੧-੧੦. ਆਰਕ੍ਖਦਾਯਕਤ੍ਥੇਰਅਪਦਾਨਾਦਿਵਣ੍ਣਨਾ

ਬਾਤ੍ਤਿਂਸਤਿਮਵਗ੍ਗੇ ਪਠਮਦੁਤਿਯਤਤਿਯਾਪਦਾਨਾਨਿ ਸੁਵਿਞ੍ਞੇਯ੍ਯਾਨੇਵ.

੧੬. ਚਤੁਤ੍ਥਾਪਦਾਨੇ ਜਲਜਗ੍ਗੇਹਿ ਓਕਿਰਿਨ੍ਤਿ ਜਲਜੇਹਿ ਉਤ੍ਤਮੇਹਿ ਉਪ੍ਪਲਪਦੁਮਾਦੀਹਿ ਪੁਪ੍ਫੇਹਿ ਓਕਿਰਿਂ ਪੂਜੇਸਿਨ੍ਤਿ ਅਤ੍ਥੋ.

ਪਞ੍ਚਮਾਪਦਾਨਂ ਉਤ੍ਤਾਨਮੇਵ.

੨੬-੨੭. ਛਟ੍ਠਾਪਦਾਨੇ ਚੇਤਿਯਂ ਉਤ੍ਤਮਂ ਨਾਮ, ਸਿਖਿਨੋ ਲੋਕਬਨ੍ਧੁਨੋਤਿ ਸਕਲਲੋਕਤ੍ਤਯਸ੍ਸ ਬਨ੍ਧੁਨੋ ਞਾਤਕਸ੍ਸ ਸਿਖਿਸ੍ਸ ਭਗਵਤੋ ਉਤ੍ਤਮਂ ਚੇਤਿਯਂ. ਇਰੀਣੇ ਜਨਸਞ੍ਚਰਵਿਰਹਿਤੇ ਵਨੇ ਮਨੁਸ੍ਸਾਨਂ ਕੋਲਾਹਲਵਿਰਹਿਤੇ ਮਹਾਅਰਞ੍ਞੇ ਅਹੋਸੀਤਿ ਸਮ੍ਬਨ੍ਧੋ. ਅਨ੍ਧਾਹਿਣ੍ਡਾਮਹਂ ਤਦਾਤਿ ਤਸ੍ਮਿਂ ਕਾਲੇ ਵਨੇ ਮਗ੍ਗਮੂਲ਼੍ਹਭਾਵੇਨ ਅਨ੍ਧੋ, ਨ ਚਕ੍ਖੁਨਾ ਅਨ੍ਧੋ, ਅਹਂ ਆਹਿਣ੍ਡਾਮਿ ਮਗ੍ਗਂ ਪਰਿਯੇਸਾਮੀਤਿ ਅਤ੍ਥੋ. ਪਵਨਾ ਨਿਕ੍ਖਮਨ੍ਤੇਨਾਤਿ ਮਹਾਵਨਤੋ ਨਿਕ੍ਖਮਨ੍ਤੇਨ ਮਯਾ ਸੀਹਾਸਨਂ ਉਤ੍ਤਮਾਸਨਂ, ਸੀਹਸ੍ਸ ਵਾ ਭਗਵਤੋ ਆਸਨਂ ਦਿਟ੍ਠਨ੍ਤਿ ਅਤ੍ਥੋ. ਏਕਂਸਂ ਅਞ੍ਜਲਿਂ ਕਤ੍ਵਾਤਿ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਸਿਰਸਿ ਅਞ੍ਜਲਿਂ ਠਪੇਤ੍ਵਾਤਿ ਅਤ੍ਥੋ. ਸਨ੍ਥਵਿਂ ਲੋਕਨਾਯਕਨ੍ਤਿ ਸਕਲਲੋਕਤ੍ਤਯਨਯਂ ਤਂ ਨਿਬ੍ਬਾਨਂ ਪਾਪੇਨ੍ਤਂ ਥੋਮਿਤਂ ਥੁਤਿਂ ਅਕਾਸਿਨ੍ਤਿ ਅਤ੍ਥੋ.

੩੪. ਸਤ੍ਤਮਾਪਦਾਨੇ ਸੁਦਸ੍ਸਨੋ ਮਹਾਵੀਰੋਤਿ ਸੁਨ੍ਦਰਦਸ੍ਸਨੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਸਮ੍ਪਨ੍ਨਸਰੀਰਤ੍ਤਾ ਮਨੋਹਰਦਸ੍ਸਨੋ ਮਹਾਵੀਰਿਯੋ ਸਿਦ੍ਧਤ੍ਥੋ ਭਗਵਾਤਿ ਸਮ੍ਬਨ੍ਧੋ. ਵਸਤਿਘਰਮੁਤ੍ਤਮੇਤਿ ਉਤ੍ਤਮੇ ਵਿਹਾਰੇ ਵਸਤੀਤਿ ਅਤ੍ਥੋ.

ਅਟ੍ਠਮਨਵਮਦਸਮਾਪਦਾਨਾਨਿ ਉਤ੍ਤਾਨਾਨੇਵਾਤਿ.

ਬਾਤ੍ਤਿਂਸਤਿਮਵਗ੍ਗਵਣ੍ਣਨਾ ਸਮਤ੍ਤਾ.