੧੭. ਧਮ੍ਮਦਸ੍ਸੀਬੁਦ੍ਧਵਂਸਵਣ੍ਣਨਾ

ਅਤ੍ਥਦਸ੍ਸਿਮ੍ਹਿ ਸਮ੍ਮਾਸਮ੍ਬੁਦ੍ਧੇ ਪਰਿਨਿਬ੍ਬੁਤੇ ਅਨ੍ਤਰਕਪ੍ਪੇ ਚ ਵੀਤਿਵਤ੍ਤੇ ਅਪਰਿਮਿਤਾਯੁਕੇਸੁ ਸਤ੍ਤੇਸੁ ਅਨੁਪੁਬ੍ਬੇਨ ਪਰਿਹਾਯਿਤ੍ਵਾ ਵਸ੍ਸਸਤਸਹਸ੍ਸਾਯੁਕੇਸੁ ਜਾਤੇਸੁ ਧਮ੍ਮਦਸ੍ਸੀ ਨਾਮ ਸਤ੍ਥਾ ਲੋਕਾਲੋਕਕਰੋ ਲੋਭਾਦਿਲੋਕਮਲਵਿਨਯਕਰੋ ਲੋਕੇਕਨਾਯਕੋ ਲੋਕੇ ਉਦਪਾਦਿ. ਸੋਪਿ ਭਗਵਾ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਸਰਣਨਗਰੇ ਸਬ੍ਬਲੋਕਸਰਣਸ੍ਸ ਸਰਣਸ੍ਸ ਨਾਮ ਰਞ੍ਞੋ ਅਗ੍ਗਮਹੇਸਿਯਾ ਸੁਨਨ੍ਦਾਯ ਨਾਮ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਸੋ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਸਰਣੁਯ੍ਯਾਨੇ ਮਾਤੁਕੁਚ੍ਛਿਤੋ ਪਾਵੁਸ੍ਸਕਾਲੇ ਸਲਿਲਧਰਵਿਵਰਗਤੋ ਪੁਣ੍ਣਚਨ੍ਦੋ ਵਿਯ ਨਿਕ੍ਖਮਿ. ਮਹਾਪੁਰਿਸੇ ਪਨ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਮਤ੍ਤੇਯੇਵ ਅਧਿਕਰਣਵੋਹਾਰਸਤ੍ਥਪੋਤ੍ਥਕੇਸੁ ਅਧਮ੍ਮਿਯਾ ਵੋਹਾਰਾ ਸਯਮੇਵ ਅਨ੍ਤਰਧਾਯਿਂਸੁ. ਧਮ੍ਮਿਕਵੋਹਾਰਾਯੇਵ ਅਟ੍ਠਂਸੁ. ਤੇਨਸ੍ਸ ਨਾਮਗ੍ਗਹਣਦਿਵਸੇ ‘‘ਧਮ੍ਮਦਸ੍ਸੀ’’ਤਿ ਨਾਮਮਕਂਸੁ. ਸੋ ਅਟ੍ਠਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਤਸ੍ਸ ਕਿਰ ਅਰਜ-ਵਿਰਜ-ਸੁਦਸ੍ਸਨਨਾਮਕਾ ਤਯੋ ਪਾਸਾਦਾ ਅਹੇਸੁਂ. ਵਿਚਿਕੋਲ਼ਿਦੇਵਿਪ੍ਪਮੁਖਾਨਂ ਇਤ੍ਥੀਨਂ ਵੀਸਤਿਸਹਸ੍ਸਾਧਿਕਂ ਸਤਸਹਸ੍ਸਂ ਅਹੋਸਿ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਵਿਚਿਕੋਲ਼ਿਦੇਵਿਯਾ ਪੁਞ੍ਞਵਡ੍ਢਨੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਦੇਵਕੁਮਾਰੋ ਵਿਯ ਅਤਿਵਿਯ ਸੁਖੁਮਾਲੋ ਦੇਵਸਮ੍ਪਤ੍ਤਿਮਿਵ ਸਮ੍ਪਤ੍ਤਿਮਨੁਭਵਮਾਨੋ ਮਜ੍ਝਿਮਯਾਮੇ ਵੁਟ੍ਠਾਯ ਸਿਰਿਸਯਨੇ ਨਿਸਿਨ੍ਨੋ ਨਿਦ੍ਦੋਪਗਤਾਨਂ ਇਤ੍ਥੀਨਂ ਵਿਪ੍ਪਕਾਰਂ ਦਿਸ੍ਵਾ ਸਞ੍ਜਾਤਸਂਵੇਗੋ ਮਹਾਭਿਨਿਕ੍ਖਮਨਾਯ ਚਿਤ੍ਤਂ ਉਪ੍ਪਾਦੇਸਿ. ਚਿਤ੍ਤੁਪ੍ਪਾਦਸਮਨਨ੍ਤਰਮੇਵਸ੍ਸ ਸੁਦਸ੍ਸਨਪਾਸਾਦੋ ਗਗਨਤਲਮਬ੍ਭੁਗ੍ਗਨ੍ਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਪਰਿਵੁਤੋ ਦੁਤਿਯੋ ਦਿਵਸਕਰੋ ਵਿਯ ਦਿਬ੍ਬਵਿਮਾਨਂ ਵਿਯ ਚ ਗਨ੍ਤ੍ਵਾ ਰਤ੍ਤਕੁਰਵਕਤਰੁਬੋਧਿਸਮੀਪੇਯੇਵ ਓਤਰਿਤ੍ਵਾ ਅਟ੍ਠਾਸਿ. ਮਹਾਪੁਰਿਸੋ ਕਿਰ ਬ੍ਰਹ੍ਮੁਨਾ ਉਪਨੀਤਾਨਿ ਕਾਸਾਯਾਨਿ ਗਹੇਤ੍ਵਾ ਪਬ੍ਬਜਿਤ੍ਵਾ ਪਾਸਾਦਤੋ ਓਤਰਿਤ੍ਵਾ ਅਵਿਦੂਰੇ ਅਟ੍ਠਾਸਿ. ਪਾਸਾਦੋ ਪੁਨ ਆਕਾਸੇਨ ਗਨ੍ਤ੍ਵਾ ਬੋਧਿਰੁਕ੍ਖਂ ਅਨ੍ਤੋਕਤ੍ਵਾ ਪਥਵਿਯਂ ਪਤਿਟ੍ਠਾਸਿ. ਇਤ੍ਥਿਯੋਪਿ ਸਪਰਿਵਾਰਾ ਪਾਸਾਦਤੋ ਓਤਰਿਤ੍ਵਾ ਅਡ੍ਢਗਾਵੁਤਮਤ੍ਤਂ ਗਨ੍ਤ੍ਵਾ ਅਟ੍ਠਂਸੁ. ਤਤ੍ਥ ਇਤ੍ਥਿਯੋ ਚ ਤਾਸਂ ਪਰਿਚਾਰਿਕਾ ਚੇਟਿਕਾਯੋ ਚ ਠਪੇਤ੍ਵਾ ਸਬ੍ਬੇ ਮਨੁਸ੍ਸਾ ਤਂ ਅਨੁਪਬ੍ਬਜਿਂਸੁ. ਭਿਕ੍ਖੂਨਂ ਕੋਟਿਸਤਸਹਸ੍ਸਂ ਅਹੋਸਿ.

ਅਥ ਧਮ੍ਮਦਸ੍ਸੀ ਬੋਧਿਸਤ੍ਤੋ ਸਤ੍ਤਾਹਂ ਪਧਾਨਚਰਿਯਂ ਚਰਿਤ੍ਵਾ ਵਿਚਿਕੋਲ਼ਿਦੇਵਿਯਾ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਬਦਰਵਨੇ ਦਿਵਾਵਿਹਾਰਂ ਕਤ੍ਵਾ ਸਾਯਨ੍ਹਸਮਯੇ ਸਿਰਿਵਡ੍ਢਨੇਨ ਨਾਮ ਯਵਪਾਲਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਬਿਮ੍ਬਿਜਾਲਬੋਧਿਂ ਉਪਗਨ੍ਤ੍ਵਾ ਤੇਪਣ੍ਣਾਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਤਤ੍ਥ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾਵ ਬੋਧਿਸਮੀਪੇ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਕਤਬ੍ਰਹ੍ਮਯਾਚਨੋ ਅਤ੍ਤਨਾ ਸਦ੍ਧਿਂ ਪਬ੍ਬਜਿਤਸ੍ਸ ਭਿਕ੍ਖੂਨਂ ਕੋਟਿਸਤਸਹਸ੍ਸਸ੍ਸ ਸਦ੍ਧਮ੍ਮਪ੍ਪਟਿਵੇਧਸਮਤ੍ਥਤਂ ਞਤ੍ਵਾ ਅਟ੍ਠਾਰਸਯੋਜਨਿਕਮਗ੍ਗਂ ਏਕਾਹੇਨੇਵ ਇਸਿਪਤਨਂ ਗਨ੍ਤ੍ਵਾ ਤੇਹਿ ਪਰਿਵੁਤੋ ਤਤ੍ਥ ਧਮ੍ਮਚਕ੍ਕਂ ਪਵਤ੍ਤੇਸਿ, ਤਦਾ ਕੋਟਿਸਤਸਹਸ੍ਸਾਨਂ ਪਠਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਧਮ੍ਮਦਸ੍ਸੀ ਮਹਾਯਸੋ;

ਤਮਨ੍ਧਕਾਰਂ ਵਿਧਮਿਤ੍ਵਾ, ਅਤਿਰੋਚਤਿ ਸਦੇਵਕੇ.

੨. ‘‘ਤਸ੍ਸਾਪਿ ਅਤੁਲਤੇਜਸ੍ਸ, ਧਮ੍ਮਚਕ੍ਕਪ੍ਪਵਤ੍ਤਨੇ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੂ’’ਤਿ.

ਤਤ੍ਥ ਤਮਨ੍ਧਕਾਰਨ੍ਤਿ ਤਮਸਙ੍ਖਾਤਂ ਮੋਹਨ੍ਧਕਾਰਨ੍ਤਿ ਅਤ੍ਥੋ.

ਯਦਾ ਪਨ ਤਗਰਨਾਮਕੇ ਨਗਰੇ ਸਞ੍ਜਯੋ ਨਾਮ ਰਾਜਾ ਕਾਮੇਸੁ ਆਦੀਨਵਂ ਨੇਕ੍ਖਮ੍ਮਂ ਖੇਮਤੋ ਚ ਦਿਸ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿ. ਤਂ ਨਵੁਤਿਕੋਟਿਯੋ ਅਨੁਪਬ੍ਬਜਿਂਸੁ. ਤੇ ਸਬ੍ਬੇਯੇਵ ਪਞ੍ਚਾਭਿਞ੍ਞਾਅਟ੍ਠਸਮਾਪਤ੍ਤਿਲਾਭਿਨੋ ਅਹੇਸੁਂ. ਅਥ ਸਤ੍ਥਾ ਧਮ੍ਮਦਸ੍ਸੀ ਤੇਸਂ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਆਕਾਸੇਨ ਗਨ੍ਤ੍ਵਾ ਸਞ੍ਜਯਸ੍ਸ ਤਾਪਸਸ੍ਸ ਅਸ੍ਸਮਪਦਂ ਗਨ੍ਤ੍ਵਾ ਆਕਾਸੇ ਠਤ੍ਵਾ ਤੇਸਂ ਤਾਪਸਾਨਂ ਅਜ੍ਝਾਸਯਾਨੁਰੂਪਂ ਧਮ੍ਮਂ ਦੇਸੇਤ੍ਵਾ ਧਮ੍ਮਚਕ੍ਖੁਂ ਉਪ੍ਪਾਦੇਸਿ, ਸੋ ਦੁਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੩. ‘‘ਯਦਾ ਬੁਦ੍ਧੋ ਧਮ੍ਮਦਸ੍ਸੀ, ਵਿਨੇਸਿ ਸਞ੍ਜਯਂ ਇਸਿਂ;

ਤਦਾ ਨਵੁਤਿਕੋਟੀਨਂ, ਦੁਤਿਯਾਭਿਸਮਯੋ ਅਹੂ’’ਤਿ.

ਯਦਾ ਪਨ ਸਕ੍ਕੋ ਦੇਵਾਨਮਿਨ੍ਦੋ ਦਸਬਲਸ੍ਸ ਧਮ੍ਮਂ ਸੋਤੁਕਾਮੋ ਤਂ ਉਪਸਙ੍ਕਮਿ, ਤਦਾ ਅਸੀਤਿਯਾ ਕੋਟੀਨਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੪. ‘‘ਯਦਾ ਸਕ੍ਕੋ ਉਪਗਞ੍ਛਿ, ਸਪਰਿਸੋ ਵਿਨਾਯਕਂ;

ਤਦਾ ਅਸੀਤਿਕੋਟੀਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਯਦਾ ਪਨ ਸਰਣਨਗਰੇ ਵੇਮਾਤਿਕਭਾਤਿਕਂ ਪਦੁਮਕੁਮਾਰਂ ਫੁਸ੍ਸਦੇਵਕੁਮਾਰਞ੍ਚ ਸਪਰਿਵਾਰੇ ਪਬ੍ਬਾਜੇਸਿ, ਤਸ੍ਮਿਂ ਅਨ੍ਤੋਵਸ੍ਸੇ ਪਬ੍ਬਜਿਤਾਨਂ ਭਿਕ੍ਖੂਨਂ ਕੋਟਿਸਤਸਹਸ੍ਸਾਨਂ ਮਜ੍ਝੇ ਵਿਸੁਦ੍ਧਿਪਵਾਰਣਂ ਪਵਾਰੇਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਪੁਨ ਭਗਵਤੋ ਦੇਵਲੋਕਤੋ ਓਰੋਹਣੇ ਸਤਕੋਟੀਨਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਯਦਾ ਪਨ ਸੁਦਸ੍ਸਨਾਰਾਮੇ ਤੇਰਸਨ੍ਨਂ ਧੁਤਗੁਣਾਨਂ ਗੁਣੇ ਆਨਿਸਂਸੇ ਪਕਾਸੇਤ੍ਵਾ ਹਾਰਿਤਂ ਨਾਮ ਮਹਾਸਾਵਕਂ ਏਤਦਗ੍ਗੇ ਠਪੇਸਿ, ਤਦਾ ਅਸੀਤਿਯਾ ਕੋਟੀਨਂ ਮਜ੍ਝੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੫. ‘‘ਤਸ੍ਸਾਪਿ ਦੇਵਦੇਵਸ੍ਸ, ਸਨ੍ਨਿਪਾਤਾ ਤਯੋ ਅਹੁਂ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੬. ‘‘ਯਦਾ ਬੁਦ੍ਧੋ ਧਮ੍ਮਦਸ੍ਸੀ, ਸਰਣੇ ਵਸ੍ਸਂ ਉਪਾਗਮਿ;

ਤਦਾ ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ.

੭. ‘‘ਪੁਨਾਪਰਂ ਯਦਾ ਬੁਦ੍ਧੋ, ਦੇਵਤੋ ਏਤਿ ਮਾਨੁਸਂ;

ਤਦਾਪਿ ਸਤਕੋਟੀਨਂ, ਦੁਤਿਯੋ ਆਸਿ ਸਮਾਗਮੋ.

੮. ‘‘ਪੁਨਾਪਰਂ ਯਦਾ ਬੁਦ੍ਧੋ, ਪਕਾਸੇਸਿ ਧੁਤੇ ਗੁਣੇ;

ਤਦਾ ਅਸੀਤਿਕੋਟੀਨਂ, ਤਤਿਯੋ ਆਸਿ ਸਮਾਗਮੋ’’ਤਿ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਸਕ੍ਕੋ ਦੇਵਰਾਜਾ ਹੁਤ੍ਵਾ ਦ੍ਵੀਸੁ ਦੇਵਲੋਕੇਸੁ ਦੇਵੇਹਿ ਪਰਿਵੁਤੋ ਆਗਨ੍ਤ੍ਵਾ ਦਿਬ੍ਬੇਹਿ ਗਨ੍ਧਪੁਪ੍ਫਾਦੀਹਿ ਦਿਬ੍ਬਤੁਰਿਯੇਹਿ ਚ ਤਥਾਗਤਂ ਪੂਜੇਸਿ. ਸੋਪਿ ਨਂ ਸਤ੍ਥਾ – ‘‘ਅਨਾਗਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੯. ‘‘ਅਹਂ ਤੇਨ ਸਮਯੇਨ, ਸਕ੍ਕੋ ਆਸਿਂ ਪੁਰਿਨ੍ਦਦੋ;

ਦਿਬ੍ਬੇਨ ਗਨ੍ਧਮਾਲੇਨ, ਤੁਰਿਯੇਨਾਭਿਪੂਜਯਿਂ.

੧੦. ‘‘ਸੋਪਿ ਮਂ ਤਦਾ ਬ੍ਯਾਕਾਸਿ, ਦੇਵਮਜ੍ਝੇ ਨਿਸੀਦਿਯ;

ਅਟ੍ਠਾਰਸੇ ਕਪ੍ਪਸਤੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੧. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੨. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਸ੍ਸ ਪਨ ਭਗਵਤੋ ਸਰਣਂ ਨਾਮ ਨਗਰਂ ਅਹੋਸਿ. ਸਰਣੋ ਨਾਮ ਰਾਜਾ ਪਿਤਾ, ਸੁਨਨ੍ਦਾ ਨਾਮ ਮਾਤਾ, ਪਦੁਮੋ ਚ ਫੁਸ੍ਸਦੇਵੋ ਚ ਦ੍ਵੇ ਅਗ੍ਗਸਾਵਕਾ, ਸੁਨੇਤ੍ਤੋ ਨਾਮ ਉਪਟ੍ਠਾਕੋ, ਖੇਮਾ ਚ ਸਬ੍ਬਨਾਮਾ ਚ ਦ੍ਵੇ ਅਗ੍ਗਸਾਵਿਕਾ, ਬਿਮ੍ਬਿਜਾਲਰੁਕ੍ਖੋ ਬੋਧਿ, ਸਰੀਰਂ ਪਨਸ੍ਸ ਅਸੀਤਿਹਤ੍ਥੁਬ੍ਬੇਧਂ ਅਹੋਸਿ, ਆਯੁ ਵਸ੍ਸਸਤਸਹਸ੍ਸਂ, ਵਿਚਿਕੋਲ਼ਿਦੇਵੀ ਨਾਮਸ੍ਸ ਅਗ੍ਗਮਹੇਸੀ, ਪੁਞ੍ਞਵਡ੍ਢਨੋ ਨਾਮਸ੍ਸ ਪੁਤ੍ਤੋ, ਪਾਸਾਦੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੧੩. ‘‘ਸਰਣਂ ਨਾਮ ਨਗਰਂ, ਸਰਣੋ ਨਾਮ ਖਤ੍ਤਿਯੋ;

ਸੁਨਨ੍ਦਾ ਨਾਮ ਜਨਿਕਾ, ਧਮ੍ਮਦਸ੍ਸਿਸ੍ਸ ਸਤ੍ਥੁਨੋ.

੧੮. ‘‘ਪਦੁਮੋ ਫੁਸ੍ਸਦੇਵੋ ਚ, ਅਹੇਸੁਂ ਅਗ੍ਗਸਾਵਕਾ;

ਸੁਨੇਤ੍ਤੋ ਨਾਮੁਪਟ੍ਠਾਕੋ, ਧਮ੍ਮਦਸ੍ਸਿਸ੍ਸ ਸਤ੍ਥੁਨੋ.

੧੯. ‘‘ਖੇਮਾ ਚ ਸਬ੍ਬਨਾਮਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਬਿਮ੍ਬਿਜਾਲੋਤਿ ਵੁਚ੍ਚਤਿ.

੨੧. ‘‘ਸੋਪਿ ਬੁਦ੍ਧੋ ਅਸਮਸਮੋ, ਅਸੀਤਿਹਤ੍ਥਮੁਗ੍ਗਤੋ;

ਅਤਿਰੋਚਤਿ ਤੇਜੇਨ, ਦਸਸਹਸ੍ਸਿਮ੍ਹਿ ਧਾਤੁਯਾ.

੨੨. ‘‘ਸੁਫੁਲ੍ਲੋ ਸਾਲਰਾਜਾਵ, ਵਿਜ੍ਜੂਵ ਗਗਨੇ ਯਥਾ;

ਮਜ੍ਝਨ੍ਹਿਕੇਵ ਸੂਰਿਯੋ, ਏਵਂ ਸੋ ਉਪਸੋਭਥ.

੨੩. ‘‘ਤਸ੍ਸਾਪਿ ਅਤੁਲਤੇਜਸ੍ਸ, ਸਮਕਂ ਆਸਿ ਜੀਵਿਕਂ;

ਵਸ੍ਸਸਤਸਹਸ੍ਸਾਨਿ, ਲੋਕੇ ਅਟ੍ਠਾਸਿ ਚਕ੍ਖੁਮਾ.

੨੪. ‘‘ਓਭਾਸਂ ਦਸ੍ਸਯਿਤ੍ਵਾਨ, ਵਿਮਲਂ ਕਤ੍ਵਾਨ ਸਾਸਨਂ;

ਚਵਿ ਚਨ੍ਦੋਵ ਗਗਨੇ, ਨਿਬ੍ਬੁਤੋ ਸੋ ਸਸਾਵਕੋ’’ਤਿ.

ਤਤ੍ਥ ਬਿਮ੍ਬਿਜਾਲੋਤਿ ਰਤ੍ਤਕੁਰਵਕਰੁਕ੍ਖੋ. ਦਸਸਹਸ੍ਸਿਮ੍ਹਿ ਧਾਤੁਯਾਤਿ ਦਸਸਹਸ੍ਸਿਯਾ ਲੋਕਧਾਤੁਯਾ. ਵਿਜ੍ਜੂਵਾਤਿ ਵਿਜ੍ਜੁਲਤਾ ਵਿਯ. ਉਪਸੋਭਥਾਤਿ ਯਥਾ ਗਗਨੇ ਵਿਜ੍ਜੁ ਚ ਮਜ੍ਜਨ੍ਹਿਕੇ ਸੂਰਿਯੋ ਚ ਉਪਸੋਭਤਿ, ਏਵਂ ਸੋ ਭਗਵਾ ਉਪਸੋਭਿਤ੍ਥਾਤਿ ਅਤ੍ਥੋ. ਸਮਕਨ੍ਤਿ ਸਬ੍ਬੇਹਿ ਨਰਸਤ੍ਤੇਹਿ ਸਮਮੇਵ ਤਸ੍ਸ ਆਯੁ ਅਹੋਸੀਤਿ ਅਤ੍ਥੋ. ਚਵੀਤਿ ਚੁਤੋ. ਚਨ੍ਦੋਵਾਤਿ ਗਗਨਤੋ ਚਨ੍ਦਿਮਾ ਵਿਯ ਚਵੀਤਿ ਅਤ੍ਥੋ. ਧਮ੍ਮਦਸ੍ਸੀ ਕਿਰ ਭਗਵਾ ਸਾਲਵਤੀਨਗਰੇ ਕੇਸਾਰਾਮੇ ਪਰਿਨਿਬ੍ਬਾਯਿ ਸੇਸਮੇਤ੍ਥ ਗਾਥਾਸੁ ਪਾਕਟਮੇਵਾਤਿ.

ਧਮ੍ਮਦਸ੍ਸੀਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਪਨ੍ਨਰਸਮੋ ਬੁਦ੍ਧਵਂਸੋ.