਨਾਮ, ਸਾਲੋ ਚ ਉਪਸਾਲੋ ਚ ਦ੍ਵੇ ਅਗ੍ਗਸਾਵਕਾ, ਵਰੁਣੋ ਨਾਮੁਪਟ੍ਠਾਕੋ, ਰਾਧਾ ਚ ਸੁਰਾਧਾ ਚ ਦ੍ਵੇ ਅਗ੍ਗਸਾਵਿਕਾ, ਮਹਾਸੋਣਰੁਕ੍ਖੋ ਬੋਧਿ, ਅਟ੍ਠਪਣ੍ਣਾਸਹਤ੍ਥੁਬ੍ਬੇਧਂ ਸਰੀਰਂ, ਆਯੁ ਵਸ੍ਸਸਤਸਹਸ੍ਸਂ ਅਹੋਸਿ, ਰੂਪਾਦੀਹਿ ਗੁਣੇਹਿ ਅਨੁਤ੍ਤਰਾ ਉਤ੍ਤਰਾ ਨਾਮਸ੍ਸ ਅਗ੍ਗਮਹੇਸੀ, ਰਮ੍ਮਕੁਮਾਰੋ ਨਾਮਸ੍ਸ ਅਤਿਰਮ੍ਮੋ ਤਨਯੋ ਅਹੋਸਿ. ਤੇਨ ਵੁਤ੍ਤਂ –
੧੬. ‘‘ਚਮ੍ਪਕਂ ਨਾਮ ਨਗਰਂ, ਅਸਮੋ ਨਾਮ ਖਤ੍ਤਿਯੋ;
ਅਸਮਾ ਨਾਮ ਜਨਿਕਾ, ਪਦੁਮਸ੍ਸ ਮਹੇਸਿਨੋ.
੨੧. ‘‘ਸਾਲੋ ਚ ਉਪਸਾਲੋ ਚ, ਅਹੇਸੁਂ ਅਗ੍ਗਸਾਵਕਾ;
ਵਰੁਣੋ ਨਾਮੁਪਟ੍ਠਾਕੋ, ਪਦੁਮਸ੍ਸ ਮਹੇਸਿਨੋ.
੨੨. ‘‘ਰਾਧਾ ਚੇਵ ਸੁਰਾਧਾ ਚ, ਅਹੇਸੁਂ ਅਗ੍ਗਸਾਵਿਕਾ;
ਬੋਧਿ ਤਸ੍ਸ ਭਗਵਤੋ, ਮਹਾਸੋਣੋਤਿ ਵੁਚ੍ਚਤਿ.
੨੪. ‘‘ਅਟ੍ਠਪਣ੍ਣਾਸਰਤਨਂ, ਅਚ੍ਚੁਗ੍ਗਤੋ ਮਹਾਮੁਨਿ;
ਪਭਾ ਨਿਦ੍ਧਾਵਤੀ ਤਸ੍ਸ, ਅਸਮਾ ਸਬ੍ਬਤੋ ਦਿਸਾ.
੨੫. ‘‘ਚਨ੍ਦਪ੍ਪਭਾ ਸੂਰਿਯਪ੍ਪਭਾ, ਰਤਨਗ੍ਗਿਮਣਿਪ੍ਪਭਾ;
ਸਬ੍ਬਾਪਿ ਤਾ ਹਤਾ ਹੋਨ੍ਤਿ, ਪਤ੍ਵਾ ਜਿਨਪਭੁਤ੍ਤਮਂ.
੨੬. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;
ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.
੨੭. ‘‘ਪਰਿਪਕ੍ਕਮਾਨਸੇ ਸਤ੍ਤੇ, ਬੋਧਯਿਤ੍ਵਾ ਅਸੇਸਤੋ;
ਸੇਸਕੇ ਅਨੁਸਾਸਿਤ੍ਵਾ, ਨਿਬ੍ਬੁਤੋ ਸੋ ਸਸਾਵਕੋ.
੨੮. ‘‘ਉਰਗੋਵ ਤਚਂ ਜਿਣ੍ਣਂ, ਵਦ੍ਧਪਤ੍ਤਂਵ ਪਾਦਪੋ;
ਜਹਿਤ੍ਵਾ ਸਬ੍ਬਸਙ੍ਖਾਰੇ, ਨਿਬ੍ਬੁਤੋ ਸੋ ਯਥਾ ਸਿਖੀ’’ਤਿ.
ਤਤ੍ਥ ਰਤਨਗ੍ਗਿਮਣਿਪ੍ਪਭਾਤਿ ਰਤਨਪ੍ਪਭਾ ਚ ਅਗ੍ਗਿਪ੍ਪਭਾ ਚ ਮਣਿਪ੍ਪਭਾ ਚ. ਹਤਾਤਿ ਅਭਿਭੂਤਾ. ਜਿਨਪਭੁਤ੍ਤਮਨ੍ਤਿ ਜਿਨਸ੍ਸ ਸਰੀਰਪ੍ਪਭਂ ਉਤ੍ਤਮਂ ਪਤ੍ਵਾ ਹਤਾਤਿ ਅਤ੍ਥੋ. ਪਰਿਪਕ੍ਕਮਾਨਸੇਤਿ ਪਰਿਪਕ੍ਕਿਨ੍ਦ੍ਰਿਯੇ ਵੇਨੇਯ੍ਯਸਤ੍ਤੇ. ਵਦ੍ਧਪਤ੍ਤਨ੍ਤਿ ਪੁਰਾਣਪਤ੍ਤਂ. ਪਾਦਪੋ ਵਾਤਿ ਪਾਦਪੋ ਵਿਯ. ਸਬ੍ਬਸਙ੍ਖਾਰੇਤਿ ਸਬ੍ਬੇਪਿ ਅਜ੍ਝਤ੍ਤਿਕਬਾਹਿਰੇ ਸਙ੍ਖਾਰੇ. ‘‘ਹਿਤ੍ਵਾ ਸਬ੍ਬਸਙ੍ਖਾਰ’’ਨ੍ਤਿਪਿ ਪਾਠੋ, ਸੋਯੇਵਤ੍ਥੋ. ਯਥਾ ਸਿਖੀਤਿ ਅਗ੍ਗਿ ਵਿਯ ਨਿਰੁਪਾਦਾਨੋ ਨਿਬ੍ਬੁਤਿਂ ਸੁਗਤੋ ਗਤੋਤਿ. ਸੇਸਮੇਤ੍ਥ ਗਾਥਾਸੁ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵਾਤਿ.
ਪਦੁਮਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.
ਨਿਟ੍ਠਿਤੋ ਅਟ੍ਠਮੋ ਬੁਦ੍ਧਵਂਸੋ.