੨. ਪੁਣ੍ਣਕਤ੍ਥੇਰਅਪਦਾਨਵਣ੍ਣਨਾ

੨੯. ਦੁਤਿਯਾਪਦਾਨੇ ਪਬ੍ਭਾਰਕੂਟਂ ਨਿਸ੍ਸਾਯਾਤਿਆਦਿਕਂ ਆਯਸ੍ਮਤੋ ਪੁਣ੍ਣਕਤ੍ਥੇਰਸ੍ਸ ਅਪਦਾਨਂ. ਤਤ੍ਥ ਹਿਮਵਨ੍ਤੇ ਯਕ੍ਖਸੇਨਾਪਤਿ ਹੁਤ੍ਵਾ ਪਰਿਨਿਬ੍ਬੁਤਸ੍ਸ ਪਚ੍ਚੇਕਬੁਦ੍ਧਸ੍ਸ ਆਲ਼ਹਨਕਰਣਮੇਵ ਨਾਨਤ੍ਤਂ. ਸੇਸਂ ਪਾਠਾਨੁਸਾਰੇਨ ਸੁਵਿਞ੍ਞੇਯ੍ਯਮੇਵ.

੪੫. ਤਤਿਯਾਪਦਾਨੇ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਮੇਤ੍ਤਗੁਤ੍ਥੇਰਸ੍ਸ ਅਪਦਾਨਂ. ਤਤ੍ਥ ਹਿਮਵਨ੍ਤਸਮੀਪੇ ਅਸੋਕਪਬ੍ਬਤੇ ਸੋ ਤਾਪਸੋ ਹੁਤ੍ਵਾ ਪਣ੍ਣਸਾਲਾਯਂ ਵਸਨ੍ਤੋ ਸੁਮੇਧਸਮ੍ਬੁਦ੍ਧਂ ਦਿਸ੍ਵਾ ਪਤ੍ਤਂ ਗਹੇਤ੍ਵਾ ਸਪ੍ਪਿਪੂਰਣਂ ਵਿਸੇਸੋ. ਸੇਸਂ ਪੁਞ੍ਞਫਲਾਨਿ ਚ ਸੁਵਿਞ੍ਞੇਯ੍ਯਾਨੇਵ. ਅਪਦਾਨਗਾਥਾਨਂ ਅਤ੍ਥੋ ਚ ਪਾਕਟੋਯੇਵ.

੭੨. ਚਤੁਤ੍ਥਾਪਦਾਨੇ ਗਙ੍ਗਾ ਭਾਗੀਰਥੀ ਨਾਮਾਤਿਆਦਿਕਂ ਆਯਸ੍ਮਤੋ ਧੋਤਕਤ੍ਥੇਰਸ੍ਸ ਅਪਦਾਨਂ. ਤਤ੍ਰਾਪਿ ਬ੍ਰਾਹ੍ਮਣੋ ਹੁਤ੍ਵਾ ਭਾਗੀਰਥੀਗਙ੍ਗਾਯ ਤਰਮਾਨੇ ਭਿਕ੍ਖੂ ਦਿਸ੍ਵਾ ਪਸਨ੍ਨਮਾਨਸੋ ਸੇਤੁਂ ਕਾਰਾਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦਿਤਭਾਵੋਯੇਵ ਵਿਸੇਸੋ. ਪੁਞ੍ਞਫਲਪਰਿਦੀਪਨਗਾਥਾਨਂ ਅਤ੍ਥੋ ਨਯਾਨੁਸਾਰੇਨ ਸੁਵਿਞ੍ਞੇਯ੍ਯੋਵ.

੧੦੦. ਪਞ੍ਚਮਾਪਦਾਨੇ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਉਪਸਿਵਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤੇ ਪਦੁਮੁਤ੍ਤਰਂ ਭਗਵਨ੍ਤਂ ਦਿਸ੍ਵਾ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਤਤ੍ਥ ਨਿਸਿਨ੍ਨਸ੍ਸ ਭਗਵਤੋ ਸਾਲਪੁਪ੍ਫਪੂਜਂ ਅਕਾਸੀਤਿ ਅਯਂ ਵਿਸੇਸੋ, ਸੇਸਮੁਤ੍ਤਾਨਮੇਵ.

੧੬੧. ਛਟ੍ਠਾਪਦਾਨੇ ਮਿਗਲੁਦ੍ਦੋ ਪੁਰੇ ਆਸਿਨ੍ਤਿਆਦਿਕਂ ਆਯਸ੍ਮਤੋ ਨਨ੍ਦਕਤ੍ਥੇਰਸ੍ਸ ਅਪਦਾਨਂ. ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕਰਵਿਕਸਕੁਣੋ ਹੁਤ੍ਵਾ ਮਧੁਰਕੂਜਿਤਂ ਕਰੋਨ੍ਤੋ ਸਤ੍ਥਾਰਂ ਪਦਕ੍ਖਿਣਂ ਅਕਾਸਿ. ਅਪਰਭਾਗੇ ਮਯੂਰੋ ਹੁਤ੍ਵਾ ਅਞ੍ਞਤਰਸ੍ਸ ਪਚ੍ਚੇਕਬੁਦ੍ਧਸ੍ਸ ਵਸਨਗੁਹਾਦ੍ਵਾਰੇ ਪਸਨ੍ਨਮਾਨਸੋ ਦਿਵਸਸ੍ਸ ਤਿਕ੍ਖਤ੍ਤੁਂ ਮਧੁਰੇਨ ਵਸ੍ਸਿਤਂ ਵਸ੍ਸਿ. ਏਵਂ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਨਨ੍ਦਕੋਤਿ ਲਦ੍ਧਨਾਮੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਮਿਗਲੁਦ੍ਦੋ ਪੁਰੇ ਆਸਿਨ੍ਤਿਆਦਿਮਾਹ. ਤਤ੍ਥ ਪਚ੍ਚੇਕਬੁਦ੍ਧਸ੍ਸ ਮਣ੍ਡਪਂ ਕਤ੍ਵਾ ਪਦੁਮਪੁਪ੍ਫੇਹਿ ਛਦਨਮੇਵ ਵਿਸੇਸੋ.

੧੮੩. ਸਤ੍ਤਮਾਪਦਾਨੇ ਪਬ੍ਭਾਰਕੂਟਂ ਨਿਸ੍ਸਾਯਾਤਿਆਦਿਕਂ ਆਯਸ੍ਮਤੋ ਹੇਮਕਤ੍ਥੇਰਸ੍ਸ ਅਪਦਾਨਂ. ਤਤ੍ਥਾਪਿ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤੇ ਵਸਨ੍ਤੋ ਪਿਯਦਸ੍ਸਿਂ ਭਗਵਨ੍ਤਂ ਉਪਗਤਂ ਦਿਸ੍ਵਾ ਰਤਨਮਯਂ ਪੀਠਂ ਅਤ੍ਥਰਿਤ੍ਵਾ ਅਟ੍ਠਾਸਿ. ਤਤ੍ਥ ਨਿਸਿਨ੍ਨਸ੍ਸ ਕੁਮ੍ਭਮਤ੍ਤਂ ਜਮ੍ਬੁਫਲਂ ਆਹਰਿਤ੍ਵਾ ਅਦਾਸਿ. ਭਗਵਾ ਤਸ੍ਸ ਚਿਤ੍ਤਪ੍ਪਸਾਦਤ੍ਥਾਯ ਤਂ ਫਲਂ ਪਰਿਭੁਞ੍ਜਿ. ਏਤ੍ਤਕਮੇਵ ਵਿਸੇਸੋ.

੨੨੪. ਅਟ੍ਠਮਾਪਦਾਨੇ ਰਾਜਾਸਿ ਵਿਜਯੋ ਨਾਮਾਤਿਆਦਿਕਂ ਆਯਸ੍ਮਤੋ ਤੋਦੇਯ੍ਯਤ੍ਥੇਰਸ੍ਸ ਅਪਦਾਨਂ. ਤਤ੍ਥ ਰਾਜਾਸਿ ਵਿਜਯੋ ਨਾਮਾਤਿ ਦਹਰਕਾਲਤੋ ਪਟ੍ਠਾਯ ਸਬ੍ਬਸਙ੍ਗਾਮੇਸੁ ਜਿਨਤੋ, ਚਤੂਹਿ ਸਙ੍ਗਹਵਤ੍ਥੂਹਿ ਜਨਂ ਰਞ੍ਜਨਤੋ ਅਲ੍ਲੀਯਨਤੋ ਵਿਜਯੋ ਨਾਮ ਰਾਜਾ ਅਹੋਸੀਤਿ ਅਤ੍ਥੋ. ਕੇਤੁਮਤੀਪੁਰੁਤ੍ਤਮੇਤਿ ਕੇਤੁ ਵੁਚ੍ਚਨ੍ਤਿ ਧਜਪਟਾਕਾ. ਅਥ ਵਾ ਨਗਰਸੋਭਨਤ੍ਥਾਯ ਨਗਰਮਜ੍ਝੇ ਉਸ੍ਸਾਪਿਤਰਤਨਤੋਰਣਾਨਿ, ਤੇ ਕੇਤੂ ਨਿਚ੍ਚਂ ਉਸ੍ਸਾਪਿਤਾ ਸੋਭਯਮਾਨਾ ਅਸ੍ਸਾ ਅਤ੍ਥੀਤਿ ਕੇਤੁਮਤੀ. ਪੂਰੇਤਿ ਧਨਧਞ੍ਞੇਹਿ ਸਬ੍ਬਜਨਾਨਂ ਮਨਨ੍ਤਿ ਪੁਰਂ. ਕੇਤੁਮਤੀ ਚ ਸਾ ਪੁਰਞ੍ਚ ਸੇਟ੍ਠਟ੍ਠੇਨ ਉਤ੍ਤਮਞ੍ਚੇਤਿ ਕੇਤੁਮਤੀਪੁਰੁਤ੍ਤਮਂ, ਤਸ੍ਮਿਂ ਕੇਤੁਮਤੀਪੁਰੁਤ੍ਤਮੇ. ਸੂਰੋ ਵਿਕ੍ਕਮਸਮ੍ਪਨ੍ਨੋਤਿ ਅਭੀਤੋ ਵੀਰਿਯਸਮ੍ਪਨ੍ਨੋ ਵਿਜਯੋ ਨਾਮ ਰਾਜਾ ਅਜ੍ਝਾਵਸੀਤਿ ਸਮ੍ਬਨ੍ਧੋ. ਇਤ੍ਥਂ ਭੂਤਂ ਪੁਰਞ੍ਚ ਸਬ੍ਬਵਤ੍ਥੁਵਾਹਨਞ੍ਚ ਛਡ੍ਡੇਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਸਨ੍ਤੋ ਸੁਮੇਧਭਗਵਨ੍ਤਂ ਦਿਸ੍ਵਾ ਸੋਮਨਸ੍ਸਂ ਉਪ੍ਪਾਦੇਤ੍ਵਾ ਚਨ੍ਦਨੇਨ ਪੂਜਾਕਰਣਮੇਵ ਵਿਸੇਸੋ.

੨੭੬. ਨਵਮਾਪਦਾਨੇ ਨਗਰੇ ਹਂਸਵਤਿਯਾਤਿਆਦਿਕਂ ਆਯਸ੍ਮਤੋ ਜਤੁਕਣ੍ਣਿਤ੍ਥੇਰਸ੍ਸ ਅਪਦਾਨਂ. ਤਤ੍ਥ ਸੇਟ੍ਠਿਪੁਤ੍ਤੋ ਹੁਤ੍ਵਾ ਸੁਵਣ੍ਣਪਾਸਾਦੇ ਵਸਨਭਾਵੋ ਚ ਪਞ੍ਚਹਿ ਕਾਮਗੁਣੇਹਿ ਸਮਙ੍ਗੀ ਹੁਤ੍ਵਾ ਵਸਨਭਾਵੋ ਚ ਸਬ੍ਬਦੇਸਵਾਸੀਨਂ ਸਬ੍ਬਸਿਪ੍ਪਵਿਞ੍ਞੂਨਞ੍ਚ ਆਗਨ੍ਤ੍ਵਾ ਸੇਵਨਭਾਵੋ ਚ ਵਿਸੇਸੋ.

੩੩੦. ਦਸਮਾਪਦਾਨੇ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਉਦੇਨਤ੍ਥੇਰਸ੍ਸ ਅਪਦਾਨਂ. ਤਤ੍ਥ ਹਿਮਵਨ੍ਤਸਮੀਪੇ ਪਦੁਮਪਬ੍ਬਤਂ ਨਿਸ੍ਸਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਸਨ੍ਤੇਨ ਪਦੁਮੁਤ੍ਤਰਸ੍ਸ ਭਗਵਤੋ ਪਦੁਮਪੁਪ੍ਫਂ ਗਹੇਤ੍ਵਾ ਪੂਜਿਤਭਾਵੋਵ ਵਿਸੇਸੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਏਕਚਤ੍ਤਾਲੀਸਮਵਗ੍ਗਵਣ੍ਣਨਾ ਸਮਤ੍ਤਾ.