੨੬. ਕਸ੍ਸਪਬੁਦ੍ਧਵਂਸਵਣ੍ਣਨਾ

ਕੋਣਾਗਮਨਸ੍ਸ ਪਨ ਭਗਵਤੋ ਅਪਰਭਾਗੇ ਤਸ੍ਸ ਸਾਸਨੇ ਚ ਅਨ੍ਤਰਹਿਤੇ ਤਿਂਸਵਸ੍ਸਸਹਸ੍ਸਾਯੁਕਾ ਸਤ੍ਤਾ ਅਨੁਪੁਬ੍ਬੇਨ ਪਰਿਹਾਯਿਤ੍ਵਾ ਦਸਵਸ੍ਸਾਯੁਕਾ ਹੁਤ੍ਵਾ ਪੁਨ ਵਡ੍ਢਿਤ੍ਵਾ ਅਪਰਿਮਿਤਾਯੁਕਾ ਹੁਤ੍ਵਾ ਪੁਨ ਅਨੁਪੁਬ੍ਬੇਨ ਪਰਿਹਾਯਿਤ੍ਵਾ ਵੀਸਤਿਵਸ੍ਸਸਹਸ੍ਸਾਯੁਕੇਸੁ ਸਤ੍ਤੇਸੁ ਜਾਤੇਸੁ ਅਨੇਕਮਨੁਸ੍ਸਪੋ ਕਸ੍ਸਪੋ ਨਾਮ ਸਤ੍ਥਾ ਲੋਕੇ ਉਦਪਾਦਿ (ਸੁ. ਨਿ. ਅਟ੍ਠ. ਆਮਕਗਨ੍ਧਸੁਤ੍ਤਵਣ੍ਣਨਾ). ਸੋ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਬਾਰਾਣਸੀਨਗਰੇ ਬ੍ਰਹ੍ਮਦਤ੍ਤਸ੍ਸ ਨਾਮ ਬ੍ਰਾਹ੍ਮਣਸ੍ਸ ਵਿਪੁਲਗੁਣਵਤਿਯਾ ਧਨਵਤਿਯਾ ਨਾਮ ਬ੍ਰਾਹ੍ਮਣਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਇਸਿਪਤਨੇ ਮਿਗਦਾਯੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਗੋਤ੍ਤਵਸੇਨ ਪਨਸ੍ਸ ‘‘ਕਸ੍ਸਪਕੁਮਾਰੋ’’ਤਿ ਨਾਮਮਕਂਸੁ. ਸੋ ਦ੍ਵੇ ਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਹਂਸਵਾ ਯਸਵਾ ਸਿਰਿਨਨ੍ਦੋਤਿ ਤਸ੍ਸ ਤਯੋ ਪਾਸਾਦਾ ਅਹੇਸੁਂ. ਸੁਨਨ੍ਦਾ ਨਾਮ ਬ੍ਰਾਹ੍ਮਣਿਪ੍ਪਮੁਖਾਨਿ ਅਟ੍ਠਚਤ੍ਤਾਲੀਸ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸੁਨਨ੍ਦਾਯ ਬ੍ਰਾਹ੍ਮਣਿਯਾ ਵਿਜਿਤਸੇਨੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਉਪ੍ਪਨ੍ਨਸਂਵੇਗੋ ‘‘ਮਹਾਭਿਨਿਕ੍ਖਮਨਂ ਨਿਕ੍ਖਮਿਸ੍ਸਾਮੀ’’ਤਿ ਚਿਨ੍ਤੇਸਿ. ਅਥਸ੍ਸ ਪਰਿਵਿਤਕ੍ਕਸਮਨਨ੍ਤਰਮੇਵ ਪਾਸਾਦੋ ਕੁਲਾਲਚਕ੍ਕਮਿਵ ਭਮਿਤ੍ਵਾ ਗਗਨਤਲਮਬ੍ਭੁਗ੍ਗਨ੍ਤ੍ਵਾ ਪਰਮਰੁਚਿਰਕਰਨਿਕਰੋ ਸਰਦਸਮਯਰਜਨਿਕਰੋ ਵਿਯ ਤਾਰਾਗਣਪਰਿਵੁਤੋ ਅਨੇਕਨਰਸਤਪਰਿਵੁਤੋ ਗਗਨਤਲਮਲਙ੍ਕਰੋਨ੍ਤੋ ਵਿਯ ਪੁਞ੍ਞਾਨੁਭਾਵਂ ਪਕਾਸੇਨ੍ਤੋ ਵਿਯ ਜਨਨਯਨਹਦਯਾਨਿ ਆਕਡ੍ਢੇਨ੍ਤੋ ਵਿਯ ਰੁਕ੍ਖਗ੍ਗਾਨਿ ਪਰਂ ਸੋਭਯਮਾਨੋ ਵਿਯ ਚ ਗਨ੍ਤ੍ਵਾ ਨਿਗ੍ਰੋਧਬੋਧਿਂ ਮਜ੍ਝੇਕਤ੍ਵਾ ਭੂਮਿਯਂ ਪਤਿਟ੍ਠਹਿ. ਅਥ ਬੋਧਿਸਤ੍ਤੋ ਮਹਾਸਤ੍ਤੋ ਪਥਵਿਯਂ ਪਤਿਟ੍ਠਹਿਤ੍ਵਾ ਦੇਵਦਤ੍ਤਂ ਅਰਹਤ੍ਤਦ੍ਧਜਮਾਦਾਯ ਪਬ੍ਬਜਿ. ਤਸ੍ਸ ਨਾਟਕਿਤ੍ਥਿਯੋ ਪਾਸਾਦਾ ਓਤਰਿਤ੍ਵਾ ਅਡ੍ਢਗਾਵੁਤਂ ਮਗ੍ਗਂ ਗਨ੍ਤ੍ਵਾ ਸਪਰਿਵਾਰਾ ਸੇਨਾਸਨ੍ਨਿਵੇਸਂ ਕਤ੍ਵਾ ਨਿਸੀਦਿਂਸੁ. ਤਤੋ ਇਤ੍ਥਿਪਰਿਚਾਰਿਕੇ ਠਪੇਤ੍ਵਾ ਸਹਾਗਤਾ ਸਬ੍ਬੇ ਪਬ੍ਬਜਿਂਸੁ.

ਮਹਾਪੁਰਿਸੋ ਕਿਰ ਸਤ੍ਤਾਹਂ ਤੇਹਿ ਪਰਿਵੁਤੋ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਸੁਨਨ੍ਦਾਯ ਨਾਮ ਬ੍ਰਾਹ੍ਮਣਿਯਾ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਖਦਿਰਵਨੇ ਦਿਵਾਵਿਹਾਰਂ ਕਤ੍ਵਾ ਸਾਯਨ੍ਹਸਮਯੇ ਸੋਮੇਨ ਨਾਮ ਯਵਪਾਲਕੇਨ ਉਪਨੀਤਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਨਿਗ੍ਰੋਧਬੋਧਿਂ ਉਪਗਨ੍ਤ੍ਵਾ ਪਞ੍ਚਦਸਹਤ੍ਥਾਯਾਮਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਤਤ੍ਥ ਨਿਸੀਦਿਤ੍ਵਾ ਅਭਿਸਮ੍ਬੋਧਿਂ ਪਾਪੁਣਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਅਤ੍ਤਨਾ ਸਹ ਪਬ੍ਬਜਿਤਾਨਂ ਭਿਕ੍ਖੂਨਂ ਕੋਟਿਯਾ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਗਗਨਤਲੇਨ ਗਨ੍ਤ੍ਵਾ ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਓਤਰਿਤ੍ਵਾ ਤੇਹਿ ਪਰਿਵੁਤੋ ਤਤ੍ਥ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਵੀਸਤਿਯਾ ਕੋਟਿਸਹਸ੍ਸਾਨਂ ਪਠਮੋ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਕੋਣਾਗਮਨਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਧਮ੍ਮਰਾਜਾ ਪਭਙ੍ਕਰੋ.

੨. ‘‘ਸਞ੍ਛਡ੍ਡਿਤਂ ਕੁਲਮੂਲਂ, ਬਹ੍ਵਨ੍ਨਪਾਨਭੋਜਨਂ;

ਦਤ੍ਵਾਨ ਯਾਚਕੇ ਦਾਨਂ, ਪੂਰਯਿਤ੍ਵਾਨ ਮਾਨਸਂ;

ਉਸਭੋਵ ਆਲ਼ਕਂ ਭੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੩. ‘‘ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਕਸ੍ਸਪੇ ਲੋਕਨਾਯਕੇ;

ਵੀਸਕੋਟਿਸਹਸ੍ਸਾਨਂ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਸਞ੍ਛਡ੍ਡਿਤਨ੍ਤਿ ਛਡ੍ਡਿਤਂ ਉਜ੍ਝਿਤਂ ਪਰਿਚ੍ਚਤ੍ਤਂ. ਕੁਲਮੂਲਨ੍ਤਿ ਕੁਲਘਰਂ, ਅਪਰਿਮਿਤਭੋਗਕ੍ਖਨ੍ਧਂ ਅਨੇਕਕੋਟਿਸਹਸ੍ਸਧਨਸਞ੍ਚਯਂ ਦਸਸਤਨਯਨਭਵਨਸਦਿਸਭੋਗਂ ਅਤਿਦੁਚ੍ਚਜਂ ਤਿਣਮਿਵ ਛਡ੍ਡਿਤਨ੍ਤਿ ਅਤ੍ਥੋ. ਯਾਚਕੇਤਿ ਯਾਚਕਾਨਂ ਦਤ੍ਵਾ. ਆਲ਼ਕਨ੍ਤਿ ਗੋਟ੍ਠਂ, ਯਥਾ ਉਸਭੋ ਗੋਟ੍ਠਂ ਭਿਨ੍ਦਿਤ੍ਵਾ ਯਥਾਸੁਖਂ ਇਚ੍ਛਿਤਟ੍ਠਾਨਂ ਪਾਪੁਣਾਤਿ, ਏਵਂ ਮਹਾਪੁਰਿਸੋਪਿ ਗੇਹਬਨ੍ਧਨਂ ਭਿਨ੍ਦਿਤ੍ਵਾ ਅਭਿਸਮ੍ਬੋਧਿਂ ਪਾਪੁਣੀਤਿ ਅਤ੍ਥੋ.

ਪੁਨ ਚਤੁਮਾਸਂ ਜਨਪਦਚਾਰਿਕਂ ਚਰਮਾਨੇ ਸਤ੍ਥਰਿ ਦਸਕੋਟਿਸਹਸ੍ਸਾਨਂ ਦੁਤਿਯੋ ਅਭਿਸਮਯੋ ਅਹੋਸਿ. ਯਦਾ ਪਨ ਸੁਨ੍ਦਰਨਗਰਦ੍ਵਾਰੇ ਅਸਨਰੁਕ੍ਖਮੂਲੇ ਯਮਕਪਾਟਿਹਾਰਿਯਂ ਕਰੋਨ੍ਤੋ ਧਮ੍ਮਂ ਦੇਸੇਸਿ, ਤਦਾ ਪਞ੍ਚਨ੍ਨਂ ਕੋਟਿਸਹਸ੍ਸਾਨਂ ਤਤਿਯੋ ਅਭਿਸਮਯੋ ਅਹੋਸਿ. ਪੁਨ ਯਮਕਪਾਟਿਹਾਰਿਯਂ ਕਤ੍ਵਾ ਸੁਰਰਿਪੁਦੁਰਭਿਭਵਨੇ ਤਾਵਤਿਂਸਭਵਨੇ ਸੁਧਮ੍ਮਾ ਨਾਮ ਦੇਵਸਭਾ ਅਤ੍ਥਿ, ਤਤ੍ਥ ਨਿਸੀਦਿਤ੍ਵਾ ਅਤ੍ਤਨੋ ਮਾਤਰਂ ਧਨਵਤੀਦੇਵਿਂ ਪਮੁਖਂ ਕਤ੍ਵਾ ਦਸਸਹਸ੍ਸਿਲੋਕਧਾਤੁਯਾ ਦੇਵਤਾਨਂ ਅਨੁਗ੍ਗਹਕਰਣਤ੍ਥਂ ਸਤ੍ਤਪ੍ਪਕਰਣਂ ਅਭਿਧਮ੍ਮਪਿਟਕਂ ਦੇਸੇਨ੍ਤੋ ਤੀਣਿ ਦੇਵਤਾਕੋਟਿਸਹਸ੍ਸਾਨਿ ਧਮ੍ਮਾਮਤਂ ਪਾਯੇਸਿ. ਤੇਨ ਵੁਤ੍ਤਂ –

੪. ‘‘ਚਤੁਮਾਸਂ ਯਦਾ ਬੁਦ੍ਧੋ, ਲੋਕੇ ਚਰਤਿ ਚਾਰਿਕਂ;

ਦਸਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੫. ‘‘ਯਮਕਂ ਵਿਕੁਬ੍ਬਨਂ ਕਤ੍ਵਾ, ਞਾਣਧਾਤੁਂ ਪਕਿਤ੍ਤਯਿ;

ਪਞ੍ਚਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੁ.

੬. ‘‘ਸੁਧਮ੍ਮਾ ਦੇਵਪੁਰੇ ਰਮ੍ਮੇ, ਤਤ੍ਥ ਧਮ੍ਮਂ ਪਕਿਤ੍ਤਯਿ;

ਤੀਣਿਕੋਟਿਸਹਸ੍ਸਾਨਂ, ਦੇਵਾਨਂ ਬੋਧਯੀ ਜਿਨੋ.

੭. ‘‘ਨਰਦੇਵਸ੍ਸ ਯਕ੍ਖਸ੍ਸ, ਅਪਰੇ ਧਮ੍ਮਦੇਸਨੇ;

ਏਤੇਸਾਨਂ ਅਭਿਸਮਯਾ, ਗਣਨਾਤੋ ਅਸਙ੍ਖਿਯਾ’’ਤਿ.

ਤਤ੍ਥ ਚਤੁਮਾਸਨ੍ਤਿ ਚਾਤੁਮਾਸੇ. ਅਯਮੇਵ ਵਾ ਪਾਠੋ. ਚਰਤੀਤਿ ਅਚਰਿ. ਯਮਕਂ ਵਿਕੁਬ੍ਬਨਂ ਕਤ੍ਵਾਤਿ ਯਮਕਪਾਟਿਹਾਰਿਯਂ ਕਤ੍ਵਾ. ਞਾਣਧਾਤੁਨ੍ਤਿ ਸਬ੍ਬਞ੍ਞੁਤਞ੍ਞਾਣਸਭਾਵਂ. ‘‘ਸਬ੍ਬਞਾਣਧਾਤੁ’’ਨ੍ਤਿਪਿ ਵਦਨ੍ਤਿ. ਪਕਿਤ੍ਤਯੀਤਿ ਮਹਾਜਨਸ੍ਸ ਪਕਾਸੇਸਿ. ਸੁਧਮ੍ਮਾਤਿ ਤਾਵਤਿਂਸਭਵਨੇ ਸੁਧਮ੍ਮਾ ਨਾਮ ਸਭਾ ਅਤ੍ਥਿ, ਤਤ੍ਥ ਨਿਸੀਦਿਤ੍ਵਾਤਿ ਅਤ੍ਥੋ. ਧਮ੍ਮਨ੍ਤਿ ਅਭਿਧਮ੍ਮਂ.

ਤਦਾ ਕਿਰ ਆਨੁਭਾਵਵਿਜਿਤਨਰਦੇਵੋ ਨਰਦੇਵੋ ਨਾਮ ਮਹੇਸਕ੍ਖੋ ਹੇਟ੍ਠਾ ਵੁਤ੍ਤਨਰਦੇਵਯਕ੍ਖੋ ਵਿਯ ਮਹਿਦ੍ਧਿਕੋ ਯਕ੍ਖੋ ਅਹੋਸਿ. ਸੋ ਜਮ੍ਬੁਦੀਪੇ ਏਕਸ੍ਮਿਂ ਨਗਰੇ ਰਞ੍ਞੋ ਯਾਦਿਸਂ ਰੂਪਂ, ਤਾਦਿਸਂ ਰੂਪਸਣ੍ਠਾਨਂ ਸਰਕੁਤ੍ਤਿਂ ਨਿਮ੍ਮਿਨਿਤ੍ਵਾ ਤਂ ਰਾਜਾਨਂ ਮਾਰੇਤ੍ਵਾ ਖਾਦਿਤ੍ਵਾ ਸਹਅਨ੍ਤੇਪੁਰਂ ਰਜ੍ਜਂ ਪਟਿਪਜ੍ਜਿਤ੍ਵਾ ਅਪਰਿਮਿਤਮਂਸਭੋਜਨੋ ਅਹੋਸਿ. ਸੋ ਕਿਰ ਇਤ੍ਥਿਧੁਤ੍ਤੋ ਚ ਅਹੋਸਿ. ਯਦਾ ਪਨ ਤਂ ਕੁਸਲਾ ਛੇਕਾ ਇਤ੍ਥਿਯੋ – ‘‘ਨਾਯਂ ਅਮ੍ਹਾਕਂ ਰਾਜਾ, ਅਮਨੁਸ੍ਸੋ ਏਸੋ’’ਤਿ ਜਾਨਨ੍ਤਿ, ਤਦਾ ਸੋ ਲਜ੍ਜਿਤੋ ਹੁਤ੍ਵਾ ਤਾ ਸਬ੍ਬਾ ਖਾਦਿਤ੍ਵਾ ਅਞ੍ਞਂ ਨਗਰਂ ਪਟਿਪਜ੍ਜਤਿ. ਏਵਮੇਵ ਸੋ ਨਰਦੇਵਯਕ੍ਖੋ ਮਨੁਸ੍ਸੇ ਭਕ੍ਖਯਨ੍ਤੋ ਯਦਾ ਸੁਨ੍ਦਰਨਗਰਾਭਿਮੁਖੋ ਅਗਮਾਸਿ, ਤਦਾ ਤਂ ਦਿਸ੍ਵਾ ਨਗਰਵਾਸਿਨੋ ਮਨੁਸ੍ਸਾ ਮਰਣਭਯਤਜ੍ਜਿਤਸਨ੍ਤਾਸਾ ਸਕਨਗਰਤੋ ਨਿਕ੍ਖਮਿਤ੍ਵਾ ਤਤੋ ਤਤੋ ਪਲਾਯਿਂਸੁ. ਅਥ ਤੇ ਮਨੁਸ੍ਸੇ ਪਲਾਯਮਾਨੇ ਦਿਸ੍ਵਾ ਕਸ੍ਸਪਦਸਬਲੋ ਤਸ੍ਸ ਨਰਦੇਵਸ੍ਸ ਯਕ੍ਖਸ੍ਸ ਪੁਰਤੋ ਅਟ੍ਠਾਸਿ. ਨਰਦੇਵੋ ਏਵਂ ਦੇਵਦੇਵਂ ਠਿਤਂ ਦਿਸ੍ਵਾ ਵਿਸ੍ਸਰਂ ਘੋਰਂ ਨਾਦਂ ਨਦਿਤ੍ਵਾ ਭਗਵਤੋ ਭਯਂ ਉਪ੍ਪਾਦੇਤੁਂ ਅਸਕ੍ਕੋਨ੍ਤੋ ਤਂ ਸਰਣਂ ਗਨ੍ਤ੍ਵਾ ਪਞ੍ਹਂ ਪੁਚ੍ਛਿ. ਪਞ੍ਹਂ ਵਿਸ੍ਸਜ੍ਜੇਤ੍ਵਾ ਤਂ ਦਮੇਤ੍ਵਾ ਧਮ੍ਮੇ ਦੇਸਿਯਮਾਨੇ ਸਮ੍ਪਤ੍ਤਾਨਂ ਨਰਮਰਾਨਂ ਗਣਨਪਥਾਤੀਤਾਨਂ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ – ‘‘ਨਰਦੇਵਸ੍ਸ ਯਕ੍ਖਸ੍ਸਾ’’ਤਿਆਦਿ. ਤਤ੍ਥ ਅਪਰੇ ਧਮ੍ਮਦੇਸਨੇਤਿ ਅਪਰਸ੍ਮਿਂ ਧਮ੍ਮਦੇਸਨੇ. ਏਤੇਸਾਨਨ੍ਤਿ ਏਤੇਸਂ. ਅਯਮੇਵ ਵਾ ਪਾਠੋ.

ਤਸ੍ਸ ਪਨ ਕਸ੍ਸਪਭਗਵਤੋ ਏਕੋਵ ਸਾਵਕਸਨ੍ਨਿਪਾਤੋ ਅਹੋਸਿ. ਬਾਰਾਣਸੀਨਗਰੇ ਪੁਰੋਹਿਤਪੁਤ੍ਤੋ ਤਿਸ੍ਸੋ ਨਾਮ ਅਹੋਸਿ. ਸੋ ਕਸ੍ਸਪਸ੍ਸ ਬੋਧਿਸਤ੍ਤਸ੍ਸ ਸਰੀਰੇ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ ਪਿਤੁਨੋ ਭਾਸਤੋ ਸੁਤ੍ਵਾ – ‘‘ਨਿਸ੍ਸਂਸਯਂ ਏਸੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਬੁਦ੍ਧੋ ਭਵਿਸ੍ਸਤਿ, ਏਤਸ੍ਸਾਹਂ ਸਨ੍ਤਿਕੇ ਪਬ੍ਬਜਿਤ੍ਵਾ ਸਂਸਾਰਦੁਕ੍ਖਤੋ ਮੁਚ੍ਚਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਸੁਦ੍ਧਮੁਨਿਗਣਵਨ੍ਤਂ ਹਿਮਵਨ੍ਤਂ ਗਨ੍ਤ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿ. ਤਸ੍ਸ ਪਰਿਵਾਰਭੂਤਾਨਿ ਵੀਸਤਿਤਾਪਸਸਹਸ੍ਸਾਨਿ ਅਹੇਸੁਂ. ਸੋ ਅਪਰਭਾਗੇ ‘‘ਕਸ੍ਸਪਕੁਮਾਰੋ ਨਿਕ੍ਖਮਿਤ੍ਵਾ ਅਭਿਸਮ੍ਬੋਧਿਂ ਅਨੁਪ੍ਪਤ੍ਤੋ’’ਤਿ ਸੁਤ੍ਵਾ ਸਪਰਿਵਾਰੋ ਆਗਨ੍ਤ੍ਵਾ ਕਸ੍ਸਪਸ੍ਸ ਭਗਵਤੋ ਸਨ੍ਤਿਕੇ ਸਪਰਿਵਾਰੋ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ. ਤਸ੍ਮਿਂ ਸਮਾਗਮੇ ਕਸ੍ਸਪੋ ਭਗਵਾ ਮਾਘਪੁਣ੍ਣਮਾਯਂ ਪਾਤਿਮੋਕ੍ਖਂ ਉਦ੍ਦਿਸਿ. ਤੇਨ ਵੁਤ੍ਤਂ –

੮. ‘‘ਤਸ੍ਸਾਪਿ ਦੇਵਦੇਵਸ੍ਸ, ਏਕੋ ਆਸਿ ਸਮਾਗਮੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੯. ‘‘ਵੀਸਭਿਕ੍ਖੁਸਹਸ੍ਸਾਨਂ, ਤਦਾ ਆਸਿ ਸਮਾਗਮੋ;

ਅਤਿਕ੍ਕਨ੍ਤਭਵਨ੍ਤਾਨਂ, ਹਿਰਿਸੀਲੇਨ ਤਾਦਿਨ’’ਨ੍ਤਿ.

ਤਤ੍ਥ ਅਤਿਕ੍ਕਨ੍ਤਭਵਨ੍ਤਾਨਨ੍ਤਿ ਅਤਿਕ੍ਕਨ੍ਤਪੁਥੁਜ੍ਜਨਸੋਤਾਪਨ੍ਨਾਦੀਨਂ, ਸਬ੍ਬੇਸਂ ਖੀਣਾਸਵਾਨਮੇਵਾਤਿ ਅਤ੍ਥੋ. ਹਿਰਿਸੀਲੇਨ ਤਾਦਿਨਨ੍ਤਿ ਹਿਰਿਯਾ ਚ ਸੀਲੇਨ ਚ ਸਦਿਸਾਨਂ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਜੋਤਿਪਾਲੋ ਨਾਮ ਮਾਣਵੋ ਤਿਣ੍ਣਂ ਵੇਦਾਨਂ ਪਾਰਗੂ ਭੂਮਿਯਞ੍ਚੇਵ ਅਨ੍ਤਲਿਕ੍ਖੇ ਚ ਪਾਕਟੋ ਘਟਿਕਾਰਸ੍ਸ ਕੁਮ੍ਭਕਾਰਸ੍ਸ ਸਹਾਯੋ ਅਹੋਸਿ. ਸੋ ਤੇਨ ਸਦ੍ਧਿਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਤਸ੍ਸ ਧਮ੍ਮਕਥਂ ਸੁਤ੍ਵਾ ਤਸ੍ਸ ਸਨ੍ਤਿਕੇ ਪਬ੍ਬਜਿ. ਸੋ ਆਰਦ੍ਧਵੀਰਿਯੋ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਵਤ੍ਤਪਟਿਪਤ੍ਤਿਯਾ ਬੁਦ੍ਧਸਾਸਨਂ ਸੋਭੇਸਿ. ਸੋਪਿ ਤਂ ਸਤ੍ਥਾ ਬ੍ਯਾਕਾਸਿ. ਤੇਨ ਵੁਤ੍ਤਂ –

੧੦. ‘‘ਅਹਂ ਤਦਾ ਮਾਣਵਕੋ, ਜੋਤਿਪਾਲੋਤਿ ਵਿਸ੍ਸੁਤੋ;

ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ.

੧੧. ‘‘ਲਕ੍ਖਣੇ ਇਤਿਹਾਸੇ ਚ, ਸਧਮ੍ਮੇ ਪਾਰਮਿਂ ਗਤੋ;

ਭੂਮਨ੍ਤਲਿਕ੍ਖਕੁਸਲੋ, ਕਤਵਿਜ੍ਜੋ ਅਨਵਯੋ.

੧੨. ‘‘ਕਸ੍ਸਪਸ੍ਸ ਭਗਵਤੋ, ਘਟਿਕਾਰੋ ਨਾਮੁਪਟ੍ਠਕੋ;

ਸਗਾਰਵੋ ਸਪ੍ਪਤਿਸ੍ਸੋ, ਨਿਬ੍ਬੁਤੋ ਤਤਿਯੇ ਫਲੇ.

੧੩. ‘‘ਆਦਾਯ ਮਂ ਘਟੀਕਾਰੋ, ਉਪਗਞ੍ਛਿ ਕਸ੍ਸਪਂ ਜਿਨਂ;

ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.

੧੪. ‘‘ਆਰਦ੍ਧਵੀਰਿਯੋ ਹੁਤ੍ਵਾ, ਵਤ੍ਤਾਵਤ੍ਤੇਸੁ ਕੋਵਿਦੋ;

ਨ ਕ੍ਵਚਿ ਪਰਿਹਾਯਾਮਿ, ਪੂਰੇਸਿਂ ਜਿਨਸਾਸਨਂ.

੧੫. ‘‘ਯਾਵਤਾ ਬੁਦ੍ਧਭਣਿਤਂ, ਨਵਙ੍ਗਂ ਜਿਨਸਾਸਨਂ;

ਸਬ੍ਬਂ ਪਰਿਯਾਪੁਣਿਤ੍ਵਾਨ, ਸੋਭਯਿਂ ਜਿਨਸਾਸਨਂ.

੧੬. ‘‘ਮਮ ਅਚ੍ਛਰਿਯਂ ਦਿਸ੍ਵਾ, ਸੋਪਿ ਬੁਦ੍ਧੋ ਵਿਯਾਕਰਿ;

ਇਮਮ੍ਹਿ ਭਦ੍ਦਕੇ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੭. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੩੦. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.

੩੧. ‘‘ਏਵਮਹਂ ਸਂਸਰਿਤ੍ਵਾ, ਪਰਿਵਜ੍ਜੇਨ੍ਤੋ ਅਨਾਚਰਂ;

ਦੁਕ੍ਕਰਞ੍ਚ ਕਤਂ ਮਯ੍ਹਂ, ਬੋਧਿਯਾਯੇਵ ਕਾਰਣਾ’’ਤਿ.

ਤਤ੍ਥ ਭੂਮਨ੍ਤਲਿਕ੍ਖਕੁਸਲੋਤਿ ਭੂਮਿਸਿਕ੍ਖਾਸੁ ਚ ਅਨ੍ਤਲਿਕ੍ਖੇਸੁ ਚ ਜੋਤਿਚਕ੍ਕਾਚਾਰੇ ਜੋਤਿਵਿਜ੍ਜਾਯ ਚ ਕੁਸਲੋਤਿ ਅਤ੍ਥੋ. ਉਪਟ੍ਠਕੋਤਿ ਉਪਟ੍ਠਾਯਕੋ. ਸਪ੍ਪਤਿਸ੍ਸੋਤਿ ਸਪ੍ਪਤਿਸ੍ਸਯੋ. ਨਿਬ੍ਬੁਤੋਤਿ ਵਿਨੀਤੋ, ਵਿਸ੍ਸੁਤੋ ਵਾ. ਤਤਿਯੇ ਫਲੇਤਿ ਨਿਮਿਤ੍ਤਸਤ੍ਤਮੀ, ਤਤਿਯਫਲਾਧਿਗਮਹੇਤੁ ਨਿਬ੍ਬੁਤੋਤਿ ਅਤ੍ਥੋ. ਆਦਾਯਾਤਿ ਮਂ ਗਹੇਤ੍ਵਾ. ਵਤ੍ਤਾਵਤ੍ਤੇਸੂਤਿ ਖੁਦ੍ਦਕਵਤ੍ਤਮਹਾਵਤ੍ਤੇਸੁ. ਕੋਵਿਦੋਤਿ ਤੇਸਂ ਪੂਰਣੇ ਕੁਸਲੋ. ਨ ਕ੍ਵਚਿ ਪਰਿਹਾਯਾਮੀਤਿ ਕ੍ਵਚਿਪਿ ਸੀਲੇਸੁ ਵਾ ਸਮਾਧਿਸਮਾਪਤ੍ਤਿਆਦੀਸੁ ਵਾ ਕਤ੍ਥਚਿ ਕੁਤੋਪਿ ਨ ਪਰਿਹਾਯਾਮਿ, ਸਬ੍ਬਤ੍ਥ ਮੇ ਪਰਿਹਾਨਿ ਨਾਮ ਨ ਵਿਜ੍ਜਤੀਤਿ ਦੀਪੇਤਿ. ‘‘ਨ ਕੋਚਿ ਪਰਿਹਾਯਾਮੀ’’ਤਿਪਿ ਪਾਠੋ, ਸੋਯੇਵਤ੍ਥੋ.

ਯਾਵਤਾਤਿ ਪਰਿਚ੍ਛੇਦਵਚਨਮੇਤਂ, ਯਾਵਤਕਨ੍ਤਿ ਅਤ੍ਥੋ. ਬੁਦ੍ਧਭਣਿਤਨ੍ਤਿ ਬੁਦ੍ਧਵਚਨਂ. ਸੋਭਯਿਨ੍ਤਿ ਸੋਭੇਸਿਂ ਪਕਾਸੇਸਿਂ. ਮਮ ਅਚ੍ਛਰਿਯਨ੍ਤਿ ਮਮ ਸਮ੍ਮਾਪਟਿਪਤ੍ਤਿਂ ਅਞ੍ਞੇਹਿ ਅਸਾਧਾਰਣਂ ਅਚ੍ਛਰਿਯਂ ਅਬ੍ਭੁਤਂ ਕਸ੍ਸਪੋ ਭਗਵਾ ਦਿਸ੍ਵਾਤਿ ਅਤ੍ਥੋ. ਸਂਸਰਿਤ੍ਵਾਤਿ ਸਂਸਾਰੇ ਸਂਸਰਿਤ੍ਵਾ. ਅਨਾਚਰਨ੍ਤਿ ਅਨਾਚਾਰਂ ਅਕਤ੍ਤਬ੍ਬਂ, ਅਕਰਣੀਯਨ੍ਤਿ ਅਤ੍ਥੋ.

ਤਸ੍ਸ ਪਨ ਕਸ੍ਸਪਸ੍ਸ ਭਗਵਤੋ ਜਾਤਨਗਰਂ ਬਾਰਾਣਸੀ ਨਾਮ ਅਹੋਸਿ, ਬ੍ਰਹ੍ਮਦਤ੍ਤੋ ਨਾਮ ਬ੍ਰਾਹ੍ਮਣੋ ਪਿਤਾ, ਪਰਮਗੁਣਵਤੀ ਧਨਵਤੀ ਨਾਮ ਬ੍ਰਾਹ੍ਮਣੀ ਮਾਤਾ, ਤਿਸ੍ਸੋ ਚ ਭਾਰਦ੍ਵਾਜੋ ਚ ਦ੍ਵੇ ਅਗ੍ਗਸਾਵਕਾ, ਸਬ੍ਬਮਿਤ੍ਤੋ ਨਾਮੁਪਟ੍ਠਾਕੋ, ਅਨੁਲ਼ਾ ਚ ਉਰੁਵੇਲ਼ਾ ਚ ਦ੍ਵੇ ਅਗ੍ਗਸਾਵਿਕਾ, ਨਿਗ੍ਰੋਧਰੁਕ੍ਖੋ ਬੋਧਿ, ਸਰੀਰਂ ਵੀਸਤਿਹਤ੍ਥੁਬ੍ਬੇਧਂ ਅਹੋਸਿ, ਵੀਸਤਿਵਸ੍ਸਸਹਸ੍ਸਾਨਿ ਆਯੁ, ਸੁਨਨ੍ਦਾ ਨਾਮਸ੍ਸ ਅਗ੍ਗਮਹੇਸੀ, ਵਿਜਿਤਸੇਨੋ ਨਾਮ ਪੁਤ੍ਤੋ, ਪਾਸਾਦਯਾਨੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੩੨. ‘‘ਨਗਰਂ ਬਾਰਾਣਸੀ ਨਾਮ, ਕਿਕੀ ਨਾਮਾਸਿ ਖਤ੍ਤਿਯੋ;

ਵਸਤੇ ਤਤ੍ਥ ਨਗਰੇ, ਸਮ੍ਬੁਦ੍ਧਸ੍ਸ ਮਹਾਕੁਲਂ.

੩੩. ‘‘ਬ੍ਰਾਹ੍ਮਣੋ ਬ੍ਰਹ੍ਮਦਤ੍ਤੋਵ, ਆਸਿ ਬੁਦ੍ਧਸ੍ਸ ਸੋ ਪਿਤਾ;

ਧਨਵਤੀ ਨਾਮ ਜਨਿਕਾ, ਕਸ੍ਸਪਸ੍ਸ ਮਹੇਸਿਨੋ.

੩੮. ‘‘ਤਿਸ੍ਸੋ ਚ ਭਾਰਦ੍ਵਾਜੋ ਚ, ਅਹੇਸੁਂ ਅਗ੍ਗਸਾਵਕਾ;

ਸਬ੍ਬਮਿਤ੍ਤੋ ਨਾਮੁਪਟ੍ਠਾਕੋ, ਕਸ੍ਸਪਸ੍ਸ ਮਹੇਸਿਨੋ.

੩੯. ‘‘ਅਨੁਲ਼ਾ ਉਰੁਵੇਲ਼ਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਨਿਗ੍ਰੋਧੋਤਿ ਪਵੁਚ੍ਚਤਿ.

੪੧. ‘‘ਉਚ੍ਚਤ੍ਤਨੇਨ ਸੋ ਬੁਦ੍ਧੋ, ਵੀਸਤਿਰਤਨੁਗ੍ਗਤੋ;

ਵਿਜ੍ਜੁਲਟ੍ਠੀਵ ਆਕਾਸੇ, ਚਨ੍ਦੋਵ ਗਹਪੂਰਿਤੋ.

੪੨. ‘‘ਵੀਸਤਿਵਸ੍ਸਸਹਸ੍ਸਾਨਿ, ਆਯੁ ਤਸ੍ਸ ਮਹੇਸਿਨੋ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੪੩. ‘‘ਧਮ੍ਮਤਲ਼ਾਕਂ ਮਾਪਯਿਤ੍ਵਾ, ਸੀਲਂ ਦਤ੍ਵਾ ਵਿਲੇਪਨਂ;

ਧਮ੍ਮਦੁਸ੍ਸਂ ਨਿਵਾਸੇਤ੍ਵਾ, ਧਮ੍ਮਮਾਲਂ ਵਿਭਜ੍ਜਿਯ.

੪੪. ‘‘ਧਮ੍ਮਵਿਮਲਮਾਦਾਸਂ, ਠਪਯਿਤ੍ਵਾ ਮਹਾਜਨੇ;

ਕੇਚਿ ਨਿਬ੍ਬਾਨਂ ਪਤ੍ਥੇਨ੍ਤਾ, ਪਸ੍ਸਨ੍ਤੁ ਮੇ ਅਲਙ੍ਕਰਂ.

੪੫. ‘‘ਸੀਲਕਞ੍ਚੁਕਂ ਦਤ੍ਵਾਨ, ਝਾਨਕਵਚਵਮ੍ਮਿਤਂ;

ਧਮ੍ਮਚਮ੍ਮਂ ਪਾਰੁਪਿਤ੍ਵਾ, ਦਤ੍ਵਾ ਸਨ੍ਨਾਹਮੁਤ੍ਤਮਂ.

੪੬. ‘‘ਸਤਿਫਲਕਂ ਦਤ੍ਵਾਨ, ਤਿਖਿਣਂ ਞਾਣਕੁਨ੍ਤਿਮਂ;

ਧਮ੍ਮਖਗ੍ਗਵਰਂ ਦਤ੍ਵਾ, ਸੀਲਸਂਸਗ੍ਗਮਦ੍ਦਨਂ.

੪੭. ‘‘ਤੇਵਿਜ੍ਜਾਭੂਸਨਂ ਦਤ੍ਵਾਨ, ਆਵੇਲ਼ਂ ਚਤੁਰੋ ਫਲੇ;

ਛਲ਼ਭਿਞ੍ਞਾਭਰਣਂ ਦਤ੍ਵਾ, ਧਮ੍ਮਪੁਪ੍ਫਪਿਲ਼ਨ੍ਧਨਂ.

੪੮. ‘‘ਸਦ੍ਧਮ੍ਮਪਣ੍ਡਰਚ੍ਛਤ੍ਤਂ, ਦਤ੍ਵਾ ਪਾਪਨਿਵਾਰਣਂ;

ਮਾਪਯਿਤ੍ਵਾਭਯਂ ਪੁਪ੍ਫਂ, ਨਿਬ੍ਬੁਤੋ ਸੋ ਸਸਾਵਕੋ.

੪੯. ‘‘ਏਸੋ ਹਿ ਸਮ੍ਮਾਸਮ੍ਬੁਦ੍ਧੋ, ਅਪ੍ਪਮੇਯ੍ਯੋ ਦੁਰਾਸਦੋ;

ਏਸੋ ਹਿ ਧਮ੍ਮਰਤਨੋ, ਸ੍ਵਾਕ੍ਖਾਤੋ ਏਹਿਪਸ੍ਸਿਕੋ.

੫੦. ‘‘ਏਸੋ ਹਿ ਸਙ੍ਘਰਤਨੋ, ਸੁਪ੍ਪਟਿਪਨ੍ਨੋ ਅਨੁਤ੍ਤਰੋ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਵਿਜ੍ਜੁਲਟ੍ਠੀਵਾਤਿ ਘਨਭਾਵੇਨ ਸਣ੍ਠਿਤਾ ਵਿਜ੍ਜੁਲਤਾ ਵਿਯ. ਚਨ੍ਦੋਵ ਗਹਪੂਰਿਤੋਤਿ ਪਰਿਵੇਸਗਹਪਰਿਕ੍ਖਿਤੋ ਪੁਣ੍ਣਚਨ੍ਦੋ ਵਿਯ. ਧਮ੍ਮਤਲ਼ਾਕਂ ਮਾਪਯਿਤ੍ਵਾਤਿ ਪਰਿਯਤ੍ਤਿਧਮ੍ਮਤਲ਼ਾਕਂ ਮਾਪਯਿਤ੍ਵਾ. ਸੀਲਂ ਦਤ੍ਵਾ ਵਿਲੇਪਨਨ੍ਤਿ ਚਤੁਪਾਰਿਸੁਦ੍ਧਿਸੀਲਸਙ੍ਖਾਤਂ ਚਿਤ੍ਤਸਨ੍ਤਤਿਵਿਭੂਸਨਤ੍ਥਂ ਵਿਲੇਪਨਂ ਦਤ੍ਵਾ. ਧਮ੍ਮਦੁਸ੍ਸਂ ਨਿਵਾਸੇਤ੍ਵਾਤਿ ਹਿਰੋਤ੍ਤਪ੍ਪਧਮ੍ਮਸਙ੍ਖਾਤਂ ਸਾਟਕਯੁਗਂ ਨਿਵਾਸੇਤ੍ਵਾ. ਧਮ੍ਮਮਾਲਂ ਵਿਭਜ੍ਜਿਯਾਤਿ ਸਤ੍ਤਤ੍ਤਿਂਸਬੋਧਿਪਕ੍ਖਿਯਧਮ੍ਮਕੁਸੁਮਮਾਲਂ ਵਿਭਜਿਤ੍ਵਾ. ਵਿਦਹਿਤ੍ਵਾਤਿ ਅਤ੍ਥੋ.

ਧਮ੍ਮਵਿਮਲਮਾਦਾਸਨ੍ਤਿ ਵਿਮਲਂ ਸੋਤਾਪਤ੍ਤਿਮਗ੍ਗਸਙ੍ਖਾਤਂ ਆਦਾਸਂ ਸਾਵਜ੍ਜਾਨਵਜ੍ਜਕੁਸਲਾਕੁਸਲਧਮ੍ਮਸਲ੍ਲਕ੍ਖਣਤ੍ਥਂ ਮਹਾਜਨਸ੍ਸ ਧਮ੍ਮਤਲ਼ਾਕਤੀਰੇ ਧਮ੍ਮਾਦਾਸਂ ਠਪੇਤ੍ਵਾਤਿ ਅਤ੍ਥੋ. ਮਹਾਜਨੇਤਿ ਮਹਾਜਨਸ੍ਸ. ਕੇਚੀਤਿ ਯੇ ਕੇਚਿ. ਨਿਬ੍ਬਾਨਂ ਪਤ੍ਥੇਨ੍ਤਾਤਿ ਸਬ੍ਬਾਕੁਸਲਮਲਵਿਲਯਕਰਂ ਅਮਤਮਸਙ੍ਖਤਮਨੀਤਿਕਂ ਪਰਮਸਨ੍ਤਂ ਅਚ੍ਚੁਤਿਰਸਂ ਨਿਬ੍ਬਾਨਂ ਪਤ੍ਥੇਨ੍ਤਾ ਵਿਚਰਨ੍ਤਿ. ਤੇ ਇਮਂ ਅਲਙ੍ਕਾਰਂ ਵੁਤ੍ਤਪ੍ਪਕਾਰਂ ਮਯਾ ਦਸ੍ਸਿਤਂ ਪਸ੍ਸਨ੍ਤੂਤਿ ਅਤ੍ਥੋ. ‘‘ਨਿਬ੍ਬਾਨਮਭਿਪਤ੍ਥੇਨ੍ਤਾ, ਪਸ੍ਸਨ੍ਤੁ ਮਂ ਅਲਙ੍ਕਰ’’ਨ੍ਤਿਪਿ ਪਾਠੋ, ਸੋਯੇਵਤ੍ਥੋ. ਅਲਙ੍ਕਰਨ੍ਤਿ ਰਸ੍ਸਂ ਕਤ੍ਵਾ ਵੁਤ੍ਤਂ.

ਸੀਲਕਞ੍ਚੁਕਂ ਦਤ੍ਵਾਨਾਤਿ ਪਞ੍ਚਸੀਲਦਸਸੀਲਚਤੁਪਾਰਿਸੁਦ੍ਧਿਸੀਲਮਯਂ ਕਞ੍ਚੁਕਂ ਦਤ੍ਵਾ. ਝਾਨਕਵਚਵਮ੍ਮਿਤਨ੍ਤਿ ਚਤੁਕ੍ਕਪਞ੍ਚਕਜ੍ਝਾਨਕਵਚਬਨ੍ਧਂ ਬਨ੍ਧਿਤ੍ਵਾ. ਧਮ੍ਮਚਮ੍ਮਂ ਪਾਰੁਪਿਤ੍ਵਾਤਿ ਸਤਿਸਮ੍ਪਜਞ੍ਞਸਙ੍ਖਾਤਧਮ੍ਮਚਮ੍ਮਂ ਪਾਰੁਪਿਤ੍ਵਾ. ਦਤ੍ਵਾ ਸਨ੍ਨਾਹਮੁਤ੍ਤਮਨ੍ਤਿ ਉਤ੍ਤਮਂ ਚਤੁਰਙ੍ਗਸਮਨ੍ਨਾਗਤਂ ਵੀਰਿਯਸਨ੍ਨਾਹਂ ਦਤ੍ਵਾਤਿ ਅਤ੍ਥੋ. ਸਤਿਫਲਕਂ ਦਤ੍ਵਾਨਾਤਿ ਰਾਗਾਦਿਦੋਸਾਰਿਪਾਪਨਿਵਾਰਣਤ੍ਥਂ ਚਤੁਸਤਿਪਟ੍ਠਾਨਫਲਕਨਿਵਾਰਣਂ ਦਤ੍ਵਾ. ਤਿਖਿਣਂ ਞਾਣਕੁਨ੍ਤਿਮਨ੍ਤਿ ਪਟਿਵੇਧਸਮਤ੍ਥਂ ਤਿਖਿਣਵਿਪਸ੍ਸਨਾਞਾਣਕੁਨ੍ਤਵਨ੍ਤਂ, ਵਿਪਸ੍ਸਨਾਞਾਣਨਿਸਿਤਕੁਨ੍ਤਵਰਨ੍ਤਿ ਅਤ੍ਥੋ, ਕਿਲੇਸਬਲਨਿਧਨਕਰਸਮਤ੍ਥਂ ਵਾ ਯੋਗਾਵਚਰਯੋਧਵਰਂ ਠਪੇਤ੍ਵਾਤਿ ਅਤ੍ਥੋ. ਧਮ੍ਮਖਗ੍ਗਵਰਂ ਦਤ੍ਵਾਤਿ ਤਸ੍ਸ ਯੋਗਾਵਚਰਸ੍ਸ ਵੀਰਿਯੁਪਲਤਲਨਿਸਿਤਧਾਰਂ ਮਗ੍ਗਪਞ੍ਞਾਵਰਖਗ੍ਗਂ ਦਤ੍ਵਾ. ਸੀਲਸਂਸਗ੍ਗਮਦ੍ਦਨਨ੍ਤਿ ਅਰਿਯਂ ਲੋਕੁਤ੍ਤਰਸੀਲਂ ਕਿਲੇਸਸਂਸਗ੍ਗਮਦ੍ਦਨਤ੍ਥਾਯ, ਕਿਲੇਸਨਿਘਾਤਨਤ੍ਥਾਯਾਤਿ ਅਤ੍ਥੋ.

ਤੇਵਿਜ੍ਜਾਭੂਸਨਂ ਦਤ੍ਵਾਤਿ ਤੇਵਿਜ੍ਜਾਮਯਂ ਵਿਭੂਸਨਂ ਦਤ੍ਵਾ. ਆਵੇਲ਼ਂ ਚਤੁਰੋ ਫਲੇਤਿ ਚਤ੍ਤਾਰਿ ਫਲਾਨਿ ਵਟਂਸਕਂ ਕਤ੍ਵਾ. ਛਲ਼ਭਿਞ੍ਞਾਭਰਣਨ੍ਤਿ ਆਭਰਣਤ੍ਥਾਯ ਅਲਙ੍ਕਾਰਕਰਣਤ੍ਥਾਯ ਛ ਅਭਿਞ੍ਞਾਯੋ ਦਤ੍ਵਾ. ਧਮ੍ਮਪੁਪ੍ਫਪਿਲ਼ਨ੍ਧਨਨ੍ਤਿ ਨਵਲੋਕੁਤ੍ਤਰਧਮ੍ਮਸਙ੍ਖਾਤਂ ਕੁਸੁਮਮਾਲਂ ਕਤ੍ਵਾ. ਸਦ੍ਧਮ੍ਮਪਣ੍ਡਰਚ੍ਛਤ੍ਤਂ, ਦਤ੍ਵਾ ਪਾਪਨਿਵਾਰਣਨ੍ਤਿ ਅਚ੍ਚਨ੍ਤਵਿਸੁਦ੍ਧਂ ਵਿਮੁਤ੍ਤਿਸੇਤਚ੍ਛਤ੍ਤਂ ਸਬ੍ਬਾਕੁਸਲਾਤਪਨਿਵਾਰਣਂ ਦਤ੍ਵਾ. ਮਾਪਯਿਤ੍ਵਾਭਯਂ ਪੁਪ੍ਫਨ੍ਤਿ ਅਭਯਪੁਰਗਾਮਿਨਂ ਅਟ੍ਠਙ੍ਗਿਕਮਗ੍ਗਂ ਪੁਪ੍ਫਂ ਕਤ੍ਵਾਤਿ ਅਤ੍ਥੋ.

ਕਸ੍ਸਪੋ ਕਿਰ ਭਗਵਾ ਕਾਸਿਰਟ੍ਠੇ ਸੇਤਬ੍ਯਨਗਰੇ ਸੇਤਬ੍ਯੁਯ੍ਯਾਨੇ ਪਰਿਨਿਬ੍ਬਾਯਿ. ਧਾਤੁਯੋ ਕਿਰਸ੍ਸ ਨ ਵਿਕਿਰਿਂਸੁ. ਸਕਲਜਮ੍ਬੁਦੀਪਵਾਸਿਨੋ ਮਨੁਸ੍ਸਾ ਸਨ੍ਨਿਪਤਿਤ੍ਵਾ ਏਕੇਕਂ ਸੁਵਣ੍ਣਿਟ੍ਠਕਂ ਕੋਟਿਅਗ੍ਘਨਕਂ ਰਤਨਵਿਚਿਤ੍ਤਂ ਬਹਿਚਿਨਨਤ੍ਥਂ ਏਕੇਕਂ ਅਡ੍ਢਕੋਟਿਅਗ੍ਘਨਕਂ ਅਬ੍ਭਨ੍ਤਰਪੂਰਣਤ੍ਥਂ ਮਨੋਸਿਲਾਯ ਮਤ੍ਤਿਕਾਕਿਚ੍ਚਂ ਤੇਲੇਨ ਉਦਕਕਿਚ੍ਚਂ ਕਰੋਨ੍ਤੋ ਯੋਜਨੁਬ੍ਬੇਧਂ ਥੂਪਮਕਂਸੁ.

‘‘ਕਸ੍ਸਪੋਪਿ ਭਗਵਾ ਕਤਕਿਚ੍ਚੋ, ਸਬ੍ਬਸਤ੍ਤਹਿਤਮੇਵ ਕਰੋਨ੍ਤੋ;

ਕਾਸਿਰਾਜਨਗਰੇ ਮਿਗਦਾਯੇ, ਲੋਕਨਨ੍ਦਨਕਰੋ ਨਿਵਸੀ’’ਤਿ.

ਸੇਸਗਾਥਾਸੁ ਸਬ੍ਬਤ੍ਥ ਪਾਕਟਮੇਵਾਤਿ.

ਇਤਿ ਮਧੁਰਤ੍ਥਵਿਲਾਸਿਨਿਯਾ ਬੁਦ੍ਧਵਂਸ-ਅਟ੍ਠਕਥਾਯ

ਕਸ੍ਸਪਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਏਤ੍ਤਾਵਤਾ ਚਤੁਵੀਸਤਿਯਾ ਬੁਦ੍ਧਾਨਂ ਬੁਦ੍ਧਵਂਸਵਣ੍ਣਨਾ

ਸਬ੍ਬਾਕਾਰੇਨ ਨਿਟ੍ਠਿਤਾ.