੩. ਸੁਭੂਤਿਵਗ੍ਗੋ
੧. ਸੁਭੂਤਿਤ੍ਥੇਰਅਪਦਾਨਵਣ੍ਣਨਾ
ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਸੁਭੂਤਿਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਇਤੋ ਕਪ੍ਪਸਤਸਹਸ੍ਸਮਤ੍ਥਕੇ ਅਨੁਪ੍ਪਨ੍ਨੇਯੇਵ ਪਦੁਮੁਤ੍ਤਰੇ ਭਗਵਤਿ ਲੋਕਨਾਥੇ ਹਂਸਵਤੀਨਗਰੇ ਅਞ੍ਞਤਰਸ੍ਸ ਬ੍ਰਾਹ੍ਮਣਮਹਾਸਾਲਸ੍ਸ ਏਕਪੁਤ੍ਤਕੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਨਨ੍ਦਮਾਣਵੋਤਿ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਤਤ੍ਥ ਸਾਰਂ ਅਪਸ੍ਸਨ੍ਤੋ ਅਤ੍ਤਨੋ ਪਰਿਵਾਰਭੂਤੇਹਿ ਚਤੁਚਤ੍ਤਾਲੀਸਾਯ ਮਾਣਵਸਹਸ੍ਸੇਹਿ ਸਦ੍ਧਿਂ ਪਬ੍ਬਤਪਾਦੇ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਟ੍ਠ ਸਮਾਪਤ੍ਤਿਯੋ ਪਞ੍ਚਾਭਿਞ੍ਞਾਯੋ ਚ ਨਿਬ੍ਬਤ੍ਤੇਸਿ. ਅਨ੍ਤੇਵਾਸਿਕਾਨਮ੍ਪਿ ਕਮ੍ਮਟ੍ਠਾਨਂ ਆਚਿਕ੍ਖਿ. ਤੇਪਿ ਨਚਿਰਸ੍ਸੇਵ ਝਾਨਲਾਭਿਨੋ ਅਹੇਸੁਂ.
ਤੇਨ ਚ ਸਮਯੇਨ ਪਦੁਮੁਤ੍ਤਰੋ ਭਗਵਾ ਲੋਕੇ ਉਪ੍ਪਜ੍ਜਿਤ੍ਵਾ ਹਂਸਵਤੀਨਗਰਂ ਉਪਨਿਸ੍ਸਾਯ ਵਿਹਰਨ੍ਤੋ ਏਕਦਿਵਸਂ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤੋ ਨਨ੍ਦਤਾਪਸਸ੍ਸ ਅਨ੍ਤੇਵਾਸਿਕਜਟਿਲਾਨਂ ਅਰਹਤ੍ਤੂਪਨਿਸ੍ਸਯਂ, ਨਨ੍ਦਤਾਪਸਸ੍ਸ ਚ ਦ੍ਵੀਹਙ੍ਗੇਹਿ ਸਮਨ੍ਨਾਗਤਸ੍ਸ ਸਾਵਕਟ੍ਠਾਨਨ੍ਤਰਸ੍ਸ ਪਤ੍ਥਨਂ ਦਿਸ੍ਵਾ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਪੁਬ੍ਬਣ੍ਹਸਮਯੇ ਪਤ੍ਤਚੀਵਰਮਾਦਾਯ ਅਞ੍ਞਂ ਕਞ੍ਚਿ ਅਨਾਮਨ੍ਤੇਤ੍ਵਾ ਸੀਹੋ ਵਿਯ ਏਕਚਰੋ ਨਨ੍ਦਤਾਪਸਸ੍ਸ ਅਨ੍ਤੇਵਾਸਿਕੇਸੁ ਫਲਾਫਲਤ੍ਥਾਯ ਗਤੇਸੁ ‘‘ਬੁਦ੍ਧਭਾਵਂ ਮੇ ਜਾਨਾਤੂ’’ਤਿ ਪਸ੍ਸਨ੍ਤਸ੍ਸੇਵ ਨਨ੍ਦਤਾਪਸਸ੍ਸ ਆਕਾਸਤੋ ਓਤਰਿਤ੍ਵਾ ਪਥਵਿਯਂ ਪਤਿਟ੍ਠਾਸਿ. ਨਨ੍ਦਤਾਪਸੋ ਬੁਦ੍ਧਾਨੁਭਾਵਞ੍ਚੇਵ ਲਕ੍ਖਣਪਾਰਿਪੂਰਿਞ੍ਚ ਦਿਸ੍ਵਾ ਲਕ੍ਖਣਮਨ੍ਤੇ ਸਮ੍ਮਸਿਤ੍ਵਾ ‘‘ਇਮੇਹਿ ਲਕ੍ਖਣੇਹਿ ਸਮਨ੍ਨਾਗਤੋ ਨਾਮ ਅਗਾਰਂ ਅਜ੍ਝਾਵਸਨ੍ਤੋ ਰਾਜਾ ਹੋਤਿ ਚਕ੍ਕਵਤ੍ਤੀ, ਪਬ੍ਬਜਨ੍ਤੋ ਲੋਕੇ ਵਿਵਟਚ੍ਛੇਦੋ ਸਬ੍ਬਞ੍ਞੂ ਬੁਦ੍ਧੋ ਹੋਤਿ, ਅਯਂ ਪੁਰਿਸਾਜਾਨੀਯੋ ਨਿਸ੍ਸਂਸਯਂ ਬੁਦ੍ਧੋ’’ਤਿ ਞਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਨਨ੍ਦਤਾਪਸੋਪਿ ਅਤ੍ਤਨੋ ਅਨੁਚ੍ਛਵਿਕਂ ਆਸਨਂ ਗਹੇਤ੍ਵਾ ਏਕਮਨ੍ਤਂ ਨਿਸੀਦਿ. ਤਸ੍ਮਿਂ ਸਮਯੇ ਚਤੁਚਤ੍ਤਾਲੀਸਸਹਸ੍ਸਜਟਿਲਾ ਪਣੀਤਪਣੀਤਾਨਿ ਓਜਵਨ੍ਤਾਨਿ ਫਲਾਫਲਾਨਿ ਗਹੇਤ੍ਵਾ ਆਚਰਿਯਸ੍ਸ ਸਨ੍ਤਿਕਂ ਸਮ੍ਪਤ੍ਤਾ ਬੁਦ੍ਧਾਨਞ੍ਚੇਵ ਆਚਰਿਯਸ੍ਸ ਚ ਨਿਸਿਨ੍ਨਾਕਾਰਂ ਓਲੋਕੇਤ੍ਵਾ ਆਹਂਸੁ – ‘‘ਆਚਰਿਯ, ਮਯਂ ‘ਇਮਸ੍ਮਿਂ ਲੋਕੇ ਤੁਮ੍ਹੇਹਿ ਮਹਨ੍ਤਤਰੋ ਨਤ੍ਥੀ’ਤਿ ਵਿਚਰਾਮ, ਅਯਂ ਪਨ ਪੁਰਿਸੋ ਤੁਮ੍ਹੇਹਿ ਮਹਨ੍ਤਤਰੋ ਮਞ੍ਞੇ’’ਤਿ. ਨਨ੍ਦਤਾਪਸੋ – ‘‘ਤਾਤਾ, ਕਿਂ ਵਦੇਥ, ਤੁਮ੍ਹੇ ਸਾਸਪੇਨ ਸਦ੍ਧਿਂ ਅਟ੍ਠਸਟ੍ਠਿਯੋਜਨਸਤਸਹਸ੍ਸੁਬ੍ਬੇਧਂ ਸਿਨੇਰੁਂ ਉਪਮੇਤੁਂ ਇਚ੍ਛਥ, ਸਬ੍ਬਞ੍ਞੁਬੁਦ੍ਧੇਨ ਸਦ੍ਧਿਂ ਮਾ ਮਂ ਉਪਮਿਤ੍ਥਾ’’ਤਿ ਆਹ. ਅਥ ਤੇ ਤਾਪਸਾ – ‘‘ਸਚੇ ਅਯਂ ਓਰਕੋ ਅਭਵਿਸ੍ਸ, ਨ ਅਮ੍ਹਾਕਂ ਆਚਰਿਯੋ ਏਵਂ ਉਪਮਂ ਆਹਰੇਯ੍ਯ. ਯਾਵ ਮਹਾਵਤਾਯਂ ਪੁਰਿਸਾਜਾਨੀਯੋ’’ਤਿ ਪਾਦੇਸੁ ਨਿਪਤਿਤ੍ਵਾ ਸਿਰਸਾ ਵਨ੍ਦਿਂਸੁ. ਅਥ ਤੇ ਆਚਰਿਯੋ ਆਹ – ‘‘ਤਾਤਾ, ਅਮ੍ਹਾਕਂ ਬੁਦ੍ਧਾਨਂ ਅਨੁਚ੍ਛਵਿਕੋ ਦੇਯ੍ਯਧਮ੍ਮੋ ਨਤ੍ਥਿ, ਭਗਵਾ ਚ ਭਿਕ੍ਖਾਚਾਰਵੇਲਾਯਂ ਇਧਾਗਤੋ, ਤਸ੍ਮਾ ਮਯਂ ਯਥਾਬਲਂ ਦੇਯ੍ਯਧਮ੍ਮਂ ਦਸ੍ਸਾਮ, ਤੁਮ੍ਹੇਹਿ ਯਂ ਯਂ ਪਣੀਤਂ ਫਲਾਫਲਂ ਆਭਤਂ, ਤਂ ਤਂ ਆਹਰਥਾ’’ਤਿ ਆਹਰਾਪੇਤ੍ਵਾ ਸਹਤ੍ਥੇਨੇਵ ਧੋਵਿਤ੍ਵਾ ਸਯਂ ਤਥਾਗਤਸ੍ਸ ਪਤ੍ਤੇ ਪਤਿਟ੍ਠਾਪੇਸਿ. ਸਤ੍ਥਾਰਾ ਫਲਾਫਲੇ ਪਟਿਗ੍ਗਹਿਤਮਤ੍ਤੇ ਦੇਵਤਾ ਦਿਬ੍ਬੋਜਂ ਪਕ੍ਖਿਪਿਂਸੁ. ਤਾਪਸੋ ਉਦਕਮ੍ਪਿ ਸਯਮੇਵ ਪਰਿਸ੍ਸਾਵੇਤ੍ਵਾ ਅਦਾਸਿ. ਤਤੋ ਭੋਜਨਕਿਚ੍ਚਂ ਨਿਟ੍ਠਾਪੇਤ੍ਵਾ ਨਿਸਿਨ੍ਨੇ ਸਤ੍ਥਰਿ ਸਬ੍ਬੇ ਅਨ੍ਤੇਵਾਸਿਕੇ ਪਕ੍ਕੋਸਿਤ੍ਵਾ ਸਤ੍ਥੁ ਸਨ੍ਤਿਕੇ ਸਾਰਣੀਯਂ ਕਥਂ ਕਥੇਨ੍ਤੋ ਨਿਸੀਦਿ. ਸਤ੍ਥਾ ‘‘ਭਿਕ੍ਖੁਸਙ੍ਘੋ ਆਗਚ੍ਛਤੂ’’ਤਿ ਚਿਨ੍ਤੇਸਿ. ਸਤ੍ਥੁ ਚਿਤ੍ਤਂ ਞਤ੍ਵਾ ਸਤਸਹਸ੍ਸਮਤ੍ਤਾ ਖੀਣਾਸਵਾ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਅਟ੍ਠਂਸੁ.
ਅਥ ਨਨ੍ਦਤਾਪਸੋ ਅਨ੍ਤੇਵਾਸਿਕੇ ਆਮਨ੍ਤੇਸਿ – ‘‘ਤਾਤਾ, ਬੁਦ੍ਧਾਨਂ ਨਿਸਿਨ੍ਨਾਸਨਮ੍ਪਿ ਨੀਚਂ, ਸਮਣਸਤਸਹਸ੍ਸਸ੍ਸਪਿ ਆਸਨਂ ਨਤ੍ਥਿ. ਤੁਮ੍ਹੇਹਿ ਅਜ੍ਜ ਉਲ਼ਾਰਂ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਸਕ੍ਕਾਰਂ ਕਾਤੁਂ ਵਟ੍ਟਤਿ, ਪਬ੍ਬਤਪਾਦਤੋ ਵਣ੍ਣਗਨ੍ਧਸਮ੍ਪਨ੍ਨਾਨਿ ਪੁਪ੍ਫਾਨਿ ਆਹਰਥਾ’’ਤਿ ਆਹ. ਅਚਿਨ੍ਤੇਯ੍ਯਤ੍ਤਾ ਇਦ੍ਧਿਵਿਸਯਸ੍ਸ ਤੇ ਮੁਹੁਤ੍ਤੇਨੇਵ ਵਣ੍ਣਗਨ੍ਧਰਸਸਮ੍ਪਨ੍ਨਾਨਿ ਪੁਪ੍ਫਾਨਿ ਆਹਰਿਤ੍ਵਾ ਬੁਦ੍ਧਾਨਂ ਯੋਜਨਪ੍ਪਮਾਣਂ ਪੁਪ੍ਫਾਸਨਂ ਪਞ੍ਞਾਪੇਸੁਂ. ਅਗ੍ਗਸਾਵਕਾਨਂ ਤਿਗਾਵੁਤਂ, ਸੇਸਭਿਕ੍ਖੂਨਂ ਅਡ੍ਢਯੋਜਨਾਦਿਭੇਦਂ, ਸਙ੍ਘਨਵਕਸ੍ਸ ਉਸਭਮਤ੍ਤਂ ਪਞ੍ਞਾਪੇਸੁਂ. ਏਵਂ ਪਞ੍ਞਤ੍ਤੇਸੁ ਆਸਨੇਸੁ ਨਨ੍ਦਤਾਪਸੋ ਤਥਾਗਤਸ੍ਸ ਪੁਰਤੋ ਅਞ੍ਜਲਿਂ ਪਗ੍ਗਯ੍ਹ ਠਿਤੋ, ‘‘ਭਨ੍ਤੇ, ਅਮ੍ਹਾਕਂ ਦੀਘਰਤ੍ਤਂ ਹਿਤਾਯ ਸੁਖਾਯ ਇਮਂ ਪੁਪ੍ਫਾਸਨਂ ਆਰੁਯ੍ਹ ਨਿਸੀਦਥਾ’’ਤਿ ਆਹ. ਨਿਸੀਦਿ ਭਗਵਾ ਪੁਪ੍ਫਾਸਨੇ. ਏਵਂ ਨਿਸਿਨ੍ਨੇ ਸਤ੍ਥਰਿ ਸਤ੍ਥੁ ਆਕਾਰਂ ਞਤ੍ਵਾ ਭਿਕ੍ਖੂ ਅਤ੍ਤਨੋ ਅਤ੍ਤਨੋ ਪਤ੍ਤਾਸਨੇ ਨਿਸੀਦਿਂਸੁ. ਨਨ੍ਦਤਾਪਸੋ ਮਹਨ੍ਤਂ ਪੁਪ੍ਫਚ੍ਛਤ੍ਤਂ ਗਹੇਤ੍ਵਾ ਤਥਾਗਤਸ੍ਸ ਮਤ੍ਥਕੇ ਧਾਰੇਨ੍ਤੋ ਅਟ੍ਠਾਸਿ. ਸਤ੍ਥਾ ‘‘ਤਾਪਸਾਨਂ ਅਯਂ ਸਕ੍ਕਾਰੋ ਮਹਪ੍ਫਲੋ ਹੋਤੂ’’ਤਿ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿ. ਸਤ੍ਥੁ ਸਮਾਪਨ੍ਨਭਾਵਂ ਞਤ੍ਵਾ ਭਿਕ੍ਖੂਪਿ ਸਮਾਪਤ੍ਤਿਂ ਸਮਾਪਜ੍ਜਿਂਸੁ. ਤਥਾਗਤੇ ਸਤ੍ਤਾਹਂ ਨਿਰੋਧਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨੇ ਅਨ੍ਤੇਵਾਸਿਕਾ ਭਿਕ੍ਖਾਚਾਰਕਾਲੇ ਸਮ੍ਪਤ੍ਤੇ ਵਨਮੂਲਫਲਾਫਲਂ ਪਰਿਭੁਞ੍ਜਿਤ੍ਵਾ ਸੇਸਕਾਲੇ ਬੁਦ੍ਧਾਨਂ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਂਸੁ. ਨਨ੍ਦਤਾਪਸੋ ਪਨ ਭਿਕ੍ਖਾਚਾਰਮ੍ਪਿ ਅਗਨ੍ਤ੍ਵਾ ਪੁਪ੍ਫਚ੍ਛਤ੍ਤਂ ਧਾਰੇਨ੍ਤੋਯੇਵ ਸਤ੍ਤਾਹਂ ਪੀਤਿਸੁਖੇਨੇਵ ਵੀਤਿਨਾਮੇਸਿ.
ਸਤ੍ਥਾ ਨਿਰੋਧਤੋ ਵੁਟ੍ਠਾਯ ਅਰਣਵਿਹਾਰਿਅਙ੍ਗੇਨ ਦਕ੍ਖਿਣੇਯ੍ਯਙ੍ਗੇਨ ਚਾਤਿ ਦ੍ਵੀਹਿ ਅਙ੍ਗੇਹਿ ਸਮਨ੍ਨਾਗਤਂ ਏਕਂ ਸਾਵਕਂ ‘‘ਇਸਿਗਣਸ੍ਸ ਪੁਪ੍ਫਾਸਨਾਨੁਮੋਦਨਂ ਕਰੋਹੀ’’ਤਿ ਆਣਾਪੇਸਿ. ਸੋ ਚਕ੍ਕਵਤ੍ਤਿਰਞ੍ਞੋ ਸਨ੍ਤਿਕਾ ਪਟਿਲਦ੍ਧਮਹਾਲਾਭੋ ਮਹਾਯੋਧੋ ਵਿਯ ਤੁਟ੍ਠਮਾਨਸੋ ਅਤ੍ਤਨੋ ਵਿਸਯੇ ਠਤ੍ਵਾ ਤੇਪਿਟਕਂ ਬੁਦ੍ਧਵਚਨਂ ਸਮ੍ਮਸਿਤ੍ਵਾ ਅਨੁਮੋਦਨਮਕਾਸਿ. ਤਸ੍ਸ ਦੇਸਨਾਵਸਾਨੇ ਸਤ੍ਥਾ ਸਯਂ ਧਮ੍ਮਂ ਦੇਸੇਸਿ. ਸਤ੍ਥੁ ਦੇਸਨਾਵਸਾਨੇ ਸਬ੍ਬੇਪਿ ਚਤੁਚਤ੍ਤਾਲੀਸਸਹਸ੍ਸਤਾਪਸਾ ਅਰਹਤ੍ਤਂ ਪਾਪੁਣਿਂਸੁ. ਸਤ੍ਥਾ – ‘‘ਏਥ ਭਿਕ੍ਖਵੋ’’ਤਿ ਹਤ੍ਥਂ ਪਸਾਰੇਸਿ. ਤੇਸਂ ਤਾਵਦੇਵ ਕੇਸਮਸ੍ਸੂ ਅਨ੍ਤਰਧਾਯਿਂਸੁ. ਅਟ੍ਠ ਪਰਿਕ੍ਖਾਰਾ ਸਰੀਰੇ ਪਟਿਮੁਕ੍ਕਾਵ ਅਹੇਸੁਂ. ਤੇ ਸਟ੍ਠਿਵਸ੍ਸਿਕਤ੍ਥੇਰਾ ਵਿਯ ਸਤ੍ਥਾਰਂ ਪਰਿਵਾਰਯਿਂਸੁ. ਨਨ੍ਦਤਾਪਸੋ ਪਨ ਵਿਕ੍ਖਿਤ੍ਤਚਿਤ੍ਤਤਾਯ ਵਿਸੇਸਂ ਨਾਧਿਗਞ੍ਛਿ. ਤਸ੍ਸ ਕਿਰ ਅਰਣਵਿਹਾਰਿਤ੍ਥੇਰਸ੍ਸ ਧਮ੍ਮਂ ਸੋਤੁਂ ਆਰਦ੍ਧਕਾਲਤੋ ਪਟ੍ਠਾਯ – ‘‘ਅਹੋ ਵਤਾਹਮ੍ਪਿ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਇਮਿਨਾ ਸਾਵਕੇਨ ਲਦ੍ਧਗੁਣਂ ਲਭੇਯ੍ਯ’’ਨ੍ਤਿ ਚਿਤ੍ਤਂ ਉਦਪਾਦਿ. ਸੋ ਤੇਨ ਵਿਤਕ੍ਕੇਨ ਮਗ੍ਗਫਲਪਟਿਵੇਧਂ ਕਾਤੁਂ ਨਾਸਕ੍ਖਿ. ਤਥਾਗਤਂ ਪਨ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਸਮ੍ਮੁਖੇ ਠਿਤੋ ਏਵਮਾਹ – ‘‘ਭਨ੍ਤੇ, ਯੇਨ ਭਿਕ੍ਖੁਨਾ ਇਸਿਗਣਸ੍ਸ ਪੁਪ੍ਫਾਸਨਾਨੁਮੋਦਨਾ ਕਤਾ, ਕੋ ਨਾਮਾਯਂ ਤੁਮ੍ਹਾਕਂ ਸਾਸਨੇ’’ਤਿ? ‘‘ਅਰਣਵਿਹਾਰਿਅਙ੍ਗੇਨ ਚ ਦਕ੍ਖਿਣੇਯ੍ਯਙ੍ਗੇਨ ਚ ਏਤਦਗ੍ਗਟ੍ਠਾਨਂ ਪਤ੍ਤੋ ਏਸੋ ਭਿਕ੍ਖੂ’’ਤਿ. ‘‘ਭਨ੍ਤੇ, ਯ੍ਵਾਯਂ ਮਯਾ ਸਤ੍ਤਾਹਂ ਪੁਪ੍ਫਚ੍ਛਤ੍ਤਂ ਧਾਰੇਨ੍ਤੇਨ ਸਕ੍ਕਾਰੋ ਕਤੋ, ਤੇਨ ਅਧਿਕਾਰੇਨ ਅਞ੍ਞਂ ਸਮ੍ਪਤ੍ਤਿਂ ਨ ਪਤ੍ਥੇਮਿ, ਅਨਾਗਤੇ ਪਨ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਅਯਂ ਥੇਰੋ ਵਿਯ ਦ੍ਵੀਹਙ੍ਗੇਹਿ ਸਮਨ੍ਨਾਗਤੋ ਸਾਵਕੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ.
ਸਤ੍ਥਾ ‘‘ਸਮਿਜ੍ਝਿਸ੍ਸਤਿ ਨੁ ਖੋ ਇਮਸ੍ਸ ਤਾਪਸਸ੍ਸ ਪਤ੍ਥਨਾ’’ਤਿ ਅਨਾਗਤਂਸਞਾਣਂ ਪੇਸੇਤ੍ਵਾ ਓਲੋਕੇਨ੍ਤੋ ਕਪ੍ਪਸਤਸਹਸ੍ਸਂ ਅਤਿਕ੍ਕਮਿਤ੍ਵਾ ਸਮਿਜ੍ਝਨਕਭਾਵਂ ਦਿਸ੍ਵਾ, ‘‘ਤਾਪਸ, ਨ ਤੇ ਅਯਂ ਪਤ੍ਥਨਾ ਮੋਘਂ ਭਵਿਸ੍ਸਤਿ, ਅਨਾਗਤੇ ਕਪ੍ਪਸਤਸਹਸ੍ਸਂ ਅਤਿਕ੍ਕਮਿਤ੍ਵਾ ਗੋਤਮੋ ਨਾਮ ਬੁਦ੍ਧੋ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸਨ੍ਤਿਕੇ ਸਮਿਜ੍ਝਿਸ੍ਸਤੀ’’ਤਿ ਧਮ੍ਮਕਥਂ ਕਥੇਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਆਕਾਸਂ ਪਕ੍ਖਨ੍ਦਿ. ਨਨ੍ਦਤਾਪਸੋ ਯਾਵ ਚਕ੍ਖੁਪਥਂ ਨ ਸਮਤਿਕ੍ਕਮਤਿ, ਤਾਵ ਸਤ੍ਥੁ ਭਿਕ੍ਖੁਸਙ੍ਘਸ੍ਸ ਚ ਅਞ੍ਜਲਿਂ ਪਗ੍ਗਹੇਤ੍ਵਾ ਅਟ੍ਠਾਸਿ. ਸੋ ਅਪਰਭਾਗੇ ਕਾਲੇਨ ਕਾਲਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਣਿਤ੍ਵਾ ਅਪਰਿਹੀਨਜ੍ਝਾਨੋਵ ਕਾਲਂ ਕਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ. ਤਤੋ ਪਨ ਚੁਤੋ ਅਪਰਾਨਿਪਿ ਪਞ੍ਚ ਜਾਤਿਸਤਾਨਿ ਪਬ੍ਬਜਿਤ੍ਵਾ ਆਰਞ੍ਞਕੋਵ ਅਹੋਸਿ, ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇਪਿ ਪਬ੍ਬਜਿਤ੍ਵਾ ਆਰਞ੍ਞਕੋ ਹੁਤ੍ਵਾ ਗਤਪਚ੍ਚਾਗਤਵਤ੍ਤਂ ਪੂਰੇਸਿ. ਏਤਂ ਕਿਰ ਵਤ੍ਤਂ ਅਪਰਿਪੂਰੇਤ੍ਵਾ ਮਹਾਸਾਵਕਭਾਵਂ ਪਾਪੁਣਨ੍ਤਾ ਨਾਮ ਨਤ੍ਥਿ, ਗਤਪਚ੍ਚਾਗਤਵਤ੍ਤਂ ਪਨ ਆਗਮਟ੍ਠਕਥਾਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸੋ ਵੀਸਤਿਵਸ੍ਸਸਹਸ੍ਸਾਨਿ ਗਤਪਚ੍ਚਾਗਤਵਤ੍ਤਂ ਪੂਰੇਤ੍ਵਾ ਕਾਲਂ ਕਤ੍ਵਾ ਤਾਵਤਿਂਸਦੇਵਲੋਕੇ ਨਿਬ੍ਬਤ੍ਤਿ.
ਏਵਂ ਸੋ ਤਾਵਤਿਂਸਭਵਨੇ ਅਪਰਾਪਰਂ ਉਪ੍ਪਜ੍ਜਨਵਸੇਨ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤੋ ਮਨੁਸ੍ਸਲੋਕੇ ਅਨੇਕਸਤਕ੍ਖਤ੍ਤੁਂ ਚਕ੍ਕਵਤ੍ਤਿਰਾਜਾ ਪਦੇਸਰਾਜਾ ਚ ਹੁਤ੍ਵਾ ਉਲ਼ਾਰਂ ਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਮ੍ਹਾਕਂ ਭਗਵਤੋ ਉਪ੍ਪਨ੍ਨਕਾਲੇ ਸਾਵਤ੍ਥਿਯਂ ਸੁਮਨਸੇਟ੍ਠਿਸ੍ਸ ਗੇਹੇ ਅਨਾਥਪਿਣ੍ਡਿਕਸ੍ਸ ਕਨਿਟ੍ਠੋ ਹੁਤ੍ਵਾ ਨਿਬ੍ਬਤ੍ਤਿ. ਸੁਭੂਤੀਤਿਸ੍ਸ ਨਾਮਂ ਅਹੋਸਿ.
ਤੇਨ ਚ ਸਮਯੇਨ ਅਮ੍ਹਾਕਂ ਭਗਵਾ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਅਨੁਪੁਬ੍ਬੇਨ ਰਾਜਗਹਂ ਗਨ੍ਤ੍ਵਾ ਤਤ੍ਥ ਵੇਲ਼ੁਵਨਪਟਿਗ੍ਗਹਣਾਦਿਨਾ ਲੋਕਾਨੁਗ੍ਗਹਂ ਕਰੋਨ੍ਤੋ ਰਾਜਗਹਂ ਉਪਨਿਸ੍ਸਾਯ ਸੀਤਵਨੇ ਵਿਹਾਸਿ. ਤਦਾ ਅਨਾਥਪਿਣ੍ਡਿਕੋ ਸੇਟ੍ਠਿ ਸਾਵਤ੍ਥਿਯਂ ਉਟ੍ਠਾਨਕਂ ਭਣ੍ਡਂ ਗਹੇਤ੍ਵਾ ਅਤ੍ਤਨੋ ਸਹਾਯਸ੍ਸ ਰਾਜਗਹਸੇਟ੍ਠਿਨੋ ਗੇਹਂ ਗਨ੍ਤ੍ਵਾ ਬੁਦ੍ਧੁਪ੍ਪਾਦਂ ਸੁਤ੍ਵਾ ਸਤ੍ਥਾਰਂ ਸੀਤਵਨੇ ਵਿਹਰਨ੍ਤਂ ਉਪਸਙ੍ਕਮਿਤ੍ਵਾ ਪਠਮਦਸ੍ਸਨੇਨੇਵ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਸਤ੍ਥਾਰਂ ਸਾਵਤ੍ਥਿਂ ਆਗਮਨਤ੍ਥਾਯ ਯਾਚਿਤ੍ਵਾ ਤਤੋ ਪਞ੍ਚਚਤ੍ਤਾਲੀਸਯੋਜਨੇ ਮਗ੍ਗੇ ਯੋਜਨੇ ਯੋਜਨੇ ਸਤਸਹਸ੍ਸਪਰਿਚ੍ਚਾਗੇਨ ਵਿਹਾਰੇ ਪਤਿਟ੍ਠਾਪੇਤ੍ਵਾ ਸਾਵਤ੍ਥਿਯਂ ਅਟ੍ਠਕਰੀਸਪ੍ਪਮਾਣਂ ਜੇਤਸ੍ਸ ਕੁਮਾਰਸ੍ਸ ਉਯ੍ਯਾਨਭੂਮਿਂ ਕੋਟਿਸਨ੍ਥਾਰੇਨ ਕਿਣਿਤ੍ਵਾ ਤਤ੍ਥ ਭਗਵਤੋ ਵਿਹਾਰਂ ਕਾਰੇਤ੍ਵਾ ਅਦਾਸਿ. ਵਿਹਾਰਮਹਦਿਵਸੇ ਅਯਂ ਸੁਭੂਤਿਕੁਟੁਮ੍ਬਿਕੋ ਅਨਾਥਪਿਣ੍ਡਿਕਸੇਟ੍ਠਿਨਾ ਸਦ੍ਧਿਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਸਦ੍ਧਂ ਪਟਿਲਭਿਤ੍ਵਾ ਪਬ੍ਬਜਿ. ਸੋ ਉਪਸਮ੍ਪਨ੍ਨੋ ਦ੍ਵੇ ਮਾਤਿਕਾ ਪਗੁਣਾ ਕਤ੍ਵਾ ਕਮ੍ਮਟ੍ਠਾਨਂ ਕਥਾਪੇਤ੍ਵਾ ਅਰਞ੍ਞੇ ਸਮਣਧਮ੍ਮਂ ਕਰੋਨ੍ਤੋ ਮੇਤ੍ਤਾਝਾਨਂ ਨਿਬ੍ਬਤ੍ਤੇਤ੍ਵਾ ਤਂ ਪਾਦਕਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ.
ਸੋ ਧਮ੍ਮਂ ਦੇਸੇਨ੍ਤੋ ਯਸ੍ਮਾ ਸਤ੍ਥਾਰਾ ਦੇਸਿਤਨਿਯਾਮੇਨ ਅਨੋਦਿਸ੍ਸਕਂ ਕਤ੍ਵਾ ਦੇਸੇਤਿ, ਤਸ੍ਮਾ ਅਰਣਵਿਹਾਰੀਨਂ ਅਗ੍ਗੋ ਨਾਮ ਜਾਤੋ. ਯਸ੍ਮਾ ਚ ਪਿਣ੍ਡਾਯ ਚਰਨ੍ਤੋ ਘਰੇ ਘਰੇ ਮੇਤ੍ਤਾਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਭਿਕ੍ਖਂ ਪਟਿਗ੍ਗਣ੍ਹਾਤਿ ‘‘ਏਵਂ ਦਾਯਕਾਨਂ ਮਹਪ੍ਫਲਂ ਭਵਿਸ੍ਸਤੀ’’ਤਿ, ਤਸ੍ਮਾ ਦਕ੍ਖਿਣੇਯ੍ਯਾਨਂ ਅਗ੍ਗੋ ਨਾਮ ਜਾਤੋ. ਤੇਨ ਨਂ ਭਗਵਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਅਰਣਵਿਹਾਰੀਨਂ ਦਕ੍ਖਿਣੇਯ੍ਯਾਨਞ੍ਚ ਯਦਿਦਂ ਸੁਭੂਤੀ’’ਤਿ (ਅ. ਨਿ. ੧.੧੯੮, ੨੦੧) ਦ੍ਵਯਙ੍ਗਸਮਨ੍ਨਾਗਤੇ ਅਗ੍ਗਟ੍ਠਾਨੇ ਠਪੇਸਿ. ਏਵਮਯਂ ਮਹਾਥੇਰੋ ਅਤ੍ਤਨਾ ਪੂਰਿਤਪਾਰਮੀਨਂ ਫਲਸ੍ਸ ਮਤ੍ਥਕਂ ਅਰਹਤ੍ਤਂ ਪਤ੍ਵਾ ਲੋਕੇ ਅਭਿਞ੍ਞਾਤੋ ਅਭਿਲਕ੍ਖਿਤੋ ਹੁਤ੍ਵਾ ਬਹੁਜਨਹਿਤਾਯ ਜਨਪਦਚਾਰਿਕਂ ਚਰਨ੍ਤੋ ਅਨੁਪੁਬ੍ਬੇਨ ਰਾਜਗਹਂ ਅਗਮਾਸਿ.
ਰਾਜਾ ਬਿਮ੍ਬਿਸਾਰੋ ਥੇਰਸ੍ਸ ਆਗਮਨਂ ਸੁਤ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਇਧੇਵ, ਭਨ੍ਤੇ, ਵਸਥ, ਵਸਨਟ੍ਠਾਨਂ ਵੋ ਕਰਿਸ੍ਸਾਮੀ’’ਤਿ ਵਤ੍ਵਾ ਪਕ੍ਕਨ੍ਤੋ ਵਿਸ੍ਸਰਿ. ਥੇਰੋ ਸੇਨਾਸਨਂ ਅਲਭਨ੍ਤੋ ਅਬ੍ਭੋਕਾਸੇ ਵੀਤਿਨਾਮੇਸਿ. ਥੇਰਸ੍ਸਾਨੁਭਾਵੇਨ ਦੇਵੋ ਨ ਵਸ੍ਸਤਿ. ਮਨੁਸ੍ਸਾ ਅਵੁਟ੍ਠਿਤਾਯ ਉਪਦ੍ਦੁਤਾ ਰਞ੍ਞੋ ਨਿਵੇਸਨਦ੍ਵਾਰੇ ਉਕ੍ਕੁਟ੍ਠਿਂ ਅਕਂਸੁ. ਰਾਜਾ ‘‘ਕੇਨ ਨੁ ਖੋ ਕਾਰਣੇਨ ਦੇਵੋ ਨ ਵਸ੍ਸਤੀ’’ਤਿ ਵੀਮਂਸਨ੍ਤੋ ‘‘ਥੇਰਸ੍ਸ ਅਬ੍ਭੋਕਾਸਵਾਸੇਨ ਮਞ੍ਞੇ ਨ ਵਸ੍ਸਤੀ’’ਤਿ ਚਿਨ੍ਤੇਤ੍ਵਾ ਤਸ੍ਸ ਪਣ੍ਣਕੁਟਿਂ ਕਾਰਾਪੇਤ੍ਵਾ ‘‘ਇਮਿਸ੍ਸਂ, ਭਨ੍ਤੇ, ਪਣ੍ਣਕੁਟਿਯਂ ਵਸਥਾ’’ਤਿ ਵਤ੍ਵਾ ਵਨ੍ਦਿਤ੍ਵਾ ਪਕ੍ਕਾਮਿ. ਥੇਰੋ ਕੁਟਿਂ ਪਵਿਸਿਤ੍ਵਾ ਤਿਣਸਨ੍ਥਾਰਕੇ ਪਲ੍ਲਙ੍ਕੇਨ ਨਿਸੀਦਿ. ਤਦਾ ਦੇਵੋ ਥੋਕਂ ਥੋਕਂ ਫੁਸਾਯਤਿ, ਨ ਸਮ੍ਮਾਧਾਰਂ ਅਨੁਪਵੇਚ੍ਛਤਿ. ਅਥ ਥੇਰੋ ਲੋਕਸ੍ਸ ਅਵੁਟ੍ਠਿਕਭਯਂ ਵਿਧਮਿਤੁਕਾਮੋ ਅਤ੍ਤਨੋ ਅਜ੍ਝਤ੍ਤਿਕਬਾਹਿਰਵਤ੍ਥੁਕਸ੍ਸ ਪਰਿਸ੍ਸਯਸ੍ਸ ਅਭਾਵਂ ਪਵੇਦੇਨ੍ਤੋ ‘‘ਛਨ੍ਨਾ ਮੇ ਕੁਟਿਕਾ’’ਤਿ (ਥੇਰਗਾ. ੧) ਗਾਥਮਾਹ. ਤਸ੍ਸਤ੍ਥੋ ਥੇਰਗਾਥਾਯਂ ਵੁਤ੍ਤੋਯੇਵ.
ਕਸ੍ਮਾ ਪਨੇਤੇ ਮਹਾਥੇਰਾ ਅਤ੍ਤਨੋ ਗੁਣੇ ਪਕਾਸੇਨ੍ਤੀਤਿ? ਇਮਿਨਾ ਦੀਘੇਨ ਅਦ੍ਧੁਨਾ ਅਨਧਿਗਤਪੁਬ੍ਬਂ ਪਰਮਗਮ੍ਭੀਰਂ ਅਤਿਵਿਯ ਸਨ੍ਤਂ ਪਣੀਤਂ ਅਤ੍ਤਨਾ ਅਧਿਗਤਲੋਕੁਤ੍ਤਰਧਮ੍ਮਂ ਪਚ੍ਚਵੇਕ੍ਖਿਤ੍ਵਾ ਪੀਤਿਵੇਗਸਮੁਸ੍ਸਾਹਿਤਉਦਾਨਦੀਪਨਤ੍ਥਂ ਸਾਸਨਸ੍ਸ ਨਿਯ੍ਯਾਨਿਕਭਾਵਵਿਭਾਵਨਤ੍ਥਞ੍ਚ ਪਰਮਪ੍ਪਿਚ੍ਛਾ ਅਰਿਯਾ ਅਤ੍ਤਨੋ ਗੁਣੇ ਪਕਾਸੇਨ੍ਤਿ. ਯਥਾ ਤਂ ਲੋਕਨਾਥੋ ਬੋਧਨੇਯ੍ਯਾਨਂ ਅਜ੍ਝਾਸਯਵਸੇਨ ‘‘ਦਸਬਲਸਮਨ੍ਨਾਗਤੋ, ਭਿਕ੍ਖਵੇ, ਤਥਾਗਤੋ ਚਤੁਵੇਸਾਰਜ੍ਜਵਿਸਾਰਦੋ’’ਤਿਆਦਿਨਾ (ਅ. ਨਿ. ੧੦.੨੧; ਮ. ਨਿ. ੧. ੧੪੮ ਅਤ੍ਥਤੋ ਸਮਾਨਂ) ਅਤ੍ਤਨੋ ਗੁਣੇ ਪਕਾਸੇਤਿ. ਏਵਮਯਂ ਥੇਰਸ੍ਸ ਅਞ੍ਞਾਬ੍ਯਾਕਰਣਗਾਥਾਪਿ ਅਹੋਸੀਤਿ.
੧. ਏਵਂ ਸੋ ਪਤ੍ਤਅਰਹਤ੍ਤਫਲੋ ਪਤ੍ਤਏਤਦਗ੍ਗਟ੍ਠਾਨੋ ਚ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਤਤ੍ਥ ਹਿਮਵਨ੍ਤਸ੍ਸਾਤਿ ਹਿਮਾਲਯਪਬ੍ਬਤਸ੍ਸ ਅਵਿਦੂਰੇ ਆਸਨ੍ਨੇ ਸਮੀਪੇ ਪਬ੍ਬਤਪਾਦੇ ਮਨੁਸ੍ਸਾਨਂ ਗਮਨਾਗਮਨਸਮ੍ਪਨ੍ਨੇ ਸਞ੍ਚਰਣਟ੍ਠਾਨੇਤਿ ਅਤ੍ਥੋ. ਨਿਸਭੋ ਨਾਮ ਪਬ੍ਬਤੋਤਿ ਪਬ੍ਬਤਾਨਂ ਜੇਟ੍ਠਤ੍ਤਾ ਨਾਮੇਨ ਨਿਸਭੋ ਨਾਮ ਸੇਲਮਯਪਬ੍ਬਤੋ ਅਹੋਸੀਤਿ ਸਮ੍ਬਨ੍ਧੋ. ਅਸ੍ਸਮੋ ਸੁਕਤੋ ਮਯ੍ਹਨ੍ਤਿ ਤਤ੍ਥ ਪਬ੍ਬਤੇ ਮਯ੍ਹਂ ਵਸਨਤ੍ਥਾਯ ਅਸ੍ਸਮੋ ਅਰਞ੍ਞਾਵਾਸੋ ਸੁਟ੍ਠੁ ਕਤੋ. ਕੁਟਿਰਤ੍ਤਿਟ੍ਠਾਨਦਿਵਾਟ੍ਠਾਨਵਤਿਪਰਿਕ੍ਖੇਪਾਦਿਵਸੇਨ ਸੁਨ੍ਦਰਾਕਾਰੇਨ ਕਤੋਤਿ ਅਤ੍ਥੋ. ਪਣ੍ਣਸਾਲਾ ਸੁਮਾਪਿਤਾਤਿ ਪਣ੍ਣੇਹਿ ਛਾਦਿਤਾ ਸਾਲਾ ਮਯ੍ਹਂ ਨਿਵਾਸਨਤ੍ਥਾਯ ਸੁਟ੍ਠੁ ਮਾਪਿਤਾ ਨਿਟ੍ਠਾਪਿਤਾਤਿ ਅਤ੍ਥੋ.
੨. ਕੋਸਿਯੋ ਨਾਮ ਨਾਮੇਨਾਤਿ ਮਾਤਾਪਿਤੂਹਿ ਕਤਨਾਮਧੇਯ੍ਯੇਨ ਕੋਸਿਯੋ ਨਾਮ. ਉਗ੍ਗਤਾਪਨੋ ਪਾਕਟਤਪੋ ਘੋਰਤਪੋ. ਏਕਾਕਿਯੋ ਅਞ੍ਞੇਸਂ ਅਭਾਵਾ ਅਹਂ ਏਵ ਏਕੋ. ਅਦੁਤਿਯੋ ਦੁਤਿਯਤਾਪਸਰਹਿਤੋ ਜਟਿਲੋ ਜਟਾਧਾਰੀ ਤਾਪਸੋ ਤਦਾ ਤਸ੍ਮਿਂ ਕਾਲੇ ਨਿਸਭੇ ਪਬ੍ਬਤੇ ਵਸਾਮਿ ਵਿਹਰਾਮੀਤਿ ਸਮ੍ਬਨ੍ਧੋ.
੩. ਫਲਂ ਮੂਲਞ੍ਚ ਪਣ੍ਣਞ੍ਚ, ਨ ਭੁਞ੍ਜਾਮਿ ਅਹਂ ਤਦਾਤਿ ਤਦਾ ਤਸ੍ਮਿਂ ਨਿਸਭਪਬ੍ਬਤੇ ਵਸਨਕਾਲੇ ਤਿਣ੍ਡੁਕਾਦਿਫਲਂ ਮੁਲ਼ਾਲਾਦਿਮੂਲਂ, ਕਾਰਪਣ੍ਣਾਦਿਪਣ੍ਣਞ੍ਚ ਰੁਕ੍ਖਤੋ ਓਚਿਨਿਤ੍ਵਾ ਨ ਭੁਞ੍ਜਾਮੀਤਿ ਅਤ੍ਥੋ. ਏਵਂ ਸਤਿ ਕਥਂ ਜੀਵਤੀਤਿ ਤਂ ਦਸ੍ਸੇਨ੍ਤੋ ਪਵਤ੍ਤਂਵ ਸੁਪਾਤਾਹਨ੍ਤਿ ਆਹ. ਤਤ੍ਥ ਪਵਤ੍ਤਂ ਸਯਮੇਵ ਜਾਤਂ ਸੁਪਾਤਂ ਅਤ੍ਤਨੋ ਧਮ੍ਮਤਾਯ ਪਤਿਤਂ ਪਣ੍ਣਾਦਿਕਂ ਨਿਸ੍ਸਾਯ ਆਹਾਰਂ ਕਤ੍ਵਾ ਅਹਂ ਤਾਵਦੇ ਤਸ੍ਮਿਂ ਕਾਲੇ ਜੀਵਾਮਿ ਜੀਵਿਕਂ ਕਪ੍ਪੇਮੀਤਿ ਸਮ੍ਬਨ੍ਧੋ. ‘‘ਪਵਤ੍ਤਪਣ੍ਡੁਪਣ੍ਣਾਨੀ’’ਤਿ ਵਾ ਪਾਠੋ, ਤਸ੍ਸ ਸਯਮੇਵ ਪਤਿਤਾਨਿ ਪਣ੍ਡੁਪਣ੍ਣਾਨਿ ਰੁਕ੍ਖਪਤ੍ਤਾਨਿ ਉਪਨਿਸ੍ਸਾਯ ਜੀਵਾਮੀਤਿ ਅਤ੍ਥੋ.
੪. ਨਾਹਂ ਕੋਪੇਮਿ ਆਜੀਵਨ੍ਤਿ ਅਹਂ ਜੀਵਿਤਂ ਚਜਮਾਨੋਪਿ ਪਰਿਚ੍ਚਾਗਂ ਕੁਰੁਮਾਨੋਪਿ ਤਣ੍ਹਾਵਸੇਨ ਫਲਮੂਲਾਦਿਆਹਾਰਪਰਿਯੇਸਨਾਯ ਸਮ੍ਮਾ ਆਜੀਵਂ ਨ ਕੋਪੇਮਿ ਨ ਨਾਸੇਮੀਤਿ ਸਮ੍ਬਨ੍ਧੋ. ਆਰਾਧੇਮਿ ਸਕਂ ਚਿਤ੍ਤਨ੍ਤਿ ਸਕਂ ਚਿਤ੍ਤਂ ਅਤ੍ਤਨੋ ਮਨਂ ਅਪ੍ਪਿਚ੍ਛਤਾਯ ਸਨ੍ਤੁਟ੍ਠਿਯਾ ਚ ਆਰਾਧੇਮਿ ਪਸਾਦੇਮਿ. ਵਿਵਜ੍ਜੇਮਿ ਅਨੇਸਨਨ੍ਤਿ ਵੇਜ੍ਜਕਮ੍ਮਦੂਤਕਮ੍ਮਾਦਿਵਸੇਨ ਅਨੇਸਨਂ ਅਯੁਤ੍ਤਪਰਿਯੇਸਨਂ ਵਿਵਜ੍ਜੇਮਿ ਦੂਰਂ ਕਰੋਮਿ.
੫. ਰਾਗੂਪਸਂਹਿਤਂ ਚਿਤ੍ਤਨ੍ਤਿ ਯਦਾ ਯਸ੍ਮਿਂ ਕਾਲੇ ਮਮ ਰਾਗੇਨ ਸਮ੍ਪਯੁਤ੍ਤਂ ਚਿਤ੍ਤਂ ਉਪ੍ਪਜ੍ਜਤਿ, ਤਦਾ ਸਯਮੇਵ ਅਤ੍ਤਨਾਯੇਵ ਪਚ੍ਚਵੇਕ੍ਖਾਮਿ ਞਾਣੇਨ ਪਟਿਵੇਕ੍ਖਿਤ੍ਵਾ ਵਿਨੋਦੇਮਿ. ਏਕਗ੍ਗੋ ਤਂ ਦਮੇਮਹਨ੍ਤਿ ਅਹਂ ਏਕਸ੍ਮਿਂ ਕਮ੍ਮਟ੍ਠਾਨਾਰਮ੍ਮਣੇ ਅਗ੍ਗੋ ਸਮਾਹਿਤੋ ਤਂ ਰਾਗਚਿਤ੍ਤਂ ਦਮੇਮਿ ਦਮਨਂ ਕਰੋਮਿ.
੬. ਰਜ੍ਜਸੇ ਰਜ੍ਜਨੀਯੇ ਚਾਤਿ ਰਜ੍ਜਨੀਯੇ ਅਲ੍ਲੀਯਿਤਬ੍ਬੇ ਰੂਪਾਰਮ੍ਮਣਾਦਿਵਤ੍ਥੁਸ੍ਮਿਂ ਰਜ੍ਜਸੇ ਅਲ੍ਲੀਨੋ ਅਸਿ ਭਵਸਿ. ਦੁਸ੍ਸਨੀਯੇ ਚ ਦੁਸ੍ਸਸੇਤਿ ਦੂਸਿਤਬ੍ਬੇ ਦੋਸਕਰਣਵਤ੍ਥੁਸ੍ਮਿਂ ਦੂਸਕੋ ਅਸਿ. ਮੁਯ੍ਹਸੇ ਮੋਹਨੀਯੇ ਚਾਤਿ ਮੋਹਿਤਬ੍ਬੇ ਮੋਹਕਰਣਵਤ੍ਥੁਸ੍ਮਿਂ ਮੋਯ੍ਹਸਿ ਮੂਲ਼੍ਹੋ ਅਸਿ ਭਵਸਿ. ਤਸ੍ਮਾ ਤੁਵਂ ਵਨਾ ਵਨਤੋ ਅਰਞ੍ਞਵਾਸਤੋ ਨਿਕ੍ਖਮਸ੍ਸੁ ਅਪਗਚ੍ਛਾਹੀਤਿ ਏਵਂ ਅਤ੍ਤਾਨਂ ਦਮੇਮੀਤਿ ਸਮ੍ਬਨ੍ਧੋ.
੨੪. ਤਿਮ੍ਬਰੂਸਕਵਣ੍ਣਾਭੋਤਿ ਸੁਵਣ੍ਣਤਿਮ੍ਬਰੂਸਕਵਣ੍ਣਾਭੋ, ਜਮ੍ਬੋਨਦਸੁਵਣ੍ਣਵਣ੍ਣੋਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਸੁਭੂਤਿਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੨. ਉਪਵਾਨਤ੍ਥੇਰਅਪਦਾਨਵਣ੍ਣਨਾ
ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਉਪਵਾਨਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਾਯਸ੍ਮਾ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਦਲਿਦ੍ਦਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਭਗਵਤਿ ਪਰਿਨਿਬ੍ਬੁਤੇ ਤਸ੍ਸ ਧਾਤੁਂ ਗਹੇਤ੍ਵਾ ਮਨੁਸ੍ਸਦੇਵਨਾਗਗਰੁਲ਼ਕੁਮ੍ਭਣ੍ਡਯਕ੍ਖਗਨ੍ਧਬ੍ਬੇਹਿ ਸਤ੍ਤਰਤਨਮਯੇ ਸਤ੍ਤਯੋਜਨਿਕੇ ਥੂਪੇ ਕਤੇ ਤਤ੍ਥ ਸੁਧੋਤਂ ਅਤ੍ਤਨੋ ਉਤ੍ਤਰਸਾਟਕਂ ਵੇਲ਼ਗ੍ਗੇ ਲਗ੍ਗੇਤ੍ਵਾ ਆਬਨ੍ਧਿਤ੍ਵਾ ਧਜਂ ਕਤ੍ਵਾ ਪੂਜਂ ਅਕਾਸਿ. ਤਂ ਗਹੇਤ੍ਵਾ ਅਭਿਸਮ੍ਮਤਕੋ ਨਾਮ ਯਕ੍ਖਸੇਨਾਪਤਿ ਦੇਵੇਹਿ ਚੇਤਿਯਪੂਜਾਰਕ੍ਖਣਤ੍ਥਂ ਠਪਿਤੋ ਅਦਿਸ੍ਸਮਾਨਕਾਯੋ ਤਂ ਆਕਾਸੇ ਧਾਰੇਨ੍ਤੋ ਚੇਤਿਯਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਅਕਾਸਿ. ਸੋ ਤਂ ਦਿਸ੍ਵਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨਮਾਨਸੋ ਹੁਤ੍ਵਾ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਉਪਵਾਨੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਜੇਤਵਨਪਟਿਗ੍ਗਹਣੇ ਬੁਦ੍ਧਾਨੁਭਾਵਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਅਰਹਤ੍ਤਂ ਪਤ੍ਵਾ ਛਲ਼ਭਿਞ੍ਞੋ ਅਹੋਸਿ. ਯਦਾ ਭਗਵਤੋ ਅਫਾਸੁ ਅਹੋਸਿ, ਤਦਾ ਥੇਰੋ ਉਣ੍ਹੋਦਕਂ ਤਥਾਰੂਪਂ ਪਾਨਕਞ੍ਚ ਭੇਸਜ੍ਜਂ ਭਗਵਤੋ ਉਪਨਾਮੇਸਿ. ਤੇਨਸ੍ਸ ਸਤ੍ਥੁਨੋ ਰੋਗੋ ਵੂਪਸਮਿ. ਤਸ੍ਸ ਭਗਵਾ ਅਨੁਮੋਦਨਂ ਅਕਾਸਿ.
੫੨. ਏਵਂ ਸੋ ਪਤ੍ਤਅਰਹਤ੍ਤਫਲੋ ਅਧਿਗਤਏਤਦਗ੍ਗਟ੍ਠਾਨੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਤ੍ਥ ਸਬ੍ਬੇਸਂ ਲੋਕਿਯਲੋਕੁਤ੍ਤਰਧਮ੍ਮਾਨਂ ਪਾਰਗੂ ਪਰਿਯੋਸਾਨਂ ਨਿਬ੍ਬਾਨਂ ਗਤੋ ਪਤ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋ ਜਿਤਪਞ੍ਚਮਾਰੋ ਭਗਵਾ ਅਗ੍ਗਿਕ੍ਖਨ੍ਧੋ ਇਵ ਛਬ੍ਬਣ੍ਣਾ ਬੁਦ੍ਧਰਂਸਿਯੋ ਜਲਿਤ੍ਵਾ ਸਬ੍ਬਲੋਕਂ ਧਮ੍ਮਪਜ੍ਜੋਤੇਨ ਓਭਾਸੇਤ੍ਵਾ ਸਮ੍ਬੁਦ੍ਧੋ ਸੁਟ੍ਠੁ ਬੁਦ੍ਧੋ ਅਵਿਜ੍ਜਾਨਿਦ੍ਦੂਪਗਤਾਯ ਪਜਾਯ ਸਵਾਸਨਾਯ ਕਿਲੇਸਨਿਦ੍ਦਾਯ ਪਟਿਬੁਦ੍ਧੋ ਵਿਕਸਿਤਨੇਤ੍ਤਪਙ੍ਕਜੋ ਪਰਿਨਿਬ੍ਬੁਤੋ ਖਨ੍ਧਪਰਿਨਿਬ੍ਬਾਨੇਨ ਨਿਬ੍ਬੁਤੋ ਅਦਸ੍ਸਨਂ ਗਤੋਤਿ ਸਮ੍ਬਨ੍ਧੋ.
੫੭. ਜਙ੍ਘਾਤਿ ਚੇਤਿਯਕਰਣਕਾਲੇ ਉਪਚਿਨਿਤਬ੍ਬਾਨਂ ਇਟ੍ਠਕਾਨਂ ਠਪਨਤ੍ਥਾਯ, ਨਿਬਨ੍ਧਿਯਮਾਨਸੋਪਾਨਪਨ੍ਤਿ.
੮੮. ਸੁਧੋਤਂ ਰਜਕੇਨਾਹਨ੍ਤਿ ਵਤ੍ਥਧੋਵਕੇਨ ਪੁਰਿਸੇਨ ਸੁਟ੍ਠੁ ਧੋਵਿਤਂ ਸੁਵਿਸੁਦ੍ਧਕਤਂ, ਉਤ੍ਤਰੇਯ੍ਯਪਟਂ ਮਮ ਉਤ੍ਤਰਸਾਟਕਂ ਅਹਂ ਵੇਲ਼ਗ੍ਗੇ ਲਗ੍ਗਿਤ੍ਵਾ ਧਜਂ ਕਤ੍ਵਾ ਉਕ੍ਖਿਪਿਂ, ਅਮ੍ਬਰੇ ਆਕਾਸੇ ਉਸ੍ਸਾਪੇਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਉਪਵਾਨਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੩. ਤਿਸਰਣਗਮਨਿਯਤ੍ਥੇਰਅਪਦਾਨਵਣ੍ਣਨਾ
ਨਗਰੇ ਬਨ੍ਧੁਮਤਿਯਾਤਿਆਦਿਕਂ ਆਯਸ੍ਮਤੋ ਤਿਸਰਣਗਮਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਬਨ੍ਧੁਮਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਅਨ੍ਧਮਾਤਾਪਿਤਰੋ ਉਪਟ੍ਠਾਸਿ. ਸੋ ਏਕਦਿਵਸਂ ਚਿਨ੍ਤੇਸਿ – ‘‘ਅਹਂ ਮਾਤਾਪਿਤਰੋ ਉਪਟ੍ਠਹਨ੍ਤੋ ਪਬ੍ਬਜਿਤੁਂ ਨ ਲਭਾਮਿ, ਯਂਨੂਨਾਹਂ ਤੀਣਿ ਸਰਣਾਨਿ ਗਣ੍ਹਿਸ੍ਸਾਮਿ, ਏਵਂ ਦੁਗ੍ਗਤਿਤੋ ਮੋਚੇਸ੍ਸਾਮੀ’’ਤਿ ਨਿਸਭਂ ਨਾਮ ਵਿਪਸ੍ਸਿਸ੍ਸ ਭਗਵਤੋ ਅਗ੍ਗਸਾਵਕਂ ਉਪਸਙ੍ਕਮਿਤ੍ਵਾ ਤੀਣਿ ਸਰਣਾਨਿ ਗਣ੍ਹਿ. ਸੋ ਤਾਨਿ ਵਸ੍ਸਸਤਸਹਸ੍ਸਾਨਿ ਰਕ੍ਖਿਤ੍ਵਾ ਤੇਨੇਵ ਕਮ੍ਮੇਨ ਤਾਵਤਿਂਸਭਵਨੇ ਨਿਬ੍ਬਤ੍ਤੋ, ਤਤੋ ਪਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਨਗਰੇ ਮਹਾਸਾਲਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਤਵਸ੍ਸਿਕੋਵ ਦਾਰਕੇਹਿ ਪਰਿਵੁਤੋ ਏਕਂ ਸਙ੍ਘਾਰਾਮਂ ਅਗਮਾਸਿ. ਤਤ੍ਥ ਏਕੋ ਖੀਣਾਸਵਤ੍ਥੇਰੋ ਤਸ੍ਸ ਧਮ੍ਮਂ ਦੇਸੇਤ੍ਵਾ ਸਰਣਾਨਿ ਅਦਾਸਿ. ਸੋ ਤਾਨਿ ਗਹੇਤ੍ਵਾ ਪੁਬ੍ਬੇ ਅਤ੍ਤਨੋ ਰਕ੍ਖਿਤਾਨਿ ਸਰਣਾਨਿ ਸਰਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤਂ ਅਰਹਤ੍ਤਪ੍ਪਤ੍ਤਂ ਭਗਵਾ ਉਪਸਮ੍ਪਾਦੇਸਿ.
੧੦੬. ਸੋ ਅਰਹਤ੍ਤਪ੍ਪਤ੍ਤੋ ਉਪਸਮ੍ਪਨ੍ਨੋ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਗਰੇ ਬਨ੍ਧੁਮਤਿਯਾਤਿਆਦਿਮਾਹ. ਤਤ੍ਥ ਮਾਤੁ ਉਪਟ੍ਠਾਕੋ ਅਹੁਨ੍ਤਿ ਅਹਂ ਮਾਤਾਪਿਤੂਨਂ ਉਪਟ੍ਠਾਕੋ ਭਰਕੋ ਬਨ੍ਧੁਮਤੀਨਗਰੇ ਅਹੋਸਿਨ੍ਤਿ ਸਮ੍ਬਨ੍ਧੋ.
੧੦੮. ਤਮਨ੍ਧਕਾਰਪਿਹਿਤਾਤਿ ਮੋਹਨ੍ਧਕਾਰੇਨ ਪਿਹਿਤਾ ਛਾਦਿਤਾ. ਤਿਵਿਧਗ੍ਗੀਹਿ ਡਯ੍ਹਰੇਤਿ ਰਾਗਗ੍ਗਿਦੋਸਗ੍ਗਿਮੋਹਗ੍ਗਿਸਙ੍ਖਾਤੇਹਿ ਤੀਹਿ ਅਗ੍ਗੀਹਿ ਡਯ੍ਹਰੇ ਡਯ੍ਹਨ੍ਤਿ ਸਬ੍ਬੇ ਸਤ੍ਤਾਤਿ ਸਮ੍ਬਨ੍ਧੋ.
੧੧੪. ਅਟ੍ਠ ਹੇਤੂ ਲਭਾਮਹਨ੍ਤਿ ਅਟ੍ਠ ਕਾਰਣਾਨਿ ਸੁਖਸ੍ਸ ਪਚ੍ਚਯਭੂਤਾਨਿ ਕਾਰਣਾਨਿ ਲਭਾਮਿ ਅਹਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਤਿਸਰਣਗਮਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੪. ਪਞ੍ਚਸੀਲਸਮਾਦਾਨਿਯਤ੍ਥੇਰਅਪਦਾਨਵਣ੍ਣਨਾ
ਨਗਰੇ ਚਨ੍ਦਵਤਿਯਾਤਿਆਦਿਕਂ ਆਯਸ੍ਮਤੋ ਪਞ੍ਚਸੀਲਸਮਾਦਾਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਪੁਰਿਮਭਵੇ ਕਤਾਕੁਸਲਕਮ੍ਮਾਨੁਰੂਪੇਨ ਦਲਿਦ੍ਦੋ ਹੁਤ੍ਵਾ ਅਪ੍ਪਨ੍ਨਪਾਨਭੋਜਨੋ ਪਰੇਸਂ ਭਤਿਂ ਕਤ੍ਵਾ ਜੀਵਨ੍ਤੋ ਸਂਸਾਰੇ ਆਦੀਨਵਂ ਞਤ੍ਵਾ ਪਬ੍ਬਜਿਤੁਕਾਮੋਪਿ ਪਬ੍ਬਜ੍ਜਂ ਅਲਭਮਾਨੋ ਅਨੋਮਦਸ੍ਸਿਸ੍ਸ ਭਗਵਤੋ ਸਾਵਕਸ੍ਸ ਨਿਸਭਤ੍ਥੇਰਸ੍ਸ ਸਨ੍ਤਿਕੇ ਪਞ੍ਚ ਸਿਕ੍ਖਾਪਦਾਨਿ ਸਮਾਦਿਯਿ. ਦੀਘਾਯੁਕਕਾਲੇ ਉਪ੍ਪਨ੍ਨਤ੍ਤਾ ਵਸ੍ਸਸਤਸਹਸ੍ਸਾਨਿ ਸੀਲਂ ਪਰਿਪਾਲੇਸਿ. ਤੇਨ ਕਮ੍ਮੇਨ ਸੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਮਹਾਭੋਗਕੁਲੇ ਨਿਬ੍ਬਤ੍ਤੋ. ਮਾਤਾਪਿਤਰੋ ਸੀਲਂ ਸਮਾਦਿਯਨ੍ਤੇ ਦਿਸ੍ਵਾ ਅਤ੍ਤਨੋ ਸੀਲਂ ਸਰਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਵਾ ਪਬ੍ਬਜਿ.
੧੩੪. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਉਦਾਨਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਗਰੇ ਚਨ੍ਦਵਤਿਯਾਤਿਆਦਿਮਾਹ. ਭਤਕੋ ਆਸਹਂ ਤਦਾਤਿ ਤਦਾ ਮਮ ਪੁਞ੍ਞਕਰਣਕਾਲੇ ਅਹਂ ਭਤਕੋ ਭਤਿਯਾ ਕਮ੍ਮਕਾਰਕੋ ਆਸਿਂ ਅਹੋਸਿਂ. ਪਰਕਮ੍ਮਾਯਨੇ ਯੁਤ੍ਤੋਤਿ ਭਤਿਯਾ ਪਰੇਸਂ ਕਮ੍ਮਕਰਣੇ ਆਯੁਤ੍ਤੋ ਯੋਜਿਤੋ ਓਕਾਸਾਭਾਵੇਨ ਸਂਸਾਰਤੋ ਮੁਚ੍ਚਨਤ੍ਥਾਯ ਅਹਂ ਪਬ੍ਬਜ੍ਜਂ ਨ ਲਭਾਮਿ.
੧੩੫. ਮਹਨ੍ਧਕਾਰਪਿਹਿਤਾਤਿ ਮਹਨ੍ਤੇਹਿ ਕਿਲੇਸਨ੍ਧਕਾਰੇਹਿ ਪਿਹਿਤਾ ਸਂਵੁਤਾ ਥਕਿਤਾ. ਤਿਵਿਧਗ੍ਗੀਹਿ ਡਯ੍ਹਰੇਤਿ ਨਰਕਗ੍ਗਿਪੇਤਗ੍ਗਿਸਂਸਾਰਗ੍ਗਿਸਙ੍ਖਾਤੇਹਿ ਤੀਹਿ ਅਗ੍ਗੀਹਿ ਡਯ੍ਹਨ੍ਤਿ. ਅਹਂ ਪਨ ਕੇਨ ਉਪਾਯੇਨ ਕੇਨ ਕਾਰਣੇਨ ਵਿਸਂਯੁਤ੍ਤੋ ਭਵੇਯ੍ਯਨ੍ਤਿ ਅਤ੍ਥੋ.
੧੩੬. ਦੇਯ੍ਯਧਮ੍ਮੋ ਅਨ੍ਨਪਾਨਾਦਿਦਾਤਬ੍ਬਯੁਤ੍ਤਕਂ ਵਤ੍ਥੁ ਮਯ੍ਹਂ ਨਤ੍ਥਿ, ਤਸ੍ਸਾਭਾਵੇਨ ਅਹਂ ਵਰਾਕੋ ਦੁਕ੍ਖਿਤੋ ਭਤਕੋ ਭਤਿਯਾ ਜੀਵਨਕੋ ਯਂਨੂਨਾਹਂ ਪਞ੍ਚਸੀਲਂ ਰਕ੍ਖੇਯ੍ਯਂ ਪਰਿਪੂਰਯਨ੍ਤਿ ਪਞ੍ਚਸੀਲਂ ਸਮਾਦਿਯਿਤ੍ਵਾ ਪਰਿਪੂਰੇਨ੍ਤੋ ਯਂਨੂਨ ਰਕ੍ਖੇਯ੍ਯਂ ਸਾਧੁਕਂ ਭਦ੍ਦਕਂ ਸੁਨ੍ਦਰਂ ਕਤ੍ਵਾ ਪਰਿਪਾਲੇਯ੍ਯਨ੍ਤਿ ਅਤ੍ਥੋ.
੧੪੮. ਸ੍ਵਾਹਂ ਯਸਮਨੁਭਵਿਨ੍ਤਿ ਸੋ ਅਹਂ ਦੇਵਮਨੁਸ੍ਸੇਸੁ ਮਹਨ੍ਤਂ ਯਸਂ ਅਨੁਭਵਿਂ ਤੇਸਂ ਸੀਲਾਨਂ ਵਾਹਸਾ ਆਨੁਭਾਵੇਨਾਤਿ ਅਤ੍ਥੋ. ਕਪ੍ਪਕੋਟਿਮ੍ਪਿ ਤੇਸਂ ਸੀਲਾਨਂ ਫਲਂ ਕਿਤ੍ਤੇਨ੍ਤੋ ਏਕਕੋਟ੍ਠਾਸਮੇਵ ਕਿਤ੍ਤਯੇ ਪਾਕਟਂ ਕਰੇਯ੍ਯਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਪਞ੍ਚਸੀਲਸਮਾਦਾਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੫. ਅਨ੍ਨਸਂਸਾਵਕਤ੍ਥੇਰਅਪਦਾਨਵਣ੍ਣਨਾ
ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਅਨ੍ਨਸਂਸਾਵਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਪਿਣ੍ਡਾਯ ਚਰਨ੍ਤਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਬ੍ਯਾਮਪ੍ਪਭਾਮਣ੍ਡਲੋਪਸੋਭਿਤਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਭਗਵਨ੍ਤਂ ਨਿਮਨ੍ਤੇਤ੍ਵਾ ਗੇਹਂ ਨੇਤ੍ਵਾ ਵਰਅਨ੍ਨਪਾਨੇਨ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭੋਜੇਸਿ. ਸੋ ਤੇਨੇਵ ਚਿਤ੍ਤਪ੍ਪਸਾਦੇਨ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚਵਿਤ੍ਵਾ ਮਨੁਸ੍ਸਲੋਕੇ ਨਿਬ੍ਬਤ੍ਤਿਤ੍ਵਾ ਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਅਪਰਾਪਰਂ ਦੇਵਮਨੁਸ੍ਸਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਸਾਸਨੇ ਪਸੀਦਿਤ੍ਵਾ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਸੋ ਪੁਬ੍ਬੇ ਕਤਪੁਞ੍ਞਨਾਮਵਸੇਨ ਅਨ੍ਨਸਂਸਾਵਕਤ੍ਥੇਰੋਤਿ ਪਾਕਟਨਾਮੋ ਅਹੋਸਿ.
੧੫੫-੬. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ‘‘ਏਵਂ ਮਯਾ ਇਮਿਨਾ ਪੁਞ੍ਞਸਮ੍ਭਾਰਾਨੁਭਾਵੇਨ ਪਤ੍ਤਂ ਅਰਹਤ੍ਤ’’ਨ੍ਤਿ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਉਦਾਨਵਸੇਨ ਪਕਾਸੇਨ੍ਤੋ ਸੁਵਣ੍ਣਵਣ੍ਣਨ੍ਤਿਆਦਿਮਾਹ. ਤਤ੍ਥ ਸੁਵਣ੍ਣਸ੍ਸ ਵਣ੍ਣੋ ਵਿਯ ਵਣ੍ਣੋ ਯਸ੍ਸ ਭਗਵਤੋ ਸੋਯਂ ਸੁਵਣ੍ਣਵਣ੍ਣੋ, ਤਂ ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ ਸਿਦ੍ਧਤ੍ਥਨ੍ਤਿ ਅਤ੍ਥੋ. ਗਚ੍ਛਨ੍ਤਂ ਅਨ੍ਤਰਾਪਣੇਤਿ ਵੇਸ੍ਸਾਨਂ ਆਪਣਪਨ੍ਤੀਨਂ ਅਨ੍ਤਰਵੀਥਿਯਂ ਗਚ੍ਛਮਾਨਂ. ਕਞ੍ਚਨਗ੍ਘਿਯਸਂਕਾਸਨ੍ਤਿ ਸੁਵਣ੍ਣਤੋਰਣਸਦਿਸਂ ਬਾਤ੍ਤਿਂਸਵਰਲਕ੍ਖਣਂ ਦ੍ਵਤ੍ਤਿਂਸਵਰਲਕ੍ਖਣੇਹਿ ਸਮ੍ਪਨ੍ਨਂ ਲੋਕਪਜ੍ਜੋਤਂ ਸਕਲਲੋਕਦੀਪਭੂਤਂ ਅਪ੍ਪਮੇਯ੍ਯਂ ਪਮਾਣਵਿਰਹਿਤਂ ਅਨੋਪਮਂ ਉਪਮਾਵਿਰਹਿਤਂ ਜੁਤਿਨ੍ਧਰਂ ਪਭਾਧਾਰਂ ਨੀਲਪੀਤਾਦਿਛਬ੍ਬਣ੍ਣਬੁਦ੍ਧਰਂਸਿਯੋ ਧਾਰਕਂ ਸਿਦ੍ਧਤ੍ਥਂ ਦਿਸ੍ਵਾ ਪਰਮਂ ਉਤ੍ਤਮਂ ਪੀਤਿਂ ਅਲਤ੍ਥਂ ਅਲਭਿਨ੍ਤਿ ਸਮ੍ਬਨ੍ਧੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਅਨ੍ਨਸਂਸਾਵਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੬. ਧੂਪਦਾਯਕਤ੍ਥੇਰਅਪਦਾਨਵਣ੍ਣਨਾ
ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਧੂਪਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਸਿਦ੍ਧਤ੍ਥੇ ਭਗਵਤਿ ਚਿਤ੍ਤਂ ਪਸਾਦੇਤ੍ਵਾ ਤਸ੍ਸ ਭਗਵਤੋ ਗਨ੍ਧਕੁਟਿਯਂ ਚਨ੍ਦਨਾਗਰੁਕਾਲ਼ਾਨੁਸਾਰਿਆਦਿਨਾ ਕਤੇਹਿ ਅਨੇਕੇਹਿ ਧੂਪੇਹਿ ਧੂਪਪੂਜਂ ਅਕਾਸਿ. ਸੋ ਤੇਨ ਪੁਞ੍ਞੇਨ ਦੇਵੇਸੁ ਚ ਮਨੁਸ੍ਸੇਸੁ ਚ ਉਭਯਸਮ੍ਪਤ੍ਤਿਯੋ ਅਨੁਭਵਨ੍ਤੋ ਨਿਬ੍ਬਤ੍ਤਨਿਬ੍ਬਤ੍ਤਭਵੇ ਪੂਜਨੀਯੋ ਹੁਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਪੁਞ੍ਞਸਮ੍ਭਾਰਾਨੁਭਾਵੇਨ ਸਾਸਨੇ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਵਾ ਕਤਧੂਪਪੂਜਾਪੁਞ੍ਞਤ੍ਤਾ ਨਾਮੇਨ ਧੂਪਦਾਯਕਤ੍ਥੇਰੋਤਿ ਸਬ੍ਬਤ੍ਥ ਪਾਕਟੋ. ਸੋ ਪਤ੍ਤਅਰਹਤ੍ਤਫਲੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਦਸ੍ਸੇਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਮਾਹ. ਸਿਦ੍ਧੋ ਪਰਿਪੁਣ੍ਣੋ ਸਬ੍ਬਞ੍ਞੁਤਞ੍ਞਾਣਾਦਿਗੁਣਸਙ੍ਖਾਤੋ ਅਤ੍ਥੋ ਪਯੋਜਨਂ ਯਸ੍ਸ ਭਗਵਤੋ ਸੋਯਂ ਸਿਦ੍ਧਤ੍ਥੋ, ਤਸ੍ਸ ਸਿਦ੍ਧਤ੍ਥਸ੍ਸ ਭਗਵਤੋ ਭਗ੍ਯਾਦਿਗੁਣਵਨ੍ਤਸ੍ਸ ਲੋਕਜੇਟ੍ਠਸ੍ਸ ਸਕਲਲੋਕੁਤ੍ਤਮਸ੍ਸ ਤਾਦਿਨੋ ਇਟ੍ਠਾਨਿਟ੍ਠੇਸੁ ਤਾਦਿਸਸ੍ਸ ਅਚਲਸਭਾਵਸ੍ਸਾਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.
ਧੂਪਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੭. ਪੁਲਿਨਪੂਜਕਤ੍ਥੇਰਅਪਦਾਨਵਣ੍ਣਨਾ
ਵਿਪਸ੍ਸਿਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਪੁਲਿਨਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਸਾਸਨੇ ਪਸਨ੍ਨਚਿਤ੍ਤੋ ਚੇਤਿਯਙ੍ਗਣਬੋਧਿਯਙ੍ਗਣੇਸੁ ਪੁਰਾਣਵਾਲੁਕਂ ਅਪਨੇਤ੍ਵਾ ਨਵਂ ਮੁਤ੍ਤਾਦਲਸਦਿਸਪਣ੍ਡਰਪੁਲਿਨਂ ਓਕਿਰਿਤ੍ਵਾ ਮਾਲ਼ਕਂ ਅਲਙ੍ਕਰਿ. ਤੇਨ ਕਮ੍ਮੇਨ ਸੋ ਦੇਵਲੋਕੇ ਨਿਬ੍ਬਤ੍ਤੋ ਤਤ੍ਥ ਦਿਬ੍ਬੇਹਿ ਰਤਨੇਹਿ ਵਿਜ੍ਜੋਤਮਾਨੇ ਅਨੇਕਯੋਜਨੇ ਕਨਕਵਿਮਾਨੇ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤੋ ਮਨੁਸ੍ਸਲੋਕੇ ਸਤ੍ਤਰਤਨਸਮ੍ਪਨ੍ਨੋ ਚਕ੍ਕਵਤ੍ਤੀ ਰਾਜਾ ਹੁਤ੍ਵਾ ਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਪਰਾਪਰਂ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਸਾਸਨੇ ਪਸਨ੍ਨੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਸੋ ਅਤ੍ਤਨੋ ਕਤਪੁਞ੍ਞਨਾਮਸਦਿਸੇਨ ਨਾਮੇਨ ਪੁਲਿਨਪੂਜਕਤ੍ਥੇਰੋਤਿ ਪਾਕਟੋ.
੧੬੫. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਦਸ੍ਸੇਨ੍ਤੋ ਵਿਪਸ੍ਸਿਸ੍ਸ ਭਗਵਤੋਤਿਆਦਿਮਾਹ. ਤਤ੍ਥ ਵਿਵਿਧਂ ਪਸ੍ਸਤੀਤਿ ਵਿਪਸ੍ਸੀ, ਵਿਵਿਚ੍ਚ ਪਸ੍ਸਤੀਤਿ ਵਾ ਵਿਪਸ੍ਸੀ, ਵਿਵਿਧੇ ਅਤ੍ਤਤ੍ਥਪਰਤ੍ਥਾਦਿਭੇਦੇ ਅਤ੍ਥੇ ਪਸ੍ਸਤੀਤਿ ਵਾ ਵਿਪਸ੍ਸੀ, ਵਿਵਿਧੇ ਵੋਹਾਰਪਰਮਤ੍ਥਾਦਿਭੇਦੇ ਪਸ੍ਸਤੀਤਿ ਵਾ ਵਿਪਸ੍ਸੀ, ਤਸ੍ਸ ਵਿਪਸ੍ਸਿਸ੍ਸ ਬੋਧਿਯਾ ਪਾਦਪੁਤ੍ਤਮੇ ਉਤ੍ਤਮੇ ਬੋਧਿਰੁਕ੍ਖਮਣ੍ਡਲਮਾਲ਼ਕੇ ਪੁਰਾਣਪੁਲਿਨਂ ਵਾਲੁਕਂ ਛਡ੍ਡੇਤ੍ਵਾ ਸੁਦ੍ਧਂ ਪਣ੍ਡਰਂ ਪੁਲਿਨਂ ਆਕਿਰਿਂ ਸਨ੍ਥਰਿਂ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਪੁਲਿਨਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੮. ਉਤ੍ਤਿਯਤ੍ਥੇਰਅਪਦਾਨਵਣ੍ਣਨਾ
ਚਨ੍ਦਭਾਗਾਨਦੀਤੀਰੇਤਿਆਦਿਕਂ ਆਯਸ੍ਮਤੋ ਉਤ੍ਤਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਚਨ੍ਦਭਾਗਾਨਦਿਯਂ ਸੁਸੁਮਾਰੋ ਹੁਤ੍ਵਾ ਨਿਬ੍ਬਤ੍ਤੋ ਨਦੀਤੀਰਂ ਉਪਗਤਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਪਾਰਂ ਨੇਤੁਕਾਮੋ ਤੀਰਸਮੀਪੇਯੇਵ ਨਿਪਜ੍ਜਿ. ਭਗਵਾ ਤਸ੍ਸ ਅਨੁਕਮ੍ਪਾਯ ਪਿਟ੍ਠਿਯਂ ਪਾਦੇ ਠਪੇਸਿ. ਸੋ ਤੁਟ੍ਠੋ ਉਦਗ੍ਗੋ ਪੀਤਿਵੇਗੇਨ ਮਹੁਸ੍ਸਾਹੋ ਹੁਤ੍ਵਾ ਸੋਤਂ ਛਿਨ੍ਦਨ੍ਤੋ ਸੀਘੇਨ ਜਵੇਨ ਭਗਵਨ੍ਤਂ ਪਰਤੀਰਂ ਨੇਸਿ. ਭਗਵਾ ਤਸ੍ਸ ਚਿਤ੍ਤਪ੍ਪਸਾਦਂ ਞਤ੍ਵਾ ‘‘ਅਯਂ ਇਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਸ੍ਸਤਿ, ਤਤੋ ਪਟ੍ਠਾਯ ਸੁਗਤੀਸੁਯੇਵ ਸਂਸਰਨ੍ਤੋ ਇਤੋ ਚਤੁਨ੍ਨਵੁਤਿਕਪ੍ਪੇ ਅਮਤਂ ਪਾਪੁਣਿਸ੍ਸਤੀ’’ਤਿ ਬ੍ਯਾਕਰਿਤ੍ਵਾ ਪਕ੍ਕਾਮਿ.
ਸੋ ਤਥਾ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਉਤ੍ਤਿਯੋਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ‘‘ਅਮਤਂ ਪਰਿਯੇਸਿਸ੍ਸਾਮੀ’’ਤਿ ਪਰਿਬ੍ਬਾਜਕੋ ਹੁਤ੍ਵਾ ਏਕਦਿਵਸਂ ਭਗਵਨ੍ਤਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਹੁਤ੍ਵਾ ਸਾਸਨੇ ਪਬ੍ਬਜਿਤ੍ਵਾ ਸੀਲਦਿਟ੍ਠੀਨਂ ਅਵਿਸੋਧਿਤਤ੍ਤਾ ਵਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤੋ ਅਞ੍ਞਂ ਭਿਕ੍ਖੁਂ ਵਿਸੇਸਂ ਨਿਬ੍ਬਤ੍ਤੇਤ੍ਵਾ ਅਞ੍ਞਂ ਬ੍ਯਾਕਰੋਨ੍ਤਂ ਦਿਸ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਸਙ੍ਖੇਪੇਨ ਓਵਾਦਂ ਯਾਚਿ. ਸਤ੍ਥਾਪਿ ਤਸ੍ਸ, ‘‘ਤਸ੍ਮਾਤਿਹ ਤ੍ਵਂ, ਉਤ੍ਤਿਯ, ਆਦਿਮੇਵ ਵਿਸੋਧੇਹੀ’’ਤਿਆਦਿਨਾ (ਸਂ. ਨਿ. ੫.੩੮੨) ਸਙ੍ਖੇਪੇਨੇਵ ਓਵਾਦਂ ਅਦਾਸਿ. ਸੋ ਸਤ੍ਥੁ ਓਵਾਦੇ ਠਤ੍ਵਾ ਵਿਪਸ੍ਸਨਂ ਆਰਭਿ. ਤਸ੍ਸ ਆਰਦ੍ਧਵਿਪਸ੍ਸਕਸ੍ਸ ਆਬਾਧੋ ਉਪ੍ਪਜ੍ਜਿ. ਉਪ੍ਪਨ੍ਨੇ ਆਬਾਧੇ ਜਾਤਸਂਵੇਗੋ ਵੀਰਿਯਾਰਮ੍ਭਵਤ੍ਥੁਂ ਞਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ.
੧੬੯. ਏਵਂ ਸੋ ਕਤਸਮ੍ਭਾਰਾਨੁਰੂਪੇਨ ਪਤ੍ਤਅਰਹਤ੍ਤਫਲੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਚਨ੍ਦਭਾਗਾਨਦੀਤੀਰੇਤਿਆਦਿਮਾਹ. ਤਤ੍ਥ ਚਨ੍ਦਭਾਗਾਨਦੀਤੀਰੇਤਿ ਪਰਿਸੁਦ੍ਧਪਣ੍ਡਰਪੁਲਿਨਤਲੇਹਿ ਚ ਪਭਾਸਮ੍ਪਨ੍ਨਪਸਨ੍ਨਮਧੁਰੋਦਕਪਰਿਪੁਣ੍ਣਤਾਯ ਚ ਚਨ੍ਦਪ੍ਪਭਾਕਿਰਣਸਸ੍ਸਿਰੀਕਾਭਾ ਨਦਮਾਨਾ ਸਦ੍ਦਂ ਕੁਰੁਮਾਨਾ ਗਚ੍ਛਤੀਤਿ ਚਨ੍ਦਭਾਗਾਨਦੀ, ਤਸ੍ਸਾ ਚਨ੍ਦਭਾਗਾਨਦਿਯਾ ਤੀਰੇ ਸੁਸੁਮਾਰੋ ਅਹੋਸਿਨ੍ਤਿ ਸਮ੍ਬਨ੍ਧੋ. ਤਤ੍ਥ ਸੁਸੁਮਾਰੋਤਿ ਖੁਦ੍ਦਕਮਚ੍ਛਗੁਮ੍ਬੇ ਖਣ੍ਡਾਖਣ੍ਡਿਕਂ ਕਰੋਨ੍ਤੋ ਮਾਰੇਤੀਤਿ ਸੁਸੁਮਾਰੋ, ਚਣ੍ਡਮਚ੍ਛੋ ਕੁਮ੍ਭੀਲੋਤਿ ਅਤ੍ਥੋ. ਸਭੋਜਨਪਸੁਤੋਹਨ੍ਤਿ ਅਹਂ ਸਭੋਜਨੇ ਸਕਗੋਚਰੇ ਪਸੁਤੋ ਬ੍ਯਾਵਟੋ. ਨਦੀਤਿਤ੍ਥਂ ਅਗਚ੍ਛਹਨ੍ਤਿ ਭਗਵਤੋ ਆਗਮਨਕਾਲੇ ਅਹਂ ਨਦੀਤਿਤ੍ਥਂ ਅਗਚ੍ਛਿਂ ਪਤ੍ਤੋਮ੍ਹਿ.
੧੭੦. ਸਿਦ੍ਧਤ੍ਥੋ ਤਮ੍ਹਿ ਸਮਯੇਤਿ ਤਸ੍ਮਿਂ ਮਮ ਤਿਤ੍ਥਗਮਨਕਾਲੇ ਸਿਦ੍ਧਤ੍ਥੋ ਭਗਵਾ ਅਗ੍ਗਪੁਗ੍ਗਲੋ ਸਬ੍ਬਸਤ੍ਤੇਸੁ ਜੇਟ੍ਠੋ ਸੇਟ੍ਠੋ ਸਯਮ੍ਭੂ ਸਯਮੇਵ ਭੂਤੋ ਜਾਤੋ ਬੁਦ੍ਧਭੂਤੋ ਸੋ ਭਗਵਾ ਨਦਿਂ ਤਰਿਤੁਕਾਮੋ ਨਦੀਤੀਰਂ ਉਪਾਗਮਿ.
੧੭੨. ਪੇਤ੍ਤਿਕਂ ਵਿਸਯਂ ਮਯ੍ਹਨ੍ਤਿ ਮਯ੍ਹਂ ਪਿਤੁਪਿਤਾਮਹਾਦੀਹਿ ਪਰਮ੍ਪਰਾਨੀਤਂ, ਯਦਿਦਂ ਸਮ੍ਪਤ੍ਤਸਮ੍ਪਤ੍ਤਮਹਾਨੁਭਾਵਾਨਂ ਤਰਣਨ੍ਤਿ ਅਤ੍ਥੋ.
੧੭੩. ਮਮ ਉਗ੍ਗਜ੍ਜਨਂ ਸੁਤ੍ਵਾਤਿ ਮਯ੍ਹਂ ਉਗ੍ਗਜ੍ਜਨਂ ਆਰਾਧਨਂ ਸੁਤ੍ਵਾ ਮਹਾਮੁਨਿ ਭਗਵਾ ਅਭਿਰੁਹੀਤਿ ਸਮ੍ਬਨ੍ਧੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.
ਉਤ੍ਤਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੯. ਏਕਞ੍ਜਲਿਕਤ੍ਥੇਰਅਪਦਾਨਵਣ੍ਣਨਾ
ਸੁਵਣ੍ਣਵਣ੍ਣਨ੍ਤਿਆਦਿਕਂ ਆਯਸ੍ਮਤੋ ਏਕਞ੍ਜਲਿਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਰਤਨਤ੍ਤਯੇ ਪਸਨ੍ਨੋ ਪਿਣ੍ਡਾਯ ਚਰਨ੍ਤਂ ਵਿਪਸ੍ਸਿਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਅਞ੍ਜਲਿਂ ਪਗ੍ਗਹੇਤ੍ਵਾ ਅਟ੍ਠਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਬ੍ਬਤ੍ਥ ਪੂਜਨੀਯੋ ਹੁਤ੍ਵਾ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤਿਤ੍ਵਾ ਸਾਸਨੇ ਪਸੀਦਿਤ੍ਵਾ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤੇ ਪਤਿਟ੍ਠਾਸਿ. ਪੁਬ੍ਬੇ ਕਤਪੁਞ੍ਞਵਸੇਨ ਏਕਞ੍ਜਲਿਕਤ੍ਥੇਰੋਤਿ ਪਾਕਟੋ.
੧੮੦. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਤਂ ਹਤ੍ਥਤਲੇ ਆਮਲਕਂ ਵਿਯ ਦਿਸ੍ਵਾ ਉਦਾਨਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਣ੍ਣਵਣ੍ਣਨ੍ਤਿਆਦਿਮਾਹ. ਵਿਪਸ੍ਸਿਂ ਸਤ੍ਥਵਾਹਗ੍ਗਨ੍ਤਿ ਵਾਣਿਜੇ ਕਨ੍ਤਾਰਾ ਵਹਤਿ ਤਾਰੇਤੀਤਿ ਸਤ੍ਥਵਾਹੋ. ਵਾਲ਼ਕਨ੍ਤਾਰਾ ਚੋਲ਼ਕਨ੍ਤਾਰਾ ਦੁਬ੍ਭਿਕ੍ਖਕਨ੍ਤਾਰਾ ਨਿਰੁਦਕਕਨ੍ਤਾਰਾ ਯਕ੍ਖਕਨ੍ਤਾਰਾ ਅਪ੍ਪਭਕ੍ਖਕਨ੍ਤਾਰਾ ਚ ਤਾਰੇਤਿ ਉਤ੍ਤਾਰੇਤਿ ਪਤਾਰੇਤਿ ਨਿਤ੍ਤਾਰੇਤਿ ਖੇਮਨ੍ਤਭੂਮਿਂ ਪਾਪੇਤੀਤਿ ਅਤ੍ਥੋ. ਕੋ ਸੋ? ਵਾਣਿਜਜੇਟ੍ਠਕੋ. ਸਤ੍ਥਵਾਹਸਦਿਸਤ੍ਤਾ ਅਯਮ੍ਪਿ ਭਗਵਾ ਸਤ੍ਥਵਾਹੋ. ਤਥਾ ਹਿ ਸੋ ਤਿਵਿਧਂ ਬੋਧਿਂ ਪਤ੍ਥਯਨ੍ਤੇ ਕਤਪੁਞ੍ਞਸਮ੍ਭਾਰੇ ਸਤ੍ਤੇ ਜਾਤਿਕਨ੍ਤਾਰਾ ਜਰਾਕਨ੍ਤਾਰਾ ਬ੍ਯਾਧਿਕਨ੍ਤਾਰਾ ਮਰਣਕਨ੍ਤਾਰਾ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਕਨ੍ਤਾਰਾ ਚ ਸਬ੍ਬਸ੍ਮਾ ਸਂਸਾਰਕਨ੍ਤਾਰਾ ਚ ਤਾਰੇਤਿ ਉਤ੍ਤਾਰੇਤਿ ਪਤਾਰੇਤਿ ਨਿਤ੍ਤਾਰੇਤਿ ਨਿਬ੍ਬਾਨਥਲਂ ਪਾਪੇਤੀਤਿ ਅਤ੍ਥੋ. ਸਤ੍ਥਵਾਹੋ ਚ ਸੋ ਅਗ੍ਗੋ ਸੇਟ੍ਠੋ ਪਧਾਨੋ ਚਾਤਿ ਸਤ੍ਥਵਾਹਗ੍ਗੋ, ਤਂ ਸਤ੍ਥਵਾਹਗ੍ਗਂ ਵਿਪਸ੍ਸਿਂ ਸਮ੍ਬੁਦ੍ਧਨ੍ਤਿ ਸਮ੍ਬਨ੍ਧੋ. ਨਰਵਰਂ ਵਿਨਾਯਕਨ੍ਤਿ ਨਰਾਨਂ ਅਨ੍ਤਰੇ ਅਸਿਥਿਲਪਰਕ੍ਕਮੋਤਿ ਨਰਵੀਰੋ, ਤਂ. ਵਿਸੇਸੇਨ ਕਤਪੁਞ੍ਞਸਮ੍ਭਾਰੇ ਸਤ੍ਤੇ ਨੇਤਿ ਨਿਬ੍ਬਾਨਪੁਰਂ ਪਾਪੇਤੀਤਿ ਵਿਨਾਯਕੋ, ਤਂ.
੧੮੧. ਅਦਨ੍ਤਦਮਨਂ ਤਾਦਿਨ੍ਤਿ ਰਾਗਦੋਸਮੋਹਾਦਿਕਿਲੇਸਸਮ੍ਪਯੁਤ੍ਤਤ੍ਤਾ ਕਾਯਵਚੀਮਨੋਦ੍ਵਾਰੇਹਿ ਅਦਨ੍ਤੇ ਸਤ੍ਤੇ ਦਮੇਤੀਤਿ ਅਦਨ੍ਤਦਮਨੋ, ਤਂ. ਇਟ੍ਠਾਨਿਟ੍ਠੇਸੁ ਅਕਮ੍ਪਿਯਤਾਦਿਗੁਣਯੁਤ੍ਤੋਤਿ ਤਾਦੀ, ਤਂ. ਮਹਾਵਾਦਿਂ ਮਹਾਮਤਿਨ੍ਤਿ ਸਕਸਮਯਪਰਸਮਯਵਾਦੀਨਂ ਅਨ੍ਤਰੇ ਅਤ੍ਤਨਾ ਸਮਧਿਕਪੁਗ੍ਗਲਵਿਰਹਿਤਤ੍ਤਾ ਮਹਾਵਾਦੀ, ਮਹਤੀ ਪਥਵਿਸਮਾਨਾ ਮੇਰੁਸਮਾਨਾ ਚ ਮਤਿ ਯਸ੍ਸ ਸੋ ਮਹਾਮਤਿ, ਤਂ ਮਹਾਵਾਦਿਂ ਮਹਾਮਤਿਂ ਸਮ੍ਬੁਦ੍ਧਨ੍ਤਿ ਇਮਿਨਾ ਤੁਲ੍ਯਾਧਿਕਰਣਂ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.
ਏਕਞ੍ਜਲਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੧੦. ਖੋਮਦਾਯਕਤ੍ਥੇਰਅਪਦਾਨਵਣ੍ਣਨਾ
ਨਗਰੇ ਬਨ੍ਧੁਮਤਿਯਾਤਿਆਦਿਕਂ ਆਯਸ੍ਮਤੋ ਖੋਮਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਯਪ੍ਪਤ੍ਤੋ ਸਾਸਨੇ ਅਭਿਪ੍ਪਸਨ੍ਨੋ ਰਤਨਤ੍ਤਯਮਾਮਕੋ ਵਿਪਸ੍ਸਿਸ੍ਸ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸੋ ਖੋਮਦੁਸ੍ਸੇਨ ਪੂਜਂ ਅਕਾਸਿ. ਸੋ ਤਦੇਵ ਮੂਲਂ ਕਤ੍ਵਾ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਦੇਵਲੋਕੇ ਨਿਬ੍ਬਤ੍ਤੋ. ਛਸੁ ਦੇਵੇਸੁ ਅਪਰਾਪਰਂ ਦਿਬ੍ਬਸੁਖਂ ਅਨੁਭਵਿਤ੍ਵਾ ਤਤੋ ਚਵਿਤ੍ਵਾ ਮਨੁਸ੍ਸਲੋਕੇ ਚਕ੍ਕਵਤ੍ਤਿਆਦਿਅਨੇਕਵਿਧਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਪਰਿਪਾਕਗਤੇ ਪੁਞ੍ਞਸਮ੍ਭਾਰੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਯਪ੍ਪਤ੍ਤੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਕਤਪੁਞ੍ਞਨਾਮੇਨ ਖੋਮਦਾਯਕਤ੍ਥੇਰੋਤਿ ਪਾਕਟੋ.
੧੮੪. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਦਸ੍ਸੇਨ੍ਤੋ ਨਗਰੇ ਬਨ੍ਧੁਮਤਿਯਾਤਿਆਦਿਮਾਹ. ਤਤ੍ਥ ਬਨ੍ਧੁ ਵੁਚ੍ਚਤਿ ਞਾਤਕੋ, ਤੇ ਬਨ੍ਧੂ ਯਸ੍ਮਿਂ ਨਗਰੇ ਅਞ੍ਞਮਞ੍ਞਂ ਸਙ੍ਘਟਿਤਾ ਵਸਨ੍ਤਿ, ਤਂ ਨਗਰਂ ‘‘ਬਨ੍ਧੁਮਤੀ’’ਤਿ ਵੁਚ੍ਚਤਿ. ਰੋਪੇਮਿ ਬੀਜਸਮ੍ਪਦਨ੍ਤਿ ਦਾਨਸੀਲਾਦਿਪੁਞ੍ਞਬੀਜਸਮ੍ਪਤ੍ਤਿਂ ਰੋਪੇਮਿ ਪਟ੍ਠਪੇਮੀਤਿ ਅਤ੍ਥੋ.
ਖੋਮਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
ਤਤਿਯਸ੍ਸ ਸੁਭੂਤਿਵਗ੍ਗਸ੍ਸ ਵਣ੍ਣਨਾ ਸਮਤ੍ਤਾ.
ਚਤੁਭਾਣਵਾਰਵਣ੍ਣਨਾ ਨਿਟ੍ਠਿਤਾ.