੨੨. ਸਿਖੀਬੁਦ੍ਧਵਂਸਵਣ੍ਣਨਾ

ਵਿਪਸ੍ਸਿਸ੍ਸ ਅਪਰਭਾਗੇ ਅਨ੍ਤਰਹਿਤੇ ਚ ਤਸ੍ਮਿਂ ਕਪ੍ਪੇ ਤਤੋ ਪਰਂ ਏਕੂਨਸਟ੍ਠਿਯਾ ਕਪ੍ਪੇਸੁ ਬੁਦ੍ਧਾ ਲੋਕੇ ਨ ਉਪ੍ਪਜ੍ਜਿਂਸੁ. ਅਪਗਤਬੁਦ੍ਧਾਲੋਕੋ ਅਹੋਸਿ. ਕਿਲੇਸਦੇਵਪੁਤ੍ਤਮਾਰਾਨਂ ਏਕਰਜ੍ਜਂ ਅਪਗਤਕਣ੍ਟਕਂ ਅਹੋਸਿ. ਇਤੋ ਪਨ ਏਕਤ੍ਤਿਂਸਕਪ੍ਪੇ ਸਿਨਿਦ੍ਧਸੁਕ੍ਖਸਾਰਦਾਰੁਪਚਿਤੋ ਪਹੂਤਸਪ੍ਪਿਸਿਤ੍ਤੋ ਨਿਧੂਮੋ ਸਿਖੀ ਵਿਯ ਸਿਖੀ ਚ ਵੇਸ੍ਸਭੂ ਚਾਤਿ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਲੋਕੇ ਉਪ੍ਪਜ੍ਜਿਂਸੁ. ਤਤ੍ਥ ਸਿਖੀ ਪਨ ਭਗਵਾ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਕੁਸਲਕਰਣਵਤੀ ਅਰੁਣਵਤੀਨਗਰੇ ਪਰਮਗੁਣਵਤੋ ਅਰੁਣਵਤੋ ਨਾਮ ਰਞ੍ਞੋ ਅਗ੍ਗਮਹੇਸਿਯਾ ਰਤ੍ਤਕਨਕਪਟਿਬਿਮ੍ਬਰੁਚਿਰਪ੍ਪਭਾਯ ਪਭਾਵਤਿਯਾ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸ ਮਾਸੇ ਵੀਤਿਨਾਮੇਤ੍ਵਾ ਨਿਸਭੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਨੇਮਿਤ੍ਤਿਕਾ ਪਨਸ੍ਸ ਨਾਮਂ ਕਰੋਨ੍ਤਾ ਉਣ੍ਹੀਸਸ੍ਸ ਸਿਖਾ ਵਿਯ ਉਗ੍ਗਤਤ੍ਤਾ ‘‘ਸਿਖੀ’’ਤਿ ਨਾਮਮਕਂਸੁ. ਸੋ ਸਤ੍ਤਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਸੁਚਨ੍ਦਕਸਿਰੀਗਿਰਿਯਸਨਾਰਿਵਸਭ ਨਾਮਕਾ ਤਯੋ ਪਾਸਾਦਾ ਅਹੇਸੁਂ. ਸਬ੍ਬਕਾਮਾਦੇਵਿਪ੍ਪਮੁਖਾਨਿ ਚਤੁਵੀਸਤਿ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸਬ੍ਬਕਾਮਾਦੇਵਿਯਾ ਗੁਣਗਣਾਤੁਲੇ ਅਤੁਲੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਹਤ੍ਥਿਯਾਨੇਨ ਹਤ੍ਥਿਕ੍ਖਨ੍ਧਵਰਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਸਤ੍ਤਤਿਪੁਰਿਸਸਤਸਹਸ੍ਸਾਨਿ ਅਨੁਪਬ੍ਬਜਿਂਸੁ. ਸੋ ਤੇਹਿ ਪਰਿਵੁਤੋ ਅਟ੍ਠਮਾਸਂ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਗਣਸਙ੍ਗਣਿਕਂ ਪਹਾਯ ਸੁਦਸ੍ਸਨਨਿਗਮੇ ਪਿਯਦਸ੍ਸੀਸੇਟ੍ਠਿਨੋ ਧੀਤੁਯਾ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਤਰੁਣਖਦਿਰਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਅਨੋਮਦਸ੍ਸਿਨਾ ਨਾਮ ਤਾਪਸੇਨ ਦਿਨ੍ਨਾ ਅਟ੍ਠ ਕੁਸਤਿਣਮੁਟ੍ਠਿਯੋ ਗਹੇਤ੍ਵਾ ਪੁਣ੍ਡਰੀਕਬੋਧਿਂ ਉਪਸਙ੍ਕਮਿ. ਤਸ੍ਸਾ ਕਿਰ ਪੁਣ੍ਡਰੀਕਬੋਧਿਯਾਪਿ ਪਾਟਲਿਯਾ ਪਮਾਣਮੇਵ ਪਮਾਣਂ ਅਹੋਸਿ. ਤਂਦਿਵਸਮੇਵ ਸੋ ਪਣ੍ਣਾਸਰਤਨਕ੍ਖਨ੍ਧੋ ਹੁਤ੍ਵਾ ਅਬ੍ਭੁਗ੍ਗਤੋ, ਸਾਖਾਪਿਸ੍ਸ ਪਣ੍ਣਾਸਰਤਨਮਤ੍ਤਾਵ. ਸੋ ਦਿਬ੍ਬੇਹਿ ਗਨ੍ਧੇਹਿ ਪੁਪ੍ਫੇਹਿ ਸਞ੍ਛਨ੍ਨੋ ਅਹੋਸਿ. ਨ ਕੇਵਲਂ ਪੁਪ੍ਫੇਹੇਵ, ਫਲੇਹਿਪਿ ਸਞ੍ਛਨ੍ਨੋ ਅਹੋਸਿ. ਤਸ੍ਸ ਏਕਪਸ੍ਸਤੋ ਤਰੁਣਾਨਿ ਫਲਾਨਿ ਏਕਤੋ ਮਜ੍ਝਿਮਾਨਿ ਏਕਤੋ ਨਾਤਿਪਕ੍ਕਾਨਿ ਏਕਤੋ ਪਕ੍ਖਿਤ੍ਤਦਿਬ੍ਬੋਜਾਨਿ ਵਿਯ ਸੁਰਸਾਨਿ ਵਣ੍ਣਗਨ੍ਧਰਸਸਮ੍ਪਨ੍ਨਾਨਿ ਤਤੋ ਤਤੋ ਓਲਮ੍ਬਨ੍ਤਿ. ਯਥਾ ਚ ਸੋ, ਏਵਂ ਦਸਸਹਸ੍ਸਿਚਕ੍ਕਵਾਲ਼ੇਸੁ ਪੁਪ੍ਫੂਪਗਾ ਰੁਕ੍ਖਾ ਪੁਪ੍ਫੇਹਿ ਫਲੂਪਗਾ ਰੁਕ੍ਖਾ ਫਲੇਹਿ ਪਟਿਮਣ੍ਡਿਤਾ ਅਹੇਸੁਂ.

ਸੋ ਤਤ੍ਥ ਚਤੁਵੀਸਤਿਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਨਿਸੀਦਿ. ਏਵਂ ਨਿਸੀਦਿਤ੍ਵਾ ਛਤ੍ਤਿਂਸ ਯੋਜਨਵਿਤ੍ਥਤਂ ਸਮਾਰਂ ਮਾਰਬਲਂ ਵਿਧਮਿਤ੍ਵਾ ਸਮ੍ਬੋਧਿਂ ਪਾਪੁਣਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਬੋਧਿਸਮੀਪੇਯੇਵ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਬ੍ਰਹ੍ਮਾਯਾਚਨਂ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨਾ ਸਹ ਪਬ੍ਬਜਿਤਾਨਂ ਸਤ੍ਤਤਿਯਾ ਭਿਕ੍ਖੁਸਤਸਹਸ੍ਸਾਨਂ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਸੁਰਪਥੇਨ ਗਨ੍ਤ੍ਵਾ ਵਿਵਿਧਾਵਰਣਵਤਿਯਾ ਅਰੁਣਵਤਿਯਾ ਰਾਜਧਾਨਿਯਾ ਸਮੀਪੇ ਮਿਗਾਜਿਨੁਯ੍ਯਾਨੇ ਓਤਰਿਤ੍ਵਾ ਤੇਹਿ ਮੁਨਿਗਣੇਹਿ ਪਰਿਵੁਤੋ ਤੇਸਂ ਮਜ੍ਝੇ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਕੋਟਿਸਤਸਹਸ੍ਸਾਨਂ ਪਠਮੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਵਿਪਸ੍ਸਿਸ੍ਸ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਸਿਖਿਵ੍ਹਯੋ ਆਸਿ ਜਿਨੋ, ਅਸਮੋ ਅਪ੍ਪਟਿਪੁਗ੍ਗਲੋ.

੨. ‘‘ਮਾਰਸੇਨਂ ਪਮਦ੍ਦਿਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ;

ਧਮ੍ਮਚਕ੍ਕਂ ਪਵਤ੍ਤੇਸਿ, ਅਨੁਕਮ੍ਪਾਯ ਪਾਣਿਨਂ.

੩. ‘‘ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਸਿਖਿਮ੍ਹਿ ਜਿਨਪੁਙ੍ਗਵੇ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੂ’’ਤਿ.

ਪੁਨਪਿ ਅਰੁਣਵਤਿਯਾ ਰਾਜਧਾਨਿਯਾ ਸਮੀਪੇਯੇਵ ਅਭਿਭੂਰਾਜਪੁਤ੍ਤਸ੍ਸ ਚ ਸਮ੍ਭਵਰਾਜਪੁਤ੍ਤਸ੍ਸ ਚਾਤਿ ਦ੍ਵਿਨ੍ਨਂ ਸਪਰਿਵਾਰਾਨਂ ਧਮ੍ਮਂ ਦੇਸੇਤ੍ਵਾ ਨਵੁਤਿਕੋਟਿਸਹਸ੍ਸਾਨਿ ਧਮ੍ਮਾਮਤਂ ਪਾਯੇਸਿ. ਸੋ ਦੁਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੪. ‘‘ਅਪਰਮ੍ਪਿ ਧਮ੍ਮਂ ਦੇਸੇਨ੍ਤੇ, ਗਣਸੇਟ੍ਠੇ ਨਰੁਤ੍ਤਮੇ;

ਨਵੁਤ੍ਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੂ’’ਤਿ.

ਯਦਾ ਪਨ ਸੂਰਿਯਵਤੀਨਗਰਦ੍ਵਾਰੇ ਚਮ੍ਪਕਰੁਕ੍ਖਮੂਲੇ ਤਿਤ੍ਥਿਯਮਦਮਾਨਭਞ੍ਜਨਤ੍ਥਂ ਸਬ੍ਬਜਨਬਨ੍ਧਨਮੋਕ੍ਖਤ੍ਥਞ੍ਚ ਯਮਕਪਾਟਿਹਾਰਿਯਂ ਕਰੋਨ੍ਤੋ ਭਗਵਾ ਧਮ੍ਮਂ ਦੇਸੇਸਿ, ਤਦਾ ਅਸੀਤਿਕੋਟਿਸਹਸ੍ਸਾਨਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਯਮਕਪਾਟਿਹਾਰਿਯਞ੍ਚ, ਦਸ੍ਸਯਨ੍ਤੇ ਸਦੇਵਕੇ;

ਅਸੀਤਿਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਅਭਿਭੁਨਾ ਚ ਸਮ੍ਭਵੇਨ ਚ ਰਾਜਪੁਤ੍ਤੇਨ ਸਦ੍ਧਿਂ ਪਬ੍ਬਜਿਤਾਨਂ ਅਰਹਨ੍ਤਾਨਂ ਸਤਸਹਸ੍ਸਾਨਂ ਮਜ੍ਝੇ ਨਿਸੀਦਿਤ੍ਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ, ਅਰੁਣਵਤੀਨਗਰੇ ਞਾਤਿਸਮਾਗਮੇ ਪਬ੍ਬਜਿਤਾਨਂ ਅਸੀਤਿਯਾ ਭਿਕ੍ਖੁਸਹਸ੍ਸਾਨਂ ਮਜ੍ਝੇ ਨਿਸੀਦਿਤ੍ਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਧਨਞ੍ਜਯਨਗਰੇ ਧਨਪਾਲਕਨਾਗਵਿਨਯਨਸਮਯੇ ਪਬ੍ਬਜਿਤਾਨਂ ਸਤ੍ਤਤਿਯਾ ਭਿਕ੍ਖੁਸਹਸ੍ਸਾਨਂ ਮਜ੍ਝੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੬. ‘‘ਸਨ੍ਨਿਪਾਤਾ ਤਯੋ ਆਸੁਂ, ਸਿਖਿਸ੍ਸਾਪਿ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੭. ‘‘ਭਿਕ੍ਖੁਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਅਸੀਤਿਭਿਕ੍ਖੁਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੮. ‘‘ਸਤ੍ਤਤਿਭਿਕ੍ਖੁਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਅਨੁਪਲਿਤ੍ਤੋ ਪਦੁਮਂਵ, ਤੋਯਮ੍ਹਿ ਸਮ੍ਪਵਡ੍ਢਿਤ’’ਨ੍ਤਿ.

ਤਤ੍ਥ ਅਨੁਪਲਿਤ੍ਤੋ ਪਦੁਮਂਵਾਤਿ ਤੋਯੇ ਜਾਤਂ ਤੋਯੇਵ ਵਡ੍ਢਿਤਂ ਪਦੁਮਂ ਵਿਯ ਤੋਯੇਨ ਅਨੁਪਲਿਤ੍ਤਂ, ਸੋਪਿ ਭਿਕ੍ਖੁਸਨ੍ਨਿਪਾਤੋ ਲੋਕੇ ਜਾਤੋਪਿ ਲੋਕਧਮ੍ਮੇਹਿ ਅਨੁਪਲਿਤ੍ਤੋ ਅਹੋਸੀਤਿ ਅਤ੍ਥੋ.

ਤਦਾ ਕਿਰ ਅਮ੍ਹਾਕਂ ਬੋਧਿਸਤ੍ਤੋ ਕਤ੍ਥਚਿ ਅਸਂਸਟ੍ਠੋ ਪਰਿਭੁਤ੍ਤਨਗਰੇ ਅਰਿਨ੍ਦਮੋ ਨਾਮ ਰਾਜਾ ਹੁਤ੍ਵਾ ਸਿਖਿਮ੍ਹਿ ਸਤ੍ਥਰਿ ਪਰਿਭੁਤ੍ਤਨਗਰਮਨੁਪ੍ਪਤ੍ਤੇ ਸਪਰਿਵਾਰੋ ਰਾਜਾ ਭਗਵਤੋ ਪਚ੍ਚੁਗ੍ਗਨ੍ਤ੍ਵਾ ਪਸਾਦਵਡ੍ਢਿਤਹਦਯਨਯਨਸੋਤੋ ਦਸਬਲਸ੍ਸ ਅਮਲਚਰਣਕਮਲਯੁਗਲ਼ੇਸੁ ਸਪਰਿਵਾਰੋ ਸਿਰਸਾ ਅਭਿਵਨ੍ਦਿਤ੍ਵਾ ਦਸਬਲਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਇਸ੍ਸਰਿਯਕੁਲਵਿਭਵਸਦ੍ਧਾਨੁਰੂਪਂ ਮਹਾਦਾਨਂ ਦਤ੍ਵਾ ਦੁਸ੍ਸਭਣ੍ਡਾਗਾਰਦ੍ਵਾਰਾਨਿ ਵਿਵਰਾਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਗ੍ਘਾਨਿ ਵਤ੍ਥਾਨਿ ਅਦਾਸਿ. ਅਤ੍ਤਨੋ ਚ ਬਲਰੂਪਲਕ੍ਖਣਜਵਸਮ੍ਪਨ੍ਨਹੇਮਜਾਲਮਾਲਾਸਮਲਙ੍ਕਤਂ ਨਵਕਨਕਰੁਚਿਰਦਣ੍ਡਕੋਸਚਾਮਰਯੁਗਵਿਰਾਜਿਤਂ ਵਿਪੁਲਮੁਦੁਕਣ੍ਣਂ ਚਨ੍ਦਰਾਜਿਵਿਰਾਜਿਤਵਦਨਸੋਭਂ ਏਰਾਵਣਵਾਰਣਮਿਵ ਅਰਿਵਾਰਣਂ ਵਰਵਾਰਣਂ ਦਤ੍ਵਾ ਵਾਰਣਪ੍ਪਮਾਣਮੇਵ ਕਤ੍ਵਾ ਕਪ੍ਪਿਯਭਣ੍ਡਞ੍ਚ ਅਦਾਸਿ. ਸੋਪਿ ਨਂ ਸਤ੍ਥਾ – ‘‘ਇਤੋ ਏਕਤ੍ਤਿਂਸਕਪ੍ਪੇ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੯. ‘‘ਅਹਂ ਤੇਨ ਸਮਯੇਨ, ਅਰਿਨ੍ਦਮੋ ਨਾਮ ਖਤ੍ਤਿਯੋ;

ਸਮ੍ਬੁਦ੍ਧਪ੍ਪਮੁਖਂ ਸਙ੍ਘਂ, ਅਨ੍ਨਪਾਨੇਨ ਤਪ੍ਪਯਿਂ.

੧੦. ‘‘ਬਹੁਂ ਦੁਸ੍ਸਵਰਂ ਦਤ੍ਵਾ, ਦੁਸ੍ਸਕੋਟਿਂ ਅਨਪ੍ਪਕਂ;

ਅਲਙ੍ਕਤਂ ਹਤ੍ਥਿਯਾਨਂ, ਸਮ੍ਬੁਦ੍ਧਸ੍ਸ ਅਦਾਸਹਂ.

੧੧. ‘‘ਹਤ੍ਥਿਯਾਨਂ ਨਿਮ੍ਮਿਨਿਤ੍ਵਾ, ਕਪ੍ਪਿਯਂ ਉਪਨਾਮਯਿਂ;

ਪੂਰਯਿਂ ਮਾਨਸਂ ਮਯ੍ਹਂ, ਨਿਚ੍ਚਂ ਦਲ਼੍ਹਮੁਪਟ੍ਠਿਤਂ.

੧੨. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸਿਖੀ ਲੋਕਗ੍ਗਨਾਯਕੋ;

ਏਕਤ੍ਤਿਂਸੇ ਇਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੩. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੪. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਨਿਮ੍ਮਿਨਿਤ੍ਵਾਤਿ ਤਸ੍ਸ ਹਤ੍ਥਿਨੋ ਪਮਾਣੇਨ ਤੁਲਯਿਤ੍ਵਾ. ਕਪ੍ਪਿਯਨ੍ਤਿ ਕਪ੍ਪਿਯਭਣ੍ਡਂ, ਭਿਕ੍ਖੂਨਂ ਯਂ ਭਣ੍ਡਂ ਕਪ੍ਪਤਿ ਗਹੇਤੁਂ, ਤਂ ਕਪ੍ਪਿਯਭਣ੍ਡਂ ਨਾਮ. ਪੂਰਯਿਂ ਮਾਨਸਂ ਮਯ੍ਹਨ੍ਤਿ ਮਮ ਚਿਤ੍ਤਂ ਦਾਨਪੀਤਿਯਾ ਪੂਰਯਿਂ, ਮਯ੍ਹਂ ਹਾਸੁਪ੍ਪਾਦਨਸਮਤ੍ਥਂ ਅਕਾਸਿਨ੍ਤਿ ਅਤ੍ਥੋ. ਨਿਚ੍ਚਂ ਦਲ਼੍ਹਮੁਪਟ੍ਠਿਤਨ੍ਤਿ ਨਿਚ੍ਚਕਾਲਂ ਦਾਨਂ ਦਸ੍ਸਾਮੀ’’ਤਿ ਦਾਨਵਸੇਨ ਦਲ਼੍ਹਂ ਉਪਟ੍ਠਿਤਂ ਚਿਤ੍ਤਨ੍ਤਿ ਅਤ੍ਥੋ.

ਤਸ੍ਸ ਪਨ ਭਗਵਤੋ ਨਗਰਂ ਅਰੁਣਵਤੀ ਨਾਮ ਅਹੋਸਿ. ਅਰੁਣਵਾ ਨਾਮ ਰਾਜਾ ਪਿਤਾ, ਪਭਾਵਤੀ ਨਾਮ ਮਾਤਾ, ਅਭਿਭੂ ਚ ਸਮ੍ਭਵੋ ਚ ਦ੍ਵੇ ਅਗ੍ਗਸਾਵਕਾ, ਖੇਮਙ੍ਕਰੋ ਨਾਮੁਪਟ੍ਠਾਕੋ, ਸਖਿਲਾ ਚ ਮਦੁਮਾ ਚ ਦ੍ਵੇ ਅਗ੍ਗਸਾਵਿਕਾ, ਪੁਣ੍ਡਰੀਕਰੁਕ੍ਖੋ ਬੋਧਿ, ਸਰੀਰਞ੍ਚਸ੍ਸ ਸਤ੍ਤਤਿਹਤ੍ਥੁਬ੍ਬੇਧਂ ਅਹੋਸਿ. ਸਰੀਰਪ੍ਪਭਾ ਨਿਚ੍ਚਕਾਲਂ ਯੋਜਨਤ੍ਤਯਂ ਫਰਿਤ੍ਵਾ ਅਟ੍ਠਾਸਿ. ਸਤ੍ਤਤਿਵਸ੍ਸਸਹਸ੍ਸਾਨਿ ਆਯੁ, ਸਬ੍ਬਕਾਮਾ ਨਾਮਸ੍ਸ ਅਗ੍ਗਮਹੇਸੀ, ਅਤੁਲੋ ਨਾਮਸ੍ਸ ਪੁਤ੍ਤੋ, ਹਤ੍ਥਿਯਾਨੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੧੫. ‘‘ਨਗਰਂ ਅਰੁਣਵਤੀ ਨਾਮ, ਅਰੁਣੋ ਨਾਮ ਖਤ੍ਤਿਯੋ;

ਪਭਾਵਤੀ ਨਾਮ ਜਨਿਕਾ, ਸਿਖਿਸ੍ਸਾਪਿ ਮਹੇਸਿਨੋ.

੨੦. ‘‘ਅਭਿਭੂ ਸਮ੍ਭਵੋ ਚੇਵ, ਅਹੇਸੁਂ ਅਗ੍ਗਸਾਵਕਾ;

ਖੇਮਙ੍ਕਰੋ ਨਾਮੁਪਟ੍ਠਾਕੋ, ਸਿਖਿਸ੍ਸਾਪਿ ਮਹੇਸਿਨੋ.

੨੧. ‘‘ਸਖਿਲਾ ਚ ਪਦੁਮਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਪੁਣ੍ਡਰੀਕੋਤਿ ਵੁਚ੍ਚਤਿ.

੨੨. ‘‘ਸਿਰਿਵਡ੍ਢੋ ਚ ਨਨ੍ਦੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;

ਚਿਤ੍ਤਾ ਚੇਵ ਸੁਗੁਤ੍ਤਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.

੨੩. ‘‘ਉਚ੍ਚਤ੍ਤਨੇਨ ਸੋ ਬੁਦ੍ਧੋ, ਸਤ੍ਤਤਿਹਤ੍ਥਮੁਗ੍ਗਤੋ;

ਕਞ੍ਚਨਗ੍ਘਿਯਸਙ੍ਕਾਸੋ, ਦ੍ਵਤ੍ਤਿਂਸਵਰਲਕ੍ਖਣੋ.

੨੪. ‘‘ਤਸ੍ਸਾਪਿ ਬ੍ਯਾਮਪ੍ਪਭਾ ਕਾਯਾ, ਦਿਵਾਰਤ੍ਤਿਂ ਨਿਰਨ੍ਤਰਂ;

ਦਿਸੋਦਿਸਂ ਨਿਚ੍ਛਰਨ੍ਤਿ, ਤੀਣਿ ਯੋਜਨਸੋ ਪਭਾ.

੨੫. ‘‘ਸਤ੍ਤਤਿਵਸ੍ਸਸਹਸ੍ਸਾਨਿ, ਆਯੁ ਤਸ੍ਸ ਮਹੇਸਿਨੋ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੬. ‘‘ਧਮ੍ਮਮੇਘਂ ਪਵਸ੍ਸੇਤ੍ਵਾ, ਤੇਮਯਿਤ੍ਵਾ ਸਦੇਵਕੇ;

ਖੇਮਨ੍ਤਂ ਪਾਪਯਿਤ੍ਵਾਨ, ਨਿਬ੍ਬੁਤੋ ਸੋ ਸਸਾਵਕੋ.

੨੭. ‘‘ਅਨੁਬ੍ਯਞ੍ਜਨਸਮ੍ਪਨ੍ਨਂ, ਦ੍ਵਤ੍ਤਿਂਸਵਰਲਕ੍ਖਣਂ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਪੁਣ੍ਡਰੀਕੋਤਿ ਸੇਤਮ੍ਬਰੁਕ੍ਖੋ. ਤੀਣਿ ਯੋਜਨਸੋ ਪਭਾਤਿ ਤੀਣਿ ਯੋਜਨਾਨਿ ਪਭਾ ਨਿਚ੍ਛਰਨ੍ਤੀਤਿ ਅਤ੍ਥੋ. ਧਮ੍ਮਮੇਘਨ੍ਤਿ ਧਮ੍ਮਵਸ੍ਸਂ, ਧਮ੍ਮਵਸ੍ਸਨਕੋ ਬੁਦ੍ਧਮੇਘੋ. ਤੇਮਯਿਤ੍ਵਾਤਿ ਧਮ੍ਮਕਥਾਸਲਿਲੇਨ ਤੇਮੇਤ੍ਵਾ, ਸਿਞ੍ਚਿਤ੍ਵਾਤਿ ਅਤ੍ਥੋ. ਸਦੇਵਕੇਤਿ ਸਦੇਵਕੇ ਸਤ੍ਤੇ. ਖੇਮਨ੍ਤਨ੍ਤਿ ਖੇਮਨ੍ਤਂ ਨਿਬ੍ਬਾਨਂ. ਅਨੁਬ੍ਯਞ੍ਜਨਸਮ੍ਪਨ੍ਨਨ੍ਤਿ ਤਮ੍ਬਨਖਤੁਙ੍ਗਨਾਸਵਟ੍ਟਙ੍ਗੁਲਿਤਾਦੀਹਿ ਅਸੀਤਿਯਾ ਅਨੁਬ੍ਯਞ੍ਜਨੇਹਿ ਸਮ੍ਪਨ੍ਨਂ, ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਪਟਿਮਣ੍ਡਿਤਂ ਭਗਵਤੋ ਸਰੀਰਨ੍ਤਿ ਅਤ੍ਥੋ. ਸਿਖੀ ਕਿਰ ਸਮ੍ਮਾਸਮ੍ਬੁਦ੍ਧੋ ਸੀਲਵਤੀਨਗਰੇ ਅਸ੍ਸਾਰਾਮੇ ਪਰਿਨਿਬ੍ਬਾਯਿ.

‘‘ਸਿਖੀਵ ਲੋਕੇ ਤਪਸਾ ਜਲਿਤ੍ਵਾ, ਸਿਖੀਵ ਮੇਘਾਗਮਨੇ ਨਦਿਤ੍ਵਾ;

ਸਿਖੀ ਮਹੇਸਿਨ੍ਧਨਵਿਪ੍ਪਹੀਨੋ, ਸਿਖੀਵ ਸਨ੍ਤਿਂ ਸੁਗਤੋ ਗਤੋ ਸੋ’’.

ਸਿਖਿਸ੍ਸ ਕਿਰ ਭਗਵਤੋ ਧਾਤੁਯੋ ਏਕਗ੍ਘਨਾਵ ਹੁਤ੍ਵਾ ਅਟ੍ਠਂਸੁ ਨ ਵਿਪ੍ਪਕਿਰਿਂਸੁ. ਸਕਲਜਮ੍ਬੁਦੀਪਵਾਸਿਨੋ ਪਨ ਮਨੁਸ੍ਸਾ ਤਿਯੋਜਨੁਬ੍ਬੇਧਂ ਸਤ੍ਤਰਤਨਮਯਂ ਹਿਮਗਿਰਿਸਦਿਸਸੋਭਂ ਥੂਪਮਕਂਸੁ. ਸੇਸਮੇਤ੍ਥ ਗਾਥਾਸੁ ਪਾਕਟਮੇਵਾਤਿ.

ਸਿਖੀਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਵੀਸਤਿਮੋ ਬੁਦ੍ਧਵਂਸੋ.