੨੪. ਕਕੁਸਨ੍ਧਬੁਦ੍ਧਵਂਸਵਣ੍ਣਨਾ

ਵੇਸ੍ਸਭੁਮ੍ਹਿ ਸਯਮ੍ਭੁਮ੍ਹਿ ਪਰਿਨਿਬ੍ਬੁਤੇ ਤਸ੍ਮਿਂ ਪਨ ਕਪ੍ਪੇ ਅਤਿਕ੍ਕਨ੍ਤੇ ਏਕੂਨਤ੍ਤਿਂਸਕਪ੍ਪੇਸੁ ਜਿਨਦਿਵਸਕਰਾ ਨੁਪ੍ਪਜ੍ਜਿਂਸੁ. ਇਮਸ੍ਮਿਂ ਪਨ ਭਦ੍ਦਕਪ੍ਪੇ ਚਤ੍ਤਾਰੋ ਬੁਦ੍ਧਾ ਨਿਬ੍ਬਤ੍ਤਿਂਸੁ. ਕਤਮੇ ਚਤ੍ਤਾਰੋ? ਕਕੁਸਨ੍ਧੋ ਕੋਣਾਗਮਨੋ ਕਸ੍ਸਪੋ ਅਮ੍ਹਾਕਂ ਬੁਦ੍ਧੋਤਿ. ਮੇਤ੍ਤੇਯ੍ਯੋ ਪਨ ਭਗਵਾ ਉਪ੍ਪਜ੍ਜਿਸ੍ਸਤਿ. ਏਵਮਯਂ ਕਪ੍ਪੋ ਪਞ੍ਚਹਿ ਬੁਦ੍ਧੁਪ੍ਪਾਦੇਹਿ ਪਟਿਮਣ੍ਡਿਤਤ੍ਤਾ ਭਦ੍ਦਕਪ੍ਪੋਤਿ ਭਗਵਤਾ ਵਣ੍ਣਿਤੋ. ਤਤ੍ਥ ਕਕੁਸਨ੍ਧੋ ਨਾਮ ਭਗਵਾ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਖੇਮਵਤੀਨਗਰੇ ਖੇਮਙ੍ਕਰਸ੍ਸ ਨਾਮ ਰਞ੍ਞੋ ਅਤ੍ਥਧਮ੍ਮਾਨੁਸਾਸਕਸ੍ਸ ਅਗ੍ਗਿਦਤ੍ਤਸ੍ਸ ਨਾਮ ਪੁਰੋਹਿਤਸ੍ਸ ਅਗ੍ਗਮਹੇਸਿਯਾ ਵਿਸਾਖਾਯ ਨਾਮ ਬ੍ਰਾਹ੍ਮਣਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਯਦਾ ਪਨ ਖਤ੍ਤਿਯਾ ਬ੍ਰਾਹ੍ਮਣੇ ਸਕ੍ਕਰੋਨ੍ਤਿ ਗਰੁਕਰੋਨ੍ਤਿ ਮਾਨੇਨ੍ਤਿ ਪੂਜੇਨ੍ਤਿ, ਤਦਾ ਬੋਧਿਸਤ੍ਤਾ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਨ੍ਤਿ.

ਯਦਾ ਪਨ ਬ੍ਰਾਹ੍ਮਣਾ ਖਤ੍ਤਿਯੇ ਸਕ੍ਕਰੋਨ੍ਤਿ ਗਰੁਕਰੋਨ੍ਤਿ ਮਾਨੇਨ੍ਤਿ ਪੂਜੇਨ੍ਤਿ, ਤਦਾ ਖਤ੍ਤਿਯਕੁਲੇ ਉਪ੍ਪਜ੍ਜਨ੍ਤਿ. ਤਦਾ ਕਿਰ ਬ੍ਰਾਹ੍ਮਣਾ ਖਤ੍ਤਿਯੇਹਿ ਸਕ੍ਕਰੀਯਨ੍ਤਿ ਗਰੁਕਰੀਯਨ੍ਤਿ, ਤਸ੍ਮਾ ਸਚ੍ਚਸਨ੍ਧੋ ਕਕੁਸਨ੍ਧੋ ਬੋਧਿਸਤ੍ਤੋ ਵਿਭਵਸਿਰਿਸਮੁਦਯੇਨਾਕੁਲੇ ਅਨਾਕੁਲੇ ਬ੍ਰਾਹ੍ਮਣਕੁਲੇ ਦਸਸਹਸ੍ਸਿਲੋਕਧਾਤੁਂ ਉਨ੍ਨਾਦੇਨ੍ਤੋ ਕਮ੍ਪਯਨ੍ਤੋ ਉਦਪਾਦਿ. ਹੇਟ੍ਠਾ ਵੁਤ੍ਤਪ੍ਪਕਾਰਾਨਿ ਪਾਟਿਹਾਰਿਯਾਨਿ ਨਿਬ੍ਬਤ੍ਤਿਂਸੁ. ਤਤੋ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਖੇਮਵਤੁਯ੍ਯਾਨੇ ਮਾਤੁਕੁਚ੍ਛਿਤੋ ਸੁਵਣ੍ਣਲਤਾਤੋ ਅਗ੍ਗਿਜਾਲੋ ਵਿਯ ਨਿਕ੍ਖਮਿ. ਸੋ ਚਤ੍ਤਾਰਿ ਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਤਸ੍ਸ ਕਿਰ ਕਾਮਕਾਮਵਣ੍ਣਕਾਮਸੁਦ੍ਧਿਨਾਮਕਾ ਤਯੋ ਪਾਸਾਦਾ ਅਹੇਸੁਂ. ਰੋਚਿਨੀਬ੍ਰਾਹ੍ਮਣੀਪਮੁਖਾਨਿ ਤਿਂਸ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਰੋਚਿਨਿਯਾ ਬ੍ਰਾਹ੍ਮਣਿਯਾ ਅਨੁਤ੍ਤਰੇ ਉਤ੍ਤਰੇ ਨਾਮ ਕੁਮਾਰੇ ਉਪ੍ਪਨ੍ਨੇ ਪਯੁਤ੍ਤੇਨ ਆਜਞ੍ਞਰਥੇਨ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਚਤ੍ਤਾਲੀਸਸਹਸ੍ਸਾਨਿ ਅਨੁਪਬ੍ਬਜਿਂਸੁ. ਸੋ ਤੇਹਿ ਪਰਿਵੁਤੋ ਅਟ੍ਠ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਸੁਚਿਰਿਨ੍ਧਨਿਗਮੇ ਵਜਿਰਿਨ੍ਧਬ੍ਰਾਹ੍ਮਣਸ੍ਸ ਧੀਤਾਯ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਖਦਿਰਵਨੇ ਦਿਵਾਵਿਹਾਰਂ ਕਤ੍ਵਾ ਸਾਯਨ੍ਹਸਮਯੇ ਸੁਭਦ੍ਦੇਨ ਨਾਮ ਯਵਪਾਲਕੇਨ ਉਪਨੀਤਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਸਿਰੀਸਬੋਧਿਂ ਪਾਟਲਿਯਾ ਵੁਤ੍ਤਪ੍ਪਮਾਣਂ ਦਿਬ੍ਬਗਨ੍ਧਂ ਉਪਵਾਯਮਾਨਂ ਉਪਗਨ੍ਤ੍ਵਾ ਚਤੁਤ੍ਤਿਂਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਸਮ੍ਬੋਧਿਂ ਪਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਅਤ੍ਤਨਾ ਸਹ ਪਬ੍ਬਜਿਤਾਨਂ ਚਤ੍ਤਾਲੀਸਾਯ ਭਿਕ੍ਖੁਸਹਸ੍ਸਾਨਂ ਸਚ੍ਚਪ੍ਪਟਿਵੇਧਸਮਤ੍ਥਤਂ ਦਿਸ੍ਵਾ ਏਕਾਹੇਨੇਵ ਮਕਿਲਨਗਰਸਮੀਪੇ ਸਮ੍ਭੂਤਂ ਇਸਿਪਤਨਂ ਨਾਮ ਮਿਗਦਾਯਂ ਪਵਿਸਿਤ੍ਵਾ ਤੇਸਂ ਮਜ੍ਝਗਤੋ ਭਗਵਾ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਚਤ੍ਤਾਲੀਸਾਯ ਕੋਟਿਸਹਸ੍ਸਾਨਂ ਪਠਮੋ ਧਮ੍ਮਾਭਿਸਮਯੋ ਅਹੋਸਿ.

ਪੁਨ ਕਣ੍ਣਕੁਜ੍ਜਨਗਰਦ੍ਵਾਰੇ ਮਹਾਸਾਲਰੁਕ੍ਖਮੂਲੇ ਯਮਕਪਾਟਿਹਾਰਿਯਂ ਕਤ੍ਵਾ ਤਿਂਸਕੋਟਿਸਹਸ੍ਸਾਨਂ ਧਮ੍ਮਚਕ੍ਖੁਂ ਉਪ੍ਪਾਦੇਸਿ, ਸੋ ਦੁਤਿਯੋ ਅਭਿਸਮਯੋ ਅਹੋਸਿ. ਯਦਾ ਪਨ ਖੇਮਵਤੀਨਗਰਸ੍ਸਾਵਿਦੂਰੇ ਅਞ੍ਞਤਰਸ੍ਮਿਂ ਦੇਵਾਯਤਨੇ ਅਭਿਮਤਨਰਦੇਵੋ ਨਰਦੇਵੋ ਨਾਮ ਯਕ੍ਖੋ ਦਿਸ੍ਸਮਾਨਮਨੁਸ੍ਸਸਰੀਰੋ ਹੁਤ੍ਵਾ ਕਨ੍ਤਾਰਮਜ੍ਝੇ ਏਕਸ੍ਸ ਕਮਲਕੁਵਲਯੁਪ੍ਪਲਸਮਲਙ੍ਕਤਸਲਿਲਸੀਤਲਸ੍ਸ ਪਰਮਮਧੁਰਸਿਸਿਰਵਾਰਿਨੋ ਸਬ੍ਬਜਨਸੁਰਭਿਰਮਸ੍ਸ ਸਰਸ੍ਸ ਸਮੀਪੇ ਠਤ੍ਵਾ ਕਮਲਕੁਵਲਯਕਲ੍ਲਹਾਰਾਦੀਹਿ ਸਤ੍ਤੇ ਉਪਲਾਪੇਤ੍ਵਾ ਮਨੁਸ੍ਸੇ ਖਾਦਤਿ. ਤਸ੍ਮਿਂ ਮਗ੍ਗੇ ਪਚ੍ਛਿਨ੍ਨੇ ਜਨਸਮ੍ਪਾਤਰਹਿਤੇ ਮਹਾਅਟਵਿਂ ਪਵਿਸਿਤ੍ਵਾ ਤਤ੍ਥ ਸਮ੍ਪਤ੍ਤੇ ਸਤ੍ਤੇ ਖਾਦਤਿ. ਸੋ ਲੋਕਵਿਸ੍ਸੁਤੋ ਮਹਾਕਨ੍ਤਾਰਮਗ੍ਗੋ ਅਹੋਸਿ. ਉਭਤੋਕਨ੍ਤਾਰਦ੍ਵਾਰੇ ਕਿਰ ਮਹਾਜਨਕਾਯੋ ਸਨ੍ਨਿਪਤਿਤ੍ਵਾ ਕਨ੍ਤਾਰਨਿਤ੍ਥਰਣਤ੍ਥਾਯ ਅਟ੍ਠਾਸਿ. ਅਥ ਵਿਗਤਭਵਬਨ੍ਧੋ ਕਕੁਸਨ੍ਧੋ ਸਤ੍ਥਾ ਏਕਦਿਵਸਂ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਞਾਣਜਾਲਸ੍ਸ ਅਨ੍ਤੋਗਤਂ ਤਂ ਮਹੇਸਕ੍ਖਂ ਨਰਦੇਵਯਕ੍ਖਂ ਤਞ੍ਚ ਜਨਸਮੂਹਮਦ੍ਦਸ. ਦਿਸ੍ਵਾ ਚ ਪਨ ਗਗਨਤਲੇਨ ਗਨ੍ਤ੍ਵਾ ਤਸ੍ਸ ਜਨਕਾਯਸ੍ਸ ਪਸ੍ਸਨ੍ਤਸ੍ਸੇਵ ਭਗਵਾ ਅਨੇਕਵਿਹਿਤਂ ਪਾਟਿਹਾਰਿਯਂ ਕਰੋਨ੍ਤੋ ਤਸ੍ਸ ਨਰਦੇਵਯਕ੍ਖਸ੍ਸ ਭਵਨੇ ਓਤਰਿਤ੍ਵਾ ਤਸ੍ਸ ਮਙ੍ਗਲਪਲ੍ਲਙ੍ਕੇ ਨਿਸੀਦਿ.

ਅਥ ਖੋ ਸੋ ਮਨੁਸ੍ਸਭਕ੍ਖੋ ਯਕ੍ਖੋ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜੇਨ੍ਤਂ ਇਨ੍ਦਧਨੁਪਰਿਵੁਤਮਿਵ ਦਿਵਸਕਰਂ ਮੁਨਿਦਿਵਸਕਰਂ ਪਵਨਪਥੇਨਾਗਚ੍ਛਨ੍ਤਂ ਦਿਸ੍ਵਾ – ‘‘ਦਸਬਲੋ ਮਮਾਨੁਕਮ੍ਪਾਯ ਇਧਾਗਚ੍ਛਤੀ’’ਤਿ ਪਸਨ੍ਨਹਦਯੋ ਅਤ੍ਤਨੋ ਪਰਿਵਾਰਯਕ੍ਖੇਹਿ ਸਦ੍ਧਿਂ ਅਨੇਕਮਿਗਗਣਵਨ੍ਤਂ ਹਿਮਵਨ੍ਤਂ ਗਨ੍ਤ੍ਵਾ ਨਾਨਾਵਣ੍ਣਗਨ੍ਧਾਨਿ ਜਲਜਥਲਜਾਨਿ ਕੁਸੁਮਾਨਿ ਪਰਮਮਨੋਰਮਾਨਿ ਸੁਗਨ੍ਧਗਨ੍ਧੇ ਸਮਾਹਰਿਤ੍ਵਾ ਅਤ੍ਤਨੋ ਪਲ੍ਲਙ੍ਕੇ ਨਿਸਿਨ੍ਨਂ ਵਿਗਤਰਨ੍ਧਂ ਕਕੁਸਨ੍ਧਂ ਲੋਕਨਾਯਕਂ ਮਾਲਾਗਨ੍ਧਵਿਲੇਪਨਾਦੀਹਿ ਪੂਜਯਿਤ੍ਵਾ ਥੁਤਿਸਙ੍ਗੀਤਾਨਿ ਪਵਤ੍ਤੇਨ੍ਤੋ ਸਿਰਸਿ ਅਞ੍ਜਲਿਂ ਕਤ੍ਵਾ ਨਮਸ੍ਸਮਾਨੋ ਅਟ੍ਠਾਸਿ. ਤਤੋ ਮਨੁਸ੍ਸਾ ਤਂ ਪਾਟਿਹਾਰਿਯਂ ਦਿਸ੍ਵਾ ਪਸਨ੍ਨਹਦਯਾ ਸਮਾਗਮ੍ਮ ਭਗਵਨ੍ਤਂ ਪਰਿਵਾਰੇਤ੍ਵਾ ਨਮਸ੍ਸਮਾਨਾ ਅਟ੍ਠਂਸੁ. ਅਥ ਅਪ੍ਪਟਿਸਨ੍ਧੋ ਕਕੁਸਨ੍ਧੋ ਭਗਵਾ ਅਭਿਪੂਜਿਤਨਰਦੇਵਯਕ੍ਖਂ ਨਰਦੇਵਯਕ੍ਖਂ ਕਮ੍ਮਫਲਸਮ੍ਬਨ੍ਧਦਸ੍ਸਨੇਨ ਸਮੁਤ੍ਤੇਜੇਤ੍ਵਾ ਨਿਰਯਕਥਾਯ ਸਨ੍ਤਾਸੇਤ੍ਵਾ ਚਤੁਸਚ੍ਚਕਥਂ ਕਥੇਸਿ, ਤਦਾ ਅਪਰਿਮਿਤਾਨਂ ਸਤ੍ਤਾਨਂ ਧਮ੍ਮਾਭਿਸਮਯੋ ਅਹੋਸਿ, ਅਯਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਵੇਸ੍ਸਭੁਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਕਕੁਸਨ੍ਧੋ ਨਾਮ ਨਾਮੇਨ, ਅਪ੍ਪਮੇਯ੍ਯੋ ਦੁਰਾਸਦੋ.

੨. ‘‘ਉਗ੍ਘਾਟੇਤ੍ਵਾ ਸਬ੍ਬਭਵਂ, ਚਰਿਯਾਯ ਪਾਰਮਿਂ ਗਤੋ;

ਸੀਹੋਵ ਪਞ੍ਜਰਂ ਭੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੩. ‘‘ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਕਕੁਸਨ੍ਧੇ ਲੋਕਨਾਯਕੇ;

ਚਤ੍ਤਾਲੀਸਕੋਟਿਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ.

੪. ‘‘ਅਨ੍ਤਲਿਕ੍ਖਮ੍ਹਿ ਆਕਾਸੇ, ਯਮਕਂ ਕਤ੍ਵਾ ਵਿਕੁਬ੍ਬਨਂ;

ਤਿਂਸਕੋਟਿਸਹਸ੍ਸਾਨਂ, ਬੋਧੇਸਿ ਦੇਵਮਾਨੁਸੇ.

੫. ‘‘ਨਰਦੇਵਸ੍ਸ ਯਕ੍ਖਸ੍ਸ, ਚਤੁਸਚ੍ਚਪ੍ਪਕਾਸਨੇ;

ਧਮ੍ਮਾਭਿਸਮਯੋ ਤਸ੍ਸ, ਗਣਨਾਤੋ ਅਸਙ੍ਖਿਯੋ’’ਤਿ.

ਤਤ੍ਥ ਉਗ੍ਘਾਟੇਤ੍ਵਾਤਿ ਸਮੂਹਨਿਤ੍ਵਾ. ਸਬ੍ਬਭਵਨ੍ਤਿ ਸਬ੍ਬਂ ਨਵਵਿਧਂ ਭਵਂ, ਭਵੁਪ੍ਪਤ੍ਤਿਨਿਮਿਤ੍ਤਂ ਕਮ੍ਮਨ੍ਤਿ ਅਤ੍ਥੋ. ਚਰਿਯਾਯ ਪਾਰਮਿਂ ਗਤੋਤਿ ਸਬ੍ਬਪਾਰਮੀਨਂ ਪੂਰਣਵਸੇਨ ਪਾਰਂ ਗਤੋ. ਸੀਹੋਵ ਪਞ੍ਜਰਂ ਭੇਤ੍ਵਾਤਿ ਸੀਹੋ ਵਿਯ ਪਞ੍ਜਰਂ ਮੁਨਿਕੁਞ੍ਜਰੋ ਭਵਪਞ੍ਜਰਂ ਵਿਨਾਸੇਤ੍ਵਾਤਿ ਅਤ੍ਥੋ. ਕਕੁਸਨ੍ਧਸ੍ਸ ਵਿਦ੍ਧਸ੍ਤਭਵਬਨ੍ਧਨਸ੍ਸ ਏਕੋਵ ਸਾਵਕਸਨ੍ਨਿਪਾਤੋ ਅਹੋਸਿ. ਕਣ੍ਣਕੁਜ੍ਜਨਗਰੇ ਇਸਿਪਤਨੇ ਮਿਗਦਾਯੇ ਅਤ੍ਤਨਾ ਸਹ ਪਬ੍ਬਜਿਤੇਹਿ ਚਤ੍ਤਾਲੀਸਾਯ ਅਰਹਨ੍ਤਸਹਸ੍ਸੇਹਿ ਪਰਿਵੁਤੋ ਮਾਘਪੁਣ੍ਣਮਾਯਂ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ. ਤੇਨ ਵੁਤ੍ਤਂ –

੬. ‘‘ਕਕੁਸਨ੍ਧਸ੍ਸ ਭਗਵਤੋ, ਏਕੋ ਆਸਿ ਸਮਾਗਮੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੭. ‘‘ਚਤ੍ਤਾਲੀਸਸਹਸ੍ਸਾਨਂ, ਤਦਾ ਆਸਿ ਸਮਾਗਮੋ;

ਦਨ੍ਤਭੂਮਿਮਨੁਪ੍ਪਤ੍ਤਾਨਂ, ਆਸਵਾਰਿਗਣਕ੍ਖਯਾ’’ਤਿ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਖੇਮੋ ਨਾਮ ਰਾਜਾ ਹੁਤ੍ਵਾ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਪਤ੍ਤਚੀਵਰਂ ਮਹਾਦਾਨਂ ਦਤ੍ਵਾ ਅਞ੍ਜਨਾਦੀਨਿ ਸਬ੍ਬਭੇਸਜ੍ਜਾਨਿ ਚ ਅਦਾਸਿ. ਅਞ੍ਞਞ੍ਚ ਸਮਣਪਰਿਕ੍ਖਾਰਂ ਦਤ੍ਵਾ ਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਹਦਯੋ ਹੁਤ੍ਵਾ ਭਗਵਤੋ ਸਨ੍ਤਿਕੇ ਪਬ੍ਬਜਿ. ਸੋ ਪਨ ਸਤ੍ਥਾ – ‘‘ਅਨਾਗਤੇ ਇਮਸ੍ਮਿਂਯੇਵ ਕਪ੍ਪੇ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੮. ‘‘ਅਹਂ ਤੇਨ ਸਮਯੇਨ, ਖੇਮੋ ਨਾਮਾਸਿ ਖਤ੍ਤਿਯੋ;

ਤਥਾਗਤੇ ਜਿਨਪੁਤ੍ਤੇ, ਦਾਨਂ ਦਤ੍ਵਾ ਅਨਪ੍ਪਕਂ.

੯. ‘‘ਪਤ੍ਤਞ੍ਚ ਚੀਵਰਂ ਦਤ੍ਵਾ, ਅਞ੍ਜਨਂ ਮਧੁਲਟ੍ਠਿਕਂ;

ਇਮੇਤਂ ਪਤ੍ਥਿਤਂ ਸਬ੍ਬਂ, ਪਟਿਯਾਦੇਮਿ ਵਰਂ ਵਰਂ.

੧੦. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਕਕੁਸਨ੍ਧੋ ਵਿਨਾਯਕੋ;

ਇਮਮ੍ਹਿ ਭਦ੍ਦਕੇ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੧. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੩. ‘‘ਨਗਰਂ ਖੇਮਵਤੀ ਨਾਮ, ਖੇਮੋ ਨਾਮਾਸਹਂ ਤਦਾ;

ਸਬ੍ਬਞ੍ਞੁਤਂ ਗਵੇਸਨ੍ਤੋ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ’’ਤਿ.

ਤਤ੍ਥ ਅਞ੍ਜਨਂ ਪਾਕਟਮੇਵ. ਮਧੁਲਟ੍ਠਿਕਨ੍ਤਿ ਯਟ੍ਠਿਮਧੁਕਂ. ਇਮੇਤਨ੍ਤਿ ਇਮਂ ਏਤਂ. ਪਤ੍ਥਿਤਨ੍ਤਿ ਇਚ੍ਛਿਤਂ. ਪਟਿਯਾਦੇਮੀਤਿ ਦਜ੍ਜਾਮਿ, ਅਦਾਸਿਨ੍ਤਿ ਅਤ੍ਥੋ. ਵਰਂ ਵਰਨ੍ਤਿ ਸੇਟ੍ਠਂ ਸੇਟ੍ਠਨ੍ਤਿ ਅਤ੍ਥੋ. ‘‘ਯਦੇਤਂ ਪਤ੍ਥਿਤ’’ਨ੍ਤਿਪਿ ਪਾਠੋ, ਤਸ੍ਸ ਯਂ ਇਚ੍ਛਤਿ, ਏਤਂ ਸਬ੍ਬਂ ਅਦਾਸਿਨ੍ਤਿ ਅਤ੍ਥੋ. ਅਯਂ ਸੁਨ੍ਦਰਤਰੋ.

ਤਸ੍ਸ ਪਨ ਅਦਨ੍ਧਸ੍ਸ ਕਕੁਸਨ੍ਧਸ੍ਸ ਭਗਵਤੋ ਖੇਮਂ ਨਾਮ ਨਗਰਂ ਅਹੋਸਿ. ਅਗ੍ਗਿਦਤ੍ਤੋ ਨਾਮ ਬ੍ਰਾਹ੍ਮਣੋ ਪਿਤਾ, ਵਿਸਾਖਾ ਨਾਮ ਬ੍ਰਾਹ੍ਮਣੀ ਮਾਤਾ, ਵਿਧੁਰੋ ਚ ਸਞ੍ਜੀਵੋ ਚ ਦ੍ਵੇ ਅਗ੍ਗਸਾਵਕਾ, ਬੁਦ੍ਧਿਜੋ ਨਾਮੁਪਟ੍ਠਾਕੋ, ਸਾਮਾ ਚ ਚਮ੍ਪਾ ਚ ਦ੍ਵੇ ਅਗ੍ਗਸਾਵਿਕਾ, ਮਹਾਸਿਰੀਸਰੁਕ੍ਖੋ ਬੋਧਿ, ਸਰੀਰਂ ਚਤ੍ਤਾਲੀਸਹਤ੍ਥੁਬ੍ਬੇਧਂ ਅਹੋਸਿ, ਸਮਨ੍ਤਾ ਦਸਯੋਜਨਾਨਿ ਸਰੀਰਪ੍ਪਭਾ ਨਿਚ੍ਛਰਤਿ, ਚਤ੍ਤਾਲੀਸਵਸ੍ਸਸਹਸ੍ਸਾਨਿ ਆਯੁ, ਭਰਿਯਾ ਪਨਸ੍ਸ ਰੋਚਿਨੀ ਨਾਮ ਬ੍ਰਾਹ੍ਮਣੀ, ਉਤ੍ਤਰੋ ਨਾਮ ਪੁਤ੍ਤੋ, ਆਜਞ੍ਞਰਥੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੧੪. ‘‘ਬ੍ਰਾਹ੍ਮਣੋ ਅਗ੍ਗਿਦਤ੍ਤੋ ਚ, ਆਸਿ ਬੁਦ੍ਧਸ੍ਸ ਸੋ ਪਿਤਾ;

ਵਿਸਾਖਾ ਨਾਮ ਜਨਿਕਾ, ਕਕੁਸਨ੍ਧਸ੍ਸ ਸਤ੍ਥੁਨੋ.

੧੫. ‘‘ਵਸਤੇ ਤਤ੍ਥ ਖੇਮੇ ਪੁਰੇ, ਸਮ੍ਬੁਦ੍ਧਸ੍ਸ ਮਹਾਕੁਲਂ;

ਨਰਾਨਂ ਪਵਰਂ ਸੇਟ੍ਠਂ, ਜਾਤਿਮਨ੍ਤਂ ਮਹਾਯਸਂ.

੨੦. ‘‘ਵਿਧੁਰੋ ਚ ਸਞ੍ਜੀਵੋ ਚ, ਅਹੇਸੁਂ ਅਗ੍ਗਸਾਵਕਾ;

ਬੁਦ੍ਧਿਜੋ ਨਾਮੁਪਟ੍ਠਾਕੋ, ਕਕੁਸਨ੍ਧਸ੍ਸ ਸਤ੍ਥੁਨੋ.

੨੧. ‘‘ਸਾਮਾ ਚ ਚਮ੍ਪਾਨਾਮਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਸਿਰੀਸੋਤਿ ਪਵੁਚ੍ਚਤਿ.

੨੩. ‘‘ਚਤ੍ਤਾਲੀਸਰਤਨਾਨਿ, ਅਚ੍ਚੁਗ੍ਗਤੋ ਮਹਾਮੁਨਿ;

ਕਨਕਪ੍ਪਭਾ ਨਿਚ੍ਛਰਤਿ, ਸਮਨ੍ਤਾ ਦਸਯੋਜਨਂ.

੨੪. ‘‘ਚਤ੍ਤਾਲੀਸਵਸ੍ਸਸਹਸ੍ਸਾਨਿ, ਆਯੁ ਤਸ੍ਸ ਮਹੇਸਿਨੋ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੫. ‘‘ਧਮ੍ਮਾਪਣਂ ਪਸਾਰੇਤ੍ਵਾ, ਨਰਨਾਰੀਨਂ ਸਦੇਵਕੇ;

ਨਦਿਤ੍ਵਾ ਸੀਹਨਾਦਂਵ, ਨਿਬ੍ਬੁਤੋ ਸੋ ਸਸਾਵਕੋ.

੨੬. ‘‘ਅਟ੍ਠਙ੍ਗਵਚਨਸਮ੍ਪਨ੍ਨੋ, ਅਚ੍ਛਿਦ੍ਦਾਨਿ ਨਿਰਨ੍ਤਰਂ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਵਸਤੇ ਤਤ੍ਥ ਖੇਮੇ ਪੁਰੇਤਿ ਅਯਂ ਗਾਥਾ ਕਕੁਸਨ੍ਧਸ੍ਸ ਜਾਤਨਗਰਸਨ੍ਦਸ੍ਸਨਤ੍ਥਂ ਵੁਤ੍ਤਾਤਿ ਵੇਦਿਤਬ੍ਬਾ. ਮਹਾਕੁਲਨ੍ਤਿ ਉਦਿਤੋਦਿਤਂ ਭਗਵਤੋ ਪਿਤੁਕੁਲਂ. ਨਰਾਨਂ ਪਵਰਂ ਸੇਟ੍ਠਨ੍ਤਿ ਜਾਤਿਵਸੇਨ ਸਬ੍ਬਮਨੁਸ੍ਸਾਨਂ ਪਵਰਂ ਸੇਟ੍ਠਨ੍ਤਿ ਅਤ੍ਥੋ. ਜਾਤਿਮਨ੍ਤਨ੍ਤਿ ਅਭਿਜਾਤਿਵਨ੍ਤਂ, ਉਤ੍ਤਮਾਭਿਜਾਤਂ. ਮਹਾਯਸਨ੍ਤਿ ਮਹਾਪਰਿਵਾਰਂ, ਕਿਂ ਤਂ ਬੁਦ੍ਧਸ੍ਸ ਮਹਾਕੁਲਂ? ਤਤ੍ਥ ਮਹਾਕੁਲਂ ਖੇਮੇ ਪੁਰੇ ਵਸਤੇਤਿਪਦੇਨ ਸਮ੍ਬਨ੍ਧੋ ਦਟ੍ਠਬ੍ਬੋ.

ਸਮਨ੍ਤਾ ਦਸਯੋਜਨਨ੍ਤਿ ਸਮਨ੍ਤਤੋ ਦਸ ਯੋਜਨਾਨਿ ਫਰਿਤ੍ਵਾ ਨਿਚ੍ਚਕਾਲਂ ਸਰੀਰਤੋ ਨਿਕ੍ਖਮਿਤ੍ਵਾ ਸੁਵਣ੍ਣਵਣ੍ਣਾ ਪਭਾ ਨਿਚ੍ਛਰਤੀਤਿ ਅਤ੍ਥੋ. ਧਮ੍ਮਾਪਣਨ੍ਤਿ ਧਮ੍ਮਸਙ੍ਖਾਤਂ ਆਪਣਂ. ਪਸਾਰੇਤ੍ਵਾਤਿ ਭਣ੍ਡਵਿਕ੍ਕਿਣਨਤ੍ਥਂ ਨਾਨਾਭਣ੍ਡਸਮਿਦ੍ਧਮਾਪਣਂ ਵਿਯ ਧਮ੍ਮਾਪਣਂ ਪਸਾਰੇਤ੍ਵਾਤਿ ਅਤ੍ਥੋ. ਨਰਨਾਰੀਨਨ੍ਤਿ ਵੇਨੇਯ੍ਯਨਰਨਾਰੀਨਂ ਝਾਨਸਮਾਪਤ੍ਤਿਮਗ੍ਗਫਲਰਤਨਵਿਸੇਸਾਧਿਗਮਤ੍ਥਾਯ. ਸੀਹਨਾਦਂ ਵਾਤਿ ਸੀਹਨਾਦਂ ਵਿਯ, ਅਭਯਨਾਦਂ ਨਦਿਤ੍ਵਾ. ਅਟ੍ਠਙ੍ਗਵਚਨਸਮ੍ਪਨ੍ਨੋਤਿ ਅਟ੍ਠਙ੍ਗਸਮਨ੍ਨਾਗਤਸਰੋ ਸਤ੍ਥਾ. ਅਚ੍ਛਿਦ੍ਦਾਨੀਤਿ ਛਿਦ੍ਦਾਦਿਭਾਵਰਹਿਤਾਨਿ ਸੀਲਾਨਿ ਅਚ੍ਛਿਦ੍ਦਾਨਿ ਅਸਬਲਾਨਿ ਅਕਮ੍ਮਾਸਾਨਿ. ਅਥ ਵਾ ਅਚ੍ਛਿਦ੍ਦਾਨਿ ਅਵਿਵਰਾਨਿ ਸਾਵਕਯੁਗਲ਼ਾਦੀਨਿ. ਨਿਰਨ੍ਤਰਨ੍ਤਿ ਸਤਤਂ ਸਬ੍ਬਕਾਲਂ. ਸਬ੍ਬਂ ਤਮਨ੍ਤਰਹਿਤਨ੍ਤਿ ਸਤ੍ਥਾ ਚ ਸਾਵਕਯੁਗਲ਼ਾਦੀਨਿ ਚ ਤਂ ਸਬ੍ਬਂ ਮੁਨਿਭਾਵਮੁਪਗਨ੍ਤ੍ਵਾ ਅਦਸ੍ਸਨਭਾਵਮੁਪਗਤਨ੍ਤਿ ਅਤ੍ਥੋ.

‘‘ਅਪੇਤਬਨ੍ਧੋ ਕਕੁਸਨ੍ਧਬੁਦ੍ਧੋ, ਅਦਨ੍ਧਪਞ੍ਞੋ ਗਤਸਬ੍ਬਰਨ੍ਧੋ;

ਤਿਲੋਕਸਨ੍ਧੋ ਕਿਰ ਸਚ੍ਚਸਨ੍ਧੋ, ਖੇਮੇ ਪਨੇ ਵਾਸਮਕਪ੍ਪਯਿਤ੍ਥ’’.

ਸੇਸਗਾਥਾਸੁ ਸਬ੍ਬਤ੍ਥ ਪਾਕਟਮੇਵਾਤਿ.

ਕਕੁਸਨ੍ਧਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਬਾਵੀਸਤਿਮੋ ਬੁਦ੍ਧਵਂਸੋ.