੧੯. ਤਿਸ੍ਸਬੁਦ੍ਧਵਂਸਵਣ੍ਣਨਾ

ਤਸ੍ਸ ਪਨ ਸਿਦ੍ਧਤ੍ਥਸ੍ਸ ਭਗਵਤੋ ਅਪਰਭਾਗੇ ਏਕੋ ਕਪ੍ਪੋ ਬੁਦ੍ਧਸੁਞ੍ਞੋ ਅਹੋਸਿ. ਇਤੋ ਦ੍ਵਾਨਵੁਤਿਕਪ੍ਪਮਤ੍ਥਕੇ ਤਿਸ੍ਸੋ, ਫੁਸ੍ਸੋਤਿ ਏਕਸ੍ਮਿਂ ਕਪ੍ਪੇ ਦ੍ਵੇ ਬੁਦ੍ਧਾ ਨਿਬ੍ਬਤ੍ਤਿਂਸੁ. ਤਤ੍ਥ ਤਿਸ੍ਸੋ ਨਾਮ ਮਹਾਪੁਰਿਸੋ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਖੇਮਕਨਗਰੇ ਜਨਸਨ੍ਧਸ੍ਸ ਨਾਮ ਰਞ੍ਞੋ ਅਗ੍ਗਮਹੇਸਿਯਾ ਪਦੁਮਦਲਸਦਿਸਨਯਨਾਯ ਪਦੁਮਾਨਾਮਾਯ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਅਨੋਮੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਸਤ੍ਤਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਤਸ੍ਸ ਗੁਹਾਸੇਲ-ਨਾਰਿਸਯ-ਨਿਸਭਨਾਮਕਾ ਤਯੋ ਪਾਸਾਦਾ ਅਹੇਸੁਂ. ਸੁਭਦ੍ਦਾਦੇਵਿਪ੍ਪਮੁਖਾਨਿ ਤੇਤ੍ਤਿਂਸ ਇਤ੍ਥਿਸਹਸ੍ਸਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸੁਭਦ੍ਦਾਦੇਵਿਯਾ ਪੁਤ੍ਤੇ ਆਨਨ੍ਦਕੁਮਾਰੇ ਉਪ੍ਪਨ੍ਨੇ ਸੋਨੁਤ੍ਤਰਂ ਨਾਮ ਅਨੁਤ੍ਤਰਂ ਤੁਰਙ੍ਗਵਰਮਾਰੁਯ੍ਹ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਮਨੁਸ੍ਸਾਨਂ ਕੋਟਿ ਅਨੁਪਬ੍ਬਜਿ. ਸੋ ਤੇਹਿ ਪਰਿਵੁਤੋ ਅਟ੍ਠ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਵੀਰਨਿਗਮੇ ਵੀਰਸੇਟ੍ਠਿਸ੍ਸ ਧੀਤਾਯ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸਲਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਵਿਜਿਤਸਙ੍ਗਾਮਕੇਨ ਨਾਮ ਯਵਪਾਲੇਨ ਉਪਨੀਤਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਅਸਨਬੋਧਿਂ ਉਪਸਙ੍ਕਮਿਤ੍ਵਾ ਚਤ੍ਤਾਲੀਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਤਤ੍ਥ ਪਲ੍ਲਙ੍ਕਂ ਆਭੁਜਿਤ੍ਵਾ ਸਮਾਰਂ ਮਾਰਬਲਂ ਵਿਧਮਿਤ੍ਵਾ ਅਧਿਗਤਸਬ੍ਬਞ੍ਞੁਤਞ੍ਞਾਣੋ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਬੋਧਿਸਮੀਪੇਯੇਵ ਵੀਤਿਨਾਮੇਤ੍ਵਾ ਯਸਵਤੀ ਨਗਰੇ ਬ੍ਰਹ੍ਮਦੇਵਂ ਉਦਯਞ੍ਚ ਦ੍ਵੇ ਰਾਜਪੁਤ੍ਤੇ ਸਪਰਿਵਾਰੇ ਉਪਨਿਸ੍ਸਯਸਮ੍ਪਨ੍ਨੇ ਆਕਾਸੇਨ ਗਨ੍ਤ੍ਵਾ ਯਸਵਤੀਮਿਗਦਾਯੇ ਓਤਰਿਤ੍ਵਾ ਉਯ੍ਯਾਨਪਾਲੇਨ ਰਾਜਪੁਤ੍ਤੇ ਪਕ੍ਕੋਸਾਪੇਤ੍ਵਾ ਤੇਸਂ ਸਪਰਿਵਾਰਾਨਂ ਅਵਿਸਾਰਿਨਾ ਬ੍ਯਾਪਿਨਾ ਮਧੁਰੇਨ ਬ੍ਰਹ੍ਮਸ੍ਸਰੇਨ ਦਸਸਹਸ੍ਸਿਲੋਕਧਾਤੁਂ ਵਿਞ੍ਞਾਪੇਨ੍ਤੋਵ ਧਮ੍ਮਚਕ੍ਕਂ ਪਵਤ੍ਤੇਸਿ, ਤਦਾ ਕੋਟਿਸਤਾਨਂ ਪਠਮੋ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਸਿਦ੍ਧਤ੍ਥਸ੍ਸ ਅਪਰੇਨ, ਅਸਮੋ ਅਪ੍ਪਟਿਪੁਗ੍ਗਲੋ;

ਅਨਨ੍ਤਤੇਜੋ ਅਮਿਤਯਸੋ, ਤਿਸ੍ਸੋ ਲੋਕਗ੍ਗਨਾਯਕੋ.

੨. ‘‘ਤਮਨ੍ਧਕਾਰਂ ਵਿਧਮਿਤ੍ਵਾ, ਓਭਾਸੇਤ੍ਵਾ ਸਦੇਵਕਂ;

ਅਨੁਕਮ੍ਪਕੋ ਮਹਾਵੀਰੋ, ਲੋਕੇ ਉਪ੍ਪਜ੍ਜਿ ਚਕ੍ਖੁਮਾ.

੩. ‘‘ਤਸ੍ਸਾਪਿ ਅਤੁਲਾ ਇਦ੍ਧਿ, ਅਤੁਲਂ ਸੀਲਂ ਸਮਾਧਿ ਚ;

ਸਬ੍ਬਤ੍ਥ ਪਾਰਮਿਂ ਗਨ੍ਤ੍ਵਾ, ਧਮ੍ਮਚਕ੍ਕਂ ਪਵਤ੍ਤਯਿ.

੪. ‘‘ਸੋ ਬੁਦ੍ਧੋ ਦਸਸਹਸ੍ਸਿਮ੍ਹਿ, ਵਿਞ੍ਞਾਪੇਸਿ ਗਿਰਂ ਸੁਚਿਂ;

ਕੋਟਿਸਤਾਨਿ ਅਭਿਸਮਿਂਸੁ, ਪਠਮੇ ਧਮ੍ਮਦੇਸਨੇ’’ਤਿ.

ਤਤ੍ਥ ਸਬ੍ਬਤ੍ਥਾਤਿ ਸਬ੍ਬੇਸੁ ਧਮ੍ਮੇਸੁ ਪਾਰਂ ਗਨ੍ਤ੍ਵਾ. ਦਸਸਹਸ੍ਸਿਮ੍ਹੀਤਿ ਦਸਸਹਸ੍ਸਿਯਂ ਅਥਾਪਰੇਨ ਸਮਯੇਨ ਤਿਸ੍ਸੇਨ ਸਤ੍ਥਾਰਾ ਸਦ੍ਧਿਂ ਪਬ੍ਬਜਿਤਾਨਂ ਭਿਕ੍ਖੂਨਂ ਕੋਟਿ ਮਹਾਪੁਰਿਸਸ੍ਸ ਗਣਵਾਸਂ ਪਹਾਯ ਬੋਧਿਮੂਲਮੁਪਗਮਨਸਮਯੇ ਅਞ੍ਞਤ੍ਰ ਗਤਾ. ਸਾ ਤਿਸ੍ਸੇਨ ਸਮ੍ਮਾਸਮ੍ਬੁਦ੍ਧੇਨ ਧਮ੍ਮਚਕ੍ਕਂ ਪਵਤ੍ਤਿਤ’’ਨ੍ਤਿ ਸੁਤ੍ਵਾ ਯਸਵਤੀਮਿਗਦਾਯਂ ਆਗਨ੍ਤ੍ਵਾ ਦਸਬਲਮਭਿਵਾਦੇਤ੍ਵਾ ਤਂ ਪਰਿਵਾਰੇਤ੍ਵਾ ਨਿਸੀਦਿ. ਤੇਸਂ ਭਗਵਾ ਧਮ੍ਮਂ ਦੇਸੇਸਿ, ਤਦਾ ਨਵੁਤਿਯਾ ਕੋਟੀਨਂ ਦੁਤਿਯਾਭਿਸਮਯੋ ਅਹੋਸਿ. ਪੁਨ ਮਹਾਮਙ੍ਗਲਸਮਾਗਮੇ ਮਙ੍ਗਲਪਰਿਯੋਸਾਨੇ ਸਟ੍ਠਿਯਾ ਕੋਟੀਨਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਦੁਤਿਯੋ ਨਵੁਤਿਕੋਟੀਨਂ, ਤਤਿਯੋ ਸਟ੍ਠਿਕੋਟਿਯੋ;

ਬਨ੍ਧਨਾਤੋ ਪਮੋਚੇਸਿ, ਸਤ੍ਤੇ ਨਰਮਰੂ ਤਦਾ’’ਤਿ.

ਤਤ੍ਥ ਦੁਤਿਯੋ ਨਵੁਤਿਕੋਟੀਨਨ੍ਤਿ ਦੁਤਿਯੋ ਅਭਿਸਮਯੋ ਅਹੋਸਿ ਨਵੁਤਿਕੋਟਿਪਾਣੀਨਨ੍ਤਿ ਅਤ੍ਥੋ. ਬਨ੍ਧਨਾਤੋਤਿ ਬਨ੍ਧਨਤੋ, ਦਸਹਿ ਸਂਯੋਜਨੇਹਿ ਪਰਿਮੋਚੇਸੀਤਿ ਅਤ੍ਥੋ. ਇਦਾਨਿ ਪਰਿਮੋਚਿਤੇ ਸਤ੍ਤੇ ਸਰੂਪਤੋ ਦਸ੍ਸੇਨ੍ਤੋ ‘‘ਨਰਮਰੂ’’ਤਿ ਆਹ. ਨਰਮਰੂਤਿ ਨਰਾਮਰੇ.

ਯਸਵਤੀਨਗਰੇ ਕਿਰ ਅਨ੍ਤੋਵਸ੍ਸਂ ਪਬ੍ਬਜਿਤਾਨਂ ਅਰਹਨ੍ਤਾਨਂ ਸਤਸਹਸ੍ਸੇਹਿ ਪਰਿਵੁਤੋ ਪਵਾਰੇਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਉਭਤੋ ਸੁਜਾਤਸ੍ਸ ਸੁਜਾਤਸ੍ਸ ਨਾਮ ਰਞ੍ਞੋ ਨਾਰਿਵਾਹਨਕੁਮਾਰੋ ਨਾਰਿਵਾਹਨਨਗਰਂ ਅਨੁਪ੍ਪਤ੍ਤੇ ਭਗਵਤਿ ਲੋਕਨਾਥੇ ਸਪਰਿਵਾਰੋ ਪਚ੍ਚੁਗ੍ਗਨ੍ਤ੍ਵਾ ਦਸਬਲਂ ਸਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਅਸਦਿਸਦਾਨਂ ਦਤ੍ਵਾ ਅਤ੍ਤਨੋ ਰਜ੍ਜਂ ਪੁਤ੍ਤਸ੍ਸ ਨਿਯ੍ਯਾਤੇਤ੍ਵਾ ਸਪਰਿਵਾਰੋ ਸਬ੍ਬਲੋਕਾਧਿਪਤਿਸ੍ਸ ਤਿਸ੍ਸਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕੇ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿ. ਤਸ੍ਸ ਕਿਰ ਸਾ ਪਬ੍ਬਜ੍ਜਾ ਸਬ੍ਬਦਿਸਾਸੁ ਪਾਕਟਾ ਅਹੋਸਿ. ਤਸ੍ਮਾ ਤਤੋ ਤਤੋ ਆਗਨ੍ਤ੍ਵਾ ਨਾਰਿਵਾਹਨਕੁਮਾਰਂ ਮਹਾਜਨੋ ਅਨੁਪਬ੍ਬਜਿ. ਤਦਾ ਤਥਾਗਤੋ ਨਵੁਤਿਯਾ ਭਿਕ੍ਖੁਸਤਸਹਸ੍ਸਸ੍ਸ ਮਜ੍ਝਗਤੋ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਪੁਨ ਖੇਮਵਤੀਨਗਰੇ ਞਾਤਿਸਮਾਗਮੇ ਬੁਦ੍ਧਵਂਸਧਮ੍ਮਕਥਂ ਸੁਤ੍ਵਾ ਅਸੀਤਿਸਤਸਹਸ੍ਸਾਨਿ ਤਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ, ਤੇਹਿ ਪਰਿਵੁਤੋ ਸੁਗਤੋ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੬. ‘‘ਸਨ੍ਨਿਪਾਤਾ ਤਯੋ ਆਸੁਂ, ਤਿਸ੍ਸੇ ਲੋਕਗ੍ਗਨਾਯਕੇ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੭. ‘‘ਖੀਣਾਸਵਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਨਵੁਤਿਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੮. ‘‘ਅਸੀਤਿਸਤਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਖੀਣਾਸਵਾਨਂ ਵਿਮਲਾਨਂ, ਪੁਪ੍ਫਿਤਾਨਂ ਵਿਮੁਤ੍ਤਿਯਾ’’ਤਿ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਯਸਵਤੀਨਗਰੇ ਸੁਜਾਤੋ ਨਾਮ ਰਾਜਾ ਹੁਤ੍ਵਾ ਇਦ੍ਧਂ ਫੀਤਂ ਜਨਪਦਂ ਅਨੇਕਕੋਟਿਧਨਸਨ੍ਨਿਚਯਂ ਅਨੁਰਾਗਮੁਪਗਤਹਦਯਞ੍ਚ ਪਰਿਜਨਂ ਤਿਣਨਲ਼ਮਿਵ ਪਰਿਚ੍ਚਜਿਤ੍ਵਾ ਜਾਤਿਆਦੀਸੁ ਸਂਵਿਗ੍ਗਹਦਯੋ ਨਿਕ੍ਖਮਿਤ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਮਹਿਦ੍ਧਿਕੋ ਮਹਾਨੁਭਾਵੋ ਹੁਤ੍ਵਾ ‘‘ਬੁਦ੍ਧੋ ਲੋਕੇ ਉਪ੍ਪਨ੍ਨੋ’’ਤਿ ਸੁਤ੍ਵਾ ਪਞ੍ਚਵਣ੍ਣਾਯ ਪੀਤਿਯਾ ਫੁਟਸਰੀਰੋ ਹੁਤ੍ਵਾ ਸਪਤਿਸ੍ਸੋ ਤਿਸ੍ਸਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਚਿਨ੍ਤੇਸਿ – ‘‘ਹਨ੍ਦਾਹਂ ਮਨ੍ਦਾਰਵਪਾਰਿਚ੍ਛਤ੍ਤਕਾਦੀਹਿ ਦਿਬ੍ਬਕੁਸੁਮੇਹਿ ਭਗਵਨ੍ਤਂ ਪੂਜੇਸ੍ਸਾਮੀ’’ਤਿ. ਅਥ ਸੋ ਏਵਂ ਚਿਨ੍ਤੇਤ੍ਵਾ ਇਦ੍ਧਿਯਾ ਸਗ੍ਗਲੋਕਂ ਗਨ੍ਤ੍ਵਾ ਚਿਤ੍ਤਲਤਾਵਨਂ ਪਵਿਸਿਤ੍ਵਾ ਪਦੁਮਪਾਰਿਚ੍ਛਤ੍ਤਕਮਨ੍ਦਾਰਵਾਦੀਹਿ ਦਿਬ੍ਬਕੁਸੁਮੇਹਿ ਰਤਨਮਯਂ ਚਙ੍ਕੋਟਕਂ ਗਾਵੁਤਪ੍ਪਮਾਣਂ ਪੂਰੇਤ੍ਵਾ ਗਹੇਤ੍ਵਾ ਗਗਨਤਲੇਨ ਆਗਨ੍ਤ੍ਵਾ ਦਿਬ੍ਬੇਹਿ ਸੁਰਭਿਕੁਸੁਮੇਹਿ ਭਗਵਨ੍ਤਂ ਪੂਜੇਸਿ. ਏਕਞ੍ਚ ਮਣਿਦਣ੍ਡਕਂ ਸੁਵਣ੍ਣਮਯਕਣ੍ਣਿਕਂ ਪਦੁਮਰਾਗਮਣਿਮਯਪਣ੍ਣਂ ਸੁਗਨ੍ਧਕੇਸਰਚ੍ਛਤ੍ਤਂ ਵਿਯ ਪਦੁਮਚ੍ਛਤ੍ਤਂ ਭਗਵਤੋ ਸਿਰਸਿ ਧਾਰਯਨ੍ਤੋ ਚਤੁਪਰਿਸਮਜ੍ਝੇ ਅਟ੍ਠਾਸਿ. ਅਥ ਭਗਵਾ ਨਂ – ‘‘ਇਤੋ ਦ੍ਵੇਨਵੁਤੇ ਕਪ੍ਪੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੯. ‘‘ਅਹਂ ਤੇਨ ਸਮਯੇਨ, ਸੁਜਾਤੋ ਨਾਮ ਖਤ੍ਤਿਯੋ;

ਮਹਾਭੋਗਂ ਛਡ੍ਡਯਿਤ੍ਵਾ, ਪਬ੍ਬਜਿਂ ਇਸਿਪਬ੍ਬਜਂ.

੧੦. ‘‘ਮਯਿ ਪਬ੍ਬਜਿਤੇ ਸਨ੍ਤੇ, ਉਪ੍ਪਜ੍ਜਿ ਲੋਕਨਾਯਕੋ;

ਬੁਦ੍ਧੋਤਿ ਸਦ੍ਦਂ ਸੁਤ੍ਵਾਨ, ਪੀਤਿ ਮੇ ਉਪਪਜ੍ਜਥ.

੧੧. ‘‘ਦਿਬ੍ਬਂ ਮਨ੍ਦਾਰਵਂ ਪੁਪ੍ਫਂ, ਪਦੁਮਂ ਪਾਰਿਛਤ੍ਤਕਂ;

ਉਭੋ ਹਤ੍ਥੇਹਿ ਪਗ੍ਗਯ੍ਹ, ਧੁਨਮਾਨੋ ਉਪਾਗਮਿਂ.

੧੨. ‘‘ਚਾਤੁਵਣ੍ਣਪਰਿਵੁਤਂ, ਤਿਸ੍ਸਂ ਲੋਕਗ੍ਗਨਾਯਕਂ;

ਤਮਹਂ ਪੁਪ੍ਫਂ ਗਹੇਤ੍ਵਾ, ਮਤ੍ਥਕੇ ਧਾਰਯਿਂ ਜਿਨਂ.

੧੩. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਜਨਮਜ੍ਝੇ ਨਿਸੀਦਿਯ;

ਦ੍ਵੇਨਵੁਤੇ ਇਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੪. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੫. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਮਯਿ ਪਬ੍ਬਜਿਤੇਤਿ ਮਯਿ ਪਬ੍ਬਜਿਤਭਾਵਂ ਉਪਗਤੇ. ‘‘ਮਮ ਪਬ੍ਬਜਿਤਂ ਸਨ੍ਤ’’ਨ੍ਤਿ ਪੋਤ੍ਥਕੇਸੁ ਲਿਖਨ੍ਤਿ, ਸੋ ਪਮਾਦਲੇਖੋਤਿ ਵੇਦਿਤਬ੍ਬੋ. ਉਪਪਜ੍ਜਥਾਤਿ ਉਪ੍ਪਜ੍ਜਿਤ੍ਥ. ਉਭੋ ਹਤ੍ਥੇਹੀਤਿ ਉਭੇਹਿ ਹਤ੍ਥੇਹਿ. ਪਗ੍ਗਯ੍ਹਾਤਿ ਗਹੇਤ੍ਵਾਨ. ਧੁਨਮਾਨੋਤਿ ਵਾਕਚੀਰਾਨਿ ਵਿਧੁਨਮਾਨੋਵ. ਚਾਤੁਵਣ੍ਣਪਰਿਵੁਤਨ੍ਤਿ ਚਤੁਪਰਿਸਪਰਿਵੁਤਂ, ਖਤ੍ਤਿਯਬ੍ਰਾਹ੍ਮਣਗਹਪਤਿਸਮਣਪਰਿਵੁਤਨ੍ਤਿ ਅਤ੍ਥੋ. ‘‘ਚਤੁਵਣ੍ਣੇਹਿ ਪਰਿਵੁਤ’’ਨ੍ਤਿ ਪਠਨ੍ਤਿ ਕੇਚਿ.

ਤਸ੍ਸ ਪਨ ਭਗਵਤੋ ਖੇਮਂ ਨਾਮ ਨਗਰਂ ਅਹੋਸਿ. ਜਨਸਨ੍ਧੋ ਨਾਮ ਖਤ੍ਤਿਯੋ ਪਿਤਾ, ਪਦੁਮਾ ਨਾਮ ਜਨਿਕਾ, ਬ੍ਰਹ੍ਮਦੇਵੋ ਚ ਉਦਯੋ ਚ ਦ੍ਵੇ ਅਗ੍ਗਸਾਵਕਾ, ਸਮਙ੍ਗੋ ਨਾਮੁਪਟ੍ਠਾਕੋ, ਫੁਸ੍ਸਾ ਚ ਸੁਦਤ੍ਤਾ ਚ ਦ੍ਵੇ ਅਗ੍ਗਸਾਵਿਕਾ, ਅਸਨਰੁਕ੍ਖੋ ਬੋਧਿ, ਸਰੀਰਂ ਸਟ੍ਠਿਹਤ੍ਥੁਬ੍ਬੇਧਂ ਅਹੋਸਿ, ਵਸ੍ਸਸਤਸਹਸ੍ਸਂ ਆਯੁ, ਸੁਭਦ੍ਦਾ ਨਾਮ ਅਗ੍ਗਮਹੇਸੀ, ਆਨਨ੍ਦੋ ਨਾਮ ਪੁਤ੍ਤੋ, ਤੁਰਙ੍ਗਯਾਨੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੧੬. ‘‘ਖੇਮਕਂ ਨਾਮ ਨਗਰਂ, ਜਨਸਨ੍ਧੋ ਨਾਮ ਖਤ੍ਤਿਯੋ;

ਪਦੁਮਾ ਨਾਮ ਜਨਿਕਾ, ਤਿਸ੍ਸਸ੍ਸ ਚ ਮਹੇਸਿਨੋ.

੨੧. ‘‘ਬ੍ਰਹ੍ਮਦੇਵੋ ਚ ਉਦਯੋ ਚ, ਅਹੇਸੁਂ ਅਗ੍ਗਸਾਵਕਾ;

ਸਮਙ੍ਗੋ ਨਾਮੁਪਟ੍ਠਾਕੋ, ਤਿਸ੍ਸਸ੍ਸ ਚ ਮਹੇਸਿਨੋ.

੨੨. ‘‘ਫੁਸ੍ਸਾ ਚੇਵ ਸੁਦਤ੍ਤਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਅਸਨੋਤਿ ਪਵੁਚ੍ਚਤਿ.

੨੪. ‘‘ਸੋ ਬੁਦ੍ਧੋ ਸਟ੍ਠਿਰਤਨੋ, ਅਹੁ ਉਚ੍ਚਤ੍ਤਨੇ ਜਿਨੋ;

ਅਨੂਪਮੋ ਅਸਦਿਸੋ, ਹਿਮਵਾ ਵਿਯ ਦਿਸ੍ਸਤਿ.

੨੫. ‘‘ਤਸ੍ਸਾਪਿ ਅਤੁਲਤੇਜਸ੍ਸ, ਆਯੁ ਆਸਿ ਅਨੁਤ੍ਤਰੋ;

ਵਸ੍ਸਸਤਸਹਸ੍ਸਾਨਿ, ਲੋਕੇ ਅਟ੍ਠਾਸਿ ਚਕ੍ਖੁਮਾ.

੨੬. ‘‘ਉਤ੍ਤਮਂ ਪਵਰਂ ਸੇਟ੍ਠਂ, ਅਨੁਭੋਤ੍ਵਾ ਮਹਾਯਸਂ;

ਜਲਿਤ੍ਵਾ ਅਗ੍ਗਿਕ੍ਖਨ੍ਧੋਵ, ਨਿਬ੍ਬੁਤੋ ਸੋ ਸਸਾਵਕੋ.

੨੭. ‘‘ਵਲਾਹਕੋਵ ਅਨਿਲੇਨ, ਸੂਰਿਯੇਨ ਵਿਯ ਉਸ੍ਸਵੋ;

ਅਨ੍ਧਕਾਰੋਵ ਪਦੀਪੇਨ, ਨਿਬ੍ਬੁਤੋ ਸੋ ਸਸਾਵਕੋ’’ਤਿ.

ਤਤ੍ਥ ਉਚ੍ਚਤ੍ਤਨੇਤਿ ਉਚ੍ਚਭਾਵੇਨ. ਹਿਮਵਾ ਵਿਯ ਦਿਸ੍ਸਤੀਤਿ ਹਿਮਵਾਵ ਪਦਿਸ੍ਸਤਿ. ਅਯਮੇਵ ਵਾ ਪਾਠੋ. ਯਥਾ ਯੋਜਨਾਨਂ ਸਤਾਨੁਚ੍ਚੋ ਹਿਮਵਾ ਪਞ੍ਚਪਬ੍ਬਤੋ ਸੁਦੂਰੇ ਠਿਤਾਨਮ੍ਪਿ ਉਚ੍ਚਭਾਵੇਨ ਚ ਸੋਮ੍ਮਭਾਵੇਨ ਚ ਅਤਿਰਮਣੀਯੋ ਹੁਤ੍ਵਾ ਦਿਸ੍ਸਤਿ, ਏਵਂ ਭਗਵਾਪਿ ਦਿਸ੍ਸਤੀਤਿ ਅਤ੍ਥੋ. ਅਨੁਤ੍ਤਰੋਤਿ ਨਾਤਿਦੀਘੋ ਨਾਤਿਰਸ੍ਸੋ. ਆਯੁ ਵਸ੍ਸਸਤਸਹਸ੍ਸਨ੍ਤਿ ਅਤ੍ਥੋ. ਉਤ੍ਤਮਂ ਪਵਰਂ ਸੇਟ੍ਠਨ੍ਤਿ ਅਞ੍ਞਮਞ੍ਞਵੇਵਚਨਾਨਿ. ਉਸ੍ਸਵੋਤਿ ਹਿਮਬਿਨ੍ਦੁ ਵਲਾਹਕਉਸ੍ਸਵਅਨ੍ਧਕਾਰਾ ਵਿਯ ਅਨਿਲਸੂਰਿਯਦੀਪੇਹਿ ਅਨਿਚ੍ਚਤਾਨਿਲਸੂਰਿਯਦੀਪੇਹਿ ਉਪਦ੍ਦੁਤੋ ਪਰਿਨਿਬ੍ਬੁਤੋ ਸਸਾਵਕੋ ਭਗਵਾਤਿ ਅਤ੍ਥੋ.

ਤਿਸ੍ਸੋ ਕਿਰ ਭਗਵਾ ਸੁਨਨ੍ਦਵਤੀਨਗਰੇ ਸੁਨਨ੍ਦਾਰਾਮੇ ਪਰਿਨਿਬ੍ਬਾਯਿ. ਸੇਸਮੇਤ੍ਥ ਗਾਥਾਸੁ ਪਾਕਟਮੇਵਾਤਿ.

ਤਿਸ੍ਸਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਸਤ੍ਤਰਸਮੋ ਬੁਦ੍ਧਵਂਸੋ.