੯. ਸੋਪਾਕਤ੍ਥੇਰਅਪਦਾਨਵਣ੍ਣਨਾ

ਪਬ੍ਭਾਰਂ ਸੋਧਯਨ੍ਤਸ੍ਸਾਤਿਆਦਿਕਂ ਆਯਸ੍ਮਤੋ ਸੋਪਾਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਅਞ੍ਞਤਰਸ੍ਸ ਕੁਟੁਮ੍ਬਿਕਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਏਕਦਿਵਸਂ ਸਤ੍ਥਾਰਂ ਦਿਸ੍ਵਾ ਬੀਜਪੂਰਫਲਾਨਿ ਸਤ੍ਥੁ ਉਪਨੇਸਿ, ਪਰਿਭੁਞ੍ਜਿ ਭਗਵਾ ਤਸ੍ਸਾਨੁਕਮ੍ਪਂ ਉਪਾਦਾਯ. ਸੋ ਭਿਕ੍ਖੁ ਸਤ੍ਥਰਿ ਸਙ੍ਘੇ ਚ ਅਭਿਪ੍ਪਸਨ੍ਨੋ ਸਲਾਕਭਤ੍ਤਂ ਪਟ੍ਠਪੇਤ੍ਵਾ ਸਙ੍ਘੁਦ੍ਦੇਸਵਸੇਨ ਤਿਣ੍ਣਂ ਭਿਕ੍ਖੂਨਂ ਯਾਵਤਾਯੁਕਂ ਖੀਰਭਤ੍ਤਂ ਅਦਾਸਿ. ਸੋ ਤੇਹਿ ਪੁਞ੍ਞੇਹਿ ਅਪਰਾਪਰਂ ਦੇਵਮਨੁਸ੍ਸੇਸੁ ਸਮ੍ਪਤ੍ਤਿਯੋ ਅਨੁਭਵਨ੍ਤੋ ਏਕਦਾ ਮਨੁਸ੍ਸਯੋਨਿਯਂ ਨਿਬ੍ਬਤ੍ਤੋ ਏਕਸ੍ਸ ਪਚ੍ਚੇਕਬੁਦ੍ਧਸ੍ਸ ਖੀਰਭਤ੍ਤਂ ਅਦਾਸਿ.

ਏਵਂ ਤਤ੍ਥ ਤਤ੍ਥ ਪੁਞ੍ਞਾਨਿ ਕਤ੍ਵਾ ਸੁਗਤੀਸੁਯੇਵ ਪਰਿਬ੍ਭਮਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਪੁਰਿਮਕਮ੍ਮਨਿਸ੍ਸਨ੍ਦੇਨ ਸਾਵਤ੍ਥਿਯਂ ਅਞ੍ਞਤਰਾਯ ਦੁਗ੍ਗਤਿਤ੍ਥਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਸਾ ਤਂ ਦਸਮਾਸੇ ਕੁਚ੍ਛਿਨਾ ਪਰਿਹਰਿਤ੍ਵਾ ਪਰਿਪਕ੍ਕੇ ਗਬ੍ਭੇ ਵਿਜਾਯਨਕਾਲੇ ਵਿਜਾਯਿਤੁਂ ਅਸਕ੍ਕੋਨ੍ਤੀ ਮੁਚ੍ਛਂ ਆਪਜ੍ਜਿਤ੍ਵਾ ਬਹੁਵੇਲਂ ਮਤਾ ਵਿਯ ਨਿਪਜ੍ਜਿ. ਞਾਤਕਾ ‘‘ਮਤਾ’’ਤਿ ਸਞ੍ਞਾਯ ਸੁਸਾਨਂ ਨੇਤ੍ਵਾ ਚਿਤਕਂ ਆਰੋਪੇਤ੍ਵਾ ਦੇਵਤਾਨੁਭਾਵੇਨ ਵਾਤਵੁਟ੍ਠਿਯਾ ਉਟ੍ਠਿਤਾਯ ਅਗ੍ਗਿਂ ਅਦਤ੍ਵਾ ਪਕ੍ਕਮਿਂਸੁ. ਦਾਰਕੋ ਪਚ੍ਛਿਮਭਵਿਕਤ੍ਤਾ ਦੇਵਤਾਨੁਭਾਵੇਨੇਵ ਅਰੋਗੋ ਹੁਤ੍ਵਾ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਮਾਤਾ ਪਨ ਕਾਲਮਕਾਸਿ. ਦੇਵਤਾ ਮਨੁਸ੍ਸਰੂਪੇਨੁਪਗਮ੍ਮ ਤਂ ਗਹੇਤ੍ਵਾ ਸੁਸਾਨਗੋਪਕਸ੍ਸ ਗੇਹੇ ਠਪੇਤ੍ਵਾ ਕਤਿਪਾਹਂ ਕਾਲਂ ਪਤਿਰੂਪੇਨ ਆਹਾਰੇਨ ਪੋਸੇਸਿ. ਤਤੋ ਪਰਂ ਸੁਸਾਨਗੋਪਕੋ ਅਤ੍ਤਨੋ ਪੁਤ੍ਤਂ ਕਤ੍ਵਾ ਵਡ੍ਢੇਸਿ. ਸੋ ਤਥਾ ਵਡ੍ਢੇਨ੍ਤੋ ਤਸ੍ਸ ਪੁਤ੍ਤੇਨ ਸੁਪ੍ਪਿਯੇਨ ਨਾਮ ਦਾਰਕੇਨ ਸਦ੍ਧਿਂ ਕੀਲ਼ਨ੍ਤੋ ਵਿਚਰਿ. ਤਸ੍ਸ ਸੁਸਾਨੇ ਜਾਤਸਂਵਡ੍ਢਭਾਵਤੋ ਸੋਪਾਕੋਤਿ ਸਮਞ੍ਞਾ ਅਹੋਸਿ.

ਅਥੇਕਦਿਵਸਂ ਸਤ੍ਤਵਸ੍ਸਿਕਂ ਤਂ ਭਗਵਾ ਪਚ੍ਚੂਸਵੇਲਾਯਂ ਞਾਣਜਾਲਂ ਪਤ੍ਥਰਿਤ੍ਵਾ ਵੇਨੇਯ੍ਯਬਨ੍ਧਵੇ ਓਲੋਕੇਨ੍ਤੋ ਞਾਣਜਾਲਸ੍ਸ ਅਨ੍ਤੋਗਤਂ ਦਿਸ੍ਵਾ ਸੁਸਾਨਟ੍ਠਾਨਂ ਅਗਮਾਸਿ. ਦਾਰਕੋ ਪੁਬ੍ਬਹੇਤੁਨਾ ਚੋਦਿਯਮਾਨੋ ਪਸਨ੍ਨਮਾਨਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਸਤ੍ਥਾ ਤਸ੍ਸ ਧਮ੍ਮਂ ਕਥੇਸਿ. ਸੋ ਧਮ੍ਮਂ ਸੁਤ੍ਵਾ ਪਬ੍ਬਜ੍ਜਂ ਯਾਚਿਤ੍ਵਾ ਪਿਤਰਾ ‘‘ਅਨੁਞ੍ਞਾਤੋਸੀ’’ਤਿ ਵੁਤ੍ਤੋ ਪਿਤਰਂ ਸਤ੍ਥੁ ਸਨ੍ਤਿਕਂ ਆਨੇਸਿ. ਤਸ੍ਸ ਪਿਤਾ ਸਤ੍ਥਾਰਂ ਵਨ੍ਦਿਤ੍ਵਾ ‘‘ਇਮਂ ਦਾਰਕਂ ਪਬ੍ਬਾਜੇਥ, ਭਨ੍ਤੇ’’ਤਿ ਅਨੁਜਾਨਿ, ਤਂ ਪਬ੍ਬਾਜੇਤ੍ਵਾ ਭਗਵਾ ਮੇਤ੍ਤਾਭਾਵਨਾਯ ਨਿਯੋਜੇਸਿ. ਸੋ ਮੇਤ੍ਤਾਕਮ੍ਮਟ੍ਠਾਨਂ ਗਹੇਤ੍ਵਾ ਸੁਸਾਨੇ ਵਿਹਰਨ੍ਤੋ ਨਚਿਰਸ੍ਸੇਵ ਮੇਤ੍ਤਾਝਾਨਂ ਪਾਦਕਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਸਚ੍ਛਾਕਾਸਿ. ਅਰਹਾ ਹੁਤ੍ਵਾਪਿ ਅਞ੍ਞੇਸਂ ਸੋਸਾਨਿਕਭਿਕ੍ਖੂਨਂ ਮੇਤ੍ਤਾਭਾਵਨਾਵਿਧਿਂ ਦਸ੍ਸੇਨ੍ਤੋ ‘‘ਯਥਾਪਿ ਏਕਪੁਤ੍ਤਸ੍ਮਿ’’ਨ੍ਤਿ (ਥੇਰਗਾ. ੩੩) ਗਾਥਂ ਅਭਾਸਿ. ਇਦਂ ਵੁਤ੍ਤਂ ਹੋਤਿ – ਯਥਾ ਏਕਪੁਤ੍ਤਕੇ ਪਿਯੇ ਮਨਾਪੇ ਮਾਤਾ ਪਿਤਾ ਚ ਕੁਸਲੀ ਏਕਨ੍ਤਹਿਤੇਸੀ ਭਵੇਯ੍ਯ, ਏਵਂ ਪੁਰਤ੍ਥਿਮਾਦਿਭੇਦਾਸੁ ਸਬ੍ਬਾਸੁ ਦਿਸਾਸੁ ਕਾਮਭਵਾਦਿਭੇਦੇਸੁ ਵਾ ਸਬ੍ਬੇਸੁ ਭਵੇਸੁ ਦਹਰਾਦਿਭੇਦਾਸੁ ਸਬ੍ਬਾਸੁ ਅਵਤ੍ਥਾਸੁਪਿ ਠਿਤੇਸੁ ਸਬ੍ਬੇਸੁ ਸਤ੍ਤੇਸੁ ਏਕਨ੍ਤਹਿਤੇਸਿਤਾਯ ਕੁਸਲੀ ਭਵੇਯ੍ਯ ‘‘ਮਿਤ੍ਤੋ, ਉਦਾਸਿਨੋ, ਪਚ੍ਚਤ੍ਥਿਕੋ’’ਤਿ ਸੀਮਂ ਅਕਤ੍ਵਾ ਸੀਮਾਯ ਸਮ੍ਭੇਦਵਸੇਨ ਸਬ੍ਬਤ੍ਥ ਏਕਰਸਂ ਮੇਤ੍ਤਂ ਭਾਵੇਯ੍ਯਾਤਿ ਇਮਂ ਪਨ ਗਾਥਂ ਵਤ੍ਵਾ ‘‘ਸਚੇ ਤੁਮ੍ਹੇ ਆਯਸ੍ਮਨ੍ਤੋ ਏਵਂ ਮੇਤ੍ਤਂ ਭਾਵੇਯ੍ਯਾਥ, ਯੇ ਤੇ ਭਗਵਤਾ ‘ਸੁਖਂ ਸੁਪਤੀ’ਤਿਆਦਿਨਾ (ਅ. ਨਿ. ੧੧.੧੫; ਪਰਿ. ੩੩੧; ਮਿ. ਪ. ੪.੪.੬) ਏਕਾਦਸ ਮੇਤ੍ਤਾਨਿਸਂਸਾ ਚ ਵੁਤ੍ਤਾ, ਏਕਂਸੇਨ ਤੇਸਂ ਭਾਗਿਨੋ ਭਵਥਾ’’ਤਿ ਓਵਾਦਂ ਅਦਾਸਿ.

੧੧੨. ਏਵਂ ਸੋ ਪਤ੍ਤਫਲਾਧਿਗਮੋ ਅਤ੍ਤਨੋ ਕਤਪੁਞ੍ਞਂ ਪਚ੍ਚਵੇਕ੍ਖਿਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਦਸ੍ਸੇਨ੍ਤੋ ਪਬ੍ਭਾਰਂ ਸੋਧਯਨ੍ਤਸ੍ਸਾਤਿਆਦਿਮਾਹ. ਤਤ੍ਥ ਪਬ੍ਭਾਰਨ੍ਤਿ ਸਿਲਾਪਬ੍ਬਤਸ੍ਸ ਵਿਵੇਕਟ੍ਠਾਨਂ, ਤਂ ਪਬ੍ਬਜਿਤਾਨੁਰੂਪਤ੍ਤਾ ਇਟ੍ਠਕਪਾਕਾਰਂ ਕਤ੍ਵਾ ਦ੍ਵਾਰਕਵਾਟਂ ਯੋਜੇਤ੍ਵਾ ਭਿਕ੍ਖੂਨਂ ਵਸਨਤ੍ਥਾਯ ਅਦਾਸਿ, ਪਕਾਰੇਨ ਭਰੋ ਪਤ੍ਥੇਤਬ੍ਬੋਤਿ ਪਬ੍ਭਾਰੋ, ਤਂ ਸੋਧਯਨ੍ਤਸ੍ਸ ਮਮ ਸਨ੍ਤਿਕਂ ਸਿਦ੍ਧਤ੍ਥੋ ਨਾਮ ਭਗਵਾ ਆਗਚ੍ਛਿ ਪਾਪੁਣਿ.

੧੧੩. ਬੁਦ੍ਧਂ ਉਪਗਤਂ ਦਿਸ੍ਵਾਤਿ ਏਵਂ ਮਮ ਸਨ੍ਤਿਕਂ ਆਗਤਂ ਦਿਸ੍ਵਾ ਤਾਦਿਨੋ ਇਟ੍ਠਾਨਿਟ੍ਠੇਸੁ ਅਕਮ੍ਪਿਯਸਭਾਵਤ੍ਤਾ ਤਾਦਿਗੁਣਯੁਤ੍ਤਸ੍ਸ ਲੋਕਜੇਟ੍ਠਸ੍ਸ ਬੁਦ੍ਧਸ੍ਸ ਸਨ੍ਥਰਂ ਤਿਣਪਣ੍ਣਾਦਿਸਨ੍ਥਰਂ ਕਟ੍ਠਤ੍ਥਰਂ ਪਞ੍ਞਾਪੇਤ੍ਵਾ ਨਿਟ੍ਠਾਪੇਤ੍ਵਾ ਪੁਪ੍ਫਾਸਨਂ ਪੁਪ੍ਫਮਯਂ ਆਸਨਂ ਅਹਂ ਅਦਾਸਿਂ.

੧੧੪. ਪੁਪ੍ਫਾਸਨੇ ਨਿਸੀਦਿਤ੍ਵਾਤਿ ਤਸ੍ਮਿਂ ਪਞ੍ਞਤ੍ਤੇ ਪੁਪ੍ਫਾਸਨੇ ਨਿਸੀਦਿਤ੍ਵਾ ਲੋਕਨਾਯਕੋ ਸਿਦ੍ਧਤ੍ਥੋ ਭਗਵਾ. ਮਮਞ੍ਚ ਗਤਿਮਞ੍ਞਾਯਾਤਿ ਮਯ੍ਹਂ ਗਤਿਂ ਆਯਤਿਂ ਉਪ੍ਪਤ੍ਤਿਟ੍ਠਾਨਂ ਅਞ੍ਞਾਯ ਜਾਨਿਤ੍ਵਾ ਅਨਿਚ੍ਚਤਂ ਅਨਿਚ੍ਚਭਾਵਂ ਉਦਾਹਰਿ ਕਥੇਸਿ.

੧੧੫. ਅਨਿਚ੍ਚਾ ਵਤ ਸਙ੍ਖਾਰਾਤਿ ਵਤ ਏਕਨ੍ਤੇਨ ਸਙ੍ਖਾਰਾ ਪਚ੍ਚਯੇਹਿ ਸਮੇਚ੍ਚ ਸਮਾਗਨ੍ਤ੍ਵਾ ਕਰੀਯਮਾਨਾ ਸਬ੍ਬੇ ਸਪ੍ਪਚ੍ਚਯਧਮ੍ਮਾ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾ. ਉਪ੍ਪਾਦਵਯਧਮ੍ਮਿਨੋਤਿ ਉਪ੍ਪਜ੍ਜਿਤ੍ਵਾ ਵਿਨਸ੍ਸਨਸਭਾਵਾ ਉਪ੍ਪਜ੍ਜਿਤ੍ਵਾ ਪਾਤੁਭਵਿਤ੍ਵਾ ਏਤੇ ਸਙ੍ਖਾਰਾ ਨਿਰੁਜ੍ਝਨ੍ਤਿ ਵਿਨਸ੍ਸਨ੍ਤੀਤਿ ਅਤ੍ਥੋ. ਤੇਸਂ ਵੂਪਸਮੋ ਸੁਖੋਤਿ ਤੇਸਂ ਸਙ੍ਖਾਰਾਨਂ ਵਿਸੇਸੇਨ ਉਪਸਮੋ ਸੁਖੋ, ਤੇਸਂ ਵੂਪਸਮਕਰਂ ਨਿਬ੍ਬਾਨਮੇਵ ਏਕਨ੍ਤਸੁਖਨ੍ਤਿ ਅਤ੍ਥੋ.

੧੧੬. ਇਦਂ ਵਤ੍ਵਾਨ ਸਬ੍ਬਞ੍ਞੂਤਿ ਸਬ੍ਬਧਮ੍ਮਜਾਨਨਕੋ ਭਗਵਾ ਲੋਕਾਨਂ ਜੇਟ੍ਠੋ ਵੁਡ੍ਢੋ ਨਰਾਨਂ ਆਸਭੋ ਪਧਾਨੋ ਵੀਰੋ ਇਦਂ ਅਨਿਚ੍ਚਪਟਿਸਂਯੁਤ੍ਤਂ ਧਮ੍ਮਦੇਸਨਂ ਵਤ੍ਵਾਨ ਕਥੇਤ੍ਵਾ ਅਮ੍ਬਰੇ ਆਕਾਸੇ ਹਂਸਰਾਜਾ ਇਵ ਨਭਂ ਆਕਾਸਂ ਅਬ੍ਭੁਗ੍ਗਮੀਤਿ ਸਮ੍ਬਨ੍ਧੋ.

੧੧੭. ਸਕਂ ਦਿਟ੍ਠਿਂ ਅਤ੍ਤਨੋ ਲਦ੍ਧਿਂ ਖਨ੍ਤਿਂ ਰੁਚਿਂ ਅਜ੍ਝਾਸਯਂ ਜਹਿਤ੍ਵਾਨ ਪਹਾਯ. ਭਾਵਯਾਨਿਚ੍ਚਸਞ੍ਞਹਨ੍ਤਿ ਅਨਿਚ੍ਚੇ ਅਨਿਚ੍ਚਨ੍ਤਿ ਪਵਤ੍ਤਸਞ੍ਞਂ ਅਹਂ ਭਾਵਯਿਂ ਵਡ੍ਢੇਸਿਂ ਮਨਸਿ ਅਕਾਸਿਂ. ਤਤ੍ਥ ਕਾਲਂ ਕਤੋ ਅਹਨ੍ਤਿ ਤਤ੍ਥ ਤਿਸ੍ਸਂ ਜਾਤਿਯਂ ਤਤੋ ਜਾਤਿਤੋ ਅਹਂ ਕਾਲਂ ਕਤੋ ਮਤੋ.

੧੧੮. ਦ੍ਵੇ ਸਮ੍ਪਤ੍ਤੀ ਅਨੁਭੋਤ੍ਵਾਤਿ ਮਨੁਸ੍ਸਸਮ੍ਪਤ੍ਤਿਦਿਬ੍ਬਸਮ੍ਪਤ੍ਤਿਸਙ੍ਖਾਤਾ ਦ੍ਵੇ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ. ਸੁਕ੍ਕਮੂਲੇਨ ਚੋਦਿਤੋਤਿ ਪੁਰਾਣਕੁਸਲਮੂਲੇਨ, ਮੂਲਭੂਤੇਨ ਕੁਸਲੇਨ ਵਾ ਚੋਦਿਤੋ ਸਞ੍ਚੋਦਿਤੋ. ਪਚ੍ਛਿਮੇ ਭਵੇ ਸਮ੍ਪਤ੍ਤੇਤਿ ਪਰਿਯੋਸਾਨੇ ਭਵੇ ਸਮ੍ਪਤ੍ਤੇ ਪਾਪੁਣਿਤੇ. ਸਪਾਕਯੋਨੁਪਾਗਮਿਨ੍ਤਿ ਸਕਂ ਪਚਿਤਭਤ੍ਤਂ ਸਪਾਕਂ ਯੋਨਿਂ ਉਪਾਗਮਿਂ. ਯਸ੍ਸ ਕੁਲਸ੍ਸ ਅਤ੍ਤਨੋ ਪਚਿਤਭਤ੍ਤਂ ਅਞ੍ਞੇਹਿ ਅਭੁਞ੍ਜਨੀਯਂ, ਤਸ੍ਮਿਂ ਚਣ੍ਡਾਲਕੁਲੇ ਨਿਬ੍ਬਤ੍ਤੋਸ੍ਮੀਤਿ ਅਤ੍ਥੋ. ਅਥ ਵਾ ਸਾ ਵੁਚ੍ਚਤਿ ਸੁਨਖੋ, ਸੁਨਖੋਚ੍ਛਿਟ੍ਠਭਤ੍ਤਭੁਞ੍ਜਨਕਚਣ੍ਡਾਲਕੁਲੇ ਜਾਤੋਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਸੋਪਾਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.