੪. ਵਙ੍ਗੀਸਤ੍ਥੇਰਅਪਦਾਨਵਣ੍ਣਨਾ

ਚਤੁਤ੍ਥਾਪਦਾਨੇ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਵਙ੍ਗੀਸਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਧਮ੍ਮਂ ਸੋਤੁਂ ਗਚ੍ਛਨ੍ਤੇਹਿ ਨਗਰਵਾਸੀਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਭਿਕ੍ਖੁਂ ਪਟਿਭਾਨਵਨ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਤ੍ਥੁ ਅਧਿਕਾਰਕਮ੍ਮਂ ਕਤ੍ਵਾ – ‘‘ਅਹਮ੍ਪਿ ਅਨਾਗਤੇ ਪਟਿਭਾਨਵਨ੍ਤਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਕਤ੍ਵਾ ਸਤ੍ਥਾਰਾ ਬ੍ਯਾਕਤੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਮਾਤੁ ਪਰਿਬ੍ਬਾਜਿਕਾਭਾਵੇਨ ਅਪਰਭਾਗੇ ਪਰਿਬ੍ਬਾਜਕੋਤਿ ਪਾਕਟੋ ਵਙ੍ਗੀਸੋਤਿ ਚ ਲਦ੍ਧਨਾਮੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਤਤੋ ਆਚਰਿਯਂ ਆਰਾਧੇਤ੍ਵਾ ਛਵਸੀਸਜਾਨਨਮਨ੍ਤਂ ਨਾਮ ਸਿਕ੍ਖਿਤ੍ਵਾ ਛਵਸੀਸਂ ਨਖੇਨ ਆਕੋਟੇਤ੍ਵਾ – ‘‘ਅਯਂ ਸਤ੍ਤੋ ਅਸੁਕਯੋਨਿਯਂ ਨਿਬ੍ਬਤ੍ਤੋ’’ਤਿ ਜਾਨਾਤਿ.

ਬ੍ਰਾਹ੍ਮਣਾ ‘‘ਅਯਂ ਅਮ੍ਹਾਕਂ ਜਿਵਿਕਾਯ ਮਗ੍ਗੋ’’ਤਿ ਵਙ੍ਗੀਸਂ ਗਹੇਤ੍ਵਾ ਗਾਮਨਿਗਮਰਾਜਧਾਨਿਯੋ ਵਿਚਰਿਂਸੁ. ਵਙ੍ਗੀਸੋ ਤਿਵਸ੍ਸਮਤ੍ਥਕੇ ਮਤਾਨਮ੍ਪਿ ਸੀਸਂ ਆਹਰਾਪੇਤ੍ਵਾ ਨਖੇਨ ਆਕੋਟੇਤ੍ਵਾ – ‘‘ਅਯਂ ਸਤ੍ਤੋ ਅਸੁਕਯੋਨਿਯਂ ਨਿਬ੍ਬਤ੍ਤੋ’’ਤਿ ਵਤ੍ਵਾ ਮਹਾਜਨਸ੍ਸ ਕਙ੍ਖਾਚ੍ਛੇਦਨਤ੍ਥਂ ਤੇ ਤੇ ਜਨੇ ਆਵਾਹੇਤ੍ਵਾ ਅਤ੍ਤਨੋ ਅਤ੍ਤਨੋ ਗਤਿਂ ਕਥਾਪੇਤਿ. ਤੇਨ ਤਸ੍ਮਿਂ ਮਹਾਜਨੋ ਅਭਿਪ੍ਪਸੀਦਤਿ. ਸੋ ਤਂ ਨਿਸ੍ਸਾਯ ਮਹਾਜਨਸ੍ਸ ਹਤ੍ਥਤੋ ਸਤਮ੍ਪਿ ਸਹਸ੍ਸਮ੍ਪਿ ਲਭਤਿ. ਬ੍ਰਾਹ੍ਮਣਾ ਵਙ੍ਗੀਸਂ ਆਦਾਯ ਯਥਾਰੁਚਿ ਵਿਚਰਿਂਸੁ. ਵਙ੍ਗੀਸੋ ਸਤ੍ਥੁ ਗੁਣੇ ਸੁਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤੁਕਾਮੋ ਅਹੋਸਿ. ਬ੍ਰਾਹ੍ਮਣਾ ‘‘ਸਮਣੋ ਗੋਤਮੋ ਮਾਯਾਯ ਤਂ ਆਵਟ੍ਟੇਸ੍ਸਤੀ’’ਤਿ ਪਟਿਕ੍ਖਿਪਿਂਸੁ.

ਵਙ੍ਗੀਸੋ ਤੇਸਂ ਵਚਨਂ ਅਨਾਦਿਯਿਤ੍ਵਾ, ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ, ਪਟਿਸਨ੍ਥਾਰਂ ਕਤ੍ਵਾ, ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤਂ ਪੁਚ੍ਛਿ – ‘‘ਵਙ੍ਗੀਸ, ਕਿਞ੍ਚਿ ਸਿਪ੍ਪਂ ਜਾਨਾਤੀ’’ਤਿ? ‘‘ਆਮ, ਭੋ ਗੋਤਮ, ਛਵਸੀਸਮਨ੍ਤਂ ਨਾਮੇਕਂ ਜਾਨਾਮਿ, ਤੇਨ ਤਿਵਸ੍ਸਮਤ੍ਥਕੇ ਮਤਾਨਮ੍ਪਿ ਸੀਸਂ ਨਖੇਨ ਆਕੋਟੇਤ੍ਵਾ ਨਿਬ੍ਬਤ੍ਤਟ੍ਠਾਨਂ ਜਾਨਾਮੀ’’ਤਿ. ਅਥ ਸਤ੍ਥਾ ਤਸ੍ਸ ਏਕਂ ਨਿਰਯੇ ਨਿਬ੍ਬਤ੍ਤਸ੍ਸ ਸੀਸਂ, ਏਕਂ ਮਨੁਸ੍ਸੇਸੁ, ਏਕਂ ਦੇਵੇਸੁ, ਏਕਂ ਪਰਿਨਿਬ੍ਬੁਤਸ੍ਸ ਸੀਸਂ ਆਹਰਾਪੇਤ੍ਵਾ ਦਸ੍ਸੇਸਿ. ਸੋ ਪਠਮਸੀਸਂ ਆਕੋਟੇਤ੍ਵਾ, ‘‘ਭੋ ਗੋਤਮ, ਅਯਂ ਸਤ੍ਤੋ ਨਿਰਯੇ ਨਿਬ੍ਬਤ੍ਤੋ’’ਤਿ ਆਹ. ਸਾਧੁ ਵਙ੍ਗੀਸ, ਸੁਟ੍ਠੁ ਤਯਾ ਦਿਟ੍ਠਂ, ‘‘ਅਯਂ ਸਤ੍ਤੋ ਕੁਹਿਂ ਨਿਬ੍ਬਤ੍ਤੋ’’ਤਿ ਪੁਚ੍ਛਿ. ‘‘ਮਨੁਸ੍ਸਲੋਕੇ’’ਤਿ. ‘‘ਅਯਂ ਕੁਹਿ’’ਨ੍ਤਿ? ‘‘ਦੇਵਲੋਕੇ’’ਤਿ. ਤਿਣ੍ਣਨ੍ਨਮ੍ਪਿ ਨਿਬ੍ਬਤ੍ਤਟ੍ਠਾਨਂ ਕਥੇਸਿ. ਪਰਿਨਿਬ੍ਬੁਤਸ੍ਸ ਪਨ ਸੀਸਂ ਨਖੇਨ ਆਕੋਟੇਨ੍ਤੋ ਨੇਵ ਅਨ੍ਤਂ ਨ ਕੋਟਿਂ ਪਸ੍ਸਿ. ਅਥ ਨਂ ਸਤ੍ਥਾ ‘‘ਨ ਸਕ੍ਕੋਸਿ, ਵਙ੍ਗੀਸਾ’’ਤਿ ਪੁਚ੍ਛਿ. ‘‘ਪਸ੍ਸਥ, ਭੋ ਗੋਤਮ, ਉਪਪਰਿਕ੍ਖਾਮਿ ਤਾਵਾਤਿ ਪੁਨਪ੍ਪੁਨਂ ਪਰਿਵਤ੍ਤੇਤ੍ਵਾਪਿ ਬਾਹਿਰਕਮਨ੍ਤੇਨ ਖੀਣਾਸਵਸ੍ਸ ਸੀਸਂ ਜਾਨਿਤੁਂ ਨ ਸਕ੍ਕੋਤਿ. ਅਥਸ੍ਸ ਮਤ੍ਥਕਤੋ ਸੇਦੋ ਮੁਚ੍ਚਿ. ਸੋ ਲਜ੍ਜਿਤ੍ਵਾ ਤੁਣ੍ਹੀ ਅਹੋਸਿ’’. ਅਥ ਨਂ ਸਤ੍ਥਾ ‘‘ਕਿਲਮਸਿ, ਵਙ੍ਗੀਸਾ’’ਤਿ ਆਹ. ‘‘ਆਮ, ਭੋ ਗੋਤਮ, ਇਮਸ੍ਸ ਨਿਬ੍ਬਤ੍ਤਟ੍ਠਾਨਂ ਜਾਨਿਤੁਂ ਨ ਸਕ੍ਕੋਮਿ. ਸਚੇ ਤੁਮ੍ਹੇ ਜਾਨਾਥ, ਕਥੇਥਾ’’ਤਿ. ‘‘ਵਙ੍ਗੀਸ, ਅਹਂ ਏਤਮ੍ਪਿ ਜਾਨਾਮਿ, ਇਤੋ ਉਤ੍ਤਰਿਪਿ ਜਾਨਾਮੀ’’ਤਿ ਵਤ੍ਵਾ –

‘‘ਚੁਤਿਂ ਯੋ ਵੇਦਿ ਸਤ੍ਤਾਨਂ, ਉਪਪਤ੍ਤਿਞ੍ਚ ਸਬ੍ਬਸੋ;

ਅਸਤ੍ਤਂ ਸੁਗਤਂ ਬੁਦ੍ਧਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣਂ.

‘‘ਯਸ੍ਸ ਗਤਿਂ ਨ ਜਾਨਨ੍ਤਿ, ਦੇਵਾ ਗਨ੍ਧਬ੍ਬਮਾਨੁਸਾ;

ਖੀਣਾਸਵਂ ਅਰਹਨ੍ਤਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣ’’ਨ੍ਤਿ. (ਧ. ਪ. ੪੧੯-੪੨੦; ਸੁ. ਨਿ. ੬੪੮-੬੪੯) –

ਇਮਾ ਦ੍ਵੇ ਗਾਥਾਯੋ ਅਭਾਸਿ. ਸੋ ਤੇਨ ਹਿ, ਭੋ ਗੋਤਮ, ਤਂ ਵਿਜ੍ਜਂ ਮੇ ਦੇਥਾਤਿ ਅਪਚਿਤਿਂ ਦਸ੍ਸੇਤ੍ਵਾ ਸਤ੍ਥੁ ਸਨ੍ਤਿਕੇ ਨਿਸੀਦਿ. ਸਤ੍ਥਾ ‘‘ਅਮ੍ਹੇਹਿ ਸਮਾਨਲਿਙ੍ਗਸ੍ਸ ਦੇਮਾ’’ਤਿ ਆਹ. ਵਙ੍ਗੀਸੋ ‘‘ਯਂ ਕਿਞ੍ਚਿ ਕਤ੍ਵਾ ਮਯਾ ਇਮਂ ਮਨ੍ਤਂ ਗਹੇਤੁਂ ਵਟ੍ਟਤੀ’’ਤਿ ਬ੍ਰਾਹ੍ਮਣੇ ਉਪਗਨ੍ਤ੍ਵਾ ਆਹ – ‘‘ਤੁਮ੍ਹੇ ਮਯਿ ਪਬ੍ਬਜਨ੍ਤੇ ਮਾ ਚਿਨ੍ਤਯਿਤ੍ਥ, ਅਹਂ ਮਨ੍ਤਂ ਉਗ੍ਗਣ੍ਹਿਤ੍ਵਾ ਸਕਲਜਮ੍ਬੁਦੀਪੇ ਜੇਟ੍ਠਕੋ ਭਵਿਸ੍ਸਾਮਿ, ਤੁਮ੍ਹਾਕਮ੍ਪਿ ਤੇਨ ਭਦ੍ਦਮੇਵ ਭਵਿਸ੍ਸਤੀ’’ਤਿ ਸੋ ਮਨ੍ਤਤ੍ਥਾਯ ਸਤ੍ਥੁ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਦਾ ਚ ਥੇਰੋ ਨਿਗ੍ਰੋਧਕਪ੍ਪੋ ਭਗਵਤੋ ਸਨ੍ਤਿਕੇ ਠਿਤੋ ਹੋਤਿ, ਤਂ ਭਗਵਾ ਆਣਾਪੇਸਿ – ‘‘ਨਿਗ੍ਰੋਧਕਪ੍ਪ, ਇਮਂ ਪਬ੍ਬਾਜੇਹੀ’’ਤਿ. ਥੇਰੋ ਸਤ੍ਥੁ ਆਣਾਯ ਤਂ ਪਬ੍ਬਾਜੇਤ੍ਵਾ ‘‘ਮਨ੍ਤਪਰਿਵਾਰਂ ਤਾਵ ਉਗ੍ਗਣ੍ਹਾਹੀ’’ਤਿ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ ਵਿਪਸ੍ਸਨਾਕਮ੍ਮਟ੍ਠਾਨਞ੍ਚ ਆਚਿਕ੍ਖਿ. ਸੋ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ ਸਜ੍ਝਾਯਨ੍ਤੋਵ ਵਿਪਸ੍ਸਨਾਯ ਕਮ੍ਮਟ੍ਠਾਨਂ ਪਟ੍ਠਪੇਸਿ. ਬ੍ਰਾਹ੍ਮਣਾ ਤਂ ਉਪਸਙ੍ਕਮਿਤ੍ਵਾ – ‘‘ਕਿਂ, ਭੋ ਵਙ੍ਗੀਸ, ਸਮਣਸ੍ਸ ਗੋਤਮਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਹਿਤ’’ਨ੍ਤਿ ਪੁਚ੍ਛਿਂਸੁ. ‘‘ਆਮ ਸਿਕ੍ਖਿਤਂ’’. ‘‘ਤੇਨ ਹਿ ਏਹਿ ਗਮਿਸ੍ਸਾਮਾ’’ਤਿ. ‘‘ਕਿਂ ਸਿਪ੍ਪਸਿਕ੍ਖਨੇਨ, ਗਚ੍ਛਥ ਤੁਮ੍ਹੇ ਨ ਮਯ੍ਹਂ ਤੁਮ੍ਹੇਹਿ ਕਤ੍ਤਬ੍ਬਕਿਚ੍ਚ’’ਨ੍ਤਿ. ਬ੍ਰਾਹ੍ਮਣਾ ‘‘ਤ੍ਵਮ੍ਪਿ ਦਾਨਿ ਸਮਣਸ੍ਸ ਗੋਤਮਸ੍ਸ ਵਸਂ ਆਪਨ੍ਨੋ, ਮਾਯਾਯ ਆਵਟ੍ਟਿਤੋ, ਕਿਂ ਮਯਂ ਤਵ ਸਨ੍ਤਿਕੇ ਕਰਿਸ੍ਸਾਮਾ’’ਤਿ ਆਗਤਮਗ੍ਗੇਨੇਵ ਪਕ੍ਕਮਿਂਸੁ. ਵਙ੍ਗੀਸੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਸਚ੍ਛਾਕਾਸਿ.

੯੬. ਏਵਂ ਥੇਰੋ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਅਨੁਤ੍ਤਾਨਤ੍ਥਮੇਵ ਵਣ੍ਣਯਿਸ੍ਸਾਮ.

੯੯. ਪਭਾਹਿ ਅਨੁਰਞ੍ਜਨ੍ਤੋਤਿ ਸੋ ਪਦੁਮੁਤ੍ਤਰੋ ਭਗਵਾ ਨੀਲਪੀਤਾਦਿਛਬ੍ਬਣ੍ਣਪਭਾਹਿ ਰਂਸੀਹਿ ਅਨੁਰਞ੍ਜਨ੍ਤੋ ਜਲਨ੍ਤੋ ਸੋਭਯਮਾਨੋ ਵਿਜ੍ਜੋਤਮਾਨੋਤਿ ਅਤ੍ਥੋ. ਵੇਨੇਯ੍ਯਪਦੁਮਾਨਿ ਸੋਤਿ ਪਦੁਮੁਤ੍ਤਰਸੂਰਿਯੋ ਅਤ੍ਤਨੋ ਵਚਨਸਙ੍ਖਾਤੇਨ ਸੂਰਿਯਰਂਸਿਯਾ ਵੇਨੇਯ੍ਯਜਨਸਙ੍ਖਾਤਪਦੁਮਾਨਿ ਵਿਸੇਸੇਨ ਬੋਧੇਨ੍ਤੋ ਪਬੋਧੇਨ੍ਤੋ ਅਰਹਤ੍ਤਮਗ੍ਗਾਧਿਗਮੇਨ ਫੁਲ੍ਲਿਤਾਨਿ ਕਰੋਤੀਤਿ ਅਤ੍ਥੋ.

੧੦੦. ਵੇਸਾਰਜ੍ਜੇਹਿ ਸਮ੍ਪਨ੍ਨੋਤਿ –

‘‘ਅਨ੍ਤਰਾਯੇ ਚ ਨਿਯ੍ਯਾਨੇ, ਬੁਦ੍ਧਤ੍ਤੇ ਆਸਵਕ੍ਖਯੇ;

ਏਤੇਸੁ ਚਤੁਟ੍ਠਾਨੇਸੁ, ਬੁਦ੍ਧੋ ਸੁਟ੍ਠੁ ਵਿਸਾਰਦੋ’’ਤਿ. –

ਏਵਂ ਵੁਤ੍ਤਚਤੁਵੇਸਾਰਜ੍ਜਞਾਣੇਹਿ ਸਮ੍ਪਨ੍ਨੋ ਸਮਙ੍ਗੀਭੂਤੋ ਸਮਨ੍ਨਾਗਤੋਤਿ ਅਤ੍ਥੋ.

੧੦੫. ਵਾਗੀਸੋ ਵਾਦਿਸੂਦਨੋਤਿ ਵਾਦੀਨਂ ਪਣ੍ਡਿਤਜਨਾਨਂ ਈਸੋ ਪਧਾਨੋ ‘‘ਵਾਦੀਸੋ’’ਤਿ ਵਤ੍ਤਬ੍ਬੇ ਦ-ਕਾਰਸ੍ਸ ਗ-ਕਾਰਂ ਕਤ੍ਵਾ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਸਕਤ੍ਥਪਰਤ੍ਥਵਾਦਂ ਸੂਦਤਿ ਪਗ੍ਘਰਾਪੇਤਿ ਪਾਕਟਂ ਕਰੋਤੀਤਿ ਵਾਦਿਸੂਦਨੋ.

੧੧੦. ਮਾਰਮਸਨਾਤਿ ਖਨ੍ਧਮਾਰਾਦਯੋ ਪਞ੍ਚਮਾਰੇ ਮਸਤਿ ਪਰਾਮਸਤਿ ਵਿਦ੍ਧਂਸੇਤੀਤਿ ਮਾਰਮਸਨੋ. ਦਿਟ੍ਠਿਸੂਦਨਾਤਿ ਵੋਹਾਰਪਰਮਤ੍ਥਸਙ੍ਖਾਤਂ ਦਿਟ੍ਠਿਦਸ੍ਸਨਂ ਸੂਦਤਿ ਪਗ੍ਘਰਂ ਦੀਪੇਤੀਤਿ ਦਿਟ੍ਠਿਸੂਦਨੋ.

੧੧੧. ਵਿਸ੍ਸਾਮਭੂਮਿ ਸਨ੍ਤਾਨਨ੍ਤਿ ਸਕਲਸਂਸਾਰਸਾਗਰੇ ਸਨ੍ਤਾਨਂ ਕਿਲਮਨ੍ਤਾਨਂ ਸੋਤਾਪਤ੍ਤਿਮਗ੍ਗਾਦਿਅਧਿਗਮਾਪਨੇਨ ਵਿਸ੍ਸਮਭੂਮਿ ਵਿਸ੍ਸਮਟ੍ਠਾਨਂ ਵੂਪਸਮਨਟ੍ਠਾਨਨ੍ਤਿ ਅਤ੍ਥੋ.

੧੩੨. ਤਤੋਹਂ ਵਿਹਤਾਰਮ੍ਭੋਤਿ ਤਤੋ ਪਚ੍ਚੇਕਬੁਦ੍ਧਸ੍ਸ ਸਰੀਰਦਸ੍ਸਨੇਨ ਅਹਂ ਵਿਹਤਾਰਮ੍ਭੋ ਵਿਨਟ੍ਠਸਾਰਮ੍ਭੋ, ਵਿਨਟ੍ਠਮਾਨੋ ਨਿਮ੍ਮਦੋ ਹੁਤ੍ਵਾ ਪਬ੍ਬਜ੍ਜਂ ਸਂ ਸੁਟ੍ਠੁ ਯਾਚਿਂ ਸਂਯਾਚਿਂ ਆਰੋਚੇਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਵਙ੍ਗੀਸਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.