੮. ਸੋਭਿਤਬੁਦ੍ਧਵਂਸਵਣ੍ਣਨਾ

ਤਸ੍ਸ ਪਨ ਅਪਰਭਾਗੇ ਤਸ੍ਸ ਸਾਸਨੇਪਿ ਅਨ੍ਤਰਹਿਤੇ ਸੋਭਿਤੋ ਨਾਮ ਬੋਧਿਸਤ੍ਤੋ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਦੇਵੇਹਿ ਆਯਾਚਿਤੋ ਤੁਸਿਤਪੁਰਤੋ ਚਵਿਤ੍ਵਾ ਸੁਧਮ੍ਮਨਗਰੇ ਸੁਧਮ੍ਮਰਾਜਸ੍ਸ ਕੁਲੇ ਸੁਧਮ੍ਮਾਯ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਸੋ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਸੁਧਮ੍ਮੁਯ੍ਯਾਨੇ ਮਾਤੁਕੁਚ੍ਛਿਤੋ ਪਰਿਸੁਦ੍ਧਵਿਰਾਜਿਤਘਨਮੇਘਪਟਲਤੋ ਪੁਣ੍ਣਚਨ੍ਦੋ ਵਿਯ ਨਿਕ੍ਖਮਿ. ਤਸ੍ਸ ਪਟਿਸਨ੍ਧਿਯਂ ਜਾਤਿਯਞ੍ਚ ਪਾਟਿਹਾਰਿਯਾਨਿ ਪੁਬ੍ਬੇ ਵੁਤ੍ਤਪ੍ਪਕਾਰਾਨਿ.

ਸੋ ਦਸਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿਤ੍ਵਾ ਸਤ੍ਤਤ੍ਤਿਂਸਨਾਟਕਿਤ੍ਥਿਸਹਸ੍ਸਾਨਂ ਅਗ੍ਗਾਯ ਅਗ੍ਗਮਹੇਸਿਯਾ ਮਖਿਲਦੇਵਿਯਾ ਕੁਚ੍ਛਿਸ੍ਮਿਂ ਸੀਹਕੁਮਾਰੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸਞ੍ਜਾਤਸਂਵੇਗੋ ਪਾਸਾਦੇਯੇਵ ਪਬ੍ਬਜਿਤ੍ਵਾ ਤਤ੍ਥੇਵ ਆਨਾਪਾਨਸ੍ਸਤਿਸਮਾਧਿਂ ਭਾਵੇਤ੍ਵਾ ਚਤ੍ਤਾਰਿ ਝਾਨਾਨਿ ਪਟਿਲਭਿਤ੍ਵਾ ਸਤ੍ਤਾਹਂ ਤਤ੍ਥੇਵ ਪਧਾਨਚਰਿਯਮਚਰਿ. ਤਤੋ ਮਖਿਲਮਹਾਦੇਵਿਯਾ ਦਿਨ੍ਨਂ ਪਰਮਮਧੁਰਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਅਭਿਨਿਕ੍ਖਮਨਤ੍ਥਾਯ ਚਿਤ੍ਤਮੁਪ੍ਪਾਦੇਸਿ – ‘‘ਅਯਂ ਪਾਸਾਦੋ ਅਲਙ੍ਕਤਪਟਿਯਤ੍ਤੋ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਆਕਾਸੇਨ ਗਨ੍ਤ੍ਵਾ ਬੋਧਿਰੁਕ੍ਖਂ ਮਜ੍ਝੇਕਤ੍ਵਾ ਪਥਵਿਯਂ ਓਤਰਤੁ, ਇਮਾ ਚ ਇਤ੍ਥਿਯੋ ਮਯਿ ਬੋਧਿਮੂਲੇ ਨਿਸਿਨ੍ਨੇ ਅਵੁਤ੍ਤਾ ਸਯਮੇਵ ਪਾਸਾਦਤੋ ਨਿਕ੍ਖਮਨ੍ਤੂ’’ਤਿ. ਸਹਚਿਤ੍ਤੁਪ੍ਪਾਦਾ ਪਾਸਾਦੋ ਚ ਸੁਧਮ੍ਮਰਾਜਭਵਨਤੋ ਉਪ੍ਪਤਿਤ੍ਵਾ ਅਸਿਤਞ੍ਜਨਸਙ੍ਕਾਸਮਾਕਾਸਮਬ੍ਭੁਗ੍ਗਞ੍ਛਿ. ਸੋ ਸਮੋਸਰਿਤਸੁਰਭਿਕੁਸੁਮਦਾਮਸਮਲਙ੍ਕਤਪਾਸਾਦਤਲੋ ਸਕਲਮ੍ਪਿ ਗਗਨਤਲਂ ਸਮਲਙ੍ਕੁਰੁਮਾਨੋ ਵਿਯ ਕਨਕਰਸਧਾਰਾਸਦਿਸਰੁਚਿਰਕਰਨਿਕਰੋ ਦਿਵਸਕਰੋ ਵਿਯ ਚ ਸਰਦਸਮਯਰਜਨਿਕਰੋ ਵਿਯ ਚ ਵਿਰੋਚਮਾਨੋ ਵਿਲਮ੍ਬਮਾਨਵਿਵਿਧਵਿਚਿਤ੍ਤਕਿਙ੍ਕਿਣਿਕਜਾਲੋ ਯਸ੍ਸ ਕਿਰ ਵਾਤੇਰਿਤਸ੍ਸ ਸੁਕੁਸਲਜਨਵਾਦਿਤਸ੍ਸ ਪਞ੍ਚਙ੍ਗਿਕਸ੍ਸ ਤੁਰਿਯਸ੍ਸ ਵਿਯ ਸਦ੍ਦੋ ਵਗ੍ਗੁ ਚ ਰਜਨੀਯੋ ਚ ਕਮਨੀਯੋ ਚ ਅਹੋਸਿ.

ਦੂਰਤੋ ਪਟ੍ਠਾਯ ਸੁਯ੍ਯਮਾਨੇਨ ਮਧੁਰੇਨ ਸਰੇਨ ਸਤ੍ਤਾਨਂ ਸੋਤਾਨਿ ਓਦਹਮਾਨੋ ਘਰਚਚ੍ਚਰਚਤੁਕ੍ਕਵੀਥਿਆਦੀਸੁ ਠਤ੍ਵਾ ਪਵਤ੍ਤਿਤਕਥਾਸਲ੍ਲਾਪੇਸੁ ਮਨੁਸ੍ਸੇਸੁ ਨਾਤਿਨੀਚੇਨ ਨਾਤਿਉਚ੍ਚੇਨ ਤਰੁਵਰਵਨਮਤ੍ਥਕਾਵਿਦੂਰੇਨਾਕਾਸੇਨ ਪਲੋਭਯਮਾਨੋ ਵਿਯ ਤਰੁਵਰਸਾਖਾਨਾਨਾਰਤਨਜੁਤਿਵਿਸਰਸਮੁਜ੍ਜਲੇਨ ਵਣ੍ਣੇਨ ਜਨਨਯਨਾਨਿ ਆਕਡ੍ਢੇਨ੍ਤੋ ਵਿਯ ਚ ਪੁਞ੍ਞਾਨੁਭਾਵਂ ਸਮੁਗ੍ਘੋਸਯਨ੍ਤੋ ਵਿਯ ਚ ਗਗਨਤਲਂ ਪਟਿਪਜ੍ਜਿ. ਤਤ੍ਥ ਨਾਟਕਿਤ੍ਥਿਯੋਪਿ ਪਞ੍ਚਙ੍ਗਿਕਸ੍ਸ ਵਰਤੁਰਿਯਸ੍ਸ ਮਧੁਰੇਨ ਸਰੇਨ ਉਪਗਾਯਿਂਸੁ ਚੇਵ ਵਿਲਪਿਂਸੁ ਚ. ਚਤੁਰਙ੍ਗਿਨੀ ਕਿਰਸ੍ਸ ਸੇਨਾਪਿ ਅਲਙ੍ਕਾਰ-ਕਾਯਾਭਰਣ-ਜੁਤਿ-ਸਮੁਦਯ-ਸਮੁਜ੍ਜੋਤਨਾਨਾਵਿਰਾਗ-ਸੁਰਭਿਕੁਸੁਮਵਸਨਾਭਰਣਸੋਭਿਤਾ ਅਮਰਵਰਸੇਨਾ ਵਿਯ ਪਰਮਰੁਚਿਰਦਸ੍ਸਨਾ ਧਰਣੀ ਵਿਯ ਗਗਨਤਲੇਨ ਪਾਸਾਦਂ ਪਰਿਵਾਰੇਤ੍ਵਾ ਅਗਮਾਸਿ.

ਤਤੋ ਪਾਸਾਦੋ ਗਨ੍ਤ੍ਵਾ ਅਟ੍ਠਾਸੀਤਿਹਤ੍ਥੁਬ੍ਬੇਧਂ ਉਜੁਵਿਪੁਲਵਟ੍ਟਕ੍ਖਨ੍ਧਂ ਕੁਸੁਮਪਲ੍ਲਵਮਕੁਲਸਮਲਙ੍ਕਤਂ ਨਾਗਰੁਕ੍ਖਂ ਮਜ੍ਝੇਕਤ੍ਵਾ ਓਤਰਿਤ੍ਵਾ ਭੂਮਿਯਂ ਪਤਿਟ੍ਠਹਿ. ਨਾਟਕਿਤ੍ਥਿਯੋ ਚ ਕੇਨਚਿ ਅਵੁਤ੍ਤਾਵ ਤਤੋ ਪਾਸਾਦਤੋ ਓਤਰਿਤ੍ਵਾ ਪਕ੍ਕਮਿਂਸੁ. ਅਨੇਕਗੁਣਸੋਭਿਤੋ ਕਿਰ ਸੋਭਿਤੋਪਿ ਮਹਾਪੁਰਿਸੋ ਮਹਾਜਨਕਤਪਰਿਵਾਰੋਯੇਵ ਰਤ੍ਤਿਯਾ ਤੀਸੁ ਯਾਮੇਸੁ ਤਿਸ੍ਸੋ ਵਿਜ੍ਜਾਯੋ ਉਪ੍ਪਾਦੇਸਿ. ਮਾਰਬਲਂ ਪਨਸ੍ਸ ਧਮ੍ਮਤਾਬਲੇਨੇਵ ਯਥਾਗਤਮਗਮਾਸਿ. ਪਾਸਾਦੋ ਪਨ ਤਤ੍ਥੇਵ ਅਟ੍ਠਾਸਿ. ਸੋਭਿਤੋ ਪਨ ਭਗਵਤਾ ਸਮ੍ਬੋਧਿਂ ਪਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਬੋਧਿਸਮੀਪੇਯੇਵ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਬ੍ਰਹ੍ਮੁਨੋ ਧਮ੍ਮਜ੍ਝੇਸਨਂ ਪਟਿਜਾਨਿਤ੍ਵਾ – ‘‘ਕਸ੍ਸ ਨੁ ਖੋ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ ਬੁਦ੍ਧਚਕ੍ਖੁਨਾ ਓਲੋਕੇਨ੍ਤੋ ਅਤ੍ਤਨੋ ਵੇਮਾਤਿਕੇ ਕਨਿਟ੍ਠਭਾਤਿਕੇ ਅਸਮਕੁਮਾਰਞ੍ਚ ਸੁਨੇਤ੍ਤਕੁਮਾਰਞ੍ਚ ਦਿਸ੍ਵਾ – ‘‘ਇਮੇ ਦ੍ਵੇ ਕੁਮਾਰਾ ਉਪਨਿਸ੍ਸਯਸਮ੍ਪਨ੍ਨਾ ਗਮ੍ਭੀਰਂ ਨਿਪੁਣਂ ਧਮ੍ਮਂ ਪਟਿਵਿਜ੍ਝਿਤੁਂ ਸਮਤ੍ਥਾ, ਹਨ੍ਦਾਹਂ ਇਮੇਸਂ ਧਮ੍ਮਂ ਦੇਸੇਯ੍ਯ’’ਨ੍ਤਿ ਆਕਾਸੇਨਾਗਨ੍ਤ੍ਵਾ ਸੁਧਮ੍ਮੁਯ੍ਯਾਨੇ ਓਤਰਿਤ੍ਵਾ ਦ੍ਵੇਪਿ ਕੁਮਾਰੇ ਉਯ੍ਯਾਨਪਾਲੇਨ ਪਕ੍ਕੋਸਾਪੇਤ੍ਵਾ ਤੇਹਿ ਸਪਰਿਵਾਰੇਹਿ ਪਰਿਵੁਤੋ ਮਹਾਜਨਮਜ੍ਝੇ ਧਮ੍ਮਚਕ੍ਕਂ ਪਵਤ੍ਤੇਸਿ. ਤੇਨ ਵੁਤ੍ਤਂ –

੧. ‘‘ਰੇਵਤਸ੍ਸ ਅਪਰੇਨ, ਸੋਭਿਤੋ ਨਾਮ ਨਾਯਕੋ;

ਸਮਾਹਿਤੋ ਸਨ੍ਤਚਿਤ੍ਤੋ, ਅਸਮੋ ਅਪ੍ਪਟਿਪੁਗ੍ਗਲੋ.

੨. ‘‘ਸੋ ਜਿਨੋ ਸਕਗੇਹਮ੍ਹਿ, ਮਾਨਸਂ ਵਿਨਿਵਤ੍ਤਯਿ;

ਪਤ੍ਵਾਨ ਕੇਵਲਂ ਬੋਧਿਂ, ਧਮ੍ਮਚਕ੍ਕਂ ਪਵਤ੍ਤਯਿ.

੩. ‘‘ਯਾਵ ਹੇਟ੍ਠਾ ਅਵੀਚਿਤੋ, ਭਵਗ੍ਗਾ ਚਾਪਿ ਉਦ੍ਧਤੋ;

ਏਤ੍ਥਨ੍ਤਰੇ ਏਕਪਰਿਸਾ, ਅਹੋਸਿ ਧਮ੍ਮਦੇਸਨੇ.

੪. ‘‘ਤਾਯ ਪਰਿਸਾਯ ਸਮ੍ਬੁਦ੍ਧੋ, ਧਮ੍ਮਚਕ੍ਕਂ ਪਵਤ੍ਤਯਿ;

ਗਣਨਾਯ ਨ ਵਤ੍ਤਬ੍ਬੋ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਸਕਗੇਹਮ੍ਹੀਤਿ ਅਤ੍ਤਨੋ ਭਵਨੇਯੇਵ, ਅਨ੍ਤੋਪਾਸਾਦਤਲੇਯੇਵਾਤਿ ਅਤ੍ਥੋ. ਮਾਨਸਂ ਵਿਨਿਵਤ੍ਤਯੀਤਿ ਚਿਤ੍ਤਂ ਪਰਿਵਤ੍ਤੇਸਿ, ਸਕਗੇਹੇ ਠਤ੍ਵਾ ਸਤ੍ਤਦਿਵਸਬ੍ਭਨ੍ਤਰੇਯੇਵ ਪੁਥੁਜ੍ਜਨਭਾਵਤੋ ਚਿਤ੍ਤਂ ਵਿਨਿਵਤ੍ਤੇਤ੍ਵਾ ਬੁਦ੍ਧਤ੍ਤਂ ਪਾਪੁਣੀਤਿ ਅਤ੍ਥੋ. ਹੇਟ੍ਠਾਤਿ ਹੇਟ੍ਠਤੋ. ਭਵਗ੍ਗਾਤਿ ਅਕਨਿਟ੍ਠਭਵਨਤੋ. ਤਾਯ ਪਰਿਸਾਯਾਤਿ ਤਸ੍ਸਾ ਪਰਿਸਾਯ ਮਜ੍ਝੇ. ਗਣਨਾਯ ਨ ਵਤ੍ਤਬ੍ਬੋਤਿ ਗਣਨਪਥਮਤੀਤਾਤਿ ਅਤ੍ਥੋ. ਪਠਮਾਭਿਸਮਯੋਤਿ ਪਠਮੋ ਧਮ੍ਮਾਭਿਸਮਯੋ. ਅਹੂਤਿ ਗਣਨਾਯ ਨ ਵਤ੍ਤਬ੍ਬਾ ਪਰਿਸਾ ਅਹੋਸੀਤਿ ਅਤ੍ਥੋ. ‘‘ਪਠਮੇ ਅਭਿਸਮਿਂਸੁਯੇਵਾ’’ਤਿਪਿ ਪਾਠੋ, ਤਸ੍ਸ ਪਠਮਧਮ੍ਮਦੇਸਨੇ ਅਭਿਸਮਿਂਸੁ ਯੇ ਜਨਾ, ਤੇ ਗਣਨਾਯ ਨ ਵਤ੍ਤਬ੍ਬਾਤਿ ਅਤ੍ਥੋ.

ਅਥਾਪਰੇਨ ਸਮਯੇਨ ਸੁਦਸ੍ਸਨਨਗਰਦ੍ਵਾਰੇ ਚਿਤ੍ਤਪਾਟਲਿਯਾ ਮੂਲੇ ਯਮਕਪਾਟਿਹਾਰਿਯਂ ਕਤ੍ਵਾ ਨਵਕਨਕਮਣਿਮਯਭਵਨੇ ਤਾਵਤਿਂਸਭਵਨੇ ਪਾਰਿਚ੍ਛਤ੍ਤਕਮੂਲੇ ਪਣ੍ਡੁਕਮ੍ਬਲਸਿਲਾਤਲੇ ਨਿਸੀਦਿਤ੍ਵਾ ਅਭਿਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਨਵੁਤਿਕੋਟਿਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਅਯਂ ਦੁਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਤਤੋ ਪਰਮ੍ਪਿ ਦੇਸੇਨ੍ਤੇ, ਮਰੂਨਞ੍ਚ ਸਮਾਗਮੇ;

ਨਵੁਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੂ’’ਤਿ.

ਅਥਾਪਰੇਨ ਸਮਯੇਨ ਸੁਦਸ੍ਸਨਨਗਰੇ ਜਯਸੇਨੋ ਨਾਮ ਰਾਜਕੁਮਾਰੋ ਯੋਜਨਪ੍ਪਮਾਣਂ ਵਿਹਾਰਂ ਕਾਰੇਤ੍ਵਾ ਅਸੋਕਸ੍ਸਕਣ੍ਣਚਮ੍ਪਕਨਾਗਪੁਨ੍ਨਾਗਵਕੁਲਸੁਰਭਿਚੂਤਪਨਸਾਸਨਸਾਲਕੁਨ੍ਦ- ਸਹਕਾਰਕਰਵੀਰਾਦਿਤਰੁਵਰਨਿਰਨ੍ਤਰਂ ਆਰਾਮਂ ਰੋਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਤੇਸਿ. ਦਾਨਾਨੁਮੋਦਨਂ ਕਤ੍ਵਾ ਯਾਗਂ ਵਣ੍ਣੇਤ੍ਵਾ ਭਗਵਾ ਧਮ੍ਮਂ ਦੇਸੇਸਿ. ਤਦਾ ਕੋਟਿਸਤਸਹਸ੍ਸਸਤ੍ਤਨਿਕਾਯਸ੍ਸ ਧਮ੍ਮਾਭਿਸਮਯੋ ਅਹੋਸਿ. ਅਯਂ ਤਤਿਯਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੬. ‘‘ਪੁਨਾਪਰਂ ਰਾਜਪੁਤ੍ਤੋ, ਜਯਸੇਨੋ ਨਾਮ ਖਤ੍ਤਿਯੋ;

ਆਰਾਮਂ ਰੋਪਯਿਤ੍ਵਾਨ, ਬੁਦ੍ਧੇ ਨਿਯ੍ਯਾਤਯੀ ਤਦਾ.

੭. ‘‘ਤਸ੍ਸ ਯਾਗਂ ਪਕਿਤ੍ਤੇਨ੍ਤੋ, ਧਮ੍ਮਂ ਦੇਸੇਸਿ ਚਕ੍ਖੁਮਾ;

ਤਦਾ ਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਪੁਨ ਉਗ੍ਗਤੋ ਨਾਮ ਰਾਜਾ ਸੁਨਨ੍ਦਨਗਰੇ ਸੁਨਨ੍ਦਂ ਨਾਮ ਵਿਹਾਰਂ ਕਾਰੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਅਦਾਸਿ. ਤਸ੍ਮਿਂ ਦਾਨੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾਨਂ ਕੋਟਿਸਤਂ ਅਰਹਨ੍ਤਾਨਂ ਸਨ੍ਨਿਪਾਤੋ, ਤੇਸਂ ਮਜ੍ਝੇ ਸੋਭਿਤੋ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ. ਅਯਂ ਪਠਮੋ ਸਨ੍ਨਿਪਾਤੋ ਅਹੋਸਿ. ਪੁਨ ਮੇਖਲਾਨਗਰੇ ਧਮ੍ਮਗਣੋ ਧਮ੍ਮਗਣਾਰਾਮਂ ਨਾਮ ਪਵਰਾਰਾਮਂ ਮਹਾਵਿਹਾਰਂ ਕਾਰੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਤ੍ਵਾ ਸਹ ਸਬ੍ਬਪਰਿਕ੍ਖਾਰੇਹਿ ਦਾਨਂ ਅਦਾਸਿ. ਤਸ੍ਮਿਂ ਸਮਾਗਮੇ ਏਹਿਭਿਕ੍ਖੁਭਾਵੇਨ ਪਬ੍ਬਜਿਤਾਨਂ ਨਵੁਤਿਯਾ ਅਰਹਨ੍ਤਕੋਟੀਨਂ ਸਨ੍ਨਿਪਾਤੇ ਪਾਤਿਮੋਕ੍ਖਂ ਉਦ੍ਦਿਸਿ. ਅਯਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਯਦਾ ਪਨ ਭਗਵਾ ਦਸਸਤਨਯਨਪੁਰੇ ਵਸ੍ਸਂ ਵਸਿਤ੍ਵਾ ਪਵਾਰਣਾਯ ਸੁਰਵਰਪਰਿਵੁਤੋ ਓਤਰਿ, ਤਦਾ ਅਸੀਤਿਯਾ ਅਰਹਨ੍ਤਕੋਟੀਹਿ ਸਦ੍ਧਿਂ ਚਤੁਰਙ੍ਗਿਕੇ ਸਨ੍ਨਿਪਾਤੇ ਪਵਾਰੇਸਿ. ਅਯਂ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੮. ‘‘ਸਨ੍ਨਿਪਾਤਾ ਤਯੋ ਆਸੁਂ, ਸੋਭਿਤਸ੍ਸ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੯. ‘‘ਉਗ੍ਗਤੋ ਨਾਮ ਸੋ ਰਾਜਾ, ਦਾਨਂ ਦੇਤਿ ਨਰੁਤ੍ਤਮੇ;

ਤਮ੍ਹਿ ਦਾਨੇ ਸਮਾਗਞ੍ਛੁਂ, ਅਰਹਨ੍ਤਾ ਸਤਕੋਟਿਯੋ.

੧੦. ‘‘ਪੁਨਾਪਰਂ ਪੁਰਗਣੋ, ਦੇਤਿ ਦਾਨਂ ਨਰੁਤ੍ਤਮੇ;

ਤਦਾ ਨਵੁਤਿਕੋਟੀਨਂ, ਦੁਤਿਯੋ ਆਸਿ ਸਮਾਗਮੋ.

੧੧. ‘‘ਦੇਵਲੋਕੇ ਵਸਿਤ੍ਵਾਨ, ਯਦਾ ਓਰੋਹਤੀ ਜਿਨੋ;

ਤਦਾ ਅਸੀਤਿਕੋਟੀਨਂ, ਤਤਿਯੋ ਆਸਿ ਸਮਾਗਮੋ’’ਤਿ.

ਤਦਾ ਕਿਰ ਅਮ੍ਹਾਕਂ ਬੋਧਿਸਤ੍ਤੋ ਰਮ੍ਮਵਤੀਨਗਰੇ ਉਭਤੋ ਸੁਜਾਤੋ ‘ਸੁਜਾਤੋ’ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਸੋਭਿਤਸ੍ਸ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਸਰਣੇਸੁ ਪਤਿਟ੍ਠਾਯ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਤੇਮਾਸਂ ਮਹਾਦਾਨਮਦਾਸਿ. ਸੋਪਿ ਨਂ ‘‘ਅਨਾਗਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੧੨. ‘‘ਅਹਂ ਤੇਨ ਸਮਯੇਨ, ਸੁਜਾਤੋ ਨਾਮ ਬ੍ਰਾਹ੍ਮਣੋ;

ਤਦਾ ਸਸਾਵਕਂ ਬੁਦ੍ਧਂ, ਅਨ੍ਨਪਾਨੇਨ ਤਪ੍ਪਯਿਂ.

੧੩. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸੋਭਿਤੋ ਲੋਕਨਾਯਕੋ;

ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੪. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੫. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਹਟ੍ਠੋ ਸਂਵਿਗ੍ਗਮਾਨਸੋ;

ਤਮੇਵਤ੍ਥਮਨੁਪ੍ਪਤ੍ਤਿਯਾ, ਉਗ੍ਗਂ ਧਿਤਿਮਕਾਸਹ’’ਨ੍ਤਿ.

ਤਤ੍ਥ ਤਮੇਵਤ੍ਥਮਨੁਪ੍ਪਤ੍ਤਿਯਾਤਿ ਤਸ੍ਸ ਬੁਦ੍ਧਤ੍ਤਸ੍ਸ ਅਨੁਪ੍ਪਤ੍ਤਿਅਤ੍ਥਂ, ਤਸ੍ਸ ਪਨ ਸੋਭਿਤਬੁਦ੍ਧਸ੍ਸ – ‘‘ਅਨਾਗਤੇ ਅਯਂ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਵਚਨਂ ਸੁਤ੍ਵਾ ‘‘ਅਵਿਤਥਵਚਨਾ ਹਿ ਬੁਦ੍ਧਾ’’ਤਿ ਬੁਦ੍ਧਤ੍ਤਪ੍ਪਤ੍ਤਿਅਤ੍ਥਨ੍ਤਿ ਅਤ੍ਥੋ. ਉਗ੍ਗਨ੍ਤਿ ਤਿਬ੍ਬਂ ਘੋਰਂ. ਧਿਤਿਨ੍ਤਿ ਵੀਰਿਯਂ. ਅਕਾਸਹਨ੍ਤਿ ਅਕਾਸਿਂ ਅਹਂ.

ਤਸ੍ਸ ਪਨ ਸੋਭਿਤਸ੍ਸ ਭਗਵਤੋ ਸੁਧਮ੍ਮਂ ਨਾਮ ਨਗਰਂ ਅਹੋਸਿ, ਪਿਤਾ ਸੁਧਮ੍ਮੋ ਨਾਮ ਰਾਜਾ, ਮਾਤਾ ਸੁਧਮ੍ਮਾ ਨਾਮ ਦੇਵੀ, ਅਸਮੋ ਚ ਸੁਨੇਤ੍ਤੋ ਚ ਦ੍ਵੇ ਅਗ੍ਗਸਾਵਕਾ, ਅਨੋਮੋ ਨਾਮੁਪਟ੍ਠਾਕੋ, ਨਕੁਲਾ ਚ ਸੁਜਾਤਾ ਚ ਦ੍ਵੇ ਅਗ੍ਗਸਾਵਿਕਾ, ਨਾਗਰੁਕ੍ਖੋ ਬੋਧਿ, ਅਟ੍ਠਪਣ੍ਣਾਸਹਤ੍ਥੁਬ੍ਬੇਧਂ ਸਰੀਰਂ ਅਹੋਸਿ, ਨਵੁਤਿਵਸ੍ਸਸਹਸ੍ਸਾਨਿ ਆਯੁਪ੍ਪਮਾਣਂ, ਮਖਿਲਾ ਨਾਮਸ੍ਸ ਮਹਾਦੇਵੀ, ਸੀਹਕੁਮਾਰੋ ਨਾਮ ਅਤ੍ਰਜੋ, ਨਾਟਕਿਤ੍ਥੀਨਂ ਸਤ੍ਤਤ੍ਤਿਂਸਸਹਸ੍ਸਾਨਿ ਨਵਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਪਾਸਾਦੇਨ ਅਭਿਨਿਕ੍ਖਮਿ. ਜਯਸੇਨੋ ਨਾਮ ਰਾਜਾ ਉਪਟ੍ਠਾਕੋ. ਸੇਤਾਰਾਮੇ ਕਿਰ ਵਸੀਤਿ. ਤੇਨ ਵੁਤ੍ਤਂ –

੧੬. ‘‘ਸੁਧਮ੍ਮਂ ਨਾਮ ਨਗਰਂ, ਸੁਧਮ੍ਮੋ ਨਾਮ ਖਤ੍ਤਿਯੋ;

ਸੁਧਮ੍ਮਾ ਨਾਮ ਜਨਿਕਾ, ਸੋਭਿਤਸ੍ਸ ਮਹੇਸਿਨੋ.

੨੧. ‘‘ਅਸਮੋ ਚ ਸੁਨੇਤ੍ਤੋ ਚ, ਅਹੇਸੁਂ ਅਗ੍ਗਸਾਵਕਾ;

ਅਨੋਮੋ ਨਾਮੁਪਟ੍ਠਾਕੋ, ਸੋਭਿਤਸ੍ਸ ਮਹੇਸਿਨੋ.

੨੨. ‘‘ਨਕੁਲਾ ਚ ਸੁਜਾਤਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੁਜ੍ਝਮਾਨੋ ਚ ਸੋ ਬੁਦ੍ਧੋ, ਨਾਗਮੂਲੇ ਅਬੁਜ੍ਝਥ.

੨੪. ‘‘ਅਟ੍ਠਪਣ੍ਣਾਸਰਤਨਂ, ਅਚ੍ਚੁਗ੍ਗਤੋ ਮਹਾਮੁਨਿ;

ਓਭਾਸੇਤਿ ਦਿਸਾ ਸਬ੍ਬਾ, ਸਤਰਂਸੀਵ ਉਗ੍ਗਤੋ.

੨੫. ‘‘ਤਥਾ ਸੁਫੁਲ੍ਲਂ ਪਵਨਂ, ਨਾਨਾਗਨ੍ਧੇਹਿ ਧੂਪਿਤਂ;

ਤਥੇਵ ਤਸ੍ਸ ਪਾਵਚਨਂ, ਸੀਲਗਨ੍ਧੇਹਿ ਧੂਪਿਤਂ.

੨੬. ‘‘ਯਥਾਪਿ ਸਾਗਰੋ ਨਾਮ, ਦਸ੍ਸਨੇਨ ਅਤਪ੍ਪਿਯੋ;

ਤਥੇਵ ਤਸ੍ਸ ਪਾਵਚਨਂ, ਸਵਨੇਨ ਅਤਪ੍ਪਿਯਂ.

੨੭. ‘‘ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੮. ‘‘ਓਵਾਦਂ ਅਨੁਸਿਟ੍ਠਿਞ੍ਚ, ਦਤ੍ਵਾਨ ਸੇਸਕੇ ਜਨੇ;

ਹੁਤਾਸਨੋਵ ਤਾਪੇਤ੍ਵਾ, ਨਿਬ੍ਬੁਤੋ ਸੋ ਸਸਾਵਕੋ.

੨੯. ‘‘ਸੋ ਚ ਬੁਦ੍ਧੋ ਅਸਮਸਮੋ, ਤੇਪਿ ਸਾਵਕਾ ਬਲਪ੍ਪਤ੍ਤਾ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਸਤਰਂਸੀਵਾਤਿਆਦਿਚ੍ਚੋ ਵਿਯ, ਸਬ੍ਬਾ ਦਿਸਾ ਓਭਾਸੇਤੀਤਿ ਅਤ੍ਥੋ. ਪਵਨਨ੍ਤਿ ਮਹਾਵਨਂ. ਧੂਪਿਤਨ੍ਤਿ ਵਾਸਿਤਂ ਗਨ੍ਧਿਤਂ. ਅਤਪ੍ਪਿਯੋਤਿ ਅਤਿਤ੍ਤਿਕਰੋ, ਅਤਿਤ੍ਤਿਜਨਨੋ ਵਾ. ਤਾਵਦੇਤਿ ਤਸ੍ਮਿਂ ਕਾਲੇ, ਤਾਵਤਕਂ ਕਾਲਨ੍ਤਿ ਅਤ੍ਥੋ. ਤਾਰੇਸੀਤਿ ਤਾਰਯੀ. ਓਵਾਦਨ੍ਤਿ ਸਕਿਂ ਵਾਦੋ ਓਵਾਦੋ ਨਾਮ. ਅਨੁਸਿਟ੍ਠਿਨ੍ਤਿ ਪੁਨਪ੍ਪੁਨਂ ਵਚਨਂ ਅਨੁਸਿਟ੍ਠਿ ਨਾਮ. ਸੇਸਕੇ ਜਨੇਤਿ ਸਚ੍ਚਪ੍ਪਟਿਵੇਧਂ ਅਪ੍ਪਤ੍ਤਸ੍ਸ ਸੇਸਜਨਸ੍ਸ, ਸਾਮਿਅਤ੍ਥੇ ਭੁਮ੍ਮਵਚਨਂ. ਹੁਤਾਸਨੋਵ ਤਾਪੇਤ੍ਵਾਤਿ ਅਗ੍ਗਿ ਵਿਯ ਤਪ੍ਪੇਤ੍ਵਾ. ਅਯਮੇਵ ਵਾ ਪਾਠੋ, ਉਪਾਦਾਨਕ੍ਖਯਾ ਭਗਵਾ ਪਰਿਨਿਬ੍ਬੁਤੋਤਿ ਅਤ੍ਥੋ. ਸੇਸਗਾਥਾਸੁ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਸੋਭਿਤਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਛਟ੍ਠੋ ਬੁਦ੍ਧਵਂਸੋ.