੨੦. ਫੁਸ੍ਸਬੁਦ੍ਧਵਂਸਵਣ੍ਣਨਾ

ਤਸ੍ਸ ਤਿਸ੍ਸਸ੍ਸ ਭਗਵਤੋ ਅਪਰਭਾਗੇ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਪੁਨ ਵਡ੍ਢਿਤ੍ਵਾ ਅਪਰਿਮਿਤਾਯੁਕਾ ਹੁਤ੍ਵਾ ਅਨੁਪੁਬ੍ਬੇਨ ਹਾਯਿਤ੍ਵਾ ਨਵੁਤਿਵਸ੍ਸਸਹਸ੍ਸਾਯੁਕੇਸੁ ਜਾਤੇਸੁ ਤਸ੍ਮਿਂਯੇਵ ਕਪ੍ਪੇ ਫੁਸ੍ਸੋ ਨਾਮ ਸਤ੍ਥਾ ਲੋਕੇ ਉਪ੍ਪਜ੍ਜਿ. ਸੋਪਿ ਭਗਵਾ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਕਾਸਿਕਨਗਰੇ ਜਯਸੇਨਰਞ੍ਞੋ ਅਗ੍ਗਮਹੇਸਿਯਾ ਸਿਰਿਮਾਯ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਸਿਰਿਮੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਸੋ ਨਵਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਤਸ੍ਸ ਕਿਰ ਗਰੁਲ਼ਪਕ੍ਖ-ਹਂਸ-ਸੁਵਣ੍ਣਭਾਰਾਤਿ ਤਯੋ ਪਾਸਾਦਾ ਅਹੇਸੁਂ. ਕਿਸਾਗੋਤਮਿਪ੍ਪਮੁਖਾਨਿ ਤਿਂਸ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਕਿਸਾਗੋਤਮਿਯਾ ਅਨੁਪਮੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਅਲਙ੍ਕਤਗਜਵਰਕ੍ਖਨ੍ਧਗਤੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਪਬ੍ਬਜਿਤਂ ਜਨਕੋਟਿ ਅਨੁਪਬ੍ਬਜਿ. ਸੋ ਤੇਹਿ ਪਰਿਵੁਤੋ ਛ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਤਤੋ ਗਣਂ ਪਹਾਯ ਸਤ੍ਤਾਹਂ ਏਕਚਰਿਯਂ ਅਨੁਬ੍ਰੂਹਯਮਾਨੋ ਵਸਿਤ੍ਵਾ ਵਿਸਾਖਪੁਣ੍ਣਮਾਯ ਅਞ੍ਞਤਰੇ ਨਗਰੇ ਅਞ੍ਞਤਰਸ੍ਸ ਸੇਟ੍ਠਿਨੋ ਧੀਤਾਯ ਸਿਰਿਵਡ੍ਢਾਯ ਨਾਮ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸਿਂਸਪਾਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਸਿਰਿਵਡ੍ਢੇਨ ਨਾਮ ਉਪਾਸਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਆਮਲਕਬੋਧਿਂ ਉਪਸਙ੍ਕਮਿਤ੍ਵਾ ਸਮਾਰਂ ਮਾਰਬਲਂ ਵਿਧਮਿਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਬੋਧਿਸਮੀਪੇਯੇਵ ਵੀਤਿਨਾਮੇਤ੍ਵਾ ਅਤ੍ਤਨਾ ਸਦ੍ਧਿਂ ਪਬ੍ਬਜਿਤਾਨਂ ਭਿਕ੍ਖੂਨਂ ਕੋਟੀਨਂ ਧਮ੍ਮਪਟਿਵੇਧਸਮਤ੍ਥਤਂ ਦਿਸ੍ਵਾ ਆਕਾਸੇਨ ਗਨ੍ਤ੍ਵਾ ਸਙ੍ਕਸ੍ਸਨਗਰੇ ਇਸਿਪਤਨੇ ਮਿਗਦਾਯੇ ਓਤਰਿਤ੍ਵਾ ਤੇਸਂ ਮਜ੍ਝੇ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਕੋਟਿਸਤਸਹਸ੍ਸਾਨਂ ਪਠਮੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਅਹੁ ਸਤ੍ਥਾ ਅਨੁਤ੍ਤਰੋ;

ਅਨੂਪਮੋ ਅਸਮਸਮੋ, ਫੁਸ੍ਸੋ ਲੋਕਗ੍ਗਨਾਯਕੋ.

੨. ‘‘ਸੋਪਿ ਸਬ੍ਬਂ ਤਮਂ ਹਨ੍ਤ੍ਵਾ, ਵਿਜਟੇਤ੍ਵਾ ਮਹਾਜਟਂ;

ਸਦੇਵਕਂ ਤਪ੍ਪਯਨ੍ਤੋ, ਅਭਿਵਸ੍ਸਿ ਅਮਤਮ੍ਬੁਨਾ.

੩. ‘‘ਧਮ੍ਮਚਕ੍ਕਂ ਪਵਤ੍ਤੇਨ੍ਤੇ, ਫੁਸ੍ਸੇ ਨਕ੍ਖਤ੍ਤਮਙ੍ਗਲੇ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਤਤ੍ਥੇਵ ਮਣ੍ਡਕਪ੍ਪਮ੍ਹੀਤਿ ਯਸ੍ਮਿਂ ਕਪ੍ਪੇ ਦ੍ਵੇ ਬੁਦ੍ਧਾ ਉਪ੍ਪਜ੍ਜਨ੍ਤਿ, ਸੋ ‘‘ਮਣ੍ਡਕਪ੍ਪੋ’’ਤਿ ਹੇਟ੍ਠਾ ਵੁਤ੍ਤੋ. ਵਿਜਟੇਤ੍ਵਾਤਿ ਪਟਿਵਿਸ੍ਸਜ੍ਜੇਤ੍ਵਾ. ਮਹਾਜਟਨ੍ਤਿ ਏਤ੍ਥ ਜਟਾਤਿ ਤਣ੍ਹਾਯੇਤਂ ਅਧਿਵਚਨਂ. ਸਾ ਹਿ ਰੂਪਾਦੀਸੁ ਆਰਮ੍ਮਣੇਸੁ ਹੇਟ੍ਠੁਪਰਿਯਵਸੇਨ ਪੁਨਪ੍ਪੁਨਂ ਉਪ੍ਪਜ੍ਜਨਤੋ ਸਂਸਿਬ੍ਬਨਤੋ ਸੁਤ੍ਤਗੁਮ੍ਬਜਾਲਪੂਵਸਙ੍ਖਾਤਾ ਜਟਾ ਵਿਯਾਤਿ ਜਟਾਤਿ ਵੁਤ੍ਤਂ, ਤਂ ਮਹਾਜਟਂ. ਸਦੇਵਕਨ੍ਤਿ ਸਦੇਵਕਂ ਲੋਕਂ. ਅਭਿਵਸ੍ਸੀਤਿ ਪਾਵਸ੍ਸਿ. ਅਮਤਮ੍ਬੁਨਾਤਿ ਅਮਤਸਙ੍ਖਾਤੇਨ ਧਮ੍ਮਕਥਾਸਲਿਲੇਨ ਤਪ੍ਪਯਨ੍ਤੋ ਪਾਵਸ੍ਸੀਤਿ ਅਤ੍ਥੋ.

ਯਦਾ ਪਨ ਬਾਰਾਣਸੀਨਗਰੇ ਸਿਰਿਵਡ੍ਢੋ ਨਾਮ ਰਾਜਾ ਮਹਨ੍ਤਂ ਭੋਗਕ੍ਖਨ੍ਧਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿ. ਤੇਨ ਸਹ ਪਬ੍ਬਜਿਤਾਨਂ ਤਾਪਸਾਨਂ ਨਵੁਤਿਸਤਸਹਸ੍ਸਾਨਿ ਅਹੇਸੁਂ. ਤੇਸਂ ਭਗਵਾ ਧਮ੍ਮਂ ਦੇਸੇਸਿ. ਤਦਾ ਨਵੁਤਿਯਾ ਸਤਸਹਸ੍ਸਾਨਂ ਦੁਤਿਯਾਭਿਸਮਯੋ ਅਹੋਸਿ. ਯਦਾ ਪਨ ਅਤ੍ਤਨੋ ਪੁਤ੍ਤਸ੍ਸ ਅਨੁਪਮਕੁਮਾਰਸ੍ਸ ਧਮ੍ਮਂ ਦੇਸੇਸਿ, ਤਦਾ ਅਸੀਤਿਯਾ ਸਤਸਹਸ੍ਸਾਨਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੪. ‘‘ਨਵੁਤਿਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ;

ਅਸੀਤਿਸਤਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਤਤੋ ਅਪਰੇਨ ਸਮਯੇਨ ਕਣ੍ਣਕੁਜ੍ਜਨਗਰੇ ਸੁਰਕ੍ਖਿਤੋ ਰਾਜਪੁਤ੍ਤੋ ਚ ਪੁਰੋਹਿਤਪੁਤ੍ਤੋ ਧਮ੍ਮਸੇਨਕੁਮਾਰੋ ਚ ਫੁਸ੍ਸੇ ਸਮ੍ਮਾਸਮ੍ਬੁਦ੍ਧੇ ਅਤ੍ਤਨੋ ਨਗਰਂ ਸਮ੍ਪਤ੍ਤੇ ਸਟ੍ਠਿਯਾ ਪੁਰਿਸਸਤਸਹਸ੍ਸੇਹਿ ਸਦ੍ਧਿਂ ਪਚ੍ਚੁਗ੍ਗਨ੍ਤ੍ਵਾ ਵਨ੍ਦਿਤ੍ਵਾ ਨਿਮਨ੍ਤੇਤ੍ਵਾ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਦਸਬਲਸ੍ਸ ਧਮ੍ਮਕਥਂ ਸੁਤ੍ਵਾ ਭਗਵਤਿ ਪਸੀਦਿਤ੍ਵਾ ਤੇ ਸਪਰਿਵਾਰਾ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤੇਸਂ ਸਟ੍ਠਿਯਾ ਭਿਕ੍ਖੁਸਤਸਹਸ੍ਸਾਨਂ ਮਜ੍ਝੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਪੁਨ ਕਾਸਿਨਗਰੇ ਜਯਸੇਨਰਞ੍ਞੋ ਸਟ੍ਠਿਮਤ੍ਤਾਨਂ ਞਾਤੀਨਂ ਸਮਾਗਮੇ ਬੁਦ੍ਧਵਂਸਂ ਦੇਸੇਸਿ, ਤਂ ਸੁਤ੍ਵਾ ਪਞ੍ਞਾਸਸਤਸਹਸ੍ਸਾਨਿ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤੇਸਂ ਮਜ੍ਝਗਤੋ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਪੁਨ ਮਹਾਮਙ੍ਗਲਸਮਾਗਮੇ ਮਙ੍ਗਲਕਥਂ ਸੁਤ੍ਵਾ ਚਤ੍ਤਾਲੀਸਪੁਰਿਸਸਤਸਹਸ੍ਸਾਨਿ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤੇਸਂ ਮਜ੍ਝਗਤੋ ਸੁਗਤੋ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਸਨ੍ਨਿਪਾਤਾ ਤਯੋ ਆਸੁਂ, ਫੁਸ੍ਸਸ੍ਸਪਿ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੬. ‘‘ਸਟ੍ਠਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਪਞ੍ਞਾਸਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੭. ‘‘ਚਤ੍ਤਾਲੀਸਸਤਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਅਨੁਪਾਦਾ ਵਿਮੁਤ੍ਤਾਨਂ, ਵੋਚ੍ਛਿਨ੍ਨਪਟਿਸਨ੍ਧਿਨ’’ਨ੍ਤਿ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਅਰਿਨ੍ਦਮਨਗਰੇ ਵਿਜਿਤਾਵੀ ਨਾਮ ਖਤ੍ਤਿਯੋ ਹੁਤ੍ਵਾ ਤਸ੍ਸ ਧਮ੍ਮਂ ਸੁਤ੍ਵਾ ਭਗਵਤਿ ਪਸੀਦਿਤ੍ਵਾ ਤਸ੍ਸ ਮਹਾਦਾਨਂ ਦਤ੍ਵਾ ਮਹਾਰਜ੍ਜਂ ਪਹਾਯ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਤੇਪਿਟਕਧਰੋ ਮਹਾਜਨਸ੍ਸ ਧਮ੍ਮਕਥਂ ਕਥੇਸਿ, ਸੀਲਪਾਰਮਿਞ੍ਚ ਪੂਰੇਸਿ. ਸੋਪਿ ਨਂ ‘‘ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੮. ‘‘ਅਹਂ ਤੇਨ ਸਮਯੇਨ, ਵਿਜਿਤਾਵੀ ਨਾਮ ਖਤ੍ਤਿਯੋ;

ਛਡ੍ਡਯਿਤ੍ਵਾ ਮਹਾਰਜ੍ਜਂ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.

੯. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਫੁਸ੍ਸੋ ਲੋਕਗ੍ਗਨਾਯਕੋ;

ਦ੍ਵੇਨਵੁਤੇ ਇਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੦. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਦਸਪਾਰਮਿਪੂਰਿਯਾ.

੧੨. ‘‘ਸੁਤ੍ਤਨ੍ਤਂ ਵਿਨਯਞ੍ਚਾਪਿ, ਨਵਙ੍ਗਂ ਸਤ੍ਥੁਸਾਸਨਂ;

ਸਬ੍ਬਂ ਪਰਿਯਾਪੁਣਿਤ੍ਵਾ, ਸੋਭਯਿਂ ਜਿਨਸਾਸਨਂ.

੧੩. ‘‘ਤਤ੍ਥਪ੍ਪਮਤ੍ਤੋ ਵਿਹਰਨ੍ਤੋ, ਬ੍ਰਹ੍ਮਂ ਭਾਵੇਤ੍ਵ ਭਾਵਨਂ;

ਅਭਿਞ੍ਞਾਪਾਰਮਿਂ ਗਨ੍ਤ੍ਵਾ, ਬ੍ਰਹ੍ਮਲੋਕਮਗਞ੍ਛਹ’’ਨ੍ਤਿ.

ਤਸ੍ਸ ਪਨ ਭਗਵਤੋ ਕਾਸਿਕਂ ਨਾਮ ਨਗਰਂ ਅਹੋਸਿ. ਜਯਸੇਨੋ ਨਾਮ ਰਾਜਾ ਪਿਤਾ, ਸਿਰਿਮਾ ਨਾਮ ਮਾਤਾ, ਸੁਰਕ੍ਖਿਤੋ ਚ ਧਮ੍ਮਸੇਨੋ ਚ ਦ੍ਵੇ ਅਗ੍ਗਸਾਵਕਾ, ਸਭਿਯੋ ਨਾਮੁਪਟ੍ਠਾਕੋ, ਚਾਲਾ ਚ ਉਪਚਾਲਾ ਚ ਦ੍ਵੇ ਅਗ੍ਗਸਾਵਿਕਾ, ਆਮਲਕਰੁਕ੍ਖੋ ਬੋਧਿ, ਸਰੀਰਂ ਅਟ੍ਠਪਣ੍ਣਾਸਹਤ੍ਥੁਬ੍ਬੇਧਂ ਅਹੋਸਿ, ਆਯੁ ਨਵੁਤਿਵਸ੍ਸਸਹਸ੍ਸਾਨਿ, ਕਿਸਾਗੋਤਮੀ ਨਾਮ ਅਗ੍ਗਮਹੇਸੀ, ਅਨੁਪਮੋ ਨਾਮਸ੍ਸ ਪੁਤ੍ਤੋ, ਹਤ੍ਥਿਯਾਨੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੧੪. ‘‘ਕਾਸਿਕਂ ਨਾਮ ਨਗਰਂ, ਜਯਸੇਨੋ ਨਾਮ ਖਤ੍ਤਿਯੋ;

ਸਿਰਿਮਾ ਨਾਮ ਜਨਿਕਾ, ਫੁਸ੍ਸਸ੍ਸਾਪਿ ਮਹੇਸਿਨੋ…ਪੇ. …;

ਬੋਧਿ ਤਸ੍ਸ ਭਗਵਤੋ, ਆਮਣ੍ਡੋਤਿ ਪਵੁਚ੍ਚਤਿ…ਪੇ….

੨੨. ‘‘ਅਟ੍ਠਪਣ੍ਣਾਸਰਤਨਂ, ਸੋਪਿ ਅਚ੍ਚੁਗ੍ਗਤੋ ਮੁਨਿ;

ਸੋਭਤੇ ਸਤਰਂਸੀਵ, ਉਲ਼ੁਰਾਜਾਵ ਪੂਰਿਤੋ.

੨੩. ‘‘ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

੨੪. ‘‘ਓਵਦਿਤ੍ਵਾ ਬਹੂ ਸਤ੍ਤੇ, ਸਨ੍ਤਾਰੇਤ੍ਵਾ ਬਹੂ ਜਨੇ;

ਸੋਪਿ ਸਤ੍ਥਾ ਅਤੁਲਯਸੋ, ਨਿਬ੍ਬੁਤੋ ਸੋ ਸਸਾਵਕੋ’’ਤਿ.

ਤਤ੍ਥ ਆਮਣ੍ਡੋਤਿ ਆਮਲਕਰੁਕ੍ਖੋ. ਓਵਦਿਤ੍ਵਾਤਿ ਓਵਾਦਂ ਦਤ੍ਵਾ, ਅਨੁਸਾਸਿਤ੍ਵਾਤਿ ਅਤ੍ਥੋ. ਸੋਪਿ ਸਤ੍ਥਾ ਅਤੁਲਯਸੋਤਿ ਸੋਪਿ ਸਤ੍ਥਾ ਅਮਿਤਯਸੋਤਿ ਅਤ੍ਥੋ. ‘‘ਸੋ ਜਹਿਤ੍ਵਾ ਅਮਿਤਯਸੋ’’ਤਿਪਿ ਪਾਠੋ, ਤਸ੍ਸ ਸੋ ਸਬ੍ਬਮੇਵ ਵੁਤ੍ਤਪ੍ਪਕਾਰਂ ਵਿਸੇਸਂ ਹਿਤ੍ਵਾਤਿ ਅਤ੍ਥੋ.

ਫੁਸ੍ਸੋ ਕਿਰ ਸਮ੍ਮਾਸਮ੍ਬੁਦ੍ਧੋ ਕੁਸਿਨਾਰਾਯਂ ਸੇਨਾਰਾਮੇ ਪਰਿਨਿਬ੍ਬਾਯਿ. ਧਾਤੁਯੋ ਕਿਰਸ੍ਸ ਵਿਤ੍ਥਾਰਿਕਾ ਅਹੇਸੁਂ. ਸੇਸਗਾਥਾਸੁ ਸਬ੍ਬਤ੍ਥ ਪਾਕਟਮੇਵਾਤਿ.

ਫੁਸ੍ਸਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਅਟ੍ਠਾਰਸਮੋ ਬੁਦ੍ਧਵਂਸੋ.