੬. ਸੁਮਨਬੁਦ੍ਧਵਂਸਵਣ੍ਣਨਾ

ਏਵਂ ਏਕਪ੍ਪਹਾਰੇਨੇਵ ਦਸਸਹਸ੍ਸਿਲੋਕਧਾਤੁਂ ਏਕਨ੍ਧਕਾਰਂ ਕਤ੍ਵਾ ਤਸ੍ਮਿਂ ਭਗਵਤਿ ਪਰਿਨਿਬ੍ਬੁਤੇ ਤਸ੍ਸ ਅਪਰਭਾਗੇ ਨਵੁਤਿਵਸ੍ਸਸਹਸ੍ਸਾਯੁਕੇਸੁ ਮਨੁਸ੍ਸੇਸੁ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਦਸਵਸ੍ਸੇਸੁ ਜਾਤੇਸੁ ਪੁਨ ਵਡ੍ਢਿਤ੍ਵਾ ਅਨੁਕ੍ਕਮੇਨ ਅਸਙ੍ਖ੍ਯੇਯ੍ਯਾਯੁਕਾ ਹੁਤ੍ਵਾ ਪੁਨ ਪਰਿਹਾਯਿਤ੍ਵਾ ਨਵੁਤਿਵਸ੍ਸਸਹਸ੍ਸਾਯੁਕੇਸੁ ਜਾਤੇਸੁ ਸੁਮਨੋ ਨਾਮ ਬੋਧਿਸਤ੍ਤੋ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਮੇਖਲਨਗਰੇ ਸੁਦਤ੍ਤਸ੍ਸ ਨਾਮ ਰਞ੍ਞੋ ਕੁਲੇ ਸਿਰਿਮਾਯ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਪਾਟਿਹਾਰਿਯਾਨਿ ਪੁਬ੍ਬੇ ਵੁਤ੍ਤਨਯਾਨੇਵ.

ਸੋ ਅਨੁਕ੍ਕਮੇਨ ਵੁਦ੍ਧਿਪ੍ਪਤ੍ਤੋ ਸਿਰਿਵਡ੍ਢਨਸੋਮਵਡ੍ਢਨਇਦ੍ਧਿਵਡ੍ਢਨਨਾਮਧੇਯ੍ਯੇਸੁ ਤੀਸੁ ਪਾਸਾਦੇਸੁ ਤੇਸਟ੍ਠਿਯਾ ਨਾਟਕਿਤ੍ਥਿਸਤਸਹਸ੍ਸੇਹਿ ਪਰਿਚਾਰਿਯਮਾਨੋ ਸੁਰਯੁਵਤੀਹਿ ਪਰਿਚਾਰਿਯਮਾਨੋ ਦੇਵਕੁਮਾਰੋ ਵਿਯ ਨਵਵਸ੍ਸਸਹਸ੍ਸਾਨਿ ਦਿਬ੍ਬਸੁਖਸਦਿਸਂ ਵਿਸਯਸੁਖਮਨੁਭਵਮਾਨੋ ਵਟਂਸਿਕਾਯ ਨਾਮ ਦੇਵਿਯਾ ਅਨੁਪਮਂ ਨਾਮ ਨਿਰੁਪਮਂ ਪੁਤ੍ਤਂ ਜਨੇਤ੍ਵਾ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਹਤ੍ਥਿਯਾਨੇਨ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਪਨ ਪਬ੍ਬਜਨ੍ਤਂ ਤਿਂਸਕੋਟਿਯੋ ਅਨੁਪਬ੍ਬਜਿਂਸੁ.

ਸੋ ਤੇਹਿ ਪਰਿਵੁਤੋ ਦਸਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਅਨੋਮਨਿਗਮੇ ਅਨੋਮਸੇਟ੍ਠਿਨੋ ਧੀਤਾਯ ਅਨੁਪਮਾਯ ਨਾਮ ਦਿਨ੍ਨਂ ਪਕ੍ਖਿਤ੍ਤਦਿਬ੍ਬੋਜਂ ਪਾਯਾਸਂ ਪਰਿਭੁਞ੍ਜਿਤ੍ਵਾ ਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਅਨੁਪਮਾਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਨਾਗਬੋਧਿਂ ਉਪਗਨ੍ਤ੍ਵਾ ਤਂ ਪਦਕ੍ਖਿਣਂ ਕਤ੍ਵਾ ਅਟ੍ਠਹਿ ਤਿਣਮੁਟ੍ਠੀਹਿ ਤਿਂਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਕਤ੍ਵਾ ਤਤ੍ਥ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਿ. ਤਤੋ ਮਾਰਬਲਂ ਵਿਧਮਿਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ (ਧ. ਪ. ੧੫੩-੧੫੪) ਉਦਾਨਂ ਉਦਾਨੇਸਿ. ਤੇਨ ਵੁਤ੍ਤਂ –

੧. ‘‘ਮਙ੍ਗਲਸ੍ਸ ਅਪਰੇਨ, ਸੁਮਨੋ ਨਾਮ ਨਾਯਕੋ;

ਸਬ੍ਬਧਮ੍ਮੇਹਿ ਅਸਮੋ, ਸਬ੍ਬਸਤ੍ਤਾਨਮੁਤ੍ਤਮੋ’’ਤਿ.

ਤਤ੍ਥ ਮਙ੍ਗਲਸ੍ਸ ਅਪਰੇਨਾਤਿ ਮਙ੍ਗਲਸ੍ਸ ਭਗਵਤੋ ਅਪਰਭਾਗੇ. ਸਬ੍ਬਧਮ੍ਮੇਹਿ ਅਸਮੋਤਿ ਸਬ੍ਬੇਹਿਪਿ ਸੀਲਸਮਾਧਿਪਞ੍ਞਾਧਮ੍ਮੇਹਿ ਅਸਮੋ ਅਸਦਿਸੋ.

ਸੁਮਨੋ ਕਿਰ ਭਗਵਾ ਬੋਧਿਸਮੀਪੇਯੇਵ ਸਤ੍ਤਸਤ੍ਤਾਹਾਨਿ ਵੀਤਿਨਾਮੇਤ੍ਵਾ ਧਮ੍ਮਦੇਸਨਤ੍ਥਂ ਬ੍ਰਹ੍ਮਾਯਾਚਨਂ ਸਮ੍ਪਟਿਚ੍ਛਿਤ੍ਵਾ – ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ (ਦੀ. ਨਿ. ੨.੭੨; ਮ. ਨਿ. ੧.੨੮੪; ੨.੩੪੧; ਮਹਾਵ. ੧੦) ਉਪਧਾਰੇਨ੍ਤੋ ਅਤ੍ਤਨਾ ਸਹ ਪਬ੍ਬਜਿਤਾਨਂ ਤਿਂਸਕੋਟਿਯੋ ਚ ਅਤ੍ਤਨੋ ਕਨਿਟ੍ਠਭਾਤਿਕਂ ਵੇਮਾਤਿਕਂ ਸਰਣਕੁਮਾਰਞ੍ਚ ਪੁਰੋਹਿਤਪੁਤ੍ਤਂ ਭਾਵਿਤਤ੍ਤਮਾਣਵਕਞ੍ਚ ਉਪਨਿਸ੍ਸਯਸਮ੍ਪਨ੍ਨੇ ਦਿਸ੍ਵਾ – ‘‘ਏਤੇਸਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਹਂਸਰਾਜਾ ਵਿਯ ਗਗਨਪਥੇਨ ਮੇਖਲੁਯ੍ਯਾਨੇ ਓਤਰਿਤ੍ਵਾ ਉਯ੍ਯਾਨਪਾਲਂ ਪੇਸੇਤ੍ਵਾ ਅਤ੍ਤਨੋ ਕਨਿਟ੍ਠਭਾਤਿਕਂ ਸਰਣਕੁਮਾਰਞ੍ਚ ਪੁਰੋਹਿਤਪੁਤ੍ਤਂ ਭਾਵਿਤਤ੍ਤਕੁਮਾਰਞ੍ਚ ਪਕ੍ਕੋਸਾਪੇਤ੍ਵਾ ਤੇਸਂ ਪਰਿਵਾਰਭੂਤਾ ਸਤ੍ਤਤਿਂਸਕੋਟਿਯੋ ਅਤ੍ਤਨਾ ਸਹ ਪਬ੍ਬਜਿਤਾ ਤਿਂਸਕੋਟਿਯੋ ਚ ਅਞ੍ਞੇ ਚ ਬਹੂ ਦੇਵਮਨੁਸ੍ਸਕੋਟਿਯੋ ਚਾਤਿ ਏਵਂ ਕੋਟਿਸਤਸਹਸ੍ਸਂ ਧਮ੍ਮਚਕ੍ਕਪ੍ਪਵਤ੍ਤਨੇਨ ਧਮ੍ਮਾਮਤਂ ਪਾਯੇਸਿ. ਤੇਨ ਵੁਤ੍ਤਂ –

੨. ‘‘ਤਦਾ ਅਮਤਭੇਰਿਂ ਸੋ, ਆਹਨੀ ਮੇਖਲੇ ਪੁਰੇ;

ਧਮ੍ਮਸਙ੍ਖਸਮਾਯੁਤ੍ਤਂ, ਨਵਙ੍ਗਂ ਜਿਨਸਾਸਨ’’ਨ੍ਤਿ.

ਤਤ੍ਥ ਅਮਤਭੇਰਿਨ੍ਤਿ ਅਮਤਾਧਿਗਮਾਯ ਨਿਬ੍ਬਾਨਾਧਿਗਮਾਯ ਭੇਰਿਂ. ਆਹਨੀਤਿ ਵਾਦਯਿ, ਧਮ੍ਮਂ ਦੇਸੇਸੀਤਿ ਅਤ੍ਥੋ. ਸਾਯਂ ਅਮਤਭੇਰੀ ਨਾਮ ਅਮਤਪਰਿਯੋਸਾਨਂ ਨਵਙ੍ਗਂ ਬੁਦ੍ਧਵਚਨਂ. ਤੇਨੇਵਾਹ – ‘‘ਧਮ੍ਮਸਙ੍ਖਸਮਾਯੁਤ੍ਤਂ, ਨਵਙ੍ਗਂ ਜਿਨਸਾਸਨ’’ਨ੍ਤਿ. ਤਤ੍ਥ ਧਮ੍ਮਸਙ੍ਖਸਮਾਯੁਤ੍ਤਨ੍ਤਿ ਚਤੁਸਚ੍ਚਧਮ੍ਮਕਥਾਸਙ੍ਖਵਰਸਮਾਯੁਤ੍ਤਂ.

ਸੁਮਨੋ ਪਨ ਲੋਕਨਾਯਕੋ ਅਭਿਸਮ੍ਬੋਧਿਂ ਪਾਪੁਣਿਤ੍ਵਾ ਪਟਿਞ੍ਞਾਨੁਰੂਪਂ ਪਟਿਪਦਂ ਪਟਿਪਜ੍ਜਮਾਨੋ ਮਹਾਜਨਸ੍ਸ ਭਵਬਨ੍ਧਨਮੋਕ੍ਖਤ੍ਥਾਯ ਕੁਸਲਰਤਨਸ੍ਸ ਕਿਲੇਸਚੋਰੇਹਿ ਵਿਲੁਪ੍ਪਮਾਨਸ੍ਸ ਪਰਿਤ੍ਤਾਨਤ੍ਥਂ ਸੀਲਵਿਪੁਲਪਾਕਾਰਂ ਸਮਾਧਿਪਰਿਖਾਪਰਿਵਾਰਿਤਂ ਵਿਪਸ੍ਸਨਾਞਾਣਦ੍ਵਾਰਂ ਸਤਿਸਮ੍ਪਜਞ੍ਞਦਲ਼੍ਹਕਵਾਟਂ ਸਮਾਪਤ੍ਤਿਮਣ੍ਡਪਾਦਿਪਟਿਮਣ੍ਡਿਤਂ ਬੋਧਿਪਕ੍ਖਿਯਜਨਸਮਾਕੁਲਂ ਅਮਤਵਰਨਗਰਂ ਮਾਪੇਸਿ. ਤੇਨ ਵੁਤ੍ਤਂ –

੩. ‘‘ਨਿਜ੍ਜਿਨਿਤ੍ਵਾ ਕਿਲੇਸੇ ਸੋ, ਪਤ੍ਵਾ ਸਮ੍ਬੋਧਿਮੁਤ੍ਤਮਂ;

ਮਾਪੇਸਿ ਨਗਰਂ ਸਤ੍ਥਾ, ਸਦ੍ਧਮ੍ਮਪੁਰਵਰੁਤ੍ਤਮ’’ਨ੍ਤਿ.

ਤਤ੍ਥ ਨਿਜ੍ਜਿਨਿਤ੍ਵਾਤਿ ਵਿਜਿਨਿਤ੍ਵਾ ਅਭਿਭੁਯ੍ਯ, ਕਿਲੇਸਾਭਿਸਙ੍ਖਾਰਦੇਵਪੁਤ੍ਤਮਾਰੇ ਵਿਦ੍ਧਂਸੇਤ੍ਵਾਤਿ ਅਤ੍ਥੋ. ਸੋਤਿ ਸੋ ਸੁਮਨੋ ਭਗਵਾ. ‘‘ਵਿਜਿਨਿਤ੍ਵਾ ਕਿਲੇਸੇ ਹੀ’’ਤਿਪਿ ਪਾਠੋ. ਤਤ੍ਥ ਹਿ-ਕਾਰੋ ਪਦਪੂਰਣਮਤ੍ਤੇ ਨਿਪਾਤੋ. ਪਤ੍ਵਾਤਿ ਅਧਿਗਨ੍ਤ੍ਵਾ. ‘‘ਪਤ੍ਤੋ’’ਤਿਪਿ ਪਾਠੋ. ਨਗਰਨ੍ਤਿ ਨਿਬ੍ਬਾਨਨਗਰਂ. ਸਦ੍ਧਮ੍ਮਪੁਰਵਰੁਤ੍ਤਮਨ੍ਤਿ ਸਦ੍ਧਮ੍ਮਸਙ੍ਖਾਤਂ ਪੁਰਵਰੇਸੁ ਉਤ੍ਤਮਂ ਸੇਟ੍ਠਂ ਪਧਾਨਭੂਤਂ. ਅਥ ਵਾ ਸਦ੍ਧਮ੍ਮਮਯੇਸੁ ਪੁਰੇਸੁ ਪਵਰੇਸੁ ਉਤ੍ਤਮਂ ਸਦ੍ਧਮ੍ਮਪੁਰਵਰੁਤ੍ਤਮਂ. ਪੁਰਿਮਸ੍ਮਿਂ ਅਤ੍ਥਵਿਕਪ੍ਪੇ ‘‘ਨਗਰ’’ਨ੍ਤਿ ਤਸ੍ਸੇਵ ਵੇਵਚਨਨ੍ਤਿ ਦਟ੍ਠਬ੍ਬਂ. ਪਟਿਵਿਦ੍ਧਧਮ੍ਮਸਭਾਵਾਨਂ ਸੇਕ੍ਖਾਸੇਕ੍ਖਾਨਂ ਅਰਿਯਪੁਗ੍ਗਲਾਨਂ ਪਤਿਟ੍ਠਾਨਂ ਗੋਚਰਨਿਵਾਸਟ੍ਠੇਨ ਨਿਬ੍ਬਾਨਂ ‘‘ਨਗਰ’’ਨ੍ਤਿ ਵੁਚ੍ਚਤਿ. ਤਸ੍ਮਿਂ ਪਨ ਸਦ੍ਧਮ੍ਮਵਰਨਗਰੇ ਸੋ ਸਤ੍ਥਾ ਅਵਿਚ੍ਛਿਨ੍ਨਂ ਅਕੁਟਿਲਂ ਉਜੁਂ ਪੁਥੁਲਞ੍ਚ ਵਿਤ੍ਥਤਞ੍ਚ ਸਤਿਪਟ੍ਠਾਨਮਯਂ ਮਹਾਵੀਥਿਂ ਮਾਪੇਸਿ. ਤੇਨ ਵੁਤ੍ਤਂ –

੪. ‘‘ਨਿਰਨ੍ਤਰਂ ਅਕੁਟਿਲਂ, ਉਜੁਂ ਵਿਪੁਲਵਿਤ੍ਥਤਂ;

ਮਾਪੇਸਿ ਸੋ ਮਹਾਵੀਥਿਂ, ਸਤਿਪਟ੍ਠਾਨਵਰੁਤ੍ਤਮ’’ਨ੍ਤਿ.

ਤਤ੍ਥ ਨਿਰਨ੍ਤਰਨ੍ਤਿ ਕੁਸਲਜਵਨਸਞ੍ਚਰਣਾਨਨ੍ਤਰਭਾਵਤੋ ਨਿਰਨ੍ਤਰਂ. ਅਕੁਟਿਲਨ੍ਤਿ ਕੁਟਿਲਭਾਵਕਰਦੋਸਵਿਰਹਿਤਤੋ ਅਕੁਟਿਲਂ. ਉਜੁਨ੍ਤਿ ਅਕੁਟਿਲਤ੍ਤਾਵ ਉਜੁਂ. ਪੁਰਿਮਪਦਸ੍ਸੇਵ ਅਤ੍ਥਦੀਪਕਮਿਦਂ ਵਚਨਂ. ਵਿਪੁਲਵਿਤ੍ਥਤਨ੍ਤਿ ਆਯਾਮਤੋ ਚ ਵਿਤ੍ਥਾਰਤੋ ਚ ਪੁਥੁਲਵਿਤ੍ਥਤਂ, ਪੁਥੁਲਵਿਤ੍ਥਤਭਾਵੋ ਲੋਕਿਯਲੋਕੁਤ੍ਤਰਸਤਿਪਟ੍ਠਾਨਵਸੇਨ ਦਟ੍ਠਬ੍ਬੋ. ਮਹਾਵੀਥਿਨ੍ਤਿ ਮਹਾਮਗ੍ਗਂ. ਸਤਿਪਟ੍ਠਾਨਵਰੁਤ੍ਤਮਨ੍ਤਿ ਸਤਿਪਟ੍ਠਾਨਞ੍ਚ ਤਂ ਵਰੇਸੁ ਉਤ੍ਤਮਞ੍ਚਾਤਿ ਸਤਿਪਟ੍ਠਾਨਵਰੁਤ੍ਤਮਂ. ਅਥ ਵਾ ਵਰਂ ਸਤਿਪਟ੍ਠਾਨਮਯਂ ਉਤ੍ਤਮਵੀਥਿਨ੍ਤਿ ਅਤ੍ਥੋ.

ਇਦਾਨਿ ਤਸ੍ਸ ਨਿਬ੍ਬਾਨਮਹਾਨਗਰਸ੍ਸ ਤਸ੍ਸਂ ਸਤਿਪਟ੍ਠਾਨਵੀਥਿਯਂ ਚਤ੍ਤਾਰਿ ਸਾਮਞ੍ਞਫਲਾਨਿ ਚਤਸ੍ਸੋ ਪਟਿਸਮ੍ਭਿਦਾ ਛ ਅਭਿਞ੍ਞਾ ਅਟ੍ਠ ਸਮਾਪਤ੍ਤਿਯੋਤਿ ਇਮਾਨਿ ਮਹਗ੍ਘਰਤਨਾਨਿ ਉਭੋਸੁ ਪਸ੍ਸੇਸੁ ਧਮ੍ਮਾਪਣੇ ਪਸਾਰੇਸਿ. ਤੇਨ ਵੁਤ੍ਤਂ –

੫. ‘‘ਫਲੇ ਚਤ੍ਤਾਰਿ ਸਾਮਞ੍ਞੇ, ਚਤਸ੍ਸੋ ਪਟਿਸਮ੍ਭਿਦਾ;

ਛਲ਼ਭਿਞ੍ਞਾਟ੍ਠਸਮਾਪਤ੍ਤੀ, ਪਸਾਰੇਸਿ ਤਤ੍ਥ ਵੀਥਿਯ’’ਨ੍ਤਿ.

ਇਦਾਨਿ ਭਗਵਾ ਇਮਾਨਿ ਰਤਨਭਣ੍ਡਾਨਿ ਯੇ ਪਨ ਅਪ੍ਪਮਤ੍ਤਾ ਸਤਿਮਨ੍ਤੋ ਪਣ੍ਡਿਤਾ ਹਿਰਿਓਤ੍ਤਪ੍ਪਵੀਰਿਯਾਦੀਹਿ ਸਮਨ੍ਨਾਗਤਾ, ਤੇ ਆਦੀਯਨ੍ਤੀਤਿ ਤੇਸਂ ਰਤਨਾਨਂ ਹਰਣੂਪਾਯਂ ਦਸ੍ਸੇਨ੍ਤੋ –

੬. ‘‘ਯੇ ਅਪ੍ਪਮਤ੍ਤਾ ਅਖਿਲਾ, ਹਿਰਿਵੀਰਿਯੇਹੁਪਾਗਤਾ;

ਤੇ ਤੇ ਇਮੇ ਗੁਣਵਰੇ, ਆਦਿਯਨ੍ਤਿ ਯਥਾਸੁਖ’’ਨ੍ਤਿ. – ਆਹ;

ਤਤ੍ਥ ਯੇਤਿ ਅਨਿਯਮੁਦ੍ਦੇਸੋ. ਅਪ੍ਪਮਤ੍ਤਾਤਿ ਪਮਾਦਸ੍ਸ ਪਟਿਪਕ੍ਖਭੂਤੇਨ ਸਤਿਯਾ ਅਵਿਪ੍ਪਵਾਸਲਕ੍ਖਣੇਨ ਅਪ੍ਪਮਾਦੇਨ ਸਮਨ੍ਨਾਗਤਾ. ਅਖਿਲਾਤਿ ਪਞ੍ਚਚੇਤੋਖਿਲਰਹਿਤਾ. ਹਿਰਿਵੀਰਿਯੇਹੁਪਾਗਤਾਤਿ ਕਾਯਦੁਚ੍ਚਰਿਤਾਦੀਹਿ ਹਿਰੀਯਤੀਤਿ ਹਿਰੀ, ਲਜ੍ਜਾਯੇਤਂ ਅਧਿਵਚਨਂ. ਵੀਰਸ੍ਸ ਭਾਵੋ ਵੀਰਿਯਂ, ਤਂ ਉਸ੍ਸਾਹਲਕ੍ਖਣਂ. ਤੇਹਿ ਹਿਰਿਵੀਰਿਯੇਹਿ ਉਪਾਗਤਾ ਸਮਨ੍ਨਾਗਤਾ ਭਬ੍ਬਪੁਗ੍ਗਲਾ. ਤੇਤਿ ਇਦਂ ਪੁਬ੍ਬੇ ਅਨਿਯਮੁਦ੍ਦੇਸਸ੍ਸ ਨਿਯਮੁਦ੍ਦੇਸੋ. ਪੁਨ ਤੇਤਿ ਵੁਤ੍ਤਪ੍ਪਕਾਰੇ ਗੁਣਰਤਨਵਿਸੇਸੇ ਤੇ ਕੁਲਪੁਤ੍ਤਾ ਆਦਿਯਨ੍ਤਿ ਪਟਿਲਭਨ੍ਤਿ ਅਧਿਗਚ੍ਛਨ੍ਤੀਤਿ ਅਤ੍ਥੋ. ਸਬ੍ਬਂ ਪਨ ਸੁਮਨੋ ਭਗਵਾ ਕਤਵਿਦਿਤਮਨੋ ਧਮ੍ਮਭੇਰਿਂ ਆਹਨਿਤ੍ਵਾ ਧਮ੍ਮਨਗਰਂ ਮਾਪੇਤ੍ਵਾ ਇਮਿਨਾ ਨਯੇਨ ਪਠਮਮੇਵ ਸਤਸਹਸ੍ਸਕੋਟਿਯੋ ਬੋਧੇਸਿ. ਤੇਨ ਵੁਤ੍ਤਂ –

੭. ‘‘ਏਵਮੇਤੇਨ ਯੋਗੇਨ, ਉਦ੍ਧਰਨ੍ਤੋ ਮਹਾਜਨਂ;

ਬੋਧੇਸਿ ਪਠਮਂ ਸਤ੍ਥਾ, ਕੋਟਿਸਤਸਹਸ੍ਸਿਯੋ’’ਤਿ.

ਤਤ੍ਥ ਉਦ੍ਧਰਨ੍ਤੋਤਿ ਸਂਸਾਰਸਾਗਰਤੋ ਅਰਿਯਮਗ੍ਗਨਾਵਾਯ ਸਮੁਦ੍ਧਰਨ੍ਤੋ. ਕੋਟਿਸਤਸਹਸ੍ਸਿਯੋਤਿ ਸਤਸਹਸ੍ਸਕੋਟਿਯੋਤਿ ਅਤ੍ਥੋ. ਵਿਪਰਿਯਾਯੇਨ ਨਿਦ੍ਦਿਟ੍ਠਂ.

ਯਦਾ ਪਨ ਸੁਮਨੋ ਲੋਕਨਾਯਕੋ ਸੁਨਨ੍ਦਵਤੀਨਗਰੇ ਅਮ੍ਬਰੁਕ੍ਖਮੂਲੇ ਤਿਤ੍ਥਿਯਮਦਮਾਨਮਦ੍ਦਨਂ ਯਮਕਪਾਟਿਹਾਰਿਯਂ ਕਤ੍ਵਾ ਸਤ੍ਤਾਨਂ ਕੋਟਿਸਹਸ੍ਸਂ ਧਮ੍ਮਾਮਤਂ ਪਾਯੇਸਿ. ਅਯਂ ਦੁਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੮. ‘‘ਯਮ੍ਹਿ ਕਾਲੇ ਮਹਾਵੀਰੋ, ਓਵਦੀ ਤਿਤ੍ਥਿਯੇ ਗਣੇ;

ਕੋਟਿਸਹਸ੍ਸਾ ਭਿਸਮਿਂਸੁ, ਦੁਤਿਯੇ ਧਮ੍ਮਦੇਸਨੇ’’ਤਿ.

ਤਤ੍ਥ ਤਿਤ੍ਥਿਯੇ ਗਣੇਤਿ ਤਿਤ੍ਥਿਯਭੂਤੇ ਗਣੇ, ਤਿਤ੍ਥਿਯਾਨਂ ਗਣੇ ਵਾ ‘‘ਤਿਤ੍ਥਿਯੇ ਅਭਿਮਦ੍ਦਨ੍ਤੋ, ਬੁਦ੍ਧੋ ਧਮ੍ਮਮਦੇਸਯੀ’’ਤਿ ਪਠਨ੍ਤਿ ਕੇਚਿ.

ਯਦਾ ਪਨ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਦੇਵਤਾ ਇਮਸ੍ਮਿਂ ਚਕ੍ਕਵਾਲ਼ੇ ਸਨ੍ਨਿਪਤਿਤ੍ਵਾ ਮਨੁਸ੍ਸਾ ਚ ਨਿਰੋਧਕਥਂ ਸਮੁਟ੍ਠਾਪੇਸੁਂ – ‘‘ਕਥਂ ਨਿਰੋਧਂ ਸਮਾਪਜ੍ਜਨ੍ਤਿ, ਕਥਂ ਨਿਰੋਧਸਮਾਪਨ੍ਨਾ ਹੋਨ੍ਤਿ, ਕਥਂ ਨਿਰੋਧਾ ਵੁਟ੍ਠਹਨ੍ਤੀ’’ਤਿ? ਏਵਂ ਸਮਾਪਜ੍ਜਨਅਧਿਟ੍ਠਾਨਵੁਟ੍ਠਾਨਾਦੀਸੁ ਵਿਨਿਚ੍ਛਯਂ ਕਾਤੁਂ ਅਸਕ੍ਕੋਨ੍ਤਾ ਸਹ ਮਨੁਸ੍ਸੇਹਿ ਛਸੁ ਕਾਮਾਵਚਰਦੇਵਲੋਕੇਸੁ ਦੇਵਾ ਚ ਨਵਸੁ ਬ੍ਰਹ੍ਮਲੋਕੇਸੁ ਬ੍ਰਹ੍ਮਾਨੋ ਚ ਦ੍ਵੇਲ਼੍ਹਕਜਾਤਾ ਦ੍ਵਿਧਾ ਅਹੇਸੁਂ. ਤਤੋ ਨਰਸੁਨ੍ਦਰੇਨ ਅਰਿਨ੍ਦਮੇਨ ਨਾਮ ਰਞ੍ਞਾ ਸਦ੍ਧਿਂ ਸਾਯਨ੍ਹਸਮਯੇ ਸੁਮਨਦਸਬਲਂ ਸਬ੍ਬਲੋਕਨਾਥਂ ਉਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਅਰਿਨ੍ਦਮੋ ਰਾਜਾ ਭਗਵਨ੍ਤਂ ਨਿਰੋਧਪਞ੍ਹਂ ਪੁਚ੍ਛਿ. ਤਤੋ ਭਗਵਤਾ ਨਿਰੋਧਪਞ੍ਹੇ ਵਿਸ੍ਸਜ੍ਜਿਤੇ ਨਵੁਤਿਪਾਣਕੋਟਿਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਅਯਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੯. ‘‘ਯਦਾ ਦੇਵਾ ਮਨੁਸ੍ਸਾ ਚ, ਸਮਗ੍ਗਾ ਏਕਮਾਨਸਾ;

ਨਿਰੋਧਪਞ੍ਹਂ ਪੁਚ੍ਛਿਂਸੁ, ਸਂਸਯਂ ਚਾਪਿ ਮਾਨਸਂ.

੧੦. ‘‘ਤਦਾਪਿ ਧਮ੍ਮਦੇਸਨੇ, ਨਿਰੋਧਪਰਿਦੀਪਨੇ;

ਨਵੁਤਿਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਤਸ੍ਸ ਪਨ ਸੁਮਨਸ੍ਸ ਭਗਵਤੋ ਤਯੋ ਸਾਵਕਸਨ੍ਨਿਪਾਤਾ ਅਹੇਸੁਂ. ਤਤ੍ਥ ਪਠਮਸਨ੍ਨਿਪਾਤੇ ਮੇਖਲਨਗਰਂ ਉਪਨਿਸ੍ਸਾਯ ਵਸ੍ਸਂ ਵਸਿਤ੍ਵਾ ਪਠਮਪਵਾਰਣਾਯ ਅਰਹਨ੍ਤਾਨਂ ਕੋਟਿਸਹਸ੍ਸੇਨ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤੇਨ ਸਦ੍ਧਿਂ ਭਗਵਾ ਪਵਾਰੇਸਿ, ਅਯਂ ਪਠਮੋ ਸਨ੍ਨਿਪਾਤੋ ਅਹੋਸਿ. ਅਥਾਪਰੇਨ ਸਮਯੇਨ ਸਙ੍ਕਸ੍ਸਨਗਰਸ੍ਸਾਵਿਦੂਰੇ ਅਰਿਨ੍ਦਮਰਾਜਕੁਸਲਬਲਨਿਬ੍ਬਤ੍ਤੇ ਯੋਜਨਪ੍ਪਮਾਣੇ ਕਨਕਪਬ੍ਬਤੇ ਨਿਸਿਨ੍ਨੋ ਸਰਦਸਮਯਰੁਚਿਰਕਰਨਿਕਰੋ ਦਿਵਸਕਰੋ ਵਿਯ ਯੁਗਨ੍ਧਰਪਬ੍ਬਤੇ ਮੁਨਿਵਰਦਿਵਸਕਰੋ ਅਰਿਨ੍ਦਮਰਾਜਾਨਂ ਪਰਿਵਾਰੇਤ੍ਵਾ ਆਗਤਾਨਂ ਪੁਰਿਸਾਨਂ ਨਵੁਤਿਕੋਟਿਸਹਸ੍ਸਾਨਿ ਦਮੇਤ੍ਵਾ ਸਬ੍ਬੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਾਜੇਤ੍ਵਾ ਤਸ੍ਮਿਂਯੇਵ ਦਿਵਸੇ ਅਰਹਤ੍ਤਂ ਪਤ੍ਤੇਹਿ ਭਿਕ੍ਖੂਹਿ ਪਰਿਵੁਤੋ ਚਤੁਰਙ੍ਗਸਮਨ੍ਨਾਗਤੇ ਸਨ੍ਨਿਪਾਤੇ ਪਾਤਿਮੋਕ੍ਖਂ ਉਦ੍ਦਿਸਿ. ਅਯਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਯਦਾ ਪਨ ਸਕ੍ਕੋ ਦੇਵਰਾਜਾ ਸੁਗਤਦਸ੍ਸਨਤ੍ਥਾਯ ਉਪਸਙ੍ਕਮਿ, ਤਦਾ ਸੁਮਨੋ ਭਗਵਾ ਅਸੀਤਿਯਾ ਅਰਹਨ੍ਤਕੋਟਿਸਹਸ੍ਸੇਹਿ ਪਰਿਵੁਤੋ ਪਾਤਿਮੋਕ੍ਖਂ ਉਦ੍ਦਿਸਿ, ਅਯਂ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੧੧. ‘‘ਸਨ੍ਨਿਪਾਤਾ ਤਯੋ ਆਸੁਂ, ਸੁਮਨਸ੍ਸ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੧੨. ‘‘ਵਸ੍ਸਂਵੁਟ੍ਠਸ੍ਸ ਭਗਵਤੋ, ਅਭਿਘੁਟ੍ਠੇ ਪਵਾਰਣੇ;

ਕੋਟਿਸਤਸਹਸ੍ਸੇਹਿ, ਪਵਾਰੇਸਿ ਤਥਾਗਤੋ.

੧੩. ‘‘ਤਤੋ ਪਰਂ ਸਨ੍ਨਿਪਾਤੇ, ਵਿਮਲੇ ਕਞ੍ਚਨਪਬ੍ਬਤੇ;

ਨਵੁਤਿਕੋਟਿਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੧੪. ‘‘ਯਦਾ ਸਕ੍ਕੋ ਦੇਵਰਾਜਾ, ਬੁਦ੍ਧਦਸ੍ਸਨੁਪਾਗਮਿ;

ਅਸੀਤਿਕੋਟਿਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ’’ਤਿ.

ਤਤ੍ਥ ਅਭਿਘੁਟ੍ਠੇ ਪਵਾਰਣੇਤਿ ਲਿਙ੍ਗਵਿਪਲ੍ਲਾਸੋ ਦਟ੍ਠਬ੍ਬੋ, ਅਭਿਘੁਟ੍ਠਾਯ ਪਵਾਰਣਾਯਾਤਿ ਅਤ੍ਥੋ. ਤਤੋਪਰਨ੍ਤਿ ਤਤੋ ਅਪਰਭਾਗੇ. ਕਞ੍ਚਨਪਬ੍ਬਤੇਤਿ ਕਨਕਮਯੇ ਪਬ੍ਬਤੇ. ਬੁਦ੍ਧਦਸ੍ਸਨੁਪਾਗਮੀਤਿ ਬੁਦ੍ਧਦਸ੍ਸਨਤ੍ਥਮੁਪਾਗਮਿ. ਤਦਾ ਕਿਰ ਅਮ੍ਹਾਕਂ ਬੋਧਿਸਤ੍ਤੋ ਅਤੁਲੋ ਨਾਮ ਨਾਗਰਾਜਾ ਅਹੋਸਿ ਮਹਿਦ੍ਧਿਕੋ ਮਹਾਨੁਭਾਵੋ. ਸੋ ‘‘ਲੋਕੇ ਬੁਦ੍ਧੋ ਉਪ੍ਪਨ੍ਨੋ’’ਤਿ ਸੁਤ੍ਵਾ ਞਾਤਿਗਣਪਰਿਵੁਤੋ ਸਕਭਵਨਾ ਨਿਕ੍ਖਮਿਤ੍ਵਾ ਕੋਟਿਸਤਸਹਸ੍ਸਭਿਕ੍ਖੁਪਰਿਵਾਰਸ੍ਸ ਸੁਮਨਸ੍ਸ ਭਗਵਤੋ ਦਿਬ੍ਬੇਹਿ ਤੁਰਿਯੇਹਿ ਉਪਹਾਰਂ ਕਾਰੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਪਚ੍ਚੇਕਦੁਸ੍ਸਯੁਗਾਨਿ ਦਤ੍ਵਾ ਸਰਣੇਸੁ ਪਤਿਟ੍ਠਾਸਿ. ਸੋਪਿ ਨਂ ਸਤ੍ਥਾ ‘‘ਅਨਾਗਤੇ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੧੫. ‘‘ਅਹਂ ਤੇਨ ਸਮਯੇਨ, ਨਾਗਰਾਜਾ ਮਹਿਦ੍ਧਿਕੋ;

ਅਤੁਲੋ ਨਾਮ ਨਾਮੇਨ, ਉਸ੍ਸਨ੍ਨਕੁਸਲਸਞ੍ਚਯੋ.

੧੬. ‘‘ਤਦਾਹਂ ਨਾਗਭਵਨਾ, ਨਿਕ੍ਖਮਿਤ੍ਵਾ ਸਞਾਤਿਭਿ;

ਨਾਗਾਨਂ ਦਿਬ੍ਬਤੁਰਿਯੇਹਿ, ਸਸਙ੍ਘਂ ਜਿਨਮੁਪਟ੍ਠਹਿਂ.

੧੭. ‘‘ਕੋਟਿਸਤਸਹਸ੍ਸਾਨਂ, ਅਨ੍ਨਪਾਨੇਨ ਤਪ੍ਪਯਿਂ;

ਪਚ੍ਚੇਕਦੁਸ੍ਸਯੁਗਂ ਦਤ੍ਵਾ, ਸਰਣਂ ਤਮੁਪਾਗਮਿਂ.

੧੮. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸੁਮਨੋ ਲੋਕਨਾਯਕੋ;

ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੯. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.

ਯਥਾ ਕੋਣ੍ਡਞ੍ਞਬੁਦ੍ਧਵਂਸੇ, ਏਵਂ ਅਟ੍ਠ ਗਾਥਾ ਵਿਤ੍ਥਾਰੇਤਬ੍ਬਾਤਿ.

੨੦. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਸ੍ਸ ਪਨ ਸੁਮਨਸ੍ਸ ਭਗਵਤੋ ਮੇਖਲਂ ਨਾਮ ਨਗਰਂ ਅਹੋਸਿ, ਸੁਦਤ੍ਤੋ ਨਾਮ ਰਾਜਾ ਪਿਤਾ, ਸਿਰਿਮਾ ਨਾਮ ਦੇਵੀ ਮਾਤਾ, ਸਰਣੋ ਚ ਭਾਵਿਤਤ੍ਤੋ ਚ ਦ੍ਵੇ ਅਗ੍ਗਸਾਵਕਾ, ਉਦੇਨੋ ਨਾਮੁਪਟ੍ਠਾਕੋ, ਸੋਣਾ ਚ ਉਪਸੋਣਾ ਚ ਦ੍ਵੇ ਅਗ੍ਗਸਾਵਿਕਾ, ਨਾਗਰੁਕ੍ਖੋ ਬੋਧਿ, ਨਵੁਤਿਹਤ੍ਥੁਬ੍ਬੇਧਂ ਸਰੀਰਂ, ਨਵੁਤਿਯੇਵ ਵਸ੍ਸਸਹਸ੍ਸਾਨਿ ਆਯੁਪ੍ਪਮਾਣਂ ਅਹੋਸਿ, ਵਟਂਸਿਕਾ ਨਾਮਸ੍ਸ ਮਹੇਸੀ ਦੇਵੀ, ਅਨੂਪਮੋ ਨਾਮ ਪੁਤ੍ਤੋ ਅਹੋਸਿ, ਹਤ੍ਥਿਯਾਨੇਨ ਨਿਕ੍ਖਮਿ. ਉਪਟ੍ਠਾਕੋ ਅਙ੍ਗਰਾਜਾ. ਅਙ੍ਗਾਰਾਮੇ ਵਸੀਤਿ. ਤੇਨ ਵੁਤ੍ਤਂ –

੨੧. ‘‘ਨਗਰਂ ਮੇਖਲਂ ਨਾਮ, ਸੁਦਤ੍ਤੋ ਨਾਮ ਖਤ੍ਤਿਯੋ;

ਸਿਰਿਮਾ ਨਾਮ ਜਨਿਕਾ, ਸੁਮਨਸ੍ਸ ਮਹੇਸਿਨੋ.

੨੨. ‘‘ਨਵਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;

ਚਨ੍ਦੋ ਸੁਚਨ੍ਦੋ ਵਟਂਸੋ ਚ, ਤਯੋ ਪਾਸਾਦਮੁਤ੍ਤਮਾ.

੨੩. ‘‘ਤੇਸਟ੍ਠਿਸਤਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਵਟਂਸਿਕਾ ਨਾਮ ਨਾਰੀ, ਅਨੂਪਮੋ ਨਾਮ ਅਤ੍ਰਜੋ.

੨੪. ‘‘ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਹਤ੍ਥਿਯਾਨੇਨ ਨਿਕ੍ਖਮਿ;

ਅਨੂਨਦਸਮਾਸਾਨਿ, ਪਧਾਨਂ ਪਦਹੀ ਜਿਨੋ.

੨੫. ‘‘ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਸੁਮਨੋ ਲੋਕਨਾਯਕੋ;

ਵਤ੍ਤਿ ਚਕ੍ਕਂ ਮਹਾਵੀਰੋ, ਮੇਖਲੇ ਪੁਰਮੁਤ੍ਤਮੇ.

੨੬. ‘‘ਸਰਣੋ ਭਾਵਿਤਤ੍ਤੋ ਚ, ਅਹੇਸੁਂ ਅਗ੍ਗਸਾਵਕਾ;

ਉਦੇਨੋ ਨਾਮੁਪਟ੍ਠਾਕੋ, ਸੁਮਨਸ੍ਸ ਮਹੇਸਿਨੋ.

੨੭. ‘‘ਸੋਣਾ ਚ ਉਪਸੋਣਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਸੋਪਿ ਬੁਦ੍ਧੋ ਅਮਿਤਯਸੋ, ਨਾਗਮੂਲੇ ਅਬੁਜ੍ਝਥ.

੨੮. ‘‘ਵਰੁਣੋ ਚੇਵ ਸਰਣੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਚਾਲਾ ਚ ਉਪਚਾਲਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੯. ‘‘ਉਚ੍ਚਤ੍ਤਨੇਨ ਸੋ ਬੁਦ੍ਧੋ, ਨਵੁਤਿਹਤ੍ਥਮੁਗ੍ਗਤੋ;

ਕਞ੍ਚਨਗ੍ਘਿਯਸਙ੍ਕਾਸੋ, ਦਸਸਹਸ੍ਸੀ ਵਿਰੋਚਤਿ.

੩੦. ‘‘ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੧. ‘‘ਤਾਰਣੀਯੇ ਤਾਰਯਿਤ੍ਵਾ, ਬੋਧਨੀਯੇ ਚ ਬੋਧਯਿ;

ਪਰਿਨਿਬ੍ਬਾਯਿ ਸਮ੍ਬੁਦ੍ਧੋ, ਉਲ਼ੁਰਾਜਾਵ ਅਤ੍ਥਮਿ.

੩੨. ‘‘ਤੇ ਚ ਖੀਣਾਸਵਾ ਭਿਕ੍ਖੂ, ਸੋ ਚ ਬੁਦ੍ਧੋ ਅਸਾਦਿਸੋ;

ਅਤੁਲਪ੍ਪਭਂ ਦਸ੍ਸਯਿਤ੍ਵਾ, ਨਿਬ੍ਬੁਤਾ ਤੇ ਮਹਾਯਸਾ.

੩੩. ‘‘ਤਞ੍ਚ ਞਾਣਂ ਅਤੁਲਿਯਂ, ਤਾਨਿ ਚ ਅਤੁਲਾਨਿ ਰਤਨਾਨਿ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ.

੩੪. ‘‘ਸੁਮਨੋ ਯਸਧਰੋ ਬੁਦ੍ਧੋ, ਅਙ੍ਗਾਰਾਮਮ੍ਹਿ ਨਿਬ੍ਬੁਤੋ;

ਤਤ੍ਥੇਵ ਤਸ੍ਸ ਜਿਨਥੂਪੋ, ਚਤੁਯੋਜਨਮੁਗ੍ਗਤੋ’’ਤਿ.

ਤਤ੍ਥ ਕਞ੍ਚਨਗ੍ਘਿਯਸਙ੍ਕਾਸੋਤਿ ਵਿਵਿਧਰਤਨਵਿਚਿਤ੍ਤਕਞ੍ਚਨਮਯਗ੍ਘਿਕਸਦਿਸਰੂਪਸੋਭੋ. ਦਸਸਹਸ੍ਸੀ ਵਿਰੋਚਤੀਤਿ ਤਸ੍ਸ ਪਭਾਯ ਦਸਸਹਸ੍ਸੀਪਿ ਲੋਕਧਾਤੁ ਵਿਰੋਚਤੀਤਿ ਅਤ੍ਥੋ. ਤਾਰਣੀਯੇਤਿ ਤਾਰਯਿਤਬ੍ਬੇ, ਤਾਰਯਿਤੁਂ ਵੁਤ੍ਤੇ ਸਬ੍ਬੇ ਬੁਦ੍ਧਵੇਨੇਯ੍ਯੇਤਿ ਅਤ੍ਥੋ. ਉਲ਼ੁਰਾਜਾਵਾਤਿ ਚਨ੍ਦੋ ਵਿਯ. ਅਤ੍ਥਮੀਤਿ ਅਤ੍ਥਙ੍ਗਤੋ. ਕੇਚਿ ‘‘ਅਤ੍ਥਂ ਗਤੋ’’ਤਿ ਪਠਨ੍ਤਿ. ਅਸਾਦਿਸੋਤਿ ਅਸਦਿਸੋ. ਮਹਾਯਸਾਤਿ ਮਹਾਕਿਤ੍ਤਿਸਦ੍ਦਾ ਮਹਾਪਰਿਵਾਰਾ ਚ. ਤਞ੍ਚ ਞਾਣਨ੍ਤਿ ਤਂ ਸਬ੍ਬਞ੍ਞੁਤਞ੍ਞਾਣਞ੍ਚ. ਅਤੁਲਿਯਨ੍ਤਿ ਅਤੁਲ੍ਯਂ ਅਸਦਿਸਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਸੁਮਨਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਚਤੁਤ੍ਥੋ ਬੁਦ੍ਧਵਂਸੋ.