੨੩. ਵੇਸ੍ਸਭੂਬੁਦ੍ਧਵਂਸਵਣ੍ਣਨਾ

ਸਿਖਿਸ੍ਸ ਪਨ ਸਮ੍ਮਾਸਮ੍ਬੁਦ੍ਧਸ੍ਸ ਅਪਰਭਾਗੇ ਅਨ੍ਤਰਹਿਤੇ ਤਸ੍ਸ ਸਾਸਨੇ ਸਤ੍ਤਤਿਵਸ੍ਸਸਹਸ੍ਸਾਯੁਕਾ ਮਨੁਸ੍ਸਾ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਦਸਵਸ੍ਸਾਯੁਕਾ ਅਹੇਸੁਂ. ਪੁਨ ਵਡ੍ਢਿਤ੍ਵਾ ਅਪਰਿਮਿਤਾਯੁਕਾ ਹੁਤ੍ਵਾ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਸਟ੍ਠਿਵਸ੍ਸਸਹਸ੍ਸਾਯੁਕਾ ਅਹੇਸੁਂ. ਤਦਾ ਵਿਜਿਤਮਨੋਭੂ ਸਬ੍ਬਲੋਕਾਭਿਭੂ ਸਯਮ੍ਭੂ ਵੇਸ੍ਸਭੂ ਨਾਮ ਸਤ੍ਥਾ ਲੋਕੇ ਉਦਪਾਦਿ. ਸੋ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਅਨੋਮਨਗਰੇ ਸੁਪ੍ਪਤੀਤਸ੍ਸ ਸੁਪ੍ਪਤੀਤਸ੍ਸ ਨਾਮ ਰਞ੍ਞੋ ਅਗ੍ਗਮਹੇਸਿਯਾ ਸੀਲਵਤਿਯਾ ਯਸਵਤਿਯਾ ਨਾਮ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਸੋ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਅਨੁਪਮੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਜਾਯਮਾਨੋਵ ਜਨਂ ਤੋਸੇਨ੍ਤੋ ਵਸਭਨਾਦਂ ਨਦਿ. ਤਸ੍ਮਾ ਵਸਭਨਾਦਹੇਤੁਤ੍ਤਾ ਤਸ੍ਸ ਨਾਮਗ੍ਗਹਣਦਿਵਸੇ ‘‘ਵੇਸ੍ਸਭੂ’’ਤਿ ਨਾਮਮਕਂਸੁ. ਸੋ ਛਬ੍ਬਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਰੁਚਿ-ਸੁਰੁਚਿ-ਰਤਿਵਡ੍ਢਨਨਾਮਕਾ ਤਯੋ ਪਾਸਾਦਾ ਤਸ੍ਸ ਅਹੇਸੁਂ. ਸੁਚਿਤ੍ਤਾਦੇਵਿਪ੍ਪਮੁਖਾਨਿ ਤਿਂਸ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸੁਚਿਤ੍ਤਾਯ ਨਾਮ ਦੇਵਿਯਾ ਸੁਪ੍ਪਬੁਦ੍ਧੇ ਨਾਮ ਕੁਮਾਰੇ ਉਪ੍ਪਨ੍ਨੇ ਸੁਵਣ੍ਣਸਿਵਿਕਾਯ ਉਯ੍ਯਾਨਦਸ੍ਸਨਤ੍ਥਾਯ ਗਨ੍ਤ੍ਵਾ ਦੇਵਦਤ੍ਤਾਨਿ ਕਾਸਾਯਾਨਿ ਗਹੇਤ੍ਵਾ ਪਬ੍ਬਜਿ. ਤਂ ਸਤ੍ਤਤ੍ਤਿਂਸਸਹਸ੍ਸਾਨਿ ਅਨੁਪਬ੍ਬਜਿਂਸੁ. ਅਥ ਸੋ ਤੇਹਿ ਪਰਿਵੁਤੋ ਛ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਸੁਚਿਤ੍ਤਨਿਗਮੇ ਸਨ੍ਦਿਸ੍ਸਮਾਨਸਰੀਰਾਯ ਸਿਰਿਵਡ੍ਢਨਾਯ ਨਾਮ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਨਰਿਨ੍ਦਨਾਗਰਾਜੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਸਾਲਬੋਧਿਂ ਪਦਕ੍ਖਿਣਤੋ ਉਪਾਗਮਿ. ਤਸ੍ਸਾਪਿ ਸਾਲਸ੍ਸ ਤਦੇਵ ਪਾਟਲਿਯਾ ਪਮਾਣਮੇਵ ਪਮਾਣਂ ਅਹੋਸਿ. ਤਥੇਵ ਪੁਪ੍ਫਫਲਸਿਰਿਵਿਭਵੋ ਵੇਦਿਤਬ੍ਬੋ. ਸੋ ਸਾਲਮੂਲਮੁਪਗਨ੍ਤ੍ਵਾ ਚਤ੍ਤਾਲੀਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਵਿਗਤਨੀਵਰਣਂ ਸਬ੍ਬਕਾਮਮਦਾਵਰਣਂ ਅਨਾਵਰਣਞਾਣਂ ਪਟਿਲਭਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਤਤ੍ਥੇਵ ਵੀਤਿਨਾਮੇਤ੍ਵਾ ਅਤ੍ਤਨੋ ਕਨਿਟ੍ਠਭਾਤਿਕਸ੍ਸ ਸੋਣਕੁਮਾਰਸ੍ਸ ਉਤ੍ਤਰਕੁਮਾਰਸ੍ਸ ਚ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਦੇਵਪਥੇਨ ਗਨ੍ਤ੍ਵਾ ਅਨੋਮਨਗਰਸਮੀਪੇ ਅਰੁਣੁਯ੍ਯਾਨੇ ਓਤਰਿਤ੍ਵਾ ਉਯ੍ਯਾਨਪਾਲੇਨ ਕੁਮਾਰੇ ਪਕ੍ਕੋਸਾਪੇਤ੍ਵਾ ਤੇਸਂ ਸਪਰਿਵਾਰਾਨਂ ਮਜ੍ਝੇ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਅਸੀਤਿਯਾ ਕੋਟਿਸਹਸ੍ਸਾਨਂ ਪਠਮੋ ਅਭਿਸਮਯੋ ਅਹੋਸਿ.

ਪੁਨ ਜਨਪਦਚਾਰਿਕਂ ਚਰਨ੍ਤੋ ਭਗਵਾ ਤਤ੍ਥ ਤਤ੍ਥ ਧਮ੍ਮਂ ਦੇਸੇਨ੍ਤੋ ਸਤ੍ਤਤਿਯਾ ਕੋਟਿਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ, ਸੋ ਦੁਤਿਯੋ ਅਭਿਸਮਯੋ ਅਹੋਸਿ. ਅਨੋਮਨਗਰੇਯੇਵ ਦਿਟ੍ਠਿਜਾਲਂ ਭਿਨ੍ਦਨ੍ਤੋ ਤਿਤ੍ਥਿਯਮਾਨਦ੍ਧਜਂ ਪਾਤੇਨ੍ਤੋ ਮਾਨਮਦਂ ਵਿਦ੍ਧਂਸੇਨ੍ਤੋ ਧਮ੍ਮਦ੍ਧਜਂ ਸਮੁਸ੍ਸਯਨ੍ਤੋ ਨਵੁਤਿਯੋਜਨਵਿਤ੍ਥਤਾਯ ਮਨੁਸ੍ਸਪਰਿਸਾਯ ਪਰਿਮਾਣਰਹਿਤਾਯ ਦੇਵਪਰਿਸਾਯ ਯਮਕਪਾਟਿਹਾਰਿਯਂ ਕਤ੍ਵਾ ਦੇਵਮਨੁਸ੍ਸੇ ਪਸਾਦੇਤ੍ਵਾ ਸਟ੍ਠਿਕੋਟਿਯੋ ਧਮ੍ਮਾਮਤੇਨ ਤਪ੍ਪੇਸਿ, ਸੋ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਅਸਮੋ ਅਪ੍ਪਟਿਪੁਗ੍ਗਲੋ;

ਵੇਸ੍ਸਭੂ ਨਾਮ ਨਾਮੇਨ, ਲੋਕੇ ਉਪ੍ਪਜ੍ਜਿ ਨਾਯਕੋ.

੨. ‘‘ਆਦਿਤ੍ਤਂ ਵਤ ਰਾਗਗ੍ਗਿ, ਤਣ੍ਹਾਨਂ ਵਿਜਿਤਂ ਤਦਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੩. ‘‘ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਵੇਸ੍ਸਭੂਲੋਕਨਾਯਕੇ;

ਅਸੀਤਿਕੋਟਿਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.

੪. ‘‘ਪਕ੍ਕਨ੍ਤੇ ਚਾਰਿਕਂ ਰਟ੍ਠੇ, ਲੋਕਜੇਟ੍ਠੇ ਨਰਾਸਭੇ;

ਸਤ੍ਤਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੫. ‘‘ਮਹਾਦਿਟ੍ਠਿਂ ਵਿਨੋਦੇਨ੍ਤੋ, ਪਾਟਿਹੇਰਂ ਕਰੋਤਿ ਸੋ;

ਸਮਾਗਤਾ ਨਰਮਰੂ, ਦਸਸਹਸ੍ਸੀ ਸਦੇਵਕੇ.

੬. ‘‘ਮਹਾਅਚ੍ਛਰਿਯਂ ਦਿਸ੍ਵਾ, ਅਬ੍ਭੁਤਂ ਲੋਮਹਂਸਨਂ;

ਦੇਵਾ ਚੇਵ ਮਨੁਸ੍ਸਾ ਚ, ਬੁਜ੍ਝਰੇ ਸਟ੍ਠਿਕੋਟਿਯੋ’’ਤਿ.

ਤਤ੍ਥ ਆਦਿਤ੍ਤਨ੍ਤਿ ਸਕਲਮਿਦਂ ਲੋਕਤ੍ਤਯਂ ਸਮ੍ਪਦਿਤ੍ਤਂ. ਰਾਗਗ੍ਗੀਤਿ ਰਾਗੇਨ. ਤਣ੍ਹਾਨਂ ਵਿਜਿਤਨ੍ਤਿ ਤਣ੍ਹਾਨਂ ਵਿਜਿਤਂ ਰਟ੍ਠਂ ਵਸਵਤ੍ਤਿਟ੍ਠਾਨਨ੍ਤਿ ਏਵਂ ਞਤ੍ਵਾਤਿ ਅਤ੍ਥੋ. ਨਾਗੋਵ ਬਨ੍ਧਨਂ ਛੇਤ੍ਵਾਤਿ ਹਤ੍ਥੀ ਵਿਯ ਪੂਤਿਲਤਾਬਨ੍ਧਨਂ ਛਿਨ੍ਦਿਤ੍ਵਾ ਸਮ੍ਬੋਧਿਂ ਪਤ੍ਤੋ ਅਧਿਗਤੋ. ਦਸਸਹਸ੍ਸੀਤਿ ਦਸਸਹਸ੍ਸਿਯਂ. ਸਦੇਵਕੇਤਿ ਸਦੇਵਕੇ ਲੋਕੇ. ਬੁਜ੍ਝਰੇਤਿ ਬੁਜ੍ਝਿਂਸੁ.

ਸੋਣੁਤ੍ਤਰਾਨਂ ਪਨ ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਸਮਾਗਮੇ ਪਬ੍ਬਜਿਤਾਨਂ ਅਸੀਤਿਯਾ ਅਰਹਨ੍ਤਸਹਸ੍ਸਾਨਂ ਮਜ੍ਝੇ ਮਾਘਪੁਣ੍ਣਮਾਯਂ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਯਦਾ ਪਨ ਵੇਸ੍ਸਭੁਨਾ ਸਬ੍ਬਲੋਕਾਭਿਭੁਨਾ ਸਹ ਪਬ੍ਬਜਿਤਾ ਸਤ੍ਤਤ੍ਤਿਂਸਸਹਸ੍ਸਸਙ੍ਖਾ ਭਿਕ੍ਖੂ ਗਣਤੋ ਓਹੀਨਸਮਯੇ ਪਕ੍ਕਨ੍ਤਾ, ਤੇ ਵੇਸ੍ਸਭੁਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਧਮ੍ਮਚਕ੍ਕਪ੍ਪਵਤ੍ਤਿਂ ਸੁਤ੍ਵਾ ਸੋਰੇਯ੍ਯਂ ਨਾਮ ਨਗਰਂ ਆਗਨ੍ਤ੍ਵਾ ਭਗਵਨ੍ਤਂ ਅਦ੍ਦਸਂਸੁ. ਤੇਸਂ ਭਗਵਾ ਧਮ੍ਮਂ ਦੇਸੇਤ੍ਵਾ ਸਬ੍ਬੇਵ ਤੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਾਜੇਤ੍ਵਾ ਚਤੁਰਙ੍ਗਸਮਨ੍ਨਾਗਤਾਯ ਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ.

ਯਦਾ ਪਨ ਨਾਰਿਵਾਹਨਨਗਰੇ ਉਪਸਨ੍ਤੋ ਨਾਮ ਰਾਜਪੁਤ੍ਤੋ ਰਜ੍ਜਂ ਕਾਰੇਸਿ, ਤਸ੍ਸਾਨੁਕਮ੍ਪਾਯ ਭਗਵਾ ਤਤ੍ਥ ਅਗਮਾਸਿ, ਸੋਪਿ ਭਗਵਤੋ ਆਗਮਨਂ ਸੁਤ੍ਵਾ ਸਪਰਿਵਾਰੋ ਭਗਵਤੋ ਪਚ੍ਚੁਗ੍ਗਮਨਂ ਕਤ੍ਵਾ ਨਿਮਨ੍ਤੇਤ੍ਵਾ ਮਹਾਦਾਨਂ ਦਤ੍ਵਾ ਤਸ੍ਸ ਧਮ੍ਮਂ ਸੁਤ੍ਵਾ ਪਸਨ੍ਨਹਦਯੋ ਪਬ੍ਬਜਿ. ਤਂ ਸਟ੍ਠਿਸਹਸ੍ਸਸਙ੍ਖਾ ਪੁਰਿਸਾ ਅਨੁਪਬ੍ਬਜਿਂਸੁ. ਤੇ ਤੇਨ ਸਦ੍ਧਿਂ ਅਰਹਤ੍ਤਂ ਪਾਪੁਣਿਂਸੁ. ਸੋ ਤੇਹਿ ਪਰਿਵੁਤੋ ਵੇਸ੍ਸਭੂ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੭. ‘‘ਸਨ੍ਨਿਪਾਤਾ ਤਯੋ ਆਸੁਂ, ਵੇਸ੍ਸਭੁਸ੍ਸ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੮. ‘‘ਅਸੀਤਿਭਿਕ੍ਖੁਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਸਤ੍ਤਤਿਭਿਕ੍ਖੁਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੯. ‘‘ਸਟ੍ਠਿਭਿਕ੍ਖੁਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਜਰਾਦਿਭਯਤੀਤਾਨਂ, ਓਰਸਾਨਂ ਮਹੇਸਿਨੋ’’ਤਿ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਸਰਭਵਤੀਨਗਰੇ ਪਰਮਪਿਯਦਸ੍ਸਨੋ ਸੁਦਸ੍ਸਨੋ ਨਾਮ ਰਾਜਾ ਹੁਤ੍ਵਾ ਵੇਸ੍ਸਭੁਮ੍ਹਿ ਲੋਕਨਾਯਕੇ ਸਰਭਨਗਰਮੁਪਗਤੇ ਤਸ੍ਸ ਧਮ੍ਮਂ ਸੁਤ੍ਵਾ ਪਸਨ੍ਨਹਦਯੋ ਦਸਨਖਸਮੋਧਾਨਸਮੁਜ੍ਜਲਂ ਜਲਜਾਮਲਾਵਿਕਲਕਮਲਮਕੁਲਸਦਿਸਮਞ੍ਜਲਿਂ ਸਿਰਸਿ ਕਤ੍ਵਾ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਸਚੀਵਰਂ ਮਹਾਦਾਨਂ ਦਤ੍ਵਾ ਤਤ੍ਥੇਵ ਭਗਵਤੋ ਨਿਵਾਸਤ੍ਥਾਯ ਗਨ੍ਧਕੁਟਿਂ ਕਤ੍ਵਾ ਤਂ ਪਰਿਕ੍ਖਿਪਿਤ੍ਵਾ ਵਿਹਾਰਸਹਸ੍ਸਂ ਕਾਰੇਤ੍ਵਾ ਸਬ੍ਬਞ੍ਚ ਵਿਭਵਜਾਤਂ ਭਗਵਤੋ ਸਾਸਨੇ ਪਰਿਚ੍ਚਜਿਤ੍ਵਾ ਤਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਆਚਾਰਗੁਣਸਮ੍ਪਨ੍ਨੋ ਤੇਰਸਧੁਤਗੁਣੇਸੁ ਨਿਰਤੋ ਬੋਧਿਸਮ੍ਭਾਰਪਰਿਯੇਸਨਾਯ ਰਤੋ ਬੁਦ੍ਧਸਾਸਨਾਭਿਰਤੋ ਵਿਹਾਸਿ. ਸੋਪਿ ਤਂ ਭਗਵਾ ਬ੍ਯਾਕਾਸਿ – ‘‘ਅਨਾਗਤੇ ਇਤੋ ਏਕਤ੍ਤਿਂਸਕਪ੍ਪੇ ਅਯਂ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ. ਤੇਨ ਵੁਤ੍ਤਂ –

੧੦. ‘‘ਅਹਂ ਤੇਨ ਸਮਯੇਨ, ਸੁਦਸ੍ਸਨੋ ਨਾਮ ਖਤ੍ਤਿਯੋ;

ਨਿਮਨ੍ਤੇਤ੍ਵਾ ਮਹਾਵੀਰਂ, ਦਾਨਂ ਦਤ੍ਵਾ ਮਹਾਰਹਂ;

ਅਨ੍ਨਪਾਨੇਨ ਵਤ੍ਥੇਨ, ਸਸਙ੍ਘਂ ਜਿਨਪੂਜਯਿਂ.

੧੧. ‘‘ਤਸ੍ਸ ਬੁਦ੍ਧਸ੍ਸ ਅਸਮਸ੍ਸ, ਚਕ੍ਕਂ ਵਤ੍ਤਿਤਮੁਤ੍ਤਮਂ;

ਸੁਤ੍ਵਾਨ ਪਣਿਤਂ ਧਮ੍ਮਂ, ਪਬ੍ਬਜ੍ਜਮਭਿਰੋਚਯਿਂ.

੧੨. ‘‘ਮਹਾਦਾਨਂ ਪਵਤ੍ਤੇਤ੍ਵਾ, ਰਤ੍ਤਿਨ੍ਦਿਵਮਤਨ੍ਦਿਤੋ;

ਪਬ੍ਬਜ੍ਜਂ ਗੁਣਸਮ੍ਪਨ੍ਨਂ, ਪਬ੍ਬਜਿਂ ਜਿਨਸਨ੍ਤਿਕੇ.

੧੩. ‘‘ਆਚਾਰਗੁਣਸਮ੍ਪਨ੍ਨੋ, ਵਤ੍ਤਸੀਲਸਮਾਹਿਤੋ;

ਸਬ੍ਬਞ੍ਞੁਤਂ ਗਵੇਸਨ੍ਤੋ, ਰਮਾਮਿ ਜਿਨਸਾਸਨੇ.

੧੪. ‘‘ਸਦ੍ਧਾਪੀਤਿਂ ਉਪਗਨ੍ਤ੍ਵਾ, ਬੁਦ੍ਧਂ ਵਨ੍ਦਾਮਿ ਸਤ੍ਥਰਂ;

ਪੀਤਿ ਉਪ੍ਪਜ੍ਜਤਿ ਮਯ੍ਹਂ, ਬੋਧਿਯਾਯੇਵ ਕਾਰਣਾ.

੧੫. ‘‘ਅਨਿਵਤ੍ਤਮਾਨਸਂ ਞਤ੍ਵਾ, ਸਮ੍ਬੁਦ੍ਧੋ ਏਤਦਬ੍ਰਵਿ;

ਏਕਤ੍ਤਿਂਸੇ ਇਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੬. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ…ਪੇ… ਹੇਸ੍ਸਾਮ ਸਮ੍ਮੁਖਂ ਇਮਂ.

੧੭. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਚਕ੍ਕਂ ਵਤ੍ਤਿਤਨ੍ਤਿ ਧਮ੍ਮਚਕ੍ਕਂ ਪਵਤ੍ਤਿਤਂ. ਪਣੀਤਂ ਧਮ੍ਮਨ੍ਤਿ ਉਤ੍ਤਰਿਮਨੁਸ੍ਸਧਮ੍ਮਂ. ਪਬ੍ਬਜ੍ਜਂ ਗੁਣਸਮ੍ਪਨ੍ਨਨ੍ਤਿ ਞਤ੍ਵਾ ਪਬ੍ਬਜਿਨ੍ਤਿ ਅਤ੍ਥੋ. ਵਤ੍ਤਸੀਲਸਮਾਹਿਤੋਤਿ ਵਤ੍ਤੇਸੁ ਚ ਸੀਲੇਸੁ ਚ ਸਮਾਹਿਤੋ. ਤੇਸਂ ਤੇਸਂ ਪੂਰਣੇ ਸਮਾਹਿਤੋਤਿ ਅਤ੍ਥੋ. ਰਮਾਮੀਤਿ ਅਭਿਰਮਿਂ. ਸਦ੍ਧਾਪੀਤਿਨ੍ਤਿ ਸਦ੍ਧਞ੍ਚ ਪੀਤਿਞ੍ਚ ਉਪਗਨ੍ਤ੍ਵਾ. ਵਨ੍ਦਾਮੀਤਿ ਅਭਿਵਨ੍ਦਿਂ, ਅਤੀਤਤ੍ਥੇ ਵਤ੍ਤਮਾਨਵਚਨਂ ਦਟ੍ਠਬ੍ਬਂ. ਸਤ੍ਥਰਨ੍ਤਿ ਸਤ੍ਥਾਰਂ. ਅਨਿਵਤ੍ਤਮਾਨਸਨ੍ਤਿ ਅਨੋਸਕ੍ਕਿਯਮਾਨਮਾਨਸਂ.

ਤਸ੍ਸ ਪਨ ਭਗਵਤੋ ਅਨੋਮਂ ਨਾਮ ਨਗਰਂ ਅਹੋਸਿ. ਸੁਪ੍ਪਤੀਤੋ ਨਾਮਸ੍ਸ ਪਿਤਾ ਖਤ੍ਤਿਯੋ, ਯਸਵਤੀ ਨਾਮ ਮਾਤਾ, ਸੋਣੋ ਚ ਉਤ੍ਤਰੋ ਚ ਦ੍ਵੇ ਅਗ੍ਗਸਾਵਕਾ, ਉਪਸਨ੍ਤੋ ਨਾਮੁਪਟ੍ਠਾਕੋ, ਰਾਮਾ ਚ ਸਮਾਲਾ ਚ ਦ੍ਵੇ ਅਗ੍ਗਸਾਵਿਕਾ, ਸਾਲਰੁਕ੍ਖੋ ਬੋਧਿ, ਸਰੀਰਂ ਸਟ੍ਠਿਹਤ੍ਥੁਬ੍ਬੇਧਂ ਅਹੋਸਿ. ਸਟ੍ਠਿਵਸ੍ਸਸਹਸ੍ਸਾਨਿ ਆਯੁ, ਸੁਚਿਤ੍ਤਾ ਨਾਮਸ੍ਸ ਭਰਿਯਾ, ਸੁਪ੍ਪਬੁਦ੍ਧੋ ਨਾਮਸ੍ਸ ਪੁਤ੍ਤੋ, ਸੁਵਣ੍ਣਸਿਵਿਕਾਯ ਨਿਕ੍ਖਮਿ. ਤੇਨ ਵੁਤ੍ਤਂ –

੧੮. ‘‘ਅਨੋਮਂ ਨਾਮ ਨਗਰਂ, ਸੁਪ੍ਪਤੀਤੋ ਨਾਮ ਖਤ੍ਤਿਯੋ;

ਮਾਤਾ ਯਸਵਤੀ ਨਾਮ, ਵੇਸ੍ਸਭੁਸ੍ਸ ਮਹੇਸਿਨੋ.

੨੩. ‘‘ਸੋਣੋ ਚ ਉਤ੍ਤਰੋ ਚੇਵ, ਅਹੇਸੁਂ ਅਗ੍ਗਸਾਵਕਾ;

ਉਪਸਨ੍ਤੋ ਨਾਮੁਪਟ੍ਠਾਕੋ, ਵੇਸ੍ਸਭੁਸ੍ਸ ਮਹੇਸਿਨੋ.

੨੪. ‘‘ਰਾਮਾ ਚੇਵ ਸਮਾਲਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਮਹਾਸਾਲੋਤਿ ਵੁਚ੍ਚਤਿ.

੨੫. ‘‘ਸੋਤ੍ਥਿਕੋ ਚੇਵ ਰਮ੍ਮੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਗੋਤਮੀ ਸਿਰਿਮਾ ਚੇਵ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੬. ‘‘ਸਟ੍ਠਿਰਤਨਮੁਬ੍ਬੇਧੋ, ਹੇਮਯੂਪਸਮੂਪਮੋ;

ਕਾਯਾ ਨਿਚ੍ਛਰਤੀ ਰਸ੍ਮਿ, ਰਤ੍ਤਿਂਵ ਪਬ੍ਬਤੇ ਸਿਖੀ.

੨੭. ‘‘ਸਟ੍ਠਿਵਸ੍ਸਸਹਸ੍ਸਾਨਿ, ਆਯੁ ਤਸ੍ਸ ਮਹੇਸਿਨੋ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ, ਜਨਤਂ ਬਹੁਂ.

੨੮. ‘‘ਧਮ੍ਮਂ ਵਿਤ੍ਥਾਰਿਕਂ ਕਤ੍ਵਾ, ਵਿਭਜਿਤ੍ਵਾ ਮਹਾਜਨਂ;

ਧਮ੍ਮਨਾਵਂ ਠਪੇਤ੍ਵਾਨ, ਨਿਬ੍ਬੁਤੋ ਸੋ ਸਸਾਵਕੋ.

੨੯. ‘‘ਦਸ੍ਸਨੇਯ੍ਯਂ ਸਬ੍ਬਜਨਂ, ਵਿਹਾਰਂ ਇਰਿਯਾਪਥਂ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਹੇਮਯੂਪਸਮੂਪਮੋਤਿ ਸੁਵਣ੍ਣਤ੍ਥਮ੍ਭਸਦਿਸੋਤਿ ਅਤ੍ਥੋ. ਨਿਚ੍ਛਰਤੀਤਿ ਇਤੋ ਚਿਤੋ ਚ ਸਨ੍ਧਾਵਤਿ. ਰਸ੍ਮੀਤਿ ਪਭਾਰਸ੍ਮਿ. ਰਤ੍ਤਿਂਵ ਪਬ੍ਬਤੇ ਸਿਖੀਤਿ ਰਤ੍ਤਿਯਂ ਪਬ੍ਬਤਮਤ੍ਥਕੇ ਅਗ੍ਗਿ ਵਿਯ. ਰਂਸਿਵਿਜ੍ਜੋਤਾ ਤਸ੍ਸ ਕਾਯੇਤਿ ਅਤ੍ਥੋ. ਵਿਭਜਿਤ੍ਵਾਤਿ ਵਿਭਾਗਂ ਕਤ੍ਵਾ, ਉਗ੍ਘਟਿਤਾਦਿਵਸੇਨ ਸੋਤਾਪਨ੍ਨਾਦਿਵਸੇਨ ਚਾਤਿ ਅਤ੍ਥੋ. ਧਮ੍ਮਨਾਵਨ੍ਤਿ ਅਟ੍ਠਙ੍ਗਮਗ੍ਗਸਙ੍ਖਾਤਂ ਧਮ੍ਮਨਾਵਂ, ਚਤੁਰੋਘਨਿਤ੍ਥਰਣਤ੍ਥਾਯ ਠਪੇਤ੍ਵਾਤਿ ਅਤ੍ਥੋ. ਦਸ੍ਸਨੇਯ੍ਯਨ੍ਤਿ ਦਸ੍ਸਨੀਯੋ. ਸਬ੍ਬਜਨਨ੍ਤਿ ਸਬ੍ਬੋ ਜਨੋ, ਸਸਾਵਕਸਙ੍ਘੋ ਸਮ੍ਮਾਸਮ੍ਬੁਦ੍ਧੋਤਿ ਅਤ੍ਥੋ. ਵਿਹਾਰਨ੍ਤਿ ਵਿਹਾਰੋ, ਸਬ੍ਬਤ੍ਥ ਪਚ੍ਚਤ੍ਤੇ ਉਪਯੋਗਵਚਨਂ ਦਟ੍ਠਬ੍ਬਂ.

ਵੇਸ੍ਸਭੂ ਕਿਰ ਭਗਵਾ ਉਸਭਵਤੀਨਗਰੇ ਖੇਮੇ ਮਿਗਦਾਯੇ ਪਰਿਨਿਬ੍ਬਾਯਿ. ਧਾਤੁਯੋ ਪਨਸ੍ਸ ਵਿਪ੍ਪਕਿਰਿਂਸੁ.

‘‘ਉਸਭਵਤਿਪੁਰੇ ਪੁਰੁਤ੍ਤਮੇ, ਜਿਨਵਸਭੋ ਭਗਵਾ ਹਿ ਵੇਸ੍ਸਭੂ;

ਉਪਵਨਵਿਹਰੇ ਮਨੋਰਮੇ, ਨਿਰੁਪਧਿਸੇਸਮੁਪਾਗਤੋ ਕਿਰਾ’’ਤਿ.

ਸੇਸਂ ਸਬ੍ਬਤ੍ਥ ਗਾਥਾਸੁ ਪਾਕਟਮੇਵਾਤਿ.

ਵੇਸ੍ਸਭੂਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਏਕਵੀਸਤਿਮੋ ਬੁਦ੍ਧਵਂਸੋ.