੧੬. ਅਤ੍ਥਦਸ੍ਸੀਬੁਦ੍ਧਵਂਸਵਣ੍ਣਨਾ

ਪਿਯਦਸ੍ਸਿਮ੍ਹਿ ਸਮ੍ਮਾਸਮ੍ਬੁਦ੍ਧੇ ਪਰਿਨਿਬ੍ਬੁਤੇ ਤਸ੍ਸ ਸਾਸਨੇ ਚ ਅਨ੍ਤਰਹਿਤੇ ਪਰਿਹਾਯਿਤ੍ਵਾ ਵਡ੍ਢਿਤ੍ਵਾ ਅਪਰਿਮਿਤਾਯੁਕੇਸੁ ਮਨੁਸ੍ਸੇਸੁ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਵਸ੍ਸਸਤਸਹਸ੍ਸਾਯੁਕੇਸੁ ਜਾਤੇਸੁ ਪਰਮਤ੍ਥਦਸ੍ਸੀ ਅਤ੍ਥਦਸ੍ਸੀ ਨਾਮ ਬੁਦ੍ਧੋ ਲੋਕੇ ਉਪ੍ਪਜ੍ਜਿ. ਸੋ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਪਰਮਸੋਭਨੇ ਸੋਭਨੇ ਨਾਮ ਨਗਰੇ ਸਾਗਰਸ੍ਸ ਨਾਮ ਰਞ੍ਞੋ ਕੁਲੇ ਅਗ੍ਗਮਹੇਸਿਯਾ ਸੁਦਸ੍ਸਨਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸ ਮਾਸੇ ਗਬ੍ਭੇ ਵਸਿਤ੍ਵਾ ਸੁਚਿਨ੍ਧਨੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਮਾਤੁਕੁਚ੍ਛਿਤੋ ਮਹਾਪੁਰਿਸੇ ਨਿਕ੍ਖਨ੍ਤਮਤ੍ਤੇ ਸੁਚਿਰਕਾਲਨਿਹਿਤਾਨਿ ਕੁਲਪਰਮ੍ਪਰਾਗਤਾਨਿ ਮਹਾਨਿਧਾਨਾਨਿ ਧਨਸਾਮਿਕਾ ਪਟਿਲਭਿਂਸੂਤਿ ਤਸ੍ਸ ਨਾਮਗ੍ਗਹਣਦਿਵਸੇ ‘‘ਅਤ੍ਥਦਸ੍ਸੀ’’ਤਿ ਨਾਮਮਕਂਸੁ. ਸੋ ਦਸਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਅਮਰਗਿਰਿ-ਸੁਰਗਿਰਿ-ਗਿਰਿਵਾਹਨਨਾਮਕਾ ਪਰਮਸੁਰਭਿਜਨਕਾ ਤਯੋ ਚਸ੍ਸ ਪਾਸਾਦਾ ਅਹੇਸੁਂ. ਵਿਸਾਖਾਦੇਵਿਪ੍ਪਮੁਖਾਨਿ ਤੇਤ੍ਤਿਂਸ ਇਤ੍ਥਿਸਹਸ੍ਸਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਵਿਸਾਖਾਦੇਵਿਯਾ ਸੇਲਕੁਮਾਰੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਸੁਦਸ੍ਸਨਂ ਨਾਮ ਅਸ੍ਸਰਾਜਂ ਅਭਿਰੁਹਿਤ੍ਵਾ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਨਵ ਮਨੁਸ੍ਸਕੋਟਿਯੋ ਅਨੁਪਬ੍ਬਜਿਂਸੁ. ਤੇਹਿ ਪਰਿਵੁਤੋ ਸੋ ਮਹਾਪੁਰਿਸੋ ਅਟ੍ਠ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਸੁਚਿਨ੍ਧਰਨਾਗਿਯਾ ਉਪਹਾਰਤ੍ਥਾਯ ਆਨੀਤਂ ਮਧੁਪਾਯਾਸਂ ਮਹਾਜਨੇਨ ਸਨ੍ਦਿਸ੍ਸਮਾਨਸਬ੍ਬਸਰੀਰਾਯ ਨਾਗਿਯਾ ਸਹ ਸੁਵਣ੍ਣਪਾਤਿਯਾ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਤਰੁਣਤਰੁਸਤਸਮਲਙ੍ਕਤੇ ਤਰੁਣਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਧਮ੍ਮਰੁਚਿਨਾ ਮਹਾਰੁਚਿਨਾ ਨਾਮ ਨਾਗਰਾਜੇਨ ਦਿਨ੍ਨਾ ਅਟ੍ਠ ਕੁਸਤਿਣਮੁਟ੍ਠਿਯੋ ਗਹੇਤ੍ਵਾ ਚਮ੍ਪਕਬੋਧਿਂ ਉਪਸਙ੍ਕਮਿਤ੍ਵਾ ਤੇਪਞ੍ਞਾਸਹਤ੍ਥਾਯਾਮਵਿਤ੍ਥਤਂ ਕੁਸਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਸਮ੍ਬੋਧਿਂ ਪਤ੍ਵਾ ਸਬ੍ਬਬੁਦ੍ਧਾਚਿਣ੍ਣਂ – ‘‘ਅਨੇਕਜਾਤਿਸਂਸਾਰਂ…ਪੇ… ਤਣ੍ਹਾਨਂ ਖਯਮਜ੍ਝਗਾ’’ਤਿ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਬੋਧਿਸਮੀਪੇਯੇਵ ਵੀਤਿਨਾਮੇਤ੍ਵਾ ਬ੍ਰਹ੍ਮੁਨੋ ਧਮ੍ਮਦੇਸਨਾਯਾਚਨਂ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨਾ ਸਹ ਪਬ੍ਬਜਿਤਨਵਭਿਕ੍ਖੁਕੋਟਿਯੋ ਅਰਿਯਧਮ੍ਮਪਟਿਵੇਧਸਮਤ੍ਥੇ ਦਿਸ੍ਵਾ ਆਕਾਸੇਨ ਗਨ੍ਤ੍ਵਾ ਅਨੋਮਨਗਰਸਮੀਪੇ ਅਨੋਮੁਯ੍ਯਾਨੇ ਓਤਰਿਤ੍ਵਾ ਤੇਹਿ ਪਰਿਵੁਤੋ ਤਤ੍ਥ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਕੋਟਿਸਤਸਹਸ੍ਸਾਨਂ ਪਠਮੋ ਧਮ੍ਮਾਭਿਸਮਯੋ ਅਹੋਸਿ.

ਪੁਨ ਭਗਵਤਿ ਲੋਕਨਾਯਕੇ ਦੇਵਲੋਕਚਾਰਿਕਂ ਚਰਿਤ੍ਵਾ ਤਤ੍ਥ ਧਮ੍ਮਂ ਦੇਸੇਨ੍ਤੇ ਕੋਟਿਸਤਸਹਸ੍ਸਾਨਂ ਦੁਤਿਯੋ ਅਭਿਸਮਯੋ ਅਹੋਸਿ. ਯਦਾ ਪਨ ਭਗਵਾ ਅਤ੍ਥਦਸ੍ਸੀ ਅਮ੍ਹਾਕਂ ਭਗਵਾ ਵਿਯ ਕਪਿਲਵਤ੍ਥੁਪੁਰਂ ਸੋਭਨਪੁਰਂ ਪਵਿਸਿਤ੍ਵਾ ਧਮ੍ਮਂ ਦੇਸੇਸਿ, ਤਦਾ ਕੋਟਿਸਤਸਹਸ੍ਸਾਨਂ ਤਤਿਯੋ ਧਮ੍ਮਾਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਅਤ੍ਥਦਸ੍ਸੀ ਮਹਾਯਸੋ;

ਮਹਾਤਮਂ ਨਿਹਨ੍ਤ੍ਵਾਨ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੨. ‘‘ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਧਮ੍ਮਚਕ੍ਕਂ ਪਵਤ੍ਤਯਿ;

ਅਮਤੇਨ ਤਪ੍ਪਯੀ ਲੋਕਂ, ਦਸਸਹਸ੍ਸੀ ਸਦੇਵਕਂ.

੩. ‘‘ਤਸ੍ਸਾਪਿ ਲੋਕਨਾਥਸ੍ਸ, ਅਹੇਸੁਂ ਅਭਿਸਮਯਾ ਤਯੋ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.

੪. ‘‘ਯਦਾ ਬੁਦ੍ਧੋ ਅਤ੍ਥਦਸ੍ਸੀ, ਚਰਤਿ ਦੇਵਚਾਰਿਕਂ;

ਕੋਟਿਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੫. ‘‘ਪੁਨਾਪਰਂ ਯਦਾ ਬੁਦ੍ਧੋ, ਦੇਸੇਸਿ ਪਿਤੁਸਨ੍ਤਿਕੇ;

ਕੋਟਿਸਤਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਤਤ੍ਥ ਤਤ੍ਥੇਵਾਤਿ ਤਸ੍ਮਿਞ੍ਞੇਵ ਕਪ੍ਪੇਤਿ ਅਤ੍ਥੋ. ਏਤ੍ਥ ਪਨ ਵਰਕਪ੍ਪੋ ‘‘ਮਣ੍ਡਕਪ੍ਪੋ’’ਤਿ ਅਧਿਪ੍ਪੇਤੋ. ‘‘ਯਸ੍ਮਿਂ ਕਪ੍ਪੇ ਤਯੋ ਬੁਦ੍ਧਾ ਨਿਬ੍ਬਤ੍ਤਨ੍ਤਿ, ਸੋ ਕਪ੍ਪੋ ਵਰਕਪ੍ਪੋ’’ਤਿ ਹੇਟ੍ਠਾ ਪਦੁਮੁਤ੍ਤਰਬੁਦ੍ਧਵਂਸਵਣ੍ਣਨਾਯਂ ਵੁਤ੍ਤੋ. ਤਸ੍ਮਾ ਵਰਕਪ੍ਪੋ ਇਧ ‘‘ਮਣ੍ਡਕਪ੍ਪੋ’’ਤਿ ਵੁਤ੍ਤੋ. ਨਿਹਨ੍ਤ੍ਵਾਨਾਤਿ ਨਿਹਨਿਤ੍ਵਾ. ਅਯਮੇਵ ਵਾ ਪਾਠੋ. ਸਨ੍ਤੋਤਿ ਸਮਾਨੋ. ਅਮਤੇਨਾਤਿ ਮਗ੍ਗਫਲਾਧਿਗਮਾਮਤਪਾਨੇਨ. ਤਪ੍ਪਯੀਤਿ ਅਤਪ੍ਪਯਿ, ਪੀਣੇਸੀਤਿ ਅਤ੍ਥੋ. ਦਸਸਹਸ੍ਸੀਤਿ ਦਸਸਹਸ੍ਸਿਲੋਕਧਾਤੁਂ. ਦੇਵਚਾਰਿਕਨ੍ਤਿ ਦੇਵਾਨਂ ਵਿਨਯਨਤ੍ਥਂ ਦੇਵਲੋਕਚਾਰਿਕਨ੍ਤਿ ਅਤ੍ਥੋ.

ਸੁਚਨ੍ਦਕਨਗਰੇ ਕਿਰ ਸਨ੍ਤੋ ਚ ਰਾਜਪੁਤ੍ਤੋ ਉਪਸਨ੍ਤੋ ਚ ਪੁਰੋਹਿਤਪੁਤ੍ਤੋ ਤੀਸੁ ਵੇਦੇਸੁ ਸਬ੍ਬਸਮਯਨ੍ਤਰੇਸੁ ਚ ਸਾਰਮਦਿਸ੍ਵਾ ਨਗਰਸ੍ਸ ਚਤੂਸੁ ਦ੍ਵਾਰੇਸੁ ਚਤ੍ਤਾਰੋ ਪਣ੍ਡਿਤੇ ਵਿਸਾਰਦੇ ਚ ਮਨੁਸ੍ਸੇ ਠਪੇਸੁਂ – ‘‘ਯਂ ਪਨ ਤੁਮ੍ਹੇ ਪਣ੍ਡਿਤਂ ਸਮਣਂ ਵਾ ਬ੍ਰਾਹ੍ਮਣਂ ਵਾ ਪਸ੍ਸਥ ਸੁਣਾਥ ਵਾ, ਤਂ ਅਮ੍ਹਾਕਂ ਆਗਨ੍ਤ੍ਵਾ ਆਰੋਚੇਥਾ’’ਤਿ. ਤੇਨ ਚ ਸਮਯੇਨ ਅਤ੍ਥਦਸ੍ਸੀ ਲੋਕਨਾਥੋ ਸੁਚਨ੍ਦਕਨਗਰਂ ਸਮ੍ਪਾਪੁਣਿ. ਅਥ ਤੇਹਿ ਨਿਵੇਦਿਤਾ ਪੁਰਿਸਾ ਗਨ੍ਤ੍ਵਾ ਤੇਸਂ ਦਸਬਲਸ੍ਸ ਤਤ੍ਥਾਗਮਨਂ ਪਟਿਵੇਦੇਸੁਂ. ਤਤੋ ਤੇ ਸਨ੍ਤੋਪਸਨ੍ਤਾ ਤਥਾਗਤਾਗਮਨਂ ਸੁਤ੍ਵਾ ਪਹਟ੍ਠਮਾਨਸਾ ਸਹਸ੍ਸਪਰਿਵਾਰਾ ਦਸਬਲਂ ਅਸਮਂ ਪਚ੍ਚੁਗ੍ਗਨ੍ਤ੍ਵਾ ਅਭਿਵਾਦੇਤ੍ਵਾ ਨਿਮਨ੍ਤੇਤ੍ਵਾ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਅਸਦਿਸਂ ਮਹਾਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਸਕਲਨਗਰਵਾਸੀਹਿ ਮਨੁਸ੍ਸੇਹਿ ਸਦ੍ਧਿਂ ਧਮ੍ਮਕਥਂ ਸੁਣਿਂਸੁ. ਤਸ੍ਮਿਂ ਕਿਰ ਦਿਵਸੇ ਅਟ੍ਠਨਵੁਤਿਸਹਸ੍ਸਾਨਿ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤਾਯ ਪਰਿਸਾਯ ਮਜ੍ਝੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ.

ਯਦਾ ਪਨ ਭਗਵਾ ਅਤ੍ਤਨੋ ਪੁਤ੍ਤਸ੍ਸ ਸੇਲਤ੍ਥੇਰਸ੍ਸ ਧਮ੍ਮਂ ਦੇਸੇਨ੍ਤੋ ਅਟ੍ਠਾਸੀਤਿਸਹਸ੍ਸਾਨਿ ਪਸਾਦੇਤ੍ਵਾ ਏਹਿਭਿਕ੍ਖੁਭਾਵੇਨ ਪਬ੍ਬਾਜੇਤ੍ਵਾ ਅਰਹਤ੍ਤਂ ਪਾਪੇਤ੍ਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਪੁਨ ਮਹਾਮਙ੍ਗਲਸਮਾਗਮੇ ਮਾਘਪੁਣ੍ਣਮਾਯਂ ਦੇਵਮਨੁਸ੍ਸਾਨਂ ਧਮ੍ਮਂ ਦੇਸੇਨ੍ਤੋ ਅਟ੍ਠਸਤ੍ਤਤਿਸਹਸ੍ਸਾਨਿ ਅਰਹਤ੍ਤਂ ਪਾਪੇਤ੍ਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੬. ‘‘ਸਨ੍ਨਿਪਾਤਾ ਤਯੋ ਆਸੁਂ, ਤਸ੍ਸਾਪਿ ਚ ਮਹੇਸਿਨੋ;

ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.

੭. ‘‘ਅਟ੍ਠਨਵੁਤਿਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;

ਅਟ੍ਠਾਸੀਤਿਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.

੮. ‘‘ਅਟ੍ਠਸਤ੍ਤਤਿਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;

ਅਨੁਪਾਦਾ ਵਿਮੁਤ੍ਤਾਨਂ, ਵਿਮਲਾਨਂ ਮਹੇਸਿਨ’’ਨ੍ਤਿ.

ਤਦਾ ਕਿਰ ਅਮ੍ਹਾਕਂ ਬੋਧਿਸਤ੍ਤੋ ਚਮ੍ਪਕਨਗਰੇ ਸੁਸੀਮੋ ਨਾਮ ਬ੍ਰਾਹ੍ਮਣਮਹਾਸਾਲੋ ਲੋਕਸਮ੍ਮਤੋ ਅਹੋਸਿ. ਸੋ ਸਬ੍ਬਵਿਭਵਜਾਤਂ ਦੀਨਾਨਾਥਕਪਣਦ੍ਧਿਕਾਦੀਨਂ ਵਿਸ੍ਸਜ੍ਜੇਤ੍ਵਾ ਹਿਮਵਨ੍ਤਸਮੀਪਂ ਗਨ੍ਤ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਟ੍ਠ ਸਮਾਪਤ੍ਤਿਯੋ ਪਞ੍ਚ ਅਭਿਞ੍ਞਾਯੋ ਚ ਨਿਬ੍ਬਤ੍ਤੇਤ੍ਵਾ ਮਹਿਦ੍ਧਿਕੋ ਮਹਾਨੁਭਾਵੋ ਹੁਤ੍ਵਾ ਮਹਾਜਨਸ੍ਸ ਕੁਸਲਾਕੁਸਲਾਨਂ ਧਮ੍ਮਾਨਂ ਅਨਵਜ੍ਜਸਾਵਜ੍ਜਭਾਵਞ੍ਚ ਦਸ੍ਸੇਤ੍ਵਾ ਬੁਦ੍ਧੁਪ੍ਪਾਦਂ ਆਗਮਯਮਾਨੋ ਅਟ੍ਠਾਸਿ.

ਅਥਾਪਰੇਨ ਸਮਯੇਨ ਅਤ੍ਥਦਸ੍ਸਿਮ੍ਹਿ ਲੋਕਨਾਯਕੇ ਲੋਕੇ ਉਪ੍ਪਜ੍ਜਿਤ੍ਵਾ ਸੁਦਸ੍ਸਨਮਹਾਨਗਰੇ ਅਟ੍ਠਨ੍ਨਂ ਪਰਿਸਾਨਂ ਮਜ੍ਝੇ ਧਮ੍ਮਾਮਤਵਸ੍ਸਂ ਵਸ੍ਸੇਨ੍ਤੇ ਤਸ੍ਸ ਧਮ੍ਮਂ ਸੁਤ੍ਵਾ ਸਗ੍ਗਲੋਕਂ ਗਨ੍ਤ੍ਵਾ ਦਿਬ੍ਬਾਨਿ ਮਨ੍ਦਾਰਵਪਦੁਮਪਾਰਿਚ੍ਛਤ੍ਤਕਾਦੀਨਿ ਪੁਪ੍ਫਾਨਿ ਦੇਵਲੋਕਤੋ ਆਹਰਿਤ੍ਵਾ ਅਤ੍ਤਨੋ ਆਨੁਭਾਵਂ ਦਸ੍ਸੇਨ੍ਤੋ ਦਿਸ੍ਸਮਾਨਸਰੀਰੋ ਚਤੂਸੁ ਦਿਸਾਸੁ ਚਤੁਦ੍ਦੀਪਿਕਮਹਾਮੇਘੋ ਵਿਯ ਪੁਪ੍ਫਵਸ੍ਸਂ ਵਸ੍ਸੇਤ੍ਵਾ ਸਮਨ੍ਤਤੋ ਪੁਪ੍ਫਮਣ੍ਡਪਂ ਪੁਪ੍ਫਮਯਗ੍ਘਿਤੋਰਣਹੇਮਜਾਲਾਦੀਨਿ ਪੁਪ੍ਫਮਯਾਨਿ ਕਤ੍ਵਾ ਮਨ੍ਦਾਰਵਪੁਪ੍ਫਚ੍ਛਤ੍ਤੇਨ ਦਸਬਲਂ ਪੂਜੇਸਿ. ਸੋਪਿ ਨਂ ਭਗਵਾ – ‘‘ਅਨਾਗਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੯. ‘‘ਅਹਂ ਤੇਨ ਸਮਯੇਨ, ਜਟਿਲੋ ਉਗ੍ਗਤਾਪਨੋ;

ਸੁਸੀਮੋ ਨਾਮ ਨਾਮੇਨ, ਮਹਿਯਾ ਸੇਟ੍ਠਸਮ੍ਮਤੋ.

੧੦. ‘‘ਦਿਬ੍ਬਂ ਮਨ੍ਦਾਰਵਂ ਪੁਪ੍ਫਂ, ਪਦੁਮਂ ਪਾਰਿਚ੍ਛਤ੍ਤਕਂ;

ਦੇਵਲੋਕਾ ਹਰਿਤ੍ਵਾਨ, ਸਮ੍ਬੁਦ੍ਧਮਭਿਪੂਜਯਿਂ.

੧੧. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਅਤ੍ਥਦਸ੍ਸੀ ਮਹਾਮੁਨਿ;

ਅਟ੍ਠਾਰਸੇ ਕਪ੍ਪਸਤੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੨. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੩. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਹਟ੍ਠੋ ਸਂਵਿਗ੍ਗਮਾਨਸੋ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਜਟਿਲੋਤਿ ਜਟਾ ਅਸ੍ਸ ਅਤ੍ਥੀਤਿ ਜਟਿਲੋ. ਮਹਿਯਾ ਸੇਟ੍ਠਸਮ੍ਮਤੋਤਿ ਸਕਲੇਨਪਿ ਲੋਕੇਨ ਸੇਟ੍ਠੋ ਉਤ੍ਤਮੋ ਪਵਰੋਤਿ ਏਵਂ ਸਮ੍ਮਤੋ ਸਮ੍ਭਾਵਿਤੋਤਿ ਅਤ੍ਥੋ.

ਤਸ੍ਸ ਪਨ ਭਗਵਤੋ ਸੋਭਨਂ ਨਾਮ ਨਗਰਂ ਅਹੋਸਿ. ਸਾਗਰੋ ਨਾਮ ਰਾਜਾ ਪਿਤਾ, ਸੁਦਸ੍ਸਨਾ ਨਾਮ ਮਾਤਾ, ਸਨ੍ਤੋ ਉਪਸਨ੍ਤੋ ਚ ਦ੍ਵੇ ਅਗ੍ਗਸਾਵਕਾ, ਅਭਯੋ ਨਾਮੁਪਟ੍ਠਾਕੋ, ਧਮ੍ਮਾ ਚ ਸੁਧਮ੍ਮਾ ਚ ਦ੍ਵੇ ਅਗ੍ਗਸਾਵਿਕਾ, ਚਮ੍ਪਕਰੁਕ੍ਖੋ ਬੋਧਿ, ਸਰੀਰਂ ਅਸੀਤਿਹਤ੍ਥੁਬ੍ਬੇਧਂ ਅਹੋਸਿ. ਸਰੀਰਪ੍ਪਭਾ ਸਮਨ੍ਤਤੋ ਸਬ੍ਬਕਾਲਂ ਯੋਜਨਮਤ੍ਤਂ ਫਰਿਤ੍ਵਾ ਅਟ੍ਠਾਸਿ, ਆਯੁ ਵਸ੍ਸਸਤਸਹਸ੍ਸਂ, ਵਿਸਾਖਾ ਨਾਮਸ੍ਸ ਅਗ੍ਗਮਹੇਸੀ, ਸੇਲੋ ਨਾਮ ਪੁਤ੍ਤੋ, ਅਸ੍ਸਯਾਨੇਨ ਨਿਕ੍ਖਮਿ. ਤੇਨ ਵੁਤ੍ਤਂ –

੧੪. ‘‘ਸੋਭਨਂ ਨਾਮ ਨਗਰਂ, ਸਾਗਰੋ ਨਾਮ ਖਤ੍ਤਿਯੋ;

ਸੁਦਸ੍ਸਨਾ ਨਾਮ ਜਨਿਕਾ, ਅਤ੍ਥਦਸ੍ਸਿਸ੍ਸ ਸਤ੍ਥੁਨੋ.

੧੯. ‘‘ਸਨ੍ਤੋ ਚ ਉਪਸਨ੍ਤੋ ਚ, ਅਹੇਸੁਂ ਅਗ੍ਗਸਾਵਕਾ;

ਅਭਯੋ ਨਾਮੁਪਟ੍ਠਾਕੋ, ਅਤ੍ਥਦਸ੍ਸਿਸ੍ਸ ਸਤ੍ਥੁਨੋ.

੨੦. ‘‘ਧਮ੍ਮਾ ਚੇਵ ਸੁਧਮ੍ਮਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਚਮ੍ਪਕੋਤਿ ਪਵੁਚ੍ਚਤਿ.

੨੨. ‘‘ਸੋਪਿ ਬੁਦ੍ਧੋ ਅਸਮਸਮੋ, ਅਸੀਤਿਹਤ੍ਥਮੁਗ੍ਗਤੋ;

ਸੋਭਤੇ ਸਾਲਰਾਜਾਵ, ਉਲ਼ੁਰਾਜਾਵ ਪੂਰਿਤੋ.

੨੩. ‘‘ਤਸ੍ਸ ਪਾਕਤਿਕਾ ਰਂਸੀ, ਅਨੇਕਸਤਕੋਟਿਯੋ;

ਉਦ੍ਧਂ ਅਧੋ ਦਸ ਦਿਸਾ, ਫਰਨ੍ਤਿ ਯੋਜਨਂ ਸਦਾ.

੨੪. ‘‘ਸੋਪਿ ਬੁਦ੍ਧੋ ਨਰਾਸਭੋ, ਸਬ੍ਬਸਤ੍ਤੁਤ੍ਤਮੋ ਮੁਨਿ;

ਵਸ੍ਸਸਤਸਹਸ੍ਸਾਨਿ, ਲੋਕੇ ਅਟ੍ਠਾਸਿ ਚਕ੍ਖੁਮਾ.

੨੫. ‘‘ਅਤੁਲਂ ਦਸ੍ਸੇਤ੍ਵਾ ਓਭਾਸਂ, ਵਿਰੋਚੇਤ੍ਵਾ ਸਦੇਵਕੇ;

ਸੋਪਿ ਅਨਿਚ੍ਚਤਂ ਪਤ੍ਤੋ, ਯਥਗ੍ਗੁਪਾਦਾਨਸਙ੍ਖਯਾ’’ਤਿ.

ਤਤ੍ਥ ਉਲ਼ੁਰਾਜਾਵ ਪੂਰਿਤੋਤਿ ਸਰਦਸਮਯਪਰਿਪੁਣ੍ਣਵਿਮਲਸਕਲਮਣ੍ਡਲੋ ਤਾਰਕਰਾਜਾ ਵਿਯਾਤਿ ਅਤ੍ਥੋ. ਪਾਕਤਿਕਾਤਿ ਪਕਤਿਵਸੇਨ ਉਪ੍ਪਜ੍ਜਮਾਨਾ, ਨ ਅਧਿਟ੍ਠਾਨਵਸੇਨ. ਯਦਾ ਇਚ੍ਛਤਿ ਭਗਵਾ, ਤਦਾ ਅਨੇਕਕੋਟਿਸਤਸਹਸ੍ਸੇਪਿ ਚਕ੍ਕਵਾਲ਼ੇ ਆਭਾਯ ਫਰੇਯ੍ਯ. ਰਂਸੀਤਿ ਰਸ੍ਮਿਯੋ. ਉਪਾਦਾਨਸਙ੍ਖਯਾਤਿ ਉਪਾਦਾਨਕ੍ਖਯਾ ਇਨ੍ਧਨਕ੍ਖਯਾ ਅਗ੍ਗਿ ਵਿਯ. ਸੋਪਿ ਭਗਵਾ ਚਤੁਨ੍ਨਂ ਉਪਾਦਾਨਾਨਂ ਖਯੇਨ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਅਨੁਪਮਨਗਰੇ ਅਨੋਮਾਰਾਮੇ ਪਰਿਨਿਬ੍ਬਾਯਿ. ਧਾਤੁਯੋ ਪਨਸ੍ਸ ਅਧਿਟ੍ਠਾਨੇਨ ਵਿਕਿਰਿਂਸੁ. ਸੇਸਮੇਤ੍ਥ ਗਾਥਾਸੁ ਉਤ੍ਤਾਨਮੇਵਾਤਿ.

ਅਤ੍ਥਦਸ੍ਸੀਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਚੁਦ੍ਦਸਮੋ ਬੁਦ੍ਧਵਂਸੋ.