੧੪. ਸੁਜਾਤਬੁਦ੍ਧਵਂਸਵਣ੍ਣਨਾ
ਤਤੋ ਤਸ੍ਸਾਪਰਭਾਗੇ ਤਸ੍ਮਿਂਯੇਵ ਮਣ੍ਡਕਪ੍ਪੇ ਅਨੁਪੁਬ੍ਬੇਨ ਅਪਰਿਮਿਤਾਯੁਕੇਸੁ ਸਤ੍ਤੇਸੁ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਨਵੁਤਿਵਸ੍ਸਸਹਸ੍ਸਾਯੁਕੇਸੁ ਜਾਤੇਸੁ ਸੁਜਾਤਰੂਪਕਾਯੋ ਪਰਿਸੁਦ੍ਧਜਾਤੋ ਸੁਜਾਤੋ ਨਾਮ ਸਤ੍ਥਾ ਲੋਕੇ ਉਦਪਾਦਿ. ਸੋਪਿ ਪਾਰਮਿਯੋ ਪੂਰੇਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚਵਿਤ੍ਵਾ ਸੁਮਙ੍ਗਲਨਗਰੇ ਉਗ੍ਗਤਸ੍ਸ ਨਾਮ ਰਞ੍ਞੋ ਕੁਲੇ ਪਭਾਵਤਿਯਾ ਨਾਮ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਦਸਨ੍ਨਂ ਮਾਸਾਨਂ ਅਚ੍ਚਯੇਨ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਨਾਮਗ੍ਗਹਣਦਿਵਸੇ ਚਸ੍ਸ ਨਾਮਂ ਕਰੋਨ੍ਤੋ ਸਕਲਜਮ੍ਬੁਦੀਪੇ ਸਬ੍ਬਸਤ੍ਤਾਨਂ ਸੁਖਂ ਜਨਯਨ੍ਤੋ ਜਾਤੋਤਿ ‘‘ਸੁਜਾਤੋ’’ ਤ੍ਵੇਵਸ੍ਸ ਨਾਮਮਕਂਸੁ. ਸੋ ਨਵਵਸ੍ਸਸਹਸ੍ਸਾਨਿ ਅਗਾਰਂ ਅਜ੍ਝਾਵਸਿ. ਸਿਰੀ ਉਪਸਿਰੀ ਸਿਰਿਨਨ੍ਦੋ ਚਾਤਿ ਤਸ੍ਸ ਤਯੋ ਪਾਸਾਦਾ ਅਹੇਸੁਂ. ਸਿਰੀਨਨ੍ਦਾਦੇਵਿਪ੍ਪਮੁਖਾਨਿ ਤੇਵੀਸਤਿ ਇਤ੍ਥਿਸਹਸ੍ਸਾਨਿ ਪਚ੍ਚੁਪਟ੍ਠਿਤਾਨਿ ਅਹੇਸੁਂ.
ਸੋ ਚਤ੍ਤਾਰਿ ਨਿਮਿਤ੍ਤਾਨਿ ਦਿਸ੍ਵਾ ਸਿਰੀਨਨ੍ਦਾਦੇਵਿਯਾ ਉਪਸੇਨੇ ਨਾਮ ਪੁਤ੍ਤੇ ਉਪ੍ਪਨ੍ਨੇ ਹਂਸਵਹਂ ਨਾਮ ਵਰਤੁਰਙ੍ਗਮਾਰੁਯ੍ਹ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿ. ਤਂ ਪਨ ਪਬ੍ਬਜਨ੍ਤਂ ਮਨੁਸ੍ਸਾਨਂ ਕੋਟਿ ਅਨੁਪਬ੍ਬਜਿ. ਅਥ ਸੋ ਤੇਹਿ ਪਰਿਵੁਤੋ ਨਵ ਮਾਸੇ ਪਧਾਨਚਰਿਯਂ ਚਰਿਤ੍ਵਾ ਵਿਸਾਖਪੁਣ੍ਣਮਾਯ ਸਿਰੀਨਨ੍ਦਨਨਗਰੇ ਸਿਰੀਨਨ੍ਦਨਸੇਟ੍ਠਿਸ੍ਸ ਧੀਤਾਯ ਦਿਨ੍ਨਂ ਪਰਮਮਧੁਰਂ ਮਧੁਪਾਯਾਸਂ ਪਰਿਭੁਞ੍ਜਿਤ੍ਵਾ ਸਾਲਵਨੇ ਦਿਵਾਵਿਹਾਰਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯੇ ਸੁਨਨ੍ਦਾਜੀਵਕੇਨ ਦਿਨ੍ਨਾ ਅਟ੍ਠ ਤਿਣਮੁਟ੍ਠਿਯੋ ਗਹੇਤ੍ਵਾ ਵੇਲ਼ੁਬੋਧਿਂ ਉਪਸਙ੍ਕਮਿਤ੍ਵਾ ਤੇਤ੍ਤਿਂਸਹਤ੍ਥਵਿਤ੍ਥਤਂ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਸੂਰਿਯੇ ਧਰਮਾਨੇਯੇਵ ਸਮਾਰਂ ਮਾਰਬਲਂ ਵਿਧਮਿਤ੍ਵਾ ਸਮ੍ਮਾਸਮ੍ਬੋਧਿਂ ਪਟਿਵਿਜ੍ਝਿਤ੍ਵਾ ਸਬ੍ਬਬੁਦ੍ਧਾਨੁਚਿਣ੍ਣਂ ਉਦਾਨਂ ਉਦਾਨੇਤ੍ਵਾ ਸਤ੍ਤਸਤ੍ਤਾਹਂ ਬੋਧਿਸਮੀਪੇਯੇਵ ਵੀਤਿਨਾਮੇਤ੍ਵਾ ਬ੍ਰਹ੍ਮੁਨਾ ਆਯਾਚਿਤੋ ਅਤ੍ਤਨੋ ਕਨਿਟ੍ਠਭਾਤਿਕਂ ਸੁਦਸ੍ਸਨਕੁਮਾਰਂ ਪੁਰੋਹਿਤਪੁਤ੍ਤਂ ਦੇਵਕੁਮਾਰਞ੍ਚ ਚਤੁਸਚ੍ਚਧਮ੍ਮਪਟਿਵੇਧਸਮਤ੍ਥੇ ਦਿਸ੍ਵਾ ਆਕਾਸੇਨ ਗਨ੍ਤ੍ਵਾ ਸੁਮਙ੍ਗਲਨਗਰਸਮੀਪੇ ਸੁਮਙ੍ਗਲੁਯ੍ਯਾਨੇ ਓਤਰਿਤ੍ਵਾ ਉਯ੍ਯਾਨਪਾਲੇਨ ਅਤ੍ਤਨੋ ਭਾਤਿਕਂ ਸੁਦਸ੍ਸਨਕੁਮਾਰਂ ਪੁਰੋਹਿਤਪੁਤ੍ਤਂ ਦੇਵਕੁਮਾਰਞ੍ਚ ਪਕ੍ਕੋਸਾਪੇਤ੍ਵਾ ਤੇਸਂ ਸਪਰਿਵਾਰਾਨਂ ਮਜ੍ਝੇ ਨਿਸਿਨ੍ਨੋ ਧਮ੍ਮਚਕ੍ਕਂ ਪਵਤ੍ਤੇਸਿ. ਤਤ੍ਥ ਅਸੀਤਿਯਾ ਕੋਟੀਨਂ ਧਮ੍ਮਾਭਿਸਮਯੋ ਅਹੋਸਿ. ਅਯਂ ਪਠਮਾਭਿਸਮਯੋ ਅਹੋਸਿ.
ਯਦਾ ਪਨ ਭਗਵਾ ਸੁਦਸ੍ਸਨੁਯ੍ਯਾਨਦ੍ਵਾਰੇ ਮਹਾਸਾਲਮੂਲੇ ਯਮਕਪਾਟਿਹਾਰਿਯਂ ਕਤ੍ਵਾ ਦੇਵੇਸੁ ਤਾਵਤਿਂਸੇਸੁ ਵਸ੍ਸਾਵਾਸਂ ਉਪਾਗਮਿ, ਤਦਾ ਸਤ੍ਤਤ੍ਤਿਂਸਸਤਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਅਯਂ ਦੁਤਿਯੋ ਅਭਿਸਮਯੋ ਅਹੋਸਿ. ਯਦਾ ਪਨ ਸੁਜਾਤੋ ਦਸਬਲੋ ਪਿਤੁਸਨ੍ਤਿਕਂ ਅਗਮਾਸਿ, ਤਦਾ ਸਟ੍ਠਿਸਤਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਅਯਂ ਤਤਿਯੋ ਅਭਿਸਮਯੋ ਅਹੋਸਿ. ਤੇਨ ਵੁਤ੍ਤਂ –
੧. ‘‘ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਸੁਜਾਤੋ ਨਾਮ ਨਾਯਕੋ;
ਸੀਹਹਨੁਸਭਕ੍ਖਨ੍ਧੋ, ਅਪ੍ਪਮੇਯ੍ਯੋ ਦੁਰਾਸਦੋ.
੨. ‘‘ਚਨ੍ਦੋਵ ਵਿਮਲੋ ਬੁਦ੍ਧੋ, ਸਤਰਂਸੀਵ ਪਤਾਪਵਾ;
ਏਵਂ ਸੋਭਤਿ ਸਮ੍ਬੁਦ੍ਧੋ, ਜਲਨ੍ਤੋ ਸਿਰਿਯਾ ਸਦਾ.
੩. ‘‘ਪਾਪੁਣਿਤ੍ਵਾਨ ਸਮ੍ਬੁਦ੍ਧੋ, ਕੇਵਲਂ ਬੋਧਿਮੁਤ੍ਤਮਂ;
ਸੁਮਙ੍ਗਲਮ੍ਹਿ ਨਗਰੇ, ਧਮ੍ਮਚਕ੍ਕਂ ਪਵਤ੍ਤਯਿ.
੪. ‘‘ਦੇਸੇਨ੍ਤੇ ਪਵਰਂ ਧਮ੍ਮਂ, ਸੁਜਾਤੇ ਲੋਕਨਾਯਕੇ;
ਅਸੀਤਿਕੋਟੀ ਅਭਿਸਮਿਂਸੁ, ਪਠਮੇ ਧਮ੍ਮਦੇਸਨੇ.
੫. ‘‘ਯਦਾ ਸੁਜਾਤੋ ਅਮਿਤਯਸੋ, ਦੇਵੇ ਵਸ੍ਸਂ ਉਪਾਗਮਿ;
ਸਤ੍ਤਤ੍ਤਿਂਸਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.
੬. ‘‘ਯਦਾ ਸੁਜਾਤੋ ਅਸਮਸਮੋ, ਉਪਗਚ੍ਛਿ ਪਿਤੁਸਨ੍ਤਿਕਂ;
ਸਟ੍ਠਿਸਤਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੂ’’ਤਿ.
ਤਤ੍ਥ ਤਤ੍ਥੇਵ ਮਣ੍ਡਕਪ੍ਪਮ੍ਹੀਤਿ ਯਸ੍ਮਿਂ ਮਣ੍ਡਕਪ੍ਪੇ ਸੁਮੇਧੋ ਭਗਵਾ ਉਪ੍ਪਨ੍ਨੋ, ਤਤ੍ਥੇਵ ਕਪ੍ਪੇ ਸੁਜਾਤੋਪਿ ਭਗਵਾ ਉਪ੍ਪਨ੍ਨੋਤਿ ਅਤ੍ਥੋ. ਸੀਹਹਨੂਤਿ ਸੀਹਸ੍ਸ ਵਿਯ ਹਨੁ ਅਸ੍ਸਾਤਿ ਸੀਹਹਨੁ. ਸੀਹਸ੍ਸ ਪਨ ਹੇਟ੍ਠਿਮਹਨੁਮੇਵ ਪੁਣ੍ਣਂ ਹੋਤਿ, ਨ ਉਪਰਿਮਂ. ਅਸ੍ਸ ਪਨ ਮਹਾਪੁਰਿਸਸ੍ਸ ਸੀਹਸ੍ਸ ਹੇਟ੍ਠਿਮਹਨੁ ਵਿਯ ਦ੍ਵੇਪਿ ਪਰਿਪੁਣ੍ਣਾਨਿ ਦ੍ਵਾਦਸਿਯਂ ਪਕ੍ਖਸ੍ਸ ਚਨ੍ਦਸਦਿਸਾਨਿ ਹੋਨ੍ਤਿ. ਤੇਨ ਵੁਤ੍ਤਂ ‘‘ਸੀਹਹਨੂ’’ਤਿ. ਉਸਭਕ੍ਖਨ੍ਧੋਤਿ ਉਸਭਸ੍ਸੇਵ ਸਮਪ੍ਪਵਟ੍ਟਕ੍ਖਨ੍ਧੋ, ਸੁਵਟ੍ਟਿਤਸੁਵਣ੍ਣਾਲਿਙ੍ਗਸਦਿਸਕ੍ਖਨ੍ਧੋਤਿ ਅਤ੍ਥੋ. ਸਤਰਂਸੀਵਾਤਿ ਦਿਵਸਕਰੋ ਵਿਯ. ਸਿਰਿਯਾਤਿ ਬੁਦ੍ਧਸਿਰਿਯਾ. ਬੋਧਿਮੁਤ੍ਤਮਨ੍ਤਿ ਉਤ੍ਤਮਂ ਸਮ੍ਬੋਧਿਂ.
ਸੁਧਮ੍ਮਵਤੀਨਗਰੇ ਸੁਧਮ੍ਮੁਯ੍ਯਾਨੇ ਆਗਤਾਨਂ ਮਨੁਸ੍ਸਾਨਂ ਧਮ੍ਮਂ ਦੇਸੇਤ੍ਵਾ ਸਟ੍ਠਿਸਤਸਹਸ੍ਸਾਨਿ ਏਹਿਭਿਕ੍ਖੁਭਾਵੇਨ ਪਬ੍ਬਾਜੇਤ੍ਵਾ ਤੇਸਂ ਮਜ੍ਝੇ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਪਠਮੋ ਸਨ੍ਨਿਪਾਤੋ ਅਹੋਸਿ. ਤਤੋ ਪਰਂ ਤਿਦਿਵੋਰੋਹਣੇ ਭਗਵਤੋ ਪਞ੍ਞਾਸਸਤਸਹਸ੍ਸਾਨਂ ਦੁਤਿਯੋ ਸਨ੍ਨਿਪਾਤੋ ਅਹੋਸਿ. ਪੁਨ ‘‘ਸੁਦਸ੍ਸਨਕੁਮਾਰੋ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਤ੍ਤੋ’’ਤਿ ਸੁਤ੍ਵਾ ‘‘ਮਯਮ੍ਪਿ ਪਬ੍ਬਜਿਸ੍ਸਾਮਾ’’ਤਿ ਆਗਤਾਨਿ ਚਤ੍ਤਾਰਿ ਪੁਰਿਸਸਤਸਹਸ੍ਸਾਨਿ ਗਹੇਤ੍ਵਾ ਸੁਦਸ੍ਸਨਤ੍ਥੇਰੋ ਸੁਜਾਤਂ ਨਰਾਸਭਂ ਉਪਸਙ੍ਕਮਿ. ਤੇਸਂ ਭਗਵਾ ਧਮ੍ਮਂ ਦੇਸੇਤ੍ਵਾ ਏਹਿਭਿਕ੍ਖੁਪਬ੍ਬਜ੍ਜਾਯ ਪਬ੍ਬਾਜੇਤ੍ਵਾ ਚਤੁਰਙ੍ਗਸਮਨ੍ਨਾਗਤੇ ਸਨ੍ਨਿਪਾਤੇ ਪਾਤਿਮੋਕ੍ਖਂ ਉਦ੍ਦਿਸਿ, ਸੋ ਤਤਿਯੋ ਸਨ੍ਨਿਪਾਤੋ ਅਹੋਸਿ. ਤੇਨ ਵੁਤ੍ਤਂ –
੭. ‘‘ਸਨ੍ਨਿਪਾਤਾ ਤਯੋ ਆਸੁਂ, ਸੁਜਾਤਸ੍ਸ ਮਹੇਸਿਨੋ;
ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.
੮. ‘‘ਅਭਿਞ੍ਞਾਬਲਪ੍ਪਤ੍ਤਾਨਂ, ਅਪ੍ਪਤ੍ਤਾਨਂ ਭਵਾਭਵੇ;
ਸਟ੍ਠਿਸਤਸਹਸ੍ਸਾਨਿ, ਪਠਮਂ ਸਨ੍ਨਿਪਤਿਂਸੁ ਤੇ.
੯. ‘‘ਪੁਨਾਪਰਂ ਸਨ੍ਨਿਪਾਤੇ, ਤਿਦਿਵੋਰੋਹਣੇ ਜਿਨੇ;
ਪਞ੍ਞਾਸਸਤਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.
੧੦. ‘‘ਉਪਸਙ੍ਕਮਨ੍ਤੋ ਨਰਾਸਭਂ, ਸੁਦਸ੍ਸਨੋ ਅਗ੍ਗਸਾਵਕੋ;
ਚਤੂਹਿ ਸਤਸਹਸ੍ਸੇਹਿ, ਸਮ੍ਬੁਦ੍ਧਂ ਉਪਸਙ੍ਕਮੀ’’ਤਿ.
ਤਤ੍ਥ ਅਪ੍ਪਤ੍ਤਾਨਨ੍ਤਿ ਭਵਾਭਵੇ ਅਸਮ੍ਪਤ੍ਤਾਨਨ੍ਤਿ ਅਤ੍ਥੋ. ‘‘ਅਪ੍ਪਵਤ੍ਤਾ ਭਵਾਭਵੇ’’ਤਿਪਿ ਪਾਠੋ, ਸੋਯੇਵਤ੍ਥੋ. ਤਿਦਿਵੋਰੋਹਣੇਤਿ ਸਗ੍ਗਲੋਕਤੋ ਓਤਰਨ੍ਤੇ ਕਤ੍ਤੁਕਾਰਕੇ ਦਟ੍ਠਬ੍ਬੋ. ਕਾਰਕਵਿਪਲ੍ਲਾਸੇਨ ਵੁਤ੍ਤਂ. ਅਥ ਵਾ ਤਿਦਿਵੋਰੋਹਣੇਤਿ ਤਿਦਿਵਤੋ ਓਤਰਣੇ. ਜਿਨੇਤਿ ਜਿਨਸ੍ਸ, ਸਾਮਿਅਤ੍ਥੇ ਭੁਮ੍ਮਂ ਦਟ੍ਠਬ੍ਬਂ.
ਤਦਾ ਕਿਰ ਅਮ੍ਹਾਕਂ ਬੋਧਿਸਤ੍ਤੋ ਚਕ੍ਕਵਤ੍ਤਿਰਾਜਾ ਹੁਤ੍ਵਾ ‘‘ਬੁਦ੍ਧੋ ਲੋਕੇ ਉਪ੍ਪਨ੍ਨੋ’’ਤਿ ਸੁਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਧਮ੍ਮਕਥਂ ਸੁਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤਹਿ ਰਤਨੇਹਿ ਸਦ੍ਧਿਂ ਚਤੁਮਹਾਦੀਪਰਜ੍ਜਂ ਦਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿ. ਸਕਲਦੀਪਵਾਸਿਨੋ ਜਨਾ ਰਟ੍ਠੁਪ੍ਪਾਦਂ ਗਹੇਤ੍ਵਾ ਆਰਾਮਿਕਕਿਚ੍ਚਂ ਸਾਧੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਨਿਚ੍ਚਂ ਮਹਾਦਾਨਮਦਂਸੁ. ਸੋਪਿ ਨਂ ਸਤ੍ਥਾ – ‘‘ਅਨਾਗਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਤੇਨ ਵੁਤ੍ਤਂ –
੧੧. ‘‘ਅਹਂ ਤੇਨ ਸਮਯੇਨ, ਚਤੁਦੀਪਮ੍ਹਿ ਇਸ੍ਸਰੋ;
ਅਨ੍ਤਲਿਕ੍ਖਚਰੋ ਆਸਿਂ, ਚਕ੍ਕਵਤ੍ਤੀ ਮਹਬ੍ਬਲੋ.
੧੩. ‘‘ਚਤੁਦੀਪੇ ਮਹਾਰਜ੍ਜਂ ਰਤਨੇ ਸਤ੍ਤ ਉਤ੍ਤਮੇ;
ਬੁਦ੍ਧੇ ਨਿਯ੍ਯਾਤਯਿਤ੍ਵਾਨ, ਪਬ੍ਬਜਿਂ ਤਸ੍ਸ ਸਨ੍ਤਿਕੇ.
੧੪. ‘‘ਆਰਾਮਿਕਾ ਜਨਪਦੇ, ਉਟ੍ਠਾਨਂ ਪਟਿਪਿਣ੍ਡਿਯ;
ਉਪਨੇਨ੍ਤਿ ਭਿਕ੍ਖੁਸਙ੍ਘਸ੍ਸ, ਪਚ੍ਚਯਂ ਸਯਨਾਸਨਂ.
੧੫. ‘‘ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਦਸਸਹਸ੍ਸਿਮ੍ਹਿ ਇਸ੍ਸਰੋ;
ਤਿਂਸਕਪ੍ਪਸਹਸ੍ਸਮ੍ਹਿ, ਅਯਂ ਬੁਦ੍ਧੋ ਭਵਿਸ੍ਸਤਿ.
੧੬. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ.
੧੭. ‘‘ਤਸ੍ਸਾਪਿ ਚਵਨਂ ਸੁਤ੍ਵਾ, ਭਿਯ੍ਯੋ ਹਾਸਂ ਜਨੇਸਹਂ;
ਅਧਿਟ੍ਠਹਿਂ ਵਤਂ ਉਗ੍ਗਂ, ਦਸਪਾਰਮਿਪੂਰਿਯਾ.
੧੮. ‘‘ਸੁਤ੍ਤਨ੍ਤਂ ਵਿਨਯਞ੍ਚਾਪਿ, ਨਵਙ੍ਗਂ ਸਤ੍ਥੁਸਾਸਨਂ;
ਸਬ੍ਬਂ ਪਰਿਯਾਪੁਣਿਤ੍ਵਾਨ, ਸੋਭਯਿਂ ਜਿਨਸਾਸਨਂ.
੧੯. ‘‘ਤਤ੍ਥਪ੍ਪਮਤ੍ਤੋ ਵਿਹਰਨ੍ਤੋ, ਬ੍ਰਹ੍ਮਂ ਭਾਵੇਤ੍ਵ ਭਾਵਨਂ;
ਅਭਿਞ੍ਞਾਪਾਰਮਿਂ ਗਨ੍ਤ੍ਵਾ, ਬ੍ਰਹ੍ਮਲੋਕਮਗਞ੍ਛਹ’’ਨ੍ਤਿ.
ਤਤ੍ਥ ਚਤੁਦੀਪਮ੍ਹੀਤਿ ਸਪਰਿਵਾਰਦੀਪਾਨਂ ਚਤੁਨ੍ਨਂ ਮਹਾਦੀਪਾਨਨ੍ਤਿ ਅਤ੍ਥੋ. ਅਨ੍ਤਲਿਕ੍ਖਚਰੋਤਿ ਚਕ੍ਕਰਤਨਂ ਪੁਰਕ੍ਖਤ੍ਵਾ ਆਕਾਸਚਰੋ. ਰਤਨੇ ਸਤ੍ਤਾਤਿ ਹਤ੍ਥਿਰਤਨਾਦੀਨਿ ਸਤ੍ਤ ਰਤਨਾਨਿ. ਉਤ੍ਤਮੇਤਿ ਉਤ੍ਤਮਾਨਿ. ਅਥ ਵਾ ਉਤ੍ਤਮੇ ਬੁਦ੍ਧੇਤਿ ਅਤ੍ਥੋ ਦਟ੍ਠਬ੍ਬੋ. ਨਿਯ੍ਯਾਤਯਿਤ੍ਵਾਨਾਤਿ ਦਤ੍ਵਾਨ. ਉਟ੍ਠਾਨਨ੍ਤਿ ਰਟ੍ਠੁਪ੍ਪਾਦਂ, ਆਯਨ੍ਤਿ ਅਤ੍ਥੋ. ਪਟਿਪਿਣ੍ਡਿਯਾਤਿ ਰਾਸਿਂ ਕਤ੍ਵਾ ਸਂਕਡ੍ਢਿਤ੍ਵਾ. ਪਚ੍ਚਯਨ੍ਤਿ ਚੀਵਰਾਦਿਵਿਵਿਧਂ ਪਚ੍ਚਯਂ. ਦਸਸਹਸ੍ਸਿਮ੍ਹਿ ਇਸ੍ਸਰੋਤਿ ਦਸਸਹਸ੍ਸਿਲੋਕਧਾਤੁਯਂ ਇਸ੍ਸਰੋ, ਤਦੇਤਂ ਜਾਤਿਕ੍ਖੇਤ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਨਨ੍ਤਾਨਂ ਲੋਕਧਾਤੂਨਂ ਇਸ੍ਸਰੋ ਭਗਵਾ. ਤਿਂਸਕਪ੍ਪਸਹਸ੍ਸਮ੍ਹੀਤਿ ਇਤੋ ਪਟ੍ਠਾਯ ਤਿਂਸਕਪ੍ਪਸਹਸ੍ਸਾਨਂ ਮਤ੍ਥਕੇਤਿ ਅਤ੍ਥੋ.
ਤਸ੍ਸ ਪਨ ਸੁਜਾਤਸ੍ਸ ਭਗਵਤੋ ਸੁਮਙ੍ਗਲਂ ਨਾਮ ਨਗਰਂ ਅਹੋਸਿ, ਉਗ੍ਗਤੋ ਨਾਮ ਰਾਜਾ ਪਿਤਾ, ਪਭਾਵਤੀ ਨਾਮ ਮਾਤਾ, ਸੁਦਸ੍ਸਨੋ ਚ ਸੁਦੇਵੋ ਚ ਦ੍ਵੇ ਅਗ੍ਗਸਾਵਕਾ, ਨਾਰਦੋ ਨਾਮੁਪਟ੍ਠਾਕੋ, ਨਾਗਾ ਚ ਨਾਗਸਮਾਲਾ ਚ ਦ੍ਵੇ ਅਗ੍ਗਸਾਵਿਕਾ, ਮਹਾਵੇਲ਼ੁਰੁਕ੍ਖੋ ਬੋਧਿ, ਸੋ ਕਿਰ ਮਨ੍ਦਚ੍ਛਿਦ੍ਦੋ ਘਨਕ੍ਖਨ੍ਧੋ ਪਰਮਰਮਣੀਯੋ ਵੇਲ਼ੁਰਿਯਮਣਿਵਣ੍ਣੇਹਿ ਵਿਮਲੇਹਿ ਪਤ੍ਤੇਹਿ ਸਞ੍ਛਨ੍ਨਵਿਪੁਲਸਾਖੋ ਮਯੂਰਪਿਞ੍ਛਕਲਾਪੋ ਵਿਯ ਵਿਰੋਚਿਤ੍ਥ. ਤਸ੍ਸ ਪਨ ਭਗਵਤੋ ਸਰੀਰਂ ਪਣ੍ਣਾਸਹਤ੍ਥੁਬ੍ਬੇਧਂ ਅਹੋਸਿ, ਆਯੁ ਨਵੁਤਿਵਸ੍ਸਸਹਸ੍ਸਾਨਿ, ਸਿਰੀਨਨ੍ਦਾ ਨਾਮਸ੍ਸ ਅਗ੍ਗਮਹੇਸੀ, ਉਪਸੇਨੋ ਨਾਮ ਪੁਤ੍ਤੋ. ਤੁਰਙ੍ਗਵਰਯਾਨੇਨ ਨਿਕ੍ਖਮਿ. ਸੋ ਪਨ ਚਨ੍ਦਵਤੀਨਗਰੇ ਸਿਲਾਰਾਮੇ ਪਰਿਨਿਬ੍ਬਾਯਿ. ਤੇਨ ਵੁਤ੍ਤਂ –
੨੦. ‘‘ਸੁਮਙ੍ਗਲਂ ਨਾਮ ਨਗਰਂ, ਉਗ੍ਗਤੋ ਨਾਮ ਖਤ੍ਤਿਯੋ;
ਮਾਤਾ ਪਭਾਵਤੀ ਨਾਮ, ਸੁਜਾਤਸ੍ਸ ਮਹੇਸਿਨੋ.
੨੫. ‘‘ਸੁਦਸ੍ਸਨੋ ਸੁਦੇਵੋ ਚ, ਅਹੇਸੁਂ ਅਗ੍ਗਸਾਵਕਾ;
ਨਾਰਦੋ ਨਾਮੁਪਟ੍ਠਾਕੋ, ਸੁਜਾਤਸ੍ਸ ਮਹੇਸਿਨੋ.
੨੬. ‘‘ਨਾਗੋ ਚ ਨਾਗਸਮਾਲਾ ਚ, ਅਹੇਸੁਂ ਅਗ੍ਗਸਾਵਿਕਾ;
ਬੋਧਿ ਤਸ੍ਸ ਭਗਵਤੋ, ਮਹਾਵੇਲ਼ੂਤਿ ਵੁਚ੍ਚਤਿ.
੨੭. ‘‘ਸੋ ਚ ਰੁਕ੍ਖੋ ਘਨਕ੍ਖਨ੍ਧੋ, ਅਚ੍ਛਿਦ੍ਦੋ ਹੋਤਿ ਪਤ੍ਤਿਕੋ;
ਉਜੁ ਵਂਸੋ ਬ੍ਰਹਾ ਹੋਤਿ, ਦਸ੍ਸਨੀਯੋ ਮਨੋਰਮੋ.
੨੮. ‘‘ਏਕਕ੍ਖਨ੍ਧੋ ਪਵਡ੍ਢਿਤ੍ਵਾ, ਤਤੋ ਸਾਖਾ ਪਭਿਜ੍ਜਤਿ;
ਯਥਾ ਸੁਬਦ੍ਧੋ ਮੋਰਹਤ੍ਥੋ, ਏਵਂ ਸੋਭਤਿ ਸੋ ਦੁਮੋ.
੨੯. ‘‘ਨ ਤਸ੍ਸ ਕਣ੍ਟਕਾ ਹੋਨ੍ਤਿ, ਨਾਪਿ ਛਿਦ੍ਦਂ ਮਹਾ ਅਹੁ;
ਵਿਤ੍ਥਿਣ੍ਣਸਾਖੋ ਅਵਿਰਲੋ, ਸਨ੍ਦਚ੍ਛਾਯੋ ਮਨੋਰਮੋ.
੩੧. ‘‘ਪਞ੍ਞਾਸਰਤਨੋ ਆਸਿ, ਉਚ੍ਚਤ੍ਤਨੇਨ ਸੋ ਜਿਨੋ;
ਸਬ੍ਬਾਕਾਰਵਰੂਪੇਤੋ, ਸਬ੍ਬਗੁਣਮੁਪਾਗਤੋ.
੩੨. ‘‘ਤਸ੍ਸ ਪਭਾ ਅਸਮਸਮਾ, ਨਿਦ੍ਧਾਵਤਿ ਸਮਨ੍ਤਤੋ;
ਅਪ੍ਪਮਾਣੋ ਅਤੁਲਿਯੋ, ਓਪਮ੍ਮੇਹਿ ਅਨੂਪਮੋ.
੩੩. ‘‘ਨਵੁਤਿਵਸ੍ਸਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;
ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.
੩੪. ‘‘ਯਥਾਪਿ ਸਾਗਰੇ ਊਮੀ, ਗਗਨੇ ਤਾਰਕਾ ਯਥਾ;
ਏਵਂ ਤਦਾ ਪਾਵਚਨਂ, ਅਰਹਨ੍ਤੇਹਿ ਚਿਤ੍ਤਿਤਂ.
੩੫. ‘‘ਸੋ ਚ ਬੁਦ੍ਧੋ ਅਸਮਸਮੋ, ਗੁਣਾਨਿ ਚ ਤਾਨਿ ਅਤੁਲਿਯਾਨਿ;
ਸਬ੍ਬਂ ਤਮਨ੍ਤਰਹਿਤਂ, ਨਨੁ ਰਿਤ੍ਤਾ ਸਬ੍ਬਸਙ੍ਖਾਰਾ’’ਤਿ.
ਤਤ੍ਥ ਅਚ੍ਛਿਦ੍ਦੋਤਿ ਅਪ੍ਪਚ੍ਛਿਦ੍ਦੋ. ‘‘ਅਨੁਦਰਾ ਕਞ੍ਞਾ’’ਤਿਆਦੀਸੁ ਵਿਯ ਦਟ੍ਠਬ੍ਬਂ. ਕੇਚਿ ‘‘ਛਿਦ੍ਦਂ ਹੋਤਿ ਪਰਿਤ੍ਤਕ’’ਨ੍ਤਿ ਪਠਨ੍ਤਿ. ਪਤ੍ਤਿਕੋਤਿ ਬਹੁਪਤ੍ਤੋ, ਕਾਚਮਣਿਵਣ੍ਣੇਹਿ ਪਤ੍ਤੇਹਿ ਸਞ੍ਛਨ੍ਨੋਤਿ ਅਤ੍ਥੋ. ਉਜੂਤਿ ਅਵਙ੍ਕੋ ਅਕੁਟਿਲੋ. ਵਂਸੋਤਿ ਵੇਲ਼ੁ. ਬ੍ਰਹਾਤਿ ਸਮਨ੍ਤਤੋ ਮਹਾ. ਏਕਕ੍ਖਨ੍ਧੋਤਿ ਅਵਨਿਰੁਹੋ ਏਕੋ ਅਦੁਤਿਯੋ ਚਾਤਿ ਅਤ੍ਥੋ. ਪਵਡ੍ਢਿਤ੍ਵਾਤਿ ਵਡ੍ਢਿਤ੍ਵਾ. ਤਤੋ ਸਾਖਾ ਪਭਿਜ੍ਜਤੀਤਿ ਤਤੋ ਵਂਸਗ੍ਗਤੋ ਪਞ੍ਚਵਿਧਾ ਸਾਖਾ ਨਿਕ੍ਖਮਿਤ੍ਵਾ ਪਭਿਜ੍ਜਿਤ੍ਥ. ‘‘ਤਤੋ ਸਾਖਾ ਪਭਿਜ੍ਜਥਾ’’ਤਿਪਿ ਪਾਠੋ. ਸੁਬਦ੍ਧੋਤਿ ਸੁਟ੍ਠੁ ਪਞ੍ਚਬਨ੍ਧਨਾਕਾਰੇਨ ਬਦ੍ਧੋ. ਮੋਰਹਤ੍ਥੋਤਿ ਆਤਪਸਨ੍ਨਿਵਾਰਣਤ੍ਥਂ ਕਤੋ ਬਦ੍ਧੋ ਮੋਰਪਿਞ੍ਛਕਲਾਪੋ ਵੁਚ੍ਚਤਿ.
ਨ ਤਸ੍ਸ ਕਣ੍ਟਕਾ ਹੋਨ੍ਤੀਤਿ ਤਸ੍ਸ ਵਂਸਸ੍ਸ ਕਣ੍ਟਕਿਨੋਪਿ ਰੁਕ੍ਖਸ੍ਸ ਕਣ੍ਟਕਾ ਨਾਹੇਸੁਂ. ਅਵਿਰਲੋਤਿ ਅਵਿਰਲਸਾਖਾਸਞ੍ਛਨ੍ਨੋ. ਸਨ੍ਦਚ੍ਛਾਯੋਤਿ ਘਨਚ੍ਛਾਯੋ, ਅਵਿਰਲਤ੍ਤਾਵ ਸਨ੍ਦਚ੍ਛਾਯੋਤਿ ਵੁਤ੍ਤੋ. ਪਞ੍ਞਾਸਰਤਨੋ ਆਸੀਤਿ ਪਞ੍ਞਾਸਹਤ੍ਥੋ ਅਹੋਸਿ. ਸਬ੍ਬਾਕਾਰਵਰੂਪੇਤੋਤਿ ਸਬ੍ਬੇਨ ਆਕਾਰੇਨ ਵਰੇਹਿਯੇਵ ਉਪੇਤੋ ਸਬ੍ਬਾਕਾਰਵਰੂਪੇਤੋ ਨਾਮ. ਸਬ੍ਬਗੁਣਮੁਪਾਗਤੋਤਿ ਅਨਨ੍ਤਰਪਦਸ੍ਸੇਵ ਵੇਵਚਨਮਤ੍ਤਂ.
ਅਪ੍ਪਮਾਣੋਤਿ ਪਮਾਣਰਹਿਤੋ, ਪਮਾਣਂ ਗਹੇਤੁਂ ਅਸਕ੍ਕੁਣੇਯ੍ਯਤ੍ਤਾ ਵਾ ਅਪ੍ਪਮਾਣੋ. ਅਤੁਲਿਯੋਤਿ ਅਤੁਲੋ, ਕੇਨਚਿ ਅਸਦਿਸੋਤਿ ਅਤ੍ਥੋ. ਓਪਮ੍ਮੇਹੀਤਿ ਉਪਮਿਤਬ੍ਬੇਹਿ. ਅਨੂਪਮੋਤਿ ਉਪਮਾਰਹਿਤੋ, ‘‘ਇਮਿਨਾ ਚ ਇਮਿਨਾ ਚ ਸਦਿਸੋ’’ਤਿ ਵਤ੍ਤੁਂ ਅਸਕ੍ਕੁਣੇਯ੍ਯਭਾਵਤੋ ਅਨੂਪਮੋਤਿ ਅਤ੍ਥੋ. ਗੁਣਾਨਿ ਚ ਤਾਨੀਤਿ ਗੁਣਾ ਚ ਤੇ, ਸਬ੍ਬਞ੍ਞੁਤਞ੍ਞਾਣਾਦਯੋ ਗੁਣਾਤਿ ਅਤ੍ਥੋ. ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਸੁਜਾਤਬੁਦ੍ਧਵਂਸਵਣ੍ਣਨਾ ਨਿਟ੍ਠਿਤਾ.
ਨਿਟ੍ਠਿਤੋ ਦ੍ਵਾਦਸਮੋ ਬੁਦ੍ਧਵਂਸੋ.