੫੪. ਕਚ੍ਚਾਯਨਵਗ੍ਗੋ

੧. ਮਹਾਕਚ੍ਚਾਯਨਤ੍ਥੇਰਅਪਦਾਨਵਣ੍ਣਨਾ

ਚਤੁਪਞ੍ਞਾਸਮਵਗ੍ਗੇ ਪਠਮਾਪਦਾਨੇ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਮਹਾਕਚ੍ਚਾਯਨਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵੁਦ੍ਧਿਪ੍ਪਤ੍ਤੋ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਾ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਵਿਭਜਨ੍ਤਾਨਂ ਅਗ੍ਗਟ੍ਠਾਨੇ ਠਪਿਯਮਾਨਂ ਏਕਂ ਭਿਕ੍ਖੁਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਪਣਿਧਾਨਂ ਕਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਵਿਜ੍ਜਾਧਰੋ ਹੁਤ੍ਵਾ ਆਕਾਸੇਨ ਗਚ੍ਛਨ੍ਤੋ ਏਕਸ੍ਮਿਂ ਵਨਸਣ੍ਡੇ ਨਿਸਿਨ੍ਨਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਕਣਿਕਾਰਪੁਪ੍ਫੇਹਿ ਪੂਜਂ ਅਕਾਸਿ.

ਸੋ ਤੇਨ ਪੁਞ੍ਞੇਨ ਅਪਰਾਪਰਂ ਸੁਗਤੀਸੁਯੇਵ ਪਰਿਵਤ੍ਤੇਨ੍ਤੋ ਕਸ੍ਸਪਦਸਬਲਸ੍ਸ ਕਾਲੇ ਬਾਰਾਣਸਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਪਰਿਨਿਬ੍ਬੁਤੇ ਭਗਵਤਿ ਸੁਵਣ੍ਣਚੇਤਿਯਕਮ੍ਮਟ੍ਠਾਨੇ ਸਤਸਹਸ੍ਸਗ੍ਘਨਿਕਾਯ ਸੁਵਣ੍ਣਿਟ੍ਠਕਾਯ ਪੂਜਂ ਕਤ੍ਵਾ ‘‘ਇਮਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸਰੀਰਂ ਮੇ ਸੁਵਣ੍ਣਵਣ੍ਣਂ ਹੋਤੂ’’ਤਿ ਪਤ੍ਥਨਂ ਅਕਾਸਿ. ਤਤੋ ਯਾਵਜੀਵਂ ਕੁਸਲਕਮ੍ਮਂ ਕਤ੍ਵਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਉਜ੍ਜੇਨਿਯਂ ਰਞ੍ਞੋ ਚਣ੍ਡਪਜ੍ਜੋਤਸ੍ਸ ਪੁਰੋਹਿਤਗੇਹੇ ਨਿਬ੍ਬਤ੍ਤਿ, ਤਸ੍ਸ ਨਾਮਗ੍ਗਹਣਦਿਵਸੇ ਮਾਤਾ ‘‘ਮਯ੍ਹਂ ਪੁਤ੍ਤੋ ਸੁਵਣ੍ਣਵਣ੍ਣੋ, ਅਤ੍ਤਨੋ ਨਾਮਂ ਗਹੇਤ੍ਵਾ ਆਗਤੋ’’ਤਿ ਕਞ੍ਚਨਮਾਣਵੋਤ੍ਵੇਵ ਨਾਮਂ ਅਕਾਸਿ. ਸੋ ਵੁਦ੍ਧਿਮਨ੍ਵਾਯ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਪਿਤੁ ਅਚ੍ਚਯੇਨ ਪੁਰੋਹਿਤਟ੍ਠਾਨਂ ਲਭਿ. ਸੋ ਗੋਤ੍ਤਵਸੇਨ ਕਚ੍ਚਾਯਨੋਤਿ ਪਞ੍ਞਾਯਿਤ੍ਥ. ਅਥ ਰਾਜਾ ਚਣ੍ਡਪਜ੍ਜੋਤੋ ਬੁਦ੍ਧੁਪ੍ਪਾਦਂ ਸੁਤ੍ਵਾ, ‘‘ਆਚਰਿਯ, ਤੁਮ੍ਹੇ ਤਤ੍ਥ ਗਨ੍ਤ੍ਵਾ ਸਤ੍ਥਾਰਂ ਇਧਾਨੇਥਾ’’ਤਿ ਪੇਸੇਸਿ. ਸੋ ਅਤ੍ਤਟ੍ਠਮੋ ਸਤ੍ਥੁ ਸਨ੍ਤਿਕਂ ਉਪਗਤੋ ਤਸ੍ਸ ਸਤ੍ਥਾ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਸਤ੍ਤਹਿ ਜਨੇਹਿ ਸਦ੍ਧਿਂ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤੇ ਪਤਿਟ੍ਠਾਸਿ.

੧. ਸੋ ਏਵਂ ਪਤ੍ਤਅਰਹਤ੍ਤਫਲੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਅਥ ਸਤ੍ਥਾ ‘‘ਏਥ, ਭਿਕ੍ਖਵੋ’’ਤਿ ਹਤ੍ਥਂ ਪਸਾਰੇਸਿ. ਤੇ ਤਾਵਦੇਵ ਦ੍ਵਙ੍ਗੁਲਮਤ੍ਤਕੇਸਮਸ੍ਸੁਇਦ੍ਧਿਮਯਪਤ੍ਤਚੀਵਰਧਰਾ ਵਸ੍ਸਸਟ੍ਠਿਕਤ੍ਥੇਰਾ ਵਿਯ ਅਹੇਸੁਂ. ਏਵਂ ਥੇਰੋ ਸਦਤ੍ਥਂ ਨਿਪ੍ਫਾਦੇਤ੍ਵਾ, ‘‘ਭਨ੍ਤੇ, ਰਾਜਾ ਪਜ੍ਜੋਤੋ ਤੁਮ੍ਹਾਕਂ ਪਾਦੇ ਵਨ੍ਦਿਤੁਂ ਧਮ੍ਮਞ੍ਚ ਸੋਤੁਂ ਇਚ੍ਛਤੀ’’ਤਿ ਆਰੋਚੇਸਿ. ਸਤ੍ਥਾ ‘‘ਤ੍ਵਂਯੇਵ, ਕਚ੍ਚਾਨ, ਤਤ੍ਥ ਗਚ੍ਛ, ਤਯਿ ਗਤੇ ਰਾਜਾ ਪਸੀਦਿਸ੍ਸਤੀ’’ਤਿ ਆਹ. ਥੇਰੋ ਸਤ੍ਥੁ ਆਣਾਯ ਅਤ੍ਤਟ੍ਠਮੋ ਤਤ੍ਥ ਗਨ੍ਤ੍ਵਾ ਰਾਜਾਨਂ ਪਸਾਦੇਤ੍ਵਾ ਅਵਨ੍ਤੀਸੁ ਸਾਸਨਂ ਪਤਿਟ੍ਠਾਪੇਤ੍ਵਾ ਪੁਨ ਸਤ੍ਥੁ ਸਨ੍ਤਿਕਮੇਵ ਆਗਤੋ. ਅਤ੍ਤਨੋ ਪੁਬ੍ਬਪਤ੍ਥਨਾਵਸੇਨ ਕਚ੍ਚਾਯਨਪ੍ਪਕਰਣਂ ਮਹਾਨਿਰੁਤ੍ਤਿਪ੍ਪਕਰਣਂ ਨੇਤ੍ਤਿਪ੍ਪਕਰਣਨ੍ਤਿ ਪਕਰਣਤ੍ਤਯਂ ਸਙ੍ਘਮਜ੍ਝੇ ਬ੍ਯਾਕਾਸਿ. ਅਥ ਸਨ੍ਤੁਟ੍ਠੇਨ ਭਗਵਤਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਵਿਭਜਨ੍ਤਾਨਂ ਯਦਿਦਂ ਮਹਾਕਚ੍ਚਾਨੋ’’ਤਿ (ਅ. ਨਿ. ੧.੧੮੮, ੧੯੭) ਏਤਦਗ੍ਗਟ੍ਠਾਨੇ ਠਪਿਤੋ ਅਗ੍ਗਫਲਸੁਖੇਨ ਵਿਹਾਸੀਤਿ.

ਮਹਾਕਚ੍ਚਾਯਨਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਵਕ੍ਕਲਿਤ੍ਥੇਰਅਪਦਾਨਵਣ੍ਣਨਾ

ਦੁਤਿਯਾਪਦਾਨੇ ਇਤੋ ਸਤਸਹਸ੍ਸਮ੍ਹੀਤਿਆਦਿਕਂ ਆਯਸ੍ਮਤੋ ਵਕ੍ਕਲਿਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਸਨ੍ਤਿਕਂ ਗਚ੍ਛਨ੍ਤੇਹਿ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਠਿਤੋ ਧਮ੍ਮਂ ਸੁਣਨ੍ਤੋ ਸਤ੍ਥਾਰਾ ਏਕਂ ਭਿਕ੍ਖੁਂ ਸਦ੍ਧਾਧਿਮੁਤ੍ਤਾਨਂ ਅਗ੍ਗਟ੍ਠਾਨੇ ਠਪਿਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾ ਤਸ੍ਸ ਅਨਨ੍ਤਰਾਯਂ ਦਿਸ੍ਵਾ ਬ੍ਯਾਕਰਿ.

ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਭਗਵਤੋ ਕਾਲੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ, ਤਸ੍ਸ ਵਕ੍ਕਲੀਤਿ ਨਾਮਂ ਕਰਿਂਸੁ. ਤਤ੍ਥ ਕਲੀਤਿ ਅਪਰਾਧਤਿਲਕਾਲ਼ਕਾਦਿਦੋਸਸ੍ਸ ਅਧਿਵਚਨਂ. ਨਿਦ੍ਧਨ੍ਤਸੁਵਣ੍ਣਪਿਣ੍ਡਸਦਿਸਤਾਯ ਅਪਗਤੋ ਬ੍ਯਪਗਤੋ ਕਲਿ ਦੋਸੋ ਅਸ੍ਸਾਤਿ ਵ-ਕਾਰਾਗਮਂ ਕਤ੍ਵਾ ਵਕ੍ਕਲੀਤਿ ਵੁਚ੍ਚਤਿ. ਸੋ ਵੁਦ੍ਧਿਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਬ੍ਰਾਹ੍ਮਣਸਿਪ੍ਪੇਸੁ ਨਿਪ੍ਫਤ੍ਤਿਂ ਗਤੋ, ਸਤ੍ਥਾਰਂ ਦਿਸ੍ਵਾ ਰੂਪਕਾਯਸਮ੍ਪਤ੍ਤਿਦਸ੍ਸਨੇਨ ਅਤਿਤ੍ਤੋ ਸਤ੍ਥਾਰਾ ਸਦ੍ਧਿਂਯੇਵ ਵਿਚਰਤਿ. ‘‘ਅਗਾਰਮਜ੍ਝੇ ਵਸਨ੍ਤੋ ਨਿਚ੍ਚਕਾਲਂ ਸਤ੍ਥੁ ਦਸ੍ਸਨਂ ਨ ਲਭਿਸ੍ਸਾਮੀ’’ਤਿ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਠਪੇਤ੍ਵਾ ਭੋਜਨਕਾਲਂ ਸਰੀਰਕਿਚ੍ਚਕਾਲਞ੍ਚ ਸੇਸਕਾਲੇ ਯਤ੍ਥ ਠਿਤੇਨ ਸਕ੍ਕਾ ਦਸਬਲਂ ਪਸ੍ਸਿਤੁਂ, ਤਤ੍ਥ ਠਿਤੋ ਅਞ੍ਞਂ ਕਿਚ੍ਚਂ ਪਹਾਯ ਭਗਵਨ੍ਤਂ ਓਲੋਕੇਨ੍ਤੋਯੇਵ ਵਿਹਰਤਿ. ਸਤ੍ਥਾ ਤਸ੍ਸ ਞਾਣਪਰਿਪਾਕਂ ਆਗਮੇਨ੍ਤੋ ਬਹੁਕਾਲਂ ਤਸ੍ਮਿਂ ਰੂਪਦਸ੍ਸਨੇਨੇਵ ਵਿਚਰਨ੍ਤੇ ਕਿਞ੍ਚਿ ਅਵਤ੍ਵਾ ਪੁਨੇਕਦਿਵਸਂ – ‘‘ਕਿਂ ਤੇ, ਵਕ੍ਕਲਿ, ਇਮਿਨਾ ਪੂਤਿਕਾਯੇਨ ਦਿਟ੍ਠੇਨ? ਯੋ ਖੋ, ਵਕ੍ਕਲਿ, ਧਮ੍ਮਂ ਪਸ੍ਸਤਿ, ਸੋ ਮਂ ਪਸ੍ਸਤਿ; ਯੋ ਮਂ ਪਸ੍ਸਤਿ, ਸੋ ਧਮ੍ਮਂ ਪਸ੍ਸਤਿ. ਧਮ੍ਮਞ੍ਹਿ, ਵਕ੍ਕਲਿ, ਪਸ੍ਸਨ੍ਤੋ ਮਂ ਪਸ੍ਸਤੀ’’ਤਿ (ਸਂ. ਨਿ. ੩.੮੭) ਆਹ. ਸਤ੍ਥਰਿ ਏਵਂ ਵਦਨ੍ਤੇਪਿ ਥੇਰੋ ਸਤ੍ਥੁ ਦਸ੍ਸਨਂ ਪਹਾਯ ਅਞ੍ਞਤ੍ਥ ਗਨ੍ਤੁਂ ਨ ਸਕ੍ਕੋਤਿ. ਤਤੋ ਸਤ੍ਥਾ, ‘‘ਨਾਯਂ ਭਿਕ੍ਖੁ ਸਂਵੇਗਂ ਅਲਭਿਤ੍ਵਾ ਬੁਜ੍ਝਿਸ੍ਸਤੀ’’ਤਿ ਵਸ੍ਸੂਪਨਾਯਿਕਦਿਵਸੇ – ‘‘ਅਪੇਹਿ, ਵਕ੍ਕਲੀ’’ਤਿ ਥੇਰਂ ਪਣਾਮੇਸਿ. ਸੋ ਸਤ੍ਥਾਰਾ ਪਣਾਮਿਤੋ ਸਤ੍ਥੁ ਸਮ੍ਮੁਖੇ ਠਾਤੁਂ ਅਸਕ੍ਕੋਨ੍ਤੋ – ‘‘ਕਿਂ ਮਯ੍ਹਂ ਜੀਵਿਤੇਨ, ਯੋਹਂ ਸਤ੍ਥਾਰਂ ਦਟ੍ਠੁਂ ਨ ਲਭਾਮੀ’’ਤਿ ਗਿਜ੍ਝਕੂਟੇ ਪਬ੍ਬਤੇ ਪਪਾਤਟ੍ਠਾਨਂ ਅਭਿਰੁਹਿ? ਸਤ੍ਥਾ ਤਸ੍ਸ ਤਂ ਪਵਤ੍ਤਿਂ ਞਤ੍ਵਾ – ‘‘ਅਯਂ ਭਿਕ੍ਖੁ ਮਮ ਸਨ੍ਤਿਕਾ ਅਸ੍ਸਾਸਂ ਅਲਭਨ੍ਤੋ ਮਗ੍ਗਫਲਾਨਂ ਉਪਨਿਸ੍ਸਯਂ ਨਾਸੇਯ੍ਯਾ’’ਤਿ ਅਤ੍ਤਾਨਂ ਦਸ੍ਸੇਤ੍ਵਾ ਓਭਾਸਂ ਵਿਸ੍ਸਜ੍ਜੇਨ੍ਤੋ –

‘‘ਪਾਮੋਜ੍ਜਬਹੁਲੋ ਭਿਕ੍ਖੁ, ਪਸਨ੍ਨੋ ਬੁਦ੍ਧਸਾਸਨੇ;

ਅਧਿਗਚ੍ਛੇ ਪਦਂ ਸਨ੍ਤਂ, ਸਙ੍ਖਾਰੂਪਸਮਂ ਸੁਖ’’ਨ੍ਤਿ. (ਧ. ਪ. ੩੮੧) –

ਗਾਥਂ ਵਤ੍ਵਾ ‘‘ਏਹਿ, ਵਕ੍ਕਲੀ’’ਤਿ (ਧ. ਪ. ਅਟ੍ਠ. ੨.੩੮੧) ਹਤ੍ਥਂ ਪਸਾਰੇਸਿ. ਥੇਰੋ ‘‘ਦਸਬਲੋ ਮੇ ਦਿਟ੍ਠੋ, ‘ਏਹੀ’ਤਿ ਅਵ੍ਹਾਯਨਮ੍ਪਿ ਲਦ੍ਧ’’ਨ੍ਤਿ ਬਲਵਪੀਤਿਸੋਮਨਸ੍ਸਂ ਉਪ੍ਪਾਦੇਤ੍ਵਾ ‘‘ਕੁਤੋ ਗਚ੍ਛਾਮੀ’’ਤਿ ਅਤ੍ਤਨੋ ਗਮਨਭਾਵਂ ਅਜਾਨਿਤ੍ਵਾਵ ਸਤ੍ਥੁ ਸਮ੍ਮੁਖੇ ਆਕਾਸੇ ਪਕ੍ਖਨ੍ਦਿਤ੍ਵਾ ਪਠਮੇਨ ਪਾਦੇਨ ਪਬ੍ਬਤੇ ਠਿਤੋਯੇਵ ਸਤ੍ਥਾਰਾ ਵੁਤ੍ਤਗਾਥਾਯੋ ਆਵਜ੍ਜੇਨ੍ਤੋ ਆਕਾਸੇਯੇਵ ਪੀਤਿਂ ਵਿਕ੍ਖਮ੍ਭੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣੀਤਿ ਅਙ੍ਗੁਤ੍ਤਰਟ੍ਠਕਥਾਯਂ (ਅ. ਨਿ. ਅਟ੍ਠ. ੧.੧.੨੦੮) ਧਮ੍ਮਪਦਵਣ੍ਣਨਾਯਞ੍ਚ (ਧ. ਪ. ਅਟ੍ਠ. ੨.੩੮੧ ਵਕ੍ਕਲਿਤ੍ਥੇਰਵਤ੍ਥੁ) ਆਗਤਂ.

ਇਧ ਪਨ ਏਵਂ ਵੇਦਿਤਬ੍ਬਂ – ‘‘ਕਿਂ ਤੇ, ਵਕ੍ਕਲੀ’’ਤਿਆਦਿਨਾ ਸਤ੍ਥਾਰਾ ਓਵਦਿਤੋ ਗਿਜ੍ਝਕੂਟੇ ਵਿਹਰਨ੍ਤੋ ਵਿਪਸ੍ਸਨਂ ਪਟ੍ਠਪੇਸਿ, ਤਸ੍ਸ ਸਦ੍ਧਾਯ ਬਲਵਭਾਵਤੋ ਏਵ ਵਿਪਸ੍ਸਨਾ ਵੀਥਿਂ ਨ ਓਤਰਤਿ? ਭਗਵਾ ਤਂ ਞਤ੍ਵਾ ਕਮ੍ਮਟ੍ਠਾਨਂ ਸੋਧੇਤ੍ਵਾ ਅਦਾਸਿ. ਸੋ ਪੁਨ ਵਿਪਸ੍ਸਨਂ ਮਤ੍ਥਕਂ ਪਾਪੇਤੁਂ ਨਾਸਕ੍ਖਿਯੇਵ. ਅਥਸ੍ਸ ਆਹਾਰਵੇਕਲ੍ਲੇਨ ਵਾਤਾਬਾਧੋ ਉਪ੍ਪਜ੍ਜਿ, ਤਂ ਵਾਤਾਬਾਧੇਨ ਪੀਲ਼ਿਯਮਾਨਂ ਞਤ੍ਵਾ ਭਗਵਾ ਤਤ੍ਥ ਗਨ੍ਤ੍ਵਾ ਪੁਚ੍ਛਨ੍ਤੋ –

‘‘ਵਾਤਰੋਗਾਭਿਨੀਤੋ ਤ੍ਵਂ, ਵਿਹਰਂ ਕਾਨਨੇ ਵਨੇ;

ਪਵਿਦ੍ਧਗੋਚਰੇ ਲੂਖੇ, ਕਥਂ ਭਿਕ੍ਖੁ ਕਰਿਸ੍ਸਸੀ’’ਤਿ. (ਥੇਰਗਾ. ੩੫੦) –

ਆਹ. ਤਂ ਸੁਤ੍ਵਾ ਥੇਰੋ –

‘‘ਪੀਤਿਸੁਖੇਨ ਵਿਪੁਲੇਨ, ਫਰਮਾਨੋ ਸਮੁਸ੍ਸਯਂ;

ਲੂਖਮ੍ਪਿ ਅਭਿਸਮ੍ਭੋਨ੍ਤੋ, ਵਿਹਰਿਸ੍ਸਾਮਿ ਕਾਨਨੇ.

‘‘ਭਾਵੇਨ੍ਤੋ ਸਤਿਪਟ੍ਠਾਨੇ, ਇਨ੍ਦ੍ਰਿਯਾਨਿ ਬਲਾਨਿ ਚ;

ਬੋਜ੍ਝਙ੍ਗਾਨਿ ਚ ਭਾਵੇਨ੍ਤੋ, ਵਿਹਰਿਸ੍ਸਾਮਿ ਕਾਨਨੇ.

‘‘ਆਰਦ੍ਧਵੀਰਿਯੇ ਪਹਿਤਤ੍ਤੇ, ਨਿਚ੍ਚਂ ਦਲ਼੍ਹਪਰਕ੍ਕਮੇ;

ਸਮਗ੍ਗੇ ਸਹਿਤੇ ਦਿਸ੍ਵਾ, ਵਿਹਰਿਸ੍ਸਾਮਿ ਕਾਨਨੇ.

‘‘ਅਨੁਸ੍ਸਰਨ੍ਤੋ ਸਮ੍ਬੁਦ੍ਧਂ, ਅਗ੍ਗਂ ਦਨ੍ਤਂ ਸਮਾਹਿਤਂ;

ਅਤਨ੍ਦਿਤੋ ਰਤ੍ਤਿਨ੍ਦਿਵਂ, ਵਿਹਰਿਸ੍ਸਾਮਿ ਕਾਨਨੇ’’ਤਿ. (ਥੇਰਗਾ. ੩੫੧-੩੫੪) –

ਚਤਸ੍ਸੋ ਗਾਥਾਯੋ ਅਭਾਸਿ. ਤਾਸਂ ਅਤ੍ਥੋ ਥੇਰਗਾਥਾਵਣ੍ਣਨਾਯਂ (ਥੇਰਗਾ. ਅਟ੍ਠ. ੨.੩੫੧-੩੫੪) ਵੁਤ੍ਤੋਯੇਵ. ਏਵਂ ਥੇਰੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ.

੨੮. ਸੋ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਇਤੋ ਸਤਸਹਸ੍ਸਮ੍ਹੀਤਿਆਦਿਮਾਹ. ਤਤ੍ਥ ਇਤੋਤਿ ਕਕੁਸਨ੍ਧਾਦੀਨਂ ਉਪ੍ਪਨ੍ਨਭਦ੍ਦਕਪ੍ਪਤੋ ਹੇਟ੍ਠਾ ਕਪ੍ਪਸਤਸਹਸ੍ਸਮਤ੍ਥਕੇਤਿ ਅਤ੍ਥੋ.

੨੯. ਪਦੁਮਾਕਾਰਵਦਨੋਤਿ ਸੁਪੁਪ੍ਫਿਤਪਦੁਮਸਸ੍ਸਿਰੀਕਮੁਖੋ. ਪਦੁਮਪਤ੍ਤਕ੍ਖੋਤਿ ਸੇਤਪਦੁਮਪੁਪ੍ਫਪਣ੍ਣਸਦਿਸਅਕ੍ਖੀਤਿ ਅਤ੍ਥੋ.

੩੦. ਪਦੁਮੁਤ੍ਤਰਗਨ੍ਧੋਵਾਤਿ ਪਦੁਮਗਨ੍ਧਮੁਖੋਤਿ ਅਤ੍ਥੋ.

੩੧. ਅਨ੍ਧਾਨਂ ਨਯਨੂਪਮੋਤਿ ਚਕ੍ਖੁਵਿਰਹਿਤਾਨਂ ਸਤ੍ਤਾਨਂ ਨਯਨਸਦਿਸੋ, ਧਮ੍ਮਦੇਸਨਾਯ ਸਬ੍ਬਸਤ੍ਤਾਨਂ ਪਞ੍ਞਾਚਕ੍ਖਾਦਿਚਕ੍ਖੁਦਾਯਕੋਤਿ ਅਤ੍ਥੋ. ਸਨ੍ਤਵੇਸੋਤਿ ਸਨ੍ਤਸਭਾਵੋ ਸਨ੍ਤਇਰਿਯਾਪਥੋ. ਗੁਣਨਿਧੀਤਿ ਗੁਣਾਨਂ ਨਿਧਿ, ਸਬ੍ਬਗੁਣਗਣਾਨਂ ਨਿਧਾਨਟ੍ਠਾਨਭੂਤੋਤਿ ਅਤ੍ਥੋ. ਕਰੁਣਾਮਤਿਆਕਰੋਤਿ ਸਾਧੂਨਂ ਚਿਤ੍ਤਕਮ੍ਪਨਸਙ੍ਖਾਤਾਯ ਕਰੁਣਾਯ ਚ ਅਤ੍ਥਾਨਤ੍ਥਮਿਨਨਪਰਿਚ੍ਛਿਨ੍ਨਮਤਿਯਾ ਚ ਆਕਰੋ ਆਧਾਰਭੂਤੋ.

੩੨. ਬ੍ਰਹ੍ਮਾਸੁਰਸੁਰਚ੍ਚਿਤੋਤਿ ਬ੍ਰਹ੍ਮੇਹਿ ਚ ਅਸੁਰੇਹਿ ਚ ਦੇਵੇਹਿ ਚ ਅਚ੍ਚਿਤੋ ਪੂਜਿਤੋਤਿ ਅਤ੍ਥੋ.

੩੩. ਮਧੁਰੇਨ ਰੁਤੇਨ ਚਾਤਿ ਕਰਵੀਕਰੁਤਮਧੁਰੇਨ ਸਦ੍ਦੇਨ ਸਕਲਂ ਜਨਂ ਰਞ੍ਜਯਨ੍ਤੀਤਿ ਸਮ੍ਬਨ੍ਧੋ. ਸਨ੍ਥਵੀ ਸਾਵਕਂ ਸਕਨ੍ਤਿ ਅਤ੍ਤਨੋ ਸਾਵਕਂ ਮਧੁਰਧਮ੍ਮਦੇਸਨਾਯ ਸਨ੍ਥਵੀ, ਥੁਤਿਂ ਅਕਾਸੀਤਿ ਅਤ੍ਥੋ.

੩੪. ਸਦ੍ਧਾਧਿਮੁਤ੍ਤੋਤਿ ਸਦ੍ਦਹਨਸਦ੍ਧਾਯ ਸਾਸਨੇ ਅਧਿਮੁਤ੍ਤੋ ਪਤਿਟ੍ਠਿਤੋਤਿ ਅਤ੍ਥੋ. ਮਮ ਦਸ੍ਸਨਲਾਲਸੋਤਿ ਮਯ੍ਹਂ ਦਸ੍ਸਨੇ ਬ੍ਯਾਵਟੋ ਤਪ੍ਪਰੋ.

੩੫. ਤਂ ਠਾਨਮਭਿਰੋਚਯਿਨ੍ਤਿ ਤਂ ਸਦ੍ਧਾਧਿਮੁਤ੍ਤਟ੍ਠਾਨਨ੍ਤਰਂ ਅਭਿਰੋਚਯਿਂ, ਇਚ੍ਛਿਂ ਪਤ੍ਥੇਸਿਨ੍ਤਿ ਅਤ੍ਥੋ.

੪੦. ਪੀਤਮਟ੍ਠਨਿਵਾਸਨਨ੍ਤਿ ਸਿਲਿਟ੍ਠਸੁਵਣ੍ਣਵਣ੍ਣਵਤ੍ਥੇ ਨਿਵਤ੍ਥਨ੍ਤਿ ਅਤ੍ਥੋ. ਹੇਮਯਞ੍ਞੋਪਚਿਤਙ੍ਗਨ੍ਤਿ ਸੁਵਣ੍ਣਪਾਮਙ੍ਗਲਗ੍ਗਿਤਗਤ੍ਤਨ੍ਤਿ ਅਤ੍ਥੋ.

੪੭-੪੮. ਨੋਨੀਤਸੁਖੁਮਾਲਂ ਮਨ੍ਤਿ ਨਵਨੀਤਮਿਵ ਮੁਦੁਤਲੁਣਹਤ੍ਥਪਾਦਂ. ਜਾਤਪਲ੍ਲਵਕੋਮਲਨ੍ਤਿ ਅਸੋਕਪਲ੍ਲਵਪਤ੍ਤਕੋਮਲਮਿਵ ਮੁਦੁਕਨ੍ਤਿ ਅਤ੍ਥੋ. ਪਿਸਾਚੀਭਯਤਜ੍ਜਿਤਾਤਿ ਤਦਾ ਏਵਂਭੂਤਂ ਕੁਮਾਰਂ ਮਂ ਅਞ੍ਞਾ ਪਿਸਾਚੀ ਏਕਾ ਰਕ੍ਖਸੀ ਭਯੇਨ ਤਜ੍ਜੇਸਿ ਭਿਂਸਾਪੇਸੀਤਿ ਅਤ੍ਥੋ. ਤਦਾ ਮਹੇਸਿਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਪਾਦਮੂਲੇ ਮਂ ਸਾਯੇਸੁਂ ਨਿਪਜ੍ਜਾਪੇਸੁਂ. ਦੀਨਮਾਨਸਾ ਭੀਤਚਿਤ੍ਤਾ ਮਮ ਮਾਤਾਪਿਤਰੋ ਇਮਂ ਦਾਰਕਂ ਤੇ ਦਦਾਮ, ਇਮਸ੍ਸ ਸਰਣਂ ਪਤਿਟ੍ਠਾ ਹੋਤੁ ਨਾਥ ਨਾਯਕਾਤਿ ਸਮ੍ਬਨ੍ਧੋ.

੪੯. ਤਦਾ ਪਟਿਗ੍ਗਹਿ ਸੋ ਮਨ੍ਤਿ ਸੋ ਭਗਵਾ ਤਦਾ ਤਸ੍ਮਿਂ ਮਮ ਮਾਤੁਯਾ ਦਿਨ੍ਨਕਾਲੇ ਜਾਲਿਨਾ ਜਾਲਯੁਤ੍ਤੇਨ ਸਙ੍ਖਾਲਕੇਨ ਚਕ੍ਕਲਕ੍ਖਣਾਦੀਹਿ ਲਕ੍ਖਿਤੇਨ ਮੁਦੁਕੋਮਲਪਾਣਿਨਾ ਮੁਦੁਕੇਨ ਵਿਸੁਦ੍ਧੇਨ ਹਤ੍ਥਤਲੇਨ ਮਂ ਅਗ੍ਗਹੇਸੀਤਿ ਅਤ੍ਥੋ.

੫੨. ਸਬ੍ਬਪਾਰਮਿਸਮ੍ਭੂਤਨ੍ਤਿ ਸਬ੍ਬੇਹਿ ਦਾਨਪਾਰਮਿਤਾਦੀਹਿ ਸਮ੍ਭੂਤਂ ਜਾਤਂ. ਨੀਲਕ੍ਖਿਨਯਨਂ ਵਰਂ ਪੁਞ੍ਞਸਮ੍ਭਾਰਜਂ ਉਤ੍ਤਮਨੀਲਅਕ੍ਖਿਵਨ੍ਤਂ. ਸਬ੍ਬਸੁਭਾਕਿਣ੍ਣਂ ਸਬ੍ਬੇਨ ਸੁਭੇਨ ਵਣ੍ਣੇਨ ਸਣ੍ਠਾਨੇਨ ਆਕਿਣ੍ਣਂ ਗਹਨੀਭੂਤਂ ਰੂਪਂ ਭਗਵਤੋ ਹਤ੍ਥਪਾਦਸੀਸਾਦਿਰੂਪਂ ਦਿਸ੍ਵਾਤਿ ਅਤ੍ਥੋ, ਤਿਤ੍ਤਿਂ ਅਪਤ੍ਤੋ ਵਿਹਰਾਮਿ ਅਹਨ੍ਤਿ ਸਮ੍ਬਨ੍ਧੋ.

੬੧. ਤਦਾ ਮਂ ਚਰਣਨ੍ਤਗੋਤਿ ਤਸ੍ਮਿਂ ਮਯ੍ਹਂ ਅਰਹਤ੍ਤਂ ਪਤ੍ਤਕਾਲੇ ਸੀਲਾਦਿਪਨ੍ਨਰਸਨ੍ਨਂ ਚਰਣਧਮ੍ਮਾਨਂ ਅਨ੍ਤਗੋ, ਪਰਿਯੋਸਾਨਪ੍ਪਤ੍ਤੋ ਪਰਿਪੂਰਕਾਰੀਤਿ ਅਤ੍ਥੋ. ‘‘ਮਰਣਨ੍ਤਗੋ’’ਤਿਪਿ ਪਾਠੋ. ਤਸ੍ਸ ਮਰਣਸ੍ਸ ਅਨ੍ਤਂ ਨਿਬ੍ਬਾਨਂ ਪਤ੍ਤੋਤਿ ਅਤ੍ਥੋ. ਸਦ੍ਧਾਧਿਮੁਤ੍ਤਾਨਂ ਅਗ੍ਗਂ ਪਞ੍ਞਪੇਸੀਤਿ ਸਮ੍ਬਨ੍ਧੋ. ਅਥ ਸਤ੍ਥਾ ਭਿਕ੍ਖੁਸਙ੍ਘਮਜ੍ਝੇ ਨਿਸਿਨ੍ਨੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਸਦ੍ਧਾਧਿਮੁਤ੍ਤਾਨਂ ਯਦਿਦਂ, ਵਕ੍ਕਲੀ’’ਤਿ (ਅ. ਨਿ. ੧.੧੯੮, ੨੦੮) ਮਂ ਏਤਦਗ੍ਗਟ੍ਠਾਨੇ ਠਪੇਸੀਤਿ ਵੁਤ੍ਤਂ ਹੋਤਿ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਵਕ੍ਕਲਿਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਮਹਾਕਪ੍ਪਿਨਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਕਪ੍ਪਿਨਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਦੇਸਨਂ ਸੁਣਨ੍ਤੋ ਸਤ੍ਥਾਰਾ ਏਕਂ ਭਿਕ੍ਖੁਂ ਓਵਾਦਕਾਨਂ ਅਗ੍ਗਟ੍ਠਾਨੇ ਠਪਿਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ.

ਸੋ ਤਤ੍ਥ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਬਾਰਾਣਸਿਤੋ ਅਵਿਦੂਰੇ ਏਕਸ੍ਮਿਂ ਪੇਸਕਾਰਗਾਮੇ ਜੇਟ੍ਠਪੇਸਕਾਰਗੇਹੇ ਨਿਬ੍ਬਤ੍ਤੋ ਤਦਾ ਸਹਸ੍ਸਮਤ੍ਤਾ ਪਚ੍ਚੇਕਬੁਦ੍ਧਾ ਹਿਮਵਨ੍ਤੇ ਅਟ੍ਠ ਮਾਸੇ ਵਸਿਤ੍ਵਾ ਵਸ੍ਸਿਕੇ ਚਤ੍ਤਾਰੋ ਮਾਸੇ ਜਨਪਦੇ ਵਸਨ੍ਤਿ. ਤੇ ਏਕਵਾਰਂ ਬਾਰਾਣਸਿਯਾ ਅਵਿਦੂਰੇ ਓਤਰਿਤ੍ਵਾ ‘‘ਸੇਨਾਸਨਂ ਕਰਣਤ੍ਥਾਯ ਹਤ੍ਥਕਮ੍ਮਂ ਯਾਚਥਾ’’ਤਿ ਰਞ੍ਞੋ ਸਨ੍ਤਿਕਂ ਅਟ੍ਠ ਪਚ੍ਚੇਕਬੁਦ੍ਧੇ ਪਹਿਣਿਂਸੁ. ਤਦਾ ਪਨ ਰਞ੍ਞੋ ਵਪ੍ਪਮਙ੍ਗਲਂ ਅਹੋਸਿ. ਸੋ ‘‘ਪਚ੍ਚੇਕਬੁਦ੍ਧਾ ਕਿਰ ਆਗਤਾ’’ਤਿ ਸੁਤ੍ਵਾ ਨਿਕ੍ਖਮਿਤ੍ਵਾ ਆਗਤਕਾਰਣਂ ਪੁਚ੍ਛਿਤ੍ਵਾ ‘‘ਅਜ੍ਜ, ਭਨ੍ਤੇ, ਓਕਾਸੋ ਨਤ੍ਥਿ ਸ੍ਵੇ ਅਮ੍ਹਾਕਂ ਵਪ੍ਪਮਙ੍ਗਲਂ, ਤਤਿਯਦਿਵਸੇ ਕਰਿਸ੍ਸਾਮਾ’’ਤਿ ਵਤ੍ਵਾ ਪਚ੍ਚੇਕਬੁਦ੍ਧੇ ਅਨਿਮਨ੍ਤੇਤ੍ਵਾਵ ਪਾਵਿਸਿ. ਪਚ੍ਚੇਕਬੁਦ੍ਧਾ ‘‘ਅਞ੍ਞਂ ਗਾਮਂ ਪਵਿਸਿਸ੍ਸਾਮਾ’’ਤਿ ਪਕ੍ਕਮਿਂਸੁ.

ਤਸ੍ਮਿਂ ਸਮਯੇ ਜੇਟ੍ਠਪੇਸਕਾਰਸ੍ਸ ਭਰਿਯਾ ਕੇਨਚਿਦੇਵ ਕਰਣੀਯੇਨ ਬਾਰਾਣਸਿਂ ਗਚ੍ਛਨ੍ਤੀ ਤੇ ਪਚ੍ਚੇਕਬੁਦ੍ਧੇ ਦਿਸ੍ਵਾ ਵਨ੍ਦਿਤ੍ਵਾ, ‘‘ਕਿਂ, ਭਨ੍ਤੇ, ਅਵੇਲਾਯ ਅਯ੍ਯਾ ਆਗਤਾ’’ਤਿ ਪੁਚ੍ਛਿ. ਤੇ ਆਦਿਤੋ ਪਟ੍ਠਾਯ ਕਥੇਸੁਂ. ਤਂ ਸੁਤ੍ਵਾ ਸਦ੍ਧਾਸਮ੍ਪਨ੍ਨਾ ਬੁਦ੍ਧਿਸਮ੍ਪਨ੍ਨਾ ਇਤ੍ਥੀ ‘‘ਸ੍ਵੇ, ਭਨ੍ਤੇ, ਅਮ੍ਹਾਕਂ ਭਿਕ੍ਖਂ ਗਣ੍ਹਥਾ’’ਤਿ ਨਿਮਨ੍ਤੇਸਿ. ‘‘ਬਹੁਕਾ ਮਯਂ, ਭਗਿਨੀ’’ਤਿ. ‘‘ਕਿਤ੍ਤਕਾ, ਭਨ੍ਤੇ’’ਤਿ? ‘‘ਸਹਸ੍ਸਮਤ੍ਤਾ, ਭਗਿਨੀ’’ਤਿ. ‘‘ਭਨ੍ਤੇ, ਇਮਸ੍ਮਿਂ ਨੋ ਗਾਮੇ ਸਹਸ੍ਸਮਤ੍ਤਾ ਵਸਿਮ੍ਹਾ, ਏਕੇਕੋ ਏਕੇਕਸ੍ਸ ਭਿਕ੍ਖਂ ਦਸ੍ਸਤਿ, ਭਿਕ੍ਖਂ ਅਧਿਵਾਸੇਥ, ਅਹਮੇਵ ਵੋ ਵਸਨਟ੍ਠਾਨਂ ਕਾਰਾਪੇਸ੍ਸਾਮੀ’’ਤਿ ਆਹ. ਪਚ੍ਚੇਕਬੁਦ੍ਧਾ ਅਧਿਵਾਸੇਸੁਂ.

ਸਾ ਗਾਮਂ ਪਵਿਸਿਤ੍ਵਾ ਉਗ੍ਘੋਸੇਸਿ – ‘‘ਅਮ੍ਮਤਾਤਾ, ਅਹਂ ਸਹਸ੍ਸਮਤ੍ਤੇ ਪਚ੍ਚੇਕਬੁਦ੍ਧੇ ਦਿਸ੍ਵਾ ਨਿਮਨ੍ਤੇਸਿਂ, ਅਯ੍ਯਾਨਂ ਨਿਸੀਦਨਟ੍ਠਾਨਂ ਸਂਵਿਦਹਥ, ਯਾਗੁਭਤ੍ਤਾਦੀਨਿ ਸਮ੍ਪਾਦੇਥਾ’’ਤਿ ਗਾਮਮਜ੍ਝੇ ਮਣ੍ਡਪਂ ਕਾਰਾਪੇਤ੍ਵਾ ਆਸਨਾਨਿ ਪਞ੍ਞਾਪੇਤ੍ਵਾ ਪੁਨਦਿਵਸੇ ਪਚ੍ਚੇਕਬੁਦ੍ਧੇ ਨਿਸੀਦਾਪੇਤ੍ਵਾ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਪਰਿਵਿਸਿਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਤਸ੍ਮਿਂ ਗਾਮੇ ਸਬ੍ਬਾ ਇਤ੍ਥਿਯੋ ਆਦਾਯ ਤਾਹਿ ਸਦ੍ਧਿਂ ਪਚ੍ਚੇਕਬੁਦ੍ਧੇ ਵਨ੍ਦਿਤ੍ਵਾ ਤੇਮਾਸਂ ਵਸਨਤ੍ਥਾਯ ਪਟਿਞ੍ਞਂ ਗਣ੍ਹਿਤ੍ਵਾ ਪੁਨ ਗਾਮੇ ਉਗ੍ਘੋਸੇਸਿ – ‘‘ਅਮ੍ਮਤਾਤਾ, ਏਕੇਕਕੁਲਤੋ ਏਕੇਕਪੁਰਿਸੋ ਵਾਸਿਫਰਸੁਆਦੀਨਿ ਗਹੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਦਬ੍ਬਸਮ੍ਭਾਰੇ ਆਹਰਿਤ੍ਵਾ ਅਯ੍ਯਾਨਂ ਵਸਨਟ੍ਠਾਨਂ ਕਰੋਤੂ’’ਤਿ. ਗਾਮਵਾਸਿਨੋ ਤਸ੍ਸਾਯੇਵ ਵਚਨਂ ਸੁਤ੍ਵਾ ਏਕੇਕੋ ਏਕੇਕਂ ਕਤ੍ਵਾ ਸਦ੍ਧਿਂ ਰਤ੍ਤਿਦਿਵਾਟ੍ਠਾਨੇਹਿ ਪਣ੍ਣਸਾਲਸਹਸ੍ਸਂ ਨਿਟ੍ਠਾਪੇਤ੍ਵਾ ਅਤ੍ਤਨੋ ਅਤ੍ਤਨੋ ਪਣ੍ਣਸਾਲਾਯਂ ਉਪਗਤਂ ਪਚ੍ਚੇਕਬੁਦ੍ਧਂ ‘‘ਅਹਂ ਸਕ੍ਕਚ੍ਚਂ ਉਪਟ੍ਠਹਿਸ੍ਸਾਮਿ, ਅਹਂ ਸਕ੍ਕਚ੍ਚਂ ਉਪਟ੍ਠਹਿਸ੍ਸਾਮੀ’’ਤਿ ਵਤ੍ਵਾ ਉਪਟ੍ਠਹਿਂਸੁ. ਸਾ ਵਸ੍ਸਂਵੁਟ੍ਠਕਾਲੇ ‘‘ਅਤ੍ਤਨੋ ਅਤ੍ਤਨੋ ਪਣ੍ਣਸਾਲਾਯ ਵਸ੍ਸਂਵੁਟ੍ਠਾਨਂ ਪਚ੍ਚੇਕਬੁਦ੍ਧਾਨਂ ਚੀਵਰਸਾਟਕੇ ਸਜ੍ਜੇਥਾ’’ਤਿ ਸਮਾਦਪੇਤ੍ਵਾ ਏਕੇਕਸ੍ਸ ਸਹਸ੍ਸ ਸਹਸ੍ਸਮੂਲਂ ਚੀਵਰਂ ਦਾਪੇਸਿ. ਪਚ੍ਚੇਕਬੁਦ੍ਧਾ ਵੁਟ੍ਠਵਸ੍ਸਾ ਅਨੁਮੋਦਨਂ ਕਤ੍ਵਾ ਪਕ੍ਕਮਿਂਸੁ. ਗਾਮਵਾਸਿਨੋਪਿ ਇਦਂ ਪੁਞ੍ਞਕਮ੍ਮਂ ਕਤ੍ਵਾ ਤਤੋ ਚੁਤੋ ਤਾਵਤਿਂਸਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਗਣਦੇਵਤਾ ਨਾਮ ਅਹੇਸੁਂ.

ਤੇ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਕੁਟੁਮ੍ਬਿਕਗੇਹੇਸੁ ਨਿਬ੍ਬਤ੍ਤਿਂਸੁ. ਪੁਬ੍ਬੇ ਜੇਟ੍ਠਕਪੇਸਕਾਰੋ ਜੇਟ੍ਠਕਕੁਟੁਮ੍ਬਿਕਸ੍ਸ ਪੁਤ੍ਤੋ ਅਹੋਸਿ. ਭਰਿਯਾਪਿਸ੍ਸ ਏਕਸ੍ਸ ਜੇਟ੍ਠਕਕੁਟੁਮ੍ਬਿਕਸ੍ਸ ਧੀਤਾ ਅਹੋਸਿ. ਸੇਸਾਨਂ ਭਰਿਯਾਯੋ ਸੇਸਕੁਟੁਮ੍ਬਿਕਾਨਂ ਧੀਤਰੋ ਅਹੇਸੁਂ, ਤਾ ਸਬ੍ਬਾਪਿ ਵਯਪ੍ਪਤ੍ਤਾ ਪਰਕੁਲਂ ਗਚ੍ਛਨ੍ਤਿਯੋ ਤੇਸਂ ਤੇਸਂਯੇਵ ਗੇਹਾਨਿ ਅਗਮਂਸੁ. ਅਥੇਕਦਿਵਸਂ ਵਿਹਾਰੇ ਧਮ੍ਮਸ੍ਸਵਨੇ ਸਙ੍ਘੁਟ੍ਠੇ ‘‘ਸਤ੍ਥਾ ਧਮ੍ਮਂ ਦੇਸੇਸ੍ਸਤੀ’’ਤਿ ਸੁਤ੍ਵਾ ਤੇ ਸਬ੍ਬੇਪਿ ਕੁਟੁਮ੍ਬਿਕਾ ‘‘ਧਮ੍ਮਂ ਸੋਸ੍ਸਾਮਾ’’ਤਿ ਭਰਿਯਾਹਿ ਸਦ੍ਧਿਂ ਵਿਹਾਰਂ ਅਗਮਂਸੁ. ਤੇਸਂ ਵਿਹਾਰਮਜ੍ਝਂ ਪਵਿਟ੍ਠਕ੍ਖਣੇ ਵਸ੍ਸਂ ਵਸ੍ਸਿ. ਯੇਸਂ ਕੁਲੂਪਕਾ ਵਾ ਞਾਤਿਸਾਮਣੇਰਾਦਯੋ ਵਾ ਅਤ੍ਥਿ, ਤੇ ਤੇਸਂ ਪਰਿਵੇਣਾਦੀਨਿ ਪਵਿਸਿਂਸੁ. ਤੇ ਪਨ ਤਥਾਰੂਪਾਨਂ ਨਤ੍ਥਿਤਾਯ ਕਤ੍ਥਚਿ ਪਵਿਸਿਤੁਂ ਅਵਿਸਹਨ੍ਤਾ ਵਿਹਾਰਮਜ੍ਝੇਯੇਵ ਅਟ੍ਠਂਸੁ. ਅਥ ਨੇ ਜੇਟ੍ਠਕਕੁਟੁਮ੍ਬਿਕੋ ਆਹ – ‘‘ਪਸ੍ਸਥ, ਭੋ, ਅਮ੍ਹਾਕਂ ਵਿਪ੍ਪਕਾਰਂ, ਕੁਲਪੁਤ੍ਤੇਹਿ ਨਾਮ ਏਤ੍ਤਕੇਨ ਲਜ੍ਜਿਤੁਂ ਯੁਤ੍ਤ’’ਨ੍ਤਿ. ‘‘ਅਯ੍ਯ, ਕਿਂ ਕਰੋਮਾ’’ਤਿ? ‘‘ਮਯਂ ਵਿਸ੍ਸਾਸਿਕਟ੍ਠਾਨਸ੍ਸ ਅਭਾਵੇਨ ਇਮਂ ਵਿਪ੍ਪਕਾਰਂ ਪਤ੍ਤਾ, ਸਬ੍ਬੇ ਧਨਂ ਸਂਹਰਿਤ੍ਵਾ ਪਰਿਵੇਣਂ ਕਰਿਸ੍ਸਾਮਾ’’ਤਿ. ‘‘ਸਾਧੁ, ਅਯ੍ਯਾ’’ਤਿ ਜੇਟ੍ਠਕੋ ਸਹਸ੍ਸਂ ਅਦਾਸਿ. ਸੇਸਾ ਪਞ੍ਚ ਪਞ੍ਚ ਸਤਾਨਿ. ਇਤ੍ਥਿਯੋ ਅਡ੍ਢਤੇਯ੍ਯਾਨਿ ਅਡ੍ਢਤੇਯ੍ਯਾਨਿ ਸਤਾਨਿ. ਤੇ ਤਂ ਧਨਂ ਆਹਰਿਤ੍ਵਾ ਸਹਸ੍ਸਕੂਟਾਗਾਰਪਰਿਵਾਰਂ ਸਤ੍ਥੁ ਵਸਨਤ੍ਥਾਯ ਮਹਾਪਰਿਵੇਣਂ ਨਾਮ ਕਾਰਾਪੇਸੁਂ. ਨਵਕਮ੍ਮਸ੍ਸ ਮਹਨ੍ਤਤਾਯ ਧਨੇ ਅਪ੍ਪਹੋਨ੍ਤੇ ਪੁਬ੍ਬੇ ਦਿਨ੍ਨਧਨਤੋ ਪੁਨ ਉਪਡ੍ਢੂਪਡ੍ਢਂ ਅਦਂਸੁ. ਨਿਟ੍ਠਿਤੇ ਪਰਿਵੇਣੇ ਵਿਹਾਰਮਹਂ ਕਰੋਨ੍ਤਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਵੀਸਤਿਯਾ ਭਿਕ੍ਖੁਸਹਸ੍ਸਾਨਂ ਚੀਵਰਾਨਿ ਸਜ੍ਜਯਿਂਸੁ.

ਜੇਟ੍ਠਕਕੁਟੁਮ੍ਬਿਕਸ੍ਸ ਪਨ ਭਰਿਯਾ ਅਤ੍ਤਨੋ ਪਞ੍ਞਾਯ ਠਿਤਾ ਅਹਂ ਤੇਹਿ ਸਮਕਂ ਅਕਤ੍ਵਾ ਅਤਿਰੇਕਤਰਂ ਕਤ੍ਵਾ ‘‘ਸਤ੍ਥਾਰਂ ਪੂਜੇਸ੍ਸਾਮੀ’’ਤਿ ਅਨੋਜਪੁਪ੍ਫਵਣ੍ਣੇਨ ਸਹਸ੍ਸਮੂਲੇਨ ਸਾਟਕੇਨ ਸਦ੍ਧਿਂ ਅਨੋਜਪੁਪ੍ਫਚਙ੍ਕੋਟਕਂ ਗਹੇਤ੍ਵਾ ਸਤ੍ਥਾਰਂ ਅਨੋਜਪੁਪ੍ਫੇਹਿ ਪੂਜੇਤ੍ਵਾ ਤਂ ਸਾਟਕਂ ਸਤ੍ਥੁ ਪਾਦਮੂਲੇ ਠਪੇਤ੍ਵਾ, ‘‘ਭਨ੍ਤੇ, ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਅਨੋਜਪੁਪ੍ਫਵਣ੍ਣਂਯੇਵ ਮੇ ਸਰੀਰਂ ਹੋਤੁ, ਅਨੋਜਾਤ੍ਵੇਵ ਚ ਨਾਮਂ ਹੋਤੂ’’ਤਿ ਪਤ੍ਥਨਂ ਅਕਾਸਿ. ਸਤ੍ਥਾ ‘‘ਏਵਂ ਹੋਤੂ’’ਤਿ ਅਨੁਮੋਦਨਂ ਅਕਾਸਿ. ਤੇ ਸਬ੍ਬੇਪਿ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤਾ ਦੇਵਲੋਕੇ ਨਿਬ੍ਬਤ੍ਤਿਂਸੁ. ਤੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਦੇਵਲੋਕਾ ਚਵਿਤ੍ਵਾ ਜੇਟ੍ਠਕੋ ਕੁਕ੍ਕੁਟਵਤੀਨਗਰੇ ਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਮਹਾਕਪ੍ਪਿਨਰਾਜਾ ਨਾਮ ਅਹੋਸਿ. ਸੇਸਾ ਅਮਚ੍ਚਕੁਲੇਸੁ ਨਿਬ੍ਬਤ੍ਤਿਂਸੁ. ਜੇਟ੍ਠਕਸ੍ਸ ਭਰਿਯਾ ਮਦ੍ਦਰਟ੍ਠੇ ਸਾਕਲਨਗਰੇ ਰਾਜਕੁਲੇ ਨਿਬ੍ਬਤ੍ਤਿ ਅਨੋਜਪੁਪ੍ਫਵਣ੍ਣਮੇਵਸ੍ਸਾ ਸਰੀਰਂ ਅਹੋਸਿ, ਤੇਨ ਅਨੋਜਾਤ੍ਵੇਵਸ੍ਸਾ ਨਾਮਂ ਅਕਂਸੁ, ਸਾ ਵਯਪ੍ਪਤ੍ਤਾ ਮਹਾਕਪ੍ਪਿਨਰਞ੍ਞੋ ਗੇਹਂ ਗਨ੍ਤ੍ਵਾ ਅਨੋਜਾਦੇਵੀਤਿ ਪਾਕਟਾ ਅਹੋਸਿ.

ਸੇਸਿਤ੍ਥਿਯੋਪਿ ਅਮਚ੍ਚਕੁਲੇਸੁ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਤੇਸਂਯੇਵ ਅਮਚ੍ਚਪੁਤ੍ਤਾਨਂ ਗੇਹਾਨਿ ਅਗਮਂਸੁ. ਤੇ ਸਬ੍ਬੇਪਿ ਰਞ੍ਞੋ ਸਮ੍ਪਤ੍ਤਿਸਦਿਸਂ ਸਮ੍ਪਤ੍ਤਿਂ ਅਨੁਭਵਿਂਸੁ. ਯਦਾ ਹਿ ਰਾਜਾ ਅਲਙ੍ਕਾਰਪਟਿਮਣ੍ਡਿਤੋ ਹਤ੍ਥਿਂ ਅਭਿਰੁਹਿਤ੍ਵਾ ਵਿਚਰਤਿ, ਤਦਾਪਿ ਤੇ ਤਥੇਵ ਵਿਚਰਨ੍ਤਿ. ਤਸ੍ਮਿਂ ਅਸ੍ਸੇਨ ਵਾ ਰਥੇਨ ਵਾ ਵਿਚਰਨ੍ਤੇ ਤੇਪਿ ਤਥੇਵ ਵਿਚਰਨ੍ਤਿ. ਏਵਂ ਤੇ ਏਕਤੋ ਹੁਤ੍ਵਾ ਕਤਾਨਂ ਪੁਞ੍ਞਾਨਂ ਬਲੇਨ ਏਕਤੋਵ ਸਮ੍ਪਤ੍ਤਿਂ ਅਨੁਭਵਿਂਸੁ. ਰਞ੍ਞੋ ਪਨ ਵਾਲੋ, ਵਾਲਵਾਹਨੋ, ਪੁਪ੍ਫੋ, ਪੁਪ੍ਫਵਾਹਨੋ, ਸੁਪਤ੍ਤੋਤਿ ਪਞ੍ਚੇਵ ਅਸ੍ਸਾ ਹੋਨ੍ਤਿ. ਤੇਸੁ ਰਾਜਾ ਸੁਪਤ੍ਤਂ ਅਸ੍ਸਂ ਸਯਂ ਆਰੋਹਤਿ, ਇਤਰੇ ਚਤ੍ਤਾਰੋ ਅਸ੍ਸੇ ਅਸ੍ਸਾਰੋਹਾਨਂ ਸਾਸਨਾਹਰਣਤ੍ਥਾਯ ਅਦਾਸਿ. ਰਾਜਾ ਤੇ ਪਾਤੋਵ ਭੋਜੇਤ੍ਵਾ ‘‘ਗਚ੍ਛਥ, ਭਣੇ, ਦ੍ਵੇ ਵਾ ਤੀਣਿ ਵਾ ਯੋਜਨਾਨਿ ਆਹਿਣ੍ਡਿਤ੍ਵਾ ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਉਪ੍ਪਨ੍ਨਭਾਵਂ ਸੁਤ੍ਵਾ ਮਯ੍ਹਂ ਸੁਖਸਾਸਨਂ ਆਰੋਚੇਥਾ’’ਤਿ ਪੇਸੇਸਿ. ਤੇ ਚਤੂਹਿ ਦ੍ਵਾਰੇਹਿ ਨਿਕ੍ਖਮਿਤ੍ਵਾ ਦ੍ਵੇ ਤੀਣਿ ਯੋਜਨਾਨਿ ਆਹਿਣ੍ਡਿਤ੍ਵਾ ਕਿਞ੍ਚਿ ਸਾਸਨਂ ਅਲਭਿਤ੍ਵਾਵ ਪਚ੍ਚਾਗਮਿਂਸੁ.

ਅਥੇਕਦਿਵਸਂ ਰਾਜਾ ਸੁਪਤ੍ਤਂ ਆਰੁਹਿਤ੍ਵਾ ਅਮਚ੍ਚਸਹਸ੍ਸਪਰਿਵੁਤੋ ਉਯ੍ਯਾਨਂ ਗਚ੍ਛਨ੍ਤੋ ਕਿਲਨ੍ਤਰੂਪੇ ਪਞ੍ਚਸਤਮਤ੍ਤੇ ਵਾਣਿਜਕੇ ਨਗਰਂ ਪਵਿਸਨ੍ਤੇ ਦਿਸ੍ਵਾ ‘‘ਇਮੇ ਅਦ੍ਧਾਨਕਿਲਨ੍ਤਾ, ਅਦ੍ਧੋ ਇਮੇਸਂ ਸਨ੍ਤਿਕਾ ਏਕਂ ਭਦ੍ਦਕਂ ਸਾਸਨਂ ਸੋਸ੍ਸਾਮੀ’’ਤਿ ਤੇ ਪਕ੍ਕੋਸਾਪੇਤ੍ਵਾ ‘‘ਕੁਤੋ ਆਗਤਤ੍ਥਾ’’ਤਿ ਪੁਚ੍ਛਿ. ‘‘ਅਤ੍ਥਿ, ਦੇਵ, ਇਤੋ ਵੀਸਤਿਯੋਜਨਸਤਮਤ੍ਥਕੇ ਸਾਵਤ੍ਥਿ ਨਾਮ ਨਗਰਂ, ਤਤੋ ਆਗਤਮ੍ਹਾ’’ਤਿ. ‘‘ਅਤ੍ਥਿ ਪਨ ਵੋ ਦੇਸੇ ਕਿਞ੍ਚਿ ਸਾਸਨਂ ਉਪ੍ਪਨ੍ਨ’’ਨ੍ਤਿ. ‘‘ਦੇਵ, ਅਞ੍ਞਂ ਕਿਞ੍ਚਿ ਨਤ੍ਥਿ, ਸਮ੍ਮਾਸਮ੍ਬੁਦ੍ਧੋ ਉਪ੍ਪਨ੍ਨੋ’’ਤਿ. ਰਾਜਾ ਤਾਵਦੇਵ ਬਲਵਪੀਤਿਯਾ ਫੁਟ੍ਠਸਰੀਰੋ ਕਿਞ੍ਚਿ ਸਲ੍ਲਕ੍ਖੇਤੁਂ ਅਸਕ੍ਕੋਨ੍ਤੋ ਮੁਹੁਤ੍ਤਂ ਵੀਤਿਨਾਮੇਤ੍ਵਾ ਪਨ, ‘‘ਤਾਤਾ, ਕਿਂ ਵਦੇਥਾ’’ਤਿ ਪੁਚ੍ਛਿ. ‘‘ਬੁਦ੍ਧੋ, ਦੇਵ, ਉਪ੍ਪਨ੍ਨੋ’’ਤਿ. ਰਾਜਾ ਦੁਤਿਯਮ੍ਪਿ ਤਤਿਯਮ੍ਪਿ ਤਥੇਵ ਵੀਤਿਨਾਮੇਤ੍ਵਾ ਚਤੁਤ੍ਥਵਾਰੇ ‘‘ਕਿਂ ਵਦੇਥ, ਤਾਤਾ’’ਤਿ ਪੁਚ੍ਛਿਤ੍ਵਾ ‘‘ਬੁਦ੍ਧੋ ਉਪ੍ਪਨ੍ਨੋ’’ਤਿ ਵੁਤ੍ਤੇ, ‘‘ਤਾਤਾ, ਸੁਖਸਾਸਨਸਵਨਾਯ ਸਤਸਹਸ੍ਸਂ ਵੋ ਦਮ੍ਮੀ’’ਤਿ ਵਤ੍ਵਾ ‘‘ਅਪਰਮ੍ਪਿ ਕਿਞ੍ਚਿ ਸਾਸਨਂ ਅਤ੍ਥਿ, ਤਾਤਾ’’ਤਿ ਪੁਚ੍ਛਿ. ‘‘ਅਤ੍ਥਿ, ਦੇਵ, ਧਮ੍ਮੋ ਉਪ੍ਪਨ੍ਨੋ’’ਤਿ. ਰਾਜਾ ਤਮ੍ਪਿ ਸੁਤ੍ਵਾ ਪੁਰਿਮਨਯੇਨੇਵ ਤਯੋ ਵਾਰੇ ਵੀਤਿਨਾਮੇਤ੍ਵਾ ਚਤੁਤ੍ਥਵਾਰੇ ‘‘ਧਮ੍ਮੋ ਉਪ੍ਪਨ੍ਨੋ’’ਤਿ ਵੁਤ੍ਤੇ – ‘‘ਇਧਾਪਿ ਵੋ ਸਤਸਹਸ੍ਸਂ ਦਮ੍ਮੀ’’ਤਿ ਵਤ੍ਵਾ ‘‘ਅਪਰਮ੍ਪਿ ਕਿਞ੍ਚਿ ਸਾਸਨਂ ਅਤ੍ਥਿ, ਤਾਤਾ’’ਤਿ ਪੁਚ੍ਛਿ. ‘‘ਅਤ੍ਥਿ, ਦੇਵ, ਸਙ੍ਘੋ ਉਪ੍ਪਨ੍ਨੋ’’ਤਿ. ਰਾਜਾ ਤਮ੍ਪਿ ਸੁਤ੍ਵਾ ਤਥੇਵ ਤਯੋ ਵਾਰੇ ਵੀਤਿਨਾਮੇਤ੍ਵਾ ਚਤੁਤ੍ਥਵਾਰੇ ‘‘ਸਙ੍ਘੋ ਉਪ੍ਪਨ੍ਨੋ’’ਤਿ ਵੁਤ੍ਤੇ – ‘‘ਇਧਾਪਿ ਵੋ ਸਤਸਹਸ੍ਸਂ ਦਮ੍ਮੀ’’ਤਿ ਵਤ੍ਵਾ ਅਮਚ੍ਚਸਹਸ੍ਸਂ ਓਲੋਕੇਤ੍ਵਾ, ‘‘ਤਾਤਾ, ਕਿਂ ਕਰਿਸ੍ਸਾਮਾ’’ਤਿ ਪੁਚ੍ਛਿ. ‘‘ਦੇਵ, ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ? ‘‘ਅਹਂ, ਤਾਤਾ, ‘ਬੁਦ੍ਧੋ ਉਪ੍ਪਨ੍ਨੋ ਧਮ੍ਮੋ ਉਪ੍ਪਨ੍ਨੋ ਸਙ੍ਘੋ ਉਪ੍ਪਨ੍ਨੋ’ਤਿ ਸੁਤ੍ਵਾ ਨ ਪੁਨ ਨਿਵਤ੍ਤਿਸ੍ਸਾਮਿ, ਭਗਵਨ੍ਤਂ ਉਦ੍ਦਿਸ੍ਸ ਗਨ੍ਤ੍ਵਾ ਤਸ੍ਸ ਸਨ੍ਤਿਕੇ ਪਬ੍ਬਜਿਸ੍ਸਾਮੀ’’ਤਿ. ‘‘ਮਯਮ੍ਪਿ, ਦੇਵ, ਤੁਮ੍ਹੇਹਿ ਸਦ੍ਧਿਂ ਪਬ੍ਬਜਿਸ੍ਸਾਮਾ’’ਤਿ. ਰਾਜਾ ਸੁਵਣ੍ਣਪਟ੍ਟੇ ਅਕ੍ਖਰਾਨਿ ਲਿਖਾਪੇਤ੍ਵਾ ਵਾਣਿਜਕਾਨਂ ਦਤ੍ਵਾ ‘‘ਇਮਂ ਅਨੋਜਾਯ ਨਾਮ ਦੇਵਿਯਾ ਦੇਥ, ਸਾ ਤੁਮ੍ਹਾਕਂ ਤੀਣਿ ਸਤਸਹਸ੍ਸਾਨਿ ਦਸ੍ਸਤਿ, ਏਵਞ੍ਚ ਪਨ ਨਂ ਵਦੇਯ੍ਯਾਥ ‘ਰਞ੍ਞਾ ਕਿਰ ਤੇ ਇਸ੍ਸਰਿਯਂ ਵਿਸ੍ਸਟ੍ਠਂ, ਯਥਾਸੁਖਂ ਸਮ੍ਪਤ੍ਤਿਂ ਪਰਿਭੁਞ੍ਜਾਹੀ’ਤਿ, ਸਚੇ ਪਨ ‘ਵੋ ਰਾਜਾ ਕਹ’ਨ੍ਤਿ ਪੁਚ੍ਛਤਿ, ‘ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਸ੍ਸਾਮੀ’ਤਿ ਵਤ੍ਵਾ ਗਤੋਤਿ ਆਰੋਚੇਯ੍ਯਾਥਾ’’ਤਿ ਆਹ. ਅਮਚ੍ਚਾਪਿ ਅਤ੍ਤਨੋ ਅਤ੍ਤਨੋ ਭਰਿਯਾਨਂ ਤਥੇਵ ਸਾਸਨਂ ਪਹਿਣਿਂਸੁ. ਰਾਜਾ ਵਾਣਿਜਕੇ ਉਯ੍ਯੋਜੇਤ੍ਵਾ ਅਸ੍ਸਂ ਅਭਿਰੁਯ੍ਹ ਅਮਚ੍ਚਸਹਸ੍ਸਪਰਿਵੁਤੋ ਤਂਖਣਞ੍ਞੇਵ ਨਿਕ੍ਖਮਿ.

ਸਤ੍ਥਾਪਿ ਤਂਦਿਵਸਂ ਪਚ੍ਚੂਸਕਾਲੇ ਲੋਕਂ ਵੋਲੋਕੇਨ੍ਤੋ ਮਹਾਕਪ੍ਪਿਨਰਾਜਾਨਂ ਸਪਰਿਵਾਰਂ ਦਿਸ੍ਵਾ ‘‘ਅਯਂ ਮਹਾਕਪ੍ਪਿਨੋ ਵਾਣਿਜਕਾਨਂ ਸਨ੍ਤਿਕਾ ਤਿਣ੍ਣਂ ਰਤਨਾਨਂ ਉਪ੍ਪਨ੍ਨਭਾਵਂ ਸੁਤ੍ਵਾ ਤੇਸਂ ਵਚਨਂ ਤੀਹਿ ਸਤਸਹਸ੍ਸੇਹਿ ਪੂਜੇਤ੍ਵਾ ਰਜ੍ਜਂ ਪਹਾਯ ਅਮਚ੍ਚਸਹਸ੍ਸਪਰਿਵੁਤੋ ਮਂ ਉਦ੍ਦਿਸ੍ਸ ਪਬ੍ਬਜਿਤੁਕਾਮੋ ਸ੍ਵੇ ਨਿਕ੍ਖਮਿਸ੍ਸਤਿ, ਸੋ ਸਪਰਿਵਾਰੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਸ੍ਸਤਿ, ਪਚ੍ਚੁਗ੍ਗਮਨਂ ਕਰਿਸ੍ਸਾਮੀ’’ਤਿ ਪੁਨਦਿਵਸੇ ਚਕ੍ਕਵਤ੍ਤੀ ਵਿਯ ਖੁਦ੍ਦਕਗਾਮਭੋਜਕਂ ਰਾਜਾਨਂ ਪਚ੍ਚੁਗ੍ਗਚ੍ਛਨ੍ਤੋ ਸਯਮੇਵ ਪਤ੍ਤਚੀਵਰਮਾਦਾਯ ਵੀਸਯੋਜਨਸਤਂ ਮਗ੍ਗਂ ਪਚ੍ਚੁਗ੍ਗਨ੍ਤ੍ਵਾ ਚਨ੍ਦਭਾਗਾਯ ਨਦਿਯਾ ਤੀਰੇ ਨਿਗ੍ਰੋਧਰੁਕ੍ਖਮੂਲੇ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਨਿਸੀਦਿ. ਰਾਜਾਪਿ ਆਗਚ੍ਛਨ੍ਤੋ ਏਕਂ ਨਦਿਂ ਪਤ੍ਵਾ ‘‘ਕਾ ਨਾਮਾਯ’’ਨ੍ਤਿ ਪੁਚ੍ਛਿ. ‘‘ਅਪਰਚ੍ਛਾ ਨਾਮ, ਦੇਵਾ’’ਤਿ. ‘‘ਕਿਮਸ੍ਸਾ ਪਰਿਮਾਣਂ, ਤਾਤਾ’’ਤਿ? ‘‘ਗਮ੍ਭੀਰਤੋ ਗਾਵੁਤਂ, ਪੁਥੁਲਤੋ ਦ੍ਵੇ ਗਾਵੁਤਾਨਿ, ਦੇਵਾ’’ਤਿ. ‘‘ਅਤ੍ਥਿ ਪਨੇਤ੍ਥ ਨਾਵਾ ਵਾ ਉਲ਼ੁਮ੍ਪੋ ਵਾ’’ਤਿ? ‘‘ਨਤ੍ਥਿ, ਦੇਵਾ’’ਤਿ. ‘‘ਨਾਵਾਦੀਨਿ ਓਲੋਕੇਨ੍ਤੇ ਅਮ੍ਹੇ ਜਾਤਿ ਜਰਂ ਉਪਨੇਤਿ, ਜਰਾ ਮਰਣਂ. ਅਹਂ ਨਿਬ੍ਬੇਮਤਿਕੋ ਹੁਤ੍ਵਾ ਤੀਣਿ ਰਤਨਾਨਿ ਉਦ੍ਦਿਸ੍ਸ ਨਿਕ੍ਖਨ੍ਤੋ, ਤੇਸਂ ਮੇ ਆਨੁਭਾਵੇਨ ‘ਇਦਂ ਉਦਕਂ ਉਦਕਂ ਵਿਯ ਮਾ ਹੋਤੂ’ਤਿ ਰਤਨਤ੍ਤਯਸ੍ਸ ਗੁਣਂ ਆਵਜ੍ਜੇਤ੍ਵਾ ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ’’’ਤਿ ਬੁਦ੍ਧਗੁਣਂ ਅਨੁਸ੍ਸਰਨ੍ਤੋ ਸਪਰਿਵਾਰੋ ਅਸ੍ਸਸਹਸ੍ਸੇਨ ਉਦਕਪਿਟ੍ਠੇ ਪਕ੍ਖਨ੍ਦਿ. ਸਿਨ੍ਧਵਾ ਪਿਟ੍ਠਿਪਾਸਾਣੇ ਵਿਯ ਪਕ੍ਖਨ੍ਦਿਂਸੁ. ਖੁਰਾਨਂ ਅਗ੍ਗਟ੍ਠਾਨੇਵ ਤੇਮਿਂਸੁ.

ਸੋ ਤਂ ਉਤ੍ਤਰਿਤ੍ਵਾ ਪੁਰਤੋ ਗਚ੍ਛਨ੍ਤੋ ਅਪਰਮ੍ਪਿ ਨਦਿਂ ਦਿਸ੍ਵਾ ‘‘ਅਯਂ ਕਾ ਨਾਮਾ’’ਤਿ ਪੁਚ੍ਛਿ. ‘‘ਨੀਲਵਾਹਾ ਨਾਮ, ਦੇਵਾ’’ਤਿ. ‘‘ਕਿਮਸ੍ਸਾ ਪਰਿਮਾਣ’’ਨ੍ਤਿ? ‘‘ਗਮ੍ਭੀਰਤੋਪਿ ਪੁਥੁਲਤੋਪਿ ਅਡ੍ਢਯੋਜਨਂ, ਦੇਵਾ’’ਤਿ. ਸੇਸਂ ਪੁਰਿਮਸਦਿਸਮੇਵ. ਤਂ ਪਨ ਨਦਿਂ ਦਿਸ੍ਵਾ ‘‘ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ’’ਤਿ ਧਮ੍ਮਾਨੁਸ੍ਸਤਿਂ ਅਨੁਸ੍ਸਰਨ੍ਤੋ ਪਕ੍ਖਨ੍ਦਿ. ਤਮ੍ਪਿ ਅਤਿਕ੍ਕਮਿਤ੍ਵਾ ਗਚ੍ਛਨ੍ਤੋ ਅਪਰਮ੍ਪਿ ਨਦਿਂ ਦਿਸ੍ਵਾ ‘‘ਅਯਂ ਕਾ ਨਾਮਾ’’ਤਿ ਪੁਚ੍ਛਿ. ‘‘ਚਨ੍ਦਭਾਗਾ ਨਾਮ, ਦੇਵਾ’’ਤਿ. ‘‘ਕਿਮਸ੍ਸਾ ਪਰਿਮਾਣ’’ਨ੍ਤਿ? ‘‘ਗਮ੍ਭੀਰਤੋਪਿ ਪੁਥੁਲਤੋਪਿ ਯੋਜਨਂ, ਦੇਵਾ’’ਤਿ. ਸੇਸਂ ਪੁਰਿਮਸਦਿਸਮੇਵ. ਤਂ ਪਨ ਨਦਿਂ ਦਿਸ੍ਵਾ ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’’ਤਿ ਸਙ੍ਘਾਨੁਸ੍ਸਤਿਂ ਅਨੁਸ੍ਸਰਨ੍ਤੋ ਪਕ੍ਖਨ੍ਦਿ. ਤਮ੍ਪਿ ਨਦਿਂ ਅਤਿਕ੍ਕਮਿਤ੍ਵਾ ਗਚ੍ਛਨ੍ਤੋ ਸਤ੍ਥੁ ਸਰੀਰਤੋ ਨਿਕ੍ਖਨ੍ਤਾ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਨਿਗ੍ਰੋਧਰੁਕ੍ਖਸ੍ਸ ਸਾਖਾਵਿਟਪਪਲਾਸਾਨਿ ਓਭਾਸਯਮਾਨਾ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਓਭਾਸੋ ਨੇਵ ਚਨ੍ਦਸ੍ਸ, ਨ ਸੂਰਿਯਸ੍ਸ, ਨ ਦੇਵਮਾਰਬ੍ਰਾਹ੍ਮਣਸੁਪਣ੍ਣਨਾਗਾਨਂ ਅਞ੍ਞਤਰਸ੍ਸ, ਅਦ੍ਧਾ ਅਹਂ ਸਤ੍ਥਾਰਂ ਉਦ੍ਦਿਸ੍ਸ ਆਗਚ੍ਛਨ੍ਤੋ ਸਮ੍ਮਾਸਮ੍ਬੁਦ੍ਧੇਨ ਦਿਟ੍ਠੋ ਭਵਿਸ੍ਸਾਮੀ’’ਤਿ. ਸੋ ਤਾਵਦੇਵ ਅਸ੍ਸਪਿਟ੍ਠਿਤੋ ਓਤਰਿਤ੍ਵਾ ਓਨਤਸਰੀਰੋ ਰਸ੍ਮਿਯਾਨੁਸਾਰੇਨ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਮਨੋਸਿਲਾਰਸੇ ਨਿਮੁਜ੍ਜਨ੍ਤੋ ਵਿਯ ਬੁਦ੍ਧਰਸ੍ਮੀਨਂ ਅਨ੍ਤੋ ਪਾਵਿਸਿ. ਸੋ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ ਸਦ੍ਧਿਂ ਅਮਚ੍ਚਸਹਸ੍ਸੇਨ. ਸਤ੍ਥਾ ਤੇਸਂ ਅਨੁਪੁਬ੍ਬਿਂ ਕਥਂ ਕਥੇਸਿ. ਦੇਸਨਾਪਰਿਯੋਸਾਨੇ ਸਪਰਿਵਾਰੋ ਰਾਜਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਅਥ ਸਬ੍ਬੇ ਉਟ੍ਠਹਿਤ੍ਵਾ ਪਬ੍ਬਜ੍ਜਂ ਯਾਚਿਂਸੁ. ਸਤ੍ਥਾ ‘‘ਆਗਮਿਸ੍ਸਤਿ ਨੁ ਖੋ ਇਮੇਸਂ ਕੁਲਪੁਤ੍ਤਾਨਂ ਇਦ੍ਧਿਮਯਪਤ੍ਤਚੀਵਰ’’ਨ੍ਤਿ ਉਪਧਾਰੇਨ੍ਤੋ ‘‘ਇਮੇ ਕੁਲਪੁਤ੍ਤਾ ਪਚ੍ਚੇਕਬੁਦ੍ਧਸਹਸ੍ਸਾਨਂ ਚੀਵਰਸਹਸ੍ਸਂ ਅਦਂਸੁ, ਕਸ੍ਸਪਬੁਦ੍ਧਕਾਲੇ ਵੀਸਤਿਯਾ ਭਿਕ੍ਖੁਸਹਸ੍ਸਾਨਂ ਵੀਸਤਿਚੀਵਰਸਹਸ੍ਸਾਨਿਪਿ ਅਦਂਸੁ, ਅਨਚ੍ਛਰਿਯਂ ਇਮੇਸਂ ਕੁਲਪੁਤ੍ਤਾਨਂ ਇਦ੍ਧਿਮਯਪਤ੍ਤਚੀਵਰਾਗਮਨ’’ਨ੍ਤਿ ਞਤ੍ਵਾ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ ‘‘ਏਥ, ਭਿਕ੍ਖਵੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ ਆਹ. ਤੇ ਤਾਵਦੇਵ ਅਟ੍ਠਪਰਿਕ੍ਖਾਰਧਰਾ ਵਸ੍ਸਸਟ੍ਠਿਕਤ੍ਥੇਰਾ ਵਿਯ ਹੁਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪਚ੍ਚੋਰੋਹਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ.

ਤੇ ਪਨ ਵਾਣਿਜਕਾ ਰਾਜਗੇਹਂ ਗਨ੍ਤ੍ਵਾ ਦੇਵਿਯਾ ਰਞ੍ਞਾ ਪਹਿਤਸਾਸਨਂ ਆਰੋਚੇਤ੍ਵਾ ਦੇਵਿਯਾ ‘‘ਆਗਚ੍ਛਨ੍ਤੂ’’ਤਿ ਵੁਤ੍ਤੇ ਪਵਿਸਿਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਅਥ ਨੇ ਦੇਵੀ ਪੁਚ੍ਛਿ – ‘‘ਤਾਤਾ, ਕਿਂਕਾਰਣਾ ਆਗਤਤ੍ਥਾ’’ਤਿ? ‘‘ਮਯਂ ਰਞ੍ਞਾ ਤੁਮ੍ਹਾਕਂ ਸਨ੍ਤਿਕਂ ਪੇਸਿਤਾ, ਤੀਣਿ ਕਿਰ ਨੋ ਸਤਸਹਸ੍ਸਾਨਿ ਦੇਥਾ’’ਤਿ. ‘‘ਬਹੁਂ, ਭਣੇ, ਭਣਥ, ਕਿਂ ਤੁਮ੍ਹੇਹਿ ਰਞ੍ਞੋ ਸਨ੍ਤਿਕੇ ਕਤਂ, ਕਿਸ੍ਮਿਂ ਵੋ ਰਾਜਾ ਪਸਨ੍ਨੋ ਏਤ੍ਤਕਂ ਧਨਂ ਦਾਪੇਤੀ’’ਤਿ? ‘‘ਦੇਵਿ, ਨ ਅਞ੍ਞਂ ਕਿਞ੍ਚਿ ਕਤਂ, ਏਕਂ ਪਨ ਸਾਸਨਂ ਆਰੋਚਯਿਮ੍ਹਾ’’ਤਿ. ‘‘ਸਕ੍ਕਾ ਪਨ, ਤਾਤਾ, ਮਯ੍ਹਮ੍ਪਿ ਤਂ ਆਰੋਚੇਤੁ’’ਨ੍ਤਿ. ‘‘ਸਕ੍ਕਾ, ਦੇਵੀ’’ਤਿ ਸੁਵਣ੍ਣਭਿਙ੍ਗਾਰੇਨ ਮੁਖਂ ਵਿਕ੍ਖਾਲੇਤ੍ਵਾ ‘‘ਦੇਵਿ, ਬੁਦ੍ਧੋ ਲੋਕੇ ਉਪ੍ਪਨ੍ਨੋ’’ਤਿ. ਸਾਪਿ ਤਂ ਸੁਤ੍ਵਾ ਪੀਤਿਯਾ ਫੁਟ੍ਠਸਰੀਰਾ ਤਿਕ੍ਖਤ੍ਤੁਂ ਕਿਞ੍ਚਿ ਅਸਲ੍ਲਕ੍ਖੇਤ੍ਵਾ ਚਤੁਤ੍ਥਵਾਰੇ ‘‘ਬੁਦ੍ਧੋ ਉਪ੍ਪਨ੍ਨੋ’’ਤਿ ਸੁਤ੍ਵਾ ‘‘ਕਿਂ, ਤਾਤਾ, ਇਮਸ੍ਮਿਂ ਪਦੇ ਰਞ੍ਞਾ ਦਿਨ੍ਨ’’ਨ੍ਤਿ? ‘‘ਸਤਸਹਸ੍ਸਂ, ਦੇਵੀ’’ਤਿ. ‘‘ਤਾਤਾ, ਅਨਨੁਚ੍ਛਵਿਕਂ ਰਞ੍ਞਾ ਕਤਂ ਏਵਰੂਪਂ ਸਾਸਨਂ ਸੁਤ੍ਵਾ ਤੁਮ੍ਹਾਕਂ ਸਤਸਹਸ੍ਸਦਦਮਾਨੇਨ, ਅਹਂ ਵੋ ਮਮ ਦੁਗ੍ਗਤਪਣ੍ਣਾਕਾਰੇ ਤੀਣਿ ਸਤਸਹਸ੍ਸਾਨਿ ਦਮ੍ਮਿ. ਅਪਰਂ ਕਿਞ੍ਚਿ ਤੁਮ੍ਹੇਹਿ ਆਰੋਚਿਤ’’ਨ੍ਤਿ? ਤੇ ਇਦਞ੍ਚ ਇਦਞ੍ਚਾਤਿ ਇਤਰਾਨਿਪਿ ਦ੍ਵੇ ਸਾਸਨਾਨਿ ਆਰੋਚੇਸੁਂ. ਦੇਵੀ ਪੁਰਿਮਨਯੇਨੇਵ ਤਯੋ ਤਯੋ ਵਾਰੇ ਅਸਲ੍ਲਕ੍ਖੇਤ੍ਵਾ ਚਤੁਤ੍ਥਚਤੁਤ੍ਥਵਾਰੇ ਤੀਣਿ ਤੀਣਿ ਸਤਸਹਸ੍ਸਾਨਿ ਅਦਾਸਿ. ਏਵਂ ਤੇ ਸਬ੍ਬਾਨਿ ਦ੍ਵਾਦਸਸਤਸਹਸ੍ਸਾਨਿ ਲਭਿਂਸੁ.

ਅਥ ਨੇ ਦੇਵੀ ਪੁਚ੍ਛਿ – ‘‘ਰਾਜਾ ਕਹਂ, ਤਾਤਾ’’ਤਿ? ‘‘ਦੇਵਿ, ਰਾਜਾ ‘ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਸ੍ਸਾਮੀ’ਤਿ ਵਤ੍ਵਾ ਗਤੋ’’ਤਿ. ‘‘ਮਯ੍ਹਂ ਤੇਨ ਕਿਂ ਸਾਸਨਂ ਦਿਨ੍ਨ’’ਨ੍ਤਿ? ‘‘ਸਬ੍ਬਂ ਕਿਰ ਇਸ੍ਸਰਿਯਂ ਤੁਮ੍ਹਾਕਂ ਵਿਸ੍ਸਟ੍ਠਂ, ‘ਤੁਮ੍ਹੇ ਕਿਰ ਯਥਾਸੁਖਂ ਸਮ੍ਪਤ੍ਤਿਂ ਅਨੁਭਵਥਾ’’’ਤਿ. ‘‘ਅਮਚ੍ਚਾ ਪਨ ਕੁਹਿਂ, ਤਾਤਾ’’ਤਿ? ‘‘ਤੇਪਿ ਰਞ੍ਞਾ ਸਦ੍ਧਿਂ ‘ਪਬ੍ਬਜਿਸ੍ਸਾਮਾ’ਤਿ ਗਤਾ, ਦੇਵੀ’’ਤਿ. ਸਾ ਤੇਸਂ ਭਰਿਯਾਯੋ ਪਕ੍ਕੋਸਾਪੇਤ੍ਵਾ, ‘‘ਅਮ੍ਮਾ, ਤੁਮ੍ਹਾਕਂ ਸਾਮਿਕਾ ਰਞ੍ਞਾ ਸਦ੍ਧਿਂ ‘ਪਬ੍ਬਜਿਸ੍ਸਾਮਾ’ਤਿ ਗਤਾ, ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ? ‘‘ਕਿਂ ਪਨ ਤੇਹਿ ਅਮ੍ਹਾਕਂ ਸਾਸਨਂ ਪਹਿਤਂ, ਦੇਵੀ’’ਤਿ? ‘‘ਤੇਹਿ ਕਿਰ ਅਤ੍ਤਨੋ ਸਮ੍ਪਤ੍ਤਿ ਤੁਮ੍ਹਾਕਂ ਵਿਸ੍ਸਟ੍ਠਾ ‘ਤੁਮ੍ਹੇ ਕਿਰ ਸਮ੍ਪਤ੍ਤਿਂ ਯਥਾਸੁਖਂ ਪਰਿਭੁਞ੍ਜਥਾ’’’ਤਿ. ‘‘ਤੁਮ੍ਹੇ ਪਨ, ਦੇਵਿ, ਕਿਂ ਕਰਿਸ੍ਸਥਾ’’ਤਿ? ‘‘ਅਮ੍ਹਾਕਂ ਸੋ ਤਾਵ ਰਾਜਾ ਮਗ੍ਗੇ ਠਿਤੋ ਤੀਹਿ ਸਤਸਹਸ੍ਸੇਹਿ ਤੀਣਿ ਰਤਨਾਨਿ ਪੂਜੇਤ੍ਵਾ ਖੇਲ਼ਪਿਣ੍ਡਂ ਵਿਯ ਸਮ੍ਪਤ੍ਤਿਂ ਪਹਾਯ ‘ਪਬ੍ਬਜਿਸ੍ਸਾਮੀ’ਤਿ ਨਿਕ੍ਖਨ੍ਤੋ, ਮਯਾਪਿ ਤਿਣ੍ਣਂ ਰਤਨਾਨਂ ਸਾਸਨਂ ਸੁਤ੍ਵਾ ਤਾਨਿ ਨਵਹਿ ਸਤਸਹਸ੍ਸੇਹਿ ਪੂਜਿਤਾਨਿ, ਨ ਖੋ ਪਨੇਸਾ ਸਮ੍ਪਤ੍ਤਿ ਨਾਮ ਰਞ੍ਞੋਯੇਵ ਦੁਕ੍ਖਾ, ਮਯ੍ਹਮ੍ਪਿ ਦੁਕ੍ਖਾ ਏਵ. ਕੋ ਰਞ੍ਞਾ ਛਡ੍ਡਿਤਖੇਲ਼ਪਿਣ੍ਡਂ ਜਣ੍ਣੁਕੇਹਿ ਭੂਮਿਯਂ ਪਤਿਟ੍ਠਹਿਤ੍ਵਾ ਮੁਖੇਨ ਗਣ੍ਹਿਸ੍ਸਤਿ, ਨ ਮਯ੍ਹਂ ਸਮ੍ਪਤ੍ਤਿਯਾ ਅਤ੍ਥੋ, ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਸ੍ਸਾਮੀ’’ਤਿ. ‘‘ਦੇਵਿ, ਮਯਮ੍ਪਿ ਤੁਮ੍ਹੇਹਿ ਸਦ੍ਧਿਂ ਪਬ੍ਬਜਿਸ੍ਸਾਮਾ’’ਤਿ. ‘‘ਸਚੇ ਸਕ੍ਕੋਥ, ਸਾਧੂ’’ਤਿ. ‘‘ਸਕ੍ਕੋਮ, ਦੇਵੀ’’ਤਿ. ਤੇਨ ਹਿ ‘‘ਏਥਾ’’ਤਿ ਰਥਸਹਸ੍ਸਂ ਯੋਜਾਪੇਤ੍ਵਾ ਰਥਂ ਆਰੁਯ੍ਹ ਤਾਹਿ ਸਦ੍ਧਿਂ ਨਿਕ੍ਖਮਿਤ੍ਵਾ ਅਨ੍ਤਰਾਮਗ੍ਗੇ ਪਠਮਂ ਨਦਿਂ ਦਿਸ੍ਵਾ ਯਥਾ ਰਞ੍ਞਾ ਪਠਮਂ ਪੁਚ੍ਛਿਤਾ, ਤਥੇਵ ਪੁਚ੍ਛਿਤ੍ਵਾ ਸਬ੍ਬਂ ਪਵਤ੍ਤਿਂ ਸੁਤ੍ਵਾ ‘‘ਰਞ੍ਞਾ ਗਤਮਗ੍ਗਂ ਓਲੋਕੇਥਾ’’ਤਿ ਵਤ੍ਵਾ ‘‘ਸਿਨ੍ਧਵਾਨਂ ਪਦਵਲਞ੍ਜਂ ਨ ਪਸ੍ਸਾਮਾ’’ਤਿ ਵੁਤ੍ਤੇ ਰਾਜਾ ‘‘ਤੀਣਿ ਰਤਨਾਨਿ ਉਦ੍ਦਿਸ੍ਸ ਨਿਕ੍ਖਨ੍ਤੋਸ੍ਮੀ’’ਤਿ ਸਚ੍ਚਕਿਰਿਯਂ ਕਰਿਤ੍ਵਾ ਤਿਣ੍ਣਂ ਰਤਨਾਨਂ ਗੁਣੇ ਅਨੁਸ੍ਸਰਿਤ੍ਵਾ ਗਤੋ ਭਵਿਸ੍ਸਤਿ, ਅਹਮ੍ਪਿ ਤੀਣਿ ਰਤਨਾਨਿ ਉਦ੍ਦਿਸ੍ਸ ਨਿਕ੍ਖਨ੍ਤਾ, ਤੇਸਂ ਮੇ ਆਨੁਭਾਵੇਨ ‘‘ਇਦਂ ਉਦਕਂ ਉਦਕਂ ਵਿਯ ਮਾ ਹੋਤੂ’’ਤਿ ਤਿਣ੍ਣਂ ਰਤਨਾਨਂ ਗੁਣੇ ਅਨੁਸ੍ਸਰਨ੍ਤੀ ਰਥਸਹਸ੍ਸਂ ਪੇਸੇਸਿ. ਉਦਕਂ ਪਿਟ੍ਠਿਪਾਸਾਣਸਦਿਸਂ ਅਹੋਸਿ, ਚਕ੍ਕਾਨਂ ਅਗ੍ਗਟ੍ਠਾਨੇਵ ਤੇਮਿਂਸੁ. ਏਤੇਨੇਵ ਉਪਾਯੇਨ ਇਤਰਾ ਦ੍ਵੇਪਿ ਨਦਿਯੋ ਉਤ੍ਤਰਿਂਸੁ.

ਸਤ੍ਥਾ ਤਾਸਂ ਆਗਤਭਾਵਂ ਞਤ੍ਵਾ ਯਥਾ ਤਾ ਅਤ੍ਤਨੋ ਸਨ੍ਤਿਕੇ ਨਿਸਿਨ੍ਨੇ ਸਾਮਿਕੇ ਭਿਕ੍ਖੂ ਨ ਪਸ੍ਸਨ੍ਤਿ, ਤਥਾ ਅਧਿਟ੍ਠਾਸਿ. ਦੇਵੀਪਿ ਆਗਚ੍ਛਨ੍ਤੀ ਸਤ੍ਥੁ ਸਰੀਰਤੋ ਨਿਕ੍ਖਨ੍ਤਾ ਰਸ੍ਮਿਯੋ ਦਿਸ੍ਵਾ ਤਥੇਵ ਚਿਨ੍ਤੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ, ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ ਪੁਚ੍ਛਿ – ‘‘ਭਨ੍ਤੇ, ਮਹਾਕਪ੍ਪਿਨੋ ਰਾਜਾ ਤੁਮ੍ਹੇ ਉਦ੍ਦਿਸ੍ਸ ਨਿਕ੍ਖਮਿਤ੍ਵਾ ਗਤੋ, ਕਹਂ ਨੁ ਖੋ ਸੋ, ਅਮ੍ਹਾਕਂ ਤਂ ਦਸ੍ਸੇਥਾ’’ਤਿ. ‘‘ਨਿਸੀਦਥ ਤਾਵ, ਇਧੇਵ ਨਂ ਪਸ੍ਸਿਸ੍ਸਥਾ’’ਤਿ. ਤਾ ਸਬ੍ਬਾਪਿ ਹਟ੍ਠਤੁਟ੍ਠਾ ‘‘ਇਧੇਵ ਕਿਰ ਨਿਸਿਨ੍ਨਾ ਸਾਮਿਕੇ ਨੋ ਪਸ੍ਸਿਸ੍ਸਾਮਾ’’ਤਿ ਨਿਸੀਦਿਂਸੁ. ਸਤ੍ਥਾ ਅਨੁਪੁਬ੍ਬਿਂ ਕਥਂ ਕਥੇਸਿ. ਅਨੋਜਾਦੇਵੀ ਦੇਸਨਾਪਰਿਯੋਸਾਨੇ ਤਾਹਿ ਸਦ੍ਧਿਂ ਸੋਤਾਪਤ੍ਤਿਫਲਂ ਪਾਪੁਣਿ. ਮਹਾਕਪ੍ਪਿਨੋ ਥੇਰੋ ਤਾਸਂ ਦੇਸਿਯਮਾਨਂ ਧਮ੍ਮਦੇਸਨਂ ਸੁਤ੍ਵਾ ਸਪਰਿਵਾਰੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤਸ੍ਮਿਂ ਖਣੇ ਸਤ੍ਥਾ ਤਾਸਂ ਤੇ ਭਿਕ੍ਖੂ ਦਸ੍ਸੇਸਿ. ਤਾਸਞ੍ਹਿ ਆਗਤਕ੍ਖਣੇਯੇਵ ਅਤ੍ਤਨੋ ਸਾਮਿਕੇ ਕਾਸਾਵਧਰੇ ਮੁਣ੍ਡਸੀਸੇ ਦਿਸ੍ਵਾ ਚਿਤ੍ਤਂ ਏਕਗ੍ਗਂ ਨ ਭਵੇਯ੍ਯ, ਮਗ੍ਗਫਲਂ ਨਿਬ੍ਬਤ੍ਤੇਤੁਂ ਸਕ੍ਕਾ ਨ ਭਵੇਯ੍ਯ. ਤਸ੍ਮਾ ਅਚਲਸਦ੍ਧਾਯ ਪਤਿਟ੍ਠਿਤਕਾਲਤੋ ਪਟ੍ਠਾਯ ਤਾਸਂ ਤੇ ਭਿਕ੍ਖੂ ਅਰਹਤ੍ਤਪ੍ਪਤ੍ਤੇ ਦਸ੍ਸੇਸਿ. ਤਾਪਿ ਤੇ ਦਿਸ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ, ‘‘ਭਨ੍ਤੇ, ਤੁਮ੍ਹਾਕਂ ਪਬ੍ਬਜਿਤਕਿਚ੍ਚਂ ਮਤ੍ਥਕਪ੍ਪਤ੍ਤ’’ਨ੍ਤਿ ਵਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਠਤ੍ਵਾ ਪਬ੍ਬਜ੍ਜਂ ਯਾਚਿਂਸੁ.

ਏਵਂ ਵੁਤ੍ਤੇ ਸਤ੍ਥਾ ਉਪ੍ਪਲਵਣ੍ਣਾਯ ਥੇਰਿਯਾ ਆਗਮਨਂ ਚਿਨ੍ਤੇਸਿ. ਸਾ ਸਤ੍ਥੁ ਚਿਨ੍ਤਿਤਕ੍ਖਣੇਯੇਵ ਆਕਾਸੇਨਾਗਨ੍ਤ੍ਵਾ ਤਾ ਸਬ੍ਬਾ ਇਤ੍ਥਿਯੋ ਗਹੇਤ੍ਵਾ ਆਕਾਸੇਨ ਭਿਕ੍ਖੁਨੁਪਸ੍ਸਯਂ ਨੇਤ੍ਵਾ ਪਬ੍ਬਾਜੇਸਿ. ਤਾ ਸਬ੍ਬਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿਂਸੁ. ਸਤ੍ਥਾ ਭਿਕ੍ਖੁਸਹਸ੍ਸਂ ਆਦਾਯ ਆਕਾਸੇਨ ਜੇਤਵਨਂ ਅਗਮਾਸਿ. ਤਤ੍ਰ ਸੁਦਂ ਆਯਸ੍ਮਾ ਮਹਾਕਪ੍ਪਿਨੋ ਰਤ੍ਤਿਟ੍ਠਾਨਾਦੀਸੁ ‘‘ਅਹੋ ਸੁਖਂ, ਅਹੋ ਸੁਖ’’ਨ੍ਤਿ ਉਦਾਨਂ ਉਦਾਨੇਨ੍ਤੋ ਵਿਚਰਤਿ. ਭਿਕ੍ਖੂ ਭਗਵਤੋ ਆਰੋਚੇਸੁਂ – ‘‘ਭਨ੍ਤੇ, ਮਹਾਕਪ੍ਪਿਨੋ ‘ਅਹੋ ਸੁਖਂ, ਅਹੋ ਸੁਖ’ਨ੍ਤਿ ਉਦਾਨਂ ਉਦਾਨੇਨ੍ਤੋ ਵਿਚਰਤਿ, ਅਤ੍ਤਨੋ ਰਜ੍ਜਸੁਖਂ ਆਰਬ੍ਭ ਉਦਾਨੇਤਿ ਮਞ੍ਞੇ’’ਤਿ. ਸਤ੍ਥਾ ਤਂ ਪਕ੍ਕੋਸਾਪੇਤ੍ਵਾ – ‘‘ਸਚ੍ਚਂ ਕਿਰ ਤ੍ਵਂ, ਕਪ੍ਪਿਨ, ਕਾਮਸੁਖਂ ਆਰਬ੍ਭ ਉਦਾਨਂ ਉਦਾਨੇਸੀ’’ਤਿ? ‘‘ਭਗਵਾ ਮੇ, ਭਨ੍ਤੇ, ਤਂ ਆਰਬ੍ਭ ਉਦਾਨਭਾਵਂ ਵਾ ਅਞ੍ਞਂ ਆਰਬ੍ਭ ਉਦਾਨਭਾਵਂ ਵਾ ਜਾਨਾਤੀ’’ਤਿ. ਅਥ ਸਤ੍ਥਾ – ‘‘ਨ, ਭਿਕ੍ਖਵੇ, ਮਮ ਪੁਤ੍ਤੋ ਕਾਮਸੁਖਂ ਰਜ੍ਜਸੁਖਂ ਆਰਬ੍ਭ ਉਦਾਨਂ ਉਦਾਨੇਤਿ, ਪੁਤ੍ਤਸ੍ਸ ਪਨ ਮੇ ਧਮ੍ਮਂ ਚਰਤੋ ਧਮ੍ਮਪੀਤਿ ਨਾਮ ਉਪ੍ਪਜ੍ਜਤਿ, ਸੋ ਅਮਤਮਹਾਨਿਬ੍ਬਾਨਂ ਆਰਬ੍ਭ ਏਵਂ ਉਦਾਨਂ ਉਦਾਨੇਸੀ’’ਤਿ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

‘‘ਧਮ੍ਮਪੀਤਿ ਸੁਖਂ ਸੇਤਿ, ਵਿਪ੍ਪਸਨ੍ਨੇਨ ਚੇਤਸਾ;

ਅਰਿਯਪ੍ਪਵੇਦਿਤੇ ਧਮ੍ਮੇ, ਸਦਾ ਰਮਤਿ ਪਣ੍ਡਿਤੋ’’ਤਿ. (ਧ. ਪ. ੭੯);

ਅਥੇਕਦਿਵਸਂ ਸਤ੍ਥਾ ਭਿਕ੍ਖੂ ਆਮਨ੍ਤੇਸਿ – ‘‘ਕਚ੍ਚਿ, ਭਿਕ੍ਖਵੇ, ਕਪ੍ਪਿਨੋ ਭਿਕ੍ਖੂਨਂ ਧਮ੍ਮਂ ਦੇਸੇਤੀ’’ਤਿ? ‘‘ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਦਿਟ੍ਠਧਮ੍ਮਸੁਖਵਿਹਾਰਂ ਅਨੁਯੁਤ੍ਤੋ ਵਿਹਰਤਿ, ਓਵਾਦਮਤ੍ਤਮ੍ਪਿ ਨ ਦੇਤੀ’’ਤਿ. ਸਤ੍ਥਾ ਥੇਰਂ ਪਕ੍ਕੋਸਾਪੇਤ੍ਵਾ – ‘‘ਸਚ੍ਚਂ ਕਿਰ ਤ੍ਵਂ, ਕਪ੍ਪਿਨ, ਅਨ੍ਤੇਵਾਸਿਕਾਨਂ ਓਵਾਦਮਤ੍ਤਮ੍ਪਿ ਨ ਦੇਸੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ‘‘ਬ੍ਰਾਹ੍ਮਣ, ਮਾ ਏਵਂ ਅਕਾਸਿ, ਅਜ੍ਜ ਪਟ੍ਠਾਯ ਉਪਗਤਾਨਂ ਭਿਕ੍ਖੂਨਂ ਧਮ੍ਮਂ ਦੇਸੇਹੀ’’ਤਿ. ‘‘ਸਾਧੁ, ਭਨ੍ਤੇ’’ਤਿ ਥੇਰੋ ਭਗਵਤੋ ਵਚਨਂ ਸਿਰਸਾ ਸਮ੍ਪਟਿਚ੍ਛਿਤ੍ਵਾ ਏਕੋਵਾਦੇਨੇਵ ਸਮਣਸਹਸ੍ਸਂ ਅਰਹਤ੍ਤੇ ਪਤਿਟ੍ਠਾਪੇਸਿ. ਤੇਨ ਨਂ ਸਤ੍ਥਾ ਪਟਿਪਾਟਿਯਾ ਅਤ੍ਤਨੋ ਸਾਵਕੇ ਠਾਨਨ੍ਤਰੇ ਠਪੇਨ੍ਤੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੁਓਵਾਦਕਾਨਂ ਯਦਿਦਂ ਮਹਾਕਪ੍ਪਿਨੋ’’ਤਿ (ਅ. ਨਿ. ੧.੨੧੯, ੨੩੧) ਏਤਦਗ੍ਗੇ ਠਪੇਸਿ.

੬੬. ਏਵਂ ਥੇਰੋ ਪਤ੍ਤਅਰਹਤ੍ਤਫਲੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਉਦਿਤੋ ਅਜਟਾਕਾਸੇਤਿ ਸਕਲਾਕਾਸੇ ਉਦਿਤੋ ਉਟ੍ਠਿਤੋ ਪਾਕਟਭੂਤੋ. ਸਰਦਮ੍ਬਰੇ ਸਰਦਕਾਲੇ ਆਕਾਸੇ ਰਵੀਵ ਸੂਰਿਯੋ ਇਵਾਤਿ ਅਤ੍ਥੋ.

੭੦. ਅਕ੍ਖਦਸ੍ਸੋ ਤਦਾ ਆਸਿਨ੍ਤਿ ਤਸ੍ਮਿਂ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਸਾਰਦਸ੍ਸੀ ਹਿਤਦਸ੍ਸੀ ਆਚਰਿਯੋ ਪਾਕਟੋ ਅਹੋਸਿਨ੍ਤਿ ਅਤ੍ਥੋ.

੭੧. ਸਾਵਕਸ੍ਸ ਕਤਾਵਿਨੋਤਿ ਤਸ੍ਸ ਭਗਵਤੋ ਮੇ ਮਨਂ ਮਮ ਚਿਤ੍ਤਂ, ਤਪ੍ਪਯਨ੍ਤਸ੍ਸ ਤੋਸਯਨ੍ਤਸ੍ਸ ਸਾਵਕਸ੍ਸ ਓਵਾਦਕਸ੍ਸ ਗੁਣਂ ਪਕਾਸਯਤੋ ਅਗ੍ਗਟ੍ਠਾਨੇ ਠਪੇਨ੍ਤਸ੍ਸ ਕਤਾਵਿਨੋ ਸਾਤਚ੍ਚਕਿਚ੍ਚਯੁਤ੍ਤਸ੍ਸ ਵਚਨਂ ਸੁਤ੍ਵਾਤਿ ਸਮ੍ਬਨ੍ਧੋ.

੭੩. ਹਂਸਸਮਭਾਗੋਤਿ ਹਂਸਸਦਿਸਗਾਮਿ. ਹਂਸਦੁਨ੍ਦੁਭਿਨਿਸ੍ਸਨੋਤਿ ਹਂਸਰਵੋ ਦੁਨ੍ਦੁਭਿਭੇਰਿਸਦ੍ਦਸਦਿਸਵਚਨੋ ‘‘ਏਤਂ ਮਹਾਮਤ੍ਤਂ ਪਸ੍ਸਥ, ਭਿਕ੍ਖਵੋ’’ਤਿ ਆਹਾਤਿ ਸਮ੍ਬਨ੍ਧੋ.

੭੪. ਸਮੁਗ੍ਗਤਤਨੂਰੁਹਨ੍ਤਿ ਸੁਟ੍ਠੁ ਉਗ੍ਗਤਲੋਮਂ ਉਦ੍ਧਗ੍ਗਲੋਮਂ, ਉਦਗ੍ਯਮਨਂ ਵਾ. ਜੀਮੂਤਵਣ੍ਣਨ੍ਤਿ ਮੁਤ੍ਤਫਲਸਮਾਨਵਣ੍ਣਂ ਸੁਨ੍ਦਰਸਰੀਰਪਭਨ੍ਤਿ ਅਤ੍ਥੋ. ਪੀਣਂਸਨ੍ਤਿ ਪਰਿਪੁਣ੍ਣਂ ਅਂਸਂ. ਪਸਨ੍ਨਨਯਨਾਨਨਨ੍ਤਿ ਪਸਨ੍ਨਅਕ੍ਖਿਪਸਨ੍ਨਮੁਖਨ੍ਤਿ ਅਤ੍ਥੋ.

੭੫. ਕਤਾਵਿਨੋਤਿ ਕਤਾਧਿਕਾਰਸ੍ਸ ਏਤਦਗ੍ਗੇ ਠਿਤਸ੍ਸ ਭਿਕ੍ਖੁਨੋ ਠਾਨਂ ਸੋ ਏਸੋ ਮੁਦਿਤਾਯ ਪਹਟ੍ਠਚਿਤ੍ਤਤਾਯ ਪਤ੍ਥੇਤੀਤਿ ਸਮ੍ਬਨ੍ਧੋ.

੮੧. ਸਤਸੋ ਅਨੁਸਾਸਿਯਾਤਿ ਧਮ੍ਮੇਨ ਸਮੇਨ ਵਚਨੇਨ ਕਾਰਣਵਸੇਨ ਅਨੁਸਾਸਿਤ੍ਵਾਤਿ ਅਤ੍ਥੋ. ਬਾਰਾਣਸਿਯਮਾਸਨ੍ਨੇਤਿ ਬਾਰਾਣਸਿਯਾ ਸਮੀਪੇ ਪੇਸਕਾਰਗਾਮੇ. ਜਾਤੋ ਕੇਨਿਯਜਾਤਿਯਨ੍ਤਿ ਤਨ੍ਤਵਾਯਜਾਤਿਯਾ ਪੇਸਕਾਰਕੁਲੇ ਜਾਤੋਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਮਹਾਕਪ੍ਪਿਨਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਦਬ੍ਬਮਲ੍ਲਪੁਤ੍ਤਤ੍ਥੇਰਅਪਦਾਨਵਣ੍ਣਨਾ

ਚਤੁਤ੍ਥਾਪਦਾਨੇ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਦਬ੍ਬਮਲ੍ਲਪੁਤ੍ਤਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਸੇਟ੍ਠਿਪੁਤ੍ਤੋ ਹੁਤ੍ਵਾ ਜਾਤੋ ਵਿਭਵਸਮ੍ਪਨ੍ਨੋ ਅਹੋਸਿ, ਸਤ੍ਥਰਿ ਪਸਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਸੇਨਾਸਨਪਞ੍ਞਾਪਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਸਤ੍ਤਾਹਚ੍ਚਯੇਨ ਭਗਵਤੋ ਪਾਦਮੂਲੇ ਨਿਪਤਿਤ੍ਵਾ ਤਂ ਠਾਨਂ ਪਤ੍ਥੇਸਿ. ਭਗਵਾਪਿਸ੍ਸ ਸਮਿਜ੍ਝਨਭਾਵਂ ਞਤ੍ਵਾ ਬ੍ਯਾਕਾਸਿ. ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਤਤੋ ਚੁਤੋ ਤੁਸਿਤਾਦੀਸੁ ਦੇਵੇਸੁ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਅਸਪ੍ਪੁਰਿਸਸਂਸਗ੍ਗੇਨ ਤਸ੍ਸ ਸਾਵਕਂ ਭਿਕ੍ਖੁਂ ਅਰਹਾਤਿ ਜਾਨਨ੍ਤੋਪਿ ਅਬ੍ਭੂਤੇਨ ਅਬ੍ਭਾਚਿਕ੍ਖਿ. ਤਸ੍ਸੇਵ ਸਾਵਕਾਨਂ ਖੀਰਸਲਾਕਭਤ੍ਤਂ ਅਦਾਸਿ. ਸੋ ਯਾਵਤਾਯੁਕਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਕਸ੍ਸਪਦਸਬਲਸ੍ਸ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਓਸਾਨਕਾਲੇ ਸਾਸਨੇ ਪਬ੍ਬਜਿਤੋ ਪਰਿਨਿਬ੍ਬੁਤੇ ਭਗਵਤਿ ਸਕਲਲੋਕੇ ਕੋਲਾਹਲੇ ਜਾਤੇ ਸਤ੍ਤ ਭਿਕ੍ਖਵੋ ਪਬ੍ਬਜਿਤੋ ਪਚ੍ਚਨ੍ਤਜਨਪਦੇ ਵਨਮਜ੍ਝੇ ਏਕਂ ਪਬ੍ਬਤਂ ਅਭਿਰੁਹਿਤ੍ਵਾ ‘‘ਜੀਵਿਤਾਸਾ ਓਰੋਹਨ੍ਤੁ ਨਿਰਾਲਯਾ ਨਿਸੀਦਨ੍ਤੂ’’ਤਿ ਨਿਸ੍ਸੇਣਿਂ ਪਾਤੇਸੁਂ. ਤੇਸਂ ਓਵਾਦਦਾਯਕੋ ਜੇਟ੍ਠਕਤ੍ਥੇਰੋ ਸਤ੍ਥਾਹਬ੍ਭਨ੍ਤਰੇ ਅਰਹਾ ਅਹੋਸਿ. ਤਦਨਨ੍ਤਰਤ੍ਥੇਰੋ ਅਨਾਗਾਮੀ, ਇਤਰੇ ਪਞ੍ਚ ਪਰਿਸੁਦ੍ਧਸੀਲਾ ਤਤੋ ਚੁਤਾ ਦੇਵਲੋਕੇ ਨਿਬ੍ਬਤ੍ਤਾ. ਤਤ੍ਥ ਏਕਂ ਬੁਦ੍ਧਨ੍ਤਰਂ ਦਿਬ੍ਬਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਪੁਕ੍ਕੁਸਾਤਿ (ਮ. ਨਿ. ੩.੩੪੨), ਸਭਿਯੋ (ਸੁ. ਨਿ. ਸਭਿਯਸੁਤ੍ਤ), ਬਾਹਿਯੋ (ਉਦਾ. ੧੦), ਕੁਮਾਰਕਸ੍ਸਪੋਤਿ (ਮ. ਨਿ. ੧.੨੪੯) ਇਮੇ ਚਤ੍ਤਾਰੋ ਤਤ੍ਥ ਤਤ੍ਥ ਨਿਬ੍ਬਤ੍ਤਿਂਸੁ. ਅਯਂ ਪਨ ਮਲ੍ਲਰਟ੍ਠੇ ਅਨੁਪਿਯਨਗਰੇ ਨਿਬ੍ਬਤ੍ਤਿ. ਤਸ੍ਮਿਂ ਮਾਤੁਕੁਚ੍ਛਿਤੋ ਅਨਿਕ੍ਖਨ੍ਤੇਯੇਵ ਮਾਤਾ ਕਾਲਮਕਾਸਿ, ਅਥੇਕੋ ਤਸ੍ਸਾ ਸਰੀਰਂ ਝਾਪਨਤ੍ਥਾਯ ਚਿਤਕਸ੍ਮਿਂ ਆਰੋਪੇਤ੍ਵਾ ਕੁਮਾਰਂ ਦਬ੍ਬਨ੍ਤਰੇ ਪਤਿਤਂ ਗਹੇਤ੍ਵਾ ਜਗ੍ਗਾਪੇਸਿ. ਦਬ੍ਬੇ ਪਤਿਤਤ੍ਤਾ ਦਬ੍ਬੋ ਮਲ੍ਲਪੁਤ੍ਤੋਤਿ ਪਾਕਟੋ ਅਹੋਸਿ. ਅਪਰਭਾਗੇ ਪੁਬ੍ਬਸਮ੍ਭਾਰਵਸੇਨ ਪਬ੍ਬਜਿ, ਸੋ ਕਮ੍ਮਟ੍ਠਾਨਮਨੁਯੁਤ੍ਤੋ ਨਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ.

ਅਥ ਨਂ ਸਤ੍ਥਾ ਮਜ੍ਝਤ੍ਤਭਾਵੇਨ ਆਨੁਭਾਵਸਮ੍ਪਨ੍ਨਭਾਵੇਨ ਚ ਭਿਕ੍ਖੂਨਂ ਸੇਨਾਸਨਂ ਪਞ੍ਞਾਪਨੇ ਭਤ੍ਤੁਦ੍ਦੇਸਨੇ ਚ ਨਿਯੋਜੇਸਿ. ਸਬ੍ਬੋ ਚ ਭਿਕ੍ਖੁਸਙ੍ਘੋ ਤਂ ਸਮਨ੍ਨੇਸਿ. ਤਂ ਵਿਨਯਖਨ੍ਧਕੇ (ਚੂਲ਼ਵ. ੧੮੯-੧੯੦) ਆਗਤਮੇਵ. ਅਪਰਭਾਗੇ ਥੇਰੋ ਏਕਸ੍ਸ ਵਰਸਲਾਕਦਾਯਕਸ੍ਸ ਸਲਾਕਭਤ੍ਤਂ ਮੇਤ੍ਤਿਯਭੂਮਜਕਾਨਂ ਭਿਕ੍ਖੂਨਂ ਉਦ੍ਦਿਸਿ. ਤੇ ਹਟ੍ਠਤੁਟ੍ਠਾ ‘‘ਸ੍ਵੇ ਮਯ੍ਹਂ ਮੁਗ੍ਗਘਤਮਧੁਮਿਸ੍ਸਕਭਤ੍ਤਂ ਭੁਞ੍ਜਿਸ੍ਸਾਮਾ’’ਤਿ ਉਸ੍ਸਾਹਜਾਤਾ ਅਹੇਸੁਂ. ਸੋ ਪਨ ਉਪਾਸਕੋ ਤੇਸਂ ਵਾਰਪ੍ਪਤ੍ਤਭਾਵਂ ਸੁਤ੍ਵਾ ਦਾਸਿਂ ਆਣਾਪੇਸਿ – ‘‘ਯੇ, ਜੇ, ਭਿਕ੍ਖੂ ਸ੍ਵੇ ਇਧ ਆਗਮਿਸ੍ਸਨ੍ਤਿ, ਤੇ ਕਣਾਜਕੇਨ ਬਿਲਙ੍ਗਦੁਤਿਯੇਨ ਪਰਿਵਿਸਾਹੀ’’ਤਿ. ਸਾਪਿ ਤਥੇਵ ਤੇ ਭਿਕ੍ਖੂ ਆਗਤੇ ਕੋਟ੍ਠਕਪਮੁਖੇ ਨਿਸੀਦਾਪੇਤ੍ਵਾ ਭੋਜੇਸਿ. ਤੇ ਭਿਕ੍ਖੂ ਅਨਤ੍ਤਮਨਾ ਕੋਪੇਨ ਤਟਤਟਾਯਨ੍ਤਾ ਥੇਰੇ ਆਘਾਤਂ ਬਨ੍ਧਿਤ੍ਵਾ ‘‘ਮਧੁਰਭਤ੍ਤਦਾਯਕਂ ਅਮ੍ਹਾਕਂ ਅਮਧੁਰਭਤ੍ਤਂ ਦਾਪੇਤੁਂ ਏਸੋਵ ਨਿਯੋਜੇਸੀ’’ਤਿ ਦੁਕ੍ਖੀ ਦੁਮ੍ਮਨਾ ਨਿਸੀਦਿਂਸੁ. ਅਥ ਤੇ ਮੇਤ੍ਤਿਯਾ ਨਾਮ ਭਿਕ੍ਖੁਨੀ ‘‘ਕਿਂ, ਭਨ੍ਤੇ, ਦੁਮ੍ਮਨਾ’’ਤਿ ਪੁਚ੍ਛਿ. ਤੇ, ‘‘ਭਗਿਨਿ, ਕਿਂ ਅਮ੍ਹੇ ਦਬ੍ਬੇਨ ਮਲ੍ਲਪੁਤ੍ਤੇਨ ਵਿਹੇਠਿਯਮਾਨੇ ਅਜ੍ਝੁਪੇਕ੍ਖਸੀ’’ਤਿ ਆਹਂਸੁ. ‘‘ਕਿਂ, ਭਨ੍ਤੇ, ਮਯਾ ਸਕ੍ਕਾ ਕਾਤੁ’’ਨ੍ਤਿ? ‘‘ਤਸ੍ਸ ਦੋਸਂ ਆਰੋਪੇਹੀ’’ਤਿ. ਸਾ ਤਤ੍ਥ ਤਤ੍ਥ ਥੇਰਸ੍ਸ ਅਭੂਤਾਰੋਪਨਂ ਅਕਾਸਿ. ਤਂ ਸੁਤ੍ਵਾ ਭਿਕ੍ਖੂ ਭਗਵਤੋ ਆਰੋਚੇਸੁਂ. ਅਥ ਭਗਵਾ ਦਬ੍ਬਂ ਮਲ੍ਲਪੁਤ੍ਤਂ ਪਕ੍ਕੋਸਾਪੇਤ੍ਵਾ – ‘‘ਸਚ੍ਚਂ ਕਿਰ ਤ੍ਵਂ, ਦਬ੍ਬ, ਮੇਤ੍ਤਿਯਾਯ ਭਿਕ੍ਖੁਨਿਯਾ ਵਿਪ੍ਪਕਾਰਮਕਾਸੀ’’ਤਿ ਪੁਚ੍ਛਿ. ‘‘ਯਥਾ ਮਂ, ਭਨ੍ਤੇ, ਭਗਵਾ ਜਾਨਾਤੀ’’ਤਿ. ‘‘ਨ ਖੋ, ਦਬ੍ਬ, ਦਬ੍ਬਾ ਏਵਂ ਨਿਬ੍ਬੇਠੇਨ੍ਤਿ, ਕਾਰਕਭਾਵਂ ਵਾ ਅਕਾਰਕਭਾਵਂ ਵਾ ਵਦੇਹੀ’’ਤਿ. ‘‘ਅਕਾਰਕੋ ਅਹਂ, ਭਨ੍ਤੇ’’ਤਿ. ਭਗਵਾ – ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਤ੍ਵਾ ਤੇ ਭਿਕ੍ਖੂ ਅਨੁਯੁਞ੍ਜਥਾ’’ਤਿ ਆਹ. ਉਪਾਲਿਤ੍ਥੇਰਪ੍ਪਮੁਖਾ ਭਿਕ੍ਖੂ ਤਂ ਭਿਕ੍ਖੁਨਿਂ ਉਪ੍ਪਬ੍ਬਾਜੇਤ੍ਵਾ ਮੇਤ੍ਤਿਯਭੂਮਜਕੇ ਭਿਕ੍ਖੂ ਅਨੁਯੁਞ੍ਜਿਤ੍ਵਾ ਤੇਹਿ ‘‘ਅਮ੍ਹੇਹਿ ਨਿਯੋਜਿਤਾ ਸਾ ਭਿਕ੍ਖੁਨੀ’’ਤਿ ਵੁਤ੍ਤੇ ਭਗਵਤੋ ਏਕਮਤ੍ਥਂ ਆਰੋਚੇਸੁਂ. ਭਗਵਾ ਮੇਤ੍ਤਿਯਭੂਮਜਕਾਨਂ ਭਿਕ੍ਖੂਨਂ ਅਮੂਲਕਸਙ੍ਘਾਦਿਸੇਸਂ ਪਞ੍ਞਪੇਸਿ.

ਤੇਨ ਚ ਸਮਯੇਨ ਦਬ੍ਬਤ੍ਥੇਰੋ ਭਿਕ੍ਖੂਨਂ ਸੇਨਾਸਨਂ ਪਞ੍ਞਾਪੇਨ੍ਤੋ ਵੇਲ਼ੁਵਨਵਿਹਾਰਸ੍ਸ ਸਾਮਨ੍ਤਾ ਅਟ੍ਠਾਰਸਮਹਾਵਿਹਾਰੇ ਸਭਾਗੇ ਭਿਕ੍ਖੂ ਪੇਸੇਨ੍ਤੋ ਰਤ੍ਤਿਭਾਗੇ ਅਨ੍ਧਕਾਰੇ ਅਙ੍ਗੁਲਿਯਾ ਪਦੀਪਂ ਜਾਲੇਤ੍ਵਾ ਤੇਨੇਵਾਲੋਕੇਨ ਅਨਿਦ੍ਧਿਮਨ੍ਤੇ ਭਿਕ੍ਖੂ ਪੇਸੇਸਿ. ਏਵਂ ਥੇਰਸ੍ਸ ਸੇਨਾਸਨਪਞ੍ਞਾਪਨਭਤ੍ਤੁਦ੍ਦੇਸਨਕਿਚ੍ਚੇ ਪਾਕਟੇ ਜਾਤੇ ਸਤ੍ਥਾ ਅਰਿਯਗਣਮਜ੍ਝੇ ਦਬ੍ਬਤ੍ਥੇਰਂ ਠਾਨਨ੍ਤਰੇ ਠਪੇਨ੍ਤੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਸੇਨਾਸਨਪਞ੍ਞਾਪਕਾਨਂ ਯਦਿਦਂ ਦਬ੍ਬੋ ਮਲ੍ਲਪੁਤ੍ਤੋ’’ਤਿ (ਅ. ਨਿ. ੧.੨੦੯, ੨੧੪) ਏਤਦਗ੍ਗੇ ਠਪੇਸਿ.

੧੦੮. ਥੇਰੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਇਤੋ ਏਕਨਵੁਤੇ ਕਪ੍ਪੇ ਵਿਪਸ੍ਸੀ ਨਾਮ ਨਾਯਕੋ ਲੋਕੇ ਉਪ੍ਪਜ੍ਜੀਤਿ ਸਮ੍ਬਨ੍ਧੋ.

੧੨੫. ਦੁਟ੍ਠਚਿਤ੍ਤੋਤਿ ਦੂਸਿਤਚਿਤ੍ਤੋ ਅਸਾਧੁਸਙ੍ਗਮੇਨ ਅਪਸਨ੍ਨਚਿਤ੍ਤੋਤਿ ਅਤ੍ਥੋ. ਉਪਵਦਿਂ ਸਾਵਕਂ ਤਸ੍ਸਾਤਿ ਤਸ੍ਸ ਭਗਵਤੋ ਖੀਣਾਸਵਂ ਸਾਵਕਂ ਉਪਵਦਿਂ, ਉਪਰਿ ਅਭੂਤਂ ਵਚਨਂ ਆਰੋਪੇਸਿਂ, ਅਬ੍ਭਕ੍ਖਾਨਂ ਅਕਾਸਿਨ੍ਤਿ ਅਤ੍ਥੋ.

੧੩੨. ਦੁਨ੍ਦੁਭਿਯੋਤਿ ਦੁਨ੍ਦੁਂ ਇਤਿ ਸਦ੍ਦਾਯਨਤੋ ਦੁਨ੍ਦੁਭਿਸਙ੍ਖਾਤਾ ਭੇਰਿਯੋ. ਨਾਦਯਿਂਸੂਤਿ ਸਦ੍ਦਂ ਕਰਿਂਸੁ. ਸਮਨ੍ਤਤੋ ਅਸਨਿਯੋਤਿ ਸਬ੍ਬਦਿਸਾਭਾਗਤੋ ਅਸਨੇ ਵਿਨਾਸਨੇ ਨਿਯੁਤ੍ਤੋਤਿ ਅਸਨਿਯੋ, ਦੇਵਦਣ੍ਡਾ ਭਯਾਵਹਾ ਫਲਿਂਸੂਤਿ ਸਮ੍ਬਨ੍ਧੋ.

੧੩੩. ਉਕ੍ਕਾ ਪਤਿਂਸੁ ਨਭਸਾਤਿ ਆਕਾਸਤੋ ਅਗ੍ਗਿਕ੍ਖਨ੍ਧਾ ਚ ਪਤਿਂਸੂਤਿ ਅਤ੍ਥੋ. ਧੂਮਕੇਤੁ ਚ ਦਿਸ੍ਸਤੀਤਿ ਧੂਮਰਾਜਿਸਹਿਤੋ ਅਗ੍ਗਿਕ੍ਖਨ੍ਧੋ ਚ ਦਿਸ੍ਸਤਿ ਪਞ੍ਞਾਯਤੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਦਬ੍ਬਮਲ੍ਲਪੁਤ੍ਤਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਕੁਮਾਰਕਸ੍ਸਪਤ੍ਥੇਰਅਪਦਾਨਵਣ੍ਣਨਾ

ਪਞ੍ਚਮਾਪਦਾਨੇ ਇਤੋ ਸਤਸਹਸ੍ਸਮ੍ਹੀਤਿਆਦਿਕਂ ਆਯਸ੍ਮਤੋ ਕੁਮਾਰਕਸ੍ਸਪਤ੍ਥੇਰਸ੍ਸ ਅਪਦਾਨਂ. ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਚਿਤ੍ਤਕਥਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਪਣਿਧਾਨਂ ਕਤ੍ਵਾ ਤਦਨੁਰੂਪਾਨਿ ਪੁਞ੍ਞਾਨਿ ਕਰੋਨ੍ਤੋ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਕਸ੍ਸਪਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਤਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੋ ਦਿਬ੍ਬਸੁਖਂ ਮਾਨੁਸਸੁਖਞ੍ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਏਕਿਸ੍ਸਾ ਸੇਟ੍ਠਿਧੀਤਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ. ਸਾ ਕਿਰ ਕੁਮਾਰਿਕਾਕਾਲੇਯੇਵ ਪਬ੍ਬਜਿਤੁਕਾਮਾ ਮਾਤਾਪਿਤਰੋ ਯਾਚਿਤ੍ਵਾ ਪਬ੍ਬਜ੍ਜਂ ਅਲਭਮਾਨਾ ਪਤਿਕੁਲਂ ਗਨ੍ਤ੍ਵਾ ਗਬ੍ਭਂ ਗਣ੍ਹਿਤ੍ਵਾ ਤਂ ਅਜਾਨਿਤ੍ਵਾ ‘‘ਸਾਮਿਕਂ ਆਰਾਧੇਤ੍ਵਾ ਪਬ੍ਬਜ੍ਜਂ ਅਨੁਜਾਨਾਪੇਸ੍ਸਾਮੀ’’ਤਿ ਚਿਨ੍ਤੇਸਿ. ਸਾ ਸਾਮਿਕਂ ਆਰਾਧੇਨ੍ਤੀ, ਅਯ੍ਯਪੁਤ੍ਤ –

‘‘ਸਚੇ ਇਮਸ੍ਸ ਕਾਯਸ੍ਸ, ਅਨ੍ਤੋ ਬਾਹਿਰਕੋ ਸਿਯਾ;

ਦਣ੍ਡਂ ਨੂਨ ਗਹੇਤ੍ਵਾਨ, ਕਾਕੇ ਸੋਣੇ ਨਿਵਾਰਯੇ’’ਤਿ. (ਵਿਸੁਦ੍ਧਿ. ੧.੧੨੨) –

ਆਦਿਨਾ ਸਰੀਰਸ੍ਸ ਦੋਸਂ ਦਸ੍ਸੇਨ੍ਤੀ ਤਂ ਆਰਾਧੇਸਿ.

ਸਾ ਸਾਮਿਕੇਨ ਅਨੁਞ੍ਞਾਤਾ ਗਬ੍ਭਿਨਿਭਾਵਂ ਅਜਾਨਨ੍ਤੀ ਦੇਵਦਤ੍ਤਪਕ੍ਖਿਯਾਸੁ ਭਿਕ੍ਖੁਨੀਸੁ ਪਬ੍ਬਜਿ. ਤਸ੍ਸਾ ਗਬ੍ਭਿਨਿਭਾਵਂ ਦਿਸ੍ਵਾ ਭਿਕ੍ਖੁਨਿਯੋ ਦੇਵਦਤ੍ਤਂ ਪੁਚ੍ਛਿਂਸੁ. ਸੋ ‘‘ਅਸ੍ਸਮਣੀ’’ਤਿ ਆਹ. ਸਾ ‘‘ਨਾਹਂ ਦੇਵਦਤ੍ਤਂ ਉਦ੍ਦਿਸ੍ਸ ਪਬ੍ਬਜਿਤਾ, ਭਗਵਨ੍ਤਂ ਉਦ੍ਦਿਸ੍ਸ ਪਬ੍ਬਜਿਤਾ’’ਤਿ ਭਗਵਤੋ ਸਨ੍ਤਿਕਂ ਗਨ੍ਤ੍ਵਾ ਦਸਬਲਂ ਪੁਚ੍ਛਿ. ਸਤ੍ਥਾ ਉਪਾਲਿਤ੍ਥੇਰਂ ਪਟਿਚ੍ਛਾਪੇਸਿ. ਥੇਰੋ ਸਾਵਤ੍ਥਿਨਗਰਵਾਸੀਨਿ ਕੁਲਾਨਿ ਵਿਸਾਖਞ੍ਚ ਉਪਾਸਿਕਂ ਪਕ੍ਕੋਸਾਪੇਤ੍ਵਾ ਸਰਾਜਿਕਾਯ ਪਰਿਸਾਯ ਤਂ ਵਿਨਿਚ੍ਛਿਨਨ੍ਤੋ ‘‘ਪੁਰੇ ਲਦ੍ਧੋ ਗਬ੍ਭੋ, ਅਰੋਗਾ ਪਬ੍ਬਜ੍ਜਾ’’ਤਿ ਆਹ. ਤਂ ਸੁਤ੍ਵਾ ਸਤ੍ਥਾ ‘‘ਸਾਧੁ ਸੁਵਿਨਿਚ੍ਛਿਤਂ ਉਪਾਲਿਨਾ ਅਧਿਕਰਣ’’ਨ੍ਤਿ ਥੇਰਸ੍ਸ ਸਾਧੁਕਾਰਂ ਅਦਾਸਿ.

ਸਾ ਭਿਕ੍ਖੁਨੀ ਸੁਵਣ੍ਣਬਿਮ੍ਬਸਦਿਸਂ ਪੁਤ੍ਤਂ ਵਿਜਾਯਿ. ਤਂ ਰਾਜਾ ਪਸੇਨਦਿ ਕੋਸਲੋ ‘‘ਦਾਰਕਪਰਿਹਰਣਂ ਭਿਕ੍ਖੁਨੀਨਂ ਪਲਿਬੋਧੋ’’ਤਿ ਧਾਤੀਨਂ ਦਾਪੇਤ੍ਵਾ ਪੋਸਾਪੇਸਿ, ਕਸ੍ਸਪੋਤਿਸ੍ਸ ਨਾਮਂ ਕਰਿਂਸੁ. ਅਪਰਭਾਗੇ ਅਲਙ੍ਕਰਿਤ੍ਵਾ ਸਤ੍ਥੁ ਸਨ੍ਤਿਕਂ ਨੇਤ੍ਵਾ ਪਬ੍ਬਾਜੇਸਿ. ਕੁਮਾਰਕਾਲੇ ਪਬ੍ਬਜਿਤਤ੍ਤਾ ਪਨ ਭਗਵਤਾ ‘‘ਕਸ੍ਸਪਂ ਪਕ੍ਕੋਸਥ, ਇਦਂ ਫਲਂ ਵਾ ਖਾਦਨੀਯਂ ਵਾ ਕਸ੍ਸਪਸ੍ਸ ਦੇਥਾ’’ਤਿ ਵੁਤ੍ਤੇ ‘‘ਕਤਰਕਸ੍ਸਪਸ੍ਸਾ’’ਤਿ ‘‘ਕੁਮਾਰਕਸ੍ਸਪਸ੍ਸਾ’’ਤਿ ਏਵਂ ਗਹਿਤਨਾਮਤ੍ਤਾ ਰਞ੍ਞਾ ਪੋਸਾਵਨੀਯਪੁਤ੍ਤਤ੍ਤਾ ਚ ਵੁਦ੍ਧਕਾਲੇਪਿ ਕੁਮਾਰਕਸ੍ਸਪੋਤ੍ਵੇਵ ਪਞ੍ਞਾਯਿਤ੍ਥ.

ਸੋ ਪਬ੍ਬਜਿਤਕਾਲਤੋ ਪਟ੍ਠਾਯ ਵਿਪਸ੍ਸਨਾਯ ਕਮ੍ਮਂ ਕਰੋਤਿ, ਬੁਦ੍ਧਵਚਨਞ੍ਚ ਉਗ੍ਗਣ੍ਹਾਤਿ. ਅਥ ਤੇਨ ਸਦ੍ਧਿਂ ਪਬ੍ਬਤਮਤ੍ਥਕੇ ਸਮਣਧਮ੍ਮਂ ਕਤ੍ਵਾ ਅਨਾਗਾਮੀ ਹੁਤ੍ਵਾ ਸੁਦ੍ਧਾਵਾਸੇ ਨਿਬ੍ਬਤ੍ਤਮਹਾਬ੍ਰਹ੍ਮਾ ‘‘ਵਿਪਸ੍ਸਨਾਯ ਮੁਖਂ ਦਸ੍ਸੇਤ੍ਵਾ ਮਗ੍ਗਫਲੁਪ੍ਪਤ੍ਤਿਯਾ ਉਪਾਯਂ ਕਰਿਸ੍ਸਾਮੀ’’ਤਿ ਪਞ੍ਚਦਸਪਞ੍ਹੇ ਅਭਿਸਙ੍ਖਰਿਤ੍ਵਾ ਅਨ੍ਧਵਨੇ ਵਸਨ੍ਤਸ੍ਸ ਥੇਰਸ੍ਸ ‘‘ਇਮੇ ਪਞ੍ਹੇ ਸਤ੍ਥਾਰਂ ਪੁਚ੍ਛੇਯ੍ਯਾਸੀ’’ਤਿ ਆਚਿਕ੍ਖਿ. ਤਤੋ ਸੋ ਤੇ ਪਞ੍ਹੇ ਭਗਵਨ੍ਤਂ ਪੁਚ੍ਛਿ. ਭਗਵਾਪਿਸ੍ਸ ਵਿਸ੍ਸਜ੍ਜੇਸਿ. ਥੇਰੋ ਭਗਵਤਾ ਕਥਿਤਨਿਯਾਮੇਨੇਵ ਤੇ ਉਗ੍ਗਣ੍ਹਿਤ੍ਵਾ ਵਿਪਸ੍ਸਨਂ ਗਬ੍ਭਂ ਗਾਹਾਪੇਤ੍ਵਾ ਅਰਹਤ੍ਤਂ ਪਾਪੁਣਿ.

੧੫੦. ਸੋ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਇਤੋ ਸਤਸਹਸ੍ਸਮ੍ਹੀਤਿਆਦਿਮਾਹ. ਤਤ੍ਥ ਯਂ ਹੇਟ੍ਠਾ ਵੁਤ੍ਤਨਯਞ੍ਚ ਉਤ੍ਤਾਨਤ੍ਥਞ੍ਚ, ਤਂ ਸਬ੍ਬਂ ਨ ਵਣ੍ਣਯਿਸ੍ਸਾਮ. ਅਨੁਤ੍ਤਾਨਪਦਮੇਵ ਵਣ੍ਣਯਿਸ੍ਸਾਮ.

੧੬੯. ਆਪਨ੍ਨਸਤ੍ਤਾ ਮੇ ਮਾਤਾਤਿ ਮਯ੍ਹਂ ਮਾਤਾ ਗਰੁਗਬ੍ਭਾ ਗਬ੍ਭਿਨੀ ਪਸੁਤਾਸਨ੍ਨਗਬ੍ਭਾਤਿ ਅਤ੍ਥੋ.

੧੭੩. ਵਮ੍ਮਿਕਸਦਿਸਂ ਕਾਯਨ੍ਤਿ ਸਰੀਰਂ ਨਾਮ ਵਮ੍ਮਿਕਸਦਿਸਂ ਯਥਾ ਵਮ੍ਮਿਕੋ ਇਤੋ ਚਿਤੋ ਚ ਛਿਦ੍ਦਾਵਛਿਦ੍ਦੋ ਘਰਗੋਲ਼ਿਕਉਪਚਿਕਾਦੀਨਂ ਆਸਯੋ, ਏਵਮੇਵ ਅਯਂ ਕਾਯੋ ਨਵਛਿਦ੍ਦੋ ਧੁਵਸ੍ਸਵੋਤਿ ਬੁਦ੍ਧੇਨ ਭਗਵਤਾ ਦੇਸਿਤਂ ਪਕਾਸਿਤਂ ਤਂ ਸੁਤ੍ਵਾ ਮੇ ਚਿਤ੍ਤਂ ਆਸਵੇ ਅਗ੍ਗਹੇਤ੍ਵਾ ਅਸੇਸੇਤ੍ਵਾ ਕਿਲੇਸਤੋ ਵਿਮੁਚ੍ਚਿ, ਅਰਹਤ੍ਤੇ ਪਤਿਟ੍ਠਾਸੀਤਿ ਅਤ੍ਥੋ. ਅਪਰਭਾਗੇ ਤਤ੍ਥ ਤਤ੍ਥ ਭਿਕ੍ਖੂਨਂ ਵਿਚਿਤ੍ਤਧਮ੍ਮਕਥਿਕਭਾਵਂ ਸੁਤ੍ਵਾ ਸਤ੍ਥਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਚਿਤ੍ਤਕਥਿਕਾਨਂ ਯਦਿਦਂ ਕੁਮਾਰਕਸ੍ਸਪੋ’’ਤਿ (ਅ. ਨਿ. ੧.੨੦੯, ੨੧੭) ਏਤਦਗ੍ਗੇ ਠਪੇਸੀਤਿ.

ਕੁਮਾਰਕਸ੍ਸਪਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਬਾਹਿਯਤ੍ਥੇਰਅਪਦਾਨਵਣ੍ਣਨਾ

ਛਟ੍ਠਾਪਦਾਨੇ ਇਤੋ ਸਤਸਹਸ੍ਸਮ੍ਹੀਤਿਆਦਿਕਂ ਆਯਸ੍ਮਤੋ ਬਾਹਿਯਸ੍ਸ ਦਾਰੁਚੀਰਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਬ੍ਰਾਹ੍ਮਣਸਿਪ੍ਪੇਸੁ ਨਿਪ੍ਫਤ੍ਤਿਂ ਗਨ੍ਤ੍ਵਾ ਵੇਦਙ੍ਗੇਸੁ ਅਨਵਯੋ ਏਕਦਿਵਸਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਪਸਨ੍ਨਮਾਨਸੋ ਸਤ੍ਥਾਰਂ ਏਕਂ ਭਿਕ੍ਖੁਂ ਖਿਪ੍ਪਾਭਿਞ੍ਞਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਤਂ ਠਾਨਂ ਪਤ੍ਤੁਕਾਮੋ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਤੋ ਪਾਦਮੂਲੇ ਨਿਪਨ੍ਨੋ ‘‘ਭਗਵਾ, ਭਨ੍ਤੇ, ਇਤੋ ਸਤ੍ਤਮੇ ਦਿਵਸੇ ਯਂ ਭਿਕ੍ਖੁਂ ਖਿਪ੍ਪਾਭਿਞ੍ਞਾਨਂ ਅਗ੍ਗਟ੍ਠਾਨੇ ਠਪੇਸਿ, ਸੋ ਵਿਯ ਅਹਮ੍ਪਿ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਖਿਪ੍ਪਾਭਿਞ੍ਞਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਭਗਵਾ ਅਨਾਗਤਂਸਞਾਣੇਨ ਓਲੋਕੇਤ੍ਵਾ ਸਮਿਜ੍ਝਨਭਾਵਂ ਞਤ੍ਵਾ ‘‘ਅਨਾਗਤੇ ਗੋਤਮਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਖਿਪ੍ਪਾਭਿਞ੍ਞਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਯਾਵਤਾਯੁਕਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ ਤਤ੍ਥ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਪੁਨ ਮਨੁਸ੍ਸੇਸੁ ਚਕ੍ਕਵਤ੍ਤਿਆਦਿਸਮ੍ਪਤ੍ਤਿਯੋ ਅਨੇਕਕਪ੍ਪਕੋਟਿਸਤੇਸੁ ਅਨੁਭਵਿਤ੍ਵਾ ਕਸ੍ਸਪਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ, ਭਗਵਤਿ ਪਰਿਨਿਬ੍ਬੁਤੇ ਪਬ੍ਬਜਿਤੋ ਯਦਾ ਸਾਸਨੇ ਓਸਕ੍ਕਮਾਨੇ ਸਤ੍ਤ ਭਿਕ੍ਖੂ ਚਤੁਨ੍ਨਂ ਪਰਿਸਾਨਂ ਅਜ੍ਝਾਚਾਰਂ ਦਿਸ੍ਵਾ ਸਂਵੇਗਪ੍ਪਤ੍ਤਾ ਅਰਞ੍ਞਂ ਪਵਿਸਿਤ੍ਵਾ ‘‘ਯਾਵ ਸਾਸਨਸ੍ਸ ਅਨ੍ਤਰਧਾਨਂ ਨ ਹੋਤਿ, ਤਾਵ ਅਤ੍ਤਨੋ ਪਤਿਟ੍ਠਂ ਕਰਿਸ੍ਸਾਮਾ’’ਤਿ ਸੁਵਣ੍ਣਚੇਤਿਯਂ ਵਨ੍ਦਿਤ੍ਵਾ ਤਤ੍ਥ ਅਰਞ੍ਞੇ ਏਕਂ ਪਬ੍ਬਤਂ ਦਿਸ੍ਵਾ ‘‘ਜੀਵਿਤਸਾਲਯਾ ਨਿਵਤ੍ਤਨ੍ਤੁ, ਨਿਰਾਲਯਾ ਇਮਂ ਪਬ੍ਬਤਂ ਅਭਿਰੁਹਨ੍ਤੂ’’ਤਿ ਨਿਸ੍ਸੇਣਿਂ ਬਨ੍ਧਿਤ੍ਵਾ ਸਬ੍ਬੇ ਤਂ ਪਬ੍ਬਤਂ ਅਭਿਰੁਯ੍ਹ ਨਿਸ੍ਸੇਣਿਂ ਪਾਤੇਤ੍ਵਾ ਸਮਣਧਮ੍ਮਂ ਕਰਿਂਸੁ. ਤੇਸੁ ਸਙ੍ਘਤ੍ਥੇਰੋ ਏਕਰਤ੍ਤਾਤਿਕ੍ਕਮੇਨ ਅਰਹਤ੍ਤਂ ਪਾਪੁਣਿ. ਸੋ ਅਨੋਤਤ੍ਤਦਹੇ ਨਾਗਲਤਾਦਨ੍ਤਕਟ੍ਠਂ ਖਾਦਿਤ੍ਵਾ ਮੁਖਂ ਧੋਵਿਤ੍ਵਾ ਉਤ੍ਤਰਕੁਰੁਤੋ ਪਿਣ੍ਡਪਾਤਂ ਆਹਰਿਤ੍ਵਾ ਤੇ ਭਿਕ੍ਖੂ ਆਹ – ‘‘ਆਵੁਸੋ, ਇਮਂ ਪਿਣ੍ਡਪਾਤਂ ਭੁਞ੍ਜਥਾ’’ਤਿ. ਤੇ ਆਹਂਸੁ – ‘‘ਕਿਂ, ਭਨ੍ਤੇ, ਅਮ੍ਹੇਹਿ ਏਵਂ ਕਤਿਕਾ ਕਤਾ ‘ਯੋ ਪਠਮਂ ਅਰਹਤ੍ਤਂ ਪਾਪੁਣਾਤਿ, ਤੇਨਾਭਤਂ ਪਿਣ੍ਡਪਾਤਂ ਅਵਸੇਸਾ ਪਰਿਭੁਞ੍ਜਨ੍ਤੂ’’’ਤਿ? ‘‘ਨੋ ਹੇਤਂ, ਆਵੁਸੋ’’ਤਿ. ‘‘ਤੇਨ ਹਿ ਸਚੇ ਮਯਮ੍ਪਿ ਤੁਮ੍ਹੇ ਵਿਯ ਵਿਸੇਸਂ ਨਿਬ੍ਬਤ੍ਤੇਸ੍ਸਾਮ, ਸਯਂ ਆਹਰਿਤ੍ਵਾ ਭੁਞ੍ਜਿਸ੍ਸਾਮਾ’’ਤਿ ਨ ਇਚ੍ਛਿਂਸੁ.

ਦੁਤਿਯਦਿਵਸੇ ਦੁਤਿਯਤ੍ਥੇਰੋ ਅਨਾਗਾਮੀ ਹੁਤ੍ਵਾ ਤਥੇਵ ਪਿਣ੍ਡਪਾਤਂ ਆਹਰਿਤ੍ਵਾ ਇਤਰੇ ਨਿਮਨ੍ਤੇਸਿ. ਤੇ ਏਵਮਾਹਂਸੁ – ‘‘ਕਿਂ ਪਨਾਵੁਸੋ, ਕਤਿਕਾ ਕਤਾ, ‘ਮਹਾਥੇਰੇਨ ਆਭਤਂ ਪਿਣ੍ਡਪਾਤਂ ਅਭੁਞ੍ਜਿਤ੍ਵਾ ਅਨੁਥੇਰੇਨ ਆਭਤਂ ਭੁਞ੍ਜਿਸ੍ਸਾਮਾ’’’ਤਿ? ‘‘ਨੋ ਹੇਤਂ, ਆਵੁਸੋ’’ਤਿ. ‘‘ਏਵਂ ਸਨ੍ਤੇ ਤੁਮ੍ਹੇ ਵਿਯ ਮਯਮ੍ਪਿ ਵਿਸੇਸਂ ਨਿਬ੍ਬਤ੍ਤੇਤ੍ਵਾ ਅਤ੍ਤਨੋ ਅਤ੍ਤਨੋ ਪੁਰਿਸਕਾਰੇਨ ਭੁਞ੍ਜਿਤੁਂ ਸਕ੍ਕੋਨ੍ਤਾ ਭੁਞ੍ਜਿਸ੍ਸਾਮਾ’’ਤਿ ਨ ਇਚ੍ਛਿਂਸੁ. ਤੇਸੁ ਅਰਹਤ੍ਤਪ੍ਪਤ੍ਤਤ੍ਥੇਰੋ ਪਰਿਨਿਬ੍ਬਾਯਿ, ਦੁਤਿਯੋ ਅਨਾਗਾਮੀ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ, ਇਤਰੇ ਪਞ੍ਚ ਵਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤਾ ਸੁਸ੍ਸਿਤ੍ਵਾ ਸਤ੍ਤਮੇ ਦਿਵਸੇ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਂਸੁ. ਤਤ੍ਥ ਦਿਬ੍ਬਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਤਤੋ ਚਵਿਤ੍ਵਾ ਮਨੁਸ੍ਸੇਸੁ ਨਿਬ੍ਬਤ੍ਤਿਂਸੁ. ਤੇਸੁ ਏਕੋ ਪੁਕ੍ਕੁਸਾਤਿ ਰਾਜਾ ਅਹੋਸਿ, ਏਕੋ ਗਨ੍ਧਾਰਰਟ੍ਠੇ ਤਕ੍ਕਸਿਲਾਯਂ ਕੁਮਾਰਕਸ੍ਸਪੋ, ਏਕੋ ਬਾਹਿਯੋ ਦਾਰੁਚੀਰਿਯੋ, ਏਕੋ ਦਬ੍ਬੋ ਮਲ੍ਲਪੁਤ੍ਤੋ, ਏਕੋ ਸਭਿਯੋ ਪਰਿਬ੍ਬਾਜਕੋਤਿ. ਤੇਸੁ ਅਯਂ ਬਾਹਿਯੋ ਦਾਰੁਚੀਰਿਯੋ ਸੁਪ੍ਪਾਰਕਪਟ੍ਟਨੇ ਵਾਣਿਜਕੁਲੇ ਨਿਬ੍ਬਤ੍ਤੋ ਵਾਣਿਜਕਮ੍ਮੇ ਨਿਪ੍ਫਤ੍ਤਿਂ ਗਤੋ ਮਹਦ੍ਧਨੋ ਮਹਾਭੋਗੋ, ਸੋ ਸੁਵਣ੍ਣਭੂਮਿਂ ਗਚ੍ਛਨ੍ਤੇਹਿ ਵਾਣਿਜੇਹਿ ਸਦ੍ਧਿਂ ਨਾਵਮਾਰੁਯ੍ਹ ਵਿਦੇਸਂ ਗਚ੍ਛਨ੍ਤੋ ਕਤਿਪਾਹਂ ਗਨ੍ਤ੍ਵਾ ਭਿਨ੍ਨਾਯ ਨਾਵਾਯ ਸੇਸੇਸੁ ਮਚ੍ਛਕਚ੍ਛਪਭਕ੍ਖੇਸੁ ਜਾਤੇਸੁ ਏਕੋਯੇਵ ਅਵਸਿਟ੍ਠੋ ਏਕਂ ਫਲਕਂ ਗਹੇਤ੍ਵਾ ਵਾਯਮਨ੍ਤੋ ਸਤ੍ਤਮੇ ਦਿਵਸੇ ਸੁਪ੍ਪਾਰਕਪਟ੍ਟਨਤੀਰਂ ਓਕ੍ਕਮਿ. ਤਸ੍ਸ ਨਿਵਾਸਨਪਾਰੁਪਨਂ ਨਤ੍ਥਿ, ਸੋ ਅਞ੍ਞਂ ਕਿਞ੍ਚਿ ਅਪਸ੍ਸਨ੍ਤੋ ਸੁਕ੍ਖਕਟ੍ਠਦਣ੍ਡਕੇ ਵਾਕੇਹਿ ਪਲਿਵੇਠੇਤ੍ਵਾ ਨਿਵਾਸੇਤ੍ਵਾ ਪਾਰੁਪਿਤ੍ਵਾ ਚ ਦੇਵਕੁਲਤੋ ਕਪਾਲਂ ਗਹੇਤ੍ਵਾ ਸੁਪ੍ਪਾਰਕਪਟ੍ਟਨਂ ਅਗਮਾਸਿ. ਮਨੁਸ੍ਸਾ ਤਂ ਦਿਸ੍ਵਾ ਯਾਗੁਭਤ੍ਤਾਦੀਨਿ ਦਤ੍ਵਾ ‘‘ਅਯਂ ਏਕੋ ਅਰਹਾ’’ਤਿ ਸਮ੍ਭਾਵੇਸੁਂ. ਸੋ ਵਤ੍ਥੇਸੁ ਉਪਨੀਤੇਸੁ ‘‘ਸਚਾਹਂ ਨਿਵਾਸੇਮਿ, ਪਾਰੁਪਾਮਿ ਵਾ, ਲਾਭਸਕ੍ਕਾਰੋ ਮੇ ਪਰਿਹਾਯਿਸ੍ਸਤੀ’’ਤਿ ਤਾਨਿ ਪਟਿਕ੍ਖਿਪਿਤ੍ਵਾ ਦਾਰੁਚੀਰਾਨੇਵ ਪਰਿਹਰਿ.

ਅਥਸ੍ਸ ‘‘ਅਰਹਾ, ਅਰਹਾ’’ਤਿ ਬਹੂਹਿ ਸਮ੍ਭਾਵਿਯਮਾਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ‘‘ਯੇ ਕੇਚਿ ਲੋਕੇ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ, ਅਹਂ ਤੇਸਂ ਅਞ੍ਞਤਰੋ’’ਤਿ ਸੋ ਤੇਨ ਨਿਯਾਮੇਨ ਕੁਹਨਕਮ੍ਮੇਨ ਜੀਵਿਕਂ ਕਪ੍ਪੇਤਿ.

ਕਸ੍ਸਪਦਸਬਲਸ੍ਸ ਸਾਸਨੇ ਸਤ੍ਤਸੁ ਜਨੇਸੁ ਪਬ੍ਬਤਂ ਆਰੁਯ੍ਹ ਸਮਣਧਮ੍ਮਂ ਕਰੋਨ੍ਤੇਸੁ ਏਕੋ ਅਨਾਗਾਮੀ ਹੁਤ੍ਵਾ ਸੁਦ੍ਧਾਵਾਸਬ੍ਰਹ੍ਮਲੋਕੇ ਨਿਬ੍ਬਤ੍ਤਿਤ੍ਵਾ ਅਤ੍ਤਨੋ ਬ੍ਰਹ੍ਮਸਮ੍ਪਤ੍ਤਿਂ ਓਲੋਕੇਨ੍ਤੋ ਆਗਤਟ੍ਠਾਨਂ ਆਵਜ੍ਜੇਨ੍ਤੋ ਪਬ੍ਬਤਮਾਰੁਯ੍ਹ ਸਮਣਧਮ੍ਮਂ ਕਰਣਟ੍ਠਾਨਂ ਦਿਸ੍ਵਾ ਸੇਸਾਨਂ ਨਿਬ੍ਬਤ੍ਤਨਟ੍ਠਾਨਂ ਆਵਜ੍ਜੇਨ੍ਤੋ ਏਕਸ੍ਸ ਪਰਿਨਿਬ੍ਬੁਤਭਾਵਂ ਇਤਰੇਸਞ੍ਚ ਪਞ੍ਚਨ੍ਨਂ ਕਾਮਾਵਚਰਦੇਵਲੋਕੇ ਨਿਬ੍ਬਤ੍ਤਭਾਵਂ ਞਤ੍ਵਾ ਤੇ ਕਾਲਾਨੁਕਾਲਂ ਆਵਜ੍ਜੇਸਿ ‘‘ਇਮਸ੍ਮਿਂ ਪਨ ਕਾਲੇ ਕਹਂ ਨੁ ਖੋ ਤੇ’’ਤਿ ਆਵਜ੍ਜੇਨ੍ਤੋ ਦਾਰੁਚੀਰਿਯਂ ਸੁਪ੍ਪਾਰਕਪਟ੍ਟਨਂ ਨਿਸ੍ਸਾਯ ਕੁਹਨਕਮ੍ਮੇਨ ਜੀਵਿਤਂ ਕਪ੍ਪੇਨ੍ਤਂ ਦਿਸ੍ਵਾ ‘‘ਨਟ੍ਠੋ ਵਤਾਯਂ ਬਾਲੋ, ਪੁਬ੍ਬੇ ਸਮਣਧਮ੍ਮਂ ਕਰੋਨ੍ਤੋ ਅਤਿਉਕ੍ਕਟ੍ਠਭਾਵੇਨ ਅਰਹਤਾਪਿ ਆਭਤਂ ਪਿਣ੍ਡਪਾਤਂ ਅਪਰਿਭੁਞ੍ਜਿਤ੍ਵਾ ਇਦਾਨਿ ਉਦਰਹੇਤੁ ਅਨਾਰਹਾਵ ਸਮਾਨੋ ਅਰਹਤ੍ਤਂ ਪਟਿਜਾਨਿਤ੍ਵਾ ਲੋਕਂ ਵਞ੍ਚੇਨ੍ਤੋ ਵਿਚਰਤਿ, ਦਸਬਲਸ੍ਸ ਉਪ੍ਪਨ੍ਨਭਾਵਂ ਨ ਜਾਨਾਤਿ, ਗਚ੍ਛਾਮਿ ਨਂ ਸਂਵੇਜੇਤ੍ਵਾ ਬੁਦ੍ਧੁਪ੍ਪਾਦਂ ਜਾਨਾਪੇਸ੍ਸਾਮੀ’’ਤਿ ਖਣੇਨੇਵ ਬ੍ਰਹ੍ਮਲੋਕਤੋ ਓਤਰਿਤ੍ਵਾ ਸੁਪ੍ਪਾਰਕਪਟ੍ਟਨੇ ਰਤ੍ਤਿਭਾਗਸਮਨਨ੍ਤਰੇ ਦਾਰੁਚੀਰਿਯਸ੍ਸ ਸਮ੍ਮੁਖੇ ਪਾਤੁਰਹੋਸਿ. ਸੋ ਅਤ੍ਤਨੋ ਵਸਨਟ੍ਠਾਨੇ ਓਭਾਸਂ ਦਿਸ੍ਵਾ ਬਹਿ ਨਿਕ੍ਖਮਿਤ੍ਵਾ ਮਹਾਬ੍ਰਹ੍ਮਾਨਂ ਦਿਸ੍ਵਾ ਅਞ੍ਜਲਿਂ ਪਗ੍ਗਯ੍ਹ ‘‘ਕੇ ਤੁਮ੍ਹੇ’’ਤਿ ਪੁਚ੍ਛਿ. ‘‘ਅਹਂ ਤੁਮ੍ਹਾਕਂ ਪੋਰਾਣਕਸਹਾਯੋ ਅਨਾਗਾਮਿਫਲਂ ਪਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ, ਅਮ੍ਹਾਕਂ ਸਬ੍ਬਜੇਟ੍ਠਕੋ ਅਰਹਾ ਹੁਤ੍ਵਾ ਪਰਿਨਿਬ੍ਬੁਤੋ, ਤੁਮ੍ਹੇ ਪਨ ਪਞ੍ਚਜਨਾ ਦੇਵਲੋਕੇ ਨਿਬ੍ਬਤ੍ਤਾ. ਸ੍ਵਾਹਂ ਦਾਨਿ ਤਂ ਇਮਸ੍ਮਿਂ ਠਾਨੇ ਕੁਹਨਕਮ੍ਮੇਨ ਜੀਵਿਕਂ ਕਪ੍ਪੇਨ੍ਤਂ ਦਿਸ੍ਵਾ ਦਮਿਤੁਂ ਆਗਤੋ’’ਤਿ ਵਤ੍ਵਾ ਇਦਂ ਕਾਰਣਂ ਆਹ – ‘‘ਨੇਵ ਖੋ ਤ੍ਵਂ, ਬਾਹਿਯ, ਅਰਹਾ ਨਾਪਿ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨੋ, ਸਾਪਿ ਤੇ ਪਟਿਪਦਾ ਨਤ੍ਥਿ, ਯਾਯ ਤ੍ਵਂ ਅਰਹਾ ਵਾ ਅਸ੍ਸ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨੋ’’ਤਿ. ਅਥਸ੍ਸ ਸਤ੍ਥੁ ਉਪ੍ਪਨ੍ਨਭਾਵਂ ਸਾਵਤ੍ਥਿਯਂ ਵਸਨਭਾਵਞ੍ਚ ਆਚਿਕ੍ਖਿਤ੍ਵਾ ‘‘ਸਤ੍ਥੁ ਸਨ੍ਤਿਕਂ ਗਚ੍ਛਾ’’ਤਿ ਤਂ ਉਯ੍ਯੋਜੇਤ੍ਵਾ ਬ੍ਰਹ੍ਮਲੋਕਮੇਵ ਅਗਮਾਸਿ.

ਬਾਹਿਯੋ ਪਨ ਆਕਾਸੇ ਠਤ੍ਵਾ ਕਥੇਨ੍ਤਂ ਮਹਾਬ੍ਰਹ੍ਮਾਨਂ ਓਲੋਕੇਤ੍ਵਾ ਚਿਨ੍ਤੇਸਿ – ‘‘ਅਹੋ ਭਾਰਿਯਂ ਕਮ੍ਮਂ ਮਯਾ ਕਤਂ, ਅਨਰਹਂ ਅਰਹਾ ਅਹਨ੍ਤਿ ਚਿਨ੍ਤੇਸਿਂ, ਅਯਞ੍ਚ ਮਂ ‘ਨ ਤ੍ਵਂ ਅਰਹਾ, ਨਾਪਿ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾਸੀ’ਤਿ ਵਦਤਿ, ਅਤ੍ਥਿ ਨੁ ਖੋ ਲੋਕੇ ਅਞ੍ਞੋ ਅਰਹਾ’’ਤਿ. ਅਥ ਨਂ ਪੁਚ੍ਛਿ – ‘‘ਅਥ ਕੇ ਚਰਹਿ ਸਦੇਵਕੇ ਲੋਕੇ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ’’ਤਿ. ਅਥਸ੍ਸ ਦੇਵਤਾ ਆਚਿਕ੍ਖਿ – ‘‘ਅਤ੍ਥਿ, ਬਾਹਿਯ, ਉਤ੍ਤਰੇਸੁ ਜਨਪਦੇਸੁ ਸਾਵਤ੍ਥਿ ਨਾਮ ਨਗਰਂ, ਤਤ੍ਥ ਸੋ ਭਗਵਾ ਏਤਰਹਿ ਵਿਹਰਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ. ਸੋ ਹਿ, ਬਾਹਿਯ, ਭਗਵਾ ਅਰਹਾ ਚੇਵ ਅਰਹਤ੍ਤਾਯ ਚ ਧਮ੍ਮਂ ਦੇਸੇਸੀ’’ਤਿ. ਬਾਹਿਯੋ ਰਤ੍ਤਿਭਾਗੇ ਦੇਵਤਾਯ ਕਥਂ ਸੁਤ੍ਵਾ ਸਂਵਿਗ੍ਗਮਾਨਸੋ ਤਂਖਣਂਯੇਵ ਸੁਪ੍ਪਾਰਕਾ ਨਿਕ੍ਖਮਿਤ੍ਵਾ ਏਕਰਤ੍ਤਿਵਾਸੇਨ ਸਾਵਤ੍ਥਿਂ ਅਗਮਾਸਿ, ਗਚ੍ਛਨ੍ਤੋ ਚ ਪਨ ਦੇਵਤਾਨੁਭਾਵੇਨ ਬੁਦ੍ਧਾਨੁਭਾਵੇਨ ਚ ਵੀਸਯੋਜਨਸਤਿਕਂ ਮਗ੍ਗਂ ਅਤਿਕ੍ਕਮਿਤ੍ਵਾ ਸਾਵਤ੍ਥਿਂ ਅਨੁਪ੍ਪਤ੍ਤੋ, ਤਸ੍ਮਿਂ ਖਣੇ ਸਤ੍ਥਾ ਸਾਵਤ੍ਥਿਯਂ ਪਿਣ੍ਡਾਯ ਪਵਿਟ੍ਠੋ ਹੋਤਿ. ਸੋ ਜੇਤਵਨਂ ਪਵਿਸਿਤ੍ਵਾ ਅਬ੍ਭੋਕਾਸੇ ਚਙ੍ਕਮਨ੍ਤੇ ਸਮ੍ਬਹੁਲੇ ਭਿਕ੍ਖੂ ਪੁਚ੍ਛਿ – ‘‘ਕੁਹਿਂ ਏਤਰਹਿ ਸਤ੍ਥਾ’’ਤਿ? ਭਿਕ੍ਖੂ ‘‘ਸਾਵਤ੍ਥਿਯਂ ਪਿਣ੍ਡਾਯ ਪਵਿਟ੍ਠੋ’’ਤਿ ਵਤ੍ਵਾ ‘‘ਤ੍ਵਂ ਪਨ ਕੁਤੋ ਆਗਤੋਸੀ’’ਤਿ ਪੁਚ੍ਛਿਂਸੁ. ‘‘ਸੁਪ੍ਪਾਰਕਾ ਆਗਤੋਮ੍ਹੀ’’ਤਿ. ‘‘ਕਦਾ ਨਿਕ੍ਖਨ੍ਤੋਸੀ’’ਤਿ? ‘‘ਹਿਯ੍ਯੋ ਸਾਯਨ੍ਹਸਮਯੇ ਨਿਕ੍ਖਨ੍ਤੋਮ੍ਹੀ’’ਤਿ. ‘‘ਦੂਰਤੋਪਿ ਆਗਤੋ, ਨਿਸੀਦ ਤਾਵ ਪਾਦੇ ਧੋਵਿਤ੍ਵਾ ਤੇਲੇਨ ਮਕ੍ਖੇਤ੍ਵਾ ਥੋਕਂ ਵਿਸ੍ਸਮਾਹਿ, ਆਗਤਕਾਲੇ ਸਤ੍ਥਾਰਂ ਦਕ੍ਖਿਸ੍ਸਤੀ’’ਤਿ ਆਹਂਸੁ. ‘‘ਅਹਂ, ਭਨ੍ਤੇ, ਸਤ੍ਥੁ ਵਾ ਅਤ੍ਤਨੋ ਵਾ ਜੀਵਿਤਨ੍ਤਰਾਯਂ ਨ ਜਾਨਾਮਿ, ਕਤ੍ਥਚਿ ਅਟ੍ਠਤ੍ਵਾ ਅਨਿਸੀਦਿਤ੍ਵਾ ਏਕਰਤ੍ਤੇਨੇਵ ਵੀਸਯੋਜਨਸਤਿਕਂ ਮਗ੍ਗਂ ਆਗਤੋ, ਸਤ੍ਥਾਰਂ ਪਸ੍ਸਿਤ੍ਵਾਵ ਵਿਸ੍ਸਮਿਸ੍ਸਾਮੀ’’ਤਿ ਆਹ. ਸੋ ਏਵਂ ਵਤ੍ਵਾ ਤਰਮਾਨਰੂਪੋ ਸਾਵਤ੍ਥਿਂ ਪਵਿਸਿਤ੍ਵਾ ਭਗਵਨ੍ਤਂ ਅਨੋਪਮਾਯ ਬੁਦ੍ਧਸਿਰਿਯਾ ਚਰਨ੍ਤਂ ਦਿਸ੍ਵਾ ‘‘ਚਿਰਸ੍ਸਂ ਵਤ ਮੇ ਗੋਤਮੋ ਸਮ੍ਮਾਸਮ੍ਬੁਦ੍ਧੋ ਦਿਟ੍ਠੋ’’ਤਿ ਦਿਟ੍ਠਟ੍ਠਾਨਤੋ ਪਟ੍ਠਾਯ ਓਨਤਸਰੀਰੋ ਗਨ੍ਤ੍ਵਾ ਅਨ੍ਤਰਵੀਥਿਯਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਗੋਪ੍ਫਕੇਸੁ ਦਲ਼੍ਹਂ ਗਹੇਤ੍ਵਾ ਏਵਮਾਹ – ‘‘ਦੇਸੇਤੁ, ਭਨ੍ਤੇ ਭਗਵਾ, ਧਮ੍ਮਂ, ਦੇਸੇਤੁ ਸੁਗਤੋ ਧਮ੍ਮਂ, ਯਂ ਮਮਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਅਥ ਨਂ ਸਤ੍ਥਾ ‘‘ਅਕਾਲੋ ਖੋ ਤਾਵ, ਬਾਹਿਯ, ਅਨ੍ਤਰਘਰਂ ਪਵਿਟ੍ਠਮ੍ਹਾ ਪਿਣ੍ਡਾਯਾ’’ਤਿ ਪਟਿਕ੍ਖਿਪਿ.

ਤਂ ਸੁਤ੍ਵਾ ਬਾਹਿਯੋ, ‘‘ਭਨ੍ਤੇ, ਸਂਸਾਰੇ ਸਂਸਰਨ੍ਤੇਨ ਕਬਲ਼ੀਕਾਰਾਹਾਰੋ ਨ ਅਲਦ੍ਧਪੁਬ੍ਬੋ, ਤੁਮ੍ਹਾਕਂ ਵਾ ਮਯ੍ਹਂ ਵਾ ਜੀਵਿਤਨ੍ਤਰਾਯਂ ਨ ਜਾਨਾਮਿ, ਦੇਸੇਤੁ ਮੇ, ਭਨ੍ਤੇ ਭਗਵਾ, ਧਮ੍ਮਂ, ਦੇਸੇਤੁ ਸੁਗਤੋ ਧਮ੍ਮ’’ਨ੍ਤਿ ਪੁਨ ਯਾਚਿ. ਸਤ੍ਥਾ ਦੁਤਿਯਮ੍ਪਿ ਤਥੇਵ ਪਟਿਕ੍ਖਿਪਿ. ਏਵਂ ਕਿਰਸ੍ਸ ਅਹੋਸਿ – ‘‘ਇਮਸ੍ਸ ਦਿਟ੍ਠਕਾਲਤੋ ਪਟ੍ਠਾਯ ਸਕਲਸਰੀਰਂ ਪੀਤਿਯਾ ਨਿਰਨ੍ਤਰਂ ਅਜ੍ਝੋਤ੍ਥਟਂ ਹੋਤਿ, ਬਲਵਪੀਤਿਵੇਗੋ ਧਮ੍ਮਂ ਸੁਤ੍ਵਾਪਿ ਨ ਸਕ੍ਖਿਸ੍ਸਤਿ ਪਟਿਵਿਜ੍ਝਿਤੁਂ, ਮਜ੍ਝਤ੍ਤੁਪੇਕ੍ਖਾਯ ਤਾਵ ਤਿਟ੍ਠਤੁ, ਏਕਰਤ੍ਤੇਨੇਵ ਵੀਸਯੋਜਨਸਤਿਕਂ ਮਗ੍ਗਂ ਆਗਤਸ੍ਸਪਿ ਚਸ੍ਸ ਦਰਥੋ ਬਲਵਾ ਸੋਪਿ ਤਾਵ ਪਟਿਪ੍ਪਸ੍ਸਮ੍ਭਤੂ’’ਤਿ. ਤਸ੍ਮਾ ਦ੍ਵਿਕ੍ਖਤ੍ਤੁਂ ਪਟਿਕ੍ਖਿਪਿਤ੍ਵਾ ਤਤਿਯਂ ਯਾਚਿਤੋ ਅਨ੍ਤਰਵੀਥਿਯਂ ਠਿਤੋਵ ‘‘ਤਸ੍ਮਾਤਿਹ ਤੇ, ਬਾਹਿਯ, ਏਵਂ ਸਿਕ੍ਖਿਤਬ੍ਬਂ, ਦਿਟ੍ਠੇ ਦਿਟ੍ਠਮਤ੍ਤਂ ਭਵਿਸ੍ਸਤੀ’’ਤਿਆਦਿਨਾ (ਉਦਾ. ੧੦) ਨਯੇਨ ਅਨੇਕਪਰਿਯਾਯੇਨ ਧਮ੍ਮਂ ਦੇਸੇਸਿ. ਸੋ ਸਤ੍ਥੁ ਧਮ੍ਮਂ ਸੁਣਨ੍ਤੋਯੇਵ ਸਬ੍ਬਾਸਵੇ ਖੇਪੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ.

੧੭੮. ਸੋ ਅਰਹਤ੍ਤਂ ਪਤ੍ਤਕ੍ਖਣੇਯੇਵ ਪੁਬ੍ਬਕਮ੍ਮਂ ਸਰਿਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਇਤੋ ਸਤਸਹਸ੍ਸਮ੍ਹੀਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ. ਅਨੁਤ੍ਤਾਨਪਦਵਣ੍ਣਨਮੇਵ ਕਰਿਸ੍ਸਾਮ.

੧੮੧. ਹਸਨਂ ਪਚ੍ਚਵੇਕ੍ਖਣਨ੍ਤਿ ਪਰਿਪੁਣ੍ਣਸੋਮਨਸ੍ਸਜਾਤਂ ਪਚ੍ਚਵੇਕ੍ਖਣਂ, ਕੋਮਾਰਵਣ੍ਣਂ ਅਤਿਕੋਮਲਨ੍ਤਿ ਅਤ੍ਥੋ.

੧੮੨. ਹੇਮਯਞ੍ਞੋਪਚਿਤਙ੍ਗਨ੍ਤਿ ਸੁਵਣ੍ਣਸੁਤ੍ਤਯਞ੍ਞੋਪਚਿਤਸੁਤ੍ਤਅਵਯਵਂ ਸਰੀਰਂ ਦੇਹਨ੍ਤਿ ਅਤ੍ਥੋ. ਪਲਮ੍ਬਬਿਮ੍ਬਤਮ੍ਬੋਟ੍ਠਨ੍ਤਿ ਓਲਮ੍ਬਿਤਬਿਮ੍ਬਫਲਸਦਿਸਂ ਰਤ੍ਤਵਣ੍ਣਂ ਓਟ੍ਠਦ੍ਵਯਸਮਨ੍ਨਾਗਤਨ੍ਤਿ ਅਤ੍ਥੋ. ਸੇਤਤਿਣ੍ਹਸਮਂ ਦਿਜਨ੍ਤਿ ਸੁਨਿਸਿਤਤਿਖਿਣਅਯਲੋਹਘਂਸਨੇਨ ਘਂਸਿਤ੍ਵਾ ਸਮਂ ਕਤਂ ਵਿਯ ਸਮਦਨ੍ਤਨ੍ਤਿ ਅਤ੍ਥੋ.

੧੮੩. ਪੀਤਿਸਮ੍ਫੁਲ੍ਲਿਤਾਨਨਨ੍ਤਿ ਪੀਤਿਯਾ ਸੁਟ੍ਠੁ ਫੁਲ੍ਲਿਤਂ ਵਿਕਸਿਤਂ ਆਨਨਂ ਮੁਖਂ ਆਦਾਸਤਲਸਦਿਸਮੁਖਵਨ੍ਤਨ੍ਤਿ ਅਤ੍ਥੋ.

੧੮੪. ਖਿਪ੍ਪਾਭਿਞ੍ਞਸ੍ਸ ਭਿਕ੍ਖੁਨੋਤਿ ਖਿਪ੍ਪਂ ਦੇਸਨਾਯ ਸਮੁਗ੍ਘਾਟਿਤਕ੍ਖਣੇਯੇਵ ਅਭਿਵਿਸੇਸੇਨ ਞਾਤੁਂ ਸਮਤ੍ਥਸ੍ਸ ਭਿਕ੍ਖੁਨੋਤਿ ਅਤ੍ਥੋ.

੧੮੬. ਸਗ੍ਗਂ ਅਗਂ ਸਭਵਨਂ ਯਥਾਤਿ ਅਤ੍ਤਨੋ ਗੇਹਂ ਵਿਯ ਸਗ੍ਗਂ ਲੋਕਂ ਅਗਮਾਸਿਨ੍ਤਿ ਅਤ੍ਥੋ.

੧੯੬. ਨ ਤ੍ਵਂ ਉਪਾਯਮਗ੍ਗਞ੍ਞੂਤਿ ਤ੍ਵਂ ਨਿਬ੍ਬਾਨਾਧਿਗਮੂਪਾਯਭੂਤਮਗ੍ਗਞ੍ਞੂ ਨ ਅਹੋਸੀਤਿ ਅਤ੍ਥੋ.

੨੦੦. ਸਤ੍ਥੁਨੋ ਸਦਾ ਜਿਨਨ੍ਤਿ ਸਦਾ ਸਬ੍ਬਕਾਲਂ ਜਿਨਂ ਜਿਨਨ੍ਤੋ ਪਰਾਜਿਤਕੋਪੋ ਸਤ੍ਥੁਨੋ ਸਮ੍ਮਾਸਮ੍ਬੁਦ੍ਧਸ੍ਸ ਵਿਮਲਾਨਨਂ ਆਦਾਸਤਲਸਦਿਸਮੁਖਂ ਪਸ੍ਸਿਸ੍ਸਾਮਿ ਪਸ੍ਸਿਤੁਂ ਨਿਕ੍ਖਮਾਮੀਤਿ ਯੋਜਨਾ. ਦਿਜੇ ਅਪੁਚ੍ਛਿਂ ਕੁਹਿਂ ਲੋਕਨਨ੍ਦਨੋਤਿ ਕੁਹਿਂ ਠਾਨੇ ਲੋਕਪਸਾਦਕਰੋ ਸਤ੍ਥਾਤਿ ਦਿਜੇ ਬ੍ਰਾਹ੍ਮਣੇ ਅਹਂ ਭਿਕ੍ਖੂ ਅਪੁਚ੍ਛਿਨ੍ਤਿ ਅਤ੍ਥੋ.

੨੦੧. ਸਸੋਵ ਖਿਪ੍ਪਂ ਮੁਨਿਦਸ੍ਸਨੁਸ੍ਸੁਕੋਤਿ ਮੁਨਿਦਸ੍ਸਨੇ ਤਥਾਗਤਦਸ੍ਸਨੇ ਉਸ੍ਸੁਕੋ ਉਸ੍ਸਾਹਜਾਤੋ ਸਸੋ ਇਵ ਖਿਪ੍ਪਂ ਪਾਪੁਣਾਤੀਤਿ ਅਤ੍ਥੋ.

੨੦੨. ਤੁਵਟਂ ਗਨ੍ਤ੍ਵਾਤਿ ਸੀਘਂ ਗਨ੍ਤ੍ਵਾ. ਪਿਣ੍ਡਤ੍ਥਂ ਅਪਿਹਾਗਿਧਨ੍ਤਿ ਪਿਣ੍ਡਪਾਤਂ ਪਟਿਚ੍ਚ ਅਪਿਹਂ ਅਪਗਤਪਿਹਂ ਅਗਿਧਂ ਨਿਤ੍ਤਣ੍ਹਂ.

੨੦੩. ਅਲੋਲਕ੍ਖਨ੍ਤਿ ਇਤੋ ਚਿਤੋ ਚ ਅਨੋਲੋਕਯਮਾਨਂ ਉਤ੍ਤਮੇ ਸਾਵਤ੍ਥਿਨਗਰੇ ਪਿਣ੍ਡਾਯ ਵਿਚਰਨ੍ਤਂ ਅਦਕ੍ਖਿਨ੍ਤਿ ਸਮ੍ਬਨ੍ਧੋ. ਸਿਰੀਨਿਲਯਸਙ੍ਕਾਸਨ੍ਤਿ ਸਿਰਿਯਾ ਲਕ੍ਖਣਾਨੁਬ੍ਯਞ੍ਜਨਸੋਭਾਯ ਨਿਲਯਂ ਸਙ੍ਕਾਸਂ ਜਲਮਾਨਤੋਰਣਸਦਿਸਂ. ਰਵਿਦਿਤ੍ਤਿਹਰਾਨਨਨ੍ਤਿ ਵਿਜ੍ਜੋਤਮਾਨਸੂਰਿਯਮਣ੍ਡਲਂ ਵਿਯ ਵਿਜ੍ਜੋਤਮਾਨਮੁਖਮਣ੍ਡਲਂ.

੨੦੪. ਕੁਪਥੇ ਵਿਪ੍ਪਨਟ੍ਠਸ੍ਸਾਤਿ ਕੁਚ੍ਛਿਤਪਥੇ ਸੋਪਦ੍ਦਵਮਗ੍ਗੇ ਮੂਲ਼੍ਹਸ੍ਸ ਮਿਚ੍ਛਾਪਟਿਪਨ੍ਨਸ੍ਸ ਮੇ ਸਰਣਂ ਹੋਹਿ ਪਤਿਟ੍ਠਾ ਹੋਹਿ. ਗੋਤਮਾਤਿ ਭਗਵਨ੍ਤਂ ਗੋਤ੍ਤੇਨ ਆਲਪਤਿ.

੨੧੮. ਨ ਤਤ੍ਥ ਸੁਕ੍ਕਾ ਜੋਤਨ੍ਤੀਤਿ ਸੁਕ੍ਕਪਭਾਸਮ੍ਪਨ੍ਨਾ ਜੋਤਮਾਨਓਸਧਿਤਾਰਕਾਦਯੋ ਨ ਜੋਤਨ੍ਤਿ ਨਪ੍ਪਭਾਸਨ੍ਤਿ. ਸੇਸਂ ਉਤ੍ਤਾਨਤ੍ਥਮੇਵ. ਸੋ ਏਵਂ ਪੁਬ੍ਬਚਰਿਤਾਪਦਾਨਂ ਪਕਾਸੇਤ੍ਵਾ ਤਾਵਦੇਵ ਚ ਭਗਵਨ੍ਤਂ ਪਬ੍ਬਜ੍ਜਂ ਯਾਚਿ. ‘‘ਪਰਿਪੁਣ੍ਣਂ ਤੇ ਪਤ੍ਤਚੀਵਰ’’ਨ੍ਤਿ ਚ ਪੁਟ੍ਠੋ ‘‘ਨ ਪਰਿਪੁਣ੍ਣ’’ਨ੍ਤਿ ਆਹ. ਅਥ ਨਂ ਸਤ੍ਥਾ ‘‘ਤੇਨ ਹਿ ਪਤ੍ਤਚੀਵਰਂ ਪਰਿਯੇਸਾਹੀ’’ਤਿ ਵਤ੍ਵਾ ਪਕ੍ਕਾਮਿ. ਸੋ ਕਿਰ ਵੀਸਤਿਵਸ੍ਸਸਹਸ੍ਸਾਨਿ ਸਮਣਧਮ੍ਮਂ ਕਰੋਨ੍ਤੋ ‘‘ਭਿਕ੍ਖੁਨਾ ਨਾਮ ਅਤ੍ਤਨਾ ਪਚ੍ਚਯੇ ਲਭਿਤ੍ਵਾ ਅਞ੍ਞਂ ਅਨੋਲੋਕੇਤ੍ਵਾ ਸਯਮੇਵ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ ਵਤ੍ਵਾ ਏਕਭਿਕ੍ਖੁਸ੍ਸਾਪਿ ਪਤ੍ਤੇਨ ਵਾ ਚੀਵਰੇਨ ਵਾ ਸਙ੍ਗਹਂ ਨਾਕਾਸਿ, ‘‘ਨ ਤੇਨਸ੍ਸ ਇਦ੍ਧਿਮਯਂ ਪਤ੍ਤਚੀਵਰਂ ਉਪ੍ਪਜ੍ਜਿਸ੍ਸਤੀ’’ਤਿ ਞਤ੍ਵਾ ਭਗਵਾ ਏਹਿਭਿਕ੍ਖੁਭਾਵੇਨ ਪਬ੍ਬਜ੍ਜਂ ਨਾਦਾਸਿ. ਤਮ੍ਪਿ ਪਤ੍ਤਚੀਵਰਂ ਪਰਿਯੇਸਮਾਨਮੇਵ ਸਙ੍ਕਾਰਟ੍ਠਾਨਤੋ ਚੋਲ਼ਕ੍ਖਣ੍ਡਾਨਿ ਸਂਕਡ੍ਢੇਨ੍ਤਂ ਪੁਬ੍ਬਵੇਰਿਕੋ ਅਮਨੁਸ੍ਸੋ ਏਕਿਸ੍ਸਾ ਤਰੁਣਵਚ੍ਛਾਯ ਗਾਵਿਯਾ ਸਰੀਰੇ ਅਧਿਮੁਚ੍ਚਿਤ੍ਵਾ ਵਾਮਊਰੁਮ੍ਹਿ ਪਹਰਿਤ੍ਵਾ ਜੀਵਿਤਕ੍ਖਯਂ ਪਾਪੇਸਿ. ਸਤ੍ਥਾ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਸਮ੍ਬਹੁਲੇਹਿ ਭਿਕ੍ਖੂਹਿ ਸਦ੍ਧਿਂ ਨਿਕ੍ਖਮਨ੍ਤੋ ਬਾਹਿਯਸ੍ਸ ਸਰੀਰਂ ਸਙ੍ਕਾਰਟ੍ਠਾਨੇ ਪਤਿਤਂ ਦਿਸ੍ਵਾ ‘‘ਗਣ੍ਹਥ, ਭਿਕ੍ਖਵੇ, ਏਤਂ ਬਾਹਿਯਂ ਦਾਰੁਚੀਰਿਯਨ੍ਤਿ ਏਕਸ੍ਮਿਂ ਗੇਹਦ੍ਵਾਰੇ ਠਤ੍ਵਾ ਮਞ੍ਚਕਂ ਆਹਰਾਪੇਤ੍ਵਾ ਇਮਂ ਸਰੀਰਂ ਨਗਰਦ੍ਵਾਰਤੋ ਨੀਹਰਿਤ੍ਵਾ ਝਾਪੇਤ੍ਵਾ ਧਾਤੁਯੋ ਗਹੇਤ੍ਵਾ ਥੂਪਂ ਕਰੋਥਾ’’ਤਿ ਭਿਕ੍ਖੂ ਆਣਾਪੇਸਿ.

ਤੇ ਭਿਕ੍ਖੂ ਧਾਤੁਂ ਮਹਾਪਥੇ ਥੂਪਂ ਕਾਰੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਅਤ੍ਤਨੋ ਕਤਕਮ੍ਮਂ ਆਰੋਚੇਸੁਂ. ਤਤੋ ਸਙ੍ਘਮਜ੍ਝੇ ਕਥਾ ਉਦਪਾਦਿ – ‘‘ਤਥਾਗਤੋ ਭਿਕ੍ਖੁਸਙ੍ਘੇਨ ਸਰੀਰਝਾਪਨਕਿਚ੍ਚਂ ਕਾਰੇਸਿ, ਧਾਤੁਯੋ ਚ ਗਾਹਾਪੇਤ੍ਵਾ ਚੇਤਿਯਂ ਕਾਰਾਪੇਸਿ, ਕਤਰਮਗ੍ਗੋ ਨੁ ਖੋ ਤੇਨ ਸਮਧਿਗਤੋ, ਸਾਮਣੇਰੋ ਨੁ ਖੋ ਸੋ, ਭਿਕ੍ਖੁ ਨੁ ਖੋ’’ਤਿ. ਸਤ੍ਥਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ‘‘ਪਤਿਟ੍ਠਿਤੋ, ਭਿਕ੍ਖਵੇ, ਬਾਹਿਯੋ ਦਾਰੁਚੀਰਿਯੋ ਅਰਹਤ੍ਤੋ’’ਤਿ ਉਪਰਿ ਧਮ੍ਮਦੇਸਨਂ ਵਡ੍ਢੇਤਿ. ਤਸ੍ਸ ਪਰਿਨਿਬ੍ਬੁਤਭਾਵਞ੍ਚ ਆਚਿਕ੍ਖਿਤ੍ਵਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਖਿਪ੍ਪਾਭਿਞ੍ਞਾਨਂ ਯਦਿਦਂ ਬਾਹਿਯੋ ਦਾਰੁਚੀਰਿਯੋ’’ਤਿ (ਅ. ਨਿ. ੧.੨੦੯, ੨੧੬) ਏਤਦਗ੍ਗੇ ਠਪੇਸਿ.

ਅਥ ਨਂ ਭਿਕ੍ਖੂ ਪੁਚ੍ਛਿਂਸੁ – ‘‘ਤੁਮ੍ਹੇ, ਭਨ੍ਤੇ, ‘ਬਾਹਿਯੋ ਦਾਰੁਚੀਰਿਯੋ ਅਰਹਤ੍ਤਂ ਪਤ੍ਤੋ’ਤਿ ਵਦੇਥ, ਕਦਾ ਸੋ ਅਰਹਤ੍ਤਂ ਪਤ੍ਤੋ’’ਤਿ? ‘‘ਮਮ ਧਮ੍ਮਂ ਸੁਤਕਾਲੇ, ਭਿਕ੍ਖਵੇ’’ਤਿ. ‘‘ਕਦਾ ਪਨਸ੍ਸ, ਭਨ੍ਤੇ, ਤੁਮ੍ਹੇਹਿ ਧਮ੍ਮੋ ਕਥਿਤੋ’’ਤਿ? ‘‘ਭਿਕ੍ਖਾਯ ਚਰਨ੍ਤੇਨ ਅਨ੍ਤਰਵੀਥਿਯਂ ਠਿਤੇਨਾ’’ਤਿ. ‘‘ਅਪ੍ਪਮਤ੍ਤਕੋ, ਭਨ੍ਤੇ, ਤੁਮ੍ਹੇਹਿ ਅਨ੍ਤਰਵੀਥਿਯਂ ਠਤ੍ਵਾ ਕਥਿਤਧਮ੍ਮੋ; ਕਥਂ ਸੋ ਤਾਵਤ੍ਤਕੇਨ ਵਿਸੇਸਂ ਨਿਬ੍ਬਤ੍ਤੇਸੀ’’ਤਿ? ਅਥ ਨੇ ਸਤ੍ਥਾ, ‘‘ਭਿਕ੍ਖਵੇ, ਮਮ ਧਮ੍ਮਂ ‘ਅਪ੍ਪਂ’ ਵਾ ‘ਬਹੁਂ ਵਾ’ਤਿ ਮਾ ਚਿਨ੍ਤਯਿਤ੍ਥ. ਅਨੇਕਾਨਿਪਿ ਹਿ ਅਨਤ੍ਥਪਦਸਂਹਿਤਾਨਿ ਗਾਥਾਸਹਸ੍ਸਾਨਿ ਨ ਸੇਯ੍ਯੋ, ਅਤ੍ਥਨਿਸ੍ਸਿਤਂ ਪਨ ਏਕਮ੍ਪਿ ਗਾਥਾਪਦਂ ਸੇਯ੍ਯੋ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

‘‘ਸਹਸ੍ਸਮਪਿ ਚੇ ਗਾਥਾ, ਅਨਤ੍ਥਪਦਸਂਹਿਤਾ;

ਏਕਂ ਗਾਥਾਪਦਂ ਸੇਯ੍ਯੋ, ਯਂ ਸੁਤ੍ਵਾ ਉਪਸਮ੍ਮਤੀ’’ਤਿ. (ਧ. ਪ. ੧੦੧) –

ਦੇਸਨਾਪਰਿਯੋਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਬਾਹਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਮਹਾਕੋਟ੍ਠਿਕਤ੍ਥੇਰਅਪਦਾਨਵਣ੍ਣਨਾ

ਸਤ੍ਤਮਾਪਦਾਨੇ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਮਹਾਕੋਟ੍ਠਿਕਤ੍ਥੇਰਸ੍ਸ ਅਪਦਾਨਂ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਮਾਤਾਪਿਤੂਨਂ ਅਚ੍ਚਯੇਨ ਕੁਟੁਮ੍ਬਂ ਸਣ੍ਠਪੇਤ੍ਵਾ ਘਰਾਵਾਸਂ ਵਸਨ੍ਤੋ ਏਕਦਿਵਸਂ ਪਦੁਮੁਤ੍ਤਰਸ੍ਸ ਭਗਵਤੋ ਧਮ੍ਮਦੇਸਨਾਕਾਲੇ ਹਂਸਵਤੀਨਗਰਵਾਸਿਨੋ ਗਨ੍ਧਮਾਲਾਦਿਹਤ੍ਥੇ ਯੇਨ ਬੁਦ੍ਧੋ ਯੇਨ ਧਮ੍ਮੋ ਯੇਨ ਸਙ੍ਘੋ, ਤਨ੍ਨਿਨ੍ਨੇ ਤਪ੍ਪੋਣੇ ਤਪ੍ਪਬ੍ਭਾਰੇ ਗਚ੍ਛਨ੍ਤੇ ਦਿਸ੍ਵਾ ਤੇਹਿ ਸਦ੍ਧਿਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ, ਸਤ੍ਥਾਰਂ ਏਕਂ ਭਿਕ੍ਖੁਂ ਪਟਿਸਮ੍ਭਿਦਾਪ੍ਪਤ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ‘‘ਅਯਂ ਇਮਸ੍ਮਿਂ ਸਾਸਨੇ ਪਟਿਸਮ੍ਭਿਦਾਪ੍ਪਤ੍ਤਾਨਂ ਅਗ੍ਗੋ, ਯਂਨੂਨਾਹਮ੍ਪਿ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਅਯਂ ਵਿਯ ਪਟਿਸਮ੍ਭਿਦਾਪ੍ਪਤ੍ਤਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਸਤ੍ਥੁ ਦੇਸਨਾਪਰਿਯੋਸਾਨੇ ਵੁਟ੍ਠਿਤਾਯ ਪਰਿਸਾਯ ਭਗਵਨ੍ਤਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਸ੍ਵੇ ਮਯ੍ਹਂ ਗੇਹੇ ਭਿਕ੍ਖਂ ਗਣ੍ਹਥਾ’’ਤਿ ਨਿਮਨ੍ਤੇਸਿ. ਸਤ੍ਥਾ ਅਧਿਵਾਸੇਸਿ. ਸੋ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਸਕਨਿਵੇਸਨਂ ਗਨ੍ਤ੍ਵਾ ਸਬ੍ਬਰਤ੍ਤਿਂ ਬੁਦ੍ਧਸ੍ਸ ਚ ਭਿਕ੍ਖੁਸਙ੍ਘਸ੍ਸ ਚ ਨਿਸਜ੍ਜਟ੍ਠਾਨਂ ਗਨ੍ਧਮਾਲਾਦੀਹਿ ਅਲਙ੍ਕਰਿਤ੍ਵਾ ਖਾਦਨੀਯਭੋਜਨੀਯਂ ਪਟਿਯਾਦਾਪੇਤ੍ਵਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਸਕਨਿਵੇਸਨੇ ਭਿਕ੍ਖੁਸਤਸਹਸ੍ਸਪਰਿਵਾਰਂ ਸਤ੍ਥਾਰਂ ਵਿਵਿਧਯਾਗੁਖਜ੍ਜਕਪਰਿਵਾਰਂ ਸਸੂਪਬ੍ਯਞ੍ਜਨਂ ਗਨ੍ਧਸਾਲਿਭੋਜਨਂ ਭੋਜਾਪੇਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਚਿਨ੍ਤੇਸਿ – ‘‘ਮਹਨ੍ਤਂ ਖੋ ਅਹਂ ਠਾਨਨ੍ਤਰਂ ਪਤ੍ਥੇਮਿ, ਨ ਪਨ ਯੁਤ੍ਤਂ ਮਯਾ ਏਕਦਿਵਸਮੇਵ ਦਾਨਂ ਦਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤੁਂ, ਅਨੁਪਟਿਪਾਟਿਯਾ ਸਤ੍ਤਾਹਂ ਦਾਨਂ ਦਤ੍ਵਾ ਪਤ੍ਥੇਸ੍ਸਾਮੀ’’ਤਿ. ਸੋ ਤੇਨੇਵ ਨਿਯਾਮੇਨ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਦੁਸ੍ਸਕੋਟ੍ਠਾਗਾਰਂ ਵਿਵਰਾਪੇਤ੍ਵਾ ਉਤ੍ਤਮਂ ਤਿਚੀਵਰਪ੍ਪਹੋਨਕਂ ਸੁਖੁਮਵਤ੍ਥਂ ਬੁਦ੍ਧਸ੍ਸ ਪਾਦਮੂਲੇ ਠਪੇਤ੍ਵਾ ਭਿਕ੍ਖੁਸਤਸਹਸ੍ਸਸ੍ਸ ਚ ਤਿਚੀਵਰਂ ਦਤ੍ਵਾ ਤਥਾਗਤਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਯੋ ਸੋ ਭਿਕ੍ਖੁ ਤੁਮ੍ਹੇਹਿ ਇਤੋ ਸਤ੍ਤਮੇ ਦਿਵਸਮਤ੍ਥਕੇ ਪਟਿਸਮ੍ਭਿਦਾਪ੍ਪਤ੍ਤਾਨਂ ਅਗ੍ਗਟ੍ਠਾਨੇ ਠਪਿਤੋ, ਅਹਮ੍ਪਿ ਸੋ ਭਿਕ੍ਖੁ ਵਿਯ ਅਨਾਗਤੇ ਉਪ੍ਪਜ੍ਜਨਕਸ੍ਸ ਬੁਦ੍ਧਸ੍ਸ ਸਾਸਨੇ ਪਬ੍ਬਜਿਤ੍ਵਾ ਪਟਿਸਮ੍ਭਿਦਾਪ੍ਪਤ੍ਤਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਸਤ੍ਥੁ ਪਾਦਮੂਲੇ ਨਿਪਜ੍ਜਿਤ੍ਵਾ ਪਤ੍ਥਨਂ ਅਕਾਸਿ. ਸਤ੍ਥਾ ਤਸ੍ਸ ਸਮਿਜ੍ਝਨਭਾਵਂ ਞਤ੍ਵਾ ‘‘ਅਨਾਗਤੇ ਇਤੋ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਲੋਕੇ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸਾਸਨੇ ਤਵ ਪਤ੍ਥਨਾ ਸਮਿਜ੍ਝਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਤਤ੍ਥ ਯਾਵਤਾਯੁਕਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਪਰਾਪਰਂ ਦੇਵਮਨੁਸ੍ਸੇਸੁ ਪਰਿਬ੍ਭਮਿ.

ਏਵਂ ਸੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਤਤ੍ਥ ਤਤ੍ਥ ਭਵੇ ਪੁਞ੍ਞਞਾਣਸਮ੍ਭਾਰੇ ਸਮ੍ਭਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿ, ਕੋਟ੍ਠਿਕੋਤਿਸ੍ਸ ਨਾਮਂ ਅਕਂਸੁ. ਕਸ੍ਮਾ ਮਾਤੁਯਾ ਵਾ ਅਯ੍ਯਕਪਯ੍ਯਕਾਦੀਨਂ ਵਾ ਨਾਮਂ ਅਗ੍ਗਹੇਤ੍ਵਾ ਏਵਂ ਨਾਮਂ ਕਰਿਂਸੂਤਿ ਚੇ? ਅਤ੍ਤਨੋ ਪਞ੍ਞਵਨ੍ਤਤਾਯ ਵੇਦਙ੍ਗੇਸੁ ਸਤਕ੍ਕਪਰਤਕ੍ਕੇਸੁ ਸਨਿਘਣ੍ਡੁਕੇਟੁਭੇਸੁ ਸਾਕ੍ਖਰਪ੍ਪਭੇਦੇਸੁ ਸਕਲਬ੍ਯਾਕਰਣੇਸੁ ਚ ਛੇਕਭਾਵੇਨ ਚ ਦਿਟ੍ਠਦਿਟ੍ਠੇ ਜਨੇ ਮੁਖਸਤ੍ਤੀਹਿ ਕੋਟ੍ਠੇਨ੍ਤੋ ਪਕ੍ਕੋਟ੍ਠੇਨ੍ਤੋ ਵਿਤੁਦਨ੍ਤੋ ਵਿਚਰਤੀਤਿ ਅਨ੍ਵਤ੍ਥਨਾਮਂ ਕਰਿਂਸੂਤਿ ਵੇਦਿਤਬ੍ਬਂ. ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਹੇਤ੍ਵਾ ਬ੍ਰਾਹ੍ਮਣਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਤੋ ਏਕਦਿਵਸਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨਕਾਲਤੋ ਪਟ੍ਠਾਯ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਪਟਿਸਮ੍ਭਿਦਾਸੁ ਚਿਣ੍ਣਵਸੀ ਹੁਤ੍ਵਾ ਅਭੀਤੋ ਮਹਾਥੇਰੇ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਨ੍ਤੋਪਿ ਦਸਬਲਂ ਉਪਸਙ੍ਕਮਿਤ੍ਵਾ ਪਟਿਸਮ੍ਭਿਦਾਸੁਯੇਵ ਪਞ੍ਹਂ ਪੁਚ੍ਛਿ. ਏਵਮਯਂ ਥੇਰੋ ਤਤ੍ਥ ਕਤਾਧਿਕਾਰਤਾਯ ਤਤ੍ਥ ਚਿਣ੍ਣਵਸੀਭਾਵੇਨ ਚ ਪਟਿਸਮ੍ਭਿਦਾਪ੍ਪਤ੍ਤਾਨਂ ਅਗ੍ਗੋ ਜਾਤੋ. ਅਥ ਨਂ ਸਤ੍ਥਾ ਮਹਾਵੇਦਲ੍ਲਸੁਤ੍ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਪਟਿਸਮ੍ਭਿਦਾਪ੍ਪਤ੍ਤਾਨਂ ਅਗ੍ਗਟ੍ਠਾਨੇ ਠਪੇਸਿ, ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਪਟਿਸਮ੍ਭਿਦਾਪ੍ਪਤ੍ਤਾਨਂ ਯਦਿਦਂ ਮਹਾਕੋਟ੍ਠਿਕੋ’’ਤਿ (ਅ. ਨਿ. ੧.੨੦੯, ੨੧੮).

੨੨੧. ਸੋ ਅਪਰੇਨ ਸਮਯੇਨ ਵਿਮੁਤ੍ਤਿਸੁਖਂ ਪਟਿਸਂਵੇਦੇਨ੍ਤੋ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਇਤ੍ਥਂ ਸੁਦਮਾਯਸ੍ਮਾ ਮਹਾਕੋਟ੍ਠਿਕੋਤਿ ਏਤ੍ਥ ਸੁਦਨ੍ਤਿ ਨਿਦਸ੍ਸਨੇ ਨਿਪਾਤੋ. ਆਯਸ੍ਮਾਤਿ ਗਾਰਵਾਧਿਵਚਨਂ, ਯਥਾ ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋਤਿ.

ਮਹਾਕੋਟ੍ਠਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਉਰੁਵੇਲਕਸ੍ਸਪਤ੍ਥੇਰਅਪਦਾਨਵਣ੍ਣਨਾ

ਅਟ੍ਠਮਾਪਦਾਨੇ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਉਰੁਵੇਲਕਸ੍ਸਪਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਯਪ੍ਪਤ੍ਤੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਤ੍ਥਾਰਂ ਏਕਂ ਭਿਕ੍ਖੁਂ ਮਹਾਪਰਿਵਾਰਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਮਹਾਦਾਨਂ ਦਤ੍ਵਾ ਪਣਿਧਾਨਂ ਅਕਾਸਿ. ਭਗਵਾ ਚਸ੍ਸ ਅਨਨ੍ਤਰਾਯਤਂ ਦਿਸ੍ਵਾ ‘‘ਅਨਾਗਤੇ ਗੋਤਮਬੁਦ੍ਧਸ੍ਸ ਸਾਸਨੇ ਮਹਾਪਰਿਵਾਰਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਤਤ੍ਥ ਯਾਵਤਾਯੁਕਂ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਤੋ ਦ੍ਵੇਨਵੁਤਿਕਪ੍ਪਮਤ੍ਥਕੇ ਫੁਸ੍ਸਸ੍ਸ ਭਗਵਤੋ ਵੇਮਾਤਿਕਕਨਿਟ੍ਠਭਾਤਾ ਹੁਤ੍ਵਾ ਨਿਬ੍ਬਤ੍ਤੋ, ਅਞ੍ਞੇਪਿਸ੍ਸ ਦ੍ਵੇ ਕਨਿਟ੍ਠਭਾਤਰੋ ਅਹੇਸੁਂ. ਤੇ ਤਯੋ ਬੁਦ੍ਧਪ੍ਪਮੁਖਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਪਰਮਾਯ ਪੂਜਾਯ ਪੂਜੇਤ੍ਵਾ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਬਾਰਾਣਸਿਯਂ ਬ੍ਰਾਹ੍ਮਣਕੁਲੇ ਤਯੋ ਭਾਤਰੋ ਹੁਤ੍ਵਾ ਨਿਬ੍ਬਤ੍ਤਾ ਗੋਤ੍ਤਵਸੇਨ ਤਯੋਪਿ ਕਸ੍ਸਪਾਤਿ ਏਵਂ ਨਾਮਕਾ ਅਹੇਸੁਂ. ਤੇ ਤਯੋ ਵਯਪ੍ਪਤ੍ਤਾ ਤਯੋ ਵੇਦੇ ਉਗ੍ਗਣ੍ਹਿਂਸੁ. ਤੇਸਂ ਜੇਟ੍ਠਭਾਤਿਕਸ੍ਸ ਪਞ੍ਚਮਾਣਵਕਸਤਾਨਿ ਪਰਿਵਾਰਾ, ਮਜ੍ਝਿਮਸ੍ਸ ਤੀਣਿ, ਕਨਿਟ੍ਠਸ੍ਸ ਦ੍ਵੇ, ਤੇ ਅਤ੍ਤਨੋ ਗਨ੍ਥੇਸੁ ਸਾਰਂ ਓਲੋਕੇਨ੍ਤਾ ਦਿਟ੍ਠਧਮ੍ਮਿਕਮੇਵ ਅਤ੍ਥਂ ਦਿਸ੍ਵਾ ਪਬ੍ਬਜ੍ਜਂ ਰੋਚੇਸੁਂ. ਤੇਸੁ ਜੇਟ੍ਠਭਾਤਾ ਅਤ੍ਤਨੋ ਪਰਿਵਾਰੇਨ ਸਦ੍ਧਿਂ ਉਰੁਵੇਲਂ ਗਨ੍ਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਉਰੁਵੇਲਕਸ੍ਸਪੋ ਨਾਮ ਜਾਤੋ, ਮਜ੍ਝਿਮੋ ਗਙ੍ਗਾਨਦੀਵਙ੍ਕੇ ਪਬ੍ਬਜਿਤੋ ਨਦੀਕਸ੍ਸਪੋ ਨਾਮ ਜਾਤੋ, ਕਨਿਟ੍ਠੋ ਗਯਾਸੀਸੇ ਪਬ੍ਬਜਿਤੋ ਗਯਾਕਸ੍ਸਪੋ ਨਾਮ ਜਾਤੋ. ਏਵਂ ਤੇਸੁ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਤਤ੍ਥ ਤਤ੍ਥ ਵਸਨ੍ਤੇਸੁ ਬਹੂਨਂ ਦਿਵਸਾਨਂ ਅਚ੍ਚਯੇਨ ਅਮ੍ਹਾਕਂ ਬੋਧਿਸਤ੍ਤੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਟਿਵਿਦ੍ਧਸਬ੍ਬਞ੍ਞੁਤਞ੍ਞਾਣੋ ਅਨੁਕ੍ਕਮੇਨ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਪਞ੍ਚਵਗ੍ਗਿਯਤ੍ਥੇਰੇ ਅਰਹਤ੍ਤੇ ਪਤਿਟ੍ਠਾਪੇਤ੍ਵਾ ਯਸਕੁਲਪੁਤ੍ਤਪ੍ਪਮੁਖੇ ਪਞ੍ਚਪਞ੍ਞਾਸਜਨੇ ਸਹਾਯਕੇ ਵਿਨੇਤ੍ਵਾ ਸਟ੍ਠਿ ਅਰਹਨ੍ਤੇ ‘‘ਚਰਥ, ਭਿਕ੍ਖਵੇ, ਚਾਰਿਕ’’ਨ੍ਤਿ (ਮਹਾਵ. ੩੨) ਵਿਸ੍ਸਜ੍ਜੇਤ੍ਵਾ ਤਿਂਸਭਦ੍ਦਵਗ੍ਗਿਯੇ ਵਿਨੇਤ੍ਵਾ ਉਰੁਵੇਲਕਸ੍ਸਪਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਵਸਨਤ੍ਥਾਯ ਅਗ੍ਯਾਗਾਰਂ ਪਵਿਸਿਤ੍ਵਾ ਤਤ੍ਥ ਗਤਨਾਗਦਮਨਾਦੀਹਿ ਅਡ੍ਢੁਡ੍ਢਸਹਸ੍ਸੇਹਿ ਪਾਟਿਹਾਰਿਯੇਹਿ ਉਰੁਵੇਲਕਸ੍ਸਪਂ ਸਪਰਿਵਾਰਂ ਵਿਨੇਤ੍ਵਾ ਪਬ੍ਬਾਜੇਸਿ. ਤਸ੍ਸ ਪਬ੍ਬਜ੍ਜਾਵਿਧਾਨਞ੍ਚ ਇਦ੍ਧਿਪਾਟਿਹਾਰਿਯਕਰਣਞ੍ਚ ਸਬ੍ਬਂ ਨਦੀਕਸ੍ਸਪਸ੍ਸ ਅਪਦਾਨਟ੍ਠਕਥਾਯਂ ਆਵਿ ਭਵਿਸ੍ਸਤਿ. ਤਸ੍ਸ ਪਬ੍ਬਜਿਤਭਾਵਂ ਸੁਤ੍ਵਾ ਇਤਰੇਪਿ ਦ੍ਵੇ ਭਾਤਰੋ ਸਪਰਿਸਾ ਆਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਂਸੁ. ਸਬ੍ਬੇਵ ਤੇ ਇਦ੍ਧਿਮਯਪਤ੍ਤਚੀਵਰਧਰਾ ਏਹਿਭਿਕ੍ਖੁਕਾ ਅਹੇਸੁਂ. ਸਤ੍ਥਾ ਤਂ ਸਮਣਸਹਸ੍ਸਂ ਆਦਾਯ ਗਯਾਸੀਸਂ ਗਨ੍ਤ੍ਵਾ ਪਿਟ੍ਠਿਪਾਸਾਣੇ ਨਿਸਿਨ੍ਨੋ ਆਦਿਤ੍ਤਪਰਿਯਾਯਦੇਸਨਾਯ (ਮਹਾਵ. ੫੪) ਤੇ ਸਬ੍ਬੇ ਅਰਹਤ੍ਤੇ ਪਤਿਟ੍ਠਾਪੇਸਿ.

੨੫੧. ਸੋ ਏਵਂ ਅਰਹਤ੍ਤਂ ਪਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਅਨੁਤ੍ਤਾਨਪਦਮੇਵ ਵਣ੍ਣਯਿਸ੍ਸਾਮ.

੨੬੮. ਸੋ ਚ ਸਬ੍ਬਂ ਤਮਂ ਹਨ੍ਤ੍ਵਾਤਿ ਸੋ ਫੁਸ੍ਸੋ ਭਗਵਾ ਰਾਗਦੋਸਮੋਹਾਦਿਕਿਲੇਸਨ੍ਧਕਾਰਂ ਵਿਦ੍ਧਂਸੇਤ੍ਵਾ. ਵਿਜਟੇਤ੍ਵਾ ਮਹਾਜਟਨ੍ਤਿ ਤਣ੍ਹਾਮਾਨਾਦੀਹਿ ਦਿਯਡ੍ਢਸਹਸ੍ਸੇਹਿ ਕਿਲੇਸਗਣੇਹਿ ਮਹਾਬ੍ਯਾਕੁਲਂ ਜਟਂ ਵਿਜਟੇਤ੍ਵਾ ਪਦਾਲੇਤ੍ਵਾ ਫਾਲੇਤ੍ਵਾਤਿ ਅਤ੍ਥੋ. ਸਦੇਵਕਂ ਦੇਵਲੋਕਸਹਿਤਂ ਸਕਲਂ ਲੋਕਸਨ੍ਨਿਵਾਸਂਤਪ੍ਪਯਨ੍ਤੋ ਸਨ੍ਤਪ੍ਪਯਨ੍ਤੋ ਪੀਣੇਨ੍ਤੋ ਅਮਤਂ ਵੁਟ੍ਠਿਂ ਮਹਾਨਿਬ੍ਬਾਨਵੁਟ੍ਠਿਧਾਰਂ ਵਸ੍ਸਤੇ ਪਗ੍ਘਰਾਪੇਤੀਤਿ ਯੋਜਨਾ.

੨੬੯. ਤਦਾ ਹਿ ਬਾਰਾਣਸਿਯਨ੍ਤਿ ‘‘ਬਾਰਸ ਮਨੁਸ੍ਸਾ’’ਤਿਆਦੀਸੁ ਵਿਯ ਬਾਰਸ ਦ੍ਵਾਦਸਰਾਸੀ ਹੁਤ੍ਵਾ ਪੁਰਾ, ਹਿਮਵਨ੍ਤਤੋ ਇਸਯੋ ਚ ਪਚ੍ਚੇਕਮੁਨਿਸਙ੍ਖਾਤਾ ਇਸਯੋ ਚ ਗਨ੍ਧਮਾਦਨਤੋ ਆਕਾਸੇਨਾਗਨ੍ਤ੍ਵਾ ਏਤ੍ਥ ਗਚ੍ਛਨ੍ਤਿ ਓਤਰਨ੍ਤਿ ਪਵਿਸਨ੍ਤੀਤਿ ਬਾਰਾਣਸੀ, ਅਥ ਵਾ ਸਮ੍ਮਾਸਮ੍ਬੁਦ੍ਧਸਙ੍ਖਾਤਾਨਂ ਅਨੇਕਸਤਸਹਸ੍ਸਾਨਂ ਧਮ੍ਮਚਕ੍ਕਪਵਤ੍ਤਨਤ੍ਥਾਯ ਓਤਰਟ੍ਠਾਨਂ ਨਗਰਂ ਲਿਙ੍ਗਵਿਪਲ੍ਲਾਸਂ ਕਤ੍ਵਾ ਇਤ੍ਥਿਲਿਙ੍ਗਵਸੇਨ ਬਾਰਾਣਸੀਤਿ ਵੁਚ੍ਚਤਿ, ਤਿਸ੍ਸਂ ਬਾਰਾਣਸਿਯਂ.

੨੭੩. ਨਿਕ੍ਖਿਤ੍ਤਸਤ੍ਥਂ ਪਚ੍ਚਨ੍ਤਨ੍ਤਿ ਛਡ੍ਡਿਤਸਤ੍ਥਂ ਪਾਤਿਤਆਵੁਧਂ ਪਚ੍ਚਨ੍ਤਜਨਪਦਂ ਨਿਬ੍ਬਿਸੇਵਨਂ ਕਤ੍ਵਾ ਪੁਨਰੁਪਚ੍ਚਤਨ੍ਤਿ ਪੁਨਰਪਿ ਤਂ ਨਗਰਂ ਉਪੇਚ੍ਚ ਉਪਗਮ੍ਮ ਸਮ੍ਪਤ੍ਤਾਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਉਰੁਵੇਲਕਸ੍ਸਪਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਰਾਧਤ੍ਥੇਰਅਪਦਾਨਵਣ੍ਣਨਾ

੨੯੬. ਨਵਮਾਪਦਾਨੇ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਰਾਧਤ੍ਥੇਰਸ੍ਸ ਅਪਦਾਨਂ. ਤਂ ਸਬ੍ਬਂ ਪਾਠਾਨੁਸਾਰੇਨ ਨਯਾਨੁਚਿਨ੍ਤਨੇਨ ਵਿਞ੍ਞੂਹਿ ਸੁਵਿਞ੍ਞੇਯ੍ਯਮੇਵ. ਕੇਵਲਂ ਪੁਞ੍ਞਨਾਨਤ੍ਤਮੇਵਾਤਿ.

ਰਾਧਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਦਸਮਂ ਮੋਘਰਾਜਤ੍ਥੇਰਅਪਦਾਨਂ ਸੁਵਿਞ੍ਞੇਯ੍ਯਮੇਵਾਤਿ.

ਚਤੁਪਞ੍ਞਾਸਮਵਗ੍ਗਵਣ੍ਣਨਾ ਸਮਤ੍ਤਾ.