੪. ਕੋਣ੍ਡਞ੍ਞਬੁਦ੍ਧਵਂਸਵਣ੍ਣਨਾ

ਦੀਪਙ੍ਕਰੇ ਕਿਰ ਭਗਵਤਿ ਪਰਿਨਿਬ੍ਬੁਤੇ ਤਸ੍ਸ ਸਾਸਨਂ ਵਸ੍ਸਸਤਸਹਸ੍ਸਂ ਪਵਤ੍ਤਿਤ੍ਥ. ਅਥ ਬੁਦ੍ਧਾਨੁਬੁਦ੍ਧਾਨਂ ਸਾਵਕਾਨਂ ਅਨ੍ਤਰਧਾਨੇਨ ਸਾਸਨਮ੍ਪਿਸ੍ਸ ਅਨ੍ਤਰਧਾਯਿ. ਅਥਸ੍ਸ ਅਪਰਭਾਗੇ ਏਕਮਸਙ੍ਖ੍ਯੇਯ੍ਯਮਤਿਕ੍ਕਮਿਤ੍ਵਾ ਏਕਸ੍ਮਿਂ ਕਪ੍ਪੇ ਕੋਣ੍ਡਞ੍ਞੋ ਨਾਮ ਸਤ੍ਥਾ ਉਦਪਾਦਿ. ਸੋ ਪਨ ਭਗਵਾ ਸੋਲ਼ਸਅਸਙ੍ਖ੍ਯੇਯ੍ਯਂ ਕਪ੍ਪਾਨਞ੍ਚ ਸਤਸਹਸ੍ਸਂ ਪਾਰਮਿਯੋ ਪੂਰੇਤ੍ਵਾ ਬੋਧਿਞਾਣਂ ਪਰਿਪਾਚੇਤ੍ਵਾ ਵੇਸ੍ਸਨ੍ਤਰਤ੍ਤਭਾਵਸਦਿਸੇ ਅਤ੍ਤਭਾਵੇ ਠਤ੍ਵਾ ਤਤੋ ਚਵਿਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਦੇਵਤਾਨਂ ਪਟਿਞ੍ਞਂ ਦਤ੍ਵਾ ਤੁਸਿਤਪੁਰਤੋ ਚਵਿਤ੍ਵਾ ਰਮ੍ਮਵਤੀਨਗਰੇ ਸੁਨਨ੍ਦਸ੍ਸ ਨਾਮ ਰਞ੍ਞੋ ਕੁਲੇ ਸੁਜਾਤਾਯ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਤਸ੍ਸਪਿ ਪਟਿਸਨ੍ਧਿਕ੍ਖਣੇ ਦੀਪਙ੍ਕਰਬੁਦ੍ਧਵਂਸੇ ਵੁਤ੍ਤਪ੍ਪਕਾਰਾਨਿ ਦ੍ਵਤ੍ਤਿਂਸ ਪਾਟਿਹਾਰਿਯਾਨਿ ਨਿਬ੍ਬਤ੍ਤਿਂਸੁ. ਸੋ ਦੇਵਤਾਹਿ ਕਤਾਰਕ੍ਖਸਂਵਿਧਾਨੋ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਮਾਤੁਕੁਚ੍ਛਿਤੋ ਨਿਕ੍ਖਮਿਤ੍ਵਾ ਸਬ੍ਬਸਤ੍ਤੁਤ੍ਤਰੋ ਉਤ੍ਤਰਾਭਿਮੁਖੋ ਸਤ੍ਤਪਦਵੀਤਿਹਾਰੇਨ ਗਨ੍ਤ੍ਵਾ ਸਬ੍ਬਾ ਚ ਦਿਸਾ ਵਿਲੋਕੇਤ੍ਵਾ ਆਸਭਿਂ ਵਾਚਂ ਨਿਚ੍ਛਾਰੇਸਿ – ‘‘ਅਗ੍ਗੋਹਮਸ੍ਮਿ ਲੋਕਸ੍ਸ, ਜੇਟ੍ਠੋਹਮਸ੍ਮਿ ਲੋਕਸ੍ਸ, ਸੇਟ੍ਠੋਹਮਸ੍ਮਿ ਲੋਕਸ੍ਸ, ਅਯਮਨ੍ਤਿਮਾ ਜਾਤਿ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ (ਦੀ. ਨਿ. ੨.੩੧; ਮ. ਨਿ. ੩.੨੦੭).

ਤਤੋ ਕੁਮਾਰਸ੍ਸ ਨਾਮਕਰਣਦਿਵਸੇ ਨਾਮਂ ਕਰੋਨ੍ਤਾ ‘‘ਕੋਣ੍ਡਞ੍ਞੋ’’ਤਿ ਨਾਮਮਕਂਸੁ. ਸੋ ਹਿ ਭਗਵਾ ਕੋਣ੍ਡਞ੍ਞਗੋਤ੍ਤੋ ਅਹੋਸਿ. ਤਸ੍ਸ ਕਿਰ ਤਯੋ ਪਾਸਾਦਾ ਅਹੇਸੁਂ – ਰਾਮ, ਸੁਰਾਮ, ਸੁਭਨਾਮਕਾ ਪਰਮਰਮਣੀਯਾ. ਤੇਸੁ ਤੀਣਿ ਸਤਸਹਸ੍ਸਾਨਿ ਨਾਟਕਿਤ੍ਥੀਨਂ ਨਚ੍ਚਗੀਤਵਾਦਿਤਕੁਸਲਾਨਂ ਸਬ੍ਬਕਾਲਂ ਪਚ੍ਚੁਪਟ੍ਠਿਤਾਨਿ ਅਹੇਸੁਂ. ਤਸ੍ਸ ਰੁਚਿਦੇਵੀ ਨਾਮ ਅਗ੍ਗਮਹੇਸੀ ਅਹੋਸਿ. ਵਿਜਿਤਸੇਨੋ ਨਾਮਸ੍ਸ ਪੁਤ੍ਤੋ ਅਹੋਸਿ. ਸੋ ਦਸਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ.

ਸੋ ਪਨ ਜਿਣ੍ਣਬ੍ਯਾਧਿਮਤਪਬ੍ਬਜਿਤੇ ਦਿਸ੍ਵਾ ਆਜਞ੍ਞਰਥੇਨ ਨਿਕ੍ਖਮਿਤ੍ਵਾ ਪਬ੍ਬਜਿਤ੍ਵਾ ਦਸ ਮਾਸੇ ਪਧਾਨਚਰਿਯਂ ਚਰਿ. ਕੋਣ੍ਡਞ੍ਞਕੁਮਾਰਂ ਪਨ ਪਬ੍ਬਜਨ੍ਤਂ ਦਸ ਜਨਕੋਟਿਯੋ ਅਨੁਪਬ੍ਬਜਿਂਸੁ. ਸੋ ਤੇਹਿ ਪਰਿਵੁਤੋ ਦਸ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਸੁਨਨ੍ਦਗਾਮੇ ਸਮਸਹਿਤਘਨਪਯੋਧਰਾਯ ਯਸੋਧਰਾਯ ਨਾਮ ਸੇਟ੍ਠਿਧੀਤਾਯ ਦਿਨ੍ਨਂ ਪਰਮਮਧੁਰਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਫਲਪਲ੍ਲਵਙ੍ਕੁਰਸਮਲਙ੍ਕਤੇ ਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਗਣਂ ਪਹਾਯ ਸੁਨਨ੍ਦਕਾਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਸਾਲਕਲ੍ਯਾਣਿਰੁਕ੍ਖਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਪੁਬ੍ਬਦਿਸਾਭਾਗਂ ਓਲੋਕੇਤ੍ਵਾ ਬੋਧਿਰੁਕ੍ਖਂ ਪਿਟ੍ਠਿਤੋ ਕਤ੍ਵਾ ਅਟ੍ਠਪਣ੍ਣਾਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਮਾਰਬਲਂ ਵਿਧਮਿਤ੍ਵਾ ਰਤ੍ਤਿਯਾ ਪਠਮਯਾਮੇ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ ਵਿਸੋਧੇਤ੍ਵਾ ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਤ੍ਵਾ ਪਚ੍ਛਿਮਯਾਮੇ ਪਚ੍ਚਯਾਕਾਰਂ ਸਮ੍ਮਸਿਤ੍ਵਾ ਆਨਾਪਾਨਚਤੁਤ੍ਥਜ੍ਝਾਨਤੋ ਵੁਟ੍ਠਾਯ ਪਞ੍ਚਸੁ ਖਨ੍ਧੇਸੁ ਅਭਿਨਿਵਿਸਿਤ੍ਵਾ ਉਦਯਬ੍ਬਯਵਸੇਨ ਸਮਪਞ੍ਞਾਸ ਲਕ੍ਖਣਾਨਿ ਦਿਸ੍ਵਾ ਯਾਵ ਗੋਤ੍ਰਭੁਞਾਣਂ ਵਿਪਸ੍ਸਨਂ ਵਡ੍ਢੇਤ੍ਵਾ ਚਤ੍ਤਾਰਿ ਮਗ੍ਗਞਾਣਾਨਿ ਚਤ੍ਤਾਰਿ ਚ ਫਲਞਾਣਾਨਿ ਚਤਸ੍ਸੋ ਪਟਿਸਮ੍ਭਿਦਾ ਚਤੁਯੋਨਿਪਰਿਚ੍ਛੇਦਕਞਾਣਂ ਪਞ੍ਚਗਤਿਪਰਿਚ੍ਛੇਦਕਞਾਣਂ ਛ ਅਸਾਧਾਰਣਞਾਣਾਨਿ ਸਕਲੇ ਚ ਬੁਦ੍ਧਗੁਣੇ ਪਟਿਵਿਜ੍ਝਿਤ੍ਵਾ ਪਰਿਪੁਣ੍ਣਸਙ੍ਕਪ੍ਪੋ ਬੋਧਿਮੂਲੇ ਨਿਸਿਨ੍ਨੋਵ –

‘‘ਅਨੇਕਜਾਤਿਸਂਸਾਰਂ, ਸਨ੍ਧਾਵਿਸ੍ਸਂ ਅਨਿਬ੍ਬਿਸਂ;

ਗਹਕਾਰਂ ਗਵੇਸਨ੍ਤੋ, ਦੁਕ੍ਖਾ ਜਾਤਿ ਪੁਨਪ੍ਪੁਨਂ.

‘‘ਗਹਕਾਰਕ ਦਿਟ੍ਠੋਸਿ, ਪੁਨ ਗੇਹਂ ਨ ਕਾਹਸਿ;

ਸਬ੍ਬਾ ਤੇ ਫਾਸੁਕਾ ਭਗ੍ਗਾ, ਗਹਕੂਟਂ ਵਿਸਙ੍ਖਤਂ;

ਵਿਸਙ੍ਖਾਰਗਤਂ ਚਿਤ੍ਤਂ, ਤਣ੍ਹਾਨਂ ਖਯਮਜ੍ਝਗਾ. (ਧ. ਪ. ੧੫੩-੧੫੪);

‘‘ਅਯੋਘਨਹਤਸ੍ਸੇਵ, ਜਲਤੋ ਜਾਤਵੇਦਸੋ;

ਅਨੁਪੁਬ੍ਬੂਪਸਨ੍ਤਸ੍ਸ, ਯਥਾ ਨ ਞਾਯਤੇ ਗਤਿ.

‘‘ਏਵਂ ਸਮ੍ਮਾ ਵਿਮੁਤ੍ਤਾਨਂ, ਕਾਮਬਨ੍ਧੋਘਤਾਰਿਨਂ;

ਪਞ੍ਞਾਪੇਤੁਂ ਗਤੀ ਨਤ੍ਥਿ, ਪਤ੍ਤਾਨਂ ਅਚਲਂ ਸੁਖ’’ਨ੍ਤਿ. (ਉਦਾ. ੮੦) –

ਏਵਂ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਬੋਧਿਮੂਲੇਯੇਵ ਫਲਸਮਾਪਤ੍ਤਿਸੁਖੇਨ ਵੀਤਿਨਾਮੇਤ੍ਵਾ ਅਟ੍ਠਮੇ ਸਤ੍ਤਾਹੇ ਬ੍ਰਹ੍ਮੁਨੋ ਅਜ੍ਝੇਸਨਂ ਪਟਿਚ੍ਚ – ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ (ਮ. ਨਿ. ੧.੨੮੪; ੨.੩੪੧; ਮਹਾਵ. ੧੦) ਉਪਧਾਰੇਨ੍ਤੋ ਅਤ੍ਤਨਾ ਸਦ੍ਧਿਂ ਪਬ੍ਬਜਿਤਾ ਦਸ ਭਿਕ੍ਖੁਕੋਟਿਯੋ ਅਦ੍ਦਸ. ‘‘ਇਮੇ ਪਨ ਕੁਲਪੁਤ੍ਤਾ ਸਮੁਪਚਿਤਕੁਸਲਮੂਲਾ ਮਂ ਪਬ੍ਬਜਨ੍ਤਂ ਅਨੁਪਬ੍ਬਜਿਤਾ ਮਯਾ ਸਦ੍ਧਿਂ ਪਧਾਨਂ ਚਰਿਤ੍ਵਾ ਮਂ ਉਪਟ੍ਠਹਿਂਸੁ, ਹਨ੍ਦਾਹਂ ਇਮੇਸਂ ਸਬ੍ਬਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ ਏਵਂ ਉਪਧਾਰੇਤ੍ਵਾ – ‘‘ਇਦਾਨਿ ਪਨ ਤੇ ਕਤ੍ਥ ਵਸਨ੍ਤੀ’’ਤਿ ਓਲੋਕੇਨ੍ਤੋ – ‘‘ਇਤੋ ਅਟ੍ਠਾਰਸਯੋਜਨਿਕੇ ਅਰੁਨ੍ਧਵਤੀਨਗਰੇ ਦੇਵਵਨੇ ਵਿਹਰਨ੍ਤੀ’’ਤਿ ਦਿਸ੍ਵਾ – ‘‘ਤੇਸਂ ਧਮ੍ਮਂ ਦੇਸੇਤੁਂ ਗਮਿਸ੍ਸਾਮੀ’’ਤਿ ਪਤ੍ਤਚੀਵਰਮਾਦਾਯ ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ ਬੋਧਿਮੂਲੇ ਅਨ੍ਤਰਹਿਤੋ ਦੇਵਵਨੇ ਪਾਤੁਰਹੋਸਿ.

ਤਸ੍ਮਿਞ੍ਚ ਸਮਯੇ ਤਾ ਦਸ ਭਿਕ੍ਖੁਕੋਟਿਯੋ ਅਰੁਨ੍ਧਵਤੀਨਗਰਂ ਉਪਨਿਸ੍ਸਾਯ ਦੇਵਵਨੇ ਵਿਹਰਨ੍ਤਿ. ਤੇ ਪਨ ਭਿਕ੍ਖੂ ਦਸਬਲਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਪਸਨ੍ਨਮਾਨਸਾ ਪਚ੍ਚੁਗ੍ਗਨ੍ਤ੍ਵਾ, ਭਗਵਤੋ ਪਤ੍ਤਚੀਵਰਂ ਪਟਿਗ੍ਗਹੇਤ੍ਵਾ, ਬੁਦ੍ਧਾਸਨਂ ਪਞ੍ਞਾਪੇਤ੍ਵਾ, ਸਤ੍ਥੁ ਗਾਰਵਂ ਕਤ੍ਵਾ, ਭਗਵਨ੍ਤਂ ਵਨ੍ਦਿਤ੍ਵਾ, ਪਰਿਵਾਰੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਤਤ੍ਰ ਕੋਣ੍ਡਞ੍ਞੋ ਦਸਬਲੋ ਮੁਨਿਗਣਪਰਿਵੁਤੋ ਬੁਦ੍ਧਾਸਨੇ ਨਿਸਿਨ੍ਨੋ ਤਿਦਸਗਣਪਰਿਵੁਤੋ ਦਸਸਤਨਯਨੋ ਵਿਯ ਵਿਮਲਗਗਨਤਲਗਤੋ ਸਰਦਸਮਯਰਜਨਿਕਰੋ ਵਿਯ ਤਾਰਾਗਣਪਰਿਵੁਤੋ ਪੁਣ੍ਣਚਨ੍ਦੋ ਵਿਯ ਵਿਰੋਚਿਤ੍ਥ. ਅਥ ਸਤ੍ਥਾ ਤੇਸਂ ਸਬ੍ਬਬੁਦ੍ਧਨਿਸੇਵਿਤਂ ਅਨੁਤ੍ਤਰਂ ਤਿਪਰਿਵਟ੍ਟਂ ਦ੍ਵਾਦਸਾਕਾਰਂ ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਨ੍ਤਂ ਕਥੇਤ੍ਵਾ ਦਸਭਿਕ੍ਖੁਕੋਟਿਪ੍ਪਮੁਖਾ ਸਤਸਹਸ੍ਸਦੇਵਮਨੁਸ੍ਸਕੋਟਿਯੋ ਧਮ੍ਮਾਮਤਂ ਪਾਯੇਸਿ. ਤੇਨ ਵੁਤ੍ਤਂ –

੧. ‘‘ਦੀਪਙ੍ਕਰਸ੍ਸ ਅਪਰੇਨ, ਕੋਣ੍ਡਞ੍ਞੋ ਨਾਮ ਨਾਯਕੋ;

ਅਨਨ੍ਤਤੇਜੋ ਅਮਿਤਯਸੋ, ਅਪ੍ਪਮੇਯ੍ਯੋ ਦੁਰਾਸਦੋ.

੨. ‘‘ਧਰਣੂਪਮੋ ਖਮਨੇਨ, ਸੀਲੇਨ ਸਾਗਰੂਪਮੋ;

ਸਮਾਧਿਨਾ ਮੇਰੂਪਮੋ, ਞਾਣੇਨ ਗਗਨੂਪਮੋ.

੩. ‘‘ਇਨ੍ਦ੍ਰਿਯਬਲਬੋਜ੍ਝਙ੍ਗ-ਮਗ੍ਗਸਚ੍ਚਪ੍ਪਕਾਸਨਂ;

ਪਕਾਸੇਸਿ ਸਦਾ ਬੁਦ੍ਧੋ ਹਿਤਾਯ ਸਬ੍ਬਪਾਣਿਨਂ.

੪. ‘‘ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਕੋਣ੍ਡਞ੍ਞੇ ਲੋਕਨਾਯਕੇ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਦੀਪਙ੍ਕਰਸ੍ਸ ਅਪਰੇਨਾਤਿ ਦੀਪਙ੍ਕਰਸ੍ਸ ਸਤ੍ਥੁਨੋ ਅਪਰਭਾਗੇਤਿ ਅਤ੍ਥੋ. ਕੋਣ੍ਡਞ੍ਞੋ ਨਾਮਾਤਿ ਅਤ੍ਤਨੋ ਗੋਤ੍ਤਵਸੇਨ ਸਮਧਿਗਤਨਾਮਧੇਯ੍ਯੋ. ਨਾਯਕੋਤਿ ਵਿਨਾਯਕੋ. ਅਨਨ੍ਤਤੇਜੋਤਿ ਅਤ੍ਤਨੋ ਸੀਲਗੁਣਞਾਣਪੁਞ੍ਞਤੇਜੇਨ ਅਨਨ੍ਤਤੇਜੋ. ਹੇਟ੍ਠਤੋ ਅਵੀਚਿ ਉਪਰਿ ਭਵਗ੍ਗਂ ਤਿਰਿਯਤੋ ਅਨਨ੍ਤਾ ਲੋਕਧਾਤੁਯੋ ਏਤ੍ਥਨ੍ਤਰੇ ਏਕਪੁਗ੍ਗਲੋਪਿ ਤਸ੍ਸ ਮੁਖਂ ਓਲੋਕੇਤ੍ਵਾ ਠਾਤੁਂ ਸਮਤ੍ਥੋ ਨਾਮ ਨਤ੍ਥਿ. ਤੇਨ ਵੁਤ੍ਤਂ ‘‘ਅਨਨ੍ਤਤੇਜੋ’’ਤਿ. ਅਮਿਤਯਸੋਤਿ ਅਨਨ੍ਤਪਰਿਵਾਰੋ. ਤਸ੍ਸ ਹਿ ਭਗਵਤੋ ਵਸ੍ਸਸਤਸਹਸ੍ਸਾਨਿ ਯਾਵ ਪਰਿਨਿਬ੍ਬਾਨਸਮਯਂ ਏਤ੍ਥਨ੍ਤਰੇ ਭਿਕ੍ਖੁਪਰਿਸਾਯ ਗਣਨਪਰਿਚ੍ਛੇਦੋ ਨਾਮ ਨਾਹੋਸਿ. ਤਸ੍ਮਾ ‘‘ਅਮਿਤਯਸੋ’’ਤਿ ਵੁਚ੍ਚਤਿ. ਅਮਿਤਗੁਣਕਿਤ੍ਤਿਪਿ ‘‘ਅਮਿਤਯਸੋ’’ਤਿ ਵੁਚ੍ਚਤਿ. ਅਪ੍ਪਮੇਯ੍ਯੋਤਿ ਗੁਣਗਣਪਰਿਮਾਣਵਸੇਨ ਨਪ੍ਪਮੇਯ੍ਯੋਤਿ ਅਪ੍ਪਮੇਯ੍ਯੋ. ਯਥਾਹ –

‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ, ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;

ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ, ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿ. (ਦੀ. ਨਿ. ਅਟ੍ਠ. ੧.੩੦੪; ੩.੧੪੧; ਮ. ਨਿ. ਅਟ੍ਠ. ੨.੪੨੫; ਉਦਾ. ਅਟ੍ਠ. ੫੩; ਚਰਿਯਾ. ਅਟ੍ਠ. ਨਿਦਾਨਕਥਾ);

ਤਸ੍ਮਾ ਅਪ੍ਪਮੇਯ੍ਯਗੁਣਗਣਤ੍ਤਾ ‘‘ਅਪ੍ਪਮੇਯ੍ਯੋ’’ਤਿ ਵੁਚ੍ਚਤਿ. ਦੁਰਾਸਦੋਤਿ ਦੁਰੁਪਸਙ੍ਕਮਨੀਯੋ, ਆਸਜ੍ਜ ਘਟ੍ਟੇਤ੍ਵਾ ਉਪਸਙ੍ਕਮਿਤੁਮਸਕ੍ਕੁਣੇਯ੍ਯਭਾਵਤੋ ਦੁਰਾਸਦੋ, ਦੁਰਭਿਭਵਨੀਯੋਤਿ ਅਤ੍ਥੋ.

ਧਰਣੂਪਮੋਤਿ ਧਰਣੀਸਮੋ. ਖਮਨੇਨਾਤਿ ਖਨ੍ਤਿਯਾ, ਚਤੁਨਹੁਤਾਧਿਕਦ੍ਵਿਯੋਜਨਸਤਸਹਸ੍ਸਬਹਲਾ ਮਹਾਪਥਵੀ ਵਿਯ ਪਕਤਿਵਾਤੇਨ ਲਾਭਾਲਾਭਇਟ੍ਠਾਨਿਟ੍ਠਾਦੀਹਿ ਅਕਮ੍ਪਨਭਾਵਤੋ ‘‘ਧਰਣੂਪਮੋ’’ਤਿ ਵੁਚ੍ਚਤਿ. ਸੀਲੇਨ ਸਾਗਰੂਪਮੋਤਿ ਸੀਲਸਂਵਰੇਨ ਵੇਲਾਨਾਤਿਕ੍ਕਮਨਭਾਵੇਨ ਸਾਗਰਸਮੋ. ‘‘ਮਹਾਸਮੁਦ੍ਦੋ, ਭਿਕ੍ਖਵੇ, ਠਿਤਧਮ੍ਮੋ ਵੇਲਂ ਨਾਤਿਵਤ੍ਤਤੀ’’ਤਿ (ਅ. ਨਿ. ੮.੧੯; ਚੂਲ਼ਵ. ੩੮੪; ਮਿ. ਪ. ੬.੨.੧੦) ਹਿ ਵੁਤ੍ਤਂ.

ਸਮਾਧਿਨਾ ਮੇਰੂਪਮੋਤਿ ਸਮਾਧਿਪਟਿਪਕ੍ਖਭੂਤਧਮ੍ਮਜਨਿਤਕਮ੍ਪਾਭਾਵਤੋ ਮੇਰੁਨਾ ਗਿਰਿਵਰੇਨ ਸਮੋ, ਸਦਿਸੋਤਿ ਅਤ੍ਥੋ. ਮੇਰੁਗਿਰਿਵਰੋ ਵਿਯ ਥਿਰਤਰਸਰੀਰੋਤਿ ਵਾ. ਞਾਣੇਨ ਗਗਨੂਪਮੋਤਿ ਏਤ੍ਥ ਭਗਵਤੋ ਞਾਣਸ੍ਸ ਅਨਨ੍ਤਭਾਵੇਨ ਅਨਨ੍ਤਾਕਾਸੇਨ ਉਪਮਾ ਕਤਾ. ਚਤ੍ਤਾਰਿ ਅਨਨ੍ਤਾਨਿ ਵੁਤ੍ਤਾਨਿ ਭਗਵਤਾ. ਯਥਾਹ –

‘‘ਸਤ੍ਤਕਾਯੋ ਚ ਆਕਾਸੋ, ਚਕ੍ਕਵਾਲ਼ਾ ਚਨਨ੍ਤਕਾ;

ਬੁਦ੍ਧਞਾਣਂ ਅਪ੍ਪਮੇਯ੍ਯਂ, ਨ ਸਕ੍ਕਾ ਏਤੇ ਵਿਜਾਨਿਤੁ’’ਨ੍ਤਿ. (ਬੁ. ਵਂ. ੧.੬੪);

ਤਸ੍ਮਾ ਅਨਨ੍ਤਸ੍ਸ ਞਾਣਸ੍ਸ ਅਨਨ੍ਤੇਨ ਆਕਾਸੇਨ ਉਪਮਾ ਕਤਾਤਿ.

ਇਨ੍ਦ੍ਰਿਯਬਲਬੋਜ੍ਝਙ੍ਗਮਗ੍ਗਸਚ੍ਚਪ੍ਪਕਾਸਨਨ੍ਤਿ ਏਤੇਸਂ ਇਨ੍ਦ੍ਰਿਯਬਲਬੋਜ੍ਝਙ੍ਗਮਗ੍ਗਸਚ੍ਚਾਨਂ ਗਹਣੇਨ ਸਤਿਪਟ੍ਠਾਨਸਮ੍ਮਪ੍ਪਧਾਨਿਦ੍ਧਿਪਾਦਾਪਿ ਗਹਿਤਾਵ ਹੋਨ੍ਤਿ. ਤਸ੍ਮਾ ਇਨ੍ਦ੍ਰਿਯਾਦੀਨਂ ਚਤੁਸਙ੍ਖੇਪਾਨਂ ਵਸੇਨ ਸਤ੍ਤਤ੍ਤਿਂਸਬੋਧਿਪਕ੍ਖਿਯਧਮ੍ਮਾਨਂ ਪਕਾਸਨਧਮ੍ਮਂ ਪਕਾਸੇਸਿ, ਦੇਸੇਸੀਤਿ ਅਤ੍ਥੋ. ਹਿਤਾਯਾਤਿ ਹਿਤਤ੍ਥਂ. ਧਮ੍ਮਚਕ੍ਕਂ ਪਵਤ੍ਤੇਨ੍ਤੇਤਿ ਦੇਸਨਾਞਾਣੇ ਪਵਤ੍ਤਿਯਮਾਨੇ.

ਤਤੋ ਅਪਰਭਾਗੇ ਮਹਾਮਙ੍ਗਲਸਮਾਗਮੇ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਦੇਵਤਾਯੋ ਸੁਖੁਮੇ ਅਤ੍ਤਭਾਵੇ ਮਾਪੇਤ੍ਵਾ ਇਮਸ੍ਮਿਞ੍ਞੇਵ ਚਕ੍ਕਵਾਲ਼ੇ ਸਨ੍ਨਿਪਤਿਂਸੁ. ਤਤ੍ਥ ਕਿਰ ਅਞ੍ਞਤਰੋ ਦੇਵਪੁਤ੍ਤੋ ਕੋਣ੍ਡਞ੍ਞਦਸਬਲਂ ਮਙ੍ਗਲਪਞ੍ਹਂ ਪੁਚ੍ਛਿ. ਤਸ੍ਸ ਭਗਵਾ ਮਙ੍ਗਲਾਨਿ ਕਥੇਸਿ. ਤਤ੍ਥ ਨਵੁਤਿਕੋਟਿਸਹਸ੍ਸਾਨਿ ਅਰਹਤ੍ਤਂ ਪਾਪੁਣਿਂਸੁ. ਸੋਤਾਪਨ੍ਨਾਦੀਨਂ ਗਣਨਪਰਿਚ੍ਛੇਦੋ ਨਾਮ ਨਾਹੋਸਿ. ਤੇਨ ਵੁਤ੍ਤਂ –

੫. ‘‘ਤਤੋ ਪਰਮ੍ਪਿ ਦੇਸੇਨ੍ਤੇ, ਨਰਮਰੂਨਂ ਸਮਾਗਮੇ;

ਨਵੁਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੂ’’ਤਿ.

ਤਤ੍ਥ ਤਤੋ ਪਰਮ੍ਪੀਤਿ ਤਤੋ ਅਪਰਭਾਗੇਪਿ. ਦੇਸੇਨ੍ਤੇਤਿ ਭਗਵਤਿ ਧਮ੍ਮਂ ਦੇਸੇਨ੍ਤੇ. ਨਰਮਰੂਨਨ੍ਤਿ ਨਰਾਨਞ੍ਚੇਵ ਅਮਰਾਨਞ੍ਚ, ਯਦਾ ਪਨ ਭਗਵਾ ਗਗਨਤਲੇ ਤਿਤ੍ਥਿਯਮਾਨਮਦ੍ਦਨਂ ਯਮਕਪਾਟਿਹਾਰਿਯਂ ਕਰੋਨ੍ਤੋ ਧਮ੍ਮਂ ਦੇਸੇਸਿ ਤਦਾ ਅਸੀਤਿਕੋਟਿਸਹਸ੍ਸਾਨਿ ਅਰਹਤ੍ਤਂ ਪਾਪੁਣਿਂਸੁ. ਤੀਸੁ ਫਲੇਸੁ ਪਤਿਟ੍ਠਿਤਾ ਗਣਨਪਥਂ ਵੀਤਿਵਤ੍ਤਾ. ਤੇਨ ਵੁਤ੍ਤਂ –

੬. ‘‘ਤਿਤ੍ਥਿਯੇ ਅਭਿਮਦ੍ਦਨ੍ਤੋ, ਯਦਾ ਧਮ੍ਮਮਦੇਸਯਿ;

ਅਸੀਤਿਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਤਤ੍ਥ ਤਦਾ-ਸਦ੍ਦਂ ਆਨੇਤ੍ਵਾ ਅਤ੍ਥੋ ਦਟ੍ਠਬ੍ਬੋ. ਯਦਾ ਭਗਵਾ ਧਮ੍ਮਂ ਦੇਸੇਸਿ, ਤਦਾ ਅਸੀਤਿਕੋਟਿਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੂਤਿ.

ਕੋਣ੍ਡਞ੍ਞੋ ਕਿਰ ਸਤ੍ਥਾ ਅਭਿਸਮ੍ਬੋਧਿਂ ਪਤ੍ਵਾ ਪਠਮਵਸ੍ਸਂ ਚਨ੍ਦਵਤੀਨਗਰਂ ਉਪਨਿਸ੍ਸਾਯ ਚਨ੍ਦਾਰਾਮੇ ਵਿਹਾਸਿ. ਤਤ੍ਥ ਸੁਚਿਨ੍ਧਰਸ੍ਸ ਨਾਮ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤੋ ਭਦ੍ਦਮਾਣਵੋ ਨਾਮ ਯਸੋਧਰਬ੍ਰਾਹ੍ਮਣਸ੍ਸ ਪੁਤ੍ਤੋ ਸੁਭਦ੍ਦਮਾਣਵੋ ਚ ਕੋਣ੍ਡਞ੍ਞਸ੍ਸ ਬੁਦ੍ਧਸ੍ਸ ਸਮ੍ਮੁਖਾ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸਾ ਦਸਹਿ ਮਾਣਵਕਸਹਸ੍ਸੇਹਿ ਸਦ੍ਧਿਂ ਤਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ.

ਅਥ ਕੋਣ੍ਡਞ੍ਞੋ ਸਤ੍ਥਾ ਜੇਟ੍ਠਮਾਸਪੁਣ੍ਣਮਾਯ ਸੁਭਦ੍ਦਤ੍ਥੇਰਪ੍ਪਮੁਖੇਨ ਕੋਟਿਸਤਸਹਸ੍ਸੇਨ ਪਰਿਵੁਤੋ ਪਾਤਿਮੋਕ੍ਖਮੁਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਤਤੋ ਅਪਰਭਾਗੇ ਕੋਣ੍ਡਞ੍ਞਸਤ੍ਥੁਨੋ ਪੁਤ੍ਤੇ ਵਿਜਿਤਸੇਨੇ ਨਾਮ ਅਰਹਤ੍ਤਂ ਪਤ੍ਤੇ ਤਂਪਮੁਖਸ੍ਸ ਕੋਟਿਸਹਸ੍ਸਸ੍ਸ ਮਜ੍ਝੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਅਥਾਪਰੇਨ ਸਮਯੇਨ ਦਸਬਲੋ ਜਨਪਦਚਾਰਿਕਂ ਚਰਨ੍ਤੋ ਉਦੇਨਰਾਜਾਨਂ ਨਾਮ ਨਵੁਤਿਕੋਟਿਜਨਪਰਿਵਾਰਂ ਪਬ੍ਬਾਜੇਸਿ ਸਦ੍ਧਿਂ ਤਾਯ ਪਰਿਸਾਯ. ਤਸ੍ਮਿਂ ਪਨ ਅਰਹਤ੍ਤਂ ਪਤ੍ਤੇ ਤਂਪਮੁਖੇਹਿ ਨਵੁਤਿਯਾ ਅਰਹਨ੍ਤਕੋਟੀਹਿ ਭਗਵਾ ਪਰਿਵੁਤੋ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੭. ‘‘ਸਨ੍ਨਿਪਾਤਾ ਤਯੋ ਆਸੁਂ, ਕੋਣ੍ਡਞ੍ਞਸ੍ਸ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੮. ‘‘ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਦੁਤਿਯੋ ਕੋਟਿਸਹਸ੍ਸਾਨਂ, ਤਤਿਯੋ ਨਵੁਤਿਕੋਟਿਨ’’ਨ੍ਤਿ.

ਤਦਾ ਕਿਰ ਅਮ੍ਹਾਕਂ ਬੋਧਿਸਤ੍ਤੋ ਵਿਜਿਤਾਵੀ ਨਾਮ ਚਕ੍ਕਵਤ੍ਤੀ ਹੁਤ੍ਵਾ ਚਨ੍ਦਵਤੀਨਗਰੇ ਪਟਿਵਸਤਿ. ਸੋ ਕਿਰ ਅਨੇਕਨਰਵਰਪਰਿਵੁਤੋ ਸਲਿਲਨਿਧਿਨਿਵਸਨਂ ਸਮੇਰੁਯੁਗਨ੍ਧਰਂ ਅਪਰਿਮਿਤਵਸੁਧਰਂ ਵਸੁਨ੍ਧਰਂ ਅਦਣ੍ਡੇਨ ਅਸਤ੍ਥੇਨ ਧਮ੍ਮੇਨ ਪਰਿਪਾਲੇਤਿ. ਅਥ ਕੋਣ੍ਡਞ੍ਞੋ ਬੁਦ੍ਧੋਪਿ ਕੋਟਿਸਤਸਹਸ੍ਸਖੀਣਾਸਵਪਰਿਵੁਤੋ ਜਨਪਦਚਾਰਿਕਂ ਚਰਮਾਨੋ ਅਨੁਪੁਬ੍ਬੇਨ ਚਨ੍ਦਵਤੀਨਗਰਂ ਸਮ੍ਪਾਪੁਣਿ.

ਸੋ ਵਿਜਿਤਾਵੀ ਕਿਰ ਰਾਜਾ – ‘‘ਸਮ੍ਮਾਸਮ੍ਬੁਦ੍ਧੋ ਕਿਰ ਅਮ੍ਹਾਕਂ ਨਗਰਂ ਅਨੁਪ੍ਪਤ੍ਤੋ’’ਤਿ ਸੁਤ੍ਵਾ ਪਚ੍ਚੁਗ੍ਗਨ੍ਤ੍ਵਾ ਭਗਵਤੋ ਵਸਨਟ੍ਠਾਨਂ ਸਂਵਿਦਹਿਤ੍ਵਾ ਸ੍ਵਾਤਨਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਨਿਮਨ੍ਤੇਤ੍ਵਾ ਪੁਨਦਿਵਸੇ ਭਤ੍ਤਵਿਧਿਂ ਸੁਟ੍ਠੁ ਪਟਿਯਾਦੇਤ੍ਵਾ ਕੋਟਿਸਤਸਹਸ੍ਸਸਙ੍ਖਸ੍ਸ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਅਦਾਸਿ. ਬੋਧਿਸਤ੍ਤੋ ਭਗਵਨ੍ਤਂ ਭੋਜੇਤ੍ਵਾ ਅਨੁਮੋਦਨਾਵਸਾਨੇ – ‘‘ਭਨ੍ਤੇ, ਤੇਮਾਸਂ ਮਹਾਜਨਸਙ੍ਗਹਂ ਕਰੋਨ੍ਤੋ ਇਧੇਵ ਵਸਥਾ’’ਤਿ ਯਾਚਿਤ੍ਵਾ ਤਯੋ ਮਾਸੇ ਨਿਰਨ੍ਤਰਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਅਸਦਿਸਮਹਾਦਾਨਂ ਅਦਾਸਿ.

ਅਥ ਸਤ੍ਥਾ ਬੋਧਿਸਤ੍ਤਂ – ‘‘ਅਨਾਗਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਰਿਤ੍ਵਾ ਧਮ੍ਮਮਸ੍ਸ ਦੇਸੇਸਿ. ਸੋ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਰਜ੍ਜਂ ਨਿਯ੍ਯਾਤੇਤ੍ਵਾ ਪਬ੍ਬਜਿਤ੍ਵਾ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਅਟ੍ਠ ਸਮਾਪਤ੍ਤਿਯੋ ਪਞ੍ਚ ਚ ਅਭਿਞ੍ਞਾਯੋ ਉਪ੍ਪਾਦੇਤ੍ਵਾ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ. ਤੇਨ ਵੁਤ੍ਤਂ –

੯. ‘‘ਅਹਂ ਤੇਨ ਸਮਯੇਨ, ਵਿਜਿਤਾਵੀ ਨਾਮ ਖਤ੍ਤਿਯੋ;

ਸਮੁਦ੍ਦਂ ਅਨ੍ਤਮਨ੍ਤੇਨ, ਇਸ੍ਸਰਿਯਂ ਵਤ੍ਤਯਾਮਹਂ.

੧੦. ‘‘ਕੋਟਿਸਤਸਹਸ੍ਸਾਨਂ, ਵਿਮਲਾਨਂ ਮਹੇਸਿਨਂ;

ਸਹ ਲੋਕਗ੍ਗਨਾਥੇਨ, ਪਰਮਨ੍ਨੇਨ ਤਪ੍ਪਯਿਂ.

੧੧. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਕੋਣ੍ਡਞ੍ਞੋ ਲੋਕਨਾਯਕੋ;

ਅਪਰਿਮੇਯ੍ਯਿਤੋ ਕਪ੍ਪੇ, ਬੁਦ੍ਧੋ ਲੋਕੇ ਭਵਿਸ੍ਸਤਿ.

੧੨. ‘‘ਪਧਾਨਂ ਪਦਹਿਤ੍ਵਾਨ, ਕਤ੍ਵਾ ਦੁਕ੍ਕਰਕਾਰਿਕਂ;

ਅਸ੍ਸਤ੍ਥਮੂਲੇ ਸਮ੍ਬੁਦ੍ਧੋ, ਬੁਜ੍ਝਿਸ੍ਸਤਿ ਮਹਾਯਸੋ.

੧੩. ‘‘ਇਮਸ੍ਸ ਜਨਿਕਾ ਮਾਤਾ, ਮਾਯਾ ਨਾਮ ਭਵਿਸ੍ਸਤਿ;

ਪਿਤਾ ਸੁਦ੍ਧੋਦਨੋ ਨਾਮ, ਅਯਂ ਹੇਸ੍ਸਤਿ ਗੋਤਮੋ.

੧੪. ‘‘ਕੋਲਿਤੋ ਉਪਤਿਸ੍ਸੋ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਕਾ;

ਆਨਨ੍ਦੋ ਨਾਮੁਪਟ੍ਠਾਕੋ, ਉਪਟ੍ਠਿਸ੍ਸਤਿ ਤਂ ਜਿਨਂ.

੧੫. ‘‘ਖੇਮਾ ਉਪ੍ਪਲਵਣ੍ਣਾ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਅਸ੍ਸਤ੍ਥੋਤਿ ਪਵੁਚ੍ਚਤਿ.

੧੬. ‘‘ਚਿਤ੍ਤੋ ਚ ਹਤ੍ਥਾਲ਼ਵਕੋ, ਅਗ੍ਗਾ ਹੇਸ੍ਸਨ੍ਤੁਪਟ੍ਠਕਾ;

ਨਨ੍ਦਮਾਤਾ ਚ ਉਤ੍ਤਰਾ, ਅਗ੍ਗਾ ਹੇਸ੍ਸਨ੍ਤੁਪਟ੍ਠਿਕਾ;

ਆਯੁ ਵਸ੍ਸਸਤਂ ਤਸ੍ਸ, ਗੋਤਮਸ੍ਸ ਯਸਸ੍ਸਿਨੋ.

੧੭. ‘‘ਇਦਂ ਸੁਤ੍ਵਾਨ ਵਚਨਂ, ਅਸਮਸ੍ਸ ਮਹੇਸਿਨੋ;

ਆਮੋਦਿਤਾ ਨਰਮਰੂ, ਬੁਦ੍ਧਬੀਜਂ ਕਿਰ ਅਯਂ.

੧੮. ‘‘ਉਕ੍ਕੁਟ੍ਠਿਸਦ੍ਦਾ ਵਤ੍ਤਨ੍ਤਿ, ਅਪ੍ਫੋਟੇਨ੍ਤਿ ਹਸਨ੍ਤਿ ਚ;

ਕਤਞ੍ਜਲੀ ਨਮਸ੍ਸਨ੍ਤਿ, ਦਸਸਹਸ੍ਸਿਦੇਵਤਾ.

੧੯. ‘‘ਯਦਿਮਸ੍ਸ ਲੋਕਨਾਥਸ੍ਸ, ਵਿਰਜ੍ਝਿਸ੍ਸਾਮ ਸਾਸਨਂ;

ਅਨਾਗਤਮ੍ਹਿ ਅਦ੍ਧਾਨੇ, ਹੇਸ੍ਸਾਮ ਸਮ੍ਮੁਖਾ ਇਮਂ.

੨੦. ‘‘ਯਥਾ ਮਨੁਸ੍ਸਾ ਨਦਿਂ ਤਰਨ੍ਤਾ, ਪਟਿਤਿਤ੍ਥਂ ਵਿਰਜ੍ਝਿਯ;

ਹੇਟ੍ਠਾਤਿਤ੍ਥੇ ਗਹੇਤ੍ਵਾਨ, ਉਤ੍ਤਰਨ੍ਤਿ ਮਹਾਨਦਿਂ.

੨੧. ‘‘ਏਵਮੇਵ ਮਯਂ ਸਬ੍ਬੇ, ਯਦਿ ਮੁਞ੍ਚਾਮਿਮਂ ਜਿਨਂ;

ਅਨਾਗਤਮ੍ਹਿ ਅਦ੍ਧਾਨੇ, ਹੇਸ੍ਸਾਮ ਸਮ੍ਮੁਖਾ ਇਮਂ.

੨੨. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਤਮੇਵ ਅਤ੍ਥਂ ਸਾਧੇਨ੍ਤੋ, ਮਹਾਰਜ੍ਜਂ ਜਿਨੇ ਅਦਂ;

ਮਹਾਰਜ੍ਜਂ ਦਦਿਤ੍ਵਾਨ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.

੨੩. ‘‘ਸੁਤ੍ਤਨ੍ਤਂ ਵਿਨਯਂ ਚਾਪਿ, ਨਵਙ੍ਗਂ ਸਤ੍ਥੁਸਾਸਨਂ;

ਸਬ੍ਬਂ ਪਰਿਯਾਪੁਣਿਤ੍ਵਾਨ, ਸੋਭਯਿਂ ਜਿਨਸਾਸਨਂ.

੨੪. ‘‘ਤਤ੍ਥਪ੍ਪਮਤ੍ਤੋ ਵਿਹਰਨ੍ਤੋ, ਨਿਸਜ੍ਜਟ੍ਠਾਨਚਙ੍ਕਮੇ;

ਅਭਿਞ੍ਞਾਪਾਰਮਿਂ ਗਨ੍ਤ੍ਵਾ, ਬ੍ਰਹ੍ਮਲੋਕਮਗਞ੍ਛਹ’’ਨ੍ਤਿ.

ਤਤ੍ਥ ਅਹਂ ਤੇਨ ਸਮਯੇਨਾਤਿ ਅਹਂ ਤਸ੍ਮਿਂ ਸਮਯੇ. ਵਿਜਿਤਾਵੀ ਨਾਮਾਤਿ ਏਵਂਨਾਮਕੋ ਚਕ੍ਕਵਤ੍ਤਿਰਾਜਾ ਅਹੋਸਿਂ. ਸਮੁਦ੍ਦਂ ਅਨ੍ਤਮਨ੍ਤੇਨਾਤਿ ਏਤ੍ਥ ਚਕ੍ਕਵਾਲ਼ਪਬ੍ਬਤਂ ਸੀਮਂ ਮਰਿਯਾਦਂ ਕਤ੍ਵਾ ਠਿਤਂ ਸਮੁਦ੍ਦਂ ਅਨ੍ਤਂ ਕਤ੍ਵਾ ਇਸ੍ਸਰਿਯਂ ਵਤ੍ਤਯਾਮੀਤਿ ਅਤ੍ਥੋ. ਏਤ੍ਤਾਵਤਾ ਨ ਪਾਕਟਂ ਹੋਤਿ.

ਰਾਜਾ ਕਿਰ ਚਕ੍ਕਵਤ੍ਤੀ ਚਕ੍ਕਰਤਨਾਨੁਭਾਵੇਨ ਵਾਮਪਸ੍ਸੇਨ ਸਿਨੇਰੁਂ ਕਤ੍ਵਾ ਸਮੁਦ੍ਦਸ੍ਸ ਉਪਰਿਭਾਗੇਨ ਅਟ੍ਠਯੋਜਨਸਹਸ੍ਸਪ੍ਪਮਾਣਂ ਪੁਬ੍ਬਵਿਦੇਹਂ ਗਚ੍ਛਤਿ. ਤਤ੍ਥ ਰਾਜਾ ਚਕ੍ਕਵਤ੍ਤੀ – ‘‘ਪਾਣੋ ਨ ਹਨ੍ਤਬ੍ਬੋ, ਅਦਿਨ੍ਨਂ ਨਾਦਾਤਬ੍ਬਂ, ਕਾਮੇਸੁਮਿਚ੍ਛਾ ਨ ਚਰਿਤਬ੍ਬਾ, ਮੁਸਾ ਨ ਭਾਸਿਤਬ੍ਬਾ, ਮਜ੍ਜਂ ਨ ਪਾਤਬ੍ਬਂ, ਯਥਾਭੁਤ੍ਤਞ੍ਚ ਭੁਞ੍ਜਥਾ’’ਤਿ (ਦੀ. ਨਿ. ੨.੨੪੪; ੩.੮੫; ਮ. ਨਿ. ੩.੨੫੭) ਓਵਾਦਂ ਦੇਤਿ. ਏਵਂ ਓਵਾਦੇ ਦਿਨ੍ਨੇ ਤਂ ਚਕ੍ਕਰਤਨਂ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪੁਰਤ੍ਥਿਮਂ ਸਮੁਦ੍ਦਂ ਅਜ੍ਝੋਗਾਹਤਿ. ਯਥਾ ਯਥਾ ਚ ਤਂ ਅਜ੍ਝੋਗਾਹਤਿ, ਤਥਾ ਤਥਾ ਸਂਖਿਤ੍ਤਊਮਿਵਿਪ੍ਫਾਰਂ ਹੁਤ੍ਵਾ ਓਗਚ੍ਛਮਾਨਂ ਮਹਾਸਮੁਦ੍ਦਸਲਿਲਂ ਯੋਜਨਮਤ੍ਤਂ ਓਗ੍ਗਨ੍ਤ੍ਵਾ ਅਨ੍ਤੋਸਮੁਦ੍ਦਂ ਉਭੋਸੁ ਪਸ੍ਸੇਸੁ ਵੇਲ਼ੁਰਿਯਮਣਿਭਿਤ੍ਤਿ ਵਿਯ ਪਰਮਦਸ੍ਸਨੀਯਂ ਹੁਤ੍ਵਾ ਤਿਟ੍ਠਤਿ, ਏਵਂ ਪੁਰਤ੍ਥਿਮਸਾਗਰਪਰਿਯਨ੍ਤਂ ਗਨ੍ਤ੍ਵਾ ਤਂ ਚਕ੍ਕਰਤਨਂ ਪਟਿਨਿਵਤ੍ਤਤਿ. ਪਟਿਨਿਵਤ੍ਤਮਾਨੇ ਚ ਤਸ੍ਮਿਂ ਸਾ ਪਰਿਸਾ ਅਗ੍ਗਤੋ ਹੋਤਿ, ਮਜ੍ਝੇ ਰਾਜਾ ਚਕ੍ਕਵਤ੍ਤੀ ਅਨ੍ਤੇ ਚਕ੍ਕਰਤਨਂ ਹੋਤਿ. ਤਮ੍ਪਿ ਜਲਂ ਜਲਨ੍ਤੇਨ ਵਿਯੋਗਂ ਅਸਹਮਾਨਮਿਵ ਨੇਮਿਮਣ੍ਡਲਪਰਿਯਨ੍ਤਂ ਅਭਿਹਨਨ੍ਤਮੇਵ ਤੀਰਮੁਪਗਚ੍ਛਤਿ.

ਏਵਂ ਰਾਜਾ ਚਕ੍ਕਵਤ੍ਤੀ ਪੁਰਤ੍ਥਿਮਸਮੁਦ੍ਦਪਰਿਯਨ੍ਤਂ ਪੁਬ੍ਬਵਿਦੇਹਂ ਅਭਿਵਿਜਿਨਿਤ੍ਵਾ ਦਕ੍ਖਿਣਸਮੁਦ੍ਦਪਰਿਯਨ੍ਤਂ ਜਮ੍ਬੁਦੀਪਂ ਵਿਜੇਤੁਕਾਮੋ ਚਕ੍ਕਰਤਨਦੇਸਿਤੇਨ ਮਗ੍ਗੇਨ ਦਕ੍ਖਿਣਸਮੁਦ੍ਦਾਭਿਮੁਖੋ ਗਚ੍ਛਤਿ. ਤਂ ਦਸਸਹਸ੍ਸਯੋਜਨਪ੍ਪਮਾਣਂ ਜਮ੍ਬੁਦੀਪਂ ਅਭਿਵਿਜਿਨਿਤ੍ਵਾ ਦਕ੍ਖਿਣਸਮੁਦ੍ਦਤੋ ਪਚ੍ਚੁਤ੍ਤਰਿਤ੍ਵਾ ਸਤ੍ਤਯੋਜਨਸਹਸ੍ਸਪ੍ਪਮਾਣਂ ਅਪਰਗੋਯਾਨਂ ਵਿਜੇਤੁਂ ਹੇਟ੍ਠਾ ਵੁਤ੍ਤਨਯੇਨੇਵ ਗਨ੍ਤ੍ਵਾ ਤਮ੍ਪਿ ਸਾਗਰਪਰਿਯਨ੍ਤਂ ਅਭਿਵਿਜਿਨਿਤ੍ਵਾ ਪਚ੍ਛਿਮਸਮੁਦ੍ਦਤੋਪਿ ਉਤ੍ਤਰਿਤ੍ਵਾ ਅਟ੍ਠਯੋਜਨਸਹਸ੍ਸਪ੍ਪਮਾਣਂ ਉਤ੍ਤਰਕੁਰੁਂ ਵਿਜੇਤੁਂ ਤਥੇਵ ਗਨ੍ਤ੍ਵਾ ਤਂ ਸਮੁਦ੍ਦਪਰਿਯਨ੍ਤਂ ਕਤ੍ਵਾ ਤਥੇਵ ਅਭਿਵਿਜਿਯ ਉਤ੍ਤਰਸਮੁਦ੍ਦਤੋਪਿ ਪਚ੍ਚੁਤ੍ਤਰਤਿ. ਏਤ੍ਤਾਵਤਾ ਰਞ੍ਞਾ ਚਕ੍ਕਵਤ੍ਤਿਨਾ ਸਾਗਰਪਰਿਯਨ੍ਤਾਯ ਪਥਵਿਯਾ ਇਸ੍ਸਰਿਯਂ ਅਧਿਗਤਂ ਹੋਤਿ. ਤੇਨ ਵੁਤ੍ਤਂ ਸਮੁਦ੍ਦਂ ਅਨ੍ਤਮਨ੍ਤੇਨ, ਇਸ੍ਸਰਿਯਂ ਵਤ੍ਤਯਾਮਹ’’ਨ੍ਤਿ.

ਕੋਟਿਸਤਸਹਸ੍ਸਾਨਨ੍ਤਿ ਕੋਟਿਸਤਸਹਸ੍ਸਾਨਿ. ਅਯਮੇਵ ਵਾ ਪਾਠੋ. ਵਿਮਲਾਨਨ੍ਤਿ ਖੀਣਾਸਵਾਨਂ. ਸਹ ਲੋਕਗ੍ਗਨਾਥੇਨਾਤਿ ਸਦ੍ਧਿਂ ਦਸਬਲੇਨ ਕੋਟਿਸਤਸਹਸ੍ਸਾਨਨ੍ਤਿ ਅਤ੍ਥੋ. ਪਰਮਨ੍ਨੇਨਾਤਿ ਪਣੀਤੇਨ ਅਨ੍ਨੇਨ. ਤਪ੍ਪਯਿਨ੍ਤਿ ਤਪ੍ਪੇਸਿਂ. ਅਪਰਿਮੇਯ੍ਯਿਤੋ ਕਪ੍ਪੇਤਿ ਇਤੋ ਪਟ੍ਠਾਯ ਸਤਸਹਸ੍ਸਕਪ੍ਪਾਧਿਕਾਨਿ ਤੀਣਿ ਅਸਙ੍ਖ੍ਯੇਯ੍ਯਾਨਿ ਅਤਿਕ੍ਕਮਿਤ੍ਵਾ ਏਕਸ੍ਮਿਂ ਭਦ੍ਦਕਪ੍ਪੇਤਿ ਅਤ੍ਥੋ.

ਪਧਾਨਨ੍ਤਿ ਵੀਰਿਯਂ. ਤਮੇਵ ਅਤ੍ਥਂ ਸਾਧੇਨ੍ਤੋਤਿ ਤਮੇਵ ਬੁਦ੍ਧਕਾਰਕਮਤ੍ਥਂ ਦਾਨਪਾਰਮਿਂ ਪੂਰੇਨ੍ਤੋ ਸਾਧੇਨ੍ਤੋ ਨਿਪ੍ਫਾਦੇਨ੍ਤੋਤਿ ਅਤ੍ਥੋ. ਮਹਾਰਜ੍ਜਨ੍ਤਿ ਚਕ੍ਕਵਤ੍ਤਿਰਜ੍ਜਂ. ਜਿਨੇਤਿ ਭਗਵਤਿ, ਸਮ੍ਪਦਾਨਤ੍ਥੇ ਵਾ ਭੁਮ੍ਮਂ ਦਟ੍ਠਬ੍ਬਂ. ਅਦਨ੍ਤਿ ਅਦਾਸਿਂ. ਏਵਮਤ੍ਥਂ ਸਾਧੇਨ੍ਤੋਤਿ ਇਮਿਨਾ ਸਮ੍ਬਨ੍ਧੋ ਦਟ੍ਠਬ੍ਬੋ. ‘‘ਮਹਾਰਜ੍ਜਂ ਜਿਨੇ ਦਦਿ’’ਨ੍ਤਿ ਪਠਨ੍ਤਿ ਕੇਚਿ. ਦਦਿਤ੍ਵਾਨਾਤਿ ਚਜਿਤ੍ਵਾ. ਸੁਤ੍ਤਨ੍ਤਨ੍ਤਿ ਸੁਤ੍ਤਨ੍ਤਪਿਟਕਂ. ਵਿਨਯਨ੍ਤਿ ਵਿਨਯਪਿਟਕਂ. ਨਵਙ੍ਗਨ੍ਤਿ ਸੁਤ੍ਤਗੇਯ੍ਯਾਦਿਨਵਙ੍ਗਂ. ਸੋਭਯਿਂ ਜਿਨਸਾਸਨਨ੍ਤਿ ਆਗਮਾਧਿਗਮੇਹਿ ਲੋਕਿਯੇਹਿ ਸਮਲਙ੍ਕਰਿਂ. ਤਤ੍ਥਾਤਿ ਤਸ੍ਸ ਭਗਵਤੋ ਸਾਸਨੇ. ਅਪ੍ਪਮਤ੍ਤੋਤਿ ਸਤਿਸਮ੍ਪਨ੍ਨੋ. ਬ੍ਰਹ੍ਮਲੋਕਮਗਞ੍ਛਹਨ੍ਤਿ ਬ੍ਰਹ੍ਮਲੋਕਂ ਅਗਞ੍ਛਿਂ ਅਹਂ.

ਇਮਸ੍ਸ ਪਨ ਕੋਣ੍ਡਞ੍ਞਬੁਦ੍ਧਸ੍ਸ ਰਮ੍ਮਵਤੀ ਨਾਮ ਨਗਰਂ ਅਹੋਸਿ, ਸੁਨਨ੍ਦੋ ਨਾਮ ਰਾਜਾ ਪਿਤਾ, ਸੁਜਾਤਾ ਨਾਮ ਦੇਵੀ ਮਾਤਾ, ਭਦ੍ਦੋ ਚ ਸੁਭਦ੍ਦੋ ਚ ਦ੍ਵੇ ਅਗ੍ਗਸਾਵਕਾ, ਅਨੁਰੁਦ੍ਧੋ ਨਾਮੁਪਟ੍ਠਾਕੋ, ਤਿਸ੍ਸਾ ਚ ਉਪਤਿਸ੍ਸਾ ਚ ਦ੍ਵੇ ਅਗ੍ਗਸਾਵਿਕਾ, ਸਾਲਕਲ੍ਯਾਣਿਰੁਕ੍ਖੋ ਬੋਧਿ, ਅਟ੍ਠਾਸੀਤਿਹਤ੍ਥੁਬ੍ਬੇਧਂ ਸਰੀਰਂ, ਵਸ੍ਸਸਤਸਹਸ੍ਸਾਨਿ ਆਯੁਪ੍ਪਮਾਣਂ ਅਹੋਸਿ, ਤਸ੍ਸ ਰੁਚਿਦੇਵੀ ਨਾਮ ਅਗ੍ਗਮਹੇਸੀ ਅਹੋਸਿ, ਵਿਜਿਤਸੇਨੋ ਨਾਮਸ੍ਸ ਪੁਤ੍ਤੋ, ਚਨ੍ਦੋ ਨਾਮੁਪਟ੍ਠਾਕੋ ਰਾਜਾ. ਚਨ੍ਦਾਰਾਮੇ ਕਿਰ ਵਸੀਤਿ. ਤੇਨ ਵੁਤ੍ਤਂ –

੨੫. ‘‘ਨਗਰਂ ਰਮ੍ਮਵਤੀ ਨਾਮ, ਸੁਨਨ੍ਦੋ ਨਾਮ ਖਤ੍ਤਿਯੋ;

ਸੁਜਾਤਾ ਨਾਮ ਜਨਿਕਾ, ਕੋਣ੍ਡਞ੍ਞਸ੍ਸ ਮਹੇਸਿਨੋ.

੩੦. ‘‘ਭਦ੍ਦੋ ਚੇਵ ਸੁਭਦ੍ਦੋ ਚ, ਅਹੇਸੁਂ ਅਗ੍ਗਸਾਵਕਾ;

ਅਨੁਰੁਦ੍ਧੋ ਨਾਮੁਪਟ੍ਠਾਕੋ, ਕੋਣ੍ਡਞ੍ਞਸ੍ਸ ਮਹੇਸਿਨੋ.

੩੧. ‘‘ਤਿਸ੍ਸਾ ਚ ਉਪਤਿਸ੍ਸਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਸਾਲਕਲ੍ਯਾਣਿਕੋ ਬੋਧਿ, ਕੋਣ੍ਡਞ੍ਞਸ੍ਸ ਮਹੇਸਿਨੋ.

੩੩. ‘‘ਸੋ ਅਟ੍ਠਾਸੀਤਿ ਹਤ੍ਥਾਨਿ, ਅਚ੍ਚੁਗ੍ਗਤੋ ਮਹਾਮੁਨਿ;

ਸੋਭਤੇ ਉਲ਼ੁਰਾਜਾਵ, ਸੂਰਿਯੋ ਮਜ੍ਝਨ੍ਹਿਕੇ ਯਥਾ.

੩੪. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੫. ‘‘ਖੀਣਾਸਵੇਹਿ ਵਿਮਲੇਹਿ, ਵਿਚਿਤ੍ਤਾ ਆਸਿ ਮੇਦਨੀ;

ਯਥਾ ਹਿ ਗਗਨਮੁਲ਼ੂਭਿ, ਏਵਂ ਸੋ ਉਪਸੋਭਥ.

੩੬. ‘‘ਤੇਪਿ ਨਾਗਾ ਅਪ੍ਪਮੇਯ੍ਯਾ, ਅਸਙ੍ਖੋਭਾ ਦੁਰਾਸਦਾ;

ਵਿਜ੍ਜੁਪਾਤਂਵ ਦਸ੍ਸੇਤ੍ਵਾ, ਨਿਬ੍ਬੁਤਾ ਤੇ ਮਹਾਯਸਾ.

੩੭. ‘‘ਸਾ ਚ ਅਤੁਲਿਯਾ ਜਿਨਸ੍ਸ ਇਦ੍ਧਿ, ਞਾਣਪਰਿਭਾਵਿਤੋ ਚ ਸਮਾਧਿ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਸਾਲਕਲ੍ਯਾਣਿਕੋਤਿ ਸਾਲਕਲ੍ਯਾਣਿਰੁਕ੍ਖੋ, ਸੋ ਬੁਦ੍ਧਕਾਲੇ ਚੇਵ ਚਕ੍ਕਵਤ੍ਤਿਕਾਲੇ ਚ ਨਿਬ੍ਬਤ੍ਤਤਿ, ਨਾਞ੍ਞਦਾ. ਸੋ ਏਕਾਹੇਨੇਵ ਉਟ੍ਠਾਤਿ ਕਿਰ. ਖੀਣਾਸਵੇਹਿ ਵਿਮਲੇਹਿ, ਵਿਚਿਤ੍ਤਾ ਆਸਿ ਮੇਦਨੀਤਿ ਅਯਂ ਮੇਦਨੀ ਖੀਣਾਸਵੇਹਿ ਏਕਕਾਸਾਵਪਜ੍ਜੋਤਾ ਵਿਚਿਤ੍ਤਾ ਪਰਮਦਸ੍ਸਨੀਯਾ ਅਹੋਸਿ. ਯਥਾ ਹੀਤਿ ਓਪਮ੍ਮਤ੍ਥੇ ਨਿਪਾਤੋ. ਉਲ਼ੂਭੀਤਿ ਨਕ੍ਖਤ੍ਤੇਹਿ, ਤਾਰਾਗਣੇਹਿ ਗਗਨਤਲਂ ਵਿਯ ਖੀਣਾਸਵੇਹਿ ਵਿਚਿਤ੍ਤਾ ਅਯਂ ਮੇਦਨੀ ਸੋਭਿਤ੍ਥਾਤਿ ਅਤ੍ਥੋ.

ਅਸਙ੍ਖੋਭਾਤਿ ਅਟ੍ਠਹਿ ਲੋਕਧਮ੍ਮੇਹਿ ਅਕ੍ਖੋਭਾ ਅਵਿਕਾਰਾ. ਵਿਜ੍ਜੁਪਾਤਂਵ ਦਸ੍ਸੇਤ੍ਵਾਤਿ ਵਿਜ੍ਜੁਪਾਤਂ ਵਿਯ ਦਸ੍ਸਯਿਤ੍ਵਾ, ‘‘ਵਿਜ੍ਜੁਪ੍ਪਾਤਂਵਾ’’ਤਿਪਿ ਪਾਠੋ. ਕੋਣ੍ਡਞ੍ਞਬੁਦ੍ਧਸ੍ਸ ਕਿਰ ਕਾਲੇ ਪਰਿਨਿਬ੍ਬਾਯਮਾਨਾ ਭਿਕ੍ਖੂ ਸਤ੍ਤਤਾਲਪ੍ਪਮਾਣਮਾਕਾਸਮਬ੍ਭੁਗ੍ਗਨ੍ਤ੍ਵਾ ਅਸਿਤਜਲਧਰਵਿਵਰਗਤਾ ਵਿਜ੍ਜੁਲਤਾ ਵਿਯ ਸਮਨ੍ਤਤੋ ਵਿਜ੍ਜੋਤਮਾਨਾ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਨਿਰੁਪਾਦਾਨਾ ਦਹਨਾ ਵਿਯ ਪਰਿਨਿਬ੍ਬਾਯਿਂਸੁ. ਤੇਨ ਵੁਤ੍ਤਂ ‘‘ਵਿਜ੍ਜੁਪਾਤਂਵ ਦਸ੍ਸੇਤ੍ਵਾ’’ਤਿ. ਅਤੁਲਿਯਾਤਿ ਅਤੁਲ੍ਯਾ ਅਸਦਿਸਾ. ਞਾਣਪਰਿਭਾਵਿਤੋਤਿ ਞਾਣੇਨ ਵਡ੍ਢਿਤੋ. ਸੇਸਗਾਥਾ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਾ ਏਵਾਤਿ.

‘‘ਕੋਣ੍ਡਞ੍ਞੋ ਨਾਮ ਸਮ੍ਬੁਦ੍ਧੋ, ਚਨ੍ਦਾਰਾਮੇ ਮਨੋਰਮੇ;

ਨਿਬ੍ਬਾਯਿ ਚੇਤਿਯੋ ਤਸ੍ਸ, ਸਤ੍ਤਯੋਜਨਿਕੋ ਕਤੋ.

‘‘ਨ ਹੇਵ ਧਾਤੁਯੋ ਤਸ੍ਸ, ਸਤ੍ਥੁਨੋ, ਵਿਕਿਰਿਂਸੁ ਤਾ;

ਠਿਤਾ ਏਕਘਨਾ ਹੁਤ੍ਵਾ, ਸੁਵਣ੍ਣਪਟਿਮਾ ਵਿਯ’’.

ਸਕਲਜਮ੍ਬੁਦੀਪਵਾਸਿਨੋ ਮਨੁਸ੍ਸਾ ਸਮਾਗਨ੍ਤ੍ਵਾ ਸਤ੍ਤਯੋਜਨਿਕਂ ਸਤ੍ਤਰਤਨਮਯਂ ਹਰਿਤਾਲਮਨੋਸਿਲਾਯ ਮਤ੍ਤਿਕਾਕਿਚ੍ਚਂ ਤੇਲਸਪ੍ਪੀਹਿ ਉਦਕਕਿਚ੍ਚਂ ਕਤ੍ਵਾ ਨਿਟ੍ਠਾਪੇਸੁਨ੍ਤਿ.

ਕੋਣ੍ਡਞ੍ਞਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਦੁਤਿਯੋ ਬੁਦ੍ਧਵਂਸੋ.