੧-੧੦. ਤਮਾਲਪੁਪ੍ਫਿਯਤ੍ਥੇਰਅਪਦਾਨਾਦਿਵਣ੍ਣਨਾ

ਵੀਸਤਿਮੇ ਵਗ੍ਗੇ ਪਠਮਤ੍ਥੇਰਾਪਦਾਨਂ ਉਤ੍ਤਾਨਮੇਵ.

੬. ਦੁਤਿਯਤ੍ਥੇਰਾਪਦਾਨੇ ਯਂ ਦਾਯਵਾਸਿਕੋ ਇਸੀਤਿ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਨੇ ਵਸਨਭਾਵੇਨ ਦਾਯਵਾਸਿਕੋ ਇਸੀਤਿ ਸਙ੍ਖਂ ਗਤੋ, ਅਤ੍ਤਨੋ ਅਨੁਕਮ੍ਪਾਯ ਤਂ ਵਨਂ ਉਪਗਤਸ੍ਸ ਸਿਦ੍ਧਤ੍ਥਸ੍ਸ ਸਤ੍ਥੁਨੋ ਵਸਨਮਣ੍ਡਪਚ੍ਛਾਦਨਤ੍ਥਾਯ ਯਂ ਤਿਣਂ, ਤਂ ਲਾਯਤਿ ਛਿਨ੍ਦਤੀਤਿ ਅਤ੍ਥੋ. ਦਬ੍ਬਛਦਨਂ ਕਤ੍ਵਾ ਅਨੇਕੇਹਿ ਖੁਦ੍ਦਕਦਣ੍ਡਕੇਹਿ ਮਣ੍ਡਪਂ ਕਤ੍ਵਾ ਤਂ ਤਿਣੇਨ ਛਾਦੇਤ੍ਵਾ ਸਿਦ੍ਧਤ੍ਥਸ੍ਸ ਭਗਵਤੋ ਅਹਂ ਅਦਾਸਿਂ ਪੂਜੇਸਿਨ੍ਤਿ ਅਤ੍ਥੋ.

੮. ਸਤ੍ਤਾਹਂ ਧਾਰਯੁਂ ਤਤ੍ਥਾਤਿ ਤਂ ਮਣ੍ਡਪਂ ਤਤ੍ਥ ਠਿਤਾ ਦੇਵਮਨੁਸ੍ਸਾ ਸਤ੍ਤਾਹਂ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨਸ੍ਸ ਸਤ੍ਥੁਨੋ ਧਾਰਯੁਂ ਧਾਰੇਸੁਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਤਤਿਯਤ੍ਥੇਰਸ੍ਸ ਅਪਦਾਨੇ ਖਣ੍ਡਫੁਲ੍ਲਿਯਤ੍ਥੇਰੋਤਿ ਏਤ੍ਥ ਖਣ੍ਡਨ੍ਤਿ ਕਟ੍ਠਾਨਂ ਜਿਣ੍ਣਤ੍ਤਾ ਛਿਨ੍ਨਭਿਨ੍ਨਟ੍ਠਾਨਂ, ਫੁਲ੍ਲਨ੍ਤਿ ਕਟ੍ਠਾਨਂ ਜਿਣ੍ਣਟ੍ਠਾਨੇ ਕਣ੍ਣਕਿਤਮਹਿਚ੍ਛਤ੍ਤਕਾਦਿਪੁਪ੍ਫਨਂ, ਖਣ੍ਡਞ੍ਚ ਫੁਲ੍ਲਞ੍ਚ ਖਣ੍ਡਫੁਲ੍ਲਾਨਿ, ਖਣ੍ਡਫੁਲ੍ਲਾਨਂ ਪਟਿਸਙ੍ਖਰਣਂ ਪੁਨਪ੍ਪੁਨਂ ਥਿਰਕਰਣਨ੍ਤਿ ਖਣ੍ਡਫੁਲ੍ਲਪਟਿਸਙ੍ਖਰਣਂ. ਇਮਸ੍ਸ ਪਨ ਥੇਰਸ੍ਸ ਸਮ੍ਭਾਰਪੂਰਣਕਾਲੇ ਫੁਸ੍ਸਸ੍ਸ ਭਗਵਤੋ ਚੇਤਿਯੇ ਛਿਨ੍ਨਭਿਨ੍ਨਟ੍ਠਾਨੇ ਸੁਧਾਪਿਣ੍ਡਂ ਮਕ੍ਖੇਤ੍ਵਾ ਥਿਰਕਰਣਂ ਖਣ੍ਡਫੁਲ੍ਲਪਟਿਸਙ੍ਖਰਣਂ ਨਾਮ. ਤਸ੍ਮਾ ਸੋ ਖਣ੍ਡਫੁਲ੍ਲਿਯੋ ਥੇਰੋਤਿ ਪਾਕਟੋ ਅਹੋਸਿ. ਤਤਿਯਂ.

੧੭. ਚਤੁਤ੍ਥਤ੍ਥੇਰਸ੍ਸਾਪਦਾਨੇ ਰਞ੍ਞੋ ਬਦ੍ਧਚਰੋ ਅਹਨ੍ਤਿ ਰਞ੍ਞੋ ਪਰਿਚਾਰਕੋ ਕਮ੍ਮਕਾਰਕੋ ਅਹੋਸਿਨ੍ਤਿ ਅਤ੍ਥੋ.

੧੯. ਜਲਜੁਤ੍ਤਮਨਾਮਿਨੋਤਿ ਜਲੇ ਉਦਕੇ ਜਾਤਂ ਜਲਜਂ, ਕਿਂ ਤਂ ਪਦੁਮਂ, ਪਦੁਮੇਨ ਸਮਾਨਨਾਮਤ੍ਤਾ ਪਦੁਮੁਤ੍ਤਰਸ੍ਸ ਭਗਵਤੋਤਿ ਅਤ੍ਥੋ. ਉਤ੍ਤਮਪਦੁਮਨਾਮਸ੍ਸ ਭਗਵਤੋਤਿ ਵਾ ਅਤ੍ਥੋ. ਚਤੁਤ੍ਥਂ.

ਪਞ੍ਚਮਂ ਉਤ੍ਤਾਨਤ੍ਥਮੇਵ.

੨੮. ਛਟ੍ਠੇ ਨਗਰੇ ਦ੍ਵਾਰਵਤਿਯਾਤਿ ਮਹਾਦ੍ਵਾਰਵਾਤਪਾਨਕਵਾਟਫਲਕਾਹਿ ਵਤਿਪਾਕਾਰਟ੍ਟਾਲਗੋਪੁਰਕਦ੍ਦਮੋਦਕਪਰਿਖਾਹਿ ਚ ਸਮ੍ਪਨ੍ਨਂ ਨਗਰਨ੍ਤਿ ਦ੍ਵਾਰਵਤੀਨਗਰਂ, ਦ੍ਵਾਰਂ ਵਤਿਞ੍ਚ ਪਧਾਨਂ ਕਤ੍ਵਾ ਨਗਰਸ੍ਸ ਉਪਲਕ੍ਖਿਤਤ੍ਤਾ ‘‘ਦ੍ਵਾਰਵਤੀ ਨਗਰ’’ਨ੍ਤਿ ਵੋਹਰਨ੍ਤੀਤਿ ਨਗਰੇ ਦ੍ਵਾਰਵਤਿਯਾਤਿ ਵੁਤ੍ਤਂ. ਮਾਲਾਵਚ੍ਛੋ ਪੁਪ੍ਫਾਰਾਮੋ ਮਮ ਅਹੋਸੀਤਿ ਅਤ੍ਥੋ.

੩੧. ਤੇ ਕਿਸਲਯਾਤਿ ਤੇ ਅਸੋਕਪਲ੍ਲਵਾ. ਛਟ੍ਠਂ.

ਸਤ੍ਤਮਟ੍ਠਮਨਵਮਾਨਿ ਉਤ੍ਤਾਨਤ੍ਥਾਨੇਵ. ਦਸਮੇਪਿ ਅਪੁਬ੍ਬਂ ਨਤ੍ਥੀਤਿ.

ਵੀਸਤਿਮਵਣ੍ਣਨਾ ਸਮਤ੍ਤਾ.