੬. ਕਾਲ਼ੁਦਾਯਿਤ੍ਥੇਰਅਪਦਾਨਵਣ੍ਣਨਾ

ਛਟ੍ਠਾਪਦਾਨੇ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਕਾਲ਼ੁਦਾਯਿਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਕੁਲਪ੍ਪਸਾਦਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਤਜ੍ਜਂ ਅਭਿਨੀਹਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਤ੍ਥਾਪਿ ਬ੍ਯਾਕਾਸਿ. ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਬੋਧਿਸਤ੍ਤਸ੍ਸ ਮਾਤੁਕੁਚ੍ਛਿਯਂ ਪਟਿਸਨ੍ਧਿਗ੍ਗਹਣਦਿਵਸੇ ਦੇਵਲੋਕਤੋ ਚਵਿਤ੍ਵਾ ਕਪਿਲਵਤ੍ਥੁਸ੍ਮਿਂਯੇਵ ਅਮਚ੍ਚਕੁਲੇ ਪਟਿਸਨ੍ਧਿਂ ਗਣ੍ਹਿ. ਬੋਧਿਸਤ੍ਤੇਨ ਸਹ ਏਕਦਿਵਸੇਯੇਵ ਜਾਤੋ, ਤਂਦਿਵਸਂਯੇਵ ਨਂ ਦੁਕੂਲਚੁਮ੍ਬਟਕੇਨ ਨਿਪਜ੍ਜਾਪੇਤ੍ਵਾ ਬੋਧਿਸਤ੍ਤਸ੍ਸ ਉਪਟ੍ਠਾਨਂ ਨਯਿਂਸੁ. ਬੋਧਿਸਤ੍ਤੇਨ ਹਿ ਸਦ੍ਧਿਂ ਬੋਧਿਰੁਕ੍ਖੋ, ਰਾਹੁਲਮਾਤਾ, ਚਤ੍ਤਾਰੋ ਨਿਧੀ, ਆਰੋਹਨਿਯਹਤ੍ਥੀ, ਕਣ੍ਡਕੋ, ਛਨ੍ਨੋ, ਕਾਲ਼ੁਦਾਯੀਤਿ ਇਮੇ ਸਤ੍ਤ ਏਕਦਿਵਸੇ ਜਾਤਤ੍ਤਾ ਸਹਜਾਤਾ ਨਾਮ ਅਹੇਸੁਂ. ਅਥਸ੍ਸ ਨਾਮਗ੍ਗਹਣਦਿਵਸੇ ਸਕਲਨਗਰਸ੍ਸ ਉਦਗ੍ਗਚਿਤ੍ਤਦਿਵਸੇ ਜਾਤਤ੍ਤਾ ਉਦਾਯੀਤ੍ਵੇਵ ਨਾਮਂ ਕਰਿਂਸੁ. ਥੋਕਂ ਕਾਲ਼ਧਾਤੁਕਤ੍ਤਾ ਪਨ ਕਾਲ਼ੁਦਾਯੀਤਿ ਪਞ੍ਞਾਯਿਤ੍ਥ. ਸੋ ਬੋਧਿਸਤ੍ਤੇਨ ਸਦ੍ਧਿਂ ਕੁਮਾਰਕੀਲ਼ਂ ਕੀਲ਼ਨ੍ਤੋ ਵੁਦ੍ਧਿਂ ਅਗਮਾਸਿ.

ਅਪਰਭਾਗੇ ਲੋਕਨਾਥੇ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਅਨੁਕ੍ਕਮੇਨ ਸਬ੍ਬਞ੍ਞੁਤਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ ਵਿਹਰਨ੍ਤੇ ਸੁਦ੍ਧੋਦਨਮਹਾਰਾਜਾ ਤਂ ਪਵਤ੍ਤਿਂ ਸੁਤ੍ਵਾ ਪੁਰਿਸਸਹਸ੍ਸਪਰਿਵਾਰਂ ਏਕਂ ਅਮਚ੍ਚਂ ‘‘ਪੁਤ੍ਤਂ ਮੇ ਇਧਾਨੇਹੀ’’ਤਿ ਪੇਸੇਸਿ. ਸੋ ਸਤ੍ਥੁ ਧਮ੍ਮਦੇਸਨਾਵੇਲਾਯਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਠਿਤੋ ਧਮ੍ਮਂ ਸੁਤ੍ਵਾ ਸਪਰਿਵਾਰੋ ਅਰਹਤ੍ਤਂ ਪਾਪੁਣਿ. ਅਥ ਨੇ ਸਤ੍ਥਾ ‘‘ਏਥ, ਭਿਕ੍ਖਵੋ’’ਤਿ ਹਤ੍ਥਂ ਪਸਾਰੇਸਿ. ਸਬ੍ਬੇ ਤਂਖਣਂਯੇਵ ਇਦ੍ਧਿਮਯਪਤ੍ਤਚੀਵਰਧਰਾ ਵਸ੍ਸਸਟ੍ਠਿਕਤ੍ਥੇਰਾ ਵਿਯ ਅਹੇਸੁਂ. ਅਰਹਤ੍ਤਪ੍ਪਤ੍ਤਤੋ ਪਟ੍ਠਾਯ ਅਰਿਯਾ ਨਾਮ ਮਜ੍ਝਤ੍ਤਾਵ ਹੋਨ੍ਤਿ, ਤਸ੍ਮਾ ਰਞ੍ਞਾ ਪੇਸਿਤਸਾਸਨਂ ਦਸਬਲਸ੍ਸ ਨਾਰੋਚੇਸਿ. ਰਾਜਾ ਨੇਵ ਗਤੋ ਆਗਚ੍ਛਤਿ, ਨ ਸਾਸਨਂ ਸੁਯ੍ਯਤੀਤਿ ਅਪਰਮ੍ਪਿ ਅਮਚ੍ਚਂ ਪੁਰਿਸਸਹਸ੍ਸਪਰਿਵਾਰਂ ਪੇਸੇਸਿ. ਤਸ੍ਮਿਮ੍ਪਿ ਤਥਾ ਪਟਿਪਨ੍ਨੇ ਅਪਰਮ੍ਪੀਤਿ ਏਤੇਨ ਨਯੇਨ ਨਵਪੁਰਿਸਸਹਸ੍ਸਪਰਿਵਾਰੇ ਨਵ ਅਮਚ੍ਚੇ ਪੇਸੇਸਿ. ਸਬ੍ਬੇ ਗਨ੍ਤ੍ਵਾ ਅਰਹਤ੍ਤਂ ਪਤ੍ਵਾ ਤੁਣ੍ਹੀਭੂਤਾ ਅਹੇਸੁਂ.

ਅਥ ਰਾਜਾ ਚਿਨ੍ਤੇਸਿ – ‘‘ਏਤ੍ਤਕਾ ਜਨਾ ਮਯਿ ਸਿਨੇਹਾਭਾਵੇਨ ਦਸਬਲਸ੍ਸ ਇਧਾਗਮਨਤ੍ਥਾਯ ਨ ਕਿਞ੍ਚਿ ਕਥਯਿਂਸੁ, ਅਯਂ ਖੋ ਪਨ ਉਦਾਯੀ ਦਸਬਲੇਨ ਸਮਵਯੋ ਸਹਪਂਸੁਕੀਲ਼ਿਕੋ, ਮਯਿ ਚ ਸਿਨੇਹਵਾ, ਇਮਂ ਪੇਸੇਸ੍ਸਾਮੀ’’ਤਿ. ਅਥ ਤਂ ਪਕ੍ਕੋਸਾਪੇਤ੍ਵਾ, ‘‘ਤਾਤ, ਤ੍ਵਂ ਪੁਰਿਸਸਹਸ੍ਸਪਰਿਵਾਰੋ ਗਨ੍ਤ੍ਵਾ ਦਸਬਲਂ ਇਧਾਨੇਹੀ’’ਤਿ ਵਤ੍ਵਾ ਪੇਸੇਸਿ. ਸੋ ਪਨ ਗਚ੍ਛਨ੍ਤੋ ‘‘ਸਚਾਹਂ, ਦੇਵ, ਪਬ੍ਬਜਿਤੁਂ ਲਭਿਸ੍ਸਾਮਿ, ਏਵਾਹਂ ਭਗਵਨ੍ਤਂ ਇਧਾਨੇਸ੍ਸਾਮੀ’’ਤਿ ਵਤ੍ਵਾ ਰਞ੍ਞਾ ‘‘ਪਬ੍ਬਜਿਤੋਪਿ ਮਮ ਪੁਤ੍ਤਂ ਦਸ੍ਸੇਹੀ’’ਤਿ ਵੁਤ੍ਤੋ ਰਾਜਗਹਂ ਗਨ੍ਤ੍ਵਾ ਸਤ੍ਥੁ ਧਮ੍ਮਦੇਸਨਾਵੇਲਾਯ ਪਰਿਸਪਰਿਯਨ੍ਤੇ ਠਿਤੋ ਧਮ੍ਮਂ ਸੁਤ੍ਵਾ ਸਪਰਿਵਾਰੋ ਅਰਹਤ੍ਤਂ ਪਤ੍ਵਾ ਏਹਿਭਿਕ੍ਖੁਭਾਵੇ ਪਤਿਟ੍ਠਾਸਿ. ਸੋ ਅਰਹਤ੍ਤਂ ਪਤ੍ਵਾ – ‘‘ਨ ਤਾਵਾਯਂ ਦਸਬਲਸ੍ਸ ਕੁਲਨਗਰਂ ਗਨ੍ਤੁਂ ਕਾਲੋ, ਵਸ੍ਸਨ੍ਤੇ ਪਨ ਉਪਗਤੇ ਪਬ੍ਬਤੇਸੁ ਵਨਸਣ੍ਡੇਸੁ ਹਰਿਤਤਿਣਸਞ੍ਛਨ੍ਨਾਯ ਭੂਮਿਯਾ ਗਮਨਕਾਲੋ ਭਵਿਸ੍ਸਤੀ’’ਤਿ ਗਮਨਕਾਲਂ ਆਗਮੇਨ੍ਤੋ ਵਸ੍ਸਨ੍ਤੇ ਸਮ੍ਪਤ੍ਤੇ ਸਤ੍ਥੁ ਕੁਲਨਗਰਂ ਗਨ੍ਤੁਂ ਗਮਨਵਣ੍ਣਂ ਸਂਵਣ੍ਣੇਸਿ. ਵੁਤ੍ਤਞ੍ਚੇਤਂ ਥੇਰਗਾਥਾਯ (ਥੇਰਗਾ. ੫੨੭-੫੩੦) –

‘‘ਅਙ੍ਗਾਰਿਨੋ ਦਾਨਿ ਦੁਮਾ ਭਦਨ੍ਤੇ, ਫਲੇਸਿਨੋ ਛਦਨਂ ਵਿਪ੍ਪਹਾਯ;

ਤੇ ਅਚ੍ਚਿਮਨ੍ਤੋਵ ਪਭਾਸਯਨ੍ਤਿ, ਸਮਯੋ ਮਹਾਵੀਰ ਭਾਗੀ ਰਸਾਨਂ.

‘‘ਦੁਮਾਨਿ ਫੁਲ੍ਲਾਨਿ ਮਨੋਰਮਾਨਿ, ਸਮਨ੍ਤਤੋ ਸਬ੍ਬਦਿਸਾ ਪਵਨ੍ਤਿ;

ਪਤ੍ਤਂ ਪਹਾਯ ਫਲਮਾਸਸਾਨਾ, ਕਾਲੋ ਇਤੋ ਪਕ੍ਕਮਨਾਯ ਵੀਰ.

‘‘ਨੇਵਾਤਿਸੀਤਂ ਨ ਪਨਾਤਿਉਣ੍ਹਂ, ਸੁਖਾ ਉਤੁ ਅਦ੍ਧਨਿਯਾ ਭਦਨ੍ਤੇ;

ਪਸ੍ਸਨ੍ਤੁ ਤਂ ਸਾਕਿਯਾ ਕੋਲ਼ਿਯਾ ਚ, ਪਚ੍ਛਾਮੁਖਂ ਰੋਹਿਨਿਯਂ ਤਰਨ੍ਤਂ.

‘‘ਆਸਾਯ ਕਸਤੇ ਖੇਤ੍ਤਂ, ਬੀਜਂ ਆਸਾਯ ਵਪ੍ਪਤਿ;

ਆਸਾਯ ਵਾਣਿਜਾ ਯਨ੍ਤਿ, ਸਮੁਦ੍ਦਂ ਧਨਹਾਰਕਾ;

ਯਾਯ ਆਸਾਯ ਤਿਟ੍ਠਾਮਿ, ਸਾ ਮੇ ਆਸਾ ਸਮਿਜ੍ਝਤੁ.

‘‘ਨਾਤਿਸੀਤਂ ਨਾਤਿਉਣ੍ਹਂ, ਨਾਤਿਦੁਬ੍ਭਿਕ੍ਖਛਾਤਕਂ;

ਸਦ੍ਦਲਾ ਹਰਿਤਾ ਭੂਮਿ, ਏਸ ਕਾਲੋ ਮਹਾਮੁਨਿ. (ਅ. ਨਿ. ਅਟ੍ਠ. ੧.੧.੨੨੫);

‘‘ਪੁਨਪ੍ਪੁਨਞ੍ਚੇਵ ਵਪਨ੍ਤਿ ਬੀਜਂ, ਪੁਨਪ੍ਪੁਨਂ ਵਸ੍ਸਤਿ ਦੇਵਰਾਜਾ;

ਪੁਨਪ੍ਪੁਨਂ ਖੇਤ੍ਤਂ ਕਸਨ੍ਤਿ ਕਸ੍ਸਕਾ, ਪੁਨਪ੍ਪੁਨਂ ਧਞ੍ਞਮੁਪੇਤਿ ਰਟ੍ਠਂ.

‘‘ਪੁਨਪ੍ਪੁਨਂ ਯਾਚਨਕਾ ਚਰਨ੍ਤਿ, ਪੁਨਪ੍ਪੁਨਂ ਦਾਨਪਤੀ ਦਦਨ੍ਤਿ;

ਪੁਨਪ੍ਪੁਨਂ ਦਾਨਪਤੀ ਦਦਿਤ੍ਵਾ, ਪੁਨਪ੍ਪੁਨਂ ਸਗ੍ਗਮੁਪੇਨ੍ਤਿ ਠਾਨਂ.

‘‘ਵੀਰੋ ਹਵੇ ਸਤ੍ਤਯੁਗਂ ਪੁਨੇਤਿ; ਯਸ੍ਮਿਂ ਕੁਲੇ ਜਾਯਤਿ ਭੂਰਿਪਞ੍ਞੋ;

ਮਞ੍ਞਾਮਹਂ ਸਕ੍ਕਤਿ ਦੇਵਦੇਵੋ, ਤਯਾ ਹਿ ਜਾਤੋ ਮੁਨਿ ਸਚ੍ਚਨਾਮੋ.

‘‘ਸੁਦ੍ਧੋਦਨੋ ਨਾਮ ਪਿਤਾ ਮਹੇਸਿਨੋ, ਬੁਦ੍ਧਸ੍ਸ ਮਾਤਾ ਪਨ ਮਾਯਨਾਮਾ;

ਯਾ ਬੋਧਿਸਤ੍ਤਂ ਪਰਿਹਰਿਯ ਕੁਚ੍ਛਿਨਾ, ਕਾਯਸ੍ਸ ਭੇਦਾ ਤਿਦਿਵਮ੍ਹਿ ਮੋਦਤਿ.

‘‘ਸਾ ਗੋਤਮੀ ਕਾਲਕਤਾ ਇਤੋ ਚੁਤਾ, ਦਿਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤਾ;

ਸਾ ਮੋਦਤਿ ਕਾਮਗੁਣੇਹਿ ਪਞ੍ਚਹਿ, ਪਰਿਵਾਰਿਤਾ ਦੇਵਗਣੇਹਿ ਤੇਹਿ.

‘‘ਬੁਦ੍ਧਸ੍ਸ ਪੁਤ੍ਤੋਮ੍ਹਿ ਅਸਯ੍ਹਸਾਹਿਨੋ, ਅਙ੍ਗੀਰਸਸ੍ਸਪ੍ਪਟਿਮਸ੍ਸ ਤਾਦਿਨੋ;

ਪਿਤੁਪਿਤਾ ਮਯ੍ਹਂ ਤੁਵਂਸਿ ਸਕ੍ਕ, ਧਮ੍ਮੇਨ ਮੇ ਗੋਤਮ ਅਯ੍ਯਕੋਸੀ’’ਤਿ. (ਥੇਰਗਾ. ੫੩੧-੫੩੬);

‘‘ਅਮ੍ਬਾ ਪਨਸਾ ਕਪਿਟ੍ਠਾ ਚ, ਪੁਪ੍ਫਪਲ੍ਲਵਲਙ੍ਕਤਾ;

ਧੁਵਪ੍ਫਲਾਨਿ ਸਵਨ੍ਤਿ, ਖੁਦ੍ਦਾਮਧੁਕਕੂਪਮਾ;

ਸੇਵਮਾਨੋ ਉਭੋ ਪਸ੍ਸੇ, ਗਨ੍ਤੁਕਾਲੋ ਮਹਾਯਸ੍ਸ.

‘‘ਜਮ੍ਬੂ ਸੁਮਧੁਰਾ ਨੀਪਾ, ਮਧੁਗਣ੍ਡਿਦਿਵਪ੍ਫਲਾ;

ਤਾ ਉਭੋਸੁ ਪਜ੍ਜੋਤਨ੍ਤਿ, ਗਨ੍ਤੁਕਾਲੋ ਮਹਾਯਸ.

‘‘ਤਿਣ੍ਡੁਕਾਨਿ ਪਿਯਾਲਾਨਿ, ਸੋਣ੍ਣਵਣ੍ਣਾ ਮਨੋਰਮਾ;

ਖੁਦ੍ਦਕਪ੍ਪਫਲਾ ਨਿਚ੍ਚਂ, ਗਨ੍ਤੁਕਾਲੋ ਮਹਾਯਸ.

‘‘ਕਦਲੀ ਪਞ੍ਚਮੋਚ੍ਚਿ ਚ, ਸੁਪਕ੍ਕਫਲਭੂਸਿਤਾ;

ਉਭੋਪਸ੍ਸੇਸੁ ਲਮ੍ਬਨ੍ਤਿ, ਗਨ੍ਤੁਕਾਲੋ ਮਹਾਯਸ.

‘‘ਮਧੁਪ੍ਫਲਧਰਾ ਨਿਚ੍ਚਂ, ਮੋਰਰੁਕ੍ਖਾ ਮਨੋਰਮਾ;

ਖੁਦ੍ਦਕਪ੍ਪਫਲਾ ਨਿਚ੍ਚਂ, ਗਨ੍ਤੁਕਾਲੋ ਮਹਾਯਸ.

‘‘ਹਿਨ੍ਤਾਲਤਾਲਪਨ੍ਤੀ ਚ, ਰਜਤਕ੍ਖਨ੍ਧੋਵ ਜੋਤਰੇ;

ਸੁਪਕ੍ਕਫਲਸਞ੍ਛਨ੍ਨਾ, ਖੁਦ੍ਦਕਪ੍ਪਾ ਮਧੁਸ੍ਸਵਾ;

ਫਲਾਨਿ ਤਾਨਿ ਖਾਦਨ੍ਤੇ, ਗਨ੍ਤੁਕਾਲੋ ਮਹਾਯਸ.

‘‘ਉਦੁਮ੍ਬਰਾਰੁਣਾਵਣ੍ਣਾ, ਸਦਾਸੁਮਧੁਰਪ੍ਫਲਾ;

ਉਭੋਪਸ੍ਸੇਸੁ ਲਮ੍ਬਨ੍ਤਿ, ਗਨ੍ਤੁਕਾਲੋ ਮਹਾਯਸ.

‘‘ਇਤ੍ਥਮ੍ਭੂਤਾ ਅਨੇਕਾ ਤੇ, ਨਾਨਾਫਲਧਰਾ ਦੁਮਾ;

ਉਭੋਪਸ੍ਸੇਸੁ ਲਮ੍ਬਨ੍ਤਿ, ਗਨ੍ਤੁਕਾਲੋ ਮਹਾਯਸ.

‘‘ਚਮ੍ਪਕਾ ਸਲਲ਼ਾ ਨਾਗਾ, ਸੁਗਨ੍ਧਾ ਮਾਲੁਤੇਰਿਤਾ;

ਸੁਪੁਪ੍ਫਿਤਗ੍ਗਾ ਜੋਤਨ੍ਤਿ, ਸੁਗਨ੍ਧੇਨਾਭਿਪੂਜਯੁਂ;

ਸਾਦਰਾ ਵਿਨਤਾਨੇਵ, ਗਨ੍ਤੁਕਾਲੋ ਮਹਾਯਸ.

‘‘ਪੁਨ੍ਨਾਗਾ ਗਿਰਿਪੁਨ੍ਨਾਗਾ, ਪੁਪ੍ਫਿਤਾ ਧਰਣੀਰੁਹਾ;

ਸੁਪੁਪ੍ਫਿਤਗ੍ਗਾ ਜੋਤਨ੍ਤਿ, ਸੁਗਨ੍ਧੇਨਾਭਿਪੂਜਯੁਂ;

ਸਾਦਰਾ ਵਿਨਤੁਗ੍ਗਗ੍ਗਾ, ਗਨ੍ਤੁਕਾਲੋ ਮਹਾਯਸ.

‘‘ਅਸੋਕਾ ਕੋਵਿਲ਼ਾਰਾ ਚ, ਸੋਮਨਸ੍ਸਕਰਾ ਵਰਾ;

ਸੁਗਨ੍ਧਾ ਕਣ੍ਣਿਕਾ ਬਨ੍ਧਾ, ਰਤ੍ਤਵਣ੍ਣੇਹਿ ਭੂਸਿਤਾ;

ਸਾਦਰਾ ਵਿਨਤੁਗ੍ਗਗ੍ਗਾ, ਸਮਯੋ ਤੇ ਮਹਾਯਸ.

‘‘ਕਣ੍ਣਿਕਾਰਾ ਫੁਲ੍ਲਿਤਾ ਨਿਚ੍ਚਂ, ਸੋਵਣ੍ਣਰਂਸਿਜੋਤਕਾ;

ਦਿਬ੍ਬਗਨ੍ਧਾ ਪਵਾਯਨ੍ਤਿ, ਦਿਸਾ ਸਬ੍ਬਾਨਿ ਸੋਭਯਂ;

ਸਾਦਰਾ ਵਿਨਤਾਨੇਵ, ਸਮਯੋ ਤੇ ਮਹਾਯਸ.

‘‘ਸੁਪਤ੍ਤਾ ਗਨ੍ਧਸਮ੍ਪਨ੍ਨਾ, ਕੇਤਕੀ ਧਨੁਕੇਤਕੀ;

ਸੁਗਨ੍ਧਾ ਸਮ੍ਪਵਾਯਨ੍ਤਿ, ਦਿਸਾ ਸਬ੍ਬਾਭਿਗਨ੍ਧਿਨੋ;

ਸਾਦਰਾ ਪੂਜਯਨ੍ਤਾਵ, ਸਮਯੋ ਤੇ ਮਹਾਯਸ.

‘‘ਮਲ੍ਲਿਕਾ ਜਾਤਿਸੁਮਨਾ, ਸੁਗਨ੍ਧਾ ਖੁਦ੍ਦਮਲ੍ਲਿਕਾ;

ਦਿਸਾ ਸਬ੍ਬਾ ਪਵਾਯਨ੍ਤਿ, ਉਭੋ ਮਗ੍ਗੇ ਪਸੋਭਯਂ;

ਸਾਦਰਾ ਤੇ ਪਲਮ੍ਬਨ੍ਤਿ, ਸਮਯੋ ਤੇ ਮਹਾਯਸ.

‘‘ਸਿਨ੍ਧੁਵਾਰਾ ਸੀਤਗਨ੍ਧਾ, ਸੁਗਨ੍ਧਾ ਮਾਲੁਤੇਰਿਤਾ;

ਦਿਸਾ ਸਬ੍ਬਾਭਿਪੂਜੇਨ੍ਤਾ, ਉਭੋ ਮਗ੍ਗੇ ਪਸੋਭਯਂ;

ਸਾਦਰਾ ਵਿਨਤੁਗ੍ਗਗ੍ਗਾ, ਸਮਯੋ ਤੇ ਮਹਾਯਸ.

‘‘ਸੀਹਾ ਕੇਸਰਸੀਹਾ ਚ, ਚਤੁਪ੍ਪਦਨਿਸੇਵਿਤਾ;

ਅਚ੍ਛਮ੍ਭੀਤਾ ਸੁਰਾਪਾਨੇ, ਮਿਗਰਾਜਾ ਪਤਾਪਿਨੋ.

‘‘ਸੀਹਨਾਦੇਨ ਪੂਜੇਨ੍ਤਿ, ਸਾਦਰਾ ਤੇ ਮਿਗਾਭਿਭੂ;

ਮਗ੍ਗਮ੍ਹਿ ਉਭਤੋ ਵੂਲ਼੍ਹਾ, ਸਮਯੋ ਤੇ ਮਹਾਯਸ.

‘‘ਬ੍ਯਗ੍ਘਾ ਸਿਨ੍ਧਵਾ ਨਕੁਲਾ, ਸਾਧੁਰੂਪਾ ਭਯਾਨਕਾ;

ਆਕਾਸੇ ਸਮ੍ਪਤਨ੍ਤਾਵ, ਨਿਬ੍ਭੀਤਾ ਯੇਨ ਕੇਨਚਿ;

ਤੇਹਿ ਤੇ ਸਾਦਰਾ ਨਤਾ, ਸਮਯੋ ਤੇ ਮਹਾਯਸ.

‘‘ਤਿਧਾ ਪਭਿਨ੍ਨਾ ਛਦ੍ਦਨ੍ਤਾ, ਸੁਰੂਪਾ ਸੁਸ੍ਸਰਾ ਸੁਭਾ;

ਸਤ੍ਤਪ੍ਪਤਿਟ੍ਠਿਤਙ੍ਗਾ ਤੇ, ਉਭੋ ਮਗ੍ਗੇਸੁ ਕੂਜਿਨੋ;

ਸਾਦਰਾ ਹਾਸਮਾਨਾਵ, ਸਮਯੋ ਤੇ ਮਹਾਯਸ.

‘‘ਮਿਗਾ ਵਰਾਹਾ ਪਸਦਾ, ਚਿਤ੍ਰਾਸਾਵਯਵਾ ਸੁਭਾ;

ਆਰੋਹਪਰਿਣਾਹੇਨ, ਸੁਰੂਪਾ ਅਙ੍ਗਸਂਯੁਤਾ;

ਉਭੋ ਮਗ੍ਗੇ ਗਾਯਮਾਨਾਵ, ਸਮਯੋ ਤੇ ਮਹਾਯਸ.

‘‘ਗੋਕਣ੍ਣਾ ਸਰਭਾ ਰੁਰੂ, ਆਰੋਹਪਰਿਣਾਹਿਨੋ;

ਸੁਰੂਪਾ ਅਙ੍ਗਸਮ੍ਪਨ੍ਨਾ, ਸੇਵਮਾਨਾਵ ਅਚ੍ਛਰੁਂ;

ਸੇਵਮਾਨਾ ਤੇਹਿ ਤਦਾ, ਸਮਯੋ ਤੇ ਮਹਾਯਸ.

‘‘ਦੀਪੀ ਅਚ੍ਛਾ ਤਰਚ੍ਛਾ ਚ, ਤੁਦਰਾ ਵਰੁਣਾ ਸਦਾ;

ਤੇ ਦਾਨਿ ਸਿਕ੍ਖਿਤਾ ਸਬ੍ਬੇ, ਮੇਤ੍ਤਾਯ ਤਵ ਤਾਦਿਨੋ;

ਤੇ ਪਚ੍ਚਸੇਵਕਾ ਅਦ੍ਧਾ, ਸਮਯੋ ਤੇ ਮਹਾਯਸ.

‘‘ਸਸਾ ਸਿਙ੍ਗਾਲਾ ਨਕੁਲਾ, ਕਲਨ੍ਦਕਾਲ਼ਕਾ ਬਹੂ;

ਕਸ੍ਤੁਰਾ ਸੂਰਾ ਗਨ੍ਧਾ ਤੇ, ਕੇਵਲਾ ਗਾਯਮਾਨਾਵ.

ਸਮਯੋ ਤੇ ਮਹਾਯਸ;

‘‘ਮਯੂਰਾ ਨੀਲਗੀਵਾ ਤੇ, ਸੁਸਿਖਾ ਸੁਭਪਕ੍ਖਿਕਾ;

ਸੁਪਿਞ੍ਛਾ ਤੇ ਸੁਨਾਦਾ ਚ, ਵੇਲ਼ੁਰਿਯਮਣਿਸਨ੍ਨਿਭਾ;

ਨਾਦਂ ਕਰੋਨ੍ਤਾ ਪੂਜੇਨ੍ਤਿ, ਕਾਲੋ ਤੇ ਪਿਤੁਦਸ੍ਸਨੇ.

‘‘ਸੁਵਣ੍ਣਚਿਤ੍ਰਹਂਸਾ ਚ, ਜਵਹਂਸਾ ਵਿਹਾਚਰਾ;

ਤੇ ਸਬ੍ਬੇ ਆਸਯਾ ਛੁਦ੍ਧਾ, ਜਿਨਦਸ੍ਸਨਬ੍ਯਾਵਟਾ;

ਮਧੁਰਸ੍ਸਰੇਨ ਕੂਜਨ੍ਤਿ, ਕਾਲੋ ਤੇ ਪਿਤੁਦਸ੍ਸਨੇ.

‘‘ਹਂਸਾ ਕੋਞ੍ਚਾ ਸੁਨਦਾ ਤੇ, ਚਕ੍ਕਵਾਕਾ ਨਦੀਚਰਾ;

ਬਕਾ ਬਲਾਕਾ ਰੁਚਿਰਾ, ਜਲਕਾਕਾ ਸਰਕੁਕ੍ਕੁਟਾ;

ਸਾਦਰਾਭਿਨਾਦਿਨੋ ਏਤੇ, ਕਾਲੋ ਤੇ ਪਿਤੁਦਸ੍ਸਨੇ.

‘‘ਚਿਤ੍ਰਾ ਸੁਰੂਪਾ ਸੁਸ੍ਸਰਾ, ਸਾਲ਼ਿਕਾ ਸੁਵਤਣ੍ਡਿਕਾ;

ਰੁਕ੍ਖਗ੍ਗਾ ਸਮ੍ਪਤਨ੍ਤਾ ਤੇ, ਉਭੋ ਮਗ੍ਗੇਸੁ ਕੂਜਿਨੋ;

ਤੇਸੁ ਤੇਸੁ ਨਿਕੂਜਨ੍ਤਿ, ਕਾਲੋ ਤੇ ਪਿਤੁਦਸ੍ਸਨੇ.

‘‘ਕੋਕਿਲਾ ਸਕਲਾ ਚਿਤ੍ਰਾ, ਸਦਾ ਮਞ੍ਜੁਸ੍ਸਰਾ ਵਰਾ;

ਵਿਮ੍ਹਾਪਿਤਾ ਤੇ ਜਨਤਂ, ਸਦ੍ਧਿਮਿਤ੍ਤਾਦਿਕੇ ਸੁਰਾ;

ਸਰੇਹਿ ਪੂਜਯਨ੍ਤਾਵ, ਕਾਲੋ ਤੇ ਪਿਤੁਦਸ੍ਸਨੇ.

‘‘ਭਿਙ੍ਕਾ ਕੁਰਰਾ ਸਾਰਾ, ਪੂਰਿਤਾ ਕਾਨਨੇ ਸਦਾ;

ਨਿਨ੍ਨਾਦਯਨ੍ਤਾ ਪਵਨਂ, ਅਞ੍ਞਮਞ੍ਞਸਮਙ੍ਗਿਨੋ;

ਗਾਯਮਾਨਾ ਸਰੇਨੇਵ, ਕਾਲੋ ਤੇ ਪਿਤੁਦਸ੍ਸਨੇ.

‘‘ਤਿਤ੍ਤਿਰਾ ਸੁਸਰਾ ਸਾਰਾ, ਸੁਸਰਾ ਵਨਕੁਕ੍ਕੁਟਾ;

ਮਞ੍ਜੁਸ੍ਸਰਾ ਰਾਮਣੇਯ੍ਯਾ, ਕਾਲੋ ਤੇ ਪਿਤੁਦਸ੍ਸਨੇ.

‘‘ਸੇਤਵਾਲੁਕਸਞ੍ਛਨ੍ਨਾ, ਸੁਪਤਿਤ੍ਥਾ ਮਨੋਰਮਾ;

ਮਧੁਰੋਦਕਸਮ੍ਪੁਣ੍ਣਾ, ਸਰਾ ਜੋਤਨ੍ਤਿ ਤੇ ਸਦਾ;

ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ ਚ, ਸਮਯੋ ਤੇ ਞਾਤਿਦਸ੍ਸਨੇ.

‘‘ਕੁਮ੍ਭੀਰਾਮਕਰਾਕਿਣ੍ਣਾ, ਵਲਯਾ ਮੁਞ੍ਜਰੋਹਿਤਾ;

ਮਚ੍ਛਕਚ੍ਛਪਬ੍ਯਾਵਿਦ੍ਧਾ, ਸਰਾ ਸੀਤੋਦਕਾ ਸੁਭਾ;

ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ ਚ, ਸਮਯੋ ਤੇ ਞਾਤਿਦਸ੍ਸਨੇ.

‘‘ਨੀਲੁਪ੍ਪਲਸਮਾਕਿਣ੍ਣਾ, ਤਥਾ ਰਤ੍ਤੁਪ੍ਪਲੇਹਿ ਚ;

ਕੁਮੁਦੁਪ੍ਪਲਸਂਕਿਣ੍ਣਾ, ਸਰਾ ਸੋਭਨ੍ਤਿਨੇਕਧਾ;

ਤਤ੍ਥ ਸੀਤਲਕਾ ਤੋਯਾ, ਸਮਯੋ ਤੇ ਞਾਤਿਦਸ੍ਸਨੇ.

‘‘ਪੁਣ੍ਡਰੀਕੇਹਿ ਸਞ੍ਛਨ੍ਨਾ, ਪਦੁਮੇਹਿ ਸਮੋਹਤਾ;

ਉਭੋ ਮਗ੍ਗੇਸੁ ਸੋਭਨ੍ਤਿ, ਪੋਕ੍ਖਰਞ੍ਞੋ ਤਹਿਂ ਤਹਿਂ;

ਤਤ੍ਥੋਦਕਾਨਿ ਨ੍ਹਾਯਨ੍ਤਿ, ਸਮਯੋ ਤੇ ਞਾਤਿਦਸ੍ਸਨੇ.

‘‘ਸੇਤਪੁਲਿਨਸਂਕਿਣ੍ਣਾ, ਸੁਪਤਿਤ੍ਥਾ ਮਨੋਰਮਾ;

ਸੀਤੋਦਕਮਹੋਘੇਹਿ, ਸਮ੍ਪੁਣ੍ਣਾ ਤਾ ਨਦੀ ਸੁਭਾ;

ਉਭੋ ਮਗ੍ਗੇਹਿ ਸਨ੍ਦਨ੍ਤਿ, ਸਮਯੋ ਤੇ ਞਾਤਿਦਸ੍ਸਨੇ.

‘‘ਮਗ੍ਗਸ੍ਸ ਉਭਤੋਪਸ੍ਸੇ, ਗਾਮਨਿਗਮਸਮਾਕੁਲਾ;

ਸਦ੍ਧਾ ਪਸਨ੍ਨਾ ਜਨਤਾ, ਰਤਨਤ੍ਤਯਮਾਮਕਾ;

ਤੇਸਂ ਸਮ੍ਪੁਣ੍ਣਸਙ੍ਕਪ੍ਪੋ, ਸਮਯੋ ਤੇ ਞਾਤਿਦਸ੍ਸਨੇ.

‘‘ਤੇਸੁ ਤੇਸੁ ਪਦੇਸੇਸੁ, ਦੇਵਾ ਮਾਨੁਸ੍ਸਕਾ ਉਭੋ;

ਗਨ੍ਧਮਾਲਾਭਿਪੂਜੇਨ੍ਤਿ, ਸਮਯੋ ਤੇ ਞਾਤਿਦਸ੍ਸਨੇ’’ਤਿ.

ਏਵਂ ਥੇਰੋ ਸਟ੍ਠਿਮਤ੍ਤਾਹਿ ਗਾਥਾਹਿ ਸਤ੍ਥੁ ਗਮਨਵਣ੍ਣਂ ਸਂਵਣ੍ਣੇਸਿ. ਅਥ ਖੋ ਭਗਵਾ ‘‘ਕਾਲ਼ੁਦਾਯੀ ਮਮ ਗਮਨਂ ਪਤ੍ਥੇਤਿ, ਪੂਰੇਸ੍ਸਾਮਿਸ੍ਸ ਸਙ੍ਕਪ੍ਪ’’ਨ੍ਤਿ ਤਤ੍ਥ ਗਮਨੇ ਬਹੂਨਂ ਵਿਸੇਸਾਧਿਗਮਂ ਦਿਸ੍ਵਾ ਵੀਸਤਿਸਹਸ੍ਸਖੀਣਾਸਵਪਰਿਵੁਤੋ ਰਾਜਗਹਤੋ ਅਤੁਰਿਤਚਾਰਿਕਾਵਸੇਨ ਵੁਤ੍ਤਪ੍ਪਕਾਰਫਲਾਫਲੇ ਅਨੁਭਵਨ੍ਤੋ ਦ੍ਵਿਪਦਚਤੁਪ੍ਪਦਾਦਿਸਮੂਹਾਨਂ ਸੇਵਨਪੂਜਾਯ ਪੂਜਿਯਮਾਨੋ ਵੁਤ੍ਤਪ੍ਪਕਾਰਸੁਗਨ੍ਧਪੁਪ੍ਫਗਨ੍ਧੇਹਿ ਗਨ੍ਧਿਯਮਾਨੋ ਗਾਮਨਿਗਮਵਾਸੀਨਂ ਸਙ੍ਗਹਂ ਕੁਰੁਮਾਨੋ ਕਪਿਲਵਤ੍ਥੁਗਾਮਿਮਗ੍ਗਂ ਪਟਿਪਜ੍ਜਿ. ਥੇਰੋ ਇਦ੍ਧਿਯਾ ਕਪਿਲਵਤ੍ਥੁਂ ਗਨ੍ਤ੍ਵਾ ਰਞ੍ਞੋ ਪੁਰਤੋ ਆਕਾਸੇ ਠਿਤੋ ਅਦਿਟ੍ਠਪੁਬ੍ਬਂ ਵੇਸਂ ਦਿਸ੍ਵਾ, ਰਞ੍ਞਾ – ‘‘ਕੋਸਿ ਤ੍ਵ’’ਨ੍ਤਿ ਪੁਚ੍ਛਿਤੋ ‘‘ਸਚੇ ਅਮਚ੍ਚਪੁਤ੍ਤਂ ਤਯਾ ਭਗਵਤੋ ਸਨ੍ਤਿਕੇ ਪੇਸਿਤਂ ਨ ਜਾਨਾਸਿ, ਏਵਂ ਜਾਨਾਹੀ’’ਤਿ ਵਦਨ੍ਤੋ –

‘‘ਬੁਦ੍ਧਸ੍ਸ ਪੁਤ੍ਤੋਮ੍ਹਿ ਅਸਯ੍ਹਸਾਹਿਨੋ, ਅਙ੍ਗੀਰਸਸ੍ਸਪ੍ਪਟਿਮਸ੍ਸ ਤਾਦਿਨੋ;

ਪਿਤੁਪਿਤਾ ਮਯ੍ਹਂ ਤੁਵਂਸਿ ਸਕ੍ਕ, ਧਮ੍ਮੇਨ ਮੇ ਗੋਤਮ ਅਯ੍ਯਕੋਸੀ’’ਤਿ. (ਥੇਰਗਾ. ੫੩੬) – ਗਾਥਮਾਹ;

ਤਤ੍ਥ ਬੁਦ੍ਧਸ੍ਸ ਪੁਤ੍ਤੋਮ੍ਹੀਤਿ ਸਬ੍ਬਞ੍ਞੁਬੁਦ੍ਧਸ੍ਸ ਉਰੇ ਵਾਯਾਮਜਨਿਤਾਹਿ ਧਮ੍ਮਦੇਸਨਾਹਿ ਜਾਤਤਾਯ ਓਰਸਪੁਤ੍ਤੋ ਅਮ੍ਹਿ. ਅਸਯ੍ਹਸਾਹਿਨੋਤਿ ਅਭਿਸਮ੍ਬੋਧਿਤੋ ਪੁਬ੍ਬੇ ਠਪੇਤ੍ਵਾ ਮਹਾਬੋਧਿਸਤ੍ਤਂ ਅਞ੍ਞੇਹਿ ਸਹਿਤੁਂ ਅਸਕ੍ਕੁਣੇਯ੍ਯਤ੍ਤਾ ਅਸਯ੍ਹਸ੍ਸ ਸਕਲਬੋਧਿਸਮ੍ਭਾਰਸ੍ਸ, ਮਹਾਕਰੁਣਾਕਰਸ੍ਸ ਚ ਸਹਨਤੋ ਤਤੋ ਪਰਮ੍ਪਿ ਅਞ੍ਞੇਹਿ ਸਹਿਤੁਂ ਅਭਿਭਵਿਤੁਂ ਅਸਕ੍ਕੁਣੇਯ੍ਯਤ੍ਤਾ ਅਸਯ੍ਹਾਨਂ ਪਞ੍ਚਨ੍ਨਂ ਮਾਰਾਨਂ ਸਹਨਤੋ ਅਭਿਭਵਨਤੋ ਆਸਯਾਨੁਸਯਚਰਿਤਾਧਿਮੁਤ੍ਤਿਆਦਿਵਿਭਾਗਾਵਬੋਧੇਨ ਯਥਾਰਹਂ ਵੇਨੇਯ੍ਯਾਨਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਅਨੁਸਾਸਨੀਸਙ੍ਖਾਤਸ੍ਸ ਅਞ੍ਞੇਹਿ ਅਸਯ੍ਹਸ੍ਸ ਬੁਦ੍ਧਕਿਚ੍ਚਸ੍ਸ ਸਹਨਤੋ ਤਤ੍ਥ ਵਾ ਸਾਧੁਕਾਰੀਭਾਵਤੋ ਅਸਯ੍ਹਸਾਹਿਨੋ. ਅਙ੍ਗੀਰਸਸ੍ਸਾਤਿ ਅਙ੍ਗੀਕਤਸੀਲਾਦਿਸਮ੍ਪਤ੍ਤਿਕਸ੍ਸ. ‘‘ਅਙ੍ਗਮਙ੍ਗੇਹਿ ਨਿਚ੍ਛਰਣਕਓਭਾਸਸ੍ਸਾ’’ਤਿ ਅਪਰੇ. ਕੇਚਿ ਪਨ ‘‘ਅਙ੍ਗੀਰਸੋ ਸਿਦ੍ਧਤ੍ਥੋਤਿ ਇਮਾਨਿ ਦ੍ਵੇ ਨਾਮਾਨਿ ਪਿਤਰਾਯੇਵ ਗਹਿਤਾਨੀ’’ਤਿ ਵਦਨ੍ਤਿ. ਅਪ੍ਪਟਿਮਸ੍ਸਾਤਿ ਅਨੁਪਮਸ੍ਸ ਇਟ੍ਠਾਦੀਸੁ ਤਾਦਿਲਖਣਸਮ੍ਪਤ੍ਤਿਯਾ ਤਾਦਿਨੋ. ਪਿਤੁਪਿਤਾ ਮਯ੍ਹਂ ਤੁਵਂਸੀਤਿ ਅਰਿਯਜਾਤਿਵਸੇਨ ਮਯ੍ਹਂ ਪਿਤੁ ਸਮ੍ਮਾਸਮ੍ਬੁਦ੍ਧਸ੍ਸ ਲੋਕਵੋਹਾਰਵਸੇਨ ਤ੍ਵਂ ਪਿਤਾ ਅਸਿ. ਸਕ੍ਕਾਤਿ ਵਂਸੇਨ ਰਾਜਾਨਂ ਆਲਪਤਿ. ਧਮ੍ਮੇਨਾਤਿ ਸਭਾਵੇਨ ਅਰਿਯਜਾਤਿਲੋਕਿਯਜਾਤੀਹਿ ਦ੍ਵਿਨ੍ਨਂ ਜਾਤੀਨਂ ਸਭਾਵਸਮੋਧਾਨੇਨ. ਗੋਤਮਾਤਿ ਗੋਤ੍ਤੇਨ ਰਾਜਾਨਂ ਆਲਪਤਿ. ਅਯ੍ਯਕੋਸੀਤਿ ਪਿਤਾਮਹੋ ਅਹੋਸਿ. ਏਤ੍ਥ ਚ ‘‘ਬੁਦ੍ਧਸ੍ਸ ਪੁਤ੍ਤੋਮ੍ਹੀ’’ਤਿਆਦਿਂ ਵਦਨ੍ਤੋ ਥੇਰੋ ਅਞ੍ਞਂ ਬ੍ਯਾਕਾਸਿ.

ਏਵਂ ਪਨ ਅਤ੍ਤਾਨਂ ਜਾਨਾਪੇਤ੍ਵਾ ਹਟ੍ਠਤੁਟ੍ਠੇਨ ਰਞ੍ਞਾ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਅਤ੍ਤਨੋ ਪਟਿਯਾਦਿਤਸ੍ਸ ਨਾਨਗ੍ਗਰਸਭੋਜਨਸ੍ਸ ਪਤ੍ਤਂ ਪੂਰੇਤ੍ਵਾ ਪਤ੍ਤੇ ਦਿਨ੍ਨੇ ਗਮਨਾਕਾਰਂ ਦਸ੍ਸੇਸਿ. ‘‘ਕਸ੍ਮਾ ਗਨ੍ਤੁਕਾਮਤ੍ਥ, ਭੁਞ੍ਜਥਾ’’ਤਿ ਵੁਤ੍ਤੇ, ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਭੁਞ੍ਜਿਸ੍ਸਾਮੀਤਿ. ਕਹਂ ਪਨ ਸਤ੍ਥਾਤਿ? ਵੀਸਤਿਸਹਸ੍ਸਭਿਕ੍ਖੁਪਰਿਵਾਰੋ ਤੁਮ੍ਹਾਕਂ ਦਸ੍ਸਨਤ੍ਥਾਯ ਮਗ੍ਗਂ ਪਟਿਪਨ੍ਨੋਤਿ. ਤੁਮ੍ਹੇ ਇਮਂ ਪਿਣ੍ਡਪਾਤਂ ਭੁਞ੍ਜਥ, ਅਞ੍ਞਂ ਭਗਵਤੋ ਹਰਥ. ਯਾਵ ਚ ਮਮ ਪੁਤ੍ਤੋ ਇਮਂ ਨਗਰਂ ਪਾਪੁਣਾਤਿ, ਤਾਵਸ੍ਸ ਇਤੋਯੇਵ ਪਿਣ੍ਡਪਾਤਂ ਹਰਥਾਤਿ. ਥੇਰੋ ਭਤ੍ਤਕਿਚ੍ਚਂ ਕਤ੍ਵਾ ਰਞ੍ਞੋ ਚ ਪਰਿਸਾਯ ਚ ਧਮ੍ਮਂ ਦੇਸੇਤ੍ਵਾ ਸਤ੍ਥੁ ਆਗਮਨਤੋ ਪੁਰੇਤਰਮੇਵ ਰਾਜਨਿਵੇਸਨਂ ਰਤਨਤ੍ਤਯਗੁਣੇਸੁ ਅਭਿਪ੍ਪਸਨ੍ਨਂ ਕਰੋਨ੍ਤੋ ਸਬ੍ਬੇਸਂ ਪਸ੍ਸਨ੍ਤਾਨਂਯੇਵ ਸਤ੍ਥੁ ਆਹਰਿਤਬ੍ਬਭਤ੍ਤਪੁਣ੍ਣਂ ਪਤ੍ਤਂ ਆਕਾਸੇ ਵਿਸ੍ਸਜ੍ਜੇਤ੍ਵਾ ਸਯਮ੍ਪਿ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪਿਣ੍ਡਪਾਤਂ ਉਪਨੇਤ੍ਵਾ ਸਤ੍ਥੁ ਹਤ੍ਥੇ ਠਪੇਸਿ. ਸਤ੍ਥਾਪਿ ਤਂ ਪਿਣ੍ਡਪਾਤਂ ਪਰਿਭੁਞ੍ਜਿ. ਏਵਂ ਸਟ੍ਠਿਯੋਜਨਂ ਮਗ੍ਗਂ ਦਿਵਸੇ ਦਿਵਸੇ ਯੋਜਨਂ ਗਚ੍ਛਨ੍ਤਸ੍ਸ ਭਗਵਤੋ ਰਾਜਗੇਹਤੋ ਭਤ੍ਤਂ ਆਹਰਿਤ੍ਵਾ ਅਦਾਸਿ. ਭਗਵਾ ਕਮੇਨ ਕਪਿਲਵਤ੍ਥੁਨਗਰਂ ਪਤ੍ਵਾ ਪੁਨਦਿਵਸੇ ਰਾਜਵੀਥਿਯਂ ਪਿਣ੍ਡਾਯ ਚਰਤਿ. ਤਂ ਸੁਤ੍ਵਾ ਸੁਦ੍ਧੋਦਨਮਹਾਰਾਜਾ ਤਤ੍ਥ ਗਨ੍ਤ੍ਵਾ, ‘‘ਮਾ ਏਵਂ ਕਤ੍ਤਬ੍ਬਂ ਮਞ੍ਞਿ, ਨਯਿਦਂ ਰਾਜਵਂਸਪ੍ਪਵੇਣੀ’’ਤਿ. ‘‘ਅਯਂ ਤੁਮ੍ਹਾਕਂ, ਮਹਾਰਾਜ, ਵਂਸੋ, ਈਦਿਸੋ ਅਮ੍ਹਾਕਂ ਪਨ ਬੁਦ੍ਧਵਂਸੋ’’ਤਿ ਵਤ੍ਵਾ –

‘‘ਉਤ੍ਤਿਟ੍ਠੇ ਨਪ੍ਪਮਜ੍ਜੇਯ੍ਯ, ਧਮ੍ਮਂ ਸੁਚਰਿਤਂ ਚਰੇ;

ਧਮ੍ਮਚਾਰੀ ਸੁਖਂ ਸੇਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

‘‘ਧਮ੍ਮਂ ਚਰੇ ਸੁਚਰਿਤਂ, ਨ ਨਂ ਦੁਚ੍ਚਰਿਤਂ ਚਰੇ;

ਧਮ੍ਮਚਾਰੀ ਸੁਖਂ ਸੇਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚਾ’’ਤਿ. (ਧ. ਪ. ੧੬੮-੧੬੯) –

ਧਮ੍ਮਂ ਦੇਸੇਸਿ. ਰਾਜਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਤਤੋ ਰਾਜਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਸਕਮਨ੍ਦਿਰੇ ਭੋਜੇਤ੍ਵਾ ਸਮ੍ਪਵਾਰੇਤ੍ਵਾ ਭੋਜਨਾਵਸਾਨੇ ਧਮ੍ਮਪਾਲਜਾਤਕਂ (ਜਾ. ੧.੧੦.੯੨ ਆਦਯੋ) ਸੁਤ੍ਵਾ ਸਪਰਿਸੋ ਅਨਾਗਾਮਿਫਲੇ ਪਤਿਟ੍ਠਹਿ. ਅਪਰਭਾਗੇ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਨਿਪਨ੍ਨੋਵ ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬਾਯਿ.

ਤਤੋ ਭਗਵਾ ਰਾਹੁਲਮਾਤੁਯਾ ਬਿਮ੍ਬਾਦੇਵਿਯਾ ਪਾਸਾਦਂ ਗਨ੍ਤ੍ਵਾ ਤਸ੍ਸਾ ਧਮ੍ਮਂ ਦੇਸੇਤ੍ਵਾ ਸੋਕਂ ਵਿਨੋਦੇਤ੍ਵਾ ਚਨ੍ਦਕਿਨ੍ਨਰੀਜਾਤਕਦੇਸਨਾਯ (ਜਾ. ੧.੧੪.੧੮ ਆਦਯੋ) ਪਸਾਦਂ ਜਨੇਤ੍ਵਾ ਨਿਗ੍ਰੋਧਾਰਾਮਂ ਅਗਮਾਸਿ. ਅਥ ਬਿਮ੍ਬਾਦੇਵੀ ਪੁਤ੍ਤਂ ਰਾਹੁਲਕੁਮਾਰਂ ਆਹ – ‘‘ਗਚ੍ਛ, ਤਵ ਪਿਤੁ ਸਨ੍ਤਕਂ ਧਨਂ ਯਾਚਾਹੀ’’ਤਿ. ਕੁਮਾਰੋ ‘‘ਦਾਯਜ੍ਜਂ, ਮੇ ਸਮਣ, ਦੇਹੀ’’ਤਿ ਵਤ੍ਵਾ ਭਗਵਨ੍ਤਂ ਅਨੁਬਨ੍ਧਿਤ੍ਵਾ, ‘‘ਸੁਖਾ, ਤੇ ਸਮਣ, ਛਾਯਾ’’ਤਿ ਵਦਨ੍ਤੋ ਗਚ੍ਛਤਿ. ਤਂ ਭਗਵਾ ਨਿਗ੍ਰੋਧਾਰਾਮਂ ਨੇਤ੍ਵਾ ‘‘ਲੋਕੁਤਰਦਾਯਜ੍ਜਂ ਗਣ੍ਹਾਹੀ’’ਤਿ ਵਤ੍ਵਾ ਪਬ੍ਬਾਜੇਸਿ. ਅਥ ਭਗਵਾ ਅਰਿਯਗਣਮਜ੍ਝੇ ਨਿਸਿਨ੍ਨੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਕੁਲਪ੍ਪਸਾਦਕਾਨਂ ਯਦਿਦਂ ਕਾਲ਼ੁਦਾਯੀ’’ਤਿ (ਅ. ਨਿ. ੧.੨੧੯, ੨੨੫) ਥੇਰਂ ਏਤਦਗ੍ਗੇ ਠਪੇਸਿ.

੧੬੫. ਥੇਰੋ ਪਤ੍ਤਏਤਦਗ੍ਗਟ੍ਠਾਨੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਗਾਥਾਯੋ ਅਭਾਸਿ. ਤਤ੍ਥ ਅਨੁਤ੍ਤਾਨਪਦਮੇਵ ਵਣ੍ਣਯਿਸ੍ਸਾਮ.

੧੬੬. ਗੁਣਾਗੁਣਵਿਦੂਤਿ ਗੁਣਞ੍ਚ ਅਗੁਣਞ੍ਚ ਗੁਣਾਗੁਣਂ, ਵਣ੍ਣਾਵਣ੍ਣਂ, ਕੁਸਲਾਕੁਸਲਂ ਵਾ ਤਂ ਜਾਨਾਤੀਤਿ ਗੁਣਾਗੁਣਵਿਦੂ. ਕਤਞ੍ਞੂਤਿ ਅਞ੍ਞੇਹਿ ਕਤਗੁਣਂ ਜਾਨਾਤੀਤਿ ਕਤਞ੍ਞੂ, ਏਕਦਿਵਸਮ੍ਪਿ ਭਤ੍ਤਦਾਨਾਦਿਨਾ ਕਤੂਪਕਾਰਸ੍ਸ ਰਜ੍ਜਮ੍ਪਿ ਦਾਤੁਂ ਸਮਤ੍ਥਤ੍ਤਾ ਕਤਞ੍ਞੂ. ਕਤਵੇਦੀਤਿ ਕਤਂ ਵਿਨ੍ਦਤਿ ਅਨੁਭਵਤਿ ਸਮ੍ਪਟਿਚ੍ਛਤੀਤਿ ਕਤਵੇਦੀ. ਤਿਤ੍ਥੇ ਯੋਜੇਤਿ ਪਾਣਿਨੇਤਿ ਸਬ੍ਬਸਤ੍ਤੇ ਨਿਬ੍ਬਾਨਪਵੇਸਨੁਪਾਯੇ ਕੁਸਲਪਥੇ ਮਗ੍ਗੇ ਧਮ੍ਮਦੇਸਨਾਯ ਯੋਜੇਤਿ ਸਮ੍ਪਯੋਜੇਤਿ ਪਤਿਟ੍ਠਾਪੇਤੀਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵ. ਗਮਨਵਣ੍ਣਨਗਾਥਾਨਮਤ੍ਥੋ ਥੇਰਗਾਥਾਯਂ ਵੁਤ੍ਤੋਯੇਵਾਤਿ.

ਕਾਲ਼ੁਦਾਯਿਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.