੧-੧੦. ਪਣ੍ਣਦਾਯਕਤ੍ਥੇਰਅਪਦਾਨਾਦਿਵਣ੍ਣਨਾ

੧-੨. ਏਕੂਨਤਿਂਸਤਿਮੇ ਵਗ੍ਗੇ ਪਠਮਾਪਦਾਨੇ ਪਣ੍ਣਭੋਜਨਭੋਜਨੋਤਿ ਖੀਰਪਣ੍ਣਾਦਿਭੋਜਨਸ੍ਸ ਭੁਞ੍ਜਨਤ੍ਥਾਯ ਪਣ੍ਣਸਾਲਾਯ ਨਿਸਿਨ੍ਨੋ ਅਮ੍ਹਿ ਭਵਾਮੀਤਿ ਅਤ੍ਥੋ. ਉਪਵਿਟ੍ਠਞ੍ਚ ਮਂ ਸਨ੍ਤਨ੍ਤਿ ਪਣ੍ਣਸਾਲਾਯਂ ਉਪਵਿਟ੍ਠਂ ਸਨ੍ਤਂ ਵਿਜ੍ਜਮਾਨਂ ਮਂ. ਉਪਾਗਚ੍ਛਿ ਮਹਾਇਸੀਤਿ ਮਹਨ੍ਤੇ ਸੀਲਾਦਿਖਨ੍ਧੇ ਏਸਨਤੋ ਮਹਾਇਸਿ. ਲੋਕਪਜ੍ਜੋਤੋ ਲੋਕਪਦੀਪੋ ਸਿਦ੍ਧਤ੍ਥੋ ਭਗਵਾ ਉਪਗਚ੍ਛਿ, ਮਮ ਸਮੀਪਂ ਅਗਮਾਸੀਤਿ ਅਤ੍ਥੋ. ਨਿਸਿਨ੍ਨਸ੍ਸ ਪਣ੍ਣਸਨ੍ਥਰੇਤਿ ਉਪਗਨ੍ਤ੍ਵਾ ਪਣ੍ਣਸਨ੍ਥਰੇ ਨਿਸਿਨ੍ਨਸ੍ਸ ਖਾਦਨਤ੍ਥਾਯ ਸੇਦਿਤਂ ਪਣ੍ਣਂ ਮਯਾ ਦਿਨ੍ਨਨ੍ਤਿ ਸਮ੍ਬਨ੍ਧੋ.

੫-੭. ਦੁਤਿਯਾਪਦਾਨੇ ਸਿਨੇਰੁਸਮਸਨ੍ਤੋਸੋ ਧਰਣੀਸਮਸਾਦਿਸੋ ਸਿਦ੍ਧਤ੍ਥੋ ਭਗਵਾਤਿ ਸਮ੍ਬਨ੍ਧੋ. ਵੁਟ੍ਠਹਿਤ੍ਵਾ ਸਮਾਧਿਮ੍ਹਾਤਿ ਨਿਰੋਧਸਮਾਪਤ੍ਤਿਤੋ ਵੁਟ੍ਠਹਿਤ੍ਵਾ ਵਿਸੁਂ ਹੁਤ੍ਵਾਤਿ ਅਤ੍ਥੋ. ਭਿਕ੍ਖਾਯ ਮਮੁਪਟ੍ਠਿਤੋਤਿ ਭਿਕ੍ਖਾਚਾਰਵੇਲਾਯ ‘‘ਅਜ੍ਜ ਮਮ ਯੋ ਕੋਚਿ ਕਿਞ੍ਚਿ ਦਾਨਂ ਦਦਾਤਿ, ਤਸ੍ਸ ਮਹਪ੍ਫਲ’’ਨ੍ਤਿ ਚਿਨ੍ਤੇਤ੍ਵਾ ਨਿਸਿਨ੍ਨਸ੍ਸ ਮਮ ਸਨ੍ਤਿਕਂ ਸਮੀਪਂ ਉਪਟ੍ਠਿਤੋ ਸਮੀਪਮਾਗਤੋਤਿ ਅਤ੍ਥੋ. ਹਰੀਤਕਂ…ਪੇ… ਫਾਰੁਸਕਫਲਾਨਿ ਚਾਤਿ ਏਵਂ ਸਬ੍ਬਂ ਤਂ ਫਲਂ ਸਬ੍ਬਲੋਕਾਨੁਕਮ੍ਪਿਨੋ ਤਸ੍ਸ ਸਿਦ੍ਧਤ੍ਥਸ੍ਸ ਮਹੇਸਿਸ੍ਸ ਮਯਾ ਵਿਪ੍ਪਸਨ੍ਨੇਨ ਚੇਤਸਾ ਦਿਨ੍ਨਨ੍ਤਿ ਅਤ੍ਥੋ.

੧੧-੧੨. ਤਤਿਯਾਪਦਾਨੇ ਸੀਹਂ ਯਥਾ ਵਨਚਰਨ੍ਤਿ ਵਨੇ ਚਰਮਾਨਂ ਸੀਹਰਾਜਂ ਇਵ ਚਰਮਾਨਂ ਸਿਦ੍ਧਤ੍ਥਂ ਭਗਵਨ੍ਤਨ੍ਤਿ ਸਮ੍ਬਨ੍ਧੋ. ਨਿਸਭਾਜਾਨਿਯਂ ਯਥਾਤਿ ਵਸਭੋ, ਨਿਸਭੋ, ਵਿਸਭੋ, ਆਸਭੋਤਿ ਚਤ੍ਤਾਰੋ ਗਵਜੇਟ੍ਠਕਾ. ਤੇਸੁ ਗਵਸਤਸ੍ਸ ਜੇਟ੍ਠਕੋ ਵਸਭੋ, ਗਵਸਹਸ੍ਸਸ੍ਸ ਜੇਟ੍ਠਕੋ ਨਿਸਭੋ, ਗਵਸਤਸਹਸ੍ਸਸ੍ਸ ਜੇਟ੍ਠਕੋ ਵਿਸਭੋ, ਗਵਕੋਟਿਸਤਸਹਸ੍ਸਸ੍ਸ ਜੇਟ੍ਠਕੋ ਆਸਭੋ. ਇਧ ਪਨ ਆਸਭੋ ‘‘ਨਿਸਭੋ’’ਤਿ ਵੁਤ੍ਤੋ, ਆਜਾਨੀਯਂ ਅਭੀਤਂ ਨਿਚ੍ਚਲਂ ਉਸਭਰਾਜਂ ਇਵਾਤਿ ਅਤ੍ਥੋ. ਕਕੁਧਂ ਵਿਲਸਨ੍ਤਂਵਾਤਿ ਪੁਪ੍ਫਪਲ੍ਲਵੇਹਿ ਸੋਭਮਾਨਂ ਕਕੁਧਰੁਕ੍ਖਂ ਇਵ ਨਰਾਸਭਂ ਨਰਾਨਂ ਆਸਭਂ ਉਤ੍ਤਮਂ ਆਗਚ੍ਛਨ੍ਤਂ ਸਿਦ੍ਧਤ੍ਥਂ ਭਗਵਨ੍ਤਂ ਦਿਸ੍ਵਾ ਸਦ੍ਧਾਯ ਸਮ੍ਪਯੁਤ੍ਤਤ੍ਤਾ ਵਿਪ੍ਪਸਨ੍ਨੇਨ ਚੇਤਸਾ ਪਚ੍ਚੁਗ੍ਗਮਨਂ ਅਕਾਸਿਨ੍ਤਿ ਅਤ੍ਥੋ.

ਚਤੁਤ੍ਥਾਪਦਾਨਾਦੀਨਿ ਦਸਮਾਵਸਾਨਾਨਿ ਸੁਵਿਞ੍ਞੇਯ੍ਯਾਨੇਵਾਤਿ.

ਏਕੂਨਤਿਂਸਤਿਮਵਗ੍ਗਵਣ੍ਣਨਾ ਸਮਤ੍ਤਾ.