੨੧. ਵਿਪਸ੍ਸੀਬੁਦ੍ਧਵਂਸਵਣ੍ਣਨਾ

ਫੁਸ੍ਸਸ੍ਸ ਬੁਦ੍ਧਸ੍ਸ ਅਪਰਭਾਗੇ ਸਾਨ੍ਤਰਕਪ੍ਪੇ ਤਸ੍ਮਿਞ੍ਚ ਕਪ੍ਪੇ ਵੀਤਿਵਤ੍ਤੇ ਇਤੋ ਏਕਨਵੁਤਿਕਪ੍ਪੇ ਵਿਜਿਤਸਬ੍ਬਕਪ੍ਪੋ ਪਰਹਿਤਨਿਰਤਸਙ੍ਕਪ੍ਪੋ ਸਬ੍ਬਤ੍ਥ ਵਿਪਸ੍ਸੀ ਵਿਪਸ੍ਸੀ ਨਾਮ ਸਤ੍ਥਾ ਲੋਕੇ ਉਦਪਾਦਿ. ਸੋ ਪਾਰਮਿਯੋ ਪੂਰੇਤ੍ਵਾ ਅਨੇਕਰਤਨਮਣਿਵਿਸਰਸਮੁਜ੍ਜੋਤਿਤਭਵਨੇ ਤੁਸਿਤਭਵਨੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਬਨ੍ਧੁਮਤੀਨਗਰੇ ਅਨੇਕਬਨ੍ਧੁਮਤੋ ਬਨ੍ਧੁਮਤੋ ਰਞ੍ਞੋ ਬਨ੍ਧੁਮਤਿਯਾ ਨਾਮ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਸੋ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਖੇਮੇ ਮਿਗਦਾਯੇ ਮਾਤੁਦਰਤੋ ਅਸਿਤਨੀਰਦਰਾਜਿਤੋ ਪੁਣ੍ਣਚਨ੍ਦੋ ਵਿਯ ਨਿਕ੍ਖਮਿ. ਨਾਮਗ੍ਗਹਣਦਿਵਸੇ ਪਨਸ੍ਸ ਲਕ੍ਖਣਪਾਠਕਾ ਞਾਤਕਾ ਚ ਦਿਵਾ ਚ ਰਤ੍ਤਿਞ੍ਚ ਅਨ੍ਤਰਨ੍ਤਰਾ ਨਿਮ੍ਮਿਸਸਞ੍ਜਨਿਤਨ੍ਧਕਾਰਵਿਰਹੇਨ ਵਿਸੁਦ੍ਧਂ ਪਸ੍ਸਨ੍ਤਿ, ਵਿਵਟੇਹਿ ਵਾ ਅਕ੍ਖੀਹਿ ਪਸ੍ਸਤੀਤਿ ‘‘ਵਿਪਸ੍ਸੀ’’ਤਿ ਨਾਮਮਕਂਸੁ. ‘‘ਵਿਚੇਯ੍ਯ ਵਿਚੇਯ੍ਯ ਪਸ੍ਸਤੀਤਿ ਵਿਪਸ੍ਸੀ’’ਤਿ ਵਦਨ੍ਤਿ. ਸੋ ਅਟ੍ਠਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਨਨ੍ਦ-ਸੁਨਨ੍ਦ-ਸਿਰਿਮਾਨਾਮਕਾ ਤਯੋ ਚਸ੍ਸ ਪਾਸਾਦਾ ਅਹੇਸੁਂ.

ਸੁਦਸ੍ਸਨਾਦੇਵਿਪ੍ਪਮੁਖਾਨਂ ਇਤ੍ਥੀਨਂ ਸਤਸਹਸ੍ਸਂ ਵੀਸਤਿ ਚ ਸਹਸ੍ਸਾਨਿ ਅਹੇਸੁਂ. ‘‘ਸੁਤਨੂ’’ਤਿਪਿ ਸੁਦਸ੍ਸਨਾ ਵੁਚ੍ਚਤਿ. ਸੋ ਅਟ੍ਠਵਸ੍ਸਸਹਸ੍ਸਾਨਂ ਅਚ੍ਚਯੇਨ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸੁਤਨੁਦੇਵਿਯਾ ਸਮਵਟ੍ਟਕ੍ਖਨ੍ਧੇ ਨਾਮ ਤਨਯੇ ਜਾਤੇ ਆਜਞ੍ਞਰਥੇਨ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਪੁਰਿਸਾਨਂ ਚਤੁਰਾਸੀਤਿਸਤਸਹਸ੍ਸਾਨਿ ਅਨੁਪਬ੍ਬਜਿਂਸੁ. ਸੋ ਤੇਹਿ ਪਰਿਵੁਤੋ ਮਹਾਪੁਰਿਸੋ ਅਟ੍ਠਮਾਸਂ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਸੁਦਸ੍ਸਨਸੇਟ੍ਠਿਧੀਤਾਯ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਕੁਸੁਮਸਮਲਙ੍ਕਤੇ ਸਾਲਵਨੇ ਦਿਵਾਵਿਹਾਰਂ ਕਤ੍ਵਾ ਸੁਜਾਤੇਨ ਨਾਮ ਯਵਪਾਲਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਪਾਟਲਿਬੋਧਿਂ ਸਮਲਙ੍ਕਤਂ ਦਿਸ੍ਵਾ ਦਕ੍ਖਿਣਦਿਸਾਭਾਗੇਨ ਤਂ ਉਪਾਗਮਿ.

ਤਸ੍ਸਾ ਪਨ ਪਾਟਲਿਯਾ ਸਮਵਟ੍ਟਕ੍ਖਨ੍ਧੋ ਤਂ ਦਿਵਸਂ ਪਣ੍ਣਾਸਰਤਨੋ ਹੁਤ੍ਵਾ ਅਬ੍ਭੁਗ੍ਗਤੋ ਸਾਖਾ ਪਣ੍ਣਾਸਰਤਨਾ ਉਬ੍ਬੇਧੇਨ ਰਤਨਸਤਂ ਅਹੋਸਿ. ਤਂਦਿਵਸਮੇਵ ਸਾ ਪਾਟਲੀ ਕਣ੍ਣਿਕਾਬਦ੍ਧੇਹਿ ਵਿਯ ਪੁਪ੍ਫੇਹਿ ਪਰਮਸੁਰਭਿਗਨ੍ਧੇਹਿ ਮੂਲਤੋ ਪਟ੍ਠਾਯ ਸਬ੍ਬਸਞ੍ਛਨ੍ਨਾ ਅਹੋਸਿ. ਦਿਬ੍ਬਗਨ੍ਧੋ ਵਾਯਤਿ, ਨ ਕੇਵਲਂ ਤਦਾ ਅਯਮੇਵ ਪੁਪ੍ਫਿਤੋ, ਦਸਸਹਸ੍ਸਿ ਚਕ੍ਕਵਾਲ਼ੇਸੁ ਸਬ੍ਬੇ ਪਾਟਲਿਯੋ ਪੁਪ੍ਫਿਤਾਵ. ਨ ਕੇਵਲਂ ਪਾਟਲਿਯੋਵ, ਦਸਸਹਸ੍ਸਿਚਕ੍ਕਵਾਲ਼ੇਸੁ ਸਬ੍ਬਰੁਕ੍ਖਗੁਮ੍ਬਲਤਾਯੋਪਿ ਪੁਪ੍ਫਿਂਸੁ. ਮਹਾਸਮੁਦ੍ਦੋਪਿ ਪਞ੍ਚਵਣ੍ਣੇਹਿ ਪਦੁਮੇਹਿ ਕੁਵਲਯੁਪ੍ਪਲਕੁਮੁਦੇਹਿ ਸਞ੍ਛਨ੍ਨੋ ਸੀਤਲਮਧੁਰਸਲਿਲੋ ਅਹੋਸਿ. ਸਬ੍ਬਮ੍ਪਿ ਚ ਦਸਸਹਸ੍ਸਿ ਚਕ੍ਕਵਾਲ਼ਬ੍ਭਨ੍ਤਰਂ ਧਜਮਾਲਾਕੁਲਂ ਅਹੋਸਿ. ਤਤ੍ਥ ਤਤ੍ਥ ਪਟਿਮਾਲਾਗੁਲਵਿਪ੍ਪਕਿਣ੍ਣਂ ਨਾਨਾਸੁਰਭਿਕੁਸੁਮਸਜ੍ਜਿਤਧਰਣੀਤਲਂ ਧੂਪਚੁਣ੍ਣਨ੍ਧਕਾਰਂ ਅਹੋਸਿ. ਤਂ ਉਪਗਨ੍ਤ੍ਵਾ ਤੇਪਣ੍ਣਾਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਚਤੁਰਙ੍ਗਸਮਨ੍ਨਾਗਤਂ ਵੀਰਿਯਂ ਅਧਿਟ੍ਠਾਯ – ‘‘ਯਾਵ ਬੁਦ੍ਧੋ ਨ ਹੋਮਿ, ਤਾਵ ਇਤੋ ਨ ਉਟ੍ਠਹਾਮੀ’’ਤਿ ਪਟਿਞ੍ਞਂ ਕਤ੍ਵਾ ਨਿਸੀਦਿ. ਏਵਂ ਨਿਸੀਦਿਤ੍ਵਾ ਸਮਾਰਂ ਮਾਰਬਲਂ ਵਿਧਮਿਤ੍ਵਾ ਮਗ੍ਗਾਨੁਕ੍ਕਮੇਨ ਚਤ੍ਤਾਰਿ ਮਗ੍ਗਞਾਣਾਨਿ ਮਗ੍ਗਾਨਨ੍ਤਰਂ ਚਤ੍ਤਾਰਿ ਫਲਞਾਣਾਨਿ ਚਤਸ੍ਸੋ ਪਟਿਸਮ੍ਭਿਦਾ ਚਤੁਯੋਨਿਪਰਿਚ੍ਛੇਦਕਞਾਣਂ ਪਞ੍ਚਗਤਿਪਰਿਚ੍ਛੇਦਕਞਾਣਂ ਚਤੁਵੇਸਾਰਜ੍ਜਞਾਣਾਨਿ ਛ ਅਸਾਧਾਰਣਞਾਣਾਨਿ ਚ ਸਕਲੇ ਚ ਬੁਦ੍ਧਗੁਣੇ ਹਤ੍ਥਗਤੇ ਕਤ੍ਵਾ ਪਰਿਪੁਣ੍ਣਸਙ੍ਕਪ੍ਪੋ ਬੋਧਿਪਲ੍ਲਙ੍ਕੇ ਨਿਸਿਨ੍ਨੋਵ –

‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ. (ਧ. ਪ. ੧੫੩-੧੫੪);

‘‘ਅਯੋਘਨਹਤਸ੍ਸੇਵ, ਜਲਤੋ ਜਾਤਵੇਦਸੋ;

ਅਨੁਪੁਬ੍ਬੂਪਸਨ੍ਤਸ੍ਸ, ਯਥਾ ਨ ਞਾਯਤੇ ਗਤਿ.

‘‘ਏਵਂ ਸਮ੍ਮਾ ਵਿਮੁਤ੍ਤਾਨਂ, ਕਾਮਬਨ੍ਧੋਘਤਾਰਿਨਂ;

ਪਞ੍ਞਾਪੇਤੁਂ ਗਤੀ ਨਤ੍ਥਿ, ਪਤ੍ਤਾਨਂ ਅਚਲਂ ਸੁਖ’’ਨ੍ਤਿ. (ਉਦਾ. ੮੦) –

ਏਵਂ ਉਦਾਨਂ ਉਦਾਨੇਤ੍ਵਾ ਬੋਧਿਸਮੀਪੇਯੇਵ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਬ੍ਰਹ੍ਮਾਯਾਚਨਂ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨੋ ਵੇਮਾਤਿਕਸ੍ਸ ਭਾਤਿਕਸ੍ਸ ਖਣ੍ਡਕੁਮਾਰਸ੍ਸ ਚ ਪੁਰੋਹਿਤਪੁਤ੍ਤਸ੍ਸ ਤਿਸ੍ਸਕੁਮਾਰਸ੍ਸ ਚ ਉਪਨਿਸ੍ਸਯਸਮ੍ਪਤ੍ਤਿਂ ਓਲੋਕੇਤ੍ਵਾ ਆਕਾਸੇਨ ਗਨ੍ਤ੍ਵਾ ਖੇਮੇ ਮਿਗਦਾਯੇ ਓਤਰਿਤ੍ਵਾ ਉਭੋਪਿ ਤੇ ਉਯ੍ਯਾਨਪਾਲੇਨ ਪਕ੍ਕੋਸਾਪੇਤ੍ਵਾ ਤੇਸਂ ਪਰਿਵਾਰਾਨਂ ਮਜ੍ਝੇ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਅਪਰਿਮਿਤਾਨਂ ਦੇਵਤਾਨਂ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਫੁਸ੍ਸਸ੍ਸ ਚ ਅਪਰੇਨ, ਸਮ੍ਬੁਦ੍ਧੋ ਦ੍ਵਿਪਦੁਤ੍ਤਮੋ;

ਵਿਪਸ੍ਸੀ ਨਾਮ ਨਾਮੇਨ, ਲੋਕੇ ਉਪ੍ਪਜ੍ਜਿ ਚਕ੍ਖੁਮਾ.

੨. ‘‘ਅਵਿਜ੍ਜਂ ਸਬ੍ਬਂ ਪਦਾਲੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ;

ਧਮ੍ਮਚਕ੍ਕਂ ਪਵਤ੍ਤੇਤੁਂ, ਪਕ੍ਕਾਮਿ ਬਨ੍ਧੁਮਤੀਪੁਰਂ.

੩. ‘‘ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ, ਉਭੋ ਬੋਧੇਸਿ ਨਾਯਕੋ;

ਗਣਨਾਯ ਨ ਵਤ੍ਤਬ੍ਬੋ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਪਦਾਲੇਤ੍ਵਾਤਿ ਭਿਨ੍ਦਿਤ੍ਵਾ, ਅਵਿਜ੍ਜਨ੍ਧਕਾਰਂ ਭਿਨ੍ਦਿਤ੍ਵਾਤਿ ਅਤ੍ਥੋ. ‘‘ਵਤ੍ਤੇਤ੍ਵਾ ਚਕ੍ਕਮਾਰਾਮੇ’’ਤਿਪਿ ਪਾਠੋ, ਤਸ੍ਸ ਆਰਾਮੇਤਿ ਖੇਮੇ ਮਿਗਦਾਯੇਤਿ ਅਤ੍ਥੋ. ਉਭੋ ਬੋਧੇਸੀਤਿ ਅਤ੍ਤਨੋ ਕਨਿਟ੍ਠਭਾਤਿਕਂ ਖਣ੍ਡਂ ਰਾਜਪੁਤ੍ਤਂ ਤਿਸ੍ਸਞ੍ਚ ਪੁਰੋਹਿਤਪੁਤ੍ਤਨ੍ਤਿ ਉਭੋ ਬੋਧੇਸਿ. ਗਣਨਾਯ ਨ ਵਤ੍ਤਬ੍ਬੋਤਿ ਦੇਵਤਾਨਂ ਅਭਿਸਮਯਵਸੇਨ ਗਣਨਪਰਿਚ੍ਛੇਦੋ ਨਤ੍ਥੀਤਿ ਅਤ੍ਥੋ.

ਅਥਾਪਰੇਨ ਸਮਯੇਨ ਖਣ੍ਡਂ ਰਾਜਪੁਤ੍ਤਂ ਤਿਸ੍ਸਞ੍ਚ ਪੁਰੋਹਿਤਪੁਤ੍ਤਂ ਅਨੁਪਬ੍ਬਜਿਤਾਨਿ ਚਤੁਰਾਸੀਤਿਭਿਕ੍ਖੁਸਹਸ੍ਸਾਨਿ ਧਮ੍ਮਾਮਤਂ ਪਾਯੇਸਿ. ਸੋ ਦੁਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੪. ‘‘ਪੁਨਾਪਰਂ ਅਮਿਤਯਸੋ, ਤਤ੍ਥ ਸਚ੍ਚਂ ਪਕਾਸਯਿ;

ਚਤੁਰਾਸੀਤਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੂ’’ਤਿ.

ਤਤ੍ਥ ਤਤ੍ਥਾਤਿ ਖੇਮੇ ਮਿਗਦਾਯੇਤਿ ਅਤ੍ਥੋ. ‘‘ਚਤੁਰਾਸੀਤਿਸਹਸ੍ਸਾਨਿ, ਸਮ੍ਬੁਦ੍ਧਮਨੁਪਬ੍ਬਜੁ’’ਨ੍ਤਿ ਏਤ੍ਥ ਏਤੇ ਪਨ ਚਤੁਰਾਸੀਤਿਸਹਸ੍ਸਸਙ੍ਖਾਤਾ ਪੁਰਿਸਾ ਵਿਪਸ੍ਸਿਸ੍ਸ ਕੁਮਾਰਸ੍ਸ ਉਪਟ੍ਠਾਕਪੁਰਿਸਾਯੇਵ. ਤੇ ਪਾਤੋਵ ਵਿਪਸ੍ਸਿਕੁਮਾਰਸ੍ਸ ਉਪਟ੍ਠਾਨਂ ਆਗਨ੍ਤ੍ਵਾ ਕੁਮਾਰਮਦਿਸ੍ਵਾ ਪਾਤਰਾਸਤ੍ਥਾਯ ਗਨ੍ਤ੍ਵਾ ਭੁਤ੍ਤਪਾਤਰਾਸਾ ‘‘ਕੁਹਿਂ ਕੁਮਾਰੋ’’ਤਿ ਪੁਚ੍ਛਿਤ੍ਵਾ ਤਤੋ ‘‘ਉਯ੍ਯਾਨਭੂਮਿਂ ਗਤੋ’’ਤਿ ਸੁਤ੍ਵਾ ‘‘ਤਤ੍ਥੇਵ ਨਂ ਦਕ੍ਖਿਸ੍ਸਾਮਾ’’ਤਿ ਨਿਕ੍ਖਨ੍ਤਾ ਨਿਵਤ੍ਤਮਾਨਂ ਤਸ੍ਸ ਸਾਰਥਿਂ ਦਿਸ੍ਵਾ ‘‘ਕੁਮਾਰੋ ਪਬ੍ਬਜਿਤੋ’’ਤਿ ਸੁਤ੍ਵਾ ਸੁਤਟ੍ਠਾਨੇਯੇਵ ਸਬ੍ਬਾਭਰਣਾਨਿ ਮੁਞ੍ਚਿਤ੍ਵਾ ਅਨ੍ਤਰਾਪਣਤੋ ਕਾਸਾਯਾਨਿ ਵਤ੍ਥਾਨਿ ਆਹਰਾਪੇਤ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਪਬ੍ਬਜਿਂਸੁ. ਪਬ੍ਬਜਿਤ੍ਵਾ ਚ ਤੇ ਗਨ੍ਤ੍ਵਾ ਮਹਾਪੁਰਿਸਂ ਪਰਿਵਾਰਯਿਂਸੁ.

ਤਤੋ ਵਿਪਸ੍ਸੀ ਬੋਧਿਸਤ੍ਤੋ ‘‘ਪਧਾਨਚਰਿਯਂ ਚਰਨ੍ਤੋ ਆਕਿਣ੍ਣੋ ਵਿਹਰਾਮਿ, ਨ ਖੋ ਪਨਮੇਤਂ ਪਾਤਿਰੂਪਂ ਯਥੇਵ ਮਂ ਇਮੇ ਗਿਹਿਭੂਤਾ ਪੁਬ੍ਬੇ ਪਰਿਵਾਰੇਤ੍ਵਾ ਚਰਨ੍ਤਿ, ਇਦਾਨਿਪਿ ਤਥੇਵ ਕਿਂ ਇਮਿਨਾ ਗਣੇਨਾ’’ਤਿ ਗਣਸਙ੍ਗਣਿਕਾਯ ਉਕ੍ਕਣ੍ਠਿਤ੍ਵਾ ‘‘ਅਜ੍ਜੇਵ ਗਚ੍ਛਾਮੀ’’ਤਿ ਚਿਨ੍ਤੇਤ੍ਵਾ ਪੁਨ – ‘‘ਅਜ੍ਜ ਅਵੇਲਾ, ਸਚੇ ਪਨਾਹਂ ਅਜ੍ਜ ਗਮਿਸ੍ਸਾਮਿ, ਸਬ੍ਬੇਪਿਮੇ ਜਾਨਿਸ੍ਸਨ੍ਤਿ, ਸ੍ਵੇਵ ਗਮਿਸ੍ਸਾਮੀ’’ਤਿ ਚਿਨ੍ਤੇਸਿ. ਤਂਦਿਵਸਞ੍ਚ ਉਰੁਵੇਲਗਾਮਸਦਿਸੇ ਏਕਸ੍ਮਿਂ ਗਾਮੇ ਗਾਮਵਾਸਿਨੋ ਮਨੁਸ੍ਸਾ ਸ੍ਵਾਤਨਾਯ ਸਦ੍ਧਿਂ ਪਰਿਸਾਯ ਮਹਾਪੁਰਿਸਂ ਨਿਮਨ੍ਤਯਿਂਸੁ. ਤੇ ਤੇਸਂ ਚਤੁਰਾਸੀਤਿਸਹਸ੍ਸਾਨਂ ਮਹਾਪੁਰਿਸਸ੍ਸ ਚ ਪਾਯਾਸਮੇਵ ਪਟਿਯਾਦਯਿਂਸੁ. ਅਥ ਵਿਪਸ੍ਸੀ ਮਹਾਪੁਰਿਸੋ ਪੁਨਦਿਵਸੇ ਵਿਸਾਖਪੁਣ੍ਣਮਾਯ ਤਸ੍ਮਿਂ ਗਾਮੇ ਤੇਹਿ ਪਬ੍ਬਜਿਤਜਨੇਹਿ ਸਦ੍ਧਿਂ ਭਤ੍ਤਕਿਚ੍ਚਂ ਕਤ੍ਵਾ ਵਸਨਟ੍ਠਾਨਮੇਵ ਅਗਮਾਸਿ. ਤਤ੍ਰ ਤੇ ਪਬ੍ਬਜਿਤਾ ਮਹਾਪੁਰਿਸਸ੍ਸ ਵਤ੍ਤਂ ਦਸ੍ਸੇਤ੍ਵਾ ਅਤ੍ਤਨੋ ਅਤ੍ਤਨੋ ਰਤ੍ਤਿਟ੍ਠਾਨਦਿਵਾਟ੍ਠਾਨਾਨਿ ਪਵਿਸਿਂਸੁ.

ਬੋਧਿਸਤ੍ਤੋਪਿ ਪਣ੍ਣਸਾਲਂ ਪਵਿਸਿਤ੍ਵਾ ਨਿਸਿਨ੍ਨੋ ਚਿਨ੍ਤੇਸਿ – ‘‘ਅਯਂ ਕਾਲੋ ਨਿਕ੍ਖਮਿਤੁ’’ਨ੍ਤਿ ਨਿਕ੍ਖਮਿਤ੍ਵਾ ਪਣ੍ਣਸਾਲਦ੍ਵਾਰਂ ਪਿਦਹਿਤ੍ਵਾ ਬੋਧਿਮਣ੍ਡਾਭਿਮੁਖੋ ਪਾਯਾਸਿ. ਤੇ ਕਿਰ ਪਬ੍ਬਜਿਤਾ ਸਾਯਂ ਬੋਧਿਸਤ੍ਤਸ੍ਸ ਉਪਟ੍ਠਾਨਂ ਗਨ੍ਤ੍ਵਾ ਪਣ੍ਣਸਾਲਂ ਪਰਿਵਾਰੇਤ੍ਵਾ ਨਿਸਿਨ੍ਨਾ – ‘‘ਅਤਿਵਿਕਾਲੋ ਜਾਤੋ ਉਪਧਾਰੇਥਾ’’ਤਿ ਵਤ੍ਵਾ ਪਣ੍ਣਸਾਲਦ੍ਵਾਰਂ ਵਿਵਰਿਤ੍ਵਾ ਤਂ ਅਪਸ੍ਸਨ੍ਤਾਪਿ ‘‘ਕੁਹਿਂ ਨੁ ਗਤੋ ਮਹਾਪੁਰਿਸੋ’’ਤਿ ਨਾਨੁਬਨ੍ਧਿਂਸੁ. ‘‘ਗਣਵਾਸੇ ਨਿਬ੍ਬਿਨ੍ਨੋ ਏਕੋ ਵਿਹਰਿਤੁਕਾਮੋ ਮਞ੍ਞੇ ਮਹਾਪੁਰਿਸੋ ਬੁਦ੍ਧਭੂਤਂਯੇਵ ਤਂ ਪਸ੍ਸਿਸ੍ਸਾਮਾ’’ਤਿ ਅਨ੍ਤੋਜਮ੍ਬੁਦੀਪਾਭਿਮੁਖਾ ਚਾਰਿਕਂ ਪਕ੍ਕਮਿਂਸੁ. ਅਥ ਤੇ – ‘‘ਵਿਪਸ੍ਸਿਨਾ ਕਿਰ ਬੁਦ੍ਧਤ੍ਤਂ ਪਤ੍ਵਾ ਧਮ੍ਮਚਕ੍ਕਂ ਪਵਤ੍ਤਿਤ’’ਨ੍ਤਿ ਸੁਤ੍ਵਾ ਅਨੁਕ੍ਕਮੇਨ ਸਬ੍ਬੇ ਤੇ ਪਬ੍ਬਜਿਤਾ ਬਨ੍ਧੁਮਤਿਯਾ ਰਾਜਧਾਨਿਯਾ ਖੇਮੇ ਮਿਗਦਾਯੇ ਸਨ੍ਨਿਪਤਿਂਸੁ. ਤਤੋ ਤੇਸਂ ਭਗਵਾ ਧਮ੍ਮਂ ਦੇਸੇਸਿ, ਤਦਾ ਚਤੁਰਾਸੀਤਿਯਾ ਭਿਕ੍ਖੁਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਸੋ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਚਤੁਰਾਸੀਤਿਸਹਸ੍ਸਾਨਿ, ਸਮ੍ਬੁਦ੍ਧਂ ਅਨੁਪਬ੍ਬਜੁਂ;

ਤੇਸਮਾਰਾਮਪਤ੍ਤਾਨਂ, ਧਮ੍ਮਂ ਦੇਸੇਸਿ ਚਕ੍ਖੁਮਾ.

੬. ‘‘ਸਬ੍ਬਾਕਾਰੇਨ ਭਾਸਤੋ, ਸੁਤ੍ਵਾ ਉਪਨਿਸਾਦਿਨੋ;

ਤੇਪਿ ਧਮ੍ਮਵਰਂ ਗਨ੍ਤ੍ਵਾ, ਤਤਿਯਾਭਿਸਮਯੋ ਅਹੂ’’ਤਿ.

ਤਤ੍ਥ ਚਤੁਰਾਸੀਤਿਸਹਸ੍ਸਾਨਿ, ਸਮ੍ਬੁਦ੍ਧਂ ਅਨੁਪਬ੍ਬਜੁਨ੍ਤਿ ਏਤ੍ਥ ਅਨੁਨਾ ਯੋਗਤੋ ਸਮ੍ਬੁਦ੍ਧਨ੍ਤਿ ਉਪਯੋਗਵਚਨਂ ਕਤਨ੍ਤਿ ਵੇਦਿਤਬ੍ਬਂ, ਸਮ੍ਬੁਦ੍ਧਸ੍ਸ ਪਚ੍ਛਾ ਪਬ੍ਬਜਿਂਸੂਤਿ ਅਤ੍ਥੋ. ਲਕ੍ਖਣਂ ਸਦ੍ਦਸਤ੍ਥਤੋ ਗਹੇਤਬ੍ਬਂ. ‘‘ਤਤ੍ਥ ਆਰਾਮਪਤ੍ਤਾਨ’’ਨ੍ਤਿਪਿ ਪਾਠੋ. ਭਾਸਤੋਤਿ ਵਦਤੋ. ਉਪਨਿਸਾਦਿਨੋਤਿ ਗਨ੍ਤ੍ਵਾ ਉਪਨਿਸ੍ਸਾਯ ਧਮ੍ਮਦਾਨਂ ਦਦਤੋਤਿ ਅਤ੍ਥੋ. ਤੇਪੀਤਿ ਤੇ ਚਤੁਰਾਸੀਤਿਸਹਸ੍ਸਸਙ੍ਖਾਤਾ ਪਬ੍ਬਜਿਤਾ ਵਿਪਸ੍ਸਿਸ੍ਸ ਉਪਟ੍ਠਾਕਭੂਤਾ. ਗਨ੍ਤ੍ਵਾਤਿ ਤਸ੍ਸ ਧਮ੍ਮਂ ਞਤ੍ਵਾ. ਏਵਂ ਤੇਸਂ ਤਤਿਯੋ ਅਭਿਸਮਯੋ ਅਹੋਸਿ. ਖੇਮੇ ਮਿਗਦਾਯੇ ਵਿਪਸ੍ਸੀਸਮ੍ਮਾਸਮ੍ਬੁਦ੍ਧਂ ਦ੍ਵੇ ਚ ਅਗ੍ਗਸਾਵਕੇ ਅਨੁਪਬ੍ਬਜਿਤਾਨਂ ਭਿਕ੍ਖੂਨਂ ਅਟ੍ਠਸਟ੍ਠਿਸਤਸਹਸ੍ਸਾਨਂ ਮਜ੍ਝੇ ਨਿਸਿਨ੍ਨੋ ਵਿਪਸ੍ਸੀ ਭਗਵਾ –

‘‘ਖਨ੍ਤੀਪਰਮਂ ਤਪੋ ਤਿਤਿਕ੍ਖਾ, ਨਿਬ੍ਬਾਨਂ ਪਰਮਂ ਵਦਨ੍ਤਿ ਬੁਦ੍ਧਾ;

ਨ ਹਿ ਪਬ੍ਬਜਿਤੋ ਪਰੂਪਘਾਤੀ, ਨ ਸਮਣੋ ਹੋਤਿ ਪਰਂ ਵਿਹੇਠਯਨ੍ਤੋ.

‘‘ਸਬ੍ਬਪਾਪਸ੍ਸ ਅਕਰਣਂ, ਕੁਸਲਸ੍ਸ ਉਪਸਮ੍ਪਦਾ;

ਸਚਿਤ੍ਤਪਰਿਯੋਦਪਨਂ, ਏਤਂ ਬੁਦ੍ਧਾਨ ਸਾਸਨਂ.

‘‘ਅਨੂਪਵਾਦੋ ਅਨੂਪਘਾਤੋ, ਪਾਤਿਮੋਕ੍ਖੇ ਚ ਸਂਵਰੋ;

ਮਤ੍ਤਞ੍ਞੁਤਾ ਚ ਭਤ੍ਤਸ੍ਮਿਂ, ਪਨ੍ਤਞ੍ਚ ਸਯਨਾਸਨਂ;

ਅਧਿਚਿਤ੍ਤੇ ਚ ਆਯੋਗੋ, ਏਤਂ ਬੁਦ੍ਧਾਨ ਸਾਸਨ’’ਨ੍ਤਿ. (ਦੀ. ਨਿ. ੨.੯੦; ਧ. ਪ. ੧੮੩, ੧੮੪, ੧੮੫) –

ਇਮਂ ਪਾਤਿਮੋਕ੍ਖਂ ਉਦ੍ਦਿਸਿ. ਇਮਾ ਪਨ ਸਬ੍ਬਬੁਦ੍ਧਾਨਂ ਪਾਤਿਮੋਕ੍ਖੁਦ੍ਦੇਸਗਾਥਾਯੋ ਹੋਨ੍ਤੀਤਿ ਵੇਦਿਤਬ੍ਬਂ. ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਪੁਨ ਯਮਕਪਾਟਿਹਾਰਿਯਂ ਦਿਸ੍ਵਾ ਪਬ੍ਬਜਿਤਾਨਂ ਭਿਕ੍ਖੂਨਂ ਸਤਸਹਸ੍ਸਾਨਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਯਦਾ ਪਨ ਵਿਪਸ੍ਸਿਸ੍ਸ ਵੇਮਾਤਿਕਾ ਤਯੋ ਭਾਤਰੋ ਪਚ੍ਚਨ੍ਤਂ ਵੂਪਸਮੇਤ੍ਵਾ ਭਗਵਤੋ ਉਪਟ੍ਠਾਨਕਿਰਿਯਾਯ ਲਦ੍ਧਵਰਾ ਹੁਤ੍ਵਾ ਅਤ੍ਤਨੋ ਨਗਰਂ ਨੇਤ੍ਵਾ ਉਪਟ੍ਠਹਨ੍ਤਾ ਤਸ੍ਸ ਧਮ੍ਮਂ ਸੁਤ੍ਵਾ ਪਬ੍ਬਜਿਂਸੁ. ਤੇਸਂ ਅਸੀਤਿਸਤਸਹਸ੍ਸਾਨਂ ਮਜ੍ਝੇ ਨਿਸੀਦਿਤ੍ਵਾ ਭਗਵਾ ਖੇਮੇ ਮਿਗਦਾਯੇ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੭. ‘‘ਸਨ੍ਨਿਪਾਤਾ ਤਯੋ ਆਸੁਂ, ਵਿਪਸ੍ਸਿਸ੍ਸ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੮. ‘‘ਅਟ੍ਠਸਟ੍ਠਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਭਿਕ੍ਖੁਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੯. ‘‘ਅਸੀਤਿਭਿਕ੍ਖੁਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਤਤ੍ਥ ਭਿਕ੍ਖੁਗਣਮਜ੍ਝੇ, ਸਮ੍ਬੁਦ੍ਧੋ ਅਤਿਰੋਚਤੀ’’ਤਿ.

ਤਤ੍ਥ ਅਟ੍ਠਸਟ੍ਠਿਸਤਸਹਸ੍ਸਾਨਨ੍ਤਿ ਅਟ੍ਠਸਟ੍ਠਿਸਹਸ੍ਸਾਧਿਕਾਨਂ ਸਤਸਹਸ੍ਸਭਿਕ੍ਖੂਨਨ੍ਤਿ ਅਤ੍ਥੋ. ਤਤ੍ਥਾਤਿ ਤਤ੍ਥ ਖੇਮੇ ਮਿਗਦਾਯੇ. ਭਿਕ੍ਖੁਗਣਮਜ੍ਝੇਤਿ ਭਿਕ੍ਖੁਗਣਸ੍ਸ ਮਜ੍ਝੇ. ‘‘ਤਸ੍ਸ ਭਿਕ੍ਖੁਗਣਮਜ੍ਝੇ’’ਤਿਪਿ ਪਾਠੋ, ਤਸ੍ਸ ਭਿਕ੍ਖੁਗਣਸ੍ਸ ਮਜ੍ਝੇਤਿ ਅਤ੍ਥੋ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਮਹਿਦ੍ਧਿਕੋ ਮਹਾਨੁਭਾਵੋ ਅਤੁਲੋ ਨਾਮ ਨਾਗਰਾਜਾ ਹੁਤ੍ਵਾ ਅਨੇਕਨਾਗਕੋਟਿਸਤਸਹਸ੍ਸਪਰਿਵਾਰੋ ਹੁਤ੍ਵਾ ਸਪਰਿਵਾਰਸ੍ਸ ਦਸਬਲਸ੍ਸ ਅਸਮਬਲਸੀਲਸ੍ਸ ਕਰੁਣਾਸੀਤਲਹਦਯਸ੍ਸ ਸਕ੍ਕਾਰਕਰਣਤ੍ਥਂ ਸਤ੍ਤਰਤਨਮਯਂ ਚਨ੍ਦਮਣ੍ਡਲਸਙ੍ਕਾਸਂ ਦਟ੍ਠਬ੍ਬਸਾਰਮਣ੍ਡਂ ਮਣ੍ਡਪਂ ਕਾਰੇਤ੍ਵਾ ਤਤ੍ਥ ਨਿਸੀਦਾਪੇਤ੍ਵਾ ਸਤ੍ਤਾਹਂ ਦਿਬ੍ਬਵਿਭਵਾਨੁਰੂਪਂ ਮਹਾਦਾਨਂ ਦਤ੍ਵਾ ਸਤ੍ਤਰਤਨਖਚਿਤਂ ਮਹਾਰਹਂ ਸੁਵਣ੍ਣਮਯਂ ਨਾਨਾਮਣਿਜੁਤਿਵਿਸਰਸਮੁਜ੍ਜਲਂ ਪੀਠਂ ਭਗਵਤੋ ਅਦਾਸਿ. ਤਦਾ ਨਂ ਪੀਠਾਨੁਮੋਦਨਾਵਸਾਨੇ ‘‘ਇਤੋ ਅਯਂ ਏਕਨਵੁਤਿਕਪ੍ਪੇ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੧੦. ‘‘ਅਹਂ ਤੇਨ ਸਮਯੇਨ, ਨਾਗਰਾਜਾ ਮਹਿਦ੍ਧਿਕੋ;

ਅਤੁਲੋ ਨਾਮ ਨਾਮੇਨ, ਪੁਞ੍ਞਵਨ੍ਤੋ ਜੁਤਿਨ੍ਧਰੋ.

੧੧. ‘‘ਨੇਕਾਨਂ ਨਾਗਕੋਟੀਨਂ, ਪਰਿਵਾਰੇਤ੍ਵਾਨਹਂ ਤਦਾ;

ਵਜ੍ਜਨ੍ਤੋ ਦਿਬ੍ਬਤੁਰਿਯੇਹਿ, ਲੋਕਜੇਟ੍ਠਂ ਉਪਾਗਮਿਂ.

੧੨. ‘‘ਉਪਸਙ੍ਕਮਿਤ੍ਵਾ ਸਮ੍ਬੁਦ੍ਧਂ, ਵਿਪਸ੍ਸਿਂ ਲੋਕਨਾਯਕਂ;

ਮਣਿਮੁਤ੍ਤਰਤਨਖਚਿਤਂ, ਸਬ੍ਬਾਭਰਣਭੂਸਿਤਂ;

ਨਿਮਨ੍ਤੇਤ੍ਵਾ ਧਮ੍ਮਰਾਜਸ੍ਸ, ਸੁਵਣ੍ਣਪੀਠਮਦਾਸਹਂ.

੧੩. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸਙ੍ਘਮਜ੍ਝੇ ਨਿਸੀਦਿਯ;

ਏਕਨਵੁਤਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੪. ‘‘ਅਹੁ ਕਪਿਲਵ੍ਹਯਾ ਰਮ੍ਮਾ, ਨਿਕ੍ਖਮਿਤ੍ਵਾ ਤਥਾਗਤੋ;

ਪਧਾਨਂ ਪਦਹਿਤ੍ਵਾਨ, ਕਤ੍ਵਾ ਦੁਕ੍ਕਰਕਾਰਿਕਂ.

੧੫. ‘‘ਅਜਪਾਲਰੁਕ੍ਖਮੂਲਸ੍ਮਿਂ, ਨਿਸੀਦਿਤ੍ਵਾ ਤਥਾਗਤੋ;

ਤਤ੍ਥ ਪਾਯਾਸਂ ਪਗ੍ਗਯ੍ਹ, ਨੇਰਞ੍ਜਰਮੁਪੇਹਿਤਿ.

੧੬. ‘‘ਨੇਰਞ੍ਜਰਾਯ ਤੀਰਮ੍ਹਿ, ਪਾਯਾਸਂ ਅਦ ਸੋ ਜਿਨੋ;

ਪਟਿਯਤ੍ਤਵਰਮਗ੍ਗੇਨ, ਬੋਧਿਮੂਲਮੁਪੇਹਿਤਿ.

੧੭. ‘‘ਤਤੋ ਪਦਕ੍ਖਿਣਂ ਕਤ੍ਵਾ, ਬੋਧਿਮਣ੍ਡਂ ਅਨੁਤ੍ਤਰੋ;

ਅਸ੍ਸਤ੍ਥਮੂਲੇ ਸਮ੍ਬੋਧਿਂ, ਬੁਜ੍ਝਿਸ੍ਸਤਿ ਮਹਾਯਸੋ.

੧੮. ‘‘ਇਮਸ੍ਸ ਜਨਿਕਾ ਮਾਤਾ, ਮਾਯਾ ਨਾਮ ਭਵਿਸ੍ਸਤਿ;

ਪਿਤਾ ਸੁਦ੍ਧੋਦਨੋ ਨਾਮ, ਅਯਂ ਹੇਸ੍ਸਤਿ ਗੋਤਮੋ.

੧੯. ‘‘ਅਨਾਸਵਾ ਵੀਤਰਾਗਾ, ਸਨ੍ਤਚਿਤ੍ਤਾ ਸਮਾਹਿਤਾ;

ਕੋਲਿਤੋ ਉਪਤਿਸ੍ਸੋ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਕਾ;

ਆਨਨ੍ਦੋ ਨਾਮੁਪਟ੍ਠਾਕੋ, ਉਪਟ੍ਠਿਸ੍ਸਤਿਮਂ ਜਿਨਂ.

੨੦. ‘‘ਖੇਮਾ ਉਪ੍ਪਲਵਣ੍ਣਾ ਚ, ਅਗ੍ਗਾ ਹੇਸ੍ਸਨ੍ਤਿ ਸਾਵਿਕਾ;

ਅਨਾਸਵਾ ਵੀਤਰਾਗਾ, ਸਨ੍ਤਚਿਤ੍ਤਾ ਸਮਾਹਿਤਾ;

ਬੋਧਿ ਤਸ੍ਸ ਭਗਵਤੋ, ਅਸ੍ਸਤ੍ਥੋਤਿ ਪਵੁਚ੍ਚਤਿ…ਪੇ….

੨੩. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਪੁਞ੍ਞਵਨ੍ਤੋਤਿ ਪੁਞ੍ਞਵਾ, ਸਮੁਪਚਿਤਪੁਞ੍ਞਸਞ੍ਚਯੋਤਿ ਅਤ੍ਥੋ. ਜੁਤਿਨ੍ਧਰੋਤਿ ਪਭਾਯੁਤ੍ਤੋ. ਨੇਕਾਨਂ ਨਾਗਕੋਟੀਨਨ੍ਤਿ ਅਨੇਕਾਹਿ ਨਾਗਕੋਟੀਹਿ, ਕਰਣਤ੍ਥੇ ਸਾਮਿਵਚਨਂ ਦਟ੍ਠਬ੍ਬਂ. ਪਰਿਵਾਰੇਤ੍ਵਾਨਾਤਿ ਭਗਵਨ੍ਤਂ ਪਰਿਵਾਰੇਤ੍ਵਾ. ਅਹਨ੍ਤਿ ਅਤ੍ਤਾਨਂ ਨਿਦ੍ਦਿਸਤਿ. ਵਜ੍ਜਨ੍ਤੋਤਿ ਵਾਦੇਨ੍ਤੋ ਤਾਲ਼ੇਨ੍ਤੋ. ਮਣਿਮੁਤ੍ਤਰਤਨਖਚਿਤਨ੍ਤਿ ਮਣਿਮੁਤ੍ਤਾਦੀਹਿ ਵਿਵਿਧੇਹਿ ਰਤਨੇਹਿ ਖਚਿਤਨ੍ਤਿ ਅਤ੍ਥੋ. ਸਬ੍ਬਾਭਰਣਭੂਸਿਤਨ੍ਤਿ ਸਬ੍ਬਾਭਰਣੇਹਿ ਵਾਲ਼ਰੂਪਾਦੀਹਿ ਰਤਨਮਯੇਹਿ ਮਣ੍ਡਿਤਨ੍ਤਿ ਅਤ੍ਥੋ. ਸੁਵਣ੍ਣਪੀਠਨ੍ਤਿ ਸੁਵਣ੍ਣਮਯਂ ਪੀਠਂ. ਅਦਾਸਹਨ੍ਤਿ ਅਦਾਸਿਂ ਅਹਂ.

ਤਸ੍ਸ ਪਨ ਵਿਪਸ੍ਸਿਸ੍ਸ ਭਗਵਤੋ ਬਨ੍ਧੁਮਤੀ ਨਾਮ ਨਗਰਂ ਅਹੋਸਿ. ਬਨ੍ਧੁਮਾ ਨਾਮ ਰਾਜਾ ਪਿਤਾ, ਬਨ੍ਧੁਮਤੀ ਨਾਮ ਮਾਤਾ, ਖਣ੍ਡੋ ਚ ਤਿਸ੍ਸੋ ਚ ਦ੍ਵੇ ਅਗ੍ਗਸਾਵਕਾ, ਅਸੋਕੋ ਨਾਮੁਪਟ੍ਠਾਕੋ, ਚਨ੍ਦਾ ਚ ਚਨ੍ਦਮਿਤ੍ਤਾ ਚ ਦ੍ਵੇ ਅਗ੍ਗਸਾਵਿਕਾ, ਪਾਟਲਿਰੁਕ੍ਖੋ ਬੋਧਿ, ਸਰੀਰਂ ਅਸੀਤਿਹਤ੍ਥੁਬ੍ਬੇਧਂ ਅਹੋਸਿ, ਸਰੀਰਪ੍ਪਭਾ ਸਬ੍ਬਕਾਲਂ ਸਤ੍ਤ ਯੋਜਨਾਨਿ ਫਰਿਤ੍ਵਾ ਅਟ੍ਠਾਸਿ ਅਸੀਤਿਵਸ੍ਸਸਹਸ੍ਸਾਨਿ ਆਯੁ, ਸੁਤਨੁ ਨਾਮਸ੍ਸ ਅਗ੍ਗਮਹੇਸੀ, ਸਮਵਟ੍ਟਕ੍ਖਨ੍ਧੋ ਨਾਮਸ੍ਸ ਪੁਤ੍ਤੋ, ਆਜਞ੍ਞਰਥੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੨੪. ‘‘ਨਗਰਂ ਬਨ੍ਧੁਮਤੀ ਨਾਮ, ਬਨ੍ਧੁਮਾ ਨਾਮ ਖਤ੍ਤਿਯੋ;

ਮਾਤਾ ਬਨ੍ਧੁਮਤੀ ਨਾਮ, ਵਿਪਸ੍ਸਿਸ੍ਸ ਮਹੇਸਿਨੋ.

੨੯. ‘‘ਖਣ੍ਡੋ ਚ ਤਿਸ੍ਸਨਾਮੋ ਚ, ਅਹੇਸੁਂ ਅਗ੍ਗਸਾਵਕਾ;

ਅਸੋਕੋ ਨਾਮੁਪਟ੍ਠਾਕੋ, ਵਿਪਸ੍ਸਿਸ੍ਸ ਮਹੇਸਿਨੋ.

੩੦. ‘‘ਚਨ੍ਦਾ ਚ ਚਨ੍ਦਮਿਤ੍ਤਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਪਾਟਲੀਤਿ ਪਵੁਚ੍ਚਤਿ.

੩੨. ‘‘ਅਸੀਤਿਹਤ੍ਥਮੁਬ੍ਬੇਧੋ, ਵਿਪਸ੍ਸੀ ਲੋਕਨਾਯਕੋ;

ਪਭਾ ਨਿਦ੍ਧਾਵਤੀ ਤਸ੍ਸ, ਸਮਨ੍ਤਾ ਸਤ੍ਤਯੋਜਨੇ.

੩੩. ‘‘ਅਸੀਤਿਵਸ੍ਸਸਹਸ੍ਸਾਨਿ, ਆਯੁ ਬੁਦ੍ਧਸ੍ਸ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੩੪. ‘‘ਬਹੁਦੇਵਮਨੁਸ੍ਸਾਨਂ, ਬਨ੍ਧਨਾ ਪਰਿਮੋਚਯਿ;

ਮਗ੍ਗਾਮਗ੍ਗਞ੍ਚ ਆਚਿਕ੍ਖਿ, ਅਵਸੇਸਪੁਥੁਜ੍ਜਨੇ.

੩੫. ‘‘ਆਲੋਕਂ ਦਸ੍ਸਯਿਤ੍ਵਾਨ, ਦੇਸੇਤ੍ਵਾ ਅਮਤਂ ਪਦਂ;

ਜਲਿਤ੍ਵਾ ਅਗ੍ਗਿਕ੍ਖਨ੍ਧੋਵ, ਨਿਬ੍ਬੁਤੋ ਸੋ ਸਸਾਵਕੋ.

੩੬. ‘‘ਇਦ੍ਧਿਵਰਂ ਪੁਞ੍ਞਵਰਂ, ਲਕ੍ਖਣਞ੍ਚ ਕੁਸੁਮਿਤਂ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਬਨ੍ਧਨਾਤਿ ਦੇਵਮਨੁਸ੍ਸੇ ਕਾਮਰਾਗਸਂਯੋਜਨਾਦਿਬਨ੍ਧਨਾ ਮੋਚੇਸਿ, ਵਿਕਾਸੇਸੀਤਿ ਅਤ੍ਥੋ. ਮਗ੍ਗਾਮਗ੍ਗਞ੍ਚ ਆਚਿਕ੍ਖੀਤਿ ‘‘ਅਮਤਾਧਿਗਮਾਯ ਅਯਂ ਮਗ੍ਗੋ ਉਚ੍ਛੇਦਸਸ੍ਸਤਦਿਟ੍ਠਿਵਿਰਹਿਤਾ ਮਜ੍ਝਿਮਾ ਪਟਿਪਦਾ ਮਗ੍ਗੋ ਕਾਯਕਿਲਮਥਾਦਿਕੋ ਨਾਯਂ ਮਗ੍ਗੋ’’ਤਿ ਸੇਸਪੁਥੁਜ੍ਜਨੇ ਆਚਿਕ੍ਖੀਤਿ ਅਤ੍ਥੋ. ਆਲੋਕਂ ਦਸ੍ਸਯਿਤ੍ਵਾਨਾਤਿ ਮਗ੍ਗਞਾਣਾਲੋਕਂ ਵਿਪਸ੍ਸਨਾਞਾਣਾਲੋਕਞ੍ਚ ਦਸ੍ਸਯਿਤ੍ਵਾ. ਲਕ੍ਖਣਞ੍ਚ ਕੁਸੁਮਿਤਨ੍ਤਿ ਚਿਤ੍ਤਲਕ੍ਖਣਾਦੀਹਿ ਫੁਲ੍ਲਿਤਂ ਮਣ੍ਡਿਤਂ ਭਗਵਤੋ ਸਰੀਰਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਗਾਥਾਸੁ ਉਤ੍ਤਾਨਮੇਵਾਤਿ.

ਵਿਪਸ੍ਸੀਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਏਕੂਨਵੀਸਤਿਮੋ ਬੁਦ੍ਧਵਂਸੋ.