੭. ਰੇਵਤਬੁਦ੍ਧਵਂਸਵਣ੍ਣਨਾ

ਸੁਮਨਸ੍ਸ ਪਨ ਭਗਵਤੋ ਅਪਰਭਾਗੇ ਸਾਸਨੇ ਚਸ੍ਸ ਅਨ੍ਤਰਹਿਤੇ ਨਵੁਤਿਵਸ੍ਸਸਹਸ੍ਸਾਯੁਕਾ ਮਨੁਸ੍ਸਾ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਦਸਵਸ੍ਸਾਯੁਕਾ ਹੁਤ੍ਵਾ ਪੁਨ ਅਨੁਕ੍ਕਮੇਨ ਵਡ੍ਢਿਤ੍ਵਾ ਅਸਙ੍ਖ੍ਯੇਯ੍ਯਾਯੁਕਾ ਹੁਤ੍ਵਾ ਪੁਨ ਪਰਿਹਾਯਮਾਨਾ ਸਟ੍ਠਿਵਸ੍ਸਸਹਸ੍ਸਾਯੁਕਾ ਅਹੇਸੁਂ. ਤਦਾ ਰੇਵਤੋ ਨਾਮ ਸਤ੍ਥਾ ਉਦਪਾਦਿ. ਸੋਪਿ ਪਾਰਮਿਯੋ ਪੂਰੇਤ੍ਵਾ ਅਨੇਕਰਤਨਸਮੁਜ੍ਜਲਿਤਭਵਨੇ ਤੁਸਿਤਭਵਨੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਸਬ੍ਬਧਨਧਞ੍ਞਵਤਿਸੁਧਞ੍ਞਵਤੀਨਗਰੇ ਸਬ੍ਬਾਲਙ੍ਕਾਰਸਮਲਙ੍ਕਤਅਮਿਤਰੁਚਿਰਪਰਿਵਾਰਪਰਿਵੁਤਸ੍ਸ ਸਿਰਿਵਿਭਵਸਮੁਦਯੇਨਾਕੁਲਸ੍ਸ ਸਬ੍ਬਸਮਿਦ੍ਧਿਵਿਪੁਲਸ੍ਸ ਵਿਪੁਲਸ੍ਸ ਨਾਮ ਰਞ੍ਞੋ ਕੁਲੇ ਸਬ੍ਬਜਨਨਯਨਾਲਿਪਾਲਿਸਮਾਕੁਲਾਯ ਸਮ੍ਫੁਲ੍ਲਨਯਨਕੁਵਲਯਸਸ੍ਸਿਰਿਕਸਿਨਿਦ੍ਧਵਦਨਕਮਲਾਕਰਸੋਭਾਸਮੁਜ੍ਜਲਾਯ ਸੁਰੁਚਿਰਮਨੋਹਰਗੁਣਗਣਵਿਪੁਲਾਯ ਵਿਪੁਲਾਯ ਨਾਮ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਚਿਤ੍ਤਕੂਟਪਬ੍ਬਤਤੋ ਸੁਵਣ੍ਣਹਂਸਰਾਜਾ ਵਿਯ ਮਾਤੁਕੁਚ੍ਛਿਤੋ ਨਿਕ੍ਖਮਿ.

ਤਸ੍ਸ ਪਟਿਸਨ੍ਧਿਯਂ ਜਾਤਿਯਞ੍ਚ ਪਾਟਿਹਾਰਿਯਾਨਿ ਪੁਬ੍ਬੇ ਵੁਤ੍ਤਨਯਾਨੇਵ ਅਹੇਸੁਂ. ਸੁਦਸ੍ਸਨਰਤਨਗ੍ਘਿਆਵੇਲ਼ਨਾਮਕਾ ਤਯੋ ਚਸ੍ਸ ਪਾਸਾਦਾ ਅਹੇਸੁਂ. ਸੁਦਸ੍ਸਨਾਦੇਵਿਪ੍ਪਮੁਖਾਨਿ ਤੇਤ੍ਤਿਂਸ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ. ਤਾਹਿ ਪਰਿਵੁਤੋ ਸੋ ਸੁਰਯੁਵਤੀਹਿ ਪਰਿਵੁਤੋ ਦੇਵਕੁਮਾਰੋ ਵਿਯ ਛਬ੍ਬਸ੍ਸਸਹਸ੍ਸਾਨਿ ਵਿਸਯਸੁਖਮਨੁਭਵਮਾਨੋ ਅਗਾਰਂ ਅਜ੍ਝਾਵਸਿ. ਸੋ ਸੁਦਸ੍ਸਨਾਯ ਨਾਮ ਦੇਵਿਯਾ ਵਰੁਣੇ ਨਾਮ ਤਨਯੇ ਜਾਤੇ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਨਾਨਾਵਿਰਾਗਤਨੁਵਰਵਸਨਨਿਵਸਨੋ ਆਮੁਕ੍ਕਮੁਤ੍ਤਾਹਾਰਮਣਿਕੁਣ੍ਡਲੋ ਵਰਕੇਯੂਰਮਕੁਟਕਟਕਧਰੋ ਪਰਮਸੁਰਭਿਗਨ੍ਧਕੁਸੁਮਸਮਲਙ੍ਕਤੋ ਪਰਮਰੁਚਿਰਕਰਨਿਕਰੋ ਸਰਦਸਮਯਰਜਨਿਕਰੋ ਵਿਯ ਤਾਰਾਗਣਪਰਿਵੁਤੋ ਵਿਯ ਚਨ੍ਦੋ ਤਿਦਸਗਣਪਰਿਵੁਤੋ ਵਿਯ ਦਸਸਤਨਯਨੋ ਬ੍ਰਹ੍ਮਗਣਪਰਿਵੁਤੋ ਵਿਯ ਚ ਹਾਰਿਤਮਹਾਬ੍ਰਹ੍ਮਾ ਚਤੁਰਙ੍ਗਿਨਿਯਾ ਮਹਤਿਯਾ ਸੇਨਾਯ ਪਰਿਵੁਤੋ ਆਜਞ੍ਞਰਥੇਨ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਸਬ੍ਬਾਭਰਣਾਨਿ ਓਮੁਞ੍ਚਿਤ੍ਵਾ ਭਣ੍ਡਾਗਾਰਿਕਸ੍ਸ ਹਤ੍ਥੇ ਦਤ੍ਵਾ ਜਲਜਾਮਲਾਵਿਕਲਨੀਲਕੁਵਲਯਦਲਸਦਿਸੇਨਾਤਿਨਿਸਿਤੇਨਾਤਿਤਿਖਿਣੇਨਾਸਿਨਾ ਸਕੇਸਮਕੁਟਂ ਛਿਨ੍ਦਿਤ੍ਵਾ ਆਕਾਸੇ ਖਿਪਿ. ਤਂ ਸਕ੍ਕੋ ਦੇਵਰਾਜਾ ਸੁਵਣ੍ਣਚਙ੍ਕੋਟਕੇਨ ਪਟਿਗ੍ਗਹੇਤ੍ਵਾ ਤਾਵਤਿਂਸਭਵਨਂ ਨੇਤ੍ਵਾ ਸਿਨੇਰੁਮੁਦ੍ਧਨਿ ਸਤ੍ਤਰਤਨਮਯਂ ਚੇਤਿਯਂ ਅਕਾਸਿ.

ਮਹਾਪੁਰਿਸੋ ਪਨ ਦੇਵਦਤ੍ਤਾਨਿ ਕਾਸਾਯਾਨਿ ਪਰਿਦਹਿਤ੍ਵਾ ਪਬ੍ਬਜਿ, ਏਕਾ ਚ ਨਂ ਪੁਰਿਸਕੋਟਿ ਅਨੁਪਬ੍ਬਜਿ. ਸੋ ਤੇਹਿ ਪਰਿਵੁਤੋ ਸਤ੍ਤਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਅਞ੍ਞਤਰਾਯ ਸਾਧੁਦੇਵਿਯਾ ਨਾਮ ਸੇਟ੍ਠਿਧੀਤਾਯ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਅਞ੍ਞਤਰੇਨਾਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਮਤ੍ਤਵਰਨਾਗਗਾਮੀ ਨਾਗਬੋਧਿਂ ਪਦਕ੍ਖਿਣਂ ਕਤ੍ਵਾ ਤੇਪਣ੍ਣਾਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਨਿਸੀਦਿਤ੍ਵਾ ਮਾਰਬਲਂ ਵਿਧਮਿਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ (ਧ. ਪ. ੧੫੩-੧੫੪) ਉਦਾਨਂ ਉਦਾਨੇਸਿ. ਤੇਨ ਵੁਤ੍ਤਂ –

੧. ‘‘ਸੁਮਨਸ੍ਸ ਅਪਰੇਨ, ਰੇਵਤੋ ਨਾਮ ਨਾਯਕੋ;

ਅਨੁਪਮੋ ਅਸਦਿਸੋ, ਅਤੁਲੋ ਉਤ੍ਤਮੋ ਜਿਨੋ’’ਤਿ.

ਰੇਵਤੋ ਕਿਰ ਸਤ੍ਥਾ ਬੋਧਿਸਮੀਪੇਯੇਵ ਸਤ੍ਤਸਤ੍ਤਾਹਾਨਿ ਵੀਤਿਨਾਮੇਤ੍ਵਾ ਧਮ੍ਮਦੇਸਨਤ੍ਥਂ ਬ੍ਰਹ੍ਮਾਯਾਚਨਂ ਸਮ੍ਪਟਿਚ੍ਛਿਤ੍ਵਾ – ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ (ਦੀ. ਨਿ. ੨.੭੨; ਮ. ਨਿ. ੧.੨੮੪; ੨.੩੪੧; ਮਹਾਵ. ੧੦) ਉਪਧਾਰੇਨ੍ਤੋ ਅਤ੍ਤਨਾ ਸਹ ਪਬ੍ਬਜਿਤਭਿਕ੍ਖੁਕੋਟਿਯੋ ਅਞ੍ਞੇ ਚ ਬਹੂ ਦੇਵਮਨੁਸ੍ਸੇ ਉਪਨਿਸ੍ਸਯਸਮ੍ਪਨ੍ਨੇ ਦਿਸ੍ਵਾ ਆਕਾਸੇਨ ਗਨ੍ਤ੍ਵਾ ਵਰੁਣਾਰਾਮੇ ਓਤਰਿਤ੍ਵਾ ਤੇਹਿ ਪਰਿਵੁਤੋ ਗਮ੍ਭੀਰਂ ਨਿਪੁਣਂ ਤਿਪਰਿਵਟ੍ਟਂ ਅਪ੍ਪਟਿਵਤ੍ਤਿਯਂ ਅਞ੍ਞੇਨ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਭਿਕ੍ਖੂਨਂ ਕੋਟਿ ਅਰਹਤ੍ਤੇ ਪਤਿਟ੍ਠਾਪੇਸਿ. ਤੀਸੁ ਮਗ੍ਗਫਲੇਸੁ ਪਤਿਟ੍ਠਿਤਾਨਂ ਗਣਨਪਰਿਚ੍ਛੇਦੋ ਨਤ੍ਥਿ. ਤੇਨ ਵੁਤ੍ਤਂ –

੨. ‘‘ਸੋਪਿ ਧਮ੍ਮਂ ਪਕਾਸੇਸਿ, ਬ੍ਰਹ੍ਮੁਨਾ ਅਭਿਯਾਚਿਤੋ;

ਖਨ੍ਧਧਾਤੁਵਵਤ੍ਥਾਨਂ, ਅਪ੍ਪਵਤ੍ਤਂ ਭਵਾਭਵੇ’’ਤਿ.

ਤਤ੍ਥ ਖਨ੍ਧਧਾਤੁਵਵਤ੍ਥਾਨਨ੍ਤਿ ਪਞ੍ਚਨ੍ਨਂ ਖਨ੍ਧਾਨਂ ਅਟ੍ਠਾਰਸਨ੍ਨਂ ਧਾਤੂਨਂ ਨਾਮਰੂਪਵਵਤ੍ਥਾਨਾਦਿਵਸੇਨ ਵਿਭਾਗਕਰਣਂ. ਸਭਾਵਲਕ੍ਖਣਸਾਮਞ੍ਞਲਕ੍ਖਣਾਦਿਵਸੇਨ ਰੂਪਾਰੂਪਧਮ੍ਮਪਰਿਗ੍ਗਹੋ ਖਨ੍ਧਧਾਤੁਵਵਤ੍ਥਾਨਂ ਨਾਮ. ਅਥ ਵਾ ਫੇਣਪਿਣ੍ਡੂਪਮਂ ਰੂਪਂ ਪਰਿਮਦ੍ਦਨਾਸਹਨਤੋ ਛਿਦ੍ਦਾਵਛਿਦ੍ਦਾਦਿਭਾਵਤੋ ਚ ਉਦਕਪੁਬ੍ਬੁਲ਼ਕਂ ਵਿਯ ਵੇਦਨਾ ਮੁਹੁਤ੍ਤਰਮਣੀਯਭਾਵਤੋ, ਮਰੀਚਿਕਾ ਵਿਯ ਸਞ੍ਞਾ ਵਿਪ੍ਪਲਮ੍ਭਨਤੋ, ਕਦਲਿਕ੍ਖਨ੍ਧੋ ਵਿਯ ਸਙ੍ਖਾਰਾ ਅਸਾਰਕਤੋ, ਮਾਯਾ ਵਿਯ ਵਿਞ੍ਞਾਣਂ ਵਞ੍ਚਨਕਤੋ’’ਤਿ ਏਵਮਾਦਿਨਾਪਿ ਨਯੇਨ ਅਨਿਚ੍ਚਾਨੁਪਸ੍ਸਨਾਦਿਵਸੇਨਪਿ ਖਨ੍ਧਧਾਤੁਵਵਤ੍ਥਾਨਂ ਵੇਦਿਤਬ੍ਬਂ (ਵਿਭ. ਅਟ੍ਠ. ੨੬ ਕਮਾਦਿਵਿਨਿਚ੍ਛਯਕਥਾ). ਅਪ੍ਪਵਤ੍ਤਂ ਭਵਾਭਵੇਤਿ ਏਤ੍ਥ ਭਵੋਤਿ ਵਡ੍ਢਿ, ਅਭਵੋਤਿ ਹਾਨਿ. ਭਵੋਤਿ ਸਸ੍ਸਤਦਿਟ੍ਠਿ, ਅਭਵੋਤਿ ਉਚ੍ਛੇਦਦਿਟ੍ਠਿ. ਭਵੋਤਿ ਖੁਦ੍ਦਕਭਵੋ, ਅਭਵੋਤਿ ਮਹਾਭਵੋ. ਭਵੋਤਿ ਕਾਮਭਵੋ, ਅਭਵੋਤਿ ਰੂਪਾਰੂਪਭਵੋਤਿ ਏਵਮਾਦਿਨਾ ਨਯੇਨ ਭਵਾਭਵਾਨਂ ਅਤ੍ਥੋ ਵੇਦਿਤਬ੍ਬੋ (ਮ. ਨਿ. ਅਟ੍ਠ. ੨.੨੨੩; ਸਂ. ਨਿ. ਅਟ੍ਠ. ੩.੫.੧੦੮੦; ਉਦਾ. ਅਟ੍ਠ. ੨੦). ਤੇਸਂ ਭਵਾਭਵਾਨਂ ਅਪ੍ਪਵਤ੍ਤਿਹੇਤੁਭੂਤਂ ਧਮ੍ਮਂ ਪਕਾਸੇਸੀਤਿ ਅਤ੍ਥੋ. ਅਥ ਵਾ ਭਵਤਿ ਅਨੇਨਾਤਿ ਭਵੋ, ਤੀਸੁ ਭਵੇਸੁ ਉਪ੍ਪਤ੍ਤਿਨਿਮਿਤ੍ਤਂ ਕਮ੍ਮਾਦਿਕਂ. ਉਪਪਤ੍ਤਿਭਵੋ ਅਭਵੋ ਨਾਮ. ਉਭਯਤ੍ਥ ਨਿਕਨ੍ਤਿਯਾ ਪਹਾਨਕਰਂ ਅਪ੍ਪਵਤ੍ਤਂ ਧਮ੍ਮਂ ਦੇਸੇਸੀਤਿ ਅਤ੍ਥੋ. ਤਸ੍ਸ ਪਨ ਰੇਵਤਬੁਦ੍ਧਸ੍ਸ ਤਯੋਵ ਅਭਿਸਮਯਾ ਅਹੇਸੁਂ. ਪਠਮੋ ਪਨਸ੍ਸ ਗਣਨਪਥਂ ਵੀਤਿਵਤ੍ਤੋ. ਤੇਨ ਵੁਤ੍ਤਂ –

੩. ‘‘ਤਸ੍ਸਾਭਿਸਮਯਾ ਤੀਣਿ, ਅਹੇਸੁਂ ਧਮ੍ਮਦੇਸਨੇ;

ਗਣਨਾਯ ਨ ਵਤ੍ਤਬ੍ਬੋ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਤੀਣੀਤਿ ਤਯੋ, ਲਿਙ੍ਗਵਿਪਲ੍ਲਾਸੋ ਕਤੋ, ਅਯਂ ਪਠਮੋ ਅਭਿਸਮਯੋ ਅਹੋਸਿ.

ਅਥਾਪਰੇਨ ਸਮਯੇਨ ਨਗਰੁਤ੍ਤਰੇ ਉਤ੍ਤਰੇ ਨਗਰੇ ਸਬ੍ਬਾਰਿਨ੍ਦਮੋ ਅਰਿਨ੍ਦਮੋ ਨਾਮ ਰਾਜਾ ਅਹੋਸਿ. ਸੋ ਕਿਰ ਭਗਵਨ੍ਤਂ ਅਤ੍ਤਨੋ ਨਗਰਮਨੁਪ੍ਪਤ੍ਤਂ ਸੁਤ੍ਵਾ ਤੀਹਿ ਜਨਕੋਟੀਹਿ ਪਰਿਵੁਤੋ ਭਗਵਤੋ ਪਚ੍ਚੁਗ੍ਗਮਨਂ ਕਤ੍ਵਾ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਤਿਗਾਵੁਤਵਿਤ੍ਥਤਂ ਦੀਪਪੂਜਂ ਕਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਨਿਸੀਦਿ. ਅਥ ਭਗਵਾ ਤਸ੍ਸ ਮਨੋਨੁਕੂਲਂ ਵਿਚਿਤ੍ਤਨਯਂ ਧਮ੍ਮਂ ਦੇਸੇਸਿ. ਤਤ੍ਥ ਦੇਵਮਨੁਸ੍ਸਾਨਂ ਕੋਟਿਸਹਸ੍ਸਸ੍ਸ ਦੁਤਿਯਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੪. ‘‘ਯਦਾ ਅਰਿਨ੍ਦਮਂ ਰਾਜਂ, ਵਿਨੇਸਿ ਰੇਵਤੋ ਮੁਨਿ;

ਤਦਾ ਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੂ’’ਤਿ.

ਅਯਂ ਦੁਤਿਯੋ ਅਭਿਸਮਯੋ.

ਅਥਾਪਰੇਨ ਸਮਯੇਨ ਰੇਵਤੋ ਸਤ੍ਥਾ ਉਤ੍ਤਰਨਿਗਮਂ ਨਾਮ ਉਪਨਿਸ੍ਸਾਯ ਵਿਹਰਨ੍ਤੋ ਸਤ੍ਤਾਹਂ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸੀਦਿ. ਤਦਾ ਕਿਰ ਉਤ੍ਤਰਨਿਗਮਵਾਸਿਨੋ ਮਨੁਸ੍ਸਾ ਯਾਗੁਭਤ੍ਤਖਜ੍ਜਕਭੇਸਜ੍ਜਪਾਨਕਾਦੀਨਿ ਆਹਰਿਤ੍ਵਾ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਭਿਕ੍ਖੂ ਪਰਿਪੁਚ੍ਛਿਂਸੁ – ‘‘ਕੁਹਿਂ, ਭਨ੍ਤੇ, ਭਗਵਾ’’ਤਿ? ਤਤੋ ਤੇਸਂ ਭਿਕ੍ਖੂ ਆਹਂਸੁ – ‘‘ਭਗਵਾ, ਆਵੁਸੋ, ਨਿਰੋਧਸਮਾਪਤ੍ਤਿਂ ਸਮਾਪਨ੍ਨੋ’’ਤਿ. ਅਥਾਤੀਤੇ ਤਸ੍ਮਿਂ ਸਤ੍ਤਾਹੇ ਭਗਵਨ੍ਤਂ ਨਿਰੋਧਸਮਾਪਤ੍ਤਿਤੋ ਵੁਟ੍ਠਿਤਂ ਸਰਦਸਮਯੇ ਸੂਰਿਯੋ ਵਿਯ ਅਤ੍ਤਨੋ ਅਨੂਪਮਾਯ ਬੁਦ੍ਧਸਿਰਿਯਾ ਵਿਰੋਚਮਾਨਂ ਦਿਸ੍ਵਾ ਨਿਰੋਧਸਮਾਪਤ੍ਤਿਯਾ ਗੁਣਾਨਿਸਂਸਂ ਪੁਚ੍ਛਿਂਸੁ. ਭਗਵਾ ਚ ਤੇਸਂ ਨਿਰੋਧਸਮਾਪਤ੍ਤਿਯਾ ਗੁਣਾਨਿਸਂਸਂ ਕਥੇਸਿ. ਤਦਾ ਦੇਵਮਨੁਸ੍ਸਾਨਂ ਕੋਟਿਸਤਂ ਅਰਹਤ੍ਤੇ ਪਤਿਟ੍ਠਾਸਿ. ਅਯਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਸਤ੍ਤਾਹਂ ਪਟਿਸਲ੍ਲਾਨਾ, ਵੁਟ੍ਠਹਿਤ੍ਵਾ ਨਰਾਸਭੋ;

ਕੋਟਿਸਤਂ ਨਰਮਰੂਨਂ, ਵਿਨੇਸਿ ਉਤ੍ਤਮੇ ਫਲੇ’’ਤਿ.

ਸੁਧਞ੍ਞਵਤੀਨਗਰੇ ਪਠਮਮਹਾਪਾਤਿਮੋਕ੍ਖੁਦ੍ਦੇਸੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾਨਂ ਅਰਹਨ੍ਤਾਨਂ ਗਣਨਪਥਂ ਵੀਤਿਵਤ੍ਤਾਨਂ ਪਠਮੋ ਸਨ੍ਨਿਪਾਤੋ ਅਹੋਸਿ. ਮੇਖਲਨਗਰੇ ਕੋਟਿਸਤਸਹਸ੍ਸਸਙ੍ਖਾਤਾਨਂ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤਾਨਂ ਅਰਹਨ੍ਤਾਨਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਰੇਵਤਸ੍ਸ ਪਨ ਭਗਵਤੋ ਧਮ੍ਮਚਕ੍ਕਾਨੁਵਤ੍ਤਕੋ ਵਰੁਣੋ ਨਾਮ ਅਗ੍ਗਸਾਵਕੋ ਪਞ੍ਞਵਨ੍ਤਾਨਂ ਅਗ੍ਗੋ ਆਬਾਧਿਕੋ ਅਹੋਸਿ. ਤਤ੍ਥ ਗਿਲਾਨਪੁਚ੍ਛਨਤ੍ਥਾਯ ਸਮ੍ਪਤ੍ਤਮਹਾਜਨਸ੍ਸ ਲਕ੍ਖਣਤ੍ਤਯਪਰਿਦੀਪਕਂ ਧਮ੍ਮਂ ਦੇਸੇਤ੍ਵਾ ਕੋਟਿਸਤਸਹਸ੍ਸਂ ਪੁਰਿਸਾਨਂ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਾਜੇਤ੍ਵਾ ਅਰਹਤ੍ਤੇ ਪਤਿਟ੍ਠਾਪੇਤ੍ਵਾ ਚਤੁਰਙ੍ਗਿਨਿਕੇ ਸਨ੍ਨਿਪਾਤੇ ਪਾਤਿਮੋਕ੍ਖਂ ਉਦ੍ਦਿਸਿ. ਅਯਂ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੬. ‘‘ਸਨ੍ਨਿਪਾਤਾ ਤਯੋ ਆਸੁਂ, ਰੇਵਤਸ੍ਸ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸੁਵਿਮੁਤ੍ਤਾਨ ਤਾਦਿਨਂ.

੭. ‘‘ਅਤਿਕ੍ਕਨ੍ਤਾ ਗਣਨਪਥਂ, ਪਠਮਂ ਯੇ ਸਮਾਗਤਾ;

ਕੋਟਿਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੮. ‘‘ਯੋਪਿ ਪਞ੍ਞਾਯ ਅਸਮੋ, ਤਸ੍ਸ ਚਕ੍ਕਾਨੁਵਤ੍ਤਕੋ;

ਸੋ ਤਦਾ ਬ੍ਯਾਧਿਤੋ ਆਸਿ, ਪਤ੍ਤੋ ਜੀਵਿਤਸਂਸਯਂ.

੯. ‘‘ਤਸ੍ਸ ਗਿਲਾਨਪੁਚ੍ਛਾਯ, ਯੇ ਤਦਾ ਉਪਗਤਾ ਮੁਨੀ;

ਕੋਟਿਸਤਸਹਸ੍ਸਾ ਅਰਹਨ੍ਤੋ, ਤਤਿਯੋ ਆਸਿ ਸਮਾਗਮੋ’’ਤਿ.

ਤਤ੍ਥ ਚਕ੍ਕਾਨੁਵਤ੍ਤਕੋਤਿ ਧਮ੍ਮਚਕ੍ਕਾਨੁਵਤ੍ਤਕੋ. ਪਤ੍ਤੋ ਜੀਵਿਤਸਂਸਯਨ੍ਤਿ ਏਤ੍ਥ ਜੀਵਿਤੇ ਸਂਸਯਂ ਜੀਵਿਤਸਂਸਯਂ, ਜੀਵਿਤਕ੍ਖਯਂ ਪਾਪੁਣਾਤਿ ਵਾ, ਨ ਵਾ ਪਾਪੁਣਾਤੀਤਿ ਏਵਂ ਜੀਵਿਤਸਂਸਯਂ ਪਤ੍ਤੋ, ਬ੍ਯਾਧਿਤਸ੍ਸ ਬਲਵਭਾਵੇਨ ਮਰਤਿ, ਨ ਮਰਤੀਤਿ ਜੀਵਿਤੇ ਸਂਸਯਂ ਪਤ੍ਤੋਤਿ ਅਤ੍ਥੋ. ਯੇ ਤਦਾ ਉਪਗਤਾ ਮੁਨੀਤਿ ਇਤਿ ਦੀਘਭਾਵੇ ਸਤਿ ਭਿਕ੍ਖੂਨਂ ਉਪਰਿ ਹੋਤਿ, ਰਸ੍ਸੇ ਅਨੁਸ੍ਸਰੇਨ ਸਦ੍ਧਿਂ ਵਰੁਣਸ੍ਸ ਉਪਰਿ ਹੋਤਿ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਰਮ੍ਮਵਤੀਨਗਰੇ ਅਤਿਦੇਵੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਬ੍ਰਾਹ੍ਮਣਧਮ੍ਮੇ ਪਾਰਂ ਗਤੋ ਰੇਵਤਂ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਤਸ੍ਸ ਧਮ੍ਮਕਥਂ ਸੁਤ੍ਵਾ ਸਰਣੇਸੁ ਪਤਿਟ੍ਠਾਯ ਸਿਲੋਕਸਹਸ੍ਸੇਨ ਦਸਬਲਂ ਕਿਤ੍ਤੇਤ੍ਵਾ ਸਹਸ੍ਸਗ੍ਘਨਿਕੇਨ ਉਤ੍ਤਰਾਸਙ੍ਗੇਨ ਭਗਵਨ੍ਤਂ ਪੂਜੇਸਿ. ਸੋਪਿ ਨਂ ਬੁਦ੍ਧੋ ਬ੍ਯਾਕਾਸਿ – ‘‘ਇਤੋ ਕਪ੍ਪਸਤਸਹਸ੍ਸਾਧਿਕਾਨਂ ਦ੍ਵਿਨ੍ਨਂ ਅਸਙ੍ਖ੍ਯੇਯ੍ਯਾਨਂ ਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ. ਤੇਨ ਵੁਤ੍ਤਂ –

੧੦. ‘‘ਅਹਂ ਤੇਨ ਸਮਯੇਨ, ਅਤਿਦੇਵੋ ਨਾਮ ਬ੍ਰਾਹ੍ਮਣੋ;

ਉਪਗਨ੍ਤ੍ਵਾ ਰੇਵਤਂ ਬੁਦ੍ਧਂ, ਸਰਣਂ ਤਸ੍ਸ ਗਞ੍ਛਹਂ.

੧੧. ‘‘ਤਸ੍ਸ ਸੀਲਂ ਸਮਾਧਿਞ੍ਚ, ਪਞ੍ਞਾਗੁਣਮਨੁਤ੍ਤਮਂ;

ਥੋਮਯਿਤ੍ਵਾ ਯਥਾਥਾਮਂ, ਉਤ੍ਤਰੀਯਮਦਾਸਹਂ.

੧੨. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਰੇਵਤੋ ਲੋਕਨਾਯਕੋ;

ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੩. ‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮ’’’ਨ੍ਤਿ. –

ਅਟ੍ਠ ਗਾਥਾ ਵਿਤ੍ਥਾਰੇਤਬ੍ਬਾ.

੧੪. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੧੫. ‘‘ਤਦਾਪਿ ਤਂ ਬੁਦ੍ਧਧਮ੍ਮਂ, ਸਰਿਤ੍ਵਾ ਅਨੁਬ੍ਰੂਹਯਿਂ;

ਆਹਰਿਸ੍ਸਾਮਿ ਤਂ ਧਮ੍ਮਂ, ਯਂ ਮਯ੍ਹਂ ਅਭਿਪਤ੍ਥਿਤ’’ਨ੍ਤਿ.

ਤਤ੍ਥ ਸਰਣਂ ਤਸ੍ਸ ਗਞ੍ਛਹਨ੍ਤਿ ਤਂ ਸਰਣਂ ਅਗਞ੍ਛਿਂ ਅਹਂ, ਉਪਯੋਗਤ੍ਥੇ ਸਾਮਿਵਚਨਂ. ਪਞ੍ਞਾਗੁਣਨ੍ਤਿ ਪਞ੍ਞਾਸਮ੍ਪਤ੍ਤਿਂ. ਅਨੁਤ੍ਤਮਨ੍ਤਿ ਸੇਟ੍ਠਂ. ‘‘ਪਞ੍ਞਾਵਿਮੁਤ੍ਤਿਗੁਣਮੁਤ੍ਤਮ’’ਨ੍ਤਿਪਿ ਪਾਠੋ, ਸੋ ਉਤ੍ਤਾਨੋਵ. ਥੋਮਯਿਤ੍ਵਾਤਿ ਥੋਮੇਤ੍ਵਾ ਵਣ੍ਣਯਿਤ੍ਵਾ. ਯਥਾਥਾਮਨ੍ਤਿ ਯਥਾਬਲਂ. ਉਤ੍ਤਰੀਯਨ੍ਤਿ ਉਤ੍ਤਰਾਸਙ੍ਗਂ. ਅਦਾਸਹਨ੍ਤਿ ਅਦਾਸਿਂ ਅਹਂ. ਬੁਦ੍ਧਧਮ੍ਮਨ੍ਤਿ ਬੁਦ੍ਧਭਾਵਕਰਂ ਧਮ੍ਮਂ, ਪਾਰਮੀਧਮ੍ਮਨ੍ਤਿ ਅਤ੍ਥੋ. ਸਰਿਤ੍ਵਾਤਿ ਅਨੁਸ੍ਸਰਿਤ੍ਵਾ. ਅਨੁਬ੍ਰੂਹਯਿਨ੍ਤਿ ਅਭਿਵਡ੍ਢੇਸਿਂ. ਆਹਰਿਸ੍ਸਾਮੀਤਿ ਆਨਯਿਸ੍ਸਾਮਿ. ਤਂ ਧਮ੍ਮਨ੍ਤਿ ਤਂ ਬੁਦ੍ਧਤ੍ਤਂ. ਯਂ ਮਯ੍ਹਂ ਅਭਿਪਤ੍ਥਿਤਨ੍ਤਿ ਯਂ ਮਯਾ ਅਭਿਪਤ੍ਥਿਤਂ ਬੁਦ੍ਧਤ੍ਤਂ, ਤਂ ਆਹਰਿਸ੍ਸਾਮੀਤਿ ਅਤ੍ਥੋ.

ਤਸ੍ਸ ਪਨ ਰੇਵਤਸ੍ਸ ਭਗਵਤੋ ਨਗਰਂ ਸੁਧਞ੍ਞਵਤੀ ਨਾਮ ਅਹੋਸਿ, ਪਿਤਾ ਵਿਪੁਲੋ ਨਾਮ ਖਤ੍ਤਿਯੋ, ਮਾਤਾ ਵਿਪੁਲਾ ਨਾਮ, ਵਰੁਣੋ ਚ ਬ੍ਰਹ੍ਮਦੇਵੋ ਚ ਦ੍ਵੇ ਅਗ੍ਗਸਾਵਕਾ, ਸਮ੍ਭਵੋ ਨਾਮ ਉਪਟ੍ਠਾਕੋ, ਭਦ੍ਦਾ ਚ ਸੁਭਦ੍ਦਾ ਚ ਦ੍ਵੇ ਅਗ੍ਗਸਾਵਿਕਾ, ਨਾਗਰੁਕ੍ਖੋ ਬੋਧਿ, ਸਰੀਰਂ ਅਸੀਤਿਹਤ੍ਥੁਬ੍ਬੇਧਂ ਅਹੋਸਿ, ਆਯੁ ਸਟ੍ਠਿਵਸ੍ਸਸਹਸ੍ਸਾਨਿ, ਸੁਦਸ੍ਸਨਾ ਨਾਮ ਅਗ੍ਗਮਹੇਸੀ, ਵਰੁਣੋ ਨਾਮ ਪੁਤ੍ਤੋ, ਆਜਞ੍ਞਰਥੇਨ ਨਿਕ੍ਖਮਿ.

‘‘ਤਸ੍ਸ ਦੇਹਾਭਿਨਿਕ੍ਖਨ੍ਤਂ, ਪਭਾਜਾਲਮਨੁਤ੍ਤਰਂ;

ਦਿਵਾ ਚੇਵ ਤਦਾ ਰਤ੍ਤਿਂ, ਨਿਚ੍ਚਂ ਫਰਤਿ ਯੋਜਨਂ.

‘‘ਧਾਤੁਯੋ ਮਮ ਸਬ੍ਬਾਪਿ, ਵਿਕਿਰਨ੍ਤੂਤਿ ਸੋ ਜਿਨੋ;

ਅਧਿਟ੍ਠਾਸਿ ਮਹਾਵੀਰੋ, ਸਬ੍ਬਸਤ੍ਤਾਨੁਕਮ੍ਪਕੋ.

‘‘ਮਹਾਨਾਗਵਨੁਯ੍ਯਾਨੇ, ਮਹਤੋ ਨਗਰਸ੍ਸ ਸੋ;

ਪੂਜਿਤੋ ਨਰਮਰੂਹਿ, ਪਰਿਨਿਬ੍ਬਾਯਿ ਰੇਵਤੋ’’ਤਿ.

ਤੇਨ ਵੁਤ੍ਤਂ –

੧੬. ‘‘ਨਗਰਂ ਸੁਧਞ੍ਞਵਤੀ ਨਾਮ, ਵਿਪੁਲੋ ਨਾਮ ਖਤ੍ਤਿਯੋ;

ਵਿਪੁਲਾ ਨਾਮ ਜਨਿਕਾ, ਰੇਵਤਸ੍ਸ ਮਹੇਸਿਨੋ.

੨੧. ‘‘ਵਰੁਣੋ ਬ੍ਰਹ੍ਮਦੇਵੋ ਚ, ਅਹੇਸੁਂ ਅਗ੍ਗਸਾਵਕਾ;

ਸਮ੍ਭਵੋ ਨਾਮੁਪਟ੍ਠਾਕੋ, ਰੇਵਤਸ੍ਸ ਮਹੇਸਿਨੋ.

੨੨. ‘‘ਭਦ੍ਦਾ ਚੇਵ ਸੁਭਦ੍ਦਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਸੋਪਿ ਬੁਦ੍ਧੋ ਅਸਮਸਮੋ, ਨਾਗਮੂਲੇ ਅਬੁਜ੍ਝਥ.

੨੩. ‘‘ਪਦੁਮੋ ਕੁਞ੍ਜਰੋ ਚੇਵ, ਅਹੇਸੁਂ ਅਗ੍ਗੁਪਟ੍ਠਕਾ;

ਸਿਰਿਮਾ ਚੇਵ ਯਸਵਤੀ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੪. ‘‘ਉਚ੍ਚਤ੍ਤਨੇਨ ਸੋ ਬੁਦ੍ਧੋ, ਅਸੀਤਿਹਤ੍ਥਮੁਗ੍ਗਤੋ;

ਓਭਾਸੇਤਿ ਦਿਸਾ ਸਬ੍ਬਾ, ਇਨ੍ਦਕੇਤੁਵ ਉਗ੍ਗਤੋ.

੨੫. ‘‘ਤਸ੍ਸ ਸਰੀਰੇ ਨਿਬ੍ਬਤ੍ਤਾ, ਪਭਾਮਾਲਾ ਅਨੁਤ੍ਤਰਾ;

ਦਿਵਾ ਵਾ ਯਦਿ ਵਾ ਰਤ੍ਤਿਂ, ਸਮਨ੍ਤਾ ਫਰਤਿ ਯੋਜਨਂ.

੨੬. ‘‘ਸਟ੍ਠਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਦਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੭. ‘‘ਦਸ੍ਸਯਿਤ੍ਵਾ ਬੁਦ੍ਧਬਲਂ ਅਮਤਂ ਲੋਕੇ ਪਕਾਸਯਂ;

ਨਿਬ੍ਬਾਯਿ ਅਨੁਪਾਦਾਨੋ, ਯਥਗ੍ਗੁਪਾਦਾਨਸਙ੍ਖਯਾ.

੨੮. ‘‘ਸੋ ਚ ਕਾਯੋ ਰਤਨਨਿਭੋ, ਸੋ ਚ ਧਮ੍ਮੋ ਅਸਾਦਿਸੋ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਓਭਾਸੇਤੀਤਿ ਪਕਾਸਯਤਿ. ਉਗ੍ਗਤੋਤਿ ਉਸ੍ਸਿਤੋ. ਪਭਾਮਾਲਾਤਿ ਪਭਾਵੇਲਾ. ਯਥਗ੍ਗੀਤਿ ਅਗ੍ਗਿ ਵਿਯ. ਉਪਾਦਾਨਸਙ੍ਖਯਾਤਿ ਇਨ੍ਧਨਕ੍ਖਯਾ. ਸੋ ਚ ਕਾਯੋ ਰਤਨਨਿਭੋਤਿ ਸੋ ਚ ਤਸ੍ਸ ਭਗਵਤੋ ਕਾਯੋ ਸੁਵਣ੍ਣਵਣ੍ਣੋ. ‘‘ਤਞ੍ਚ ਕਾਯਂ ਰਤਨਨਿਭ’’ਨ੍ਤਿਪਿ ਪਾਠੋ, ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਸੋਯੇਵ ਪਨਸ੍ਸਤ੍ਥੋ. ਸੇਸਗਾਥਾਸੁ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਰੇਵਤਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਪਞ੍ਚਮੋ ਬੁਦ੍ਧਵਂਸੋ.