੨੮. ਬੁਦ੍ਧਪਕਿਣ੍ਣਕਕਥਾ
੧-੧੮. ‘‘ਅਪਰਿਮੇਯ੍ਯਿਤੋ ਕਪ੍ਪੇ, ਚਤੁਰੋ ਆਸੁਂ ਵਿਨਾਯਕਾ’’ਤਿਆਦਿਕਾ ਅਟ੍ਠਾਰਸਗਾਥਾ ਸਙ੍ਗੀਤਿਕਾਰਕੇਹਿ ਠਪਿਤਾ ਨਿਗਮਨਗਾਥਾਤਿ ਵੇਦਿਤਬ੍ਬਾ. ਸੇਸਗਾਥਾਸੁ ਸਬ੍ਬਤ੍ਥ ਪਾਕਟਮੇਵਾਤਿ.
ਵੇਮਤ੍ਤਕਥਾ
ਇਮਸ੍ਮਿਂ ਪਨ ਸਕਲੇਪਿ ਬੁਦ੍ਧਵਂਸੇ ਨਿਦ੍ਦਿਟ੍ਠਾਨਂ ਪਞ੍ਚਵੀਸਤਿਯਾ ਬੁਦ੍ਧਾਨਂ ਅਟ੍ਠ ਵੇਮਤ੍ਤਾਨਿ ਵੇਦਿਤਬ੍ਬਾਨਿ. ਕਤਮਾਨਿ ਅਟ੍ਠ? ਆਯੁਵੇਮਤ੍ਤਂ, ਪਮਾਣਵੇਮਤ੍ਤਂ, ਕੁਲਵੇਮਤ੍ਤਂ, ਪਧਾਨਵੇਮਤ੍ਤਂ, ਰਸ੍ਮਿਵੇਮਤ੍ਤਂ, ਯਾਨਵੇਮਤ੍ਤਂ, ਬੋਧਿਵੇਮਤ੍ਤਂ, ਪਲ੍ਲਙ੍ਕਵੇਮਤ੍ਤਨ੍ਤਿ.
ਤਤ੍ਥ ਆਯੁਵੇਮਤ੍ਤਂ ਨਾਮ ਕੇਚਿ ਦੀਘਾਯੁਕਾ ਹੋਨ੍ਤਿ ਕੇਚਿ ਅਪ੍ਪਾਯੁਕਾ. ਤਥਾ ਹਿ ਦੀਪਙ੍ਕਰੋ ਕੋਣ੍ਡਞ੍ਞੋ ਅਨੋਮਦਸ੍ਸੀ ਪਦੁਮੋ ਪਦੁਮੁਤ੍ਤਰੋ ਅਤ੍ਥਦਸ੍ਸੀ ਧਮ੍ਮਦਸ੍ਸੀ ਸਿਦ੍ਧਤ੍ਥੋ ਤਿਸ੍ਸੋਤਿ ਇਮੇ ਨਵ ਬੁਦ੍ਧਾ ਵਸ੍ਸਸਤਸਹਸ੍ਸਾਯੁਕਾ ਅਹੇਸੁਂ. ਮਙ੍ਗਲੋ ਸੁਮਨੋ ਸੋਭਿਤੋ ਨਾਰਦੋ ਸੁਮੇਧੋ ਸੁਜਾਤੋ ਪਿਯਦਸ੍ਸੀ ਫੁਸ੍ਸੋਤਿ ਇਮੇ ਅਟ੍ਠ ਬੁਦ੍ਧਾ ਨਵੁਤਿਵਸ੍ਸਸਹਸ੍ਸਾਯੁਕਾ ਅਹੇਸੁਂ. ਰੇਵਤੋ ਵੇਸ੍ਸਭੂ ਚਾਤਿ ਇਮੇ ਦ੍ਵੇ ਬੁਦ੍ਧਾ ਸਟ੍ਠਿਵਸ੍ਸਸਹਸ੍ਸਾਯੁਕਾ ਅਹੇਸੁਂ. ਵਿਪਸ੍ਸੀ ਭਗਵਾ ਅਸੀਤਿਵਸ੍ਸਸਹਸ੍ਸਾਯੁਕਾ ਅਹੋਸਿ. ਸਿਖੀ ਕਕੁਸਨ੍ਧੋ ਕੋਣਾਗਮਨੋ ਕਸ੍ਸਪੋਤਿ ਇਮੇ ਚਤ੍ਤਾਰੋ ਬੁਦ੍ਧਾ ਯਥਾਕ੍ਕਮੇਨ ਸਤ੍ਤਤਿਚਤ੍ਤਾਲੀਸਤਿਂਸਵੀਸਵਸ੍ਸਸਹਸ੍ਸਾਯੁਕਾ ਅਹੇਸੁਂ. ਅਮ੍ਹਾਕਂ ਪਨ ਭਗਵਤੋ ਵਸ੍ਸਸਤਂ ਆਯੁਪ੍ਪਮਾਣਂ ਅਹੋਸਿ. ਉਪਚਿਤਪੁਞ੍ਞਸਮ੍ਭਾਰਾਨਂ ਦੀਘਾਯੁਕਸਂਵਤ੍ਤਨਿਯਕਮ੍ਮਸਮੁਪੇਤਾਨਮ੍ਪਿ ਬੁਦ੍ਧਾਨਂ ਯੁਗਵਸੇਨ ਆਯੁਪ੍ਪਮਾਣਂ ਅਪ੍ਪਮਾਣਂ ਅਹੋਸਿ. ਅਯਂ ਪਞ੍ਚਵੀਸਤਿਯਾ ਬੁਦ੍ਧਾਨਂ ਆਯੁਵੇਮਤ੍ਤਂ ਨਾਮ.
ਪਮਾਣਵੇਮਤ੍ਤਂ ਨਾਮ ਕੇਚਿ ਦੀਘਾ ਹੋਨ੍ਤਿ ਕੇਚਿ ਰਸ੍ਸਾ. ਤਥਾ ਹਿ ਦੀਪਙ੍ਕਰ-ਰੇਵਤ-ਪਿਯਦਸ੍ਸੀ-ਅਤ੍ਥਦਸ੍ਸੀ-ਧਮ੍ਮਦਸ੍ਸੀ-ਵਿਪਸ੍ਸੀਬੁਦ੍ਧਾਨਂ ਅਸੀਤਿਹਤ੍ਥੁਬ੍ਬੇਧਂ ਸਰੀਰਪ੍ਪਮਾਣਂ ਅਹੋਸਿ. ਕੋਣ੍ਡਞ੍ਞ-ਮਙ੍ਗਲ-ਨਾਰਦ-ਸੁਮੇਧਾਨਂ ਅਟ੍ਠਾਸੀਤਿਹਤ੍ਥੁਬ੍ਬੇਧੋ ਕਾਯੋ ਅਹੋਸਿ. ਸੁਮਨਸ੍ਸ ਨਵੁਤਿਹਤ੍ਥੁਬ੍ਬੇਧਂ ਸਰੀਰਂ ਅਹੋਸਿ. ਸੋਭਿਤ-ਅਨੋਮਦਸ੍ਸੀ-ਪਦੁਮ-ਪਦੁਮੁਤ੍ਤਰ-ਫੁਸ੍ਸਬੁਦ੍ਧਾਨਂ ਅਟ੍ਠਪਣ੍ਣਾਸਹਤ੍ਥੁਬ੍ਬੇਧਂ ਸਰੀਰਂ ਅਹੋਸਿ. ਸੁਜਾਤੋ ਪਣ੍ਣਾਸਹਤ੍ਥੁਬ੍ਬੇਧਸਰੀਰੋ ਅਹੋਸਿ. ਸਿਦ੍ਧਤ੍ਥ-ਤਿਸ੍ਸ-ਵੇਸ੍ਸਭੁਨੋ ਸਟ੍ਠਿਹਤ੍ਥੁਬ੍ਬੇਧਾ ਅਹੇਸੁਂ. ਸਿਖੀ ਸਤ੍ਤਤਿਹਤ੍ਥੁਬ੍ਬੇਧੋ ਅਹੋਸਿ. ਕਕੁਸਨ੍ਧ-ਕੋਣਾਗਮਨ-ਕਸ੍ਸਪਾ ਯਥਾਕ੍ਕਮੇਨ ਚਤ੍ਤਾਲੀਸਤਿਂਸਵੀਸਤਿਹਤ੍ਥੁਬ੍ਬੇਧਾ ਅਹੇਸੁਂ. ਅਮ੍ਹਾਕਂ ਭਗਵਾ ਅਟ੍ਠਾਰਸਹਤ੍ਥੁਬ੍ਬੇਧੋ ਅਹੋਸਿ. ਅਯਂ ਪਞ੍ਚਵੀਸਤਿਯਾ ਬੁਦ੍ਧਾਨਂ ਪਮਾਣਵੇਮਤ੍ਤਂ ਨਾਮ.
ਕੁਲਵੇਮਤ੍ਤਂ ਨਾਮ ਕੇਚਿ ਖਤ੍ਤਿਯਕੁਲੇ ਨਿਬ੍ਬਤ੍ਤਿਂਸੁ ਕੇਚਿ ਬ੍ਰਾਹ੍ਮਣਕੁਲੇ. ਤਥਾ ਹਿ ਕਕੁਸਨ੍ਧਕੋਣਾਗਮਨਕਸ੍ਸਪਸਮ੍ਮਾਸਮ੍ਬੁਦ੍ਧਾ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਂਸੁ. ਦੀਪਙ੍ਕਰਾਦਿਗੋਤਮਬੁਦ੍ਧਪਰਿਯਨ੍ਤਾ ਦ੍ਵਾਵੀਸਤਿ ਬੁਦ੍ਧਾ ਖਤ੍ਤਿਯਕੁਲੇਯੇਵ ਨਿਬ੍ਬਤ੍ਤਿਂਸੁ. ਅਯਂ ਪਞ੍ਚਵੀਸਤਿਯਾ ਬੁਦ੍ਧਾਨਂ ਕੁਲਵੇਮਤ੍ਤਂ ਨਾਮ.
ਪਧਾਨਵੇਮਤ੍ਤਂ ਨਾਮ ਦੀਪਙ੍ਕਰ-ਕੋਣ੍ਡਞ੍ਞ-ਸੁਮਨ-ਅਨੋਮਦਸ੍ਸੀ-ਸੁਜਾਤਸਿਦ੍ਧਤ੍ਥ-ਕਕੁਸਨ੍ਧਾਨਂ ਦਸਮਾਸਿਕਾ ਪਧਾਨਚਰਿਯਾ. ਮਙ੍ਗਲ-ਸੁਮੇਧਤਿਸ੍ਸ ਸਿਖੀਨਂ ਅਟ੍ਠਮਾਸਿਕਾ. ਰੇਵਤਸ੍ਸ ਸਤ੍ਤਮਾਸਿਕਾ. ਸੋਭਿਤਸ੍ਸ ਚਤ੍ਤਾਰੋ ਮਾਸਾ. ਪਦੁਮਅਤ੍ਥਦਸ੍ਸੀ ਵਿਪਸ੍ਸੀਨਂ ਅਡ੍ਢਮਾਸਿਕਾ. ਨਾਰਦ-ਪਦੁਮੁਤ੍ਤਰ-ਧਮ੍ਮਦਸ੍ਸੀ-ਕਸ੍ਸਪਾਨਂ ਸਤ੍ਤਾਹਾਨਿ. ਪਿਯਦਸ੍ਸੀ-ਫੁਸ੍ਸ-ਵੇਸ੍ਸਭੂ ਕੋਣਾਗਮਨਾਨਂ ਛਮਾਸਿਕਾ. ਅਮ੍ਹਾਕਂ ਬੁਦ੍ਧਸ੍ਸ ਛਬ੍ਬਸ੍ਸਾਨਿ ਪਧਾਨਚਰਿਯਾ ਅਹੋਸਿ. ਅਯਂ ਪਧਾਨਵੇਮਤ੍ਤਂ ਨਾਮ.
ਰਸ੍ਮਿਵੇਮਤ੍ਤਂ ਨਾਮ ਮਙ੍ਗਲਸ੍ਸ ਕਿਰ ਸਮ੍ਮਾਸਮ੍ਬੁਦ੍ਧਸ੍ਸ ਸਰੀਰਸ੍ਮਿ ਦਸਸਹਸ੍ਸਿਲੋਕਧਾਤੁਂ ਫਰਿਤ੍ਵਾ ਅਟ੍ਠਾਸਿ. ਪਦੁਮੁਤ੍ਤਰਬੁਦ੍ਧਸ੍ਸ ਦ੍ਵਾਦਸਯੋਜਨਿਕਾ ਅਹੋਸਿ. ਵਿਪਸ੍ਸਿਸ੍ਸ ਭਗਵਤੋ ਸਤ੍ਤਯੋਜਨਿਕਾ ਅਹੋਸਿ. ਸਿਖਿਸ੍ਸ ਤਿਯੋਜਨਪ੍ਪਮਾਣਾ. ਕਕੁਸਨ੍ਧਸ੍ਸ ਦਸਯੋਜਨਿਕਾ. ਅਮ੍ਹਾਕਂ ਭਗਵਤੋ ਸਮਨ੍ਤਤੋ ਬ੍ਯਾਮਪ੍ਪਮਾਣਾ. ਸੇਸਾਨਂ ਅਨਿਯਤਾ ਅਹੋਸਿ. ਅਯਂ ਰਸ੍ਮਿਵੇਮਤ੍ਤਂ ਨਾਮ ਅਜ੍ਝਾਸਯਪਟਿਬਦ੍ਧਂ, ਯੋ ਯਤ੍ਤਕਂ ਇਚ੍ਛਤਿ, ਤਸ੍ਸ ਸਰੀਰਪ੍ਪਭਾ ਤਤ੍ਤਕਂ ਫਰਤਿ, ਪਟਿਵਿਦ੍ਧਗੁਣੇ ਪਨ ਕਸ੍ਸਚਿ ਵੇਮਤ੍ਤਂ ਨਾਮ ਨਤ੍ਥਿ. ਅਯਂ ਰਸ੍ਮਿਵੇਮਤ੍ਤਂ ਨਾਮ.
ਯਾਨਵੇਮਤ੍ਤਂ ਨਾਮ ਕੇਚਿ ਹਤ੍ਥਿਯਾਨੇਨ ਕੇਚਿ ਅਸ੍ਸਯਾਨੇਨ ਕੇਚਿ ਰਥਪਦ-ਪਾਸਾਦ-ਸਿਵਿਕਾਦੀਸੁ ਅਞ੍ਞਤਰੇਨ ਨਿਕ੍ਖਮਨ੍ਤਿ. ਤਥਾ ਹਿ ਦੀਪਙ੍ਕਰ-ਸੁਮਨ-ਸੁਮੇਧ-ਫੁਸ੍ਸ-ਸਿਖੀ-ਕੋਣਾਗਮਨਾ ਹਤ੍ਥਿਯਾਨੇਨ ਨਿਕ੍ਖਮਿਂਸੁ. ਕੋਣ੍ਡਞ੍ਞ-ਰੇਵਤ-ਪਦੁਮ-ਪਿਯਦਸ੍ਸੀ-ਵਿਪਸ੍ਸੀ-ਕਕੁਸਨ੍ਧਾ ਰਥਯਾਨੇਨ. ਮਙ੍ਗਲ-ਸੁਜਾਤ-ਅਤ੍ਥਦਸ੍ਸੀ-ਤਿਸ੍ਸ-ਗੋਤਮਾ ਅਸ੍ਸਯਾਨੇਨ. ਅਨੋਮਦਸ੍ਸੀਸਿਦ੍ਧਤ੍ਥਵੇਸ੍ਸਭੁਨੋ ਸਿਵਿਕਾਯਾਨੇਨ. ਨਾਰਦੋ ਪਦਸਾ ਨਿਕ੍ਖਮਿ. ਸੋਭਿਤ-ਪਦੁਮੁਤ੍ਤਰ-ਧਮ੍ਮਦਸ੍ਸੀ-ਕਸ੍ਸਪਾ ਪਾਸਾਦੇਨ ਨਿਕ੍ਖਮਿਂਸੁ. ਅਯਂ ਯਾਨਵੇਮਤ੍ਤਂ ਨਾਮ.
ਬੋਧਿਵੇਮਤ੍ਤਂ ਨਾਮ ਦੀਪਙ੍ਕਰਸ੍ਸ ਭਗਵਤੋ ਕਪੀਤਨਰੁਕ੍ਖੋ ਬੋਧਿ; ਕੋਣ੍ਡਞ੍ਞਸ੍ਸ ਭਗਵਤੋ ਸਾਲਕਲ੍ਯਾਣਿਰੁਕ੍ਖੋ, ਮਙ੍ਗਲ-ਸੁਮਨ-ਰੇਵਤ-ਸੋਭਿਤਾਨਂ ਨਾਗਰੁਕ੍ਖੋ, ਅਨੋਮਦਸ੍ਸਿਸ੍ਸ ਅਜ੍ਜੁਨਰੁਕ੍ਖੋ, ਪਦੁਮਨਾਰਦਾਨਂ ਮਹਾਸੋਣਰੁਕ੍ਖੋ, ਪਦੁਮੁਤ੍ਤਰਸ੍ਸ ਸਲਲਰੁਕ੍ਖੋ, ਸੁਮੇਧਸ੍ਸ ਨੀਪੋ, ਸੁਜਾਤਸ੍ਸ ਵੇਲ਼ੁ, ਪਿਯਦਸ੍ਸਿਨੋ ਕਕੁਧੋ, ਅਤ੍ਥਦਸ੍ਸਿਸ੍ਸ ਚਮ੍ਪਕਰੁਕ੍ਖੋ, ਧਮ੍ਮਦਸ੍ਸਿਸ੍ਸ ਰਤ੍ਤਕੁਰਵਕਰੁਕ੍ਖੋ, ਸਿਦ੍ਧਤ੍ਥਸ੍ਸ ਕਣਿਕਾਰਰੁਕ੍ਖੋ, ਤਿਸ੍ਸਸ੍ਸ ਅਸਨਰੁਕ੍ਖੋ, ਫੁਸ੍ਸਸ੍ਸ ਆਮਲਕਰੁਕ੍ਖੋ, ਵਿਪਸ੍ਸਿਸ੍ਸ ਪਾਟਲਿਰੁਕ੍ਖੋ, ਸਿਖਿਸ੍ਸ ਪੁਣ੍ਡਰੀਕਰੁਕ੍ਖੋ, ਵੇਸ੍ਸਭੁਸ੍ਸ ਸਾਲਰੁਕ੍ਖੋ, ਕਕੁਸਨ੍ਧਸ੍ਸ ਸਿਰੀਸਰੁਕ੍ਖੋ, ਕੋਣਾਗਮਨਸ੍ਸ ਉਦੁਮ੍ਬਰਰੁਕ੍ਖੋ, ਕਸ੍ਸਪਸ੍ਸ ਨਿਗ੍ਰੋਧੋ, ਗੋਤਮਸ੍ਸ ਅਸ੍ਸਤ੍ਥੋਤਿ ਅਯਂ ਬੋਧਿਵੇਮਤ੍ਤਂ ਨਾਮ.
ਪਲ੍ਲਙ੍ਕਵੇਮਤ੍ਤਂ ਨਾਮ ਦੀਪਙ੍ਕਰ-ਰੇਵਤ-ਪਿਯਦਸ੍ਸੀ-ਅਤ੍ਥਦਸ੍ਸੀ-ਧਮ੍ਮਦਸ੍ਸੀ-ਵਿਪਸ੍ਸੀਨਂ ਤੇਪਣ੍ਣਾਸਹਤ੍ਥਪਲ੍ਲਙ੍ਕਾ ਅਹੇਸੁਂ; ਕੋਣ੍ਡਞ੍ਞ-ਮਙ੍ਗਲ-ਨਾਰਦ-ਸੁਮੇਧਾਨਂ ਸਤ੍ਤਪਣ੍ਣਾਸਹਤ੍ਥਾ; ਸੁਮਨਸ੍ਸ ਸਟ੍ਠਿਹਤ੍ਥੋ ਪਲ੍ਲਙ੍ਕੋ ਅਹੋਸਿ; ਸੋਭਿਤ-ਅਨੋਮਦਸ੍ਸੀ-ਪਦੁਮ-ਪਦੁਮੁਤ੍ਤਰ-ਫੁਸ੍ਸਾਨਂ ਅਟ੍ਠਤ੍ਤਿਂਸਹਤ੍ਥਾ, ਸੁਜਾਤਸ੍ਸ ਦ੍ਵਤ੍ਤਿਂਸਹਤ੍ਥੋ, ਸਿਦ੍ਧਤ੍ਥ-ਤਿਸ੍ਸ-ਵੇਸ੍ਸਭੂਨਂ ਚਤ੍ਤਾਲੀਸਹਤ੍ਥਾ, ਸਿਖਿਸ੍ਸ ਦ੍ਵਤ੍ਤਿਂਸਹਤ੍ਥੋ, ਕਕੁਸਨ੍ਧਸ੍ਸ ਛਬ੍ਬੀਸਤਿਹਤ੍ਥੋ, ਕੋਣਾਗਮਨਸ੍ਸ ਵੀਸਤਿਹਤ੍ਥੋ, ਕਸ੍ਸਪਸ੍ਸ ਪਨ੍ਨਰਸਹਤ੍ਥੋ, ਗੋਤਮਸ੍ਸ ਚੁਦ੍ਦਸਹਤ੍ਥੋ ਪਲ੍ਲਙ੍ਕੋ ਅਹੋਸਿ. ਅਯਂ ਪਲ੍ਲਙ੍ਕਵੇਮਤ੍ਤਂ ਨਾਮ. ਇਮਾਨਿ ਅਟ੍ਠ ਵੇਮਤ੍ਤਾਨਿ ਨਾਮ.
ਅਵਿਜਹਿਤਟ੍ਠਾਨਕਥਾ
ਸਬ੍ਬਬੁਦ੍ਧਾਨਂ ਪਨ ਚਤ੍ਤਾਰਿ ਅਵਿਜਹਿਤਟ੍ਠਾਨਾਨਿ ਨਾਮ ਹੋਨ੍ਤਿ. ਸਬ੍ਬਬੁਦ੍ਧਾਨਞ੍ਹਿ ਬੋਧਿਪਲ੍ਲਙ੍ਕੋ ਅਵਿਜਹਿਤੋ ਏਕਸ੍ਮਿਂਯੇਵ ਠਾਨੇ ਹੋਤਿ. ਧਮ੍ਮਚਕ੍ਕਪ੍ਪਵਤ੍ਤਨਂ ਇਸਿਪਤਨੇ ਮਿਗਦਾਯੇ ਅਵਿਜਹਿਤਮੇਵ ਹੋਤਿ. ਦੇਵੋਰੋਹਣਕਾਲੇ ਸਙ੍ਕਸ੍ਸਨਗਰਦ੍ਵਾਰੇ ਪਠਮਕ੍ਕਪਾਦਟ੍ਠਾਨਂ ਅਵਿਜਹਿਤਮੇਵ ਹੋਤਿ. ਜੇਤਵਨੇ ਗਨ੍ਧਕੁਟਿਯਾ ਚਤ੍ਤਾਰਿ ਮਞ੍ਚਪਾਦਟ੍ਠਾਨਾਨਿ ਅਵਿਜਹਿਤਾਨੇਵ ਹੋਨ੍ਤਿ. ਵਿਹਾਰੋ ਪਨ ਖੁਦ੍ਦਕੋਪਿ ਮਹਨ੍ਤੋਪਿ ਹੋਤਿ. ਵਿਹਾਰੋ ਨ ਵਿਜਹਤਿਯੇਵ, ਨਗਰਂ ਪਨ ਵਿਜਹਤਿ.
ਸਹਜਾਤਪਰਿਚ੍ਛੇਦ-ਨਕ੍ਖਤ੍ਤਪਰਿਚ੍ਛੇਦਕਥਾ
ਅਪਰਂ ਪਨ ਅਮ੍ਹਾਕਂਯੇਵ ਭਗਵਤੋ ਸਹਜਾਤਪਰਿਚ੍ਛੇਦਞ੍ਚ ਨਕ੍ਖਤ੍ਤਪਰਿਚ੍ਛੇਦਞ੍ਚ ਦੀਪੇਸੁਂ. ਅਮ੍ਹਾਕਂ ਸਬ੍ਬਞ੍ਞੁਬੋਧਿਸਤ੍ਤੇਨ ਕਿਰ ਸਦ੍ਧਿਂ ਰਾਹੁਲਮਾਤਾ ਆਨਨ੍ਦਤ੍ਥੇਰੋ ਛਨ੍ਨੋ ਕਣ੍ਡਕੋ ਅਸ੍ਸਰਾਜਾ ਨਿਧਿਕੁਮ੍ਭੋ ਮਹਾਬੋਧਿ ਕਾਲ਼ੁਦਾਯੀਤਿ ਇਮਾਨਿ ਸਤ੍ਤ ਸਹਜਾਤਾਨਿ. ਅਯਂ ਸਹਜਾਤਪਰਿਚ੍ਛੇਦੋ. ਮਹਾਪੁਰਿਸੋ ਪਨ ਉਤ੍ਤਰਾਸਾਲ਼੍ਹਨਕ੍ਖਤ੍ਤੇਨੇਵ ਮਾਤੁਕੁਚ੍ਛਿਂ ਓਕ੍ਕਮਿ, ਮਹਾਭਿਨਿਕ੍ਖਮਨਂ ਨਿਕ੍ਖਮਿ, ਧਮ੍ਮਚਕ੍ਕਂ ਪਵਤ੍ਤੇਸਿ, ਯਮਕਪਾਟਿਹਾਰਿਯਂ ਅਕਾਸਿ. ਵਿਸਾਖਨਕ੍ਖਤ੍ਤੇਨ ਜਾਤੋ ਚ ਅਭਿਸਮ੍ਬੁਦ੍ਧੋ ਚ ਪਰਿਨਿਬ੍ਬੁਤੋ ਚ. ਮਾਘਨਕ੍ਖਤ੍ਤੇਨ ਤਸ੍ਸ ਸਾਵਕਸਨ੍ਨਿਪਾਤੋ ਚ ਆਯੁਸਙ੍ਖਾਰਵੋਸਜ੍ਜਨਞ੍ਚ ਅਹੋਸਿ. ਅਸ੍ਸਯੁਜਨਕ੍ਖਤ੍ਤੇਨ ਦੇਵੋਰੋਹਣਂ. ਅਯਂ ਨਕ੍ਖਤ੍ਤਪਰਿਚ੍ਛੇਦੋਤਿ.
ਸਧਮ੍ਮਤਾਕਥਾ
ਇਦਾਨਿ ਪਨ ਸਬ੍ਬੇਸਂ ਬੁਦ੍ਧਾਨਂ ਸਾਧਾਰਣਧਮ੍ਮਤਂ ਪਕਾਸਯਿਸ੍ਸਾਮ. ਸਬ੍ਬਬੁਦ੍ਧਾਨਂ ਸਮਤ੍ਤਿਂਸਵਿਧਾ ਧਮ੍ਮਤਾ. ਸੇਯ੍ਯਥਿਦਂ – ਪਚ੍ਛਿਮਭਵਿਕਬੋਧਿਸਤ੍ਤਸ੍ਸ ਸਮ੍ਪਜਾਨਸ੍ਸ ਮਾਤੁਕੁਚ੍ਛਿਓਕ੍ਕਮਨਂ, ਮਾਤੁਕੁਚ੍ਛਿਯਂ ਪਲ੍ਲਙ੍ਕੇਨ ਨਿਸੀਦਿਤ੍ਵਾ ਬਹਿਮੁਖੋਲੋਕਨਂ, ਠਿਤਾਯ ਬੋਧਿਸਤ੍ਤਮਾਤੁਯਾ ਵਿਜਾਯਨਂ, ਅਰਞ੍ਞੇਯੇਵ ਮਾਤੁਕੁਚ੍ਛਿਤੋ ਨਿਕ੍ਖਮਨਂ, ਕਞ੍ਚਨਪਟ੍ਟੇਸੁ ਪਤਿਟ੍ਠਿਤਪਾਦਾਨਂ ਉਤ੍ਤਰਾਭਿਮੁਖਾਨਂ ਸਤ੍ਤਪਦਵੀਤਿਹਾਰਾਨਂ ਗਨ੍ਤ੍ਵਾ ਚਤੁਦ੍ਦਿਸਂ ਓਲੋਕੇਤ੍ਵਾ ਸੀਹਨਾਦਨਦਨਂ, ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਜਾਤਮਤ੍ਤਪੁਤ੍ਤਾਨਂ ਮਹਾਸਤ੍ਤਾਨਂ ਮਹਾਭਿਨਿਕ੍ਖਮਨਂ, ਅਰਹਦ੍ਧਜਮਾਦਾਯ ਪਬ੍ਬਜਿਤ੍ਵਾ ਸਬ੍ਬਹੇਟ੍ਠਿਮੇਨ ਪਰਿਚ੍ਛੇਦੇਨ ਸਤ੍ਤਾਹਂ ਪਧਾਨਚਰਿਯਾ, ਸਮ੍ਬੋਧਿਂ ਪਾਪੁਣਨਦਿਵਸੇ ਪਾਯਾਸਭੋਜਨਂ, ਤਿਣਸਨ੍ਥਰੇ ਨਿਸੀਦਿਤ੍ਵਾ ਸਬ੍ਬਞ੍ਞੁਤਞ੍ਞਾਣਾਧਿਗਮੋ, ਆਨਾਪਾਨਸ੍ਸਤਿਕਮ੍ਮਟ੍ਠਾਨਪਰਿਕਮ੍ਮਂ, ਮਾਰਬਲਵਿਦ੍ਧਂਸਨਂ, ਬੋਧਿਪਲ੍ਲਙ੍ਕੇਯੇਵ ਤਿਸ੍ਸੋ ਵਿਜ੍ਜਾ ਆਦਿਂ ਕਤ੍ਵਾ ਅਸਾਧਾਰਣਞਾਣਾਦਿਗੁਣਪਟਿਲਾਭੋ, ਸਤ੍ਤਸਤ੍ਤਾਹਂ ਬੋਧਿਸਮੀਪੇਯੇਵ ਵੀਤਿਨਾਮਨਂ, ਮਹਾਬ੍ਰਹ੍ਮੁਨੋ ਧਮ੍ਮਦੇਸਨਤ੍ਥਾਯ ਆਯਾਚਨਂ, ਇਸਿਪਤਨੇ ਮਿਗਦਾਯੇ ਧਮ੍ਮਚਕ੍ਕਪ੍ਪਵਤ੍ਤਨਂ, ਮਾਘਪੁਣ੍ਣਮਾਯ ਚਤੁਰਙ੍ਗਿਕਸਨ੍ਨਿਪਾਤੇ ਪਾਤਿਮੋਕ੍ਖੁਦ੍ਦੇਸੋ, ਜੇਤਵਨਟ੍ਠਾਨੇ ਨਿਬਦ੍ਧਵਾਸੋ, ਸਾਵਤ੍ਥਿਨਗਰਦ੍ਵਾਰੇ ਯਮਕਪਾਟਿਹਾਰਿਯਕਰਣਂ, ਤਾਵਤਿਂਸਭਵਨੇ ਅਭਿਧਮ੍ਮਦੇਸਨਾ, ਸਙ੍ਕਸ੍ਸਨਗਰਦ੍ਵਾਰੇ ਦੇਵਲੋਕਤੋ ਓਤਰਣਂ ਸਤਤਂ ਫਲਸਮਾਪਤ੍ਤਿਸਮਾਪਜ੍ਜਨਂ, ਦ੍ਵੀਸੁ ਵਾਰੇਸੁ ਵੇਨੇਯ੍ਯਜਨਾਵਲੋਕਨਂ, ਉਪ੍ਪਨ੍ਨੇ ਵਤ੍ਥੁਮ੍ਹਿ ਸਿਕ੍ਖਾਪਦਪਞ੍ਞਾਪਨਂ ਉਪ੍ਪਨ੍ਨਾਯ ਅਟ੍ਠੁਪ੍ਪਤ੍ਤਿਯਾ ਜਾਤਕਕਥਨਂ, ਞਾਤਿਸਮਾਗਮੇ ਬੁਦ੍ਧਵਂਸਕਥਨਂ, ਆਗਨ੍ਤੁਕੇਹਿ ਭਿਕ੍ਖੂਹਿ ਪਟਿਸਨ੍ਥਾਰਕਰਣਂ, ਨਿਮਨ੍ਤਿਤਾਨਂ ਵੁਟ੍ਠਵਸ੍ਸਾਨਂ ਅਨਾਪੁਚ੍ਛਾ ਅਗਮਨਂ, ਦਿਵਸੇ ਦਿਵਸੇ ਪੁਰੇਭਤ੍ਤਪਚ੍ਛਾਭਤ੍ਤਪਠਮਮਜ੍ਝਿਮਪਚ੍ਛਿਮਯਾਮਕਿਚ੍ਚਕਰਣਂ, ਪਰਿਨਿਬ੍ਬਾਨਦਿਵਸੇ ਮਂਸਰਸਭੋਜਨਂ, ਚਤੁਵੀਸਤਿਕੋਟਿਸਤਸਹਸ੍ਸਸਮਾਪਤ੍ਤਿਯੋ ਸਮਾਪਜ੍ਜਿਤ੍ਵਾ ਪਰਿਨਿਬ੍ਬਾਨਨ੍ਤਿ ਇਮਾ ਸਮਤ੍ਤਿਂਸ ਸਬ੍ਬਬੁਦ੍ਧਾਨਂ ਧਮ੍ਮਤਾਤਿ.
ਅਨਨ੍ਤਰਾਯਿਕਧਮ੍ਮਕਥਾ
ਸਬ੍ਬਬੁਦ੍ਧਾਨਂ ਚਤ੍ਤਾਰੋ ਅਨਨ੍ਤਰਾਯਿਕਾ ਧਮ੍ਮਾ. ਕਤਮੇ ਚਤ੍ਤਾਰੋ? ਬੁਦ੍ਧਾਨਂ ਉਦ੍ਦਿਸ੍ਸ ਅਭਿਹਟਾਨਂ ਚਤੁਨ੍ਨਂ ਪਚ੍ਚਯਾਨਂ ਨ ਸਕ੍ਕਾ ਕੇਨਚਿ ਅਨ੍ਤਰਾਯੋ ਕਾਤੁਂ. ਬੁਦ੍ਧਾਨਂ ਆਯੁਨੋ ਨ ਸਕ੍ਕਾ ਕੇਨਚਿ ਅਨ੍ਤਰਾਯੋ ਕਾਤੁਂ. ਵੁਤ੍ਤਞ੍ਹੇਤਂ – ‘‘ਅਟ੍ਠਾਨਮੇਤਂ ਅਨਵਕਾਸੋ, ਯਂ ਪਰੂਪਕ੍ਕਮੇਨ ਤਥਾਗਤਂ ਜੀਵਿਤਾ ਵੋਰੋਪੇਯ੍ਯਾ’’ਤਿ (ਚੂਲ਼ਵ. ੩੪੨). ਬੁਦ੍ਧਾਨਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਂ ਅਸੀਤਿਯਾ ਅਨੁਬ੍ਯਞ੍ਜਨਾਨਞ੍ਚ ਨ ਸਕ੍ਕਾ ਕੇਨਚਿ ਅਨ੍ਤਰਾਯੋ ਕਾਤੁਂ. ਬੁਦ੍ਧਰਂਸੀਨਂ ਨ ਸਕ੍ਕਾ ਕੇਨਚਿ ਅਨ੍ਤਰਾਯੋ ਕਾਤੁਨ੍ਤਿ. ਇਮੇ ਚਤ੍ਤਾਰੋ ਅਨਨ੍ਤਰਾਯਿਕਾ ਧਮ੍ਮਾ ਨਾਮਾਤਿ.
ਨਿਗਮਨਕਥਾ
ਏਤ੍ਤਾਵਤਾ ਗਤਾ ਸਿਦ੍ਧਿਂ, ਬੁਦ੍ਧਵਂਸਸ੍ਸ ਵਣ੍ਣਨਾ;
ਸੁਵਣ੍ਣਪਦਵਿਞ੍ਞਾਤਵਿਚਿਤ੍ਤਨਯਸੋਭਿਤਾ.
ਪੋਰਾਣਟ੍ਠਕਥਾਮਗ੍ਗਂ, ਪਾਲ਼ਿਅਤ੍ਥਪ੍ਪਕਾਸਕਂ;
ਆਦਾਯੇਵ ਕਤਾ ਬੁਦ੍ਧ-ਵਂਸਸ੍ਸਟ੍ਠਕਥਾ ਮਯਾ.
ਪਪਞ੍ਚਤ੍ਥਂ ਵਿਵਜ੍ਜੇਤ੍ਵਾ, ਮਧੁਰਤ੍ਥਸ੍ਸ ਸਬ੍ਬਸੋ;
ਸਮ੍ਪਕਾਸਨਤੋ ਤਸ੍ਮਾ, ਮਧੁਰਤ੍ਥਪ੍ਪਕਾਸਿਨੀ.
ਕਾਵੀਰਜਲਸਮ੍ਪਾਤ-ਪਰਿਪੂਤਮਹੀਤਲੇ;
ਕਾਵੀਰਪਟ੍ਟਨੇ ਰਮ੍ਮੇ, ਨਾਨਾਨਾਰਿਨਰਾਕੁਲੇ.
ਕਾਰਿਤੇ ਕਣ੍ਹਦਾਸੇਨ, ਸਣ੍ਹਵਾਚੇਨ ਸਾਧੁਨਾ;
ਵਿਹਾਰੇ ਵਿਵਿਧਾਕਾਰ-ਚਾਰੁਪਾਕਾਰਗੋਪੁਰੇ.
ਛਾਯਾਸਲਿਲਸਮ੍ਪਨ੍ਨੇ, ਦਸ੍ਸਨੀਯੇ ਮਨੋਰਮੇ;
ਹਤਦੁਜ੍ਜਨਸਮ੍ਬਾਧੇ, ਪਵਿਵੇਕਸੁਖੇ ਸਿਵੇ.
ਤਤ੍ਥ ਪਾਚੀਨਪਾਸਾਦ-ਤਲੇ ਪਰਮਸੀਤਲੇ;
ਵਸਤਾ ਬੁਦ੍ਧਵਂਸਸ੍ਸ, ਮਯਾ ਸਂਵਣ੍ਣਨਾ ਕਤਾ.
ਯਥਾ ਬੁਦ੍ਧਵਂਸਸ੍ਸ ਸਂਵਣ੍ਣਨਾਯਂ, ਗਤਾ ਸਾਧੁ ਸਿਦ੍ਧਿਂ ਵਿਨਾ ਅਨ੍ਤਰਾਯਂ;
ਤਥਾ ਧਮ੍ਮਯੁਤ੍ਤਾ ਜਨਾਨਂ ਵਿਤਕ੍ਕਾ, ਵਿਨਾਵਨ੍ਤਰਾਯੇਨ ਸਿਦ੍ਧਿਂ ਵਜਨ੍ਤੁ.
ਇਮਂ ਬੁਦ੍ਧਵਂਸਸ੍ਸ ਸਂਵਣ੍ਣਨਂ ਮੇ, ਕਰੋਨ੍ਤੇਨ ਯਂ ਪਤ੍ਥਿਤਂ ਪੁਞ੍ਞਜਾਤਂ;
ਸਦਾ ਤਸ੍ਸ ਦੇਵਾਨੁਭਾਵੇਨ ਲੋਕੋ, ਧੁਵਂ ਸਨ੍ਤਮਚ੍ਚਨ੍ਤਮਤ੍ਥਂ ਪਯਾਤਂ.
ਵਿਨਸ੍ਸਨ੍ਤੁ ਰੋਗਾ ਮਨੁਸ੍ਸੇਸੁ ਸਬ੍ਬੇ, ਪਵਸ੍ਸਨ੍ਤੁ ਦੇਵਾਪਿ ਵਸ੍ਸਨ੍ਤਕਾਲੇ;
ਸੁਖਂ ਹੋਤੁ ਨਿਚ੍ਚਂ ਵਰਂ ਨਾਰਕਾਪਿ, ਪਿਸਾਚਾਪਯਾਤਾ ਪਿਪਾਸਾ ਭਵਨ੍ਤੁ.
ਸੁਰਾ ਅਚ੍ਛਰਾਨਂ ਗਣਾਦੀਹਿ ਸਦ੍ਧਿਂ, ਚਿਰਂ ਦੇਵਲੋਕੇ ਸੁਖਂ ਚਾਨੁਭੋਨ੍ਤੁ;
ਚਿਰਂ ਠਾਤੁ ਧਮ੍ਮੋ ਮੁਨਿਨ੍ਦਸ੍ਸ ਲੋਕੇ, ਸੁਖਂ ਲੋਕਪਾਲਾ ਮਹਿਂ ਪਾਲਯਨ੍ਤੁ.
ਗਰੂਹਿ ਗੀਤਨਾਮੇਨ, ਬੁਦ੍ਧਦਤ੍ਤੋਤਿ ਵਿਸ੍ਸੁਤੋ;
ਥੇਰੋ ਕਤ੍ਵਾ ਅਟ੍ਠਕਥਂ, ਮਧੁਰਤ੍ਥਵਿਲਾਸਿਨਿਂ.
ਪੋਤ੍ਥਕਂ ਠਪਯਿਤ੍ਵੇਮਂ, ਪਰਮ੍ਪਰੇ ਹਿਤਾਵਹਂ;
ਅਚਿਰਟ੍ਠਿਤਭਾਵੇਨ, ਅਹੋ ਮਚ੍ਚੁਵਸਂ ਗਤੋ.
ਇਤਿ ਭਾਣਵਾਰਵਸੇਨ ਛਬ੍ਬੀਸਤਿਭਾਣਵਾਰਾ, ਗਨ੍ਥਵਸੇਨ ਪਞ੍ਚਸਤਾਧਿਕਛਸਹਸ੍ਸਗਨ੍ਥਾ, ਅਕ੍ਖਰਵਸੇਨ ਤਿਸਹਸ੍ਸਾਧਿਕਾਨਿ ਦ੍ਵੇਸਤਸਹਸ੍ਸਕ੍ਖਰਾਨਿ.
ਅਨ੍ਤਰਾਯਂ ਵਿਨਾ ਏਸਾ, ਯਥਾ ਨਿਟ੍ਠਂ ਉਪਾਗਤਾ;
ਤਥਾ ਸਿਜ੍ਝਨ੍ਤੁ ਸਙ੍ਕਪ੍ਪਾ, ਸਤ੍ਤਾਨਂ ਧਮ੍ਮਨਿਸ੍ਸਿਤਾਤਿ.
ਇਤਿ ਮਧੁਰਤ੍ਥਵਿਲਾਸਿਨੀ ਨਾਮ
ਬੁਦ੍ਧਵਂਸ-ਅਟ੍ਠਕਥਾ ਨਿਟ੍ਠਿਤਾ.