੫. ਮਙ੍ਗਲਬੁਦ੍ਧਵਂਸਵਣ੍ਣਨਾ

ਕੋਣ੍ਡਞ੍ਞੇ ਕਿਰ ਸਤ੍ਥਰਿ ਪਰਿਨਿਬ੍ਬੁਤੇ ਤਸ੍ਸ ਸਾਸਨਂ ਵਸ੍ਸਸਤਸਹਸ੍ਸਂ ਪਵਤ੍ਤਿਤ੍ਥ. ਬੁਦ੍ਧਾਨੁਬੁਦ੍ਧਾਨਂ ਸਾਵਕਾਨਂ ਅਨ੍ਤਰਧਾਨੇਨ ਸਾਸਨਮਸ੍ਸ ਅਨ੍ਤਰਧਾਯਿ. ਕੋਣ੍ਡਞ੍ਞਸ੍ਸ ਪਨ ਅਪਰਭਾਗੇ ਏਕਮਸਙ੍ਖ੍ਯੇਯ੍ਯਮਤਿਕ੍ਕਮਿਤ੍ਵਾ ਏਕਸ੍ਮਿਂਯੇਵ ਕਪ੍ਪੇ ਚਤ੍ਤਾਰੋ ਬੁਦ੍ਧਾ ਨਿਬ੍ਬਤ੍ਤਿਂਸੁ ਮਙ੍ਗਲੋ, ਸੁਮਨੋ, ਰੇਵਤੋ, ਸੋਭਿਤੋਤਿ. ਤਤ੍ਥ ਮਙ੍ਗਲੋ ਪਨ ਲੋਕਨਾਯਕੋ ਕਪ੍ਪਸਤਸਹਸ੍ਸਾਧਿਕਾਨਿ ਸੋਲ਼ਸ ਅਸਙ੍ਖ੍ਯੇਯ੍ਯਾਨਿ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਪਞ੍ਚਸੁ ਪੁਬ੍ਬਨਿਮਿਤ੍ਤੇਸੁ ਉਪ੍ਪਨ੍ਨੇਸੁ ਬੁਦ੍ਧਕੋਲਾਹਲਂ ਨਾਮ ਉਦਪਾਦਿ, ਤਦਾ ਦਸਸਹਸ੍ਸਚਕ੍ਕਵਾਲ਼ੇ ਦੇਵਤਾਯੋ ਏਕਸ੍ਮਿਂ ਚਕ੍ਕਵਾਲ਼ੇ ਸਨ੍ਨਿਪਤਿਤ੍ਵਾ ਆਯਾਚਨ੍ਤਿ –

‘‘ਕਾਲੋ ਖੋ ਤੇ ਮਹਾਵੀਰ, ਉਪ੍ਪਜ੍ਜ ਮਾਤੁਕੁਚ੍ਛਿਯਂ;

ਸਦੇਵਕਂ ਤਾਰਯਨ੍ਤੋ, ਬੁਜ੍ਝਸ੍ਸੁ ਅਮਤਂ ਪਦ’’ਨ੍ਤਿ. (ਬੁ. ਵਂ. ੧.੬੭);

ਏਵਂ ਦੇਵੇਹਿ ਆਯਾਚਿਤੋ ਕਤਪਞ੍ਚਵਿਲੋਕਨੋ ਤੁਸਿਤਾ ਕਾਯਾ ਚਵਿਤ੍ਵਾ ਸਬ੍ਬਨਗਰੁਤ੍ਤਮੇ ਉਤ੍ਤਰਨਗਰੇ ਅਨੁਤ੍ਤਰਸ੍ਸ ਉਤ੍ਤਰਸ੍ਸ ਨਾਮ ਰਞ੍ਞੋ ਕੁਲੇ ਉਤ੍ਤਰਾਯ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ. ਤਦਾ ਅਨੇਕਾਨਿ ਪਾਟਿਹਾਰਿਯਾਨਿ ਪਾਤੁਰਹੁਂ. ਤਾਨਿ ਦੀਪਙ੍ਕਰਬੁਦ੍ਧਵਂਸੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ. ਤਸ੍ਸਾ ਉਤ੍ਤਰਾਯ ਕਿਰ ਮਹਾਦੇਵਿਯਾ ਕੁਚ੍ਛਿਸ੍ਮਿਂ ਸਬ੍ਬਲੋਕਮਙ੍ਗਲਸ੍ਸ ਮਙ੍ਗਲਸ੍ਸ ਮਹਾਸਤ੍ਤਸ੍ਸ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਸਰੀਰਪ੍ਪਭਾ ਰਤ੍ਤਿਨ੍ਦਿਵਂ ਅਸੀਤਿਹਤ੍ਥਪ੍ਪਮਾਣਂ ਪਦੇਸਂ ਫਰਿਤ੍ਵਾ ਚਨ੍ਦਾਲੋਕਸੂਰਿਯਾਲੋਕੇਹਿ ਅਨਭਿਭਵਨੀਯਾ ਹੁਤ੍ਵਾ ਅਟ੍ਠਾਸਿ. ਸਾ ਚ ਅਞ੍ਞੇਨਾਲੋਕੇਨ ਵਿਨਾ ਅਤ੍ਤਨੋ ਸਰੀਰਪ੍ਪਭਾਸਮੁਦਯੇਨੇਵ ਅਨ੍ਧਕਾਰਂ ਵਿਧਮਿਤ੍ਵਾ ਅਟ੍ਠਸਟ੍ਠਿਯਾ ਧਾਤੀਹਿ ਪਰਿਚਾਰਿਯਮਾਨਾ ਵਿਚਰਤਿ.

ਸਾ ਕਿਰ ਦੇਵਤਾਹਿ ਕਤਾਰਕ੍ਖਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਪਰਮਸੁਰਭਿਕੁਸੁਮਫਲਧਰਸਾਖਾਵਿਟਪੇ ਕਮਲਕੁਵਲਯਸਮਲਙ੍ਕਤੇ ਰੁਰੁ-ਸੀਹ-ਬ੍ਯਗ੍ਘ-ਗਜ-ਗਵਯ-ਮਹਿਂਸਪਸਦਵਿਵਿਧਮਿਗਗਣਵਿਚਰਿਤੇ ਪਰਮਰਮਣੀਯੇ ਉਤ੍ਤਰਮਧੁਰੁਯ੍ਯਾਨੇ ਨਾਮ ਮਙ੍ਗਲੁਯ੍ਯਾਨੇ ਮਙ੍ਗਲਮਹਾਪੁਰਿਸਂ ਵਿਜਾਯਿ. ਸੋ ਜਾਤਮਤ੍ਤੋਵ ਮਹਾਸਤ੍ਤੋ ਸਬ੍ਬਾ ਦਿਸਾ ਵਿਲੋਕੇਤ੍ਵਾ ਉਤ੍ਤਰਾਭਿਮੁਖੋ ਸਤ੍ਤਪਦਵੀਤਿਹਾਰੇਨ ਗਨ੍ਤ੍ਵਾ ਆਸਭਿਂ ਵਾਚਂ ਨਿਚ੍ਛਾਰੇਸਿ. ਤਸ੍ਮਿਞ੍ਚ ਖਣੇ ਸਕਲਦਸਸਹਸ੍ਸਿਲੋਕਧਾਤੂਸੁ ਦੇਵਤਾ ਦਿਸ੍ਸਮਾਨਸਰੀਰਾ ਦਿਬ੍ਬਮਾਲਾਦੀਹਿ ਸਮਲਙ੍ਕਤਗਤ੍ਤਾ ਤਤ੍ਥ ਤਤ੍ਥ ਠਤ੍ਵਾ ਜਯਮਙ੍ਗਲਥੁਤਿਵਚਨਾਨਿ ਸਮ੍ਪਵਤ੍ਤੇਸੁਂ. ਪਾਟਿਹਾਰਿਯਾਨਿ ਵੁਤ੍ਤਨਯਾਨੇਵ. ਨਾਮਗ੍ਗਹਣਦਿਵਸੇ ਪਨਸ੍ਸ ਲਕ੍ਖਣਪਾਠਕਾ ਸਬ੍ਬਮਙ੍ਗਲਸਮ੍ਪਤ੍ਤਿਯਾ ਜਾਤੋਤਿ ‘‘ਮਙ੍ਗਲਕੁਮਾਰੋ’’ ਤ੍ਵੇਵ ਨਾਮਂ ਕਰਿਂਸੁ.

ਤਸ੍ਸ ਕਿਰ ਯਸਵਾ ਰੁਚਿਮਾ ਸਿਰਿਮਾਤਿ ਤਯੋ ਪਾਸਾਦਾ ਅਹੇਸੁਂ. ਯਸਵਤੀਦੇਵਿਪ੍ਪਮੁਖਾਨਿ ਤਿਂਸਨਾਟਕਿਤ੍ਥਿਸਹਸ੍ਸਾਨਿ ਅਹੇਸੁਂ. ਤਤ੍ਥ ਮਹਾਸਤ੍ਤੋ ਨਵਵਸ੍ਸਸਹਸ੍ਸਾਨਿ ਦਿਬ੍ਬਸੁਖਸਦਿਸਂ ਸੁਖਂ ਅਨੁਭਵਿਤ੍ਵਾ ਯਸਵਤਿਯਾ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਸੀਲਵਂ ਨਾਮ ਪੁਤ੍ਤਂ ਲਭਿਤ੍ਵਾ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਅਲਙ੍ਕਤਂ ਪਣ੍ਡਰਂ ਨਾਮ ਸੁਨ੍ਦਰਤੁਰਙ੍ਗਵਰਮਾਰੁਯ੍ਹ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਪਨ ਪਬ੍ਬਜਨ੍ਤਂ ਤਿਸ੍ਸੋ ਮਨੁਸ੍ਸਕੋਟਿਯੋ ਅਨੁਪਬ੍ਬਜਿਂਸੁ. ਤੇਹਿ ਪਰਿਵੁਤੋ ਮਹਾਪੁਰਿਸੋ ਅਟ੍ਠ ਮਾਸੇ ਪਧਾਨਚਰਿਯਮਚਰਿ.

ਤਤੋ ਵਿਸਾਖਪੁਣ੍ਣਮਾਯ ਉਤ੍ਤਰਗਾਮੇ ਉਤ੍ਤਰਸੇਟ੍ਠਿਨੋ ਧੀਤਾਯ ਉਤ੍ਤਰਾਯ ਨਾਮ ਦਿਨ੍ਨਂ ਪਕ੍ਖਿਤ੍ਤਦਿਬ੍ਬੋਜਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸੁਰਭਿਕੁਸੁਮਾਲਙ੍ਕਤੇ ਨੀਲੋਭਾਸੇ ਮਨੋਰਮੇ ਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਉਤ੍ਤਰੇਨ ਨਾਮ ਆਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਅਸਿਤਞ੍ਜਨਗਿਰਿਸਙ੍ਕਾਸਂ ਅਕ੍ਕਨ੍ਤਵਰਕਨਕਜਾਲਕੂਟਂਵ ਸੀਤਚ੍ਛਾਯਂ ਵਿਵਿਧਮਿਗਗਣਸਮ੍ਪਾਤਵਿਰਹਿਤਂ ਮਨ੍ਦਮਾਲੁਤੇਰਿਤਾਯ ਘਨਸਾਖਾਯ ਸਮਲਙ੍ਕਤਂ ਨਚ੍ਚਨ੍ਤਮਿਵ ਪੀਤਿਯਾ ਵਿਰੋਚਮਾਨਂ ਨਾਗਬੋਧਿਂ ਉਪਸਙ੍ਕਮਿਤ੍ਵਾ ਮਤ੍ਤਵਰਨਾਗਗਾਮੀ ਨਾਗਬੋਧਿਂ ਪਦਕ੍ਖਿਣਂ ਕਤ੍ਵਾ ਪੁਬ੍ਬੁਤ੍ਤਰਪਸ੍ਸੇ ਠਤ੍ਵਾ ਅਟ੍ਠਪਣ੍ਣਾਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਤਤ੍ਥ ਪਲ੍ਲਙ੍ਕਂ ਆਭੁਜਿਤ੍ਵਾ ਚਤੁਰਙ੍ਗਸਮਨ੍ਨਾਗਤਂ ਵੀਰਿਯਂ ਅਧਿਟ੍ਠਹਿਤ੍ਵਾ ਸਬਲਂ ਮਾਰਬਲਂ ਵਿਦ੍ਧਂਸੇਤ੍ਵਾ ਪੁਬ੍ਬੇਨਿਵਾਸਦਿਬ੍ਬਚਕ੍ਖੁਞਾਣਾਨਿ ਪਟਿਲਭਿਤ੍ਵਾ ਪਚ੍ਚਯਾਕਾਰਸਮ੍ਮਸਨਂ ਕਤ੍ਵਾ ਖਨ੍ਧੇਸੁ ਅਨਿਚ੍ਚਾਦਿਵਸੇਨ ਅਭਿਨਿਵਿਸਿਤ੍ਵਾ ਅਨੁਕ੍ਕਮੇਨ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਪਤ੍ਵਾ –

‘‘ਅਨੇਕਜਾਤਿਸਂਸਾਰਂ, ਸਨ੍ਧਾਵਿਸ੍ਸਂ ਅਨਿਬ੍ਬਿਸਂ;

ਗਹਕਾਰਂ ਗਵੇਸਨ੍ਤੋ, ਦੁਕ੍ਖਾ ਜਾਤਿ ਪੁਨਪ੍ਪੁਨਂ.

‘‘ਗਹਕਾਰਕ ਦਿਟ੍ਠੋਸਿ, ਪੁਨ ਗੇਹਂ ਨ ਕਾਹਸਿ;

ਸਬ੍ਬਾ ਤੇ ਫਾਸੁਕਾ ਭਗ੍ਗਾ, ਗਹਕੂਟਂ ਵਿਸਙ੍ਖਤਂ;

ਵਿਸਙ੍ਖਾਰਗਤਂ ਚਿਤ੍ਤਂ, ਤਣ੍ਹਾਨਂ ਖਯਮਜ੍ਝਗਾ’’ਤਿ. (ਧ. ਪ. ੧੫੩-੧੫੪) –

ਉਦਾਨਂ ਉਦਾਨੇਸਿ.

ਮਙ੍ਗਲਸ੍ਸ ਪਨ ਸਮ੍ਮਾਸਮ੍ਬੁਦ੍ਧਸ੍ਸ ਅਞ੍ਞੇਹਿ ਬੁਦ੍ਧੇਹਿ ਅਧਿਕਤਰਾ ਸਰੀਰਪ੍ਪਭਾ ਅਹੋਸਿ. ਯਥਾ ਪਨ ਅਞ੍ਞੇਸਂ ਸਮ੍ਮਾਸਮ੍ਬੁਦ੍ਧਾਨਂ ਸਮਨ੍ਤਾ ਅਸੀਤਿਹਤ੍ਥਪ੍ਪਮਾਣਾ ਵਾ ਬ੍ਯਾਮਪ੍ਪਮਾਣਾ ਵਾ ਸਰੀਰਪ੍ਪਭਾ ਅਹੋਸਿ, ਨ ਏਵਂ ਤਸ੍ਸ. ਤਸ੍ਸ ਪਨ ਭਗਵਤੋ ਸਰੀਰਪ੍ਪਭਾ ਨਿਚ੍ਚਕਾਲਂ ਦਸਸਹਸ੍ਸਿਲੋਕਧਾਤੁਂ ਫਰਿਤ੍ਵਾ ਅਟ੍ਠਾਸਿ. ਤਰੁਗਿਰਿਘਰਪਾਕਾਰਘਟਕਵਾਟਾਦਯੋ ਸੁਵਣ੍ਣਪਟ੍ਟਪਰਿਯੋਨਦ੍ਧਾ ਵਿਯ ਅਹੇਸੁਂ. ਨਵੁਤਿਵਸ੍ਸਸਤਸਹਸ੍ਸਾਨਿ ਆਯੁ ਤਸ੍ਸ ਅਹੋਸਿ. ਏਤ੍ਤਕਂ ਕਾਲਂ ਚਨ੍ਦਸੂਰਿਯਤਾਰਕਾਦੀਨਂ ਪਭਾ ਨਤ੍ਥਿ. ਰਤ੍ਤਿਨ੍ਦਿਵਪਰਿਚ੍ਛੇਦੋ ਨ ਪਞ੍ਞਾਯਿਤ੍ਥ. ਦਿਵਾ ਸੂਰਿਯਾਲੋਕੇਨ ਵਿਯ ਸਤ੍ਤਾ ਨਿਚ੍ਚਂ ਬੁਦ੍ਧਾਲੋਕੇਨੇਵ ਸਬ੍ਬਕਮ੍ਮਾਨਿ ਕਰੋਨ੍ਤਾ ਵਿਚਰਿਂਸੁ. ਸਾਯਂ ਪੁਪ੍ਫਨਕਕੁਸੁਮਾਨਂ ਪਾਤੋ ਚ ਰਵਨਕਸਕੁਣਾਦੀਨਞ੍ਚ ਵਸੇਨ ਲੋਕੋ ਰਤ੍ਤਿਨ੍ਦਿਵਪਰਿਚ੍ਛੇਦਂ ਸਲ੍ਲਕ੍ਖੇਸਿ.

ਕਿਂ ਪਨ ਅਞ੍ਞੇਸਂ ਬੁਦ੍ਧਾਨਂ ਅਯਮਾਨੁਭਾਵੋ ਨਤ੍ਥੀਤਿ? ਨੋ ਨਤ੍ਥਿ. ਤੇਪਿ ਹਿ ਆਕਙ੍ਖਮਾਨਾ ਦਸਸਹਸ੍ਸਿਲੋਕਧਾਤੁਂ ਤਤੋ ਵਾ ਭਿਯ੍ਯੋ ਆਭਾਯ ਫਰੇਯ੍ਯੁਂ. ਮਙ੍ਗਲਸ੍ਸ ਪਨ ਭਗਵਤੋ ਪੁਬ੍ਬਪਤ੍ਥਨਾਵਸੇਨ ਅਞ੍ਞੇਸਂ ਬ੍ਯਾਮਪ੍ਪਭਾ ਵਿਯ ਸਰੀਰਪ੍ਪਭਾ ਨਿਚ੍ਚਮੇਵ ਦਸਸਹਸ੍ਸਿਲੋਕਧਾਤੁਂ ਫਰਿਤ੍ਵਾ ਅਟ੍ਠਾਸਿ. ਸੋ ਕਿਰ ਬੋਧਿਸਤ੍ਤਕਾਲੇ ਵੇਸ੍ਸਨ੍ਤਰਤ੍ਤਭਾਵਸਦਿਸੇ ਅਤ੍ਤਭਾਵੇ ਸਪੁਤ੍ਤਦਾਰੋ ਵਙ੍ਕਪਬ੍ਬਤਸਦਿਸੇ ਪਬ੍ਬਤੇ ਵਸਿ. ਅਥੇਕੋ ਸਬ੍ਬਜਨਵਿਹੇਠਕੋ ਖਰਦਾਠਿਕੋ ਨਾਮ ਮਨੁਸ੍ਸਭਕ੍ਖੋ ਮਹੇਸਕ੍ਖੋ ਯਕ੍ਖੋ ਮਹਾਪੁਰਿਸਸ੍ਸ ਦਾਨਜ੍ਝਾਸਯਤਂ ਸੁਤ੍ਵਾ ਬ੍ਰਾਹ੍ਮਣਵਣ੍ਣੇਨ ਉਪਸਙ੍ਕਮਿਤ੍ਵਾ ਮਹਾਸਤ੍ਤਂ ਦ੍ਵੇ ਦਾਰਕੇ ਯਾਚਿ. ਮਹਾਸਤ੍ਤੋ ‘‘ਦਦਾਮਿ ਬ੍ਰਾਹ੍ਮਣਸ੍ਸ ਪੁਤ੍ਤਕੇ’’ਤਿ ਹਟ੍ਠਪਹਟ੍ਠੋ ਉਦਕਪਰਿਯਨ੍ਤਂ ਪਥਵਿਂ ਕਮ੍ਪੇਨ੍ਤੋ ਦ੍ਵੇ ਦਾਰਕੇ ਅਦਾਸਿ. ਅਥ ਖੋ ਯਕ੍ਖੋ ਤਸ੍ਸ ਪਸ੍ਸਨ੍ਤਸ੍ਸੇਵ ਮਹਾਪੁਰਿਸਸ੍ਸ ਤਂ ਬ੍ਰਾਹ੍ਮਣਵਣ੍ਣਂ ਪਹਾਯ ਅਨਲਜਾਲਪਿਙ੍ਗਲਵਿਰੂਪਨਯਨੋ ਵਿਸਮਵਿਰੂਪਕੁਟਿਲਭੀਮਦਾਠੋ ਚਿਪਿਟਕਵਿਰੂਪਨਾਸੋ ਕਪਿਲਫਰੁਸਦੀਘਕੇਸੋ ਨਵਦਡ੍ਢਤਾਲਕ੍ਖਨ੍ਧਸਦਿਸਕਾਯੋ ਹੁਤ੍ਵਾ ਤੇ ਦਾਰਕੇ ਮੁਲ਼ਾਲਕਲਾਪਂ ਵਿਯ ਗਹੇਤ੍ਵਾ ਖਾਦਿ. ਮਹਾਪੁਰਿਸਸ੍ਸ ਯਕ੍ਖਂ ਓਲੋਕੇਤ੍ਵਾ ਮੁਖੇ ਵਿਵਟਮਤ੍ਤੇ ਅਗ੍ਗਿਜਾਲਂ ਵਿਯ ਲੋਹਿਤਧਾਰਂ ਉਗ੍ਗਿਰਨ੍ਤਂ ਤਸ੍ਸ ਮੁਖਂ ਦਿਸ੍ਵਾਪਿ ਕੇਸਗ੍ਗਮਤ੍ਤਮ੍ਪਿ ਦੋਮਨਸ੍ਸਂ ਨ ਉਪ੍ਪਜ੍ਜਿ. ‘‘ਸੁਦਿਨ੍ਨਂ ਵਤ ਮੇ ਦਾਨ’’ਨ੍ਤਿ ਚਿਨ੍ਤਯਤੋ ਪਨਸ੍ਸ ਸਰੀਰੇ ਮਹਨ੍ਤਂ ਪੀਤਿਸੋਮਨਸ੍ਸਂ ਉਦਪਾਦਿ. ਸੋ ‘‘ਇਮਸ੍ਸ ਮੇ ਨਿਸ੍ਸਨ੍ਦੇਨ ਅਨਾਗਤੇ ਇਮਿਨਾ ਨੀਹਾਰੇਨ ਰਸ੍ਮਿਯੋ ਨਿਕ੍ਖਮਨ੍ਤੂ’’ਤਿ ਪਤ੍ਥਨਮਕਾਸਿ. ਤਸ੍ਸ ਤਂ ਪਤ੍ਥਨਂ ਨਿਸ੍ਸਾਯ ਬੁਦ੍ਧਭੂਤਸ੍ਸ ਸਰੀਰਤੋ ਰਸ੍ਮਿਯੋ ਨਿਕ੍ਖਮਿਤ੍ਵਾ ਏਤ੍ਤਕਂ ਠਾਨਂ ਫਰਿਂਸੁ.

ਅਪਰਮ੍ਪਿ ਪੁਬ੍ਬਚਰਿਯਂ ਤਸ੍ਸ ਅਤ੍ਥਿ. ਅਯਂ ਕਿਰ ਬੋਧਿਸਤ੍ਤਕਾਲੇ ਏਕਸ੍ਸ ਬੁਦ੍ਧਸ੍ਸ ਚੇਤਿਯਂ ਦਿਸ੍ਵਾ – ‘‘ਇਮਸ੍ਸ ਬੁਦ੍ਧਸ੍ਸ ਮਮ ਜੀਵਿਤਂ ਪਰਿਚ੍ਚਜਿਤੁਂ ਵਟ੍ਟਤੀ’’ਤਿ ਦਣ੍ਡਦੀਪਿਕਾਵੇਠਨਨਿਯਾਮੇਨ ਸਕਲਸਰੀਰਂ ਵੇਠਾਪੇਤ੍ਵਾ ਰਤਨਮਤ੍ਤਮਕੁਲ਼ਂ ਸਤਸਹਸ੍ਸਗ੍ਘਨਿਕਂ ਸੁਵਣ੍ਣਪਾਤਿਂ ਸੁਗਨ੍ਧਸਪ੍ਪਿਸ੍ਸ ਪੂਰਾਪੇਤ੍ਵਾ ਤਤ੍ਥ ਸਹਸ੍ਸਵਟ੍ਟਿਯੋ ਜਾਲੇਤ੍ਵਾ ਤਂ ਸੀਸੇਨਾਦਾਯ ਸਕਲਸਰੀਰਂ ਜਾਲਾਪੇਤ੍ਵਾ ਜਿਨਚੇਤਿਯਂ ਪਦਕ੍ਖਿਣਂ ਕਰੋਨ੍ਤੋ ਸਕਲਰਤ੍ਤਿਂ ਵੀਤਿਨਾਮੇਸਿ. ਏਵਂ ਯਾਵ ਅਰੁਣੁਗ੍ਗਮਨਾ ਵਾਯਮਨ੍ਤਸ੍ਸ ਲੋਮਕੂਪਮਤ੍ਤਮ੍ਪਿ ਉਸੁਮਂ ਨ ਗਣ੍ਹਿ. ਪਦੁਮਗਬ੍ਭਂ ਪਵਿਟ੍ਠਕਾਲੋ ਵਿਯ ਅਹੋਸਿ. ਧਮ੍ਮੋ ਹਿ ਨਾਮੇਸ ਅਤ੍ਤਾਨਂ ਰਕ੍ਖਨ੍ਤਂ ਰਕ੍ਖਤਿ. ਤੇਨਾਹ ਭਗਵਾ –

‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ, ਧਮ੍ਮੋ ਸੁਚਿਣ੍ਣੋ ਸੁਖਮਾਵਹਾਤਿ;

ਏਸਾਨਿਸਂਸੋ ਧਮ੍ਮੇ ਸੁਚਿਣ੍ਣੇ, ਨ ਦੁਗ੍ਗਤਿਂ ਗਚ੍ਛਤਿ ਧਮ੍ਮਚਾਰੀ’’ਤਿ. (ਥੇਰਗਾ. ੩੦੩; ਜਾ. ੧.੧੦.੧੦੨; ੧.੧੫.੩੮੫);

ਇਮਸ੍ਸਾਪਿ ਕਮ੍ਮਸ੍ਸ ਨਿਸ੍ਸਨ੍ਦੇਨ ਤਸ੍ਸ ਸਰੀਰੋਭਾਸੋ ਦਸਸਹਸ੍ਸਿਲੋਕਧਾਤੁਂ ਫਰਿਤ੍ਵਾ ਅਟ੍ਠਾਸਿ (ਧ. ਸ. ਅਟ੍ਠ. ਨਿਦਾਨਕਥਾ). ਤੇਨ ਵੁਤ੍ਤਂ –

੧. ‘‘ਕੋਣ੍ਡਞ੍ਞਸ੍ਸ ਅਪਰੇਨ, ਮਙ੍ਗਲੋ ਨਾਮ ਨਾਯਕੋ;

ਤਮਂ ਲੋਕੇ ਨਿਹਨ੍ਤ੍ਵਾਨ, ਧਮ੍ਮੋਕ੍ਕਮਭਿਧਾਰਯਿ.

੨. ‘‘ਅਤੁਲਾਸਿ ਪਭਾ ਤਸ੍ਸ, ਜਿਨੇਹਞ੍ਞੇਹਿ ਉਤ੍ਤਰਿਂ;

ਚਨ੍ਦਸੂਰਿਯਪ੍ਪਭਂ ਹਨ੍ਤ੍ਵਾ, ਦਸਸਹਸ੍ਸੀ ਵਿਰੋਚਤੀ’’ਤਿ.

ਤਤ੍ਥ ਤਮਨ੍ਤਿ ਲੋਕਨ੍ਧਕਾਰਞ੍ਚ ਹਦਯਤਮਞ੍ਚ. ਨਿਹਨ੍ਤ੍ਵਾਨਾਤਿ ਅਭਿਭਵਿਤ੍ਵਾ. ਧਮ੍ਮੋਕ੍ਕਨ੍ਤਿ ਏਤ੍ਥ ਅਯਂ ਪਨ ਉਕ੍ਕਾ-ਸਦ੍ਦੋ ਸੁਵਣ੍ਣਕਾਰਮੂਸਾਦੀਸੁ ਅਨੇਕੇਸੁ ਅਤ੍ਥੇਸੁ ਦਿਸ੍ਸਤਿ. ਤਥਾਹਿ ‘‘ਸਣ੍ਡਾਸੇਨ ਜਾਤਰੂਪਂ ਗਹੇਤ੍ਵਾ ਉਕ੍ਕਾਮੁਖੇ ਪਕ੍ਖਿਪੇਯ੍ਯਾ’’ਤਿ (ਮ. ਨਿ. ੩.੩੬੦) ਆਗਤਟ੍ਠਾਨੇ ਸੁਵਣ੍ਣਕਾਰਾਨਂ ਮੂਸਾ ‘‘ਉਕ੍ਕਾ’’ਤਿ ਵੇਦਿਤਬ੍ਬਾ. ‘‘ਉਕ੍ਕਂ ਬਨ੍ਧੇਯ੍ਯ, ਉਕ੍ਕਂ ਬਨ੍ਧਿਤ੍ਵਾ ਉਕ੍ਕਾਮੁਖਂ ਆਲਿਮ੍ਪੇਯ੍ਯਾ’’ਤਿ ਆਗਤਟ੍ਠਾਨੇ ਕਮ੍ਮਾਰਾਨਂ ਅਙ੍ਗਾਰਕਪਲ੍ਲਂ. ‘‘ਕਮ੍ਮਾਰਾਨਂ ਯਥਾ ਉਕ੍ਕਾ, ਅਨ੍ਤੋ ਝਾਯਤਿ ਨੋ ਬਹੀ’’ਤਿ (ਜਾ. ੨.੨੨.੬੪੯) ਆਗਤਟ੍ਠਾਨੇ ਕਮ੍ਮਾਰੁਦ੍ਧਨਂ. ‘‘ਏਵਂਵਿਪਾਕੋ ਉਕ੍ਕਾਪਾਤੋ ਭਵਿਸ੍ਸਤੀ’’ਤਿ (ਦੀ. ਨਿ. ੧.੨੪, ੨੦੮) ਆਗਤਟ੍ਠਾਨੇ ਵਾਯੁਵੇਗੋ ‘‘ਉਕ੍ਕਾ’’ਤਿ ਵੁਚ੍ਚਤਿ. ‘‘ਉਕ੍ਕਾਸੁ ਧਾਰਿਯਮਾਨਾਸੂ’’ਤਿ (ਦੀ. ਨਿ. ੧.੧੫੯) ਆਗਤਟ੍ਠਾਨੇ ਦੀਪਿਕਾ ‘‘ਉਕ੍ਕਾ’’ਤਿ ਵੁਚ੍ਚਤਿ. ਇਧਾਪਿ ਦੀਪਿਕਾ ਉਕ੍ਕਾਤਿ ਅਧਿਪ੍ਪੇਤਾ (ਮ. ਨਿ. ਅਟ੍ਠ. ੧.੭੬ ਆਦਯੋ). ਤਸ੍ਮਾ ਇਧ ਧਮ੍ਮਮਯਂ ਉਕ੍ਕਂ ਅਭਿਧਾਰਯਿ, ਅਵਿਜ੍ਜਨ੍ਧਕਾਰਪਟਿਚ੍ਛਨ੍ਨਸ੍ਸ ਅਵਿਜ੍ਜਨ੍ਧਕਾਰਾਭਿਭੂਤਸ੍ਸ ਲੋਕਸ੍ਸ ਧਮ੍ਮਮਯਂ ਉਕ੍ਕਂ ਧਾਰੇਸੀਤਿ ਅਤ੍ਥੋ.

ਅਤੁਲਾਸੀਤਿ ਅਤੁਲ੍ਯਾ ਆਸਿ. ਅਯਮੇਵ ਵਾ ਪਾਠੋ, ਅਞ੍ਞੇਹਿ ਬੁਦ੍ਧੇਹਿ ਅਸਦਿਸਾ ਅਹੋਸੀਤਿ ਅਤ੍ਥੋ. ਜਿਨੇਹਞ੍ਞੇਹੀਤਿ ਜਿਨੇਹਿ ਅਞ੍ਞੇਹਿ. ਚਨ੍ਦਸੂਰਿਯਪ੍ਪਭਂ ਹਨ੍ਤ੍ਵਾਤਿ ਚਨ੍ਦਸੂਰਿਯਾਨਂ ਪਭਂ ਅਭਿਹਨ੍ਤ੍ਵਾ. ਦਸਸਹਸ੍ਸੀ ਵਿਰੋਚਤੀਤਿ ਚਨ੍ਦਸੂਰਿਯਾਲੋਕਂ ਵਿਨਾ ਬੁਦ੍ਧਾਲੋਕੇਨੇਵ ਦਸਸਹਸ੍ਸੀ ਵਿਰੋਚਤੀਤਿ ਅਤ੍ਥੋ.

ਮਙ੍ਗਲਸਮ੍ਮਾਸਮ੍ਬੁਦ੍ਧੋ ਪਨ ਅਧਿਗਤਬੋਧਿਞਾਣੋ ਬੋਧਿਮੂਲੇਯੇਵ ਸਤ੍ਤਸਤ੍ਤਾਹਾਨਿ ਵੀਤਿਨਾਮੇਤ੍ਵਾ ਬ੍ਰਹ੍ਮੁਨੋ ਧਮ੍ਮਾਯਾਚਨਂ ਸਮ੍ਪਟਿਚ੍ਛਿਤ੍ਵਾ – ‘‘ਕਸ੍ਸ ਨੁ ਖੋ ਅਹਂ ਇਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ (ਮ. ਨਿ. ੧.੨੮੪; ੨.੩੪੧; ਮਹਾਵ. ੧੦) ਉਪਧਾਰੇਨ੍ਤੋ ਅਤ੍ਤਨਾ ਸਹ ਪਬ੍ਬਜਿਤਾਨਂ ਭਿਕ੍ਖੂਨਂ ਤਿਸ੍ਸੋ ਕੋਟਿਯੋ ਉਪਨਿਸ੍ਸਯਸਮ੍ਪਨ੍ਨਂ ਅਦ੍ਦਸ. ਅਥਸ੍ਸ ਏਤਦਹੋਸਿ – ‘‘ਇਮੇ ਕੁਲਪੁਤ੍ਤਾ ਮਂ ਪਬ੍ਬਜਨ੍ਤਂ ਅਨੁਪਬ੍ਬਜਿਤਾ ਉਪਨਿਸ੍ਸਯਸਮ੍ਪਨ੍ਨਾ ਚ, ਤੇ ਮਯਾ ਵਿਸਾਖਪੁਣ੍ਣਮਾਯ ਵਿਵੇਕਤ੍ਥਿਕੇਨ ਵਿਸ੍ਸਜ੍ਜਿਤਾ ਸਿਰਿਵਡ੍ਢਨਨਗਰਂ ਉਪਨਿਸ੍ਸਾਯ ਸਿਰਿਵਨਗਹਨਂ ਗਨ੍ਤ੍ਵਾ ਵਿਹਰਨ੍ਤਿ, ਹਨ੍ਦਾਹਂ ਤਤ੍ਥ ਗਨ੍ਤ੍ਵਾ ਧਮ੍ਮਂ ਤੇਸਂ ਦੇਸੇਸ੍ਸਾਮੀ’’ਤਿ ਅਤ੍ਤਨੋ ਪਤ੍ਤਚੀਵਰਂ ਗਹੇਤ੍ਵਾ ਹਂਸਰਾਜਾ ਵਿਯ ਗਗਨਤਲਮਬ੍ਭੁਗ੍ਗਨ੍ਤ੍ਵਾ ਸਿਰਿਵਨਗਹਨੇ ਪਚ੍ਚੁਟ੍ਠਾਸਿ. ਤੇ ਚ ਭਿਕ੍ਖੂ ਭਗਵਨ੍ਤਂ ਵਨ੍ਦਿਤ੍ਵਾ ਅਨ੍ਤੇਵਾਸਿਕਵਤ੍ਤਂ ਦਸ੍ਸੇਤ੍ਵਾ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਤੇਸਂ ਭਗਵਾ ਸਬ੍ਬਬੁਦ੍ਧਨਿਸੇਵਿਤਂ ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਨ੍ਤਂ ਕਥੇਸਿ. ਤਤੋ ਤਿਸ੍ਸੋ ਭਿਕ੍ਖੁਕੋਟਿਯੋ ਅਰਹਤ੍ਤਂ ਪਾਪੁਣਿਂਸੁ. ਦੇਵਮਨੁਸ੍ਸਾਨਂ ਕੋਟਿਸਤਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੩. ‘‘ਸੋਪਿ ਬੁਦ੍ਧੋ ਪਕਾਸੇਸਿ, ਚਤੁਰੋ ਸਚ੍ਚਵਰੁਤ੍ਤਮੇ;

ਤੇ ਤੇ ਸਚ੍ਚਰਸਂ ਪੀਤ੍ਵਾ, ਵਿਨੋਦੇਨ੍ਤਿ ਮਹਾਤਮਂ.

੪. ‘‘ਪਤ੍ਵਾਨ ਬੋਧਿਮਤੁਲਂ, ਪਠਮੇ ਧਮ੍ਮਦੇਸਨੇ;

ਕੋਟਿਸਤਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੂ’’ਤਿ.

ਤਤ੍ਥ ਚਤੁਰੋਤਿ ਚਤ੍ਤਾਰਿ. ਸਚ੍ਚਵਰੁਤ੍ਤਮੇਤਿ ਸਚ੍ਚਾਨਿ ਚ ਵਰਾਨਿ ਚ ਸਚ੍ਚਵਰਾਨਿ, ਸਚ੍ਚਾਨਿ ਉਤ੍ਤਮਾਨੀਤਿ ਅਤ੍ਥੋ. ‘‘ਚਤ੍ਤਾਰੋ ਸਚ੍ਚਵਰੁਤ੍ਤਮੇ’’ਤਿਪਿ ਪਾਠੋ, ਤਸ੍ਸ ਚਤ੍ਤਾਰਿ ਸਚ੍ਚਵਰਾਨਿ ਉਤ੍ਤਮਾਨੀਤਿ ਅਤ੍ਥੋ. ਤੇ ਤੇਤਿ ਤੇ ਤੇ ਦੇਵਮਨੁਸ੍ਸਾ ਬੁਦ੍ਧੇਨ ਭਗਵਤਾ ਵਿਨੀਤਾ. ਸਚ੍ਚਰਸਨ੍ਤਿ ਚਤੁਸਚ੍ਚਪਟਿਵੇਧਾਮਤਰਸਂ ਪਿਵਿਤ੍ਵਾ. ਵਿਨੋਦੇਨ੍ਤਿ ਮਹਾਤਮਨ੍ਤਿ ਤੇਨ ਤੇਨ ਮਗ੍ਗੇਨ ਪਹਾਤਬ੍ਬਂ ਮੋਹਤਮਂ ਵਿਨੋਦੇਨ੍ਤਿ, ਵਿਦ੍ਧਂਸੇਨ੍ਤੀਤਿ ਅਤ੍ਥੋ. ਪਤ੍ਵਾਨਾਤਿ ਪਟਿਵਿਜ੍ਝਿਤ੍ਵਾ. ਬੋਧਿਨ੍ਤਿ ਏਤ੍ਥ ਪਨਾਯਂ ਬੋਧਿ-ਸਦ੍ਦੋ –

‘‘ਮਗ੍ਗੇ ਫਲੇ ਚ ਨਿਬ੍ਬਾਨੇ, ਰੁਕ੍ਖੇ ਪਞ੍ਞਤ੍ਤਿਯਂ ਤਥਾ;

ਸਬ੍ਬਞ੍ਞੁਤੇ ਚ ਞਾਣਸ੍ਮਿਂ, ਬੋਧਿਸਦ੍ਦੋ ਪਨਾਗਤੋ’’.

ਤਥਾ ਹਿ ਪਨੇਸ – ‘‘ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣ’’ਨ੍ਤਿਆਦੀਸੁ (ਚੂਲ਼ਨਿ. ਖਗ੍ਗਵਿਸਾਣਸੁਤ੍ਤਨਿਦ੍ਦੇਸ ੧੨੧) ਮਗ੍ਗੇ ਆਗਤੋ. ‘‘ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਸਂਵਤ੍ਤਤੀ’’ਤਿ (ਮ. ਨਿ. ੧.੩੩; ੩.੩੨੩; ਮਹਾਵ. ੧੩; ਸਂ. ਨਿ. ੫.੧੦੮੧; ਪਟਿ. ਮ. ੨.੩੦) ਏਤ੍ਥ ਫਲੇ. ‘‘ਪਤ੍ਵਾਨ ਬੋਧਿਂ ਅਮਤਂ ਅਸਙ੍ਖਤ’’ਨ੍ਤਿ ਏਤ੍ਥ ਨਿਬ੍ਬਾਨੇ. ‘‘ਅਨ੍ਤਰਾ ਚ ਗਯਂ ਅਨ੍ਤਰਾ ਚ ਬੋਧਿ’’ਨ੍ਤਿ (ਮ. ਨਿ. ੧.੨੮੫; ੨.੩੪੧; ਮਹਾਵ. ੧੧) ਏਤ੍ਥ ਅਸ੍ਸਤ੍ਥਰੁਕ੍ਖੇ. ‘‘ਬੋਧਿ ਖੋ ਰਾਜਕੁਮਾਰੋ ਭੋਤੋ ਗੋਤਮਸ੍ਸ ਪਾਦੇ ਸਿਰਸਾ ਵਨ੍ਦਤੀ’’ਤਿ ਏਤ੍ਥ (ਮ. ਨਿ. ੨.੩੨੪; ਚੂਲ਼ਵ. ੨੬੮) ਪਞ੍ਞਤ੍ਤਿਯਂ. ‘‘ਪਪ੍ਪੋਤਿ ਬੋਧਿਂ ਵਰਭੂਰਿਮੇਧਸੋ’’ਤਿ (ਦੀ. ਨਿ. ੩.੨੧੭) ਏਤ੍ਥ ਸਬ੍ਬਞ੍ਞੁਤਞ੍ਞਾਣੇ. ਇਧਾਪਿ ਸਬ੍ਬਞ੍ਞੁਤਞ੍ਞਾਣੇ ਦਟ੍ਠਬ੍ਬੋ. ਅਰਹਤ੍ਤਮਗ੍ਗਞਾਣੇਪਿ ਵਟ੍ਟਤਿ (ਮ. ਨਿ. ਅਟ੍ਠ. ੧.੧੩; ਉਦਾ. ਅਟ੍ਠ. ੧; ਪਾਰਾ. ਅਟ੍ਠ. ੧.੧੧; ਚਰਿਯਾ. ਅਟ੍ਠ. ਨਿਦਾਨਕਥਾ). ਅਤੁਲਨ੍ਤਿ ਤੁਲਰਹਿਤਂ ਪਮਾਣਾਤੀਤਂ, ਅਪ੍ਪਮਾਣਨ੍ਤਿ ਅਤ੍ਥੋ. ਸਮ੍ਬੋਧਿਂ ਪਤ੍ਵਾ ਧਮ੍ਮਂ ਦੇਸੇਨ੍ਤਸ੍ਸ ਤਸ੍ਸ ਭਗਵਤੋ ਪਠਮੇ ਧਮ੍ਮਦੇਸਨੇਤਿ ਅਤ੍ਥੋ ਗਹੇਤਬ੍ਬੋ.

ਯਦਾ ਪਨ ਚਿਤ੍ਤਂ ਨਾਮ ਨਗਰਂ ਉਪਨਿਸ੍ਸਾਯ ਵਿਹਰਨ੍ਤੋ ਚਮ੍ਪਕਰੁਕ੍ਖਮੂਲੇ ਕਣ੍ਡਮ੍ਬਰੁਕ੍ਖਮੂਲੇ ਅਮ੍ਹਾਕਂ ਭਗਵਾ ਵਿਯ ਤਿਤ੍ਥਿਯਾਨਂ ਮਾਨਮਦ੍ਦਨਂ ਯਮਕਪਾਟਿਹਾਰਿਯਂ ਕਤ੍ਵਾ ਸੁਰਾਸੁਰਯੁਵਤਿਰਤਿਸਮ੍ਭਵਨੇ ਰੁਚਿਰਨਵਕਨਕਰਜਤਮਯਵਰਭਵਨੇ ਤਾਵਤਿਂਸਭਵਨੇ ਪਾਰਿਚ੍ਛਤ੍ਤਕਰੁਕ੍ਖਮੂਲੇ ਪਣ੍ਡੁਕਮ੍ਬਲਸਿਲਾਤਲੇ ਨਿਸੀਦਿਤ੍ਵਾ ਅਭਿਧਮ੍ਮਂ ਕਥੇਸਿ, ਤਦਾ ਕੋਟਿਸਤਸਹਸ੍ਸਾਨਂ ਦੇਵਤਾਨਂ ਧਮ੍ਮਾਭਿਸਮਯੋ ਅਹੋਸਿ, ਅਯਂ ਦੁਤਿਯੋ ਅਭਿਸਮਯੋ. ਯਦਾ ਪਨ ਸੁਨਨ੍ਦੋ ਨਾਮ ਚਕ੍ਕਵਤ੍ਤਿਰਾਜਾ ਸੁਰਭਿਨਗਰੇ ਪੂਰਿਤਚਕ੍ਕਵਤ੍ਤਿਵਤ੍ਤੋ ਹੁਤ੍ਵਾ ਚਕ੍ਕਰਤਨਂ ਪਟਿਲਭਿ. ਤਂ ਕਿਰ ਮਙ੍ਗਲਦਸਬਲੇ ਲੋਕੇ ਉਪ੍ਪਨ੍ਨੇ ਚਕ੍ਕਰਤਨਂ ਠਾਨਾ ਓਸਕ੍ਕਿਤਂ ਦਿਸ੍ਵਾ ਸੁਨਨ੍ਦੋ ਰਾਜਾ ਵਿਗਤਾਨਨ੍ਦੋ ਬ੍ਰਾਹ੍ਮਣੇ ਪਰਿਪੁਚ੍ਛਿ – ‘‘ਇਮਂ ਚਕ੍ਕਰਤਨਂ ਮਮ ਕੁਸਲੇਨ ਨਿਬ੍ਬਤ੍ਤਂ, ਕਸ੍ਮਾ ਠਾਨਾ ਓਸਕ੍ਕਿਤ’’ਨ੍ਤਿ? ਤਤੋ ਤੇ ਤਸ੍ਸ ਰਞ੍ਞੋ ਓਸਕ੍ਕਨਕਾਰਣਂ ਬ੍ਯਾਕਰਿਂਸੁ. ‘‘ਚਕ੍ਕਵਤ੍ਤਿਰਞ੍ਞੋ ਆਯੁਕ੍ਖਯੇਨ ਵਾ ਪਬ੍ਬਜ੍ਜੂਪਗਮਨੇਨ ਵਾ ਬੁਦ੍ਧਪਾਤੁਭਾਵੇਨ ਵਾ ਚਕ੍ਕਰਤਨਂ ਠਾਨਾ ਓਸਕ੍ਕਤੀਤਿ ਵਤ੍ਵਾ ਤੁਯ੍ਹਂ ਪਨ, ਮਹਾਰਾਜ, ਆਯੁਕ੍ਖਯੋ ਨਤ੍ਥਿ, ਅਤਿਦੀਘਾਯੁਕੋ ਤ੍ਵਂ, ਮਙ੍ਗਲੋ ਪਨ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਨ੍ਨੋ, ਤੇਨ ਤੇ ਚਕ੍ਕਰਤਨਂ ਓਸਕ੍ਕਿਤ’’ਨ੍ਤਿ. ਤਂ ਸੁਤ੍ਵਾ ਸੁਨਨ੍ਦੋ ਚਕ੍ਕਵਤ੍ਤਿਰਾਜਾ ਸਪਰਿਜਨੋ ਤਂ ਚਕ੍ਕਰਤਨਂ ਸਿਰਸਾ ਵਨ੍ਦਿਤ੍ਵਾ ਆਯਾਚਿ – ‘‘ਯਾਵਾਹਂ ਤਵਾਨੁਭਾਵੇਨ ਮਙ੍ਗਲਦਸਬਲਂ ਸਕ੍ਕਰਿਸ੍ਸਾਮਿ, ਤਾਵ ਤ੍ਵਂ ਮਾ ਅਨ੍ਤਰਧਾਯਸ੍ਸੂ’’ਤਿ. ਅਥ ਨਂ ਚਕ੍ਕਰਤਨਂ ਯਥਾਠਾਨੇਯੇਵ ਅਟ੍ਠਾਸਿ.

ਤਤੋ ਸਮੁਪਾਗਤਾਨਨ੍ਦੋ ਸੁਨਨ੍ਦੋ ਚਕ੍ਕਵਤ੍ਤਿਰਾਜਾ ਛਤ੍ਤਿਂਸਯੋਜਨਪਰਿਮਣ੍ਡਲਾਯ ਪਰਿਸਾਯ ਪਰਿਵੁਤੋ ਸਬ੍ਬਲੋਕਮਙ੍ਗਲਂ ਮਙ੍ਗਲਦਸਬਲਂ ਉਪਸਙ੍ਕਮਿਤ੍ਵਾ ਸਸਾਵਕਸਙ੍ਘਂ ਸਤ੍ਥਾਰਂ ਮਹਾਦਾਨੇਨ ਸਨ੍ਤਪ੍ਪੇਤ੍ਵਾ ਅਰਹਨ੍ਤਾਨਂ ਕੋਟਿਸਤਸਹਸ੍ਸਾਨਂ ਕਾਸਿਕਵਤ੍ਥਾਨਿ ਦਤ੍ਵਾ ਤਥਾਗਤਸ੍ਸ ਸਬ੍ਬਪਰਿਕ੍ਖਾਰੇ ਦਤ੍ਵਾ ਸਕਲਲੋਕਵਿਮ੍ਹਯਕਰਂ ਭਗਵਤੋ ਪੂਜਂ ਕਤ੍ਵਾ ਮਙ੍ਗਲਂ ਸਬ੍ਬਲੋਕਨਾਥਂ ਉਪਸਙ੍ਕਮਿਤ੍ਵਾ ਦਸਨਖਸਮੋਧਾਨਸਮੁਜ੍ਜਲਂ ਵਿਮਲਕਮਲਮਕੁਲ਼ਸਮਮਞ੍ਜਲਿਂ ਸਿਰਸਿ ਕਤ੍ਵਾ ਵਨ੍ਦਿਤ੍ਵਾ ਧਮ੍ਮਸ੍ਸਵਨਤ੍ਥਾਯ ਏਕਮਨ੍ਤਂ ਨਿਸੀਦਿ. ਪੁਤ੍ਤੋਪਿ ਤਸ੍ਸ ਅਨੁਰਾਜਕੁਮਾਰੋ ਨਾਮ ਤਥੇਵ ਨਿਸੀਦਿ.

ਤਦਾ ਸੁਨਨ੍ਦਚਕ੍ਕਵਤ੍ਤਿਰਾਜਪ੍ਪਮੁਖਾਨਂ ਤੇਸਂ ਭਗਵਾ ਅਨੁਪੁਬ੍ਬਿਕਥਂ ਕਥੇਸਿ. ਸੁਨਨ੍ਦੋ ਚਕ੍ਕਵਤ੍ਤੀ ਸਦ੍ਧਿਂ ਪਰਿਸਾਯ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਥ ਸਤ੍ਥਾ ਤੇਸਂ ਪੁਬ੍ਬਚਰਿਯਂ ਓਲੋਕੇਨ੍ਤੋ ਇਦ੍ਧਿਮਯਪਤ੍ਤਚੀਵਰਸ੍ਸ ਉਪਨਿਸ੍ਸਯਂ ਦਿਸ੍ਵਾ ਚਕ੍ਕਜਾਲਸਮਲਙ੍ਕਤਂ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ – ‘‘ਏਥ, ਭਿਕ੍ਖਵੋ’’ਤਿ ਆਹ. ਸਬ੍ਬੇ ਤਙ੍ਖਣਂਯੇਵ ਦੁਵਙ੍ਗੁਲਕੇਸਾ ਇਦ੍ਧਿਮਯਪਤ੍ਤਚੀਵਰਧਰਾ ਵਸ੍ਸਸਟ੍ਠਿਕਤ੍ਥੇਰਾ ਵਿਯ ਆਕਪ੍ਪਸਮ੍ਪਨ੍ਨਾ ਹੁਤ੍ਵਾ ਭਗਵਨ੍ਤਂ ਪਰਿਵਾਰਯਿਂਸੁ. ਅਯਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਸੁਰਿਨ੍ਦਦੇਵਭਵਨੇ, ਬੁਦ੍ਧੋ ਧਮ੍ਮਮਦੇਸਯਿ;

ਕੋਟਿਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੬. ‘‘ਯਦਾ ਸੁਨਨ੍ਦੋ ਚਕ੍ਕਵਤ੍ਤੀ, ਸਮ੍ਬੁਦ੍ਧਂ ਉਪਸਙ੍ਕਮਿ;

ਤਦਾ ਆਹਨਿ ਸਮ੍ਬੁਦ੍ਧੋ, ਧਮ੍ਮਭੇਰਿਂ ਵਰੁਤ੍ਤਮਂ.

੭. ‘‘ਸੁਨਨ੍ਦਸ੍ਸਾਨੁਚਰਾ ਜਨਤਾ, ਤਦਾਸੁਂ ਨਵੁਤਿਕੋਟਿਯੋ;

ਸਬ੍ਬੇਪਿ ਤੇ ਨਿਰਵਸੇਸਾ, ਅਹੇਸੁਂ ਏਹਿਭਿਕ੍ਖੁਕਾ’’ਤਿ.

ਤਤ੍ਥ ਸੁਰਿਨ੍ਦਦੇਵਭਵਨੇਤਿ ਪੁਨ ਦੇਵਿਨ੍ਦਭਵਨੇਤਿ ਅਤ੍ਥੋ. ਧਮ੍ਮਨ੍ਤਿ ਅਭਿਧਮ੍ਮਂ. ਆਹਨੀਤਿ ਅਭਿਹਨਿ. ਵਰੁਤ੍ਤਮਨ੍ਤਿ ਵਰੋ ਭਗਵਾ ਉਤ੍ਤਮਂ ਧਮ੍ਮਭੇਰਿਨ੍ਤਿ ਅਤ੍ਥੋ. ਅਨੁਚਰਾਤਿ ਨਿਬਦ੍ਧਚਰਾ ਸੇਵਕਾ. ਆਸੁਨ੍ਤਿ ਅਹੇਸੁਂ. ‘‘ਤਦਾਸਿ ਨਵੁਤਿਕੋਟਿਯੋ’’ਤਿਪਿ ਪਾਠੋ. ਤਸ੍ਸ ਜਨਤਾ ਆਸਿ, ਸਾ ਜਨਤਾ ਕਿਤ੍ਤਕਾਤਿ ਚੇ, ਨਵੁਤਿਕੋਟਿਯੋਤਿ ਅਤ੍ਥੋ.

ਅਥ ਮਙ੍ਗਲੇ ਕਿਰ ਲੋਕਨਾਥੇ ਮੇਖਲੇ ਪੁਰੇ ਵਿਹਰਨ੍ਤੇ ਤਸ੍ਮਿਂਯੇਵ ਪੁਰੇ ਸੁਦੇਵੋ ਚ ਧਮ੍ਮਸੇਨੋ ਚ ਮਾਣਵਕਾ ਮਾਣਵਕਸਹਸ੍ਸਪਰਿਵਾਰਾ ਤਸ੍ਸ ਭਗਵਤੋ ਸਨ੍ਤਿਕੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਂਸੁ. ਮਾਘਪੁਣ੍ਣਮਾਯ ਦ੍ਵੀਸੁ ਅਗ੍ਗਸਾਵਕੇਸੁ ਸਪਰਿਵਾਰੇਸੁ ਅਰਹਤ੍ਤਂ ਪਤ੍ਤੇਸੁ ਸਤ੍ਥਾ ਕੋਟਿਸਤਸਹਸ੍ਸਭਿਕ੍ਖੁਗਣਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ, ਅਯਂ ਪਠਮੋ ਸਨ੍ਨਿਪਾਤੋ ਅਹੋਸਿ. ਪੁਨ ਉਤ੍ਤਰਾਰਾਮੇ ਨਾਮ ਅਨੁਤ੍ਤਰੇ ਞਾਤਿਸਮਾਗਮੇ ਪਬ੍ਬਜਿਤਾਨਂ ਕੋਟਿਸਤਸਹਸ੍ਸਾਨਂ ਸਮਾਗਮੇ ਪਾਤਿਮੋਕ੍ਖਂ ਉਦ੍ਦਿਸਿ, ਅਯਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਸੁਨਨ੍ਦਚਕ੍ਕਵਤ੍ਤਿਭਿਕ੍ਖੁਗਣਸਮਾਗਮੇ ਨਵੁਤਿਕੋਟਿਸਹਸ੍ਸਾਨਂ ਭਿਕ੍ਖੂਨਂ ਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ, ਅਯਂ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੮. ‘‘ਸਨ੍ਨਿਪਾਤਾ ਤਯੋ ਆਸੁਂ, ਮਙ੍ਗਲਸ੍ਸ ਮਹੇਸਿਨੋ;

ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ.

੯. ‘‘ਦੁਤਿਯੋ ਕੋਟਿਸਤਸਹਸ੍ਸਾਨਂ, ਤਤਿਯੋ ਨਵੁਤਿਕੋਟਿਨਂ;

ਖੀਣਾਸਵਾਨਂ ਵਿਮਲਾਨਂ, ਤਦਾ ਆਸਿ ਸਮਾਗਮੋ’’ਤਿ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਸੁਰੁਚਿਬ੍ਰਾਹ੍ਮਣਗਾਮੇ ਸੁਰੁਚਿ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ ਪਦਕੋ ਵੇਯ੍ਯਾਕਰਣੋ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ ਅਹੋਸਿ. ਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਦਸਬਲਸ੍ਸ ਮਧੁਰਧਮ੍ਮਕਥਂ ਸੁਤ੍ਵਾ ਭਗਵਤਿ ਪਸੀਦਿਤ੍ਵਾ ਸਰਣਂ ਗਨ੍ਤ੍ਵਾ – ‘‘ਸ੍ਵੇ ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ ਸਸਾਵਕਸਙ੍ਘਂ ਭਗਵਨ੍ਤਂ ਨਿਮਨ੍ਤੇਸਿ. ਸੋ ਭਗਵਤਾ ‘‘ਬ੍ਰਾਹ੍ਮਣ, ਕਿਤ੍ਤਕੇਹਿ ਭਿਕ੍ਖੂਹਿ ਤੇ ਅਤ੍ਥੋ’’ਤਿ ਵੁਤ੍ਤੋ – ‘‘ਕਿਤ੍ਤਕਾ ਪਨ ਵੋ, ਭਨ੍ਤੇ, ਪਰਿਵਾਰਾ ਭਿਕ੍ਖੂ’’ਤਿ ਆਹ. ਤਦਾ ਪਠਮਸਨ੍ਨਿਪਾਤੋਵ ਹੋਤਿ, ਤਸ੍ਮਾ ‘‘ਕੋਟਿਸਤਸਹਸ੍ਸ’’ਨ੍ਤਿ ਵੁਤ੍ਤੇ – ‘‘ਯਦਿ ਏਵਂ, ਭਨ੍ਤੇ, ਸਬ੍ਬੇਹਿਪਿ ਸਦ੍ਧਿਂ ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ ਨਿਮਨ੍ਤੇਸਿ. ਸਤ੍ਥਾ ਅਧਿਵਾਸੇਸਿ.

ਬ੍ਰਾਹ੍ਮਣੋ ਭਗਵਨ੍ਤਂ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਅਤ੍ਤਨੋ ਘਰਂ ਗਚ੍ਛਨ੍ਤੋ ਚਿਨ੍ਤੇਸਿ – ‘‘ਅਹਂ ਏਤ੍ਤਕਾਨਂ ਭਿਕ੍ਖੂਨਂ ਯਾਗੁਭਤ੍ਤਵਤ੍ਥਾਦੀਨਿ ਦਾਤੁਂ ਸਕ੍ਕੋਮਿ, ਨਿਸੀਦਨਟ੍ਠਾਨਂ ਪਨ ਕਥਂ ਭਵਿਸ੍ਸਤੀ’’ਤਿ. ਤਸ੍ਸ ਕਿਰ ਸਾ ਚਿਨ੍ਤਨਾ ਚਤੁਰਾਸੀਤਿਯੋਜਨਸਹਸ੍ਸਪ੍ਪਮਾਣੇ ਮੇਰੁਮਤ੍ਥਕੇ ਠਿਤਸ੍ਸ ਦੇਵਰਾਜਸ੍ਸ ਦਸਸਤਨਯਨਸ੍ਸ ਪਣ੍ਡੁਕਮ੍ਬਲਸਿਲਾਸਨਸ੍ਸ ਉਣ੍ਹਾਕਾਰਂ ਜਨੇਸਿ. ਅਥ ਸਕ੍ਕੋ ਦੇਵਰਾਜਾ ਆਸਨਸ੍ਸ ਉਣ੍ਹਭਾਵਂ ਦਿਸ੍ਵਾ – ‘‘ਕੋ ਨੁ ਖੋ ਮਂ ਇਮਮ੍ਹਾ ਠਾਨਾ ਚਾਵੇਤੁਕਾਮੋ’’ਤਿ ਸਮੁਪ੍ਪਨ੍ਨਪਰਿਵਿਤਕ੍ਕੋ ਦਿਬ੍ਬੇਨ ਚਕ੍ਖੁਨਾ ਮਨੁਸ੍ਸਲੋਕਂ ਓਲੋਕੇਨ੍ਤੋ ਮਹਾਪੁਰਿਸਂ ਦਿਸ੍ਵਾ – ‘‘ਅਯਂ ਮਹਾਸਤ੍ਤੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਤਸ੍ਸ ਨਿਸੀਦਨਤ੍ਥਾਯ ਚਿਨ੍ਤੇਸਿ, ਮਯਾਪਿ ਤਤ੍ਥ ਗਨ੍ਤ੍ਵਾ ਪੁਞ੍ਞਕੋਟ੍ਠਾਸਂ ਗਹੇਤੁਂ ਵਟ੍ਟਤੀ’’ਤਿ ਵਡ੍ਢਕੀਵਣ੍ਣਂ ਨਿਮ੍ਮਿਨਿਤ੍ਵਾ ਵਾਸਿਫਰਸੁਹਤ੍ਥੋ ਮਹਾਪੁਰਿਸਸ੍ਸ ਪੁਰਤੋ ਪਾਤੁਰਹੋਸਿ. ਸੋ ‘‘ਅਤ੍ਥਿ ਨੁ ਖੋ ਕਸ੍ਸਚਿ ਭਤਿਯਾ ਕਤ੍ਤਬ੍ਬਕਮ੍ਮ’’ਨ੍ਤਿ ਆਹ.

ਮਹਾਸਤ੍ਤੋ ਦਿਸ੍ਵਾ ‘‘ਕਿਂ ਕਮ੍ਮਂ ਕਾਤੁਂ ਸਕ੍ਖਿਸ੍ਸਸੀ’’ਤਿ ਆਹ. ‘‘ਮਮ ਅਜਾਨਨਸਿਪ੍ਪਂ ਨਾਮ ਨਤ੍ਥਿ, ਯੋ ਯੋ ਯਂ ਯਂ ਇਚ੍ਛਤਿ ਮਣ੍ਡਪਂ ਵਾ ਪਾਸਾਦਂ ਵਾ ਅਞ੍ਞਂ ਵਾ ਕਿਞ੍ਚਿ ਨਿਵੇਸਨਾਦਿਕਂ, ਤਸ੍ਸ ਤਸ੍ਸ ਤਂ ਤਂ ਕਾਤੁਂ ਸਮਤ੍ਥੋਮ੍ਹੀ’’ਤਿ. ‘‘ਤੇਨ ਹਿ ਮਯ੍ਹਂ ਕਮ੍ਮਂ ਅਤ੍ਥੀ’’ਤਿ. ‘‘ਕਿਂ, ਅਯ੍ਯਾ’’ਤਿ? ‘‘ਸ੍ਵਾਤਨਾਯ ਮਯਾ ਕੋਟਿਸਤਸਹਸ੍ਸਭਿਕ੍ਖੂ ਨਿਮਨ੍ਤਿਤਾ, ਤੇਸਂ ਨਿਸੀਦਨਮਣ੍ਡਪਂ ਕਰਿਸ੍ਸਸੀ’’ਤਿ? ‘‘ਅਹਂ ਨਾਮ ਕਰੇਯ੍ਯਂ, ਸਚੇ ਮੇ ਭਤਿਂ ਦਾਤੁਂ ਸਕ੍ਖਿਸ੍ਸਥਾ’’ਤਿ. ‘‘ਸਕ੍ਖਿਸ੍ਸਾਮਿ, ਤਾਤਾ’’ਤਿ. ‘‘ਯਦਿ ਏਵਂ, ਸਾਧੁ, ਕਰਿਸ੍ਸਾਮੀ’’ਤਿ ਵਤ੍ਵਾ ਏਕਂ ਪਦੇਸਂ ਓਲੋਕੇਸਿ. ਸੋ ਦ੍ਵਾਦਸਯੋਜਨਪ੍ਪਮਾਣੋ ਪਦੇਸੋ ਕਸਿਣਮਣ੍ਡਲਂ ਵਿਯ ਸਮਤਲੋ ਪਰਮਰਮਣੀਯੋ ਅਹੋਸਿ. ਪੁਨ ਸੋ ‘‘ਏਤ੍ਤਕੇ ਠਾਨੇ ਸਤ੍ਤਰਤਨਮਯੋ ਦਟ੍ਠਬ੍ਬਸਾਰਮਣ੍ਡੋ ਮਣ੍ਡਪੋ ਉਟ੍ਠਹਤੂ’’ਤਿ ਚਿਨ੍ਤੇਤ੍ਵਾ ਓਲੋਕੇਸਿ. ਤਤੋ ਤਾਵਦੇਵ ਮਣ੍ਡਪਸਦਿਸੋ ਪਥਵਿਤਲਂ ਭਿਨ੍ਦਿਤ੍ਵਾ ਮਣ੍ਡਪੋ ਉਟ੍ਠਹਿ. ਤਸ੍ਸ ਸੋਵਣ੍ਣਮਯੇਸੁ ਥਮ੍ਭੇਸੁ ਰਜਤਮਯਾ ਘਟਕਾ ਅਹੇਸੁਂ, ਰਜਤਮਯੇਸੁ ਥਮ੍ਭੇਸੁ ਸੋਵਣ੍ਣਮਯਾ ਘਟਕਾ, ਮਣਿਤ੍ਥਮ੍ਭੇਸੁ ਪਵਾਲ਼ਮਯਾ ਘਟਕਾ, ਪਵਾਲ਼ਮਯੇਸੁ ਥਮ੍ਭੇਸੁ ਮਣਿਮਯਾ ਘਟਕਾ, ਸਤ੍ਤਰਤਨਮਯੇਸੁ ਥਮ੍ਭੇਸੁ ਸਤ੍ਤਰਤਨਮਯਾ ਘਟਕਾ ਅਹੇਸੁਂ.

ਤਤੋ ਮਣ੍ਡਪਸ੍ਸ ਅਨ੍ਤਰਨ੍ਤਰਾਪਿ ਕਿਙ੍ਕਿਣਿਕਜਾਲਾ ਓਲਮ੍ਬਤੂ’’ਤਿ ਓਲੋਕੇਸਿ, ਸਹ ਓਲੋਕਨੇਨ ਕਿਙ੍ਕਿਣਿਕਜਾਲਾ ਓਲਮ੍ਬਿ, ਯਸ੍ਸ ਮਨ੍ਦਵਾਤੇਰਿਤਸ੍ਸ ਪਞ੍ਚਙ੍ਗਿਕਸ੍ਸੇਵ ਤੁਰਿਯਸ੍ਸ ਪਰਮਮਨੋਰਮੋ ਮਧੁਰੋ ਸਦ੍ਦੋ ਨਿਚ੍ਛਰਤਿ, ਦਿਬ੍ਬਸਙ੍ਗੀਤਿਵਤ੍ਤਨਕਾਲੋ ਵਿਯ ਅਹੋਸਿ. ‘‘ਅਨ੍ਤਰਨ੍ਤਰਾ ਦਿਬ੍ਬਗਨ੍ਧਦਾਮਪੁਪ੍ਫਦਾਮਪਤ੍ਤਦਾਮਸਤ੍ਤਰਤਨਦਾਮਾਨਿ ਓਲਮ੍ਬਨ੍ਤੂ’’ਤਿ ਚਿਨ੍ਤੇਸਿ, ਸਹ ਚਿਨ੍ਤਾਯ ਦਾਮਾਨਿ ਓਲਮ੍ਬਿਂਸੁ. ‘‘ਕੋਟਿਸਤਸਹਸ੍ਸਸਙ੍ਖਾਨਂ ਭਿਕ੍ਖੂਨਂ ਆਸਨਾਨਿ ਚ ਕਪ੍ਪਿਯਮਹਗ੍ਘਪਚ੍ਚਤ੍ਥਰਣਾਨਿ ਆਧਾਰਕਾਨਿ ਚ ਪਥਵਿਂ ਭਿਨ੍ਦਿਤ੍ਵਾ ਉਟ੍ਠਹਨ੍ਤੂ’’ਤਿ ਚਿਨ੍ਤੇਸਿ, ਤਾਵਦੇਵ ਉਟ੍ਠਹਿਂਸੁ. ‘‘ਕੋਣੇ ਕੋਣੇ ਏਕੇਕਾ ਉਦਕਚਾਟਿ ਉਟ੍ਠਹਤੂ’’ਤਿ ਚਿਨ੍ਤੇਸਿ, ਤਙ੍ਖਣਂਯੇਵ ਉਦਕਚਾਟਿਯੋ ਪਰਮਸੀਤਲੇਨ ਮਧੁਰੇਨ ਸੁਵਿਸੁਦ੍ਧਸੁਗਨ੍ਧਕਪ੍ਪਿਯਵਾਰਿਨਾ ਪੁਣ੍ਣਾ ਕਦਲਿਪਣ੍ਣਪਿਹਿਤਮੁਖਾ ਉਟ੍ਠਹਿਂਸੁ. ਸੋ ਦਸਸਤਨਯਨੋ ਏਤ੍ਤਕਂ ਮਾਪੇਤ੍ਵਾ ਬ੍ਰਾਹ੍ਮਣਸ੍ਸ ਸਨ੍ਤਿਕਂ ਗਨ੍ਤ੍ਵਾ – ‘‘ਏਹਿ, ਅਯ੍ਯ, ਤਵ ਮਣ੍ਡਪਂ ਦਿਸ੍ਵਾ ਮਯ੍ਹਂ ਭਤਿਂ ਦੇਹੀ’’ਤਿ ਆਹ. ਮਹਾਪੁਰਿਸੋ ਗਨ੍ਤ੍ਵਾ ਤਂ ਮਣ੍ਡਪਂ ਓਲੋਕੇਸਿ. ਤਸ੍ਸ ਓਲੋਕੇਨ੍ਤਸ੍ਸੇਵ ਸਕਲਸਰੀਰਂ ਪਞ੍ਚਵਣ੍ਣਾਯ ਪੀਤਿਯਾ ਨਿਰਨ੍ਤਰਂ ਫੁਟਂ ਅਹੋਸਿ.

ਅਥਸ੍ਸ ਮਣ੍ਡਪਂ ਓਲੋਕਯਤੋ ਏਤਦਹੋਸਿ – ‘‘ਨਾਯਂ ਮਣ੍ਡਪੋ ਮਨੁਸ੍ਸਭੂਤੇਨ ਕਤੋ, ਮਯ੍ਹਂ ਅਜ੍ਝਾਸਯਂ ਮਯ੍ਹਂ ਗੁਣਂ ਆਗਮ੍ਮ ਅਦ੍ਧਾ ਸਕ੍ਕਸ੍ਸ ਦੇਵਰਞ੍ਞੋ ਭਵਨਂ ਉਣ੍ਹਂ ਅਹੋਸਿ, ਤਤੋ ਸਕ੍ਕੇਨ ਦੇਵਾਨਮਿਨ੍ਦੇਨ ਅਯਂ ਮਣ੍ਡਪੋ ਨਿਮ੍ਮਿਤੋ’’ਤਿ. ‘‘ਨ ਖੋ ਪਨ ਮੇ ਯੁਤ੍ਤਂ ਏਵਰੂਪੇ ਮਣ੍ਡਪੇ ਏਕਦਿਵਸਂਯੇਵ ਦਾਨਂ ਦਾਤੁਂ, ਸਤ੍ਤਾਹਂ ਦਸ੍ਸਾਮੀ’’ਤਿ ਚਿਨ੍ਤੇਸਿ. ਬਾਹਿਰਕਦਾਨਂ ਨਾਮ ਤਤ੍ਤਕਮ੍ਪਿ ਸਮਾਨਂ ਬੋਧਿਸਤ੍ਤਾਨਂ ਹਦਯਂ ਤੁਟ੍ਠਿਂ ਕਾਤੁਂ ਨ ਸਕ੍ਕੋਤਿ, ਅਲਙ੍ਕਤਸੀਸਂ ਵਾ ਛਿਨ੍ਦਿਤ੍ਵਾ ਅਞ੍ਜਿਤਾਨਿ ਵਾ ਅਕ੍ਖੀਨਿ ਉਪ੍ਪਾਟੇਤ੍ਵਾ ਹਦਯਮਂਸਂ ਵਾ ਉਬ੍ਬਟ੍ਟੇਤ੍ਵਾ ਦਿਨ੍ਨਕਾਲੇ ਬੋਧਿਸਤ੍ਤਾਨਂ ਚਾਗਂ ਨਿਸ੍ਸਾਯ ਤੁਟ੍ਠਿ ਨਾਮ ਹੋਤਿ. ਅਮ੍ਹਾਕਂ ਬੋਧਿਸਤ੍ਤਸ੍ਸ ਹਿ ਸਿਵਿਜਾਤਕੇ (ਜਾ. ੧.੧੫.੫੨ ਆਦਯੋ) ਦੇਵਸਿਕਂ ਪਞ੍ਚਕਹਾਪਣਸਤਸਹਸ੍ਸਾਨਿ ਵਿਸ੍ਸਜ੍ਜੇਤ੍ਵਾ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇਤਿ ਪਞ੍ਚਸੁ ਠਾਨੇਸੁ ਦਾਨਂ ਦੇਨ੍ਤਸ੍ਸ ਤਂ ਦਾਨਂ ਚਾਗਤੁਟ੍ਠਿਂ ਉਪ੍ਪਾਦੇਤੁਂ ਨਾਸਕ੍ਖਿ. ਯਦਾ ਪਨਸ੍ਸ ਬ੍ਰਾਹ੍ਮਣਵਣ੍ਣੇਨ ਆਗਨ੍ਤ੍ਵਾ ਸਕ੍ਕੋ ਦੇਵਰਾਜਾ ਅਕ੍ਖੀਨਿ ਯਾਚਿ, ਤਦਾ ਸੋ ਤਾਨਿ ਚਕ੍ਖੂਨਿ ਉਪ੍ਪਾਟੇਤ੍ਵਾ ਅਦਾਸਿ, ਦਦਮਾਨਸ੍ਸੇਵ ਹਾਸੋ ਉਪ੍ਪਜ੍ਜਿ, ਕੇਸਗ੍ਗਮਤ੍ਤਮ੍ਪਿ ਚਿਤ੍ਤਸ੍ਸ ਅਞ੍ਞਥਤ੍ਤਂ ਨਾਹੋਸਿ. ਏਵਂ ਸਬ੍ਬਞ੍ਞੁਬੋਧਿਸਤ੍ਤਾਨਂ ਬਾਹਿਰਦਾਨਂ ਨਿਸ੍ਸਾਯ ਤਿਤ੍ਤਿ ਨਾਮ ਨਤ੍ਥਿ. ਤਸ੍ਮਾ ਸੋਪਿ ਮਹਾਪੁਰਿਸੋ – ‘‘ਮਯਾ ਕੋਟਿਸਤਸਹਸ੍ਸਸਙ੍ਖਾਨਂ ਭਿਕ੍ਖੂਨਂ ਦਾਨਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਤਸ੍ਮਿਂ ਮਣ੍ਡਪੇ ਨਿਸੀਦਾਪੇਤ੍ਵਾ ਸਤ੍ਤਾਹਂ ਗਵਪਾਨਂ ਨਾਮ ਦਾਨਂ ਅਦਾਸਿ.

ਏਤ੍ਥ ਗਵਪਾਨਨ੍ਤਿ ਮਹਨ੍ਤੇ ਮਹਨ੍ਤੇ ਕੋਲਮ੍ਬੇ ਖੀਰਸ੍ਸ ਪੂਰੇਤ੍ਵਾ ਉਦ੍ਧਨੇਸੁ ਆਰੋਪੇਤ੍ਵਾ ਘਨਪਾਕਪਕ੍ਕੇ ਖੀਰੇ ਥੋਕਥੋਕੇ ਤਣ੍ਡੁਲੇ ਪਕ੍ਖਿਪਿਤ੍ਵਾ ਪਕ੍ਕਮਧੁਸਕ੍ਖਰਚੁਣ੍ਣਸਪ੍ਪੀਹਿ ਅਭਿਸਙ੍ਖਤਭੋਜਨਂ ਵੁਚ੍ਚਤਿ. ਇਦਮੇਵ ਚਤੁਮਧੁਰਭੋਜਨਨ੍ਤਿਪਿ ਵੁਚ੍ਚਤਿ. ਮਨੁਸ੍ਸਾਯੇਵ ਪਨ ਪਰਿਵਿਸਿਤੁਂ ਨਾਸਕ੍ਖਿਂਸੁ. ਦੇਵਾਪਿ ਏਕਨ੍ਤਰਿਕਾ ਹੁਤ੍ਵਾ ਪਰਿਵਿਸਿਂਸੁ. ਦ੍ਵਾਦਸਯੋਜਨਪ੍ਪਮਾਣਮ੍ਪਿ ਤਂ ਠਾਨਂ ਤੇ ਭਿਕ੍ਖੂ ਗਣ੍ਹਿਤੁਂ ਨਪ੍ਪਹੋਸਿਯੇਵ, ਤੇ ਪਨ ਭਿਕ੍ਖੂ ਅਤ੍ਤਨੋ ਅਤ੍ਤਨੋ ਅਨੁਭਾਵੇਨ ਨਿਸੀਦਿਂਸੁ. ਪਰਿਯੋਸਾਨਦਿਵਸੇ ਸਬ੍ਬੇਸਂ ਭਿਕ੍ਖੂਨਂ ਪਤ੍ਤੇ ਧੋਵਾਪੇਤ੍ਵਾ ਭੇਸਜ੍ਜਤ੍ਥਾਯ ਸਪ੍ਪਿਨਵਨੀਤਮਧੁਫਾਣਿਤਾਦੀਨਂ ਪੂਰੇਤ੍ਵਾ ਤਿਚੀਵਰੇਹਿ ਸਦ੍ਧਿਂ ਅਦਾਸਿ. ਤਤ੍ਥ ਸਙ੍ਘਨਵਕਭਿਕ੍ਖੁਨਾ ਲਦ੍ਧਚੀਵਰਸਾਟਕਾ ਸਤਸਹਸ੍ਸਗ੍ਘਨਿਕਾ ਅਹੇਸੁਂ.

ਅਥ ਸਤ੍ਥਾ ਅਨੁਮੋਦਨਂ ਕਰੋਨ੍ਤੋ – ‘‘ਅਯਂ ਮਹਾਪੁਰਿਸੋ ਏਵਰੂਪਂ ਮਹਾਦਾਨਂ ਅਦਾਸਿ, ਕੋ ਨੁ ਖੋ ਭਵਿਸ੍ਸਤੀ’’ਤਿ ਉਪਧਾਰੇਨ੍ਤੋ – ‘‘ਅਨਾਗਤੇ ਕਪ੍ਪਸਤਸਹਸ੍ਸਾਧਿਕਾਨਂ ਦ੍ਵਿਨ੍ਨਂ ਅਸਙ੍ਖ੍ਯੇਯ੍ਯਾਨਂ ਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਦਿਸ੍ਵਾ ਤਤੋ ਮਹਾਸਤ੍ਤਂ ਆਮਨ੍ਤੇਤ੍ਵਾ – ‘‘ਤ੍ਵਂ ਏਤ੍ਤਕਂ ਨਾਮ ਕਾਲਂ ਅਤਿਕ੍ਕਮਿਤ੍ਵਾ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਸੀ’’ਤਿ ਬ੍ਯਾਕਾਸਿ. ਅਥ ਮਹਾਪੁਰਿਸੋ ਭਗਵਤੋ ਬ੍ਯਾਕਰਣਂ ਸੁਤ੍ਵਾ ਪਮੁਦਿਤਹਦਯੋ – ‘‘ਅਹਂ ਕਿਰ ਬੁਦ੍ਧੋ ਭਵਿਸ੍ਸਾਮਿ, ਨ ਮੇ ਘਰਾਵਾਸੇਨ ਅਤ੍ਥੋ, ਪਬ੍ਬਜਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਥਾਰੂਪਂ ਸਮ੍ਪਤ੍ਤਿਂ ਖੇਲ਼ਪਿਣ੍ਡਂ ਵਿਯ ਪਹਾਯ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਅਭਿਞ੍ਞਾ ਚ ਅਟ੍ਠ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਅਪਰਿਹੀਨਜ੍ਝਾਨੋ ਯਾਵਤਾਯੁਕਂ ਠਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ. ਤੇਨ ਵੁਤ੍ਤਂ –

੧੦. ‘‘ਅਹਂ ਤੇਨ ਸਮਯੇਨ, ਸੁਰੁਚੀ ਨਾਮ ਬ੍ਰਾਹ੍ਮਣੋ;

ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ.

੧੧. ‘‘ਤਮਹਂ ਉਪਸਙ੍ਕਮ੍ਮ, ਸਰਣਂ ਗਨ੍ਤ੍ਵਾਨ ਸਤ੍ਥੁਨੋ;

ਸਮ੍ਬੁਦ੍ਧਪ੍ਪਮੁਖਂ ਸਙ੍ਘਂ, ਗਨ੍ਧਮਾਲੇਨ ਪੂਜਯਿਂ;

ਪੂਜੇਤ੍ਵਾ ਗਨ੍ਧਮਾਲੇਨ, ਗਵਪਾਨੇਨ ਤਪ੍ਪਯਿਂ.

੧੨. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਮਙ੍ਗਲੋ ਦ੍ਵਿਪਦੁਤ੍ਤਮੋ;

ਅਪਰਿਮੇਯ੍ਯਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੩. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮ’’ਨ੍ਤਿ. –

ਅਟ੍ਠ ਗਾਥਾ ਵਿਤ੍ਥਾਰੇਤਬ੍ਬਾ.

੧੪. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੧੫. ‘‘ਤਦਾ ਪੀਤਿਮਨੁਬ੍ਰੂਹਨ੍ਤੋ, ਸਮ੍ਬੋਧਿਵਰਪਤ੍ਤਿਯਾ;

ਬੁਦ੍ਧੇ ਦਤ੍ਵਾਨ ਮਂ ਗੇਹਂ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.

੧੬. ‘‘ਸੁਤ੍ਤਨ੍ਤਂ ਵਿਨਯਂ ਚਾਪਿ, ਨਵਙ੍ਗਂ ਸਤ੍ਥੁਸਾਸਨਂ;

ਸਬ੍ਬਂ ਪਰਿਯਾਪੁਣਿਤ੍ਵਾ, ਸੋਭਯਿਂ ਜਿਨਸਾਸਨਂ.

੧੭. ‘‘ਤਤ੍ਥਪ੍ਪਮਤ੍ਤੋ ਵਿਹਰਨ੍ਤੋ, ਬ੍ਰਹ੍ਮਂ ਭਾਵੇਤ੍ਵ ਭਾਵਨਂ;

ਅਭਿਞ੍ਞਾਪਾਰਮਿਂ ਗਨ੍ਤ੍ਵਾ, ਬ੍ਰਹ੍ਮਲੋਕਮਗਞ੍ਛਹ’’ਨ੍ਤਿ.

ਤਤ੍ਥ ਗਨ੍ਧਮਾਲੇਨਾਤਿ ਗਨ੍ਧੇਹਿ ਚੇਵ ਮਾਲੇਹਿ ਚ. ਗਵਪਾਨੇਨਾਤਿ ਇਦਂ ਵੁਤ੍ਤਮੇਵ. ‘‘ਘਤਪਾਨੇਨਾ’’ਤਿਪਿ ਕੇਚਿ ਪਠਨ੍ਤਿ. ਤਪ੍ਪਯਿਨ੍ਤਿ ਤਪ੍ਪੇਸਿਂ. ਉਤ੍ਤਰਿਂ ਵਤਮਧਿਟ੍ਠਾਸਿਨ੍ਤਿ ਭਿਯ੍ਯੋਪਿ ਵਤਮਧਿਟ੍ਠਾਸਿਂ. ਦਸਪਾਰਮਿਪੂਰਿਯਾਤਿ ਦਸਨ੍ਨਂ ਪਾਰਮੀਨਂ ਪੂਰਣਤ੍ਥਾਯ. ਪੀਤਿਨ੍ਤਿ ਹਦਯਤੁਟ੍ਠਿਂ. ਅਨੁਬ੍ਰੂਹਨ੍ਤੋਤਿ ਵਡ੍ਢੇਨ੍ਤੋ. ਸਮ੍ਬੋਧਿਵਰਪਤ੍ਤਿਯਾਤਿ ਬੁਦ੍ਧਤ੍ਤਪ੍ਪਤ੍ਤਿਯਾ. ਬੁਦ੍ਧੇ ਦਤ੍ਵਾਨਾਤਿ ਬੁਦ੍ਧਸ੍ਸ ਪਰਿਚ੍ਚਜਿਤ੍ਵਾ. ਮਂ ਗੇਹਨ੍ਤਿ ਮਮ ਗੇਹਂ, ਸਬ੍ਬਂ ਸਾਪਤੇਯ੍ਯਂ ਚਤੁਪਚ੍ਚਯਤ੍ਥਾਯ ਬੁਦ੍ਧਸ੍ਸ ਭਗਵਤੋ ਪਰਿਚ੍ਚਜਿਤ੍ਵਾਤਿ ਅਤ੍ਥੋ. ਤਤ੍ਥਾਤਿ ਤਸ੍ਮਿਂ ਬੁਦ੍ਧਸਾਸਨੇ. ਬ੍ਰਹ੍ਮਨ੍ਤਿ ਬ੍ਰਹ੍ਮਵਿਹਾਰਭਾਵਨਂ ਭਾਵੇਤ੍ਵਾ.

ਮਙ੍ਗਲਸ੍ਸ ਪਨ ਭਗਵਤੋ ਨਗਰਂ ਉਤ੍ਤਰਂ ਨਾਮ ਅਹੋਸਿ, ਪਿਤਾਪਿਸ੍ਸ ਉਤ੍ਤਰੋ ਨਾਮ ਰਾਜਾ ਖਤ੍ਤਿਯੋ, ਮਾਤਾਪਿ ਉਤ੍ਤਰਾ ਨਾਮ, ਸੁਦੇਵੋ ਚ ਧਮ੍ਮਸੇਨੋ ਚ ਦ੍ਵੇ ਅਗ੍ਗਸਾਵਕਾ, ਪਾਲਿਤੋ ਨਾਮ ਉਪਟ੍ਠਾਕੋ, ਸੀਵਲਾ ਚ ਅਸੋਕਾ ਚ ਦ੍ਵੇ ਅਗ੍ਗਸਾਵਿਕਾ, ਨਾਗਰੁਕ੍ਖੋ ਬੋਧਿ, ਅਟ੍ਠਾਸੀਤਿਹਤ੍ਥੁਬ੍ਬੇਧਂ ਸਰੀਰਂ ਅਹੋਸਿ, ਨਵੁਤਿਵਸ੍ਸਸਹਸ੍ਸਂ ਆਯੁਪਰਿਮਾਣਂ, ਭਰਿਯਾ ਪਨਸ੍ਸ ਯਸਵਤੀ ਨਾਮ, ਸੀਵਲੋ ਨਾਮ ਪੁਤ੍ਤੋ, ਅਸ੍ਸਯਾਨੇਨ ਨਿਕ੍ਖਮਿ. ਉਤ੍ਤਰਾਰਾਮੇ ਵਸਿ. ਉਤ੍ਤਰੋ ਨਾਮ ਉਪਟ੍ਠਾਕੋ, ਤਸ੍ਮਿਂ ਪਨ ਨਵੁਤਿਵਸ੍ਸਸਹਸ੍ਸਾਨਿ ਠਤ੍ਵਾ ਪਰਿਨਿਬ੍ਬੁਤੇ ਭਗਵਤਿ ਏਕਪ੍ਪਹਾਰੇਨੇਵ ਦਸਚਕ੍ਕਵਾਲ਼ਸਹਸ੍ਸਾਨਿ ਏਕਨ੍ਧਕਾਰਾਨਿ ਅਹੇਸੁਂ. ਸਬ੍ਬਚਕ੍ਕਵਾਲ਼ੇਸੁ ਮਨੁਸ੍ਸਾਨਂ ਮਹਨ੍ਤਂ ਆਰੋਦਨਪਰਿਦੇਵਨਂ ਅਹੋਸਿ. ਤੇਨ ਵੁਤ੍ਤਂ –

੧੮. ‘‘ਉਤ੍ਤਰਂ ਨਾਮ ਨਗਰਂ, ਉਤ੍ਤਰੋ ਨਾਮ ਖਤ੍ਤਿਯੋ;

ਉਤ੍ਤਰਾ ਨਾਮ ਜਨਿਕਾ, ਮਙ੍ਗਲਸ੍ਸ ਮਹੇਸਿਨੋ.

੨੩. ‘‘ਸੁਦੇਵੋ ਧਮ੍ਮਸੇਨੋ ਚ, ਅਹੇਸੁਂ ਅਗ੍ਗਸਾਵਕਾ;

ਪਾਲਿਤੋ ਨਾਮੁਪਟ੍ਠਾਕੋ, ਮਙ੍ਗਲਸ੍ਸ ਮਹੇਸਿਨੋ.

੨੪. ‘‘ਸੀਵਲਾ ਚ ਅਸੋਕਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਨਾਗਰੁਕ੍ਖੋਤਿ ਵੁਚ੍ਚਤਿ.

੨੬. ‘‘ਅਟ੍ਠਾਸੀਤਿ ਰਤਨਾਨਿ, ਅਚ੍ਚੁਗ੍ਗਤੋ ਮਹਾਮੁਨਿ;

ਤਤੋ ਨਿਦ੍ਧਾਵਤੀ ਰਂਸੀ, ਅਨੇਕਸਤਸਹਸ੍ਸਿਯੋ.

੨੭. ‘‘ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੮. ‘‘ਯਥਾਪਿ ਸਾਗਰੇ ਊਮੀ, ਨ ਸਕ੍ਕਾ ਤਾ ਗਣੇਤੁਯੇ;

ਤਥੇਵ ਸਾਵਕਾ ਤਸ੍ਸ, ਨ ਸਕ੍ਕਾ ਤੇ ਗਣੇਤੁਯੇ.

੨੯. ‘‘ਯਾਵ ਅਟ੍ਠਾਸਿ ਸਮ੍ਬੁਦ੍ਧੋ, ਮਙ੍ਗਲੋ ਲੋਕਨਾਯਕੋ;

ਨ ਤਸ੍ਸ ਸਾਸਨੇ ਅਤ੍ਥਿ, ਸਕਿਲੇਸਮਰਣਂ ਤਦਾ.

੩੦. ‘‘ਧਮ੍ਮੋਕ੍ਕਂ ਧਾਰਯਿਤ੍ਵਾਨ, ਸਨ੍ਤਾਰੇਤ੍ਵਾ ਮਹਾਜਨਂ;

ਜਲਿਤ੍ਵਾ ਧੁਮਕੇਤੂਵ, ਨਿਬ੍ਬੁਤੋ ਸੋ ਮਹਾਯਸੋ.

੩੧. ‘‘ਸਙ੍ਖਾਰਾਨਂ ਸਭਾਵਤ੍ਤਂ, ਦਸ੍ਸਯਿਤ੍ਵਾ ਸਦੇਵਕੇ;

ਜਲਿਤ੍ਵਾ ਅਗ੍ਗਿਕ੍ਖਨ੍ਧੋਵ, ਸੂਰਿਯੋ ਅਤ੍ਥਙ੍ਗਤੋ ਯਥਾ’’ਤਿ.

ਤਤ੍ਥ ਤਤੋਤਿ ਤਸ੍ਸ ਮਙ੍ਗਲਸ੍ਸ ਸਰੀਰਤੋ. ਨਿਦ੍ਧਾਵਤੀਤਿ ਨਿਦ੍ਧਾਵਨ੍ਤਿ, ਵਚਨਵਿਪਰਿਯਾਯੋ ਦਟ੍ਠਬ੍ਬੋ. ਰਂਸੀਤਿ ਰਸ੍ਮਿਯੋ. ਅਨੇਕਸਤਸਹਸ੍ਸਿਯੋਤਿ ਅਨੇਕਸਤਸਹਸ੍ਸਾ. ਊਮੀਤਿ ਵੀਚਿਯੋ ਤਰਙ੍ਗਾ. ਗਣੇਤੁਯੇਤਿ ਗਣੇਤੁਂ ਸਙ੍ਖਾਤੁਂ. ਏਤ੍ਤਕਾ ਸਾਗਰੇ ਊਮਿਯੋਤਿ ਯਥਾ ਨ ਸਕ੍ਕਾ ਗਣੇਤੁਂ, ਏਵਂ ਤਸ੍ਸ ਭਗਵਤੋ ਸਾਵਕਾਪਿ ਨ ਸਕ੍ਕਾ ਗਣੇਤੁਂ, ਅਥ ਖੋ ਗਣਨਪਥਂ ਵੀਤਿਵਤ੍ਤਾਤਿ ਅਤ੍ਥੋ. ਯਾਵਾਤਿ ਯਾਵਤਕਂ ਕਾਲਂ. ਸਕਿਲੇਸਮਰਣਂ ਤਦਾਤਿ ਸਹ ਕਿਲੇਸੇਹਿ ਸਕਿਲੇਸੋ, ਸਕਿਲੇਸਸ੍ਸ ਮਰਣਂ ਸਕਿਲੇਸਮਰਣਂ, ਤਂ ਨਤ੍ਥਿ. ਤਦਾ ਕਿਰ ਤਸ੍ਸ ਭਗਵਤੋ ਸਾਸਨੇ ਸਾਵਕਾ ਸਬ੍ਬੇ ਅਰਹਤ੍ਤਂ ਪਤ੍ਵਾਯੇਵ ਪਰਿਨਿਬ੍ਬਾਯਿਂਸੁ. ਪੁਥੁਜ੍ਜਨਾ ਵਾ ਸੋਤਾਪਨ੍ਨਾਦਯੋ ਵਾ ਹੁਤ੍ਵਾ ਨ ਕਾਲਮਕਂਸੂਤਿ ਅਤ੍ਥੋ. ਕੇਚਿ ‘‘ਸਮ੍ਮੋਹਮਾਰਣਂ ਤਦਾ’’ਤਿ ਪਠਨ੍ਤਿ.

ਧਮ੍ਮੋਕ੍ਕਨ੍ਤਿ ਧਮ੍ਮਦੀਪਕਂ. ਧੂਮਕੇਤੂਤਿ ਅਗ੍ਗਿ ਵੁਚ੍ਚਤਿ, ਇਧ ਪਨ ਪਦੀਪੋ ਦਟ੍ਠਬ੍ਬੋ ਤਸ੍ਮਾ ਪਦੀਪੋ ਵਿਯ ਜਲਿਤ੍ਵਾ ਨਿਬ੍ਬੁਤੋਤਿ ਅਤ੍ਥੋ. ਮਹਾਯਸੋਤਿ ਮਹਾਪਰਿਵਾਰੋ. ਕੇਚਿ ‘‘ਨਿਬ੍ਬੁਤੋ ਸੋ ਸਸਾਵਕੋ’’ਤਿ ਪਠਨ੍ਤਿ. ਸਙ੍ਖਾਰਾਨਨ੍ਤਿ ਸਙ੍ਖਾਤਧਮ੍ਮਾਨਂ ਸਪ੍ਪਚ੍ਚਯਧਮ੍ਮਾਨਂ. ਸਭਾਵਤ੍ਤਨ੍ਤਿ ਅਨਿਚ੍ਚਾਦਿਸਾਮਞ੍ਞਲਕ੍ਖਣਂ. ਸੂਰਿਯੋ ਅਤ੍ਥਙ੍ਗਤੋ ਯਥਾਤਿ ਯਥਾ ਸਹਸ੍ਸਕਿਰਣੋ ਦਿਵਸਕਰੋ ਸਬ੍ਬਂ ਤਮਗਣਂ ਵਿਧਮਿਤ੍ਵਾ ਸਬ੍ਬਞ੍ਚ ਲੋਕਂ ਓਭਾਸੇਤ੍ਵਾ ਅਤ੍ਥਮੁਪਗਚ੍ਛਤਿ, ਏਵਂ ਮਙ੍ਗਲਦਿਵਸਕਰੋਪਿ ਵੇਨੇਯ੍ਯਕਮਲਵਨਵਿਕਸਨਕਰੋ ਸਬ੍ਬਂ ਅਜ੍ਝਤ੍ਤਿਕਬਾਹਿਰਲੋਕਤਮਂ ਵਿਧਮਿਤ੍ਵਾ ਅਤ੍ਤਨੋ ਸਰੀਰਪ੍ਪਭਾਯ ਜਲਿਤ੍ਵਾ ਅਤ੍ਥਙ੍ਗਤੋਤਿ ਅਤ੍ਥੋ. ਸੇਸਗਾਥਾ ਸਬ੍ਬਤ੍ਥ ਉਤ੍ਤਾਨਾ ਏਵਾਤਿ.

ਮਙ੍ਗਲਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਤਤਿਯੋ ਬੁਦ੍ਧਵਂਸੋ.