੪. ਏਕਾਸਨਿਯਤ੍ਥੇਰਅਪਦਾਨਵਣ੍ਣਨਾ

ਵਰੁਣੋ ਨਾਮ ਨਾਮੇਨਾਤਿਆਦਿਕਂ ਆਯਸ੍ਮਤੋ ਏਕਾਸਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਵਰੁਣੋ ਨਾਮ ਦੇਵਰਾਜਾ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਗਨ੍ਧਮਾਲਾਦੀਹਿ ਗੀਤਵਾਦਿਤੇਹਿ ਚ ਉਪਟ੍ਠਯਮਾਨੋ ਸਪਰਿਵਾਰੋ ਪੂਜੇਸਿ. ਤਤੋ ਅਪਰਭਾਗੇ ਭਗਵਤਿ ਪਰਿਨਿਬ੍ਬੁਤੇ ਤਸ੍ਸ ਮਹਾਬੋਧਿਰੁਕ੍ਖਂ ਬੁਦ੍ਧਦਸ੍ਸਨਂ ਵਿਯ ਸਬ੍ਬਤੂਰਿਯਤਾਲ਼ਾਵਚਰੇਹਿ ਸਪਰਿਵਾਰੋ ਉਪਹਾਰਮਕਾਸਿ. ਸੋ ਤੇਨ ਪੁਞ੍ਞੇਨ ਤਤੋ ਕਾਲਙ੍ਕਤ੍ਵਾ ਨਿਮ੍ਮਾਨਰਤਿਦੇਵਲੋਕੇ ਉਪ੍ਪਜ੍ਜਿ. ਏਵਂ ਦੇਵਸਮ੍ਪਤ੍ਤਿਮਨੁਭਵਿਤ੍ਵਾ ਮਨੁਸ੍ਸੇਸੁ ਚ ਮਨੁਸ੍ਸਭੂਤੋ ਚਕ੍ਕਵਤ੍ਤਿਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਸਾਸਨੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੧. ਸੋ ਪਚ੍ਛਾ ਸਕਕਮ੍ਮਂ ਸਰਿਤ੍ਵਾ ਤਂ ਤਥਤੋ ਞਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਰੁਣੋ ਨਾਮ ਨਾਮੇਨਾਤਿਆਦਿਮਾਹ. ਤਤ੍ਥ ਯਦਾ ਅਹਂ ਸਮ੍ਬੋਧਨਤ੍ਥਾਯ ਬੁਦ੍ਧਂ ਬੋਧਿਞ੍ਚ ਪੂਜੇਸਿਂ, ਤਦਾ ਵਰੁਣੋ ਨਾਮ ਦੇਵਰਾਜਾ ਅਹੋਸਿਨ੍ਤਿ ਸਮ੍ਬਨ੍ਧੋ.

੩੪. ਧਰਣੀਰੁਹਪਾਦਪਨ੍ਤਿ ਏਤ੍ਥ ਰੁਕ੍ਖਲਤਾਪਬ੍ਬਤਸਤ੍ਥਰਤਨਾਦਯੋ ਧਾਰੇਤੀਤਿ ਧਰਣੀ, ਤਸ੍ਮਿਂ ਰੁਹਤਿ ਪਤਿਟ੍ਠਹਤੀਤਿ ਧਰਣੀਰੁਹੋ. ਪਾਦੇਨ ਪਿਵਤੀਤਿ ਪਾਦਪੋ, ਸਿਞ੍ਚਿਤਸਿਞ੍ਚਿਤੋਦਕਂ ਪਾਦੇਨ ਮੂਲੇਨ ਪਿਵਤਿ ਰੁਕ੍ਖਕ੍ਖਨ੍ਧਸਾਖਾਵਿਟਪੇਹਿ ਆਪੋਰਸਂ ਪਤ੍ਥਰਿਯਤੀਤਿ ਅਤ੍ਥੋ, ਤਂ ਧਰਣੀਰੁਹਪਾਦਪਂ ਬੋਧਿਰੁਕ੍ਖਨ੍ਤਿ ਸਮ੍ਬਨ੍ਧੋ.

੩੫. ਸਕਕਮ੍ਮਾਭਿਰਦ੍ਧੋਤਿ ਅਤ੍ਤਨੋ ਕੁਸਲਕਮ੍ਮੇਨ ਅਭਿਰਦ੍ਧੋ ਪਸਨ੍ਨੋ ਉਤ੍ਤਮੇ ਬੋਧਿਮ੍ਹਿ ਪਸਨ੍ਨੋਤਿ ਸਮ੍ਬਨ੍ਧੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਏਕਾਸਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.