੨੫. ਕੋਣਾਗਮਨਬੁਦ੍ਧਵਂਸਵਣ੍ਣਨਾ

ਕਕੁਸਨ੍ਧਸ੍ਸ ਪਨ ਭਗਵਤੋ ਅਪਰਭਾਗੇ ਤਸ੍ਸ ਸਾਸਨੇ ਚ ਅਨ੍ਤਰਹਿਤੇ ਸਤ੍ਤੇਸੁ ਤਿਂਸਵਸ੍ਸਸਹਸ੍ਸਾਯੁਕੇਸੁ ਜਾਤੇਸੁ ਪਰਹਿਤਕੋਣਾਗਮਨੋ ਕੋਣਾਗਮਨੋ ਨਾਮ ਸਤ੍ਥਾ ਲੋਕੇ ਉਦਪਾਦਿ. ਅਥ ਵਾ ਕਨਕਾਗਮਨਤੋ ਕੋਣਾਗਮਨੋ ਨਾਮ ਸਤ੍ਥਾ ਲੋਕੇ ਉਦਪਾਦਿ. ਤਤ੍ਥ ਕ-ਕਾਰਸ੍ਸ ਕੋਆਦੇਸਂ ਕਤ੍ਵਾ ਨ-ਕਾਰਸ੍ਸ ਣਾਦੇਸਂ ਕਤ੍ਵਾ ਏਕਸ੍ਸ ਕ-ਕਾਰਸ੍ਸ ਲੋਪਂ ਕਤ੍ਵਾ ਨਿਰੁਤ੍ਤਿਨਯੇਨ ਕਨਕਸ੍ਸ ਕਨਕਾਦਿਆਭਰਣਸ੍ਸ ਆਗਮਨਂ ਪਵਸ੍ਸਨਂ ਯਸ੍ਸ ਭਗਵਤੋ ਉਪ੍ਪਨ੍ਨਕਾਲੇ ਸੋ ਕੋਣਾਗਮਨੋ ਨਾਮ. ਏਤ੍ਥ ਪਨ ਆਯੁ ਅਨੁਪੁਬ੍ਬੇਨ ਪਰਿਹੀਨਸਦਿਸਂ ਕਤਂ, ਨ ਏਵਂ ਪਰਿਹੀਨਂ, ਪੁਨ ਵਡ੍ਢਿਤ੍ਵਾ ਪਰਿਹੀਨਨ੍ਤਿ ਵੇਦਿਤਬ੍ਬਂ. ਕਥਂ? ਇਮਸ੍ਮਿਂਯੇਵ ਕਪ੍ਪੇ ਕਕੁਸਨ੍ਧੋ ਭਗਵਾ ਚਤ੍ਤਾਲੀਸਵਸ੍ਸਸਹਸ੍ਸਾਯੁਕਕਾਲੇ ਨਿਬ੍ਬਤ੍ਤੋ, ਤਂ ਪਨ ਆਯੁ ਪਰਿਹਾਯਮਾਨਂ ਦਸਵਸ੍ਸਕਾਲਂ ਪਤ੍ਵਾ ਪੁਨ ਅਸਙ੍ਖ੍ਯੇਯ੍ਯਂ ਪਤ੍ਵਾ ਤਤੋ ਪਰਿਹਾਯਮਾਨਂ ਤਿਂਸਵਸ੍ਸਸਹਸ੍ਸਾਯੁਕਕਾਲੇ ਠਿਤਂ, ਤਦਾ ਕੋਣਾਗਮਨੋ ਭਗਵਾ ਲੋਕੇ ਉਪ੍ਪਨ੍ਨੋਤਿ ਵੇਦਿਤਬ੍ਬੋ.

ਸੋਪਿ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਸੋਭਵਤੀਨਗਰੇ ਯਞ੍ਞਦਤ੍ਤਸ੍ਸ ਬ੍ਰਾਹ੍ਮਣਸ੍ਸ ਭਰਿਯਾਯ ਰੂਪਾਦੀਹਿ ਗੁਣੇਹਿ ਅਨੁਤ੍ਤਰਾਯ ਉਤ੍ਤਰਾਯ ਨਾਮ ਬ੍ਰਾਹ੍ਮਣਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਸੁਭਵਤੀਉਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਜਾਯਮਾਨੇ ਪਨ ਤਸ੍ਮਿਂ ਸਕਲਜਮ੍ਬੁਦੀਪੇ ਦੇਵੋ ਕਨਕਵਸ੍ਸਂ ਵਸ੍ਸਿ. ਤੇਨਸ੍ਸ ਕਨਕਾਗਮਨਕਾਰਣਤ੍ਤਾ ‘‘ਕਨਕਾਗਮਨੋ’’ਤਿ ਨਾਮਮਕਂਸੁ. ਤਂ ਪਨਸ੍ਸ ਨਾਮਂ ਅਨੁਕ੍ਕਮੇਨ ਪਰਿਣਮਮਾਨਂ ਕੋਣਾਗਮਨੋ’’ਤਿ ਜਾਤਂ. ਸੋ ਪਨ ਤੀਣਿ ਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਤੁਸਿਤ-ਸਨ੍ਤੁਸਿਤ-ਸਨ੍ਤੁਟ੍ਠਨਾਮਕਾ ਪਨਸ੍ਸ ਤਯੋ ਪਾਸਾਦਾ ਅਹੇਸੁਂ. ਰੁਚਿਗਤ੍ਤਾਬ੍ਰਾਹ੍ਮਣੀਪਮੁਖਾਨਿ ਸੋਲ਼ਸ ਇਤ੍ਥਿਸਹਸ੍ਸਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਰੁਚਿਗਤ੍ਤਾਯ ਬ੍ਰਾਹ੍ਮਣਿਯਾ ਸਤ੍ਥਵਾਹੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਹਤ੍ਥਿਕ੍ਖਨ੍ਧਵਰਗਤੋ ਹਤ੍ਥਿਯਾਨੇਨ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਤਿਂਸਪੁਰਿਸਸਹਸ੍ਸਾਨਿ ਅਨੁਪਬ੍ਬਜਿਂਸੁ. ਸੋ ਤੇਹਿ ਪਰਿਵੁਤੋ ਛ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯਂ ਅਗ੍ਗਿਸੋਨਬ੍ਰਾਹ੍ਮਣਸ੍ਸ ਧੀਤਾਯ ਅਗ੍ਗਿਸੋਨਬ੍ਰਾਹ੍ਮਣਕੁਮਾਰਿਯਾ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਖਦਿਰਵਨੇ ਦਿਵਾਵਿਹਾਰਂ ਕਤ੍ਵਾ ਸਾਯਨ੍ਹਸਮਯੇ ਜਟਾਤਿਨ੍ਦੁਕੇਨ ਨਾਮ ਯਵਪਾਲੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਉਦੁਮ੍ਬਰਬੋਧਿਂ ਪੁਣ੍ਡਰੀਕੇ ਵੁਤ੍ਤਪ੍ਪਮਾਣਂ ਫਲਵਿਭੂਤਿਸਮ੍ਪਨ੍ਨਂ ਦਕ੍ਖਿਣਤੋ ਉਪਗਨ੍ਤ੍ਵਾ ਵੀਸਤਿਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਮਾਰਬਲਂ ਵਿਦ੍ਧਂਸੇਤ੍ਵਾ ਦਸਬਲਞਾਣਾਨਿ ਪਟਿਲਭਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਅਤ੍ਤਨਾ ਸਹ ਪਬ੍ਬਜਿਤਾਨਂ ਤਿਂਸਭਿਕ੍ਖੁਸਹਸ੍ਸਾਨਂ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਗਗਨਪਥੇਨ ਗਨ੍ਤ੍ਵਾ ਸੁਦਸ੍ਸਨਨਗਰਸਮੀਪੇ ਇਸਿਪਤਨੇ ਮਿਗਦਾਯੇ ਓਤਰਿਤ੍ਵਾ ਤੇਸਂ ਮਜ੍ਝਗਤੋ ਧਮ੍ਮਚਕ੍ਕਂ ਪਵਤ੍ਤੇਸਿ, ਤਦਾ ਤਿਂਸਕੋਟਿਸਹਸ੍ਸਾਨਂ ਪਠਮਾਭਿਸਮਯੋ ਅਹੋਸਿ.

ਪੁਨ ਸੁਨ੍ਦਰਨਗਰਦ੍ਵਾਰੇ ਮਹਾਸਾਲਰੁਕ੍ਖਮੂਲੇ ਯਮਕਪਾਟਿਹਾਰਿਯਂ ਕਤ੍ਵਾ ਵੀਸਤਿਕੋਟਿਸਹਸ੍ਸਾਨਂ ਧਮ੍ਮਾਮਤਂ ਪਾਯੇਸਿ, ਸੋ ਦੁਤਿਯੋ ਅਭਿਸਮਯੋ ਅਹੋਸਿ. ਅਤ੍ਤਨੋ ਮਾਤਰਂ ਉਤ੍ਤਰਂ ਪਮੁਖਂ ਕਤ੍ਵਾ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਦੇਵਤਾਨਂ ਸਮਾਗਤਾਨਂ ਅਭਿਧਮ੍ਮਪਿਟਕਂ ਦੇਸੇਨ੍ਤੇ ਭਗਵਤਿ ਦਸਨ੍ਨਂ ਕੋਟਿਸਹਸ੍ਸਾਨਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਕਕੁਸਨ੍ਧਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਕੋਣਾਗਮਨੋ ਨਾਮ ਜਿਨੋ, ਲੋਕਜੇਟ੍ਠੋ ਨਰਾਸਭੋ.

੨. ‘‘ਦਸ ਧਮ੍ਮੇ ਪੂਰਯਿਤ੍ਵਾਨ, ਕਨ੍ਤਾਰਂ ਸਮਤਿਕ੍ਕਮਿ;

ਪਵਾਹਿਯ ਮਲਂ ਸਬ੍ਬਂ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੩. ‘‘ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਕੋਣਾਗਮਨਨਾਯਕੇ;

ਤਿਂਸਕੋਟਿਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.

੪. ‘‘ਪਾਟਿਹੀਰਂ ਕਰੋਨ੍ਤੇ ਚ, ਪਰਵਾਦਪ੍ਪਮਦ੍ਦਨੇ;

ਵੀਸਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੫. ‘‘ਤਤੋ ਵਿਕੁਬ੍ਬਨਂ ਕਤ੍ਵਾ, ਜਿਨੋ ਦੇਵਪੁਰਂ ਗਤੋ;

ਵਸਤੇ ਤਤ੍ਥ ਸਮ੍ਬੁਦ੍ਧੋ, ਸਿਲਾਯ ਪਣ੍ਡੁਕਮ੍ਬਲੇ.

੬. ‘‘ਪਕਰਣੇ ਸਤ੍ਤ ਦੇਸੇਨ੍ਤੋ, ਵਸ੍ਸਂ ਵਸਤਿ ਸੋ ਮੁਨਿ;

ਦਸਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਤਤ੍ਥ ਦਸ ਧਮ੍ਮੇ ਪੂਰਯਿਤ੍ਵਾਨਾਤਿ ਦਸ ਪਾਰਮਿਧਮ੍ਮੇ ਪੂਰਯਿਤ੍ਵਾ. ਕਨ੍ਤਾਰਂ ਸਮਤਿਕ੍ਕਮੀਤਿ ਜਾਤਿਕਨ੍ਤਾਰਂ ਸਮਤਿਕ੍ਕਮਿ. ਪਵਾਹਿਯਾਤਿ ਪਵਾਹੇਤ੍ਵਾ. ਮਲਂ ਸਬ੍ਬਨ੍ਤਿ ਰਾਗਾਦਿਮਲਤ੍ਤਯਂ. ਪਾਟਿਹੀਰਂ ਕਰੋਨ੍ਤੇ ਚ, ਪਰਵਾਦਪ੍ਪਮਦ੍ਦਨੇਤਿ ਪਰਵਾਦਿਵਾਦਪ੍ਪਮਦ੍ਦਨੇ, ਭਗਵਤਿ ਪਾਟਿਹਾਰਿਯਂ ਕਰੋਨ੍ਤੇਤਿ ਅਤ੍ਥੋ. ਵਿਕੁਬ੍ਬਨਨ੍ਤਿ ਵਿਕੁਬ੍ਬਨਿਦ੍ਧਿਂ, ਸੁਨ੍ਦਰਨਗਰਦ੍ਵਾਰੇ ਯਮਕਪਾਟਿਹਾਰਿਯਂ ਕਤ੍ਵਾ ਦੇਵਪੁਰਂ ਗਤੋ ਤਤ੍ਥ ਪਣ੍ਡੁਕਮ੍ਬਲਸਿਲਾਯਂ ਵਸਿ. ਕਥਂ ਵਸੀਤਿ? ਪਕਰਣੇ ਸਤ੍ਤ ਦੇਸੇਨ੍ਤੋਤਿ ਤਤ੍ਥ ਦੇਵਾਨਂ ਸਤ੍ਤਪ੍ਪਕਰਣਸਙ੍ਖਾਤਂ ਅਭਿਧਮ੍ਮਪਿਟਕਂ ਦੇਸੇਨ੍ਤੋ ਵਸਿ. ਏਵਂ ਤਤ੍ਥ ਅਭਿਧਮ੍ਮਂ ਦੇਸੇਨ੍ਤੇ ਭਗਵਤਿ ਦਸਕੋਟਿਸਹਸ੍ਸਾਨਂ ਦੇਵਾਨਂ ਅਭਿਸਮਯੋ ਅਹੋਸੀਤਿ ਅਤ੍ਥੋ.

ਪਰਿਸੁਦ੍ਧਪਾਰਮਿਪੂਰਣਾਗਮਨਸ੍ਸ ਕੋਣਾਗਮਨਸ੍ਸਪਿ ਏਕੋ ਸਾਵਕਸਨ੍ਨਿਪਾਤੋ ਅਹੋਸਿ. ਸੁਰਿਨ੍ਦਵਤੀਨਗਰੇ ਸੁਰਿਨ੍ਦਵਤੁਯ੍ਯਾਨੇ ਵਿਹਰਨ੍ਤੋ ਭਿਯ੍ਯਸਸ੍ਸ ਰਾਜਪੁਤ੍ਤਸ੍ਸ ਚ ਉਤ੍ਤਰਸ੍ਸ ਚ ਰਾਜਪੁਤ੍ਤਸ੍ਸ ਦ੍ਵਿਨ੍ਨਮ੍ਪਿ ਤਿਂਸਸਹਸ੍ਸਪਰਿਵਾਰਾਨਂ ਧਮ੍ਮਂ ਦੇਸੇਤ੍ਵਾ ਸਬ੍ਬੇਵ ਤੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਾਜੇਤ੍ਵਾ ਤੇਸਂ ਮਜ੍ਝਗਤੋ ਮਾਘਪੁਣ੍ਣਮਾਯਂ ਪਾਤਿਮੋਕ੍ਖਂ ਉਦ੍ਦਿਸਿ. ਤੇਨ ਵੁਤ੍ਤਂ –

੭. ‘‘ਤਸ੍ਸਾਪਿ ਦੇਵਦੇਵਸ੍ਸ, ਏਕੋ ਆਸਿ ਸਮਾਗਮੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੮. ‘‘ਤਿਂਸਭਿਕ੍ਖੁਸਹਸ੍ਸਾਨਂ, ਤਦਾ ਆਸਿ ਸਮਾਗਮੋ;

ਓਘਾਨਮਤਿਕ੍ਕਨ੍ਤਾਨਂ, ਭਿਜ੍ਜਿਤਾਨਞ੍ਚ ਮਚ੍ਚੁਯਾ’’ਤਿ.

ਤਤ੍ਥ ਓਘਾਨਨ੍ਤਿ ਕਾਮੋਘਾਦੀਨਂ, ਚਤੁਨ੍ਨਮੋਘਾਨਮੇਤਂ ਅਧਿਵਚਨਂ. ਯਸ੍ਸ ਪਨ ਤੇ ਸਂਵਿਜ੍ਜਨ੍ਤਿ, ਤਂ ਵਟ੍ਟਸ੍ਮਿਂ ਓਹਨਨ੍ਤਿ ਓਸੀਦਾਪੇਨ੍ਤੀਤਿ ਓਘਾ, ਤੇਸਂ ਓਘਾਨਂ, ਉਪਯੋਗਤ੍ਥੇ ਸਾਮਿਵਚਨਂ ਦਟ੍ਠਬ੍ਬਂ. ਚਤੁਬ੍ਬਿਧੇ ਓਘੇ ਅਤਿਕ੍ਕਨ੍ਤਾਨਨ੍ਤਿ ਅਤ੍ਥੋ. ਭਿਜ੍ਜਿਤਾਨਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਮਚ੍ਚੁਯਾਤਿ ਮਚ੍ਚੁਨੋ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਮਿਥਿਲਨਗਰੇ ਪਬ੍ਬਤੋ ਨਾਮ ਰਾਜਾ ਅਹੋਸਿ, ਤਦਾ ‘‘ਸਰਣਗਤਸਬ੍ਬਪਾਣਾਗਮਨਂ ਕੋਣਾਗਮਨਂ ਮਿਥਿਲਨਗਰਮਨੁਪ੍ਪਤ੍ਤ’’ਨ੍ਤਿ ਸੁਤ੍ਵਾ ਸਪਰਿਵਾਰੋ ਰਾਜਾ ਪਚ੍ਚੁਗ੍ਗਨ੍ਤ੍ਵਾ ਵਨ੍ਦਿਤ੍ਵਾ ਦਸਬਲਂ ਨਿਮਨ੍ਤੇਤ੍ਵਾ ਮਹਾਦਾਨਂ ਦਤ੍ਵਾ ਤਤ੍ਥ ਭਗਵਨ੍ਤਂ ਵਸ੍ਸਾਵਾਸਤ੍ਥਾਯ ਯਾਚਿਤ੍ਵਾ ਤੇਮਾਸਂ ਸਸਾਵਕਸਙ੍ਘਂ ਸਤ੍ਥਾਰਂ ਉਪਟ੍ਠਹਿਤ੍ਵਾ ਪਤ੍ਤੁਣ੍ਣਚੀਨਪਟ੍ਟਕਮ੍ਬਲਕੋਸੇਯ੍ਯਦੁਕੂਲਕਪ੍ਪਾਸਿਕਾਦੀਨਿ ਮਹਗ੍ਘਾਨਿ ਚੇਵ ਸੁਖੁਮਵਤ੍ਥਾਨਿ ਚ ਸੁਵਣ੍ਣਪਾਦੁਕਾ ਚੇਵ ਅਞ੍ਞਞ੍ਚ ਬਹੁਪਰਿਕ੍ਖਾਰਮਦਾਸਿ. ਸੋਪਿ ਨਂ ਭਗਵਾ ਬ੍ਯਾਕਾਸਿ – ‘‘ਇਮਸ੍ਮਿਂਯੇਵ ਭਦ੍ਦਕਪ੍ਪੇ ਅਯਂ ਬੁਦ੍ਧੋ ਭਵਿਸ੍ਸਤੀ’’ਤਿ. ਅਥ ਸੋ ਮਹਾਪੁਰਿਸੋ ਤਸ੍ਸ ਭਗਵਤੋ ਬ੍ਯਾਕਰਣਂ ਸੁਤ੍ਵਾ ਮਹਾਰਜ੍ਜਂ ਪਰਿਚ੍ਚਜਿਤ੍ਵਾ ਤਸ੍ਸੇਵ ਭਗਵਤੋ ਸਨ੍ਤਿਕੇ ਪਬ੍ਬਜਿ. ਤੇਨ ਵੁਤ੍ਤਂ –

੯. ‘‘ਅਹਂ ਤੇਨ ਸਮਯੇਨ, ਪਬ੍ਬਤੋ ਨਾਮ ਖਤ੍ਤਿਯੋ;

ਮਿਤ੍ਤਾਮਚ੍ਚੇਹਿ ਸਮ੍ਪਨ੍ਨੋ, ਅਨਨ੍ਤਬਲਵਾਹਨੋ.

੧੦. ‘‘ਸਮ੍ਬੁਦ੍ਧਦਸ੍ਸਨਂ ਗਨ੍ਤ੍ਵਾ, ਸੁਤ੍ਵਾ ਧਮ੍ਮਮਨੁਤ੍ਤਰਂ;

ਨਿਮਨ੍ਤੇਤ੍ਵਾ ਸਜਿਨਸਙ੍ਘਂ, ਦਾਨਂ ਦਤ੍ਵਾ ਯਦਿਚ੍ਛਕਂ.

੧੧. ‘‘ਪਤ੍ਤੁਣ੍ਣਂ ਚੀਨਪਟ੍ਟਞ੍ਚ, ਕੋਸੇਯ੍ਯਂ ਕਮ੍ਬਲਮ੍ਪਿ ਚ;

ਸੁਵਣ੍ਣਪਾਦੁਕਞ੍ਚੇਵ, ਅਦਾਸਿਂ ਸਤ੍ਥੁਸਾਵਕੇ.

੧੨. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸਙ੍ਘਮਜ੍ਝੇ ਨਿਸੀਦਿਯ;

ਇਮਮ੍ਹਿ ਭਦ੍ਦਕੇ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੩. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੪. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ ਦਸਪਾਰਮਿਪੂਰਿਯਾ.

੧੫. ‘‘ਸਬ੍ਬਞ੍ਞੁਤਂ ਗਵੇਸਨ੍ਤੋ, ਦਾਨਂ ਦਤ੍ਵਾ ਨਰੁਤ੍ਤਮੇ;

ਓਹਾਯਾਹਂ ਮਹਾਰਜ੍ਜਂ, ਪਬ੍ਬਜਿਂ ਜਿਨਸਨ੍ਤਿਕੇ’’ਤਿ.

ਤਤ੍ਥ ਅਨਨ੍ਤਬਲਵਾਹਨੋਤਿ ਬਹੁਕਂ ਅਨਨ੍ਤਂ ਮਯ੍ਹਂ ਬਲਂ ਅਸ੍ਸਹਤ੍ਥਿਆਦਿਕਂ ਵਾਹਨਞ੍ਚਾਤਿ ਅਤ੍ਥੋ. ਸਮ੍ਬੁਦ੍ਧਦਸ੍ਸਨਨ੍ਤਿ ਸਮ੍ਬੁਦ੍ਧਦਸ੍ਸਨਤ੍ਥਾਯ. ਯਦਿਚ੍ਛਕਨ੍ਤਿ ਯਾਵਦਿਚ੍ਛਕਂ ਬੁਦ੍ਧਪ੍ਪਮੁਖਂ ਸਙ੍ਘਂ ਚਤੁਬ੍ਬਿਧੇਨ ਆਹਾਰੇਨ ‘‘ਅਲਮਲ’’ਨ੍ਤਿ ਪਵਾਰਾਪੇਤ੍ਵਾ, ਹਤ੍ਥੇਨ ਪਿਦਹਾਪੇਤ੍ਵਾਤਿ ਅਤ੍ਥੋ. ਸਤ੍ਥੁਸਾਵਕੇਤਿ ਸਤ੍ਥੁਨੋ ਚੇਵ ਸਾਵਕਾਨਞ੍ਚ ਅਦਾਸਿਂ. ਨਰੁਤ੍ਤਮੇਤਿ ਨਰੁਤ੍ਤਮਸ੍ਸ. ਓਹਾਯਾਤਿ ਪਹਾਯ ਪਰਿਚ੍ਚਜਿਤ੍ਵਾ.

ਤਸ੍ਸ ਪਨ ਕੋਣਾਗਮਨਸ੍ਸ ਭਗਵਤੋ ਸੋਭਵਤੀ ਨਾਮ ਨਗਰਂ ਅਹੋਸਿ, ਯਞ੍ਞਦਤ੍ਤੋ ਨਾਮ ਬ੍ਰਾਹ੍ਮਣੋ ਪਿਤਾ, ਉਤ੍ਤਰਾ ਨਾਮ ਬ੍ਰਾਹ੍ਮਣੀ ਮਾਤਾ, ਭਿਯ੍ਯਸੋ ਚ ਉਤ੍ਤਰੋ ਚਾਤਿ ਦ੍ਵੇ ਅਗ੍ਗਸਾਵਕਾ, ਸੋਤ੍ਥਿਜੋ ਨਾਮੁਪਟ੍ਠਾਕੋ, ਸਮੁਦ੍ਦਾ ਚ ਉਤ੍ਤਰਾ ਚ ਦ੍ਵੇ ਅਗ੍ਗਸਾਵਿਕਾ, ਉਦੁਮ੍ਬਰਰੁਕ੍ਖੋ ਬੋਧਿ, ਸਰੀਰਂ ਤਿਂਸਹਤ੍ਥੁਬ੍ਬੇਧਂ ਅਹੋਸਿ, ਤਿਂਸਵਸ੍ਸਸਹਸ੍ਸਾਨਿ ਆਯੁ, ਭਰਿਯਾ ਪਨਸ੍ਸ ਰੁਚਿਗਤ੍ਤਾ ਨਾਮ ਬ੍ਰਾਹ੍ਮਣੀ, ਸਤ੍ਥਵਾਹੋ ਨਾਮ ਪੁਤ੍ਤੋ, ਹਤ੍ਥਿਯਾਨੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੧੬. ‘‘ਨਗਰਂ ਸੋਭਵਤੀ ਨਾਮ, ਸੋਭੋ ਨਾਮਾਸਿ ਖਤ੍ਤਿਯੋ;

ਵਸਤੇ ਤਤ੍ਥ ਨਗਰੇ, ਸਮ੍ਬੁਦ੍ਧਸ੍ਸ ਮਹਾਕੁਲਂ.

੧੭. ‘‘ਬ੍ਰਾਹ੍ਮਣੋ ਯਞ੍ਞਦਤ੍ਤੋ ਚ, ਆਸਿ ਬੁਦ੍ਧਸ੍ਸ ਸੋ ਪਿਤਾ;

ਉਤ੍ਤਰਾ ਨਾਮ ਜਨਿਕਾ, ਕੋਣਾਗਮਨਸ੍ਸ ਸਤ੍ਥੁਨੋ;

੨੨. ‘‘ਭਿਯ੍ਯਸੋ ਉਤ੍ਤਰੋ ਨਾਮ, ਅਹੇਸੁਂ ਅਗ੍ਗਸਾਵਕਾ;

ਸੋਤ੍ਥਿਜੋ ਨਾਮੁਪਟ੍ਠਾਕੋ, ਕੋਣਾਗਮਨਸ੍ਸ ਸਤ੍ਥੁਨੋ.

੨੩. ‘‘ਸਮੁਦ੍ਦਾ ਉਤ੍ਤਰਾ ਚੇਵ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਉਦੁਮ੍ਬਰੋਤਿ ਪਵੁਚ੍ਚਤਿ.

੨੫. ‘‘ਉਚ੍ਚਤ੍ਤਨੇਨ ਸੋ ਬੁਦ੍ਧੋ, ਤਿਂਸਹਤ੍ਥਸਮੁਗ੍ਗਤੋ;

ਉਕ੍ਕਾਮੁਖੇ ਯਥਾ ਕਮ੍ਬੁ, ਏਵਂ ਰਂਸੀਹਿ ਮਣ੍ਡਿਤੋ.

੨੬. ‘‘ਤਿਂਸਵਸ੍ਸਸਹਸ੍ਸਾਨਿ, ਆਯੁ ਬੁਦ੍ਧਸ੍ਸ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੭. ‘‘ਧਮ੍ਮਚੇਤਿਂ ਸਮੁਸ੍ਸੇਤ੍ਵਾ, ਧਮ੍ਮਦੁਸ੍ਸਵਿਭੂਸਿਤਂ;

ਧਮ੍ਮਪੁਪ੍ਫਗੁਲ਼ਂ ਕਤ੍ਵਾ, ਨਿਬ੍ਬੁਤੋ ਸੋ ਸਸਾਵਕੋ.

੨੮. ‘‘ਮਹਾਵਿਲਾਸੋ ਤਸ੍ਸ ਜਨੋ, ਸਿਰਿਧਮ੍ਮਪ੍ਪਕਾਸਨੋ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਉਕ੍ਕਾਮੁਖੇਤਿ ਕਮ੍ਮਾਰੁਦ੍ਧਨੇ. ਯਥਾ ਕਮ੍ਬੂਤਿ ਸੁਵਣ੍ਣਨਿਕ੍ਖਂ ਵਿਯ. ਏਵਂ ਰਂਸੀਹਿ ਮਣ੍ਡਿਤੋਤਿ ਏਵਂ ਰਸ੍ਮੀਹਿ ਪਟਿਮਣ੍ਡਿਤੋ ਸਮਲਙ੍ਕਤੋ. ਧਮ੍ਮਚੇਤਿਂ ਸਮੁਸ੍ਸੇਤ੍ਵਾਤਿ ਸਤ੍ਤਤ੍ਤਿਂਸਬੋਧਿਪਕ੍ਖਿਯਧਮ੍ਮਮਯਂ ਚੇਤਿਯਂ ਪਤਿਟ੍ਠਾਪੇਤ੍ਵਾ. ਧਮ੍ਮਦੁਸ੍ਸਵਿਭੂਸਿਤਨ੍ਤਿ ਚਤੁਸਚ੍ਚਧਮ੍ਮਪਟਾਕਵਿਭੂਸਿਤਂ. ਧਮ੍ਮਪੁਪ੍ਫਗੁਲ਼ਂ ਕਤ੍ਵਾਤਿ ਧਮ੍ਮਮਯਪੁਪ੍ਫਮਾਲਾਗੁਲ਼ਂ ਕਤ੍ਵਾ. ਮਹਾਜਨਸ੍ਸ ਵਿਪਸ੍ਸਨਾਚੇਤਿਯਙ੍ਗਣੇ ਠਿਤਸ੍ਸ ਨਮਸ੍ਸਨਤ੍ਥਾਯ ਧਮ੍ਮਚੇਤਿਯਂ ਪਤਿਟ੍ਠਾਪੇਤ੍ਵਾ ਸਸਾਵਕਸਙ੍ਘੋ ਸਤ੍ਥਾ ਪਰਿਨਿਬ੍ਬਾਯੀਤਿ ਅਤ੍ਥੋ. ਮਹਾਵਿਲਾਸੋਤਿ ਮਹਾਇਦ੍ਧਿਵਿਲਾਸਪ੍ਪਤ੍ਤੋ. ਤਸ੍ਸਾਤਿ ਤਸ੍ਸ ਭਗਵਤੋ. ਜਨੋਤਿ ਸਾਵਕਜਨੋ. ਸਿਰਿਧਮ੍ਮਪ੍ਪਕਾਸਨੋਤਿ ਲੋਕੁਤ੍ਤਰਧਮ੍ਮਪ੍ਪਕਾਸਨੋ ਸੋ ਭਗਵਾ ਚ ਸਬ੍ਬਂ ਤਮਨ੍ਤਰਹਿਤਨ੍ਤਿ ਅਤ੍ਥੋ.

‘‘ਸੁਖੇਨ ਕੋਣਾਗਮਨੋ ਗਤਾਸਵੋ, ਵਿਕਾਮਪਾਣਾਗਮਨੋ ਮਹੇਸੀ;

ਵਨੇ ਵਿਵੇਕੇ ਸਿਰਿਨਾਮਧੇਯ੍ਯੇ, ਵਿਸੁਦ੍ਧਵਂਸਾਗਮਨੋ ਵਸਿਤ੍ਥ’’.

ਸੇਸਗਾਥਾਸੁ ਸਬ੍ਬਤ੍ਥ ਪਾਕਟਮੇਵਾਤਿ.

ਕੋਣਾਗਮਨਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਤੇਵੀਸਤਿਮੋ ਬੁਦ੍ਧਵਂਸੋ.