੧੧. ਨਾਰਦਬੁਦ੍ਧਵਂਸਵਣ੍ਣਨਾ

ਪਦੁਮਬੁਦ੍ਧੇ ਪਨ ਪਰਿਨਿਬ੍ਬੁਤੇ ਤਸ੍ਸ ਸਾਸਨੇ ਚ ਅਨ੍ਤਰਹਿਤੇ ਵਸ੍ਸਸਤਸਹਸ੍ਸਾਯੁਕਾ ਮਨੁਸ੍ਸਾ ਅਨੁਕ੍ਕਮੇਨ ਪਰਿਹਾਯਮਾਨਾ ਦਸਵਸ੍ਸਾਯੁਕਾ ਅਹੇਸੁਂ. ਪੁਨ ਵਡ੍ਢਿਤ੍ਵਾ ਅਸਙ੍ਖ੍ਯੇਯ੍ਯਾਯੁਕਾ ਹੁਤ੍ਵਾ ਪਰਿਹਾਯਮਾਨਾ ਨਵੁਤਿਵਸ੍ਸਸਹਸ੍ਸਾਯੁਕਾ ਅਹੇਸੁਂ. ਤਦਾ ਦਸਬਲਧਰੋ ਤੇਵਿਜ੍ਜੋ ਚਤੁਵੇਸਾਰਜ੍ਜਵਿਸਾਰਦੋ ਵਿਮੁਤ੍ਤਿਸਾਰਦੋ ਨਾਰਦੋ ਨਾਮ ਨਰਸਤ੍ਤੁਤ੍ਤਮੋ ਸਤ੍ਥਾ ਲੋਕੇ ਉਦਪਾਦਿ. ਸੋ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ ਪਾਰਮਿਯੋ ਪੂਰੇਤ੍ਵਾ ਤੁਸਿਤਭਵਨੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਧਞ੍ਞਵਤੀ ਨਾਮ ਨਗਰੇ ਸਕਵੀਰਿਯਵਿਜਿਤਵਾਸੁਦੇਵਸ੍ਸ ਸੁਦੇਵਸ੍ਸ ਨਾਮ ਰਞ੍ਞੋ ਕੁਲੇ ਅਗ੍ਗਮਹੇਸਿਯਾ ਨਿਰੂਪਮਾਯ ਅਨੋਮਾਯ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਸੋ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਧਨਞ੍ਜਯੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਨਾਮਗ੍ਗਹਣਦਿਵਸੇ ਪਨ ਨਾਮਕਰਣੇ ਕਯਿਰਮਾਨੇ ਸਕਲਜਮ੍ਬੁਦੀਪੇ ਮਨੁਸ੍ਸਾਨਂ ਉਪਭੋਗਕ੍ਖਮਾਨਿ ਅਨੁਰੂਪਾਨਿ ਆਭਰਣਾਨਿ ਆਕਾਸਤੋ ਕਪ੍ਪਰੁਕ੍ਖਾਦੀਹਿ ਪਤਿਂਸੁ. ਤੇਨਸ੍ਸ ਨਰਾਨਂ ਅਰਹਾਨਿ ਆਭਰਣਾਨਿ ਅਦਾਸੀਤਿ ‘‘ਨਾਰਦੋ’’ਤਿ ਨਾਮਂ ਅਕਂਸੁ.

ਸੋ ਨਵਵਸ੍ਸਸਹਸ੍ਸਾਨਿ ਅਗਾਰਮਜ੍ਝੇ ਵਸਿ. ਵਿਜਿਤੋ ਵਿਜਿਤਾਵੀ ਵਿਜਿਤਾਭਿਰਾਮੋਤਿ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕਾ ਤਯੋ ਪਾਸਾਦਾ ਅਹੇਸੁਂ. ਤਸ੍ਸ ਨਾਰਦਕੁਮਾਰਸ੍ਸ ਕੁਲਸੀਲਾਚਾਰਰੂਪਸਮ੍ਪਨ੍ਨਂ ਮਨੋਨੁਕੂਲਂ ਵਿਜਿਤਸੇਨਂ ਨਾਮ ਅਤਿਵਿਯ ਧਞ੍ਞਂ ਖਤ੍ਤਿਯਕਞ੍ਞਂ ਅਗ੍ਗਮਹੇਸਿਂ ਅਕਂਸੁ. ਤਂ ਆਦਿਂ ਕਤ੍ਵਾ ਵੀਸਤਿਸਹਸ੍ਸਾਧਿਕਂ ਇਤ੍ਥੀਨਂ ਸਤਸਹਸ੍ਸਂ ਅਹੋਸਿ. ਤਸ੍ਸਾ ਵਿਜਿਤਸੇਨਾਯ ਦੇਵਿਯਾ ਸਬ੍ਬਲੋਕਾਨਨ੍ਦਕਰੇ ਨਨ੍ਦੁਤ੍ਤਰਕੁਮਾਰੇ ਨਾਮ ਜਾਤੇ ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਚਤੁਰਙ੍ਗਿਨਿਯਾ ਮਹਤਿਯਾ ਸੇਨਾਯ ਪਰਿਵੁਤੋ ਨਾਨਾਵਿਰਾਗਤਨੁਵਰਵਸਨਨਿਵਸਨੋ ਆਮੁਕ੍ਕਮੁਤ੍ਤਾਹਾਰਮਣਿਕੁਣ੍ਡਲੋ ਵਰਕੇਯੂਰਮਕੁਟਕਟਕਧਰੋ ਪਰਮਸੁਰਭਿਗਨ੍ਧਕੁਸੁਮਸਮਲਙ੍ਕਤੋ ਪਦਸਾਵ ਉਯ੍ਯਾਨਂ ਗਨ੍ਤ੍ਵਾ ਸਬ੍ਬਾਭਰਣਾਨਿ ਓਮੁਞ੍ਚਿਤ੍ਵਾ ਭਣ੍ਡਾਗਾਰਿਕਸ੍ਸ ਹਤ੍ਥੇ ਦਤ੍ਵਾ ਸਯਮੇਵ ਵਿਮਲਨੀਲਕੁਵਲਯਦਲਸਦਿਸੇਨਾਤਿਨਿਸਿਤੇਨਾਸਿਨਾ ਪਰਮਰੁਚਿਰਰਤਨਵਿਚਿਤ੍ਤਂ ਸਕੇਸਮਕੁਟਂ ਛਿਨ੍ਦਿਤ੍ਵਾ ਗਗਨਤਲੇ ਖਿਪਿ. ਤਂ ਸਕ੍ਕੋ ਦੇਵਰਾਜਾ ਸੁਵਣ੍ਣਚਙ੍ਕੋਟਕੇਨ ਪਟਿਗ੍ਗਹੇਤ੍ਵਾ ਤਾਵਤਿਂਸਭਵਨਂ ਨੇਤ੍ਵਾ ਤਿਯੋਜਨੁਬ੍ਬੇਧਂ ਸਿਨੇਰੁਮੁਦ੍ਧਨਿ ਸਤ੍ਤਰਤਨਮਯਂ ਚੇਤਿਯਂ ਅਕਾਸਿ.

ਮਹਾਪੁਰਿਸੋ ਪਨ ਦੇਵਦਤ੍ਤਾਨਿ ਕਾਸਾਯਾਨਿ ਵਤ੍ਥਾਨਿ ਪਰਿਦਹਿਤ੍ਵਾ ਤਤ੍ਥੇਵ ਉਯ੍ਯਾਨੇ ਪਬ੍ਬਜਿ. ਪੁਰਿਸਸਤਸਹਸ੍ਸਾ ਚ ਤਂ ਅਨੁਪਬ੍ਬਜਿਂਸੁ. ਸੋ ਸਤ੍ਤਾਹਂ ਤਤ੍ਥੇਵ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਵਿਜਿਤਸੇਨਾਯ ਅਗ੍ਗਮਹੇਸਿਯਾ ਦਿਨ੍ਨਂ ਪਾਯਾਸਂ ਪਰਿਭੁਞ੍ਜਿਤ੍ਵਾ ਤਤ੍ਥੇਵ ਉਯ੍ਯਾਨੇ ਦਿਵਾਵਿਹਾਰਂ ਕਤ੍ਵਾ ਸੁਦਸ੍ਸਨੁਯ੍ਯਾਨਪਾਲੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਮਹਾਸੋਣਬੋਧਿਂ ਪਦਕ੍ਖਿਣਂ ਕਤ੍ਵਾ ਅਟ੍ਠਪਣ੍ਣਾਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਨਿਸੀਦਿਤ੍ਵਾ ਮਾਰਬਲਂ ਵਿਧਮਿਤ੍ਵਾ ਤੀਸੁ ਯਾਮੇਸੁ ਤਿਸ੍ਸੋ ਵਿਜ੍ਜਾ ਉਪ੍ਪਾਦੇਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਾਨਿ ਵੀਤਿਨਾਮੇਤ੍ਵਾ ਬ੍ਰਹ੍ਮੁਨੋ ਯਾਚਿਤੋ ਪਟਿਞ੍ਞਂ ਦਤ੍ਵਾ ਧਨਞ੍ਜਯੁਯ੍ਯਾਨੇ ਅਤ੍ਤਨਾ ਸਹ ਪਬ੍ਬਜਿਤੇਹਿ ਸਤਸਹਸ੍ਸਭਿਕ੍ਖੂਹਿ ਪਰਿਵੁਤੋ ਤਤ੍ਥ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਕੋਟਿਸਤਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਪਦੁਮਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਨਾਰਦੋ ਨਾਮ ਨਾਮੇਨ, ਅਸਮੋ ਅਪ੍ਪਟਿਪੁਗ੍ਗਲੋ.

੨. ‘‘ਸੋ ਬੁਦ੍ਧੋ ਚਕ੍ਕਵਤ੍ਤਿਸ੍ਸ, ਜੇਟ੍ਠੋ ਦਯਿਤਓਰਸੋ;

ਆਮੁਕ੍ਕਮਾਲਾਭਰਣੋ, ਉਯ੍ਯਾਨਂ ਉਪਸਙ੍ਕਮਿ.

੩. ‘‘ਤਤ੍ਥਾਸਿ ਰੁਕ੍ਖੋ ਯਸਵਿਪੁਲੋ, ਅਭਿਰੂਪੋ ਬ੍ਰਹ੍ਮਾ ਸੁਚਿ;

ਤਮਜ੍ਝਪ੍ਪਤ੍ਵਾ ਉਪਨਿਸੀਦਿ, ਮਹਾਸੋਣਸ੍ਸ ਹੇਟ੍ਠਤੋ.

੪. ‘‘ਤਤ੍ਥ ਞਾਣਵਰੁਪ੍ਪਜ੍ਜਿ, ਅਨਨ੍ਤਂ ਵਜਿਰੂਪਮਂ;

ਤੇਨ ਵਿਚਿਨਿ ਸਙ੍ਖਾਰੇ, ਉਕ੍ਕੁਜ੍ਜਮਵਕੁਜ੍ਜਕਂ.

੫. ‘‘ਤਤ੍ਥ ਸਬ੍ਬਕਿਲੇਸਾਨਿ, ਅਸੇਸਮਭਿਵਾਹਯਿ;

ਪਾਪੁਣੀ ਕੇਵਲਂ ਬੋਧਿਂ, ਬੁਦ੍ਧਞਾਣੇ ਚ ਚੁਦ੍ਦਸ.

੬. ‘‘ਪਾਪੁਣਿਤ੍ਵਾਨ ਸਮ੍ਬੋਧਿਂ, ਧਮ੍ਮਚਕ੍ਕਂ ਪਵਤ੍ਤਯਿ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਚਕ੍ਕਵਤ੍ਤਿਸ੍ਸਾਤਿ ਚਕ੍ਕਵਤ੍ਤਿਰਞ੍ਞੋ. ਜੇਟ੍ਠੋਤਿ ਪੁਬ੍ਬਜੋ. ਦਯਿਤਓਰਸੋਤਿ ਦਯਿਤੋ ਪਿਯੋ ਓਰਸੋ ਪੁਤ੍ਤੋ, ਦਯਿਤੋ ਓਰਸਿ ਗਹੇਤ੍ਵਾ ਲਾਲਿਤੋ ਪੁਤ੍ਤੋ ਦਯਿਤਓਰਸੋ ਨਾਮ. ਆਮੁਕ੍ਕਮਾਲਾਭਰਣੋਤਿ ਆਮੁਕ੍ਕਮੁਤ੍ਤਾਹਾਰਕੇਯੂਰਕਟਕਮਕੁਟਕੁਣ੍ਡਲਮਾਲੋ. ਉਯ੍ਯਾਨਨ੍ਤਿ ਬਹਿਨਗਰੇ ਧਨਞ੍ਜਯੁਯ੍ਯਾਨਂ ਨਾਮਾਰਾਮਂ ਅਗਮਾਸਿ.

ਤਤ੍ਥਾਸਿ ਰੁਕ੍ਖੋਤਿ ਤਸ੍ਮਿਂ ਉਯ੍ਯਾਨੇ ਏਕੋ ਕਿਰ ਰੁਕ੍ਖੋ ਰਤ੍ਤਸੋਣੋ ਨਾਮ ਅਹੋਸਿ. ਸੋ ਕਿਰ ਨਵੁਤਿਹਤ੍ਥੁਬ੍ਬੇਧੋ ਸਮਵਟ੍ਟਕ੍ਖਨ੍ਧੋ ਸਮ੍ਪਨ੍ਨਵਿਵਿਧਵਿਟਪਸਾਖੋ ਨੀਲਬਹਲਵਿਪੁਲਪਲਾਸੋ ਸਨ੍ਦਚ੍ਛਾਯੋ ਦੇਵਤਾਧਿਵੁਟ੍ਠਤ੍ਤਾ ਵਿਗਤਵਿਵਿਧਵਿਹਗਗਣਸਞ੍ਚਾਰੋ ਧਰਣੀਤਲਤਿਲਕਭੂਤੋ ਤਰੁਰਜ੍ਜਂ ਵਿਯ ਕੁਰੁਮਾਨੋ ਪਰਮਰਮਣੀਯਦਸ੍ਸਨੋ ਰਤ੍ਤਕੁਸੁਮਸਮਲਙ੍ਕਤਸਬ੍ਬਸਾਖੋ ਦੇਵਮਨੁਸ੍ਸਨਯਨਰਸਾਯਨਭੂਤੋ ਅਹੋਸਿ. ਯਸਵਿਪੁਲੋਤਿ ਵਿਪੁਲਯਸੋ, ਸਬ੍ਬਲੋਕਵਿਖ੍ਯਾਤੋ ਅਤ੍ਤਨੋ ਸਮ੍ਪਤ੍ਤਿਯਾ ਸਬ੍ਬਤ੍ਥ ਪਾਕਟੋ ਵਿਸ੍ਸੁਤੋਤਿ ਅਤ੍ਥੋ. ਕੇਚਿ ‘‘ਤਤ੍ਥਾਸਿ ਰੁਕ੍ਖੋ ਵਿਪੁਲੋ’’ਤਿ ਪਠਨ੍ਤਿ. ਬ੍ਰਹਾਤਿ ਮਹਨ੍ਤੋ, ਦੇਵਾਨਂ ਪਾਰਿਚ੍ਛਤ੍ਤਕਸਦਿਸੋਤਿ ਅਤ੍ਥੋ. ਤਮਜ੍ਝਪ੍ਪਤ੍ਵਾਤਿ ਤਂ ਸੋਣਰੁਕ੍ਖਂ ਪਤ੍ਵਾ ਅਧਿਪਤ੍ਵਾ ਉਪਗਮ੍ਮਾਤਿ ਅਤ੍ਥੋ. ਹੇਟ੍ਠਤੋਤਿ ਤਸ੍ਸ ਰੁਕ੍ਖਸ੍ਸ ਹੇਟ੍ਠਾ.

ਞਾਣਵਰੁਪ੍ਪਜ੍ਜੀਤਿ ਞਾਣਵਰਂ ਉਦਪਾਦਿ. ਅਨਨ੍ਤਨ੍ਤਿ ਅਪ੍ਪਮੇਯ੍ਯਂ ਅਪ੍ਪਮਾਣਂ. ਵਜਿਰੂਪਮਨ੍ਤਿ ਵਜਿਰਸਦਿਸਂ ਤਿਖਿਣਂ, ਅਨਿਚ੍ਚਾਨੁਪਸ੍ਸਨਾਦਿਕਸ੍ਸ ਵਿਪਸ੍ਸਨਾਞਾਣਸ੍ਸੇਤਂ ਅਧਿਵਚਨਂ. ਤੇਨ ਵਿਚਿਨਿ ਸਙ੍ਖਾਰੇਤਿ ਤੇਨ ਵਿਪਸ੍ਸਨਾਞਾਣੇਨ ਰੂਪਾਦਿਕੇ ਸਙ੍ਖਾਰੇ ਵਿਚਿਨਿ. ਉਕ੍ਕੁਜ੍ਜਮਵਕੁਜ੍ਜਕਨ੍ਤਿ ਸਙ੍ਖਾਰਾਨਂ ਉਦਯਞ੍ਚ ਵਯਞ੍ਚ ਵਿਚਿਨੀਤਿ ਅਤ੍ਥੋ. ਤਸ੍ਮਾ ਪਚ੍ਚਯਾਕਾਰਂ ਸਮ੍ਮਸਿਤ੍ਵਾ ਆਨਾਪਾਨਚਤੁਤ੍ਥਜ੍ਝਾਨਤੋ ਵੁਟ੍ਠਾਯ ਪਞ੍ਚਸੁ ਖਨ੍ਧੇਸੁ ਅਭਿਨਿਵਿਸਿਤ੍ਵਾ ਉਦਯਬ੍ਬਯਵਸੇਨ ਸਮਪਞ੍ਞਾਸ ਲਕ੍ਖਣਾਨਿ ਦਿਸ੍ਵਾ ਯਾਵ ਗੋਤ੍ਰਭੁਞਾਣਂ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਿਯਮਗ੍ਗਾਨੁਕ੍ਕਮੇਨ ਸਕਲੇ ਬੁਦ੍ਧਗੁਣੇ ਪਟਿਲਭੀਤਿ ਅਤ੍ਥੋ.

ਤਤ੍ਥਾਤਿ ਸੋਣਰੁਕ੍ਖੇ. ਸਬ੍ਬਕਿਲੇਸਾਨੀਤਿ ਸਬ੍ਬੇਪਿ ਕਿਲੇਸੇ, ਲਿਙ੍ਗਵਿਪਰਿਯਾਸਂ ਕਤ੍ਵਾ ਵੁਤ੍ਤਂ. ਕੇਚਿ ‘‘ਤਤ੍ਥ ਸਬ੍ਬਕਿਲੇਸੇਹੀ’’ਤਿ ਪਠਨ੍ਤਿ. ਅਸੇਸਨ੍ਤਿ ਨਿਰਵਸੇਸਂ. ਅਭਿਵਾਹਯੀਤਿ ਮਗ੍ਗੋਧਿਨਾ ਚ ਕਿਲੇਸੋਧਿਨਾ ਚ ਸਬ੍ਬੇ ਕਿਲੇਸੇ ਅਭਿਵਾਹਯਿ, ਵਿਨਾਸਮੁਪਨੇਸੀਤਿ ਅਤ੍ਥੋ. ਬੋਧੀਤਿ ਅਰਹਤ੍ਤਮਗ੍ਗਞਾਣਂ. ਬੁਦ੍ਧਞਾਣੇ ਚ ਚੁਦ੍ਦਸਾਤਿ ਬੁਦ੍ਧਞਾਣਾਨਿ ਚੁਦ੍ਦਸ. ਤਾਨਿ ਕਤਮਾਨੀਤਿ? ਮਗ੍ਗਫਲਞਾਣਾਨਿ ਅਟ੍ਠ, ਛ ਅਸਾਧਾਰਣਞਾਣਾਨੀਤਿ ਏਵਮਿਮਾਨਿ ਚੁਦ੍ਦਸ ਬੁਦ੍ਧਞਾਣਾਨਿ ਨਾਮ, ਚ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ, ਤੇਨ ਅਪਰਾਨਿਪਿ ਚਤਸ੍ਸੋ ਪਟਿਸਮ੍ਭਿਦਾਞਾਣਾਨਿ ਚਤੁਵੇਸਾਰਜ੍ਜਞਾਣਾਨਿ ਚਤੁਯੋਨਿਪਰਿਚ੍ਛੇਦਕਞਾਣਾਨਿ ਪਞ੍ਚਗਤਿਪਰਿਚ੍ਛੇਦਕਞਾਣਾਨਿ ਦਸਬਲਞਾਣਾਨਿ ਸਕਲੇ ਚ ਬੁਦ੍ਧਗੁਣੇ ਪਾਪੁਣੀਤਿ ਅਤ੍ਥੋ.

ਏਵਂ ਬੁਦ੍ਧਤ੍ਤਂ ਪਤ੍ਵਾ ਬ੍ਰਹ੍ਮਾਯਾਚਨਂ ਅਧਿਵਾਸੇਤ੍ਵਾ ਧਨਞ੍ਜਯੁਯ੍ਯਾਨੇ ਅਤ੍ਤਨਾ ਸਹ ਪਬ੍ਬਜਿਤੇ ਸਤਸਹਸ੍ਸਭਿਕ੍ਖੂ ਸਮ੍ਮੁਖੇ ਕਤ੍ਵਾ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਕੋਟਿਸਤਸਹਸ੍ਸਸ੍ਸ ਪਠਮਾਭਿਸਮਯੋ ਅਹੋਸਿ. ਤਦਾ ਕਿਰ ਮਹਾਦੋਣਨਗਰੇ ਦੋਣੋ ਨਾਮ ਨਾਗਰਾਜਾ ਗਙ੍ਗਾਤੀਰੇ ਪਟਿਵਸਤਿ ਮਹਿਦ੍ਧਿਕੋ ਮਹਾਨੁਭਾਵੋ ਮਹਾਜਨੇਨ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ. ਸੋ ਯਸ੍ਮਿਂ ਵਿਸਯੇ ਜਨਪਦਵਾਸਿਨੋ ਮਨੁਸ੍ਸਾ ਤਸ੍ਸ ਬਲਿਕਮ੍ਮਂ ਨ ਕਰੋਨ੍ਤਿ, ਤੇਸਂ ਵਿਸਯਂ ਅਵਸ੍ਸੇਨ ਵਾ ਅਤਿਵਸ੍ਸੇਨ ਵਾ ਸਕ੍ਖਰਵਸ੍ਸੇਨ ਵਾ ਵਿਨਾਸੇਤਿ.

ਅਥ ਤੀਰਦਸ੍ਸਨੋ ਨਾਰਦੋ ਸਤ੍ਥਾ ਦੋਣਸ੍ਸ ਨਾਗਰਾਜਸ੍ਸ ਵਿਨਯਨੇ ਬਹੂਨਂ ਪਾਣੀਨਂ ਉਪਨਿਸ੍ਸਯਂ ਦਿਸ੍ਵਾ ਮਹਤਾ ਭਿਕ੍ਖੁਸਙ੍ਘੇਨ ਪਰਿਵਾਰਿਤੋ ਤਸ੍ਸ ਨਾਗਰਾਜਸ੍ਸ ਨਿਵਾਸਟ੍ਠਾਨਮਗਮਾਸਿ. ਤਤੋ ਤਂ ਮਨੁਸ੍ਸਾ ਦਿਸ੍ਵਾ ਏਵਮਾਹਂਸੁ – ‘‘ਭਗਵਾ, ਏਤ੍ਥ ਘੋਰਵਿਸੋ ਉਗ੍ਗਤੇਜੋ ਮਹਿਦ੍ਧਿਕੋ ਮਹਾਨੁਭਾਵੋ ਨਾਗਰਾਜਾ ਪਟਿਵਸਤਿ, ਸੋ ਤਂ ਮਾ ਵਿਹੇਠੇਸ੍ਸਤਿ ਨ ਗਨ੍ਤਬ੍ਬ’’ਨ੍ਤਿ. ਭਗਵਾ ਪਨ ਤੇਸਂ ਵਚਨਂ ਅਸੁਣਨ੍ਤੋ ਵਿਯ ਅਗਮਾਸਿ. ਗਨ੍ਤ੍ਵਾ ਚ ਤਤ੍ਥਸ੍ਸ ਨਾਗਰਾਜਸ੍ਸ ਸਕ੍ਕਾਰਤ੍ਥਾਯ ਕਤੇ ਪਰਮਸੁਰਭਿਗਨ੍ਧੇ ਪੁਪ੍ਫਸਨ੍ਥਰੇ ਨਿਸੀਦਿ. ਮਹਾਜਨੋ ਕਿਰ ‘‘ਨਾਰਦਸ੍ਸ ਚ ਮੁਨਿਰਾਜਸ੍ਸ ਦੋਣਸ੍ਸ ਚ ਨਾਗਰਾਜਸ੍ਸ ਦ੍ਵਿਨ੍ਨਮ੍ਪਿ ਯੁਦ੍ਧਂ ਪਸ੍ਸਿਸ੍ਸਾਮਾ’’ਤਿ ਸਨ੍ਨਿਪਤਿ.

ਅਥ ਅਹਿਨਾਗੋ ਮੁਨਿਨਾਗਂ ਤਥਾ ਨਿਸਿਨ੍ਨਂ ਦਿਸ੍ਵਾ ਮਕ੍ਖਂ ਅਸਹਮਾਨੋ ਸਨ੍ਦਿਸ੍ਸਮਾਨਕਾਯੋ ਹੁਤ੍ਵਾ ਪਧੂਪਾਯਿ. ਦਸਬਲੋਪਿ ਪਧੂਪਾਯਿ. ਪੁਨ ਨਾਗਰਾਜਾ ਪਜ੍ਜਲਿ. ਮੁਨਿਰਾਜਾਪਿ ਪਜ੍ਜਲਿ. ਅਥ ਸੋ ਨਾਗਰਾਜਾ ਦਸਬਲਸ੍ਸ ਸਰੀਰਤੋ ਨਿਕ੍ਖਨ੍ਤਾਹਿ ਧੂਮਜਾਲਾਹਿ ਅਤਿਵਿਯ ਕਿਲਨ੍ਤਸਰੀਰੋ ਦੁਕ੍ਖਂ ਅਸਹਮਾਨੋ ‘‘ਵਿਸਵੇਗੇਨ ਨਂ ਮਾਰੇਸ੍ਸਾਮੀ’’ਤਿ ਵਿਸਂ ਵਿਸ੍ਸਜ੍ਜੇਸਿ. ਵਿਸਸ੍ਸ ਵੇਗੇਨ ਸਕਲੋਪਿ ਜਮ੍ਬੁਦੀਪੋ ਵਿਨਸ੍ਸੇਯ੍ਯ. ਤਂ ਪਨ ਵਿਸਂ ਦਸਬਲਸ੍ਸ ਸਰੀਰੇ ਏਕਲੋਮਮ੍ਪਿ ਕਮ੍ਪੇਤੁਂ ਨਾਸਕ੍ਖਿ. ਅਥ ਸੋ ਨਾਗਰਾਜਾ – ‘‘ਕਾ ਨੁ ਖੋ ਸਮਣਸ੍ਸ ਪਵਤ੍ਤੀ’’ਤਿ ਓਲੋਕੇਨ੍ਤੋ ਸਰਦਸਮਯੇ ਸੂਰਿਯਂ ਵਿਯ ਚਨ੍ਦਂ ਵਿਯ ਚ ਪਰਿਪੁਣ੍ਣਂ ਛਬ੍ਬਣ੍ਣਾਹਿ ਬੁਦ੍ਧਰਸ੍ਮੀਹਿ ਵਿਰੋਚਮਾਨਂ ਵਿਪ੍ਪਸਨ੍ਨਵਦਨਸੋਭਂ ਭਗਵਨ੍ਤਂ ਦਿਸ੍ਵਾ – ‘‘ਅਹੋ! ਮਹਿਦ੍ਧਿਕੋ ਵਤਾਯਂ ਸਮਣੋ, ਮਯਾ ਪਨ ਅਤ੍ਤਨੋ ਬਲਂ ਅਜਾਨਨ੍ਤੇਨ ਅਪਰਦ੍ਧ’’ਨ੍ਤਿ ਚਿਨ੍ਤੇਤ੍ਵਾ ਤਾਣਂ ਗਵੇਸੀ ਭਗਵਨ੍ਤਂਯੇਵ ਸਰਣਮੁਪਗਞ੍ਛਿ. ਅਥ ਨਾਰਦੋ ਮੁਨਿਰਾਜਾ ਤਂ ਨਾਗਰਾਜਂ ਵਿਨੇਤ੍ਵਾ ਤਤ੍ਥ ਸਨ੍ਨਿਪਤਿਤਸ੍ਸ ਮਹਾਜਨਸ੍ਸ ਚਿਤ੍ਤਪ੍ਪਸਾਦਨਤ੍ਥਂ ਯਮਕਪਾਟਿਹਾਰਿਯਂ ਅਕਾਸਿ. ਤਦਾ ਪਾਣੀਨਂ ਨਵੁਤਿਕੋਟਿਸਹਸ੍ਸਾਨਿ ਅਰਹਤ੍ਤੇ ਪਤਿਟ੍ਠਹਿਂਸੁ. ਸੋ ਦੁਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੭. ‘‘ਮਹਾਦੋਣਂ ਨਾਗਰਾਜਂ, ਵਿਨਯਨ੍ਤੋ ਮਹਾਮੁਨਿ;

ਪਾਟਿਹੇਰਂ ਤਦਾਕਾਸਿ, ਦਸ੍ਸਯਨ੍ਤੋ ਸਦੇਵਕੇ.

੮. ‘‘ਤਦਾ ਦੇਵਮਨੁਸ੍ਸਾਨਂ, ਤਮ੍ਹਿ ਧਮ੍ਮਪ੍ਪਕਾਸਨੇ;

ਨਵੁਤਿਕੋਟਿਸਹਸ੍ਸਾਨਿ, ਤਰਿਂਸੁ ਸਬ੍ਬਸਂਸਯ’’ਨ੍ਤਿ.

ਤਤ੍ਥ ਪਾਟਿਹੇਰਂ ਤਦਾਕਾਸੀਤਿ ਅਕਾਸਿ ਯਮਕਪਾਟਿਹਾਰਿਯਨ੍ਤਿ ਅਤ੍ਥੋ. ਅਯਮੇਵ ਵਾ ਪਾਠੋ. ‘‘ਤਦਾ ਦੇਵਮਨੁਸ੍ਸਾ ਵਾ’’ਤਿਪਿ ਪਾਠੋ. ਤਤ੍ਥ ਦੇਵਮਨੁਸ੍ਸਾਨਨ੍ਤਿ ਸਾਮਿਅਤ੍ਥੇ ਪਚ੍ਚਤ੍ਤਂ. ਤਸ੍ਮਾ ਦੇਵਾਨਂ ਮਨੁਸ੍ਸਾਨਞ੍ਚ ਨਵੁਤਿਕੋਟਿਸਹਸ੍ਸਾਨੀਤਿ ਅਤ੍ਥੋ. ਤਰਿਂਸੂਤਿ ਅਤਿਕ੍ਕਮਿਂਸੁ.

ਯਦਾ ਪਨ ਅਤ੍ਤਨੋ ਪੁਤ੍ਤਂ ਨਨ੍ਦੁਤ੍ਤਰਕੁਮਾਰਂ ਓਵਦਿ, ਤਦਾ ਅਸੀਤਿਯਾ ਕੋਟਿਸਹਸ੍ਸਾਨਂ ਤਤਿਯਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੯. ‘‘ਯਮ੍ਹਿ ਕਾਲੇ ਮਹਾਵੀਰੋ, ਓਵਦੀ ਸਕਮਤ੍ਰਜਂ;

ਅਸੀਤਿਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਯਦਾ ਪਨ ਥੁਲ੍ਲਕੋਟ੍ਠਿਤਨਗਰੇ ਭਦ੍ਦਸਾਲੋ ਚ ਵਿਜਿਤਮਿਤ੍ਤੋ ਚ ਦ੍ਵੇ ਬ੍ਰਾਹ੍ਮਣਸਹਾਯਕਾ ਅਮਤਰਹਦਂ ਗਵੇਸਮਾਨਾ ਪਰਿਸਤਿ ਨਿਸਿਨ੍ਨਂ ਅਤਿਵਿਸਾਰਦਂ ਨਾਰਦਸਮ੍ਮਾਸਮ੍ਬੁਦ੍ਧਂ ਅਦ੍ਦਸਂਸੁ. ਤੇ ਭਗਵਤੋ ਕਾਯੇ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਦਿਸ੍ਵਾ – ‘‘ਅਯਂ ਲੋਕੇ ਵਿਵਟਚ੍ਛਦੋ ਸਮ੍ਮਾਸਮ੍ਬੁਦ੍ਧੋ’’ਤਿ ਨਿਟ੍ਠਂ ਗਨ੍ਤ੍ਵਾ ਭਗਵਤਿ ਸਞ੍ਜਾਤਸਦ੍ਧਾ ਸਪਰਿਵਾਰਾ ਭਗਵਤੋ ਸਨ੍ਤਿਕੇ ਪਬ੍ਬਜਿਂਸੁ. ਤੇਸੁ ਪਬ੍ਬਜਿਤ੍ਵਾ ਅਰਹਤ੍ਤਂ ਪਤ੍ਤੇਸੁ ਭਗਵਾ ਭਿਕ੍ਖੂਨਂ ਕੋਟਿਸਤਸਹਸ੍ਸਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੧੦. ‘‘ਸਨ੍ਨਿਪਾਤਾ ਤਯੋ ਆਸੁਂ, ਨਾਰਦਸ੍ਸ ਮਹੇਸਿਨੋ;

ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ’’ਤਿ.

ਯਸ੍ਮਿਂ ਸਮਯੇ ਨਾਰਦੋ ਸਮ੍ਮਾਸਮ੍ਬੁਦ੍ਧੋ ਞਾਤਿਸਮਾਗਮੇ ਅਤ੍ਤਨੋ ਪਣਿਧਾਨਤੋ ਪਟ੍ਠਾਯ ਬੁਦ੍ਧਵਂਸਂ ਕਥੇਸਿ, ਤਦਾ ਨਵੁਤਿਕੋਟਿਭਿਕ੍ਖੁਸਹਸ੍ਸਾਨਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੧੧. ‘‘ਯਦਾ ਬੁਦ੍ਧੋ ਬੁਦ੍ਧਗੁਣਂ, ਸਨਿਦਾਨਂ ਪਕਾਸਯਿ;

ਨਵੁਤਿਕੋਟਿਸਹਸ੍ਸਾਨਿ, ਸਮਿਂਸੁ ਵਿਮਲਾ ਤਦਾ’’ਤਿ.

ਤਤ੍ਥ ਵਿਮਲਾਤਿ ਵਿਗਤਮਲਾ, ਖੀਣਾਸਵਾਤਿ ਅਤ੍ਥੋ.

ਯਦਾ ਪਨ ਮਹਾਦੋਣਨਾਗਰਾਜਸ੍ਸ ਵਿਨਯਨੇ ਪਸਨ੍ਨੋ ਵੇਰੋਚਨੋ ਨਾਮ ਨਾਗਰਾਜਾ ਗਙ੍ਗਾਯ ਨਦਿਯਾ ਤਿਗਾਵੁਤਪ੍ਪਮਾਣਂ ਸਤ੍ਤਰਤਨਮਯਂ ਮਣ੍ਡਪਂ ਨਿਮ੍ਮਿਨਿਤ੍ਵਾ ਸਪਰਿਵਾਰਂ ਭਗਵਨ੍ਤਂ ਤਤ੍ਥ ਨਿਸੀਦਾਪੇਤ੍ਵਾ ਸਪਰਿਵਾਰੋ ਸਜਨਪਦੇ ਅਤ੍ਤਨੋ ਦਾਨਗ੍ਗਦਸ੍ਸਨਤ੍ਥਾਯ ਨਿਮਨ੍ਤੇਤ੍ਵਾ ਨਾਗਨਾਟਕਾਨਿ ਚ ਤਾਲ਼ਾਵਚਰੇ ਵਿਵਿਧਵੇਸਾਲਙ੍ਕਾਰਧਰੇ ਸਨ੍ਨਿਪਾਤੇਤ੍ਵਾ ਮਹਾਸਕ੍ਕਾਰੇਨ ਭਗਵਤੋ ਸਪਰਿਵਾਰਸ੍ਸ ਮਹਾਦਾਨਂ ਅਦਾਸਿ. ਭੋਜਨਾਵਸਾਨੇ ਭਗਵਾ ਮਹਾਗਙ੍ਗਂ ਓਤਾਰੇਨ੍ਤੋ ਵਿਯ ਅਨੁਮੋਦਨਮਕਾਸਿ. ਤਦਾ ਭਤ੍ਤਾਨੁਮੋਦਨੇ ਧਮ੍ਮਂ ਸੁਤ੍ਵਾ ਪਸਨ੍ਨਾਨਂ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾਨਂ ਅਸੀਤਿਭਿਕ੍ਖੁਸਤਸਹਸ੍ਸਾਨਂ ਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੧੨. ‘‘ਯਦਾ ਵੇਰੋਚਨੋ ਨਾਗੋ, ਦਾਨਂ ਦਦਾਤਿ ਸਤ੍ਥੁਨੋ;

ਤਦਾ ਸਮਿਂਸੁ ਜਿਨਪੁਤ੍ਤਾ, ਅਸੀਤਿਸਤਸਹਸ੍ਸਿਯੋ’’ਤਿ.

ਤਤ੍ਥ ਅਸੀਤਿਸਤਸਹਸ੍ਸਿਯੋਤਿ ਸਤਸਹਸ੍ਸਾਨਂ ਅਸੀਤਿਯੋ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਪਸ੍ਸੇ ਅਸ੍ਸਮਂ ਮਾਪੇਤ੍ਵਾ ਪਞ੍ਚਸੁ ਅਭਿਞ੍ਞਾਸੁ ਅਟ੍ਠਸੁ ਸਮਾਪਤ੍ਤੀਸੁ ਚ ਚਿਣ੍ਣਵਸੀ ਹੁਤ੍ਵਾ ਪਟਿਵਸਤਿ. ਅਥ ਤਸ੍ਮਿਂ ਅਨੁਕਮ੍ਪਾਯ ਨਾਰਦੋ ਭਗਵਾ ਅਸੀਤਿਯਾ ਅਰਹਨ੍ਤਕੋਟੀਹਿ ਦਸਹਿ ਚ ਅਨਾਗਾਮਿਫਲਟ੍ਠੇਹਿ ਉਪਾਸਕਸਹਸ੍ਸੇਹਿ ਪਰਿਵੁਤੋ ਤਂ ਅਸ੍ਸਮਪਦਂ ਅਗਮਾਸਿ. ਤਾਪਸੋ ਭਗਵਨ੍ਤਂ ਦਿਸ੍ਵਾਵ ਪਮੁਦਿਤਹਦਯੋ ਸਪਰਿਵਾਰਸ੍ਸ ਭਗਵਤੋ ਨਿਵਾਸਤ੍ਥਾਯ ਅਸ੍ਸਮਂ ਮਾਪੇਤ੍ਵਾ ਸਕਲਰਤ੍ਤਿਂ ਸਤ੍ਥੁਗੁਣਂ ਕਿਤ੍ਤੇਤ੍ਵਾ ਭਗਵਤੋ ਧਮ੍ਮਕਥਂ ਸੁਤ੍ਵਾ ਪੁਨਦਿਵਸੇ ਉਤ੍ਤਰਕੁਰੁਂ ਗਨ੍ਤ੍ਵਾ ਤਤੋ ਆਹਾਰਂ ਆਹਰਿਤ੍ਵਾ ਸਪਰਿਵਾਰਸ੍ਸ ਬੁਦ੍ਧਸ੍ਸ ਮਹਾਦਾਨਂ ਅਦਾਸਿ. ਏਵਂ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਹਿਮਵਨ੍ਤਤੋ ਅਨਗ੍ਘਂ ਲੋਹਿਤਚਨ੍ਦਨਂ ਆਹਰਿਤ੍ਵਾ ਤੇਨ ਲੋਹਿਤਚਨ੍ਦਨੇਨ ਭਗਵਨ੍ਤਂ ਪੂਜੇਸਿ. ਤਦਾ ਨਂ ਦਸਬਲੋ ਅਮਰਨਰਪਰਿਵੁਤੋ ਧਮ੍ਮਕਥਂ ਕਥੇਤ੍ਵਾ – ‘‘ਅਨਾਗਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੧੩. ‘‘ਅਹਂ ਤੇਨ ਸਮਯੇਨ, ਜਟਿਲੋ ਉਗ੍ਗਤਾਪਨੋ;

ਅਨ੍ਤਲਿਕ੍ਖਚਰੋ ਆਸਿਂ, ਪਞ੍ਚਾਭਿਞ੍ਞਾਸੁ ਪਾਰਗੂ.

੧੪. ‘‘ਤਦਾਪਾਹਂ ਅਸਮਸਮਂ, ਸਸਙ੍ਘਂ ਸਪਰਿਜ੍ਜਨਂ;

ਅਨ੍ਨਪਾਨੇਨ ਤਪ੍ਪੇਤ੍ਵਾ, ਚਨ੍ਦਨੇਨਾਭਿਪੂਜਯਿਂ.

੧੫. ‘‘ਸੋਪਿ ਮਂ ਤਦਾ ਬ੍ਯਾਕਾਸਿ, ਨਾਰਦੋ ਲੋਕਨਾਯਕੋ;

ਅਪਰਿਮੇਯ੍ਯਿਤੋ ਕਪ੍ਪੇ, ਬੁਦ੍ਧੋ ਲੋਕੇ ਭਵਿਸ੍ਸਤਿ.

੧੬. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੭. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਹਾਸੇਤ੍ਵ ਮਾਨਸਂ;

ਅਧਿਟ੍ਠਹਿਂ ਵਤਂ ਉਗ੍ਗਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਤਦਾਪਾਹਨ੍ਤਿ ਤਦਾਪਿ ਅਹਂ. ਅਸਮਸਮਨ੍ਤਿ ਅਸਮਾ ਨਾਮ ਅਤੀਤਾ ਬੁਦ੍ਧਾ, ਤੇਹਿ ਅਸਮੇਹਿ ਸਮਂ ਤੁਲ੍ਯਂ ਅਸਮਸਮਂ. ਅਥ ਵਾ ਅਸਮਾ ਵਿਸਮਾ, ਸਮਾ ਅਵਿਸਮਾ ਸਾਧਵੋ, ਤੇਸੁ ਅਸਮਸਮੇਸੁ ਸਮੋ ‘‘ਅਸਮਸਮਸਮੋ’’ਤਿ ਵਤ੍ਤਬ੍ਬੇ ਏਕਸ੍ਸ ਸਮਸਦ੍ਦਸ੍ਸ ਲੋਪਂ ਕਤ੍ਵਾ ਵੁਤ੍ਤਨ੍ਤਿ ਵੇਦਿਤਬ੍ਬਂ, ਅਸਮਾਵਿਸਮਸਮਨ੍ਤਿ ਅਤ੍ਥੋ. ਸਪਰਿਜ੍ਜਨਨ੍ਤਿ ਸਉਪਾਸਕਜਨਂ. ‘‘ਸੋਪਿ ਮਂ ਤਦਾ ਨਰਮਰੂਨਂ, ਮਜ੍ਝੇ ਬ੍ਯਾਕਾਸਿ ਚਕ੍ਖੁਮਾ’’ਤਿਪਿ ਪਾਠੋ, ਸੋ ਉਤ੍ਤਾਨਤ੍ਥੋਵ. ਭਿਯ੍ਯੋ ਹਾਸੇਤ੍ਵ ਮਾਨਸਨ੍ਤਿ ਉਤ੍ਤਰਿਮ੍ਪਿ ਹਾਸੇਤ੍ਵਾ ਤੋਸੇਤ੍ਵਾ ਹਦਯਂ. ਅਧਿਟ੍ਠਹਿਂ ਵਤਂ ਉਗ੍ਗਨ੍ਤਿ ਉਗ੍ਗਂ ਵਤਂ ਅਧਿਟ੍ਠਾਸਿਂ. ‘‘ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿਪਿ ਪਾਠੋ.

ਤਸ੍ਸ ਪਨ ਭਗਵਤੋ ਨਾਰਦਸ੍ਸ ਧਞ੍ਞਵਤੀ ਨਾਮ ਨਗਰਂ ਅਹੋਸਿ, ਸੁਦੇਵੋ ਨਾਮ ਖਤ੍ਤਿਯੋ ਪਿਤਾ, ਅਨੋਮਾ ਨਾਮ ਮਾਤਾ, ਭਦ੍ਦਸਾਲੋ ਚ ਜਿਤਮਿਤ੍ਤੋ ਚ ਦ੍ਵੇ ਅਗ੍ਗਸਾਵਕਾ, ਵਾਸੇਟ੍ਠੋ ਨਾਮ ਉਪਟ੍ਠਾਕੋ, ਉਤ੍ਤਰਾ ਚ ਫਗ੍ਗੁਨੀ ਚ ਦ੍ਵੇ ਅਗ੍ਗਸਾਵਿਕਾ, ਮਹਾਸੋਣਰੁਕ੍ਖੋ ਬੋਧਿ, ਸਰੀਰਂ ਅਟ੍ਠਾਸੀਤਿਹਤ੍ਥੁਬ੍ਬੇਧਂ ਅਹੋਸਿ. ਤਸ੍ਸ ਸਰੀਰਪ੍ਪਭਾ ਨਿਚ੍ਚਂ ਯੋਜਨਂ ਫਰਤਿ, ਨਵੁਤਿਵਸ੍ਸਸਹਸ੍ਸਾਨਿ ਆਯੁ, ਤਸ੍ਸ ਪਨ ਵਿਜਿਤਸੇਨਾ ਨਾਮ ਅਗ੍ਗਮਹੇਸੀ, ਨਨ੍ਦੁਤ੍ਤਰਕੁਮਾਰੋ ਨਾਮਸ੍ਸ ਪੁਤ੍ਤੋ ਅਹੋਸਿ, ਵਿਜਿਤੋ ਵਿਜਿਤਾਵੀ ਵਿਜਿਤਾਭਿਰਾਮੋਤਿ ਤਯੋ ਪਾਸਾਦਾ ਅਹੇਸੁਂ. ਸੋ ਨਵਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਸੋ ਪਦਸਾਵ ਮਹਾਭਿਨਿਕ੍ਖਮਨਂ ਨਿਕ੍ਖਮੀਤਿ. ਤੇਨ ਵੁਤ੍ਤਂ –

੧੮. ‘‘ਨਗਰਂ ਧਞ੍ਞਵਤੀ ਨਾਮ, ਸੁਦੇਵੋ ਨਾਮ ਖਤ੍ਤਿਯੋ;

ਅਨੋਮਾ ਨਾਮ ਜਨਿਕਾ, ਨਾਰਦਸ੍ਸ ਮਹੇਸਿਨੋ.

੨੩. ‘‘ਭਦ੍ਦਸਾਲੋ ਜਿਤਮਿਤ੍ਤੋ, ਅਹੇਸੁਂ ਅਗ੍ਗਸਾਵਕਾ;

ਵਾਸੇਟ੍ਠੋ ਨਾਮੁਪਟ੍ਠਾਕੋ, ਨਾਰਦਸ੍ਸ ਮਹੇਸਿਨੋ.

੨੪. ‘‘ਉਤ੍ਤਰਾ ਫਗ੍ਗੁਨੀ ਚੇਵ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਮਹਾਸੋਣੋਤਿ ਵੁਚ੍ਚਤਿ.

੨੬. ‘‘ਅਟ੍ਠਾਸੀਤਿਰਤਨਾਨਿ, ਅਚ੍ਚੁਗ੍ਗਤੋ ਮਹਾਮੁਨਿ;

ਕਞ੍ਚਨਗ੍ਘਿਯਸਙ੍ਕਾਸੋ, ਦਸਸਹਸ੍ਸੀ ਵਿਰੋਚਤਿ.

੨੭. ‘‘ਤਸ੍ਸ ਬ੍ਯਾਮਪ੍ਪਭਾ ਕਾਯਾ, ਨਿਦ੍ਧਾਵਤਿ ਦਿਸੋਦਿਸਂ;

ਨਿਰਨ੍ਤਰਂ ਦਿਵਾਰਤ੍ਤਿਂ, ਯੋਜਨਂ ਫਰਤੇ ਸਦਾ.

੨੮. ‘‘ਨ ਕੇਚਿ ਤੇਨ ਸਮਯੇਨ, ਸਮਨ੍ਤਾ ਯੋਜਨੇ ਜਨਾ;

ਉਕ੍ਕਾਪਦੀਪੇ ਉਜ੍ਜਾਲੇਨ੍ਤਿ, ਬੁਦ੍ਧਰਂਸੀਹਿ ਓਤ੍ਥਟਾ.

੨੯. ‘‘ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੦. ‘‘ਯਥਾ ਉਲ਼ੂਹਿ ਗਗਨਂ, ਵਿਚਿਤ੍ਤਂ ਉਪਸੋਭਤਿ;

ਤਥੇਵ ਸਾਸਨਂ ਤਸ੍ਸ, ਅਰਹਨ੍ਤੇਹਿ ਸੋਭਤਿ.

੩੧. ‘‘ਸਂਸਾਰਸੋਤਂ ਤਰਣਾਯ, ਸੇਸਕੇ ਪਟਿਪਨ੍ਨਕੇ;

ਧਮ੍ਮਸੇਤੁਂ ਦਲ਼੍ਹਂ ਕਤ੍ਵਾ, ਨਿਬ੍ਬੁਤੋ ਸੋ ਨਰਾਸਭੋ.

੩੨. ‘‘ਸੋਪਿ ਬੁਦ੍ਧੋ ਅਸਮਸਮੋ, ਤੇਪਿ ਖੀਣਾਸਵਾ ਅਤੁਲਤੇਜਾ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਕਞ੍ਚਨਗ੍ਘਿਯਸਙ੍ਕਾਸੋਤਿ ਵਿਵਿਧਰਤਨਵਿਚਿਤ੍ਤਕਞ੍ਚਨਮਯਗ੍ਘਿਕਸਦਿਸਰੂਪਸੋਭੋ. ਦਸਸਹਸ੍ਸੀ ਵਿਰੋਚਤੀਤਿ ਤਸ੍ਸ ਪਭਾਯ ਦਸਸਹਸ੍ਸੀਪਿ ਲੋਕਧਾਤੁ ਵਿਰੋਚਤਿ, ਵਿਰਾਜਤੀਤਿ ਅਤ੍ਥੋ. ਤਮੇਵਤ੍ਥਂ ਪਕਾਸੇਨ੍ਤੋ ਭਗਵਾ ‘‘ਤਸ੍ਸ ਬ੍ਯਾਮਪ੍ਪਭਾ ਕਾਯਾ, ਨਿਦ੍ਧਾਵਤਿ ਦਿਸੋਦਿਸ’’ਨ੍ਤਿ ਆਹ. ਤਤ੍ਥ ਬ੍ਯਾਮਪ੍ਪਭਾ ਕਾਯਾਤਿ ਬ੍ਯਾਮਪ੍ਪਭਾ ਵਿਯਾਤਿ ਬ੍ਯਾਮਪ੍ਪਭਾ, ਅਮ੍ਹਾਕਂ ਭਗਵਤੋ ਬ੍ਯਾਮਪ੍ਪਭਾ ਵਿਯਾਤਿ ਅਤ੍ਥੋ.

ਨ ਕੇਚੀਤਿ ਏਤ੍ਥ ਨ-ਕਾਰੋ ਪਟਿਸੇਧਤ੍ਥੋ, ਤਸ੍ਸ ਉਜ੍ਜਾਲੇਨ੍ਤਿ-ਸਦ੍ਦੇਨ ਸਮ੍ਬਨ੍ਧੋ ਦਟ੍ਠਬ੍ਬੋ. ਉਕ੍ਕਾਤਿ ਦਣ੍ਡਦੀਪਿਕਾ. ਉਕ੍ਕਾ ਵਾ ਪਦੀਪੇ ਵਾ ਕੇਚਿਪਿ ਜਨਾ ਨ ਉਜ੍ਜਾਲੇਨ੍ਤਿ ਨ ਪਜ੍ਜਾਲੇਨ੍ਤਿ. ਕਸ੍ਮਾਤਿ ਚੇ? ਬੁਦ੍ਧਸਰੀਰਪ੍ਪਭਾਯ ਓਭਾਸਿਤਤ੍ਤਾ. ਬੁਦ੍ਧਰਂਸੀਹੀਤਿ ਬੁਦ੍ਧਰਸ੍ਮੀਹਿ. ਓਤ੍ਥਟਾਤਿ ਅਧਿਗਤਾ.

ਉਲ਼ੂਹੀਤਿ ਤਾਰਾਹਿ, ਯਥਾ ਤਾਰਾਹਿ ਗਗਨਤਲਂ ਵਿਚਿਤ੍ਤਂ ਸੋਭਤਿ, ਤਥੇਵ ਤਸ੍ਸ ਸਾਸਨਂ ਅਰਹਨ੍ਤੇਹਿ ਵਿਚਿਤ੍ਤਂ ਉਪਸੋਭਤੀਤਿ ਅਤ੍ਥੋ. ਸਂਸਾਰਸੋਤਂ ਤਰਣਾਯਾਤਿ ਸਂਸਾਰਸਾਗਰਸ੍ਸ ਤਰਣਤ੍ਥਂ. ਸੇਸਕੇ ਪਟਿਪਨ੍ਨਕੇਤਿ ਅਰਹਨ੍ਤੇ ਠਪੇਤ੍ਵਾ ਕਲ੍ਯਾਣਪੁਥੁਜ੍ਜਨੇਹਿ ਸਦ੍ਧਿਂ ਸੇਸੇ ਸੇਕ੍ਖਪੁਗ੍ਗਲੇਤਿ ਅਤ੍ਥੋ. ਧਮ੍ਮਸੇਤੁਨ੍ਤਿ ਮਗ੍ਗਸੇਤੁਂ, ਸੇਸਪੁਗ੍ਗਲੇ ਸਂਸਾਰਤੋ ਤਾਰੇਤੁਂ ਧਮ੍ਮਸੇਤੁਂ ਠਪੇਤ੍ਵਾ ਕਤਸਬ੍ਬਕਿਚ੍ਚੋ ਹੁਤ੍ਵਾ ਪਰਿਨਿਬ੍ਬਾਯੀਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਤ੍ਤਾ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਨਾਰਦਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਨਵਮੋ ਬੁਦ੍ਧਵਂਸੋ.