੧੫. ਪਿਯਦਸ੍ਸੀਬੁਦ੍ਧਵਂਸਵਣ੍ਣਨਾ

ਸੁਜਾਤਸ੍ਸ ਪਨ ਅਪਰਭਾਗੇ ਇਤੋ ਅਟ੍ਠਕਪ੍ਪਸਤਾਧਿਕਸਹਸ੍ਸਕਪ੍ਪਮਤ੍ਥਕੇ ਏਕਸ੍ਮਿਂ ਕਪ੍ਪੇ ਪਿਯਦਸ੍ਸੀ, ਅਤ੍ਥਦਸ੍ਸੀ, ਧਮ੍ਮਦਸ੍ਸੀਤਿ ਤਯੋ ਬੁਦ੍ਧਾ ਨਿਬ੍ਬਤ੍ਤਿਂਸੁ. ਤਤ੍ਥ ਪਿਯਦਸ੍ਸੀ ਨਾਮ ਭਗਵਾ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਸੁਧਞ੍ਞਵਤੀਨਗਰੇ ਸੁਦਤ੍ਤਸ੍ਸ ਨਾਮ ਰਞ੍ਞੋ ਅਗ੍ਗਮਹੇਸਿਯਾ ਚਨ੍ਦਸਦਿਸਵਦਨਾਯ ਚਨ੍ਦਾਦੇਵਿਯਾ ਨਾਮ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਵਰੁਣੁਯ੍ਯਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਤਸ੍ਸ ਪਨ ਨਾਮਗ੍ਗਹਣਦਿਵਸੇ ਲੋਕਸ੍ਸ ਪਿਯਾਨਂ ਪਾਟਿਹਾਰਿਯਵਿਸੇਸਾਨਂ ਦਸ੍ਸਿਤਤ੍ਤਾ ‘‘ਪਿਯਦਸ੍ਸੀ’’ਤ੍ਵੇਵ ਨਾਮਮਕਂਸੁ. ਸੋ ਨਵਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਤਸ੍ਸ ਕਿਰ ਸੁਨਿਮ੍ਮਲਵਿਮਲਗਿਰਿਬ੍ਰਹਾਨਾਮਕਾ ਤਯੋ ਪਾਸਾਦਾ ਅਹੇਸੁਂ. ਵਿਮਲਾਮਹਾਦੇਵਿਪ੍ਪਮੁਖਾਨਿ ਤੇਤ੍ਤਿਂਸ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.

ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਵਿਮਲਾਦੇਵਿਯਾ ਕਞ੍ਚਨਵੇਲ਼ੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਆਜਞ੍ਞਰਥੇਨ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਏਕਾ ਚ ਨਂ ਪੁਰਿਸਕੋਟਿ ਅਨੁਪਬ੍ਬਜਿ. ਸੋ ਤੇਹਿ ਪਰਿਵੁਤੋ ਮਹਾਪੁਰਿਸੋ ਛ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਵਰੁਣਬ੍ਰਾਹ੍ਮਣਗਾਮੇ ਵਸਭਬ੍ਰਾਹ੍ਮਣਸ੍ਸ ਧੀਤਾਯ ਦਿਨ੍ਨਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸੁਜਾਤਾਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਕਕੁਧਬੋਧਿਂ ਉਪਸਙ੍ਕਮਿਤ੍ਵਾ ਤੇਪਞ੍ਞਾਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਪਲ੍ਲਙ੍ਕਂ ਆਭੁਜਿਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ ‘‘ਅਨੇਕਜਾਤਿਸਂਸਾਰ’’ਨ੍ਤਿ ਉਦਾਨਂ ਉਦਾਨੇਤ੍ਵਾ ਤਤ੍ਥੇਵ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਅਤ੍ਤਨਾ ਸਹ ਪਬ੍ਬਜਿਤਾਨਂ ਅਰਿਯਧਮ੍ਮਪਟਿਵੇਧਸਮਤ੍ਥਤਂ ਞਤ੍ਵਾ ਆਕਾਸੇਨ ਤਤ੍ਥ ਗਨ੍ਤ੍ਵਾ ਉਸਭਵਤੀਨਗਰਸਮੀਪੇ ਉਸਭਵਤੁਯ੍ਯਾਨੇ ਓਤਰਿਤ੍ਵਾ ਭਿਕ੍ਖੁਕੋਟਿਪਰਿਵੁਤੋ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਦਾ ਕੋਟਿਸਤਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਅਯਂ ਪਠਮੋ ਅਭਿਸਮਯੋ.

ਪੁਨ ਉਸਭਵਤਿਯਾ ਨਾਮ ਨਗਰਸ੍ਸ ਅਵਿਦੂਰੇ ਸੁਦਸ੍ਸਨਪਬ੍ਬਤੇ ਸੁਦਸ੍ਸਨੋ ਨਾਮ ਦੇਵਰਾਜਾ ਪਟਿਵਸਤਿ. ਸੋ ਮਿਚ੍ਛਾਦਿਟ੍ਠਿਕੋ ਅਹੋਸਿ. ਸਕਲਜਮ੍ਬੁਦੀਪੇ ਪਨ ਮਨੁਸ੍ਸਾ ਤਸ੍ਸ ਅਨੁਸਂਵਚ੍ਛਰਂ ਸਤਸਹਸ੍ਸਗ੍ਘਨਿਕਂ ਬਲਿਂ ਉਪਸਂਹਰਨ੍ਤਿ. ਸੋ ਸੁਦਸ੍ਸਨੋ ਦੇਵਰਾਜਾ ਨਰਰਾਜੇਨ ਸਦ੍ਧਿਂ ਏਕਾਸਨੇ ਨਿਸੀਦਿਤ੍ਵਾ ਬਲਿਂ ਸਮ੍ਪਟਿਚ੍ਛਤਿ. ਅਥ ਪਿਯਦਸ੍ਸੀ ਭਗਵਾ ‘‘ਤਸ੍ਸ ਸੁਦਸ੍ਸਨਸ੍ਸ ਦੇਵਰਾਜਸ੍ਸ ਤਂ ਦਿਟ੍ਠਿਗਤਂ ਵਿਨੋਦੇਸ੍ਸਾਮੀ’’ਤਿ ਤਸ੍ਮਿਂ ਦੇਵਰਾਜੇ ਯਕ੍ਖਸਮਾਗਮਂ ਗਤੇ ਤਸ੍ਸ ਭਵਨਂ ਪਵਿਸਿਤ੍ਵਾ ਸਿਰਿਸਯਨਂ ਆਰੁਹਿਤ੍ਵਾ ਛਬ੍ਬਣ੍ਣਰਂਸਿਯੋ ਮੁਞ੍ਚਨ੍ਤੋ ਯੁਗਨ੍ਧਰਪਬ੍ਬਤੇ ਸਰਦਸਮਯੇ ਸੂਰਿਯੋ ਵਿਯ ਨਿਸੀਦਿ. ਤਸ੍ਸ ਪਰਿਵਾਰਪਰਿਚਾਰਿਕਾ ਦੇਵਤਾਯੋ ਮਾਲਾਗਨ੍ਧਵਿਲੇਪਨਾਦੀਹਿ ਦਸਬਲਂ ਪੂਜੇਤ੍ਵਾ ਪਰਿਵਾਰੇਤ੍ਵਾ ਅਟ੍ਠਂਸੁ.

ਸੁਦਸ੍ਸਨੋਪਿ ਦੇਵਰਾਜਾ ਯਕ੍ਖਸਮਾਗਮਤੋ ਆਗਚ੍ਛਨ੍ਤੋ ਅਤ੍ਤਨੋ ਭਵਨਤੋ ਛਬ੍ਬਣ੍ਣਰਸ੍ਮਿਯੋ ਨਿਚ੍ਛਰਨ੍ਤੇ ਦਿਸ੍ਵਾ ਚਿਨ੍ਤੇਸਿ – ‘‘ਅਞ੍ਞੇਸੁ ਪਨ ਦਿਵਸੇਸੁ ਮਮ ਭਵਨਸ੍ਸ ਏਦਿਸੀ ਅਨੇਕਰਂਸਿਜਾਲਸਮੁਜ੍ਜਲਵਿਭੂਤਿ ਨ ਦਿਟ੍ਠਪੁਬ੍ਬਾ. ਕੋ ਨੁ ਖੋ ਇਧ ਪਵਿਟ੍ਠੋ ਦੇਵੋ ਵਾ ਮਨੁਸ੍ਸੋ ਵਾ’’ਤਿ ਓਲੋਕੇਨ੍ਤੋ ਉਦਯਗਿਰਿਸਿਖਰਮਤ੍ਥਕੇ ਸਰਦਸਮਯਦਿਵਸਕਰਮਿਵ ਛਬ੍ਬਣ੍ਣਰਂਸਿਜਾਲੇਨ ਅਭਿਜ੍ਜਲਨ੍ਤਂ ਨਿਸਿਨ੍ਨਂ ਭਗਵਨ੍ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਮੁਣ੍ਡਕਸਮਣੋ ਮਮ ਪਰਿਵਾਰੇਨ ਪਰਿਜਨੇਨ ਪਰਿਵੁਤੋ ਵਰਸਯਨੇ ਨਿਸਿਨ੍ਨੋ’’ਤਿ ਕੋਧਾਭਿਭੂਤਮਾਨਸੋ – ‘‘ਹਨ੍ਦਾਹਂ ਇਮਸ੍ਸ ਅਤ੍ਤਨੋ ਬਲਂ ਦਸ੍ਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਸਕਲਂ ਤਂ ਪਬ੍ਬਤਂ ਏਕਜਾਲਮਕਾਸਿ. ‘‘ਇਮਿਨਾ ਅਗ੍ਗਿਜਾਲੇਨ ਛਾਰਿਕਾਭੂਤੋ ਮੁਣ੍ਡਕਸਮਣੋ’’ਤਿ ਓਲੋਕੇਨ੍ਤੋ ਅਨੇਕਰਂਸਿਜਾਲਵਿਸਰਵਿਪ੍ਫੁਰਿਤਵਰਸਰੀਰਂ ਪਸਨ੍ਨਵਦਨਵਣ੍ਣਸੋਭਂ ਵਿਪ੍ਪਸਨ੍ਨਚ੍ਛਵਿਰਾਗਂ ਦਸਬਲਮਭਿਜ੍ਜਲਨ੍ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਸਮਣੋ ਅਗ੍ਗਿਦਾਹਂ ਸਹਤਿ, ਹਨ੍ਦਾਹਂ ਇਮਂ ਸਮਣਂ ਉਦਕੋਘੇਨ ਓਸਾਦੇਤ੍ਵਾ ਮਾਰੇਸ੍ਸਾਮੀ’’ਤਿ ਅਤਿਗਮ੍ਭੀਰਂ ਉਦਕੋਘਂ ਵਿਮਾਨਾਭਿਮੁਖਂ ਪਵਤ੍ਤੇਸਿ.

ਤਤੋ ਉਦਕੋਘੇਨ ਪੁਣ੍ਣੇ ਤਸ੍ਮਿਂ ਵਿਮਾਨੇ ਨਿਸਿਨ੍ਨਸ੍ਸ ਤਸ੍ਸ ਭਗਵਤੋ ਚੀਵਰੇ ਅਂਸੁਮਤ੍ਤਂ ਵਾ ਸਰੀਰੇ ਲੋਮਮਤ੍ਤਂ ਵਾ ਨ ਤੇਮਿਤ੍ਥ. ਤਤੋ ਸੁਦਸ੍ਸਨੋ ਦੇਵਰਾਜਾ – ‘‘ਇਮਿਨਾ ਸਮਣੋ ਨਿਰਸ੍ਸਾਸੋ ਮਤੋ ਭਵਿਸ੍ਸਤੀ’’ਤਿ ਮਨ੍ਤ੍ਵਾ ਉਦਕਂ ਸਙ੍ਖਿਪਿਤ੍ਵਾ ਓਲੋਕੇਨ੍ਤੋ ਭਗਵਨ੍ਤਂ ਅਸਿਤਜਲਧਰਵਿਵਰਗਤਂ ਸਰਦਸਮਯਰਜਨਿਕਰਮਿਵ ਵਿਵਿਧਰਂਸਿਜਾਲਵਿਸਰੇਨ ਵਿਰੋਚਮਾਨਂ ਸਕਪਰਿਸਪਰਿਵੁਤਂ ਨਿਸਿਨ੍ਨਂ ਦਿਸ੍ਵਾ ਅਤ੍ਤਨੋ ਮਕ੍ਖਂ ਅਸਹਮਾਨੋ – ‘‘ਹਨ੍ਦ ਮਾਰੇਸ੍ਸਾਮਿ ਨ’’ਨ੍ਤਿ ਕੋਧੇਨ ਨਵਵਿਧਆਵੁਧਵਸ੍ਸਂ ਵਸ੍ਸੇਸਿ. ਅਥਸ੍ਸ ਭਗਵਤੋ ਆਨੁਭਾਵੇਨ ਸਬ੍ਬਾਵੁਧਾਨਿ ਨਾਨਾਵਿਧਪਰਮਰੁਚਿਰਦਸ੍ਸਨਾ ਸੁਰਭਿਕੁਸੁਮਮਾਲਾ ਹੁਤ੍ਵਾ ਦਸਬਲਸ੍ਸ ਪਾਦਮੂਲੇ ਨਿਪਤਿਂਸੁ.

ਤਤੋ ਤਂ ਅਚ੍ਛਰਿਯਂ ਦਿਸ੍ਵਾ ਸੁਦਸ੍ਸਨੋ ਦੇਵਰਾਜਾ ਪਰਮਕੁਪਿਤਮਾਨਸੋ ਭਗਵਨ੍ਤਂ ਉਭੋਹਿ ਹਤ੍ਥੇਹਿ ਪਾਦੇਸੁ ਗਹੇਤ੍ਵਾ ਅਤ੍ਤਨੋ ਭਵਨਤੋ ਨੀਹਰਿਤੁਕਾਮੋ ਉਕ੍ਖਿਪਿਤ੍ਵਾ ਮਹਾਸਮੁਦ੍ਦਂ ਅਤਿਕ੍ਕਮਿਤ੍ਵਾ ਚਕ੍ਕਵਾਲ਼ਪਬ੍ਬਤਂ ਗਨ੍ਤ੍ਵਾ – ‘‘ਕਿਂ ਨੁ ਖੋ ਸਮਣੋ ਜੀਵਤਿ ਵਾ ਮਤੋ ਵਾ’’ਤਿ ਓਲੋਕੇਨ੍ਤੋ ਤਸ੍ਮਿਂਯੇਵ ਆਸਨੇ ਨਿਸਿਨ੍ਨਂ ਦਿਸ੍ਵਾ – ‘‘ਅਹੋ ਮਹਾਨੁਭਾਵੋ ਅਯਂ ਸਮਣੋ, ਨਾਹਂ ਇਮਂ ਸਮਣਂ ਇਤੋ ਨਿਕ੍ਕਡ੍ਢਿਤੁਂ ਸਕ੍ਕੋਮਿ. ਯਦਿ ਹਿ ਮਂ ਕੋਚਿ ਜਾਨਿਸ੍ਸਤਿ, ਅਨਪ੍ਪਕੋ ਮੇ ਅਯਸੋ ਭਵਿਸ੍ਸਤਿ. ਯਾਵਿਮਂ ਕੋਚਿ ਨ ਪਸ੍ਸਤਿ, ਤਾਵ ਨਂ ਵਿਸ੍ਸਜ੍ਜੇਤ੍ਵਾ ਗਮਿਸ੍ਸਾਮੀ’’ਤਿ ਚਿਨ੍ਤੇਸਿ.

ਅਥ ਦਸਬਲੋ ਤਸ੍ਸ ਚਿਤ੍ਤਾਚਾਰਂ ਞਤ੍ਵਾ ਤਥਾ ਅਧਿਟ੍ਠਾਸਿ, ਯਥਾ ਨਂ ਸਬ੍ਬੇ ਦੇਵਮਨੁਸ੍ਸਾ ਪਸ੍ਸਨ੍ਤਿ. ਤਸ੍ਮਿਞ੍ਚ ਦਿਵਸੇ ਸਕਲਜਮ੍ਬੁਦੀਪੇ ਏਕਸਤਰਾਜਾਨੋ ਤਸ੍ਸੇਵ ਉਪਹਾਰਦਾਨਤ੍ਥਾਯ ਸਨ੍ਨਿਪਤਿਂਸੁ. ਤੇ ਭਗਵਤੋ ਪਾਦੇ ਗਹੇਤ੍ਵਾ ਨਿਸਿਨ੍ਨਂ ਸੁਦਸ੍ਸਨਂ ਦੇਵਰਾਜਾਨਂ ਨਰਰਾਜਾਨੋ ਦਿਸ੍ਵਾ – ‘‘ਅਮ੍ਹਾਕਂ ਦੇਵਰਾਜਾ ਮੁਨਿਰਾਜਸ੍ਸ ਪਿਯਦਸ੍ਸਿਸ੍ਸ ਸਤ੍ਥੁਨੋ ਪਾਦਪਰਿਚਰਿਯਂ ਕਰੋਤਿ, ਅਹੋ ਬੁਦ੍ਧਾ ਨਾਮ ਅਚ੍ਛਰਿਯਾ, ਅਹੋ ਬੁਦ੍ਧਗੁਣਾ ਵਿਸਿਟ੍ਠਾ’’ਤਿ ਭਗਵਤਿ, ਪਸਨ੍ਨਚਿਤ੍ਤਾ ਸਬ੍ਬੇ ਭਗਵਨ੍ਤਂ ਨਮਸ੍ਸਮਾਨਾ ਸਿਰਸ੍ਮਿਂ ਅਞ੍ਜਲਿਂ ਕਤ੍ਵਾ ਅਟ੍ਠਂਸੁ. ਤਤ੍ਥ ਪਿਯਦਸ੍ਸੀ ਭਗਵਾ ਤਂ ਸੁਦਸ੍ਸਨਂ ਦੇਵਰਾਜਾਨਂ ਪਮੁਖਂ ਕਤ੍ਵਾ ਧਮ੍ਮਂ ਦੇਸੇਸਿ. ਤਦਾ ਦੇਵਮਨੁਸ੍ਸਾਨਂ ਨਵੁਤਿਕੋਟਿਸਹਸ੍ਸਾਨਿ ਅਰਹਤ੍ਤਂ ਪਾਪੁਣਿਂਸੁ. ਸੋ ਦੁਤਿਯੋ ਅਭਿਸਮਯੋ ਅਹੋਸਿ.

ਯਦਾ ਪਨ ਨਵਯੋਜਨਪ੍ਪਮਾਣੇ ਕੁਮੁਦਨਗਰੇ ਬੁਦ੍ਧਪਚ੍ਚਤ੍ਥਿਕੋ ਦੇਵਦਤ੍ਤੋ ਵਿਯ ਸੋਣਤ੍ਥੇਰੋ ਨਾਮ ਮਹਾਪਦੁਮਕੁਮਾਰੇਨ ਸਦ੍ਧਿਂ ਮਨ੍ਤੇਤ੍ਵਾ ਤਸ੍ਸ ਪਿਤਰਂ ਘਾਤੇਤ੍ਵਾ ਪੁਨ ਪਿਯਦਸ੍ਸੀਬੁਦ੍ਧਸ੍ਸ ਵਧਾਯ ਨਾਨਪ੍ਪਕਾਰਂ ਪਯੋਗਂ ਕਤ੍ਵਾਪਿ ਘਾਤੇਤੁਂ ਅਸਕ੍ਕੋਨ੍ਤੋ ਸੋ ਦੋਣਮੁਖਨਾਗਰਾਜਾਰੋਹਂ ਪਕ੍ਕੋਸਾਪੇਤ੍ਵਾ ਤਂ ਪਲੋਭੇਤ੍ਵਾ ਤਮਤ੍ਥਂ ਆਰੋਚੇਸਿ – ‘‘ਯਦਾ ਪਨਾਯਂ ਸਮਣੋ ਪਿਯਦਸ੍ਸੀ ਇਮਂ ਨਗਰਂ ਪਿਣ੍ਡਾਯ ਪਵਿਸਤਿ, ਤਦਾ ਦੋਣਮੁਖਂ ਨਾਮ ਗਜਵਰਂ ਵਿਸ੍ਸਜ੍ਜੇਤ੍ਵਾ ਪਿਯਦਸ੍ਸੀਸਮਣਂ ਮਾਰੇਹੀ’’ਤਿ.

ਅਥ ਸੋ ਆਰੋਹੋ ਹਿਤਾਹਿਤਵਿਚਾਰਣਰਹਿਤੋ ਰਾਜਵਲ੍ਲਭੋ – ‘‘ਅਯਂ ਸਮਣੋ ਠਾਨਨ੍ਤਰਾਪਿ ਮਂ ਚਾਵੇਯ੍ਯਾ’’ਤਿ ਮਨ੍ਤ੍ਵਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਦੁਤਿਯਦਿਵਸੇ ਦਸਬਲਸ੍ਸ ਨਗਰਪ੍ਪਵੇਸਨਸਮਯਂ ਸਲ੍ਲਕ੍ਖੇਤ੍ਵਾ ਸੁਜਾਤਮਤ੍ਥਕਪਿਣ੍ਡਕੁਮ੍ਭਨਲਾਟਂ ਧਨੁਸਦਿਸਦੀਘਸੁਣ੍ਡਤਟਂ ਸੁਵਿਪੁਲਮੁਦੁਕਣ੍ਣਂ ਮਧੁਪਿਙ੍ਗਲਨਯਨਂ ਸੁਨ੍ਦਰਕ੍ਖਨ੍ਧਾਸਨਂ ਅਨੁਵਟ੍ਟਘਨਜਘਨਂ ਨਿਚਿਤਗੂਲ਼੍ਹਜਾਣੁਅਨ੍ਤਰਂ ਈਸਾਸਦਿਸਰੁਚਿਰਦਨ੍ਤਂ ਸੁਵਾਲਧਿਂ ਅਪਚਿਤਮੇਚਕਂ ਸਬ੍ਬਲਕ੍ਖਣਸਮ੍ਪਨ੍ਨਂ ਅਸਿਤਜਲਧਰਸਦਿਸਚਾਰੁਦਸ੍ਸਨਂ ਸੀਹਵਿਕ੍ਕਨ੍ਤਲਲਿਤਗਾਮਿਨਂ ਜਙ੍ਗਮਮਿਵ ਧਰਾਧਰਂ ਸਤ੍ਤਪ੍ਪਤਿਟ੍ਠਂ ਸਤ੍ਤਧਾ ਪਭਿਨ੍ਨਂ ਸਬ੍ਬਸੋ ਵਿਸ੍ਸਵਨ੍ਤਂ ਵਿਗ੍ਗਹਵਨ੍ਤਮਿਵ ਅਨ੍ਤਕਂ ਉਪਸਙ੍ਕਮਿਤ੍ਵਾ ਪਿਣ੍ਡਕਬਲ਼ਞ੍ਜਨਧੂਪਲੇਪਾਦਿਵਿਸੇਸੇਹਿ ਭਿਯ੍ਯੋਪਿ ਮਤ੍ਤਪ੍ਪਮਤ੍ਤਂ ਕਤ੍ਵਾ ਅਰਿਵਾਰਣਵਾਰਣਂ ਏਰਾਵਣਵਾਰਣਮਿਵ ਅਰਿਜਨਵਾਰਣਂ ਮੁਨਿਵਾਰਣਂ ਮਾਰਣਤ੍ਥਾਯ ਪੇਸੇਸਿ. ਅਥ ਸੋ ਦ੍ਵਿਰਦਵਰੋ ਮੁਤ੍ਤਮਤ੍ਤੋਵ ਗਜਮਹਿਂਸਤੁਰਙ੍ਗਨਰਨਾਰਿਯੋ ਹਨ੍ਤ੍ਵਾ ਹਤਰੁਧਿਰਪਰਿਰਞ੍ਜਿਤਸਦਨ੍ਤਕਰਸਰੀਰੋ ਅਨ੍ਤਜਾਲਪਰਿਯੋਨਦ੍ਧਨਯਨੋ ਸਕਟਕਵਾਟਕੂਟਾਗਾਰਦ੍ਵਾਰਤੋਰਣਾਦੀਨਿ ਭਞ੍ਜਿਤ੍ਵਾ ਕਾਕ-ਕੁਲਲ-ਗਿਜ੍ਝਾਦੀਹਿ ਅਨੁਪਰਿਯਾਯਮਾਨੋ ਹਤਮਹਿਂਸਨਰਤੁਰਙ੍ਗਦਿਰਦਾਦੀਨਂ ਅਙ੍ਗਾਨਿ ਆਲੁਮ੍ਪਿਤ੍ਵਾ ਮਨੁਸ੍ਸਭਕ੍ਖੋ ਯਕ੍ਖੋ ਵਿਯ ਭਕ੍ਖਯਨ੍ਤੋ ਦੂਰਤੋਵ ਦਸਬਲਂ ਸਿਸ੍ਸਗਣਪਰਿਵੁਤਂ ਆਗਚ੍ਛਨ੍ਤਂ ਦਿਸ੍ਵਾ ਅਨਿਲਗਰੁਲ਼ਸਦਿਸਵੇਗੋ ਵੇਗੇਨ ਭਗਵਨ੍ਤਮਭਿਗਞ੍ਛਿ.

ਅਥ ਪੁਰਵਾਸਿਨੋ ਪਨ ਜਨਾ ਭਯਸਨ੍ਤਾਪਪਰਿਪੂਰਿਤਮਾਨਸਾ ਪਾਸਾਦਪਾਕਾਰਚਯਤਰੂਪਗਤਾ ਤਥਾਗਤਾਭਿਮੁਖਮਭਿਧਾਵਨ੍ਤਂ ਦਿਸ੍ਵਾ ਹਾਹਾਕਾਰਸਦ੍ਦਮਕਂਸੁ. ਕੇਚਿ ਪਨ ਉਪਾਸਕਾ ਤਂ ਨਾਨਪ੍ਪਕਾਰੇਹਿ ਨਯੇਹਿ ਨਿਵਾਰਯਿਤੁਮਾਰਭਿਂਸੁ. ਅਥ ਸੋ ਬੁਦ੍ਧਨਾਗੋ ਹਤ੍ਥਿਨਾਗਮਾਯਨ੍ਤਮੋਲੋਕੇਤ੍ਵਾ ਕਰੁਣਾਵਿਪ੍ਫਾਰਸੀਤਲਹਦਯੋ ਮੇਤ੍ਤਾਯ ਤਂ ਫਰਿ. ਤਤੋ ਸੋ ਹਤ੍ਥਿਨਾਗੋ ਮੇਤ੍ਤਾਫਰਣੇਨ ਮੁਦੁਕਤਹਦਯਸਨ੍ਤਾਨੋ ਅਤ੍ਤਨੋ ਦੋਸਾਪਰਾਧਂ ਞਤ੍ਵਾ ਲਜ੍ਜਾਯ ਭਗਵਤੋ ਪੁਰਤੋ ਠਾਤੁਂ ਅਸਕ੍ਕੋਨ੍ਤੋ ਪਥਵਿਯਂ ਪਵਿਸਨ੍ਤੋ ਵਿਯ ਸਿਰਸਾ ਭਗਵਤੋ ਪਾਦੇਸੁ ਨਿਪਤਿ. ਏਵਂ ਨਿਪਨ੍ਨੋ ਪਨ ਸੋ ਤਿਮਿਰਨਿਕਰਸਦਿਸਸਰੀਰੋ ਸਞ੍ਛਾਪ੍ਪਭਾਨੁਰਞ੍ਜਿਤਵਰਕਨਕਗਿਰਿਸਿਖਰਸਮੀਪਮੁਪਗਤੋ ਅਸਿਤਸਲਿਲਧਰਨਿਕਰੋ ਵਿਯ ਵਿਰੋਚਿਤ੍ਥ.

ਅਥੇਵਂ ਮੁਨਿਰਾਜਪਾਦਮੂਲੇ ਕਰਿਰਾਜਾਨਂ ਸਿਰਸਾ ਨਿਪਤਨ੍ਤਂ ਦਿਸ੍ਵਾ ਨਾਗਰਜਨਾ ਪਰਮਪੀਤਿਪੂਰਿਤਹਦਯਾ ਸਾਧੁਕਾਰਸੀਹਨਾਦਂ ਉਕ੍ਕੁਟ੍ਠਿਸਦ੍ਦਂ ਪਵਤ੍ਤਯਿਂਸੁ. ਸੁਰਭਿਕੁਸੁਮਮਾਲਾਚਨ੍ਦਨਗਨ੍ਧਚੁਣ੍ਣਾਲਙ੍ਕਾਰਾਦੀਹਿ ਤਂ ਅਨੇਕਪ੍ਪਕਾਰਂ ਪੂਜੇਸੁਂ. ਸਮਨ੍ਤਤੋ ਚੇਲੁਕ੍ਖੇਪਾ ਪਵਤ੍ਤਿਂਸੁ. ਗਗਨਤਲੇ ਸੁਰਦੁਨ੍ਦੁਭਿਯੋ ਅਭਿਨਦਿਂਸੁ. ਅਥ ਭਗਵਾ ਤਮਸਿਤਗਿਰਿਸਿਖਰਮਿਵ ਪਾਦਮੂਲੇ ਨਿਪਨ੍ਨਂ ਦਿਰਦਵਰਂ ਓਲੋਕੇਤ੍ਵਾ ਅਙ੍ਕੁਸਧਜਜਾਲਸਙ੍ਖਚਕ੍ਕਾਲਙ੍ਕਤੇਨ ਕਰਤਲੇਨ ਗਜਵਰਮਤ੍ਥਕਂ ਪਰਾਮਸਿਤ੍ਵਾ ਤਸ੍ਸ ਚਿਤ੍ਤਾਚਾਰਾਨੁਕੂਲਾਯ ਧਮ੍ਮਦੇਸਨਾਯ ਤਂ ਅਨੁਸਾਸਿ –

‘‘ਗਜਵਰ ਵਦਤੋ ਸੁਣੋਹਿ ਵਾਚਂ, ਮਮ ਹਿਤਮਤ੍ਥਯੁਤਞ੍ਚ ਤਂ ਭਜਾਹਿ;

ਤਵ ਵਧਨਿਰਤਂ ਪਦੁਟ੍ਠਭਾਵਂ, ਅਪਨਯ ਸਨ੍ਤਮੁਪੇਹਿ ਚਾਰੁਦਨ੍ਤਿ.

‘‘ਲੋਭੇਨ ਦੋਸੇਨ ਚ ਮੋਹਤੋ ਵਾ, ਯੋ ਪਾਣਿਨੋ ਹਿਂਸਤਿ ਵਾਰਣਿਨ੍ਦ;

ਸੋ ਪਾਣਘਾਤੀ ਸੁਚਿਰਮ੍ਪਿ ਕਾਲਂ, ਦੁਕ੍ਖਂ ਸੁਘੋਰਂ ਨਰਕੇਨੁਭੋਤਿ.

‘‘ਮਾਕਾਸਿ ਮਾਤਙ੍ਗ ਪੁਨੇਵਰੂਪਂ, ਕਮ੍ਮਂ ਪਮਾਦੇਨ ਮਦੇਨ ਵਾਪਿ;

ਅਵੀਚਿਯਂ ਦੁਕ੍ਖਮਸਯ੍ਹ ਕਪ੍ਪਂ, ਪਪ੍ਪੋਤਿ ਪਾਣਂ ਅਤਿਪਾਤਯਨ੍ਤੋ.

‘‘ਦੁਕ੍ਖਂ ਸੁਘੋਰਂ ਨਰਕੇਨੁਭੋਤ੍ਵਾ, ਮਨੁਸ੍ਸਲੋਕਂ ਯਦਿ ਯਾਤਿ ਭਿਯ੍ਯੋ;

ਅਪ੍ਪਾਯੁਕੋ ਹੋਤਿ ਵਿਰੂਪਰੂਪੋ, ਵਿਹਿਂਸਕੋ ਦੁਕ੍ਖਵਿਸੇਸਭਾਗੀ.

‘‘ਯਥਾ ਚ ਪਾਣਾ ਪਰਮਂ ਪਿਯਾ ਤੇ, ਮਹਾਜਨੇ ਕੁਞ੍ਜਰ ਮਨ੍ਦਨਾਗ;

ਤਥਾ ਪਰਸ੍ਸਾਪਿ ਪਿਯਾਤਿ ਞਤ੍ਵਾ, ਪਾਣਾਤਿਪਾਤੋ ਪਰਿਵਜ੍ਜਨੀਯੋ.

‘‘ਦੋਸੇ ਚ ਹਿਂਸਾਨਿਰਤੇ ਵਿਦਿਤ੍ਵਾ, ਪਾਣਾਤਿਪਾਤਾ ਵਿਰਤੇ ਗੁਣੇ ਚ;

ਪਾਣਾਤਿਪਾਤਂ ਪਰਿਵਜ੍ਜਯ ਤ੍ਵਂ, ਸਗ੍ਗੇ ਸੁਖਂ ਇਚ੍ਛਸਿ ਚੇ ਪਰਤ੍ਥ.

‘‘ਪਾਣਾਤਿਪਾਤਾ ਵਿਰਤੋ ਸੁਦਨ੍ਤੋ, ਪਿਯੋ ਮਨਾਪੋ ਭਵਤੀਧ ਲੋਕੇ;

ਕਾਯਸ੍ਸ ਭੇਦਾ ਚ ਪਰਂ ਪਨਸ੍ਸ, ਸਗ੍ਗਾਧਿਵਾਸਂ ਕਥਯਨ੍ਤਿ ਬੁਦ੍ਧਾ.

‘‘ਦੁਕ੍ਖਾਗਮਂ ਨਿਚ੍ਛਤਿ ਕੋਚਿ ਲੋਕੇ, ਸਬ੍ਬੋਪਿ ਜਾਤੋ ਸੁਖਮੇਸਤੇਵ;

ਤਸ੍ਮਾ ਮਹਾਨਾਗ ਵਿਹਾਯ ਹਿਂਸਂ, ਭਾਵੇਹਿ ਮੇਤ੍ਤਂ ਕਰੁਣਞ੍ਚ ਕਾਲੇ’’ਤਿ.

ਅਥੇਵਂ ਦਸਬਲੇਨਾਨੁਸਾਸਿਯਮਾਨੋ ਦਨ੍ਤਿਵਰੋ ਸਞ੍ਞਂ ਪਟਿਲਭਿਤ੍ਵਾ ਪਰਮਵਿਨੀਤੋ ਵਿਨਯਾਚਾਰਸਮ੍ਪਨ੍ਨੋ ਸਿਸ੍ਸੋ ਵਿਯ ਅਹੋਸਿ. ਏਵਂ ਸੋ ਪਿਯਦਸ੍ਸੀ ਭਗਵਾ ਅਮ੍ਹਾਕਂ ਸਤ੍ਥਾ ਵਿਯ ਧਨਪਾਲਂ ਦੋਣਮੁਖਂ ਕਰਿਵਰਂ ਦਮਿਤ੍ਵਾ ਤਤ੍ਥ ਮਹਾਜਨਸਮਾਗਮੇ ਧਮ੍ਮਂ ਦੇਸੇਸਿ. ਤਦਾ ਅਸੀਤਿਕੋਟਿਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਅਯਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –

੧. ‘‘ਸੁਜਾਤਸ੍ਸ ਅਪਰੇਨ, ਸਯਮ੍ਭੂ ਲੋਕਨਾਯਕੋ;

ਦੁਰਾਸਦੋ ਅਸਮਸਮੋ, ਪਿਯਦਸ੍ਸੀ ਮਹਾਯਸੋ.

੨. ‘‘ਸੋਪਿ ਬੁਦ੍ਧੋ ਅਮਿਤਯਸੋ, ਆਦਿਚ੍ਚੋਵ ਵਿਰੋਚਤਿ;

ਸਬ੍ਬਂ ਤਮਂ ਨਿਹਨ੍ਤ੍ਵਾਨ, ਧਮ੍ਮਚਕ੍ਕਂ ਪਵਤ੍ਤਯਿ.

੩. ‘‘ਤਸ੍ਸਾਪਿ ਅਤੁਲਤੇਜਸ੍ਸ, ਅਹੇਸੁਂ ਅਭਿਸਮਯਾ ਤਯੋ;

ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.

੪. ‘‘ਸੁਦਸ੍ਸਨੋ ਦੇਵਰਾਜਾ, ਮਿਚ੍ਛਾਦਿਟ੍ਠਿਮਰੋਚਯਿ;

ਤਸ੍ਸ ਦਿਟ੍ਠਿਂ ਵਿਨੋਦੇਨ੍ਤੋ, ਸਤ੍ਥਾ ਧਮ੍ਮਮਦੇਸਯਿ.

੫. ‘‘ਜਨਸਨ੍ਨਿਪਾਤੋ ਅਤੁਲੋ, ਮਹਾਸਨ੍ਨਿਪਤੀ ਤਦਾ;

ਨਵੁਤਿਕੋਟਿਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.

੬. ‘‘ਯਦਾ ਦੋਣਮੁਖਂ ਹਤ੍ਥਿਂ, ਵਿਨੇਸਿ ਨਰਸਾਰਥਿ;

ਅਸੀਤਿਕੋਟਿਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.

ਸੁਮਙ੍ਗਲਨਗਰੇ ਪਾਲਿਤੋ ਨਾਮ ਰਾਜਪੁਤ੍ਤੋ ਚ ਪੁਰੋਹਿਤਪੁਤ੍ਤੋ ਸਬ੍ਬਦਸ੍ਸਿਕੁਮਾਰੋ ਚਾਤਿ ਦ੍ਵੇ ਸਹਾਯਕਾ ਅਹੇਸੁਂ. ਤੇ ਪਿਯਦਸ੍ਸਿਮ੍ਹਿ ਸਮ੍ਮਾਸਮ੍ਬੁਦ੍ਧੇ ਚਾਰਿਕਂ ਚਰਨ੍ਤੇ ‘‘ਅਤ੍ਤਨੋ ਨਗਰਂ ਸਮ੍ਪਤ੍ਤੋ’’ਤਿ ਸੁਤ੍ਵਾ ਕੋਟਿਸਤਸਹਸ੍ਸਪਰਿਵਾਰਾ ਪਚ੍ਚੁਗ੍ਗਮਨਂ ਕਤ੍ਵਾ ਤਸ੍ਸ ਧਮ੍ਮਂ ਸੁਤ੍ਵਾ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਭਗਵਤੋ ਭਤ੍ਤਾਨੁਮੋਦਨਾਵਸਾਨੇ ਕੋਟਿਸਤਸਹਸ੍ਸੇਹਿ ਸਦ੍ਧਿਂ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤੇਸਂ ਪਨ ਮਜ੍ਝੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਅਥਾਪਰੇਨ ਸਮਯੇਨ ਸੁਦਸ੍ਸਨਦੇਵਰਾਜਸ੍ਸ ਸਮਾਗਮੇ ਨਵੁਤਿਕੋਟਿਯੋ ਅਰਹਤ੍ਤਂ ਪਾਪੁਣਿਂਸੁ. ਤੇਹਿ ਪਰਿਵੁਤੋ ਸਤ੍ਥਾ ਪਾਤਿਮੋਕ੍ਖਂ ਉਦ੍ਦਿਸਿ, ਅਯਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਪੁਨ ਦੋਣਮੁਖਵਿਨਯਨੇ ਅਸੀਤਿਕੋਟਿਯੋ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਤੇਸਂ ਮਜ੍ਝੇ ਭਗਵਾ ਪਾਤਿਮੋਕ੍ਖਂ ਉਦ੍ਦਿਸਿ, ਅਯਂ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –

੭. ‘‘ਸਨ੍ਨਿਪਾਤਾ ਤਯੋ ਆਸੁਂ, ਤਸ੍ਸਾਪਿ ਪਿਯਦਸ੍ਸਿਨੋ;

ਕੋਟਿਸਤਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ.

੮. ‘‘ਤਤੋ ਪਰਂ ਨਵੁਤਿਕੋਟੀ, ਸਮਿਂਸੁ ਏਕਤੋ ਮੁਨੀ;

ਤਤਿਯੇ ਸਨ੍ਨਿਪਾਤਮ੍ਹਿ, ਅਸੀਤਿਕੋਟਿਯੋ ਅਹੂ’’ਤਿ.

ਤਦਾ ਅਮ੍ਹਾਕਂ ਬੋਧਿਸਤ੍ਤੋ ਕਸ੍ਸਪੋ ਨਾਮ ਬ੍ਰਾਹ੍ਮਣਮਾਣਵੋ ਇਤਿਹਾਸਪਞ੍ਚਮਾਨਂ ਤਿਣ੍ਣਂ ਵੇਦਾਨਂ ਪਾਰਗੂ ਹੁਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਕੋਟਿਸਤਸਹਸ੍ਸਪਰਿਚ੍ਚਾਗੇਨ ਪਰਮਾਰਾਮਂ ਸਙ੍ਘਾਰਾਮਂ ਕਾਰੇਤ੍ਵਾ ਸਰਣੇਸੁ ਚ ਪਞ੍ਚਸੀਲੇਸੁ ਚ ਪਤਿਟ੍ਠਾਸਿ. ਅਥ ਨਂ ਸਤ੍ਥਾ – ‘‘ਇਤੋ ਅਟ੍ਠਾਰਸਕਪ੍ਪਸਤਚ੍ਚਯੇਨ ਗੋਤਮੋ ਨਾਮ ਬੁਦ੍ਧੋ ਲੋਕੇ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –

੯. ‘‘ਅਹਂ ਤੇਨ ਸਮਯੇਨ, ਕਸ੍ਸਪੋ ਨਾਮ ਬ੍ਰਾਹ੍ਮਣੋ;

ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ.

੧੦. ‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਸਾਦਂ ਜਨਯਿਂ ਅਹਂ;

ਕੋਟਿਸਤਸਹਸ੍ਸੇਹਿ, ਸਙ੍ਘਾਰਾਮਂ ਅਮਾਪਯਿਂ.

੧੧. ‘‘ਤਸ੍ਸ ਦਤ੍ਵਾਨ ਆਰਾਮਂ, ਹਟ੍ਠੋ ਸਂਵਿਗ੍ਗਮਾਨਸੋ;

ਸਰਣੇ ਪਞ੍ਚਸੀਲੇ ਚ, ਦਲ਼ਹਂ ਕਤ੍ਵਾ ਸਮਾਦਿਯਿਂ.

੧੨. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਸਙ੍ਘਮਜ੍ਝੇ ਨਿਸੀਦਿਯ;

ਅਟ੍ਠਾਰਸੇ ਕਪ੍ਪਸਤੇ, ਅਯਂ ਬੁਦ੍ਧੋ ਭਵਿਸ੍ਸਤਿ.

੧੩. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.

੧੪. ‘‘ਤਸ੍ਸਾਪਿ ਵਚਨਂ ਸੁਤ੍ਵਾ, ਭਿਯ੍ਯੋ ਚਿਤ੍ਤਂ ਪਸਾਦਯਿਂ;

ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ’’ਤਿ.

ਤਤ੍ਥ ਸਰਣੇ ਪਞ੍ਚਸੀਲੇ ਚਾਤਿ ਤੀਣਿ ਸਰਣਾਨਿ ਪਞ੍ਚ ਸੀਲਾਨਿ ਚਾਤਿ ਅਤ੍ਥੋ. ਅਟ੍ਠਾਰਸੇ ਕਪ੍ਪਸਤੇਤਿ ਇਤੋ ਅਟ੍ਠਸਤਾਧਿਕਸ੍ਸ ਕਪ੍ਪਸਹਸ੍ਸਸ੍ਸ ਅਚ੍ਚਯੇਨਾਤਿ ਅਤ੍ਥੋ.

ਤਸ੍ਸ ਪਨ ਭਗਵਤੋ ਸੁਧਞ੍ਞਂ ਨਾਮ ਨਗਰਂ ਅਹੋਸਿ. ਪਿਤਾ ਸੁਦਤ੍ਤੋ ਨਾਮ ਰਾਜਾ, ਮਾਤਾ ਸੁਚਨ੍ਦਾ ਨਾਮ ਦੇਵੀ, ਪਾਲਿਤੋ ਚ ਸਬ੍ਬਦਸ੍ਸੀ ਚ ਦ੍ਵੇ ਅਗ੍ਗਸਾਵਕਾ, ਸੋਭਿਤੋ ਨਾਮੁਪਟ੍ਠਾਕੋ, ਸੁਜਾਤਾ ਚ ਧਮ੍ਮਦਿਨ੍ਨਾ ਚ ਦ੍ਵੇ ਅਗ੍ਗਸਾਵਿਕਾ, ਕਕੁਧਰੁਕ੍ਖੋ ਬੋਧਿ, ਸਰੀਰਂ ਅਸੀਤਿਹਤ੍ਥੁਬ੍ਬੇਧਂ ਅਹੋਸਿ, ਨਵੁਤਿਵਸ੍ਸਸਹਸ੍ਸਾਨਿ ਆਯੁ, ਵਿਮਲਾ ਨਾਮਸ੍ਸ ਅਗ੍ਗਮਹੇਸੀ ਅਹੋਸਿ, ਕਞ੍ਚਨਾਵੇਲ਼ੋ ਨਾਮ ਪੁਤ੍ਤੋ, ਸੋ ਆਜਞ੍ਞਰਥੇਨ ਨਿਕ੍ਖਮੀਤਿ. ਤੇਨ ਵੁਤ੍ਤਂ –

੧੫. ‘‘ਸੁਧਞ੍ਞਂ ਨਾਮ ਨਗਰਂ, ਸੁਦਤ੍ਤੋ ਨਾਮ ਖਤ੍ਤਿਯੋ;

ਚਨ੍ਦਾ ਨਾਮਾਸਿ ਜਨਿਕਾ, ਪਿਯਦਸ੍ਸਿਸ੍ਸ ਸਤ੍ਥੁਨੋ.

੨੦. ‘‘ਪਾਲਿਤੋ ਸਬ੍ਬਦਸ੍ਸੀ ਚ, ਅਹੇਸੁਂ ਅਗ੍ਗਸਾਵਕਾ;

ਸੋਭਿਤੋ ਨਾਮੁਪਟ੍ਠਾਕੋ, ਪਿਯਦਸ੍ਸਿਸ੍ਸ ਸਤ੍ਥੁਨੋ.

੨੧. ‘‘ਸੁਜਾਤਾ ਧਮ੍ਮਦਿਨ੍ਨਾ ਚ, ਅਹੇਸੁਂ ਅਗ੍ਗਸਾਵਿਕਾ;

ਬੋਧਿ ਤਸ੍ਸ ਭਗਵਤੋ, ਕਕੁਧੋਤਿ ਪਵੁਚ੍ਚਤਿ.

੨੩. ‘‘ਸੋਪਿ ਬੁਦ੍ਧੋ ਅਮਿਤਯਸੋ, ਦ੍ਵਤ੍ਤਿਂਸਵਰਲਕ੍ਖਣੋ;

ਅਸੀਤਿਹਤ੍ਥਮੁਬ੍ਬੇਧੋ, ਸਾਲਰਾਜਾਵ ਦਿਸ੍ਸਤਿ.

੨੪. ‘‘ਅਗ੍ਗਿਚਨ੍ਦਸੂਰਿਯਾਨਂ, ਨਤ੍ਥਿ ਤਾਦਿਸਿਕਾ ਪਭਾ;

ਯਥਾ ਅਹੁ ਪਭਾ ਤਸ੍ਸ, ਅਸਮਸ੍ਸ ਮਹੇਸਿਨੋ.

੨੫. ‘‘ਤਸ੍ਸਾਪਿ ਦੇਵਦੇਵਸ੍ਸ, ਆਯੁ ਤਾਵਤਕਂ ਅਹੁ;

ਨਵੁਤਿਵਸ੍ਸਸਹਸ੍ਸਾਨਿ, ਲੋਕੇ ਅਟ੍ਠਾਸਿ ਚਕ੍ਖੁਮਾ.

੨੬. ‘‘ਸੋਪਿ ਬੁਦ੍ਧੋ ਅਸਮਸਮੋ, ਯੁਗਾਨਿਪਿ ਤਾਨਿ ਅਤੁਲਿਯਾਨਿ;

ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.

ਤਤ੍ਥ ਸਾਲਰਾਜਾ ਵਾਤਿ ਸਬ੍ਬਫਾਲਿਫੁਲ੍ਲੋ ਪਰਮਰਮਣੀਯਦਸ੍ਸਨੋ ਸਮਵਟ੍ਟਕ੍ਖਨ੍ਧੋ ਸਾਲਰਾਜਾ ਵਿਯ ਦਿਸ੍ਸਤਿ. ਯੁਗਾਨਿਪਿ ਤਾਨੀਤਿ ਅਗ੍ਗਸਾਵਕਯੁਗਾਦੀਨਿ ਯੁਗਲ਼ਾਨਿ. ਸੇਸਗਾਥਾਸੁ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਿਯਦਸ੍ਸੀਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਤੇਰਸਮੋ ਬੁਦ੍ਧਵਂਸੋ.