੧੮. ਸਿਦ੍ਧਤ੍ਥਬੁਦ੍ਧਵਂਸਵਣ੍ਣਨਾ

ਧਮ੍ਮਦਸ੍ਸਿਮ੍ਹਿ ਭਗਵਤਿ ਪਰਿਨਿਬ੍ਬੁਤੇ ਅਨ੍ਤਰਹਿਤੇ ਚਸ੍ਸ ਸਾਸਨੇ ਤਸ੍ਮਿਂ ਕਪ੍ਪੇ ਅਤੀਤੇ ਕਪ੍ਪਸਹਸ੍ਸੇ ਚ ਸਤ੍ਤਸੁ ਕਪ੍ਪਸਤੇਸੁ ਚ ਛਸੁ ਕਪ੍ਪੇਸੁ ਚ ਅਤਿਕ੍ਕਨ੍ਤੇਸੁ ਇਤੋ ਚਤੁਨਵੁਤਿਕਪ੍ਪਮਤ੍ਥਕੇ ਏਕਸ੍ਮਿਂ ਕਪ੍ਪੇ ਏਕੋਵ ਲੋਕਤ੍ਥਚਰੋ ਅਧਿਗਤਪਰਮਤ੍ਥੋ ਸਿਦ੍ਧਤ੍ਥੋ ਨਾਮ ਸਤ੍ਥਾ ਲੋਕੇ ਪਾਤੁਰਹੋਸਿ. ਤੇਨ ਵੁਤ੍ਤਂ –

੧. ‘‘ਧਮ੍ਮਦਸ੍ਸਿਸ੍ਸ ਅਪਰੇਨ, ਸਿਦ੍ਧਤ੍ਥੋ ਲੋਕਨਾਯਕੋ;

ਨਿਹਨਿਤ੍ਵਾ ਤਮਂ ਸਬ੍ਬਂ, ਸੂਰਿਯੋ ਅਬ੍ਭੁਗ੍ਗਤੋ ਯਥਾ’’ਤਿ.

ਸਿਦ੍ਧਤ੍ਥੋ ਬੋਧਿਸਤ੍ਤੋਪਿ ਪਾਰਮਿਯੋ ਪੂਰੇਤ੍ਵਾ ਤੁਸਿਤਭਵਨੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਵੇਭਾਰਨਗਰੇ ਉਦੇਨਸ੍ਸ ਨਾਮ ਰਞ੍ਞੋ ਅਗ੍ਗਮਹੇਸਿਯਾ ਸੁਫਸ੍ਸਾਯ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਵੀਰਿਯੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਜਾਤੇ ਪਨ ਮਹਾਪੁਰਿਸੇ ਸਬ੍ਬੇਸਂ ਆਰਦ੍ਧਕਮ੍ਮਨ੍ਤਾ ਚ ਇਚ੍ਛਿਤਾ ਚ ਅਤ੍ਥਾ ਸਿਦ੍ਧਿਮਗਮਂਸੁ. ਤਸ੍ਮਾ ਪਨਸ੍ਸ ਞਾਤਕਾ ‘‘ਸਿਦ੍ਧਤ੍ਥੋ’’ਤਿ ਨਾਮਮਕਂਸੁ. ਸੋ ਦਸਵਸ੍ਸਸਹਸ੍ਸਾਨਿ ਅਗਾਰਮਜ੍ਝੇ ਵਸਿ. ਤਸ੍ਸ ਕੋਕਾ-ਸੁਪ੍ਪਲ-ਪਦੁਮਨਾਮਕਾ ਤਯੋ ਪਾਸਾਦਾ ਅਹੇਸੁਂ. ਸੋਮਨਸ੍ਸਾਦੇਵਿਪ੍ਪਮੁਖਾਨਿ ਅਟ੍ਠਚਤ੍ਤਾਲੀਸ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸੋਮਨਸ੍ਸਾਦੇਵਿਯਾ ਪੁਤ੍ਤੇ ਅਨੁਪਮਕੁਮਾਰੇ ਉਪ੍ਪਨ੍ਨੇ ਆਸਾਲ਼੍ਹਿਪੁਣ੍ਣਮਿਯਂ ਸੁਵਣ੍ਣਸਿਵਿਕਾਯ ਨਿਕ੍ਖਮਿਤ੍ਵਾ ਵੀਰਿਯੁਯ੍ਯਾਨਂ ਗਨ੍ਤ੍ਵਾ ਪਬ੍ਬਜਿ. ਤਂ ਕੋਟਿਸਤਸਹਸ੍ਸਮਨੁਸ੍ਸਾ ਅਨੁਪਬ੍ਬਜਿਂਸੁ. ਮਹਾਪੁਰਿਸੋ ਕਿਰ ਤੇਹਿ ਸਦ੍ਧਿਂ ਦਸ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯਂ ਅਸਦਿਸਬ੍ਰਾਹ੍ਮਣਗਾਮੇ ਸੁਨੇਤ੍ਤਾਯ ਨਾਮ ਬ੍ਰਾਹ੍ਮਣਕਞ੍ਞਾਯ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਬਦਰਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਵਰੁਣੇਨ ਨਾਮ ਯਵਪਾਲੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਕਣਿਕਾਰਬੋਧਿਂ ਉਪਗਨ੍ਤ੍ਵਾ ਚਤ੍ਤਾਲੀਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਸਬ੍ਬਞ੍ਞੁਤਂ ਪਾਪੁਣਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਅਤ੍ਤਨਾ ਸਹ ਪਬ੍ਬਜਿਤਾਨਂ ਭਿਕ੍ਖੂਨਂ ਕੋਟਿਸਤਸਹਸ੍ਸਾਨਂ ਚਤੁਸਚ੍ਚਪਟਿਵੇਧਸਮਤ੍ਥਤਂ ਦਿਸ੍ਵਾ ਅਨਿਲਪਥੇਨ ਗਨ੍ਤ੍ਵਾ ਗਯਾਮਿਗਦਾਯੇ ਓਤਰਿਤ੍ਵਾ ਤੇਸਂ ਧਮ੍ਮਚਕ੍ਕਂ ਪਵਤ੍ਤੇਸਿ, ਤਦਾ ਕੋਟਿਸਤਸਹਸ੍ਸਾਨਂ ਪਠਮੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੨. ‘‘ਸੋਪਿ ਪਤ੍ਵਾਨ ਸਮ੍ਬੋਧਿਂ, ਸਨ੍ਤਾਰੇਨ੍ਤੋ ਸਦੇਵਕਂ;

ਅਭਿਵਸ੍ਸਿ ਧਮ੍ਮਮੇਘੇਨ, ਨਿਬ੍ਬਾਪੇਨ੍ਤੋ ਸਦੇਵਕਂ.

੩. ‘‘ਤਸ੍ਸਾਪਿ ਅਤੁਲਤੇਜਸ੍ਸ, ਅਹੇਸੁਂ ਅਭਿਸਮਯਾ ਤਯੋ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਸਦੇਵਕਨ੍ਤਿ ਸਦੇਵਕਂ ਲੋਕਂ. ਧਮ੍ਮਮੇਘੇਨਾਤਿ ਧਮ੍ਮਕਥਾਮੇਘਵਸ੍ਸੇਨ. ਪੁਨ ਭੀਮਰਥਨਗਰੇ ਭੀਮਰਥੇਨ ਨਾਮ ਰਞ੍ਞਾ ਨਿਮਨ੍ਤਿਤੋ ਨਗਰਮਜ੍ਝੇ ਕਤੇ ਸਨ੍ਥਾਗਾਰੇ ਨਿਸਿਨ੍ਨੋ ਕਰਵੀਕਰੁਤਮਞ੍ਜੁਨਾ ਸਵਨਸੁਖੇਨ ਪਰਮਮਧੁਰੇਨ ਪਣ੍ਡਿਤਜਨਹਦਯਙ੍ਗਮੇਨ ਅਮਤਾਭਿਸੇਕਸਦਿਸੇਨ ਬ੍ਰਹ੍ਮਸ੍ਸਰੇਨ ਦਸ ਦਿਸਾ ਪਰਿਪੂਰੇਨ੍ਤੋ ਧਮ੍ਮਾਮਤਦੁਨ੍ਦੁਭਿਮਾਹਨਿ, ਤਦਾ ਨਵੁਤਿਕੋਟੀਨਂ ਦੁਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੪. ‘‘ਪੁਨਾਪਰਂ ਭੀਮਰਥੇ, ਯਦਾ ਆਹਨਿ ਦੁਨ੍ਦੁਭਿਂ;

ਤਦਾ ਨਵੁਤਿਕੋਟੀਨਂ, ਦੁਤਿਯਾਭਿਸਮਯੋ ਅਹੂ’’ਤਿ.

ਯਦਾ ਪਨ ਵੇਭਾਰਨਗਰੇ ਞਾਤਿਸਮਾਗਮੇ ਬੁਦ੍ਧਵਂਸਂ ਦੇਸੇਨ੍ਤੋ ਨਵੁਤਿਕੋਟੀਨਂ ਧਮ੍ਮਚਕ੍ਖੁਂ ਉਪ੍ਪਾਦੇਸਿ, ਸੋ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਯਦਾ ਬੁਦ੍ਧੋ ਧਮ੍ਮਂ ਦੇਸੇਸਿ, ਵੇਭਾਰੇ ਸੋ ਪੁਰੁਤ੍ਤਮੇ;

ਤਦਾ ਨਵੁਤਿਕੋਟੀਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਅਮਰਰੁਚਿਰਦਸ੍ਸਨੇ ਅਮਰਨਗਰੇ ਨਾਮ ਸਮ੍ਬਲੋ ਚ ਸੁਮਿਤ੍ਤੋ ਚ ਦ੍ਵੇ ਭਾਤਰੋ ਰਜ੍ਜਂ ਕਾਰੇਸੁਂ. ਅਥ ਸਿਦ੍ਧਤ੍ਥੋ ਸਤ੍ਥਾ ਤੇਸਂ ਰਾਜੂਨਂ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਗਗਨਤਲੇਨ ਗਨ੍ਤ੍ਵਾ ਅਮਰਨਗਰਮਜ੍ਝੇ ਓਤਰਿਤ੍ਵਾ ਚਕ੍ਕਾਲਙ੍ਕਤਤਲੇਹਿ ਚਰਣੇਹਿ ਪਥਵਿਤਲਂ ਮਦ੍ਦਨ੍ਤੋ ਵਿਯ ਪਦਚੇਤਿਯਾਨਿ ਦਸ੍ਸੇਤ੍ਵਾ ਅਮਰੁਯ੍ਯਾਨਂ ਗਨ੍ਤ੍ਵਾ ਪਰਮਰਮਣੀਯੇ ਅਤ੍ਤਨੋ ਕਰੁਣਾਸੀਤਲੇ ਸਿਲਾਤਲੇ ਨਿਸੀਦਿ. ਤਤੋ ਦ੍ਵੇਪਿ ਭਾਤਿਕਰਾਜਾਨੋ ਦਸਬਲਸ੍ਸ ਪਦਚੇਤਿਯਾਨਿ ਦਿਸ੍ਵਾ ਪਦਾਨਿ ਅਨੁਗਨ੍ਤ੍ਵਾ ਸਿਦ੍ਧਤ੍ਥਂ ਅਧਿਗਤਪਰਮਤ੍ਥਂ ਸਤ੍ਥਾਰਂ ਸਬ੍ਬਲੋਕਨੇਤਾਰਂ ਸਪਰਿਵਾਰਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਤੇਸਂ ਭਗਵਾ ਅਜ੍ਝਾਸਯਾਨੁਰੂਪਂ ਧਮ੍ਮਂ ਦੇਸੇਸਿ. ਤਸ੍ਸ ਤੇ ਧਮ੍ਮਕਥਂ ਸੁਤ੍ਵਾ ਸਞ੍ਜਾਤਸਦ੍ਧਾ ਹੁਤ੍ਵਾ ਸਬ੍ਬੇਵ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤੇਸਂ ਕੋਟਿਸਤਾਨਂ ਖੀਣਾਸਵਾਨਂ ਮਜ੍ਝੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਵੇਭਾਰਨਗਰੇ ਞਾਤਿਸਮਾਗਮੇ ਪਬ੍ਬਜਿਤਾਨਂ ਨਵੁਤਿਕੋਟੀਨਂ ਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਸੁਦਸ੍ਸਨਵਿਹਾਰੇ ਸਨ੍ਨਿਪਤਿਤਾਨਂ ਅਸੀਤਿਕੋਟੀਨਂ ਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੬. ‘‘ਸਨ੍ਨਿਪਾਤਾ ਤਯੋ ਆਸੁਂ, ਤਸ੍ਮਿਮ੍ਪਿ ਦ੍ਵਿਪਦੁਤ੍ਤਮੇ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੭. ‘‘ਕੋਟਿਸਤਾਨਂ ਨਵੁਤੀਨਂ, ਅਸੀਤਿਯਾਪਿ ਚ ਕੋਟਿਨਂ;

ਏਤੇ ਆਸੁਂ ਤਯੋ ਠਾਨਾ, ਵਿਮਲਾਨਂ ਸਮਾਗਮੇ’’ਤਿ.

ਤਤ੍ਥ ਨਵੁਤੀਨਂ, ਅਸੀਤਿਯਾਪਿ ਚ ਕੋਟਿਨਨ੍ਤਿ ਨਵੁਤੀਨਂ ਕੋਟੀਨਂ ਅਸੀਤਿਯਾਪਿ ਚ ਕੋਟੀਨਂ ਸਨ੍ਨਿਪਾਤਾ ਅਹੇਸੁਨ੍ਤਿ ਅਤ੍ਥੋ. ਏਤੇ ਆਸੁਂ ਤਯੋ ਠਾਨਾਤਿ ਏਤਾਨਿ ਤੀਣਿ ਸਨ੍ਨਿਪਾਤਟ੍ਠਾਨਾਨਿ ਅਹੇਸੁਨ੍ਤਿ ਅਤ੍ਥੋ. ‘‘ਠਾਨਾਨੇ ਤਾਨਿ ਤੀਣਿ ਅਹੇਸੁ’’ਨ੍ਤਿਪਿ ਪਾਠੋ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਸੁਰਸੇਨਨਗਰੇ ਮਙ੍ਗਲੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਵੇਦਵੇਦਙ੍ਗਾਨਂ ਪਾਰਂ ਗਨ੍ਤ੍ਵਾ ਅਨੇਕਕੋਟਿਸਙ੍ਖਂ ਧਨਸਨ੍ਨਿਚਯਂ ਦੀਨਾਨਾਥਾਦੀਨਂ ਪਰਿਚ੍ਚਜਿਤ੍ਵਾ ਵਿਵੇਕਾਰਾਮੋ ਹੁਤ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਵਿਹਰਨ੍ਤੋ – ‘‘ਸਿਦ੍ਧਤ੍ਥੋ ਨਾਮ ਬੁਦ੍ਧੋ ਲੋਕੇ ਉਪ੍ਪਨ੍ਨੋ’’ਤਿ ਸੁਤ੍ਵਾ ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਤਸ੍ਸ ਧਮ੍ਮਕਥਂ ਸੁਤ੍ਵਾ ਯਾਯ ਜਮ੍ਬੁਯਾ ਅਯਂ ਜਮ੍ਬੁਦੀਪੋ ਪਞ੍ਞਾਯਤਿ, ਇਦ੍ਧਿਯਾ ਤਂ ਜਮ੍ਬੁਂ ਉਪਸਙ੍ਕਮਿਤ੍ਵਾ ਤਤੋ ਫਲਂ ਆਹਰਿਤ੍ਵਾ ਨਵੁਤਿਕੋਟਿਭਿਕ੍ਖੁਪਰਿਵਾਰਂ ਸਿਦ੍ਧਤ੍ਥਂ ਸਤ੍ਥਾਰਂ ਸੁਰਸੇਨਵਿਹਾਰੇ ਨਿਸੀਦਾਪੇਤ੍ਵਾ ਜਮ੍ਬੁਫਲੇਹਿ ਸਨ੍ਤਪ੍ਪੇਸਿ ਸਮ੍ਪਵਾਰੇਸਿ. ਅਥ ਸਤ੍ਥਾ ਤਂ ਫਲਂ ਪਰਿਭੁਞ੍ਜਿਤ੍ਵਾ – ‘‘ਇਤੋ ਚਤੁਨਵੁਤਿਕਪ੍ਪਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੮. ‘‘ਅਹਂ ਤੇਨ ਸਮਯੇਨ, ਮਙ੍ਗਲੋ ਨਾਮ ਤਾਪਸੋ;

ਉਗ੍ਗਤੇਜੋ ਦੁਪ੍ਪਸਹੋ, ਅਭਿਞ੍ਞਾਬਲਸਮਾਹਿਤੋ.

੯. ‘‘ਜਮ੍ਬੁਤੋ ਫਲਮਾਨੇਤ੍ਵਾ, ਸਿਦ੍ਧਤ੍ਥਸ੍ਸ ਅਦਾਸਹਂ;

ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਇਦਂ ਵਚਨਮਬ੍ਰਵਿ.

੧੦. ‘‘ਪਸ੍ਸਥ ਇਮਂ ਤਾਪਸਂ, ਜਟਿਲਂ ਉਗ੍ਗਤਾਪਨਂ;

ਚਤੁਨਵੁਤਿਤੋ ਕਪ੍ਪੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੧. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੨. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਦੁਪ੍ਪਸਹੋਤਿ ਦੁਰਾਸਦੋ. ਅਯਮੇਵ ਵਾ ਪਾਠੋ. ਤਸ੍ਸ ਪਨ ਭਗਵਤੋ ਨਗਰਂ ਵੇਭਾਰਂ ਨਾਮ ਅਹੋਸਿ. ਉਦੇਨੋ ਨਾਮ ਰਾਜਾ ਪਿਤਾ, ਜਯਸੇਨੋਤਿਪਿ ਤਸ੍ਸੇਵ ਨਾਮਂ, ਸੁਫਸ੍ਸਾ ਨਾਮ ਮਾਤਾ, ਸਮ੍ਬਲੋ ਚ ਸੁਮਿਤ੍ਤੋ ਚ ਦ੍ਵੇ ਅਗ੍ਗਸਾਵਕਾ, ਰੇਵਤੋ ਨਾਮੁਪਟ੍ਠਾਕੋ, ਸੀਵਲਾ ਚ ਸੁਰਾਮਾ ਚ ਦ੍ਵੇ ਅਗ੍ਗਸਾਵਿਕਾ, ਕਣਿਕਾਰਰੁਕ੍ਖੋ ਬੋਧਿ, ਸਰੀਰਂ ਸਟ੍ਠਿਹਤ੍ਥੁਬ੍ਬੇਧਂ ਅਹੋਸਿ. ਵਸ੍ਸਸਤਸਹਸ੍ਸਂ ਆਯੁ, ਸੋਮਨਸ੍ਸਾ ਨਾਮ ਅਗ੍ਗਮਹੇਸੀ ਅਹੋਸਿ, ਅਨੁਪਮੋ ਨਾਮ ਪੁਤ੍ਤੋ, ਸੁਵਣ੍ਣਸਿਵਿਕਾਯ ਨਿਕ੍ਖਮਿ. ਤੇਨ ਵੁਤ੍ਤਂ –

੧੩. ‘‘ਵੇਭਾਰਂ ਨਾਮ ਨਗਰਂ, ਉਦੇਨੋ ਨਾਮ ਖਤ੍ਤਿਯੋ;

ਸੁਫਸ੍ਸਾ ਨਾਮ ਜਨਿਕਾ, ਸਿਦ੍ਧਿਤ੍ਥਸ੍ਸ ਮਹੇਸਿਨੋ.

੧੮. ‘‘ਸਮ੍ਬਲੋ ਚ ਸੁਮਿਤ੍ਤੋ ਚ, ਅਹੇਸੁਂ ਅਗ੍ਗਸਾਵਕਾ;

ਰੇਵਤੋ ਨਾਮੁਪਟ੍ਠਾਕੋ, ਸਿਦ੍ਧਤ੍ਥਸ੍ਸ ਮਹੇਸਿਨੋ.

੧੯. ‘‘ਸੀਵਲਾ ਚ ਸੁਰਾਮਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਕਣਿਕਾਰੋਤਿ ਵੁਚ੍ਚਤਿ.

੨੧. ‘‘ਸੋ ਬੁਦ੍ਧੋ ਸਟ੍ਠਿਰਤਨਂ, ਅਹੋਸਿ ਨਭਮੁਗ੍ਗਤੋ;

ਕਞ੍ਚਨਗ੍ਘਿਯਸਙ੍ਕਾਸੋ, ਦਸਸਹਸ੍ਸੀ ਵਿਰੋਚਤਿ.

੨੨. ‘‘ਸੋਪਿ ਬੁਦ੍ਧੋ ਅਸਮਸਮੋ, ਅਤੁਲੋ ਅਪ੍ਪਟਿਪੁਗ੍ਗਲੋ;

ਵਸ੍ਸਸਤਸਹਸ੍ਸਾਨਿ, ਲੋਕੇ ਅਟ੍ਠਾਸਿ ਚਕ੍ਖੁਮਾ.

੨੩. ‘‘ਵਿਪੁਲਂ ਪਭਂ ਦਸ੍ਸਯਿਤ੍ਵਾ, ਪੁਪ੍ਫਾਪੇਤ੍ਵਾਨ ਸਾਵਕੇ;

ਵਿਲਾਸੇਤ੍ਵਾ ਸਮਾਪਤ੍ਯਾ, ਨਿਬ੍ਬੁਤੋ ਸੋ ਸਸਾਵਕੋ’’ਤਿ.

ਤਤ੍ਥ ਸਟ੍ਠਿਰਤਨਨ੍ਤਿ ਸਟ੍ਠਿਰਤਨਪ੍ਪਮਾਣਂ ਨਭਂ ਉਗ੍ਗਤੋਤਿ ਅਤ੍ਥੋ. ਕਞ੍ਚਨਗ੍ਘਿਯਸਙ੍ਕਾਸੋਤਿ ਨਾਨਾਰਤਨਵਿਚਿਤ੍ਤਕਨਕਮਯਅਗ੍ਘਿਯਸਦਿਸਦਸ੍ਸਨੋਤਿ ਅਤ੍ਥੋ. ਦਸਸਹਸ੍ਸੀ ਵਿਰੋਚਤੀਤਿ ਦਸਸਹਸ੍ਸਿਯਂ ਵਿਰੋਚਤਿ. ਵਿਪੁਲਨ੍ਤਿ ਉਲ਼ਾਰਂ ਓਭਾਸਂ. ਪੁਪ੍ਫਾਪੇਤ੍ਵਾਨਾਤਿ ਝਾਨਾਭਿਞ੍ਞਾਮਗ੍ਗਫਲਸਮਾਪਤ੍ਤਿਪੁਪ੍ਫੇਹਿ ਪੁਪ੍ਫਿਤੇ ਪਰਮਸੋਭਗ੍ਗਪ੍ਪਤ੍ਤੇ ਕਤ੍ਵਾਤਿ ਅਤ੍ਥੋ. ਵਿਲਾਸੇਤ੍ਵਾਤਿ ਵਿਲਾਸਯਿਤ੍ਵਾ ਕੀਲ਼ਿਤ੍ਵਾ. ਸਮਾਪਤ੍ਯਾਤਿ ਲੋਕਿਯਲੋਕੁਤ੍ਤਰਾਹਿ ਸਮਾਪਤ੍ਤੀਹਿ ਅਭਿਞ੍ਞਾਹਿ ਚ. ਨਿਬ੍ਬੁਤੋਤਿ ਅਨੁਪਾਦਾਪਰਿਨਿਬ੍ਬਾਨੇਨ ਨਿਬ੍ਬੁਤੋ.

ਸਿਦ੍ਧਤ੍ਥੋ ਕਿਰ ਸਤ੍ਥਾ ਕਞ੍ਚਨਵੇਲ਼ੁਨਗਰੇ ਅਨੋਮੁਯ੍ਯਾਨੇ ਪਰਿਨਿਬ੍ਬਾਯਿ. ਤਤ੍ਥੇਵਸ੍ਸ ਰਤਨਮਯਂ ਚਤੁਯੋਜਨੁਬ੍ਬੇਧਂ ਚੇਤਿਯਮਕਂਸੂਤਿ. ਸੇਸਗਾਥਾਸੁ ਸਬ੍ਬਤ੍ਥ ਪਾਕਟਮੇਵਾਤਿ.

ਸਿਦ੍ਧਤ੍ਥਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਸੋਲ਼ਸਮੋ ਬੁਦ੍ਧਵਂਸੋ.