੧੨. ਪਦੁਮੁਤ੍ਤਰਬੁਦ੍ਧਵਂਸਵਣ੍ਣਨਾ

ਨਾਰਦਬੁਦ੍ਧਸ੍ਸ ਸਾਸਨਂ ਨਵੁਤਿਵਸ੍ਸਸਹਸ੍ਸਾਨਿ ਪਵਤ੍ਤਿਤ੍ਵਾ ਅਨ੍ਤਰਧਾਯਿ. ਸੋ ਚ ਕਪ੍ਪੋ ਵਿਨਸ੍ਸਿਤ੍ਥ. ਤਤੋ ਪਰਂ ਕਪ੍ਪਾਨਂ ਅਸਙ੍ਖ੍ਯੇਯ੍ਯਂ ਬੁਦ੍ਧਾ ਲੋਕੇ ਨ ਉਪ੍ਪਜ੍ਜਿਂਸੁ. ਬੁਦ੍ਧਸੁਞ੍ਞੋ ਵਿਗਤਬੁਦ੍ਧਾਲੋਕੋ ਅਹੋਸਿ. ਤਤੋ ਕਪ੍ਪੇਸੁ ਚ ਅਸਙ੍ਖ੍ਯੇਯ੍ਯੇਸੁ ਵੀਤਿਵਤ੍ਤੇਸੁ ਇਤੋ ਕਪ੍ਪਸਤਸਹਸ੍ਸਮਤ੍ਥਕੇ ਏਕਸ੍ਮਿਂ ਕਪ੍ਪੇ ਏਕੋ ਵਿਜਿਤਮਾਰੋ ਓਹਿਤਭਾਰੋ ਮੇਰੁਸਾਰੋ ਅਸਂਸਾਰੋ ਸਤ੍ਤਸਾਰੋ ਸਬ੍ਬਲੋਕੁਤ੍ਤਰੋ ਪਦੁਮੁਤ੍ਤਰੋ ਨਾਮ ਬੁਦ੍ਧੋ ਲੋਕੇ ਉਦਪਾਦਿ. ਸੋਪਿ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਹਂਸਵਤੀਨਗਰੇ ਸਬ੍ਬਜਨਾਨਨ੍ਦਕਰਸ੍ਸਾਨਨ੍ਦਸ੍ਸ ਨਾਮ ਰਞ੍ਞੋ ਅਗ੍ਗਮਹੇਸਿਯਾ ਉਦਿਤੋਦਿਤਕੁਲੇ ਜਾਤਾਯ ਸੁਜਾਤਾਯ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਸਾ ਦੇਵਤਾਹਿ ਕਤਾਰਕ੍ਖਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਹਂਸਵਤੁਯ੍ਯਾਨੇ ਪਦੁਮੁਤ੍ਤਰਕੁਮਾਰਂ ਵਿਜਾਯਿ. ਪਟਿਸਨ੍ਧਿਯਞ੍ਚਸ੍ਸ ਜਾਤਿਯਞ੍ਚ ਹੇਟ੍ਠਾ ਵੁਤ੍ਤਪ੍ਪਕਾਰਾਨਿ ਪਾਟਿਹਾਰਿਯਾਨਿ ਅਹੇਸੁਂ.

ਤਸ੍ਸ ਕਿਰ ਜਾਤਿਯਂ ਪਦੁਮਵਸ੍ਸਂ ਵਸ੍ਸਿ. ਤੇਨਸ੍ਸ ਨਾਮਗ੍ਗਹਣਦਿਵਸੇ ਞਾਤਕਾ ‘‘ਪਦੁਮੁਤ੍ਤਰਕੁਮਾਰੋ’’ਤ੍ਵੇਵ ਨਾਮਂ ਅਕਂਸੁ. ਸੋ ਦਸਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਨਰਵਾਹਨ-ਯਸਵਾਹਨ-ਵਸਵਤ੍ਤਿਨਾਮਕਾ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕਾ ਤਯੋ ਚਸ੍ਸ ਪਾਸਾਦਾ ਅਹੇਸੁਂ. ਵਸੁਦਤ੍ਤਾਦੇਵਿਪ੍ਪਮੁਖਾਨਂ ਇਤ੍ਥੀਨਂ ਸਤਸਹਸ੍ਸਾਨਿ ਵੀਸਤਿਸਹਸ੍ਸਾਨਿ ਚ ਪਚ੍ਚੁਪਟ੍ਠਿਤਾਨਿ ਅਹੇਸੁਂ. ਸੋ ਵਸੁਦਤ੍ਤਾਯ ਦੇਵਿਯਾ ਪੁਤ੍ਤੇ ਸਬ੍ਬਗੁਣਾਨੁਤ੍ਤਰੇ ਉਤ੍ਤਰਕੁਮਾਰੇ ਨਾਮ ਉਪ੍ਪਨ੍ਨੇ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ – ‘‘ਮਹਾਭਿਨਿਕ੍ਖਮਨਂ ਨਿਕ੍ਖਮਿਸ੍ਸਾਮੀ’’ਤਿ ਚਿਨ੍ਤੇਸਿ. ਤਸ੍ਸ ਚਿਨ੍ਤਿਤਮਤ੍ਤੇਵ ਵਸਵਤ੍ਤਿਨਾਮਕੋ ਪਾਸਾਦੋ ਕੁਮ੍ਭਕਾਰਚਕ੍ਕਂ ਵਿਯ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਦੇਵਵਿਮਾਨਮਿਵ ਪੁਣ੍ਣਚਨ੍ਦੋ ਵਿਯ ਚ ਗਗਨਤਲੇਨ ਗਨ੍ਤ੍ਵਾ ਬੋਧਿਰੁਕ੍ਖਂ ਮਜ੍ਝੇਕਰੋਨ੍ਤੋ ਸੋਭਿਤਬੁਦ੍ਧਵਂਸਵਣ੍ਣਨਾਯ ਆਗਤਪਾਸਾਦੋ ਵਿਯ ਭੂਮਿਯਂ ਓਤਰਿ.

ਮਹਾਪੁਰਿਸੋ ਕਿਰ ਤਤੋ ਪਾਸਾਦਤੋ ਓਤਰਿਤ੍ਵਾ ਅਰਹਤ੍ਤਦ੍ਧਜਭੂਤਾਨਿ ਕਾਸਾਯਾਨਿ ਵਤ੍ਥਾਨਿ ਦੇਵਦਤ੍ਤਿਯਾਨਿ ਪਾਰੁਪਿਤ੍ਵਾ ਤਤ੍ਥੇਵ ਪਬ੍ਬਜਿ. ਪਾਸਾਦੋ ਪਨਾਗਨ੍ਤ੍ਵਾ ਸਕਟ੍ਠਾਨੇਯੇਵ ਅਟ੍ਠਾਸਿ. ਮਹਾਸਤ੍ਤੇਨ ਸਹਗਤਾਯ ਪਰਿਸਾਯ ਠਪੇਤ੍ਵਾ ਇਤ੍ਥਿਯੋ ਸਬ੍ਬੇ ਪਬ੍ਬਜਿਂਸੁ. ਮਹਾਪੁਰਿਸੋ ਤੇਹਿ ਸਹ ਸਤ੍ਤਾਹਂ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਉਜ੍ਜੇਨਿਨਿਗਮੇ ਰੁਚਾਨਨ੍ਦਸੇਟ੍ਠਿਧੀਤਾਯ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸਾਲਵਨੇ ਦਿਵਾਵਿਹਾਰਂ ਕਤ੍ਵਾ ਸਾਯਨ੍ਹਸਮਯੇ ਸੁਮਿਤ੍ਤਾਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਸਲਲਬੋਧਿਂ ਉਪਗਨ੍ਤ੍ਵਾ ਤਂ ਪਦਕ੍ਖਿਣਂ ਕਤ੍ਵਾ ਅਟ੍ਠਤ੍ਤਿਂਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਸਮਾਰਂ ਮਾਰਬਲਂ ਵਿਧਮਿਤ੍ਵਾ ਪਠਮੇ ਯਾਮੇ ਪੁਬ੍ਬੇਨਿਵਾਸਂ ਅਨੁਸ੍ਸਰਿਤ੍ਵਾ ਦੁਤਿਯੇ ਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਤ੍ਵਾ ਤਤਿਯੇ ਯਾਮੇ ਪਚ੍ਚਯਾਕਾਰਂ ਸਮ੍ਮਸਿਤ੍ਵਾ ਆਨਾਪਾਨਚਤੁਤ੍ਥਜ੍ਝਾਨਤੋ ਵੁਟ੍ਠਾਯ ਪਞ੍ਚਸੁ ਖਨ੍ਧੇਸੁ ਅਭਿਨਿਵਿਸਿਤ੍ਵਾ ਉਦਯਬ੍ਬਯਵਸੇਨ ਸਮਪਞ੍ਞਾਸ ਲਕ੍ਖਣਾਨਿ ਦਿਸ੍ਵਾ ਯਾਵ ਗੋਤ੍ਰਭੁਞਾਣਂ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਿਯਮਗ੍ਗੇਨ ਸਕਲਬੁਦ੍ਧਗੁਣੇ ਪਟਿਵਿਜ੍ਝਿਤ੍ਵਾ ਸਬ੍ਬਬੁਦ੍ਧਾਚਿਣ੍ਣਂ ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਸਿ. ਤਦਾ ਕਿਰ ਦਸਸਹਸ੍ਸਚਕ੍ਕਵਾਲ਼ਬ੍ਭਨ੍ਤਰਂ ਸਕਲਮ੍ਪਿ ਅਲਙ੍ਕਰੋਨ੍ਤਂ ਵਿਯ ਪਦੁਮਵਸ੍ਸਂ ਵਸ੍ਸਿ. ਤੇਨ ਵੁਤ੍ਤਂ –

੧. ‘‘ਨਾਰਦਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਪਦੁਮੁਤ੍ਤਰੋ ਨਾਮ ਜਿਨੋ, ਅਕ੍ਖੋਭੋ ਸਾਗਰੂਪਮੋ.

੨. ‘‘ਮਣ੍ਡਕਪ੍ਪੋ ਵਾ ਸੋ ਆਸਿ, ਯਮ੍ਹਿ ਬੁਦ੍ਧੋ ਅਜਾਯਥ;

ਉਸ੍ਸਨ੍ਨਕੁਸਲਾ ਜਨਤਾ, ਤਮ੍ਹਿ ਕਪ੍ਪੇ ਅਜਾਯਥਾ’’ਤਿ.

ਤਤ੍ਥ ਸਾਗਰੂਪਮੋਤਿ ਸਾਗਰਸਦਿਸਗਮ੍ਭੀਰਭਾਵੋ. ਮਣ੍ਡਕਪ੍ਪੋ ਵਾ ਸੋ ਆਸੀਤਿ ਏਤ੍ਥ ਯਸ੍ਮਿਂ ਕਪ੍ਪੇ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਅਯਂ ਮਣ੍ਡਕਪ੍ਪੋ ਨਾਮ. ਦੁਵਿਧੋ ਹਿ ਕਪ੍ਪੋ ਸੁਞ੍ਞਕਪ੍ਪੋ ਅਸੁਞ੍ਞਕਪ੍ਪੋ ਚਾਤਿ. ਤਤ੍ਥ ਸੁਞ੍ਞਕਪ੍ਪੇ ਬੁਦ੍ਧਪਚ੍ਚੇਕਬੁਦ੍ਧਚਕ੍ਕਵਤ੍ਤਿਨੋ ਨ ਉਪ੍ਪਜ੍ਜਨ੍ਤਿ. ਤਸ੍ਮਾ ਗੁਣਵਨ੍ਤਪੁਗ੍ਗਲਸੁਞ੍ਞਤ੍ਤਾ ‘‘ਸੁਞ੍ਞਕਪ੍ਪੋ’’ਤਿ ਵੁਚ੍ਚਤਿ.

ਅਸੁਞ੍ਞਕਪ੍ਪੋ ਪਞ੍ਚਵਿਧੋ – ਸਾਰਕਪ੍ਪੋ ਮਣ੍ਡਕਪ੍ਪੋ ਵਰਕਪ੍ਪੋ ਸਾਰਮਣ੍ਡਕਪ੍ਪੋ ਭਦ੍ਦਕਪ੍ਪੋਤਿ. ਤਤ੍ਥ ਗੁਣਸਾਰਰਹਿਤੇ ਕਪ੍ਪੇ ਗੁਣਸਾਰੁਪ੍ਪਾਦਕਸ੍ਸ ਗੁਣਸਾਰਜਨਨਸ੍ਸ ਏਕਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਪਾਤੁਭਾਵੇਨ ‘‘ਸਾਰਕਪ੍ਪੋ’’ਤਿ ਵੁਚ੍ਚਤਿ. ਯਸ੍ਮਿਂ ਪਨ ਕਪ੍ਪੇ ਦ੍ਵੇ ਲੋਕਨਾਯਕਾ ਉਪ੍ਪਜ੍ਜਨ੍ਤਿ, ਸੋ ‘‘ਮਣ੍ਡਕਪ੍ਪੋ’’ਤਿ ਵੁਚ੍ਚਤਿ. ਯਸ੍ਮਿਂ ਕਪ੍ਪੇ ਤਯੋ ਬੁਦ੍ਧਾ ਉਪ੍ਪਜ੍ਜਨ੍ਤਿ, ਤੇਸੁ ਪਠਮੋ ਦੁਤਿਯਂ ਬ੍ਯਾਕਰੋਤਿ, ਦੁਤਿਯੋ ਤਤਿਯਨ੍ਤਿ, ਤਤ੍ਥ ਮਨੁਸ੍ਸਾ ਪਮੁਦਿਤਹਦਯਾ ਅਤ੍ਤਨਾ ਪਤ੍ਥਿਤਪਣਿਧਾਨਵਸੇਨ ਵਰਯਨ੍ਤਿ. ਤਸ੍ਮਾ ‘‘ਵਰਕਪ੍ਪੋ’’ਤਿ ਵੁਚ੍ਚਤਿ. ਯਤ੍ਥ ਪਨ ਕਪ੍ਪੇ ਚਤ੍ਤਾਰੋ ਬੁਦ੍ਧਾ ਉਪ੍ਪਜ੍ਜਨ੍ਤਿ, ਸੋ ਪੁਰਿਮਕਪ੍ਪਤੋ ਵਿਸਿਟ੍ਠਤਰਤ੍ਤਾ ਸਾਰਤਰਤ੍ਤਾ ‘‘ਸਾਰਮਣ੍ਡਕਪ੍ਪੋ’’ਤਿ ਵੁਚ੍ਚਤਿ. ਯਸ੍ਮਿਂ ਕਪ੍ਪੇ ਪਞ੍ਚ ਬੁਦ੍ਧਾ ਉਪ੍ਪਜ੍ਜਨ੍ਤਿ, ਸੋ ‘‘ਭਦ੍ਦਕਪ੍ਪੋ’’ਤਿ ਵੁਚ੍ਚਤਿ. ਸੋ ਪਨ ਅਤਿਦੁਲ੍ਲਭੋ. ਤਸ੍ਮਿਂ ਪਨ ਕਪ੍ਪੇ ਯੇਭੁਯ੍ਯੇਨ ਸਤ੍ਤਾ ਕਲ੍ਯਾਣਸੁਖਬਹੁਲਾ ਹੋਨ੍ਤਿ. ਯੇਭੁਯ੍ਯੇਨ ਤਿਹੇਤੁਕਾ ਕਿਲੇਸਕ੍ਖਯਂ ਕਰੋਨ੍ਤਿ, ਦੁਹੇਤੁਕਾ ਸੁਗਤਿਗਾਮਿਨੋ ਹੋਨ੍ਤਿ, ਅਹੇਤੁਕਾ ਹੇਤੁਂ ਪਟਿਲਭਨ੍ਤਿ. ਤਸ੍ਮਾ ਸੋ ਕਪ੍ਪੋ ‘‘ਭਦ੍ਦਕਪ੍ਪੋ’’ਤਿ ਵੁਚ੍ਚਤਿ. ਤੇਨ ਵੁਤ੍ਤਂ – ‘‘ਅਸੁਞ੍ਞਕਪ੍ਪੋ ਪਞ੍ਚਵਿਧੋ’’ਤਿਆਦਿ. ਵੁਤ੍ਤਞ੍ਹੇਤਂ ਪੋਰਾਣੇਹਿ –

‘‘ਏਕੋ ਬੁਦ੍ਧੋ ਸਾਰਕਪ੍ਪੇ, ਮਣ੍ਡਕਪ੍ਪੇ ਜਿਨਾ ਦੁਵੇ;

ਵਰਕਪ੍ਪੇ ਤਯੋ ਬੁਦ੍ਧਾ, ਸਾਰਮਣ੍ਡੇ ਚਤੁਰੋ ਬੁਦ੍ਧਾ;

ਪਞ੍ਚ ਬੁਦ੍ਧਾ ਭਦ੍ਦਕਪ੍ਪੇ, ਤਤੋ ਨਤ੍ਥਾਧਿਕਾ ਜਿਨਾ’’ਤਿ.

ਯਸ੍ਮਿਂ ਪਨ ਕਪ੍ਪੇ ਪਦੁਮੁਤ੍ਤਰਦਸਬਲੋ ਉਪ੍ਪਜ੍ਜਿ, ਸੋ ਸਾਰਕਪ੍ਪੋਪਿ ਸਮਾਨੋ ਗੁਣਸਮ੍ਪਤ੍ਤਿਯਾ ਮਣ੍ਡਕਪ੍ਪਸਦਿਸਤ੍ਤਾ ‘‘ਮਣ੍ਡਕਪ੍ਪੋ’’ਤਿ ਵੁਤ੍ਤੋ. ਓਪਮ੍ਮਤ੍ਥੇ ਵਾ-ਸਦ੍ਦੋ ਦਟ੍ਠਬ੍ਬੋ. ਉਸ੍ਸਨ੍ਨਕੁਸਲਾਤਿ ਉਪਚਿਤਪੁਞ੍ਞਾ. ਜਨਤਾਤਿ ਜਨਸਮੂਹੋ.

ਪਦੁਮੁਤ੍ਤਰੋ ਪਨ ਪਰਿਸੁਤ੍ਤਰੋ ਭਗਵਾ ਸਤ੍ਤਾਹਂ ਬੋਧਿਪਲ੍ਲਙ੍ਕੇ ਵੀਤਿਨਾਮੇਤ੍ਵਾ – ‘‘ਪਥਵਿਯਂ ਪਾਦਂ ਨਿਕ੍ਖਿਪਿਸ੍ਸਾਮੀ’’ਤਿ ਦਕ੍ਖਿਣਂ ਪਾਦਂ ਅਭਿਨੀਹਰਿ. ਅਥ ਪਥਵਿਂ ਭਿਨ੍ਦਿਤ੍ਵਾ ਵਿਮਲਕੋਮਲਕੇਸਰਕਣ੍ਣਿਕਾਨਿ ਜਲਜਾਮਲਾਵਿਕਲਵਿਪੁਲਪਲਾਸਾਨਿ ਥਲਜਾਨਿ ਜਲਜਾਨਿ ਉਟ੍ਠਹਿਂਸੁ. ਤੇਸਂ ਕਿਰ ਧੁਰਪਤ੍ਤਾਨਿ ਨਵੁਤਿਹਤ੍ਥਾਨਿ ਕੇਸਰਾਨਿ ਤਿਂਸਹਤ੍ਥਾਨਿ ਕਣ੍ਣਿਕਾ ਦ੍ਵਾਦਸਹਤ੍ਥਾ ਏਕੇਕਸ੍ਸ ਨਵਘਟਪ੍ਪਮਾਣਾ ਰੇਣਵੋ ਅਹੇਸੁਂ. ਸਤ੍ਥਾ ਪਨ ਉਬ੍ਬੇਧਤੋ ਅਟ੍ਠਪਣ੍ਣਾਸਹਤ੍ਥੋ ਅਹੋਸਿ. ਤਸ੍ਸ ਉਭਿਨ੍ਨਂ ਬਾਹਾਨਮਨ੍ਤਰਂ ਅਟ੍ਠਾਰਸਹਤ੍ਥਂ ਨਲਾਟਂ ਪਞ੍ਚਹਤ੍ਥਂ ਹਤ੍ਥਪਾਦਾ ਏਕਾਦਸਹਤ੍ਥਾ ਅਹੇਸੁਂ. ਤਸ੍ਸ ਏਕਾਦਸਹਤ੍ਥੇਨ ਪਾਦੇਨ ਦ੍ਵਾਦਸਹਤ੍ਥਾਯ ਕਣ੍ਣਿਕਾਯ ਅਕ੍ਕਨ੍ਤਮਤ੍ਤਾਯ ਨਵਘਟਪ੍ਪਮਾਣਾ ਰੇਣਵੋ ਉਟ੍ਠਹਿਤ੍ਵਾ ਅਟ੍ਠਪਣ੍ਣਾਸਹਤ੍ਥਂ ਸਰੀਰਪ੍ਪਦੇਸਂ ਉਗ੍ਗਨ੍ਤ੍ਵਾ ਮਨੋਸਿਲਾਚੁਣ੍ਣਵਿਚੁਣ੍ਣਿਤਂ ਵਿਯ ਕਤ੍ਵਾ ਪਚ੍ਚੋਤ੍ਥਰਨ੍ਤਿ. ਤਦੁਪਾਦਾਯ ਸਤ੍ਥਾ ਪਦੁਮੁਤ੍ਤਰੋਤ੍ਵੇਵ ਲੋਕੇ ਪਞ੍ਞਾਯਿਤ੍ਥਾਤਿ ਸਂਯੁਤ੍ਤਭਾਣਕਾ ਵਦਨ੍ਤਿ.

ਅਥ ਸਬ੍ਬਲੋਕੁਤ੍ਤਰੋ ਪਦੁਮੁਤ੍ਤਰੋ ਭਗਵਾ ਬ੍ਰਹ੍ਮਾਯਾਚਨਂ ਸਮ੍ਪਟਿਚ੍ਛਿਤ੍ਵਾ ਧਮ੍ਮਦੇਸਨਾਯ ਭਾਜਨਭੂਤੇ ਸਤ੍ਤੇ ਓਲੋਕੇਨ੍ਤੋ ਮਿਥਿਲਨਗਰੇ ਦੇਵਲਂ ਸੁਜਾਤਞ੍ਚਾਤਿ ਦ੍ਵੇ ਰਾਜਪੁਤ੍ਤੇ ਉਪਨਿਸ੍ਸਯਸਮ੍ਪਨ੍ਨੇ ਦਿਸ੍ਵਾ ਤਙ੍ਖਣਞ੍ਞੇਵ ਅਨਿਲਪਥੇਨ ਗਨ੍ਤ੍ਵਾ ਮਿਥਿਲੁਯ੍ਯਾਨੇ ਓਤਰਿਤ੍ਵਾ ਉਯ੍ਯਾਨਪਾਲੇਨ ਦ੍ਵੇਪਿ ਰਾਜਕੁਮਾਰੇ ਪਕ੍ਕੋਸਾਪੇਸਿ. ਤੇਪਿ ਚ ‘‘ਅਮ੍ਹਾਕਂ ਪਿਤੁਚ੍ਛਾਪੁਤ੍ਤੋ ਪਦੁਮੁਤ੍ਤਰਕੁਮਾਰੋ ਪਬ੍ਬਜਿਤ੍ਵਾ ਸਮ੍ਮਾਸਮ੍ਬੋਧਿਂ ਪਾਪੁਣਿਤ੍ਵਾ ਅਮ੍ਹਾਕਂ ਨਗਰਂ ਸਮ੍ਪਤ੍ਤੋ, ਹਨ੍ਦ ਨਂ ਮਯਂ ਦਸ੍ਸਨਾਯ ਉਪਸਙ੍ਕਮਿਸ੍ਸਾਮਾ’’ਤਿ ਸਪਰਿਵਾਰਾ ਪਦੁਮੁਤ੍ਤਰਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਤਦਾ ਦਸਬਲੋ ਤੇਹਿ ਪਰਿਵੁਤੋ ਤਾਰਾਗਣਪਰਿਵੁਤੋ ਪੁਣ੍ਣਚਨ੍ਦੋ ਵਿਯ ਵਿਰੋਚਮਾਨੋ ਤਤ੍ਥ ਧਮ੍ਮਚਕ੍ਕਂ ਪਵਤ੍ਤੇਸਿ, ਤਦਾ ਕੋਟਿਸਤਸਹਸ੍ਸਾਨਂ ਪਠਮੋ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੩. ‘‘ਪਦੁਮੁਤ੍ਤਰਸ੍ਸ ਭਗਵਤੋ, ਪਠਮੇ ਧਮ੍ਮਦੇਸਨੇ;

ਕੋਟਿਸਤਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੂ’’ਤਿ.

ਅਥਾਪਰੇਨ ਸਮਯੇਨ ਸਰਦਤਾਪਸਸਮਾਗਮੇ ਮਹਾਜਨਂ ਨਿਰਯਸਨ੍ਤਾਪੇਨ ਸਨ੍ਤਾਪੇਤ੍ਵਾ ਧਮ੍ਮਂ ਦੇਸੇਨ੍ਤੋ ਸਤ੍ਤਤਿਂਸਸਤਸਹਸ੍ਸਸਙ੍ਖੇ ਸਤ੍ਤਕਾਯੇ ਧਮ੍ਮਾਮਤਂ ਪਾਯੇਸਿ, ਸੋ ਦੁਤਿਯੋ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੪. ‘‘ਤਤੋ ਪਰਮ੍ਪਿ ਵਸ੍ਸਨ੍ਤੇ, ਤਪ੍ਪਯਨ੍ਤੇ ਚ ਪਾਣਿਨੋ;

ਸਤ੍ਤਤ੍ਤਿਂਸਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੂ’’ਤਿ.

ਯਦਾ ਪਨ ਆਨਨ੍ਦਮਹਾਰਾਜਾ ਵੀਸਤਿਯਾ ਪੁਰਿਸਸਹਸ੍ਸੇਹਿ ਵੀਸਤਿਯਾ ਅਮਚ੍ਚੇਹਿ ਚ ਸਦ੍ਧਿਂ ਪਦੁਮੁਤ੍ਤਰਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕੇ ਮਿਥਿਲਨਗਰੇ ਪਾਤੁਰਹੋਸਿ. ਪਦੁਮੁਤ੍ਤਰੋ ਚ ਭਗਵਾ ਤੇ ਸਬ੍ਬੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਾਜੇਤ੍ਵਾ ਤੇਹਿ ਪਰਿਵੁਤੋ ਗਨ੍ਤ੍ਵਾ ਪਿਤੁਸਙ੍ਗਹਂ ਕੁਰੁਮਾਨੋ ਹਂਸਵਤਿਯਾ ਰਾਜਧਾਨਿਯਾ ਵਸਤਿ. ਤਤ੍ਥ ਸੋ ਅਮ੍ਹਾਕਂ ਭਗਵਾ ਵਿਯ ਕਪਿਲਪੁਰੇ ਗਗਨਤਲੇ ਰਤਨਚਙ੍ਕਮੇ ਚਙ੍ਕਮਨ੍ਤੋ ਬੁਦ੍ਧਵਂਸਂ ਕਥੇਸਿ, ਤਦਾ ਪਞ੍ਞਾਸਸਤਸਹਸ੍ਸਾਨਂ ਤਤਿਯੋ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਯਮ੍ਹਿ ਕਾਲੇ ਮਹਾਵੀਰੋ, ਆਨਨ੍ਦਂ ਉਪਸਙ੍ਕਮਿ;

ਪਿਤੁਸਨ੍ਤਿਕਂ ਉਪਗਨ੍ਤ੍ਵਾ, ਆਹਨੀ ਅਮਤਦੁਨ੍ਦੁਭਿਂ.

੬. ‘‘ਆਹਤੇ ਅਮਤਭੇਰਿਮ੍ਹਿ, ਵਸ੍ਸਨ੍ਤੇ ਧਮ੍ਮਵੁਟ੍ਠਿਯਾ;

ਪਞ੍ਞਾਸਸਤਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਤਤ੍ਥ ਆਨਨ੍ਦਂ ਉਪਸਙ੍ਕਮੀਤਿ ਪਿਤਰਂ ਆਨਨ੍ਦਰਾਜਾਨਂ ਸਨ੍ਧਾਯ ਵੁਤ੍ਤਂ. ਆਹਨੀਤਿ ਅਭਿਹਨਿ. ਆਹਤੇਤਿ ਆਹਤਾਯ. ਅਮਤਭੇਰਿਮ੍ਹੀਤਿ ਅਮਤਭੇਰਿਯਾ, ਲਿਙ੍ਗਵਿਪਲ੍ਲਾਸੋ ਦਟ੍ਠਬ੍ਬੋ. ‘‘ਆਸੇਵਿਤੇ’’ਤਿਪਿ ਪਾਠੋ, ਤਸ੍ਸ ਆਸੇਵਿਤਾਯਾਤਿ ਅਤ੍ਥੋ. ਵਸ੍ਸਨ੍ਤੇ ਧਮ੍ਮਵੁਟ੍ਠਿਯਾਤਿ ਧਮ੍ਮਵਸ੍ਸਂ ਵਸ੍ਸਨ੍ਤੇਤਿ ਅਤ੍ਥੋ. ਇਦਾਨਿ ਅਭਿਸਮਯਕਰਣੂਪਾਯਂ ਦਸ੍ਸੇਨ੍ਤੋ –

੭. ‘‘ਓਵਾਦਕੋ ਵਿਞ੍ਞਾਪਕੋ, ਤਾਰਕੋ ਸਬ੍ਬਪਾਣਿਨਂ;

ਦੇਸਨਾਕੁਸਲੋ ਬੁਦ੍ਧੋ, ਤਾਰੇਸਿ ਜਨਤਂ ਬਹੁ’’ਨ੍ਤਿ. – ਆਹ;

ਤਤ੍ਥ ਓਵਾਦਕੋਤਿ ਸਰਣਸੀਲਧੁਤਙ੍ਗਸਮਾਦਾਨਗੁਣਾਨਿਸਂਸਵਣ੍ਣਨਾਯ ਓਵਦਤੀਤਿ ਓਵਾਦਕੋ. ਵਿਞ੍ਞਾਪਕੋਤਿ ਚਤੁਸਚ੍ਚਂ ਵਿਞ੍ਞਾਪੇਤੀਤਿ ਵਿਞ੍ਞਾਪਕੋ, ਬੋਧਕੋ. ਤਾਰਕੋਤਿ ਚਤੁਰੋਘਤਾਰਕੋ.

ਯਦਾ ਪਨ ਸਤ੍ਥਾ ਮਿਥਿਲਨਗਰੇ ਮਿਥਿਲੁਯ੍ਯਾਨੇ ਕੋਟਿਸਤਸਹਸ੍ਸਭਿਕ੍ਖੁਗਣਮਜ੍ਝੇ ਮਾਘਪੁਣ੍ਣਮਾਯ ਪੁਣ੍ਣਚਨ੍ਦਸਦਿਸਵਦਨੋ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੮. ‘‘ਸਨ੍ਨਿਪਾਤਾ ਤਯੋ ਆਸੁਂ, ਪਦੁਮੁਤ੍ਤਰਸ੍ਸ ਸਤ੍ਥੁਨੋ;

ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ’’ਤਿ.

ਯਦਾ ਪਨ ਭਗਵਾ ਵੇਭਾਰਪਬ੍ਬਤਕੂਟੇ ਵਸ੍ਸਾਵਾਸਂ ਵਸਿਤ੍ਵਾ ਪਬ੍ਬਤਸਨ੍ਦਸ੍ਸਨਤ੍ਥਂ ਆਗਤਸ੍ਸ ਮਹਾਜਨਸ੍ਸ ਧਮ੍ਮਂ ਦੇਸੇਤ੍ਵਾ ਨਵੁਤਿਕੋਟਿਸਹਸ੍ਸਾਨਿ ਏਹਿਭਿਕ੍ਖੁਭਾਵੇਨ ਪਬ੍ਬਾਜੇਤ੍ਵਾ ਤੇਹਿ ਪਰਿਵੁਤੋ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੯. ‘‘ਯਦਾ ਬੁਦ੍ਧੋ ਅਸਮਸਮੋ, ਵਸਿ ਵੇਭਾਰਪਬ੍ਬਤੇ;

ਨਵੁਤਿਕੋਟਿਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ’’ਤਿ.

ਪੁਨ ਭਗਵਤਿ ਗੁਣਵਤਿ ਤਿਲੋਕਨਾਥੇ ਮਹਾਜਨਸ੍ਸ ਬਨ੍ਧਨਮੋਕ੍ਖਂ ਕੁਰੁਮਾਨੇ ਜਨਪਦਚਾਰਿਕਂ ਚਰਮਾਨੇ ਅਸੀਤਿਕੋਟਿਸਹਸ੍ਸਾਨਂ ਭਿਕ੍ਖੂਨਂ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੧੦. ‘‘ਪੁਨ ਚਾਰਿਕਂ ਪਕ੍ਕਨ੍ਤੇ, ਗਾਮਨਿਗਮਰਟ੍ਠਤੋ;

ਅਸੀਤਿਕੋਟਿਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ’’ਤਿ.

ਤਤ੍ਥ ਗਾਮਨਿਗਮਰਟ੍ਠਤੋਤਿ ਗਾਮਨਿਗਮਰਟ੍ਠੇਹਿ. ਅਯਮੇਵ ਵਾ ਪਾਠੋ, ਤਸ੍ਸ ਗਾਮਨਿਗਮਰਟ੍ਠੇਹਿ ਨਿਕ੍ਖਮਿਤ੍ਵਾ ਪਬ੍ਬਜਿਤਾਨਨ੍ਤਿ ਅਤ੍ਥੋ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਅਨੇਕਧਨਕੋਟਿਕੋ ਜਟਿਲੋ ਨਾਮ ਮਹਾਰਟ੍ਠਿਕੋ ਹੁਤ੍ਵਾ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਸਚੀਵਰਂ ਵਰਦਾਨਮਦਾਸਿ. ਸੋਪਿ ਤਂ ਭਤ੍ਤਾਨੁਮੋਦਨਾਵਸਾਨੇ ‘‘ਅਨਾਗਤੇ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੧੧. ‘‘ਅਹਂ ਤੇਨ ਸਮਯੇਨ, ਜਟਿਲੋ ਨਾਮ ਰਟ੍ਠਿਕੋ;

ਸਮ੍ਬੁਦ੍ਧਪ੍ਪਮੁਖਂ ਸਙ੍ਘਂ, ਸਭਤ੍ਤਂ ਦੁਸ੍ਸਮਦਾਸਹਂ.

੧੨. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸਙ੍ਘਮਜ੍ਝੇ ਨਿਸੀਦਿਯ;

ਸਤਸਹਸ੍ਸੇ ਇਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੩. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੪. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਉਤ੍ਤਰਿਂ ਵਤਮਧਿਟ੍ਠਹਿਂ;

ਅਕਾਸਿਂ ਉਗ੍ਗਦਲ਼੍ਹਂ ਧਿਤਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਸਮ੍ਬੁਦ੍ਧਪ੍ਪਮੁਖਂ ਸਙ੍ਘਨ੍ਤਿ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ, ਸਾਮਿਅਤ੍ਥੇ ਉਪਯੋਗਵਚਨਂ. ਸਭਤ੍ਤਂ ਦੁਸ੍ਸਮਦਾਸਹਨ੍ਤਿ ਸਚੀਵਰਂ ਭਤ੍ਤਂ ਅਦਾਸਿਂ ਅਹਨ੍ਤਿ ਅਤ੍ਥੋ. ਉਗ੍ਗਦਲ਼ਹਨ੍ਤਿ ਅਤਿਦਲ਼੍ਹਂ. ਧਿਤਿਨ੍ਤਿ ਵੀਰਿਯਂ ਅਕਾਸਿਨ੍ਤਿ ਅਤ੍ਥੋ.

ਪਦੁਮੁਤ੍ਤਰਸ੍ਸ ਪਨ ਭਗਵਤੋ ਕਾਲੇ ਤਿਤ੍ਥਿਯਾ ਨਾਮ ਨਾਹੇਸੁਂ. ਸਬ੍ਬੇ ਦੇਵਮਨੁਸ੍ਸਾ ਬੁਦ੍ਧਮੇਵ ਸਰਣਮਗਮਂਸੁ. ਤੇਨ ਵੁਤ੍ਤਂ –

੧੫. ‘‘ਬ੍ਯਾਹਤਾ ਤਿਤ੍ਥਿਯਾ ਸਬ੍ਬੇ, ਵਿਮਨਾ ਦੁਮ੍ਮਨਾ ਤਦਾ;

ਨ ਤੇਸਂ ਕੇਚਿ ਪਰਿਚਰਨ੍ਤਿ, ਰਟ੍ਠਤੋ ਨਿਚ੍ਛੁਭਨ੍ਤਿ ਤੇ.

੧੬. ‘‘ਸਬ੍ਬੇ ਤਤ੍ਥ ਸਮਾਗਨ੍ਤ੍ਵਾ, ਉਪਗਞ੍ਛੁਂ ਬੁਦ੍ਧਸਨ੍ਤਿਕੇ;

ਤੁਵਂ ਨਾਥੋ ਮਹਾਵੀਰ, ਸਰਣਂ ਹੋਹਿ ਚਕ੍ਖੁਮ.

੧੭. ‘‘ਅਨੁਕਮ੍ਪਕੋ ਕਾਰੁਣਿਕੋ, ਹਿਤੇਸੀ ਸਬ੍ਬਪਾਣਿਨਂ;

ਸਮ੍ਪਤ੍ਤੇ ਤਿਤ੍ਥਿਯੇ ਸਬ੍ਬੇ, ਪਞ੍ਚਸੀਲੇ ਪਤਿਟ੍ਠਹਿ.

੧੮. ‘‘ਏਵਂ ਨਿਰਾਕੁਲਂ ਆਸਿ, ਸੁਞ੍ਞਕਂ ਤਿਤ੍ਥਿਯੇਹਿ ਤਂ;

ਵਿਚਿਤ੍ਤਂ ਅਰਹਨ੍ਤੇਹਿ, ਵਸੀਭੂਤੇਹਿ ਤਾਦਿਹੀ’’ਤਿ.

ਤਤ੍ਥ ਬ੍ਯਾਹਤਾਤਿ ਵਿਹਤਮਾਨਦਪ੍ਪਾ. ਤਿਤ੍ਥਿਯਾਤਿ ਏਤ੍ਥ ਤਿਤ੍ਥਂ ਵੇਦਿਤਬ੍ਬਂ, ਤਿਤ੍ਥਕਰੋ ਵੇਦਿਤਬ੍ਬੋ, ਤਿਤ੍ਥਿਯਾ ਵੇਦਿਤਬ੍ਬਾ. ਤਤ੍ਥ ਸਸ੍ਸਤਾਦਿਦਿਟ੍ਠਿਵਸੇਨ ਤਰਨ੍ਤਿ ਏਤ੍ਥਾਤਿ ਤਿਤ੍ਥਂ, ਲਦ੍ਧਿ. ਤਸ੍ਸਾ ਲਦ੍ਧਿਯਾ ਉਪ੍ਪਾਦਕੋ ਤਿਤ੍ਥਕਰੋ, ਤਿਤ੍ਥੇ ਭਵਾ ਤਿਤ੍ਥਿਯਾਤਿ. ਪਦੁਮੁਤ੍ਤਰਸ੍ਸ ਕਿਰ ਭਗਵਤੋ ਕਾਲੇ ਤਿਤ੍ਥਿਯਾ ਨਾਹੇਸੁਂ. ਯੇ ਪਨ ਸਨ੍ਤਿ, ਤੇਪਿ ਈਦਿਸਾ ਅਹੇਸੁਨ੍ਤਿ ਦਸ੍ਸਨਤ੍ਥਂ ‘‘ਬ੍ਯਾਹਤਾ ਤਿਤ੍ਥਿਯਾ’’ਤਿਆਦਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਵਿਮਨਾਤਿ ਵਿਰੂਪਮਾਨਸਾ. ਦੁਮ੍ਮਨਾਤਿ ਤਸ੍ਸੇਵ ਵੇਵਚਨਂ. ਨ ਤੇਸਂ ਕੇਚਿ ਪਰਿਚਰਨ੍ਤੀਤਿ ਤੇਸਂ ਅਞ੍ਞਤਿਤ੍ਥਿਯਾਨਂ ਕੇਚਿਪਿ ਪੁਰਿਸਾ ਪਰਿਕਮ੍ਮਂ ਨ ਕਰੋਨ੍ਤਿ, ਨ ਭਿਕ੍ਖਂ ਦੇਨ੍ਤਿ, ਨ ਸਕ੍ਕਰੋਨ੍ਤਿ, ਨ ਗਰੁਂ ਕਰੋਨ੍ਤਿ, ਨ ਮਾਨੇਨ੍ਤਿ, ਨ ਪੂਜੇਨ੍ਤਿ, ਨ ਆਸਨਾ ਵੁਟ੍ਠਹਨ੍ਤਿ, ਨ ਅਞ੍ਜਲਿਕਮ੍ਮਂ ਕਰੋਨ੍ਤੀਤਿ ਅਤ੍ਥੋ. ਰਟ੍ਠਤੋਤਿ ਸਕਲਰਟ੍ਠਤੋਪਿ. ਨਿਚ੍ਛੁਭਨ੍ਤੀਤਿ ਨੀਹਰਨ੍ਤਿ, ਉਸ੍ਸਾਦੇਨ੍ਤਿ ਤੇਸਂ ਨਿਵਾਸਂ ਨ ਦੇਨ੍ਤੀਤਿ ਅਤ੍ਥੋ. ਤੇਤਿ ਤਿਤ੍ਥਿਯਾ.

ਉਪਗਞ੍ਛੁਂ ਬੁਦ੍ਧਸਨ੍ਤਿਕੇਤਿ ਏਵਂ ਤੇਹਿ ਰਟ੍ਠਵਾਸੀਹਿ ਮਨੁਸ੍ਸੇਹਿ ਉਸ੍ਸਾਦਿਯਮਾਨਾ ਸਬ੍ਬੇਪਿ ਅਞ੍ਞਤਿਤ੍ਥਿਯਾ ਸਮਾਗਨ੍ਤ੍ਵਾ ਪਦੁਮੁਤ੍ਤਰਦਸਬਲਮੇਵ ਸਰਣਮਗਮਂਸੁ. ‘‘ਤ੍ਵਂ ਅਮ੍ਹਾਕਂ ਸਤ੍ਥਾ ਨਾਥੋ ਗਤਿ ਪਰਾਯਨਂ ਸਰਣ’’ਨ੍ਤਿ ਏਵਂ ਵਤ੍ਵਾ ਸਰਣਮਗਮਂਸੂਤਿ ਅਤ੍ਥੋ. ਅਨੁਕਮ੍ਪਤੀਤਿ ਅਨੁਕਮ੍ਪਕੋ. ਕਰੁਣਾਯ ਚਰਤੀਤਿ ਕਾਰੁਣਿਕੋ. ਸਮ੍ਪਤ੍ਤੇਤਿ ਸਮਾਗਤੇ ਸਰਣਮੁਪਗਤੇ ਤਿਤ੍ਥਿਯੇ. ਪਞ੍ਚਸੀਲੇ ਪਤਿਟ੍ਠਹੀਤਿ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਸੀਤਿ ਅਤ੍ਥੋ. ਨਿਰਾਕੁਲਨ੍ਤਿ ਅਨਾਕੁਲਂ, ਅਞ੍ਞੇਹਿ ਲਦ੍ਧਿਕੇਹਿ ਅਸਮ੍ਮਿਸ੍ਸਨ੍ਤਿ ਅਤ੍ਥੋ. ਸੁਞ੍ਞਕਨ੍ਤਿ ਸੁਞ੍ਞਂ ਰਿਤ੍ਤਂ ਤੇਹਿ ਤਿਤ੍ਥਿਯੇਹਿ. ਤਨ੍ਤਿ ਤਂ ਭਗਵਤੋ ਸਾਸਨਨ੍ਤਿ ਵਚਨਸੇਸੋ ਦਟ੍ਠਬ੍ਬੋ. ਵਿਚਿਤ੍ਤਨ੍ਤਿ ਵਿਚਿਤ੍ਤਵਿਚਿਤ੍ਤਂ. ਵਸੀਭੂਤੇਹੀਤਿ ਵਸੀਭਾਵਪ੍ਪਤ੍ਤੇਹਿ.

ਤਸ੍ਸ ਪਨ ਪਦੁਮੁਤ੍ਤਰਸ੍ਸ ਭਗਵਤੋ ਹਂਸਵਤੀ ਨਾਮ ਨਗਰਂ ਅਹੋਸਿ. ਪਿਤਾ ਪਨਸ੍ਸ ਆਨਨ੍ਦੋ ਨਾਮ ਖਤ੍ਤਿਯੋ, ਮਾਤਾ ਸੁਜਾਤਾ ਨਾਮ ਦੇਵੀ, ਦੇਵਲੋ ਚ ਸੁਜਾਤੋ ਚ ਦ੍ਵੇ ਅਗ੍ਗਸਾਵਕਾ, ਸੁਮਨੋ ਨਾਮੁਪਟ੍ਠਾਕੋ, ਅਮਿਤਾ ਚ ਅਸਮਾ ਚ ਦ੍ਵੇ ਅਗ੍ਗਸਾਵਿਕਾ, ਸਲਲਰੁਕ੍ਖੋ ਬੋਧਿ, ਸਰੀਰਂ ਅਟ੍ਠਪਣ੍ਣਾਸਹਤ੍ਥੁਬ੍ਬੇਧਂ ਅਹੋਸਿ, ਸਰੀਰਪ੍ਪਭਾ ਚਸ੍ਸ ਸਮਨ੍ਤਾ ਦ੍ਵਾਦਸ ਯੋਜਨਾਨਿ ਗਣ੍ਹਿ, ਵਸ੍ਸਸਤਸਹਸ੍ਸਂ ਆਯੁ ਅਹੋਸਿ, ਵਸੁਦਤ੍ਤਾ ਨਾਮ ਅਗ੍ਗਮਹੇਸੀ, ਉਤ੍ਤਰੋ ਨਾਮ ਪੁਤ੍ਤੋ ਅਹੋਸਿ. ਪਦੁਮੁਤ੍ਤਰੋ ਪਨ ਭਗਵਾ ਪਰਮਾਭਿਰਾਮੇ ਨਨ੍ਦਾਰਾਮੇ ਕਿਰ ਪਰਿਨਿਬ੍ਬੁਤੋ. ਧਾਤੁਯੋ ਪਨਸ੍ਸ ਨ ਵਿਕਿਰਿਂਸੁ. ਸਕਲਜਮ੍ਬੁਦੀਪਵਾਸਿਨੋ ਮਨੁਸ੍ਸਾ ਸਮਾਗਮ੍ਮ ਦ੍ਵਾਦਸਯੋਜਨੁਬ੍ਬੇਧਂ ਸਤ੍ਤਰਤਨਮਯਂ ਚੇਤਿਯਮਕਂਸੁ. ਤੇਨ ਵੁਤ੍ਤਂ –

੧੯. ‘‘ਨਗਰਂ ਹਂਸਵਤੀ ਨਾਮ, ਆਨਨ੍ਦੋ ਨਾਮ ਖਤ੍ਤਿਯੋ;

ਸੁਜਾਤਾ ਨਾਮ ਜਨਿਕਾ, ਪਦੁਮੁਤ੍ਤਰਸ੍ਸ ਸਤ੍ਥੁਨੋ.

੨੪. ‘‘ਦੇਵਲੋ ਚ ਸੁਜਾਤੋ ਚ, ਅਹੇਸੁਂ ਅਗ੍ਗਸਾਵਕਾ;

ਸੁਮਨੋ ਨਾਮੁਪਟ੍ਠਾਕੋ, ਪਦੁਮੁਤ੍ਤਰਸ੍ਸ ਮਹੇਸਿਨੋ.

੨੫. ‘‘ਅਮਿਤਾ ਚ ਅਸਮਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਸਲਲੋਤਿ ਪਵੁਚ੍ਚਤਿ.

੨੭. ‘‘ਅਟ੍ਠਪਣ੍ਣਾਸਰਤਨਂ, ਅਚ੍ਚੁਗ੍ਗਤੋ ਮਹਾਮੁਨਿ;

ਕਞ੍ਚਨਗ੍ਘਿਯਸਙ੍ਕਾਸੋ, ਦ੍ਵਤ੍ਤਿਂਸਵਰਲਕ੍ਖਣੋ.

੨੮. ‘‘ਕੁਟ੍ਟਾ ਕਵਾਟਾ ਭਿਤ੍ਤੀ ਚ, ਰੁਕ੍ਖਾ ਨਗਸਿਲੁਚ੍ਚਯਾ;

ਨ ਤਸ੍ਸਾਵਰਣਂ ਅਤ੍ਥਿ, ਸਮਨ੍ਤਾ ਦ੍ਵਾਦਸਯੋਜਨੇ.

੨੯. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੦. ‘‘ਸਨ੍ਤਾਰੇਤ੍ਵਾ ਬਹੁਜਨਂ, ਛਿਨ੍ਦਿਤ੍ਵਾ ਸਬ੍ਬਸਂਸਯਂ;

ਜਲਿਤ੍ਵਾ ਅਗ੍ਗਿਕ੍ਖਨ੍ਧੋਵ, ਨਿਬ੍ਬੁਤੋ ਸੋ ਸਸਾਵਕੋ’’ਤਿ.

ਤਤ੍ਥ ਨਗਸਿਲੁਚ੍ਚਯਾਤਿ ਨਗਸਙ੍ਖਾਤਾ ਸਿਲੁਚ੍ਚਯਾ. ਆਵਰਣਨ੍ਤਿ ਪਟਿਚ੍ਛਾਦਨਂ ਤਿਰੋਕਰਣਂ. ਦ੍ਵਾਦਸਯੋਜਨੇਤਿ ਸਮਨ੍ਤਤੋ ਦ੍ਵਾਦਸਯੋਜਨੇ ਠਾਨੇ ਭਗਵਤੋ ਸਰੀਰਪ੍ਪਭਾ ਫਰਿਤ੍ਵਾ ਰਤ੍ਤਿਨ੍ਦਿਵਂ ਤਿਟ੍ਠਤੀਤਿ ਅਤ੍ਥੋ. ਸੇਸਗਾਥਾਸੁ ਸਬ੍ਬਤ੍ਥ ਪਾਕਟਮੇਵਾਤਿ.

ਇਤੋ ਪਟ੍ਠਾਯ ਪਾਰਮਿਪੂਰਣਾਦਿਪੁਨਪ੍ਪੁਨਾਗਤਮਤ੍ਥਂ ਸਙ੍ਖਿਪਿਤ੍ਵਾ ਵਿਸੇਸਤ੍ਥਮੇਵ ਵਤ੍ਵਾ ਗਮਿਸ੍ਸਾਮ. ਯਦਿ ਪਨ ਵੁਤ੍ਤਮੇਵ ਪੁਨਪ੍ਪੁਨਂ ਵਕ੍ਖਾਮ, ਕਦਾ ਅਨ੍ਤਂ ਗਮਿਸ੍ਸਤਿ ਅਯਂ ਸਂਵਣ੍ਣਨਾਤਿ.

ਪਦੁਮੁਤ੍ਤਰਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਦਸਮੋ ਬੁਦ੍ਧਵਂਸੋ.